၂ ကရံၣ်သူး
၂ လၢခံတဘျီ ဖဲယလဲၤကဒီးလၢ သုအိၣ်အခါ ယဆၢတဲာ်လီၤယသးလၢ ယတမၤသးအုးသုဘၣ်. ၂ ယမ့ၢ်မၤသးအုးသုသးန့ၣ် မ့ၢ်မတဂၤကအိၣ်ဒံးလၢ အကမၤဖှံထီၣ်ယသးလဲၣ်. ကအိၣ်ဒၣ်ထဲပှၤလၢ ယမၤသးအုးတ့ၢ်အသးလီၤ. ၃ ဖဲယလဲၤမ့ၢ်တုၤအခါ ဒ်သိး ယသုတသးအုးလၢ သုဃိတဂ့ၤ ဒီးယကသးခုအဂီၢ် ယကွဲးဆိပာ်စၢၤန့ၢ်သု လံာ်တဘ့ၣ်လီၤ. ဒီးယနာ်လၢ တၢ်လၢ အမၤသးခုယသးန့ၣ် မ့ၢ်တၢ်လၢ အမၤသးခု သုကိးဂၤဒဲးအသး စ့ၢ်ကီးလီၤ. ၄ လၢတၢ်ကီတၢ်ခဲ ဒီးတၢ်သူၣ်ကိၢ်သးဂီၤ ဒိၣ်မးအပူၤ ယကွဲးတ့ၢ်န့ၢ်သုလံာ်တဘ့ၣ်န့ၣ် ပှဲၤဒီး မဲာ်ထံမဲာ်နိလီၤ. ဘၣ်ဆၣ် တမ့ၢ်လၢ ယကမၤသးအုးသုဘၣ်.+ မ့ၢ်ဒ်သိး ယကဒုးသ့ၣ်ညါသုလၢ ယတၢ်အဲၣ်လၢသုဖီခိၣ် ဒိၣ်ဝဲထဲလဲၣ်န့ၣ်လီၤ.
၅ ပှၤတဂၤဂၤ မ့ၢ်ဒုးအိၣ်ထီၣ် တၢ်သးအုးန့ၣ်+ တမ့ၢ်လၢ အဝဲမၤသးအုးယၤဘၣ်. မ့ၢ်အမၤသးအုး သုကိးဂၤဒဲးလီၤ. ဘၣ်ဆၣ် ယတအဲၣ်ဒိးလၢ ယတၢ်ကတိၤတဖၣ်အံၤ ကဖျါဆူၣ်တလၢဘၣ်. ၆ တၢ်စံၣ်ညီၣ်လၢ သုအါတက့ၢ် ဟ့ၣ်အီၤန့ၣ် လၢပှဲၤလၢ ပှၤဒ်န့ၣ်အသိးတဂၤ အဂီၢ်လံ. ၇ ခဲအံၤ သုကြၢးပျၢ်အတၢ်ကမၣ် လၢသးဒီဖျၢၣ် ဒီးမၤမုာ်ထီၣ်က့ၤအီၤ+ ဒ်သိး အသုတသးအုး တုၤဒၣ်လဲာ် အတူၢ်ၡူအသးတဂ့ၤ အဂီၢ်လီၤ.+ ၈ အဃိ ယဟ့ၣ်သဆၣ်ထီၣ်သု ဒ်သိး သုကပာ်ဖျါထီၣ် သုတၢ်အဲၣ်လၢ ပှၤတဂၤန့ၣ်အဖီခိၣ်လီၤ.+ ၉ နီၢ်ကီၢ်န့ၣ် ယကွဲးဆိပာ်စၢၤန့ၢ်သု လံာ်တဘ့ၣ်န့ၣ် လၢတၢ်ဂ့ၢ်အဂၤတမံၤအဃိစ့ၢ်ကီးလီၤ. မ့ၢ်ဒ်သိး ယကသ့ၣ်ညါလၢ မ့ၢ်သုကပာ်ဖျါထီၣ် တၢ်ဒိကနၣ်လၢ တၢ်ခဲလၢာ်အပူၤဧါန့ၣ်လီၤ. ၁၀ ဖဲသုပျၢ်ကွံာ် ပှၤဂၤအတၢ်ကမၣ် တမံၤမံၤန့ၣ် ယပျၢ်ကွံာ်အတၢ်ကမၣ် စ့ၢ်ကီးလီၤ. နီၢ်ကီၢ်န့ၣ် ယမ့ၢ်ပျၢ်ကွံာ် တၢ်ကမၣ်တမံၤမံၤန့ၣ် မ့ၢ်ဒၣ်လၢသုဂီၢ် ဒီးယမၤအီၤလၢ ခရံာ်အမဲာ်ညါလီၤ. ၁၁ မုၣ်ကီၤလံၢ်* အတၢ်ကူၣ်ထီၣ်ဖးလီၤတဖၣ်န့ၣ် ပသ့ၣ်ညါပာ်စၢၤလံ.+ အဃိန့ၣ် ဒ်သိး မုၣ်ကီၤလံၢ် သုတဟံးန့ၢ် တၢ်ခွဲးတၢ်ယာ်လၢ ပဖီခိၣ်တဂ့ၤအဂီၢ် အရ့ဒိၣ်လၢ ပကဘၣ်ပျၢ်လိာ်သး တၢ်ကမၣ်လီၤ.+
