၁ ကရံၣ်သူး

၁၆ ဘၣ်ဃးဒီး တၢ်ထၢဖှိၣ်တၢ်မၤဘူၣ်လၢ ပှၤစီဆှံတဖၣ်အဂီၢ်န့ၣ်+ သုမၤထွဲဒ် ယဟံးစုနဲၣ်ကျဲ တၢ်အိၣ်ဖှိၣ်တဖၣ်လၢ ကလၤတံအသိးသ့ဝဲလီၤ. ၂ ဖဲမုၢ်ခီၣ်ထံးအနံၤ ကိးနွံဒဲးန့ၣ် သုဝဲတဂၤစုာ်စုာ် ဒ်တၢ်အိၣ်ဒီး သုအသိးန့ၣ် သုကြၢးပာ်လီၤဆီဃာ် ကျိၣ်စ့တနီၤလီၤ. သုမ့ၢ်မၤဒ်န့ၣ်န့ၣ် ဖဲယလဲၤတုၤအခါ သုတလိၣ်ထၢဖှိၣ် တၢ်မၤဘူၣ်ဘၣ်. ၃ ဒီးယလဲၤမ့ၢ်တုၤဖဲန့ၣ်န့ၣ် ပှၤလၢ သုပာ်ဖျါထီၣ်လၢ လံာ်ပရၢအပူၤလၢ သုဘၣ်သူၣ်ဘၣ်သးအီၤတဖၣ်န့ၣ်+ ယကမၢအဝဲသ့ၣ် လဲၤဆှၢတၢ်ဟ့ၣ်လၢ သုဟ့ၣ်လီၤလၢ တၢ်သူၣ်အိၣ်သးအိၣ် အပူၤအံၤ ဆူဝ့ၢ်ယရူၤၡလ့ၣ်လီၤ. ၄ ဘၣ်ဆၣ် မ့ၢ်ဖျါလၢ ယကြၢးလဲၤစ့ၢ်ကီးဖဲန့ၣ်န့ၣ် အဝဲသ့ၣ် ကလဲၤဒီးယၤဖဲန့ၣ်လီၤ.

၅ မ့ၢ်လၢ ယတိာ်ပာ်လၢ ယကလဲၤလၢ ကီၢ်မၤက့းဒနံ အဃိ ယလဲၤတၢ်လၢ ကီၢ်မၤက့းဒနံ+ မ့ၢ်ဝံၤမး ယကလဲၤလၢသုအိၣ်လီၤ. ၆ ဒီးဘၣ်သ့ၣ်သ့ၣ် ယကအိၣ်ဒီးသုဖဲန့ၣ် တတီၤဖိလီၤ. မ့တမ့ၢ် ဘၣ်သ့ၣ်သ့ၣ် ယကအိၣ်ဒီးသုတုၤလၢ တၢ်ဂိၢ်ခါဝံၤ ဒ်သိးသုကလဲၤဆှၢယၤလၢ ကျဲတကူာ်ဆူ တၢ်လီၢ်လၢ ယကလဲၤန့ၣ်လီၤ. ၇ ယတအဲၣ်ဒိးနုာ်လီၤထံၣ်သု ထဲတစိၢ်တလီၢ်ဘၣ်အဃိ ယဟိဝၤယွၤ* မ့ၢ်ဟ့ၣ်အခွဲးန့ၣ် ယအဲၣ်ဒိး အိၣ်ဒီးသုဖဲန့ၣ် တတီၤဖိညါလီၤ.+ ၈ ဘၣ်ဆၣ် ယကအိၣ်ဒံးလၢ ဝ့ၢ်အ့းဖ့းစူး+ တုၤလၢ ဘူၣ်ယဲၢ်ဆံဘၣ်ဝဲ ၉ ခီဖျိလၢ တြဲၤဖးဒိၣ်လၢ အဘၣ်ဃးဒီး တၢ်စံၣ်တဲၤတဲလီၤတၢ်မၤန့ၣ် အိးထီၣ်အသး လၢယဂီၢ်လံ.+ ဘၣ်ဆၣ် ပှၤလၢအထီဒါတၢ် အိၣ်ဝဲအါဂၤလီၤ.

၁၀ ဒီးစီၤတံၤမသ့း+ မ့ၢ်လဲၤတုၤန့ၣ် ဖဲအဝဲအိၣ်လၢ သုကျါအခါ ဒ်သိးအသု တပျံၤတၢ်ဖုးတၢ် တဂ့ၤအဂီၢ် ပလီၢ်သုသးတက့ၢ်. အဝဲမၤ ယဟိဝၤယွၤ အတၢ်မၤ+ ဒ်ယမၤအသိးလီၤ. ၁၁ အဃိ တဘၣ်ထံၣ်ဆံးအီၤ နီတဂၤတဂ့ၤ. ဒီးမၤစၢၤအီၤ ဒ်သိးအဝဲကဟဲက့ၤဘၣ် လၢယအိၣ် မုာ်မုာ်ခုၣ်ခုၣ် အဂီၢ်တက့ၢ်. ယခိးကွၢ်လၢ်အကျဲ ဃုာ်ဒီးဒီပုၢ်ဝဲၢ်ခွါတဖၣ်လီၤ.

