ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါမ့ၤ ၄–၁၀
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ မိၤၡ့ ၃၆–၃၇
“စီၤယိၤသး ကဲထီၣ်ပှၤတဂၤလၢ ပှၤသးက့ၣ်အီၤ”
(၁ မိၤၡ့ ၃၇:၃, ၄) ဒီးစီၤအံၣ်စရ့လးအဲၣ်စီၤယိၤသးအါန့ၢ် အဖိခွါခဲလၢာ်တက့ၢ်လီၤ. အဂ့ၢ်ဒ်အံၤ, မ့ၢ်အသးပှၢ်အဖိခွါလီၤ. ဒီးမၤဆ့ဖးထီတဘ့ၣ်အိၣ်ဒီးအစုလၢအဂီၢ်လီၤ. ၄ ဒီးအဒီပုၢ်ဝဲၢ်တဖၣ်န့ၣ် ထံၣ်ဘၣ်ဝဲလၢ အပၢ်အဲၣ်အီၤအါန့ၢ်အအဲၣ် အဒီပုၢ်ဝဲၢ်ခဲလၢာ်တက့ၢ်, ဒီးသးဟ့အီၤလီၤ. ဒီးကတိၤမုာ်မုာ်ဒီးအီၤတကဲဘၣ်.
“ကနၣ်လၢတၢ်မံမီၢ်အံၤလၢယမံမီၢ်တက့ၢ်”
လံာ်စီဆှံတဲဝဲလၢ “အဒီပုၢ်ဝဲၢ်တဖၣ်န့ၣ် ထံၣ်ဘၣ်ဝဲလၢ အပၢ်အဲၣ်အီၤအါန့ၢ်အအဲၣ် အဒီပုၢ်ဝဲၢ်ခဲလၢာ်တက့ၢ်, ဒီးသးဟ့အီၤလီၤ. ဒီးကတိၤမုာ်မုာ်ဒီးအီၤတကဲဘၣ်.” (၁ မိၤၡ့ ၃၇:၄) စီၤယိၤသးအဝဲၢ်ခွါတဖၣ် သူၣ်က့ၣ်သးကါအီၤန့ၣ် ပနၢ်ပၢၢ်သ့လီၤ. ဘၣ်ဆၣ် အဝဲသ့ၣ် ပာ်ဃာ်အတၢ်သူၣ်က့ၣ်သးကါလၢ အသးပူၤန့ၣ် တအိၣ်ဒီးတၢ်ကူၣ်သ့ဘၣ်. (ကတိၤဒိ ၁၄:၃၀; ၂၇:၄) ဖဲနထံၣ်ဘၣ်လၢ ပှၤတဂၤဂၤ ပှၤရ့အီၤဂ့ၤဂ့ၤ ဒီးစံးပတြၢၤအီၤအခါ နသူၣ်က့ၣ်သးကါအီၤ အိၣ်တဘျီဘျီဧါ. မ့မ့ၢ်ဒ်န့ၣ်န့ၣ် သ့ၣ်နီၣ်ထီၣ်က့ၤ စီၤယိၤသးအဝဲၢ်တဖၣ်တက့ၢ်. အဝဲသ့ၣ်အိၣ်ဒီး တၢ်သူၣ်က့ၣ်သးကါအဃိ မၤဘၣ်တၢ်ကမၣ်ဖးဒိၣ်ဝံၤအလီၢ်ခံ ပီၢ်ယၢ်လီၤက့ၤအသးလီၤ. အဝဲသ့ၣ်တဖၣ်အဒိအတဲာ်န့ၣ် မ့ၢ်တၢ်ဟ့ၣ်ပလီၢ်လၢ ပမ့ၢ် “သးခုဃုာ်ဒီး” ပှၤလၢအသးခုတဖၣ်န့ၣ် မ့ၢ်ပအိၣ်ဒီးတၢ်ကူၣ်သ့လီၤ.—ရိမ့ၤ ၁၂:၁၅.
စီၤယိၤသး အဝဲၢ်တဖၣ်သးက့ၣ်အီၤန့ၣ် ကသ့ၣ်ညါဝဲသပှၢ်တၢၢ်လီၤ. အဃိ ဖဲအလဲၤလၢအဝဲၢ်တဖၣ် အအိၣ်အခါ မ့ၢ်အဘ့ၣ်လီၤတ့ၢ်ဝဲ အဆ့ဖးထီန့ၣ်ဧါ. ဘၣ်သ့ၣ်သ့ၣ် ကအဲၣ်ဒိးဘ့ၣ်လီၤတ့ၢ်ဝဲလီၤ. ဘၣ်ဆၣ် စီၤယၤကိာ် အဲၣ်ဒိးလၢ စီၤယိၤသး ကကၤဝဲဆ့ကၤအံၤ ဒ်အမ့ၢ်တၢ်ပနီၣ်လၢ အပၢ်ဘၣ်သးအီၤ ဒီးအဲၣ်အီၤန့ၣ်လီၤ. စီၤယိၤသး အဲၣ်ဒိးအိၣ်မူဝဲဒ် အပၢ်အတၢ်နာ်န့ၢ်အီၤအသိးအဃိ အဝဲကၤဝဲဆ့ကၤအံၤထီဘိလီၤ. ပဒိးန့ၢ်တၢ်မၤလိလၢ အဝဲအဒိအတဲာ်သ့လီၤ. ပပၢ်အိၣ်လၢမူခိၣ်န့ၣ် တကွၢ်ဒိၣ်ဆံးအါစှၤတၢ်ဘၣ် သနာ်က့ တဘျီတခီၣ် အဝဲဃုထၢထီၣ် ပှၤလၢအဘူၣ်ထီၣ်ဘါထီၣ်အီၤ အကျါတနီၤ ဒီးဟ့ၣ်ဝဲတၢ်ခွဲးတၢ်ယာ်လီၤဆီန့ၣ် အိၣ်ဝဲလီၤ. အဝဲမၤလိာ်ဝဲလၢ ကယဲၢ်ပှၤလၢ အဘူၣ်ထီၣ်ဘါထီၣ်အီၤခဲလၢာ် ကဘၣ်အိၣ်လီၤဆီဒီး ဟီၣ်ခိၣ်လၢအပှဲၤဒီး တၢ်သကဲာ်ပဝးလၢ အလီၤရၢၢ်အံၤန့ၣ်လီၤ. ဒ်စီၤယိၤသး အဆ့ကၤအသိး ခရံာ်ဖိနီၢ်နီၢ်တဖၣ် အတၢ်သကဲာ်ပဝးလၢအဂ့ၤန့ၣ် ပာ်ဖျါထီၣ်ဝဲလၢ အဝဲသ့ၣ်လီၤဆီဒီး ပှၤလၢအခိၣ်အဃၢၤတဖၣ်လီၤ. တဘျီတခီၣ် ခီဖျိလၢအဝဲသ့ၣ် အတၢ်သကဲာ်ပဝးအဃိ ပှၤသူၣ်က့ၣ်သးကါအီၤ အိၣ်စ့ၢ်ကီးလီၤ. (၁ ပ့းတရူး ၄:၄) ဖဲန့ၣ်အခါ ခရံာ်ဖိတဂၤ တကြၢးပာ်ဖျါထီၣ်အသးလၢ အမ့ၢ်ကစၢ်ယွၤအခ့အပှၤလၢၤဘၣ်န့ၣ်ဧါ. ဒ်စီၤယိၤသး တပာ်ခူသူၣ်အဆ့ကၤအသိး ပဝဲသ့ၣ်တဖၣ်စ့ၢ်ကီး ပကြၢးပာ်ဖျါထီၣ်ပသးလၢ ပမ့ၢ်ကစၢ်ယွၤအခ့အပှၤလီၤ.—လူၤကၣ် ၁၁:၃၃.
(၁ မိၤၡ့ ၃၇:၅-၉) ဒီးစီၤယိၤသးမံမီၢ်တၢ်မံမီၢ်, ဒီးစံးဘၣ်တဲဘၣ်အဒီပုၢ်ဝဲၢ်, ဒီးအဝဲသ့ၣ်သးဟ့အီၤအါန့ၢ်အန့ၣ်တက့ၢ်လီၤ. ၆ ဒီးစံးဘၣ်အီၤ, ကနၣ်လၢ်တၢ်မံမီၢ်အံၤလၢယမံမီၢ်တက့ၢ်. ၇ ဒီးကွၢ်ကွၢ်, ပဃ့ဘုကဒိၣ်လၢစံာ်ပူၤ, ဒီးကွၢ်ကွၢ်, ယဘုကဒိၣ်ဂဲၤဆၢထၢၣ်, ဒီးအိၣ်ဝဲထူၣ်ကလာ်လီၤ. ဒီးကွၢ်ကွၢ်, သုဘုကဒိၣ်အိၣ်ဝးတရံးဝဲ, ဒီးသကူးလီၤအသးလၢယဘုကဒိၣ်အမဲာ်ညါလီၤ. ၈ ဒီးအဒီပုၢ်ဝဲၢ်စံးဘၣ်အီၤ, နကကဲစီၤပၤလၢပဖီခိၣ်သပှၢ်တၢၢ်ဧါ, နကပၢပှၤသပှၢ်တၢၢ်ဧါ. ဒီးသးဟ့ဒံးအီၤနးန့ၢ်အန့ၣ်တက့ၢ်လၢအတၢ်မံမီၢ်အဃိ, ဒီးလၢအတၢ်ကတိၤအဃိလီၤ. ၉ ဒီးမံမီၢ်ဒံးတၢ်မံမီၢ်လၢအဂၤတမံၤ, ဒီးစံးဘၣ်တဲဘၣ်အဒီပုၢ်ဝဲၢ်, ဒီးစံးဝဲဒၣ်, ကွၢ်ကွၢ်, ယမံမီၢ်ဒံးတၢ်မံမီၢ်တမံၤ, ဒီးကွၢ်ကွၢ်, မုၢ်ဒီးလါ, ဒီးဆၣ်တဆံတဖျၢၣ်သကူးလီၤအသးလၢယမဲာ်ညါလီၤ.
(၁ မိၤၡ့ ၃၇:၁၁) ဒီးအဒီပုၢ်ဝဲၢ်တဖၣ်န့ၣ် သးက့ၣ်အီၤလီၤ. မ့မ့ၢ်အပၢ်တဂၤန့ၣ် တိၢ်န့ၢ်တၢ်ကတိၤတထံၣ်န့ၣ်လီၤ.
“ကနၣ်လၢတၢ်မံမီၢ်အံၤလၢယမံမီၢ်တက့ၢ်”
တၢ်မံမီၢ်အံၤန့ၣ် ဟဲလၢယဟိဝၤယွၤအအိၣ် ဒီးမ့ၢ်တၢ်တဲဆိပာ်လၢ ကမၤအသးလၢခါဆူညါလီၤ. ကစၢ်ယွၤအဲၣ်ဒိးလၢ စီၤယိၤသးကတဲဘၣ် ပှၤဂၤတၢ်ဂ့ၢ်လၢအမံမီၢ်ဝဲန့ၣ်လီၤ. ဒ်ဝံတဖၣ်ဘၣ်တဲဝဲ ကစၢ်ယွၤအတၢ်ကစီၣ် ဒီးအတၢ်စံၣ်ညီၣ်အကစီၣ်လၢ ပှၤလၢအခိၣ်ကိၤတဖၣ်အအိၣ်အသိး စီၤယိၤသးစ့ၢ်ကီး ဘၣ်တဲပၠးပှၤဂၤလၢ အတၢ်မံမီၢ်အဂ့ၢ်လီၤ.
စီၤယိၤသး တဲတၢ်ဒီးအဝဲၢ်တဖၣ်လၢ တၢ်ကူၣ်သ့အပူၤဒ်အံၤ ဝံသးစူၤ “ကနၣ်လၢတၢ်မံမီၢ်အံၤ လၢယမံမီၢ်တက့ၢ်.” အဝဲၢ်တဖၣ် နၢ်ပၢၢ်ဝဲတၢ်မံမီၢ်အံၤ အခီပညီလီၤ. အဃိ အဝဲသ့ၣ်တဖၣ် တဘၣ်သူၣ်ဘၣ်သးဝဲ တၢ်မံမီၢ်အံၤဘၣ်. အဝဲသ့ၣ် စံးဆၢက့ၤအီၤလၢ “နကကဲစီၤပၤလၢ ပဖီခိၣ်သပှၢ်တၢၢ်ဧါ, နကပၢပှၤသပှၢ်တၢၢ်ဧါ.” လံာ်စီဆှံ ဆဲးပာ်ဖျါဝဲလၢ အဝဲၢ်တဖၣ် “သးဟ့ဒံးအီၤ နးန့ၢ်အန့ၣ်တက့ၢ်လၢ အတၢ်မံမီၢ်အဃိ ဒီးလၢအတၢ်ကတိၤအဃိလီၤ.” ဖဲစီၤယိၤသး တဲပၠးကဒီးအပၢ် ဒီးအဝဲၢ်တဖၣ်လၢ အတၢ်မံမီၢ်ခံခါတခါအဂ့ၢ်အခါ အဝဲၢ်တဖၣ်သးဟ့အီၤ အါန့ၢ်အလီၢ်လီၤ. ပဖးဘၣ်လၢ “အပၢ်သိၣ်ဃီၣ်အီၤ ဒီးစံးဘၣ်အီၤ, တၢ်မံမီၢ်လၢနမံမီၢ်အံၤမ့ၢ်ဒ်လဲၣ်. ယၤ, ဒီးနမိၢ်, ဒီးနဒီပုၢ်ဝဲၢ်သ့ၣ်တဖၣ် ကဟဲတီၤလီၤကဒွံကျိာ်လၢ နမဲာ်ညါသပှၢ်တၢၢ်ဧါ.” ဘၣ်ဆၣ် စီၤယၤကိာ်န့ၣ် တသးပ့ၤနီၣ်ဝဲ တၢ်ဂ့ၢ်အဝဲန့ၣ်ဘၣ်, ဆိကမိၣ်ထံဝဲလီၤ. ဘၣ်သ့ၣ်သ့ၣ် ကမ့ၢ်ယဟိဝၤယွၤ ဆဲးကျိးဒီး စီၤယိၤသးန့ၣ်ဧါ.—၁ မိၤၡ့ ၃၇:၆, ၈, ၁၀, ၁၁.
ပှၤလၢအဟီဆိပာ်တၢ်လၢ ပှၤအါဂၤတဘၣ်သူၣ်ဘၣ်သးဝဲအဃိ ပှၤမၤနးမၤဖှီၣ်အီၤအကျါန့ၣ် စီၤယိၤသး တမ့ၢ်ပှၤအဆိကတၢၢ် ဒီးပှၤအလီၢ်ခံကတၢၢ်တဂၤစ့ၢ်ကီးဘၣ်. ယ့ၣ်ၡူးမ့ၢ် ပှၤအဂ့ၤကတၢၢ်တဂၤလၢ အတဲဘၣ်ပှၤဂၤလၢတၢ်ကစီၣ်ဒ်န့ၣ်လီၤ. ယ့ၣ်ၡူး တဲဘၣ်အပျဲၢ်အဘီၣ်တဖၣ်လၢ “အဝဲသ့ၣ်မ့ၢ်မၤအၢယၤဒီး, ကမၤအၢသုစ့ၢ်ကီးလီၤ.” (ယိၤဟၣ် ၁၅:၂၀) ခရံာ်ဖိသးစၢ်မ့ၢ်ဂ့ၤ, သးပှၢ်မ့ၢ်ဂ့ၤ မၤလိန့ၢ်တၢ်သ့အါမးလၢ သးစၢ်စီၤယိၤသး အတၢ်နာ်ဒီး အတၢ်သူၣ်ဒူသးဒူန့ၣ်လီၤ.
(၁ မိၤၡ့ ၃၇:၂၃, ၂၄) ဒီးတုၤစီၤယိၤသးဟဲဆူအဒီပုၢ်ဝဲၢ်အအိၣ်ဒီး, အဝဲသ့ၣ်ဘ့ၣ်ကွံာ်အဆ့ဖးထီ အိၣ်ဒီးအစုတဘ့ၣ်န့ၣ်လၢ အလိၤလီၤ. ၂၄ ဒီးဟံးန့ၢ်အီၤ, ဒီးတ့ၢ်လီၤကွံာ်အီၤလၢတၢ်ပူၤလီၤ. ဒီးတၢ်ပူၤန့ၣ်အိၣ်ကလီလီၤ. ထံတအိၣ်ဘၣ်လၢ အပူၤဘၣ်.
(၁ မိၤၡ့ ၃၇:၂၈) ဒီးပှၤမံးဒယၣ်ဖိ, ပှၤကၤတၢ်ဖိ, လဲၤပူၤလၢအအိၣ်, ဒီးဒီးအဝဲသ့ၣ်စဲၤထီၣ်, ဒီးစိာ်ထီၣ်စီၤယိၤသးလၢတၢ်ပူၤ, ဒီးဆါကွံာ်စီၤယိၤသးလၢ ပှၤယံးၡမၤဧ့လးဖိလၢ စ့ခံဆံအဂီၢ်လီၤ. ဒီးအဝဲသ့ၣ်ဟဲစိာ်စီၤယိၤသးဆူအဲၤကူပတူးအပူၤလီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၁ မိၤၡ့ ၃၆:၁) ဒီးအဝဲအံၤမ့ၢ်စီၤဧ့ၡီၤအစၢၤအသွဲၣ် (အဝဲန့ၣ်မ့ၢ်အဒိၣ်.)
it-1 ၆၇၈
အဒိၣ်
အဒိၣ် [အဂီၤ], ပှၤအဒိၣ်ဖိ
အဒိၣ်မ့ၢ်ဝဲ စီၤဧ့ၤၡီၤလၢအဒီတဃံာ်ဒီး စီၤယၤကိာ် အမံၤခံဖျၢၣ်တဖျၢၣ်လီၤ. (၁ မိၤ. ၃၆:၁) မ့ၢ်လၢအဝဲ ဆါလီၤကွံာ် အတၢ်ဝဲၢ်ကိအလီၢ်လၢ ကသူတခွးအဃိ ဘၣ်တၢ်ကိးအီၤဒ်န့ၣ်လီၤ. (၁ မိၤ. ၂၅:၃၀-၃၄) စီၤဧ့ၤၡီၤ အိၣ်ဖျဲၣ်အခါ ဂီၤဒီတဂၤညါ (၁ မိၤ. ၂၅:၂၅), ဒီးတၢ်လီၢ်လၢ အဝဲဒီးအစၢၤအသွဲၣ်တဖၣ် န့ၢ်သါဘၣ်ဝဲစ့ၢ်ကီးဂီၤဝဲလီၤ.
