ယံးရမံယၤ
၂၇ ဖဲစီၤယိၤၡံယၤ အဖိခွါ ယူဒၤအစီၤပၤယဟိၤယါကံၣ်* စးထီၣ်ပၢတၢ်သီသီအခါ ယဟိဝၤယွၤ တဲတၢ်ဒီး ဝံယံးရမံယၤလီၤ. ၂ ဝံယံးရမံယၤ တဲဝဲလၢ “ယဟိဝၤယွၤ တဲယၤလၢ ‘တ့ထီၣ် ပျံၤတဖၣ် ဒီးနီၣ်ယိးဘိတဖၣ်လၢ နနီၢ်ကစၢ်အဂီၢ် ဒီးပာ်ထီၣ်အီၤလၢ နကိာ်ဘိလိၤတက့ၢ်. ၃ ဝံၤဒီးဆှၢလီၤအီၤလၢ ကီၢ်အဒိၣ် အစီၤပၤ,+ ကီၢ်မိၤအး အစီၤပၤ,+ ပှၤဧၣ်မိၣ်ဖိ အစီၤပၤ,+ ဝ့ၢ်စိၢ်အစီၤပၤ+ ဒီးဝ့ၢ်စံဒိၣ် အစီၤပၤ+ အအိၣ်တက့ၢ်. ဒီးဆှၢလီၤအီၤခီဖျိ ပှၤစိာ်တၢ်ကစီၣ်ဖိလၢ အဟဲဟးလၢ ဝ့ၢ်ယရူၤၡလ့ၣ်လၢ ယူဒၤအစီၤပၤစံးဒကံယၤ အအိၣ်န့ၣ်တက့ၢ်. ၄ မၤလိာ်အဝဲသ့ၣ်လၢ ကတဲဘၣ်အစီၤပၤတဖၣ် ဒ်အံၤ,
“‘“တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ်အံၣ်စရ့လး အကစၢ်ယွၤန့ၣ် တဲဝဲလၢ သုဘၣ်တဲဘၣ် သုစီၤပၤတဖၣ်ဒ်အံၤ, ၅ ‘ယမ့ၢ်ပှၤလၢအတ့လီၤ ဟီၣ်ခိၣ်, ပှၤဟီၣ်ခိၣ်ဖိ ဒီးဆၣ်ဖိကီၢ်ဖိတဖၣ်လၢ ဟီၣ်ခိၣ်ချၢ ခီဖျိလၢယစိကမီၤ ဒီးယစုလၢ အယူာ်ဃီၤအသးလီၤ. ဒီးဟီၣ်ခိၣ်န့ၣ် ဖဲဒၣ်ပှၤလၢ ယအဲၣ်ဒိးဟ့ၣ်လီၤအီၤန့ၣ်* ယဟ့ၣ်လီၤအီၤလီၤ.+ ၆ ယဟ့ၣ်လီၤကွံာ် သုကီၢ်ခဲလၢာ်လၢ ယခ့ယပှၤ ဘၤဘူၤလိၣ်အစီၤပၤ နဘူၤကးန့စၢ်+ အစုပူၤလံ. ဆၣ်ဖိကီၢ်ဖိအမံၤ လၢပျီပူၤဒၣ်လဲာ် ယဟ့ၣ်လီၤအီၤ ဒ်သိးကမၤန့ၢ်တၢ် လၢအဂီၢ်လံ. ၇ ပှၤကလုာ်ခဲလၢာ် ကမၤန့ၢ်တၢ်လၢအဂီၢ်, အဖိခွါအဂီၢ် ဒီးအလံၤခွါအဂီၢ် တုၤလီၤလၢ တၢ်ဆၢကတီၢ်ဘၣ်လၢ အဘီမုၢ် ကလီၤပှီၢ်ဝဲလီၤ.+ ဖဲန့ၣ်အခါ ပှၤအါကလုာ် ဒီးစီၤပၤဖးဒိၣ်တဖၣ် ကဒုးကဲထီၣ်အီၤလၢ အဝဲသ့ၣ် အကုၢ်လီၤ.’+
