ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါအီကူး ၃–၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ မိၤၡ့ ၁၃–၁၄
“အိၣ်ဂၢၢ်ဆိးကျၢၤ ဒီးထံၣ်ဘၣ် ယွၤအတၢ်အုၣ်က့ၤခီၣ်က့ၤ”
(၂ မိၤၡ့ ၁၄:၁၃, ၁၄) ဒီးစီၤမိၤၡ့စံးဘၣ်ပှၤဂီၢ်မုၢ်န့ၣ်, ပျံၤတဂ့ၤ, အိၣ်ဂၢၢ်ဆိးကျၢၤ, ဒီးထံၣ်ဘၣ်ယွၤအတၢ်အုၣ်က့ၤခီၣ်က့ၤ လၢအကမၤန့ၢ်သုလၢမုၢ်မဆါတနံၤအံၤတက့ၢ်. အဂ့ၢ်ဒ်အံၤ, ပှၤအဲၤကူပတူးဖိတဖၣ်လၢ သုထံၣ်ဘၣ်လၢ မုၢ်မဆါတနံၤအံၤ, စိၤရီၤသုတထံၣ်ကဒီးလၢၤဘၣ်အီၤဘၣ်. ၁၄ ယွၤကဒုးတၢ်လၢသုဂီၢ်, ဒီးသုကဘၣ်အိၣ်ဘှီၣ်ကလာ်လီၤ.
တၢး၁၃ ၂/၁ ၄
စီၤမိၤၡ့ မ့ၢ်ပှၤတဂၤလၢ အိၣ်ဒီးတၢ်နာ်
တမ့ၢ်လၢ စီၤစီၤမိၤၡ့ ကဆိကမိၣ်ထီၣ်ဘၣ်ဝဲလၢ ယဟိဝၤယွၤ ကမၤသ့ၣ်ဖး ပီၣ်လဲၣ်ဂီၤ ဒီးအိးထီၣ်ကျဲလၢ ပှၤအံၣ်စရ့လးဖိတဖၣ်အဂီၢ်ဘၣ်. ဘၣ်ဆၣ်, စီၤမိၤၡ့နာ်ဝဲ သပှၢ်တၢၢ်လၢ ကစၢ်ယွၤကမၤ တၢ်တမံၤမံၤ လၢကဒီသဒၢ အပှၤဂီၢ်မုၢ်အဂီၢ်လီၤ. စီၤမိၤၡ့ အဲၣ်ဒိးလၢ ပှၤအံၣ်စရ့လးဖိတဖၣ်စ့ၢ်ကီး ကအိၣ်ဒီးတၢ်နာ် ဒ်သိးဒီးအီၤလီၤ. ပဖးဘၣ်လၢ “ဒီးစီၤမိၤၡ့စံးဘၣ်ပှၤဂီၢ်မုၢ်န့ၣ်, ပျံၤတဂ့ၤ, အိၣ်ဂၢၢ်ဆိးကျၢၤ, ဒီးထံၣ်ဘၣ်ယွၤအတၢ်အုၣ်က့ၤခီၣ်က့ၤ လၢအကမၤန့ၢ်သုလၢ မုၢ်မဆါတနံၤအံၤတက့ၢ်.” (၂ မိၤ. ၁၄:၁၃) စီၤမိၤၡ့ မၤဂၢၢ်ကျၢၤထီၣ်ဝဲ ပှၤအံၣ်စရ့လးဖိတဖၣ် အတၢ်နာ်န့ၢ်ဧါ. လံာ်စီဆှံပာ်ဖျါထီၣ်ဝဲလၢ တမ့ၢ်ထဲ စီၤမိၤၡ့တဂၤဧိၤဘၣ် ပှၤအံၣ်စရ့လးဖိခဲလၢာ် “လၢတၢ်နာ်ခီဂာ်ပီၣ်လဲၣ်ဂီၤဒ်လၢခိအသိး” လီၤ. (ဧ့ၤဘြံၤ ၁၁:၂၉) စီၤမိၤၡ့ အတၢ်နာ်န့ၣ် အဘျုးအိၣ်လၢအဂီၢ် တကးဒံးဘၣ် အဘျုးအိၣ်စ့ၢ်ကီးလၢ ပှၤကိးဂၤဒဲးအဂီၢ်လီၤ.
(၂ မိၤၡ့ ၁၄:၂၁, ၂၂) ဒီးစီၤမိၤၡ့ယူာ်ဃီၤအစုလၢ ပီၣ်လဲၣ်အဖီခိၣ်, ဒီးယွၤဒုးလဲၤကွံာ် ပီၣ်လဲၣ်လၢကလံၤဆူၣ် လၢမုၢ်ထီၣ်တခီသီတနၤကျၢၤ, ဒီးဒုးကဲထီၣ်ပီၣ်လဲၣ်လၢခိ, ဒီးထံန့ၣ်လီၤဖးဝဲလီၤ. ၂၂ ဒီးပှၤအံၣ်စရ့လးဖိ လဲၤလီၤဆူပီၣ်လဲၣ် အသးကံၢ်ပူၤလၢခိ, ဒီးထံန့ၣ်ကဲထီၣ်အဒူၣ်လၢ အစုထွဲဒီးလၢအစုစ့ၣ် လၢအဂီၢ်လီၤ.
သ့တၢ်လၢာ်ဘၣ်ဆၣ် ဆိကမိၣ်န့ၢ်တၢ်လၢ ပှၤဂၤအဂီၢ်
၁၃ ဖး ၂ မိၤၡ့ ၁၄:၁၉-၂၂ တက့ၢ်. ထံၣ်တမှံကွၢ်လၢ နအိၣ်လၢပှၤအံၣ်စရ့လးဖိ ဖဲန့ၣ်တဖၣ်အကျါတက့ၢ်. ဖဲန့ၣ်အခါ နကျဲကတၢၢ်လံ. ဒီးပှၤအဲၤကူပတူး အသုးမုၢ်သံၣ်ဘိတဖၣ် အိၣ်လၢနလီၢ်ခံ ဒီးလၢနမဲာ်ညါန့ၣ် အိၣ်ဒီးပီၣ်လဲၣ်ဂီၤန့ၣ်လီၤ. ဖဲန့ၣ်အဆၢကတီၢ် ကစၢ်ယွၤမၤစၢၤနၤလီၤ. တၢ်အၢၣ်အထူၣ်လၢ အအိၣ်ဆၢထၢၣ်လၢ ပှၤအံၣ်စရ့လးဖိတဖၣ်အမဲာ်ညါန့ၣ် လဲၤသုးအသးဆူ ပှၤအဲၤကူပတူးဖိတဖၣ်ဒီး ပှၤအံၣ်စရ့လးဖိတဖၣ် အဘၢၣ်စၢၤလီၤ. လၢပှၤအဲၤကူပတူးဖိတဖၣ် အအိၣ်တကပၤန့ၣ်တၢ်ခံး ဘၣ်ဆၣ်လၢနအိၣ်တကပၤန့ၣ် တၢ်ကပီၤလီၤ. နထံၣ်ဘၣ်လၢ စီၤမိၤၡ့ယူာ်ထီၣ်အစုလၢ ပီၣ်လဲၣ်အဖီခိၣ်ဒီး ကလံၤဆူၣ်ဆူၣ်ဟဲလၢ မုၢ်ထီၣ်တခီ ဒီးပီၣ်လဲၣ်သ့ၣ်ဖး ဒီးကျဲအိးထီၣ်အသးဖးလဲၢ် တုၤလၢပီၣ်လဲၣ်အဝၢ်ဘးခီလီၤ. ဖဲန့ၣ်န့ၣ် နၤ, နဟံၣ်ဖိဃီဖိ, နဆၣ်ဖိကီၢ်ဖိတဖၣ် ဒီးပှၤအံၣ်စရ့လးဖိတဖၣ်န့ၣ် ပိာ်ထီၣ်လိာ်အခံဒီး ဟးလၢပီၣ်လဲၣ်အခံဒးလီၤ. ဒီးနထံၣ်ဘၣ်လၢ ပီၣ်လဲၣ်အခံဒးန့ၣ် တဘၣ်စီၣ်ဘၣ်, တၢ်တဘျ့ဘၣ် ဒီးတၢ်ဃ့ထီအဃိ နဟးဘၣ်အီၤမုာ်လီၤ. ပှၤလၢအဟးဃၢကတၢၢ်တဂၤဒၣ်လဲာ် လဲၤတုၤလၢ ပီၣ်လဲၣ်ဝၢ်ဘးခီ ဂ့ၤဂ့ၤဘၣ်ဘၣ်လီၤ.
