ယံးရမံယၤ
၄၀ ဖဲပှၤခိးတၢ်ဖိအခိၣ် စီၤနဘူစၢ်ရဒၣ်+ ပျၢ်ကွံာ် ဝံယံးရမံယၤလၢ ဝ့ၢ်ရၤမါ+ ဝံၤအလီၢ်ခံန့ၣ် ယဟိဝၤယွၤ ဆဲးတဲတၢ်ဒီး ဝံယံးရမံယၤလီၤ. လၢညါ စီၤနဘူစၢ်ရဒၣ် မၢပှၤကျီၤဃာ် ဝံယံးရမံယၤအစုဒီး ထးကျီၤစု ဒီးဆှၢတ့ၢ်အီၤလၢ ဝ့ၢ်ရၤမါ ဒီးအဝဲအိၣ်ဘၣ်ဖဲန့ၣ်လၢ ပှၤလၢအဘၣ်တၢ်ဖီၣ်အီၤလၢ ဝ့ၢ်ယရူၤၡလ့ၣ် ဒီးယူဒၤအဟီၣ်ကဝီၤတဖၣ် အကျါလီၤ. ပှၤတဖၣ်န့ၣ် ကဘၣ်တၢ်က့ၤဖီၣ်အီၤဆူ ဘၤဘူၤလိၣ်လီၤ. ၂ ဘၣ်ဆၣ် အဆိကတၢၢ်န့ၣ် ပှၤခိးတၢ်ဖိအခိၣ် ကိးန့ၢ် ဝံယံးရမံယၤ ဒီးတဲအီၤလၢ “နကစၢ် ယဟိဝၤယွၤ တဲဆိပာ်စၢၤဝဲ ဘၣ်ဃးဒီး တၢ်နးတၢ်ဖှီၣ်လၢ ကလီၤဘၣ်လၢ တၢ်လီၢ်တတီၤအံၤလီၤ. ၃ ခီဖျိလၢ သုမၤကမၣ် ယဟိဝၤယွၤ ဒီးသုတဒိကနၣ် အကလုၢ်ဘၣ်အဃိ ယဟိဝၤယွၤ မၤဝဲဒ် အတဲပာ်စၢၤဝဲအသိးလီၤ. အဃိ တၢ်ကဲထီၣ်သးဒီးသု ဒ်အံၤလီၤ.+ ၄ တနံၤအံၤ ယကဃဲၣ်လီၤကွံာ် ထးကျီၤစုလၢ အအိၣ်လၢနစုလိၤ ဒီးနမ့ၢ်အဲၣ်ဒိး လဲၤပိာ်ယခံလၢ ဘၤဘူၤလိၣ်န့ၣ် ပကလဲၤဒီး ယကကွၢ်ထွဲနၤလီၤ. ဘၣ်ဆၣ် နမ့ၢ်တအဲၣ်ဒိး လဲၤပိာ်ယခံလၢ ဘၤဘူၤလိၣ်ဘၣ်န့ၣ် တဘၣ်လဲၤတဂ့ၤ. ကွၢ်မီၤ, ကီၢ်ဒီဘ့ၣ် အိၣ်လၢ နမဲာ်ညါအဃိ ကွၢ်လၢနကဃုထၢ တတီၤတီၤန့ၣ် နလဲၤဖဲန့ၣ်သ့လီၤ.”+
၅ တချုးဖဲ ဝံယံးရမံယၤ ဆၢတဲာ်အသးလၢ ကက့ၤဒံးဘၣ်အခါ စီၤနဘူစၢ်ရဒၣ် တဲအီၤလၢ “က့ၤကဒါက့ၤလၢ စီၤၡၤဖၣ်အလံၤ+ လၢအမ့ၢ် စီၤအဃံကၣ်အဖိခွါ+ စီၤကဒါလယၤအအိၣ်+ ဒီးအိၣ်ဒီးအီၤလၢ ပှၤဂီၢ်မုၢ်အကျါတက့ၢ်. ဘၤဘူၤလိၣ်အစီၤပၤ ပာ်ထီၣ်အီၤလၢ ကပၢဝဲယူဒၤအဝ့ၢ်တဖၣ်လီၤ. နမ့ၢ်တက့ၤဖဲန့ၣ်ဘၣ်န့ၣ် ကွၢ်လၢနကဃုထၢ တတီၤတီၤန့ၣ် နလဲၤဖဲန့ၣ်သ့လီၤ.”
