ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါဖ့ၤဘြူၤအါရံၤ ၃–၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ မိၤၡ့ ၁၂–၁၄
“တၢ်အၢၣ်လီၤအီလီၤလၢ အကဲဘျုးလၢနဂီၢ်”
(၁ မိၤၡ့ ၁၂:၁, ၂) ဒီးယွၤစံးဘၣ်စီၤအၤဘြၣ်, ဟးထီၣ်နဲလၢနထံနကီၢ်ဒီး လၢနဘူးနတံၢ်အအိၣ်, ဒီးလၢနပၢ်အဟံၣ် ဆူကီၢ်တဘ့ၣ် လၢယကဒုးနဲၣ်နၤတက့ၢ်. ၂ ဒီးယကဒုးကဲထီၣ်နၤလၢပှၤတကလုာ်ဖးဒိၣ်, ဒီးယကဆိၣ်ဂ့ၤနၤ, ဒီးယကပာ်ဒိၣ်နမံၤ, ဒီးနကကဲထီၣ်တၢ်ဆိၣ်ဂ့ၤလီၤ.
it-1 ၅၂၂ ¶၄
တၢ်အၢၣ်လီၤအီလီၤ
တၢ်အၢၣ်လီၤအီလီၤလၢ ကစၢ်ယွၤမၤဝဲဒီး စီၤအၤဘြၤဟၣ်. တၢ်အၢၣ်လီၤအီလီၤအံၤ စးထီၣ်လၢထီၣ်ပှဲၤထီၣ်ဝဲဖဲ စီၤအၤဘြၤ (စီၤအၤဘြၤဟၣ်) ခီဂာ်ဝဲထံကျိ ဖရၤသး ဒီးနုာ်လီၤဝဲဆူ ကီၢ်ကနၤဧၣ်ပူၤအဆၢကတီၢ်န့ၣ်လီၤ. လၢခံပူၤကွံာ် အနံၣ် ၄၃၀ န့ၣ်ကစၢ်ယွၤ ဟ့ၣ်လီၤဝဲ စီၤမိၤၡ့အတၢ်သိၣ်တၢ်သီလီၤ. (၁ မိၤ. ၃:၁၇) ဖဲစီၤအၤဘြၤဟၣ် အိၣ်လၢကီၢ်မ့းစပတၤမံ, ပှၤက့စ့းဖိတဖၣ်အဝ့ၢ်အူၢ်အခါ ကစၢ်ယွၤတဲအီၤလၢ ကဘၣ်လဲၤဝဲလၢ ကီၢ်လၢအဝဲကဒုးနဲၣ်အီၤန့ၣ်လီၤ. (မၤတၢ်. ၇:၂, ၃; ၁ မိၤ. ၁၁:၃၁; ၁၂:၁-၃) ဒ် ၂ မိၤၡ့ ၁၂:၄၀, ၄၁ ပာ်ဖျါထီၣ်ဝဲအသိး အဝဲသ့ၣ်အိၣ်လၢ ကီၢ်အဲၤကူပတူး ဒီးကီၢ်ကနၤဧၣ် ပှဲၤထီၣ်အနံၣ် ၄၃၀ အ “နံၤ” န့ၣ် ပှၤအံၣ်စရ့လးဖိတဖၣ် ဟးထီၣ်ဘၣ်ဝဲလၢ ကီၢ်အဲၤကူပတူး လၢအဘၣ်ကဲကုၢ်အလီၢ်န့ၣ်လီၤ. မုၢ်နံၤလၢအဝဲသ့ၣ်တဖၣ် ဟးထီၣ်ကွံာ်လၢ ကီၢ်အဲၤကူပတူးအပူၤန့ၣ် မ့ၢ်ဝဲ လါနံစၣ် ၁၄ သီ ဘူၣ်လဲၤကပာ်အနံၤ, ချ.ခ.န ၁၅၁၃ လီၤ. (၂ မိၤ. ၁၂:၂, ၆, ၇) လၢတၢ်န့ၣ်အဃိ ဖဲစီၤအၤဘြၤဟၣ် ခီဂာ်ဝဲထံကျိ ဖရၤသး ဒီးနုာ်လီၤဝဲဆူ ကီၢ်ကနၤဧၣ်ပူၤအဆၢကတီၢ်န့ၣ် ဘၣ်သ့ၣ်သ့ၣ် ကမ့ၢ်ဝဲ လါနံစၣ် ၁၄ သီ, ချ.ခ.န ၁၉၄၃ ဒီးတၢ်အၢၣ်လီၤအီလီၤလၢ ကစၢ်ယွၤမၤဝဲဒီး စီၤအၤဘြၤဟၣ်န့ၣ် စးထီၣ်လၢထီၣ်ပှဲၤထီၣ်ဝဲဖဲန့ၣ်လီၤ. ဖဲအဝဲသ့ၣ်လဲၤလၢ ကီၢ်ကနၤဧၣ် အဆၢကတီၢ် ဒီးဖဲအတုၤလၢ ဝ့ၢ်ၡက့ၣ်အခါ ကစၢ်ယွၤလီၣ်ဖျါထီၣ်ကဒီးအသးလၢ စီၤအၤဘြၤဟၣ်အအိၣ် ဒီးတဲဘၣ်အီၤလၢ “ယကဟ့ၣ်လီၤကီၢ်တဘ့ၣ်အံၤလၢ နချံနသၣ်လီၤ.” တၢ်အံၤပာ်ဖျါထီၣ်ဝဲလၢ ကစၢ်ယွၤအတၢ်စံးပာ်လၢ ဧ့ၤဒ့ၣ်တၤသၣ်လီၢ်အပူၤ ဒီးတၢ်အၢၣ်လီၤအီလီၤလၢ ကစၢ်ယွၤမၤဝဲဒီး စီၤအၤဘြၤဟၣ်အံၤ ဘၣ်ထွဲလိာ်အသး လီၤ. ဒီးပာ်ဖျါထီၣ်ဝဲလၢ “ချံသၣ်” န့ၣ်ကမ့ၢ်ပှၤဟီၣ်ခိၣ်ဖိတဂၤ ဒီးကဟဲလီၤစၢၤလီၤသွဲၣ်လၢ ပှၤဟီၣ်ခိၣ်ဖိန့ၣ်လီၤ. (၁ မိၤ. ၁၂:၄-၇) လၢခံ ယဟိဝၤယွၤ ပာ်ဖျါအါထီၣ်ဝဲ တၢ်ဂ့ၢ်တၢ်ကျိၤတဖၣ် ဒ် ၁ မိၤ. ၁၃:၁၄-၁၇; ၁၅:၁၈; ၁၇:၂-၈, ၁၉; ၂၂:၁၅-၁၈ ပာ်ဖျါထီၣ်ဝဲ အသိးလီၤ.
(၁ မိၤၡ့ ၁၂:၃) ဒီးပှၤလၢအဆိၣ်ဂ့ၤနၤန့ၣ်ယကဆိၣ်ဂ့ၤအီၤ, ဒီးပှၤလၢအဆိၣ်အၢနၤန့ၣ် ယကဆိၣ်အၢအီၤလီၤ. ဒီးပှၤဟီၣ်ခိၣ်ဖိအဒူၣ်ခဲလၢာ် ကဘၣ်တၢ်ဆိၣ်ဂ့ၤလၢနပူၤလီၤ.
တၢး၈၉ ၇/၁ ၃ ¶၄
ဘၣ်မနုၤအဃိ ပကြၢးသ့ၣ်ညါ တၢ်မ့ၢ်တၢ်တီဘၣ်ဃးဒီး စီၤအၤဘြၤဟၣ်လဲၣ်
တၢ်အံၤမ့ၢ်ဝဲတၢ်စံးပာ်လၢ အလီၤကမၢကမၣ် ဒီးလၢဆၢကတီၢ်အဂၤခံဘျီစ့ၢ်ကီး စီၤအၤဘြၤဟၣ် နၢ်ဟူဘၣ်ဝဲဒ်န့ၣ်လီၤ. (၁ မိၤၡ့ ၁၈:၁၈; ၂၂:၁၈) ဒ်သိးတၢ်စံးပာ်အံၤ ကဟဲလၢထီၣ်ပှဲၤထီၣ်အဂီၢ် ကစၢ်ယွၤကမၤမူထီၣ်က့ၤ ပှၤတနီၤလၢ ဟံၣ်ဖိဃီဖိအဒူၣ်ခဲလၢာ်လၢ အစၢၤလီၤတုာ်အကျါဒၣ်လဲာ်န့ၣ်လီၤ. ပှၤလၢအဂဲၤဆၢထၢၣ်သမူထီၣ်က့ၤတဖၣ်အံၤ ကဒိးန့ၢ်ဘၣ်ဝဲ သးသမူန့ၣ် မ့ၢ်တၢ်ဆိၣ်ဂ့ၤနီၢ်နီၢ်လီၤ. မ့ၢ်လၢအဝဲသ့ၣ် အါတက့ၢ်န့ၣ် ကအိၣ်မူဘၣ်ဝဲလၢ ဟီၣ်ခိၣ်လၢ အလီၤဂာ် ဒ်ပၤရဒံစူးလၢ အလီၤမၢ်ကွံာ်ဝဲအဃိလီၤ. လၢခံဒ်သိးအဝဲသ့ၣ် ကဒိးန့ၢ်ဘၣ် တၢ်မူအထူအယိာ်အဂီၢ် ကဘၣ်တၢ်သိၣ်လိအီၤလီၤ.—၁ မိၤၡ့ ၂:၈, ၉, ၁၅-၁၇; ၃:၁၇-၂၃.
(၁ မိၤၡ့ ၁၃:၁၄-၁၇) ဒီးယွၤစံးဘၣ်စီၤအၤဘြၣ်လၢ စီၤလိာ် လီၤမုၢ်လီၤဖးဒီးအီၤ အလီၢ်ခံန့ၣ်, ကျ့ထီၣ်နမဲာ်, ဒီးဖဲနအိၣ်အလီၢ်န့ၣ် ကွၢ်ထီၣ်လၢကလံၤစိး, ဒီးလၢကလံၤထံး, ဒီးလၢမုၢ်ထီၣ်, ဒီးလၢမုၢ်နုာ် န့ၣ်တက့ၢ်. ၁၅ အဂ့ၢ်ဒ်အံၤ, ကီၢ်လၢနထံၣ်ဘၣ်အီၤန့ၣ်, ယကဟ့ၣ်လီၤအီၤဒီဘ့ၣ်ညါလၢနၤ, ဒီးလၢနချံနသၣ်လီၤစိၤလီၤထီလီၤ. ၁၆ ဒီးယကမၤနချံနသၣ် ဒ်ဟီၣ်ခိၣ်ကမူၣ်အသိးသတးဒီး, ပှၤဂံၢ်ဟီၣ်ခိၣ်ကမူၣ် မ့ၢ်သ့ဒီး ဂံၢ်နချံနသၣ် ကသ့စ့ၢ်ကီးလီၤ. ၁၇ ဂဲၤဆၢထၢၣ် လဲၤတၢ်လၢကီၢ်ပူၤ, လၢအထီဒီး လၢအဒီၣ်တူာ်န့ၣ်တက့ၢ်, အဂ့ၢ်ဒ်အံၤ, ယကဟ့ၣ်လီၤအီၤလၢနၤလီၤ.
it-2 ၂၁၃ ¶၃
တၢ်ဘျၢ
ပှၤကူၣ်ဘၣ်ကူၣ်သ့တနီၤန့ၣ် သန့ၤထီၣ်ဝဲ တၢ်အုၣ်သးလၢတၢ်စံၣ်စိၤတဲစိၤ ဒီးနာ်ဝဲလၢ ဒ်သိးပှၤကဟ့ၣ်လီၤတၢ်လီၢ်လၢ ပှၤပှ့ၤဟီၣ်ခိၣ်တဂၤအစုပူၤအဂီၢ် ပှၤကဘၣ်အိၣ်လၢတၢ်ထီၣ်ထီ ဒီးဒုးနဲၣ်ပှၤလၢကပှ့ၤတၢ်လီၢ်တဂၤ တၢ်လီၢ်အဆၢအတၢ်ပနီၣ် လီၤတံၤလီၤဆဲးန့ၣ်လီၤ. ပှၤလၢအပှ့ၤတၢ်တဂၤ မ့ၢ်တဲဝဲလၢ “ယထံၣ်” န့ၣ်အခီပညီ အဝဲတူၢ်လိာ်ဝဲလီၤ. ဖဲယဟိဝၤယွၤ အၢၣ်လီၤအီလီၤဝဲ စီၤအၤဘြၤဟၣ်လၢ ကဟ့ၣ်ဝဲကီၢ်ကနၤဧၣ်အခါ အဆိကတၢၢ်န့ၣ် အဝဲမၢအကွၢ်ဝဲ တၢ်လီၢ်လွံၢ်ကပၤလၢာ်လီၤ. စီၤအၤဘြၤဟၣ် တတဲဝဲလၢ “ယထံၣ်” ဘၣ်အဃိ ဘၣ်သ့ၣ်သ့ၣ် ကမ့ၢ်လၢ ကစၢ်ယွၤ ကဟ့ၣ်ကီၢ်တၢ်စံးပာ်အံၤလၢ စီၤအၤဘြၤဟၣ် အချံအသၣ်လၢခံအဃိလီၤ. (၁ မိၤ. ၁၃:၁၄, ၁၅) ဒ်ပတဲတ့ၢ်လၢထးအသိး နီၢ်နီၢ်န့ၣ် ဖဲကစၢ်ယွၤ တဲဝဲပှၤလၢအခၢၣ်စး ပှၤအံၣ်စရ့လးဖိ စီၤမိၤၡ့လၢက “ကွၢ်” ဝဲကီၢ်အခါ ပာ်ဖျါထီၣ်ဝဲလၢ အဝဲကဟ့ၣ်လီၤဝဲ ကီၢ်တၢ်စံးပာ်အံၤလၢ ပှၤအံၣ်စရ့လးဖိလၢ အိၣ်လၢစီၤယိၤၡူအတၢ်တီခိၣ်ရိၤမဲ အဖီလာ်တဖၣ်အစုပူၤ လၢအဖိးသဲစးလီၤ. (၅ မိၤ. ၃:၂၇, ၂၈; ၃၄:၄; ဆိကမိၣ်ကွၢ်စ့ၢ်ကီး မုၣ်ကီၤလံၢ် လ့ပစီဝဲ ယ့ၣ်ၡူး မး. ၄:၈) တၢ်လၢပှၤကဘၣ်မၤဝဲလၢခံတခါ လၢအဖိးသဲစးန့ၣ် မ့ၢ်ဝဲဒ်သိးကဒိးန့ၢ်ဘၣ်ကီၢ်အဂီၢ် ပှၤကဘၣ်လဲၤဝဲလၢ ကီၢ်ဒီတဘ့ၣ်လီၤ. (၁ မိၤ. ၁၃:၁၇; ၂၈:၁၃) ဒ်တၢ်ကွဲးနီၣ်ကွဲးဃါ လၢပျၢၤတဖၣ်အသိး ဖဲပှၤပှ့ၤပှၤဆါ ဟီၣ်ခိၣ်တၢ်လီၢ်တၢ်ကျဲအခါန့ၣ် ပၣ်ဃုာ်ဒီး သ့ၣ်ထူၣ်အနီၣ်ဂံၢ်စ့ၢ်ကီးလီၤ.—ထိၣ်သတြီၤဒီး ၁ မိၤ. ၂၃:၁၇, ၁၈.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၁ မိၤၡ့ ၁၃:၈, ၉) ဒီးစီၤအၤဘြၣ်စံးဘၣ်စီၤလိာ်, ယဃ့ကညးနၤ, မ်တၢ်အ့ၣ်လိာ်ဆိးက့လိာ် သုတအိၣ်ဒီးယၤဒီးနၤ, ဒီးယပှၤကွၢ်ဖိဆၣ်ဖိကီၢ်ဖိ, ဒီးနပှၤကွၢ်ဆၣ်ဖိကီၢ်ဖိတဂ့ၤ. အဂ့ၢ်ဒ်အံၤ, ပမ့ၢ်ဒီပုၢ်ဝဲၢ်လီၤ. ၉ ကီၢ်တဘ့ၣ်အံၤ အိၣ်လၢနမဲာ်ညါဒီဘ့ၣ်ညါတမ့ၢ်ဘၣ်ဧါ. မၤလီၤဖးလၢ် နသးဒီးယၤတက့ၢ်. မ့မ့ၢ်လၢစုစ့ၣ်တခီဒီး, ယကလဲၤဆူစုထွဲတခီလီၤ. မ့မ့ၢ်လၢစုထွဲတခီဒီး, ယကလဲၤဆူစုစ့ၣ်တခီလီၤ.