(၂ မိၤၡ့ ၁၄:၂၆-၂၈) ဒီးယွၤစံးဘၣ်စီၤမိၤၡ့, ယူာ်ဃီၤနစုလၢပီၣ်လဲၣ်အဖီခိၣ်, ဒ်သိးထံကဟဲက့ၤကဒါက့ၤလၢ ပှၤအဲၤကူပတူးဖိအဖီခိၣ်, လၢအလ့ၣ်ကဟၣ်အဖီခိၣ်, ဒီးလၢအပှၤဒိးကသ့ၣ် အဖီခိၣ်န့ၣ်တက့ၢ်. ၂၇ ဒီးစီၤမိၤၡ့ယူာ်ဃီၤအစု လၢပီၣ်လဲၣ်အဖီခိၣ်, ဒီးတုၤမုၢ်ဆ့ၣ်ထီၣ်န့ၣ်ဒီး, ပီၣ်လဲၣ်ဟဲက့ၤကဒါက့ၤ လၢအဂံၢ်အဘါ, ဒီးပှၤအဲၤကူပတူးဖိ ဃ့ၢ်ဝဲလၢအမဲာ်ညါ, ဒီးယွၤတြုၤကွံာ် ပှၤအဲၤကူပတူးဖိလၢ ပီၣ်လဲၣ်အသးကံၢ်ပူၤန့ၣ်လီၤ. ၂၈ ဒီးထံန့ၣ် ဟဲက့ၤကဒါက့ၤ ဒီးမၤဘံးမၤဘၢ လ့ၣ်ကဟၣ်, ဒီးပှၤဒိးကသ့ၣ်, ကယဲၢ်ဖၤရိၤအသုးမုၢ်ခဲလၢာ်လၢအဟဲပိာ် အခံဆူပီၣ်လဲၣ်ပူၤန့ၣ်လီၤ. တအိၣ်လီၤ တဲာ်ဘၣ်နီတဂၤဘၣ်.
တၢး၀၉ ၃/၁၅ ၇ ¶၂-၃
နတဘၣ် သးပ့ၤနီၣ် ယဟိဝၤယွၤဘၣ်
ဖဲပှၤအဲၤကူပတူးဖိ ဒီးအလ့ၣ်ကဟၣ်လၢ အဟးဂီၤကွံာ်တဖၣ် ဂုာ်ကျဲးစၢၤ ဟးထီၣ်ကွံာ်ဝဲအခါ ပှၤအံၣ်စရ့လးဖိခဲလၢာ် လဲၤတုၤလၢ ပီၣ်လဲၣ်ကၢၢ်ခိၣ်လၢ မုၢ်ထီၣ်တခီလံလီၤ. ခဲအံၤ စီၤမိၤၡ့ ယူာ်ထီၣ်က့ၤအစုလၢ ပီၣ်လဲၣ်ဂီၤအဖီခိၣ်န့ၣ်လီၤ. ဖဲန့ၣ်အခါ ယဟိဝၤယွၤ မၤလီၤပီၢ်ကွံာ်ဝဲ ထံလၢအအိၣ်တီဃာ်အသးန့ၣ်လီၤ. ထံဂီၢ်မုၢ်ဂီၢ်ပၤလီၤဖှိၣ်ဆူ ဖၤရိၤဒီး အသုးမုၢ်တဖၣ်အဖီခိၣ် ဒီးအဝဲသ့ၣ် လီၤဘျၢကွံာ်ဝဲလီၤ. အဝဲသ့ၣ် တပူၤဖျဲး နီတဂၤဘၣ်. မ့မ့ၢ် ပှၤအံၣ်စရ့လးဖိတဖၣ် ပူၤဖျဲးဝဲလီၤ.—၂ မိၤ. ၁၄:၂၆-၂၈; စံး. ၁၃၆:၁၃-၁၅.
ထံကီၢ်လၢ အခိၣ်အဃၢၤတဖၣ် နၢ်ဟူဝဲတၢ်ကစီၣ်အံၤအဃိ အဝဲသ့ၣ် အိၣ်ဒီးတၢ်ဘၣ်ယိၣ်ဘၣ်ဘှီလီၤ. (၂ မိၤ. ၁၅:၁၄-၁၆) ပူၤကွံာ်အနံၣ် ၄၀ ဝံၤအလီၢ်ခံ ဝ့ၢ်ယရံၤဃိမုၣ် နီၢ်ရၤဃး တဲဘၣ်ပှၤအံၣ်စရ့လးဖိခံဂၤလၢ “တၢ်ပျံၤသုန့ၣ်လီၤဘၣ်ပှၤ, . . . ပနၢ်ဟူလၢသုဟဲထီၣ်လၢ အဲၤကူပတူးန့ၣ် ယွၤမၤလီၤသံးကွံာ် ပီၣ်လဲၣ်ဆှဲအထံလၢသုဂီၢ်” လီၤ. (ၡူ. ၂:၉, ၁၀) ထံကီၢ်လၢ အဘူၣ်ထီၣ်ဘါထီၣ် ယွၤလၢအကမၣ်တဖၣ်ဒၣ်လဲာ် မ့ၢ်တသးပ့ၤနီၣ်ဝဲ ယဟိဝၤယွၤ မၤပူၤဖျဲးထီၣ် ပှၤအံၣ်စရ့လးဖိတဖၣ်အဂ့ၢ်ဘၣ်န့ၣ် ပှၤအံၣ်စရ့လးဖိတဖၣ် ကြၢးသ့ၣ်နီၣ်ဝဲ အါန့ၢ်အန့ၣ်ဒံးလီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၂ မိၤၡ့ ၁၃:၁၇) ဒီးတုၤဖၤရိၤပျၢ်ပှၤဂီၢ်မုၢ်ဒီး, တၢ်မၤအသးလၢ ပှၤဖလ့ၡသးဖိအကီၢ်အိၣ်ဘူး ဘၣ်ဆၣ်ဒီး, ယွၤတဆှၢဘၣ်အီၤလၢကီၢ်န့ၣ်အကျဲဘၣ်. အဂ့ၢ်ဒ်အံၤ, ယွၤစံးဝဲဒၣ်, တုၤပှၤဂီၢ်မုၢ်ထံၣ်ဘၣ်တၢ်ဒုးတၢ်ယၤဒီး, ကပီၢ်ယၢ်လီၤက့ၤဘၣ်ဖုးအသး, ဒီးကက့ၤကဒါက့ၤဆူအဲၤကူပတူးလီၤ.
