ယံးရမံယၤ
၃၆ ဖဲစီၤယိၤၡံယၤအဖိခွါ လၢအမ့ၢ် ယူဒၤအစီၤပၤ ယဟိၤယါကံၣ်+ ပၢတၢ် လွံၢ်နံၣ်တနံၣ်န့ၣ် ယဟိဝၤယွၤ တဲဘၣ် စီၤယံးရမံယၤလၢ ၂ “ဟံးန့ၢ် လံာ်ထူတထူ ဒီးကွဲးလီၤ ကယဲၢ်တၢ်ကတိၤလၢ ယတဲတ့ၢ်နၤလၢ အထီဒါဝဲ အံၣ်စရ့လး ဒီးယူဒၤ အပှၤဂီၢ်မုၢ်+ ဒီးပှၤကလုာ်ခဲလၢာ်+ စးထီၣ်လၢ ယတဲတၢ်ဒီးနၤ အဆိကတၢၢ်တနံၤ ဖဲစီၤယိၤၡံယၤအစိၤ တုၤလီၤလၢ တနံၤအံၤတက့ၢ်.+ ၃ ဒီးဖဲယူဒၤ အပှၤဂီၢ်မုၢ် နၢ်ဟူဘၣ်ဝဲ တၢ်နးတၢ်ဖှီၣ်ခဲလၢာ်လၢ ယပာ်လီၤယသးလၢ ယကဒုးလီၤဘၣ်အဝဲသ့ၣ်အခါ ဘၣ်သ့ၣ်သ့ၣ် အဝဲသ့ၣ် ကဃၣ်ကွံာ်အသးလၢ အကျဲအၢကျဲသီ ဒီးယကပျၢ်ကွံာ် အဝဲသ့ၣ် အတၢ်ကမၣ် ဒီးအတၢ်ဒဲးဘးလီၤ.”+
၄ ဒီးစီၤယံးရမံယၤ ကိးန့ၢ် စီၤန့ၤရံယၤအဖိခွါ စီၤဘၤရူး+ ဒီးစီၤယံးရမံယၤ ကိးထီၣ်န့ၢ်အီၤ တၢ်ကတိၤတဖၣ်လၢ ယဟိဝၤယွၤ တဲဘၣ်အီၤခဲလၢာ်လီၤ. ဒီးစီၤဘၤရူး ကွဲးလီၤဝဲလၢ လံာ်ထူအပူၤလီၤ.+ ၅ ဒီးစီၤယံးရမံယၤ တဲဘၣ် စီၤဘၤရူးလၢ “ပှၤဖီၣ်ဃာ်ယၤအဃိ ယလဲၤလၢ ယဟိဝၤယွၤ အဟံၣ် တသ့ဘၣ်. ၆ အဃိ နကဘၣ်လဲၤဖဲန့ၣ် ဒီးတၢ်လၢယကိးထီၣ်န့ၢ်နၤ လၢအမ့ၢ် ယဟိဝၤယွၤ အတၢ်ကတိၤလၢ အအိၣ်လၢ လံာ်ထူတထူအံၤ အပူၤန့ၣ် နကဘၣ်ဖးအီၤလၢ နကလုၢ်ဒိၣ်ဒိၣ်လီၤ. ဒီးနဘၣ်ဖးအီၤလၢ ပှၤဂီၢ်မုၢ် အမဲာ်ညါ လၢယဟိဝၤယွၤ အဟံၣ် ဖဲပှၤဒုၣ်တၢ်အီၣ် အမုၢ်နံၤလီၤ. အဃိ နဘၣ်ဖးအီၤလၢ ကယဲၢ်ယူဒၤအပှၤဂီၢ်မုၢ်လၢ အအိၣ်ဟဲလၢ အဝ့ၢ်တဖၣ်န့ၣ် အမဲာ်ညါလီၤ. ၇ ယဟိဝၤယွၤ တဲတ့ၢ်ဝဲလၢ အကစံၣ်ညီၣ် ပှၤတဖၣ်အံၤလၢ တၢ်သးထီၣ် ဒီးတၢ်သးဒိၣ်ဖးဒိၣ်အပူၤလီၤ. ဘၣ်ဆၣ် ဘၣ်သ့ၣ်သ့ၣ် အဝဲသ့ၣ် ကဃ့ကညး ယဟိဝၤယွၤ ဒီးအဝဲသ့ၣ် တဂၤစုာ်စုာ် ကဃၣ်ကွံာ်အသးလၢ အကျဲအၢကျဲသီလီၤ.”