မၤဘၣ်လိာ်က့ၤ တၢ်သဘံၣ်သဘုၣ်လၢ တၢ်အဲၣ်တၢ်ကွံအပူၤတက့ၢ်
၁၂ ဖဲယွၤအခ့အပှၤတဖၣ်အကျါ တၢ်သးတလီၤပလိာ်အိၣ်ထီၣ်အခါ အဝဲသ့ၣ်မၤဃူမၤဖိးက့ၤဝဲဒ်လဲၣ်န့ၣ် လံာ်စီဆှံပာ်ဖျါထီၣ်ဝဲလီၤ. အဒိ စီၤအၤဘြၤဟၣ် ဒီးအဖိဒိၣ်ခွါစီၤလိာ် အိၣ်ဒီးဆၣ်ဖိကီၢ်ဖိအါမးလီၤ. ဒီးအဝဲသ့ၣ်အခ့အပှၤတဖၣ် အ့ၣ်လိာ်အသး ခီဖျိလၢ ဆၣ်ဖိကီၢ်ဖိအီၣ်ဆၣ်အလီၢ် တလၢတလီၢ်အဃိန့ၣ်လီၤ. မ့ၢ်လၢစီၤအၤဘြၤဟၣ် အဲၣ်ဒိးအိၣ်ဒီး တၢ်ဃူတၢ်ဖိးအဃိ အဝဲပျဲစီၤလိာ်လၢကဃုထၢ တၢ်လီၢ်လၢအဂ့ၤကတၢၢ်လီၤ. (၁ မိၤၡ့ ၁၃:၁, ၂, ၅-၉) စီၤအၤဘြၤဟၣ်အဒိအတဲာ်အံၤ ဂ့ၤဒိၣ်မးလၢပဂီၢ်လီၤ. ခီဖျိလၢ စီၤအၤဘြၤဟၣ် သးအိၣ်ဟ့ၣ်တၢ်ညီအဃိ အဝဲတဘၣ်ကီဘၣ်ခဲထီဘိဘၣ်. ဖဲစီၤအၤဘြၤဟၣ်ပျဲ စီၤလိာ်ဃုထၢတၢ်လီၢ်ဝံၤအလီၢ်ခံ ယဟိဝၤယွၤ ဆိၣ်ဂ့ၤစီၤအၤဘြၤဟၣ် ဒီးအဆၣ်ဖိကီၢ်ဖိအိၣ်အါန့ၢ်ဒံးလၢညါလီၤ. (၁ မိၤၡ့ ၁၃:၁၄-၁၇) ပမၤလိန့ၢ် တၢ်မနုၤလဲၣ်. ဖဲပမၤဘၣ်လိာ်က့ၤ တၢ်သဘံၣ်သဘုၣ်လၢ တၢ်အဲၣ်တၢ်ကွံပူၤအခါ ပမ့ၢ်ဘၣ်တူၢ်ဆါပသး ဘၣ်ဆၣ် ယဟိဝၤယွၤကဆိၣ်ဂ့ၤပှၤလီၤ.—ကွၢ်တၢ်ဂ့ၢ်လၢ တၢ်မၤလိအကတၢၢ်တက့ၢ်.
(၁ မိၤၡ့ ၁၄:၁၈-၂၀) ဒီးၡၤလ့ၣ်အစီၤပၤ မးလကံစဒ့းဟဲက့ၤစိာ်ထီၣ်ကိၣ်ဒီးစပံးထံလီၤ. အဝဲန့ၣ်မ့ၢ်တၢ်ထီကတၢၢ်ကစၢ်အပှၤလုၢ်တၢ်အဒိၣ်လီၤ. ၁၉ ဒီးဆိၣ်ဂ့ၤအီၤ, ဒီးစံးဝဲဒၣ်, စီၤအၤဘြၣ် ဘၣ်ဃးဒီးတၢ်ထီကတၢၢ်ကစၢ်လၢ အအိၣ်ဒီးဟီၣ်ခိၣ်ဒီးဒီးမူခိၣ်န့ၣ်, မ်အဘၣ်တၢ်ဆိၣ်ဂ့ၤအီၤတက့ၢ်. ၂၀ ဒီးတၢ်ထီကတၢၢ်ကစၢ်လၢအဟ့ၣ်လီၤ နဒုၣ်နဒါလၢနစုပူၤန့ၣ်, မ်အဘၣ်တၢ်ဆိၣ်ဂ့ၤအီၤတက့ၢ်. ဒီးအဝဲဒၣ်ဟ့ၣ်အီၤ လၢတၢ်ခဲလၢာ်ဆံဆဲၣ်ပူတပူလီၤ.
(ဧ့ၤဘြံၤ ၇:၄-၁၀) အဝဲဒၣ်, လၢပပၢ်အခိၣ်စီၤအၤဘြၤဟၣ် ဟ့ၣ်အီၤလၢတၢ်ဂုာ်ဆူၣ် တၢ်အဆံဆဲၣ်ပူတပူ, မ့ၢ်ပှၤဆံးဒိၣ်လဲၣ်န့ၣ်, ဆိကမိၣ်ကွၢ်တက့ၢ်. ၅ ဒီးစီၤလ့ၤဝံအဖိခွါလၢ အန့ၢ်ပှၤလုၢ်တၢ်အဒိၣ်အလီၢ်, အိၣ်ဒီးတၢ်မၤလိာ်, ဒ်တၢ်သိၣ်တၢ်သီအသိး, ဒ်သိးအကဟံးန့ၢ် ပှၤဂီၢ်မုၢ်အတၢ်ဆံဆဲၣ်ပူတပူ, ဒ်ပစံးတၢ်အသိး, အဒီပုၢ်ဝဲၢ်လၢအဟဲနာ်သက့လၢ စီၤအၤဘြၤဟၣ် အယီၢ်ဒ့န့ၣ်လီၤ. ၆ မ့မ့ၢ်ပှၤလၢ အထူအထံးတဘၣ်ဃးဘၣ်ဒီးအဝဲသ့ၣ်ဘၣ်တဂၤအံၤ, ဒိးန့ၢ်တၢ်ဆံဆဲၣ်ပူတပူလၢ စီၤအၤဘြၤဟၣ်, ဒီးဆိၣ်ဂ့ၤပှၤလၢ အအိၣ်ဒီးတၢ်စံးပာ်တဖၣ်န့ၣ်လီၤ. ၇ ဒီးပှၤအဆံးဘၣ်တၢ်ဆိၣ်ဂ့ၤလၢ ပှၤဒိၣ်တက့ၢ်န့ၣ်, မ့ၢ်တၢ်လၢပဂ့ၢ်လိာ်ဘှီလိာ်တသ့ဘၣ်. ၈ ဒီးဖဲအံၤပှၤကညီလၢအသံတဖၣ်, ဒိးန့ၢ်တၢ်ဆံဆဲၣ်ပူတပူလီၤ. မ့မ့ၢ်ဖဲန့ၣ်ပှၤလၢ တၢ်အုၣ်အသးလၢအမူဝဲလီၤ. ၉ ဒီးမ့ၢ်ဒ်ပစံးတၢ်အသိး, စီၤလ့ၤဝံလၢ အဒိးန့ၢ်တၢ်ဆံဆဲၣ်ပူတပူန့ၣ်, ဟ့ၣ်တၢ်ဆံဆဲၣ်ပူတပူလၢ စီၤအၤဘြၤဟၣ်အပူၤလီၤ. ၁၀ ဒီးမ့ၢ်ဒ်ပစံးတၢ်အသိး, စီၤလ့ၤဝံလၢ အဒိးန့ၢ်တၢ်ဆံဆဲၣ်ပူတပူန့ၣ်, ဟ့ၣ်တၢ်ဆံဆဲၣ်ပူတပူလၢ စီၤအၤဘြၤဟၣ်အပူၤလီၤ.
it-2 ၆၈၃ ¶၁
ပှၤလုၢ်တၢ်ဒိၣ်
ၡၤလ့ၣ်အစီၤပၤ စီၤမၤလကံစဒ့းန့ၣ် မ့ၢ်ဝဲပှၤလုၢ်တၢ်ဒိၣ်လီၤဆီ (ko·henʹ) လီၤ. လံာ်စီဆှံတပာ်ဖျါထီၣ်ဝဲ အဝဲအတၢ်ဟဲလီၤစၢၤလီၤသွဲၣ်, ဟဲအိၣ်ဖျဲၣ်ထီၣ် ဒီးသံအဂ့ၢ်ဘၣ်. အဝဲတဟဲလီၤစၢၤလီၤသွဲၣ်လၢ ပှၤလုၢ်တၢ်ဒိၣ်ဘၣ်အဃိ တဒိးန့ၢ်ဘၣ် ပှၤလုၢ်တၢ်ဒိၣ်မူဒါလၢ ပှၤတဂၤဂၤအအိၣ်ဘၣ် ဒီးပှၤလၢကထီၣ်အလီၢ်စ့ၢ်ကီး တအိၣ်ဘၣ်. စီၤမၤလကံစဒ့းန့ၣ် မ့ၢ်ဝဲစီၤပၤ ဒီးပှၤလုၢ်တၢ်ဒိၣ်လီၤ. အဝဲမ့ၢ်ပှၤလုၢ်တၢ်ဒိၣ်လၢ အဒိၣ်န့ၢ်ဒံး ပှၤလ့ၤဝံဖိ အပှၤလုၢ်တၢ်ဒိၣ်လီၤ. ပှၤလ့ၤဝံဖိတဖၣ် မ့ၢ်စီၤအၤဘြၤဟၣ် အစၢၤအသွဲၣ်အဃိ ဖဲစီၤအၤဘြၤဟၣ် ဟ့ၣ်ဝဲ စီၤမၤလကံစဒ့းလၢ တၢ်ဆံဆဲၣ်ပူတပူအခါ လီၤဂာ်လၢ ပှၤလ့ၤဝံဖိတဖၣ် ဟ့ၣ်ဝဲတၢ်ဆံဆၢၣ်ပူတပူလီၤ. (၁ မိၤ. ၁၄:၁၈-၂၀; ဧ့ၤ ၇:၄-၁၀) စီၤမၤလကံစဒ့းန့ၣ် မ့ၢ်တၢ်အဒိလၢ အဘၣ်တၢ်ပာ်ဖျါဆိပာ်စၢၤ ဘၣ်ဃးဒီးယ့ၣ်ၡူးလၢအမ့ၢ် “ပှၤလုၢ်တၢ်အဒိၣ်လီၤထူလီၤယိာ်, ဒ်စီၤမၤလကံစဒ့းအလုၢ်အလၢ်အသိး” န့ၣ်လီၤ.—ဧ့ၤ. ၇:၁၇.
တၢ်ဖးလံာ်စီဆှံ
(၁ မိၤၡ့ ၁၂:၁-၂၀) ဒီးယွၤစံးဘၣ်စီၤအၤဘြၣ်, ဟးထီၣ်နဲလၢနထံနကီၢ်ဒီး လၢနဘူးနတံၢ်အအိၣ်, ဒီးလၢနပၢ်အဟံၣ် ဆူကီၢ်တဘ့ၣ် လၢယကဒုးနဲၣ်နၤတက့ၢ်. ၂ ဒီးယကဒုးကဲထီၣ်နၤလၢပှၤတကလုာ်ဖးဒိၣ်, ဒီးယကဆိၣ်ဂ့ၤနၤ, ဒီးယကပာ်ဒိၣ်နမံၤ, ဒီးနကကဲထီၣ်တၢ်ဆိၣ်ဂ့ၤလီၤ. ၃ ဒီးပှၤလၢအဆိၣ်ဂ့ၤနၤန့ၣ်ယကဆိၣ်ဂ့ၤအီၤ, ဒီးပှၤလၢအဆိၣ်အၢနၤန့ၣ် ယကဆိၣ်အၢအီၤလီၤ. ဒီးပှၤဟီၣ်ခိၣ်ဖိအဒူၣ်ခဲလၢာ် ကဘၣ်တၢ်ဆိၣ်ဂ့ၤလၢနပူၤလီၤ. ၄ ဒီးစီၤအၤဘြၣ်ဟးထီၣ်ဝဲ ဒ်ယွၤမၤလိာ်အီၤအသိးန့ၣ်ဒီး စီၤလိာ်လဲၤဝဲဒီးအီၤလီၤ. ဒီးလၢစီၤအၤဘြၣ်ဟးထီၣ်ဝဲ လၢဟၤရၣ်အပူၤန့ၣ်, အသးပှၢ်တ့ၢ်နွံဆံယဲၢ်နံၣ်လီၤ. ၅ ဒီးစီၤအၤဘြၣ်ဟံးန့ၢ် အမါနီၢ်စၤရဲ, ဒီးအဖိဒိၣ် စီၤလိာ်, ဒီးကယဲၢ်တၢ်ဖိတၢ်လံၤလၢအမၤန့ၢ်ဝဲ, ဒီးပှၤအသးလၢအန့ၢ်ဘၣ်ဝဲလၢ ဟၤရၣ်အပူၤ, ဒီးဟးထီၣ်ဝဲဒ်သိး အကလဲၤဆူကီၢ်ကနၤဧၣ်, ဒီးဟဲနုာ်လၢကီၢ်ကနၤဧၣ်အပူၤလီၤ. ၆ ဒီးစီၤအၤဘြၣ် ခီဂာ်တၢ်လၢ ကီၢ်န့ၣ်အပူၤပၢၢ်လၢ ၡက့ၣ်အလီၢ်, ဖဲမိၤရံယၤအသ့ထိးဖၣ်န့ၣ်လီၤ. အကတီၢ်ဖဲန့ၣ် ပှၤကနၤဧၣ်ဖိ အိၣ်ဝဲလၢကီၢ်ပူၤန့ၣ်လီၤ. ၇ ဒီးယွၤလီၣ်ဖျါထီၣ်အသးလၢစီၤအၤဘြၣ်, ဒီးစံးဝဲဒၣ်, ယကဟ့ၣ်လီၤကီၢ်တဘ့ၣ်အံၤ လၢနချံနသၣ်လီၤ. ဒီးမၤထီၣ်တၢ်လုၢ်အလီၢ်လၢ ယွၤလၢအလီၣ်ဖျါထီၣ် အသးလၢအီၤအဂီၢ်ဖဲန့ၣ်လီၤ. ၈ ဒီးဟးဝဲဖဲန့ၣ် ဆူကစၢၢ်ကလိတဖျၢၣ် အိၣ်လၢဝ့ၢ်ဘ့ၤသ့လးအမုၢ်ထီၣ်တခီ, ဒီးသူၣ်အဒဲအိၣ်ဒီး ဝ့ၢ်ဘ့ၤသ့လးလၢမုၢ်နုာ်တခီ, ဒီးဝ့ၢ်ဂဲလၢမုၢ်ထီၣ်တခီလီၤ. ဒီးမၤတၢ်လုၢ်အလီၢ်ဖဲန့ၣ် လၢယွၤအဂီၢ်, ဒီးကိးထီၣ်ယွၤ အမံၤလီၤ. ၉ ဒီးစီၤအၤဘြၣ်ဟးထီၣ်ဝဲ, ဒီးလဲၤတၢ်, ဒီးဟးဝဲဆူကလံၤထံးတခီလီၤ. ၁၀ ဒီးတၢ်သၣ်ဝံၤလီၤဒိ အိၣ်ထီၣ်ဝဲလၢကီၢ်ပူၤန့ၣ်, ဒီးစီၤအၤဘြၣ် လဲၤလီၤဆူအဲၤကူပတူး, ဒ်သိးအကအိၣ်တမှံၤဖဲန့ၣ်လီၤ. အဂ့ၢ်ဒ်အံၤ, တၢ်သၣ်ဝံၤလီၤဒိန့ၣ် အိၣ်နးမးလၢကီၢ်ပူၤန့ၣ်လီၤ. ၁၁ ဒီးတၢ်မၤအသးဘူးထီၣ်လၢ အကလဲၤနုာ် လၢအဲၤကူပတူးဒီး, စံးဘၣ်အမါနီၢ်စၤရဲ, ကွၢ်ကွၢ်, ယသ့ၣ်ညါလၢပှၤကွၢ်နၤတမံၤ နမ့ၢ်ပိာ်မုၣ်အဃံအလၤလီၤ. ၁၂ ဒီးတၢ်ကမၤအသး ဖဲပှၤအဲၤကူပတူးဖိ ထံၣ်ဘၣ်နၤဒီး, ကစံးဝဲ, အဝဲတဂၤအံၤမ့ၢ်အမါလီၤ. ဒီးကမၤသံယၤလီၤ. မ့မ့ၢ်ကဒုးမူဒံးနၤလီၤ. ၁၃ စံးလၢ်လၢ နမ့ၢ်ယဒီပုၢ်ဝဲၢ်မုၣ်, ဒ်သိးတၢ်ကမၤဂ့ၤယၤလၢ နဃိတက့ၢ်. ဒီးယသးကမူဒံးလၢနဃိလီၤ. ၁၄ ဒီးတၢ်မၤအသး ဖဲစီၤအၤဘြၣ်ဟဲနုာ်လၢအဲၤကူပတူးအပူၤဒီး, ပှၤအဲၤကူပတူးဖိ ထံၣ်ဘၣ်ပိာ်မုၣ်န့ၣ်လၢ အဃံအလၤဒိၣ်မးလီၤ. ၁၅ ဒီးဖၤရိၤအပဒိၣ်ဖးဒိၣ်တဖၣ် ထံၣ်ဘၣ်အီၤ, ဒီးစံးထီၣ်ပတြၢၤအီၤလၢ ဖၤရိၤအမဲာ်ညါ, ဒီးတၢ်ဆှၢန့ၢ်ပိာ်မုၣ်ဆူ ဖၤရိၤအဟံၣ်ပူၤလီၤ. ၁၆ ဒီးဖၤရိၤအပဒိၣ်ဖးဒိၣ်တဖၣ် ထံၣ်ဘၣ်အီၤ, ဒီးစံးထီၣ်ပတြၢၤအီၤလၢ ဖၤရိၤအမဲာ်ညါ, ဒီးတၢ်ဆှၢန့ၢ်ပိာ်မုၣ်ဆူ ဖၤရိၤအဟံၣ်ပူၤလီၤ. ၁၇ ဒီးယွၤတီၢ်ဖၤရိၤဒီးအပှၤဟံၣ်ဖိ လၢတီၢ်တၢ်ဖးဒိၣ်တဖၣ် လၢစီၤအၤဘြၣ် အမါနီၢ်စၤရဲအဃိလီၤ. ၁၈ ဒီးဖၤရိၤကိးန့ၢ်စီၤအၤဘြၣ်, ဒီးစံးဝဲဒၣ်, နမၤယၤလၢ မနုၤတမံၤလဲၣ်. အဝဲတဂၤမ့ၢ်နမါန့ၣ် နတဒုးနဲၣ်ဘၣ်ယၤ မ့ၢ်အဘၣ်မနုၤလဲၣ်. ၁၉ အဝဲအံၤမ့ၢ်ယဒီပုၢ်ဝဲၢ်မုၣ်န့ၣ် နစံးဘၣ်မနုၤလဲၣ်. ဒီးယကဟံးန့ၢ်ဘၣ်ဖုးအီၤ လၢယမါလီၤ. ဒီးခဲကနံၣ်အံၤ, ကွၢ်ကွၢ်, ဟံးန့ၢ်နမါ, ဒီးဟးထီၣ်တက့ၢ်. ၂၀ ဒီးဖၤရိၤမၤလိာ်အခ့အပှၤလၢ အဂ့ၢ်အကျိၤ, ဒီးမၢအဟးထီၣ်ဒီးအမါ, ဒီးကယဲၢ်တၢ်လၢ အအိၣ်ဒီးအီၤခဲလၢာ်လီၤ.