it-1 ၁၁၁၇
ကျဲမုၢ်ဖးဒိၣ်
လၢပျၢၤကျဲမုၢ်ဖးဒိၣ်တဖၣ် လၢအပၣ်ဃုာ်ဒီး ကျဲအရ့ဒိၣ်လၢ ပှၤကၤတၢ်ဖိတဖၣ်အဂီၢ်န့ၣ် ဆဲးလိာ်အသးဒီး ဝ့ၢ်ဒီး ဘီမုၢ်တဖၣ်လၢ ပၤလဲးစတ့ အလီၢ်ကဝီၤပူၤလီၤ. (၄ မိၤ. ၂၀:၁၇-၁၉; ၂၁:၂၁, ၂၂; ၂၂:၅, ၂၁-၂၃; ၡူ. ၂:၂၂; စံၣ်ညီၣ်. ၂၁:၁၉; ၁ မူၤ. ၆:၉, ၁၂; ၁၃:၁၇, ၁၈) ကျဲမုၢ်ဖးဒိၣ်လၢ အရ့ဒိၣ်န့ၣ် စးထီၣ်အသးလၢ ကီၢ်အဲၤကူပတူး ဒီးလဲၤခီဂာ် ပှၤဖလ့ၡသးဖိတဖၣ်အဝ့ၢ် ဂါစၤ ဒီးအၤၡကလိၣ် ဒီးက့ၣ်လီၤ ဆူမုၢ်ထီၣ်ကလံၤစိးတကပၤ ဒီးလဲၤတုၤဆူ ဝ့ၢ်မကံးဒိၤလီၤ. ဒီးဆဲးလဲၤဆူ ဃါစိၢ် အိၣ်လၢကၤလံၤလါပီၣ်လဲၣ် ကလံၤစိးတခီ ဒီးလဲၤတုၤဆူ ဒၤမ့ၤစ့းလီၤ. ပှၤမ့ၢ်အိၣ်လၢကီၢ်အဲၤကူပတူး ဒီးလဲၤဆူကီၢ်တၢ်စံးပာ်န့ၣ် ကျဲလၢအလဲၤခီဂာ် ပှၤဖလ့ၡသးဖိအထံကီၢ်န့ၣ် မ့ၢ်ကျဲလၢအဖုၣ်ကတၢၢ်လီၤ. ဘၣ်ဆၣ် ပှၤဖလ့ၡသးဖိတဖၣ် မ့ၢ်ဟဲဒုးဘၣ်ဖုး ပှၤအံၣ်စရ့လးဖိတဖၣ်န့ၣ် အဝဲသ့ၣ် အသးကဟးဂီၤအဃိ ယဟိဝၤယွၤ ကိးထီၣ်အဝဲသ့ၣ်လၢ ကျဲလၢအဂၤတဘိလီၤ. မ့ၢ်ဒၣ် ယဟိဝၤယွၤ ပာ်ဖျါထီၣ်အတၢ်သးကညီၤလီၤ.—၂ မိၤ. ၁၃:၁၇.
(၂ မိၤၡ့ ၁၄:၂) စံးဘၣ်ပှၤအံၣ်စရ့လးဖိ ဒ်သိးအကဃၣ်အသး ဒီးသူၣ်အဒဲလၢ ပံၤဟဃံရိးအမဲာ်ညါ, လၢမံးကဒိးလး ဒီးပီၣ်လဲၣ်အဘၢၣ်စၢၤ, လၢဘဧၤလးစဖိၣ် အမဲာ်ညါန့ၣ်တက့ၢ်, သုဘၣ်သူၣ်ဒဲသဃီၤဒီးအီၤ လၢပီၣ်လဲၣ်နံၤန့ၣ်လီၤ.
it-1 ၇၈၂ ¶ ၂-၃
တၢ်ဟးထီၣ်
ပှၤအံၣ်စရ့လးဖိတဖၣ် ခီဂာ်ဝဲ ပီၣ်လဲၣ်ဂီၤကန့ၢ်အဂီၢ် ပီၣ်လဲၣ်ဘၣ်တၢ်မၤသ့ၣ်ဖးအီၤ ဖဲလဲၣ်တတီၤလဲၣ်.
ပာ်သူၣ်ပာ်သးလၢ ဖဲအဝဲသ့ၣ် လဲၤတၢ်တုၤလၢ တၢ်လီၢ်ခံတီၤတတီၤ, အ့သၣ် “လၢပှၢ်မုၢ်ကနၢအဃၢၤ” အခါ ကစၢ်ယွၤမၤလိာ်စီၤမိၤၡ့လၢအက “ဃၣ်အသး ဒီးသူၣ်အဒဲလၢ ပံၤဟဃံရိးအမဲာ်ညါ, . . . ပီၣ်လဲၣ်အဘၢၣ်စၢၤ” န့ၣ်လီၤ. တၢ်မၤအသးဒ်အံၤအဃိ ဖၤရိၤနာ်ဝဲလၢ ပှၤအံၣ်စရ့လးဖိတဖၣ် “အိၣ်သဘံၣ်ဘုၣ်လၢ ကီၢ်ပူၤလံ” လီၤ. (၂ မိၤ. ၁၃:၂၀; ၁၄:၁-၃) ပှၤကူၣ်ဘၣ်ကူၣ်သ့လၢ အတဲဝဲလၢ အဝဲသ့ၣ် လဲၤတၢ်လၢ အဲဟးကျဲတဖၣ် စံးဝဲလၢ ဧ့ၤဘြံၤအတၢ်ကတိၤလၢ ဘၣ်တၢ်ပာ်ဖျါလၢ “ဃၣ်” န့ၣ်မ့ၢ်တၢ်ကတိၤလၢအခီပညီယိာ်ဝဲလီၤ. အခီပညီတမ့ၢ်ထဲ “ဃၣ်ကပၤကွံာ်” မ့တမ့ၢ် “လဲၤလၢကျဲအဂၤ”ဘၣ်. အခီပညီအိၣ်လၢ တၢ်ဟဲက့ၤတရံး, လဲၤသကွ့ၤတၢ်ဖးယံၤန့ၣ်လီၤ. အဝဲသ့ၣ်တဲဝဲလၢ ဖဲပှၤအံၣ်စရ့လးဖိတဖၣ် လဲၤတုၤလၢ စူအဲးပီၣ်လဲၣ်ကျီၤ ကလံၤစိးတခီအခါ က့ၤတရံးက့ၤဝဲဆူ ကၠံၤဘၢၤအတၤကၤ ကစၢၢ်အမုၢ်ထီၣ်တခီလၢ အအိၣ်လၢ ပီၣ်လဲၣ်ကျီၤအမုၢ်နုာ်တခီန့ၣ်လီၤ. ပှၤအဲၤကူပတူးဖိတဖၣ် မ့ၢ်ဟဲလူၤအဝဲသ့ၣ်လၢ ကလံၤစိးတခီန့ၣ် ပှၤအံၣ်စရ့လးဖိအိၣ်ဂီၢ်မုၢ်အဃိ အဝဲသ့ၣ် ကကတံာ်ထီတ့ၢ်လၢ ပီၣ်လဲၣ်ဒီးကစၢၢ်အဘၢၣ်စၢၤ ဒီးဟးထီၣ်ကျဲတအိၣ်ဘၣ်လီၤ.
ပှၤယူဒၤဖိ အလုၢ်လၢ်လၢ တၢယၤဖှိၣ်အစိၤ နာ်ဝဲဒ်န့ၣ်အသိးလီၤ. ဘၣ်ဆၣ် တၢ်လၢအရ့ဒိၣ်န့ၢ် အန့ၣ်န့ၣ်မ့ၢ်ဝဲ တၢ်အိၣ်သးအံၤလီၤပလိာ်လိာ်အသးဒီး လံာ်စီဆှံန့ၣ်လီၤ. ပှၤကူၣ်ဘၣ်ကူၣ်သ့ အါတက့ၢ် အတၢ်ထံၣ်န့ၣ် တလီၤပလိာ်ဒီး လံာ်စီဆှံဘၣ်. (၂ မိၤ. ၁၄:၉-၁၆) အဃိ ဖျါလၢအဝဲသ့ၣ် ခီဂာ်ဝဲဖဲ ပီၣ်လဲၣ်ကျီၤအထးခီ (ဟီၣ်ခိၣ်လၢ အလဲၤလီၤဆူပီၣ်လဲၣ်ပူၤ လၢအိၣ်လၢပီၣ်လဲၣ်ဂီၤမုၢ်နုာ်တခီ) န့ၣ်လီၤ. အဃိ ဖၤရိၤအသုးမုၢ်တဖၣ် လဲၤလူၤအဝဲသ့ၣ်တုၤလၢ ပီၣ်လဲၣ်ကျီၤအကတၢၢ် ဒီးကဝီၤဝဲ ပှၤအံၣ်စရ့လးဖိတဖၣ်တန့ၢ်ဘၣ်အဃိ ပှၤအံၣ်စရ့လးဖိတဖၣ် လဲၤခီဝဲဆူဘးခီန့ၢ်ဝဲညီညီလီၤ.—၂ မိၤ. ၁၄:၂၂, ၂၃.