(၁ မိၤၡ့ ၃၇:၂၉-၃၂) ဒီးစီၤရူၤဘ့ၣ်က့ၤက့ၤဝဲဆူတၢ်ပူၤ, ဒီးကွၢ်ကွၢ်, စီၤယိၤသးတအိၣ်ဘၣ် လၢတၢ်ပူၤဘၣ်, ဒီးဖှီဝဲအယၣ်, ၃၀ ဒီးက့ၤကဒါက့ၤဆူအဒီပုၢ်ဝဲၢ်အအိၣ်, ဒီးစံးဝဲဒၣ်, ဖိသၣ်ပိာ်ခွါတဂၤန့ၣ်တအိၣ်လၢၤဘၣ်. ဒီးယဲဒၣ်အံၤယကလဲၤယဲဖဲလဲၣ်. ၃၁ ဒီးအဝဲသ့ၣ်ဟံးန့ၢ် စီၤယိၤသးအဆ့တဘ့ၣ်, ဒီးမၤသံမဲာ်တဲးလဲးဖိတဒု, ဒီးဘျၢလီၤဆ့တဘ့ၣ်န့ၣ်လၢ အသွံၣ်ပူၤ, ၃၂ ဒီးမၢပှၤက့ၤစိာ်ဆ့ဖးထီအိၣ်ဒီးအစုန့ၣ်, ဒီးလဲၤစိာ်ဝဲဆူအပၢ်အအိၣ်, ဒီးစံးဝဲဒၣ်, တၢ်အံၤတဘ့ၣ်ပထံၣ်န့ၢ်အီၤလီၤ. မ့ၢ်နဖိခွါအဆ့ဧါ, တမ့ၢ်ဘၣ်ဧါန့ၣ်ကွၢ်တက့ၢ်
it-1 ၅၆၁–၅၆၂
တၢ်ကွၢ်ထွဲတၢ်
ဖဲပှၤကွၢ်သိ မ့တမ့ၢ် ပှၤကွၢ်ထွဲ ဆၣ်ဖိကီၢ်ဖိတဂၤ တဲဝဲလၢ အဝဲကကွၢ် သိတဖု မ့တမ့ၢ် ဆၣ်ဖိကီၢ်ဖိတဖုအခါ အဝဲကဲထီၣ်ပှၤတဂၤလၢ အိၣ်ဒီးမူဒါလၢအဖိးသဲစးလၢ ကကွၢ်ထွဲဝဲ ဆၣ်ဖိကီၢ်ဖိတဖၣ်အံၤလီၤ. အဝဲဘၣ်အုၣ်ကီၤဝဲ အကစၢ်လၢ ကဃုဒုးအီၣ်ဝဲအဆၣ် ဒီးကဒီသဒၢဝဲလၢ တၢ်ဟုၣ်တၢ်ဘျၣ် ဒီးတၢ်မ့ၢ်ဟုၣ်အီၤန့ၣ် ကလိးက့ၤဝဲလီၤ. ဘၣ်ဆၣ် တၢ်လၢအဝဲဟံးန့ၢ်ဝဲမူဒါ တသ့ဘၣ်န့ၣ် အိၣ်ဝဲလီၤ. တၢ်မၤအသးလၢ အဝဲဟံးန့ၢ်ဝဲဒၣ်မူဒါတသ့တဖၣ် ဒ်သိးဒီး တၢ်မံးလာ်လၢ ပှၢ်လၢ်ကျါမ့ၢ်အ့ၣ်သံအီၤန့ၣ် အဝဲတလိၣ်ဟံးန့ၢ်ဝဲမူဒါဘၣ်. ဒ်သိးအဝဲကပူၤဒီး တၢ်ကမၣ်အဂီၢ် ကဘၣ်ပာ်ဖျါထီၣ် တၢ်အုၣ်အသးလၢ ဆၣ်ဖိကီၢ်ဖိအသံစိၣ် လၢအကစၢ်အအိၣ်လီၤ. တၢ်မၤကစၢ် ကသမံသမိးဝဲ တၢ်အုၣ်အသးဒီး ကဆၢတဲာ်ဝဲလၢ အတၢ်ကမၣ်တအိၣ်ဘၣ်န့ၣ်လီၤ.
တၢ်သိၣ်တၢ်သီမိၢ်ပှၢ်အံၤ ဘၣ်ထွဲလိာ်အသးဒီး တၢ်စုလီၢ်ခီၣ်ခိၣ်လၢ ပှၤဘၣ်ပၢၤဝဲခဲလၢာ်လီၤ. အဒိ, လၢဟံၣ်ဃီပူၤ ဖိဝဲၢ်ကိန့ၣ် အိၣ်ဒီးမူဒါလၢ ကဘၣ်ဒီသဒၢဝဲ အပုၢ်တဖၣ်လီၤ. အဃိ ဒ် ၁ မိၤၡ့ ၃၇:၁၈-၃၀ ပာ်ဖျါဝဲအသိး ဖဲစီၤရူၤဘ့ၣ် အဒီပုၢ်ဝဲၢ်ခွါတဖၣ် ကူၣ်ထီၣ်ဝဲလၢ ကမၤသံစီၤယိၤသးအခါ အဝဲဘၣ်ယိၣ်တၢ်န့ၣ် ပနၢ်ပၢၢ်သ့လီၤ. အဝဲတဲဝဲလၢ “မ်ပသုတကျီသံအသးတဂ့ၤ. . . လူလီၤတၢ်သွံၣ်တဂ့ၤ, . . . သုသုတပာ်သုစုလၢအလိၤတဂ့ၤ, ဒ်သိးအကမၤပူၤမၤဖျဲးအီၤ ဒီးအစုပူၤလၢ အကဟ့ၣ်က့ၤအီၤလၢအပၢ်အဂ့ၢ်လီၤ.” ဖဲစီၤရူၤဘ့ၣ် တထံၣ်ဝဲ စီၤယိၤသးလၢၤဘၣ်အခါ အဝဲအသးကိၢ်တၢ်ဒိၣ်မးအဃိ “ဖှီဝဲအယၣ်” ဒီးကိးထီၣ်ဝဲလၢ “ဖိသၣ်ပိာ်ခွါတဂၤန့ၣ်တအိၣ်လၢၤဘၣ်. ဒီးယဲဒၣ်အံၤယကလဲၤယဲဖဲလဲၣ်.” အဝဲသ့ၣ်ညါဝဲလၢ ကဘၣ်ဟံးန့ၢ်ဝဲမူဒါလၢ စီၤယိၤသးလီၤမၢ်အဃိန့ၣ်လီၤ. ဒ်သိးအဝဲ ကပူၤဒီးတၢ်ကမၣ်အဂီၢ် အဒီပုၢ်ဝဲၢ်တဖၣ် တဲလံၣ်တဲလီတၢ်လၢ ဆၣ်ဖိကီၢ်ဖိလၢပှၢ်လၢ်ကျါတဒု အ့ၣ်သံကွံာ် စီၤယိၤသးန့ၣ်လီၤ. အဝဲသ့ၣ် ဘျၢလီၤဝဲ စီၤယိၤသးအဆ့ကၤလၢ မဲာ်တဲးလဲးအသွံၣ်ပူၤ ဒီးဒုးနဲၣ်ဝဲ တၢ်အုၣ်အသးလၢ စီၤယၤကိာ်န့ၣ်လီၤ. မ့ၢ်လၢ စီၤယၤကိာ်ထံၣ်ဝဲ တၢ်အုၣ်သးလၢအမ့ၢ် စီၤယိၤသးအဆ့ကၤလၢ အဘၣ်အၢဒီးတၢ်သွံၣ်အဃိ ပျၢ်ဝဲစီၤရူၤဘ့ၤအတၢ်ကမၣ် ဒီးနာ်ဝဲလၢ စီၤယိၤသးသံလံန့ၣ်လီၤ.—၁ မိၤ. ၃၇:၃၁–၃၃.
တၢ်ဖးလံာ်စီဆှံ
(၁ မိၤၡ့ ၃၆:၁-၁၉) ဒီးအဝဲအံၤမ့ၢ် စီၤဧ့ၡီၤအစၢၤအသွဲၣ် (အဝဲန့ၣ်မ့ၢ်အဒိၣ်.) ၂ စီၤဧ့ၡီၤန့ၢ်မါလၢ ကနၤဧၣ်အဖိမုၣ်အကျါန့ၣ်, ပှၤဃ့ၤသးဖိ စီၤအ့လိၣ်အဖိမုၣ် နီၢ်ဧဒၤတဂၤ, ဒီးနီၢ်အဟိးလံးဘါမၤ, စီၤဧနၤအဖိမုၣ်, ပှၤဃံၤဝံၤဖိ စီၤစံးဘဧိၣ်အဖိခွါန့ၣ်လီၤ. ၃ ဒီးစီၤယံးၡမၤဧ့လးအဖိမုၣ်, စီၤနဘါယိးအဒီပုၢ်ဝဲၢ်မုၣ်, နီၢ်ဘၤစမးတဂၤလီၤ. ၄ ဒီးနီၢ်ဧဒၤန့ၣ်ဆံးစၢ်န့ၢ် စီၤအလံဖးစးန့ၣ်လၢ စီၤဧ့ၡီၤအဂီၢ်, ဒီးနီၢ်ဘၤစမးန့ၣ် ဆံးစၢ်န့ၢ်စီၤရဧူၤအ့လး, ၅ ဒီးနီၢ်အဟိးလံးဘါမၤန့ၣ် ဆံးစၢ်န့ၢ်စီၤယဧူၤၡး, ဒီးစီၤယၤဧလၣ်, ဒီးစီၤကိးရးလီၤ. အဝဲသ့ၣ်တဖၣ်န့ၣ် မ့ၢ်စီၤဧ့ၡီၤအဖိခွါလၢ အအိၣ်ဖျဲၣ်လၢအဂီၢ် လၢကီၢ်ကနၤဧၣ်အပူၤလီၤ. ၆ ဒီးစီၤဧ့ၡီၤဟံးန့ၢ်အမါ, ဒီးအဖိခွါ, ဒီးအဖိမုၣ်, ဒီးကယဲၢ်ပှၤအသးလၢ အဟံၣ်ပူၤခဲလၢာ်, ဒီးအသိဒီးမဲာ်တဲးလဲး, ဒီးအဆၣ်ဖိကီၢ်ဖိအဒၢခဲလၢာ်, ဒီးကယဲၢ်အစုလီၢ်ခီၣ်ခိၣ်လၢ အန့ၢ်ဘၣ်လၢကီၢ်ကနၤဧၣ်အပူၤ, ဒီးဟးဆူကီၢ်ယံၤ ဒီးအဒီပုၢ်ဝဲၢ် စီၤယၤကိာ်တဘ့ၣ်အပူၤလီၤ. ၇ အဂ့ၢ်ဒ်အံၤ, အတၢ်ဖိတၢ်လံၤအါ တုၤအအိၣ်တပူၤဃီတသ့ဘၣ်လီၤ. ဒီးကီၢ်လၢအအိၣ်တမှံၤလၢအပူၤ အိၣ်ဒီးအီၤတသ့ဘၣ်လၢ အဆၣ်ဖိကီၢ်ဖိအဒၢအဃိလီၤ. ၈ ဒီးစီၤဧ့ၡီၤအိၣ်ဝဲဆိးဝဲလၢ ကစၢၢ်စ့ဧ့ၢ်အလိၤလီၤ. စီၤဧ့ၡီၤန့ၣ်မ့ၢ်အဒိၣ်လီၤ. ၉ ဒီးအအံၤမ့ၢ်ပှၤအဒိၣ်ဖိလၢ ကစၢၢ်စ့ဧ့ၢ်အလိၤတဖၣ်အပၢ် စီၤဧ့ၡီၤအစၢၤအသွဲၣ်လီၤ. ၁၀ အအံၤမ့ၢ်စီၤဧ့ၡီၤအဖိခွါအမံၤ, စီၤဧ့ၡီၤအမါ နီၢ်ဧဒၤအဖိခွါ စီၤအလံဖးစးတဂၤ, ဒီးစီၤဧ့ၡီၤအမါ နီၢ်ဘၤစမးအဖိခွါ စီၤရဧူၤအ့လးတဂၤလီၤ. ၁၁ ဒီးစီၤအလံဖးစး အဖိခွါမ့ၢ်စီၤတ့ၤမၣ်, ဒီးစီၤအိမၢ်, စီၤစဖိၤ, ဒီးစီၤကၤတၣ်, ဒီးစီၤကနးစးလီၤ. ၁၂ ဒီးနီၢ်တံးမနၤမ့ၢ်စီၤဧ့ၡီၤအဖိခွါ စီၤအလံဖးစးအသံၣ်မါလီၤ. ဒီးဆံးစၢ်န့ၢ်စီၤဧမၤလ့းလၢ စီၤအလံဖးစးအဂီၢ်လီၤ. အဝဲသ့ၣ်တဖၣ်န့ၣ် မ့ၢ်စီၤဧ့ၡီၤအမါနီၢ်ဧဒၤအဖိခွါလီၤ. ၁၃ ဒီးအအံၤမ့ၢ်စီၤရဧူၤအ့လးအဖိခွါ, စီၤနၤဃး, ဒီးစီၤစ့ရၤ, စီၤၡးမၤ, ဒီးစီၤမံစၤလီၤ. အဝဲသ့ၣ်တဖၣ်န့ၣ် မ့ၢ်စီၤဧ့ၡီၤအမါ နီၢ်ဘၤစမးအဖိခွါလီၤ. ၁၄ ဒီးအအံၤမ့ၢ် စီၤစံးဘဧိၣ်အဖိခွါစီၤဧနၤအဖိမုၣ်, စီၤဧ့ၡီၤအမါ နီၢ်အဟိးလံးဘါမၤအဖိခွါ, ဒီးဆံးစၢ်န့ၢ်စီၤယဧူၡၢ်, ဒီးစီၤယၤဧလၣ်, ဒီးစီၤကိးရးလၢစီၤဧ့ၡီၤအဂီၢ်လီၤ. ၁၅ ဒီးအအံၤမ့ၢ်စီၤဧ့ၡီၤအဖိခွါ အစကီၤတဖၣ်, လၢစီၤဧ့ၡီၤအဖိဝဲၢ်ကိ စီၤအလံဖးစးအဖိခွါအကျါ, စကီၤတ့ၤမၣ်, စကီၤအိမၢ်, စကီၤစဖိၤ, စကီၤကနးစး, ၁၆ စကီၤကိးရး, စကီၤကၤတၣ်, စကီၤဧမၤလ့းလီၤ. အဝဲသ့ၣ်တဖၣ် န့ၣ်မ့ၢ်စီၤအလံဖးစးအစကီၤ အိၣ်လၢကီၢ်အဒိၣ်အပူၤလီၤ. အဝဲသ့ၣ်န့ၣ် မ့ၢ်နီၢ်ဧဒၤအဖိခွါလီၤ. ၁၇ ဒီးအအံၤမ့ၢ်စီၤဧ့ၡီၤအဖိခွါ စီၤရဧူၤအ့လးအဖိခွါ, စကီၤနၤဃး, စကီၤစ့ရၤ, စကီၤၡးမၤ, စကီၤမံစၤလီၤ. အဝဲသ့ၣ်တဖၣ်န့ၣ် မ့ၢ်စီၤရဧူၤအ့လးအစကီၤတဖၣ် လၢကီၢ်အဒိၣ်အပူၤလီၤ. အဝဲသ့ၣ်န့ၣ်မ့ၢ် စီၤဧ့ၡီၤအမါနီၢ်ဘၤစမးအဖိခွါလီၤ. ၁၈ ဒီးအအံၤမ့ၢ်စီၤဧ့ၡီၤ အမါနီၢ်အဟိးလံးဘါမၤအဖိခွါ, စကီၤယဧူၢ်ၡး, စကီၤယၤဧလၣ်, စကီၤကိးရးလီၤ. အဝဲသ့ၣ်တဖၣ်န့ၣ်မ့ၢ် စီၤဧနၤအဖိမုၣ် စီၤဧ့ၡီၤအမါ နီၢ်အဟိးလံးဘါမၤအစကီၤတဖၣ်န့ၣ်လီၤ. ၁၉ အဝဲသ့ၣ်တဖၣ်န့ၣ် မ့ၢ်စီၤဧ့ၡီၤအဖိခွါ (အဝဲဒၣ်မ့ၢ်အဒိၣ်) ဒီးအဝဲသ့ၣ်တဖၣ်န့ၣ်မ့ၢ်စကီၤတဖၣ်လီၤ.
တၢး၀၂ ၁၀/၁၅ ၃၀-၃၁
ဘၣ်မနုၤအဃိ ခရံာ်ဖိတဖၣ် ကြၢးအိၣ်ဒီး တၢ်သူၣ်ဆူၣ်သးဆူၣ်လၢ ယဟိဝၤယွၤအဂီၢ်လဲၣ်.
ပအိၣ်ဒီး တၢ်သူၣ်ဆူၣ်သးဆူၣ်လၢ တၢ်ဘူၣ်ထီၣ်ဘါထီၣ် စီဆှံအဂီၢ်န့ၣ် ကြၢးဝဲဘၣ်ဝဲလီၤ. ဖဲပသးစၢၢ်ဆၢထဲဒၣ် ပနီၢ်ကစၢ်အတၢ်ခွဲးတၢ်ယာ် ဒီးတၢ်မံၤဂ့ၤသၣ်ဂ့ၤအခါ ပမ့ၢ်အိၣ်ဒီး တၢ်သူၣ်ဆူၣ်သးဆူၣ်လၢ ကစၢ်ယွၤအဂီၢ်န့ၣ် ကမၤစၢၤပှၤလၢ ပကသးစၢၢ်ဆၢ ယဟိဝၤယွၤလီၤ. ပမ့ၢ်မၤဒ်န့ၣ်န့ၣ် ကမၤစၢၤပှၤ ဒ်သိးပကစံၣ်တဲၤတဲလီၤ တၢ်မ့ၢ်တၢ်တီ ဘၣ်ဃးဒီးကစၢ်ယွၤ ဒီးဃုကျဲလၢပကဆီၣ်ထွဲမၤစၢၤ အပှၤဂီၢ်မုၢ်အဂီၢ်လီၤ.
