ယံးရမံယၤ
၄၆ ဘၣ်ဃးဒီး ပှၤကလုာ်တဖၣ်န့ၣ် ယဟိဝၤယွၤ တဲဘၣ် ဝံယံးရမံယၤလၢ+ ၂ တၢ်ကစီၣ်လၢအဘၣ်ဃးဒီး ကီၢ်အဲၤကူပတူး+ ဒီးအဲၤကူပတူး အစီၤပၤဖၤရိၤနကိၤ+ အသုးမုၢ်အဂ့ၢ်န့ၣ် အိၣ်ဝဲဒ်လၢလာ်အံၤသိးလီၤ. ဖဲယူဒၤအစီၤပၤ စီၤယိၤၡံယၤအဖိခွါ စီၤယဟိၤယါကံၣ်+ ပၢတၢ် လွံၢ်နံၣ်တနံၣ်န့ၣ် ဘၤဘူၤလိၣ် အစီၤပၤနဘူၤကးန့စၢ် မၤနၢၤတ့ၢ် ဖၤရိၤနကိၤတဂၤအံၤ ဖဲဝ့ၢ်ကၢ်ကမံၣ်လၢ အဘူးဒီး ထံကျိဖရၤသးလီၤ. တၢ်ကစီၣ်န့ၣ် မ့ၢ်ဝဲ
၃ “ကတဲာ်ကတီၤထီၣ် ကတီၤဖိတဖၣ်* ဒီးကတီၤဖးဒိၣ်တဖၣ်
ဒီးလဲၤထီၣ်ဒုးတၢ်တက့ၢ်.
၄ ပှၤဒိးကသ့ၣ်ဖိသ့ၣ်ဧၢ, ကတဲာ်ကတီၤထီၣ် ကသ့ၣ်တဖၣ် ဒီးဒိးထီၣ်အီၤတက့ၢ်.
ဖျီၣ်ထီၣ်သုခိၣ်ဖျီၣ်သုး ဒီးဟံးန့ၢ် သုလီၢ်တက့ၢ်.
ထူးကပီၤထီၣ် ဘီဖိတဖၣ် ဒီးကၤထီၣ် သုဆ့ကၤသုးတက့ၢ်.
၅ ‘ဘၣ်မနုၤအဃိ ယထံၣ်လၢ အဝဲသ့ၣ် ပှဲၤဒီးတၢ်ပျံၤတၢ်ဖုးလဲၣ်.
အဝဲသ့ၣ် ဂုၤက့ၤဆူ အလီၢ်ခံ ဒီးအသုးဖိလၢ အဂံၢ်ဆူၣ်ဘါဆူၣ်တဖၣ်န့ၣ် ဘၣ်တၢ်မၤနၢၤအီၤလီၤ.
အဝဲသ့ၣ် ဃ့ၢ်ဝဲလၢ တၢ်ပျံၤတၢ်ဖုးအပူၤ ဒီးအသုးဖိလၢ အဂံၢ်ဆူၣ်ဘါဆူၣ်တဖၣ်န့ၣ် တဃၣ်လီၤက့ၤဆူ တၢ်လီၢ်ခံလၢၤဘၣ်.
ဒီးတၢ်ပျံၤတၢ်ဖုးန့ၣ် အိၣ်ဝးတရံး အဝဲသ့ၣ်လီၤ.’ ယဟိဝၤယွၤ တဲဝဲဒ်န့ၣ်လီၤ.
၆ ‘ပှၤလၢအဃ့ၢ်ချ့တဖၣ် ဃ့ၢ်တကဲလၢၤဘၣ် ဒီးပှၤသုးဖိလၢ အဂံၢ်ဆူၣ်ဘါဆူၣ်တဖၣ် ဃ့ၢ်ပူၤဖျဲးအသး တသ့ဘၣ်.