တၢး၁၂ ၁/၁ ၈
တၢ်မနုၤဒုးကဲထီၣ် နီၢ်စၤရါလၢ ပိာ်မုၣ်လၢအလုၢ်ဒိၣ်ပှ့ၤဒိၣ်လဲၣ်
နီၢ်စၤရါန့ၣ် ဆီဟံၣ်ဆီဃီဒီးပာ်ခွါလၢ အိၣ်ဒီးတၢ်နာ်လၢ အဂၢၢ်ကျၢၤတဂၤလီၤ. အဝဲအနီၢ်ကစၢ်ဒၣ်ဝဲစ့ၢ်ကီး မ့ၢ်ပိာ်မုၣ်လၢ အဒိဂ့ၤတဲာ်ဘၣ် လၢအိၣ်ဒီးတၢ်ယူးယီၣ်ယွၤလီၤ. ဒ်သိးပိာ်မုၣ်လၢ အဲၣ်ဒိးဒိးန့ၢ်ဘၣ် ယွၤအတၢ်ဘၣ်သးတဖၣ် ကကွၢ်လိမၤဒိအီၤအဂီၢ် လံာ်စီဆှံပာ်ဖျါထီၣ်အီၤ ဃုာ်ဒီးအမံၤ သၢဘျီလီၤ. (ယၡါယၤ ၅၁:၁, ၂; ဧ့ၤဘြံၤ ၁၁:၁၁; ၁ ပ့းတရူး ၃:၃-၆) လံာ်စီဆှံ ပာ်ဖျါထီၣ်ဝဲ ပိာ်မုၣ်လၢအလီၤကွၢ်လိအံၤအဂ့ၢ် ထဲတစဲးဖိသနာ်က့ ပသ့ၣ်ညါဘၣ်လၢ အဝဲအိၣ်ဒီးတၢ်ဂ့ၤတၢ်ဝါအါမးလီၤ.
အဒိ ဖဲစီၤအၤဘြၤဟၣ်တဲပၠးအီၤ ယဟိဝၤယွၤအတၢ်ဟံးစုနဲၣ်ကျဲလၢ အဝဲသ့ၣ်ကဘၣ်ဟးထီၣ်လၢ ဝ့ၢ်အူၢ်အခါ အဆိကတၢၢ် အဝဲမၤဝဲဒ်လဲၣ်န့ၣ် ဆိကမိၣ်ကွၢ်တက့ၢ်. မ့ၢ်အဝဲကဆိကမိၣ်ဘၣ်ဝဲလၢ အဝဲသ့ၣ်ကဘၣ်လဲၤဝဲဖဲလဲၣ်. ဘၣ်မနုၤအဃိကဘၣ်လဲၤဝဲလဲၣ်. အဝဲကဘၣ်ကိၢ်ဘၣ်ဂီၤတၢ်လၢ နီၢ်ခိအတၢ်လိၣ်ဘၣ်တဖၣ်အဂီၢ်ဧါ. ကဘၣ်အိၣ်လီၤဖးဒီး အတံၤသကိး, အဘူးအတံၢ်တဖၣ် ဒီးဘၣ်သ့ၣ်သ့ၣ် တမ့ၢ်လၢ ကက့ၤထံၣ်လိာ်ဘၣ်က့ၤအသးလၢၤဘၣ်အဃိ မ့ၢ်အဝဲအသးကဘၣ်ဒိဧါ. အဝဲကဆိကမိၣ်ဘၣ်ဝဲ တၢ်ဂ့ၢ်တဖၣ်အံၤသပှၢ်တၢၢ်လီၤ. ဘၣ်ဆၣ် တၢ်လၢစီၤအၤဘြၤဟၣ်တဲအီၤတဖၣ်န့ၣ် အဝဲတူၢ်လိာ်ဝဲလၢ တၢ်သူၣ်အိၣ်သးအိၣ် ဒီးနာ်ဝဲလၢ ယဟိဝၤယွၤ ကဆိၣ်ဂ့ၤအတၢ်ဒိကနၣ်လီၤ.—မၤတၢ် ၇:၂, ၃.
နီၢ်စၤရါန့ၣ် မ့ၢ်ပှၤလၢအဘူၣ်ထီၣ်ဘါထီၣ် ကစၢ်ယွၤ ဒီးအိၣ်ဒီးတၢ်ဒိကနၣ် တကးဒံးဘၣ် မ့ၢ်စ့ၢ်ကီးမါလၢအကူၣ်တၢ်သ့တဂၤလီၤ. အဝဲတထိၣ်သတြီၤအသးဒီးအဝၤ ဒီးတဂုာ်ကျဲးစၢးပၢအဟံၣ်ဖိဃီဖိဘၣ်. လၢတၢ်န့ၣ်အလီၢ် အဝဲပာ်ကဲအဝၤလၢအသးပူၤ ဒီးလၢတၢ်အဲၣ်တၢ်ကွံအပူၤ ဆီၣ်ထွဲမၤစၢၤအဝၤ အတၢ်ဟံးစုနဲၣ်ကျဲလၢ ဟံၣ်ဃီပူၤလီၤ. ခီဖျိအဝဲကယၢကယဲအသးလၢ တၢ်ဂ့ၤတၢ်ဝါတဖၣ်အံၤအဃိ ကဲထီၣ်ဝဲမါလၢ အလုၢ်ဒိၣ်ပှ့ၤဒိၣ်တဂၤလီၤ.—၁ ပ့းတရူး ၃:၁-၆.
တၢ်ဂ့ၤတၢ်ဝါလၢ နီၢ်စၤရါပာ်ဖျါထီၣ်တ့ၢ်ဝဲတဖၣ်န့ၣ် အဘျုးအိၣ်လၢ မါလၢမုၢ်မဆါတနံၤအံၤတဖၣ်အဂီၢ်ဒံးဧါ. ပိာ်မုၣ်လၢအမံၤမ့ၢ် ကၠ့လ် လၢအဆီဟံၣ်ဆီဃီအိၣ် အနံၣ် ၃၀ ဘျဲၣ်ဒီးအိၣ်ဒီး တၢ်သူၣ်ခုသးခုတဂၤတဲဝဲလၢ “နီၢ်စၤရါအဒိအတဲာ်န့ၣ် သိၣ်လိယၤလၢ ယကြၢးတဲဖျါထီၣ်ယတၢ်ထံၣ်လၢ ယဝၤအအိၣ်လၢ တၢ်သဘျ့အပူၤလီၤ. အဝဲတဲကဒီးဝဲလၢ “ယဝၤမ့ၢ်ဟံၣ်ခိၣ်အဃိ တၢ်ဆၢတဲာ်လၢအလီၢ်ခံကတၢၢ်န့ၣ် အိၣ်ဒၣ်အဝဲကဘၣ်မၤဝဲလီၤ. အဝဲမၤတၢ်ဆၢတဲာ်မ့ၢ်ဝံၤန့ၣ် ယမူဒါအိၣ်လၢ တသ့ဖဲအသ့ ယကဆီၣ်ထွဲမၤစၢၤအီၤ ဒ်သိးအတၢ်ဆၢတဲာ် ကကဲထီၣ်လိၣ်ထီၣ်အဂီၢ်လီၤ.”
တၢ်မၤလိအဂ့ၤကတၢၢ်လၢ ပဒိးန့ၢ်ဘၣ်လၢ နီၢ်စၤရါအအိၣ်န့ၣ်မ့ၢ်ဝဲ အဝဲမ့ၢ်ပိာ်မုၣ်လၢအဃံလၤဒိၣ်မးတဂၤ ဘၣ်ဆၣ် အဝဲတပာ်ထီၣ်ထီအသးလၢ အနီၢ်ခိတၢ်ဃံတၢ်လၤအဃိဘၣ်. (၁ မိၤၡ့ ၁၂:၁၀-၁၃) လၢတၢ်န့ၣ်အလီၢ် မုာ်မ့ၢ်ဂ့ၤ ဖှီၣ်မ့ၢ်ဂ့ၤ အဝဲဆီၣ်ထွဲမၤစၢၤ စီၤအၤဘြၤဟၣ်လၢ တၢ်ဆီၣ်လီၤသးအပူၤလီၤ. ပနာ်သ့သပှၢ်တၢၢ်လၢ စီၤအၤဘြၤဟၣ် ဒီးနီၢ်စၤရါန့ၣ် သးတီလိာ်အသး, အဲၣ်လိာ်အသးတဂၤဒီးတဂၤဒီး အိၣ်ဒီးတၢ်ဆီၣ်လီၤသးလီၤ. မ့ၢ်ဝဲပှၤနီၢ်ဒီမါဝၤခံဂၤလၢ အမၤစၢၤလိာ်သးတဂၤဒီးတဂၤ ဒ်သိးကဒိးန့ၢ်ဘၣ် ကစၢ်ယွၤအတၢ်ဆိၣ်ဂ့ၤအဂီၢ်လီၤ.
လါဖ့ၤဘြူၤအါရံၤ ၁၀–၁၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ မိၤၡ့ ၁၅–၁၇
ဘၣ်မနုၤအဃိ “ယဟိဝၤယွၤ ယုၢ်န့ၢ်ဝဲစီၤအၤဘြၣ် ဒီးနီၢ်စၤရဲအမံၤသီ” လဲၣ်
(၁ မိၤၡ့ ၁၇:၁) ဒီးလၢစီၤအၤဘြၣ်အသးပှၢ် ခွံဆံခွံနံၣ်န့ၣ် ယွၤလီၣ်ဖျါထီၣ်အသးလၢ စီၤအၤဘြၣ်အမဲာ်ညါ, ဒီးစံးဘၣ်အီၤ, တၢ်လၢယၤအံၤ ယမ့ၢ်ကစၢ်သ့တၢ်လၢာ်လီၤ. လဲၤတၢ်လၢယမဲာ်ညါ, ဒီးလၢထီၣ်ပှဲၤထီၣ်တက့ၢ်.
it-1 ၈၁၇
တၢ်ကမၣ်, တၢ်ပာ်ဒ့ၣ်ပာ်ကမၣ်
တၢ်လၢပှၤဟီၣ်ခိၣ်ဖိတဖၣ်မၤဝဲ ဒီးဒုးအိၣ်ထီၣ်ဝဲတဖၣ်န့ၣ် ညီနုၢ်တပူၤဒီးတၢ်ကမၣ်ဘၣ်. တၢ်ဒဲးဘးဒီး တၢ်ကမၣ်န့ၣ် မ့ၢ်တၢ်န့ၢ်သါလၢ ပှၤဟီၣ်ခိၣ်ဖိတဖၣ် န့ၢ်သါဘၣ်ဝဲလၢ စီၤအၤဒၣ်အအိၣ်လီၤ. (ရိ. ၅:၁၂; စံး. ၅၁:၅) ဘၣ်ဆၣ် ယဟိဝၤယွၤအနီၢ်ကစၢ်ဒၣ်ဝဲ လၢဝဲပှဲၤဝဲဒီး “သ့ၣ်ညါပနီၢ်ခိလီၤ. သ့ၣ်နီၣ်ထီၣ်က့ၤဝဲလၢ ပမ့ၢ်ဟီၣ်ခိၣ်အကမူၣ်” ဒီးအိၣ်ဒီးတၢ်သးကညီၤလီၤ. (စံး. ၁၀၃:၁၃, ၁၄) အဝဲထံၣ်ဝဲ စီၤနိအၤလၢ အိၣ်ဒီးတၢ်ဒိကနၣ် ဒီးတၢ်သးတီတဂၤအံၤဒ် “ပှၤအတီ, ဒီးပှၤအလၢအပှဲၤလၢ ပှၤတစိၤဒၣ်အီၤအကျါလီၤ.” (၁ မိၤ. ၆:၉) အဝဲတဲဘၣ် စီၤအၤဘြၤဟၣ်လၢ “လဲၤတၢ်လၢယမဲာ်ညါ, ဒီးလၢထီၣ်ပှဲၤထီၣ်တက့ၢ်.” (၁ မိၤ. ၁၇:၁) အဝဲသ့ၣ် ခံဂၤလၢာ် မ့ၢ်ပှၤတလၢတပှဲၤ ဒီးဘၣ်သံဝဲဘၣ်ဆၣ် ယဟိဝၤယွၤလၢအ “ကွၢ်ပှၤအသး” တဂၤထံၣ်အဝဲသ့ၣ် ဒ်ပှၤလၢပှၤပှဲၤတဖၣ်လီၤ. (၁ မူၤ. ၁၆:၇; ထိၣ်သတြီၤဒီး ၂ စီၤပၤ. ၂၀:၃; ၂ ကွဲး. ၁၆:၉) ကစၢ်ယွၤ တဲဘၣ်ပှၤအံၣ်စရ့လးဖိတဖၣ်လၢ “နဘၣ်လၢထီၣ်ပှဲၤထီၣ်ဒီး ယွၤနကစၢ်လီၤ.” (၅ မိၤ. ၁၈:၁၃; ၂ မူၤ. ၂၂:၂၄) အဝဲကတဲာ်ကတီၤ အဖိခွါလၢ အလၢအပှဲၤ (ဧ့ၤ. ၇:၂၆) ဒ်တၢ်ပှ့ၤက့ၤအသိးလီၤ. လၢတၢ်န့ၣ်အဃိ ပှၤလၢအစူၢ်က့ၤနာ်က့ၤတၢ်ဒီး အိၣ်ဒီးတၢ်ဒိကနၣ်တဖၣ်န့ၣ် ကစၢ်ယွၤကိးအဝဲသ့ၣ်လၢ ‘ပှၤတီပှၤလိၤ’ မ့တမ့ၢ် ပှၤလၢပှၤပှဲၤသ့လီၤ. ဒီးတကတီၢ်ဃီန့ၣ် အဝဲဟံးဃာ်ဂၢၢ်ကျၢၤ အတၢ်တီတၢ်လိၤ ဒီးအတၢ်စံၣ်ညီၣ်တီန့ၣ်လီၤ.—ရိ. ၃:၂၅, ၂၆; ကွၢ် INTEGRITY; PERFECTION.