ဒီးပှၤခိးတၢ်ဖိအခိၣ် ဟ့ၣ်လီၤအီၤ တၢ်အီၣ်တနီၤ ဒီးတၢ်ဟ့ၣ်တမံၤ ဒီးပျၢ်ကွံာ်အီၤလီၤ. ၆ အဃိ ဝံယံးရမံယၤ လဲၤလၢ စီၤအဃံကၣ်အဖိခွါ စီၤကဒါလယၤအအိၣ်လၢ ဝ့ၢ်မံးစပၤလီၤ.+ ဝံယံးရမံယၤ အိၣ်ဒီးစီၤကဒါလယၤ လၢပှၤဂီၢ်မုၢ်လၢ အအိၣ်တ့ၢ်ဒံးလၢ ယူဒၤအဟီၣ်ကဝီၤ အကျါလီၤ.
၇ လၢခံ သုးခိၣ်ခဲလၢာ် လၢအအိၣ်လၢ ပျီပူၤဃုာ်ဒီး အသုးဖိတဖၣ်န့ၣ် နၢ်ဟူဝဲလၢ ဘၤဘူၤလိၣ်အစီၤပၤ ပာ်ထီၣ်ဝဲ စီၤအဃံကၣ်အဖိခွါ စီၤကဒါလယၤလၢ ကပၢဝဲ ယူဒၤအဟီၣ်ကဝီၤလီၤ. စီၤပၤပာ်ထီၣ်အီၤလၢ ပှၤလၢအအိၣ်ဒံးလၢ ဟီၣ်ကဝီၤအပူၤလၢ တဘၣ်တၢ်က့ၤဖီၣ်အီၤလၢ ဘၤဘူၤလိၣ်ဘၣ်တဖၣ် အဖီခိၣ်လီၤ. ပှၤတဖၣ်န့ၣ် မ့ၢ်ဝဲပှၤဖှီၣ်ဖိယာ်ဖိလၢ အပၣ်ဃုာ်ဒီး ပှၤပိာ်ခွါ, ပှၤပိာ်မုၣ်, ဒီးဖိသၣ်တဖၣ်လီၤ.+ ၈ အဃိ သုးခိၣ်ခဲလၢာ် လဲၤဝဲလၢ စီၤကဒါလယၤအအိၣ်လၢ ဝ့ၢ်မံးစပၤအပူၤလီၤ.+ အဝဲသ့ၣ် မ့ၢ်ဝဲ စီၤနသၤနံယၤအဖိခွါ စီၤယံးၡမၤဧ့လး,+ စီၤကါရ့ၤအဖိခွါ စီၤယိဃၤနၣ်+ ဒီးစီၤယိနၤသၣ်, စီၤတ့ၣ်ဃူမ့းအဖိခွါ စီၤစရါယၤ, ပှၤနတိဖၤဖိ စီၤဧ့ၤဖ့ၤ အဖိခွါတဖၣ် ဒီးပှၤမၤကးဖိတဂၤ အဖိခွါ စီၤယၤစါနယၤလီၤ.+ ဒီးအဝဲသ့ၣ် ဟဲဝဲဒီး အသုးဖိတဖၣ်လီၤ. ၉ စီၤၡၤဖၣ်အလံၤ လၢအမ့ၢ် စီၤအဃံကၣ်အဖိခွါ စီၤကဒါလယၤန့ၣ် မၤတၢ်အၢၣ်လီၤဒီးအဝဲသ့ၣ်ဒီး အသုးဖိတဖၣ် ဒီးတဲအဝဲသ့ၣ်လၢ “တဘၣ်ဘၣ်ယိၣ်တၢ်လၢ သုဘၣ်မၤန့ၢ်တၢ်လၢ ပှၤက့ၤစ့းဖိ အဂီၢ်တဂ့ၤ. အိၣ်လၢကီၢ်ပူၤဒီး မၤတၢ်လၢ ဘၤဘူၤလိၣ် အစီၤပၤအဂီၢ်တက့ၢ်. သုမ့ၢ်မၤဒ်န့ၣ်န့ၣ် သုကအိၣ်ဘၣ် မုာ်မုာ်ခုၣ်ခုၣ်လီၤ.+ ၁၀ မ့မ့ၢ်ယၤန့ၣ် ယကဆဲးအိၣ်လၢ ဝ့ၢ်မံးစပၤအဃိ ဖဲပှၤက့ၤစ့းဖိ ဟဲလၢပအိၣ်အခါ ယကကဲပှၤခၢၣ်စးလၢ သုဂီၢ်လီၤ. ဘၣ်ဆၣ် သုကဘၣ်ပာ်ဖှိၣ် စပံးထံ, တၤသူတၤသၣ်တဖၣ်, သိ ဒီးပၢနုာ်အီၤလၢ တၢ်အဒၢတဖၣ်အပူၤ ဒီးအိၣ်ဆိးလၢ ဝ့ၢ်လၢ သုမၤန့ၢ်အီၤတဖၣ် အပူၤလီၤ.”+