လၢကလံၤစိးတခီ ဖဲထံကျိဖရၤသး အကၢၢ်နံၤန့ၣ်
အဝဲသ့ၣ် အခီၣ်ဘၣ်တိၢ်ဒီး လီၤဃံၢ်ဝဲလီၤ.’+
၇ ပှၤလၢအဟဲထီၣ်ဝဲ ဒ်ထံကျိနံၤလါအသိး
ဒီးဒ်ထံကျိတဖၣ်လၢ အယွၤလီၤ ဆူၣ်ဆူၣ်အသိးန့ၣ် မ့ၢ်မတဂၤလဲၣ်.
၈ ပှၤလၢအဟဲထီၣ်ဝဲ ဒ်ထံကျိနံၤလါအသိး+
ဒီးဒ်ထံကျိတဖၣ်လၢ အယွၤလီၤ ဆူၣ်ဆူၣ်အသိးန့ၣ် မ့ၢ်ဝဲ အဲၤကူပတူးလီၤ.
အဲၤကူပတူး တဲဝဲလၢ ‘ယကဟဲထီၣ်ဒီး လုၢ်ဘၢဟီၣ်ခိၣ်လီၤ.
ယကမၤဟးဂီၤ ဝ့ၢ်ဒီး ပှၤအိၣ်လၢ အပူၤတဖၣ်လီၤ.’
၉ ကသ့ၣ်တဖၣ်ဧၢ, လဲၤဃ့ၢ်ထီၣ်သၢၤ.
လ့ၣ်ကဟၣ်သ့ၣ်ဧၢ, လဲၤသဖှိတၢ် ဆူၣ်ဆူၣ်သၢၤ.
ပှၤသုးဖိလၢ အဂံၢ်ဆူၣ်ဘါဆူၣ်သ့ၣ်ဧၢ, လဲၤထီၣ်ဆူညါသၢၤ.
၁၀ “တၢ်တနံၤန့ၣ် မ့ၢ်ဝဲ တၢ်ပၢကစၢ် လၢအမ့ၢ် တၢ်သုးမုၢ်ဂီၢ်မုၢ်အကစၢ် ယဟိဝၤယွၤ အမုၢ်နံၤလၢ အဝဲကဟ့ၣ်ကၣ်က့ၤ အဒုၣ်အဒါတဖၣ်လီၤ. မ့ၢ်လၢ တၢ်ပၢကစၢ် လၢအမ့ၢ် တၢ်သုးမုၢ်ဂီၢ်မုၢ်အကစၢ် ယဟိဝၤယွၤန့ၣ် ကကတဲာ်ကတီၤ တၢ်လုၢ်တခါလၢ ထံကျိဖရၤသးအကပၤ+ လၢအအိၣ်လၢ ကီၢ်လၢကလံၤစိးတခီ အဃိ နးကအီၣ် အဝဲသ့ၣ် ဘျဲဘျဲ ဒီးကအီ အဝဲသ့ၣ် အသွံၣ်ဘျဲဘျဲလီၤ.
၁၁ ပှၤလၢအအိၣ်လၢ ကီၢ်အဲၤကူပတူးအပူၤသ့ၣ်ဧၢ,
လဲၤဟံးန့ၢ် သ့ၣ်စရံအထုး လၢ ကံးလဧး အဟီၣ်ကဝီၤသၢၤ.+
တၢ်ကူစါယါဘျါ လၢသုဂီၢ် တအိၣ် နီတမံၤဘၣ်+ အဃိ
သုသူကသံၣ်ကသီအါအါ သနာ်က့ အကဲ တၢ်ကလီကလီလီၤ.
၁၂ ပှၤကလုာ်တဖၣ် နၢ်ဟူဘၣ် သု တၢ်မဲာ်ဆှးအဂ့ၢ်+
ဒီးသုတၢ်ဟီၣ်ကိးပသူထီၣ်န့ၣ် ဟူထီၣ်လၢ ကီၢ်ဒီဘ့ၣ်ညါအပူၤလီၤ.