အၤခံၤခိၣ်လၢအမ့ၢ် ပှၤစံၣ်တဲၤတဲလီၤတၢ်လၢ ဆၢကတီၢ်လၢပှဲၤတဂၤ ထံၣ်ဘၣ်ဒီး ဟံၣ်ကစၢ်ပိာ်မုၣ်လၢ အကိးဃါအီၤ ဆူၣ်ဆူၣ်ကိၤကိၤတဂၤလီၤ. မ့ၢ်လၢပိာ်မုၣ်အံၤ အိၣ်ဒီးတၢ်ထံၣ်ကမၣ်လၢ ကစၢ်ယွၤအတၢ်မၤလိာ်လၢ ဘၣ်ဃးဒီးတၢ်သွံၣ်အဃိလီၤ. အၤခံၤခိၣ် ဒီသဒၢက့ၤဝဲ ကစၢ်ယွၤအကလုၢ်ကထါလၢ တၢ်ကူၣ်သ့အပူၤ ဒီးတဲဘၣ်အီၤ တၢ်ဆူးတၢ်ဆါလၢ ဟဲအိၣ်ထီၣ် ခီဖျိတၢ်သွီပှၤသွံၣ်အဃိ ဒီးတၢ်ကီတၢ်ခဲအဂၤတဖၣ်အဂ့ၢ်န့ၣ်လီၤ. လၢခံ အၤခံၤခိၣ် သ့ၣ်ညါက့ၤဝဲလၢ ပိာ်မုၣ်အံၤထီဒါအီၤန့ၣ် မ့ၢ်လၢတနာ်ဝဲလၢ တၢ်ဘၣ်တ့ကစၢ်အိၣ်အဃိလီၤ. လၢတၢ်န့ၣ်အဃိ အၤခံၤခိၣ် သးအိၣ်တဲဘၣ်အီၤ ယဟိဝၤယွၤအဂ့ၢ်ဒိၣ်မးအဃိ အဝဲတဲဝဲတၢ်ဂ့ၢ်လၢအဂၤလၢ ဘၣ်ဃးဒီး တၢ်ဘၣ်တ့တဖၣ်န့ၣ် မၤစၢၤပှၤလၢ ပကနာ်လၢကစၢ်ယွၤအိၣ်လီၤ. မ့ၢ်လၢအၤခံၤခိၣ် တဲဆၢက့ၤဝဲလၢ တၢ်သူၣ်ဒူသးဒူအပူၤအဃိ အဝဲမၤလီၤမၢ်ကွံာ်ဝဲ ဟံၣ်ကစၢ်မုၣ်အံၤ အတၢ်ထံၣ်လၢအကမၣ်န့ၢ်ဝဲ တကးဒံးဘၣ် အဝဲမၤဝဲ တၢ်မၤလိလံာ်စီဆှံဒီးအီၤန့ၢ်စ့ၢ်ကီးလီၤ. ခဲအံၤ ဟံၣ်ကစၢ်မုၣ်လၢ အသးထီၣ်တၢ်တဂၤအံၤ ကဲထီၣ်ဝဲပှၤတဂၤလၢ အစံးထီၣ်ပတြၢၤ ယဟိဝၤယွၤလံ.
တၢ်သူၣ်ဆူၣ်သးဆူၣ်လၢ တၢ်ဘူၣ်ထီၣ်ဘါထီၣ်စီဆှံအဂီၢ်န့ၣ် မၤစၢၤပှၤဒ်သိး ပကအိၣ်ဆိးသီ ဒီးပကထံၣ်န့ၢ်တၢ်ခွဲးတၢ်ယာ်လၢ ပကတဲဘၣ်ပှၤဂၤလၢ ပတၢ်နာ်အဂ့ၢ် လၢတၢ်မၤလီၢ်, ကၠိ, ကျး မ့တမ့ၢ် ဖဲပလဲၤတၢ်က့ၤတၢ်အခါန့ၣ်လီၤ. အဒိ မံၤဒိရံၤန့ၣ် ပာ်လီၤအသးလၢ ကတဲပၠးဝဲ အတၢ်နာ်အဂ့ၢ်လၢ ပှၤလၢအမၤသကိးတၢ်ဒီးအီၤတဖၣ်န့ၣ်လီၤ. ပိာ်မုၣ်လၢ အသးကအိၣ် ၄၀ ဘျဲၣ်တဂၤတဲအီၤလၢ အဝဲတအဲၣ်ဒိး မၤဘၣ်ဃးအသးဒီး ယဟိဝၤပှၤအုၣ်အသးတဖၣ်ဘၣ်. လၢခံတယံာ်တမီၢ် ဖဲဒီပုၢ်ဝဲၢ်မုၣ်တဲသကိးတၢ်ဒီး ပိာ်မုၣ်အံၤအခါ နၢ်ဟူဘၣ်ဝဲလၢ အဝဲကဒူးကဒ့ၣ်တၢ် ဘၣ်ဃးဒီး အဖိမုၣ်ဖိအဂ့ၢ်န့ၣ်လီၤ. မံၤဒိရံၤ ပၠးအီၤ လံာ်တဘ့ၣ် (Questions Young People Ask—Answers That Work) ဒီးတဲဘၣ်အီၤလၢ အအဲၣ်ဒိးမၤလိသကိး လံာ်အံၤဒီးအဖိမုၣ်ဖိ ဒီးအဲၣ်ဒိးမၤစၢၤအီၤန့ၣ်လီၤ. အဝဲသ့ၣ် စးထီၣ်မၤလိသကိးတၢ် သနာ်က့ ပိာ်မုၣ်အံၤ တဟဲနုာ်လီၤတဲသကိးတၢ်ဒီး အဝဲသ့ၣ်ဘၣ်. တၢ်န့ၣ်အလီၢ်ခံ မံၤဒိရံၤ ပာ်လီၤအသးလၢ ကပၠးအီၤ တၢ်ဂီၤမူ (Jehovah’s Witnesses—The Organization Behind the Name) တခါလီၤ. တၢ်ဂီၤမူအံၤ မၤလီၤမၢ်ကွံာ် ပိာ်မုၣ်အံၤအတၢ်ထံၣ်လၢ အကမၣ်တဖၣ်လီၤ. အဝဲဘၣ်သူၣ်ဘၣ်သးဝဲ တၢ်လၢအထံၣ်ဘၣ်ဝဲတဖၣ် ဒီးတဲဝဲလၢ “ယအဲၣ်ဒိးလီၤဂာ်ဒီး ယဟိဝၤယွၤပှၤအုၣ်အသးတဖၣ်လီၤ.’’ လၢခံ အဝဲဒီးအဖိမုၣ်န့ၣ် မၤလိလံာ်စီဆှံ ဒ်သိးသိးလီၤ.
တၢ်သူၣ်ဆူၣ်သးဆူၣ် ကြၢးအိၣ်လၢ တၢ်အိၣ်ဖှိၣ်ပူၤစ့ၢ်ကီးလီၤ. တၢ်သူၣ်ဆူၣ်သးဆူၣ်အံၤ မၤဒိၣ်ထီၣ်အါထီၣ် တၢ်အဲၣ်ဒီး တၢ်သူၣ်အိၣ်သးအိၣ်လၢ တဂၤဒီးတဂၤအဖီခိၣ်လီၤ. ကဲထီၣ်တၢ်မၤစၢၤလၢ ပကတြီဆၢ တၢ်လၢကမၤလီၤမုၢ်လီၤဖးပှၤ ဒ်သိးဒီး တၢ်တဲအီၣ် ပဒီပုၢ်ဝဲၢ်တဖၣ်အဂ့ၢ် ဒီးတၢ်ဆိကမိၣ်လၢ အဘၣ်ထွဲဒီး ပှၤလၢအစူးကွံာ်ညိကွံာ်တၢ်နာ်တဖၣ်လီၤ. တဘျီတခီၣ် အလီၢ်ကအိၣ်လၢ တၢ်အိၣ်ဖှိၣ်သးပှၢ်တဖၣ် ကဘၣ်သိၣ်ဃီၣ် ပှၤလၢအမၤတၢ်ကမၣ်တဂၤန့ၣ်လီၤ. ဖဲန့ၣ်အခါ ပမ့ၢ်အိၣ်ဒီး တၢ်သူၣ်ဆူၣ်သးဆူၣ်လၢ ယွၤအဂီၢ်န့ၣ် ပကတူၢ်လိာ် တၢ်အိၣ်ဖှိၣ်သးပှၢ်တဖၣ် အတၢ်ဆၢတဲာ်န့ၣ်လီၤ. (၁ ကရံၣ်သူး ၅:၁၁-၁၃; ၁ တံၤမသ့း ၅:၂၀) စီၤပီလူး အိၣ်ဒီးတၢ်သူၣ်ဆူၣ်သးဆူၣ်လၢ ဒီပုၢ်ဝဲၢ်လၢ ကရံၣ်သူးတၢ်အိၣ်ဖှိၣ်တဖၣ်အဂီၢ်န့ၣ် အဝဲကွဲဝဲလၢ “အဂ့ၢ်ဒ်အံၤ, ယသးက့ၣ်သုလၢ တၢ်သးက့ၣ်ဘၣ်ဃးဒီးယွၤလီၤ. အဂ့ၢ်ဒ်အံၤ, ယဒုးအဲၣ်တီသုဒီးဝၤတဂၤ, ဒ်သိးယကပာ်သုလၢ မုၣ်ကနီၤစီဆှံလၢ ခရံာ်အမဲာ်ညါလီၤ.” (၂ ကရံၣ်သူး ၁၁:၂) အဃိ ပတၢ်သူၣ်ဆူၣ်သးဆူၣ်န့ၣ် ကထိၣ်ဟူးထိၣ်ဂဲၤထီၣ်ပှၤလၢ ပကမၤအဂ့ၤကတၢၢ် ဒ်သိးပကဒီသဒၢ တၢ်အိၣ်ဖှိၣ်ဖိတဖၣ်လၢ ဘၣ်ဃးဒီး တၢ်သိၣ်လိလၢအကမၣ် ဒီးကဆဲးအိၣ်ကဆှီလၢ နီၢ်ခိဒီးနီၢ်သးအဂီၢ်န့ၣ်လီၤ.
တၢ်သူၣ်ဆူၣ်သးဆူၣ် လၢအကြၢးအဘၣ်, တၢ်သူၣ်ဆူၣ်သးဆူၣ်လၢ ယွၤအဂီၢ်န့ၣ် အဘျုးအိၣ်လၢ ပှၤဂၤအဂီၢ်လီၤ. ပမ့ၢ်အိၣ်ဒီး တၢ်သူၣ်ဆူၣ်သးဆူၣ်န့ၣ် ပကဒိးန့ၢ်ဘၣ် ယဟိဝၤယွၤအတၢ်ဘၣ်သး ဒီးမ့ၢ်စ့ၢ်ကီး တၢ်ဂ့ၤတၢ်ဝါတမံၤလၢ ကြၢးအိၣ်ဒီးခရံာ်ဖိလၢ မုၢ်မဆါတနံၤအံၤတဖၣ်လီၤ.—ယိၤဟၣ် ၂:၁၇.
လါမ့ၤ ၁၁–၁၇
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ မိၤၡ့ ၃၈–၃၉
“ယဟိဝၤယွၤ တလဲၤသဒၣ် စီၤယိၤသးဘၣ်”
(၁ မိၤၡ့ ၃၉:၁) ဒီးပှၤလဲၤစိာ်လီၤ စီၤယိၤသးဆူ ကီၢ်အဲၤကူပတူးအပူၤ, ဒီးပှၤအဲၤကူပတူးဖိ, ဖၤရိၤအပှၤဒ့ဒံၣ်, ပှၤမၤသံတၢ်တဖၣ်အဒိၣ်, စီၤပိၤတံၤဖၢ်န့ၣ်ပှ့ၤအီၤ လၢပှၤယံးၡမၤဧ့လးဖိလၢ အဟဲစိာ်အီၤဖဲန့ၣ်တဖၣ်အစုပူၤလီၤ.
တၢး၁၄ ၁၁/၁ ၁၂ ¶၄-၅
“ယကမၤ တၢ်အၢတၢ်သီအဒိၣ်အယိာ်တမံၤအံၤ” ဒ်လဲၣ်
“ဒီးပှၤလဲၤစိာ်လီၤ စီၤယိၤသးဆူ ကီၢ်အဲၤကူပတူးအပူၤ, ဒီးပှၤအဲၤကူပတူးဖိ, ဖၤရိၤအပှၤဒ့ဒံၣ်, ပှၤမၤသံတၢ်တဖၣ်အဒိၣ်, စီၤပိၤတံၤဖၢ်န့ၣ်ပှ့ၤအီၤ လၢပှၤယံးၡမၤဧ့လးဖိလၢ အဟဲစိာ်အီၤဖဲန့ၣ် တဖၣ်အစုပူၤလီၤ.” (၁ မိၤၡ့ ၃၉:၁) လံာ်စီဆှံပာ်ဖျါထီၣ်ဝဲ တၢ်ကတိၤတဖၣ်အံၤန့ၣ် မၤစၢၤပှၤလၢ ပကထံၣ်တမှံကွၢ် စီၤယိၤသးဖိ ဘၣ်တၢ်ဆါအီၣ်ကဒီးအီၤ အသီတဘျီအဃိ အဝဲအမဲာ်ကဆှး ဒီးအသးကဆံးထဲလဲၣ်န့ၣ်လီၤ. ပှၤပာ်အီၤဒ် တၢ်ဖိတၢ်လံၤတခါအသိးလီၤ. ပထံၣ်တမှံကွၢ်သ့လၢ အဝဲဘၣ်လဲၤပိာ်ဝဲ အကစၢ်လၢအမ့ၢ် ပှၤဘၣ်မူဘၣ်ဒါလၢ အဲၤကူပတူးအနီပူၤတဂၤအခံလီၤ. အဝဲဘၣ်လဲၤဝဲလၢ ကျဲမုၢ်လၢပှၤအိၣ်အါဒီး ကျးတဖၣ် ဒီးလဲၤဝဲဆူ အကစၢ်အဟံၣ်လီၤ.
ခဲအံၤဟံၣ်လၢစီၤယိၤသး လဲၤတုၤဝဲန့ၣ် လီၤဆီလိာ်အသးဒီး အဟံၣ်ဒိၣ်မးလီၤ. အဝဲဒိၣ်ထီၣ်ဘၣ်လၢ ဟံၣ်ဖိဃီဖိလၢအအိၣ်လၢဒဲ, ဘၣ်ဟးသုးအလီၢ်တတီၤဝံၤတတီၤ ဒီးဘၣ်ကွၢ်သိလီၤ. မ့မ့ၢ် ပှၤကဲဒိၣ်ကဲပှၢ် ဒ်ပှၤအဲၤကူပတူးဖိ စီၤပိၤတံၤဖၢ်အသိးတဖၣ်အဟံၣ်န့ၣ် လီၤဘီလီၤမုၢ် ဒီးဘၣ်တၢ်ဖှူအီၤလၢ တၢ်အလွဲၢ်ဆဲးတဖၣ်လီၤ. ပှၤဃုသ့ၣ်ညါ တၢ်ဖိတၢ်လံၤလၢပျၢၤတဖၣ် ပာ်ဖျါဝဲလၢ လၢပျၢၤပှၤအဲၤကူပတူးဖိတဖၣ်န့ၣ် ဘၣ်သူၣ်ဘၣ်သးဝဲ ကရၢၢ်လၢအိၣ်ဒီးအဒူၣ် ဒီးလၢအကိပူၤန့ၣ် အိၣ်ဒီးသ့ၣ်ထူၣ်ဖးဒိၣ်, ထံကမါလၢအိၣ်ဒီး ဆှဲအထူၣ်, တကီဖီ ဒီးတၢ်ထူၣ်အဂၤလၢ အိၣ်လၢထံကျါတဖၣ်လီၤ. ဟံၣ်တနီၤလၢ ပှၤဘှီထီၣ်အီၤလၢ ဖီကရၢၢ်အပူၤန့ၣ် အိၣ်ဒီးတၢ်လီၢ်လၢ ပှၤအိၣ်ကသူၣ်ကသီအဂီၢ်, ပဲတြီဖးဒိၣ် ဒီးဒၢးတဖၣ်အိၣ်အါမးလီၤ. အိၣ်စ့ၢ်ကီးဒီး တၢ်အီၣ်မ့ၤလီၢ်အဒၢး ဒီးဒၢးလၢကုၢ်တဖၣ်ကအိၣ်အဂီၢ်လီၤ.
(၁ မိၤၡ့ ၃၉:၁၂-၁၄) ဒီးအဝဲဒၣ်ဖီၣ်န့ၢ်အီၤလၢ အယၣ်ဒီးစံးဝဲဒၣ်, မံဃုာ်ဒီးယၤတက့ၢ်. ဒီးလဲၤသဒၣ်အယၣ်လၢအစုပူၤဒီးဃ့ၢ်ဝဲ, ဒီးဟးထီၣ်ဆူခိလီၤ. ၁၃ ဒီးတၢ်မၤအသး တုၤပိာ်မုၣ်ထံၣ်ဝဲ လၢအလဲၤသဒၣ်အယၣ်လၢအစုပူၤ, ဒီးဃ့ၢ်ထီၣ်ကွံာ်ဆူခိဒီး, ၁၄ အဝဲဒၣ်ကိးန့ၢ်ပှၤဟံၣ်ဖိတဖၣ်, ဒီးကတိၤတၢ်ဒီးအီၤ, ဒီးစံးဝဲဒၣ်, ကွၢ်, အဝဲဒၣ်န့ၣ် ဟဲစိာ်ပှၤဧ့ၤဘြံၤဖိဆူပအိၣ် ဒ်သိးအကမၤတရီတပါပှၤလီၤ. ဟဲနုာ်ဝဲလၢယအိၣ် ဒ်သိးအကမံဃုာ်ဒီးယၤ, ဒီးယကိးပသူထီၣ် လၢယကလုၢ်ဖးဒိၣ်လီၤ.
(၁ မိၤၡ့ ၃၉:၂၀) ဒီးစီၤယိၤသး အကစၢ်န့ၣ်ဟံးန့ၢ်အီၤ, ဒီးဒၢနုာ်အီၤလၢဃိာ်ပူၤ, အလီၢ်ဖဲ စီၤပၤအပှၤဃိာ်ဖိတဖၣ် အိၣ်စၢဃာ်အသးလီၤ. ဒီးအိၣ်ဝဲလၢဃိာ်ပူၤဖဲန့ၣ်လီၤ.