၈ “‘“‘ပှၤကလုာ် တကလုာ်ဂ့ၤတကလုာ်ဂ့ၤ ဒီးဘီမုၢ်တဘ့ၣ်ဂ့ၤတဘ့ၣ်ဂ့ၤ မ့ၢ်တမၤန့ၢ်တၢ်လၢ ဘၤဘူၤလိၣ်အစီၤပၤ နဘူၤကးန့စၢ်အဂီၢ်ဘၣ် ဒီးမ့ၢ်တဒိးလီၤအကိာ်လၢ ဘၤဘူၤလိၣ်အစီၤပၤ အနီၣ်ယိးဘိ အဖီလာ်ဘၣ်န့ၣ် ယကသိၣ်ဃီၣ် ပှၤတကလုာ်န့ၣ်လၢ တၢ်ဒုးတၢ်ယၤ,+ တၢ်သၣ်ဝံၤလီၤဒိ ဒီးတၢ်ဆါသံသတြိာ် တုၤလၢ ယမၤဟးဂီၤ အဝဲသ့ၣ်ခီဖျိ စီၤနဘူၤကးန့စၢ် အစုပူၤလီၤ.’ ယဟိဝၤယွၤ တဲဝဲဒ်န့ၣ်လီၤ.
၉ “‘“‘အဃိ သုဝံတဖၣ်, ပှၤလၢအဖး တၢ်ကမၤအသးလၢ ခါဆူညါအဂ့ၢ်တဖၣ်, ပှၤလၢ အဖးတၢ်မံမီၢ်တဖၣ်, ပှၤအူတၢ်သမူတၢ်တဖၣ် ဒီးပှၤအူတၢ်လိၢ်တၢ်တဖၣ် လၢအတဲသုလၢ “သုတလိၣ်မၤန့ၢ်တၢ်လၢ ဘၤဘူၤလိၣ် အစီၤပၤအဂီၢ်ဘၣ်” န့ၣ်တဘၣ်ဒိကနၣ် အဝဲသ့ၣ်တဂ့ၤ. ၁၀ ဒ်သိးသုကဘၣ် ဟးယံၤကွံာ်ဒီး သုကီၢ်ဖးယံၤအဂီၢ် အဝဲသ့ၣ် တဲဘၣ်သု ဝံအတၢ်စံးပာ်လၢ အတမ့ၢ်တတီဘၣ်တဖၣ်လီၤ. အဃိ သုမ့ၢ်ဒိကနၣ် အဝဲသ့ၣ်အကလုၢ်န့ၣ် ယကမၤလီၤပြံလီၤပြါသု ဒီးသုကသံလီၤ.
၁၁ “‘“ယဟိဝၤယွၤ တဲဝဲလၢ ‘ပှၤကလုာ်လၢ အဒိးလီၤအကိာ်လၢ ဘၤဘူၤလိၣ်အစီၤပၤ အနီၣ်ယိးဘိ အဖီလာ် ဒီးမၤန့ၢ်တၢ်လၢအဂီၢ်န့ၣ် ယကပျဲလၢအဝဲသ့ၣ် ဆဲးအိၣ်ဘၣ်လၢ အကီၢ်ပူၤ, သူၣ်အီၣ်ဖျးအီၣ်တၢ် ဒီးအိၣ်ဝဲဆိးဝဲလၢအပူၤလီၤ.’”’”
