မ့ၢ်နဆိကမိၣ်ဘၣ်လၢ နအဲၣ်ဒိးဖးလံာ်စီဆှံ ဘၣ်ဆၣ် နဂုၤက့ၤနလီၢ်ခံ မ့ၢ်လၢနတူၢ်ဘၣ်ဒ်ပှၤလၢထးအံၤအသိးဧါ. ပှၤအါဂၤဆိကမိၣ်ဝဲလၢ တၢ်ဖးလံာ်စီဆှံန့ၣ် မ့ၢ်တၢ်ကီဒိၣ်မးလၢအဝဲသ့ၣ်အဂီၢ်လီၤ. ဘၣ်ဆၣ် နမ့ၢ်မၤလိလံာ်စီဆှံန့ၣ် ကမၤစၢၤနၤလၢ နကအိၣ်ဒီး တၢ်သူၣ်ဖှံသးညီဒီး နတၢ်အိၣ်မူကပှဲၤဒီးအခီပညီလီၤ. တကးဒံးဘၣ် ဒ်သိးနဖးလံာ်စီဆှံ ကမုာ်အဂီၢ် တၢ်ဟ့ၣ်ကူၣ်အိၣ်ဝဲလီၤ. ဒီးလံာ်စီဆှံ ကဲဘျုးလၢနဂီၢ်ဒ်လဲၣ်န့ၣ် မ့ၢ်နအဲၣ်ဒိးသ့ၣ်ညါဧါ.

ပကကွၢ်သကိးဘၣ်ဃးဒီး ပှၤတနီၤဖဲအဝဲသ့ၣ် စးထီၣ်ဖးလံာ်စီဆှံအခါ ဒိးန့ၢ်ဘၣ်အဘျုးဒ်လဲၣ်အဂ့ၢ်န့ၣ်လီၤ.

အံစံၤခံၤယိၤလၢအသးအိၣ်အနံၣ် ၂၀ န့ၣ်တဲဝဲလၢ– “လၢအပူၤကွံာ် ယတၢ်အိၣ်မူလီၤဂာ်ဒ် ပှၤတဂၤလၢအဟးနီလိာ်ကွဲကါ လၢတအိၣ်ဒီးအတၢ်ပညိၣ်ဘၣ်. ဘၣ်ဆၣ် တၢ်ဖးလံာ်စီဆှံမၤစၢၤယၤလၢ ယတၢ်အိၣ်မူန့ၣ် ကအိၣ်ဒီးအခီပညီအဂီၢ်လီၤ. လံာ်စီဆှံန့ၣ် အိၣ်ဒီးတၢ်ဟ့ၣ်ကူၣ်လၢ ယတၢ်အိၣ်မူကိးနံၤဒဲးအဂီၢ်လီၤ.”

ဖြံဒၤလၢအသးအိၣ်အနံၣ် ၂၀ န့ၣ်တဲစ့ၢ်ကီးဝဲလၢ– “ယမ့ၢ်တ့ၢ်ပှၤလၢအသးချ့တဂၤ, ဘၣ်ဆၣ် တၢ်ဖးလံာ်စီဆှံမၤစၢၤယၤလၢ ယကပၢၤဃာ်ယတၢ်သးထီၣ်လီၤ. အဃိ ယကဲထီၣ်ပှၤတဂၤလၢ ပှၤရ့ဘၣ်အီၤညီဒီး ခဲအံၤန့ၣ် ယတံၤသကိးအိၣ်ဝဲအါမးလီၤ.”

ပိာ်မုၣ်တဂၤလၢအသးနံၣ်အိၣ်ဝဲ ၅၀ ဘျဲၣ်လၢအမံၤမ့ၢ် ယူနဲး(စ်)တဲဝဲလၢ– “လံာ်စီဆှံမၤစၢၤယၤလၢ ယကကဲထီၣ်ပှၤလၢအဂ့ၤတဂၤ ဒီးဆီတလဲယလုၢ်လၢ်လၢအတဂ့ၤတဖၣ်လီၤ.”