တၢး၁၄ ၁၁/၁ ၁၄-၁၅
“ယကမၤ တၢ်အၢတၢ်သီအဒိၣ်အယိာ်တမံၤအံၤ” ဒ်လဲၣ်
ဖဲန့ၣ်အဆၢကတီၢ် အဲၤကူပတူးအဃိာ်တဖၣ် ကအိၣ်အသးဒ်လဲၣ်န့ၣ် ပတသ့ၣ်ညါဘၣ်. ဘၣ်ဆၣ် ပှၤဃုသ့ၣ်ညါ တၢ်ဖိတၢ်လံၤလၢပျၢၤတဖၣ် ထံၣ်ဘၣ်ဝဲ တၢ်သူၣ်ထီၣ်ဖးဒိၣ်လၢ အအိၣ်ဒီးဃိာ်ဒၢး ဒီးဟီၣ်လာ်ဃိာ်တဖၣ် အတၢ်ဟးဂူာ်ဟးဂီၤန့ၣ်လီၤ. လၢခံစီၤယိၤသးစ့ၢ်ကီး ကိးဝဲဃိာ်လၢ ဧ့ၤဘြံၤကျိာ်လၢ “တၢ်ပူၤ” လီၤ. အခီပညီမ့ၢ်ဝဲ တၢ်ခံးဒီးမ့ၢ်တၢ်လီၢ်လၢ ပှၤထူၣ်ဖျဲးထီၣ်က့ၤတသ့ဘၣ်လီၤ. (၁ မိၤ. ၄၀:၁၅) ဘၣ်ဃးဒီး စီၤယိၤသး ဘၣ်တၢ်မၤအၢမၤနးအီၤအဂ့ၢ်န့ၣ် လံာ်စံးထီၣ်ပတြၢၤ ပာ်ဖျါဝဲလၢ “အခီၣ်တဖၣ် ဘၣ်တၢ်စၢဃာ်အီၤလၢ ထးသွဲတဖၣ် ဒီးအကိာ်ဘၣ်တၢ်ကွီၤဃာ်အီၤလၢ ထးကွီၤ” လီၤ. (စံးထီၣ်ပတြၢၤ ၁၀၅:၁၇, ၁၈, ခ့ခါစှီၤကျိာ်) ပှၤအဲၤကူပတူးဖိတဖၣ်န့ၣ် စၢဝဲပှၤဃိာ်ဖိတဖၣ် အစုလၢအလီၢ်ခံတပၤ ဒီးတနီၤန့ၣ် ဖျီၣ်ဝဲအကိာ်လၢ ထးကွီၤလီၤ. စီၤယိၤသး ဘၣ်တၢ်မၤအၢမၤနးအီၤ တတီတလိၤအဃိ အဝဲတူၢ်ဘၣ်ဝဲကဆါထဲလဲၣ်. နီၢ်နီၢ်န့ၣ် အဝဲတမၤဘၣ်တၢ်ကမၣ်နီတမံၤလၢ ကဘၣ်တူၢ်တၢ်ဒ်န့ၣ်အဂီၢ်ဘၣ်.
စီၤယိၤသး တူၢ်ဘၣ်တၢ်နးတၢ်ဖှီၣ်တဖၣ်န့ၣ် တမ့ၢ်ထဲတစိၢ်ဖိဘၣ်. လံာ်စီဆှံပာ်ဖျါဝဲလၢ အဝဲ “အိၣ်ဝဲလၢဃိာ်ပူၤဖဲန့ၣ်လီၤ.” အဝဲဘၣ်အိၣ်လၢ တၢ်လီၢ်လၢအလီၤပျံၤလီၤဖုးအံၤအပူၤ အနံၣ်အါမးလီၤ. အဝဲကဟးထီၣ်ဘၣ်လၢ ဃိာ်ပူၤဧါ, တဟးထီၣ်ဘၣ်ဧါန့ၣ် တသ့ၣ်ညါဝဲဘၣ်. အဝဲဘၣ်နးဘၣ်ဖှီၣ်လၢ နီၢ်ခိဒီးသးတခီန့ၣ် ယံာ်ဝဲလၢ အနွံတဖၣ်အနွံ အလါတဖၣ်အလါလီၤ. ဖဲန့ၣ်အဆၢကတီၢ် ဒ်သိးအဝဲအသး သုတဟးဂီၤဒီး သုတဟ့ၣ်ၡူအသးတဂ့ၤအဂီၢ် တၢ်မနုၤမၤစၢၤအီၤလဲၣ်.
လံာ်စီဆှံပာ်ဖျါထီၣ်ဝဲလၢ “ယွၤအိၣ်ဒီး စီၤယိၤသး, ဒီးမၤအီၤလၢ အဘျုးအဖှိၣ်” လီၤ. (၁ မိၤၡ့ ၃၉:၂၁) ဒ်သိးယဟိဝၤယွၤ အတၢ်အဲၣ်သုတလဲၤတုၤဆူ ပှၤလၢအဘူၣ်ထီၣ်ဘါထီၣ်အီၤတဖၣ် အအိၣ်တဂ့ၤအဂီၢ် ဃိာ်အတြဲၤ, စုကျီၤထး ဒီးဒၢးလၢအခံးသူတဖၣ် တြီအီၤတန့ၢ်ဘၣ်. (ရိမ့ၤ ၈:၃၈, ၃၉) ထံၣ်တမှံကွၢ်လၢ စီၤယိၤသး တဲဖျါထီၣ် အတၢ်တူၢ်ဘၣ်တဖၣ်လၢ အပၢ်အိၣ်လၢမူခိၣ်လၢအမ့ၢ် “တၢ်မၤမုာ်ခဲလၢာ်အကစၢ်” အအိၣ်ဝံၤအလီၢ်ခံ အဝဲအသးမုာ်ထီၣ်က့ၤဝဲန့ၣ်တက့ၢ်. (၂ ကရံၣ်သူး ၁:၃, ၄; ဖံလံးပံၤ ၄:၆, ၇) ယဟိဝၤယွၤ မၤဝဲတၢ်မနုၤလၢ စီၤယိၤသးအဂီၢ်ဒံးလဲၣ်. ပဖးဘၣ်လၢ “ဒီးဒုးဘၣ်အီၤ လၢတၢ်အဘျုးအဖှိၣ် လၢပှၤဃိာ်ဒိၣ်တဂၤအမဲာ်ညါလီၤ.”
(၁ မိၤၡ့ ၃၉:၂၁-၂၃) ဒီးယွၤအိၣ်ဒီး စီၤယိၤသး, ဒီးမၤအီၤလၢ အဘျုးအဖှိၣ်, ဒီးဒုးဘၣ်အီၤ လၢတၢ်အဘျုးအဖှိၣ် လၢပှၤဃိာ်ဒိၣ်တဂၤအမဲာ်ညါလီၤ. ၂၂ ဒီးပှၤဃိာ်ဒိၣ်တဂၤန့ၣ် ပာ်ပှၤဃိာ်ဖိအိၣ်လၢ ဃိာ်ပူၤခဲလၢာ်လၢစီၤယိၤသးအစုပူၤ, ဒီးဖဲဒၣ်ပှၤမၤတၢ် တမံၤလၢ်လၢ်ဖဲန့ၣ် မ့ၢ်အဝဲဒၣ်မၤဝဲလီၤ. ၂၃ ဒီးပှၤဃိာ်ဒိၣ်တဂၤန့ၣ် တကွၢ်ဘၣ်တၢ်အိၣ်လၢ အစုပူၤနီတမံၤဘၣ်. အဂ့ၢ်ဒ်အံၤ, ယွၤအိၣ်ဒီးစီၤယိၤသး, ဒီးအတၢ်မၤန့ၣ် ယွၤဒုးကဲထီၣ်ဝဲလီၤ.
တၢး၁၄ ၁၁/၁ ၁၅ ¶၂
“ယကမၤ တၢ်အၢတၢ်သီအဒိၣ်အယိာ်တမံၤအံၤ” ဒ်လဲၣ်
လံာ်စီဆှံပာ်ဖျါထီၣ်ဝဲလၢ “ယွၤအိၣ်ဒီး စီၤယိၤသး, ဒီးမၤအီၤလၢ အဘျုးအဖှိၣ်” လီၤ. (၁ မိၤၡ့ ၃၉:၂၁) ဒ်သိးယဟိဝၤယွၤ အတၢ်အဲၣ်သုတလဲၤတုၤဆူ ပှၤလၢအဘူၣ်ထီၣ်ဘါထီၣ်အီၤတဖၣ် အအိၣ်တဂ့ၤအဂီၢ် ဃိာ်အတြဲၤ, စုကျီၤထး ဒီးဒၢးလၢအခံးသူတဖၣ် တြီအီၤတန့ၢ်ဘၣ်. (ရိမ့ၤ ၈:၃၈, ၃၉) ထံၣ်တမှံကွၢ်လၢ စီၤယိၤသး တဲဖျါထီၣ် အတၢ်တူၢ်ဘၣ်တဖၣ်လၢ အပၢ်အိၣ်လၢမူခိၣ်လၢအမ့ၢ် “တၢ်မၤမုာ်ခဲလၢာ်အကစၢ်” အအိၣ်ဝံၤအလီၢ်ခံ အဝဲအသးမုာ်ထီၣ်က့ၤဝဲန့ၣ်တက့ၢ်. (၂ ကရံၣ်သူး ၁:၃, ၄; ဖံလံးပံၤ ၄:၆, ၇) ယဟိဝၤယွၤ မၤဝဲတၢ်မနုၤလၢ စီၤယိၤသးအဂီၢ်ဒံးလဲၣ်. ပဖးဘၣ်လၢ “ဒီးဒုးဘၣ်အီၤ လၢတၢ်အဘျုးအဖှိၣ် လၢပှၤဃိာ်ဒိၣ်တဂၤအမဲာ်ညါလီၤ.”
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၁ မိၤၡ့ ၃၈:၉-၁၀) ဒီးစီၤအိၤနၣ်န့ၣ်သ့ၣ်ညါဝဲလၢ တၢ်အချံအသၣ် တကဲထီၣ်အတၢ်ဒၣ်ဝဲဘၣ်, ဒီးတၢ်မၤအသးတုၤအလဲၤနုာ်လၢ အဝဲၢ်အမါအအိၣ်ဒီး, မၤဟးဂီၤကွံာ်တၢ်ဆူဟီၣ်ခိၣ်, ဒ်သိးအသုတဟ့ၣ် တၢ်အချံအသၣ်လၢ အဝဲၢ်တဂ့ၤန့ၣ်လီၤ. ၁၀ ဒီးတၢ်လၢအမၤဝဲန့ၣ် မ့ၢ်တၢ်အၢလၢယွၤအမဲာ်ညါ, ဒီးမၤသံအီၤစ့ၢ်ကီးလီၤ.
it-2 ၅၅၅
စီၤအိၤနၣ်
(အိၤနၣ်) [အခီပညီ ဟဲလီၤစၢၤလၢ “ဒုးထီၣ်ဖိထီၣ်လံၤတၢ်, တၢ်အသဟီၣ်လၢအဆူၣ်”]
အဝဲမ့ၢ် စီၤယူဒၤလၢအန့ၢ်မါဒီး ပှၤကနၤဧၣ်ဖိ စီၤၡူာ်အဖိမုၣ် အဖိခွါခံဂၤတဂၤလီၤ. (၁ မိၤၡ့ ၃၈:၂-၄; ၁ ကွဲး ၂:၃) စီၤအိၤနၣ် အဝဲၢ်ခွါစီၤအ့ၢ်န့ၣ် မၤတၢ်တဂ့ၤအဃိ ယဟိဝၤယွၤ စံၣ်ညီၣ်သံအီၤလီၤ. စီၤအ့ၢ်န့ၣ်အဖိတအိၣ်ဘၣ်. ဒ်လုၢ်လၢ်အိၣ်လၢ ပှၤကဘၣ်ဟံးန့ၢ်က့ၤဝဲ အဝဲၢ်ခွါအမါအသိး စီၤယူဒၤတဲဘၣ် စီၤအိၤနၣ်လၢ ကဟံးန့ၢ်က့ၤ စီၤအ့ၢ်အမါမုၣ်ကမဲ နီၢ်တၤမၢ်လီၤ. စီၤအိၤနၣ်အဖိမ့ၢ်အိၣ်လၢ အပိာ်ခွါန့ၣ် တဘၣ်တၢ်ပာ်ပနီၣ်အီၤလၢ အဝဲအဖိခွါဘၣ်. စီၤအိၤနၣ် အဖိဝဲၢ်ကိအတၢ်န့ၢ်သါန့ၣ် ကဘၣ်တၢ်ပာ်အီၤလၢ စီၤအ့ၢ်အတၢ်န့ၢ်သါလီၤ. ပှၤလၢအကဟံးန့ၢ် တၢ်န့ၢ်သါမ့ၢ်တအိၣ်ဘၣ်န့ၣ် စီၤအိၤနၣ် ကဒိးန့ၢ်ဘၣ်ဝဲ တၢ်န့ၢ်သါတဖၣ်လီၤ. ဖဲစီၤအိၤနၣ် မံဃုာ်ဒီး နီၢ်တၤမၢ်အခါ “အဝဲဒုးဟးထီၣ်ကွံာ်ပိာ်ခွါ အချံအသၣ်ဆူတၢ်ချၢ” လီၤ. လံာ်စီဆှံပာ်ဖျါထီၣ်ဝဲလၢဖဲ “အမံဃုာ်ဒီး အဝဲၢ်အမါမုၣ်ကမဲတဘျီ လၢ်လၢ်” အခါ ဒုးဟးထီၣ်ကွံာ်ဝဲပိာ်ခွါ အချံအသၣ်ဆူတၢ်ချၢအဃိ တမ့ၢ်လၢအဖူးလဲး နီၢ်ကစၢ်မုၣ်ခွါက့ၢ်ဂီၤဘၣ်. စီၤအိၤနၣ်န့ၣ် မံဃုာ်ဒီးနီၢ်တၤမၢ် သနာ်က့ အဝဲမၤဝဲဒ်သိး အချံအသၣ် သုတနုာ်လီၤလၢ နီၢ်တၤမၢ်အဒၢလီၢ်ပူၤတဂ့ၤအဂီၢ်လီၤ. အဝဲတဒိကနၣ်အပၢ်အကလုၢ်ဘၣ်, အိၣ်ဒီးတၢ်သူၣ်လီသးကွံ, ထီဒါဝဲကစၢ်ယွၤ အတၢ်ရဲၣ်တၢ်ကျဲၤလၢ အဘၣ်ဃးဒီး တၢ်ဆီဟံၣ်ဆီဃီ ဒီးအဖိတအိၣ်ဘၣ်အဃိ ကစၢ်ယွၤစံၣ်ညီၣ်သံအီၤလီၤ.—၁ မိၤ. ၃၈:၆-၁၀, ခ့ခါစှီၤကျိာ်; ၄ မိၤ. ၂၆:၁၉.
(၁ မိၤၡ့ ၃၈:၁၅-၁၈) ဒီးစီၤယူဒၤထံၣ်ဘၣ်အီၤ, ဒီးမ့ၢ်အကျၢၢ်ဘၢအမဲာ်ဒီး, ဆိကမိၣ်ဝဲလၢ အမ့ၢ်ပှၤဃဲသဲမုၣ်တဂၤလီၤ. ၁၆ ဒီးဃၣ်ကပၤအသးဆူ အအိၣ်လၢကျဲဃၢၤ, ဒီးစံးဝဲဒၣ်, ဟဲမီၣ်, ဒုးဟဲနုာ်လၢ်ယၤလၢနအိၣ်တက့ၢ်, (အဂ့ၢ်ဒ်အံၤ, တသ့ၣ်ညါဘၣ်လၢအမ့ၢ်အဒဲၣ်ဘၣ်.) ဒီးစံးဝဲဒၣ်, ဒ်သိးနကဟဲနုာ်လၢယအိၣ်ဒီး, နကဟ့ၣ်ယၤလၢမနုၤတမံၤလဲၣ်. ၁၇ ဒီးစံးဝဲဒၣ်, ယကမၢပှၤဟဲစိာ်န့ၢ်နၤလၢ မဲာ်တဲးလဲးဖိတဒုလၢ မဲာ်တဲးလဲးအကျါလီၤ. ဒီးစံးဝဲဒၣ်, နတချုးမၢလီၤဒံးဘၣ်ဒီး, နကဟ့ၣ်ကီၤတၢ်တမံၤမံၤဧါ. ၁၈ ဒီးစံးဝဲဒၣ်, ယဘၣ်ဟ့ၣ်နၤလၢ တၢ်ဟ့ၣ်ကီၤမနုၤတမံၤလဲၣ်. ဒီးစံးဝဲဒၣ်, နတၢ်စဲဃာ်ပနီၣ်, ဒီးအပျံၤ, ဒီးနီၣ်ထိးဘိလၢ အအိၣ်လၢနစုပူၤလီၤ. ဒီးဟ့ၣ်တၢ်တဖၣ်န့ၣ်လၢအီၤ, ဒီးလဲၤနုာ်ဆူအအိၣ်, ဒီးအဝဲဒၣ်ဒၢထီၣ်လၢအဃိလီၤ.
တၢး၀၄ ၁/၁၅ ၃၀ ¶၄-၅
ပှၤဖးလံာ်ဖိတဖၣ် အတၢ်သံကွၢ်
စီၤယူဒၤန့ၣ် ဒ်အတၢ်အၢၣ်လီၤအိၣ်ဝဲအသိး တဒုးအဲၣ်ဝဲအဖိခွါ စီၤၡ့လၤ ဒီးနီၢ်တၤမၢ်အဃိ မ့ၢ်အဝဲမၤတၢ်ကမၣ်လီၤ. တကးဒံးဘၣ် အဝဲလဲၤမံဃုာ်ဒီးပိာ်မုၣ်တဂၤလၢ အဆိကမိၣ်ဝဲလၢ အမ့ၢ်တၢ်လုၢ်ဟံၣ်အဃဲသဲလီၤ. အဝဲမၤဝဲဒ်အံၤန့ၣ် ထီဒါလိာ်အသးဒီး ကစၢ်ယွၤ အတၢ်တိာ်ပာ်လၢအမ့ၢ် တၢ်မံဃုာ်အိၣ်ဃုာ်န့ၣ် မ့ၢ်ဒၣ်ထဲပှၤလၢအဖျီအသးဝံၤခံဂၤအဂီၢ်လီၤ. (၁ မိၤၡ့ ၂:၂၄) နီၢ်နီၢ်န့ၣ် စီၤယူဒၤတမံဃုာ်ဒီး ဃဲသဲမုၣ်တဂၤဘၣ်. လၢတၢ်န့ၣ်အလီၢ် လၢတၢ်တပာ်သူၣ်ပာ်သးအပူၤ အဝဲကဲထီၣ်ဘၣ် ဖိအပၢ်လၢအဖိးသဲစးလၢ အဖိခွါစီၤၡ့လၤအလီၢ် ခီဖျိလုၢ်လၢ်လၢ ပှၤကဘၣ်ဟံးန့ၢ်က့ၤ အဝဲၢ်ခွါအမါအဃိလီၤ.
