ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါမၢ်ၡး ၂–၈
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ မိၤၡ့ ၂၂–၂၃
“ယွၤမၤကွၢ်စီၤအၤဘြၤဟၣ်”
(၁ မိၤၡ့ ၂၂:၁, ၂) ဒီးတၢ်မၤအသးလၢတၢ်တဖၣ်န့ၣ်အလီၢ်ခံဒီး, ယွၤမၤကွၢ်စီၤအၤဘြၤဟၣ်, ဒီးစံးဘၣ်အီၤ, စီၤအၤဘြၤဟၣ်ဧၢ, ဒီးစံးဝဲဒၣ်, ကွၢ်ကွၢ်, ယၤလီၤ. ၂ ဒီးစံးဝဲဒၣ်, ဟံးန့ၢ်နဖိခွါ, နဖိခွါတဂၤဃီ, စီၤအံၤစဲးလၢ နအဲၣ်အီၤ, ဒီးလဲၤဆူကီၢ်မိၤရံယၤ, ဒီးလုၢ်ထီၣ်အီၤဖဲန့ၣ် လၢတၢ်လုၢ်မ့ၣ်အူလၢ ကစၢၢ်တဖျၢၣ်အလိၤ လၢကစၢၢ်အကျါ, လၢယကစံးဘၣ်နၤန့ၣ်တက့ၢ်.
ဘၣ်မနုၤအဃိ ကစၢ်ယွၤ ဃ့ဝဲလၢ စီၤအၤဘြၤဟၣ်လၢ ကလုၢ်ထီၣ်အဖိခွါလဲၣ်
ဆိကမိၣ်ကွၢ် ယဟိဝၤယွၤ တဲတၢ်ဒီးစီၤအၤဘြၤဟၣ်တက့ၢ်– “[ဝံသးစူၤ, NWT] ဟံးန့ၢ်နဖိခွါ, နဖိခွါတဂၤဃီ, စီၤအံၤစဲးလၢ နအဲၣ်အီၤ, ဒီးလဲၤဆူကီၢ်မိၤရံယၤ, ဒီးလုၢ်ထီၣ်အီၤဖဲန့ၣ် လၢတၢ်လုၢ်မ့ၣ်အူလၢ ကစၢၢ်တဖျၢၣ်အလိၤ လၢကစၢၢ်အကျါ, လၢယကစံးဘၣ်နၤန့ၣ်တက့ၢ်.” (၁ မိၤၡ့ ၂၂:၂) ပာ်သူၣ်ပာ်သးလၢ ယဟိဝၤယွၤ ပာ်ဖျါထီၣ်ဝဲလၢ စီၤအံၤစဲးန့ၣ်မ့ၢ် နဖိခွါလၢ “နအဲၣ်” တက့ၢ်. ယဟိဝၤယွၤ သ့ၣ်ညါဝဲလၢ စီၤအၤဘြၤဟၣ် အဲၣ်စီၤအံၤစဲးဒိၣ်မးလီၤ. ကစၢ်ယွၤအနီၢ်ကစၢ်ဒၣ်ဝဲစ့ၢ်ကီး အဲၣ်အဖိခွါ ယ့ၣ်ၡူးဒိၣ်မးလီၤ. ယဟိဝၤယွၤ အဲၣ်ဝဲယ့ၣ်ၡူးဒိၣ်မးအဃိ လၢမူခိၣ်န့ၣ် အဝဲတဲလီၤဝဲခံဘျီလၢ “ယဖိခွါလၢယအဲၣ်” လီၤ.—မၢ်ကူး ၁:၁၁; ၉:၇.
ပာ်သူၣ်ပာ်သးလၢ ဖဲယဟိဝၤယွၤ တဲတၢ်ဒီးစီၤအၤဘြၤဟၣ်အခါ သူဝဲတၢ်ကတိၤလၢ “ဝံသးစူၤ” န့ၣ်တက့ၢ်. ပှၤကူၣ်ဘၣ်ကူၣ်သ့တဂၤ တဲဝဲလၢ ကစၢ်ယွၤသူဝဲ တၢ်ကတိၤအံၤန့ၣ် ပာ်ဖျါထီၣ်ဝဲလၢ “ကစၢ်ယွၤ ပာ်လုၢ်ပာ်ပှ့ၤဝဲ တၢ်လၢအဃ့ဝဲအံၤ အလုၢ်အပှ့ၤန့ၣ်လီၤ.” တၢ်လၢကစၢ်ယွၤဃ့ဝဲအံၤ ကမၤသးအုး စီၤအၤဘြၤဟၣ်ဒိၣ်မးန့ၣ် ပထံၣ်တမှံကွၢ်သ့လီၤ. ဒ်န့ၣ်အသိး ဖဲယဟိဝၤယွၤ ထံၣ်ဘၣ်ဝဲ အဖိခွါလၢအအဲၣ်ဝဲတဂၤ တူၢ်ဘၣ်တၢ်နးတၢ်ဖှီၣ် နးနးကလဲာ်ဒီးသံအခါ အဝဲအသးကဘၣ်ဒိထဲလဲၣ်န့ၣ် ပထံၣ်တမှံကွၢ်သ့လီၤ. ယဟိဝၤယွၤ တူၢ်ဘၣ်တၢ်ဒ်အံၤန့ၣ် ကမ့ၢ်တၢ်လၢအမၤဘၣ်ဒိအီၤ အဒိၣ်ကတၢၢ်လၢ အပူၤကွံာ်တတူၢ်ဘၣ်တ့ၢ်ဝဲ နီတဘျီဘၣ် ဒီးလၢခံစ့ၢ်ကီးတတူၢ်ဘၣ်ဝဲလၢၤဘၣ်န့ၣ်လီၤ.
ဘၣ်သ့ၣ်သ့ၣ် ပကဖုးဘၣ်ပသးလၢ တၢ်လၢယဟိဝၤယွၤဃ့ဝဲ စီၤအၤဘြၤဟၣ်အဃိ သနာ်က့ ပကြၢးသ့ၣ်နီၣ်ထီၣ်က့ၤလၢ ယဟိဝၤယွၤ တပျဲဝဲ စီၤအၤဘြၤဟၣ် ကဟ့ၣ်လုၢ်ထီၣ်အဖိခွါန့ၣ်ဘၣ်. ဒ်ပၢ်တဂၤအသိး စီၤအၤဘြၤဟၣ် ကတူၢ်ဘၣ်တၢ်နးနးကလဲာ်န့ၣ် ကစၢ်ယွၤတပျဲဝဲဘၣ်. အဝဲဒီသဒၢ စီၤအံၤစဲးလၢ တၢ်သံလီၤ. ဘၣ်ဆၣ် မ့မ့ၢ်ယဟိဝၤယွၤန့ၣ် “တသးလီဘၣ် အဖိခွါဒၣ်ဝဲဘၣ်, ဒီးဟ့ၣ်လီၤကွံာ်အီၤလၢ ပဝဲဒၣ်ခဲလၢာ် အဂီၢ်” လီၤ. (ရိမ့ၤ ၈:၃၂) ဘၣ်မနုၤအဃိ ယဟိဝၤယွၤ အနီၢ်ကစၢ်ဒၣ်ဝဲ ပျဲဝဲလၢတၢ်သူၣ်အုးသးအုး နးနးကလဲာ်အံၤ ကဘၣ်အီၤလဲၣ်. မ့ၢ်ဒ်သိး “ပကမူ” အဂီၢ်လီၤ. (၁ ယိၤဟၣ် ၄:၉) တၢ်အံၤဒုးသ့ၣ်နီၣ်ပှၤ ယွၤအတၢ်အဲၣ်ဒိၣ်လၢ ပဖီခိၣ်ထဲလဲၣ်န့ၣ်လီၤ. ပကြၢးအဲၣ်ဆၢက့ၤ ကစၢ်ယွၤတမ့ၢ်ဘၣ်ဧါ.
(၁ မိၤၡ့ ၂၂:၉-၁၂) ဒီးလဲၤတုၤလၢအလီၢ်လၢယွၤစံးတ့ၢ်အီၤ, ဒီးစီၤအၤဘြၤဟၣ် မၤထီၣ်တၢ်လုၢ်လီၢ်ဖဲန့ၣ်, ဒီးကတဲာ်ကတီၤသ့ၣ်မုၣ်, ဒီးစၢဃာ်အဖိခွါစီၤအံၤစဲး, ဒီးပာ်အီၤလၢတၢ်လုၢ်လီၢ်လၢ သ့ၣ်မုၣ်အဖီခိၣ်လီၤ. ၁၀ ဒီးစီၤအၤဘြၤဟၣ်ယူာ်ထီၣ်အစု, ဒီးဟံးန့ၢ်ဒီတဘ့ၣ်န့ၣ်ဒ်သိးအကမၤသံအဖိခွါလီၤ. ၁၁ ဒီးယွၤအကလူးကိးထီၣ်အီၤလၢမူခိၣ်, ဒီးစံးဝဲဒၣ်, စီၤအၤဘြၤဟၣ်ဧၢ, စီၤအၤဘြၤဟၣ်ဧၢ, ဒီးစံးဝဲဒၣ်, ကွၢ်ကွၢ်, ယၤလီၤ. ၁၂ ဒီးစံးဝဲဒၣ်, ယူာ်ထီၣ်နစုလၢ ဖိသၣ်အလိၤတဂ့ၤ, ဒီးမၤအီၤလၢတၢ်နီတမံၤတဂ့ၤ. အဂ့ၢ်ဒ်အံၤ, ခဲကနံၣ်အံၤယသ့ၣ်ညါလၢနပျံၤယွၤလီၤ. ယမၤန့ၢ်နဖိခွါ, နဖိခွါတဂၤဃီန့ၣ် နတညးဘၣ်လီၤ.
(၁ မိၤၡ့ ၂၂:၁၅-၁၈) ဒီးယွၤအကလူး ကိးလီၤဝဲလၢမူခိၣ် ဆူစီၤအၤဘြၤဟၣ်ခံဘျီတဘျီ, ၁၆ ဒီးစံးဝဲဒၣ်, ယဆိၣ်လီၤယသးလၢယကစၢ်ဒၣ်ယဲ, ယွၤစံးဝဲဒၣ်, မ့ၢ်နမၤတၢ်အံၤတမံၤ ဒီးတဟံးဃာ်ဘၣ်နဖိခွါ, နဖိခွါတဂၤဃီဘၣ်အဃိဒီး, ၁၇ ဆိၣ်ဂ့ၤဒီးယကဆိၣ်ဂ့ၤနၤ, ဒီးမၤအါထီၣ်ဒီး ယကမၤအါထီၣ် နချံနသၣ် ဒ်ဆၣ်ဧိၤဖီဧိၤ လၢမူခိၣ်အသိး, ဒီးဒ်မဲးဧိၤဟီၣ်ဧိၤလၢ ပီၣ်လဲၣ်နံၤအသိးန့ၣ်လီၤ. ဒီးနချံနသၣ်ကန့ၢ်ဘၣ် အဒုၣ်အဒါအပဲတရီလီၤ. ၁၈ မ့ၢ်နဒိကနၣ်ယကလုၢ်အဃိဒီး, ကယဲၢ်ပှၤကညီလၢဟီၣ်ခိၣ်ချၢ ကဘၣ်တၢ်ဆိၣ်ဂ့ၤလၢနချံနသၣ်အပူၤလီၤ.
တၢး၁၂ ၁၀/၁၅ ၂၃ ¶၆
ဒိကနၣ်ကစၢ်ယွၤအကလုၢ် ဒီးဟံးန့ၢ်တၢ်အဘျုးလၢ ယွၤအတၢ်ဆိၣ်တက့ၢ်
၆ ဒ်သိးပှၤတၢ်ဒဲးဘးဖိတဖၣ် ကဒိးန့ၢ်ဘၣ်အဘျုးအဂီၢ် ယဟိဝၤယွၤစ့ၢ်ကီး မၤဝဲတၢ်ဆိၣ် ခီဖျိသူဝဲ တၢ်ကတိၤဒ်သိးဒီး “ယမူယဲ” လီၤ. (ဃ့း. ၁၇:၁၆) လံာ်စီဆှံ ပာ်ဖျါဝဲလၢ ယဟိဝၤယွၤ မၤတၢ်ဆိၣ်အိၣ်ဝဲ အဘျီ ၄၀ ဘျဲၣ်ညါလီၤ. ပှၤသ့ၣ်ညါအီၤအါကတၢၢ်န့ၣ် မ့ၢ်တၢ်ဆိၣ်လၢ ကစၢ်ယွၤမၤဝဲ ဒီးစီၤအၤဘြၤဟၣ်လီၤ. လၢစီၤအၤဘြၤဟၣ် အတၢ်အိၣ်မူအပူၤန့ၣ် ယဟိဝၤယွၤ မၤတၢ်အၢၣ်လီၤအီလီၤ ဒီးအီၤအါမးလီၤ. ခီဖျိလၢ တၢ်အၢၣ်လီၤအီလီၤတဖၣ်အံၤအဃိ စီၤအၤဘြၤဟၣ်သ့ၣ်ညါဘၣ်ဝဲလၢ တၢ်စံးပာ်ချံသၣ်န့ၣ် ကဟဲလီၤစၢၤလီၤသွဲၣ်လၢ အဖိခွါစီၤအံၤစဲးလီၤ. (၁ မိၤ. ၁၂:၁-၃, ၇; ၁၃:၁၄-၁၇; ၁၅:၅, ၁၈; ၂၁:၁၂) လၢခံ ယဟိဝၤယွၤ မၤကွၢ်စီၤအၤဘြၤဟၣ် ဒီးတဲအီၤလၢ ကဘၣ်ဟ့ၣ်လုၢ်ထီၣ် အဖိခွါလၢအအဲၣ်ဝဲဒိၣ်မးလီၤ. စီၤအၤဘြၤဟၣ် တမၤယံာ်မၤနီၣ်အသးဘၣ် အဝဲဒိကနၣ်ဝဲ ဒီးဘူးထီၣ်လၢ ကဟ့ၣ်လုၢ်ထီၣ် အဖိခွါအခါ မူခိၣ်ကလူးတြီအီၤလီၤ. တၢ်န့ၣ်အလီၢ်ခံ ယဟိဝၤယွၤ မၤတၢ်ဆိၣ်ဒီး တဲဝဲလၢ “ယဆိၣ်လီၤယသးလၢယကစၢ်ဒၣ်ယဲ, ယွၤစံးဝဲဒၣ်, မ့ၢ်နမၤတၢ်အံၤတမံၤ ဒီးတဟံးဃာ်ဘၣ်နဖိခွါ, နဖိခွါတဂၤဃီဘၣ်အဃိဒီး, ဆိၣ်ဂ့ၤဒီးယကဆိၣ်ဂ့ၤနၤ, ဒီးမၤအါထီၣ်ဒီးယကမၤအါထီၣ် နချံနသၣ်ဒ်ဆၣ်ဧိၤဖီဧိၤ လၢမူခိၣ်အသိး, ဒီးဒ်မဲးဧိၤဟီၣ်ဧိၤလၢ ပီၣ်လဲၣ်နံၤအသိးန့ၣ်လီၤ. ဒီးနချံနသၣ်ကန့ၢ်ဘၣ် အဒုၣ်အဒါအပဲတရီလီၤ. မ့ၢ်နဒိကနၣ်ယကလုၢ်အဃိဒီး, ကယဲၢ်ပှၤကညီလၢဟီၣ်ခိၣ်ချၢ ကဘၣ်တၢ်ဆိၣ်ဂ့ၤလၢနချံနသၣ်အပူၤလီၤ.”—၁ မိၤ. ၂၂:၁-၃, ၉-၁၂, ၁၅-၁၈.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၁ မိၤၡ့ ၂၂:၅) ဒီးစီၤအၤဘြၤဟၣ်စံးဘၣ်ဖိၣ်သၣ်ခွါတဖၣ်, အိၣ်သုဝဲဒီးကသ့ၣ်ယီၤဖဲအံၤတက့ၢ်. ဒီးယဲဒၣ်ဒီးဖိသၣ်အံၤ ပကလဲၤဆူဘးန့ၣ်, ဒီးဘူၣ်တၢ်ဘါတၢ်, ဒီးဟဲက့ၤကဒါက့ၤဆူသုအိၣ်လီၤ.
