ယံးရမံယၤ
၁၈ ယဟိဝၤယွၤ တဲဘၣ် စီၤယံးရမံယၤလၢ ၂ “ဂဲၤဆၢထၢၣ် ဒီးလဲၤလီၤလၢ ပှၤတ့သပၢၤဖိတဂၤ အဟံၣ်+ ဒီးယကတဲတၢ်ဒီးနၤ ဖဲန့ၣ်လီၤ.”
၃ အဃိ ယလဲၤလီၤလၢ ပှၤတ့သပၢၤဖိတဂၤ အဟံၣ် ဒီးအဝဲတ့ထီၣ် တၢ်တမံၤလၢ တၢ်ဘ့ၣ်ဘၣ်တရံးသး* အဖီခိၣ်လီၤ. ၄ ဘၣ်ဆၣ် သပၢၤလၢ ပှၤတ့သပၢၤဖိတဂၤ စးထီၣ်တ့ဝဲလၢ ကပံာ်အံၤန့ၣ် ဟးဂီၤဝဲလၢ အစုပူၤလီၤ. အဃိ အဝဲက့ၤတ့ကဒါက့ၤဝဲလၢ သပၢၤအဂၤတခါ ဒ်အဝဲထံၣ်လၢ အကြၢးဝဲဘၣ်ဝဲ အသိးလီၤ.
၅ လၢခံ ယဟိဝၤယွၤ တဲဘၣ်ယၤဒ်အံၤလီၤ. ၆ ယဟိဝၤယွၤ တဲဝဲလၢ “‘အိ ပှၤအံၣ်စရ့လးဖိဧၢ, ယမၤသု ဒ်ပှၤတ့သပၢၤဖိတဂၤ မၤဝဲကပံာ်အသိး တသ့ဧီၤ. အိ ပှၤအံၣ်စရ့လးဖိဧၢ, သုအိၣ်လၢ ယစုပူၤ ဒ်ကပံာ်အိၣ်လၢ ပှၤတ့သပၢၤဖိတဂၤ အစုပူၤ အသိးလီၤ.+ ၇ တဘျီဂ့ၤ တဘျီဂ့ၤ ဖဲယတဲလၢ ယကထဲးထီၣ်ကွံာ်, မၤလီၤကူၢ် ဒီးမၤဟးဂီၤ ပှၤကလုာ်တကလုာ်မ့ၢ်ဂ့ၤ, ဘီမုၢ်တဘီမုၢ်မ့ၢ်ဂ့ၤ+ ၈ ဒီးပှၤကလုာ်တကလုာ်န့ၣ် မ့ၢ်တမၤ တၢ်အၢတၢ်သီလၢ ယတဲတ့ၢ်လၢၤဘၣ်န့ၣ် ယၤစ့ၢ်ကီး ယကဆိကမိၣ်ထံကဒါက့ၤ* ဘၣ်ဃးဒီး တၢ်နးတၢ်ဖှီၣ်လၢ ယပာ်လီၤယသးလၢ ယကဒုးလီၤဘၣ် အဝဲသ့ၣ် ဒီးယတမၤလၢၤဘၣ်.+ ၉ တဘျီဂ့ၤ တဘျီဂ့ၤ ဖဲယတဲလၢ ယကတ့ထီၣ်တၢ် ဒီးသူၣ်လီၤ ပှၤကလုာ်တကလုာ်မ့ၢ်ဂ့ၤ, ဘီမုၢ်တဘီမုၢ်မ့ၢ်ဂ့ၤ ၁၀ ဒီးပှၤကလုာ်တကလုာ်န့ၣ် မ့ၢ်မၤ တၢ်လၢယထံၣ်လၢအအၢ ဒီးမ့ၢ်တဒိကနၣ် ယကလုၢ်ဘၣ်န့ၣ် ယကဆိကမိၣ်ထံကဒါက့ၤ* ဘၣ်ဃးဒီး တၢ်အဂ့ၤလၢ ယပာ်လီၤယသးလၢ ယကမၤန့ၢ်လၢအဂီၢ် ဒီးယတမၤလၢၤဘၣ်.’