နီၢ်တၤမၢ်န့ၣ် တမၤကမၣ်မုၣ်ကမၣ်ခွါဘၣ်. အဖိခွါတဃံာ်ခံဂၤစ့ၢ်ကီး တမ့ၢ်ပှၤဒၢဘၢဖိဘၣ်. ဖဲပှၤဘ့ၤသလ့ဃ့ၣ်ဖိ စီၤဘိၤဧး ဟံးန့ၢ်ဝဲ နီၢ်ရူၤသး ဒ်လုၢ်လၢ်လၢ ပှၤဘၣ်ဟံးန့ၢ်က့ၤ အဝဲၢ်ခွါအမါအခါ ဝ့ၢ်အပှၤသးပှၢ်တဖၣ်န့ၣ် တဲဂ့ၤဝဲနီၢ်တၤမၢ်အဖိခွါ စီၤဖ့ရ့းလီၤ. ဒီးအဝဲသ့ၣ်တဲဝဲ စီၤဘိၤဧးလၢ “မ်နဟံၣ်မၤသးဒ်စီၤဖ့ရ့းအဟံၣ်အသိး (လၢနီၢ်တၤမၢ်ဆံးစၢ်န့ၢ်လၢ စီၤယူဒၤအဂီၢ်), လၢတၢ်အချံအသၣ်လၢ ယွၤကဟ့ၣ်လီၤနၤလၢပိာ်မုၣ်အံၤတက့ၢ်.” (ရူၤ. ၄:၁၂) တကးဒံးဘၣ် စီၤဖ့ရ့းန့ၣ် ပၣ်ဃုာ်ဘၣ်လၢ ပှၤလၢယ့ၣ်ၡူး ဟဲလီၤစၢၤလီၤသွဲၣ်ဝဲတဖၣ်အကျါလီၤ.—မးသဲ ၁:၁-၃; လူၤကၣ် ၃:၂၃-၃၃.
တၢ်ဖးလံာ်စီဆှံ
(၁ မိၤၡ့ ၃၈:၁-၁၉) ဒီးအကတီၢ်ဖဲန့ၣ်တၢ်မၤအသးလၢ စီၤယူဒၤဟးထီၣ်လၢအဒီပုၢ်ဝဲၢ်အကျါ, ဒီးဃၣ်ကပၤအသး ဆူပှၤတဂၤ, ပှၤဧဒူးလၣ်ဖိအအိၣ်, လၢအမံၤမ့ၢ်စီၤဃံရၤလီၤ. ၂ ဒီးစီၤယူဒၤန့ၣ်ထံၣ်ဘၣ်မတၤတဂၤ, ပှၤကနၤဧၣ်ဖိစီၤၡူာ်အဖိမုၣ်ဖဲန့ၣ်, ဒီးဟံးန့ၢ်အီၤ, ဒီးလဲၤနုာ်ဆူအအိၣ်လီၤ. ၃ ဒီးဒၢထီၣ်ဝဲဒီးဆံးစၢ်န့ၢ်အဖိခွါ, ဒီးယုၢ်ဝဲအမံၤလၢစီၤအ့ၢ်လီၤ. ၄ ဒီးဒၢထီၣ်ကဒီးဝဲ, ဒီးဆံးစၢ်န့ၢ်အဖိခွါ, ဒီးယုၢ်ဝဲအမံၤလၢစီၤအိၤနၣ်လီၤ. ၅ ဒီးဒၢထီၣ်ကဒီးဝဲ, ဒီးဆံးစၢ်န့ၢ်အဖိခွါ, ဒီးယုၢ်ဝဲအမံၤလၢစီၤၡ့လၤလီၤ. ဒီးလၢအဆံးစၢ်အဝဲတဂၤန့ၣ် စီၤယူဒၤအိၣ်ဝဲလၢဝ့ၢ်ကစံာ်လီၤ. ၆ ဒီးစီၤယူဒၤဟံးန့ၢ်မါလၢ အဖိဝဲၢ်ကိစီၤအ့ၢ်အဂီၢ် ဒီးအမံၤမ့ၢ်နီၢ်တၤမၢ်လီၤ. ၇ ဒီးစီၤယူဒၤအဖိဝဲၢ်ကိ စီၤအ့ၢ်တဂၤန့ၣ်, အၢဝဲလၢယွၤအမဲာ်ညါ, ဒီးယွၤမၤသံအီၤလီၤ. ၈ ဒီးစီၤယူဒၤစံးဘၣ်စီၤအိၤနၣ်, လဲၤနုာ်ဆူနဝဲၢ်အမါအအိၣ်, ဒီးန့ၢ်မါလၢအီၤ, ဒီးဒုးအိၣ်ထီၣ် တၢ်အချံအသၣ်လၢ နဝဲၢ်အဂီၢ်တက့ၢ်. ၉ ဒီးစီၤအိၤနၣ်န့ၣ်သ့ၣ်ညါဝဲလၢ တၢ်အချံအသၣ် တကဲထီၣ်အတၢ်ဒၣ်ဝဲဘၣ်, ဒီးတၢ်မၤအသးတုၤအလဲၤနုာ်လၢ အဝဲၢ်အမါအအိၣ်ဒီး, မၤဟးဂီၤကွံာ်တၢ်ဆူဟီၣ်ခိၣ်, ဒ်သိးအသုတဟ့ၣ်တၢ်အချံအသၣ်လၢ အဝဲၢ်တဂ့ၤန့ၣ်လီၤ. ၁၀ ဒီးတၢ်လၢအမၤဝဲန့ၣ် မ့ၢ်တၢ်အၢလၢယွၤအမဲာ်ညါ, ဒီးမၤသံအီၤစ့ၢ်ကီးလီၤ. ၁၁ ဒီးစီၤယူဒၤစံးဘၣ် အဒဲၣ်နီၢ်တၤမၢ်န့ၢ်, အိၣ်ကမဲလၢနပၢ်အဟံၣ်ပူၤ တုၤယဖိခွါစီၤၡ့လၤဒိၣ်ထီၣ်တက့ၢ်. အဂ့ၢ်ဒ်အံၤ, စံးဝဲဒၣ်, ကသံဘၣ်ဖုးဒ်အဝဲၢ်တဖၣ်အသိးလီၤ. ဒီးနီၢ်တၤမၢ်န့ၣ် လဲၤအိၣ်ဝဲဆိးဝဲလၢ အပၢ်အဟံၣ်ပူၤလီၤ. ၁၂ ဒီးအနံၤအသီအါထီၣ်ဝဲဝံၤဒီး, စီၤၡူာ်အဖိမုၣ်, စီၤယူဒၤအမါသံဝဲလီၤ. ဒီးစီၤယူဒၤဘၣ်တၢ်မၤမုာ်အီၤဝံၤဒီး, လဲၤဝဲဆူပှၤတံာ်သိအဆူၣ်အအိၣ်, ဆူတံးမနၤ, အဝဲဒၣ်ဒီးအတံၤအသကိး ပှၤဧဒူးလၣ်ဖိစီၤဃံရၤလီၤ. ၁၃ ဒီးပှၤစံးဘၣ်နီၢ်တၤမၢ်ဒီးစံးဝဲဒၣ်, နမံၤပှၢ်ပိာ်ခွါလဲၤထီၣ်ဆူတံးမနၤ, ဒ်သိးအကတံာ်အသိအဆူၣ်လိၤ. ၁၄ ဒီးအဝဲဒၣ်ဘ့ၣ်ကွံာ် အမုၣ်ကမဲအကူအသိး, ကျၢၢ်ဘၢထီၣ်အသးဒီးနီၢ်ကျၢၢ်ဘၢ, ဒီးကၤအတၢ်, ဒီးဆ့ၣ်နီၤလၢထံထီၣ်ပၢၢ်ခံပူၤအကျဲစၢၤ, လၢအအိၣ်ဝဲလၢ တံးမနၤအကျဲဃၢၤန့ၣ်လီၤ. အဂ့ၢ်ဒ်အံၤ, ထံၣ်ဘၣ်ဝဲလၢစီၤၡ့လၤဒိၣ်ထီၣ်ဝဲ, ဒီးတၢ်တဟ့ၣ်ဘၣ်အီၤလၢအမါဘၣ်. ၁၅ ဒီးစီၤယူဒၤထံၣ်ဘၣ်အီၤ, ဒီးမ့ၢ်အကျၢၢ်ဘၢအမဲာ်ဒီး, ဆိကမိၣ်ဝဲလၢ အမ့ၢ်ပှၤဃဲသဲမုၣ်တဂၤလီၤ. ၁၆ ဒီးဃၣ်ကပၤအသးဆူ အအိၣ်လၢကျဲဃၢၤ, ဒီးစံးဝဲဒၣ်, ဟဲမီၣ်, ဒုးဟဲနုာ်လၢ်ယၤလၢ နအိၣ်တက့ၢ်, (အဂ့ၢ်ဒ်အံၤ, တသ့ၣ်ညါဘၣ်လၢအမ့ၢ်အဒဲၣ်ဘၣ်.) ဒီးစံးဝဲဒၣ်, ဒ်သိးနကဟဲနုာ်လၢယအိၣ်ဒီး, နကဟ့ၣ်ယၤလၢ မနုၤတမံၤလဲၣ်. ၁၇ ဒီးစံးဝဲဒၣ်, ယကမၢပှၤဟဲစိာ်န့ၢ်နၤလၢ မဲာ်တဲးလဲးဖိတဒုလၢ မဲာ်တဲးလဲးအကျါလီၤ. ဒီးစံးဝဲဒၣ်, နတချုးမၢလီၤဒံးဘၣ်ဒီး, နကဟ့ၣ်ကီၤတၢ်တမံၤမံၤဧါ. ၁၈ ဒီးစံးဝဲဒၣ်, ယဘၣ်ဟ့ၣ်နၤလၢ တၢ်ဟ့ၣ်ကီၤမနုၤတမံၤလဲၣ်. ဒီးစံးဝဲဒၣ်, နတၢ်စဲဃာ်ပနီၣ်, ဒီးအပျံၤ, ဒီးနီၣ်ထိးဘိလၢ အအိၣ်လၢနစုပူၤလီၤ. ဒီးဟ့ၣ်တၢ်တဖၣ်န့ၣ်လၢအီၤ, ဒီးလဲၤနုာ်ဆူအအိၣ်, ဒီးအဝဲဒၣ်ဒၢထီၣ်လၢအဃိလီၤ. ၁၉ ဒီးဂဲၤဆၢထၢၣ်ဝဲ, ဒီးက့ၤက့ၤတၢ်, ဒီးဘ့ၣ်ကွံာ်အနီၣ်ကျၢၢ်ဘၢလၢအလိၤ, ဒီးကူသိးထီၣ်က့ၤပှၤမုၣ်ကမဲအကူအသိးလီၤ.
လါမ့ၤ ၁၈–၂၄
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ မိၤၡ့ ၄၀–၄၁
“ယဟိဝၤယွၤ မၤပူၤဖျဲးထီၣ် စီၤယိၤသး”
(၁ မိၤၡ့ ၄၁:၉-၁၃) ဒီးပှၤကွၢ်တၢ်အီတဖၣ် အဒိၣ်တဂၤန့ၣ် ကတိၤထီၣ်တၢ်ဒီးဖၤရိၤ ဒီးစံးဝဲဒၣ်, တၢ်လၢမုၢ်မဆါတနံၤအံၤ ယသ့ၣ်နီၣ်ထီၣ်က့ၤ ယတၢ်ဒဲးဘးလီၤ. ၁၀ ဖၤရိၤသးထီၣ်အကုၢ်အပှၤ, ဒီးဟ့ၣ်တၢ်ပၢၤယၤလၢ ပှၤမၤသံတၢ်တဖၣ်အဒိၣ်အဟံၣ်ပူၤ, ယၤဒီးပှၤကုၢ်ကိၣ်တဖၣ်အဒိၣ်လီၤ. ၁၁ ဒီးပမံမီၢ် တၢ်မံမီၢ်လၢမုၢ်တနၤဃီ, ယၤဒီးအဝဲဒၣ်, တဂၤဒ်အတၢ်မံမီၢ်ဖးဝဲအသိး, တဂၤဒ်အတၢ်မံမီၢ်ဖးဝဲအသိးန့ၣ်, ပမံမီၢ်တၢ်လီၤ. ၁၂ ဒီးပှၤမၤသံတၢ်တဖၣ်အဒိၣ်တဂၤ အကုၢ်အပှၤဖိၣ်သၣ်ခွါ, ပှၤဧ့ၤဘြံၤဖိတဂၤ အိၣ်ဝဲဒီးပှၤဖဲန့ၣ်, ဒီးပဃဲၤဘၣ်အီၤ, ဒီးအဝဲဒၣ်န့ၣ် ဖးန့ၢ်ပှၤလၢပတၢ်မံမီၢ်, တဂၤဒ်အတၢ်မံမီၢ်အသိး, တဂၤဒ်အတၢ်မံမီၢ်အသိးန့ၣ်ဖးဝဲလီၤ. ၁၃ ဒီးဒ်အဖးန့ၢ်ပှၤအသိးန့ၣ် တၢ်မၤအသးလီၤ. တၢ်လၢယၤအံၤ ပာ်က့ၤဝဲလၢယလီၢ်လီၤ. မ့မ့ၢ်အဝဲတဂၤန့ၣ်ဘျးထီၣ်ဝဲလီၤ.
တၢး၁၅ ၂/၁ ၁၄ ¶၄-၅
“ဖးတၢ်တဖၣ်အိၣ်ဒီးယွၤတမ့ၢ်ဘၣ်ဧါ”
ပှၤကွၢ်တၢ်အီ သးပ့ၤနီၣ်ကွံာ်ဝဲ စီၤယိၤသးသနာ်က့ ယဟိဝၤယွၤ တသးပ့ၤနီၣ်အီၤဘၣ်. ဘၣ်တနၤ ကစၢ်ယွၤဒုးမံမီၢ် စီၤပၤဖၤရိၤလၢ တၢ်မံမီၢ်လီၤဆီခံခါလီၤ. တၢ်မံမီၢ်တၢတခါန့ၣ် ဂီၤဖံးလၢအဘီၣ်နွံဒု ဟဲထီၣ်လၢထံကျိနံၤလါအပူၤလီၤ. တၢ်န့ၣ်အလီၢ်ခံ ဂီၤဖံးလၢအဃဲၤနွံဒု ဟဲထီၣ်စ့ၢ်ကီးလၢထံကျိပူၤလီၤ. ဒီးဂီၤဖံးလၢအဃဲၤနွံဒုန့ၣ် အီၣ်ကွံာ်ဝဲဂီၤဖံးလၢအဘီၣ်နွံဒုလီၤ. တၢ်မံမီၢ်လၢခံတခါန့ၣ် စီၤပၤဖၤရိၤထံၣ်ဝဲ ဘုတထူၣ်လၢ အိၣ်ဒီးဘုစဲၤအဖျၢၣ်ကၢနွံစဲၤလီၤ. တၢ်န့ၣ်အလီၢ်ခံ လၢကလံၤမုၢ်ထီၣ်အဃိ ဘုတထူၣ်လၢ အိၣ်ဒီးဘုစဲၤလၢအဖျၢၣ်သွံး နွံစဲၤဟဲထီၣ်ဝဲလီၤ. ဘုစဲၤလၢအဖျၢၣ်သွံးနွံစဲၤအံၤ ယူၢ်လီၤကွံာ်ဝဲ ဘုစဲၤလၢအကၢတဖၣ်န့ၣ်လီၤ. မုၢ်ဆ့ၣ်ထီၣ်န့ၣ် ခီဖျိလၢအတၢ်မံမီၢ်အဃိ စီၤပၤဖၤရိၤ ဘၣ်ယိၣ်တၢ်ဒိၣ်မးလီၤ. လၢတၢ်န့ၣ်အဃိ အဝဲကိးဝဲ ကယဲၢ်ပှၤအဲၤကူပတူးအပှၤကွဲးလံာ် ဒီးအပှၤကူၣ်တၢ်သ့ခဲလၢာ် ဒ်သိးကဖးန့ၢ်အတၢ်မံမီၢ်အဂီၢ်လီၤ. ဘၣ်ဆၣ် အဝဲသ့ၣ်တဖၣ် ဖးဝဲတသ့နီတဂၤဘၣ်. (၁ မိၤၡ့ ၄၁:၁-၈) ဖဲအဝဲသ့ၣ်နၢ်ဟူဘၣ် တၢ်မံမီၢ်အဂ့ၢ်အခါ အသးလီၤကတုၤ မ့တမ့ၢ် တဲတၢ်မံမီၢ်အခီပညီ တဂၤတမံၤတဂၤတမၠိဧါန့ၣ် ပတသ့ၣ်ညါဘၣ်. ဒ်လဲၣ်ဂ့ၤဒ်လဲၣ်ဂ့ၤ စီၤပၤဖၤရိၤ တဘၣ်သူၣ်ဘၣ်သး အဝဲသ့ၣ်အတၢ်စံးဆၢဘၣ်. အဝဲအဲၣ်ဒိးသ့ၣ်ညါဝဲ အခီပညီလီၤတံၢ်လီၤဆဲး ဒိၣ်မးလီၤ.
ဖဲန့ၣ်အဆၢကတီၢ် ပှၤကွၢ်တၢ်အီန့ၣ် သ့ၣ်နီၣ်ထီၣ်က့ၤဝဲ စီၤယိၤသးလီၤ. အဝဲတတဲဘၣ်ဝဲန့ၣ် အိၣ်ဝဲတကဲလၢၤဘၣ်. အဃိ အဝဲတဲပၠးဝဲ စီၤပၤဖၤရိၤလၢ ပူၤကွံာ်ခံနံၣ် ဖဲအဝဲအိၣ်လၢဃိာ်ပူၤအခါ ပှၤသးစၢ်တဂၤ ဖးန့ၢ်အဝဲဒီး ပှၤကုၢ်ကိၣ် အတၢ်မံမီၢ်အခီပညီန့ၣ် ဘၣ်ဝဲလီၤတံၢ်လီၤဆဲးလီၤ. ဒီးစီၤပၤဖၤရိၤန့ၣ် မၢပှၤလဲၤကိး စီၤယိၤသးလၢအအိၣ်လၢဃိာ်ပူၤန့ၣ် တဘျီဃီလီၤ.—၁ မိၤၡ့ ၄၁:၉-၁၃.
