ယံးရမံယၤ
၄၈ တၢ်သုးမုၢ်ဂီၢ်မုၢ်အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤန့ၣ် တဲဝဲဘၣ်ဃးဒီး ကီၢ်မိၤအး+ အဂ့ၢ်လၢ
“ဝ့ၢ်နဘိ ဘၣ်တၢ်မၤဟးဂီၤအီၤလံ+ အဃိ လီၤသးအုးလၢ အဂီၢ် ဒိၣ်မးလီၤ.
ဝ့ၢ်ကံးရယးသံၣ်+ ဘၣ်တၢ်မၤန့ၢ်အီၤ ဒီးအပှၤဝ့ၢ်ဖိတဖၣ် ဘၣ်တၢ် မၤမဲာ်ဆှးအီၤလီၤ.
ဒီးတၢ်အိၣ်သဒၢအလီၢ်န့ၣ် လီၤကလဲဝဲ ဒီးပှၤအိၣ်ဖဲန့ၣ်တဖၣ် ဒိးန့ၢ်ဘၣ်တၢ်မဲာ်ဆှးလီၤ.+
၂ ပှၤတပတြၢၤ ကီၢ်မိၤအးလၢၤဘၣ်.
ဒုၣ်ဒါတဖၣ် ကူၣ်ထီၣ်တၢ်လၢ ဝ့ၢ်ဃ့ၡဘိၣ်အပူၤ+ ဒ်သိး ကမၤဟးဂီၤအီၤအဂီၢ်
ဒီးတဲလၢ ‘ဟဲသၢၤ, ပကမၤဟးဂီၤကွံာ်အီၤ ဒီတကလုာ်.’
မးဒမၣ်ဧၢ, နးလူၤပိာ်နခံလံအဃိ
အိၣ်ဃိဒိသၢၤ.
၃ တၢ်ဟီၣ်ကိးပသူ သီၣ်ထီၣ်ဝဲလၢ ဃိရနဲၣ်အတၢ်လီၢ်,+
မ့ၢ်လၢ တၢ်ဟးဂူာ်ဟးဂီၤ ဒီးတၢ်မၤဟးဂီၤတၢ်ဖးဒိၣ် လီၤဘၣ်အီၤ အဃိလီၤ.
၄ ကီၢ်မိၤအး ဟးဂီၤကွံာ်ဝဲလံ.
အဖိဆံးတဖၣ် ဟီၣ်ကိးပသူထီၣ်လံ.
၅ ဖဲအဝဲသ့ၣ်လဲၤထီၣ်လၢ လူဃံးအခါ အဝဲသ့ၣ် လဲၤတခီခီ ဟီၣ်တခီခီလီၤ.
ဒီးဖဲအဝဲသ့ၣ် အိၣ်ဟဲလီၤလၢ ဃိရနဲၣ်အခါ အဝဲသ့ၣ် နၢ်ဟူဘၣ် တၢ်ကိးပသူထီၣ်လၢ တၢ်မၤဟးဂီၤတၢ် အဃိလီၤ.+
၆ ဃ့ၢ်, ဃ့ၢ်ပူၤဖျဲးကွံာ်သုသးတက့ၢ်.
သုကဘၣ် ကဲထီၣ် ဒ်သိးဒီး သ့ၣ်ကၠူနံးဖၢၤတထူၣ်လၢ ပှၢ်မုၢ်ကနၢအပူၤလီၤ.
၇ ခီဖျိလၢ သုသန့ၤသုသးလၢ တၢ်လၢသုမၤတဖၣ် ဒီးသုတၢ်လုၢ်ဒိၣ်ပှ့ၤဒိၣ်တဖၣ် အဃိ
သုကဘၣ် တၢ်ဖီၣ်န့ၢ်သု စ့ၢ်ကီးလီၤ.
သုယွၤလၢအမ့ၢ် ကမိၣ်,+
အပှၤလုၢ်တၢ်ဒိၣ်တဖၣ် ဃုာ်ဒီး အပဒိၣ်ဖးဒိၣ်တဖၣ်န့ၣ် ကဘၣ် တၢ်က့ၤဖီၣ်အီၤလီၤ.