၁၂ ဖဲယလဲၤတုၤလၢ ဝ့ၢ်တြိၤအါ+ ဒ်သိး ကစံၣ်တဲၤတဲလီၤ တၢ်သးခုကစီၣ်လၢ အဘၣ်ဃးဒီးခရံာ်အခါ တြဲၤအိးထီၣ်အသးလၢယဂီၢ် ဒ်သိး ယကမၤကစၢ်အတၢ်မၤ အဂီၢ်လီၤ. ၁၃ ဘၣ်ဆၣ် ယတထံၣ် ယဒီပုၢ်ဝဲၢ် စီၤတံတူး+ ဘၣ်အဃိ ယသူၣ်ကိၢ်သးဂီၤတၢ် ဒိၣ်မးလီၤ. အဃိ ယဆၢဂ့ၤဆၢဝါ ဒီပုၢ်ဝဲၢ်လၢ အအိၣ်ဖဲန့ၣ်တဖၣ်ဝံၤဒီး ယလဲၤလၢ ကီၢ်မၤက့းဒနံလီၤ.+
၁၄ ဘၣ်ဆၣ် ပစံးဘျုးကစၢ်ယွၤလီၤ. ထီဘိန့ၣ် အဝဲဆှၢပှၤ လၢခရံာ်အပူၤ ဒ်သုးဖိတဖၣ်လၢ အဒုးတၢ်နၢၤ ဒီးဟဲက့ၤဝဲအသိးလီၤ. ဒီးတၢ်သ့ၣ်ညါယွၤ ရၤလီၤအသး လၢတၢ်လီၢ်ကိးပူၤဒဲး ဒ်တၢ်နၢမူအသိး ခီဖျိလၢ ပှၤလီၤ. ၁၅ ဒီးလၢကစၢ်ယွၤ အမဲာ်ညါန့ၣ် ပလီၤဂာ်ဒီး တၢ်နၢမူနၢဆှီ တမံၤလၢ အဘၣ်ဃးဒီးခရံာ်လီၤ. ဒီးပှၤလၢ အကတုၤလၢ တၢ်အုၣ်က့ၤခီၣ်က့ၤ ဒီးပှၤလၢ အကတုၤလၢ တၢ်ဟးဂီၤန့ၣ် နၢဘၣ်ဝဲလီၤ. ၁၆ လၢပှၤလၢ အကတုၤလၢ တၢ်ဟးဂီၤအဂီၢ်န့ၣ် တၢ်နၢတခါအံၤ လီၤဂာ်ဒ် တၢ်သံအစိ ဒီးကဆှၢအဝဲသ့ၣ်ဆူ တၢ်သံလီၤ.+ မ့မ့ၢ် ပှၤလၢအကတုၤလၢ တၢ်အုၣ်က့ၤခီၣ်က့ၤအဂီၢ်န့ၣ် တၢ်နၢတခါအံၤ လီၤဂာ်ဒ် တၢ်မူအစိ ဒီးကဆှၢအဝဲသ့ၣ်ဆူ တၢ်မူလီၤ. ဒီးမ့ၢ်မတဂၤ တုၤထီၣ်ထီၣ်ဘးလၢ ကမၤတၢ်မၤ အဝဲအံၤအဂီၢ်လဲၣ်. ၁၇ ပဝဲဒၣ်အံၤ ပတုၤထီၣ်ထီၣ်ဘးလီၤ. ပတဒ်သိးဒီး ပှၤအါဂၤလၢ အမၤအီၣ်စ့ လၢကစၢ်ယွၤ အကလုၢ်ကထါ အဃိဘၣ်.+ ဘၣ်ဆၣ် ပတဲတၢ်လၢ တၢ်သူၣ်ဘျၢသးဘျၢအပူၤ လၢကစၢ်ယွၤအမဲာ်ညါ ဒ်ပှၤလၢ ကစၢ်ယွၤ ဆှၢလီၤဝဲအသိး ဒီးဒ်ပှၤလၢ အပိာ်ခရံာ်အခံ အသိးလီၤ.