(၁ မိၤၡ့ ၄၁:၁၆) ဒီးစီၤယိၤသးစံးဆၢဖၤရိၤဒီးစံးဝဲဒၣ်, တအိၣ်ဘၣ်ဒီးယၤဘၣ်, ယွၤကစံးဆၢဖၤရိၤမုာ်မုာ်လီၤ.
(၁ မိၤၡ့ ၄၁:၂၉-၃၂) ကွၢ်ကွၢ်, နွံနံၣ်ကဟဲအိၣ်ဒီးတၢ်လၢ တၢ်ပှဲၤဖးဒိၣ်လၢ ကီၢ်အဲၤကူပတူး ဒီဘ့ၣ်ညါအပူၤလီၤ. ၃၀ ဒီးနွံနံၣ်အိၣ်ဒီး တၢ်သၣ်ဝံၤလီၤဒိကအိၣ်ထီၣ်လၢ အလီၢ်ခံန့ၣ်, ဒီးပှၤကသးပ့ၤနီၣ် တၢ်လၢတၢ်ပှဲၤလၢ ကီၢ်အဲၤကူပတူးအပူၤန့ၣ်, ဒီးတၢ်သၣ်ဝံၤလီၤဒိ ကမၤလၢာ်ကွံာ် ထံဧိၤကီၢ်ဧိၤန့ၣ်လီၤ. ၃၁ ဒီးပှၤတသ့ၣ်ညါလၢၤဘၣ် တၢ်လၢတၢ်ပှဲၤလၢကီၢ်ပူၤ လၢတၢ်သၣ်ဝံၤလီၤဒိအိၣ်လၢ အလီၢ်ခံအဃိန့ၣ်လီၤ. အဂ့ၢ်ဒ်အံၤ, အဝဲန့ၣ်ကအိၣ်နးမးလီၤ. ၃၂ ဒီးတၢ်မံမီၢ်အိၣ်ဒီးဖၤရိၤခံမံၤခံဘျီ, အဂ့ၢ်ဒ်အံၤ, မ့ၢ်ယွၤကတဲာ်ကတီၤတၢ်တမံၤန့ၣ် ဂၢၢ်ဂၢၢ်ကျၢၤကျၢၤအဂ့ၢ်လီၤ. ဒီးယွၤကဒုးကဲထီၣ် တၢ်န့ၣ်ချ့သဒံးလီၤ.
တၢး၁၅ ၂/၁ ၁၄-၁၅
“ဖးတၢ်တဖၣ်အိၣ်ဒီးယွၤတမ့ၢ်ဘၣ်ဧါ”
ယဟိဝၤယွၤ အဲၣ်ဝဲပှၤလၢအိၣ်ဒီးတၢ်ဆီၣ်လီၤသး ဒီးတၢ်သးတီတဖၣ်လီၤ. အဃိ တၢ်မံမီၢ်အခီပညီလၢ ပှၤအဲၤကူပတူး အပှၤကွဲးလံာ် ဒီးအပှၤကူၣ်တၢ်သ့တဖၣ် တသ့ၣ်ညါဝဲန့ၣ် ဒ်သိးစီၤယိၤသး တဲဖျါထီၣ်ဝဲကဘၣ်အဂီၢ် ယဟိဝၤယွၤမၤစၢၤအီၤလီၤ. စီၤယိၤသးတဲနၢ်ပၢၢ်ဝဲ စီၤပၤဖၤရိၤလၢ အတၢ်မံမီၢ်ခံခါအံၤ အခီပညီန့ၣ် ဒ်သိးလိာ်အသးလီၤ. ယဟိဝၤယွၤန့ၣ် ဒ်သိးက ‘ပာ်ဂၢၢ်ပာ်ကျၢၤ’ ဝဲတၢ်ဂ့ၢ်တခါအဂီၢ် တဲဝဲခံဘျီလီၤ. တၢ်လၢအတဲဝဲဝံၤတဖၣ်န့ၣ် ကဟဲလၢပှဲၤထီၣ် သပှၢ်တၢၢ်လီၤ. ဂီၤဖံးလၢအဘီၣ်နွံဒုဒီး ဘုစဲၤလၢအဖျၢၣ်ကၢနွံစဲၤန့ၣ် အခီပညီမ့ၢ် တၢ်အီၣ်တၢ်အီကအိၣ်အါအါဂီၢ်ဂီၢ် နွံနံၣ်လၢ ကီၢ်အဲၤကူပတူးအပူၤလီၤ. ဂီၤဖံးလၢအဃဲၤဒီး ဘုးစဲၤလၢအသွံးတဖၣ်န့ၣ် အခီပညီမ့ၢ် တၢ်အီၣ်တၢ်အီကကၤလၢ ကီၢ်အဲၤကူပတူးအပူၤ နွံနံၣ်လီၤ. ထံကီၢ်ဒီတဘ့ၣ် ကဘၣ်ကီဘၣ်ခဲလၢ တၢ်အီၣ်တၢ်အီကၤအဃိလီၤ.—၁ မိၤၡ့ ၄၁:၂၅-၃၂.
(၁ မိၤၡ့ ၄၁:၃၈-၄၀) ဒီးဖၤရိၤစံးဘၣ်အခ့အပှၤန့ၣ်, ပထံၣ်န့ၢ်ပှၤဒ်အံၤသိး, ပှၤလၢပကစၢ် အသးအိၣ်လၢအပူၤ ကသ့စ့ၢ်ကီးဧါ. ၃၉ ဒီးဖၤရိၤစံးဘၣ် စီၤယိၤသး, မ့ၢ်ပကစၢ် ဘိးဘၣ်သ့ၣ်ညါနၤလၢ တၢ်တဖၣ်န့ၣ်ခဲလၢာ်ဒီး, ပှၤအသူၣ်ဖးအသးဖး, ဒီးကူၣ်တၢ်သ့ကူၣ်တၢ်ဘၣ် ထဲသိးဒီးနၤအံၤ တအိၣ်ဘၣ်နီတဂၤဘၣ်. ၄၀ နကအိၣ်လၢ ယဟံၣ်အဖီခိၣ်, ဒီးဖဲတၢ်ထီၣ်ဖျဲးလၢနထးခိၣ်န့ၣ် ယပှၤဂီၢ်မုၢ်ဘၣ် ဒိကနၣ်ခဲလၢာ်လီၤ. ထဲလၢယလီၢ်ပစိာ်အဖီခိၣ်န့ၣ် ယကဒိၣ်န့ၢ်နၤလီၤ.
တၢး၁၅ ၂/၁ ၁၅ ¶၃
“ဖးတၢ်တဖၣ်အိၣ်ဒီးယွၤတမ့ၢ်ဘၣ်ဧါ”
စီၤပၤဖၤရိၤန့ၣ် မၤဝဲဒ်အတၢ်ကတိၤအသိးလီၤ. စီၤပၤဖၤရိၤ ဒုးကူကၤထီၣ်အီၤဆ့ကၤဘဲတဘ့ၣ်, ဒုးလံာ်ထီၣ်အီၤ ဖဲထူတပျံၤ ဒီးဒုးသိးထီၣ်အီၤအပသံးလီၤ. တကးဒံးဘၣ် ဒုးဒိးထီၣ်အီၤ အလ့ၣ်ကဟၣ် ဒီးဒုးလဲၤဝဲလၢ ထံကီၢ်ဒီတဘ့ၣ် ဒ်သိးကမၤဝဲဒ်အတၢ်ဟ့ၣ်ကူၣ်အသိးလီၤ. (၁ မိၤၡ့ ၄၁:၄၂-၄၄) တၢ်တနံၤန့ၣ် စီၤယိၤသးလဲၤအိၣ်ဘၣ်လၢ နီပူၤတဘျီဃီလီၤ. အဝဲတမ့ၢ်လၢၤ ပှၤဃိာ်ဖိတဂၤလၢၤဘၣ်. ကဲထီၣ်ဘၣ်ဝဲ ပှၤပၢတၢ်လၢအိၣ်ဒီးတၢ်စိတၢ်ကမီၤ ဒီးပှၤလၢအဒိၣ်န့ၢ်အီၤန့ၣ် အိၣ်ထဲစီၤပၤဖၤရိၤတဂၤလီၤ. စီၤယိၤသးအတၢ်နာ် ယဟိဝၤယွၤ ဂၢၢ်ကျၢၤဝဲဒိၣ်မးန့ၣ် အိၣ်ဖျါထီၣ်လံ. စီၤယိၤသးတူၢ်ဘၣ် တၢ်တတီတလိၤ အနံၣ်ယံာ်အလါအါန့ၣ် ယဟိဝၤယွၤထံၣ်ဝဲလီၤ. ဘၣ်ဃးဒီးတၢ်ဂ့ၢ်တဖၣ်န့ၣ် ယဟိဝၤယွၤ မၤဘၣ်ဂီၢ်က့ၤဝဲလၢ အဆၢကတီၢ်ဘၣ် ဒီးလၢကျဲမ့ၢ်ကျဲတီလီၤ. ယဟိဝၤယွၤန့ၣ် ဒ်သိးကပာ်ဖျါထီၣ်ဝဲ တၢ်တတီတလိၤလၢ စီၤယိၤသးတူၢ်ဘၣ်ဝဲ ဒီးကဒီသဒၢပှၤအံၣ်စရ့လးဖိတဖၣ် လၢခါဆူညါအဂီၢ် အဝဲဆိကမိၣ်ဝဲထီဘိလီၤ. တၢ်ဂ့ၢ်တဖၣ်အံၤ ပကဆဲးသ့ၣ်ညါဘၣ်လၢ တၢ်မၤလိလၢခံတဖၣ်အပူၤလီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၁ မိၤၡ့ ၄၁:၁၄) ဒီးဖၤရိၤမၢလီၤပှၤကိးန့ၢ်စီၤယိၤသး, ဒီးဒုးဟဲက့ၤထီၣ်အီၤလၢဃိာ်ပူၤချ့ချ့, ဒီးလူၤအခၣ်ဆူၣ်, ဒီးကလံၤအသး, ဒီးဟဲဝဲဆူဖၤရိၤအအိၣ်လီၤ.
မ့ၢ်နသ့ၣ်ညါဧါ
တချုးလၢ စီၤယိၤသး လဲၤထံၣ်လိာ်အသးဒီး ဖၤရိၤဒံးဘၣ်န့ၣ် ဘၣ်မနုၤအဃိ အဝဲ လူၤအခၣ်ဆူၣ်လဲၣ်.
ဒ် ၁ မိၤၡ့ ပာ်ဖျါဝဲအသိး ဖၤရိၤ ဟ့ၣ်လီၤအကလုၢ်လၢ ပှၤကလဲၤကိး ပှၤဧ့ၤဘြံၤဖိ စီၤယိၤသးလၢ အဆိအချ့ ဒ်သိးကဖးန့ၢ်အီၤ အတၢ်မံမီၢ်လၢ အမၤတံာ်တာ်အသးန့ၣ်လီၤ. ဖဲန့ၣ်အခါ စီၤယိၤသး အိၣ်ဘၣ်လၢဃိာ်ပူၤ အိၣ်အနံၣ်ယံာ်လံလီၤ. ဖၤရိၤ မၢပှၤလဲၤကိးအီၤလၢ အဆိအချ့ သနာ်က့ စီၤယိၤသး ဘၣ်ဟံးန့ၢ် တၢ်ဆၢကတီၢ်လၢ ကလူၤအခိၣ်ဆူၣ်ခၣ်ဆူၣ်အဂီၢ်လီၤ. (၁ မိၤၡ့ ၃၉:၂၀-၂၃; ၄၁:၁, ၁၄) ပမ့ၢ်ကွၢ်တၢ်ဂ့ၢ်အံၤ ဖျါလၢအရ့တဒိၣ်ဘၣ်သနာ်က့ ပသ့ၣ်ညါဘၣ်လၢ ပှၤကွဲးလံာ် ၁ မိၤၡ့န့ၣ် သ့ၣ်ညါဝဲပှၤအဲၤကူပတူးဖိ အလုၢ်အလၢ်ဂ့ၤဂ့ၤလီၤ.
ပှၤကလုာ်လၢပျၢၤ အါတက့ၢ် ဃုာ်ဒီးပှၤဧ့ၤဘြံၤဖိတဖၣ်န့ၣ် အိၣ်ဒီးလုၢ်လၢ်လၢ ပာ်ထီအခၣ်ဆူၣ်လီၤ. လံာ်တဘ့ၣ် (McClintock and Strong’s Cyclopedia of Biblical, Theological, and Ecclesiastical Literature) ပာ်ဖျါဝဲလၢ “ပှၤမုၢ်ထီၣ်ဖိတဖၣ်အကျါ ထဲဒၣ်ပှၤအဲၤကူပတူးဖိတဖၣ်န့ၣ် တပာ်ထီအခၣ်ဆူၣ်ဘၣ်.”
ဘၣ်လူၤဝဲထဲဒၣ်အခၣ်ဆူၣ်လီၤဧါ. လံာ်တဘ့ၣ် (Biblical Archaeology Review) ပာ်ဖျါထီၣ်ဝဲလၢ ပှၤအဲၤကူပတူးဖိတဖၣ် အလုၢ်အလၢ်တနီၤန့ၣ် ပှၤတဂၤမ့ၢ်လဲၤနုာ်လၢ စီၤပၤအမဲာ်ညါအခါ ကဘၣ်မၤဝဲဒ် အလဲၤနုာ်လၢ တၢ်လုၢ်ဟံၣ်ပူၤအခါအသိးန့ၣ်လီၤ. လၢတၢ်န့ၣ်အဃိ တချုးလၢ စီၤယိၤသး လဲၤနုာ်လၢ စီၤပၤဖၤရိၤအမဲာ်ညါဒံးဘၣ်န့ၣ် အဝဲလူၤအခၣ်ဆူၣ်လီၤ.
(၁ မိၤၡ့ ၄၁:၃၃) ဒီးခဲကနံၣ်အံၤ မ်ဖၤရိၤကွၢ်ဃုပှၤအသူၣ်ဖးအသးဖး, ဒီးကူၣ်တၢ်သ့ကူၣ်တၢ်ဘၣ်တဂၤ, ဒီးပာ်အီၤလၢ ကီၢ်အဲၤကူပတူးအဖီခိၣ်န့ၣ်တက့ၢ်.
တၢး၀၉ ၁၁/၁၅ ၂၈ ¶၁၄
ဒ်ယွၤအခ့အပှၤတဖၣ်အသိး ပာ်ဖျါထီၣ်လုၢ်လၢ်လၢအဂ့ၤ
၁၄ လၢပျၢၤမိၢ်ပၢ်လၢ အအဲၣ်ယွၤတဖၣ်န့ၣ် ဒ်သိးအဖိတဖၣ် ကအိၣ်ဒီးတၢ်ယူးယီၣ်ပာ်ကဲအဂီၢ် သိၣ်လိဝဲလၢဟံၣ်လီၤ. ဆိကမိၣ်ကွၢ် ဖဲ ၁ မိၤၡ့ ၂၂:၇ အပူၤန့ၣ် စီၤအၤဘြၤဟၣ် ဒီးစီၤအံၤစဲး ကိးလိာ်အသးတဂၤဒီးတဂၤလၢ တၢ်ပာ်ကဲအပူၤလီၤ. ပမ့ၢ်ဖးကွၢ် စီၤယိၤသးအဂ့ၢ်န့ၣ် ဖျါလၢအဝဲဒိးန့ၢ်ဘၣ် အမိၢ်အပၢ် အတၢ်သိၣ်လိဂ့ၤဂ့ၤလီၤ. ဖဲအဝဲအိၣ်လၢဃိာ်ပူၤ အဆၢကတီၢ်ဒၣ်လဲာ် တဲတၢ်ဒီးပှၤဃိာ်ဖိတဖၣ်လၢ တၢ်ပာ်ကဲအပူၤလီၤ. (၁ မိၤ. ၄၀:၈, ၁၄) အဝဲအတၢ်ကတိၤလၢ အတဲသကိးတၢ်ဒီး ဖၤရိၤန့ၣ် ပာ်ဖျါထီၣ်ဝဲလၢ အဝဲမၤလိအသး ဒ်သိးကဘၣ်ကတိၤတၢ်ဒီး ပှၤလၢအိၣ်ဒီးအလီၢ်အလၤတဖၣ်ဒ်လဲၣ်န့ၣ်လီၤ.—၁ မိၤ. ၄၁:၁၆, ၃၃, ၃၄.