၈ ပှၤမၤဟးဂီၤတၢ်ဖိ ကဟဲနုာ်လီၤလၢ ဝ့ၢ်ကိးဖျၢၣ်ဒဲးအပူၤ
ဒီးဝ့ၢ်တပူၤဖျဲး နီတဖျၢၣ်ဘၣ်.+
တၢ်တြီၤ ကဟးဂီၤကွံာ်ဝဲ
ဒီးတၢ်ပၢၤခိၣ် ကဘၣ်တၢ်မၤဟးဂီၤအီၤ ဒ်ယဟိဝၤယွၤ တဲပာ်စၢၤဝဲ အသိးလီၤ.
၉ ဖဲမိၤအးအဝ့ၢ်တဖၣ် ဟးဂီၤကွံာ်ဝဲအခါ အပှၤဝ့ၢ်ဖိတဖၣ် ကဃ့ၢ်ကွံာ်ဝဲလီၤ.
အဃိ ပာ်လီၤ ကျဲအတၢ်ပနီၣ်တမံၤလၢ ပှၤမိၤအးဖိအဂီၢ်တက့ၢ်.
အဝ့ၢ်တဖၣ် ကကဲထီၣ် တၢ်လီၤပျံၤလီၤဖုးအလီၢ်
ဒီးပှၤတအိၣ်လၢအပူၤ နီတဂၤလၢၤဘၣ်.+
၁၀ ပှၤလၢ ယဟိဝၤယွၤ ဟ့ၣ်လီၤအီၤ မူဒါ ဒီးအမၤဝဲကၢၣ်ခုကၢၣ်ခုန့ၣ် ကဘၣ်ဆိၣ်အၢလီၤ.
ဒီးပှၤလၢ အထုးကွံာ်အနးလၢ ကလူလီၤတၢ်သွံၣ်အဂီၢ်န့ၣ် ကဘၣ်ဆိၣ်အၢလီၤ.
၁၁ ဒ်စပံးထံလၢ အလီၤဒးဝဲအသိး ပှၤမိၤအးဖိတဖၣ်န့ၣ် စးထီၣ်လၢ အသးစၢ်ခါလံၤလံၤ
အတဘၣ် တၢ်မၤတံာ်တာ်အီၤ နီတမံၤဘၣ်.
ဒီးဒ်စပံးထံလၢ ပှၤတလူလီၤအီၤလၢ တၢ်အဒၢ တဖျၢၣ်ဝံၤတဖျၢၣ် အပူၤဘၣ်အသိး
ပှၤမိၤအးဖိတဖၣ် တဘၣ်တၢ်က့ၤဖီၣ်အဝဲသ့ၣ် နီတဘျီဒံးဘၣ်.
အဃိ အဝဲသ့ၣ် အတၢ်ဝံၣ်တၢ်ဆၢ အိၣ်ဝဲဒ် အလီၢ်လီၢ်
ဒီးအတၢ်နၢအစိစ့ၢ်ကီး တဆီတလဲဝဲဘၣ်.