ယဟိဝၤယွၤ ကိးအီၤလၢ “ယတံၤသကိး”
၁၃ တချုးစီၤအၤဘြၤဟၣ် ဟးထီၣ်ဒံးဘၣ်အခါ တဲတ့ၢ်ဝဲအခ့အပှၤတဖၣ်လၢ “အိၣ်သုဝဲဒီး ကသ့ၣ်ယီၤဖဲအံၤတက့ၢ်. ဒီးယဲဒၣ်ဒီး ဖိသၣ်အံၤ ပကလဲၤဆူဘးန့ၣ်, ဒီးဘူၣ်တၢ်ဘါတၢ်, ဒီးဟဲက့ၤကဒါက့ၤဆူသုအိၣ်လီၤ.” (၁ မိၤၡ့ ၂၂:၅) စီၤအၤဘြၤဟၣ် အဲၣ်ဒိးစံးဝဲ တၢ်မနုၤလဲၣ်. မ့ၢ်အဝဲသ့ၣ်ညါဝဲလၢ အကဘၣ်လုၢ်ထီၣ် စီၤအံၤစဲးသနာ်က့ လံၣ်တၢ် ဒီးတဲဝဲလၢကဟဲက့ၤကဒါက့ၤဒီး အဖိခွါန့ၣ်ဧါ. တမ့ၢ်ဒ်န့ၣ်ဘၣ်. အဝဲသ့ၣ်ညါဝဲလၢ ယဟိဝၤယွၤ မၤသမူထီၣ်က့ၤအဖိခွါသ့ဝဲလီၤ. (ဖး ဧ့ၤဘြံၤ ၁၁:၁၉ တက့ၢ်.) စီၤအၤဘြၤဟၣ်သ့ၣ်ညါဝဲလၢ အဝဲဒီးနီၢ်စၤရါ အသးပှၢ်လံသနာ်က့ ကစၢ်ယွၤမၤစၢၤအီၤလၢ အဖိကအိၣ်အဂီၢ်လီၤ. (ဧ့ၤဘြံၤ ၁၁:၁၁, ၁၂, ၁၈) လၢတၢ်န့ၣ်အဃိ အဝဲနာ်ဝဲလၢ တၢ်လၢယဟိဝၤယွၤ မၤဝဲတသ့ဘၣ်န့ၣ် တအိၣ်နီတမံၤဘၣ်. မုၢ်နံၤအဝဲန့ၣ် တၢ်ကမၤအသးဒ်လဲၣ်န့ၣ် စီၤအၤဘြၤဟၣ် တသ့ၣ်ညါဆိဝဲဘၣ်. ဘၣ်ဆၣ်အဝဲနာ်ဝဲလၢ ဒ်သိးကစၢ်ယွၤ အတၢ်စံးပာ်တဖၣ် ကလၢပှဲၤအဂီၢ် ကစၢ်မ့ၢ်ဘၣ်မၤသမူထီၣ်က့ၤ စီၤအံၤစဲးန့ၣ် မၤသမူထီၣ်က့ၤအီၤသ့ဝဲလီၤ. လၢတၢ်န့ၣ်အဃိ စီၤအၤဘြၤဟၣ်န့ၣ် ဘၣ်တၢ်ကိးအီၤလၢ “ကယဲၢ်ပှၤနာ်တၢ်” ခဲလၢာ်အပၢ်လီၤ.
(၁ မိၤၡ့ ၂၂:၁၂) ဒီးစံးဝဲဒၣ်, ယူာ်ထီၣ်နစုလၢဖိသၣ်အလိၤတဂ့ၤ, ဒီးမၤအီၤလၢတၢ်နီတမံၤတဂ့ၤ. အဂ့ၢ်ဒ်အံၤ, ခဲကနံၣ်အံၤယသ့ၣ်ညါလၢ နပျံၤယွၤလီၤ. ယမၤန့ၢ်နဖိခွါ, နဖိခွါတဂၤဃီန့ၣ် နတညးဘၣ်လီၤ.
it-1 ၈၅၃ ¶၅-၆
တၢ်သ့ၣ်ညါနၢ်ပၢၢ်ဆိပာ်တၢ်, တၢ်စံၣ်ညီၣ်ပာ်ပနီၣ်ဆိပာ်တၢ်
တၢ်ဃုထၢသူ တၢ်သ့ၣ်ညါနၢ်ပၢၢ်ဆိပာ်တၢ်. ကစၢ်ယွၤ အတၢ်ဃုထၢသူ တၢ်သ့ၣ်ညါနၢ်ပၢၢ်ဆိပာ်တၢ်န့ၣ် လီၤပလိာ်ဒီး အတၢ်ဘျၢလၢအတီအလိၤ ဒီးအဝဲအဂ့ၢ်လၢ လံာ်စီဆှံ ပာ်ဖျါဝဲတဖၣ်လီၤ. တမ့ၢ်ဒ်သိးဒီး တၢ်ပာ်ပနီၣ်ဆိပာ်တၢ်ဘၣ်. လံာ်စီဆှံအဆၢအါဆၢ အပူၤပာ်ဖျါဝဲလၢ ကစၢ်ယွၤန့ၣ် သမံသမိးဝဲ တၢ်အိၣ်အသး ဒီးမၤဝဲတၢ်ဆၢတဲာ်လၢ အဒိးသန့ၤထီၣ်အသးလၢ အတၢ်သမံသမိး အဖီခိၣ်န့ၣ်လီၤ.
၁ မိၤၡ့ ၁၁:၅-၈ ပာ်ဖျါဝဲလၢ ကစၢ်ယွၤ ဟဲလီၤကွၢ်ဝဲဟီၣ်ခိၣ်အဂ့ၢ်န့ၣ်လီၤ. ဖဲန့ၣ်အခါ အဝဲကွၢ်ထံသမံသမိးဝဲ ဝ့ၢ်ဘၤဘ့းလး ဝံၤအလီၢ်ခံ မၤဟးဂီၤကွံာ်ဝဲ တၢ်ရဲၣ်တၢ်ကျဲၤလၢ အတကြၢးတဘၣ်အံၤန့ၣ်လီၤ. ဖဲတၢ်အၢတၢ်သီအါထီၣ်လၢ ဝ့ၢ်စဒိၣ်ဒီးဂမိရၤအခါ ယဟိဝၤယွၤတဲဝဲ (ခီဖျိလၢမူခိၣ်ကလူး) လၢ “ယကလဲၤလီၤ, ဒီးမ့ၢ်အမၤဝဲတုၤအလၢာ် ဖဲဒၣ်တၢ်ကိးလၢ အဟဲဆူယအိၣ်အသိးဧါန့ၣ် ယကကွၢ်, ဒီးမ့တမ့ၢ်ဘၣ်ဒီး, ယကသ့ၣ်ညါလီၤ.” အဝဲသမံသမိးဝဲ ဝံၤအလီၢ်ခံမး မၤဝဲတၢ်ဆၢတဲာ် ဒီးတဲဘၣ်ဝဲစီၤအၤဘြၤဟၣ်လၢ အတၢ်ဆၢတဲာ်အဂ့ၢ်န့ၣ်လီၤ. (၁ မိၤ. ၁၈:၂၀-၂၂; ၁၉:၁) စီၤအၤဘြၤဟၣ် ကတဲာ်ကတီၤဝဲလၢ ကလုၢ်ထီၣ်စီၤအံၤစဲးဝံၤအလီၢ်ခံမး ကစၢ်ယွၤတဲဝဲလၢ ‘ယသ့ၣ်ညါ စီၤအၤဘြၤဟၣ်’ လီၤ. ယဟိဝၤယွၤတဲဝဲလၢ “ခဲကနံၣ်အံၤ ယသ့ၣ်ညါလၢနပျံၤယွၤလီၤ. ယမၤန့ၢ်နဖိခွါ, နဖိခွါတဂၤဃီန့ၣ် နတညးဘၣ်လီၤ.”—၁ မိၤ. ၁၈:၁၉; ၂၂:၁၁, ၁၂; ထိၣ်သတြီၤ ဃ့. ၉:၇, ၈; ကလၤ. ၄:၉.
တၢ်ဖးလံာ်စီဆှံ
it-1 ၆၀၄ ¶၅
ယ့ၣ်ၡူးတတူၢ်သံဘၣ်အသး ဒံးဘၣ်သနာ်က့ ဘၣ်မနုၤအဃိ စီၤအၤဘြၤဟၣ်န့ၣ် ဘၣ်တၢ်ပာ်ဖျါထီၣ်အီၤလၢ ပှၤတီပှၤလိၤလဲၣ်.
စီၤအၤဘြၤဟၣ်န့ၣ် ခီဖျိလၢအတၢ်နာ် ဃုာ်ဒီးအတၢ်ဖံးတၢ်မၤတဖၣ်အဃိ “ဘၣ်တၢ်တူၢ်လိာ်အီၤဒ် ပှၤတီပှၤလိၤတဂၤအသိး” လီၤ. (ရိ. ၄:၂၀-၂၂, ခ့ခါစှီၤကျိာ်) တၢ်အံၤအခီပညီတမ့ၢ်လၢ စီၤအၤဘြၤဟၣ် ဒီးပှၤအတီအလိၤအဂၤလၢ အအိၣ်မူတ့ၢ်လၢ တချုးယ့ၣ်ၡူးအစိၤတဖၣ်န့ၣ် အတၢ်ဒဲးဘးတအိၣ်ဘၣ် ဒီးမ့ၢ်ပှၤအလၢအပှဲၤန့ၣ်ဘၣ်. မ့ၢ်လၢအဝဲသ့ၣ် နာ်ဝဲကစၢ်ယွၤ အတၢ်အၢၣ်လီၤအီလီၤလၢ ဘၣ်ဃးဒီး “ချံသၣ်” ဒီးမၤထွဲဝဲ ကစၢ်ယွၤအတၢ်မၤလိာ်တဖၣ်အဃိ တဘၣ်တၢ်ပာ်ပနီၣ်အီၤဒ် ပှၤတတီတလိၤအဂၤလၢ တဒိးန့ၢ်ဘၣ် ကစၢ်ယွၤအတၢ်ဘၣ်သးတဖၣ်န့ၣ်ဘၣ်. (၁ မိၤ. ၃:၁၅; စံး. ၁၁၉:၂, ၃) ဖဲကစၢ်ယွၤ ထိၣ်သတြီၤအဝဲသ့ၣ် ဒီးပှၤလၢတသ့ၣ်ညါယွၤတဖၣ်အခါ ယဟိဝၤယွၤ ပာ်အဝဲသ့ၣ်ဒ် ပှၤလၢအတၢ်ကမၣ်တအိၣ်အသိးလီၤ. (စံး. ၃၂:၁, ၂; အ့း. ၂:၁၂) အဝဲသ့ၣ်တလၢပှဲၤသနာ်က့ ခီဖျိလၢအတၢ်နာ်အဃိ ကစၢ်ယွၤ ဆဲးကျိးဒီးအဝဲသ့ၣ်တဖၣ် ဒီးဆိၣ်ဂ့ၤအီၤလီၤ. ဖဲကစၢ်ယွၤမၤဝဲဒ်အံၤအခါ အဝဲပၢၤဃာ်ဝဲ အတၢ်တီတၢ်လိၤလၢအလၢအပှဲၤလီၤ. (စံး. ၃၆:၁၀) ပှၤသ့ၣ်တဖၣ်အံၤစ့ၢ်ကီး တူၢ်လိာ်ဝဲလၢ အဝဲသ့ၣ်လိၣ်ဘၣ် တၢ်ပှ့ၤက့ၤ ဒီးအိၣ်ခိးဝဲလၢ ကစၢ်ယွၤကမၤဝဲတၢ်န့ၣ် အဆၢကတီၢ်လီၤ.—စံး. ၄၉:၇-၉; ဧ့ၤ. ၉:၂၆.
