ယံးရမံယၤ
၃၈ စီၤမးတၣ်အဖိခွါ စီၤၡဖးတယၤ, စီၤပးၡဃူၢ်အဖိခွါ စီၤကဒါလယၤ, စီၤၡလ့မယၤအဖိခွါ စီၤယူကၤလး+ ဒီးစီၤမၤလကံယၤအဖိခွါ စီၤပးၡဃူၢ်+ နၢ်ဟူဝဲ တၢ်ကတိၤတဖၣ်လၢ ဝံယံးရမံယၤ တဲဘၣ်ပှၤဂီၢ်မုၢ် ခဲလၢာ်လၢ ၂ “ယဟိဝၤယွၤ တဲဝဲလၢ ‘ပှၤလၢ အဆဲးအိၣ်ဝဲလၢ ဝ့ၢ်အံၤအပူၤန့ၣ် ကသံလၢ တၢ်ဒုး, တၢ်သၣ်ဝံၤလီၤဒိ ဒီးတၢ်ဆါသံသတြိာ်လီၤ.+ မ့မ့ၢ် ပှၤလၢအဟ့ၣ်လီၤအသးလၢ ပှၤက့ၤစ့းဖိ အစုပူၤန့ၣ် အသးသမူ ကပူၤဖျဲး ဒီးကဆဲးမူဘၣ်လီၤ.’+ ၃ ယဟိဝၤယွၤ တဲဝဲလၢ ‘ဝ့ၢ်တဖျၢၣ်အံၤ ကဘၣ်တၢ်ဟ့ၣ်လီၤအီၤလၢ ဘၤဘူၤလိၣ်အစီၤပၤ အသုးမုၢ် အစုပူၤ သပှၢ်တၢၢ် ဒီးဘၤဘူၤလိၣ်အစီၤပၤ ကမၤန့ၢ်ဝဲလီၤ.’”+
၄ ပဒိၣ်ဖးဒိၣ်တဖၣ် တဲဘၣ်စီၤပၤလၢ “ပှၤတဂၤအံၤ တဲတၢ်ကတိၤဒ်အံၤအဃိ အမၤစှၤလီၤ ပှၤသုးဖိတဖၣ်လၢ အအိၣ်တ့ၢ်ဒံးလၢဝ့ၢ်ပူၤ ဒီးပှၤဂီၢ်မုၢ်ခဲလၢာ် အတၢ်သးဒူလီၤ.* အဃိ ဝံသးစူၤ ဟ့ၣ်လီၤတၢ်ကလုၢ်လၢ ပှၤကမၤသံအီၤ အဂီၢ်သၢၤ.+ ပှၤတဂၤအံၤ တဃုတၢ်မုာ်တၢ်ခုၣ်လၢ ပှၤဂီၢ်မုၢ်အံၤ အဂီၢ်ဘၣ်, အဃုန့ၢ် အဝဲသ့ၣ် တၢ်ကီတၢ်ခဲလီၤ.” ၅ စီၤပၤစံးဒကံယၤ တဲဆၢက့ၤဝဲလၢ “ပှၤတဂၤန့ၣ် အိၣ်လၢသုစုပူၤလီၤ. ယတြီသု တသ့နီတမံၤဘၣ်.”
၆ အဃိ အဝဲသ့ၣ်ဖီၣ်န့ၢ် ဝံယံးရမံယၤ ဒီးစဲၤလီၤအီၤလၢ စီၤပၤအဖိခွါ* စီၤမၤလကံယၤ အထံကမျၢပူၤ* လၢအအိၣ်ဝဲလၢ ပှၤခိးတၢ်ဖိတဖၣ် အကရၢၢ်ပူၤလီၤ.+ အဝဲသ့ၣ်စဲၤလီၤ ဝံယံးရမံယၤလၢ ပျံၤတဖၣ်လီၤ. ဘၣ်ဆၣ် လၢထံကမျၢပူၤန့ၣ် ထံတအိၣ်ဘၣ်, အိၣ်ဒၣ်ထဲကပံာ်လီၤ. အဃိ ဝံယံးရမံယၤ လီၤဘျၢလၢ ကပံာ်ကျါလီၤ.