၈ အဃိ စီၤန့ၤရံယၤအဖိခွါ စီၤဘၤရူး မၤဝဲဒ် ဝံယံးရမံယၤ မၤလိာ်အီၤအသိး ခဲလၢာ်လီၤ. စီၤဘၤရူး ဖးဝဲ ယဟိဝၤယွၤ အတၢ်ကတိၤလၢ အအိၣ်လၢ လံာ်ထူတထူန့ၣ်အပူၤ လၢအကလုၢ်ဒိၣ်ဒိၣ် ဖဲယဟိဝၤယွၤ အဟံၣ်လီၤ.+
၉ တၢ်ကဲထီၣ်အသးဒ်န့ၣ် ဖဲစီၤယိၤၡံယၤအဖိခွါ လၢအမ့ၢ် ယူဒၤအစီၤပၤ ယဟိၤယါကံၣ်+ ပၢတၢ်ယဲၢ်နံၣ်တနံၣ်, လၢလါခွံလါတလါ အတီၢ်ပူၤလီၤ. ဒီးပှၤအိၣ်လၢ ဝ့ၢ်ယရူၤၡလ့ၣ်အပူၤခဲလၢာ် ဒီးပှၤလၢ အအိၣ်လၢ ယူဒၤအဝ့ၢ်တဖၣ်လၢ အဟဲဝဲလၢ ဝ့ၢ်ယရူၤၡလ့ၣ်န့ၣ် ဒုၣ်ဝဲတၢ်အီၣ်လၢ ယဟိဝၤယွၤ အမဲာ်ညါလီၤ.+ ၁၀ ဒီးစီၤယံးရမံယၤ အတၢ်ကတိၤလၢ အအိၣ်လၢ လံာ်ထူအပူၤန့ၣ် စီၤဘၤရူး ဖးဝဲလၢ အကလုၢ်ဒိၣ်ဒိၣ်လၢ ယဟိဝၤယွၤ အဟံၣ် လၢပှၤခဲလၢာ်အမဲာ်ညါလီၤ. ဖဲအဖးဝဲအခါ အအိၣ်ဝဲလၢ ပှၤကွဲးကူလံာ်ဖိ စီၤၡၤဖၣ်အဖိခွါ+ စီၤကမၤရယၤ+ အဒၢးပူၤလီၤ. ဒၢးတဖျၢၣ်အံၤ အိၣ်ဝဲလၢ တၢ်ပျီလၢ အဖီခိၣ်တတီၤ ဘူးဒီး ယဟိဝၤယွၤ အဟံၣ်တြဲၤအသီ အကျဲနုာ်လီၤန့ၣ်လီၤ.+
၁၁ ဖဲစီၤကမၤရယၤ အဖိခွါ စီၤမံၤကါယၤ လၢအမ့ၢ် စီၤၡၤဖၣ်အလံၤခွါန့ၣ် နၢ်ဟူဝဲ ယဟိဝၤယွၤ အတၢ်ကတိၤခဲလၢာ်လၢ လံာ်ထူတထူန့ၣ် အပူၤအခါ ၁၂ စီၤမံၤကါယၤ လဲၤလီၤလၢ စီၤပၤအဟံၣ် ဖဲနဲၣ်ရွဲၣ် အဒၢးလီၤ. ဒီးပဒိၣ်ဖးဒိၣ် ဆ့ၣ်နီၤဝဲဖဲန့ၣ် ကိးဂၤဒဲးလီၤ. အဝဲသ့ၣ်မ့ၢ်ဝဲ နဲၣ်ရွဲၣ် စီၤအလံၡမၤ,+ စီၤၡမါယၤအဖိခွါ စီၤဒလါယၤ, စီၤဧးကဘိၢ်အဖိခွါ+ စီၤအ့လနၤသၣ်,+ စီၤၡၤဖၣ်အဖိခွါ စီၤကမၤရယၤ, စီၤဃနၤနယၤအဖိခွါ စီၤစံးဒကံယၤ ဒီးပဒိၣ်ဖးဒိၣ်အဂၤတဖၣ်လီၤ. ၁၃ စီၤမံၤကါယၤ တဲဘၣ်အဝဲသ့ၣ်လၢ တၢ်ကတိၤခဲလၢာ်လၢ အနၢ်ဟူဘၣ်ဝဲ ဖဲစီၤဘၤရူး ဖးထီၣ်ဝဲလၢ လံာ်ထူအပူၤ လၢပှၤဂီၢ်မုၢ်အမဲာ်ညါလီၤ.