လါမၢ်ၡး ၉–၁၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ မိၤၡ့ ၂၄
“မါတဂၤလၢ စီၤအံၤစဲးအဂီၢ်”
(၁ မိၤၡ့ ၂၄:၂-၄) ဒီးစီၤအၤဘြၤဟၣ်စံးဘၣ် အကုၢ်သးပှၢ်လၢ အဟံၣ်ပူၤ, လၢအပၢကယဲၢ်အတၢ်အိၣ်ဒီးအီၤ ခဲလၢာ်တဂၤန့ၣ်, ပာ်လၢ်နစုလၢ ယကံၣ်ဒုၣ်အဖီလာ်တက့ၢ်. ၃ ဒီးယကဒုးဆိၣ်နၤလၢယွၤ, မူခိၣ်ကစၢ် ဒီးဟီၣ်ခိၣ်ကစၢ်အမဲာ်ညါ, လၢနတဟံးန့ၢ်ဘၣ် ယဖိခွါအမါလၢ ပှၤကနၤဧၣ်ဖိလၢ ယအိၣ်ယဆိးလၢအကျါတဖၣ် အဖိမုၣ်ဘၣ်လီၤ. ၄ မ့မ့ၢ်နဘၣ်လဲၤဆူယကီၢ်ဒၣ်ယဲ, ဒီးဆူယဘူးယတံၢ်အအိၣ်, ဒီးဟံးန့ၢ်ယဖိခွါစီၤအံၤစဲးအမါလီၤ.
wp၁၆.၃ ၁၄ ¶၃
“ယကလဲၤလီၤ”
စီၤအၤဘြၤဟၣ် မၢစီၤအလံၤဧ့စ့ၢ် အၢၣ်လီၤအီၤလၢ အဝဲတဃုထၢန့ၢ် အဖိခွါ စီၤအံၤစဲးအမါလၢ ပှၤကနၤဧၣ်မုၣ်အကျါဘၣ်. ဘၣ်မနုၤအဃိလဲၣ်. မ့ၢ်လၢ ပှၤကနၤဧၣ်ဖိတဖၣ် တယူးယီၣ်ပာ်ကဲ ဒီးတဘူၣ်ထီၣ်ဘါထီၣ် ယဟိဝၤယွၤအဃိလီၤ. စီၤအၤဘြၤဟၣ် သ့ၣ်ညါပာ်ဝဲလၢ တၢ်ဆၢကတီၢ်မ့ၢ်ဘၣ်န့ၣ် ယဟိဝၤယွၤ ကစံၣ်ညီၣ်အဝဲသ့ၣ်လၢ အမၤတၢ်အၢတၢ်သီအဃိလီၤ. စီၤအၤဘြၤဟၣ် တအဲၣ်ဒိးလၢ အဖိခွါစီၤအံၤစဲး ရ့လိာ်အသးဒီး ပှၤကနၤဧၣ်ဖိတဖၣ် ဒီးအသကဲာ်ပဝးလီၤရၢၢ်ဒ် အဝဲသ့ၣ်အသိးဘၣ်. အဝဲသ့ၣ်ညါစ့ၢ်ကီးဝဲလၢ ဒ်သိးကစၢ်ယွၤ အတၢ်အၢၣ်လီၤတဖၣ် ကဟဲလၢပှဲၤထီၣ်အဂီၢ် အဖိခွါစီၤအံၤစဲး အိၣ်ဒီးမူဒါလၢအရ့ဒိၣ်န့ၣ်လီၤ.—၁ မိၤၡ့ ၁၅:၁၆; ၁၇:၁၉; ၂၄:၂-၄.
(၁ မိၤၡ့ ၂၄:၁၁-၁၅) ဒီးမုၢ်ဟါအကတီၢ်, အဆၢအကတီၢ်လၢ ပိာ်မုၣ်လဲၤဒၢၣ်ထံန့ၣ်, အဝဲဒၣ်ဒုးချံးလီၤ အကီၤလၤအူးအခီၣ်လၢ ထံပူၤအဃၢၤလၢ ဝ့ၢ်တဖျၢၣ်န့ၣ်လၢခိတခီလီၤ. ၁၂ ဒီးစံးဝဲဒၣ်, ယွၤ, ယကစၢ်စီၤအၤဘြၤဟၣ်အကစၢ်ဧၢ, မၢတၢ်ဂ့ၤဘၣ်ယၤလၢ မုၢ်မဆါတနံၤအံၤတက့ၢ်, ဒီးဒုးဘၣ်ယကစၢ် စီၤအၤဘြၤဟၣ် လၢနဘျုးနဖှိၣ်တက့ၢ်. ၁၃ ကွၢ်ကွၢ်, ယဆၢထၢၣ်လၢ ထံထီၣ်ပၢၢ်အဃၢၤအံၤ, ဒီးပှၤဝ့ၢ်ဖိအဖိမုၣ်တဖၣ် ဟးထီၣ်ဒၢၣ်ထံလီၤ. ၁၄ ဒီးမ်တၢ်မၤအသးလၢ ဖိသၣ်ပိာ်မုၣ်လၢ ယစံးဘၣ်အီၤ, ပာ်လီၤစာ်နထံစဲၤ ဒ်သိးယကအီထံတက့ၢ်န့ၣ်, ဒီးကစံး, အီတက့ၢ်, ဒီးယကဒုးအီစ့ၢ်ကီး နကီၤလၤအူးန့ၣ်, မ်အဝဲဒၣ်ကမ့ၢ် ပှၤလၢနပာ်အီၤလၢ နခ့နပှၤစီၤအံၤစဲး အဂီၢ်န့ၣ်တက့ၢ်. အန့ၣ်ဒီး ယကသ့ၣ်ညါလၢ ယကစၢ်ဘၣ်ဘျုးဘၣ်ဖှိၣ်လၢနၤလီၤ. ၁၅ ဒီးတၢ်မၤအသး လၢအကတိၤတၢ် တချုးဝံၤဒံးဘၣ်ဒီး, ကွၢ်ကွၢ်, နီၢ်ရံးဘကၤ လၢအအိၣ်ဖျဲၣ်ဝဲလၢ စီၤအၤဘြၤဟၣ် အဒီပုၢ်ဝဲၢ်စီၤနၤဃိၢ်အမါ နီၢ်မံးလကၤအဖိခွါ စီၤဘသူၤအ့လးအဂီၢ်တဂၤ, ဟးထီၣ်စိာ်ဒီးအထံစဲၤအိၣ် လၢအဖံဘၣ်ခိၣ်လီၤ.
wp၁၆.၃ ၁၄ ¶၄
“ယကလဲၤလီၤ”
စီၤအလံၤဧ့စ့ၢ် တဲဘၣ် ဟံၣ်ကစၢ်လၢ ဖဲအဝဲဟဲတုၤလၢ ထံပူၤ (ထံကမျၢ) လၢအဘူးဒီးဝ့ၢ်ဟၤရၣ်အခါ အဝဲဃ့ဘါထုကဖၣ်တၢ်ဆူ ယဟိဝၤယွၤအအိၣ်အဂ့ၢ်န့ၣ်လီၤ. အဝဲဃ့ယဟိဝၤယွၤလၢ ကဃုထၢန့ၢ်အီၤ ပိာ်မုၣ်လၢ စီၤအံၤစဲးအဂီၢ်လီၤ. လၢကျဲဒ်လဲၣ်. အဝဲဃ့ဝဲလၢ ပိာ်မုၣ်လၢအဝဲအဲၣ်ဒိးလၢ စီၤအံၤစဲးကဖျီအသးဒီးအီၤတဂၤန့ၣ် မ်ကဟဲဆူထံပူၤတက့ၢ်. ဖဲယဃ့အီအီၤထံအခါ မ်ကဒုးအီယၤ တကးဒံးဘၣ် ကဒုးအီစ့ၢ်ကီး ယကီၤလၤအူးတဖၣ်တက့ၢ်. (၁ မိၤၡ့ ၂၄:၁၂-၁၄) မတၤတဂၤဟဲဆူထံပူၤဒီး မၤဒ်အဝဲဃ့ဘါထုကဖၣ်တၢ်အသိးန့ၣ်လဲၣ်. မ့ၢ်ဒၣ် နီၢ်ရံးဘကၤလီၤ. ဆိကမိၣ်ကွၢ် ဖဲအဝဲနၢ်ဟူချုးဝဲ စီၤအလံၤဧ့စ့ၢ် တဲဘၣ်ဝဲတၢ်ဂ့ၢ်လၢ အဟံၣ်ဖိဃီဖိတဖၣ်အခါ အဝဲအသးကမၤသးဒ်လဲၣ်.
(၁ မိၤၡ့ ၂၄:၅၈) ဒီးကိးန့ၢ်နီၢ်ရံးဘကၤ, ဒီးစံးဘၣ်အီၤ, နကလဲၤဒီးပှၤတဂၤအံၤစ့ၢ်ကီးဧါ. ဒီးစံးဝဲဒၣ်, ယကလဲၤလီၤ.
(၁ မိၤၡ့ ၂၄:၆၇) ဒီးစီၤအံၤစဲးဆှၢအီၤဆူအမိၢ်, နီၢ်စၤရါအဒဲပူၤ, ဒီးဟံးန့ၢ်နီၢ်ရံးဘကၤ, ဒီးအဝဲဒၣ်ကဲလၢအမါ, ဒီးစီၤအံၤစဲးအဲၣ်အီၤဒီးဘၣ်တၢ်မၤမုာ်မၤခုၣ်အီၤလၢအမိၢ်သံအလီၢ်ခံန့ၣ်လီၤ.
wp၁၆.၃ ၁၄ ¶၆-၇
“ယကလဲၤလီၤ”
လၢအပူၤကွံာ်အနွံတဖၣ်အခါ စီၤအလံၤဧ့စ့ၢ်သံကွၢ် စီၤအၤဘြၤဟၣ်လၢ “ဘၣ်တဘၣ် ပိာ်မုၣ်တပိာ်ဘၣ်ယခံဘၣ်” အခါ စီၤအၤဘြၤဟၣ် စံးဆၢက့ၤအီၤလၢ “နကပူၤဖျဲးလၢ ယဆိၣ်တၢ်အံၤလီၤ.” (၁ မိၤၡ့ ၂၄:၃၉, ၄၁) ဒ်န့ၣ်အသိးလီၤ. လၢစီၤဘသူၤအ့လး အဟံၣ်စ့ၢ်ကီး ပာ်ဆိဝဲပိာ်မုၣ်ဖိ အတၢ်ဘၣ်သးလၢညါလီၤ. စီၤအလံၤဧ့စ့ၢ် စ့ၢ်ကီး အိၣ်ဒီးတၢ်သူၣ်ဆူၣ်သးဆူၣ်ဒီး အဲၣ်ဒိးသ့ၣ်ညါဝဲလၢ မ့ၢ်အဝဲ မၤလၢပှဲၤဝဲ အမူဒါတခါအံၤကန့ၢ်ဧါ, တန့ၢ်ဧါအဃိ လၢခံတဂီၤန့ၣ် သံကွၢ်ဝဲဟံၣ်ဖိဃီဖိလၢ မ့ၢ်အဝဲက့ၤကိးဝဲ နီၢ်ရံးဘကၤ ဆူကီၢ်ကနၤဧၣ် တဘျီဃီကသ့ဧါန့ၣ်လီၤ. ဘၣ်ဆၣ် ဟံၣ်ဖိဃီဖိတဖၣ် အဲၣ်ဒိးလၢ ပိာ်မုၣ်ဖိကအိၣ်ဒီး အဝဲသ့ၣ် ဆံဆဲၣ်သီဒံးလီၤ. လၢခံကတၢၢ် အဝဲသ့ၣ် ဆၢတဲာ်ဝဲလၢ “ကကိးန့ၢ်ဖိသၣ်ပိာ်မုၣ်န့ၣ်, ဒီးသံကွၢ်တၢ်လၢအထးခိၣ်လီၤ.”—၁ မိၤၡ့ ၂၄:၅၇.
တၢ်ဂ့ၢ်အံၤ မ့ၢ်တၢ်ဆီတလဲဖးဒိၣ်လၢ နီၢ်ရံးဘကၤ အတၢ်အိၣ်မူအပူၤလီၤ. အဝဲကတဲဝဲဒ်လဲၣ်. မ့ၢ်လၢကဘၣ်လဲၤဝဲဆူ တခီထံတခီကီၢ် တကးဒံးဘၣ် သးကညီၤဘၣ်ဝဲ အပၢ်ဒီးအဝဲၢ်အဃိ မ့ၢ်ကဃ့ကညးဝဲလၢ တလဲၤပိာ်ပှၤခံဘၣ်န့ၣ်ဧါ. မ့တမ့ၢ် အဝဲကပၣ်ဃုာ်ဘၣ်လၢ ယဟိဝၤယွၤ အတၢ်ရဲၣ်တၢ်ကျဲၤအပူၤအဃိ မ့ၢ်အဝဲကထံၣ်ဝဲဒ် တၢ်ခွဲးတၢ်ယာ်လီၤဆီတခါန့ၣ်ဧါ. လၢအဝဲအတၢ်စံးဆၢအပူၤ ဖျါလၢအဝဲဘၣ်ယိၣ်တၢ်တစဲး လၢတၢ်ဆီတလဲ သတူၢ်ကလာ်အံၤအဃိလီၤ. ဘၣ်ဆၣ် အဝဲတဲဆၢက့ၤဝဲယိယိဖိလၢ “ယကလဲၤလီၤ.”—၁ မိၤၡ့ ၂၄:၅၈.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၁ မိၤၡ့ ၂၄:၁၉, ၂၀) ဒီးဒုးအီဝဲဝံၤဒီး, စံးဝဲဒၣ်, ယကဒၢၣ်ထံလၢနကီၤလၤအူးအဂီၢ် တုၤအအီဘျဲးအီစ့ၢ်ကီးလီၤ. ၂၀ ဒီးမၤဝဲချ့ချ့, ဒီးလူလီၤထံလၢ အထံစဲၤပူၤဆူကျိးပူၤ, ဒီးဃ့ၢ်ဒၢၣ်ထံကဒီးလၢ ထံထီၣ်ပၢၢ်အပူၤ, ဒီးဒၢၣ်ထံလၢ အကီၤလၤအူးခဲလၢာ်အဂီၢ်လီၤ.
wp၁၆.၃ ၁၂-၁၃
“ယကလဲၤလီၤ”
ဘၣ်တဟါ ဖဲအဝဲမၤပှဲၤထံလၢ အသပၢၤပူၤဝံၤအခါ ပှၤသးပှၢ်တဂၤဟဲဃ့ၢ်ဆူအအိၣ်ဒီး တဲအီၤလၢ “ဟ့ၣ်အီစာ်ယၤလၢ နထံတစဲးအိၣ်လၢနထံစဲၤပူၤန့ၣ်တက့ၢ်.” အဝဲဃ့ဝဲလၢ တၢ်ယူးယီၣ်ပာ်ကဲ ဒီးတၢ်သညူးသပှၢ်အပူၤလီၤ. နီၢ်ရံးဘကၤ သ့ၣ်ညါဝဲလၢပှၤသးပှၢ်အံၤ ဟဲလၢတၢ်လီၢ်ဖးယံၤလီၤ. အဃိ အဝဲပာ်လီၤ သပၢၤထံအိၣ်လၢအဖံဘၣ်ခိၣ် လၢအချ့ဒီး ဒုးအီဝဲတုၤအဘျဲ (လၢအီ) လီၤ. တမ့ၢ်ဟ့ၣ်ဒုးအီဝဲထဲတကွံးဖိဘၣ်. တကးဒံးဘၣ် အဝဲထံၣ်ဝဲလၢတၢ်ကပၤန့ၣ် ကီၤလၤအူးအဒုတဆံစ့ၢ်ကီး တအီဘၣ်ထံဒံးဘၣ်. ပှၤဃ့အီထံတဂၤအံၤ အမဲာ်ချံအတၢ်ကွၢ်လၢ အလီၤသးကညီၤအံၤအဃိ နီၢ်ရံးဘကၤစ့ၢ်ကီး အိၣ်တကဲလၢၤဘၣ်ဒီး စံးဝဲလၢ “ယကဒၢၣ်ထံလၢနကီၤလၤအူးအဂီၢ် တုၤအအီဘျဲးအီစ့ၢ်ကီးလီၤ.”—၁ မိၤၡ့ ၂၄:၁၇-၁၉.