ဒ်ပှၤသၢဂၤအံၤအသိး ပှၤလၢအကကွဲၢ်တဖၣ် သ့ၣ်ညါဝဲလၢတၢ်ဖးလံာ်စီဆှံန့ၣ် မၤစၢၤပှၤလၢ ပကအိၣ်ဒီးတၢ်သူၣ်ဖှံသးညီအဂီၢ်လီၤ. (ယၡါယၤ ၄၈:၁၇, ၁၈) လံာ်စီဆှံမၤစၢၤနၤသ့လၢ (၁) နကဆၢတဲာ်တၢ်လၢအဘၣ် (၂) အိၣ်ဒီးတံၤသကိးနီၢ်နီၢ် (၃) မၤစှၤလီၤနတၢ်ကိၢ်တၢ်ဂီၤဒီး (၄) မၤလိတၢ်မ့ၢ်တၢ်တီ ဘၣ်ဃးဒီးကစၢ်ယွၤလီၤ. တၢ်ဟ့ၣ်ကူၣ်လၢလံာ်စီဆှံအပူၤန့ၣ် ဟဲလၢကစၢ်ယွၤအအိၣ် အဃိ နမ့ၢ်မၤထွဲအီၤန့ၣ် နကျဲတကမၣ်ဘၣ်. ကစၢ်ယွၤအတၢ်ဟ့ၣ်ကူၣ်န့ၣ် ကဲဘျုးလၢပဂီၢ်ထီဘိလီၤ.

တၢ်လၢအရ့ဒိၣ်ကတၢၢ်န့ၣ် နကဘၣ်စးထီၣ်ဖးလံာ်စီဆှံလီၤ. ဒ်သိးနစးထီၣ်ဖးလံာ်စီဆှံကညီ ဒီးကမုာ်ဒိၣ်ထီၣ်ဝဲအဂီၢ် တၢ်ဟ့ၣ်ကူၣ်မနုၤတဖၣ် ကမၤစၢၤနၤလဲၣ်.

ဒ်သိးနဖးလံာ်စီဆှံကမုာ် ဒီးနကဒိးန့ၢ်တၢ်အဘျုးအဂီၢ် နကဘၣ်မၤဒ်လဲၣ်. တၢ်ဟ့ၣ်ကူၣ်ယဲၢ်ခါလၢလာ်အံၤ ကဲထီၣ်တၢ်မၤစၢၤလၢ ပှၤအါဂၤအဂီၢ်လီၤ.

တၢ်လီၢ်ဒီးတၢ်အိၣ်အသးလၢ အကဲဘျုးလၢ တၢ်ဖးလံာ်စီဆှံအဂီၢ်. ဂုာ်ကျဲးစၢးဃုတၢ်လီၢ်လၢ အဘှ့ၣ်အဘှီၣ်တက့ၢ်. ဒ်သိးနသးကစၢၢ်ဆၢ တၢ်လၢနဖးအီၤအဂီၢ် ဟးဆှဲးတၢ်လၢ ကမၤဒံဝ့ၤဒံဝီၤနသးန့ၣ်တက့ၢ်. ဖဲနဖးလံာ်စီဆှံအခါ ကလံၤဆှံဒီးတၢ်ကပီၤ မၤစၢၤနၤသ့စ့ၢ်ကီးလီၤ.