တၢ်ဖးလံာ်စီဆှံ
တၢး၀၇ ၁၂/၁၅ ၁၈-၂၀ ¶၁၃-၁၆
ဘၣ်ဃးဒီး ယဟိဝၤယွၤ မၤပူၤဖျဲးထီၣ် ပှၤအံၣ်စရ့လးဖိတဖၣ်လၢ ပီၣ်လဲၣ်ဂီၤန့ၣ် ပမၤလိန့ၢ်ဘၣ်တၢ်မနုၤလဲၣ်
၁၃ တၢ်မၤပူၤဖျဲးလၢ အလီၤကမၢကမၣ်အံၤ ကဲဘျုးလၢ ပှၤလၢအပူၤဖျဲးထီၣ်တဖၣ်အဂီၢ်ဒ်လဲၣ်. စီၤမိၤၡ့ ဒီးပှၤအံၣ်စရ့လးဖိ ပိာ်ခွါတဖၣ် သးဝံၣ်စံးထီၣ်ပတြၢၤ ယဟိဝၤယွၤလၢ တၢ်သးဝံၣ်တဘျီဃီလီၤ. အဝဲသ့ၣ်တဖၣ် သးဝံၣ်ဝဲလၢ “ယကသးဝံၣ်ထီၣ်ယွၤ, မ့ၢ်အကဟုဒိၣ်အကညီၢ်ဒိၣ်အဂ့ၢ် . . . ယွၤကကဲစီၤပၤ အစိၤစိၤအဃၣ်ဃၣ်လီၤ.” (၂ မိၤၡ့ ၁၅:၁, ၁၈) မ့ၢ်, တၢ်လၢအဝဲသ့ၣ်ဆိကမိၣ်ထီၣ်ဝဲ အဆိကတၢၢ်န့ၣ် မ့ၢ်ဝဲကသးဝံၣ်စံးထီၣ်ပတြၢၤ ကစၢ်ယွၤလီၤ. လၢတၢ်အိၣ်သးအံၤန့ၣ် ယဟိဝၤယွၤ အိၣ်ဒီးတၢ်ခွဲးတၢ်ယာ်လၢ ကပၢတၢ်န့ၣ် အိၣ်ဖျါထီၣ်ဝဲလီၤ.
၁၄ တၢ်မၤအသးလၢ အလီၤသူၣ်ပိၢ်သးဝးအံၤန့ၣ် ပဒိးန့ၢ်ဘၣ် တၢ်သိၣ်လိ, တၢ်မၤမုာ်ထီၣ်က့ၤ ဒီးပအိၣ်ဒီးတၢ်မုၢ်လၢ် မနုၤသ့လဲၣ်. ပထံၣ်ဘၣ်လၢ အပှၤဂီၢ်မုၢ်တဖၣ် မ့ၢ်ထံၣ်ဘၣ်တၢ်မၤကွၢ် ဒ်လဲၣ်ဂ့ၤဒ်လဲၣ်ဂ့ၤ ယဟိဝၤယွၤ အိၣ်ကတဲာ်ကတီၤအသးလၢ ကမၤစၢၤအဝဲသ့ၣ်အဂီၢ်လီၤ. ခါဆူညါအပှၤဂီၢ်မုၢ်တဖၣ် မ့ၢ်ထံၣ်ဘၣ် တၢ်အိၣ်သဒ်လဲၣ်ဂ့ၤဒ်လဲၣ်ဂ့ၤ ယဟိဝၤယွၤ မၤမုာ်ထီၣ်အဝဲသ့ၣ် သ့စ့ၢ်ကီးလီၤ. ဖဲယဟိဝၤယွၤ ဒုးဟဲထီၣ်ကလံၤလၢ မုၢ်ထီၣ်တခီအခါ ပီၣ်လဲၣ်ဂီၤအံၤ တကဲထီၣ်တၢ်တြီမၤတံာ်တာ်လၢ ပှၤအံၣ်စရ့လးဖိတဖၣ် အဂီၢ်လၢၤဘၣ်. တကးဒံးဘၣ် အဝဲဒုးကဲထီၣ်ဝဲ ပီၣ်လဲၣ်ဂီၤလၢ ဖၤရိၤအပှၤသုးဖိတဖၣ် အတၢ်သွၣ်ခိၣ်လီၤ. ပမ့ၢ်ဆိကမိၣ်ထံတၢ်ဂ့ၢ်အံၤန့ၣ် ဒ်ပှၤကွဲးထါစံးထီၣ်ပတြၢၤအသိး ပဝဲစ့ၢ်ကီးပတဲသ့လၢ “ယွၤအိၣ်လၢ ယအိၣ်တခီလီၤ. ပှၤကညီကမၤယၤ ဒ်လဲၣ်ဒ်လဲၣ်န့ၣ် ယတဘၣ်ယိၣ်ဘၣ်.” (စံးထီၣ်ပတြၢၤ ၁၁၈:၆) ပထံၣ်န့ၢ်တၢ်မၤမုာ်ထီၣ်က့ၤလၢ စီၤပီလူး အတၢ်ကတိၤလၢ အကွဲးနီၣ်ပာ်ဝဲလၢ ရိမ့ၤ ၈:၃၁ အပူၤသ့စ့ၢ်ကီးလီၤ. ဖဲန့ၣ်တဲဝဲလၢ “မၤသးဒ်န့ၣ်ဒီး, ပကစံးလၢတၢ်န့ၣ်တဖၣ်ဒ်လဲၣ်. ယွၤမ့ၢ်အိၣ်လၢပဂီၢ်ဒီး, မ့ၢ်မတၤကထီဒါပှၤတဂၤလဲၣ်.” တၢ်ကတိၤတဖၣ်အံၤ မၤဆူၣ်ထီၣ်ပတၢ်နာ်လီၤ. တၢ်သ့ၣ်တဖၣ်အံၤ ကမၤလီၤမၢ်ကွံာ် ပတၢ်ပျံၤတၢ်ဖုး, ပတၢ်သးဒ့ဒီတဖၣ် ဒီးမၤဂၢၢ်ကျၢၤထီၣ်ပတၢ်မုၢ်လၢ်လီၤ. လၢတၢ်န့ၣ်အဃိ လံာ်စီဆှံအဆၢလၢ ၂၀၀၈ အဂီၢ်လၢအမ့ၢ်ဝဲ ‘အိၣ်ဂၢၢ်ဆိကျၢၤ ဒီးထံၣ်ဘၣ်ယဟိဝၤယွၤ အတၢ်အုၣ်က့ၤခီၣ်က့ၤ’ တက့ၢ်န့ၣ် မ့ၢ်တၢ်လၢအကြၢးဝဲဘၣ်ဝဲလီၤ.—၂ မိၤၡ့ ၁၄:၁၃.