၁၂ “ယဟိဝၤယွၤ တဲဝဲလၢ ‘အဃိ တၢ်ဆၢကတီၢ် ကဟဲဝဲဖဲ ယကဆှၢလီၤပှၤလၢ ကလဲၤမၤလီၤတကျၢၢ် အဝဲသ့ၣ်လီၤ. ပှၤတဖၣ်န့ၣ် ကမၤလီၤတကျၢၢ်ကွံာ် အဝဲသ့ၣ် ဒီးကလူလီၤကွံာ် ကယဲၢ်တၢ်အိၣ်လၢ တၢ်အဒၢပူၤခဲလၢာ် ဒီးပှၤတဖၣ်န့ၣ် ကမၤသ့ၣ်ဖး ထံဒၢဖးဒိၣ်တဖၣ် တက့ဘၣ်တက့လီၤ. ၁၃ ဒီးပှၤမိၤအးဖိတဖၣ် ကမဲာ်ဆှးလၢ အဝဲသ့ၣ်အယွၤ လၢအမ့ၢ် ကမိၣ် လၢအနာ်န့ၢ်ဝဲအဃိ ဒ်ပှၤအံၣ်စရ့လးဖိ မဲာ်ဆှးလၢ အယွၤတဖၣ်လၢ အနာ်န့ၢ်ဝဲ ဖဲဝ့ၢ်ဘ့ၤသ့လးအပူၤ အသိးလီၤ.+
၁၄ သုတဲလၢ “ပမ့ၢ်ပှၤသုးဖိလၢ အဂံၢ်ဆူၣ်ဘါဆူၣ် ဒီးအိၣ်ကတဲာ်ကတီၤသးလၢ တၢ်ဒုးအဂီၢ်” ဘူၣ်ဒ်လဲၣ်.’+
၁၅ ‘ကီၢ်မိၤအး ဘၣ်တၢ်မၤဟးဂီၤ အီၤလံ,
ပှၤနုာ်လီၤဒုး မိၤအးအဝ့ၢ်တဖၣ်+
ဒီးအပှၤလၢ အဂံၢ်ဆူၣ်ဘါဆူၣ်ကတၢၢ်တဖၣ် ဘၣ်တၢ်မၤသံ အီၤလံ.’+
စီၤပၤလၢအမ့ၢ် တၢ်သုးမုၢ်ဂီၢ်မုၢ် အကစၢ် ယဟိဝၤယွၤ တဲဝဲဒ်န့ၣ်လီၤ.+
၁၆ ပှၤမိၤအးဖိ ကဘၣ် တၢ်နးတၢ်ဖှီၣ်န့ၣ် ဘူးထီၣ်လံ
ဒီးအတၢ်ဟးဂီၤန့ၣ် ကဟဲဝဲ ချ့ချ့လီၤ.+
၁၇ ပှၤလၢအအိၣ်ဝးတရံး အဝဲသ့ၣ် ဒီးပှၤလၢအသ့ၣ်ညါ အဝဲသ့ၣ်အဂ့ၢ်န့ၣ်
ကသးကညီၤ အဝဲသ့ၣ်လီၤ.
တဲအဝဲသ့ၣ်လၢ ‘နီၣ်တီၢ်လၢ အစိကမီၤဒိၣ် ဒီးနီၣ်ထိးဘိလၢ အဃံအလၤန့ၣ် ကၢ်ကွံာ်လံ.’
၁၈ ဖိမုၣ်လၢ အအိၣ်ဝဲဆိးဝဲလၢ ဝ့ၢ်ဒံၤဘိၣ်ဧၢ,+
ဟးထီၣ်ကွံာ်လၢ နလီၢ်နလၤ ဒီးဆ့ၣ်နီၤလၢ နလီၤဘဲအီထံ* အဃိန့ၣ်တက့ၢ်.
ပှၤလၢ အမၤဟးဂီၤ ကီၢ်မိၤအးန့ၣ် ဟဲဒုးနၤလံ.
ဒီးအဝဲ ကမၤဟးဂီၤကွံာ် နတၢ်လီၢ်တဖၣ်လၢ အဘၣ်တၢ်သူၣ်ထီၣ်အီၤ ကျၢၤကျၢၤလီၤ.+
၁၉ ပှၤလၢအအိၣ်လၢ ဝ့ၢ်ဧရိၤဧ့ၢ်အပူၤဧၢ,+ ဆၢထၢၣ်ကွၢ်တၢ်လၢ ကျဲကပၤတက့ၢ်.
သံကွၢ် ပှၤပိာ်ခွါလၢ အဃ့ၢ် ဒီးပှၤပိာ်မုၣ်လၢ အဃ့ၢ်ပူၤဖျဲးအသးန့ၣ်လၢ ‘တၢ်မနုၤကဲထီၣ်သးလဲၣ်.’
၂၀ ပှၤမိၤအးဖိ ဘၣ်တၢ်မၤမဲာ်ဆှးအီၤ ဒီးဘၣ်တၢ်မၤပျံၤမၤဖုးအီၤလီၤ.