အိၣ်ဒီးတၢ်ပာ်သူၣ်ပာ်သးလၢအဂ့ၤ. လံာ်စီဆှံအံၤဟဲလၢ ပပၢ်အိၣ်လၢမူခိၣ်အအိၣ်လီၤ. လၢတၢ်န့ၣ်အဃိ ဖဲနဖးလံာ်စီဆှံအခါ နကဘၣ်အိၣ်ဒီးတၢ်ပာ်သူၣ်ပာ်သး ဒ်ဖိသၣ်တဂၤလၢ သးအိၣ်မၤလိန့ၢ်တၢ်လၢ အမိၢ်အပၢ်လၢအအိၣ်ဒီးတၢ်အဲၣ်တၢ်ကွံအအိၣ်န့ၣ်လီၤ. ပှၤတနီၤနီၤ အိၣ်ဒီးတၢ်ဆိကမိၣ်ကမၣ် ဘၣ်ဃးဒီးလံာ်စီဆှံန့ၣ်လီၤ. ဘၣ်ဆၣ် ဒ်သိးကစၢ်ယွၤကသိၣ်လိနၤအဂီၢ် နကဘၣ်ကွၢ်ကပာ်ကွံာ် တၢ်ဆိကမိၣ်ကမၣ်တဖၣ်အံၤလီၤ.—စံးထီၣ်ပတြၢၤ ၂၅:၄.

တချုးနဖးလံာ်စီဆှံန့ၣ် ဃ့ဘါထုကဖၣ်တက့ၢ်. ယွၤအတၢ်ဆိကမိၣ်တဖၣ်အိၣ်လၢ လံာ်စီဆှံပူၤအဃိ ဒ်သိးပကနၢ်ပၢၢ်အဂီၢ် ပကဘၣ်ဃ့တၢ်မၤစၢၤလၢ ကစၢ်ယွၤအအိၣ်လီၤ. ကစၢ်ယွၤအၢၣ်လီၤဝဲလၢ အက “ဟ့ၣ်ပှၤလၢအဃ့တၢ်လၢအီၤတဖၣ် လၢသးစီဆှံ” လီၤ. (လူၤကၣ် ၁၁:၁၃) သးစီဆှံမၤစၢၤနၤလၢ နကနၢ်ပၢၢ်ကစၢ်ယွၤအတၢ်ဆိကမိၣ်တဖၣ်လီၤ. ဒ်တၢ်ဆၢကတီၢ်လဲၤပူၤကွံာ်အသိး သးစီဆှံကအိးထီၣ်နသးအတၢ်ဆိကမိၣ် လၢနကနၢ်ပၢၢ်ထီၣ် “တၢ်ခူသူၣ်အဒိၣ်အယိာ် ဘၣ်ဃးဒီးကစၢ်ယွၤ” န့ၣ်လီၤ.—၁ ကရံၣ်သူး ၂:၁၀, ခ့ခါစှီၤကျိာ်.

ဖးဒ်သိးနကနၢ်ပၢၢ်အဂီၢ်. တဘၣ်ဖးဝံၤတၢ်မံၤတဂ့ၤ. ဆိကမိၣ်ထံဘၣ်ဃးဒီး တၢ်ဂ့ၢ်လၢနဖးအီၤတဖၣ်တက့ၢ်. ဒီးသံကွၢ်လီၤနသးလၢ တၢ်သံကွၢ်တဖၣ်အံၤ– ‘ပှၤအိၣ်လၢလံာ်စီဆှံအပူၤတဂၤအံၤ ယထံၣ်ဘၣ်အတၢ်ဂ့ၤတၢ်ဝါ မနုၤတဖၣ်လဲၣ်. တၢ်ဂ့ၢ်တခါအံၤန့ၣ် ယမၤထွဲအီၤလၢယတၢ်အိၣ်မူအပူၤ ကသ့ဒ်လဲၣ်.’