၁၂ ဒီးယတဲဘၣ် ယူဒၤအစီၤပၤစံးဒကံယၤလၢ+ တၢ်ဂ့ၢ်တမံၤဃီ ဒီးယတဲလၢ “ဒိးလီၤသုကိာ်လၢ ဘၤဘူၤလိၣ် အစီၤပၤ အနီၣ်ယိးဘိ အဖီလာ် ဒီးမၤန့ၢ်တၢ်လၢအဂီၢ် ဒီးအပှၤဂီၢ်မုၢ်အဂီၢ် ဒီးသုကဆဲးအိၣ်မူဘၣ်လီၤ.+ ၁၃ နမ့ၢ်တမၤဒ်န့ၣ်ဘၣ်န့ၣ် နၤဒီးနပှၤဂီၢ်မုၢ် ကသံလၢတၢ်ဒုး,+ တၢ်သၣ်ဝံၤလီၤဒိ+ ဒီးတၢ်ဆါသံသတြိာ်+ ဒ်ယဟိဝၤယွၤ တဲဆိပာ်စၢၤဝဲ ဘၣ်ဃးဒီး ပှၤကလုာ် တကလုာ်ဂ့ၤ တကလုာ်ဂ့ၤလၢ အတမၤန့ၢ်တၢ်လၢ ဘၤဘူၤလိၣ်အစီၤပၤ အဂီၢ်ဘၣ်အသိးလီၤ. ၁၄ ဝံတဖၣ်လၢ အတဲဘၣ်သုလၢ ‘သုတလိၣ်မၤန့ၢ်တၢ်လၢ ဘၤဘူၤလိၣ် အစီၤပၤအဂီၢ်ဘၣ်’+ န့ၣ်တဘၣ်ဒိကနၣ် အဝဲသ့ၣ်တဂ့ၤ. အဝဲသ့ၣ် တဲဘၣ်သု ဝံအတၢ်စံးပာ်လၢ အတမ့ၢ်တတီဘၣ်တဖၣ်လီၤ.+
၁၅ “ယဟိဝၤယွၤ တဲဝဲလၢ ‘ယတဆှၢလီၤ အဝဲသ့ၣ်ဘၣ်. မ့ၢ်ဒၣ်အဝဲသ့ၣ် တဲလံၣ်တဲလီတၢ်လၢ ယမံၤပူၤ ဒီးသုမ့ၢ်ဒိကနၣ် အဝဲသ့ၣ်န့ၣ် ယကမၤလီၤပြံလီၤပြါသု ဒီးသုကသံဃုာ်ဒီး ဝံတဖၣ်လၢ အတဲသု ဝံအတၢ်စံးပာ်တဖၣ်အံၤလီၤ.’”+
၁၆ ယတဲဘၣ် ပှၤလုၢ်တၢ်ဒိၣ်တဖၣ် ဒီးပှၤဂီၢ်မုၢ်တဖၣ်အံၤလၢ “ယဟိဝၤယွၤ တဲဝဲဒ်အံၤ ‘သုဝံတဖၣ်လၢ အတဲဘၣ်သု ဝံအတၢ်စံးပာ်လၢ “ယဟိဝၤယွၤ အဟံၣ်အတၢ်ပီးတၢ်လီတဖၣ်လၢ အအိၣ်လၢ ဘၤဘူၤလိၣ်န့ၣ် တယံာ်လၢၤဘၣ် ကဘၣ်တၢ်ဟဲက့ၤစိာ်အီၤ”+ န့ၣ်တဘၣ်ဒိကနၣ် အဝဲသ့ၣ်တဂ့ၤ. အဝဲသ့ၣ် တဲဘၣ်သု ဝံအတၢ်စံးပာ်လၢ အတမ့ၢ်တတီဘၣ်တဖၣ်လီၤ.+ ၁၇ တဘၣ်ဒိကနၣ် အဝဲသ့ၣ်တဂ့ၤ. မၤန့ၢ်တၢ်လၢ ဘၤဘူၤလိၣ် အစီၤပၤအဂီၢ် ဒီးသုကဆဲးအိၣ်မူဘၣ်လီၤ.+ သုမ့ၢ်တမၤဘၣ်န့ၣ် ဝ့ၢ်တဖျၢၣ်အံၤ ကကဲထီၣ်တၢ်ဟးဂီၤလီၤ. ၁၈ အဝဲသ့ၣ် မ့မ့ၢ် ဝံတဖၣ် ဒီးအဝဲသ့ၣ်မ့ၢ်တဲ ယဟိဝၤယွၤ အတၢ်ကတိၤ နီၢ်ကီၢ်န့ၣ် ဝံသးစူၤ မၢအဝဲသ့ၣ် ဃ့ကညး တၢ်သုးမုၢ်ဂီၢ်မုၢ် အကစၢ် ယဟိဝၤယွၤလၢ တၢ်ပီးတၢ်လီတဖၣ် လၢအအိၣ်တ့ၢ်ဒံးလၢ ယဟိဝၤယွၤ အဟံၣ်ပူၤ, လၢယူဒၤအစီၤပၤ အဟံၣ်ပူၤ ဒီးလၢဝ့ၢ်ယရူၤၡလ့ၣ်အပူၤန့ၣ် အသုတဘၣ်တၢ်က့ၤစိာ်အီၤလၢ ကီၢ်ဘၤဘူၤလိၣ်တဂ့ၤန့ၣ်တက့ၢ်.’
