ယံးရမံယၤ
၃၅ ဖဲစီၤယိၤၡံယၤ အဖိခွါ လၢအမ့ၢ် ယူဒၤအစီၤပၤ ယဟိၤယါကံၣ်+ ပၢတၢ်အခါ ယဟိဝၤယွၤ တဲဘၣ်စီၤယံးရမံယၤလၢ ၂ “လဲၤတဲတၢ်ဒီး ပှၤရ့ကးဖိ အဒူၣ်ဖိထၢဖိတဖၣ်+ ဒီးဟဲက့ၤကိး အဝဲသ့ၣ်လၢ ယၤ, ယဟိဝၤယွၤအတၢ်လုၢ်ဟံၣ် လၢပှၤအီၣ်တၢ်အဒၢးတဖျၢၣ် အပူၤတက့ၢ်. ဝံၤဒီး ဟ့ၣ်လီၤအဝဲသ့ၣ် စပံးထံ လၢကအီဝဲအဂီၢ်တက့ၢ်.”
၃ အဃိ ယလဲၤကိး စီၤဃဘၤစံနယၤ အလံၤခွါ စီၤယၤစါနယၤ လၢအမ့ၢ် စီၤယံးရမံယၤ အဖိခွါ ဒီးအဒီပုၢ်ဝဲၢ်ခွါတဖၣ် ဒီးအဖိခွါခဲလၢာ် ဒီးပှၤရ့ကးဖိ အဒူၣ်ဖိထၢဖိခဲလၢာ်လၢ ၄ ယဟိဝၤယွၤ အတၢ်လုၢ်ဟံၣ်ပူၤလီၤ. ဒီးယလဲၤကိး အဝဲသ့ၣ်လၢ ယွၤလၢအမ့ၢ်အတီ အခ့အပှၤ စီၤဃၤနၣ် အဖိခွါတဖၣ် အီၣ်တၢ်အဒၢးလီၤ. စီၤဃၤနၣ်န့ၣ် မ့ၢ်ဝဲ စီၤယံးကဒးလယၤ အဖိခွါလီၤ. ပှၤအီၣ်တၢ်အဒၢးတဖျၢၣ်န့ၣ် အိၣ်လၢ ပဒိၣ်ဖးဒိၣ်တဖၣ် အီၣ်တၢ်အဒၢးအကပၤ လၢအအိၣ်ဝဲလၢ စီၤမၤစ့ယၤ အီၣ်တၢ်အဒၢးအဖီခိၣ်လီၤ. စီၤမၤစ့ယၤန့ၣ် မ့ၢ်ဝဲ ပှၤခိးတြဲၤဖိ စီၤၡၤလူၣ်အဖိခွါလီၤ. ၅ ဒီးယပာ်လီၤ ခွးဒီးစပံးထံအခွးတဖၣ်လၢ အပှဲၤဒီးစပံးထံလၢ ပှၤရ့ကးဖိ အပှၤပိာ်ခွါတဖၣ် အမဲာ်ညါ ဒီးတဲအဝဲသ့ၣ်လၢ “အီစပံးထံဟီ.”