ပာ်လီၤဖီတၢၣ် လီၤတံၢ်လီၤဆဲး. ဒ်သိး နတၢ်ဖးလံာ်စီဆှံ အခီပညီကအိၣ်အဂီၢ် ဂုာ်ကျဲးစၢးမၤလိန့ၢ်တၢ် တမံၤမံၤလၢ ကကဲဘျုးလၢနတၢ်အိၣ်မူအပူၤန့ၣ်တက့ၢ်. နပာ်လီၤဖီတၢၣ်ဒ်တၢ်ဂ့ၢ်လၢ လာ်တဖၣ်အံၤပာ်ဖျါထီၣ်ဝဲအသိးသ့ဝဲလီၤ. အဒိ ‘ယအဲၣ်ဒိးမၤလိအါထီၣ် ဘၣ်ဃးဒီးကစၢ်ယွၤအဂ့ၢ်. ယအဲၣ်ဒိးကဲထီၣ်ပှၤလၢ အဂ့ၤကတၢၢ်တဂၤ, ယအဲၣ်ဒိးကဲထီၣ် ဝၤမ့တမ့ၢ်မါလၢ အဂ့ၤန့ၢ်ဒံးလၢညါ.’ ဝံၤဒီး ဃုထၢလံာ်စီဆှံအဆၢတဖၣ်လၢ ကမၤစၢၤနၤဒ်သိး နကတုၤလၢနဖီတၢၣ်အဂီၢ်န့ၣ်တက့ၢ်.a

တၢ်ဟ့ၣ်ကူၣ်လၢ ထးယဲၢ်ခါအံၤ ကမၤစၢၤနၤဒ်သိး နကသးအိၣ်စးထီၣ်ဖးလံာ်စီဆှံအဂီၢ်လီၤ. ဘၣ်ဆၣ် ဒ်သိးနဖးလံာ်စီဆှံကမုာ်အဂီၢ် နကဘၣ်မၤဒ်လဲၣ်. တၢ်မၤလိလၢခံတခါ ကမၤစၢၤနၤလီၤ.

ဖဲနဖးလံာ်စီဆှံအဆၢကတီၢ် ဒ်သိးကကဲထီၣ်တၢ်ဟ့ၣ်ဂံၢ်ဟ့ၣ်ဘါ ဒီးတၢ်တကၢၣ်နသးတဂ့ၤအဂီၢ် တၢ်လၢနမၤသ့န့ၣ်အိၣ်ဝဲလီၤ. ခဲအံၤပကကွၢ်သကိး တၢ်ဂ့ၢ်လၢကမၤစၢၤနၤ ဒ်သိးနဖးလံာ်စီဆှံကမုာ်ထီၣ်အဂီၢ်လီၤ.

ဃုထၢတၢ်ကွဲးကျိာ်ထံလံာ်စီဆှံ လၢအချုးစိၤခဲအံၤ ဒီးနနာ်န့ၢ်သ့. နမ့ၢ်ဖးလံာ်လဲၢ်လၢ အိၣ်ဒီးတၢ်ကတိၤလၢ နနၢ်ပၢၢ်ဘၣ်အီၤကီ ဒီးတၢ်ကတိၤလၢပှၤတသူအီၤလၢ စိၤခဲအံၤန့ၣ် နဖးအီၤတမုာ်ဘၣ်. အဃိ ဃုဖးလံာ်စီဆှံလၢနနၢ်ပၢၢ်ဘၣ်အီၤညီ ဒ်သိးကထုးန့ၢ်နသးအဂီၢ်တက့ၢ်. ဘၣ်ဆၣ်ဒီး နကဘၣ်ဃုထၢလံာ်စီဆှံလၢ တၢ်ကွဲးကျိာ်ထံအီၤလီၤတံၢ်လီၤဆဲးစ့ၢ်ကီးလီၤ.a