တၢ်ဖးလံာ်စီဆှံ
(၁ မိၤၡ့ ၄၀:၁-၂၃) ဒီးတၢ်မၤအသး လၢတၢ်တဖၣ်န့ၣ်အလီၢ်ခံ, လၢအဲၤကူပတူးအစီၤပၤ အပှၤကွၢ်အတၢ်အီတဂၤ, ဒီးအပှၤကုၢ်အကိၣ်တဂၤ မၤကမၣ်ဘၣ်အကစၢ်, အဲၤကူပတူးအစီၤပၤလီၤ. ၂ ဒီးဖၤရိၤသးထီၣ်ဘၣ် အပှၤဒ့ဒံၣ်ခံဂၤန့ၣ်, ပှၤကွၢ်အတၢ်အီတဖၣ် အဒိၣ်တဂၤ, ဒီးပှၤကုၢ်အကိၣ်တဖၣ် အဒိၣ်တဂၤလီၤ. ၃ ဒီးဟ့ၣ်တၢ်ပၢၤအီၤ လၢပှၤမၤသံတၢ်တဖၣ်အဒိၣ်အဟံၣ်ပူၤ, လၢဃိာ်ပူၤ, အလီၢ်ဖဲစီၤယိၤသးအိၣ်စၢဃာ်အသးလီၤ. ၄ ဒီးပှၤမၤသံတၢ်တဖၣ်အဒိၣ် မၢစီၤယိၤသးကွၢ်အီၤ, ဒီးအဝဲဒၣ်မၤအီၤလၢအခ့အပှၤအတၢ်, ဒီးအဝဲသ့ၣ်တဖၣ်န့ၣ် ဘၣ်တၢ်ပၢၤအီၤတစိၢ်တလီၢ်လီၤ. ၅ ဒီးအဝဲသ့ၣ်မံမီၢ်တၢ်မံမီၢ်ခံဂၤလိာ်, တဂၤအတၢ်မံမီၢ်, တဂၤအတၢ်မံမီၢ် လၢမုၢ်တနၤဃီ, တဂၤဒ်အတၢ်မံမီၢ်ဖးဝဲအသိး, တဂၤဒ်အတၢ်မံမီၢ်ဖးဝဲအသိး, အဲၤကူပတူးအစီၤပၤအပှၤကွၢ် အတၢ်အီတဂၤ, ဒီးအပှၤကုၢ်အကိၣ်တဂၤ လၢအအိၣ်စၢဃာ်အသးလၢ ဃိာ်ပူၤလီၤ. ၆ ဒီးလၢမုၢ်ဂီၤန့ၣ် စီၤယိၤသးဟဲဆူအအိၣ်, ဒီးကွၢ်အီၤ, ဒီးကွၢ်ကွၢ်, အသူၣ်ကိၢ်အသးဂီၤဝဲလီၤ. ၇ ဒီးသံကွၢ်ဖၤရိၤအပှၤဒ့ဒံၣ်လၢအအိၣ် ဒီးအီၤတဖၣ်, လၢအဘၣ်တၢ်ပၢၤအီၤလၢ အကစၢ်အဟံၣ်ပူၤ, ဒီးစံးဝဲဒၣ်, တၢ်လၢမုၢ်မဆါတနံၤအံၤ သုမဲာ်လီၤသပှၢ် မ့ၢ်အဘၣ်မနုၤလဲၣ်. ၈ ဒီးစံးဘၣ်အီၤ, ပမံမီၢ်တၢ်မံမီၢ်, ဒီးပှၤဖးအီၤတအိၣ်ဘၣ်. ဒီးစီၤယိၤသးစံးဘၣ်အီၤ, ဖးတၢ်တဖၣ်အိၣ်ဒီးယွၤ တမ့ၢ်ဘၣ်ဧါ. စံးဘၣ်တဲဘၣ်ယၤတက့ၢ်. ၉ ဒီးပှၤကွၢ်တၢ်အီတဖၣ် အဒိၣ်တဂၤန့ၣ်, ဃဲၤလီၤအတၢ်မံမီၢ်လၢ စီၤယိၤသး ဒီးစံးဘၣ်အီၤ, ယမံမီၢ်တၢ်အဖၢမုၢ်ဒီး, ကွၢ်ကွၢ်, စပံးမုၢ်တမုၢ်အိၣ် လၢယမဲာ်ညါလီၤ. ၁၀ ဒီးစပံးမုၢ်အိၣ်ဒီး အစုဖံးသၢဘိလီၤ. ဒီးမၤသးဒ်အဒိးထီၣ်အသိး, ဆှိးထီၣ်ဝဲ, ဒီးအကူၤတဖၣ် ဒုးမံထီၣ် စပံးသၣ်လီၤ. ၁၁ ဒီးဖၤရိၤအလီခီအိၣ်လၢယစုပူၤ, ဒီးယဟံးန့ၢ်စပံးသၣ်န့ၣ်, ဒီးယစံၢ်အထံဆူဖၤရိၤအလီခီပူၤ, ဒီးယပာ်လီခီန့ၣ်လၢ ဖၤရိၤအစုညါသးအပူၤလီၤ. ၁၂ ဒီးစီၤယိၤသးစံးဘၣ်အီၤ, အအံၤမ့ၢ်တၢ်ဖးအီၤ, တၢ်လၢအစုဖံးသၢဘိန့ၣ် မ့ၢ်မုၢ်သၢနံၤလီၤ. ၁၃ သၢနံၤအတီၢ်ပူၤန့ၣ်, ဖၤရိၤကဝံၣ်ထၢၣ်နခိၣ်, ဒီးပာ်က့ၤနၤလၢနလီၢ်, ဒီးနကဟ့ၣ်က့ၤ လီခီလၢဖၤရိၤအစုပူၤ ဒ်တၢ်အလုၢ်အလၢ် အဂံၢ်ခိၣ်ဖဲနမ့ၢ် အပှၤကွၢ်အတၢ်အီအသိးန့ၣ်လီၤ. ၁၄ အန့ၣ်ဒီးတုၤနဘၣ်တၢ်ဂ့ၤဒီး, သ့ၣ်နီၣ်ထီၣ်က့ၤယၤ, ဒီးမၤယၤလၢတၢ်ဘျုးတၢ်ဖှိၣ်, ဒီးစံးဘၣ် ဖၤရိၤလၢယဂ့ၢ်ယကျိၤ, ဒီးဒုးဟးထီၣ်ယၤလၢ ဟံၣ်တဖျၢၣ်အံၤအပူၤတက့ၢ်. ၁၅ အဂ့ၢ်ဒ်အံၤ, တၢ်ဟုၣ်န့ၢ်ယၤလၢ ပှၤဧ့ၤဘြံၤဖိအကီၢ်ပူၤသပှၢ်တၢၢ်, ဒီးဖဲအံၤစ့ၢ်ကီး, ဒ်သိးပှၤကဒၢနုာ်ယၤလၢ တၢ်ပူၤအံၤဒီး, ယတမၤဘၣ် တၢ်နီတမံၤဘၣ်. ၁၆ ဒီးပှၤကုၢ်ကိၣ်တဖၣ် အဒိၣ်ထံၣ်ဘၣ်ဝဲ လၢတၢ်ဖးတၢ်မ့ၢ်အဂ့ၤ, ဒီးစံးဘၣ်စီၤယိၤသး, တၢ်လၢယၤအံၤ ယအိၣ်စ့ၢ်ကီးလၢ ယတၢ်မံမီၢ်အပူၤ, ဒီးကွၢ်ကွၢ်, ကိၣ်ဝါအနာ်သၢဖျၢၣ်အိၣ်လၢ ယခိၣ်အဖီခိၣ်လီၤ. ၁၇ ဒီးနာ်အထီကတၢၢ်တဖျၢၣ်န့ၣ် အိၣ်ဒီးဖၤရိၤအတၢ်အီၣ် ကိးကလုာ်ဒဲးလၢ ပှၤကုၢ်တၢ်ဖိမၤဝဲလီၤ. ဒီးထိၣ်ဖိလံၣ်ဖိ အီၣ်ထီၣ်ကွံာ်အီၤလၢနာ်ပူၤ အိၣ်လၢယခိၣ်အဖီခိၣ်လီၤ. ၁၈ ဒီးစီၤယိၤသးစံးဆၢတၢ် ဒီးစံးဝဲဒၣ်, အအံၤမ့ၢ်တၢ်ဖးအီၤ, တၢ်လၢနာ်သၢဖျၢၣ်န့ၣ် မ့ၢ်မုၢ်သၢနံၤလီၤ. ၁၉ သၢနံၤအတီၢ်ပူၤန့ၣ်, ဖၤရိၤကဝံၣ်ထီၣ်ကွံာ် နခိၣ်လၢနလိၤ, ဒီးကဘျးထီၣ်နၤ လၢသ့ၣ်တထူၣ်အလိၤ, ဒီးထိၣ်ဖိလံၣ်ဖိကအီၣ်ကွံာ် နဖံးနညၣ်လၢနလိၤလီၤ. ၂၀ ဒီးတၢ်မၤအသး လၢမုၢ်သၢနံၤတနံၤဘၣ် လၢဖၤရိၤအိၣ်ဖျဲၣ်အနံၤဆၢအလီၢ်, ဒီးမၤအတၢ်အီၣ်တၢ်အီလၢ အခ့အပှၤခဲလၢာ်အဂီၢ်, ဒီးဝံၣ်ထီၣ် ပှၤကွၢ်အတၢ်အီတဖၣ် အဒိၣ်တဂၤအခိၣ်, ဒီးပှၤကုၢ်အကိၣ်တဖၣ် အဒိၣ်တဂၤအခိၣ်, လၢအခ့အပှၤအကျါလီၤ. ၂၁ ဒီးပာ်က့ၤပှၤကွၢ် အတၢ်အီတဖၣ်အဒိၣ်လၢ အကွၢ်အတၢ်အီအလီၢ်, ဒီးအဝဲဒၣ်ပာ်က့ၤလီခီ, လၢဖၤရိၤအစုညါသးအပူၤလီၤ. ၂၂ မ့မ့ၢ်ပှၤကုၢ်အကိၣ်တဖၣ် အဒိၣ်တဂၤန့ၣ်ဘျးထီၣ်ဝဲ, ဒ်စီၤယိၤသးဖးဝဲလၢ အဂီၢ်အသိးန့ၣ်လီၤ. ၂၃ ဘၣ်ဆၣ်, ဒီးပှၤကွၢ်တၢ်အီတဖၣ် အဒိၣ်န့ၣ် တသ့ၣ်နီၣ်ထီၣ်က့ၤဘၣ် စီၤယိၤသးဘၣ်. မ့ၢ်အသးပ့ၤနီၣ်အီၤလီၤ.
လါမ့ၤ ၂၅–၃၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ မိၤၡ့ ၄၂–၄၃
“စီၤယိၤသး ပာ်ဖျါထီၣ် တၢ်ကီၤသူၣ်ကီၤသးနီၢ်နီၢ်”
(၁ မိၤၡ့ ၄၂:၅-၇) ဒီးစီၤအံၣ်စရ့လးအဖိခွါတဖၣ် ဟဲပှ့ၤတၢ်လၢ ပှၤလၢအဟဲတဖၣ်အကျါလီၤ. အဂ့ၢ်ဒ်အံၤ, တၢ်သၣ်ဝံၤလီၤဒိန့ၣ် အိၣ်လၢကီၢ်ကနၤဧၣ်အပူၤလီၤ. ၆ ဒီးစီၤယိၤသးမ့ၢ်တၢ်အခိၣ်လၢ ကီၢ်အဖီခိၣ်လီၤ. အဝဲဒၣ်ဆါတၢ်ဒီးပှၤကီၢ်ဖိခဲလၢာ်, ဒီးစီၤယိၤသးအဒီပုၢ်ဝဲၢ်ဟဲဝဲ, ဒီးတီၤလီၤကျးလီၤ အမဲာ်ဆူအအိၣ်လၢ ဟီၣ်ခိၣ်လီၤ. ၇ ဒီးစီၤယိၤသးထံၣ်ဘၣ်အဒီပုၢ်ဝဲၢ်, ဒီးသ့ၣ်ညါနီၣ်အီၤလီၤ. ဘၣ်ဆၣ်ဒီးပာ်အသးလၢ ပှၤတခီဘီမုၢ်ဖိလၢအမဲာ်ညါ, ဒီးကတိၤတၢ်ဆူၣ်ဆူၣ်ဒီးအီၤ, ဒီးစံးဘၣ်အီၤ, သုဟဲလၢလဲၣ်. ဒီးစံးဝဲဒၣ်, လၢကီၢ်ကနၤဧၣ် ဒ်သိးပကပှ့ၤတၢ်အီၣ်တၢ်အီလီၤ.
“ယအိၣ်လၢယွၤအလီၢ်စ့ၢ်ကီးဧါ”
စီၤယိၤသးတခီမီၤ. အဝဲကွၢ်နီၣ်အဒီပုၢ်ဝဲၢ်တဖၣ် ဘၣ်တဘျီဃီလီၤ. တကးဒံးဘၣ် ဖဲအဒီပုၢ်ဝဲၢ်တဖၣ် တီၤလီၤလၢအမဲာ်ညါအခါ အဝဲသ့ၣ်နီၣ်ထီၣ်က့ၤဝဲ တၢ်ဂ့ၢ်လၢအနီၢ်ဆံးခါလီၤ. လံာ်စီဆှံ ပာ်ဖျါထီၣ်ဝဲလၢ “စီၤယိၤသးသ့ၣ်နီၣ်ထီၣ်က့ၤ တၢ်မံမီၢ်တဖၣ်လၢ” ယဟိဝၤယွၤ ဒုးမံမီၢ်အီၤန့ၣ်လီၤ. လၢအတၢ်မံမီၢ်အပူၤန့ၣ် ဘၣ်တၢ်တဲဆိပာ်အီၤလၢ အဝဲၢ်တဖၣ်ကတီၤလီၤလၢအမဲာ်ညါလီၤ. ခဲအံၤတၢ်ကဲထီၣ်အသး ဒ်န့ၣ်အသိးလီၤ. (၁ မိၤၡ့ ၃၇:၂, ၅-၉; ၄၂:၇, ၉) စီၤယိၤသးကမၤဝဲဒ်လဲၣ်. ကဖိးဟုအဝဲၢ်တဖၣ်ဧါ မ့တမ့ၢ် ကမၤကၣ်က့ၤဝဲဧါ.
“ယအိၣ်လၢယွၤအလီၢ်စ့ၢ်ကီးဧါ”
ဘၣ်သ့ၣ်သ့ၣ် တမ့ၢ်လၢနကလဲၤခီဖျိဘၣ် တၢ်အိၣ်သးဒ် စီၤယိၤသးအသိးဘၣ်. ဘၣ်ဆၣ် မုၢ်မဆါတနံၤအံၤ ဟံၣ်ဃီပူၤ တၢ်သးတလီၤပလိာ် ဒီးတၢ်သဘံၣ်ဘုၣ်တဖၣ် အိၣ်ဝဲန့ၣ် တမ့ၢ်တၢ်လၢ အလီၤကမၢကမၣ်ဘၣ်. ဖဲပထံၣ်ဘၣ်တၢ်ကီတၢ်ခဲ ဒ်သိးန့ၣ်တဖၣ်အခါ မ့ၢ်လၢပတူၢ်တပှဲၤဘၣ်အဃိ ပကအဲၣ်ဒိး မၤဖဲပသးလီၤ. ဖဲန့ၣ်အခါ ပမ့ၢ်ကွၢ်လိမၤဒိး စီၤယိၤသးဒီး ဂုာ်ကျဲးစၢး ဃုသ့ၣ်ညါလၢ ကစၢ်ယွၤ ကအဲၣ်ဒိးသုးကျဲၤဝဲဒ်လဲၣ်န့ၣ် မ့ၢ်ပအိၣ်ဒီး တၢ်ကူၣ်သ့လီၤ. (ကတိၤဒိ ၁၄:၁၂) သ့ၣ်နီၣ်ထီၣ်လၢ ပကဘၣ်အိၣ်ဃူအိၣ်ဖိးဒီးပဟံၣ်ဖိဃီဖိန့ၣ် မ့ၢ်တၢ်လၢအရ့ဒိၣ်သနာ်က့ တၢ်လၢအရ့ဒိၣ်ကတၢၢ်န့ၣ် ပကဘၣ်အိၣ်ဃူအိၣ်ဖိးဒီး ယဟိဝၤယွၤ ဒီးအဖိခွါယ့ၣ်ၡူးလီၤ.—မးသဲ ၁၀:၃၇.
(၁ မိၤၡ့ ၄၂:၁၄-၁၇) ဒီးစီၤယိၤသးစံးဘၣ်အီၤ, တၢ်န့ၣ်မ့ၢ်တၢ်လၢ ယစံးဘၣ်သုလီၤ. ယစံး, သုမ့ၢ်ပှၤဟးကွၢ်ဟုၣ်တၢ်လီၤ. ၁၅ တၢ်ကမၤကွၢ်သုလၢတၢ်အံၤ, လၢဖၤရိၤအသးသမူ အမဲာ်ညါန့ၣ် သုပုၢ်သဒါ မ့ၢ်တဟဲဘၣ်ဖဲအံၤဘၣ်ဒီး, သုတဟးထီၣ်ဘၣ်ဖဲအံၤဘၣ်. ၁၆ မၢပှၤလၢသုကျါတဂၤလဲၤ ဒီးဟဲက့ၤစိာ်သုပုၢ်တဂၤန့ၣ်တက့ၢ်. ဒီးသုကအိၣ်စၢဃာ်သုသး, ဒ်သိးတၢ်တီအိၣ်လၢသုပူၤဧါန့ၣ်, သုတၢ်ကတိၤကဘၣ်တၢ်မၤကွၢ်အီၤလီၤ. မ့တမ့ၢ်ဘၣ် ဒ်န့ၣ်ဒီးလၢဖၤရိၤအသးသမူ အမဲာ်ညါန့ၣ် သုမ့ၢ်ပှၤဟးကွၢ်ဟုၣ်တၢ်လီၤ. ၁၇ ဒီးစီၤယိၤသးပာ်ဃုာ်အီၤခဲလၢာ် လၢပၢၤတၢ်အလီၢ်သၢနံၤလီၤ.
“ယအိၣ်လၢယွၤအလီၢ်စ့ၢ်ကီးဧါ”
ဒ်သိးစီၤယိၤသး ကသ့ၣ်ညါဝဲ အဝဲၢ်တဖၣ် အတၢ်ပာ်သူၣ်ပာ်သးအဂီၢ် အဝဲမၤကွၢ်ဝဲတခါဝံၤတခါလီၤ. အဆိကတၢၢ် အဝဲတဲတၢ်ဒီးအဝဲၢ်တဖၣ် ဆူၣ်ဆူၣ်ကိၤကိၤ ခီဖျိလၢ ပှၤကတိၤကျိာ်ထံတၢ် ဒီးပာ်ဒ့ၣ်ပာ်ကမၣ်အဝဲသ့ၣ်လၢ ပှၤကွၢ်ဟုၣ်တၢ်လီၤ. ဖဲန့ၣ်အခါ အဝဲသ့ၣ်တဲဘၣ်ဝဲ စီၤယိၤသးလၢ အဟံၣ်ဖိဃီဖိအဂ့ၢ်အကျိၤ ဒ်သိးအဝဲသ့ၣ် ကဒီသဒၢလီၤက့ၤအသးအဂီၢ်လီၤ. ပၣ်ဃုာ်ဒီး အပုၢ်လၢအိၣ်တ့ၢ်လၢဟံၣ်တဂၤအဂ့ၢ် လၢအဝဲအဲၣ်ဒိးသ့ၣ်ညါဝဲန့ၣ်လီၤ. စီၤယိၤသး ကဘၣ်ဂုာ်ကျဲးစၢး ပၢၤဃာ်အတၢ်တူၢ်ဘၣ်လီၤ. အပုၢ်အိၣ်မူဒံး လီၤမီၤ. ခဲအံၤစီၤယိၤသး ကဘၣ်မၤဝဲတၢ်မနုၤလဲၣ်န့ၣ် သ့ၣ်ညါဝဲလံ. အဝဲတဲဝဲလၢယ “ကမၤကွၢ်သုလၢတၢ်အံၤ” ဒီး တဲဘၣ်ဝဲလၢ အဝဲအဲၣ်ဒိးထံၣ်ဘၣ် အဝဲသ့ၣ်အပုၢ်သဒါလီၤ. ဖဲန့ၣ်အဆၢကတီၢ် စီၤယိၤသး ဟ့ၣ်အခွဲးလၢ အဝဲသ့ၣ်အကျါကအိၣ်တ့ၢ်တဂၤ ဒီးအဂၤတဖၣ်ကက့ၤဆူအဟံၣ် ဒီးကဟဲကိးဃုာ်အပုၢ်သဒါအဂီၢ်လီၤ.—၁ မိၤၡ့ ၄၂:၉-၂၀.