ပာ်သူၣ်ပာ်သးလၢ နီၢ်ရံးဘကၤ တဒုးအီဝဲ ကီၤလၤအူးတဖၣ် ထံထဲတစဲးဘၣ် ဒုးအီဝဲတုၤအဘျဲအီလီၤ. ကီၤလၤအူးတဖၣ် မ့ၢ်သူထံဒိၣ်ဒိၣ်ကလဲာ်န့ၣ် တဒုအီထံကလၢာ်ဝဲ ၂၅ ကါလၣ် (၉၅ လံးထၢၣ်) ကီၤလၤအူး အဒုတဆံလၢာ် မ့ၢ်သူထံဒု နီၢ်ရံးဘကၤ ကဘၣ်ဒၢၣ်ထံဖးယံာ်ညါလီၤ. ဘၣ်ဆၣ် ဖျါလၢကီၤလၤအူးတဖၣ် တသူထံကိးဒုဒဲးဘၣ်. ဖဲနီၢ်ရံးဘကၤ တဲဝဲလၢကဒၢၣ်န့ၢ်ဝဲထံလၢ ကီၤလၤအူးတဖၣ်အဂီၢ်အခါ မ့ၢ်အဝဲသ့ၣ်ညါဝဲတၢ်ဂ့ၢ်န့ၣ်ဧါ. တသ့ၣ်ညါဝဲဘၣ်. အဝဲအဲၣ်ဒိးပာ်ဖျါ တၢ်သးအိၣ်ပှၤတမှံၤအဃိ တသ့ဖဲအသ့ အဲၣ်ဒိးမၤန့ၢ်တၢ်လၢ ပှၤတမှံၤသးပှၢ်အံၤအဂီၢ်လီၤ. ပှၤသးပှၢ်အံၤတူၢ်လိာ် အဝဲအတၢ်မၤစၢၤလီၤ. တၢ်န့ၣ်အလီၢ်ခံ နီၢ်ရံးဘကၤ လဲၤဝံၤလဲၤက့ၤဒီးဒၢၣ်ထံလၢ ကီၤလၤအူးတဖၣ်အဂီၢ်အခါ ပှၤသးပှၢ်အံၤ ကွၢ်အီၤလီၤတံၢ်လီၤဆဲးလီၤ.—၁ မိၤၡ့ ၂၄:၂၀, ၂၁.
wp၁၆.၃ ၁၃, ftn.
“ယကလဲၤလီၤ”
မုၢ်ဟါလီၤလံ. နီၢ်ရံးဘကၤ အိၣ်လၢထံပူၤယံာ်ထဲလဲၣ်န့ၣ် တၢ်ကွဲးနီၣ်တပာ်ဖျါဝဲဘၣ်. ပတဲဒ်န့ၣ်အဃိ အခီပညီတမ့ၢ်လၢ အဝဲမၤတၢ်ဝံၤအခါ အဟံၣ်ဖိဃီဖိတဖၣ် မံလၢာ်လံ ဒီးအဝဲအိၣ်လၢထံပူၤ ယံာ်တလၢအဃိ ပှၤတဂၤဂၤဘၣ်လဲၤစီၤကွၢ်အီၤန့ၣ်ဘၣ်.
(၁ မိၤၡ့ ၂၄:၆၅) အဂ့ၢ်ဒ်အံၤ, စံးတ့ၢ်တၢ်အကုၢ်အပှၤ, ပှၤလၢအဟဲသဂၢၢ်ပှၤလၢ ဟီၣ်ခိၣ်တကဝီၤပူၤတဂၤန့ၣ် မ့ၢ်မတၤတဂၤလဲၣ်န့ၣ်, ဒီးတၢ်အကုၢ်အပှၤ စံးတ့ၢ်ဝဲဒၣ်, မ့ၢ်ယကစၢ်လီၤ. ဒီးဟံးန့ၢ်နီၣ်ကျၢၢ်ဘၢ, ဒီးကျၢၢ်ဘၢအမဲာ်လီၤ.
wp၁၆.၃ ၁၅ ¶၃
“ယကလဲၤလီၤ”
လၢခံကတၢၢ်န့ၣ် မုၢ်နံၤလၢ ပပာ်ဖျါထီၣ်လၢ တၢ်ကွဲးတယုၢ်အံၤအခီၣ်ထံးန့ၣ် ဟဲတုၤဃီၤလံ. ဖဲကီၤလၤအူးတဖၣ် ခီဂာ်ဝဲ ကီၢ်ကလံၤထံးအခါ, လၢမုၢ်လီၤနုာ် အတၢ်ကပီၤအဖီလာ်န့ၣ် နီၢ်ရံးဘကၤထံၣ်စိဝဲ ပှၤတဂၤဟးဝဲလၢ စံၣ်ပျီပူၤန့ၣ်လီၤ. ပှၤတဂၤန့ၣ် ဖျါလၢအမ့ၢ်ပှၤလၢ အသူၣ်ဆးသးဆး ဒီးအိၣ်ဒီးတၢ်သ့ၣ်ညါနၢ်ပၢၢ်တဂၤလီၤ. ပဖးဘၣ်လၢ အဝဲ “ယုၢ်လီၤဝဲလၢကီၤလၤအူးအလိၤ” လၢအဆိအချ့အဃိ ဖျါလၢတခိးဝဲတုၤ ကီၤလၤအူးကိာ်လီၤန့ၢ်အီၤဘၣ် အဝဲစံၣ်လီၤဒၣ်အတၢ်လီၤ. တၢ်န့ၣ်အလီၢ်ခံ အဝဲသံကွၢ်ဝဲ ပှၤလၢဟဲက့ၤကိးအီၤတဂၤန့ၣ်လၢ “ပှၤလၢအဟဲသဂၢၢ်ပှၤလၢ ဟီၣ်ခိၣ်တကဝီၤပူၤတဂၤန့ၣ် မ့ၢ်မတၤတဂၤလဲၣ်.” ဖဲအဝဲသ့ၣ်ညါဝဲလၢ အမ့ၢ်စီၤအံၤစဲးအခါ ဟံးန့ၢ်ဝဲခိၣ်ဖၢၣ် ဒီးဖၢၣ်ထီၣ်ဝဲအခိၣ်လီၤ. (၁ မိၤၡ့ ၂၄:၆၂-၆၅) ဘၣ်မနုၤအဃိ မၤဝဲဒ်န့ၣ်လဲၣ်. တၢ်ဖၢၣ်ခိၣ်န့ၣ် မ့ၢ်ဝဲတၢ်ပနီၣ်လၢ အပာ်ဖျါထီၣ် တၢ်ယူးယီၣ်ပာ်ကဲ ပှၤလၢကကဲထီၣ်အဝၤတဂၤန့ၣ်လီၤ. တၢ်ပာ်ဖျါထီၣ် တၢ်ယူးယီၣ်ပာ်ကဲ ဒ်သိးန့ၣ်န့ၣ် စိၤခဲအံၤ ပှၤတနီၤ ကဆိကမိၣ်လၢ တချုးစိၤလၢၤဘၣ်. တၢ်ဆီၣ်လီၤသးန့ၣ် မ့ၢ်တၢ်ပာ်သူၣ်ပာ်သးလၢ အလီၤဘၣ်သူၣ်ဘၣ်သး ဒီးပှၤကိးဂၤဒဲး ကြၢးပာ်ဖျါထီၣ်အဃိ ပိာ်မုၣ်မ့ၢ်ဂ့ၤ, ပိာ်ခွါမ့ၢ်ဂ့ၤ ကြၢးကွၢ်လိမၤဒိး နီၢ်ရံးဘကၤ အတၢ်ဆီၣ်လီၤသးလီၤ.
တၢ်ဖးလံာ်စီဆှံ
လါမၢ်ၡး ၁၆–၂၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ မိၤၡ့ ၂၅–၂၆
“စီၤဧ့ၡီၤ ဆါလီၤကွံာ်ဝဲ အတၢ်န့ၢ်သါ”
(၁ မိၤၡ့ ၂၅:၂၇, ၂၈) ဒီးဖိသၣ်ပိာ်ခွါတဖၣ်န့ၣ်ဒိၣ်ထီၣ်, ဒီးစီၤဧ့ၡီၤမ့ၢ်ပှၤခးတၢ်သ့, ပှၤပှၢ်လၢ်ကျါဖိလီၤ. ဒီးစီၤယၤကိာ်န့ၣ်မ့ၢ်ပှၤကစုဒု, ဒီးအိၣ်ဝဲဆိးဝဲလၢဒဲပူၤလီၤ. ၂၈ ဒီးစီၤအံၤစဲးအဲၣ်စီၤဧ့ၡီၤလီၤ. အဂ့ၢ်ဒ်အံၤ, အဆၣ်ဖိကီၢ်ဖိအမံၤအညၣ်န့ၣ် အိၣ်ဝဲလၢအကိာ်ပူၤလီၤ. မ့မ့ၢ်နီၢ်ရံးဘကၤ တဂၤအဲၣ်စီၤယၤကိာ်လီၤ.
it-1 ၁၂၄၂
စီၤယၤကိာ်
စီၤဧ့ၡီၤလၢအပၢ်အဲၣ်အီၤန့ၣ် မ့ၢ်ဝဲပှၤခးတၢ်ဖိလၢ မၤတပျုာ်တပျီၤတၢ်, အိၣ်ဃိတမုာ်ဘၣ် တဂၤလီၤ. မ့မ့ၢ်စီၤယၤကိာ်န့ၣ် “မ့ၢ်ပှၤကစုဒု မ့တမ့ၢ် ပှၤအလၢအပှဲၤ [ဧ့ၤဘြံၤ, ထဲ(မ်) (tam)] ဒီးအိၣ်ဝဲဆိးဝဲလၢဒဲပူၤလီၤ.” အဝဲမ့ၢ်ပှၤကွၢ်သိလၢ အိၣ်ခုၣ်ခုၣ် ဒီးလၢဟံၣ်ဃီပူၤန့ၣ် ပှၤနာ်န့ၢ်အီၤသ့ ဒီးမ့ၢ်ပှၤလၢအမိၢ်အဲၣ်လီၤဆီအီၤလီၤ. (၁ မိၤ. ၂၅:၂၇, ၂၈) ဖဲပှၤပာ်ဖျါထီၣ်လၢ ပှၤတဂၤဒိးန့ၢ်ဘၣ် ကစၢ်ယွၤအတၢ်ဘၣ်သးအခါ ပှၤသူဝဲဧ့ၤဘြံၤအတၢ်ကတိၤ ထဲ(မ်) (tam) လီၤ. အဒိ “ပှၤဘၣ်ဃးဒီးတၢ်သွံၣ်န့ၣ် သးဟ့ပှၤအလၢအပှဲၤလီၤ.” ဘၣ်ဆၣ် ယဟိဝၤယွၤအၢၣ်လီၤဝဲလၢ “ပှၤတဂၤန့ၣ် [ပှၤအလၢအပှဲၤ] အကတၢၢ် မ့ၢ်တၢ်ဃူတၢ်ဖိးလီၤ.” (ကတိၤ. ၂၉:၁၀; စံး. ၃၇:၃၇) ပှၤလၢအပၢၤဃာ်အတၢ်သးတီ စီၤယိၤဘးစ့ၢ်ကီးမ့ၢ် “ပှၤအလၢအပှဲၤ [ဧ့ၤဘြံၤ, ထဲ(မ်) (tam)] ဒီးအတီအလိၤ” လီၤ.—ဘး. ၁:၁, ၈; ၂:၃.
(၁ မိၤၡ့ ၂၅:၂၉, ၃၀) ဒီးစီၤယၤကိာ်ချီတၢ်ချီ, ဒီးစီၤဧ့ၡီၤဟဲက့ၤလၢ ပှၢ်လၢ်ကျါ, ဒီးအသးလီၤဘှါဝဲလီၤ. ၃၀ ဒီးစီၤဧ့ၡီၤစံးဘၣ်စီၤယၤကိာ်, ဒုးအီၣ်စာ်ယၤလၢ တၢ်အဂီၤအံၤတက့ၢ်. အဂ့ၢ်ဒ်အံၤ, ယသးလီၤဘှါလီၤ. မၤသးဒ်န့ၣ်ဒီး ပှၤကိးဝဲအမံၤလၢအဒိၣ်လီၤ.
(၁ မိၤၡ့ ၂၅:၃၁-၃၄) ဒီးစီၤယၤကိာ်စံးဝဲဒၣ်, ဆါကွံာ်န့ၢ်ယၤလၢ နဝဲၢ်ကိအလီၢ်လၢ မုၢ်မဆါတနံၤအံၤတက့ၢ်. ၃၂ ဒီးစီၤဧ့ၡီၤစံးဝဲဒၣ်, ကွၢ်ကွၢ်, ယကသံတ့ၢ်လီၤ ဒီးတၢ်လၢဝဲၢ်ကိအလီၢ်အံၤ ကဂိာ်တၢ်လၢ ယဂီၢ်မနုၤတမံၤလဲၣ်. ၃၃ ဒီးစီၤယၤကိာ်စံးဝဲဒၣ်, ဆိၣ်တၢ်ဒီးယၤလၢ မုၢ်မဆါတနံၤအံၤတက့ၢ်. ဒီးဆိၣ်တၢ်ဒီးအီၤ, ဒီးဆါကွံာ်အဝဲၢ်ကိအလီၢ်လၢ စီၤယၤကိာ်လီၤ. ၃၄ ဒီးစီၤယၤကိာ်ဟ့ၣ် စီၤဧ့ၡီၤလၢကိၣ်, ဒီးကသူအိၣ်ဒီးပထိးသၣ်လီၤ. ဒီးအီၣ်တၢ်ဒီးအီတၢ်, ဒီးဂဲၤဆၢထၢၣ်, ဒီးလဲၤတၢ်လီၤ. ဒီးစီၤဧ့ၡီၤတပးကဲဘၣ် ဝဲၢ်ကိအလီၢ်ဘၣ်လီၤ.