၁၁ “ခဲအံၤ ဝံသးစူၤ တဲဘၣ် ယူဒၤ အပှၤဂီၢ်မုၢ် ဒီးပှၤလၢ အအိၣ်လၢ ဝ့ၢ်ယရူၤၡလ့ၣ်အပူၤ ဒ်အံၤတက့ၢ်. ‘ယဟိဝၤယွၤ တဲဝဲလၢ “ယကတဲာ်ကတီၤ တၢ်နးတၢ်ဖှီၣ် ဒီးယဆိကမိၣ်ဘၣ်ဃး ယကစံၣ်ညီၣ်သုလီၤ. ဝံသးစူၤ ပာ်တ့ၢ်ကွံာ် သုတၢ်မၤလၢ အအၢအသီတဖၣ် ဒီးဆီတလဲက့ၤ သုသကဲာ်ပဝး ဒီးသုတၢ်မၤတဖၣ်တက့ၢ်.”’”+
၁၂ ဘၣ်ဆၣ် အဝဲသ့ၣ် တဲဝဲလၢ “မုၢ်လၢ်တဂ့ၤ.+ ပဝဲခဲလၢာ် ပခိၣ်ကိၤ ဒီးပသူၣ်အၢသးသီ အဃိ ပကဆဲးလဲၤဖဲပသး မၤဖဲပသးလီၤ.”+
၁၃ အဃိ ယဟိဝၤယွၤ တဲဝဲလၢ
“ဝံသးစူၤ လဲၤသံကွၢ်တၢ်လၢ ပှၤကလုာ်တဖၣ် အကျါ လၢသုနီၢ်ကစၢ်မီၤ.
ပှၤလၢ အနၢ်ဟူဘၣ် တၢ်ဒ်န့ၣ်န့ၣ် အိၣ်တဂၤဂၤဧါ.
ပှၤအံၣ်စရ့လးဖိ မၤတ့ၢ်တၢ်လၢ အအၢအသီ ဒိၣ်ကတၢၢ် တမံၤလီၤ.+
၁၄ မူခိၣ်ဖီလၢ အအိၣ်လၢ လဘၤနိၣ် အကစၢၢ်ကလိ အလၢၢ်ခိၣ်လ့ခိၣ်လၢ အအိၣ်ထီၣ်ထီတဖၣ် အလိၤန့ၣ် မ့ၢ်အလီၤမၢ် တဘျီဘျီဧါ.
လဘၤနိၣ် အထံချံၣ်လၢ အဟဲယွၤလီၤလၢ တၢ်လီၢ်လၢ အယံၤန့ၣ် မ့ၢ်အကလီၤသံးကွံာ် တဘျီဘျီဧါ.
၁၅ ဘၣ်ဆၣ် ယပှၤဂီၢ်မုၢ် သးပ့ၤနီၣ်ကွံာ်ယၤလံ.+
အဝဲသ့ၣ် ဟ့ၣ်လုၢ်ထီၣ်တၢ်လၢ တၢ်ဂီၤတၢ်ဖှီၣ်တဖၣ်+ အအိၣ်
ဒီးမၤဝဲဒ်သိး ပှၤလၢ အလဲၤကျဲလၢအဘၣ် လၢအမ့ၢ် ကျဲလၢပျၢၤန့ၣ် အခီၣ်ကဘၣ်တိၢ်အဂီၢ်+
ဒီးဒုးဟး အဝဲသ့ၣ်လၢ ကျဲဖိလၢ အထီၣ်စိလီၤညၢၣ် ဒီးတပၢၤဘၣ်တဖၣ် အပူၤလီၤ.
၁၆ အဃိ အဝဲသ့ၣ်အကီၢ်န့ၣ် ကကဲထီၣ် တၢ်လီၤပျံၤလီၤဖုးအလီၢ်+
ပှၤကိးဂၤဒဲးလၢ အလဲၤဘၣ်ကျဲ ဖဲန့ၣ်န့ၣ် ကကွၢ်ထံဝဲလၢ တၢ်သူၣ်ပျံၤသးဖုးအပူၤ ဒီးကဂံၤဂုၤ အခိၣ်သၣ်ဃံလီၤ.+
၁၇ ဒ်မုၢ်ထီၣ် အကလံၤ မၤလီၤပြံလီၤပြါဝဲ လီၢ်ဘိအသိး ယကမၤလီၤပြံ လီၤပြါ အဝဲသ့ၣ် လၢအဒုၣ်အဒါ အမဲာ်ညါလီၤ.