ဟီၣ်တၢ်ယၢၤတၢ် ဒီးဟီၣ်ကိးပသူထီၣ်တက့ၢ်.
လၢအၢ်နိၣ်အတၢ်တြီၤန့ၣ်+ တဲဖျါထီၣ်လၢ ပှၤမိၤအးဖိ ဘၣ်တၢ်မၤဟးဂီၤအီၤလံ.
၂၁ “ကစၢ်ယွၤ စံၣ်ညီၣ် တၢ်ပၢၤခိၣ်လံ.+ အဝဲစံၣ်ညီၣ် ဝ့ၢ်ဟိလိၣ်, ဝ့ၢ်ယါစၤ,+ ဝ့ၢ်မ့ဖၤ,+ ၂၂ ဝ့ၢ်ဒံၤဘိၣ်,+ ဝ့ၢ်နဘိ,+ ဝ့ၢ်ဘ့ၤသဒံးဘလၤသံၣ်, ၂၃ ဝ့ၢ်ကံးရယးသံၣ်,+ ဝ့ၢ်ဘ့ၤသကၤမူလး, ဝ့ၢ်ဘ့ၤသမဧိၣ်,+ ၂၄ ဝ့ၢ်ကရံယိး+ ဒီးဝ့ၢ်ဘိးစရၤလီၤ. ဒီးဝ့ၢ်တဖၣ်လၢ အအိၣ်လၢ ကီၢ်မိၤအးအပူၤ လၢအယံၤမ့ၢ်ဂ့ၤ လၢအဘူးမ့ၢ်ဂ့ၤ အဝဲစံၣ်ညီၣ်ဝဲ ခဲလၢာ်လီၤ.
၂၅ ယဟိဝၤယွၤ တဲဝဲလၢ ‘မိၤအး အတၢ်ဂံၢ်တၢ်ဘါန့ၣ်* ဘၣ်တၢ်ကျီတဲာ်ကွံာ်အီၤလံ.
အစု ကၢ်ကွံာ်ဝဲလံ.’
၂၆ ‘မ့ၢ်လၢ အဝဲပာ်ထီၣ်ထီအသး လၢကထီဒါ ယဟိဝၤယွၤ+ အဃိ ဒုးအီမူၤအီၤတက့ၢ်.+
မိၤအး လံာ်လူာ်အသးလၢ အနီၢ်ကစၢ် အဘှိးအကျါ
ဒီးပှၤတဲဆါအီၤလံ.
၂၇ နတဲဆါ ပှၤအံၣ်စရ့လးဖိ တမ့ၢ်ဧီၤ.+
နဂံၤဂုၤ နခိၣ်သၣ်ဃံဒီး နတဲအၢ တဲသီအီၤန့ၣ်
မ့ၢ်ခီဖျိလၢ နထံၣ်အီၤလၢ တၢ်ဟုၣ်တၢ်ဘျၣ်တဖၣ် အကျါအဃိဧါ.
၂၈ ပှၤလၢအအိၣ်လၢ ကီၢ်မိၤအးအပူၤသ့ၣ်ဧၢ, ဟးထီၣ်ကွံာ်လၢ ဝ့ၢ်တဖၣ်အပူၤ ဒီးလဲၤအိၣ်လၢ လၢၢ်ဧိၤလ့ဧိၤ အလိၤတက့ၢ်.
ဒီးကဲထီၣ်ဒ်သိးဒီး ထိၣ်လွံၢ်တဘ့ၣ်လၢ အတ့ထီၣ်အသွံလၢ တၢ်တြီၤအကပၤန့ၣ်တက့ၢ်.’”
၂၉ “ပနၢ်ဟူဘၣ်ဃးဒီး ပှၤမိၤအးဖိ အတၢ်ပာ်ထီၣ်ထီသး အဂ့ၢ်လီၤ. ပှၤမိၤအးဖိ ပာ်ထီၣ်ထီ အသးဒိၣ်မးလီၤ.