၁၄ ဝံၤဒီး ပဒိၣ်ဖးဒိၣ်ခဲလၢာ် ဆှၢလီၤ စီၤယဟူဒံၤလၢ စီၤဘၤရူး အအိၣ်လီၤ. စီၤယဟူဒံၤ အပၢ်မ့ၢ်ဝဲ စီၤနသၤနံယၤ, စီၤနသၤနံယၤ အပၢ်မ့ၢ်ဝဲ စီၤၡလ့မယၤ ဒီးစီၤၡလ့မယၤ အပၢ်မ့ၢ်ဝဲ စီၤကူၤၡံလီၤ. ဒီးစီၤယဟူဒံၤ တဲဘၣ် စီၤဘၤရူးလၢ “ဟဲ, ဟဲစိာ်ဃုာ် လံာ်တထူလၢ နဖးလၢ ပှၤဂီၢ်မုၢ်အမဲာ်ညါ န့ၣ်တက့ၢ်.” အဃိ စီၤန့ၤရံယၤအဖိခွါ စီၤဘၤရူး စိာ်ထီၣ်ဝဲ လံာ်ထူလၢအစုပူၤ ဒီးလဲၤလၢ အဝဲသ့ၣ်အအိၣ်လီၤ. ၁၅ ဒီးအဝဲသ့ၣ် တဲဘၣ် စီၤဘၤရူးလၢ “ဝံသးစူၤ ဆ့ၣ်နီၤဖးန့ၢ်ပှၤ မ့ၢ်ဒိၣ်.” အဃိ စီၤဘၤရူး ဖးန့ၢ်အဝဲသ့ၣ်လီၤ.
၁၆ ဖဲအဝဲသ့ၣ် နၢ်ဟူဘၣ် တၢ်ကတိၤခဲလၢာ်အခါ အဝဲသ့ၣ် ကွၢ်လိာ်သး တဂၤဒီးတဂၤလၢ တၢ်ပျံၤတၢ်ဖုးအပူၤ ဒီးအဝဲသ့ၣ် တဲဘၣ် စီၤဘၤရူးလၢ “ပကဘၣ်တဲဘၣ် စီၤပၤလၢ တၢ်ကတိၤတဖၣ်အံၤ သပှၢ်တၢၢ်လီၤ.” ၁၇ ဒီးအဝဲသ့ၣ် သံကွၢ်စီၤဘၤရူးလၢ “တၢ်ကတိၤခဲလၢာ်လၢ နကွဲးလီၤအီၤအံၤန့ၣ် နလဲၤန့ၢ်ဖဲလဲၣ်, ဝံသးစူၤတဲပှၤနီၤ. မ့ၢ်စီၤယံးရမံယၤ ကိးထီၣ်န့ၢ်နၤဟီဧါ.” ၁၈ စီၤဘၤရူး တဲဆၢက့ၤအဝဲသ့ၣ်လၢ “စီၤယံးရမံယၤ ကိးထီၣ်န့ၢ်ယၤ တၢ်ကတိၤတဖၣ်အံၤခဲလၢာ် ဒီးယကွဲးလီၤအီၤလၢ ကသံၣ်ထံလၢ လံာ်ထူတထူအံၤ အပူၤလီၤ.” ၁၉ ပဒိၣ်ဖးဒိၣ်တဖၣ် တဲဘၣ် စီၤဘၤရူးလၢ “နၤဒီးစီၤယံးရမံယၤန့ၣ် လဲၤအိၣ်ခူသူၣ်. ဒီးသုအိၣ်ဖဲလဲၣ်န့ၣ် တဘၣ်တဲဘၣ် ပှၤနီတဂၤတဂ့ၤ.”+
၂၀ လၢခံ ပဒိၣ်ဖးဒိၣ်တဖၣ် လဲၤပာ်လီၤ လံာ်ထူတထူန့ၣ်လၢ နဲၣ်ရွဲၣ် စီၤအလံၡမၤ အဒၢးပူၤ ဒီးအဝဲသ့ၣ် လဲၤလၢ စီၤပၤ လၢအအိၣ်ဝဲလၢ အတၢ်ပျီန့ၣ်အအိၣ် ဒီးတဲဘၣ်စီၤပၤလၢ တၢ်လၢ အဝဲသ့ၣ် နၢ်ဟူဘၣ်ဝဲ ခဲလၢာ်လီၤ.