၁၅ ဘၣ်ဃးဒီး ပှၤအံၣ်စရ့လးဖိတဖၣ် ဟးထီၣ်လၢကီၢ်အဲၤကူပတူးအပူၤန့ၣ် ပဟံးန့ၢ်တၢ်မၤလိအဂၤမနုၤသ့ဒံးလဲၣ်. တၢ်လၢယဟိဝၤယွၤ အဲၣ်ဒိးလၢပမၤ တမံၤလၢ်လၢ်န့ၣ် ပကဘၣ်ဒိကနၣ် ဒီးမၤထွဲအီၤကိးမံၤဒဲးလီၤ. ဒ်သိးပှၤအံၣ်စရ့လးဖိတဖၣ် ကကတဲာ်ကတီၤတၢ် လီၤတံၢ်လီၤဆဲးလၢ ဘၣ်ဃးဒီးဘူၣ်လဲၤကပာ်အဂီၢ်န့ၣ် အဝဲသ့ၣ်ကဘၣ်အိၣ်ဒီးတၢ်ဒိကနၣ်လီၤ. အဝဲသ့ၣ်အိၣ်ဒီးတၢ်ဒိကနၣ် ခီဖျိဖဲလါနံစၣ် ၁၄ သီအနၤန့ၣ် အဝဲသ့ၣ်အိၣ်လၢဟံၣ်ပူၤကိးဂၤဒဲးလီၤ. ဖဲအဝဲသ့ၣ်ဟးထီၣ်လၢ ကီၢ်အဲၤကူပတူးပူၤအဆၢကတီၢ် ဟးထီၣ်ဝဲဒ် ဘၣ်တၢ် “ကတဲာ်ကတီၤ” ပာ်အဝဲသ့ၣ်အသိးလီၤ. (၂ မိၤၡ့ ၁၃:၁၈) မုၢ်မဆါတနံၤအံၤ အရ့ဒိၣ်စ့ၢ်ကီးလၢ ပကဘၣ်မၤထွဲ တၢ်ဟံးစုနဲၣ်ကျဲလၢ အဟဲလၢ “တၢ်အကုၢ်အပှၤလၢ အကလုၢ်တီ” အအိၣ်န့ၣ်လီၤ. (မးသဲ ၂၄:၄၅) ပကဘၣ်ဒိကနၣ် ကစၢ်ယွၤအကလုၢ်လၢ အတဲပှၤ “အဝဲအံၤမ့ၢ်ကျဲန့ၣ်လီၤ. လဲၤတၢ်လၢအပူၤတက့ၢ်. ဖဲသုကဃၣ်ဆူစုထွဲ, ဒီးဖဲသုကဃၣ်ဆူစုစ့ၣ်န့ၣ်လီၤ.” (ယၡါယၤ ၃၀:၂၁) ဒ်တၢ်နးတၢ်ဖှီၣ်ဖးဒိၣ် ဘူးထီၣ်ဝဲအသိး ဘၣ်သ့ၣ်သ့ၣ် ပကဒိးန့ၢ်ဘၣ် တၢ်ဟံးစုနဲၣ်ကျဲလီၤတံၢ်လီၤဆဲး တနီၤလီၤ. ပကပူၤဖျဲးထီၣ်လၢ တၢ်ကီတၢ်ခဲအဆၢကတီၢ်အဂီၢ်န့ၣ် ကသန့ၤထီၣ်အသးလၢ ပဆဲးမၤသကိးတၢ်ဒီး ယဟိဝၤယွၤအခ့အပှၤ အဂၤလၢအိၣ်ဒီး တၢ်သးတီတဖၣ်လီၤ.
၁၆ သ့ၣ်နီၣ်ထီၣ်က့ၤလၢ ယဟိဝၤယွၤ ဒုးဃၣ်ကဒါက့ၤ ပှၤအံၣ်စရ့လးဖိတဖၣ် ဒ်သိးအဝဲသ့ၣ် အကျဲကကတၢၢ်လၢ ကစၢၢ်ကလိ ဒီးပီၣ်လဲၣ်ဂီၤအဘၢၣ်အစၢၤအဂီၢ်တက့ၢ်. တၢ်အိၣ်သးအံၤ တဖျါလၢ ဂ့ၤလၢအဝဲသ့ၣ်အဂီၢ်ဘၣ်. ဘၣ်ဆၣ် တၢ်ခဲလၢာ်န့ၣ်အိၣ်လၢ ယဟိဝၤယွၤအစုပူၤ ဒီးတၢ်ခဲလၢာ်န့ၣ် ကဲထီၣ်တၢ်မၤလၤကပီၤအမံၤ ဒီးတၢ်အုၣ်က့ၤခီၣ်က့ၤလၢ အပှၤဂီၢ်မုၢ်အဂီၢ်လီၤ. မုၢ်မဆါတနံၤအံၤ ဘၣ်ဃးဒီး တၢ်ကရၢကရိသုးကျဲၤဝဲ တၢ်ဂ့ၢ်တနီၤနီၤ လၢကျဲတမံၤမံၤန့ၣ် ဘၣ်သ့ၣ်သ့ၣ် ပတသ့ၣ်ညါလီၤတံၢ်လီၤဆဲးဘၣ်. ဘၣ်ဆၣ် ပနာ်သ့သပှၢ်တၢၢ်လၢ ယဟိဝၤယွၤ ဟံးစုနဲၣ်ကျဲပှၤခီဖျိ တၢ်ဆဲးကျိး ကျဲလၢအတီအလိၤလီၤ. တဘျီတခီၣ်ဖျါလၢ ပဒုၣ်ပဒါတဖၣ် ကမၤနၢၤပှၤလီၤ. ပဝဲသ့ၣ်တဖၣ် ပထံၣ်ဆိပာ်တၢ် တသ့ခဲလၢာ်ဘၣ်အဃိ ပတသ့ၣ်ညါတၢ်ဂ့ၢ်တၢ်ကျိၤ လီၤတံၢ်လီၤဆဲးခဲလၢာ်ဘၣ်. သနာ်က့ ဒ်ယဟိဝၤယွၤ မၤစၢၤတ့ၢ် ပှၤအံၣ်စရ့လးဖိတဖၣ်အသိး ဘၣ်ဃးဒီးတၢ်ဂ့ၢ်တၢ်ကျိၤတဖၣ်န့ၣ် အဝဲသုးကျဲၤဝဲလၢ တၢ်ဆၢကတီၢ်လၢ အကြၢးဝဲဘၣ်ဝဲသ့လီၤ.—ကတိၤဒိ ၃:၅.
လါအီကူး ၁၀–၁၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ မိၤၡ့ ၁၅–၁၆
“သးဝံၣ်စံးထီၣ်ပတြၢၤ ယဟိဝၤယွၤ လၢတၢ်သးဝံၣ်”
(၂ မိၤၡ့ ၁၅:၁, ၂) တုၤနုၤတစုစီၤမိၤၡ့ဒီး ပှၤအံၣ်စရ့လးဖိသးဝံၣ်တၢ်သးဝံၣ်အံၤလၢယွၤအဂ့ၢ်, ဒီးကတိၤတၢ်ဒီးစံးဝဲဒၣ်, ယကသးဝံၣ်ထီၣ်ယွၤ, မ့ၢ်အကဟုဒိၣ်အကညီၢ်ဒိၣ်အဂ့ၢ်, ကသ့ၣ်ဒီးပှၤဒိးကသ့ၣ်န့ၣ်, တ့ၢ်လီၤကွံာ်လၢပီၣ်လဲၣ်ပူၤလီၤ. ၂ ယဂံၢ်ယဘါဒီး ယတၢ်သးဝံၣ်မ့ၢ်ယွၤ, ဒီးကဲထီၣ်ဝဲလၢ တၢ်အုၣ်က့ၤခီၣ်က့ၤယၤ, အဝဲဒၣ်န့ၣ်မ့ၢ်ယကစၢ်, ဒီးယကစံးထီၣ်ပတြၢၤအီၤ, မ့ၢ်ယပၢ်တဖၣ်အကစၢ်, ဒီးယကပာ်ထီၣ်ထီအီၤလီၤ.