သူ online တၢ်ပီးတၢ်လီတဖၣ်. မုၢ်မဆါတနံၤအံၤ နဒိးန့ၢ်ဘၣ်လံာ်စီဆှံလၢ လံာ်တကးဒံးဘၣ် နဖးဘၣ်အီၤလၢ online ပူၤ, မ့တမ့ၢ် ဒီလိးအီၤလၢ နခီၣ်ဖၠူထၢၣ်, tablet မ့တမ့ၢ် လၢနလီတဲစိအပူၤသ့ဝဲလီၤ. လံာ်စီဆှံလၢ online အဖီခိၣ်တနီၤန့ၣ် အိၣ်ဒီးတၢ်ပီးတၢ်လီဒ်သိး ကမၤစၢၤနၤလၢ နကဃုကွၢ်လံာ်စီဆှံအဆၢအဂၤတဖၣ် လၢအဘၣ်ထွဲလိာ်အသး ဒီးတၢ်ဂ့ၢ်တခါဃီလီၤ. တကးဒံးဘၣ် နထိၣ်သတြီၤတၢ်ကွဲးကျိာ်ထံလံာ်စီဆှံ လၢအဂၤသ့ဝဲလီၤ. လၢနကဖးလံာ်စီဆှံအလီၢ် နမ့ၢ်အဲၣ်ဒိးဒိကနၣ်လံာ်စီဆှံန့ၣ် နဒီလိးတၢ်ကလုၢ်တနီၤနီၤ လၢကျိာ်အဂၤသ့ဝဲလီၤ. ပှၤအါဂၤ ဖဲအဝဲသ့ၣ်လဲၤတၢ်က့ၤတၢ်အခါ, ဆှုၣ်တၢ်ဒီး မၤတၢ်တမံၤမံၤအခါ အဝဲသ့ၣ်ဒိကနၣ်လံာ်စီဆှံ လၢတၢ်ကလုၢ်မုာ်ဝဲလီၤ. နၤစ့ၢ်ကီးနမ့ၢ်မၤဒ်န့ၣ်န့ၣ် ကဂ့ၤဝဲလီၤ.

သူတၢ်ပီးတၢ်လီလၢ တၢ်မၤလိလံာ်စီဆှံအဂီၢ်. ဖဲနဖးလံာ်စီဆှံအခါ နမ့ၢ်သူတၢ်ပီးတၢ်လီလၢ တၢ်မၤလိလံာ်စီဆှံအဂီၢ်န့ၣ် နကဒိးန့ၢ်အါထီၣ်အဘျုးလီၤ. အဒိ ဟီၣ်ခိၣ်ဂီၤလၢ အပာ်ဖျါထီၣ်တၢ်လီၢ်တၢ်ကျဲတဖၣ် လၢလံာ်စီဆှံအပူၤန့ၣ် ကမၤစၢၤနၤဒ်သိး နကသ့ၣ်ညါတၢ်လီၢ်တၢ်ကျဲ ဒီးနၢ်ပၢၢ်အါထီၣ်တၢ်အိၣ်သးလီၤ. တၢ်ဂ့ၢ်လၢမဲးကစံအံၤအပူၤ မ့တမ့ၢ် လၢ jw.org/ksw ပှာ်ယဲၤသန့အပူၤန့ၣ် မၤစၢၤနၤလၢ နကနၢ်ပၢၢ်အါထီၣ်လံာ်စီဆှံအဂီၢ်လီၤ.

ဖးတၢ်ဂ့ၢ်လၢ နဃုထၢအီၤအဖီခိၣ်. နမ့ၢ်ဆိကမိၣ်လၢ တၢ်ဖးလံာ်စီဆှံစးထီၣ်လၢ ၁ မိၤၡ့ တုၤလၢ တၢ်လီၣ်ဖျါ မ့ၢ်ကီလၢနဂီၢ်န့ၣ် နဃုဖးတၢ်ဂ့ၢ်လၢ နဘၣ်သူၣ်ဘၣ်သးသ့ဝဲလီၤ. နမ့ၢ်အဲၣ်ဒိးဃုသ့ၣ်ညါပှၤမံၤဟူသၣ်ဖျါလၢ လံာ်စီဆှံအပူၤန့ၣ် နဖးအဝဲသ့ၣ်တဂၤစုာ်စုာ်အဂ့ၢ်သ့ဝဲလီၤ. ဒ်သိးနမၤဒ်န့ၣ်ကသ့အဂီၢ် နကထံၣ်ဘၣ်တၢ်အဒိတခါ လၢတၢ်လွံၢ်နၢၣ်အပူၤ လၢအခိၣ်တီမ့ၢ်ဝဲ– “ဃုသ့ၣ်ညါပှၤအိၣ်လၢ လံာ်စီဆှံအပူၤတက့ၢ်.” ဃုသ့ၣ်ညါပှၤတဂၤဂၤ အဂ့ၢ်တက့ၢ်.