၇ ပှၤအဲၤသံအီးပးဖိ စီၤဧ့ၤဘ့းမ့လ့း+ လၢအမ့ၢ် ပဒိၣ်တဂၤ* လၢစီၤပၤအဟံၣ်ပူၤန့ၣ်* နၢ်ဟူဘၣ်ဝဲလၢ ပှၤထၢနုာ် ဝံယံးရမံယၤလၢ ထံကမျၢပူၤလီၤ. ဒီးစီၤပၤန့ၣ် ဆ့ၣ်နီၤဝဲလၢ ဘံၣ်ယၤမံၣ်အတြဲၤအဃၢၤလီၤ.+ ၈ အဃိ စီၤဧ့ၤဘ့းမ့လ့း ဟးထီၣ်လၢ စီၤပၤအဟံၣ်ပူၤ ဒီးလဲၤတဲ စီၤပၤလၢ ၉ “ကစၢ်စီၤပၤဧၢ, ပှၤပိာ်ခွါတဖၣ်န့ၣ် မၤဝံယံးရမံယၤ အၢဒိၣ်မး. အဝဲသ့ၣ် ထၢနုာ်အီၤလၢ ထံကမျၢပူၤလီၤ. လၢဝ့ၢ်ပူၤန့ၣ် တၢ်အီၣ်တအိၣ်လၢၤဘၣ်အဃိ ဝံယံးရမံယၤ ကသံဖဲန့ၣ်လၢ တၢ်သၣ်ဝံၤလီၤဒိအဃိလီၤ.”+
၁၀ ဒီးစီၤပၤ တဲဘၣ် ပှၤအဲၤသံအီးပးဖိ စီၤဧ့ၤဘ့းမ့လ့းလၢ “ကိးန့ၢ် ပှၤပိာ်ခွါဖဲအံၤ အဂၤ ၃၀ ဒီးတချုးလၢ ဝံယံးရမံယၤ သံဒံးဘၣ်န့ၣ် လဲၤတွံၢ်ထီၣ်က့ၤအီၤတက့ၢ်.” ၁၁ အဃိ စီၤဧ့ၤဘ့းမ့လ့း လဲၤကိးဃုာ်ဒီး ပှၤတဖၣ်န့ၣ်လၢ စီၤပၤအဟံၣ်ပူၤ ဒီးလဲၤဝဲလၢ ဒၢးတဖျၢၣ်လၢ အအိၣ်လၢ တၢ်လုၢ်ဒိၣ်ပှ့ၤဒိၣ်အလီၢ် အဖီလာ်လီၤ.+ ဖဲန့ၣ်န့ၣ် အဝဲသ့ၣ်ဟံးန့ၢ် တၢ်ကူတၢ်ကၤအလီၢ်လံၤဒီး တၢ်ကံးညာ်အလီၢ်လံၤတနီၤ ဒီးလဲၤစဲၤလီၤဝဲလၢ ထံကမျၢအပူၤလၢ ဝံယံးရမံယၤအအိၣ် ခီဖျိပျံၤတဖၣ်လီၤ. ၁၂ ဒီးပှၤအဲၤသံအီးပးဖိ စီၤဧ့ၤဘ့းမ့လ့း တဲဘၣ် ဝံယံးရမံယၤလၢ “ဝံသးစူၤ ပာ်တၢ်ကူတၢ်ကၤ ဒီးတၢ်ကံးညာ်တဖၣ်လၢ နကံာ်လာ်ဒီး ပျံၤတဖၣ်အဘၢၣ်စၢၤနီၤ.” ဒီးဝံယံးရမံယၤ မၤဝဲဒ်န့ၣ်လီၤ. ၁၃ ဒီးအဝဲသ့ၣ် ထုးထီၣ်ကွံာ် ဝံယံးရမံယၤလၢ ထံကမျၢပူၤ ခီဖျိပျံၤတဖၣ်လီၤ. ဝံယံးရမံယၤ ဆဲးအိၣ်ဝဲလၢ ပှၤခိးတၢ်ဖိတဖၣ် အကရၢၢ်ပူၤလီၤ.+
၁၄ ဒီးစီၤပၤစံးဒကံယၤ မၢပှၤလဲၤကိးန့ၢ် ဝံယံးရမံယၤလၢ ကလဲၤထံၣ်လိာ်သးဒီးအီၤဖဲ ကျဲနုာ်လီၤသၢတီၤတတီၤလၢ အအိၣ်လၢ ယဟိဝၤယွၤအဟံၣ်ပူၤလီၤ. ဒီးစီၤပၤတဲ ဝံယံးရမံယၤလၢ “ယကသံကွၢ်နၤ တၢ်တမံၤ, တဘၣ်ပာ်ခူသူၣ် တၢ်ဂ့ၢ်လၢယအိၣ် နီတမံၤတဂ့ၤ.” ၁၅ ဝံယံးရမံယၤ တဲဘၣ် စီၤစံးဒကံယၤလၢ “ယမ့ၢ်တဲဘၣ်နၤန့ၣ် နကမၤသံယၤ သပှၢ်တၢၢ်လီၤ. ယမ့ၢ်ဟ့ၣ်ကူၣ်နၤ သနာ်က့ နတဒိကနၣ်ယၤဘၣ်.” ၁၆ အဃိ စီၤပၤစံးဒကံယၤ အၢၣ်လီၤခူသူၣ်အီၤလၢ “ဒ်ယဟိဝၤယွၤလၢ အဟ့ၣ်လီၤပှၤ သးသမူတဂၤန့ၣ် မူဝဲသပှၢ်တၢၢ်အသိး ယအၢၣ်လီၤနၤလၢ ယတမၤသံနၤဘၣ်. ဒီးယတဟ့ၣ်လီၤကွံာ်နၤလၢ ပှၤလၢအဃုမၤသံနၤတဖၣ် အစုပူၤဘၣ်.”