တၢး၉၅ ၁၀/၁၅ ၁၁ ¶၁၁
ဘၣ်မနုၤအဃိ ပဘၣ်ပျံၤ ယွၤလၢ အမ့ၢ်အတီလဲၣ်
၁၁ ယဟိဝၤယွၤ မၤဟးဂီၤကွံာ်ဝဲ ပှၤအဲၤကူပတူးဖိ အသုးမုၢ်တဖၣ်အဃိ ပှၤလၢအဘူၣ်ထီၣ်ဘါထီၣ်အီၤတဖၣ် မၤလၤကပီၤအီၤ ဒီးအမံၤဟူထီၣ်သါလီၤဝဲလီၤ. (ယိၤၡူ ၂:၉, ၁၀; ၄:၂၃, ၂၄) အဝဲအမံၤ ဘၣ်တၢ်ပာ်ထီၣ်ထီအီၤလၢ အဲၤကူပတူး အယွၤလၢအကမၣ်တဖၣ်အမဲာ်ညါလီၤ. အဲၤကူပတူး အယွၤတဖၣ်န့ၣ် တအိၣ်ဒီးအစိကမီၤဘၣ် ဒီးမၤပူၤဖျဲးထီၣ်ပှၤလၢ အဘူၣ်ထီၣ်ဘါထီၣ်အီၤတဖၣ်တသ့ဘၣ်. အဝဲသ့ၣ် နာ်န့ၢ်အကစၢ်ယွၤ, ပှၤဟီၣ်ခိၣ်ဖိလၢအသံသ့ ဒီးအသုးမုၢ်သံၣ်ဘိတဖၣ်အဃိ ထံၣ်ဘၣ်တၢ်လီၤသးအုးလီၤ. (စံးထီၣ်ပတြၢၤ ၁၄၆:၃) ပှၤအံၣ်စရ့လးဖိတဖၣ် ဘၣ်တၢ်ထိၣ်ဟူးထိၣ်ဂဲၤထီၣ် အဝဲသ့ၣ်လၢ ကသးဝံၣ်စံးထီၣ်ပတြၢၤယွၤလီၤ. အဝဲသ့ၣ် အတၢ်စံးထီၣ်ပတြၢၤန့ၣ် ပာ်ဖျါထီၣ်လၢ အဝဲသ့ၣ်ပျံၤဝဲ ယွၤလၢအမၤပူၤဖျဲးထီၣ် အပှၤဂီၢ်မုၢ်န့ၣ် တလီၤကမၢကမၣ်ဘၣ်.
(၂ မိၤၡ့ ၁၅:၁၁) ယွၤဧၢ, မ့ၢ်မတၤလီၤဂာ်နၤလၢကစၢ်တဖၣ် အကျါတဂၤလဲၣ်. မ့ၢ်မတၤလီၤဂာ်နၤအိၣ်ဒီး တၢ်လၤကပီၤလၢတၢ်စီဆှံ, လၢပှၤစံးထီၣ်ပတြၢၤလၢတၢ်ပျံၤတၢ်ဖုး, လၢအမၤတၢ်လီၤလးတဂၤလဲၣ်.
(၂ မိၤၡ့ ၁၅:၁၈) ယွၤကကဲစီၤပၤအစိၤစိၤအဃၣ်ဃၣ်လီၤ.
တၢး၉၅ ၁၀/၁၅ ၁၁-၁၂ ¶၁၅-၁၆
ဘၣ်မနုၤအဃိ ပဘၣ်ပျံၤ ယွၤလၢ အမ့ၢ်အတီလဲၣ်
၁၅ ပမ့ၢ်ဆၢထၢၣ်အိၣ်ပူၤဖျဲးဘၣ်ဒီး စီၤမိၤၡ့န့ၣ် ပကအဲၣ်ဒိး သးဝံၣ်စ့ၢ်ကီးလၢ “ယွၤဧၢ, မ့ၢ်မတၤလီၤဂာ်နၤလၢကစၢ်တဖၣ် အကျါတဂၤလဲၣ်. မ့ၢ်မတၤလီၤဂာ်နၤအိၣ်ဒီး တၢ်လၤကပီၤလၢတၢ်စီဆှံ, လၢပှၤစံးထီၣ်ပတြၢၤလၢတၢ်ပျံၤတၢ်ဖုး, လၢအမၤတၢ်လီၤလးတဂၤလဲၣ်.” (၂ မိၤ. ၁၅:၁၁) တၢ်စံးထီၣ်ပတြၢၤ ဒ်သိးအံၤန့ၣ် ဘၣ်တၢ်ပာ်ဖျါထီၣ်အီၤ စးထီၣ်ဖဲန့ၣ် တုၤလီၤလၢ အနံၣ်လၢအကယၤတဖၣ်လီၤ. လံာ်စီဆှံ လၢအလီၢ်ခံကတၢၢ်တဘ့ၣ်အပူၤ တၢ်မၢဖိယိၤဟၣ် ပာ်ဖျါဝဲ ကစၢ်ယွၤအခ့အပှၤလၢ အဘၣ်တၢ်ဒိးဖှူအီၤလၢ အိၣ်ဒီးတၢ်သးတီတဖုန့ၣ် “အုၣ်ယွၤအခ့အပှၤစီၤမိၤၡ့အထါ, ဒီးသိဖိအထါ” လီၤ. အုၣ်ဝဲထါမနုၤလဲၣ်. “သ့တၢ်လၢာ်ကစၢ်ယွၤဧၢ, နတၢ်ဖံးတၢ်မၤတဖၣ်ဒိၣ်ဝဲသွါဝဲ, ဒီးလီၤလိၢ်လီၤလးမးလဲၣ်. ထံဧိၤကီၢ်ဧိၤတဖၣ်အစီၤပၤဧၢ, နကျဲဧိၤကပူၤဧိၤတဖၣ်လိၤဝဲဘၣ်ဝဲ, ဒီးမ့ၢ်ဝဲတီဝဲဆံးဒိၣ်လဲၣ်. မတၤကအိၣ်ဝဲတဂၤလၢ အတပျံၤဒီးတယူးယီၣ်နၤန့ၣ်လဲၣ်, ကစၢ်ယွၤဧၢ. မတၤတဂၤကဂ့ၢ်လိာ်လၢ အကဘိးဘၣ်သ့ၣ်ညါ ဒီးတဲဖျါထီၣ် နတၢ်ဒိၣ်တၢ်မုၢ်အဂ့ၢ်န့ၣ်လဲၣ်. ထဲနၤတဂၤဧိၤ နစီဝဲဆှံဝဲလီၤ.”—လီၣ်ဖျါ ၁၅:၂-၄.
