ဧၤမိၣ်
၉ ယထံၣ်ဘၣ် ယဟိဝၤယွၤလၢ+ တၢ်လုၢ်လီၢ်အဖီခိၣ် ဒီးအဝဲတဲဝဲလၢ “တီၢ်တၢ်အထူၣ်တဖၣ် အခိၣ်ထိး ဒီးဟံၣ်ကဟူးဝးဝဲလီၤ. မၤတဲာ်ကွံာ် တၢ်အထူၣ်တဖၣ်အခိၣ်ထိး ဒီးပှၤလၢအအိၣ်တ့ၢ်တဖၣ်န့ၣ် ယကမၤသံအီၤလၢ နးလီၤ. ပှၤလၢအဃ့ၢ်ဒီးအပူၤဖျဲးန့ၣ် တအိၣ်နီတဂၤဘၣ်.+
၂ အဝဲသ့ၣ် မ့ၢ်ခူၣ်လီၤ တၢ်သွၣ်ခိၣ်* ဒီးအိၣ်ခူသူၣ်ဝဲ ဖဲန့ၣ်ဘၣ်ဆၣ်
ယကတွံၢ်ထီၣ်က့ၤ အဝဲသ့ၣ်လၢ တၢ်လီၢ်ဖဲန့ၣ်လီၤ.
အဝဲသ့ၣ် မ့ၢ်လဲၤထီၣ်လၢ တၢ်ဖးဖီဘၣ်ဆၣ်
ယကတွံၢ်လီၤက့ၤ အဝဲသ့ၣ်လၢ တၢ်လီၢ်ဖဲန့ၣ်လီၤ.
၃ အဝဲသ့ၣ် မ့ၢ်အိၣ်ခူသူၣ်လၢ ကစၢၢ်ကၢ်မ့ၤလး အဒီခိၣ်
ဘၣ်ဆၣ် ယကဃု အဝဲသ့ၣ်ဖဲန့ၣ် ဒီးယကဟံးထီၣ်ကွံာ် အဝဲသ့ၣ် ဖဲန့ၣ်လီၤ.+
ဒီးအဝဲသ့ၣ် မ့ၢ်အိၣ်ခူသူၣ်လၢ ပီၣ်လဲၣ်အခံဒး
ဘၣ်ဆၣ် ယကမၢ ဂုၢ်လဲၤအ့ၣ် အဝဲသ့ၣ် ဖဲန့ၣ်လီၤ.
၄ အဝဲသ့ၣ် အဒုၣ်အဒါတဖၣ် မ့ၢ်က့ၤကိး အဝဲသ့ၣ် သနာ်က့
ယကမၢ ပှၤဖဲန့ၣ်တဖၣ် မၤသံ အဝဲသ့ၣ်လၢ နးလီၤ.+
ယကဃုကျဲ ဒ်သိး တၢ်ကီတၢ်ခဲ ကဘၣ် အဝဲသ့ၣ် ဒီးတမ့ၢ်လၢ အဝဲသ့ၣ် ကဘၣ်ဆိၣ်ဂ့ၤဘၣ်.+
၅ တၢ်ပၢကစၢ် ယဟိဝၤယွၤ လၢအမ့ၢ် တၢ်သုးမုၢ်ဂီၢ်မုၢ် အကစၢ်န့ၣ် မ့ၢ်ပှၤလၢ အကထိးဝဲထံကီၢ်*
ဒ်သိး ထံကီၢ်ကပှံၢ်လီၤဝဲ+ ဒီးပှၤလၢအအိၣ်လၢအပူၤ ကိးဂၤဒဲးန့ၣ် ကဟီၣ်ဝဲယၢၤဝဲလီၤ.+
ဒီးတၢ်ဆီတလဲ ဒိၣ်ဒိၣ်မုၢ်မုၢ် ကအိၣ်ထီၣ်လၢ ထံကီၢ်အပူၤ
ဒီးကမၤသးဒ်သိးဒီး ကီၢ်အဲၤကူပတူး အထံကျိနံၤလါလၢ အထံဟဲဒိၣ်ထီၣ် ဝံၤဒီး က့ၤလီၤကဒါက့ၤလီၤ.+
၆ ‘ပှၤလၢအတ့ထီၣ် ဃီလၢမူခိၣ်
ဒီးတ့ထီၣ် တၢ်သူၣ်ထီၣ်လၢ ဟီၣ်ခိၣ်အဖီခိၣ်
ဒီးပာ်ဖှိၣ်ထီၣ်ဝဲ ပီၣ်လဲၣ်အထံ
ဒ်သိးကလူလီၤက့ၤဝဲလၢ ဟီၣ်ခိၣ်လိၤတဂၤန့ၣ်+
အမံၤမ့ၢ်ဝဲ ယဟိဝၤလီၤ.’+
၇ ယဟိဝၤယွၤ တဲဝဲလၢ ‘အိ အံၣ်စရ့လး အပှၤဂီၢ်မုၢ်သ့ၣ်ဧၢ, လၢယတၢ်ထံၣ်န့ၣ် သုလီၤဂာ်ဒီး ပှၤကူၤၡးဖိတဖၣ်* တမ့ၢ်ဧီၤ.