လံာ်စီဆှံတမ့ၢ်လံာ် ယိယိဖိတဘ့ၣ်ဘၣ်. လံာ်စီဆှံအံၤဟဲလၢ ပတၢ်ဘၣ်တ့ကစၢ်အအိၣ်အဃိ အိၣ်ဒီးတၢ်ဟ့ၣ်ကူၣ်အါမးလီၤ. (၂ တံၤမသ့း ၃:၁၆) တၢ်ကစီၣ်လၢလံာ်စီဆှံအပူၤန့ၣ် မၤစၢၤပှၤလၢ ပကဆီတလဲပတၢ်အိၣ်မူလီၤ. လံာ်စီဆှံပာ်ဖျါထီၣ်ဝဲလၢ– “ယွၤအကလုၢ်န့ၣ် မ့ၢ်တၢ်မူ, ဒီးမၤတၢ်သ့” လီၤ. (ဧ့ၤဘြံၤ ၄:၁၂) လံာ်အံၤအိၣ်ဒီး တၢ်စိတၢ်ကမီၤလၢ ကမၤဂ့ၤထီၣ်ပတၢ်အိၣ်မူ လၢကျဲခံဘိလီၤ. တၢ, လံာ်စီဆှံဟံးစုနဲၣ်ကျဲပှၤလၢ ပတၢ်အိၣ်မူလၢ ဆၢကတီၢ်ခဲအံၤလီၤ. ခံ, မၤစၢၤစ့ၢ်ကီးပှၤလၢ ပကသ့ၣ်ညါထီၣ်ကစၢ်ယွၤ ဒီးအတၢ်အၢၣ်လီၤအီလီၤတဖၣ်လီၤ.—၁ တံၤမသ့း ၄:၈; ယၤကိာ် ၄:၈.

မၤဂ့ၤထီၣ် ပတၢ်အိၣ်မူ လၢဆၢကတီၢ်ခဲအံၤ. လံာ်စီဆှံ မၤစၢၤပှၤ သ့လၢကျဲအါဘိလီၤ. လံာ်စီဆှံ ဟ့ၣ်ကူၣ်ပှၤဘၣ်ဃးဒီး

• တၢ်ရ့လိာ်သးဒီးပှၤဂၤ.—အ့းဖ့းစူး ၄:၃၁, ၃၂; ၅:၂၂, ၂၅, ၂၈, ၃၃.

• တၢ်အိၣ်ဆူၣ်အိၣ်ချ့ လၢနီၢ်ခိဒီး တၢ်သူၣ်မံသးမုာ်. —စံးထီၣ်ပတြၢၤ ၃၇:၈; ကတိၤဒိ ၁၇:၂၂.

• လုၢ်လၢ်သကဲာ်ပဝး.—၁ ကရံၣ်သူး ၆:၉, ၁၀.