ပနၢ်ဟူဘၣ်ဃးဒီး ပှၤမိၤအးဖိ အတၢ်ပာ်ဒိၣ်အသး, အတၢ်ပာ်ထီၣ်ထီသး, အတၢ်ပာ်ကဖၢလၢသးအဂ့ၢ် ဒီးအတၢ်ပာ်ဒိၣ်ပာ်ထီသး အဂ့ၢ်လီၤ.”+
၃၀ “ယဟိဝၤယွၤ တဲဝဲလၢ ‘အသးထီၣ်တၢ်ဒိၣ်မးန့ၣ် ယသ့ၣ်ညါ.
ဘၣ်ဆၣ် အတၢ်ကတိၤကလီကလီန့ၣ် တကဲထီၣ်လိၣ်ထီၣ်ဘၣ်.
အဝဲသ့ၣ် တမၤတၢ်နီတမံၤဘၣ်.
၃၁ ယကဟီၣ်ကယၢၤလၢ ပှၤမိၤအးဖိအဃိ,
လၢပှၤမိၤအးဖိ ခဲလၢာ်အဂီၢ်န့ၣ် ယကဟီၣ်ကိးပသူထီၣ်
ဒီးယကကအုကစွါလၢ ဝ့ၢ်ကံၢ်ဃ့ရ့း အပှၤပိာ်ခွါတဖၣ်အဃိလီၤ.+
နဒ့ဘီၣ်ဖိလၢ အမဲထီၣ်ဂ့ၤဂ့ၤတဖၣ်န့ၣ် လဲၤတုၤလၢ ပီၣ်လဲၣ်
ဒီးလဲၤတလၢကွံာ် ပီၣ်လဲၣ် ဒီးလဲၤတုၤလၢ ဝ့ၢ်ယၤစ့ၢ်လီၤ.
ဒီးပှၤလၢ အမၤဟးဂီၤတၢ်တဂၤ ဟဲလီၤလၢ+
နတၢ်ကိၢ်ခါ အတၤသၣ်တဖၣ် ဒီးနစပံးသၣ်လၢ နထၢဖှိၣ်အီၤတဖၣ် အအိၣ်လံ.
၃၃ တၢ်သူၣ်ဖှံသးညီ ဒီးတၢ်သးခုလၢ တၤသူတၤသၣ်အကရၢၢ်ပူၤ
ဒီးလၢကီၢ်မိၤအးအပူၤ တအိၣ်လၢၤဘၣ်.+
ယကမၤပတုာ်ကွံာ် စပံးထံလၢ စပံးထံကျိးအပူၤ ဒ်သိးအသု တယွၤလီၤ လၢၤတဂ့ၤအဂီၢ်လီၤ.
ပှၤတယီၢ် စပံးသၣ်လၢ တၢ်သူၣ်ဖှံ သးညီအပူၤ နီတဂၤလၢၤဘၣ်.
လၢတၢ်န့ၣ်အလီၢ် ပှၤကကိးပသူထီၣ်လၢ တၢ်ကိးပသူသီၣ် အဂၤတမံၤလီၤ.’”+
၃၄ “‘ပှၤဟီၣ်ကိးပသူသီၣ်ထီၣ်လၢ ဝ့ၢ်ဃ့ၡဘိၣ်အပူၤ+ သီၣ်စိတုၤလၢ အ့လဧၤလ့ၤ အတၢ်လီၢ်+
ဒီးသီၣ်ပၢၢ်တုၤလၢ ဝ့ၢ်ယါစၤလီၤ.+
ဒီးတၢ်ဟီၣ်တၢ်ယၢၤလၢ အသီၣ်ထီၣ်လၢ ဝ့ၢ်စိၤဧၢ်အပူၤန့ၣ် ဟူတုၤလၢ ဃိရနဲၣ်အတၢ်လီၢ်+ တကးဒံးဘၣ် ပၢၢ်တုၤလၢ အဲကလးဃလ့ၡၤ အတၢ်လီၢ်လီၤ.