ယဒုးဟးထီၣ် ပှၤအံၣ်စရ့လးဖိတဖၣ် လၢကီၢ်အဲၤကူပတူးအပူၤ တမ့ၢ်ဧီၤ.+
ဒီးယဒုးဟးထီၣ် ပှၤဖလ့ၡသးဖိ လၢကီးကြ့တ့ၤ+ ဒီးပှၤစူၤရံဖိ လၢကံၢ်တၢ်လီၢ် တမ့ၢ်ဧီၤ.’+
၈ ယဟိဝၤယွၤ တဲဝဲလၢ ‘ယၤ တၢ်ပၢကစၢ် ယဟိဝၤယွၤ ကွၢ်လီၤတၢ်ဆူ ဘီမုၢ်လၢအပှဲၤဒီး တၢ်ဒဲးဘး
ဒီးယကမၤဟးဂီၤကွံာ် ဘီမုၢ်ဝဲန့ၣ် လၢဟီၣ်ခိၣ်ချၢ+
ဘၣ်ဆၣ် မ့မ့ၢ် စီၤယၤကိာ် အစၢၤအသွဲၣ်န့ၣ် ယတမၤဟးဂီၤကွံာ် အဝဲသ့ၣ် ခဲလၢာ်ခဲဆ့ဘၣ်.’+
၉ ‘ယကဟ့ၣ်လီၤ တၢ်ကလုၢ်
ဒီးယကဂုၤ အံၣ်စရ့လး အပှၤဂီၢ်မုၢ်* လၢပှၤကလုာ်ခဲလၢာ်အကျါ+
ဒ်ပှၤဂုၤဖ့ဂုၤ
ဒီးလၢၢ်ဖိ တလီၤတဲာ်ဘၣ်လၢ ဟီၣ်ခိၣ်လိၤ နီတဖျၢၣ်ဘၣ်အသိးလီၤ.
၁၀ အဃိ ယပှၤဂီၢ်မုၢ်လၢ အမၤ တၢ်ဒဲးဘးတဖၣ်
ဒီးအတဲဝဲလၢ “တၢ်ကီတၢ်ခဲ တဟဲဘူးဒီးပှၤ ဒီးတဟဲတုၤလၢ ပအိၣ်ဘၣ်” န့ၣ် ကဘၣ်သံဝဲလၢ နးကိးဂၤဒဲးလီၤ.’
၁၁ ‘ဖဲတၢ်တနံၤန့ၣ် ယကသူၣ်ထီၣ်ကဒီး စီၤဒၤဝံးအဒဲ+ လၢအလီၤပှီၢ်
ဒီးယကဘှီဂ့ၤထီၣ်က့ၤ တၢ်လၢ အလီၤဖျိတဖၣ်
ဒီးမၤဂ့ၤထီၣ်က့ၤ တၢ်လၢ အဟးဂီၤ
ဒီးတ့ထီၣ်က့ၤအီၤ ဒ်မုၢ်နံၤလၢညါတဖၣ် အသိးလီၤ.+
၁၂ အဃိ ယပှၤဂီၢ်မုၢ်တဖၣ် ကမၤနၢၤကွံာ် ပှၤအဒိၣ်ဖိလၢ အအိၣ်မူဒံးတဖၣ်+
ဒီးကပၢဝဲ ပှၤကလုာ်ခဲလၢာ် လၢအဘၣ်တၢ်ကိးအီၤလၢ ယမံၤလီၤ.’ ယဟိဝၤယွၤလၢ ကမၤဝဲ ဒ်အံၤတဂၤန့ၣ် တဲဝဲဒ်န့ၣ်လီၤ.
၁၃ ယဟိဝၤယွၤ တဲဝဲလၢ ‘တၢ်ဆၢကတီၢ် ကဟဲဝဲလၢ
တချုးလၢ ပှၤကူးတၢ်ဝံၤဒံးဘၣ်န့ၣ် ပှၤကစးထီၣ်ထဲၣ်တၢ်
ဒီးတချုးပှၤယီၢ်လီၤစပံးသၣ် ဝံၤဒံးဘၣ်န့ၣ် ပှၤကစးထီၣ် ဖှံလီၤ တၢ်ချံလီၤ.+