ဘၣ်မနုၤအဃိ ပကြၢးပာ်ဖျါထီၣ် တၢ်စံးဘျုးစံးဖှိၣ်လဲၣ်
၁၁ လီၤသးအုးဒိၣ်မးလၢ ပှၤတနီၤနီၤလၢ လံာ်စီဆှံအပူၤန့ၣ် တပာ်ဖျါထီၣ် တၢ်စံးဘျုးစံးဖှိၣ်ဘၣ်. အဒိ စီၤဧ့ၡီၤန့ၣ် အမိၢ်အပၢ်မ့ၢ်ပှၤလၢ အအဲၣ်ယဟိဝၤယွၤဒီး ပာ်ကဲကစၢ်ယွၤ ဘၣ်ဆၣ် အဝဲတပာ်ဖျါထီၣ် တၢ်စံးဘျုးစံးဖှိၣ်လၢ တၢ်စီဆှံတဖၣ်အဂီၢ်န့ၣ်ဘၣ်. (ဖး ဧ့ၤဘြံၤ ၁၂:၁၆ တက့ၢ်.) အဝဲတပာ်ဖျါထီၣ် တၢ်စံးဘျုးစံးဖှိၣ်န့ၣ် ပသ့ၣ်ညါဘၣ်ဒ်လဲၣ်. ပသ့ၣ်ညါဘၣ်အီၤ ခီဖျိအဝဲဆါလီၤကွံာ်ဝဲ ဖိဝဲၢ်ကိအတၢ်န့ၢ်သါလၢ အပုၢ်စီၤယၤကိာ်အအိၣ် လၢပဲကသူတခွးလီၤ. (၁ မိၤၡ့ ၂၅:၃၀-၃၄) မ့ၢ်လၢ စီၤဧ့ၡီၤမၤဝဲဒ်န့ၣ်အဃိ လၢခံန့ၣ် အဝဲအသးအုးဒိၣ်မးလီၤ. ခီဖျိလၢ အဝဲတပာ်ဖျါထီၣ် တၢ်စံးဘျုးစံးဖှိၣ်အဃိ ဖဲအဝဲတဒိးန့ၢ်ဘၣ် ဖိဝဲၢ်ကိအတၢ်န့ၢ်သါအခါ အဝဲတကြၢး ကဒူးကဒ့ၣ်တၢ်ဘၣ်.
it-1 ၈၃၅
ဖိဝဲၢ်ကိ
လၢပျၢၤပှၤအံၣ်စရ့လးဖိအစိၤန့ၣ် ဖိဝဲၢ်ကိတဖၣ် ဒိးန့ၢ်ဘၣ်တၢ်လၤကပီၤ ဒီးဘၣ်ဆဲးတီခိၣ်ရိၤမဲတၢ်လၢ ဟံၣ်ဃီအပူၤလီၤ. အဝဲသ့ၣ်ဒိးန့ၢ်ဘၣ် တၢ်န့ၢ်သါခံစးလၢ အပၢ်အအိၣ်လီၤ. (၅ မိၤ. ၂၁:၁၇) ဖဲပှၤအီၣ်တၢ်အဆၢကတီၢ်န့ၣ် စီၤရူၤဘ့ၣ် ဟံးန့ၢ်အလီၢ်လၢ စီၤယိၤသးအမဲာ်ညါ ဒ်ပှၤဝဲၢ်ကိတဂၤအသိးလီၤ. (၁ မိၤ. ၄၃:၃၃) ဘၣ်ဆၣ် လံာ်စီဆှံတမၤလၤကပီၤဝဲ ဖိဝဲၢ်ကိခဲလၢာ်ဘၣ်. လၢဖိခွါအကျါပှၤလၢအရ့ဒိၣ် မ့တမ့ၢ် ပှၤလၢအိၣ်ဒီးတၢ်သးတီန့ၣ် ပှၤပာ်အီၤဒ်အမ့ၢ် ပှၤအဆိကတၢၢ်တဂၤလီၤ.—၁ မိၤ. ၆:၁၀; ၁ ကွဲး. ၁:၂၈; ထိၣ်သတြီၤဒီး ၁ မိၤ. ၁၁:၂၆, ၃၂; ၁၂:၄; ကွၢ် BIRTHRIGHT; INHER-ITANCE.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၁ မိၤၡ့ ၂၅:၃၁-၃၄) ဒီးစီၤယၤကိာ်စံးဝဲဒၣ်, ဆါကွံာ်န့ၢ်ယၤလၢ နဝဲၢ်ကိအလီၢ်လၢ မုၢ်မဆါတနံၤအံၤတက့ၢ်. ၃၂ ဒီးစီၤဧ့ၡီၤစံးဝဲဒၣ်, ကွၢ်ကွၢ်, ယကသံတ့ၢ်လီၤ ဒီးတၢ်လၢဝဲၢ်ကိအလီၢ်အံၤ ကဂိာ်တၢ်လၢ ယဂီၢ်မနုၤတမံၤလဲၣ်. ၃၃ ဒီးစီၤယၤကိာ်စံးဝဲဒၣ်, ဆိၣ်တၢ်ဒီးယၤလၢ မုၢ်မဆါတနံၤအံၤတက့ၢ်. ဒီးဆိၣ်တၢ်ဒီးအီၤ, ဒီးဆါကွံာ်အဝဲၢ်ကိအလီၢ်လၢ စီၤယၤကိာ်လီၤ. ၃၄ ဒီးစီၤယၤကိာ်ဟ့ၣ် စီၤဧ့ၡီၤလၢကိၣ်, ဒီးကသူအိၣ်ဒီးပထိးသၣ်လီၤ. ဒီးအီၣ်တၢ်ဒီးအီတၢ်, ဒီးဂဲၤဆၢထၢၣ်, ဒီးလဲၤတၢ်လီၤ. ဒီးစီၤဧ့ၡီၤတပးကဲဘၣ် ဝဲၢ်ကိအလီၢ်ဘၣ်လီၤ.
(ဧ့ၤဘြံၤ ၁၂:၁၆) ဒ်သိးပှၤမၤကမၣ်ပိာ်မုၣ်ပိာ်မၢၤမ့ၢ်ဂ့ၤ, ပှၤလၢအမၤတရီတပါတၢ် ဒ်စီၤဧ့ၡီၤလၢအဆါကွံာ် အတၢ်ဝဲၢ်ကိအလီၢ်လၢ တၢ်အီၣ်ဘျဲးအီၣ် တဘျီအဂီၢ်အသိးမ့ၢ်ဂ့ၤ, အသုတအိၣ်တဂ့ၤ.
ပှၤဖးလံာ်ဖိတဖၣ် အတၢ်သံကွၢ်
ပကသမံသမိးကွၢ် ဧ့ၤဘြံၤ ၁၂:၁၆ လၢအတဲဝဲ “ဒ်သိးပှၤမၤကမၣ်ပိာ်မုၣ်ပိာ်မၢၤမ့ၢ်ဂ့ၤ, ပှၤလၢအမၤတရီတပါတၢ် ဒ်စီၤဧ့ၡီၤလၢအဆါကွံာ် အတၢ်ဝဲၢ်ကိအလီၢ်လၢ တၢ်အီၣ်ဘျဲးအီၣ်တဘျီ အဂီၢ်အသိးမ့ၢ်ဂ့ၤ, အသုတအိၣ်တဂ့ၤ.” လံာ်စီဆှံတဆၢအံၤ ပာ်ဖျါထီၣ်ဝဲတၢ်ဂ့ၢ်မနုၤလဲၣ်.
ဖဲအံၤန့ၣ် တၢ်မၢဖိပီလူးတအဲၣ်ဒိးတဲဝဲ မ့းၡံအၤ အဖံအဖုအဂ့ၢ်ဘၣ်. မ့ၢ်ဒၣ်အဝဲဟ့ၣ်ဂံၢ်ဟ့ၣ်ဘါဝဲ ခရံာ်ဖိတဖၣ်လၢ ‘ကမၤလိၤအကျဲဧိၤကပူၤဧိၤလၢအခီၣ်အဂီၢ်’ ဒီး “ဒ်သိးပှၤသုတလီၤတိၢ်လၢ ယွၤအဘျုးအဖှိၣ်နီတဂၤတဂ့ၤ” လီၤ. ပှၤလၢအမၤကမၣ်မုၣ်ကမၣ်ခွါန့ၣ် တဒိးန့ၢ်ဘၣ် ယွၤအဘျုးအဖှိၣ်ဘၣ်. (ဧ့ၤ. ၁၂:၁၂-၁၆) ပှၤမ့ၢ်မၤကမၣ်မုၣ်ကမၣ်ခွါန့ၣ် ကလီၤဂာ်ဒီးစီၤဧ့ၡီၤလီၤ. စီၤဧ့ၡီၤန့ၣ် “တပာ်လုၢ်ပာ်ပှ့ၤ တၢ်လၢအစီဆှံတဖၣ်ဘၣ်” ဒီး မၤတရီတပါဝဲလီၤ.
စီၤဧ့ၡီၤန့ၣ် အိၣ်မူဘၣ်ဝဲလၢ ပၢ်တဖၣ်ဒိၣ်စိဒိၣ်ကမီၤ အဆၢကတီၢ်အဃိ အဝဲအိၣ်ဒီး တၢ်ခွဲးတၢ်ယာ်လီၤဆီလၢ ကဟ့ၣ်လုၢ်ထီၣ်တၢ် အဂီၢ်ဒၣ်လဲာ်လီၤ. (၁ မိၤ. ၈:၂၀, ၂၁; ၁၂:၇, ၈; ဘး. ၁:၄, ၅) ဘၣ်ဆၣ် ဒ်သိးအဝဲကမၤလၢပှဲၤ အတၢ်မိၣ်န့ၢ်သးလီအဂီၢ် ဆါလီၤကွံာ်ဝဲ အတၢ်ခွဲးတၢ်ယာ်တဖၣ်အံၤလၢ ပဲကသူတခွးလီၤ. ဘၣ်သ့ၣ်သ့ၣ်ကမ့ၢ်လၢ အဝဲအဲၣ်ဒိးဟးဆှဲးဝဲ တၢ်နးတၢ်ဖှီၣ်လၢ ကစၢ်ယွၤတဲဆိပာ်ဝဲလၢ စီၤအၤဘြၤဟၣ်အချံအသၣ် ကထံၣ်ဘၣ်ဝဲတဖၣ်လီၤ. (၁ မိၤ. ၁၅:၁၃) တကးဒံးဘၣ် အဝဲမၤဘၣ်အၢအနီၢ်ကစၢ် ဒီးတပာ်လုၢ်ပာ်ပှ့ၤ တၢ်လၢအစီဆှံတဖၣ် ခီဖျိဆီဟံၣ်ဆီဃီဒီး ပှၤတခီဘီမုၢ်ဖိခံဂၤလၢ အမိၢ်အပၢ် တဘၣ်သူၣ်ဘၣ်သးဝဲဘၣ်န့ၣ်လီၤ. (၁ မိၤ. ၂၆:၃၄, ၃၅) အဝဲလီၤဆီဒီး စီၤယၤကိာ်လၢ အဆီဟံၣ်ဆီဃီဒီး ပှၤလၢအဘူၣ်ထီၣ်ဘါထီၣ် ယွၤအမ့ၢ်အတီလီၤ.—၁ မိၤ. ၂၈:၆, ၇; ၂၉:၁၀-၁၂, ၁၈.
(၁ မိၤၡ့ ၂၆:၇) ဒီးပှၤကညီဖဲန့ၣ် သံကွၢ်ဝဲလၢအမါအဂ့ၢ်အကျိၤ, ဒီးစံးဝဲဒၣ်, မ့ၢ်ယဒီပုၢ်ဝဲၢ်မုၣ်လီၤ. အဂ့ၢ်ဒ်အံၤ, ဒ်သိးအကစံးမ့ၢ်ယမါဒီး, ပျံၤတၢ်, ဒီးစံးဝဲဒၣ်, ပှၤဖဲအလီၢ်အံၤ ကမၤသံဘၣ်ဖုးယၤလၢ နီၢ်ရံးဘကၤအဃိလီၤ. အဂ့ၢ်ဒ်အံၤ, အက့ၢ်အဂီၤဂ့ၤဝဲလီၤ.
it-2 ၂၄၅ ¶၆
တၢ်လီတၢ်ဝ့ၤ
လံာ်စီဆှံထီဒါဝဲ ပှၤကတိၤကဘျံးကဘျၣ်တၢ်အဃိ အခီပညီတမ့ၢ်လၢ ပကဘၣ်တဲတၢ်မ့ၢ်တၢ်တီခဲလၢာ်လၢ ပှၤလၢတကြၢးသ့ၣ်ညါ တၢ်အမ့ၢ်အတီတဖၣ်န့ၣ်ဘၣ်. ယ့ၣ်ၡူးဟ့ၣ်ကူၣ်ဝဲလၢ “သုတဟ့ၣ်တၢ်စီဆှံလၢထွံၣ်တဂ့ၤ. ဒီးသုတကွံာ်လီၤ သုတၢ်မျၢ်ပလဲလၢထိး အမဲာ်ညါတဂ့ၤ, ကယီၢ်တံၢ်အီၤ လၢအခီၣ်, ဒီးကကဒါဃီၤအသးဒီးအ့ၣ်ဖှီဘၣ်ဖုးသုလီၤ.” (မး. ၇:၆) လၢတၢ်န့ၣ်အဃိ ဖဲယ့ၣ်ၡူးထံၣ်ဘၣ်ဒီး တၢ်မၤအၢမၤနးအခါ အဝဲတတဲဝဲတၢ်ဂ့ၢ်တၢ်ကျိၤခဲလၢာ်ဘၣ် ဒီးတစံးဆၢက့ၤဝဲ တၢ်သံကွၢ်ခဲလၢာ်ဘၣ်. (မး. ၁၅:၁-၆; ၂၁:၂၃-၂၇; ယိၤ. ၇:၃-၁၀) လီၤဂာ်ဒ်သိးဒီး စီၤအၤဘြၤဟၣ်, စီၤအံၤစဲး, နီၢ်ရၤဃး ဒီးစီၤအလံၤၡါ ဒုးနဲၣ်ကမၣ်ဝဲ ပှၤလၢအတဘူၣ်ထီၣ်ဘါထီၣ် ယဟိဝၤယွၤတဖၣ်အကျဲ ဒီးတတဲဘၣ်အဝဲသ့ၣ် တၢ်ဂ့ၢ်တၢ်ကျိၤခဲလၢာ်အသိးလီၤ.—၁ မိၤ. ၁၂:၁၀-၁၉; အဆၢဒိၣ် ၂၀; ၂၆:၁-၁၀; ၡူ. ၂:၁-၆; ယၤ. ၂:၂၅; ၂ စီၤပၤ. ၆:၁၁-၂၃.
တၢ်ဖးလံာ်စီဆှံ
လါမၢ်ၡး ၂၃–၂၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ မိၤၡ့ ၂၇–၂၈
“စီၤယၤကိာ် ဒိးန့ၢ်ဘၣ်တၢ်ဆိၣ်ဂ့ၤလၢ အကြၢးဒိးန့ၢ်ဘၣ်ဝဲ”
(၁ မိၤၡ့ ၂၇:၆-၁၀) ဒီးနီၢ်ရံးဘကၤကတိၤတၢ်ဒီး အဖိခွါစီၤယၤကိာ်, ဒီးစံးဝဲဒၣ်, ကွၢ်ကွၢ်, ယနၢ်ဟူနပၢ်ကတိၤတၢ် ဒီးနဝဲၢ်စီၤဧ့ၡီၤ ဒီးစံးဝဲဒၣ်, ဟဲက့ၤစိာ်န့ၢ်ယၤလၢ ဆၣ်ဖိကီၢ်ဖိအမံၤ, ၇ ဒီးမၤန့ၢ်ယၤလၢ တၢ်အီၣ်အဝံၣ်တက့ၢ်. ဒီးယကအီၣ်တၢ်ဒီး ဆိၣ်ဂ့ၤနၤလၢ ယွၤအမဲာ်ညါလၢ ယတချုးသံဒံးဘၣ်လီၤ. ၈ ဒီးခဲကနံၣ်အံၤ, ယဖိခွါဧၢ, ကနၣ်ယကလုၢ် ဒ်ယမၤလိာ်နၤအသိးန့ၣ်တက့ၢ်. ၉ လဲၤလၢ်ဆူမဲာ်တဲးလဲးတဖုအအိၣ်, ဒီးဟဲက့ၤစိာ်န့ၢ်ယၤလၢ မဲာ်တဲးလဲးဖိအဂ့ၤခံဒုတက့ၢ်. ဒီးယကမၤအီၤလၢ တၢ်အီၣ်အဝံၣ်, လၢနပၢ်အဂီၢ် ဒ်အအဲၣ်ဒိးဝဲအသိးန့ၣ်လီၤ. ၁၀ ဒီးနဘၣ်ဟဲစိာ်ဆူနပၢ်အအိၣ်, ဒီးကအီၣ်တၢ်ဒ်သိး အကဆိၣ်ဂ့ၤနၤလၢ အတချုးသံဒံးဘၣ်လီၤ.