(၁ မိၤၡ့ ၁၇:၃-၅) ဒီးစီၤအၤဘြၣ် တီၤလီၤကဒွံကျိာ်, ဒီးယွၤကတိၤတၢ်ဒီးအီၤ, ဒီးစံးဝဲဒၣ်, ၄ ယဲဒၣ်အံၤကွၢ်ကွၢ်, ယတၢ်အၢၣ်လီၤအီလီၤအိၣ်ဒီးနၤ, ဒီးနကကဲထီၣ်ပှၤအါကလုာ်အပၢ်လီၤ. ၅ ဒီးတၢ်တကိးလၢၤဘၣ်နမံၤလၢ အၤဘြၣ်ဘၣ်. မ့မ့ၢ်နမံၤကမ့ၢ် အၤဘြၤဟၣ်လီၤ. အဂ့ၢ်ဒ်အံၤ, ယပာ်နၤလၢပှၤအါကလုာ်အပၢ်လီၤ.
it-1 ၃၁ ¶၁
စီၤအၤဘြၤဟၣ်
တၢ်ဆၢကတီၢ်လဲၤပူၤကွံာ်ဝဲလီၤ. ခဲအံၤ အဝဲသ့ၣ် လဲၤတုၤလၢ ကီၢ်ကနၤဧၣ် ကအိၣ်အနံၣ်တဆံလံ သနာ်က့ နီၢ်စၤရါ အဖိတအိၣ်ဒံးဘၣ်. အဃိ အဝဲဟ့ၣ်ကူၣ်အဝၤလၢ အကုၢ်ပိာ်မုၣ် ပှၤအဲၤကူပတူးဖိ နီၢ်ဟၤကၢ် ကဟံးအဖိလၢ အဝဲဒၣ်အဂီၢ်လီၤ. စီၤအၤဘြၤဟၣ် တူၢ်လိာ်ဝဲအဃိ ချ.ခ.န ၁၉၃၂ ဖဲစီၤအၤဘြၤဟၣ်အသးအိၣ် ၈၆ နံၣ်အခါ စီၤယံးၡမၤဧ့လး အိၣ်ဖျဲၣ်ထီၣ်ဝဲလီၤ. (၁ မိၤ. ၁၆:၃, ၁၅, ၁၆) တၢ်ဆၢကတီၢ် လဲၤပူၤအါနံၣ်အါလါလီၤ. ချ.ခ.န ၁၉၁၉ ဖဲစီၤအၤဘြၤဟၣ် အသးအိၣ် ၉၉ နံၣ်န့ၣ် ယဟိဝၤယွၤမၢ အဝဲဒီးအဟံၣ်ဖိဃီဖိ ပိာ်ခွါခဲလၢာ် မၤတၢ်ကူးတရံး ဒ်အမ့ၢ် တၢ်အၢၣ်လီၤအီလီၤလီၤဆီ အတၢ်ပနီၣ်တခါ လၢယဟိဝၤယွၤ မၤဝဲဒီးစီၤအၤဘြၤဟၣ်န့ၣ်လီၤ. ဖဲန့ၣ်အဆၢကတီၢ် ယဟိဝၤယွၤ ဆီတလဲက့ၤဝဲ စီၤအၤဘြၤ အမံၤလၢ စီၤအၤဘြၤဟၣ်လီၤ. မ့ၢ်လၢ စီၤအၤဘြၤဟၣ် ကကဲထီၣ်ဝဲ “ပှၤအါကလုာ်အပၢ်” အဃိလီၤ. (၁ မိၤ. ၁၇:၅, ၉-၂၇; ရိ. ၄:၁၁) တယံာ်ဘၣ်ဒီး စီၤအၤဘြၤဟၣ် တူၢ်လိာ်ဘၣ်ဝဲ မူခိၣ်ကလူး သၢဂၤလၢ အမၤကဲထီၣ်အသးလၢ ပှၤကညီ ဒီးဟဲလၢယဟိဝၤယွၤအမံၤလီၤ. အဝဲသ့ၣ်အၢၣ်လီၤဝဲလၢ လၢခံတနံၣ် ဆၢကတီၢ်ဒ်အံၤန့ၣ် နီၢ်စၤရါ ကအိၣ်ဖျဲၣ်ထီၣ် အဖိခွါတဂၤလီၤ.—၁ မိၤ. ၁၈:၁-၁၅.
(၁ မိၤၡ့ ၁၇:၁၅, ၁၆) ဒီးယွၤစံးဘၣ်စီၤအၤဘြၣ်ဟၣ်, နမါနီၢ်စၤရဲအံၤနတဘၣ်ကိးဘၣ်အမံၤ လၢစၤရဲဘၣ်. မ့မ့ၢ်စၤရါကမ့ၢ်အမံၤလီၤ. ၁၆ ဒီးယကဆိၣ်ဂ့ၤအီၤ, ဒီးယကဟ့ၣ်လီၤ နဖိခွါလၢအီၤစ့ၢ်ကီးလီၤ. ဒီးယကဆိၣ်ဂ့ၤအီၤ, ဒီးကကဲထီၣ်ပှၤကလုာ်တဖၣ်, ဒီးပှၤဂီၢ်မုၢ်အစီၤပၤတဖၣ်ကလီၤစၢၤလၢအီၤလီၤ.
တၢး၀၉ ၂/၁ ၁၃
ပှၤမံၤန့ၣ် အခီပညီဒ်လဲၣ်
ဒ်သိးကစၢ်ယွၤ ကတဲဆိပာ်ဝဲ တၢ်တမံၤမံၤအဂီၢ် အဝဲဆီတလဲဝဲ ပှၤတနီၤအမံၤလီၤ. အဒိ ဆီတလဲဝဲ စီၤအၤဘြၤ လၢအခီပညီမ့ၢ် “ပၢ်န့ၣ်ဘၣ်တၢ်ပာ်ထီၣ်ထီအီၤ” ဆူစီၤအၤဘြၤဟၣ် လၢအခီပညီမ့ၢ် “ပှၤဂီၢ်မုၢ်အပၢ်” လီၤ. ဒ်စီၤအၤဘြၤဟၣ်အမံၤအသိး အဝဲကဲထီၣ်ဘၣ်ဝဲ ပှၤအါကလုာ်အပၢ်လီၤ. (၁ မိၤၡ့ ၁၇:၅, ၆) ဆိကမိၣ်ကွၢ်စ့ၢ်ကီး စီၤအၤဘြၤဟၣ်အမါအမံၤ နီၢ်စၤရဲ လၢအခီပညီကမ့ၢ် “ဃုတၢ်အ့ၣ်လိာ်” န့ၣ်တက့ၢ်. ဖဲကစၢ်ယွၤ ဆီတလဲက့ၤအမံၤလၢ နီၢ်စၤရါ လၢအခီပညီမ့ၢ် “နီၢ်ပၤမုၣ်ဖိ” အခါအဝဲ ကသးခုဝဲထဲလဲၣ်. ဒ်အမံၤအသိး အဝဲကဲထီၣ်ပှၤလၢ စီၤပၤတဖၣ်ဟဲလီၤစၢၤလီၤသွဲၣ်လၢအီၤလီၤ.—၁ မိၤၡ့ ၁၇:၁၅, ၁၆.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၁ မိၤၡ့ ၁၅:၁၃, ၁၄) ဒီးစံးဘၣ်စီၤအၤဘြၣ်, သ့ၣ်ညါသပှၢ်တၢၢ်လၢနချံနသၣ်ကကဲထီၣ်ပှၤတမှံၤ လၢကီၢ်တဘ့ၣ်အပူၤ လၢအတမ့ၢ်ဘၣ်အတၢ်ဘၣ်, ဒီးကမၤပှၤကီၢ်ဖိန့ၣ်အတၢ်, ဒီးအဝဲသ့ၣ် ကမၤနးမၤဖှီၣ်အီၤ အနံၣ်လွံၢ်ကယၤန့ၣ်တက့ၢ်. ၁၄ လၢန့ၣ်အမဲာ်ညါ ပှၤတကလုာ်လၢ အဝဲသ့ၣ်ကမၤအတၢ်န့ၣ် ယကစံၣ်ညီၣ်အီၤလီၤ. လၢခံက့ၤဒီး ကဟးထီၣ်အိၣ်ဒီး အတၢ်ဖိတၢ်လံၤအါအါကလဲာ်လီၤ.
it-1 ၄၆၀-၄၆၁
တၢ်ဆၢကတီၢ်ပိာ်ထွဲထီၣ်အခံ
ယဟိဝၤယွၤ တဲဘၣ်စီၤအၤဘြၤ (စီၤအၤဘြၤဟၣ်)လၢ “သ့ၣ်ညါသပှၢ်တၢၢ်လၢ နချံနသၣ်ကကဲထီၣ်ပှၤတမှံၤ လၢကီၢ်တဘ့ၣ်အပူၤ လၢအတမ့ၢ်ဘၣ်အတၢ်ဘၣ်, ဒီးကမၤပှၤကီၢ်ဖိန့ၣ်အတၢ်, ဒီးအဝဲသ့ၣ် ကမၤနးမၤဖှီၣ်အီၤ အနံၣ်လွံၢ်ကယၤန့ၣ်တက့ၢ်.” (၁ မိၤ. ၁၅:၁၃; ကွၢ်စ့ၢ်ကီး မၤတၢ်. ၇:၆, ၇.) တၢ်ကတိၤအံၤ ဘၣ်တၢ်တဲဆိပာ်အီၤ တချုးစီၤအံၤစဲးလၢအမ့ၢ် ပှၤန့ၢ်သါတၢ်လၢ အဘၣ်တၢ်တဲဆိပာ် မ့တမ့ၢ် “ချံသၣ်” ဟဲအိၣ်ဖျဲၣ်ထီၣ်ဒံးဘၣ်န့ၣ်လီၤ. ချ.ခ.န ၁၉၃၂ န့ၣ်ကုၢ်ပိာ်မုၣ် ပှၤအဲၤကူပတူးဖိ နီၢ်ဟၤကၢ် အိၣ်ဖျဲၣ်ထီၣ်ဝဲ စီၤယံးၡမၤဧ့လးလီၤ. ချ.ခ.န ၁၉၁၈ န့ၣ်စီၤအံၤစဲး ဟဲအိၣ်ဖျဲၣ်ထီၣ်ဝဲလီၤ. (၁ မိၤ. ၁၆:၁၆; ၂၁:၅) စးထီၣ်လၢ ‘တၢ်မၤနးမၤဖှီၣ်’ အကတၢၢ် (၁ မိၤ. ၁၅:၁၄), တၢ်ဟးထီၣ်လၢကီၢ်အဲၤကူပတူး အဆၢကတီၢ်, ပမ့ၢ်ဂံၢ်က့ၤဆူအလီၢ်ခံ အနံၣ် ၄၀၀ န့ၣ် တုၤလၢ ချ.ခ.န ၁၉၁၃ လီၤ. ဖဲန့ၣ်အခါ စီၤအံၤစဲးအသးအိၣ် ၅ နံၣ်ဒီးဖှၣ်အနုၢ်ဒီးကဲ “ပှၤတမှံၤ” လၢကီၢ်တဘ့ၣ်လၢ တမ့ၢ်ဘၣ်အတၢ်အပူၤလီၤ. ‘တၢ်မၤနးမၤဖှီၣ်’ စးထီၣ်အသး ဖဲစီၤယံးၡမၤဧ့လးလၢ အသးအိၣ်လံ ၁၉ နံၣ်တဂၤ “နံၤဘၣ်ဖၣ်လဲ” စီၤအံၤစဲးအခါန့ၣ်လီၤ. (၁ မိၤ. ၂၁:၈, ၉) စီၤယံးၡမၤဧ့လး နံၤဘၣ်ဖၣ်လဲဝဲ စီၤအၤဘြၣ်ဟၣ် အဖိခွါလၢအန့ၢ်သါတၢ်န့ၣ် စိၤခဲအံၤပှၤကဆိကမိၣ်လၢ တမ့ၢ်တၢ်လၢအရ့ဒိၣ်ဘၣ် သနာ်က့ ဖဲန့ၣ်အဆၢကတီၢ် ပှၤတဆိကမိၣ်ဒ်န့ၣ်ဘၣ်. ပသ့ၣ်ညါဘၣ်သ့ ခီဖျိကစၢ်ယွၤတူၢ်လိာ်ဝဲ နီၢ်စၤရါအတၢ်ဟ့ၣ်ကူၣ်လၢ ပှၤကနီၣ်ထုးထီၣ် နီၢ်ဟၤကၢ်ဒီးအဖိခွါအဃိန့ၣ်လီၤ. (၁ မိၤ. ၂၁:၁၀-၁၃) တၢ်ဂ့ၢ်အံၤ ဘၣ်တၢ်ကွဲးနီၣ်ပာ်အီၤ လီၤတံၢ်လီၤဆဲးအဃိ ဒုးသ့ၣ်ညါပှၤ တၢ်စံးပာ်လၢ ကဘၣ်တၢ်မၤနးမၤဖှီၣ် အနံၣ် ၄၀၀ စးထီၣ်အသး ဒီးကတုၤပၢၢ်လၢ အဝဲသ့ၣ်ဟးထီၣ်ဘၣ်လၢ ကီၢ်အဲၤကူပတူးပူၤန့ၣ်လီၤ.—ကလၤ. ၄:၂၉.
(၁ မိၤၡ့ ၁၅:၁၆) ဒီးပှၤလွံၢ်စိၤတစိၤန့ၣ် ကဟဲက့ၤကဒါက့ၤဖဲအံၤလီၤ. အဂ့ၢ်ဒ်အံၤ, ပှၤအမိၢ်ဖိအတၢ်အၢတၢ်သီ တပှဲၤထီၣ်ဒံးဘၣ်လီၤ.
it-1 ၇၇၈ ¶၄
တၢ်ဟးထီၣ်ကွံာ်
“လွံၢ်စိၤတစိၤ” ပကဘၣ်သ့ၣ်နီၣ်ထီၣ်လၢ ယဟိဝၤယွၤတဲဘၣ် စီၤအၤဘြၤဟၣ်လၢ အဝဲအစၢၤအသွဲၣ် လွံၢ်စိၤတစိၤ ကဟဲက့ၤကဒါက့ၤဆူ ကီၢ်ကနၤဧၣ်လီၤ. (၁ မိၤ. ၁၅:၁၆) ပမ့ၢ်ဒွးကွၢ် ပှၤဖဲန့ၣ်အစိၤတဖၣ် အသးသမူထီအဂ့ၢ်န့ၣ် စးထီၣ်လၢ တၢ်အၢၣ်လီၤအီလီၤဒီး စီၤအၤဘြၤဟၣ် စးထီၣ်ကဲဘျုး ဒီးတုၤလီၤလၢ အဝဲသ့ၣ်ဟးထီၣ်လၢ ကီၢ်အဲၤကူပတူးအပူၤ အနံၣ် ၄၃၀ အတီၢ်ပူၤန့ၣ် ပှၤလွံၢ်စိၤတစိၤ တကးလၢၤဘၣ်. ဘၣ်ဆၣ် ပှၤအံၣ်စရ့လးဖိတဖၣ် အိၣ်ဘၣ်လၢကီၢ်အဲၤကူပတူးအပူၤန့ၣ် နီၢ်နီၢ်ကအိၣ်ဝဲ ၂၁၅ နံၣ်လီၤ. ပှၤလွံၢ်စိၤလၢအိၣ်ဘၣ်လၢ ကီၢ်အဲၤကူပတူးအပူၤတဖၣ်န့ၣ် ပသူပှၤလ့ၤဝံဖိအကလုာ်ဒူၣ် ဒီးပဒွးအီၤသ့လီၤ– (၁) လ့ၤဝံ, (၂) စီၤကဃး, (၃) စီၤဧၤမရၣ် ဒီး (၄) စီၤမိၤၡ့လီၤ.—၂ မိၤ. ၆:၁၆, ၁၈, ၂၀.