၆ ဘၣ်ဆၣ် အဝဲသ့ၣ် တဲဝဲလၢ “ပတအီ စပံးထံဘၣ်. ပဖုဖးဒိၣ် စီၤရ့ကးအဖိခွါ စီၤယိၤနဒာ်+ မၤလိာ်ပှၤလၢ ပဝဲမ့ၢ်ဂ့ၤ, ပဖိခွါတဖၣ်မ့ၢ်ဂ့ၤ တဘၣ်အီ စပံးထံနီတဘျီဘၣ်. ၇ ဒီးပတဘၣ် တ့ထီၣ်ဟံၣ်, ဖှံလီၤတၢ်ချံ ဒီးအိၣ်ဒီး စပံးကျီးဒီးသူၣ်အီၤဘၣ်. ဒ်သိး ပကအိၣ်ဘၣ်လၢ ကီၢ်ပူၤ ဖဲပအိၣ် ဒ်ပှၤထံဂၤကီၢ်ဂၤဖိအသိး ဖးယံာ်အဂီၢ် ပကဘၣ်အိၣ်လၢ ဒဲပူၤထီဘိလီၤ. ၈ အဃိ ပဆဲးဒိကနၣ် တၢ်လၢ ပဖုဖးဒိၣ် စီၤရ့ကးအဖိခွါ စီၤယိၤနဒာ် မၤလိာ်ပှၤ ကိးမံၤဒဲးလီၤ. ပဝဲမ့ၢ်ဂ့ၤ, ပမါမ့ၢ်ဂ့ၤ, ပဖိခွါမ့ၢ်ဂ့ၤ, ပဖိမုၣ်မ့ၢ်ဂ့ၤ တအီစပံးထံ နီတစဲးဘၣ်. ၉ ဒီးပတတ့ထီၣ်ဟံၣ်လၢ ပကအိၣ်လၢအပူၤဘၣ်. စပံးကျီးမ့ၢ်ဂ့ၤ, ဟီၣ်ခိၣ်လီၢ်မ့ၢ်ဂ့ၤ, တၢ်ချံမ့ၢ်ဂ့ၤ တအိၣ်ဒီးပှၤနီတမံၤဘၣ်. ၁၀ ပဆဲးအိၣ်လၢဒဲပူၤ ဒီးဒိကနၣ် တၢ်လၢ ပဖုဖးဒိၣ် စီၤယိၤနဒာ် မၤလိာ်ပှၤခဲလၢာ်လီၤ. ၁၁ ဘၣ်ဆၣ် ဖဲဘၤဘူၤလိၣ် အစီၤပၤ နဘူၤကးန့စၢ် ဟဲထီၣ်ဒုးဝဲ ကီၢ်တဘ့ၣ်အံၤအခါ+ ပတဲလီၤပသးလၢ ‘ဟဲသၢၤ, ဒ်သိး ပကပူၤဖျဲးလၢ ပှၤက့ၤစ့းဖိ အသုးမုၢ် ဒီးပှၤစူၤရံဖိ အသုးမုၢ် အစုပူၤအဂီၢ် ပကလဲၤလၢ ဝ့ၢ်ယရူၤၡလ့ၣ်လီၤ.’ အဃိ ခဲအံၤန့ၣ် ပအိၣ်လၢ ဝ့ၢ်ယရူၤၡလ့ၣ် အပူၤလီၤ.”
၁၂ ဒီးယဟိဝၤယွၤ တဲဘၣ် စီၤယံးရမံယၤလၢ ၁၃ “ယၤ, တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် တဲလၢ ‘လဲၤတဲဘၣ် ယူဒၤအပှၤဂီၢ်မုၢ် ဒီးပှၤလၢ အအိၣ်လၢ ဝ့ၢ်ယရူၤၡလ့ၣ် အပူၤတဖၣ်လၢ ယၤ, ယဟိဝၤယွၤ တဲလၢ “လၢညါ ယဟ့ၣ်သဆၣ်ထီၣ်သု တလီၢ်လီၢ်လၢ သုကဒိကနၣ် ယကလုၢ်တမ့ၢ်ဧီၤ.”+ ၁၄ “စီၤရ့ကးအဖိခွါ စီၤယိၤနဒာ် မၤလိာ်ဝဲ အစၢၤအသွဲၣ်တဖၣ်လၢ အဝဲသ့ၣ် တဘၣ်အီ စပံးထံဘၣ်. ဒီးအဝဲသ့ၣ် ဒိကနၣ် အဖုဖးဒိၣ် အတၢ်မၤလိာ်အဃိ+ အဝဲသ့ၣ်မၤထွဲ အတၢ်ကတိၤ ဒီးတအီဝဲ စပံးထံဘၣ် တုၤလၢ တနံၤညါအံၤလီၤ. ဘၣ်ဆၣ် မ့မ့ၢ်ယၤန့ၣ် ယတဲသု တဘျီဝံၤတဘျီ* သနာ်က့ သုတဒိကနၣ်ယၤဘၣ်.