တၢး၀၄ ၄/၁၅ ၁၁ ¶၄-၅
နီၢ်ရံးဘကၤ မ့ၢ်ပိာ်မုၣ်လၢအယူးယီၣ်ယွၤ ဒီးအမၤတၢ်သ့
စီၤဧ့ၡီၤ ကဘၣ်ကဲကုၢ်လၢ စီၤယၤကိာ်အအိၣ်န့ၣ် စီၤအံၤစဲးသ့ၣ်ညါဝဲဧါ တသ့ၣ်ညါဝဲဧါန့ၣ် လံာ်စီဆှံတပာ်ဖျါဝဲဘၣ်. ဒ်လဲၣ်ဂ့ၤ ဒ်လဲၣ်ဂ့ၤ စီၤယၤကိာ် သ့ၣ်ညါဝဲလၢ အဝဲကြၢးဒိးန့ၢ်တၢ်ဆိၣ်ဂ့ၤ ဒီးနီၢ်ရံးဘကၤစ့ၢ်ကီး သ့ၣ်ညါဝဲလီၤ. ဖဲနီၢ်ရံးဘကၤ နၢ်ဟူဝဲလၢ စီၤအံၤစဲး တိာ်ပာ်ဝဲလၢကဆိၣ်ဂ့ၤ စီၤဧ့ၡီၤ ခီဖျိ ကသူတခွးအခါ နီၢ်ရံးဘကၤ နုာ်လီၤမၤတၢ်လၢ အနီၢ်ကစၢ် တဘျီဃီလီၤ. အဝဲအိၣ်ဒံးဒီး တၢ်ဖျဲၣ်တၢ်ဆှါ ဒီးတၢ်သူၣ်ဆူၣ်သးဆူၣ် ဒံးအညါဘီၣ်ခါအသိးလီၤ. အဝဲ “မၤလိာ်” စီၤယၤကိာ်လၢ ကဟဲက့ၤစိာ်န့ၢ်အီၤ မဲာ်တဲးလဲးဖိခံဒုလီၤ. အဝဲကဖီန့ၢ်ကသူ လၢအဝၤအီၣ်ဝဲဝံၣ်တခွးလီၤ. တၢ်န့ၣ်အလီၢ်ခံ စီၤယၤကိာ် ကဘၣ်မၤလီၤဂာ်အသး ဒ်စီၤဧ့ၡီၤ ဒီးဟံးန့ၢ်တၢ်ဆိၣ်ဂ့ၤလီၤ. စီၤယၤကိာ်တတူၢ်လိာ်ဝဲဘၣ်. အပၢ်မ့ၢ်သ့ၣ်ညါလၢ အဝဲပာ်မၤအသးန့ၣ် ကဒိးန့ၢ်ဘၣ်တၢ်ဆိၣ်အၢလီၤ. နီၢ်ရံးဘကၤ တဟ့ၣ်အၡူဘၣ် ဒီးတဲဝဲလၢ “မ်တၢ်ဆိၣ်အၢနၤန့ၣ် ဘၣ်ယၤတက့ၢ်.” တၢ်န့ၣ်အလီၢ်ခံ အဝဲဖီဝဲကသူတခွး ဒီးမၤလီၤဆီဝဲ စီၤယၤကိာ် ဒ်သိးကလီၤဂာ်ဒီး စီၤဧ့ၡီၤ ဒီးဆှၢအီၤဆူ အဝၤအအိၣ်လီၤ.—၁ မိၤၡ့ ၂၇:၁-၁၇.
ဘၣ်မနုၤအဃိ နီၢ်ရံးဘကၤ မၤဝဲဒ်အံၤလဲၣ်န့ၣ် တဘၣ်တၢ်ပာ်ဖျါထီၣ်အီၤဘၣ်. ပှၤအါတက့ၢ် ဒုၣ်ဒွဲၣ်စံးအၢအီၤလၢ အတၢ်မၤအံၤအဃိလီၤ. ဘၣ်ဆၣ် လံာ်စီဆှံမ့ၢ်ဂ့ၤ စီၤအံၤစဲးလၢ အသ့ၣ်ညါက့ၤဝဲလၢ စီၤယၤကိာ်န့ၢ်ဘၣ် တၢ်ဆိၣ်ဂ့ၤမ့ၢ်ဂ့ၤ တပာ်တၢ်ကမၣ်လၢအဝဲအလိၤဘၣ်. လၢတၢ်န့ၣ်အလီၢ် စီၤအံၤစဲး ဟ့ၣ်အါထီၣ် စီၤယၤကိာ် တၢ်ဆိၣ်ဂ့ၤလီၤ. (၁ မိၤၡ့ ၂၇:၂၉; ၂၈:၃, ၄) ယဟိဝၤယွၤ တဲဆိပာ်တၢ် ဘၣ်ဃးဒီး အဖိခွါတဖၣ်န့ၣ် နီၢ်ရံးဘကၤသ့ၣ်ညါပာ်ဝဲလီၤ. အဃိ ဒ်သိးစီၤယၤကိာ် ကဒိးန့ၢ်ဘၣ် တၢ်ဆိၣ်ဂ့ၤလၢ အကြၢးဒိးန့ၢ်ဝဲအံၤအဂီၢ် နီၢ်ရံးဘကၤ မၤဝဲလီၤတံၢ်လီၤဆဲးလီၤ. ဖျါလၢ အဝဲမၤဝဲဒ်အံၤန့ၣ် လီၤပလိာ်ဒီး ကစၢ်ယွၤအတၢ်ဘၣ်သးလီၤ.—ရိမ့ၤ ၉:၆-၁၃.
(၁ မိၤၡ့ ၂၇:၁၈, ၁၉) ဒီးအဝဲဒၣ်ဟဲဆူအပၢ်အအိၣ်, ဒီးစံးဝဲဒၣ်, ယပၢ်ဧၢ, ဒီးစံးဝဲဒၣ်, ကွၢ်ကွၢ်, ယၤလီၤ. ယဖိခွါဧၢ, နမ့ၢ်မတၤတဂၤလဲၣ်. ၁၉ ဒီးစီၤယၤကိာ်စံးဘၣ်အပၢ်, ယမ့ၢ်နဖိဝဲၢ်ကိ, စီၤဧ့ၡီၤလီၤ. ယမၤလံတၢ်ဒ် နမၤလိာ်ယၤအသိးန့ၣ်လံ. ဂဲၤဆၢထၢၣ်ဆ့ၣ်နီၤ အီၣ်လၢ်လၢ ယဆၣ်ဖိကီၢ်ဖိအမံၤ, ဒ်သိးနသးကဆိၣ်ဂ့ၤယၤတက့ၢ်.
တၢး၀၇ ၁၀/၁ ၃၁ ¶၂-၃
ပှၤဖးလံာ်ဖိတဖၣ် အတၢ်သံကွၢ်
ဘၣ်မနုၤအဃိ နီၢ်ရံးဘကၤ ဒီးစီၤယၤကိာ် မၤဝဲဒ်အံၤလဲၣ်န့ၣ် လံာ်စီဆှံ တပာ်ဖျါဝဲ လီၤတံၢ်လီၤဆဲး သနာ်က့ ပာ်ဖျါထီၣ်ဝဲလၢ တၢ်မၤအသးန့ၣ် ကဲထီၣ်အသး သတူၢ်ကလာ်လီၤ. တကးဒံးဘၣ် ပကြၢးပာ်သူၣ်ပာ်သးလၢ ဘၣ်ဃးဒီး နီၢ်ရံးဘကၤ ဒီးစီၤယၤကိာ် အတၢ်မၤအံၤ ဂ့ၤမ့ၢ်ဂ့ၤ အၢမ့ၢ်ဂ့ၤ လံာ်စီဆှံ တပာ်ဖျါဝဲဘၣ်. အဃိ တၢ်ကွဲးနီၣ်တခါအံၤ တမ့ၢ်အဲၣ်ဒိးတဲဝဲလၢ ပလံၣ်အီၣ်လီအီၣ်တၢ်န့ၢ်ဘၣ်. ဘၣ်ဆၣ် လံာ်စီဆှံ တဲနၢ်ပၢၢ်ဝဲ တၢ်အိၣ်သးအံၤလီၤ.
တၢ, တၢ်ကွဲးနီၣ် ပာ်ဖျါဝဲလၢ စီၤယၤကိာ်ကြၢးဒိးန့ၢ် အပၢ်အတၢ်ဆိၣ်ဂ့ၤ ဒီးစီၤဧ့ၡီၤတကြၢးဒိးန့ၢ်ဘၣ်ဝဲဘၣ်. လၢအခီၣ်ထံးလံၤလံၤ စီၤဧ့ၡီၤ တပာ်လုၢ်ပာ်ပှ့ၤ ဖိဝဲၢ်ကိအလီၢ်ဘၣ် ဒီးဒ်သိးအတၢ်သၣ်ဝံၤ ကလီၤမၢ်ကွံာ်ဝဲအဂီၢ် ဆါလီၤကွံာ်ဝဲလၢ ကသူတခွး ဝံၤလံအဃိ စီၤယၤကိာ်ပှ့ၤဝဲ ဖိဝဲၢ်ကိအလီၢ်အံၤဝံၤလံလီၤ. စီၤဧ့ၡီၤ “တပးကဲဘၣ်ဝဲၢ်ကိအလီၢ်ဘၣ်” (၁ မိၤၡ့ ၂၅:၂၉-၃၄) အဃိ စီၤယၤကိာ် လဲၤဝဲဆူအပၢ်အအိၣ်န့ၣ် မ့ၢ်ဒ်သိးကဒိးန့ၢ်ဘၣ်ဝဲ တၢ်ဆိၣ်ဂ့ၤလၢ အကြၢးဒိးန့ၢ်ဝဲန့ၣ်လီၤ.
(၁ မိၤၡ့ ၂၇:၂၇-၂၉) ဒီးအဝဲဒၣ်သုးဘူးအသးဆူ အအိၣ်ဒီးနၢမူအီၤလီၤ. ဒီးနၢဝဲလၢအကူအသိးအစိ, ဒီးဆိၣ်ဂ့ၤဝဲ, ဒီးစံးဝဲဒၣ်, ကွၢ်, ယဖိခွါအစိအံၤမ့ၢ်ဒ်ဟီၣ်ခိၣ် တကဝီၤလၢ ယွၤဆိၣ်ဂ့ၤအီၤအစိအသိးန့ၣ်လီၤ. ၂၈ ဒီးမ်ယွၤဟ့ၣ်လီၤနၤလၢ မူခိၣ်အပစီၤထံ, ဒီးဟီၣ်ခိၣ်အသိ, ဒီးဘုဧိၤဟုဧိၤ, ဒီးစပံးထံစပံးနိ အါအါကလဲာ်တက့ၢ်. ၂၉ မ်ပှၤဂီၢ်မုၢ်တဖၣ်မၤနတၢ်, ဒီးပှၤကလုာ်တဖၣ် သကူးလီၤအသး လၢနမဲာ်ညါတက့ၢ်. မ်နကဲထီၣ်နဒီပုၢ်ဝဲၢ်တဖၣ် အကစၢ်ဒီး နမိၢ်အဖိခွါတဖၣ် သကူးလီၤအသးလၢ နမဲာ်သၣ်ပူၤတက့ၢ်. ပှၤလၢအဆိၣ်အၢနၤန့ၣ်, မ်အဘၣ်တၢ်ဆိၣ်အၢအီၤတက့ၢ်. ဒီးပှၤလၢအဆိၣ်ဂ့ၤနၤန့ၣ်, မ်အဘၣ်တၢ်ဆိၣ်ဂ့ၤအီၤတက့ၢ်.