တၢ်ဖးလံာ်စီဆှံ
(၁ မိၤၡ့ ၁၅:၁-၂၁) တၢ်န့ၣ်တဖၣ်အလီၢ်ခံ ယွၤအကလုၢ်ဘၣ် စီၤအၤဘြၣ်လၢ တၢ်ထံၣ်တၢ်လၢညါခီအပူၤ, ဒီးစံးဝဲဒၣ်, စီၤအၤဘြၣ်ဧၢ, ပျံၤတၢ်တဂ့ၤ. ယမ့ၢ်ကတီၤတဘ့ၣ်လၢနဂီၢ် ဒီးနဘူးနလဲဒိၣ်ဒိၣ်ကလဲာ်လီၤ. ၂ စီၤအၤဘြၣ်စံးဝဲဒၣ်, ကစၢ်ယွၤဧၢ, နကဟ့ၣ်လီၤယၤမနုၤတမံၤလဲၣ်. အဂ့ၢ်ဒ်အံၤ, ယမ့ၢ်ပှၤတူာ်ဖိ, ဒီးယပှၤဟံၣ်ဖိအခိၣ် မ့ၢ်ပှၤဒၤမ့ၤစ့းဖိ, စီၤအလံၤဧ့စ့ၢ်တဂၤအံၤလီၤ. ၃ ဒီးစီၤအၤဘြၣ်စံးဝဲဒၣ်, ကွၢ်ကွၢ်, နတဟ့ၣ်လီၤဘၣ်ယၤလၢတၢ်အချံအသၣ်ဘၣ်, ဒီးကွၢ်ကွၢ်, ယပှၤဟံၣ်ဖိတဂၤမ့ၢ်ပှၤန့ၢ်သါယတၢ်လီၤ. ၄ ဒီးကွၢ်ကွၢ်, ယွၤအကလုၢ်ဘၣ်အီၤ, ဒီးစံးဝဲဒၣ်, အဝဲတဂၤန့ၣ်တကဲဘၣ်လၢပှၤန့ၢ်သါနတၢ်ဘၣ်. မ့မ့ၢ်ပှၤလၢအဟဲထီၣ်လၢနဟၢဖၢပူၤတဂၤကကဲထီၣ်ပှၤန့ၢ်သါနတၢ်လီၤ. ၅ ဒီးဒုးဟးထီၣ်အီၤဆူခိ, ဒီးစံးဝဲဒၣ်, ကွၢ်ထီၣ်ဆူမူခိၣ်, ဒီးနဂံၢ်မ့ၢ်သ့ဒီး, ဂံၢ်ဆၣ်ဧိၤဖီဧိၤန့ၣ်တက့ၢ်. ဒီးစံးဘၣ်အီၤ, နချံနသၣ်ကမၤအသးဒ်န့ၣ်လီၤ. ၆ ဒီးအဝဲဒၣ်နာ်ယွၤ, ဒီးတၢ်ပးကဲအတၢ်နာ်လၢတၢ်တီတၢ်လိၤလၢအဂီၢ်လီၤ. ၇ ဒီးစံးဘၣ်အီၤ, တၢ်လၢယၤအံၤ, ယမ့ၢ်ယွၤလၢအဒုးဟဲထီၣ်နၤ လၢပှၤက့ၤစ့းဖိအဝ့ၢ်အူၢ်အပူၤ, ဒ်သိးယကဟ့ၣ်လီၤနၤ လၢကီၢ်တဘ့ၣ်အံၤ လၢနကန့ၢ်သါအီၤလီၤ. ၈ ဒီးစံးဝဲဒၣ်, ကစၢ်ယွၤဧၢ, ယကသ့ၣ်ညါလၢယကန့ၢ်သါအီၤဒ်လဲၣ်. ၉ ဒီးစံးဘၣ်အီၤ, ဟံးန့ၢ်ယၤလၢ ဂီၤဖံးမိၢ်သၢနံၣ်ဖိတဒု, ဒီးမဲာ်တဲးလဲးမိၢ် သၢနံၣ်ဖိတဒု, ဒီးသိဖါသၢနံၣ်ဖိတဒု, ဒီးထိၣ်လွံၢ်ဘုၣ်တဘ့ၣ်, ဒီးကးက့ၣ်ဖိတဘ့ၣ်တက့ၢ်. ၁၀ ဒီးဟံးန့ၢ်တၢ်တဖၣ်န့ၣ် လၢအဂီၢ်, ဒီးနီၤဖးဝဲ လၢအသးကံၢ်ပူၤ, ဒီးပာ်ဝဲတခီတခီသဃီၤဒီးအသကိးလီၤ. မ့မ့ၢ်ထိၣ်တဖၣ်န့ၣ်တနီၤဖးဘၣ်ဝဲဘၣ်. ၁၁ ဒီးထိၣ်ဧိၤလံၣ်ဧိၤဟဲလီၤလၢတၢ်စိၣ်တဖၣ်အလိၤ, ဒီးစီၤအၤဘြၣ်ဃါထီၣ်ကွံာ်အီၤလီၤ. ၁၂ ဒီးတုၤမုၢ်လီၤနုာ်ဒီး, တၢ်မံသပ့ၤလီၤဘၣ်လၢစီၤအၤဘြၣ်အလိၤ, ဒီးကွၢ်ကွၢ်, တၢ်ပျံၤတၢ်ဖုး, တၢ်ခံးဖးဒိၣ်လီၤဘၣ်လၢအလိၤလီၤ. ၁၃ ဒီးစံးဘၣ်စီၤအၤဘြၣ်, သ့ၣ်ညါသပှၢ်တၢၢ်လၢ နချံနသၣ်ကကဲထီၣ်ပှၤတမှံၤ လၢကီၢ်တဘ့ၣ်အပူၤ လၢအတမ့ၢ်ဘၣ်အတၢ်ဘၣ်, ဒီးကမၤပှၤကီၢ်ဖိန့ၣ်အတၢ်, ဒီးအဝဲသ့ၣ် ကမၤနးမၤဖှီၣ်အီၤ အနံၣ်လွံၢ်ကယၤန့ၣ်တက့ၢ်. ၁၄ လၢန့ၣ်အမဲာ်ညါ ပှၤတကလုာ်လၢ အဝဲသ့ၣ်ကမၤအတၢ်န့ၣ် ယကစံၣ်ညီၣ်အီၤလီၤ. လၢခံက့ၤဒီး ကဟးထီၣ်အိၣ်ဒီးအတၢ်ဖိတၢ်လံၤအါအါကလဲာ်လီၤ. ၁၅ ဒီးနကလဲၤဆူနပၢ်သ့ၣ်တဖၣ် အအိၣ်မုာ်မုာ်လီၤ. နခိၣ်ဝါဂ့ၤဒီး နကဘၣ်တၢ်ခူၣ်လီၤကွံာ်နၤလီၤ. ၁၆ ဒီးပှၤလွံၢ်စိၤတစိၤန့ၣ် ကဟဲက့ၤကဒါက့ၤဖဲအံၤလီၤ. အဂ့ၢ်ဒ်အံၤ, ပှၤအမိၢ်ဖိအတၢ်အၢတၢ်သီ တပှဲၤထီၣ်ဒံးဘၣ်လီၤ. ၁၇ ဒီးတုၤမုၢ်လီၤနုာ်ဒီး, တၢ်ခံးလီၤ, ဒီးကွၢ်ကွၢ်, ဖၣ်ကပူၤအိၣ်ဒီးမ့ၣ်အူခုၣ်တဖျၢၣ်, ဒီးမ့ၣ်အူဒၢကဲၤထီၣ်တဖျၢၣ်လၢ အလဲၤလၢတၢ်တဖၣ်န့ၣ် တခီတခီအဘၢၣ်စၢၤလီၤ. ၁၈ တၢ်လၢမုၢ်နံၤတနံၤန့ၣ် ယွၤအၢၣ်လီၤအီလီၤတၢ်ဒီးစီၤအၤဘြၣ်, ဒီးစံးဝဲဒၣ်, ယဟ့ၣ်လီၤနချံနသၣ်လၢကီၢ်တဘ့ၣ်အံၤ, လၢအဲၤကူပတူး အထံကျိပၢၢ်လၢ ထံမိၢ်ပှၢ်ဖးဒိၣ်, ထံဖရၤသး, ၁၉ ပှၤက့ၣ်ဖိ ဒီးပှၤကနးဖိ, ဒီးပှၤကးမိၣ်ဖိ, ၂၀ ဒီးပှၤဃ့ၤသးဖိ, ဒီးပှၤပရးဖိဒီးပှၤရၤဖၤဖိ, ၂၁ ဒီးပှၤအမိၢ်ဖိ, ဒီးပှၤကနၤဧၣ်ဖိ, ဒီးပှၤကံၢ်ကၣ်ဖိ, ဒီးပှၤယဘူၣ်ဖိလီၤ.
လါဖ့ၤဘြူၤအါရံၤ ၁၇–၂၃
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ မိၤၡ့ ၁၈–၁၉
“‘ပှၤလၢအစံၣ်ညီၣ်ဟီၣ်ခိၣ်ဒီဘ့ၣ်ညါတဂၤ’ န့ၣ်မၤဟးဂီၤကွံာ်ဝဲ ဝ့ၢ်စဒိၣ်ဒီးဂမိရၤ”
(၁ မိၤၡ့ ၁၈:၂၃-၂၅) ဒီးစီၤအၤဘြၤဟၣ်သုးဘူးအသး ဒီးစံးဝဲဒၣ်, နကမၤဟးဂီၤ ပှၤတီပှၤလိၤစ့ၢ်ကီးဒီး ပှၤတတီတလိၤန့ၣ်ဧါ. ၂၄ ဘၣ်တဘၣ်ပှၤတီပှၤလိၤ ယဲၢ်ဆံကအိၣ်ဝဲ လၢဝ့ၢ်ပူၤလီၤ. နကမၤဟးဂီၤစ့ၢ်ကီး ဒီးတပျၢ်ဘၣ်အလီၢ်န့ၣ် လၢပှၤတီပှၤလိၤယဲၢ်ဆံ လၢအအိၣ်လၢအပူၤအဃိဘၣ်ဧါ. ၂၅ မ်နသုတမၤဒ်န့ၣ်တဂ့ၤ. မၤသံပှၤအတီအလိၤ ဒီးပှၤတတီတလိၤ, ဒီးပာ်ပှၤအတီအလိၤဒ် ပှၤတတီတလိၤအသိးန့ၣ်, မ်တၢ်သုတမၤအသးဒ်န့ၣ် ဒီးနၤတဂ့ၤ. ပှၤလၢအစံၣ်ညီၣ် ဟီၣ်ခိၣ်ဒီဘ့ၣ်ညါတဂၤန့ၣ် ကမၤတၢ်တီတၢ်လိၤ တမ့ၢ်ဘၣ်ဧါ.
“ပှၤလၢအစံၣ်ညီၣ် ဟီၣ်ခိၣ်ဒီဘ့ၣ်ညါတဂၤ” န့ၣ် ကမၤတၢ်တီတၢ်လိၤထီဘိ
“ပှၤလၢအစံၣ်ညီၣ် ဟီၣ်ခိၣ်ဒီဘ့ၣ်ညါတဂၤန့ၣ် ကမၤတၢ်တီတၢ်လိၤ တမ့ၢ်ဘၣ်ဧါ.” (၁ မိၤၡ့ ၁၈:၂၅) စီၤအၤဘြၤဟၣ်သံကွၢ်ဝဲဒ်အံၤန့ၣ် တမ့ၢ်လၢအသးဒ့ဒီအဃိဘၣ်. လၢတၢ်န့ၣ်အလီၢ် အတၢ်သံကွၢ်အံၤ ပာ်ဖျါထီၣ်လၢ အဝဲနာ်ဝဲလၢ ယဟိဝၤယွၤကစံၣ်ညီၣ် ဝ့ၢ်စဒိၣ်ဒီးဂမိရၤ တီတီလိၤလိၤလီၤ. ယဟိဝၤယွၤ ကမၤသံ “ပှၤအတီအလိၤ ဒီးပှၤတတီတလိၤ” တပူၤဃီန့ၣ် စီၤအၤဘြၤဟၣ် တဆိကမိၣ်ဘၣ်ဝဲ “ဒ်န့ၣ်” နီတဘျီဘၣ်. အဝဲနာ်ဝဲသပှၢ်တၢၢ်လၢ ယဟိဝၤယွၤ ကစံၣ်ညီၣ်တၢ်တီတီလိၤလိၤလီၤ. တကးဒံးဘၣ် ယဟိဝၤယွၤတဲစ့ၢ်ကီးဝဲလၢ အဝဲမ့ၢ်– “လၢၢ်တဖျၢၣ်, အတၢ်မၤလၢဝဲပှဲၤဝဲ, အဂ့ၢ်ဒ်အံၤ, အကျဲခဲလၢာ်မ့ၢ်တၢ်စံၣ်ညီၣ်လီၤ. မ့ၢ်တၢ်မ့ၢ်တၢ်တီအကစၢ်, ဒီးတၢ်အၢတအိၣ်လၢအီၤ, တၢ်တီဒီးတၢ်လိၤမ့ၢ်အဝဲဒၣ်လီၤ.”—၅ မိၤၡ့ ၃၁:၁၉; ၃၂:၄.
(၁ မိၤၡ့ ၁၈:၃၂) ဒီးစံးဝဲဒၣ်, မ်ကစၢ်သုတသးထီၣ်တဂ့ၤ, ဒီးယကကတိၤတၢ်ထဲ အအံၤတဘျီဧိၤလီၤ. ဘၣ်တဘၣ်တၢ်ကထံၣ်န့ၢ် ပှၤဆံဆဲၣ်ဂၤဖဲန့ၣ်လီၤ. ဒီးစံးဝဲဒၣ်, ယတမၤဟးဂီၤဘၣ်လၢ ပှၤဆံဆဲၣ်ဂၤအဃိဘၣ်လီၤ.
တၢ်ဝံသးစူၤ—အိၣ်ဒီးတၢ်တူၢ်န့ၢ်ခီၣ်ကဲလၢ တၢ်မုၢ်လၢ်အပူၤ
ပှၤလၢအဒိဂ့ၤတဲာ်ဘၣ်ကတၢၢ်လၢ အိၣ်ဒီးတၢ်ဝံသးစူၤန့ၣ် မ့ၢ်ဝဲယဟိဝၤယွၤလီၤ. (၂ ပ့းတရူး ၃:၁၅) လံာ်စီဆှံ ပာ်ဖျါထီၣ်ဝဲယဟိဝၤယွၤ အတၢ်ဝံသးစူၤအဂ့ၢ်အါမးလီၤ. (နဃ့မယၤ ၉:၃၀; ယၡါယၤ ၃၀:၁၈) ဖဲစီၤအၤဘြၤဟၣ် သံကွၢ်တၢ်ဘၣ်ဃးဒီး ယဟိဝၤယွၤအတၢ်ဆၢတဲာ်လၢ ကစံၣ်ညီၣ် ဝ့ၢ်စဒိၣ်အခါ ယဟိဝၤယွၤမၤဝဲဒ်လဲၣ်န့ၣ် မ့ၢ်နနီၣ်ဘၣ်ဒံးဧါ. ယဟိဝၤယွၤ ပျဲဝဲလၢ စီၤအၤဘြၤဟၣ် ကပာ်ဖျါထီၣ်အတၢ်ထံၣ်လီၤ. လၢတၢ်ဝံသးစူၤအပူၤ အဝဲဒိကနၣ် စီၤအၤဘြၤဟၣ်အတၢ်သံကွၢ် ဒီးအတၢ်ဘၣ်ယိၣ်ဘၣ်ဘှီ တဘျီဝံၤတဘျီလီၤ. တကးဒံးဘၣ် အဝဲပာ်ဖျါထီၣ်လၢ အဝဲနၢ်ဟူဝဲ တၢ်လၢစီၤအၤဘြၤဟၣ် အတၢ်ကိၢ်တၢ်ဂီၤ ဒီးအဝဲမၤမုာ်ထီၣ်က့ၤ စီၤအၤဘြၤဟၣ်အသးလၢ ပှၤတီပှၤလိၤမ့ၢ်အိၣ်လၢ ဝ့ၢ်အပူၤ ထဲအဂၤတဆံဧိၤဒၣ်လဲာ် အဝဲတမၤဟးဂီၤကွံာ်ဝဲ ဝ့ၢ်စဒိၣ်ဘၣ်. (၁ မိၤၡ့ ၁၈:၂၂-၃၃) ယဟိဝၤယွၤ ဒိကနၣ်တၢ်လၢ တၢ်ဝံသးစူၤအပူၤထီဘိ ဒီးအဝဲတမၤဆၢကဒါက့ၤတၢ် ကရီကဒးဘၣ်.
(၁ မိၤၡ့ ၁၉:၂၄, ၂၅) ဒီးယွၤမၢတၢ်ဟဲစူၤကးဒီးမ့ၣ်အူလၢ စဒိၣ်ဒီးဂမိရၤအဖီခိၣ်, လၢယွၤအအိၣ်လၢမူခိၣ်လီၤ. ၂၅ ဒီးမၤဟးဂီၤကွံာ်ဝ့ၢ်တဖၣ်န့ၣ်, ဒီးပျီဒီဘ့ၣ်ညါ, ဒီးကယဲၢ်ပှၤဝ့ၢ်ဖိ, ဒီးတၢ်မဲတၢ်မါလၢဟီၣ်ခိၣ်န့ၣ်လီၤ.