ပှၤသုးဖိလၢ အဂံၢ်ဆူၣ်ဘါဆူၣ်တဖၣ် ဘၣ်တိဘၣ်ထံးလိာ်သး တဂၤဒီးတဂၤ
ဒီးအဝဲသ့ၣ် လီၤဃံၢ်ဝဲ တပူၤဃီလီၤ.”
၁၃ ဘၣ်ဃးဒီး ဘၤဘူၤလိၣ် အစီၤပၤနဘူၤကးန့စၢ် ကဟဲမၤနၢၤ ကီၢ်အဲၤကူပတူးအဂ့ၢ်န့ၣ် ယဟိဝၤယွၤ တဲဘၣ် ဝံယံးရမံယၤ ဒ်အံၤလီၤ.+
၁၄ “တဲဖျါထီၣ် တၢ်ကစီၣ်အံၤလၢ ကီၢ်အဲၤကူပတူးအပူၤ ဒီးတဲဖျါထီၣ်အီၤလၢ မံးကဒိးလး အပူၤတက့ၢ်.+
တဲဖျါထီၣ်အီၤလၢ ဝ့ၢ်နိဖး ဒီးဝ့ၢ်တၤပါန့ၤ+ အပူၤတက့ၢ်.
တဲလၢ ‘နးတဘ့ၣ် ကအီၣ်ကွံာ်ပှၤလၢ သုဃၢၤဝးဝးအဃိ
အိၣ်ကတဲာ်ကတီၤသုသး ဒီးဟံးန့ၢ် သုလီၢ်တက့ၢ်.
၁၅ ဘၣ်မနုၤအဃိ သုပှၤသုးဖိလၢ အဂံၢ်ဆူၣ်ဘါဆူၣ်တဖၣ် သံဝဲ ခဲလၢာ်ခဲဆ့လဲၣ်.
မ့ၢ်လၢ ယဟိဝၤယွၤ ဆီၣ်လီၤ အဝဲသ့ၣ် အဃိ
အဝဲသ့ၣ် ဆၢထၢၣ်ကျၢၤကျၢၤ တန့ၢ်ဘၣ်.
၁၆ အဝဲသ့ၣ် ဘၣ်တိဘၣ်ထံးဒီး လီၤဃံၢ်ဝဲအါအါဂီၢ်ဂီၢ် အဃိ
အဝဲသ့ၣ် တဲလိာ်အသး တဂၤဒီး တဂၤလၢ
“ခီဖျိလၢ နးလၢအလီၤပျံၤလီၤဖုး တဘ့ၣ်န့ၣ်အဃိ
ပကက့ၤဃ့ၢ်လၢ ပပှၤကလုာ် ဒီးပနီၢ်ကစၢ်အကီၢ်လီၤ.”’
၁၇ ဖဲန့ၣ်န့ၣ် အဝဲသ့ၣ် တဲဖျါထီၣ်လၢ
‘အဲၤကူပတူး အစီၤပၤဖၤရိၤန့ၣ် အိၣ်ဒၣ် အတဲတၢ်လီၤ.
အတမၤ တၢ်နီတမံၤဘၣ်.’+
၁၈ စီၤပၤလၢ အမံၤမ့ၢ် တၢ်သုးမုၢ်ဂီၢ်မုၢ်အကစၢ် ယဟိဝၤယွၤန့ၣ် တဲဝဲလၢ ‘ဒ်ယမ့ၢ်ပှၤလၢ အမူဝဲသပှၢ်တၢၢ်အသိး ယအၢၣ်လီၤလၢ
အဝဲ* ကဟဲနုာ်လီၤဝဲ ဒီးအကလီၤဂာ် ဒ်သိးဒီး ကစၢၢ်တၤဘိၢ်လၢ+ အဖျါလီၤဆီလၢ ကစၢၢ်တဖၣ်အကျါ
ဒီးကစၢၢ်ကၢ်မ့ၤလးလၢ+ အအိၣ်ဘူးဒီး ပီၣ်လဲၣ်လီၤ.
