ဘၣ်မနုၤအဃိ ပဘၣ်ဃုသ့ၣ်ညါ လံာ်စီဆှံလဲၣ်

တချုးနဖးလံာ်စီဆှံအခါ နမ့ၢ်သ့ၣ်ညါပာ်စၢၤတၢ်ဂ့ၢ်တၢ်ကျိၤတနီၤလၢ ဘၣ်ဃးဒီးလံာ်စီဆှံန့ၣ် ကကဲထီၣ်တၢ်မၤစၢၤလၢ နဂီၢ်လီၤ. လံာ်စီဆှံန့ၣ် ဘၣ်တၢ်ပာ်ဖှိၣ်ထီၣ်အီၤလၢလံာ် ၆၆ ကတြူၢ်, စးထီၣ်လၢ ၁ မိၤၡ့ ဒီးကတၢၢ်ဝဲလၢ လံာ်တၢ်လီၣ်ဖျါလီၤ.

ပှၤဒုးအိၣ်ထီၣ် လံာ်စီဆှံန့ၣ် မ့ၢ်မတၤလဲၣ်. တၢ်အံၤမ့ၢ် တၢ်သံကွၢ်လၢ အထုးန့ၢ်ပသးတခါလီၤ. နီၢ်နီၢ်, လံာ်စီဆှံန့ၣ် ဘၣ်တၢ်ကွဲးအီၤ လၢပှၤဟီၣ်ခိၣ်ဖိအဂၤ ၄၀ ဃၣ်ဃၣ်, ဒီးယံာ်ဝဲအနံၣ် ၁,၆၀၀ ဘျဲၣ်န့ၣ်လီၤ. ဘၣ်ဆၣ်, ပှၤကွဲးလံာ်တဖၣ်အံၤန့ၣ် တစံးလီၤအသးလၢ အဝဲသ့ၣ်မ့ၢ် ပှၤဒုးအိၣ်ထီၣ်လံာ်စီဆှံဘၣ်. ပှၤကွဲးလံာ်စီဆှံတဂၤ စံးဝဲဒ်အံၤလီၤ– “ကယဲၢ်တၢ်ကွဲးအသးခဲလၢာ်န့ၣ်, ကွဲးအသးလၢ ယွၤအသးစီဆှံ” လီၤ. (၂ တံၤမသ့း ၃:၁၆) ပှၤကွဲးလံာ်အဂၤတဂၤ စံးဝဲဒ်အံၤလီၤ– “ယွၤအသးကတိၤတၢ်ဒီးယၤ, ဒီးအကလုၢ်အိၣ်ဝဲလၢ ယပျ့ၤလိၤလီၤ.” (၂ ၡမူၤအ့လး ၂၃:၂) ပှၤကွဲးလံာ်တဖၣ်အံၤ စံးဝဲလီၤတံၢ်လီၤဆဲးလၢ ပှၤလၢအဒုးအိၣ်ထီၣ် လံာ်စီဆှံန့ၣ်မ့ၢ် ယဟိဝၤယွၤ, ကစၢ်လၢအစိကမီၤဒိၣ်ကတၢၢ်လၢ အပၢဘၣ် မူဟီၣ်ကယၢလီၤ. အါန့ၢ်အန့ၣ်, အဝဲသ့ၣ်ပာ်ဖျါထီၣ်ဝဲတြၢၢ်ကလာ်လၢ ကစၢ်ယွၤအဲၣ်ဒိးလၢ ပှၤဟီၣ်ခိၣ်ဖိတဖၣ် ကသုးဘူးအသးဆူအအိၣ်လီၤ.

ဒ်သိးပကနၢ်ပၢၢ်လံာ်စီဆှံအဂီၢ် တၢ်ဂ့ၢ်လၢပကဘၣ်သ့ၣ်ညါသပှၢ်တၢၢ်အိၣ်ဒံးတမံၤလီၤ. လံာ်စီဆှံဒီဘ့ၣ်အတၢ်ဂ့ၢ်မိၢ်ပှၢ်န့ၣ် ပာ်ဖျါထီၣ်ဝဲလၢ ကစၢ်ယွၤအတၢ်ခွဲးတၢ်ယာ်လၢအကပၢပှၤဟီၣ်ခိၣ်ဖိန့ၣ် မ့ၢ်တၢ်လၢအကြၢးဝဲဘၣ်ဝဲဒီး ကစၢ်ကမၤဝဲဒ်အံၤခီဖျိအဘီမုၢ်လၢမူခိၣ်လီၤ. တၢ်ဂ့ၢ်မိၢ်ပှၢ်အံၤ ဘၣ်တၢ်ပာ်ဖျါထီၣ်အီၤလၢ ၁ မိၤၡ့ တုၤလၢ လံာ်တၢ်လီၣ်ဖျါဒ်လဲၣ်န့ၣ် ပကထံၣ်ဘၣ်လၢ လံာ်ကဘျံးလၢခံတဖၣ်အပူၤလီၤ.

ခီဖျိပနၢ်ပၢၢ် တၢ်ဂ့ၢ်လၢထးတဖၣ်အံၤအဃိ ခဲအံၤပကဃုသ့ၣ်ညါ တၢ်ကစီၣ်လၢ လံာ်စီဆှံအပူၤလီၤ. လံာ်အဝဲအံၤ မ့ၢ်လံာ်လၢ အဟူထီၣ်သါလီၤဒိၣ်ကတၢၢ် လၢဟီၣ်ခိၣ်ဒီဘ့ၣ်ညါလီၤ.