၁၆ မုၢ်မဆါတနံၤအံၤစ့ၢ်ကီး ပှၤလၢအဘူၣ်ထီၣ်ဘါထီၣ်ယွၤလၢ အပာ်လုၢ်ပာ်ပှ့ၤ ယွၤအတၢ်ဘၣ်တ့ ဒီးကစၢ်အတၢ်သိၣ်တၢ်သီတဖၣ်လၢ အကပူၤဖျဲးထီၣ်န့ၣ် အိၣ်ဝဲလီၤ. ပှၤလၢအဟဲလၢ ပှၤကိးကလုာ်အကျါတဖၣ်န့ၣ် ထူၣ်ဖျဲးထီၣ်လၢ နီၢ်သးတခီလံလီၤ. မ့ၢ်လၢအဝဲသ့ၣ် အၢၣ်လီၤတူၢ်လိာ် အကစၢ်ယွၤအကလုၢ်ကထါ ဒီးမၤထွဲဝဲအဃိ အဝဲသ့ၣ် အိၣ်လီၤဆီဒီး ဟီၣ်ခိၣ်လၢ အဘၣ်အၢဘၣ်သီအံၤလီၤ. ကိးနံၣ်ဒဲး ပှၤလၢအကထိတဖၣ် ဟးထီၣ်လၢ ဟီၣ်ခိၣ်လၢအဘၣ်အၢဘၣ်သီအံၤအပူၤ ဒီးဟဲပာ်ဖှိၣ်ထီၣ်အသးဒီး ပှၤလၢအဘူၣ်ထီၣ်ဘါထီၣ် ယဟိဝၤယွၤတဖၣ် အတၢ်ကရၢကရိ လၢအကဆှီအပူၤလီၤ. တယံၤလၢၤဘၣ် ဘၤဘူၤလိၣ်ဖးဒိၣ် ကဘၣ်တၢ်မၤဟးဂီၤအီၤ ဒီးဟီၣ်ခိၣ်အတၢ်ရဲၣ်တၢ်ကျဲၤအံၤ ကဘၣ်တၢ်မၤဟးဂီၤကွံာ်အီၤ ဝံၤအလီၢ်ခံ အဝဲသ့ၣ် ကအိၣ်မူဘၣ်လၢ ဟီၣ်ခိၣ်သီလၢအတီအလိၤအပူၤ လီၤထူလီၤယိာ်လီၤ.
(၂ မိၤၡ့ ၁၅:၂၀, ၂၁) ဒီးဝံပိာ်မုၣ်, စီၤအၤဟရိၣ်အဒီပုၢ်ဝဲၢ်မုၣ်, နီၢ်မံးရယၣ် ဟံးန့ၢ်ဒၢတဖျၢၣ်လၢအစုပူၤ, ဒီးပိာ်မုၣ်ခဲလၢာ် လဲၤပိာ်ထီၣ်အခံအိၣ်ဒီး ဒၢဒီးတၢ်ဂဲၤကလံၣ်တဖၣ်လီၤ. ၂၁ ဒီးနီၢ်မံးရယၣ်စံးဆၢအီၤ, သးဝံၣ်ထီၣ် ယွၤတက့ၢ်. မ့ၢ်အကဟုဒိၣ် အကညီၢ်ဒိၣ်အဂ့ၢ်, ကသ့ၣ်ဒီး ပှၤဒိးကသ့ၣ်န့ၣ်တ့ၢ်လီၤကွံာ် လၢပီၣ်လဲၣ်ပူၤလီၤ.
it-2 ၄၅၄ ¶၁
တၢ်သူၣ်ဝံၣ်သးဆၢ
လၢညါကီၢ်အံၣ်စရ့အပူၤန့ၣ် ဖဲပှၤသးဝံၣ်တၢ်တဖုသးဝံၣ်တၢ်အခါ အဝဲသ့ၣ် သးဝံၣ်ခီဆၢလိာ်အသးလီၤ. အဝဲသ့ၣ် နီၤဖးလိာ်အသးခံကရူၢ်ဒီး သးဝံၣ်ခီဆၢလိာ်သးလီၤ. မ့တမ့ၢ် ပှၤသးဝံၣ်စိလိၣ်တဂၤဒီး ပှၤတဖု သးဝံၣ်ခီဆၢလိာ်သးလီၤ. လၢလံာ်စီဆှံအပူၤန့ၣ် ပှၤသးဝံၣ်တၢ်ဒ်အံၤန့ၣ် ဘၣ်တၢ်ကိးအီၤလၢ တၢ်သးဝံၣ်ကဒီးတဘျီလီၤ. (၂ မိၤ. ၁၅:၂၁; ၁ မူၤ. ၁၈:၆, ၇) ထါစံးထီၣ်ပတြၢၤတနီၤ ဒ်သိးဒီး စံးထီၣ်ပတြၢၤ ၁၃၆ န့ၣ်ဘၣ်တၢ်ကွဲးအီၤ ဒ်န့ၣ်အသိးလီၤ. လၢစီၤနဃ့မယၤအစိၤန့ၣ် ပှၤသးဝံၣ်စံးဘျုးစံးဖှိၣ်တၢ်ခံဖု သးဝံၣ်တၢ်ဖဲ တၢ်ပာ်စီဆှံ ဝ့ၢ်ယရူၤၡလ့ၣ်အခိၣ်ဒူအခါ အဝဲသ့ၣ်သးဝံၣ်ဝဲ ဒ်န့ၣ်အသိးလီၤ.—ဃ့. ၁၂:၃၁, ၃၈, ၄၀-၄၂; ကွၢ်စ့ၢ်ကီး SONG.
it-2 ၆၉၈
ဝံမုၣ်
နီၢ်မံးရယၣ် မ့ၢ်ပိာ်မုၣ်အဆိကတၢၢ်တဂၤလၢ လံာ်စီဆှံ ပာ်ဖျါထီၣ်အီၤဒ်ဝံမုၣ်န့ၣ်လီၤ. ဖျါလၢ ကစၢ်ယွၤဆှၢလီၤတၢ်ကစီၣ်တနီၤ ခီဖျိလၢအီၤန့ၣ်လီၤ. ဘၣ်သ့ၣ်သ့ၣ် ကမ့ၢ်သးစီဆှံ ထိၣ်ဟူးထိၣ်ဂဲၤထီၣ်အီၤလၢ ကသးဝံၣ်တၢ်အဂီၢ်လီၤ. (၂ မိၤ. ၁၅:၂၀, ၂၁) အဃိ အဝဲဒီးစီၤအၤဟရိၣ် တဲဘၣ်စီၤမိၤၡ့လၢယွၤ “ကတိၤတၢ်စ့ၢ်ကီးလၢ ပဝဲတမ့ၢ်ဘၣ်ဧါ” (၄ မိၤ. ၁၂:၂) ယဟိဝၤယွၤ အနီၢ်ကစၢ်ဒၣ်ဝဲ တဲဝဲခီဖျိဝံမံကၤန့ၣ်လၢ ဖဲအဝဲထုးထီၣ်ကွံာ် ပှၤအံၣ်စရ့လးဖိတဖၣ်လၢ ကီၢ်အဲၤကူပတူးအခါ မၢဝဲ စီၤမိၤၡ့, စီၤအၤဟရိၣ်, ဒီးနီၢ်မံးရယၣ်လဲၤလၢမဲာ်ညါလီၤ. (မံ. ၆:၄) နီၢ်မံးရယၣ် အိၣ်ဒီးတၢ်ခွဲးတၢ်ယာ်လၢ ယွၤသူအီၤလၢ ကဆဲးကျိးတၢ်ဒီးပှၤဂၤအဂီၢ် သနာ်က့ လၢယွၤအမဲာ်ညါန့ၣ် အဝဲအိၣ်လၢ အပုၢ်စီၤမိၤၡ့ အတၢ်ဟံးစုနဲၣ်ကျဲ အဖီလာ်လီၤ. နီၢ်မံးရယၣ်န့ၣ် တအိၣ်လၢအလီၢ်ဘၣ်အဃိ ကစၢ်ယွၤဘၣ်သိၣ်ဃီၣ်အီၤလီၤ.—၄ မိၤ. ၁၂:၁-၁၅.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၂ မိၤၡ့ ၁၆:၁၃) ဒီးတၢ်မၤအသးလၢမုၢ်ဟါန့ၣ် ထိၣ်ဘှၢၣ်ဟဲထီၣ်ဒီး မၤဘံးမၤဘၢသူၣ်ဒဲအလီၢ်, ဒီးလၢမုၢ်ဆ့ၣ်ထီၣ်န့ၣ်ပစီၤထံအိၣ်ဝးတရံးသူၣ်ဒဲအလီၢ်လီၤ.