၁၁ ဒီးပှၤယူဒၤဖိလၢ အအိၣ်ဝဲလၢ ကီၢ်မိၤအး, ကီၢ်ဧၣ်မိၣ်, ကီၢ်အဒိၣ် ဒီးကီၢ်အဂၤတဖၣ်အပူၤ ခဲလၢာ်န့ၣ် နၢ်ဟူစ့ၢ်ကီးဝဲလၢ ဘၤဘူၤလိၣ်အစီၤပၤ ပျဲအိၣ်ဒံး ပှၤတနီၤလၢ ယူဒၤအဟီၣ်ကဝီၤအပူၤ ဒီးအဝဲပာ်ထီၣ် စီၤၡၤဖၣ်အလံၤ လၢအမ့ၢ် စီၤအဃံကၣ်အဖိခွါ စီၤကဒါလယၤလၢ ကပၢဝဲ ပှၤတဖၣ်န့ၣ်လီၤ. ၁၂ အဃိ ပှၤယူဒၤဖိခဲလၢာ် ဟးထီၣ်ကွံာ်လၢ တၢ်လီၢ်တဖၣ်ဖဲ အဝဲသ့ၣ် ဘၣ်တၢ်မၤလီၤပြံလီၤပြါတ့ၢ်အီၤ ဒီးဟဲက့ၤကဒါက့ၤဝဲလီၤ. ဒီးအဝဲသ့ၣ် လဲၤလၢ စီၤကဒါလယၤအအိၣ် ဖဲဝ့ၢ်မံးစပၤလၢ ယူဒၤအဟီၣ်ကဝီၤအပူၤလီၤ. ဖဲန့ၣ် အဝဲသ့ၣ် ပာ်ဖှိၣ်စပံးထံဒီး တၤသူတၤသၣ် ဒီဒူၣ်လီၤ.
၁၃ ဒီးစီၤကါရ့ၤအဖိခွါ စီၤယိဃၤနၣ် ဒီးသုးခိၣ်ခဲလၢာ်န့ၣ် ဟဲဝဲလၢ စီၤကဒါလယၤအအိၣ် ဖဲဝ့ၢ်မံးစပၤလီၤ. ၁၄ အဝဲသ့ၣ် တဲဘၣ် စီၤကဒါလယၤလၢ “ပှၤဧၣ်မိၣ်ဖိ+ အစီၤပၤဘဧၤလံၣ် ဆှၢလီၤ စီၤနသၤနံယၤအဖိခွါ စီၤယံးၡမၤဧ့လးလၢ ကမၤသံနၤန့ၣ် နတသ့ၣ်ညါဧီၤ.”+ ဘၣ်ဆၣ် စီၤအဃံကၣ်အဖိခွါ စီၤကဒါလယၤ တနာ်အဝဲသ့ၣ်ဘၣ်.
၁၅ ဒီးစီၤကါရ့ၤအဖိခွါ စီၤယိဃၤနၣ် တဲခူသူၣ် စီၤကဒါလယၤလၢ ဝ့ၢ်မံးစပၤအပူၤလၢ “ယအဲၣ်ဒိးလဲၤမၤသံ စီၤနသၤနံယၤအဖိခွါ စီၤယံးၡမၤဧ့လး ဒီးယမ့ၢ်မၤန့ၣ် ပှၤတသ့ၣ်ညါချုးဝဲ နီတဂၤဘၣ်. ပတကြၢးဟ့ၣ်အခွဲးလၢ အကမၤသံနၤဘၣ်. အမ့ၢ်မၤသံနၤန့ၣ် ယူဒၤအပှၤဂီၢ်မုၢ်လၢ အဟဲပာ်ဖှိၣ်ထီၣ်အသးလၢ နအိၣ်န့ၣ် ကလီၤပြံလီၤပြါကွံာ်ဝဲ ခဲလၢာ် ဒီးယူဒၤအပှၤဂီၢ်မုၢ်လၢ အအိၣ်တ့ၢ်ဒံးအဂၤတဖၣ်န့ၣ် ကသံကွံာ်ဝဲလီၤ.” ၁၆ ဘၣ်ဆၣ် စီၤအဃံကၣ်+ အဖိခွါ စီၤကဒါလယၤ တဲဘၣ် စီၤကါရ့ၤအဖိခွါ စီၤယိဃၤနၣ်လၢ “တဘၣ်မၤတဂ့ၤ. တၢ်လၢနတဲဘၣ်ဃးဒီး စီၤယံးၡမၤဧ့လးန့ၣ် တမ့ၢ်တတီဘၣ်.”