၁၉ ပှၤလၢအအိၣ်လၢ ကီၢ်အဲၤကူပတူး အပူၤသ့ၣ်ဧၢ,
ကတဲာ်ကတီၤထီၣ် သုတၢ်ဘံၣ်တၢ်ဘိၣ်လၢ ပှၤကက့ၤဖီၣ်သု အဂီၢ်တက့ၢ်.
ဝ့ၢ်နိဖး ကကဲထီၣ် တၢ်လီၤပျံၤ လီၤဖုးအလီၢ်,
ကဘၣ်တၢ်ဒွဲၣ်အူထီၣ်ကွံာ်အီၤ ဒီးပှၤတအိၣ်လၢအပူၤ နီတဂၤ လၢၤဘၣ်.+
၂၀ အဲၤကူပတူးန့ၣ် လီၤဂာ်ဒ်သိးဒီး ကျီၢ်မိၢ်ကနီဖိလၢ အဃံအလၤတဒု
ဘၣ်ဆၣ် ပကိာ်ဃၢ်တဖၣ်လၢ ကလံၤစိးတခီန့ၣ် ကဟဲအ့ၣ်အီၤလီၤ.
၂၁ ဒီးပှၤသုးဖိလၢ အငါဝဲလၢ အအိၣ်ဖဲန့ၣ်တဖၣ်န့ၣ် လီၤဂာ်ဒ်သိးဒီး ကျီၢ်ဖိလၢ အဘီၣ်အုၣ်တဖၣ်လီၤ.
အဝဲသ့ၣ်စ့ၢ်ကီး ဃၣ်အသးဒီး ဃ့ၢ်ကွံာ်ဝဲ တပူၤဃီ ဒ်သိးသိးလီၤ.
မ့ၢ်လၢ တၢ်ကီတၢ်ခဲဖးဒိၣ်အမုၢ်နံၤ တုၤအိၣ်အဝဲသ့ၣ်
ဒီးတၢ်ဆၢကတီၢ်ဟဲတုၤဝဲလၢ အဝဲသ့ၣ် ကဘၣ်တၢ်စံၣ်ညီၣ်အဃိ
အဝဲသ့ၣ် ဆၢထၢၣ်ကျၢၤကျၢၤ တန့ၢ်ဘၣ်.’+
၂၂ ‘အဲၤကူပတူး အကလုၢ်သီၣ်လီၤဂာ်ဒ် ဂုၢ်တဘိလၢ အဘျိၣ်ဒီးသီၣ်ဝဲ ၡူၤၡူၤအသိး,
မ့ၢ်လၢ ဒုၣ်ဒါလၢ အဂံၢ်ဆူၣ်ဘါဆူၣ်တဖၣ် လဲၤလူၤအီၤဒီးကွါတဖၣ်
ဒ်ပှၤကူာ်လီၤသ့ၣ်ထူၣ်တဖၣ် အသိးလီၤ.’
၂၃ ယဟိဝၤယွၤ တဲဝဲလၢ ‘အဲၤကူပတူးအပှၢ် မ့ၢ်ဖျါလၢ အတီၣ်တုၤလၢ ပှၤလဲၤနုာ်ဖျိတပၢၢ်ဘၣ် သနာ်က့ အဒုၣ်အဒါတဖၣ်န့ၣ်
မ့ၢ်လၢ အနီၣ်ဂံၢ်အိၣ်အါ တုၤလၢ ပှၤဂံၢ်အီၤ တလၢာ်ဘၣ်ဒီး အနီၣ်ဂံၢ်အိၣ်အါန့ၢ်ဒံး ဒွဲၣ်တဖၣ်အဃိ အဝဲသ့ၣ် ကကျီကွံာ်ဝဲ အပှၢ်လီၤ.
၂၄ ပှၤလၢအအိၣ်လၢ ကီၢ်အဲၤကူပတူးအပူၤန့ၣ် ကဘၣ်တၢ်မၤမဲာ်ဆှး အီၤလီၤ.