နံးမရံ အထံဒၣ်လဲာ် ကဃ့ထီ ကွံာ်ဝဲလီၤ.’+
၃၅ ယဟိဝၤယွၤ တဲဝဲလၢ ‘ပှၤဟဲစိာ် တၢ်လုၢ်တဖၣ်လၢ တၢ်လီၢ်ထီၣ်ထီမ့ၢ်ဂ့ၤ,
ပှၤလုၢ်ထီၣ်တၢ်လၢ အယွၤအအိၣ် မ့ၢ်ဂ့ၤ
ယကမၤပတုာ်ကွံာ်အီၤလၢ ကီၢ်မိၤအးအပူၤလီၤ.
၃၆ အဃိ ယသးန့ၣ် ကကအုသီၣ်ဝဲလၢ ကီၢ်မိၤအးအဂီၢ် ဒ်ပံသီၣ်ဝဲ အသိးလီၤ.+
ယသးကကအုသီၣ်ဝဲလၢ ပှၤကံၢ်ဃ့ရ့းဖိတဖၣ်အဂီၢ် ဒ်ပံသီၣ်ဝဲအသိးလီၤ.
ဒီးတၢ်ထူးတၢ်တီၤလၢ အပာ်ဖှိၣ်ထီၣ်ဝဲတဖၣ်န့ၣ် ကဟးဂီၤဝဲလီၤ.
၃၇ ပှၤကိးဂၤဒဲး လူၤတကျိအခိၣ်+
ဒီးပှၤကိးဂၤဒဲး တံာ်ကွံာ် အခၣ်ဆူၣ်လီၤ.
၃၈ “ယဟိဝၤယွၤ တဲဝဲလၢ ‘ယမၤဟးဂီၤကွံာ် ကီၢ်မိၤအး
ဒ်ကိတဖျၢၣ်လၢ ပှၤတလီကီဝဲလၢၤဘၣ် အသိးအဃိ
လၢကီၢ်မိၤအး အဟံၣ်ကိးဖျၢၣ်ဒဲး အခိၣ်ဒုး
ဒီးလၢအတၢ်ဆါတၢ်ပှ့ၤအလီၢ် ခဲလၢာ်န့ၣ် တၢ်တအိၣ်နီတမံၤဘၣ်.
အိၣ်ထဲ တၢ်ဟီၣ်တၢ်ယၢၤလီၤ.
၃၉ ပှၤလၢအအိၣ်လၢ ကီၢ်မိၤအးအပူၤတဖၣ် ပျံၤတၢ်ဖုးတၢ် ဒီးဟီၣ်ဝဲယၢၤဝဲ နးမးလီၤ.
ဒီးပှၤမိၤအးဖိတဖၣ် ဃၣ်ဒူၣ်ချၢအသးလၢ တၢ်မဲာ်ဆှးအပူၤလီၤ.
ကီၢ်မိၤအး ကဲထီၣ်တၢ်ဒုၣ်ဒွဲၣ်အလီၢ်
ဒီးတၢ်လီၤပျံၤလီၤဖုးအလီၢ် လၢပှၤလၢအအိၣ်လၢ အခိၣ်အဃၢၤတဖၣ် အဂီၢ်လီၤ.’”
၄၀ “ယဟိဝၤယွၤ တဲဝဲလၢ
‘ကွၢ်မီၤ, ဒ်လံာ်ကြီကြာ် ယူၤလီၤဖီၣ်စှီၤတၢ်အသိး+
ပှၤတဂၤ ကသလၣ်ထီၣ်အဒံးလၢ ကီၢ်မိၤအးအဖီခိၣ်လီၤ.+
၄၁ အဝ့ၢ်ဖိတဖၣ် ကဘၣ်တၢ်မၤန့ၢ်အီၤ
ဒီးအတၢ်အိၣ်သဒၢအလီၢ်တဖၣ် ကဘၣ်တၢ်မၤန့ၢ်အီၤလီၤ.
ဖဲတၢ်တနံၤန့ၣ် ကီၢ်မိၤအးအသုးဖိလၢ အဂံၢ်ဆူၣ်ဘါဆူၣ်တဖၣ် ကပျံၤတၢ်ဖုးတၢ်
ဒ်ပှၤပိာ်မုၣ်လၢ အဟုးဆါ ဒီးဘူးကအိၣ်ဖျဲၣ်ထီၣ်အဖိ အသိးလီၤ.’”
