ဘၣ်တဟါ ဖဲအဝဲမၤပှဲၤထံလၢ အသပၢၤပူၤဝံၤအခါ ပှၤသးပှၢ်တဂၤဟဲဃ့ၢ်ဆူအအိၣ်ဒီး တဲအီၤလၢ “ဟ့ၣ်အီစာ်ယၤလၢ နထံတစဲးအိၣ်လၢနထံစဲၤပူၤန့ၣ်တက့ၢ်.” အဝဲဃ့ဝဲလၢ တၢ်ယူးယီၣ်ပာ်ကဲ ဒီးတၢ်သညူးသပှၢ်အပူၤလီၤ. နီၢ်ရံးဘကၤ သ့ၣ်ညါဝဲလၢပှၤသးပှၢ်အံၤ ဟဲလၢတၢ်လီၢ်ဖးယံၤလီၤ. အဃိ အဝဲပာ်လီၤ သပၢၤထံအိၣ်လၢအဖံဘၣ်ခိၣ်​ လၢအချ့ဒီး ဒုးအီဝဲတုၤအဘျဲ (လၢအီ) လီၤ. တမ့ၢ်ဟ့ၣ်ဒုးအီဝဲထဲတကွံးဖိဘၣ်. တကးဒံးဘၣ်​ အဝဲထံၣ်ဝဲလၢတၢ်ကပၤန့ၣ်​ ကီၤလၤအူးအဒုတဆံစ့ၢ်ကီး တအီဘၣ်ထံဒံးဘၣ်. ပှၤဃ့အီထံတဂၤအံၤ အမဲာ်ချံအတၢ်ကွၢ်လၢ အလီၤသးကညီၤအံၤအဃိ နီၢ်ရံးဘကၤစ့ၢ်ကီး အိၣ်တကဲလၢၤဘၣ်ဒီး စံးဝဲလၢ “ယကဒၢၣ်ထံလၢနကီၤလၤအူးအဂီၢ် တုၤအအီဘျဲးအီစ့ၢ်ကီးလီၤ.”—၁ မိၤၡ့ ၂၄:၁၇-၁၉.

ပာ်သူၣ်ပာ်သးလၢ နီၢ်ရံးဘကၤ တဒုးအီဝဲ ကီၤလၤအူးတဖၣ်​ ထံထဲတစဲးဘၣ်​ ဒုးအီဝဲတုၤအဘျဲအီလီၤ. ကီၤလၤအူးတဖၣ်​ မ့ၢ်သူထံဒိၣ်ဒိၣ်ကလဲာ်န့ၣ်​ တဒုအီထံကလၢာ်ဝဲ ၂၅ ကါလၣ်​ (၉၅ လံးထၢၣ်) ကီၤလၤအူး အဒုတဆံလၢာ် မ့ၢ်သူထံဒု နီၢ်ရံးဘကၤ ကဘၣ်ဒၢၣ်ထံဖးယံာ်ညါလီၤ. ဘၣ်ဆၣ်​ ဖျါလၢကီၤလၤအူးတဖၣ်​ တသူထံကိးဒုဒဲးဘၣ်. ဖဲနီၢ်ရံးဘကၤ တဲဝဲလၢကဒၢၣ်န့ၢ်ဝဲထံလၢ ကီၤလၤအူးတဖၣ်အဂီၢ်အခါ မ့ၢ်အဝဲသ့ၣ်ညါဝဲတၢ်ဂ့ၢ်န့ၣ်ဧါ. တသ့ၣ်ညါဝဲဘၣ်. အဝဲအဲၣ်ဒိးပာ်ဖျါ တၢ်သးအိၣ်ပှၤတမှံၤအဃိ တသ့ဖဲအသ့ အဲၣ်ဒိးမၤန့ၢ်တၢ်လၢ ပှၤတမှံၤသးပှၢ်အံၤအဂီၢ်လီၤ. ပှၤသးပှၢ်အံၤတူၢ်လိာ် အဝဲအတၢ်မၤစၢၤလီၤ. တၢ်န့ၣ်အလီၢ်ခံ နီၢ်ရံးဘကၤ လဲၤဝံၤလဲၤက့ၤဒီးဒၢၣ်ထံလၢ ကီၤလၤအူးတဖၣ်အဂီၢ်အခါ ပှၤသးပှၢ်အံၤ ကွၢ်အီၤလီၤတံၢ်လီၤဆဲးလီၤ.—၁ မိၤၡ့ ၂၄:၂၀, ၂၁.

မုၢ်ဟါလီၤလံ. နီၢ်ရံးဘကၤ အိၣ်လၢထံပူၤယံာ်ထဲလဲၣ်န့ၣ်​ တၢ်ကွဲးနီၣ်တပာ်ဖျါဝဲဘၣ်. ပတဲဒ်န့ၣ်အဃိ အခီပညီတမ့ၢ်လၢ အဝဲမၤတၢ်ဝံၤအခါ အဟံၣ်ဖိဃီဖိတဖၣ်​ မံလၢာ်လံ ဒီးအဝဲအိၣ်လၢထံပူၤ ယံာ်တလၢအဃိ ပှၤတဂၤဂၤဘၣ်လဲၤစီၤကွၢ်အီၤန့ၣ်ဘၣ်.