(၁ မိၤၡ့ ၄၂:၂၁, ၂၂) ဒီးကတိၤလိာ် အသးသကိးသကိးဒီးစံးဝဲဒၣ်, ပတၢ်ဒဲးဘးအိၣ်မးလၢ ပဒီပုၢ်ဝဲၢ်တဂၤအဃိ, လၢပထံၣ်ဘၣ်အသူၣ်ကိၢ်အသးဂီၤ, လၢအဃ့ကညးပှၤ, ဒီးပတကနၣ်ဘၣ်. မၤသးဒ်န့ၣ်ဒီး တၢ်ကိၢ်တၢ်ဂီၤအံၤဘၣ်ပှၤလီၤ. ၂၂ ဒီးစီၤရူၤဘ့ၣ် စံးဆၢအီၤဒီးစံးဝဲဒၣ်, ယစံးဘၣ်သု, မၤကမၣ်ဘၣ်ဖိသၣ်တဂ့ၤ, ဒီးသုတကနၣ်ဘၣ် တမ့ၢ်ဘၣ်ဧါ. မၤသးဒ်န့ၣ်ဒီး, ကွၢ်ကွၢ်, တၢ်ဃုန့ၢ်အသွံၣ်စ့ၢ်ကီးလီၤ.
it-2 ၁၀၈ ¶၄
စီၤယိၤသး
သမံသမိး တၢ်အိၣ်သးတဖၣ်ဝံၤအလီၢ်ခံ စီၤယိၤသး အဝဲၢ်ခွါတဖၣ် တူၢ်ဘၣ်ဝဲလၢ ကစၢ်ယွၤ စံၣ်ညီၣ်အဝဲသ့ၣ် မ့ၢ်လၢ ဆါလီၤကွံာ် စီၤယိၤသးလၢ ကုၢ်အဃိလီၤ. အဝဲသ့ၣ်တိၢ်နီၣ် စီၤယိၤသး တဘၣ်ဘၣ်အဃိ တဲသကိးဝဲ အတၢ်ကမၣ်အဂ့ၢ်လၢ စီၤယိၤသးအမဲာ်ညါလီၤ. အဝဲသ့ၣ် အတၢ်ကတိၤတဖၣ်န့ၣ် ဖျါလၢအပီၢ်ယၢ်လီၤက့ၤအသးအဃိ စီၤယိၤသး ကီၤအသးတန့ၢ်လၢၤဘၣ် ဒီးဟးထီၣ်လၢအဝဲသ့ၣ် အအိၣ်ဒီး ဟီၣ်ဝဲလီၤ. ဖဲအဟဲက့ၤကဒါအခါ ဖီၣ်ဃာ်ဝဲ စီၤစူၤမ့းအိၣ် တုၤလၢပှၤဟဲက့ၤကိးန့ၢ်အီၤ အပုၢ်သဒါတစုလီၤ.—၁ မိၤ. ၄၂:၂၁-၂၄.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၁ မိၤၡ့ ၄၂:၂၂) ဒီးစီၤရူၤဘ့ၣ်စံးဆၢအီၤဒီးစံးဝဲဒၣ်, ယစံးဘၣ်သု, မၤကမၣ်ဘၣ်ဖိသၣ်တဂ့ၤ, ဒီးသုတကနၣ်ဘၣ် တမ့ၢ်ဘၣ်ဧါ. မၤသးဒ်န့ၣ်ဒီး, ကွၢ်ကွၢ်, တၢ်ဃုန့ၢ်အသွံၣ်စ့ၢ်ကီးလီၤ.
(၁ မိၤၡ့ ၄၂:၃၇) ဒီးစီၤရူၤဘ့ၣ်ကတိၤတၢ်ဒီးအပၢ်, ဒီးစံးဘၣ်အီၤ, ယမ့ၢ်တဟဲက့ၤစိာ်ဘၣ်အီၤဆူနအိၣ်ဘၣ်ဒီး, မၤသံကွံာ်ယဖိခွါခံဂၤတက့ၢ်. ပာ်အီၤလၢယစုပူၤတက့ၢ်, ဒီးယကဟဲက့ၤစိာ်အီၤဆူနအိၣ်လီၤ.
it-2 ၇၉၅
စီၤရူၤဘ့ၣ်
ပထံၣ်ဘၣ် စီၤရူၤဘ့ၣ် အတၢ်ဂ့ၤတၢ်ဝါတနီၤ ဖဲအဝဲတဲဘၣ် အဒီပုၢ်ဝဲၢ်ခွံဂၤလၢ တဘၣ်မၤသံ စီၤယိၤသးတဂ့ၤ လၢတၢ်န့ၣ်အလီၢ် ဖၢနုာ်အီၤလၢ ထံပူၤလၢထံတအိၣ်လၢအပူၤအခါန့ၣ်လီၤ. စီၤရူၤဘ့ၣ်န့ၣ် အိၣ်ဒီးတၢ်ကူၣ်လၢ ကက့ၤခူသူၣ်ဒီး ထုးထီၣ်က့ၤဝဲ စီၤယိၤသးလၢ ထံပူၤလီၤ. (၁ မိၤ. ၃၇:၁၈-၃၀) ပူၤကွံာ်အနံၣ် ၂၀ ဘျဲၣ်ဝံၤအလီၢ်ခံ ဖဲပှၤပာ်ဒ့ၣ်ပာ်ကမၣ် အဝဲသ့ၣ်လၢ အမ့ၢ်ပှၤဟဲကွၢ်ဟုၣ် ကီၢ်အဲၤကူပတူးအခါ အဒီပုၢ်ဝဲၢ်တဖၣ်တဲဝဲလၢ မ့ၢ်လၢအဝဲသ့ၣ် မၤတ့ၢ်ဘၣ်စီၤယိၤသးတတီတလိၤအဃိလီၤ. ဖဲန့ၣ်အခါ စီၤရူၤဘ့ၣ်တဲဝဲလၢ အဝဲတပၣ်ဃုာ်လၢ ပှၤမၤစီၤယိၤသးတတီတလိၤအကျါဘၣ်. (၁ မိၤ. ၄၂:၉-၁၄, ၂၁, ၂၂) ဖဲအဝဲသ့ၣ်တဖၣ် ကဘၣ်လဲၤကဒီး လၢကီၢ်အဲၤကူပတူး ခံဘျီတဘျီအခါ စီၤယၤကိာ်တဲဝဲလၢ အဝဲတပျဲဝဲလၢ စီၤဘံၣ်ယၤမံၣ် ကလဲၤဘၣ်. ဖဲန့ၣ်အခါ စီၤရူၤဘ့ၣ် အၢၣ်လီၤအပၢ်လၢ “ယမ့ၢ်တဟဲက့ၤစိာ်ဘၣ်အီၤဆူနအိၣ်ဘၣ်ဒီး မၤသံကွံာ်ယဖိခွါခံဂၤတက့ၢ်.”—၁ မိၤ. ၄၂:၃၇.
(၁ မိၤၡ့ ၄၃:၃၂) ဒီးပှၤပာ်လီၤလၢအဂီၢ်တပူၤ, ဒီးလၢအဝဲသ့ၣ်တဖၣ်န့ၣ် ပဂီၢ်တပူၤဒၣ်, ဒီးလၢပှၤအဲၤကူပတူးဖိလၢ အအီၣ်တၢ်ဒီးအီၤအဂီၢ် တပူၤဒၣ်လီၤ. အဂ့ၢ်ဒ်အံၤ, ပှၤအဲၤကူပတူးဖိ တအီၣ်ဘၣ်တၢ်ဒီးပှၤဧ့ၤဘြံၤဖိဘၣ်. အဂ့ၢ်ဒ်အံၤ, အဝဲန့ၣ်မ့ၢ်တၢ်သးဘၣ်အၢလၢ ပှၤအဲၤကူပတူးဖိန့ၣ်လီၤ.
တၢး၀၄ ၁/၁၅ ၂၉ ¶၁
လံာ်စီဆှံ အတၢ်ပာ်ဖျါလၢ လံာ် ၁ မိၤၡ့—၂
၄၃:၃၂—ဘၣ်မနုၤအဃိ ပှၤအဲၤကူပတူးဖိတဖၣ် ကအီၣ်သကိးတၢ်ဒီး ပှၤဧ့ၤဘြံၤဖိအဂီၢ် သးဘၣ်အၢဝဲလဲၣ်. ကမ့ၢ်လၢ တၢ်ဘူၣ်တၢ်ဘါ တဒ်သိးလိာ်အသး မ့တမ့ၢ် တၢ်ကွၢ်တလီၤ ကလုာ်ဒူၣ်အဃိလီၤ. ပှၤအဲၤကူပတူးဖိတဖၣ်န့ၣ် သးဘၣ်အၢဝဲ ပှၤကွၢ်သိတဖၣ်လီၤ. (၁ မိၤၡ့ ၄၆:၃၄) ဘၣ်မနုၤအဃိလဲၣ်. ပှၤအဲၤကူပတူးဖိတဖၣ်န့ၣ် ပာ်ဝဲပှၤကွၢ်သိတဖၣ်လၢ အမ့ၢ်ပှၤလၢအပတီၢ်ဖုၣ်ကတၢၢ်လီၤ. မ့တမ့ၢ် ဘၣ်သ့ၣ်သ့ၣ် ခီဖျိလၢ အစံာ်ဧိၤပှဲၤဧိၤ တအိၣ်အါအါဘၣ်အဃိ ဒ်သိးသိတဖၣ်ကအီၣ်ဘၣ်အဆၣ်အဂီၢ် အဝဲသ့ၣ်ဘၣ်ဃုဝဲတၢ်လီၢ်အဃိ ပှၤအဲၤကူပတူးဖိတဖၣ် ကထံၣ်ဆံးအဝဲသ့ၣ်လီၤ.
တၢ်ဖးလံာ်စီဆှံ
(၁ မိၤၡ့ ၄၂:၁-၂၀) ဒီးစီၤယၤကိာ်ထံၣ်ဘၣ်ဝဲလၢ ဘုဧိၤဟုဧိၤအိၣ်လၢအဲၤကူပတူးအပူၤ, ဒီးစီၤယၤကိာ်စံးဘၣ် အဖိခွါတဖၣ်, သုကွၢ်လိာ်သုသးမ့ၢ်အဘၣ်မနုၤလဲၣ်. ၂ ကွၢ်ကွၢ်, ယနၢ်ဟူလၢ ဘုဧိၤဟုဧိၤအိၣ်လၢ အဲၤကူပတူးအပူၤလီၤ. လဲၤလီၤဖဲန့ၣ်, ဒီးပှ့ၤတၢ်လၢပဂီၢ်ဖဲန့ၣ်, ဒ်သိးပကမူဒံး, ဒီးပသုတသံတဂ့ၤန့ၣ်တက့ၢ်. ၃ ဒီးစီၤယိၤသးအဒီပုၢ်ဝဲၢ်ဆံဆံၣ်ဂၤ လဲၤလီၤဝဲ ဒ်သိးအကပှ့ၤ ဘုဧိၤဟုဧိၤလၢအဲၤကူပတူးအပူၤလီၤ. ၄ မ့မ့ၢ်စီၤယိၤသး အပုၢ်စီၤဘံၣ်ယၤမံၣ်တဂၤ, စီၤယၤကိာ်တမၢဘၣ် အလဲၤတၢ်ဒီးအဒီပုၢ်ဝဲၢ်ဘၣ်. အဂ့ၢ်ဒ်အံၤ, စံးဝဲဒၣ်, ကဘၣ်တၢ်အၢတၢ်နးဘၣ်ဖုးလီၤ. ၅ ဒီးစီၤအံၣ်စရ့လးအဖိခွါတဖၣ် ဟဲပှ့ၤတၢ်လၢ ပှၤလၢအဟဲတဖၣ်အကျါလီၤ. အဂ့ၢ်ဒ်အံၤ, တၢ်သၣ်ဝံၤလီၤဒိန့ၣ် အိၣ်လၢကီၢ်ကနၤဧၣ်အပူၤလီၤ. ၆ ဒီးစီၤယိၤသးမ့ၢ်တၢ်အခိၣ်လၢ ကီၢ်အဖီခိၣ်လီၤ. အဝဲဒၣ်ဆါတၢ် ဒီးပှၤကီၢ်ဖိခဲလၢာ်, ဒီးစီၤယိၤသးအဒီပုၢ်ဝဲၢ်ဟဲဝဲ, ဒီးတီၤလီၤကျးလီၤအမဲာ်ဆူအအိၣ်လၢ ဟီၣ်ခိၣ်လီၤ. ၇ ဒီးစီၤယိၤသးထံၣ်ဘၣ်အဒီပုၢ်ဝဲၢ်, ဒီးသ့ၣ်ညါနီၣ်အီၤလီၤ. ဘၣ်ဆၣ်ဒီးပာ်အသးလၢ ပှၤတခီဘီမုၢ်ဖိလၢအမဲာ်ညါ, ဒီးကတိၤတၢ်ဆူၣ်ဆူၣ်ဒီးအီၤ, ဒီးစံးဘၣ်အီၤ, သုဟဲလၢလဲၣ်. ဒီးစံးဝဲဒၣ်, လၢကီၢ်ကနၤဧၣ် ဒ်သိးပကပှ့ၤတၢ်အီၣ်တၢ်အီလီၤ. ၈ ဒီးစီၤယိၤသးသ့ၣ်ညါနီၣ် အဒီပုၢ်ဝဲၢ်လီၤ. မ့မ့ၢ်အဝဲသ့ၣ်တဖၣ်န့ၣ် တသ့ၣ်ညါနီၣ်ဘၣ်အီၤဘၣ်. ၉ ဒီးစီၤယိၤသး သ့ၣ်နီၣ်ထီၣ်က့ၤ တၢ်မံမီၢ်တဖၣ်လၢ အမံမီၢ်လၢအဂ့ၢ်အကျိၤ, ဒီးစံးဘၣ်အီၤ, သုမ့ၢ်ပှၤဟးကွၢ်ဟုၣ်တၢ်လီၤ. ဒ်သိးသုကထံၣ်ဘၣ် ကီၢ်အအိၣ်ဘ့ၣ်ဆ့ဒီး, သုဟဲလီၤ. ၁၀ ဒီးအဝဲသ့ၣ်စံးဘၣ်အီၤ, တမ့ၢ်ဘၣ်ကစၢ်ဧၢ, မ့ၢ်ဒ်သိးပကပှ့ၤတၢ်အီၣ်တၢ်အီဒီး, နကုၢ်နပှၤဟဲလီၤ. ၁၁ ပဝဲဒၣ်ခဲလၢာ်အံၤ ပမ့ၢ်ပှၤတဂၤဃီအဖိခွါလီၤ. ပမ့ၢ်ပှၤအတီလီၤ. နကုၢ်နပှၤတမ့ၢ်ဘၣ် ပှၤဟးကွၢ်ဟုၣ်တၢ်ဘၣ်. ၁၂ ဒီးစံးဘၣ်အီၤ, တမ့ၢ်ဘၣ်, မ့ၢ်ဒ်သိးသုကထံၣ်ဘၣ် ကီၢ်အအိၣ်ဘ့ၣ်ဆ့ဒီး, သုဟဲလီၤ. ၁၃ ဒီးစံးဝဲဒၣ်, နကုၢ်နပှၤမ့ၢ်ဒီပုၢ်ဝဲၢ်တဆံခံဂၤ, ပှၤတဂၤဃီအိၣ်လၢ ကီၢ်ကနၤဧၣ်တဂၤ အဖိခွါတဖၣ်လီၤ. ဒီးကွၢ်ကွၢ်, အဆံးတဂၤ အိၣ်ဒီးပပၢ်လၢ မုၢ်မဆါတနံၤအံၤလီၤ. ဒီးအဝဲတဂၤတအိၣ်လၢၤဘၣ်. ၁၄ ဒီးစီၤယိၤသးစံးဘၣ်အီၤ, တၢ်န့ၣ်မ့ၢ်တၢ်လၢ ယစံးဘၣ်သုလီၤ. ယစံး, သုမ့ၢ်ပှၤဟးကွၢ်ဟုၣ်တၢ်လီၤ. ၁၅ တၢ်ကမၤကွၢ်သုလၢတၢ်အံၤ, လၢဖၤရိၤအသးသမူ အမဲာ်ညါန့ၣ် သုပုၢ်သဒါမ့ၢ်တဟဲဘၣ်ဖဲအံၤဘၣ်ဒီး, သုတဟးထီၣ်ဘၣ်ဖဲအံၤဘၣ်. ၁၆ မၢပှၤလၢသုကျါတဂၤလဲၤ ဒီးဟဲက့ၤစိာ်သုပုၢ်တဂၤန့ၣ်တက့ၢ်. ဒီးသုကအိၣ်စၢဃာ်သုသး, ဒ်သိးတၢ်တီအိၣ်လၢသုပူၤဧါန့ၣ်, သုတၢ်ကတိၤကဘၣ်တၢ်မၤကွၢ်အီၤလီၤ. မ့တမ့ၢ်ဘၣ် ဒ်န့ၣ်ဒီးလၢဖၤရိၤအသးသမူ အမဲာ်ညါန့ၣ် သုမ့ၢ်ပှၤဟးကွၢ်ဟုၣ်တၢ်လီၤ. ၁၇ ဒီးစီၤယိၤသးပာ်ဃုာ်အီၤခဲလၢာ် လၢပၢၤတၢ်အလီၢ်သၢနံၤလီၤ. ၁၈ ဒီးသၢနံၤတနံၤန့ၣ် စီၤယိၤသးစံးဘၣ်အီၤ, မၤတၢ်အံၤ, ဒီးမူတက့ၢ်. ယပျံၤယွၤလီၤ. ၁၉ သုမ့ၢ်တီဒီး, မ်ပှၤလၢသုဒီပုၢ်ဝဲၢ် အကျါတဂၤဘၣ် တၢ်စၢဃာ်အီၤလၢ တၢ်ပၢၤသုအဟံၣ်ပူၤ, ဒီးလဲၤစိာ်သုဘုဧိၤဟုဧိၤလၢ တၢ်သၣ်ဝံၤလီၤဒိအိၣ်လၢ သုဟံၣ်တဖၣ်အဂီၢ်န့ၣ်, ၂၀ ဒီးဟဲက့ၤစိာ်သုပုၢ်သဒါဆူ ယအိၣ်တက့ၢ်. ဒီးသုကမၤတီသုကလုၢ်, ဒီးသုတသံဘၣ်လီၤ. ဒီးအဝဲသ့ၣ်မၤဝဲဒ်န့ၣ်လီၤ.