၁၂ ဘၣ်ဃးဒီး ပဒီပုၢ်ဝဲၢ်ခွါ စီၤအပီးလိၤန့ၣ်+ ယဟ့ၣ်သဆၣ်ထီၣ်အီၤ ဆူၣ်ဆူၣ် ဒ်သိးအဝဲဒီး ဒီပုၢ်ဝဲၢ်ခွါတဖၣ် ကလဲၤလၢသုအိၣ်လီၤ. ခဲအံၤ အဝဲတလဲၤဒံးဘၣ်. ဘၣ်ဆၣ် ဆၢကတီၢ်မ့ၢ်ဘၣ်န့ၣ် အဝဲကလဲၤလီၤ.

၁၃ စီၣ်မဲာ်စီၣ်နါ,+ အိၣ်ဆၢထၢၣ် ဂၢၢ်ဂၢၢ်ကျၢၤကျၢၤ လၢတၢ်စူၢ်တၢ်နာ်အပူၤ,+ မၤသုသးဒ် ပိာ်ခွါအသိး*+ ဒီးကဲထီၣ်ပှၤလၢ အဂံၢ်ဆူၣ်ဘါဆူၣ်တက့ၢ်.+ ၁၄ တၢ်ခဲလၢာ်လၢ သုမၤန့ၣ် မၤအီၤလၢ တၢ်အဲၣ်တၢ်ကွံ အပူၤတက့ၢ်.+

၁၅ ဒီပုၢ်ဝဲၢ်သ့ၣ်ဧၢ, ခဲအံၤ ယဟ့ၣ်သဆၣ်ထီၣ်သုလီၤ. သုသ့ၣ်ညါလၢ စီၤစတ့းဖနၣ် အပှၤဟံၣ်ဖိဃီဖိန့ၣ် မ့ၢ်ဝဲတၤသၣ်ဆိလၢ အဃါယၤကီၢ်ရ့ၣ်အပူၤ ဒီးအဝဲသ့ၣ် ဟ့ၣ်လီၤအသးလၢ ကမၤစၢၤဝဲ ပှၤစီဆှံတဖၣ်လီၤ. ၁၆ မ်သုပာ်သုသးလၢ ပှၤဒ်န့ၣ်တဖၣ်အဖီလာ် ဒီးပှၤကိးဂၤဒဲးလၢ အမၤသကိးတၢ် လၢအမၤတၢ်ဆူၣ်ဆူၣ်န့ၣ် အဖီလာ်တက့ၢ်.+ ၁၇ စီၤစတ့းဖနၣ်,+ စီၤဖူာ်တူၤနါတူး ဒီးစီၤအဃကူး ဟဲဝဲအဃိ ယသးခုဒိၣ်မးလီၤ. သုမ့ၢ်တအိၣ်ဖဲအံၤဘၣ် သနာ်က့ အဝဲသ့ၣ် မၤန့ၢ်တၢ်လၢ သုလီၢ်လီၤ. ၁၈ ဒီးအဝဲသ့ၣ် မၤဖှံထီၣ်က့ၤ ယသးဒီးသုသးလီၤ. အဃိ စံးဘျုးစံးဖှိၣ် ပှၤဒ်အံၤတဖၣ်တက့ၢ်.

၁၉ တၢ်အိၣ်ဖှိၣ်တဖၣ်လၢ အၤစံအကီၢ်ရ့ၣ်န့ၣ် ဆၢဂ့ၤဆၢဝါသုလီၤ. နီၢ်ပြံစကံးလၤ ဒီးစီၤအကူလၤ ဃုာ်ဒီး တၢ်အိၣ်ဖှိၣ်လၢ အအိၣ်ဖှိၣ်ဝဲလၢ အဝဲသ့ၣ်အဟံၣ်န့ၣ်+ ဆှၢလီၤန့ၢ်သု ခရံာ်ဖိတၢ်အဲၣ်တၢ်ကွံလီၤ. ၂၀ ဒီပုၢ်ဝဲၢ်ခဲလၢာ် ဆၢဂ့ၤဆၢဝါသုလီၤ. ဆၢဂ့ၤဆၢဝါလိာ်သုသး တဂၤဒီးတဂၤလၢ တၢ်အဲၣ်တၢ်ကွံ* အပူၤတက့ၢ်.

၂၁ ယၤ, စီၤပီလူးယကွဲးန့ၢ်သု ယတၢ်ဆၢဂ့ၤဆၢဝါအံၤလၢ ယနီၢ်ကစၢ်အစုလီၤ.

၂၂ ပှၤလၢ အတအဲၣ် ကစၢ်ဘၣ်န့ၣ် မ်အဘၣ် တၢ်ဆိၣ်အၢတက့ၢ်. အိ ပကစၢ်ဧၢ, ဟဲတက့ၢ်. ၂၃ မ်ကစၢ်ယ့ၣ်ၡူး အတၢ်သးကညီၤ ဒိၣ်ဒိၣ်မုၢ်မုၢ် အိၣ်ဒီးသုတက့ၢ်. ၂၄ မ်ယတၢ်အဲၣ် အိၣ်ဒီးသုခဲလၢာ် လၢယ့ၣ်ၡူးခရံာ် အပူၤတက့ၢ်.