၂၁ အဃိ စီၤပၤမၢ စီၤယဟူဒံၤ+ လဲၤဟံးန့ၢ် လံာ်ထူတထူန့ၣ်လၢ နဲၣ်ရွဲၣ် စီၤအလံၡမၤ အဒၢးပူၤ ဒီးဟဲက့ၤစိာ်အီၤလီၤ. ဒီးစီၤယဟူဒံၤ ဖးဝဲလံာ်ထူန့ၣ်လၢ စီၤပၤ ဒီးပဒိၣ်ဖးဒိၣ်ခဲလၢာ် လၢအဆၢထၢၣ်လၢ စီၤပၤအကပၤန့ၣ် အမဲာ်ညါလီၤ. ၂၂ ဖဲန့ၣ်အခါ ဘၣ်ဖဲလါခွံလါတလါ* ဒီးစီၤပၤ ဆ့ၣ်နီၤဝဲလၢ အဒၢးလၢတၢ်ဂိၢ်ခါအဂီၢ် ဒီးလၢအမဲာ်ညါန့ၣ် အိၣ်ဝဲဒီး ဖၣ်ကပူၤလၢ မ့ၣ်အူကဲၤထီၣ်ဝဲလီၤ. ၂၃ ဖဲစီၤယဟူဒံၤ ဖးဝဲလံာ်ထူအံၤဝံၤ သၢဆၢလွံၢ်ဆၢအခါ စီၤပၤ သွဲၣ်ကွံာ်ဝဲ လံာ်ထူတတီၤန့ၣ်လၢ နဲၣ်ရွဲၣ်အဒီတဘ့ၣ် ဒီးတၢၤလီၤဝဲ လံာ်ထူတတီၤန့ၣ်လၢ ဖၣ်ကပူၤလၢ မ့ၣ်အူကဲၤဝဲ ဒီးအဝဲမၤဝဲဒ်န့ၣ် တဘျီဝံၤတဘျီ တုၤလၢ လံာ်ဒီတထူ အူအီၣ်ကွံာ်ဝဲလီၤ. ၂၄ စီၤပၤမ့ၢ်ဂ့ၤ စီၤပၤအခ့အပှၤလၢ အနၢ်ဟူ တၢ်ကတိၤတဖၣ်အံၤမ့ၢ်ဂ့ၤ တဖှီညာ်ကွံာ် အဆ့ကၤနီတဂၤဘၣ်. ဒီးအဝဲသ့ၣ် တပျံၤတၢ်ဘၣ်. ၂၅ စီၤအ့လနၤသၣ်,+ စီၤဒလါယၤ+ ဒီးစီၤကမၤရယၤ+ ဃ့ကညးစီၤပၤ ဒ်သိးအသုတဒွဲၣ်အူထီၣ် လံာ်ထူတဂ့ၤအဂီၢ် သနာ်က့ စီၤပၤ တဒိကနၣ် အဝဲသ့ၣ်ဘၣ်. ၂၆ တကးဒံးဘၣ် စီၤပၤမၢဝဲ စီၤပၤအဖိခွါ* စီၤယရၤဃမအ့လး, စီၤဧၤစရံၤအ့လးအဖိခွါ စီၤစရါယၤ ဒီးစီၤဧၤဘံးဒ့လးအဖိခွါ စီၤၡလ့မယၤ လဲၤဖီၣ်န့ၢ်ဝဲ နဲၣ်ရွဲၣ် စီၤဘၤရူး ဒီးဝံယံးရမံယၤ ဘၣ်ဆၣ် ယဟိဝၤယွၤ ပာ်ခူသူၣ်အဝဲသ့ၣ်လီၤ.+
၂၇ လံာ်ထူတထူလၢ အပၣ်ဃုာ်ဒီး တၢ်ကတိၤလၢစီၤဘၤရူး ကွဲးလီၤဝဲဒ် စီၤယံးရမံယၤ ကိးထီၣ်န့ၢ်အီၤအသိးန့ၣ် စီၤပၤဒွဲၣ်အူထီၣ်ကွံာ်ဝဲ ဝံၤအလီၢ်ခံ ယဟိဝၤယွၤ တဲတၢ်ဒီး စီၤယံးရမံယၤ လၢအသီတဘျီ+ ဒီးတဲဝဲလၢ ၂၈ “ဟံးန့ၢ်လံာ်ထူအဂၤတထူ ဒီးကွဲးလီၤတၢ်ကတိၤခဲလၢာ်လၢ အအိၣ်လၢ လံာ်ထူအဆိကတၢၢ်တထူလၢ ယူဒၤအစီၤပၤ ယဟိၤယါကံၣ် ဒွဲၣ်အူထီၣ်ကွံာ်ဝဲန့ၣ်တက့ၢ်.