၄၂ “‘မ့ၢ်လၢ ပှၤမိၤအးဖိ ပာ်ထီၣ်ထီအသး လၢကထီဒါ ယဟိဝၤယွၤအဃိ+
အဝဲသ့ၣ် ကဘၣ်တၢ်မၤဟးဂီၤကွံာ်အီၤ ဒီးတကဲ ပှၤတကလုာ် လၢၤဘၣ်.+
၄၃ ပှၤလၢအအိၣ်လၢ ကီၢ်မိၤအး အပူၤသ့ၣ်ဧၢ,
တၢ်ပျံၤတၢ်ဖုး, တၢ်ပူၤ ဒီးပျံၤသကွီၤ အိၣ်လၢသုမဲာ်ညါလီၤ.’ ယဟိဝၤယွၤ တဲဝဲဒ်န့ၣ်လီၤ.
၄၄ ယဟိဝၤယွၤ တဲဝဲလၢ ‘ယကစံၣ်ညီၣ် ကီၢ်မိၤအး ဖဲနံၣ်လၢ ယပာ်ပနီၣ်အီၤန့ၣ်လီၤ.
အဃိ ပှၤလၢအဃ့ၢ်ကွံာ် ခီဖျိလၢ အပျံၤတၢ်ဖုးတၢ် အဃိန့ၣ် ကလီၤတဲာ်လၢ တၢ်ပူၤ
ဒီးပှၤလၢ အဟဲက့ၤထီၣ်လၢ တၢ်ပူၤန့ၣ် ကဘျးက့ၤလၢ ပျံၤသကွီၤလီၤ.
၄၅ ပှၤလၢအဃ့ၢ်ထီၣ်ကွံာ်တဖၣ်န့ၣ် ဆၢထၢၣ်ဝဲလၢ ဝ့ၢ်ဃ့ၡဘိၣ် အကဒုအဖီလာ် ဘၣ်ဆၣ် အဝဲသ့ၣ် မၤတၢ်တဘၣ်နီတမံၤဘၣ်,
မ့ၢ်လၢ မ့ၣ်အူ ကဟဲထီၣ်လၢ ဝ့ၢ်ဃ့ၡဘိၣ်အပူၤ
ဒီးမ့ၣ်အူလၣ် ကဟဲထီၣ်လၢ ဝ့ၢ်စံဃိၣ်အပူၤလီၤ.+
မ့ၣ်အူအံၤ ကအီၣ်ကွံာ်ဝဲ မိၤအး အမဲာ်တူၢ်ခိၣ်
ဒီးပှၤလၢ အစုဆူၣ်ခီၣ်တကးတဖၣ် အခိၣ်သၣ်ဃံလီၤ.’+
၄၆ ‘အိ ကီၢ်မိၤအးဧၢ, ကလီၤသးအုးလၢ နဂီၢ်ထဲလဲၣ်.
ကစၢ်ကမိၣ်+ အပှၤဂီၢ်မုၢ် ဘၣ် တၢ်မၤဟးဂီၤအီၤလံ.
နဖိခွါတဖၣ် ဘၣ်တၢ်က့ၤဖီၣ်အီၤ
ဒီးနဖိမုၣ်တဖၣ် ဘၣ်တၢ်က့ၤ ဖီၣ်အီၤလံ.’+
၄၇ ယဟိဝၤယွၤ တဲဝဲလၢ ‘ဘၣ်ဆၣ် လၢမုၢ်နံၤအကတၢၢ်တဖၣ် အတီၢ်ပူၤ ယကပာ်ဖှိၣ်ထီၣ်က့ၤ ပှၤမိၤအးဖိလၢ အဘၣ်တၢ်က့ၤဖီၣ်အီၤ တဖၣ်လီၤ.
တၢ်စံၣ်ညီၣ်ကစီၣ်လၢ အဘၣ်ဃးဒီး ကီၢ်မိၤအးန့ၣ် ကတၢၢ်ဝဲ ဖဲအံၤလီၤ.’”+