ဖဲအဝဲသ့ၣ် ဘၣ်ကီဘၣ်ခဲအနံၤန့ၣ် ယတကွၢ်ဘူး အဝဲသ့ၣ်ဘၣ် ဒီးယကဃၣ်ဒူၣ်ချၢယသးလီၤ.”+
၁၈ ဒီးအဝဲသ့ၣ် တဲဝဲလၢ “ဟဲသၢၤ, ပကကူၣ်အၢသကိး စီၤယံးရမံယၤဟီ.+ ဒီးပပှၤလုၢ်တၢ်ဒိၣ်တဖၣ် ကဆဲးတဲဘၣ်ပှၤ တၢ်သိၣ်တၢ်သီ,* ပှၤကူၣ်ဘၣ်ကူၣ်သ့တဖၣ် ကဆဲးဟ့ၣ်ကူၣ်ပှၤ ဒီးဝံတဖၣ်န့ၣ် ကဆဲးတဲဘၣ်ပှၤ ယွၤအကလုၢ်ကထါလီၤ. ဟဲသၢၤ, ပကပာ်တၢ်ကမၣ်လၢ စီၤယံးရမံယၤအလိၤ ဒီးပတကနၣ်ဃုာ် တၢ်လၢအတဲဝဲဘၣ်.”
၁၉ အိ ယဟိဝၤယွၤဧၢ, ဒိကနၣ်ယၤတက့ၢ်.
ဒီးဒိကနၣ်တၢ်လၢ ပှၤလၢ အထီဒါယၤတဖၣ် တဲဝဲတက့ၢ်.
၂၀ မ့ၢ်ပှၤကြၢး မၤဆၢက့ၤ တၢ်ဂ့ၤလၢ တၢ်အၢဧါ.
ယဆၢထၢၣ်လၢ နမဲာ်ညါ ဒီးတဲဂ့ၤ အဝဲသ့ၣ်
ဒ်သိး နတၢ်သးဒိၣ်လၢ အဝဲသ့ၣ် အဖီခိၣ် ကခုၣ်လီၤအဂီၢ်န့ၣ် သ့ၣ်နီၣ်ထီၣ်တက့ၢ်.
ဘၣ်ဆၣ် အဝဲသ့ၣ် ခူၣ်လီၤ တၢ်ပူၤတပူၤလၢ ကမၤကတၢၢ်ကွံာ် ယသးသမူအဂီၢ်လီၤ.+
၂၁ အဃိ ဟ့ၣ်လီၤကွံာ် အဝဲသ့ၣ် အဖိခွါတဖၣ်လၢ တၢ်သၣ်ဝံၤလီၤဒိ
ဒီးဟ့ၣ်လီၤကွံာ် အဝဲသ့ၣ်လၢ နးတက့ၢ်.+
မ်အဝဲသ့ၣ်အမါ ဘၣ်အိၣ်သယုၢ်လၢ အဖိတအိၣ်လၢၤဘၣ်အဃိ ဒီးကဲထီၣ် မုၣ်ကမဲတက့ၢ်.+
မ်အဝဲသ့ၣ် အပှၤပိာ်ခွါတဖၣ်သံလၢ တၢ်ဆါသံသတြိာ်အဃိ
ဒီးမ်အဝဲသ့ၣ် အပှၤဖိၣ်သၣ်ခွါတဖၣ် ဘၣ်တၢ်မၤသံအီၤလၢ တၢ်ဒုး တၢ်ယၤ အပူၤတက့ၢ်.+
၂၂ မ့ၢ်လၢ အဝဲသ့ၣ် ခူၣ်လီၤတၢ်ပူၤ ဒ်သိးအကဖီၣ်န့ၢ်ယၤအဂီၢ်
ဒီးပာ်လီၤ ပျံၤသကွီၤလၢ ယခီၣ် ကဘျးအဂီၢ်+ အဃိ
ဒုးဟဲ တမျာ်တဖၣ်လၢ အဝဲသ့ၣ် အအိၣ် သတူၢ်ကလာ်
ဒီးမ်အဝဲသ့ၣ် ဟီၣ်ကိးပသူထီၣ်လၢ အဟံၣ်ပူၤတက့ၢ်.
၂၃ အိ ယဟိဝၤယွၤဧၢ,
အဝဲသ့ၣ် အတၢ်ကူၣ်ခဲလၢာ်လၢ အကမၤသံယၤ အဂီၢ်န့ၣ် နသ့ၣ်ညါ လီၤတံၢ်လီၤဆဲးလီၤ.+
တဘၣ်ကျၢၢ်ဘၢ အဝဲသ့ၣ် အတၢ်ကမၣ်
ဒီးထူးသံကွံာ် အဝဲသ့ၣ် အတၢ်ဒဲးဘးလၢ နမဲာ်ညါတဂ့ၤ.