၁၇ ဝံယံးရမံယၤ တဲဘၣ် စီၤစံးဒကံယၤလၢ “တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် အံၣ်စရ့လး ကစၢ်ယွၤန့ၣ် တဲဝဲလၢ ‘နမ့ၢ်ဟ့ၣ်လီၤကွံာ်နသးလၢ ဘၤဘူၤလိၣ်အစီၤပၤ အပဒိၣ်ဖးဒိၣ်တဖၣ် အစုပူၤန့ၣ် နသးသမူကပူၤဖျဲး ဒီးဝ့ၢ်တဖျၢၣ်အံၤန့ၣ် တဘၣ်တၢ်ဒွဲၣ်အူထီၣ်ကွံာ်အီၤဘၣ်. နၤဒီးနဟံၣ်ဖိဃီဖိ ကပူၤဖျဲးလီၤ.+ ၁၈ ဘၣ်ဆၣ် နမ့ၢ်တဟ့ၣ်လီၤကွံာ်နသးလၢ ဘၤဘူၤလိၣ်အစီၤပၤ အပဒိၣ်ဖးဒိၣ်တဖၣ် အစုပူၤဘၣ်န့ၣ် ဝ့ၢ်တဖျၢၣ်အံၤ ကဘၣ်တၢ်ဟ့ၣ်လီၤကွံာ်အီၤလၢ ပှၤက့ၤစ့းဖိ အစုပူၤ ဒီးအဝဲသ့ၣ် ကဒွဲၣ်အူထီၣ်ကွံာ်ဝဲလီၤ.+ ဒီးနတပူၤဖျဲးလၢ အဝဲသ့ၣ် အစုပူၤဘၣ်.’”+
၁၉ စီၤပၤစံးဒကံယၤ တဲဝံယံးရမံယၤလၢ “ယပျံၤပှၤယူဒၤဖိတဖၣ်လၢ အဟ့ၣ်လီၤအသးလၢ ပှၤက့ၤစ့းဖိအစုပူၤလီၤ. ပှၤမ့ၢ်ဟ့ၣ်လီၤကွံာ်ယၤလၢ ပှၤယူဒၤဖိတဖၣ်န့ၣ် အအိၣ်န့ၣ် အဝဲသ့ၣ် ကမၤအၢမၤသီယၤ နးနးလီၤ.” ၂၀ ဘၣ်ဆၣ် ဝံယံးရမံယၤ တဲဝဲလၢ “နတဘၣ် တၢ်ဟ့ၣ်လီၤကွံာ်နၤလၢ ပှၤယူဒၤဖိတဖၣ်န့ၣ် အစုပူၤဘၣ်. ဝံသးစူၤ ဒိကနၣ် ယဟိဝၤယွၤ အတၢ်ကတိၤလၢ ယတဲဘၣ်နၤတက့ၢ်. နမ့ၢ်ဒိကနၣ်န့ၣ် တၢ်ကလဲၤအသးဒီးနၤ ဂ့ၤဂ့ၤဘၣ်ဘၣ် ဒီးနကဆဲးအိၣ်မူဘၣ်လီၤ. ၂၁ ဘၣ်ဆၣ် ယဟိဝၤယွၤ ပာ်ဖျါထီၣ်န့ၢ်ယၤလၢ နမ့ၢ်တလဲၤဟ့ၣ်လီၤကွံာ်နသးလၢ ပှၤက့ၤစ့းဖိအစုပူၤဘၣ်န့ၣ် တၢ်ကကဲထီၣ်သးဒ်အံၤလီၤ. ၂၂ ပိာ်မုၣ်လၢအအိၣ်ဒံးလၢ ယူဒၤအစီၤပၤ အဟံၣ်ပူၤခဲလၢာ်န့ၣ် ပှၤကဆှၢထီၣ် အဝဲသ့ၣ်လၢ ဘၤဘူၤလိၣ်အစီၤပၤ အပဒိၣ်ဖးဒိၣ်တဖၣ်+ အအိၣ်လီၤ. ဒီးဖဲအဝဲသ့ၣ် လဲၤဝဲအခါ ကတဲဝဲလၢ
‘ပှၤပိာ်ခွါတဖၣ်လၢ နနာ်န့ၢ်အီၤန့ၣ် လံၣ်န့ၢ်လီန့ၢ်နၤ ဒီးမၤနၢၤနၤလံ.+
အဝဲသ့ၣ် ဒုးလီၤဘျၢနခီၣ်လၢ ကပံာ်ကျါ
ဒီးခဲအံၤ အဝဲသ့ၣ် ပာ်တ့ၢ်နၤ ဒီးဃ့ၢ်ကွံာ်ဝဲလံ.’