တၢး၁၀ ၁၁/၁၅ ၂၆ ¶၁၂
ယဟိဝၤယွၤ မ့ၢ်ပတၢ်ပၢကစၢ်
၁၂ ပနာ်သ့သပှၢ်ကတၢၢ်လၢ တယံာ်လၢၤဘၣ် ယဟိဝၤယွၤ ကပာ်ဖျါထီၣ်ဝဲလၢ အဝဲအိၣ်ဒီးတၢ်ခွဲးတၢ်ယာ်လၢကပၢတၢ်န့ၣ်လီၤ. မ့ၢ်လၢအဝဲ တဝံသးစူၤ တၢ်အၢတၢ်သီ ယံာ်ယံာ်ဘၣ် ဒီးပသ့ၣ်ညါဘၣ်လၢ ပအိၣ်မူဘၣ်လၢ မုၢ်နံၤခံကတၢၢ်လီၤ. ယဟိဝၤယွၤ စံၣ်ညီၣ်ဝဲ ပှၤအၢပှၤသီတဖၣ် ခီဖျိလၢ ထံလုၣ်ဘၢတၢ်လီၤ. အဝဲမၤဟးဂီၤဝဲ ဝ့ၢ်စဒိၣ်ဒီးဂမိရၤ ဒီးဖၤရိၤဒီးအသုးမုၢ်တဖၣ်လီၤ. စီၤစံစရၤ ဒီးအသုးမုၢ်, စီၤစၤနဃ့ရံာ် ဒီးအၤၡူၢ်သုးဖိတဖၣ် မၤနၢၤဝဲတၢ်ထီကတၢၢ်ကစၢ်တန့ၢ်ဘၣ်. (၁ မိၤ. ၇:၁, ၂၃; ၁၉:၂၄, ၂၅; ၂ မိၤ. ၁၄:၃၀, ၃၁; စံၣ်ညီၣ်. ၄:၁၅, ၁၆; ၂ စီၤပၤ. ၁၉:၃၅, ၃၆) ပနာ်သ့သပှၢ်ကတၢၢ်လၢ ပှၤလၢအမၤနးမၤဖှီၣ် အပှၤအုၣ်အသးတဖၣ်ဒီး ပှၤလၢအတယူးယီၣ်ပာ်ကဲအမံၤတဖၣ်န့ၣ် ယဟိဝၤယွၤ တဝံသးစူၤဝဲယံာ်ယံာ်ဘၣ်. လၢတၢ်န့ၣ်အမဲာ်ညါ ယ့ၣ်ၡူး အတၢ်ဟဲလီၤဒီး ဟီၣ်ခိၣ်လၢအအၢအသီအံၤ အကတၢၢ် အတၢ်ပနီၣ်န့ၣ် ပထံၣ်ဘၣ်ဂ့ၤဂ့ၤလံလီၤ.—မး. ၂၄:၃.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၁ မိၤၡ့ ၁၈:၁) ဒီးယွၤလီၣ်ဖျါထီၣ်အသးလၢ အမဲာ်ညါဖဲမးမရ့အသ့ထိးဖၣ်လီၤ. ဒီးလၢမုၢ်ကိၢ်ထီၣ်န့ၣ် ဆ့ၣ်နီၤဝဲလၢဒဲအကျဲစၢၤ,
(၁ မိၤၡ့ ၁၈:၂၂) ဒီးပှၤကညီတဖၣ်န့ၣ် ဃၣ်ဒူၣ်ချၢအသးဖဲန့ၣ်, ဒီးလဲၤဝဲဆူစဒိၣ်လီၤ. မ့မ့ၢ်စီၤအၤဘြၤဟၣ်န့ၣ် ဆၢထၢၣ်ဒံးလၢယွၤအမဲာ်ညါလီၤ.
တၢး၈၈ ၅/၁၅ ၂၃ ¶၄-၅
ပှၤလၢအထံၣ်ဘၣ် ကစၢ်ယွၤအိၣ်တဂၤဂၤဧါ
ဖဲစီၤအၤဘြၤဟၣ် တဲတၢ်ဒီး မူခိၣ်ကလူးလၢ အမၤကဲထီၣ်အသး ဒ်ပှၤကညီတဖၣ်အခါ ဘၣ်မနုၤအဃိ အဝဲတဲဝဲလၢအတဲတၢ်ဒီး ယဟိဝၤယွၤလဲၣ်န့ၣ် ပနၢ်ပၢၢ်သ့လီၤ. မူခိၣ်ကလူးတဖၣ်န့ၣ် ဟဲတဲဘၣ်စီၤအၤဘြၤဟၣ်လၢ တၢ်ကတိၤလၢ ယဟိဝၤယွၤမၢအတဲဝဲတဖၣ် လီၤတံၢ်လီၤဆဲးအဃိ လံာ်စီဆှံပူၤ ပာ်ဖျါထီၣ်ဝဲ ဒ်ကစၢ်ယွၤအနီၢ်ကစၢ် ဟဲဝဲလီၤ. လံာ်စီဆှံပာ်ဖျါထီၣ်ဝဲလၢ– “ယွၤလီၣ်ဖျါထီၣ်အသးလၢ အမဲာ်ညါ” လီၤ.—၁ မိၤၡ့ ၁၈:၁.
သ့ၣ်နီၣ်ထီၣ်လၢ ဖဲမူခိၣ်ကလူးတဖၣ် တဲဘၣ်က့ၤဝဲ ကစၢ်ယွၤ အတၢ်ကတိၤလီၤတံၢ်လီၤဆဲးအခါ လီၤဂာ်ဒ် ပတဲတၢ်ဒီးပှၤတဂၤလၢ လီတဲစိ မ့တမ့ၢ် ကွဲၤလ့လိၤန့ၣ်လီၤ. အဃိ စီၤအၤဘြၤဟၣ်, စီၤမိၤၡ့, စီၤမၤနိဒီးပှၤအဂၤတဖၣ်န့ၣ် ဖဲအတဲတၢ်ဒီး မူခိၣ်ကလူးလၢ အမၤကဲထီၣ်အသးဒ် ပှၤကညီတဖၣ်အခါ တဲဝဲလၢအတဲတၢ်ဒီး ယဟိဝၤယွၤန့ၣ် ပနၢ်ပၢၢ်သ့လီၤ. အဝဲသ့ၣ်တဖၣ်န့ၣ် ထံၣ်ဘၣ်ဝဲ မူခိၣ်ကလူးတဖၣ်ဒီး ယဟိဝၤယွၤအလၤကပီၤသနာ်က့ တထံၣ်ဘၣ်ကစၢ်ယွၤ အက့ၢ်အဂီၤဘၣ်. အဃိ တထီဒါလိာ်အသးဒီး တၢ်မၢဖိယိၤဟၣ် အတၢ်ကတိၤလၢ အတဲဝဲ– “ပှၤတထံၣ်ဘၣ်ယွၤ နီတခီၣ်နီတဂၤဘၣ်” န့ၣ်ဘၣ်. (ယိၤဟၣ် ၁:၁၈) မ့ၢ်ဒၣ်အဝဲသ့ၣ် ထံၣ်ဘၣ်ဝဲ မူခိၣ်ကလူးလၢ အမ့ၢ်ယွၤအပှၤခၢၣ်စးတဖၣ်လီၤ. တထံၣ်ဘၣ်ဝဲယွၤဘၣ်.
(၁ မိၤၡ့ ၁၉:၂၆) မ့မ့ၢ်အမါတဂၤကွၢ်ကဒါက့ၤဆူအလီၢ်ခံ, ဒီးကဲထီၣ်လၢအံသၣ်ထူၣ်လီၤ.
မၤစၢၤပှၤဂၤ ဒ်သိးအဝဲသ့ၣ် လဲၤခီဖျိ တၢ်သူၣ်ကိၢ်သးဂီၤတဖၣ် ကန့ၢ်အဂီၢ်
၃ စီၤလိာ်ဃုထၢဝဲလၢ ကအိၣ်လၢ ပှၤစဒိၣ်ဖိ လၢအလုၢ်လၢ်သကဲာ်ပဝး အၢသီဒိၣ်မးတဖၣ်အကျါအဃိ အတၢ်ဆၢတဲာ်န့ၣ် ကမၣ်ဝဲလီၤ. (ဖး ၂ ပ့းတရူး ၂:၇, ၈ တက့ၢ်.) မ့ၢ်လၢအဝဲလဲၤအိၣ်လၢ တၢ်လီၢ်အဝဲန့ၣ်အဃိ အိၣ်ဘၣ်အီၣ်ဘၣ် ဘီၣ်ဘီၣ်ညီညီ ဘၣ်ဆၣ်အဝဲထံၣ်ဘၣ်ဒီး တၢ်ကီတၢ်ခဲအါမးလီၤ. (၁ မိၤၡ့ ၁၃:၈-၁၃; ၁၄:၁၂) လီၤဂာ်လၢအမါန့ၣ် ဘၣ်သူၣ်ဘၣ်သးဝဲ ဝ့ၢ်တဖျၢၣ်အံၤ မ့တမ့ၢ် ပှၤအိၣ်ဖဲန့ၣ်တနီၤ ဒိၣ်မးအဃိ တဒိကနၣ် ယဟိဝၤယွၤ အကလုၢ်ဘၣ်. အဃိဖဲကစၢ်ယွၤဒုးစူၤလီၤ မ့ၣ်အူဒီးကးလၢ တၢ်လီၢ်ဖဲန့ၣ်အခါ အမါသံဝဲလီၤ. ဒီးမ့မ့ၢ် စီၤလိာ်အဖိမုၣ်ခံဂၤန့ၣ် ဒီတၢ်အဲၣ်တီဒီး ပှၤပိာ်ခွါလၢ အသံတ့ၢ်ဖဲ ဝ့ၢ်စဒိၣ်န့ၣ်လီၤ. ဒီးစီၤလိာ် အဟံၣ်, အတၢ်ထူးတၢ်တီၤ လီၤမၢ်ကွံာ်ဝဲလီၤ. တကးဒံးဘၣ် တၢ်လၢအလီၤသးအုး ဒိၣ်ကတၢၢ်န့ၣ် အမါသံဝဲလီၤ. (၁ မိၤၡ့ ၁၉:၁၂-၁၄, ၁၇, ၂၆) ဖဲစီၤလိာ်ထံၣ်ဘၣ်ဒီး တၢ်ကီတၢ်ခဲဒ်အံၤတဖၣ်အခါ မ့ၢ်ယဟိဝၤယွၤ အိၣ်ဒီးတၢ်သူၣ်စူၤသးစူၤ လၢအဖီခိၣ်ဒံးဧါ, အိၣ်ဒံးလီၤ.
တၢ်ဖးလံာ်စီဆှံ
(၁ မိၤၡ့ ၁၈:၁-၁၉) ဒီးယွၤလီၣ်ဖျါထီၣ်အသးလၢ အမဲာ်ညါဖဲမးမရ့အသ့ထိးဖၣ်လီၤ. ဒီးလၢမုၢ်ကိၢ်ထီၣ်န့ၣ် ဆ့ၣ်နီၤဝဲလၢဒဲအကျဲစၢၤ, ၂ ဒီးကျ့ထီၣ်အမဲာ်, ဒီးကွၢ်ဝဲ, ဒီးကွၢ်ကွၢ်, ပှၤကညီသၢဂၤဆၢထၢၣ်လၢအဃၢၤလီၤ. ဒီးတုၤအထံၣ်ဘၣ်ဝဲဒီး, ဃ့ၢ်ထီၣ်ဝဲ လၢဒဲအကျဲစၢၤဒ်သိး အကသဂၢၢ်ထီၣ်အီၤ, ဒီးတီၤလီၤကဒွံကျိာ်လၢဟီၣ်ခိၣ်, ၃ ဒီးစံးဝဲဒၣ်, ယကစၢ်ဧၢ, ယမ့ၢ်ဘၣ်ဘျုးလၢနမဲာ်ညါဒီး, လဲၤပူၤကွံာ်လၢ်လၢနကုၢ်နပှၤအအိၣ်တဂ့ၤ. ၄ ပျဲပှၤဟဲစိာ်ထံတစဲး, ဒီးသ့ကွံာ်သုခီၣ်, ဒီးအိၣ်ဘှံးလၢ်လၢသ့ၣ်အဖီလာ်န့ၣ်တက့ၢ်. ၅ ဒီးယကဟဲစိာ်ကိၣ်တကူာ်, ဒီးမၤမုာ်ထီၣ်က့ၤသုသးတက့ၢ်. လၢခံက့ၤဒီးသုကလဲၤဘၣ်ဒံးတၢ်လီၤ. အဂ့ၢ်ဒ်အံၤ, မ့ၢ်သုဟဲလံဆူသုကုၢ်သုပှၤအအိၣ်လံလီၤ. ဒီးစံးဝဲဒၣ်, ဒ်န့ၣ်အသိးမၤဒ်နစံးတၢ်အသိးန့ၣ်တက့ၢ်. ၆ ဒီးစီၤအၤဘြၤဟၣ်က့ၤချ့သဒံးဆူဒဲပူၤ, ဆူနီၢ်စၤရါအအိၣ်, ဒီးစံးဝဲဒၣ်, ကတဲာ်ကတီၤန့ၢ်ကိၣ်ကမူၣ်သၢစ့ၤအၤချ့ချ့, စံၢ်အီၤ, ဒီးမၤကိၣ်ဒီဘ့ၣ်တဖၣ်လၢဖၣ်ကပူၤ အဖီခိၣ်န့ၣ်တက့ၢ်. ၇ ဒီးစီၤအၤဘြၤဟၣ်ဃ့ၢ်ဆူဂီၤဖံးတဖုအအိၣ်, ဒီးမၤန့ၢ်ဂီၤဖံးဖိလၢအညၣ်စၢ်, ဒီးဂ့ၤဝဲတဒု, ဒီးဟ့ၣ်လီၤလၢ ဖိၣ်သၣ်ခွါတဂၤ, ဒီးအဝဲဒၣ်ကတဲာ်ကတီၤအီၤချ့သဒံးလီၤ. ၈ ဒီးဟံးန့ၢ်တၢ်နုၢ်ထံလီၤသကၤ, ဒီးတၢ်နုၢ်ထံ, ဒီးဂီၤဖံးဖိလၢအကတဲာ်ကတီၤတ့ၢ်န့ၣ်, ဒီးပာ်လီၤဝဲလၢအဝဲသ့ၣ်အမဲာ်ညါ, ဒီးဆၢထၢၣ် အကစၢ်ဒၣ်ဝဲ လၢအဃၢၤ လၢသ့ၣ်အဖီလာ်, ဒီးအဝဲသ့ၣ်အီၣ်တၢ်လီၤ. ၉ ဒီးစံးဘၣ်အီၤ, နမါနီၢ်စၤရါန့ၣ်မ့ၢ်အအိၣ်ဖဲလဲၣ်, ဒီးစံးဝဲဒၣ်, ကွၢ်ကွၢ်, အိၣ်ဝဲလၢဒဲပူၤလီၤ. ၁၀ ဒီးစံးဝဲဒၣ်, တၢ်ဆၢက့ၤအကတီၢ်န့ၣ် ယကဟဲက့ၤဆူနအိၣ်သပှၢ်တၢၢ်, ဒီးကွၢ်ကွၢ်, နမါနီၢ်စၤရါကအိၣ်ဒီးအဖိခွါလီၤ. ဒီးနီၢ်စၤရါနၢ်ဟူဝဲလၢ ဒဲအကျဲစၢၤအိၣ်ဝဲလၢ အချၢဃံန့ၣ်လီၤ. ၁၁ ဒီးစီၤအၤဘြၤဟၣ်ဒီးနီၢ်စၤရါအသးပှၢ်တ့ၢ်, လဲၤတ့ၢ်လၢနံၣ်တဖၣ်အကျါလီၤ. ဒီးတကဲထီၣ်လၢၤဘၣ် ဒီးနီၢ်စၤရါဒ်ပိာ်မုၣ်အလုၢ်အလၢ်အသိးန့ၣ်ဘၣ်. ၁၂ ဒီးနီၢ်စၤရါနံၤဘၣ်ဝဲလၢအသးကံၢ်ပူၤ, ဒီးစံးဝဲဒၣ်, ယသးပှၢ်တ့ၢ်အလီၢ်ခံန့ၣ်ယကအိၣ်ဒီးတၢ်မုာ်လၤစ့ၢ်ကီးဧါ. ဒီးယကစၢ်န့ၣ်သးပှၢ်တ့ၢ်လီၤ. ၁၃ ဒီးယွၤစံးဘၣ်စီၤအၤဘြၤဟၣ်, နီၢ်စၤရါနံၤဝဲ, ဒီးစံး, ယသးပှၢ်တ့ၢ်, ဒီးယကဆံးစၢ်န့ၢ်ယဖိ သပှၢ်တၢၣ်ဧါန့ၣ်ဘၣ်မနုၤလဲၣ်. ၁၄ တၢ်ကီကဲၣ်ဆိးအိၣ်ဝဲဒီး ယွၤတမံၤမံၤဧါ. တုၤအဆၢကတီၢ်ဘၣ်ဒီး, ယကဟဲက့ၤဆူနအိၣ် ဖဲတၢ်ဆၢက့ၤအကတီၢ်, ဒီးနီၢ်စၤရါကအိၣ်ဒီးအဖိခွါလီၤ. ၁၅ ဒီးနီၢ်စၤရါသမၢဝဲ, ဒီးစံးဝဲဒၣ်, ယတနံၤဘၣ်. မ့ၢ်အပျံၤတၢ်အဃိလီၤ. ဒီးစံးဝဲဒၣ်, တမ့ၢ်ဘၣ်, မ့ၢ်နနံၤလီၤ. ၁၆ ဒီးပှၤကညီတဖၣ်န့ၣ် ဟးထီၣ်ဖဲန့ၣ်, ဒီးကွၢ်ဝဲဆူဝ့ၢ်စဒိၣ်, ဒီးစီၤအၤဘြၤဟၣ်လဲၤဒီးအီၤဒ်သိးကဆှၢအီၤလီၤ. ၁၇ ဒီးယွၤစံးဝဲဒၣ်, တၢ်လၢယကမၤတၢ်အံၤ, ယကပာ်ခူသူၣ်လၢစီၤအၤဘြၤဟၣ်ဧါ. ၁၈ ဒီးစီၤအၤဘြၤဟၣ် ကကဲထီၣ်ပှၤတကလုာ်ဖးဒိၣ်ဒီးဆူၣ်ဝဲ, ဒီးကယဲၢ်ပှၤကညီလၢဟီၣ်ခိၣ်ချၢန့ၣ် ကဘၣ်တၢ်ဆိၣ်ဂ့ၤ လၢအပူၤ ကိးကလုာ်ဒဲးလီၤ. ၁၉ အဂ့ၢ်ဒ်အံၤ, ယသ့ၣ်ညါအီၤလၢအကမၤလိာ်အဖိအလံၤ, ဒီးအပှၤဟံၣ်ဖိ လၢအလီၢ်ခံန့ၣ်လီၤ. ဒီးအဝဲသ့ၣ်ကပိာ်ယွၤအကျဲ ဒ်သိးအကမၤတၢ်တီတၢ်လိၤ, ဒီးတၢ်စံၣ်ညီၣ်, ဒ်သိးယွၤကဒုးလီၤဘၣ်တၢ်လၢ စီၤအၤဘြၤဟၣ်အလိၤလၢ အစံးပာ်လၢအဂ့ၢ်လီၤ.