၁၉ “တၢ်သုးမုၢ်ဂီၢ်မုၢ် အကစၢ် ယဟိဝၤယွၤ ကတဲဝဲဘၣ်ဃးဒီး တၢ်အထူၣ်တဖၣ်,+ ထံဒၢဖးဒိၣ်တဖျၢၣ်လၢ ပှၤကိးဝဲလၢ ပီၣ်လဲၣ်တိၢ်ဘီ,+ လ့ၣ်ဆီၣ်တဖၣ်+ ဒီးတၢ်ပီးတၢ်လီတဖၣ်လၢ အအိၣ်တ့ၢ်ဒံး လၢဝ့ၢ်တဖျၢၣ်အံၤအပူၤလီၤ. ၂၀ ဖဲဘၤဘူၤလိၣ်အစီၤပၤ နဘူၤကးန့စၢ် က့ၤဖီၣ်ဝဲ စီၤယဟိၤယါကံၣ် အဖိခွါ ယူဒၤအစီၤပၤ ယံးကၤနံယၤ လၢအအိၣ်လၢ ဝ့ၢ်ယရူၤၡလ့ၣ် ဆူကီၢ်ဘၤဘူၤလိၣ် ဃုာ်ဒီး ယူဒၤ ဒီးဝ့ၢ်ယရူၤၡလ့ၣ် အပှၤဒိၣ်ပှၤပှၢ်တဖၣ်အခါ အတက့ၤစိာ်ဃုာ်ဝဲ တၢ်ပီးတၢ်လီတဖၣ်န့ၣ်ဘၣ်.+ ၂၁ မ့ၢ်လံ, တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် ကတဲဝဲဘၣ်ဃးဒီး တၢ်ပီးတၢ်လီတဖၣ် လၢအအိၣ်တ့ၢ်ဒံးလၢ ယဟိဝၤယွၤ အဟံၣ်ပူၤ, လၢယူဒၤအစီၤပၤ အဟံၣ်ပူၤ ဒီးလၢဝ့ၢ်ယရူၤၡလ့ၣ်အပူၤန့ၣ် ဒ်အံၤလီၤ. ၂၂ ‘“ပှၤကက့ၤစိာ် တၢ်ပီးတၢ်လီတဖၣ်န့ၣ်လၢ ကီၢ်ဘၤဘူၤလိၣ်+ ဒီးကအိၣ်ဖဲန့ၣ် တုၤလၢ မုၢ်နံၤလၢ ယသ့ၣ်နီၣ် တၢ်ပီးတၢ်လီတဖၣ်န့ၣ်လီၤ. ဖဲန့ၣ်အခါ ယကဟဲက့ၤစိာ်ကဒါက့ၤအီၤ ဒီးပာ်ကဒါက့ၤအီၤလၢ တၢ်လီၢ်ဖဲအံၤလီၤ.” ယဟိဝၤယွၤ တဲဝဲဒ်န့ၣ်လီၤ.’”+