၂၃ နမါခဲလၢာ် ဒီးနဖိခွါတဖၣ်န့ၣ် ပှၤကဆှၢထီၣ် အဝဲသ့ၣ်လၢ ပှၤက့ၤစ့းဖိအအိၣ် ဒီးဘၤဘူၤလိၣ်အစီၤပၤ+ ကဖီၣ်န့ၢ်နၤအဃိ နတပူၤဖျဲးလၢ အဝဲသ့ၣ်အစုပူၤဘၣ်. လၢနဃိန့ၣ် ဝ့ၢ်တဖျၢၣ်အံၤ ကဘၣ်တၢ်ဒွဲၣ်အူထီၣ်ကွံာ်အီၤလီၤ.”+
၂၄ စီၤစံးဒကံယၤ တဲဘၣ် ဝံယံးရမံယၤလၢ “ဘၣ်ဃးဒီး တၢ်ဂ့ၢ်အံၤ တဘၣ်ဒုးသ့ၣ်ညါ ပှၤနီတဂၤတဂ့ၤ. နမ့ၢ်ဒုးသ့ၣ်ညါပှၤဂၤန့ၣ် နကသံ. ၂၅ ဒီးပဒိၣ်ဖးဒိၣ်တဖၣ် မ့ၢ်သ့ၣ်ညါလၢ ယတဲတၢ်ဒီးနၤ ဒီးအဝဲသ့ၣ် မ့ၢ်ဟဲတဲနၤလၢ ‘နတဲစီၤပၤ တၢ်မနုၤလဲၣ်. စီၤပၤတဲနၤ တၢ်မနုၤလဲၣ်. ဝံသးစူၤတဲပှၤတထံၣ်မီၤ. တဘၣ်ပာ်ခူသူၣ် တၢ်လၢပအိၣ် နီတမံၤတဂ့ၤ.+ ပတမၤသံနၤဘၣ်.’ ၂၆ ဖဲန့ၣ် နဘၣ်တဲဆၢက့ၤ အဝဲသ့ၣ်လၢ ‘အိၣ်ဒၣ်ယလဲၤဃ့ကညး စီၤပၤလၢ အသုတဆှၢကဒါက့ၤယၤလၢ စီၤယိနာ်သၣ်အဟံၣ် ဒ်သိး ယသုတသံဖဲန့ၣ်တဂ့ၤ အဂီၢ်လီၤ.’”+
၂၇ လၢခံ ပဒိၣ်ဖးဒိၣ်ခဲလၢာ် လဲၤသံကွၢ်သံဒိး ဝံယံးရမံယၤလီၤ. ဒီးဝံယံးရမံယၤ တဲဘၣ်အဝဲသ့ၣ်တၢ်လၢ စီၤပၤမၤလိာ်အီၤလၢ အကဘၣ်တဲဝဲခဲလၢာ်လီၤ. ဒီးခီဖျိလၢ အဝဲသ့ၣ် တနၢ်ဟူထွဲ စီၤပၤဒီးဝံယံးရမံယၤ တဲသကိးတၢ် နီတဂၤဘၣ်အဃိ အဝဲသ့ၣ် တတဲဝံယံးရမံယၤ တၢ်အဂုၤအဂၤ နီတမံၤလၢၤဘၣ်. ၂၈ ဒီးဝံယံးရမံယၤ ဆဲးအိၣ်ဝဲလၢ ပှၤခိးတၢ်ဖိတဖၣ် အကရၢၢ်ပူၤ+ တုၤလၢမုၢ်နံၤလၢ ပှၤမၤန့ၢ် ဝ့ၢ်ယရူၤၡလ့ၣ်လီၤ. ဖဲပှၤမၤန့ၢ် ဝ့ၢ်ယရူၤၡလ့ၣ်အခါ အဝဲအိၣ်ဒံးဖဲန့ၣ်လီၤ.+