လါဖ့ၤဘြူၤအါရံၤ၂၄–လါမၢ်ၡး ၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ မိၤၡ့ ၂၀–၂၁
“ယဟိဝၤယွၤ မၤဝဲဒ်အတၢ်အၢၣ်လီၤအသိးထီဘိ”
(၁ မိၤၡ့ ၂၁:၁-၃) ဒီးယွၤအိၣ်သကိးနီၢ်စၤရါဒ်အစံးပာ်အသိး, ဒီးယွၤမၤနီၢ်စၤရါ ဒ်အကတိၤတၢ်အသိးန့ၣ်လီၤ. ၂ အဂ့ၢ်ဒ်အံၤ, နီၢ်စၤရါဒၢထီၣ်, ဒီးဆံးစၢ်န့ၢ်စီၤအၤဘြၤဟၣ် အဖိခွါလၢလၢအသးပှၢ်တ့ၢ်, ဖဲအဆၢကတီၢ် လၢယွၤစံးပာ်အီၤလီၤ. ၃ ဒီးအဖိခွါလၢ အအိၣ်ဖျဲၣ်လၢအဂီၢ်, လၢနီၢ်စၤရါဆံးစၢ်န့ၢ်အီၤတဂၤန့ၣ် စီၤအၤဘြၤဟၣ်ယုၢ်အမံၤလၢစီၤအံၤစဲးလီၤ.
wp၁၇.၅ ၁၄-၁၅
ကစၢ်ယွၤကိးအီၤလၢ နီၢ်ပၤမုၣ်ဖိ
နီၢ်စၤရါ နံၤထီၣ်ဝဲန့ၣ် မ့ၢ်လၢအတၢ်နာ်တအိၣ်ဘၣ် အဃိဧါ. တမ့ၢ်ဘၣ်. လံာ်စီဆှံတဲဝဲလၢ “လၢတၢ်နာ်, နီၢ်စၤရါအကစၢ်ဒၣ်ဝဲ, ဒိးန့ၢ်အဂံၢ်အဘါလၢ အကဒၢထီၣ်အချံအသၣ်, လၢအဟုးတုၢ်အလီၢ်ခံလီၤ. အဂ့ၢ်ဒ်အံၤ, ပာ်ပှၤလၢ အစံးပာ်တၢ်တဂၤလၢ အကလုၢ်တီလီၤ.” (ဧ့ၤဘြံၤ ၁၁:၁၁) နီၢ်စၤရါသ့ၣ်ညါဝဲ ယဟိဝၤယွၤအဂ့ၢ် ဒီးသ့ၣ်ညါစ့ၢ်ကီးဝဲလၢ ကစၢ်ယွၤန့ၣ် ဒ်အအၢၣ်လီၤဝဲအသိး မၤလၢပှဲၤထီၣ်ဝဲခဲလၢာ်လီၤ. ပဝဲသ့ၣ်တဖၣ်စ့ၢ်ကီး ပလိၣ်ဘၣ်တၢ်နာ်ဒ်သိးန့ၣ်တမ့ၢ်ဧါ. ကစၢ်ယွၤအဂ့ၢ်လၢ အိၣ်လၢလံာ်စီဆှံအပူၤန့ၣ် ပကဘၣ်သ့ၣ်ညါအီၤဂ့ၤဂ့ၤလီၤ. ပမ့ၢ်မၤဒ်န့ၣ်မး ပကသ့ၣ်ညါဘၣ်လၢ နီၢ်စၤရါန့ၣ် အိၣ်ဒီးတၢ်နာ်နီၢ်နီၢ်လီၤ. ယဟိဝၤယွၤန့ၣ် တီဝဲလိၤဝဲ ဒီးမၤလၢပှဲၤထီၣ် အတၢ်အၢၣ်လီၤကိးမံၤဒဲးလီၤ. တဘျီတခီၣ် တၢ်လၢကစၢ်ယွၤမၤဝဲလၢ ပဂီၢ်တဖၣ်န့ၣ် လီၤကမၢကမၣ်ဖးဒိၣ်တုၤဒၣ်လဲာ် ပဘၣ်နံၤလီၤ.
“ကနၣ်အကလုၢ်တက့ၢ်”
လၢခံ ဖဲနီၢ်စၤရါ အသးအိၣ် ၉၀ န့ၣ်တၢ်လၢအဝဲဆၢမုၢ်လၢ်ဝဲလၢ အတၢ်အိၣ်မူဒီတစိၤအပူၤန့ၣ် ဟဲကဲထီၣ်ဝဲလီၤ. ဖဲစီၤအၤဘြၤဟၣ် အသးအိၣ်အနံၣ်တကယၤအခါ နီၢ်စၤရါအိၣ်ဖျဲၣ်ထီၣ်န့ၢ်အီၤ အဖိခွါတဂၤလီၤ. ဒ်ကစၢ်ယွၤမၤလိာ်ပာ်ဝဲအသိး စီၤအၤဘြၤဟၣ် ဟ့ၣ်ဝဲအဖိခွါအံၤအမံၤလၢ စီၤအံၤစဲး မ့တမ့ၢ် “တၢ်နံၤ” လီၤ. ပကထံၣ်တမှံကွၢ်လၢ နီၢ်စၤရါန့ၣ်လီၤဘှံးလီၤတီၤသနာ်က့ အဝဲနံၤကမှံထီၣ်ဝဲ ဒီးတဲဝဲလၢ “ယွၤဒုးနံၤယၤလီၤ. ကယဲၢ်ပှၤလၢ အနၢ်ဟူခဲလၢာ်န့ၣ် ကနံၤဃုာ်ဒီးယၤလီၤ.” (၁ မိၤၡ့ ၂၁:၆) ခီဖျိလၢယဟိဝၤယွၤ အတၢ်ဟ့ၣ်လၢ အလီၤကမၢကမၣ်အံၤအဃိ အဝဲကဆဲးအိၣ်ဒီး တၢ်သူၣ်ခုသးခု တုၤအသံလီၤ. ဘၣ်ဆၣ် အဝဲအိၣ်ဒီးမူဒါဖးဒိၣ်စ့ၢ်ကီးလီၤ.
ဖဲစီၤအံၤစဲး အိၣ်ယဲၢ်နံၣ် ဒီးဖှၣ်အမိၢ်နုၢ်အနံၤန့ၣ် စီၤအၤဘြၤဟၣ်ဒီး အဟံၣ်ဖိဃီဖိတဖၣ် မၤဝဲမူးပွဲဖးဒိၣ်တခါလီၤ. ဘၣ်ဆၣ် တၢ်ကီတၢ်ခဲအိၣ်ထီၣ်ဝဲတခါလီၤ. ပဖးဘၣ်လၢ နီၢ်စၤရါ “ထံၣ်” ဘၣ်ဝဲတၢ်လၢ အမၤတံာ်တာ်အသးတခါလီၤ. နီၢ်ဟၤကၢ်အဖိခွါ စီၤယံးၡမၤဧ့လး လၢအသးအိၣ် ၁၉ နံၣ်န့ၣ် နံၤဘၣ်ဖၣ်လဲဝဲ စီၤအံၤစဲးလီၤ. တၢ်လၢစီၤယံးၡမၤဧ့လးမၤဝဲန့ၣ် တမ့ၢ်အမၤလိာ်ကွဲတၢ်ဘၣ်. လၢခံတၢ်မၢဖိပီလူး ကွဲးဝဲလၢ စီၤယံးၡမၤဧ့လး မၤအၢမၤသီအီၤလီၤ. နီၢ်စၤရါသ့ၣ်ညါဝဲလၢ တၢ်မၤနၢၤအီၣ်ဃီၣ်ဒ်အံၤန့ၣ် ကကဲထီၣ်တၢ်ဘၣ်ယိၣ်လၢ အဖိခွါအတၢ်အိၣ်မူ ခါဆူညါအဂီၢ်လီၤ. မ့ၢ်လၢအဝဲသ့ၣ်ညါပာ်ဝဲလၢ စီၤအံၤစဲးန့ၣ် တမ့ၢ်ထဲအကဲထီၣ်အဖိခွါဘၣ် မ့ၢ်ပှၤအရ့ဒိၣ်တဂၤလၢ ကစၢ်ယွၤအတၢ်တိာ်ပာ်အဂီၢ်စ့ၢ်ကီးလီၤ. လၢတၢ်န့ၣ်အဃိ အဝဲပာ်ဆူၣ်ထီၣ်အသး ဒီးတဲတၢ်ဒီးစီၤအၤဘြၤဟၣ် လိၤလိၤလၢ တၢ်သူၣ်ဒူသးဒူအပူၤလီၤ. အဝဲမၢ စီၤအၤဘြၤဟၣ် ဟီထီၣ်ကွံာ် နီၢ်ဟၤကၢ် ဒီးစီၤယံးၡမၤဧ့လးလီၤ.—၁ မိၤၡ့ ၂၁:၈-၁၀; ကလၤတံ ၄:၂၂, ၂၃, ၂၉.
စီၤအၤဘြၤဟၣ် မၤဝဲဒ်လဲၣ်. ပဖးဘၣ်လၢ “တၢ်တမံၤန့ၣ် ကီမးလၢစီၤအၤဘြၤဟၣ်အမဲာ်ညါ လၢအဖိခွါအဃိလီၤ.” ဒ်အမ့ၢ်ပၢ်တဂၤအသိး အဝဲအဲၣ်ဝဲစီၤယံးၡမၤဧ့လးလီၤ. ယဟိဝၤယွၤ သ့ၣ်ညါဝဲတၢ်ဂ့ၢ်အံၤဂ့ၤဂ့ၤအဃိ အဝဲနုာ်လီၤမၤဘၣ်ဂီၢ်တၢ်လၢ တၢ်ဘၢၣ်စၢၤလီၤ. ပဖးဘၣ်လၢ “ယွၤစံးဘၣ် စီၤအၤဘြၤဟၣ်, မ်အသုတမ့ၢ်တၢ်ကီလၢ နမဲာ်ညါလၢနဖိသၣ်အဃိ, ဒီးလၢနကုၢ်ပိာ်မုၣ်အဃိန့ၣ်တဂ့ၤ. ကယဲၢ်တၢ်လၢ နီၢ်စၤရါစံးဘၣ်တဲဘၣ် နၤခဲလၢာ်န့ၣ်, ကနၣ်အကလုၢ်တက့ၢ်. အဂ့ၢ်ဒ်အံၤ, တၢ်ကကိးန့ၢ်နချံနသၣ်လၢ စီၤအံၤစဲးအပူၤလီၤ.” ယဟိဝၤယွၤ ဒုးနာ်န့ၢ် စီၤအၤဘြၤဟၣ်လၢ ကမၤစၢၤဝဲ နီၢ်ဟၤကၢ် ဒီးအဖိခွါလီၤ. စီၤအၤဘြၤဟၣ် မၤဝဲဒ်ကစၢ်ယွၤမၢအီၤအသိးလီၤ.—၁ မိၤၡ့ ၂၁:၁၁-၁၄.
(၁ မိၤၡ့ ၂၁:၅-၇) ဒီးဖဲအဖိခွါစီၤအံၤစဲးအိၣ်ဖျဲၣ်လၢအဂီၢ်န့ၣ်, စီၤအၤဘြၤဟၣ် အသးပှၢ်အနံၣ်တကယၤလီၤ. ၆ ဒီးနီၢ်စၤရါစံးဝဲဒၣ်, ယွၤဒုးနံၤယၤလီၤ. ကယဲၢ်ပှၤလၢ အနၢ်ဟူခဲလၢာ်န့ၣ် ကနံၤဃုာ်ဒီးယၤလီၤ. ၇ ဒီးစံးဝဲဒၣ်, မ့ၢ်မတၤကစံးတ့ၢ်စီၤအၤဘြၤဟၣ်လၢ နီၢ်စၤရါကဒုးအီၣ်နုၢ်ဖိန့ၣ်လဲၣ်. အဂ့ၢ်ဒ်အံၤ, လၢအသးပှၢ်တ့ၢ်န့ၣ် ယဆံးစၢ်န့ၢ်အဖိခွါလီၤ.
(၁ မိၤၡ့ ၂၁:၁၀-၁၂) ဒီးစံးဘၣ်စီၤအၤဘြၤဟၣ်, ဟီထီၣ်ကွံာ်ကုၢ်ပိာ်မုၣ်န့ၣ်ဒီးအဖိခွါတက့ၢ်. အဂ့ၢ်ဒ်အံၤ, ကုၢ်ပိာ်မုၣ်အဖိခွါတန့ၢ်ဘၣ်သါတၢ်ဒီးယဖိခွါ, စီၤအံၤစဲးန့ၣ်ဘၣ်. ၁၁ ဒီးတၢ်တမံၤန့ၣ် ကီမးလၢစီၤအၤဘြၤဟၣ်အမဲာ်ညါလၢအဖိခွါအဃိလီၤ. ၁၂ ဒီးယွၤစံးဘၣ် စီၤအၤဘြၤဟၣ်, မ်အသုတမ့ၢ်တၢ်ကီလၢ နမဲာ်ညါလၢနဖိသၣ်အဃိ, ဒီးလၢနကုၢ်ပိာ်မုၣ်အဃိန့ၣ်တဂ့ၤ. ကယဲၢ်တၢ်လၢ နီၢ်စၤရါစံးဘၣ်တဲဘၣ် နၤခဲလၢာ်န့ၣ်, ကနၣ်အကလုၢ်တက့ၢ်. အဂ့ၢ်ဒ်အံၤ, တၢ်ကကိးန့ၢ်နချံနသၣ်လၢ စီၤအံၤစဲးအပူၤလီၤ.