it-1 ၃၄၁ ¶၆
တၢ်ဆိၣ်ဂ့ၤ
ပှၤအတဝၢလၢ အဟ့ၣ်စိဟ့ၣ်ကမီၤ ပၢ်တဖၣ်အကျါန့ၣ် ညီနုၢ်ပၢ်တဖၣ် ဆိၣ်ဂ့ၤဝဲအဖိခွါတဖၣ် တချုးလၢအသံဒံးဘၣ်လီၤ. တၢ်အံၤမ့ၢ်တၢ်ဂ့ၢ်လၢအရ့ဒိၣ် ဒီးပှၤဘၣ်မၤအီၤလီၤတံၢ်လီၤဆဲးလီၤ. အဃိ စီၤအံၤစဲး ဆိကမိၣ်ဝဲ စီၤယၤကိာ်လၢ အဖိဝဲၢ်ကိ စီၤဧ့ၡီၤအဃိ ဆိၣ်ဂ့ၤဝဲလီၤ. စီၤအံၤစဲး ဆိၣ်ဂ့ၤဆိဝဲ စီၤယၤကိာ်လီၤ. ပနာ်သ့ သပှၢ်တၢၢ်လၢ စီၤအံၤစဲး အသးပှၢ် ဒီးအမဲာ်ချံတဆှံအါအါလၢၤဘၣ်အဃိ ကဃ့ဝဲ ယဟိဝၤယွၤ ဒ်သိး အတၢ်ဆိၣ်ဂ့ၤတဖၣ် ကဟဲလၢပှဲၤထီၣ်အဂီၢ်လီၤ. (၁ မိၤ. ၂၇:၁-၄, ၂၃-၂၉; ၂၈:၁, ၆; ဧ့ၤ. ၁၁:၂၀; ၁၂:၁၆, ၁၇) လၢခံ စီၤအံၤစဲးသ့ၣ်ညါက့ၤဝဲလၢ အမ့ၢ်စီၤယၤကိာ် သနာ်က့ အဝဲပာ်ဂၢၢ်ပာ်ကျၢၤဝဲ တၢ်ဆိၣ်ဂ့ၤလၢအဟ့ၣ်တ့ၢ်ဝဲတဖၣ် ဒီးဟ့ၣ်အါထီၣ်ဝဲဒံးလီၤ. (၁ မိၤ. ၂၈:၁-၄) တချုးလၢ စီၤယၤကိာ်သံဒံးဘၣ်န့ၣ် ဆိၣ်ဂ့ၤဝဲ စီၤယိၤသးအဖိခွါခံဂၤဝံၤမး ဆိၣ်ဂ့ၤဝဲ အနီၢ်ကစၢ် အဖိခွါတဖၣ်လီၤ. (၁ မိၤ. ၄၈:၉, ၂၀; ၄၉:၁-၂၈; ဧ့ၤ. ၁၁:၂၁) ဒ်န့ၣ်အသိး စီၤမိၤၡ့စ့ၢ်ကီး တချုးလၢ အသံဒံးဘၣ်န့ၣ် ဆိၣ်ဂ့ၤဝဲ ပှၤအံၣ်စရ့လးဖိ ဒီကလုာ်လီၤ. (၅ မိၤ. ၃၃:၁) ပမ့ၢ်ကွၢ် တၢ်မၤအသးတဖၣ်အံၤန့ၣ် ပသ့ၣ်ညါဘၣ်လၢ မ့ၢ်ဒၣ်အဝဲသ့ၣ်တဲဆိပာ်တၢ် ဒ်ဝံအတၢ်စံးပာ်အသိးလီၤ. လၢတၢ်အိၣ်သးတနီၤန့ၣ် ပှၤလၢအဆိၣ်ဂ့ၤတၢ်တဂၤ ပာ်ထီၣ်အစုလၢ ပှၤလၢအဆိၣ်ဂ့ၤဝဲတဂၤ အခိၣ်လိၤလီၤ.—၁ မိၤ. ၄၈:၁၃, ၁၄.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၁ မိၤၡ့ ၂၇:၄၆–၂၈:၂) ဒီးနီၢ်ရံးဘကၤစံးဘၣ်စီၤအံၤစဲး, တၢ်ဘှံးယသးလၢယသးသမူအဃိ, လၢပှၤဃ့ၤသးဖိအဖိမုၣ်အဂ့ၢ်အကျိၤလီၤ. စီၤယၤကိာ်မ့ၢ်န့ၢ်မါလၢပှၤဃ့ၤသးဖိအဖိမုၣ်, ပှၤဒ်အံၤအသိး, ပှၤကီၢ်ဖိအံၤဒီး, ယသးသမူအံၤမ့ၢ်အဂိာ်မနုၤလဲၣ်.
၂၈ ဒီးစီၤအံၤစဲးကိးန့ၢ် စီၤယၤကိာ် ဒီးဆိၣ်ဂ့ၤအီၤ, ဒီးမၤလိာ်အီၤ, ဒီးစံးဘၣ်အီၤ, န့ၢ်မါလၢပှၤကနၤဧၣ်ဖိ အဖိမုၣ်တဂ့ၤ. ၂ ဂဲၤဆၢထၢၣ်လဲၤဆူ ကီၢ်ပၤဒနါရၣ်, ဆူနမိၢ်အပၢ် စီၤဘသူၤအ့လးအဟံၣ်ပူၤ, ဒီးန့ၢ်နမါလၢ နမိၢ်အဒီပုၢ်ဝဲၢ်ခွါ စီၤလၤဘၣ် အဖိမုၣ်အကျါဖဲန့ၣ်တက့ၢ်.
တၢး၀၆ ၄/၁၅ ၆ ¶၃-၄
ကျဲလၢနကတဲသကိးတၢ်ဒီး နသးသမူတံၤသကိး
စီၤအံၤစဲးဒီး နီၢ်ရံးဘကၤန့ၣ် မၤဂ့ၤထီၣ်ဝဲ အတၢ်ရ့လိာ်သးဧါ. ဖဲအဝဲသ့ၣ်အဖိခွါ စီၤဧ့ၡီၤ ဆီဟံၣ်ဆီဃီဒီး ပှၤဃ့ၤသးမုၣ်ခံဂၤအခါ တၢ်ကီတၢ်ခဲဖးဒိၣ် ဟဲအိၣ်ထီၣ်လၢ အဟံၣ်ဖိဃီဖိအပူၤလီၤ. နီၢ်ရံးဘကၤ လဲၤဆူ စီၤအံၤစဲးအအိၣ်ဒီး တဲအီၤလၢ “တၢ်ဘှံးယသးလၢ ယသးသမူအဃိ, လၢပှၤဃ့ၤသးဖိ အဖိမုၣ်အဂ့ၢ်အကျိၤလီၤ. စီၤယၤကိာ်မ့ၢ်န့ၢ်မါလၢ ပှၤဃ့ၤသးဖိအဖိမုၣ် . . . , ယသးသမူအံၤမ့ၢ်အဂိာ်မနုၤလဲၣ်.” (၁ မိၤၡ့ ၂၆:၃၄; ၂၇:၄၆) ဖျါလၢ အဝဲတဲဖျါထီၣ်ဝဲ အတၢ်ဘၣ်ယိၣ်ဘၣ်ဘှီတဖၣ် ပျီပျီလီၤ.
စီၤအံၤစဲး တဲဘၣ်စီၤယၤကိာ်လၢ အဒီတဃံာ်ဒီး စီၤဧ့ၡီၤန့ၣ်လၢ သုတဘၣ်ဟံးန့ၢ်အမါလၢ ပှၤကနၤဧၣ်မုၣ်တဂ့ၤန့ၣ်လီၤ. (၁ မိၤ. ၂၈:၁, ၂) နီၢ်ရံးဘကၤ တဲဖျါထီၣ်ဝဲ တၢ်လၢအဲၣ်ဒိးတဲဝဲတဖၣ်လီၤ. ပှၤဒီမါဝၤခံဂၤအံၤ တဲသကိးတၢ်ဂ့ၤဂ့ၤ ဘၣ်ဃးဒီး တၢ်ကီတၢ်ခဲလၢ အဟံၣ်ဖိဃီဖိ အပူၤန့ၣ်လီၤ. အဝဲသ့ၣ် ပာ်ဖျါထီၣ် ဒိဂ့ၤတဲာ်ဘၣ်လၢပဂီၢ် လၢမုၢ်မဆါတနံၤအံၤလီၤ. ဘၣ်ဆၣ် ပှၤဒီမါဝၤတဖၣ် အသးမ့ၢ်တလီၤပလိာ်ဘၣ်န့ၣ် ကြၢးမၤဝဲဒ်လဲၣ်.
(၁ မိၤၡ့ ၂၈:၁၂, ၁၃) ဒီးမံမီၢ်တၢ် ဒီးကွၢ်ကွၢ်, ဃီတဆိအိၣ်ဆၢထၢၣ်လၢဟီၣ်ခိၣ်ချၢ, ဒီးအခိၣ်ထီၣ်ဘးလၢမူခိၣ်လီၤ. ဒီးကွၢ်ကွၢ်, ယွၤအကလူးတဖၣ်လဲၤထီၣ်, ဒီးဟဲလီၤလၢအလိၤလီၤ. ၁၃ ဒီးကွၢ်ကွၢ်, ယွၤအိၣ်ဆၢထၢၣ်လၢအခိၣ်, ဒီးစံးဝဲဒၣ်, ယဲဒၣ်အံၤယမ့ၢ်ယွၤ, စီၤအၤဘြၤဟၣ် နပၢ်အကစၢ်, ဒီးစီၤအံၤစဲးအကစၢ်လီၤ. ကီၢ်လၢနမံလၢ အဖီခိၣ်တဘ့ၣ်အံၤ ယကဟ့ၣ်လီၤနၤ, ဒီးနချံနသၣ်လီၤ.
တၢး၀၄ ၁/၁၅ ၂၈ ¶၆
လံာ်စီဆှံ အတၢ်ပာ်ဖျါလၢ လံာ် ၁ မိၤၡ့—၂
၂၈:၁၂, ၁၃—စီၤယၤကိာ် အတၢ်မံမီၢ် ဘၣ်ဃးဒီး “ဃီ” န့ၣ်အခီပညီမ့ၢ်မနုၤလဲၣ်. “ဃီ” လၢလီၤဂာ် ဘၣ်တၢ်မၤအီၤလၢလၢၢ်အံၤန့ၣ် ပာ်ဖျါထီၣ်ဝဲလၢ မူခိၣ်ဒီးဟီၣ်ခိၣ်န့ၣ် တၢ်ဆဲးကျိးလိာ်သးအိၣ်ဝဲလီၤ. ကစၢ်ယွၤ အမူခိၣ်ကလူးတဖၣ် ထီၣ်စံၣ်လီၤလၢ ဃီအဝဲန့ၣ်အဃိ ပာ်ဖျါထီၣ်ဝဲလၢ အဝဲသ့ၣ်န့ၣ် ဘၣ်မၤတၢ်လၢ ယဟိဝၤယွၤ ဒီးပှၤဟီၣ်ခိၣ်ဖိလၢ ဒိးန့ၢ်ဘၣ်ကစၢ်ယွၤ အတၢ်ဘၣ်သးတဖၣ် အဘၢၣ်စၢၤလီၤ.—ယိၤဟၣ် ၁:၅၁.
တၢ်ဖးလံာ်စီဆှံ
လါမၢ်ၡး ၃၀–လါအ့ဖြ့ၣ် ၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ မိၤၡ့ ၂၉–၃၀
“စီၤယၤကိာ် ဆီဟံၣ်ဆီဃီ”
(၁ မိၤၡ့ ၂၉:၁၈-၂၀) ဒီးစီၤယၤကိာ် အဲၣ်နီၢ်ရၤဃ့လး, ဒီးစံးဝဲဒၣ်, ယကမၤနတၢ်နွံနံၣ်လၢ နီၢ်ရၤဃ့လး, နဖိမုၣ်အဆံးတဂၤအဂီၢ်လီၤ. ၁၉ ဒီးစီၤလၤဘၣ်စံးဝဲဒၣ်, ယဟ့ၣ်အီၤလၢနၤန့ၣ်ဂ့ၤန့ၢ် ယဟ့ၣ်အီၤလၢပှၤဂၤတက့ၢ်လီၤ. အိၣ်ဒီးယၤတက့ၢ်. ၂၀ ဒီးစီၤယၤကိာ် မၤတၢ်နွံနံၣ်လၢ နီၢ်ရၤဃ့လးအဂီၢ်, ဒီးအိၣ်ဝဲလၢအမဲာ်ညါ ဒ်စှၤနံၤစှၤသီအသိး, လၢအအဲၣ်အီၤအဃိလီၤ.
တၢး၀၃ ၁၀/၁၅ ၂၉ ¶၆
စီၤယၤကိာ် ပာ်လုၢ်ပာ်ပှ့ၤ နီၢ်သးတၢ်လုၢ်ဒိၣ်ပှ့ၤဒိၣ်တဖၣ်
ပှၤဘၣ်ထီၣ်တလိၢ် တလးမူးပိာ်မုၣ်ခီဖျိ ပှၤဟ့ၣ်တၢ်အဘူးအလဲလၢ အဝဲအဟံၣ်ဖိဃီဖိန့ၣ်လီၤ. လၢခံစီၤမိၤၡ့ အတၢ်သိၣ်တၢ်သီအပူၤ ပာ်ပနီၣ်ဝဲလၢ ပိာ်မုၣ်ဖိလၢ ဘၣ်တၢ်ဖီၣ်ဆူၣ်အီၤအဂီၢ်န့ၣ် ပှၤကဘၣ်ဟ့ၣ်စ့အစီၤယဲၢ်ဆံလီၤ. ပှၤကူၣ်ဘၣ်ကူၣ်သ့ ကီၤဒၢၤ ဝ့ၢ်ဟၢၤ နာ်ဝဲလၢတၢ်န့ၣ်မ့ၢ် “တၢ်အဘူးအလဲအအါကတၢၢ်” သနာ်က့ အါတက့ၢ် တၢ်အဘူးအလဲန့ၣ် “စှၤဒိၣ်မး” လီၤ. (၅ မိၤၡ့ ၂၂:၂၈, ၂၉) မ့မ့ၢ် စီၤယၤကိာ်န့ၣ် ဟ့ၣ်တၢ်အဘူးအလဲ တန့ၢ်ဘၣ်. အဝဲတဲဘၣ် စီၤလၤဘၣ်လၢ ကမၤန့ၢ်အီၤတၢ်မၤ နွံနံၣ်လီၤ. ဝ့ၢ်ဟၢၤ ဆဲးတဲဝဲလၢ “လၢပျၢၤ ဘၤဘူၤလိၣ်အစိၤန့ၣ် ပှၤမၤတၢ် မုၢ်ဆ့ၣ်မုၢ်ဂီၤတဖၣ် တလါဒိးန့ၢ်ဘၣ်စ့ တဘးဒီးတဝာ် အဘၢၣ်စၢၤလီၤ. စီၤယၤကိာ် ကဒိးန့ၢ်ဘၣ် နီၢ်ရၤဃ့လးအဂီၢ် ဟ့ၣ်ဝဲတၢ်အဘူးအလဲ (နွံနံၣ်ပှဲၤထီၣ်န့ၣ် စ့ကအိၣ်ဝဲ ၄၂ တုၤလၢ ၈၄ ၡက့လး) လၢတၢ်သူၣ်အိၣ်သးအိၣ်အပူၤလီၤ.” စီၤလၤဘၣ် တူၢ်လိာ်ဝဲညီညီလီၤ.—၁ မိၤၡ့ ၂၉:၁၉.
(၁ မိၤၡ့ ၂၉:၂၁-၂၆) ဒီးစီၤယၤကိာ်စံးဘၣ်စီၤလၤဘၣ်, ဟ့ၣ်ယမါတက့ၢ်. အဂ့ၢ်ဒ်အံၤ, ယမုၢ်နံၤတဖၣ် လၢထီၣ်ပှဲၤထီၣ်လံ. ဒီးယကလဲၤနုာ်ဆူအအိၣ်လီၤ. ၂၂ ဒီးစီၤလၤဘၣ် ဒုးအိၣ်ဖှိၣ်ရိဖှိၣ် ပှၤကညီအိၣ်ဝဲလၢ အလီၢ်တပူၤန့ၣ်ခဲလၢာ်, ဒီးမၤတၢ်အီၣ်တၢ်အီလီၤ. ၂၃ ဒီးတၢ်မၤအသးလၢ မုၢ်နၤန့ၣ်, လၢအဟံးန့ၢ်အဖိမုၣ်နီၢ်လ့ၤအၤ, ဒီးဆှၢဝဲဆူအအိၣ်, ဒီးအဝဲဒၣ်လဲၤနုာ်ဆူအအိၣ်လီၤ. ၂၄ ဒီးစီၤလၤဘၣ် ဟ့ၣ်အကုၢ်ပိာ်မုၣ်နီၢ်စံၤလပၤ, လၢအဖိမုၣ်နီၢ်လ့ၤအၤ လၢအကုၢ်ပိာ်မုၣ်အဂီၢ်လီၤ. ၂၅ ဒီးတၢ်မၤအသးလၢမုၢ်ဆ့ၣ်ထီၣ်န့ၣ်, ကွၢ်ကွၢ်, မ့ၢ်နီၢ်လ့ၤအၤလီၤ. ဒီးအဝဲဒၣ် စံးဘၣ်စီၤလၤဘၣ်, တၢ်လၢနမၤယၤမ့ၢ်မနုၤလဲၣ်. ယမၤနတၢ်လၢ နီၢ်ရၤဃ့လးအဂီၢ်တမ့ၢ်ဘၣ်ဧါ. ဒီးနလီန့ၢ်ယၤမ့ၢ်အဘၣ်မနုၤလဲၣ်. ၂၆ ဒီးစီၤလၤဘၣ်စံးဝဲဒၣ်, ဟ့ၣ်ဆိပှၤအဆံးလၢ အဝဲၢ်ကိအမဲာ်ညါန့ၣ်, တမၤဘၣ်ဘၣ်လၢ ပလီၢ်တပူၤအံၤဘၣ်.