+ ၂၉ ဒီးဘၣ်ဃးဒီး ယူဒၤအစီၤပၤ ယဟိၤယါကံၣ်န့ၣ် နကဘၣ်တဲလၢ ‘ယဟိဝၤယွၤ တဲဝဲလၢ “နဒွဲၣ်အူထီၣ်ကွံာ် လံာ်ထူတထူန့ၣ် ဒီးနတဲလၢ ‘ဘၣ်မနုၤအဃိ န* ကွဲးလီၤလၢ ဘၤဘူၤလိၣ်အစီၤပၤ ကဟဲသပှၢ်တၢၢ်ဒီး မၤဟးဂီၤကွံာ်တၢ်လီၢ်အံၤ ဒီးဒုးအိၣ်သယုၢ်အီၤ ဒ်သိး ပှၤကညီ ဒီးဆၣ်ဖိကီၢ်ဖိ သုတအိၣ်လၢအပူၤ လၢၤတဂ့ၤအဂီၢ်န့ၣ်လဲၣ်.’+ ၃၀ အဃိ ဘၣ်ဃးဒီး ယူဒၤအစီၤပၤ ယဟိၤယါကံၣ်န့ၣ် ယဟိဝၤယွၤ တဲဝဲလၢ ‘ပှၤတဂၤအံၤ အစၢၤအသွဲၣ် တထီၣ်က့ၤအလီၢ်လၢ စီၤဒၤဝံး အလီၢ်ပစိာ်အဖီခိၣ် နီတဂၤဘၣ်.*+ ဒီးအစိၣ်န့ၣ် ပှၤကပာ်ဝဲဒ်န့ၣ်အဃိ လၢမုၢ်ဆါခီန့ၣ် တၢ်ကိၢ်ကဘၣ်အီၤ ဒီးလၢမုၢ်နၤခီန့ၣ် ပစီၤထံလီၤသကၤ ကလီၤဘၣ်အီၤလီၤ.+ ၃၁ စီၤပၤမ့ၢ်ဂ့ၤ, အစၢၤအသွဲၣ်မ့ၢ်ဂ့ၤ,* အခ့အပှၤမ့ၢ်ဂ့ၤ ယကဟံးန့ၢ် အဝဲသ့ၣ်အရ့ လၢအဝဲသ့ၣ် အတၢ်ကမၣ်အဃိလီၤ. တၢ်နးတၢ်ဖှီၣ်လၢ ယတဲလၢ ယကဒုးလီၤဘၣ် အဝဲသ့ၣ်မ့ၢ်ဂ့ၤ, ပှၤအိၣ်လၢ ဝ့ၢ်ယရူၤၡလ့ၣ်အပူၤမ့ၢ်ဂ့ၤ ဒီးယူဒၤအပှၤပိာ်ခွါမ့ၢ်ဂ့ၤန့ၣ် ယကဒုးလီၤဘၣ် အဝဲသ့ၣ်+ မ့ၢ်လၢ အဝဲသ့ၣ် တဒိကနၣ် ယကလုၢ်ဘၣ်အဃိလီၤ.’”’”+
၃၂ စီၤယံးရမံယၤ ဟံးန့ၢ်လံာ်ထူအဂၤတထူ ဒီးဟ့ၣ်လီၤဝဲလၢ စီၤန့ၤရံယၤအဖိခွါ လၢအမ့ၢ် နဲၣ်ရွဲၣ် စီၤဘၤရူးလီၤ.+ ဒီးဒ်စီၤယံးရမံယၤ ကိးထီၣ်န့ၢ်အီၤအသိး အဝဲကွဲးလီၤဝဲလၢ လံာ်ထူအံၤအပူၤ ကယဲၢ်တၢ်ကတိၤလၢ အအိၣ်လၢ လံာ်ထူလၢ ယူဒၤအစီၤပၤ ယဟိၤယါကံၣ် ဒွဲၣ်အူထီၣ်ကွံာ်ဝဲလၢ မ့ၣ်အူအပူၤလီၤ.+ ဒီးလၢလံာ်ထူအံၤအပူၤန့ၣ် အဝဲကွဲးလီၤအါထီၣ်စ့ၢ်ကီးဝဲ တၢ်ကတိၤအါမးလၢ အဟဲလၢ ကစၢ်ယွၤ အအိၣ်လီၤ.