(၁ မိၤၡ့ ၂၁:၁၄) ဒီးစီၤအၤဘြၤဟၣ် ဂဲၤဆၢထၢၣ်လၢဂီၤဂီၤ, ဒီးဟံးန့ၢ်ကိၣ်, ဒီးထံတထၢၣ်, ဒီးဟ့ၣ်အီၤလၢ နီၢ်ဟၤကၢ်ဒီးပာ်ဝဲလၢအဖံဘၣ်ခိၣ် ဒီးမၢအလဲၤတၢ်လီၤ. ဒီးအဝဲဒၣ်ဟးထီၣ်, ဒီးလဲၤဝ့ၤဝီၤတၢ်လၢ ပှၢ်မုၢ်ကနၢ ဘ့ၢ်ၡဘၤအပူၤလီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၁ မိၤၡ့ ၂၀:၁၂) ဘၣ်ဆၣ်ဒီး မ့ၢ်စ့ၢ်ကီးဝဲလၢ ယဒီပုၢ်ဝဲၢ်မုၣ်လီၤ, မ့ၢ်လၢယပၢ်အဖိမုၣ်လီၤ. ဘၣ်ဆၣ်ဒီး တမ့ၢ်ဘၣ်ယမိၢ်အဖိမုၣ်ဘၣ်. ဒီးကဲထီၣ်လၢယမါလီၤ.
wp17.3 12, ftn.
“နမ့ၢ်ပိာ်မုၣ်အဃံအလၤ”
စီၤအၤဘြၤဟၣ် ဒီးနီၢ်စၤရါန့ၣ် မ့ၢ်ဝဲဒီပုၢ်ဝဲၢ်ခိၣ်ချၢ, ပၢ်တပၢ်ဃီမိၢ်လီၤဆီလီၤ. (၁ မိၤၡ့ ၂၀:၁၂) အရ့ဒိၣ်လၢ ပကဘၣ်သ့ၣ်ညါပာ်လၢ ဖဲန့ၣ်အစိၤ ဒီးပစိၤခဲအံၤ တဒ်သိးလိာ်အသးဘၣ်. မ့ၢ်လၢဖဲန့ၣ်အဆၢကတီၢ် ပှၤဟီၣ်ခိၣ်ဖိတဖၣ် တယံၤထီၣ်ဒီး တၢ်လၢတၢ်ပှဲၤလၢ စီၤအၤဒၣ် ဒီးနီၢ်အံၣ်အု ဒုးလီၤမၢ်ကွံာ်ဝဲ အါအါဒံးဘၣ်အဃိလီၤ. ပှၤဖဲန့ၣ်တဖၣ် အတၢ်အိၣ်ဆူၣ်အိၣ်ချ့ဂ့ၤဒံးအဃိ အဝဲသ့ၣ် မ့ၢ်ဆီဟံၣ်ဆီဃီဒီး အဘူးအတံၢ်သနာ်က့ တၢ်ဘၣ်ယိၣ်တအိၣ်လၢ အဝဲသ့ၣ်ကအိၣ်ဖျဲၣ်ထီၣ်အဖိလၢ အက့ၢ်အဂီၤတလၢပှဲၤန့ၣ်ဘၣ်. လၢခံပူၤကွံာ်အနံၣ် ၄၀၀ ဃၣ်ဃၣ်န့ၣ် ပှၤဟီၣ်ခိၣ်ဖိတဖၣ် ယံၤထီၣ်ဒီး တၢ်လၢတၢ်ပှဲၤလီၤ. ဖဲန့ၣ်အဆၢကတီၢ် လၢစီၤမိၤၡ့ အတၢ်မၤလိာ်အပူၤန့ၣ် တြီဃာ်ဝဲ ပှၤသုတဆီဟံၣ်ဆီဃီဒီး အဘူးအတံၢ်တဂ့ၤန့ၣ်လီၤ.—၃ မိၤၡ့ ၁၈:၆.
(၁ မိၤၡ့ ၂၁:၃၃) ဒီးစီၤအၤဘြၤဟၣ် သူၣ်သ့ၣ်တဖု လၢဘ့ၤၡဘၤအပူၤ, ဒီးကိးထီၣ်ဖဲန့ၣ် လၢယွၤအမံၤ, ကစၢ်အထူအယိာ်လီၤ.
တၢး၈၉ ၇/၁ ၂၀ ¶၉
စီၤအၤဘြၤဟၣ်—မ့ၢ်ပှၤဒိဂ့ၤတဲာ်ဘၣ်လၢ ပှၤလၢအဲၣ်ဒိးကဲထီၣ် ယွၤအတံၤသကိးတဖၣ်အဂီၢ်”
၉ စီၤအၤဘြၤဟၣ် ပာ်ဖျါထီၣ်တၢ်နာ်လၢတၢ်မၤ လၢခံတခါဒံးလီၤ. ဒ်တၢ်ကွဲးနီၣ်ပာ်ဖျါဝဲအသိး အဝဲ “မၤထီၣ်တၢ်လုၢ်အလီၢ်လၢယွၤလၢ အလီၣ်ဖျါထီၣ်အသးလၢအီၤ အဂီၢ်ဖဲန့ၣ်လီၤ.” (၁ မိၤၡ့ ၁၂:၇) လီၤဂာ်လၢ ပၣ်ဃုာ်ဒီး တၢ်လုၢ်ထီၣ်ဆၣ်ဖိကီၢ်ဖိလီၤ. ဘၣ်မနုၤအဃိလဲၣ်န့ၣ် “တၢ်လုၢ်အလီၢ်” န့ၣ်အခီပညီမ့ၢ်ဝဲ “တၢ်ဟ့ၣ်လုၢ်ထီၣ်တၢ်အလီၢ်” လီၤ. လၢခံစီၤအၤဘြၤဟၣ် ဆဲးပာ်ဖျါထီၣ်အတၢ်နာ် လၢတၢ်လီၢ်အဂၤ ခီဖျိတၢ်မၤ ခဲအံၤခဲအံၤလီၤ. တကးဒံးဘၣ် အဝဲ ‘ကိးထီၣ် ယဟိဝၤယွၤအမံၤ’ လီၤ. (၁ မိၤၡ့ ၁၂:၈; ၁၃:၁၈; ၂၁:၃၃) လၢဧ့ၤဘြံၤကျိာ် “ကိးထီၣ်ယွၤအမံၤ” န့ၣ်ဘၣ်သ့ၣ်သ့ၣ် အခီပညီကအိၣ်စ့ၢ်ကီးလၢ “စံၣ်တဲၤတဲလီၤ (ဘိးဘၣ်သ့ၣ်ညါ) ယွၤအမံၤလီၤ. လၢတၢ်န့ၣ်အဃိ လၢတၢ်သူၣ်ဒူသးဒူအပူၤ စီၤအၤဘြၤဟၣ်စံၣ်တဲၤတဲလီၤဝဲ အကစၢ်ယွၤ, ယဟိဝၤအဂ့ၢ်န့ၣ် အဟံၣ်ဖိဃီဖိ ဃုာ်ဒီးပှၤကနၤဧၣ်ဖိတဖၣ် ကနၢ်ဟူဘၣ်ဝဲလီၤ. (၁ မိၤၡ့ ၁၄:၂၂-၂၄) ဒ်န့ၣ်အသိး မုၢ်မဆါတနံၤအံၤစ့ၢ်ကီး ကယဲၢ်ပှၤလၢ အဲၣ်ဒိးကဲထီၣ် ယဟိဝၤယွၤအတံၤသကိးတဖၣ်န့ၣ် ကဘၣ်ကိးထီၣ် ကစၢ်ယွၤအမံၤလၢတၢ်နာ်နီၢ်နီၢ်အပူၤလီၤ. ကဘၣ်ပၣ်ဃုာ်လၢ တၢ်စံၣ်တဲၤတဲလီၤတၢ်မၤအပူၤ ဒီးကဘၣ် “ပာ်ထီၣ်တၢ်လုၢ်စံးထီၣ်ပတြၢၤ ယွၤတဘိယူၢ်ဃီ, ဒ်ပစံးတၢ်အသိး, ပထးခိၣ်အတၤသၣ်လၢ တၢ်အၢၣ်လီၤအီလီၤအမံၤန့ၣ်” လီၤ.—ဧ့ၤဘြံၤ ၁၃:၁၅; ရိမ့ၤ ၁၀:၁၀.
တၢ်ဖးလံာ်စီဆှံ
(၁ မိၤၡ့ ၂၀:၁-၁၈) ဒီးစီၤအၤဘြၤဟၣ် ဟးထီၣ်ဖဲန့ၣ် ဆူကီၢ်အိၣ်လၢ ကလံၤထံးတခီ, ဒီးအိၣ်ဝဲ ဆိးဝဲလၢ ကၤဒ့ၣ်ဒီး ၡူၢ်အဘၢၣ်စၢၤ, ဒီးအိၣ်တမှံၤလၢ ကရၢ်အပူၤလီၤ. ၂ ဒီးစီၤအၤဘြၤဟၣ်စံးလၢ အမါနီၢ်စၤရါအဂ့ၢ်, အဝဲဒၣ်န့ၣ်မ့ၢ်ယဒီပုၢ်ဝဲၢ်မုၣ်လီၤ. ဒီးကရၢ်အစီၤပၤအဘံၤမ့လ့းမၢလီၤဝဲ, ဒီးဟံးန့ၢ်နီၢ်စၤရါလီၤ. ၃ ဒီးယွၤဟဲဆူစီၤအဘံၤမ့လ့းအအိၣ် လၢတၢ်မံမီၢ်အပူၤလၢမုၢ်နၤ, ဒီးစံးဘၣ်အီၤ, ကွၢ်ကွၢ်, နမ့ၢ်ပှၤသံလၢပိာ်မုၣ်လၢ နဟံးန့ၢ်အီၤအဃိလီၤ. အဂ့ၢ်ဒ်အံၤ, အဝဲဒၣ်န့ၣ်မ့ၢ်ပှၤတဂၤအမါလီၤ. ၄ ဒီးစီၤအဘံၤမ့လ့း တလဲၤဘူးဒံးဘၣ်ဒီးအီၤဘၣ်, ဒီးစံးဝဲဒၣ်, ကစၢ်ဧၢ, နကမၤသံစ့ၢ်ကီးပှၤတီတကလုာ်ဧါ. ၅ အဝဲတဂၤစံးဘၣ်ယၤ, အဝဲဒၣ်န့ၣ်မ့ၢ်ယဒီပုၢ်ဝဲၢ်မုၣ်, တမ့ၢ်ဘၣ်ဧါ. ဒီးအဝဲဒၣ်အကစၢ်ဒၣ်ဝဲစံး, အဝဲဒၣ်မ့ၢ်ယဒီပုၢ်ဝဲၢ်ခွါလီၤ. ယမၤတၢ်အံၤ လၢယသးဒီဖျၢၣ် ဒီးယစုအတၢ်ဒဲးဘးတအိၣ်ဘၣ်လီၤ. ၆ ဒီးယွၤစံးဘၣ်အီၤ လၢတၢ်မံမီၢ်အပူၤန့ၣ်, ယဲဒၣ်အံၤယသ့ၣ်ညါစ့ၢ်ကီး လၢနမၤတၢ်အံၤ လၢနသးဒီဖျၢၣ်လီၤ. အဂ့ၢ်ဒ်အံၤ, ဒ်သိးနသုတမၤကမၣ်ဘၣ်ယၤတဂ့ၤဒီး, ယတြီနၤစ့ၢ်ကီးယဲလီၤ. မၤသးဒ်န့ၣ်ဒီး ယတဟ့ၣ်ဘၣ်နထိးအီၤဘၣ်လီၤ. ၇ ဒီးခဲကနံၣ်အံၤ ဟ့ၣ်က့ၤပှၤတဂၤန့ၣ်အမါတက့ၢ်. အဂ့ၢ်ဒ်အံၤ, မ့ၢ်ဝဲလၢဝံတဂၤလီၤ. ဒီးကဘါထုကဖၣ်န့ၢ်လၢနဂီၢ်, ဒီးနကမူလီၤ. မ့မ့ၢ်နမ့ၢ်တဟ့ၣ်က့ၤဘၣ်ဒီး, သ့ၣ်ညါလၢသံဒီးနကသံ, ဒီးကယဲၢ်တၢ်ဘၣ်ဃးဒီး နၤခဲလၢာ်တက့ၢ်. ၈ ဒီးစီၤအဘံၤမ့လ့းန့ၣ် ဂဲၤဆၢထၢၣ်လၢမုၢ်ဂီၤ, ဒီးကိးန့ၢ်အခ့အပှၤခဲလၢာ်, ဒီးစံၣ်တဲၤတဲလီၤ တၢ်တဖၣ်န့ၣ် လၢအနၢ်ပူၤခဲလၢာ်, ဒီးပှၤတဖၣ်န့ၣ်ပျံၤတၢ်ဒိၣ်မးလီၤ. ၉ ဒီးစီၤအဘံၤမ့လ့း ကိးန့ၢ်စီၤအၤဘြၤဟၣ်, ဒီးစံးဘၣ်အီၤ, နမၤပှၤဒ်လဲၣ်. ဒ်သိးနကမၢတၢ်ဒဲးဘး အဒိၣ်တမံၤဘၣ်ယၤ, ဒီးယဘီယမုၢ်ဒီး, ယမၤကမၣ်ဘၣ်နၤ လၢမနုၤတမံၤလဲၣ်. နမၤယၤလၢတၢ်မၤလၢ ပှၤတဂ့ၤမၤဘၣ်လီၤ. ၁၀ ဒီးစီၤအဘံၤမ့လ့း စံးဘၣ်စီၤအၤဘြၤဟၣ်, ဒ်သိးနကမၤတၢ်အံၤဒီး, နထံၣ်ဘၣ်မနုၤတမံၤလဲၣ်. ၁၁ ဒီးစီၤအၤဘြၤဟၣ်စံးဝဲဒၣ်, အဂ့ၢ်ဒ်အံၤ, ယစံး, မ့ၢ်မးတၢ်ပျံၤယွၤ တအိၣ်ဘၣ်ဖဲအံၤဘၣ်, ဒီးပှၤကမၤသံယၤ လၢယမါအဃိလီၤ. ၁၂ ဘၣ်ဆၣ်ဒီး မ့ၢ်စ့ၢ်ကီးဝဲလၢ ယဒီပုၢ်ဝဲၢ်မုၣ်လီၤ, မ့ၢ်လၢယပၢ်အဖိမုၣ်လီၤ. ဘၣ်ဆၣ်ဒီးတမ့ၢ်ဘၣ်ယမိၢ်အဖိမုၣ်ဘၣ်. ဒီးကဲထီၣ်လၢယမါလီၤ. ၁၃ ဒီးတၢ်မၤအသးဖဲ ယွၤမၢယဟးသဒၣ် ယပၢ်အဟံၣ်ဒီး, ယစံးဘၣ်အီၤ, နဘျုးနဖှိၣ်လၢ နဘၣ်မၤယၤမ့ၢ်အအံၤ, ကယဲၢ်အလီၢ်လၢ ပကလဲၤတုၤတပူၤလၢ်လၢ်န့ၣ်, စံးလၢယမ့ၢ်နဒီပုၢ်ဝဲၢ်ခွါတက့ၢ်. ၁၄ ဒီးစီၤအဘံၤမ့လ့းဟံးန့ၢ်သိ, ဒီးဂီၤဖံး, ဒီးကုၢ်ပိာ်မုၣ်, ဒီးကုၢ်ပိာ်ခွါတဖၣ်, ဒီးဟ့ၣ်စီၤအၤဘြၤဟၣ်, ဒီးဟ့ၣ်က့ၤအမါလၢအီၤလီၤ. ၁၅ ဒီးစီၤအဘံၤမ့လ့း စံးဝဲဒၣ်, ကွၢ်ကွၢ်, ယကီၢ်အိၣ်လၢနမဲာ်ညါလီၤ. ဖဲအဘၣ်နသးအိၣ်တက့ၢ်. ၁၆ ဒီးစံးဘၣ်နီၢ်စၤရါ, ကွၢ်ကွၢ်, ယဟ့ၣ်လံစ့တကထိလၢ နဒီပုၢ်ဝဲၢ်ခွါလံ. ကွၢ်ကွၢ်, အဝဲဒၣ်မ့ၢ်တၢ်မၤဘၢမဲာ်လၢနဂီၢ်, လၢကယဲၢ်ပှၤ လၢအအိၣ်ဒီးနၤအဂီၢ်, ဒီးလၢပှၤခဲလၢာ်, ဒီးအဝဲဒၣ်ဘၣ်တၢ်သိၣ်ဃီၣ်လီၤ. ၁၇ ဒီးစီၤအၤဘြၤဟၣ် ဘါထုကဖၣ်ယွၤ, ဒီးယွၤမၤဘျါက့ၤစီၤအဘံၤမ့လ့း, ဒီးအမါ, ဒီးအကုၢ်ပိာ်မုၣ်တဖၣ်, ဒီးအဝဲသ့ၣ် ဆံးစၢ်န့ၢ်အဖိလီၤ. ၁၈ အဂ့ၢ်ဒ်အံၤ, ယွၤမၤတံာ်ဃာ်စီၤအဘံၤမ့လ့း အပှၤဟံၣ်ဖိအဒၢလီၢ်ခဲလၢာ်, လၢစီၤအၤဘြၤဟၣ်အမါ, နီၢ်စၤရါအဃိလီၤ.