• ကျိၣ်စ့တၢ်ကီတၢ်ခဲတဖၣ်.—ကတိၤဒိ ၁၀:၄;၂၈:၁၉; အ့းဖ့းစူး ၄:၂၈.a

ပှၤဒီမါဝၤသးစၢ်လၢ ကီၢ်အ့ၡၢၣ်န့ၣ် ဒိးန့ၢ်ဘၣ်ဝဲ တၢ်အဘျုးလၢ လံာ်စီဆှံအတၢ်ဟ့ၣ်ကူၣ်စ့ၢ်ကီးလီၤ. ဒ်ပှၤဒီမါဝၤလၢ အထီၣ်ပှၢ်သီအါဂၤအသိး အဝဲသ့ၣ်စ့ၢ်ကီးအိၣ်ဒီးတၢ်ကီတၢ်ခဲ မ့ၢ်လၢအတၢ်ပာ်သူၣ်ပာ်သး တဒ်သိးလိာ်အသး ဒီးတဲဖျါထီၣ်အတၢ်ဆိကမိၣ် တညီဝဲဘၣ်. ဘၣ်ဆၣ် ဖဲအဝဲသ့ၣ်စးထီၣ်မၤထွဲဝဲ လံာ်စီဆှံအတၢ်ဟ့ၣ်ကူၣ်အဆၢကတီၢ် တၢ်မၤအသးဒ်လဲၣ်. ဝၤတဂၤလၢအမံၤမ့ၢ် ဝံစဲၤတဲဝဲလၢ– “ပတၢ်ဆီဟံၣ်ဆီဃီ အိၣ်ဒီးတၢ်ကီတၢ်ခဲ သနာ်က့ တၢ်ဂ့ၢ်လၢယဖးဘၣ်အီၤလၢ လံာ်စီဆှံအပူၤန့ၣ် မၤစၢၤယၤလၢ ယလဲၤခီဖျိတၢ်ကီတၢ်ခဲလၢ တၢ်အဲၣ်တၢ်ကွံအပူၤသ့ဝဲလီၤ.” ဒီးအမါလၢအမံၤမ့ၢ် အဲနၤလူၤတဲစ့ၢ်ကီးဝဲလၢ– “ခီဖျိယဖးပှၤဂၤအဒိအတဲာ်လၢ လံာ်စီဆှံပူၤအဃိ ကဲထီၣ်တၢ်မၤစၢၤလၢ ယဂီၢ်လီၤ. ခဲအံၤ ပအိၣ်ဒီးတၢ်သူၣ်ခုသးခုလၢ ပတၢ်ဆီဟံၣ်ဆီဃီအပူၤ တကးဒံးဘၣ် ပအိၣ်ဒီးဖီတၢၣ်လၢ အလီၤသူၣ်မံသးမုာ်စ့ၢ်ကီးလီၤ.”

သ့ၣ်ညါထီၣ်ကစၢ်ယွၤအဂ့ၢ်. ဝံစဲၤတဲစ့ၢ်ကီးဝဲလၢ– “ခီဖျိယဖးလံာ်စီဆှံအဃိ ယတူၢ်ဘၣ်လၢ ယတၢ်ရ့လိာ်သးဒီး ယဟိဝၤယွၤဘူးထီၣ် သပှၢ်ကတၢၢ်လီၤ.” ဝံစဲၤအတၢ်ကတိၤအံၤ ပာ်ဖျါထီၣ်ဝဲတၢ်မ့ၢ်တၢ်တီ အရ့ဒိၣ်တခါလၢ လံာ်စီဆှံမၤစၢၤနၤလၢ နကရ့လိာ်ဘၣ်နသးဒီးကစၢ်ယွၤလီၤ. နမ့ၢ်မၤဒ်န့ၣ်န့ၣ် ကစၢ်ယွၤကကဲထီၣ် နတံၤသကိးလီၤ. ဒီးနကထံၣ်ဘၣ်လၢ ကစၢ်ယွၤပာ်ဖျါန့ၢ်ပှၤ လၢဟီၣ်ခိၣ်အတၢ်အိၣ်သးတဖၣ် ကဂ့ၤထီၣ်ဝဲလီၤ. ဖဲန့ၣ်အဆၢကတီၢ် နဒိးန့ၢ်ဘၣ် “တၢ်မူအထူအယိာ်” သ့ဝဲလီၤ. (၁ တံၤမသ့း ၆:၁၉) လံာ်အဂုၤအဂၤလၢ ကဟ့ၣ်နၤတၢ်မူအထူအယိာ် ဒ်လံာ်စီဆှံန့ၣ် တအိၣ်ဝဲဘၣ်.