+ ၁၅ ဒီးယဆှၢလီၤ ယခ့ယပှၤခဲလၢာ် လၢအမ့ၢ် ဝံတဖၣ်လၢ သုအိၣ် တဘျီဝံၤတဘျီ+ ဒီးတဲလၢ ‘သုဝဲတဂၤစုာ်စုာ် ဝံသးစူၤ ပတုာ်ကွံာ် သုသကဲာ်ပဝးလၢ အအၢအသီ+ ဒီးမၤတၢ်လၢအဘၣ်တက့ၢ်. တဘၣ်ဘူၣ်ထီၣ်ဘါထီၣ် ယွၤအဂၤတဖၣ် ဒီးမၤအတၢ်တဂ့ၤ. ထဲန့ၣ်မး သုကဆဲးအိၣ်ဘၣ်လၢ ကီၢ်လၢ ယဟ့ၣ်လီၤပာ်စၢၤ သုဒီး သုမိၢ်ပၢ်ဖံဖု လၢပျၢၤတဖၣ်လီၤ.’+ ဘၣ်ဆၣ် သုတဒိကနၣ် ယကလုၢ်ဘၣ် ဒီးတကနၣ်ဃုာ်တၢ်* စ့ၢ်ကီးဘၣ်. ၁၆ စီၤရ့ကးအဖိခွါ စီၤယိၤနဒာ် အစၢၤအသွဲၣ်တဖၣ် မၤထွဲဝဲ တၢ်မၤလိာ်လၢ အဝဲသ့ၣ် အဖုဖးဒိၣ် မၤလိာ်တ့ၢ်အီၤ+ ဘၣ်ဆၣ် ပှၤဂီၢ်မုၢ်တဖၣ်အံၤ တဒိကနၣ် ယကလုၢ်ဘၣ်.”’”
၁၇ “ယၤ, တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် တဲလၢ ‘ဘၣ်ဃးဒီး တၢ်ကီတၢ်ခဲ ခဲလၢာ်လၢ ကလီၤဘၣ် ယူဒၤအပှၤဂီၢ်မုၢ် ဒီးပှၤလၢ အအိၣ်လၢ ဝ့ၢ်ယရူၤၡလ့ၣ်အပူၤန့ၣ် ယဟ့ၣ်ပလီၢ်ပာ်စၢၤ အဝဲသ့ၣ်ဝံၤလံ.+ ဒီးယတဲတၢ်ဒီးအဝဲသ့ၣ် ဘၣ်ဆၣ် အဝဲသ့ၣ် တဒိကနၣ်ယၤဘၣ်. ယကိးအဝဲသ့ၣ် ဘၣ်ဆၣ် အဝဲသ့ၣ် တစံးဆၢယၤဘၣ်.+ အဃိ ယကဒုးလီၤဘၣ် တၢ်ကီတၢ်ခဲအံၤခဲလၢာ်လၢ အဝဲသ့ၣ်အလိၤလီၤ.’”
၁၈ ဒီးစီၤယံးရမံယၤ တဲဘၣ် စီၤရ့ကး အဒူၣ်ဖိထၢဖိတဖၣ်လၢ “တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် တဲဝဲလၢ ‘ခီဖျိလၢ သုဒိကနၣ် တၢ်မၤလိာ်လၢ သုဖုဖးဒိၣ် စီၤယိၤနဒာ် မၤလိာ်သု ဒီးသုဆဲးမၤထွဲ အတၢ်မၤလိာ်ခဲလၢာ် ဒီးမၤဒ်တၢ်လၢ အမၤလိာ်သု လီၤတံၢ်လီၤဆဲးအဃိ ၁၉ ယၤ, တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် တဲလၢ “ပှၤလၢ စီၤရ့ကးအဖိခွါ စီၤယိၤနဒာ် အစၢၤအသွဲၣ် အကျါ ကမၤတၢ်လၢ ယမဲာ်ညါ ထီဘိလီၤ.”’”