တၢး၀၇ ၁၀/၁ ၈-၉
ပှၤဒီပုၢ်ဝဲၢ်မုၣ်လၢ အပှဲၤဒီးတၢ်သူၣ်ကိၢ်သးဂီၤတဖၣ်လၢအ “မၤထီၣ်အံၣ်စရ့လးအဟံၣ်”
နီၢ်လ့ၤအၤ မၤသကိးတၢ်ဒီးအပၢ် လၢကလီန့ၢ် စီၤယၤကိာ်အဂီၢ်ဧါ. မ့တမ့ၢ် မ့ၢ်ဒၣ်အဝဲဒိကနၣ် အပၢ်အကလုၢ်အဃိဧါ. ဖဲန့ၣ်အဆၢကတီၢ် နီၢ်ရၤဃ့လး လဲၤအိၣ်ဖဲလဲၣ်. တၢ်မၤအသးတဖၣ်န့ၣ် မ့ၢ်အဝဲသ့ၣ်ညါဝဲဧါ. မ့ၢ်သ့ၣ်ညါဝဲန့ၣ် အသးကမၤသးဒ်လဲၣ်. တၢ်သံကွၢ်တဖၣ်အံၤ လံာ်စီဆှံ တပာ်ဖျါထီၣ် အတၢ်စံးဆၢဘၣ်. ဘၣ်ဃးဒီး တၢ်ဂ့ၢ်အံၤ နီၢ်ရၤဃ့လး ဒီးနီၢ်လ့ၤအၤ မ့ၢ်တူၢ်ဘၣ်ဝဲ ဒ်လဲၣ်ဂ့ၤ, ဒ်လဲၣ်ဂ့ၤ မ့မ့ၢ် စီၤယၤကိာ်န့ၣ် အသးထီၣ်တၢ်ဒိၣ်မးလီၤ. ဘၣ်ဆၣ် တမ့ၢ်အသးဒိၣ်ထီၣ် အဝဲသ့ၣ်ဘၣ်. မ့ၢ်အသးဒိၣ်ထီၣ် စီၤလၤဘၣ်အဃိ တဲဝဲလၢ “ယမၤနတၢ်လၢ နီၢ်ရၤဃ့လးအဂီၢ်တမ့ၢ်ဘၣ်ဧါ. ဒီးနလီန့ၢ်ယၤ မ့ၢ်အဘၣ်မနုၤလဲၣ်.” စီၤလၤဘၣ် စံးဆၢက့ၤဝဲလၢ “ဟ့ၣ်ဆိပှၤအဆံးလၢ အဝဲၢ်ကိအမဲာ်ညါန့ၣ်, တမၤဘၣ်ဘၣ်လၢ ပလီၢ်တပူၤအံၤဘၣ်. မၤပှဲၤထီၣ်အဝဲတဂၤန့ၣ် အတနွံတက့ၢ်. ဒီးပကဟ့ၣ်အီၤစ့ၢ်ကီးလၢနၤလၢ နမၤတၢ်လၢနကမၤဒီး ယၤနွံနံၣ်အဂၤတဖၣ်အဃိလီၤ.” (၁ မိၤၡ့ ၂၉:၂၅-၂၇) အဃိ စီၤယၤကိာ်လီၤဘၣ်လၢ လုၢ်လၢ်လၢတၢ်ဟံးန့ၢ်မါ အါန့ၢ်ဒံးတဂၤလၢအပှဲၤဒီး တၢ်သူၣ်က့ၣ်သးကါလီၤ.
it-2 ၃၄၁ ¶၃
တၢ်ဆီဟံၣ်ဆီဃီ
မူးပွဲ. လၢကီၢ်အံၣ်စရ့လးအပူၤ တၢ်ဖျီအမူးတဖၣ်န့ၣ် တလီၤဘီလီၤမုၢ် သနာ်က့ ပှၤမၤအီၤလၢ တၢ်သူၣ်ဖှံသးညီအပူၤလီၤ. ဖဲတၢ်ဖျီအနံၤန့ၣ် တလးမူးပိာ်မုၣ် ဘၣ်တၢ်ကတဲာ်ကတီၤအီၤဂ့ၤဂ့ၤလီၤ. အဆိကတၢၢ် အဝဲကဘၣ်လုၢ်ထံ ဒီးဖှူအသးလၢ သိနၢမူလီၤ. (ထိၣ်သတြီၤဒီး ရူၤ. ၃:၃; ဃ့း. ၂၃:၄၀) တဘျီတခီၣ်န့ၣ် ပှၤလၢအမၤစၢၤ တလးမူးပိာ်မုၣ်တဖၣ် စၢန့ၢ်အီၤ တၢ်စၢသးနါပှၢ်, ဒုးကၤအီၤဆ့ကၤဝါကဖီ ဒီးမ့မ့ၢ်ပှၤထူးပှၤတီၤတဖၣ်န့ၣ် ဆးကံၣ်ဆးဝ့ၤထီၣ်အဆ့ကၤ ဃံဃံလၤလၤလီၤ. (ယံး. ၂:၃၂; လီၣ်. ၁၉:၇, ၈; စံး. ၄၅:၁၃, ၁၄) တလးမူးပိာ်မုၣ် အတၢ်မ့ၢ်အိၣ်မ့ၢ်ယၢၤန့ၣ် ကယၢကယဲအသးလၢ လၢၢ်လုၢ်ဒိၣ်ပှ့ၤဒိၣ်လီၤ. (ၡါ. ၄၉:၁၈; ၆၁:၁၀; လီၣ်. ၂၁:၂) ဝံၤအလီၢ်ခံ တလးမူးပိာ်မုၣ် မၤဘၢအသးလၢ တၢ်ကျၢၢ်ဘၢမဲာ် ဘူဘူဖိလၢ အထီအိၣ်စးထီၣ်လၢအခိၣ် တုၤလၢအခီၣ်န့ၣ်လီၤ. (ၡါ. ၃:၁၉, ၂၃) စီၤလၤဘၣ် လီန့ၢ်ဝဲ စီၤယၤကိာ် ခီဖျိ ဟ့ၣ်ဝဲနီၢ်လ့ၤအၤလၢ နီၢ်ရၤဃ့လးအလီၢ် န့ၢ်ဝဲညီညီဖိန့ၣ် ပနၢ်ပၢၢ်သ့လီၤ. (၁ မိၤ. ၂၉:၂၃, ၂၅) ဖဲနီၢ်ရံးဘကၤ ဟဲထံၣ်ဒီး စီၤအံၤစဲးအခါ အဝဲမၤဘၢအမဲာ်လၢ တၢ်ကျၢၢ်ဘၢမဲာ်န့ၣ်လီၤ. (၁ မိၤ. ၂၄:၆၅) တၢ်မၤဒ်အံၤန့ၣ် မ့ၢ်ဒၣ်တၢ်ပာ်ဖျါထီၣ်လၢ တလးမူးပိာ်မုၣ် အၢၣ်လီၤတူၢ်လိာ်ဝဲ တလးမူးပိာ်ခွါ အတၢ်န့ၢ်စိန့ၢ်ကမီၤလီၤ.—၁ ကရံၣ်. ၁၁:၅, ၁၀.
(၁ မိၤၡ့ ၂၉:၂၇, ၂၈) မၤပှဲၤထီၣ်အဝဲတဂၤန့ၣ် အတနွံတက့ၢ်. ဒီးပကဟ့ၣ်အီၤစ့ၢ်ကီးလၢ နၤလၢနမၤတၢ်လၢ နကမၤဒီးယၤနွံနံၣ် အဂၤတဖၣ်အဃိလီၤ. ၂၈ ဒီးစီၤယၤကိာ်မၤဝဲဒ်န့ၣ်, ဒီးမၤပှဲၤထီၣ်အဝဲတဂၤန့ၣ်အတနွံ, ဒီးအဝဲဒၣ်ဟ့ၣ်အီၤလၢ အဖိမုၣ်နီၢ်ရၤဃ့လးလၢ အမါစ့ၢ်ကီးလီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၁ မိၤၡ့ ၃၀:၃) ဒီးစံးဝဲဒၣ်, ကွၢ်ကွၢ်, ယကုၢ်ပိာ်မုၣ်နီၢ်ဘံၤလဟၤတဂၤအံၤ, လဲၤနုာ်ဆူအအိၣ်တက့ၢ်. ဒီးကဆံးစၢ်န့ၢ်ဝဲလၢ ယခီၣ်လ့ၢ်ခိၣ်အဖီခိၣ်, ဒီးယကန့ၢ်ဘၣ် ယဖိစ့ၢ်ကီးလၢအီၤလီၤ.
it-1 ၅၀
တၢ်လုၢ်ဖိ
နီၢ်ရၤဃ့လး ဒီးနီၢ်လ့ၤအၤခံဂၤလၢာ် အကုၢ်ပိာ်မုၣ်အဖိလၢ အိၣ်ဖျဲၣ်ထီၣ်ခီဖျိ စီၤယၤကိာ်တဖၣ်န့ၣ် ပာ်ဝဲဒ်အဖိလၢအအိၣ်ဖျဲၣ်ထီၣ်လၢ ‘အဝဲသ့ၣ် အခီၣ်လ့ၢ်ခိၣ်အဖီခိၣ်’ အသိးလီၤ. (၁ မိၤ. ၃၀:၃-၈, ၁၂, ၁၃, ၂၄) ဖိသ့ၣ်တဖၣ်အံၤ ဒိးန့ၢ်ဘၣ်တၢ်န့ၢ်သါဃုာ်ဒီး စီၤယၤကိာ်အမါနီၢ်ကီၢ်ခံဂၤ အဖိတဖၣ်လီၤ. ကုၢ်မုၣ်တဖၣ် မ့ၢ်ဝဲ နီၢ်ရၤဃ့လး ဒီးနီၢ်လ့ၤအၤအကုၢ်အဃိ ကုၢ်ပိာ်မုၣ်အဖိတဖၣ်န့ၣ် မ့ၢ်စ့ၢ်ကီးအဝဲသ့ၣ်အဖိလီၤ.
(၁ မိၤၡ့ ၃၀:၁၄, ၁၅) ဒီးကူးဘုကၠူၣ်အမုၢ်နံၤတဖၣ်န့ၣ် စီၤရူၤဘ့ၣ်လဲၤတၢ်, ဒီးထံၣ်န့ၢ်ဒူးဒးသၣ်လၢပျီပူၤ, ဒီးဟဲက့ၤစိာ်ဝဲဆူအမိၢ် နီၢ်လ့ၤအၤအအိၣ်လီၤ. ဒီးနီၢ်ရၤဃ့လး စံးဘၣ်နီၢ်လ့ၤအၤ, ဟ့ၣ်စာ်ယၤလၢနဖိခွါ အဒူးဒးသၣ်တနီၤတက့ၢ်. ၁၅ ဒီးစံးဘၣ်အီၤ, နဟံးထီၣ်ကွံာ်ယဝၤန့ၣ် မ့ၢ်တၢ်အဆံးဧါ, ဒီးနကဟံးထီၣ်ကွံာ်စ့ၢ်ကီး ယဖိခွါအဒူးဒးသၣ်ဧါ. ဒီးနီၢ်ရၤဃ့လးစံးဝဲဒၣ်, အဂ့ၢ်မ့ၢ်ဒ်န့ၣ်ဒီး ကမံဃုာ်ဒီးနၤခဲမုၢ်နၤအံၤ လၢနဖိခွါအဒူးဒးသၣ်အဃိလီၤ.
တၢး၀၄ ၁/၁၅ ၂၈ ¶၇
လံာ်စီဆှံ အတၢ်ပာ်ဖျါလၢ လံာ် ၁ မိၤၡ့—၂
၃၀:၁၄, ၁၅—နီၢ်ရၤဃ့လး အတၢ်ခွဲးတၢ်ယာ်အိၣ်လၢ ကဒၢထီၣ်အဂီၢ်န့ၣ် ဘၣ်မနုၤအဃိ ဆီတလဲဝဲဒီး ဒူးဒးသၣ်တနီၤလဲၣ်. လၢပျၢၤန့ၣ် ဒူးဒးသၣ် ဘၣ်တၢ်သူအီၤ ဒ်ကသံၣ်မံ, ကသံၣ်မၤဘျါ ထူၣ်ပျၢ်ထုးတၢ်ဆါ မ့တမ့ၢ် မၤကိညၢ်ထီၣ်ဝဲအဂီၢ်လီၤ. တကးဒံးဘၣ် ပှၤနာ်ဝဲလၢ တၢ်သၣ်အံၤန့ၣ် ဒုးအိၣ်ထီၣ် တၢ်သးကတၢသ့ ဒီးမၤစၢၤဝဲ ဒ်သိးပှၤကအိၣ်ထီၣ် ဒီးဟုးသးအဂီၢ်လီၤ. (တၢ်. ၇:၁၃) လံာ်စီဆှံ တပာ်ဖျါထီၣ်ဝဲ နီၢ်ရၤဃ့လး အတၢ်တိာ်ပာ် သနာ်က့ အဝဲကနာ်ဝဲလၢ တၢ်သၣ်အံၤ ကမၤစၢၤအီၤဒ်သိး ကအိၣ်ထီၣ်ဒီးအဟုးအသး ဒီးသုတဘၣ်တၢ်ဒုၣ်ဒွဲၣ်လၢ အမ့ၢ်ပှၤတူာ်ဖိတဂ့ၤအဂီၢ်လီၤ. ဘၣ်ဆၣ် ပူၤကွံာ်စှၤနံၣ်ဝံၤအလီၢ်ခံ ယဟိဝၤယွၤ “အိးထီၣ်အဒၢလီၢ်” လီၤ.—၁ မိၤ. ၃၀:၂၂-၂၄.
တၢ်ဖးလံာ်စီဆှံ