နမ့ၢ်စးထီၣ်ဖးလံာ်စီဆှံ ဒီးဖးအီၤထီဘိန့ၣ် နၤစ့ၢ်ကီးနတၢ်အိၣ်မူ ကဂ့ၤထီၣ်လၢဆၢကတီၢ်ခဲအံၤ ဒီးနကသ့ၣ်ညါထီၣ်ကစၢ်ယွၤလီၤ. ဘၣ်ဆၣ် ဖဲနဖးလံာ်စီဆှံအခါ နတၢ်သံကွၢ်ကအိၣ်ဝဲအါမးလီၤ. အဃိ နကဘၣ်သ့ၣ်နီၣ်ထီၣ်က့ၤ ပှၤအဲၤသံအီးပးဖိအပဒိၣ်တဂၤ ကဲထီၣ်တၢ်ဒိဂ့ၤတဲာ်ဘၣ်လၢ ပဂီၢ်လီၤ. အဝဲအိၣ်မူဘၣ်လၢ ပူၤကွံာ်အနံၣ် ၂,၀၀၀ လီၤ. ဘၣ်ဃးဒီးလံာ်စီဆှံအဂ့ၢ်န့ၣ် အဝဲအိၣ်ဒီးတၢ်သံကွၢ်ဒီဒူၣ်ညါ. ဖဲပှၤသံကွၢ်အီၤလၢ တၢ်လၢနဖးန့ၣ် နနၢ်ပၢၢ်ဧါအခါ အဝဲတဲဆၢက့ၤဝဲလၢ “ပှၤတဂၤဂၤ မ့ၢ်တဒုးနဲၣ်ဘၣ်ယၤဒီး, ယနၢ်ပၢၢ်ကသ့ဒ်လဲၣ်.”b ဝံၤဒီး လၢတၢ်သူၣ်ဆူၣ်သးဆူၣ်အပူၤ အဝဲတူၢ်လိာ်ဝဲ တၢ်မၤစၢၤလၢစီၤဖံလံးပူးအအိၣ်လီၤ. စီၤဖံလံးပူးမ့ၢ်ယ့ၣ်ၡူး အပျဲၢ်အဘီၣ်တဂၤလၢ အသိၣ်လိလံာ်စီဆှံသ့ဂ့ၤဂ့ၤလီၤ. (မၤတၢ် ၈:၃၀, ၃၁, ၃၄) ဒ်န့ၣ်အသိး နမ့ၢ်အဲၣ်ဒိးသ့ၣ်ညါအါထီၣ် လံာ်စီဆှံအဂ့ၢ်န့ၣ် ပကွဲမုာ်နၤလၢ နကဃ့တၢ်မၤစၢၤလၢ www.pr2711.com မ့တမ့ၢ် ကွဲးလံာ်ပရၢဆူ တၢ်အိၣ်တၢ်ဆိးအလီၢ် လၢဘၣ်တၢ်ပာ်ဖျါထီၣ်အီၤလၢမဲးကစံအံၤ အပူၤန့ၣ်တက့ၢ်. ဒီးနဆဲးကျိးဒီးယဟိဝၤပှၤအုၣ်အသးတဖၣ် လၢအိၣ်ဘူးဒီးနၤသ့ မ့တမ့ၢ် နလဲၤဆူဘီမုၢ်ဘျီၣ်ဒိၣ်လၢ အိၣ်လၢနလီၢ်ကဝီၤပူၤသ့ဝဲလီၤ. စးထီၣ်လၢတနံၤအံၤ နမ့ၢ်ဖးလံာ်စီဆှံထီဘိ ဒီးပျဲယွၤအကလုၢ်ကထါ ဟံးစုနဲၣ်ကျဲနတၢ်အိၣ်မူန့ၣ် ကဂ့ၤဝဲလီၤ.