ဒီးတၢ်ကဟ့ၣ်လီၤကွံာ်အဝဲသ့ၣ်လၢ ပှၤဂီၢ်မုၢ်လၢ အအိၣ်လၢ ကလံၤစိးတခီ အစုပူၤလီၤ.’+
၂၅ “တၢ်သုးမုၢ်ဂီၢ်မုၢ်အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် တဲဝဲလၢ ‘ခဲအံၤန့ၣ် ယကစံၣ်ညီၣ် အၤမိၣ်+ လၢအမ့ၢ်ဝ့ၢ်နိ+ အယွၤ, ဖၤရိၤ, အဲၤကူပတူး ဒီးအဲၤကူပတူး အယွၤတဖၣ်+ ဒီးအစီၤပၤတဖၣ်လီၤ. မ့ၢ်လံ, ယကစံၣ်ညီၣ် ဖၤရိၤဒီးပှၤလၢ အသန့ၤအသးလၢအီၤ ကိးဂၤဒဲးလီၤ.’+
၂၆ “ယဟိဝၤယွၤ တဲဝဲလၢ ‘ယကဟ့ၣ်လီၤကွံာ် အဝဲသ့ၣ်လၢ ပှၤလၢအဃုမၤသံ အဝဲသ့ၣ်တဖၣ် အစုပူၤ, လၢဘၤဘူၤလိၣ်အစီၤပၤ နဘူၤကးန့စၢ်+ ဒီးအခ့အပှၤတဖၣ် အစုပူၤလီၤ. ဘၣ်ဆၣ် လၢခံန့ၣ် ပှၤကအိၣ်ကဒါက့ၤလၢ ကီၢ်အဲၤကူပတူးအပူၤ ဒ်လၢညါအသိးလီၤ.’+
၂၇ ‘ယခ့ယပှၤ စီၤယၤကိာ် အစၢၤအသွဲၣ်ဧၢ, ပျံၤတၢ်တဂ့ၤ.
ပှၤအံၣ်စရ့လးဖိသ့ၣ်ဧၢ, ပျံၤတၢ် ဖုးတၢ်တဂ့ၤ.+
ယကမၤပူၤဖျဲးသုလၢ တၢ်လီၢ်အယံၤ
ဒီးယကမၤပူၤဖျဲး သုစၢၤသုသွဲၣ်လၢ တၢ်လီၢ်လၢ ပှၤက့ၤဖီၣ်သု အလီၢ်လီၤ.+
စီၤယၤကိာ် အစၢၤအသွဲၣ် ကဟဲက့ၤဘၣ်ဝဲ ဒီးကအိၣ်ဘၣ်ဝဲ မုာ်မုာ်ခုၣ်ခုၣ် ဒီးတၢ်တမၤတံာ်တာ် အဝဲသ့ၣ် နီတမံၤဘၣ်.
ဒီးပှၤတမၤပျံၤမၤဖုး အဝဲသ့ၣ် နီတဂၤလၢၤဘၣ်.+
၂၈ ယဟိဝၤယွၤ တဲဝဲလၢ “ယခ့ယပှၤ စီၤယၤကိာ်အစၢၤအသွဲၣ်ဧၢ, ပျံၤတၢ်တဂ့ၤ. ယကအိၣ်ဒီးသုလီၤ.
ဒီးယကမၤဟးဂီၤကွံာ် ကယဲၢ် ပှၤကလုာ်တဖၣ်လၢ ယမၤ လီၤပြံလီၤပြါသုလၢ အကျါ+
ဘၣ်ဆၣ် မ့မ့ၢ်သုန့ၣ် ယတမၤဟးဂီၤသုဘၣ်.+
ယကသိၣ်က့ၤသီက့ၤသု ဖဲအကြၢးဝဲဘၣ်ဝဲ+
ဒီးလ့ၤတက့ၤ ယတပျဲပူၤသုလၢ တၢ်သိၣ်ဃီၣ်ဘၣ်.”’