တၢး၁၁ ၉/၁ ၁၄
မ့ၢ်နသ့ၣ်ညါဧါ
ဘၣ်မနုၤအဃိ ကစၢ်ယွၤဃုထၢ ထိၣ်ဘှၢၣ်လၢ ကဒုးအီၣ်ဝဲ ပှၤအံၣ်စရ့လးဖိတဖၣ်လၢ ပှၢ်မုၢ်ကနၢန့ၣ်လဲၣ်.
ပှၤအံၣ်စရ့လးဖိတဖၣ် ဟးထီၣ်လၢ ကီၢ်အဲၤကူပတူးပူၤဝံၤအလီၢ်ခံ ကစၢ်ယွၤ ဒုးအီၣ်အဝဲသ့ၣ်လၢ ထိၣ်ဘှၢၣ်ခံဘျီလီၤ.—၂ မိၤၡ့ ၁၆:၁၃; ၄ မိၤၡ့ ၁၁:၃၁.
ထိၣ်ဘှၢၣ်န့ၣ် မ့ၢ်ထိၣ်ဖိတကလုာ် လၢအထီကအိၣ်ဝဲ ၇ စုမုၢ်ဒိၣ် ဒီးကဃၢဝဲ ၃.၅ အီၣ်စးလီၤ. အဝဲသ့ၣ်အါတက့ၢ် ဖးထီၣ်လၢ အ့ၡၢၣ်မုၢ်နုာ် ဒီးယူရပၤတခီန့ၣ်လီၤ. ဘူးထီၣ်လၢ တၢ်ဂိၢ်အတကီၢ် ဖဲအဝဲသ့ၣ် လဲၤသုးလီၢ်သုးကျဲဆူ ကလံၤစိး အၤဖြံၤကၤ ဒီးအရ့ၤဘံယၤအခါ လဲၤခီဂာ်ဝဲ မဲးဒံးထၢၣ်ရ့နယၢၣ် မုၢ်ထီၣ်တခီ ဒီးကစၢၢ်စံၤနါ ဟီၣ်ကမျိၤန့ၣ်လီၤ.
လံာ်တဘ့ၣ် The New Westminster Dictionary of the Bible ပာ်ဖျါဝဲလၢ ထိၣ်ဘှၢၣ်တဖၣ်န့ၣ် “ပာ်ဂံၢ်ပာ်ဘါကလံၤဒီး ယူၤဝဲချ့ချ့လီၤ. ဘၣ်ဆၣ် ကလံၤကျိၤ မ့ၢ်ဆီတလဲ မ့တမ့ၢ် ထိၣ်ဘှၢၣ်တဖၣ် ဘၣ်ယူၤဝဲ ယံၤတလၢအဃိ တၢ်မ့ၢ်ဘှံးအသးန့ၣ် အဝဲသ့ၣ်ဒီတဖု မူၤလီၤတဲာ်လၢဟီၣ်ခီၣ်လိၤသ့လီၤ.” တချုးလၢထိၣ်တဖၣ် ဆဲးလဲၤတၢ်ကဲဒံးဘၣ်န့ၣ် အဝဲသ့ၣ် ဘၣ်အိၣ်ဘှံးလၢ ဟီၣ်ခိၣ်လိၤ တသီခံသီအဃိ ဖဲန့ၣ်အဆၢကတီၢ် ပှၤဖီၣ်န့ၢ်အီၤညီလီၤ. ဖဲယၤဖှိၣ်နံၣ် ၂၀ အခီၣ်ထံးခါန့ၣ် ပှၤအဲၤကူပတူးဖိတဖၣ် ဆှၢဝဲထိၣ်ဘှၢၣ်အဘ့ၣ် သၢကကွဲၢ်ဆူထံဂၤကီၢ်ဂၤ ကိးနံၣ်ဒဲးလီၤ.
ပှၤအံၣ်စရ့လးဖိတဖၣ် အီၣ်ဘၣ်ဝဲ ထိၣ်ဘှၢၣ်ခံဘျီလၢာ်န့ၣ် ဘၣ်ဖဲတၢ်ကိၢ်ထီၣ်သီအဆၢကတီၢ်လီၤ. ထိၣ်ဘှၢၣ်တဖၣ်န့ၣ် ဖဲတၢ်ကိၢ်ထီၣ်သီ အဆၢကတီၢ် ညီနုၢ်ယူၤခီဂာ်ဝဲ စံၤနါလီၢ်ကဝီၤ သနာ်က့ ယဟိဝၤယွၤ မၤဝဲဒ်သိး ကလံၤကဆီၣ်ကွံာ်ဝဲ ထိၣ်တဖၣ်အံၤ ဆူပှၤအံၣ်စရ့လးဖိတဖၣ် သူၣ်ဒဲအလီၢ်န့ၣ်လီၤ.—၄ မိၤၡ့ ၁၁:၃၁.
(၂ မိၤၡ့ ၁၆:၃၂-၃၄) ဒီးစီၤမိၤၡ့စံးဝဲဒၣ်, အဝဲအံၤမ့ၢ်တၢ်လၢယွၤမၤလိာ်ဝဲ, မၤပှဲၤထီၣ်ဧိၤမ့ၢ်တဖျၢၣ်ဒီးအီၤ လၢအကဘၣ်တၢ်ပာ်ဃာ်အီၤ လၢသုစၢၤသုသွဲၣ်အဂီၢ်, ဒ်သိးအကထံၣ်ဘၣ် ကိၣ်လၢယဒုးအီၣ်သု လၢပှၢ်မုၢ်ကနၢ ဖဲယဒုးဟးထီၣ် သုလၢကီၢ်အဲၤကူပတူး အပူၤန့ၣ်တက့ၢ်. ၃၃ ဒီးစီၤမိၤၡ့စံးဘၣ်စီၤအၤဟရိၣ်, ဟံးန့ၢ်လီခီတဖျၢၣ်, ဒီးဒၢနုာ်မၤနၤတဧိၤမ့ၢ်လၢအပူၤ, ဒီးပာ်အီၤလၢယွၤအမဲာ်ညါ လၢအကဘၣ်တၢ်ပာ်ဃာ်အီၤ လၢသုစၢၤသုသွဲၣ်အဂီၢ်န့ၣ်တက့ၢ်. ၃၄ ဒ်ယွၤမၤလိာ်စီၤမိၤၡ့အသိးန့ၣ်, စီၤအၤဟရိၣ်ပာ်အီၤလၢ တၢ်အၢၣ်လီၤအီလီၤအမဲာ်ညါ ဒ်သိးအကဘၣ်တၢ်ပာ်ဃာ်အီၤလီၤ.
တၢး၀၆ ၁/၁၅ ၃၁
ပှၤဖးလံာ်ဖိတဖၣ် အတၢ်သံကွၢ်
ပှၤအံၣ်စရ့လးဖိတဖၣ် ထူၣ်ဖျဲးထီၣ်လၢ ကီၢ်အဲၤကူပတူးအပူၤ တယံာ်တမီၢ်န့ၣ် အဝဲသ့ၣ် စးထီၣ်ကဒူးကဒ့ၣ်တၢ် ဘၣ်ဃးဒီးတၢ်အီၣ်တၢ်အီလီၤ. အဃိ ယဟိဝၤယွၤ ဟ့ၣ်ဒုးအီၣ်အဝဲသ့ၣ် ကိၣ်မၤနၤလီၤ. (၂ မိၤ. ၁၂:၁၇, ၁၈; ၁၆:၁-၅) ဖဲန့ၣ်အခါ စီၤမိၤၡ့ တဲဘၣ်စီၤအၤဟရိၣ်လၢ “ဟံးန့ၢ်လီခီတဖျၢၣ်, ဒီးဒၢနုာ်မၤနၤတဧိၤမ့ၢ်လၢအပူၤ, ဒီးပာ်အီၤလၢယွၤအမဲာ်ညါ လၢအကဘၣ်တၢ်ပာ်ဃာ်အီၤ လၢသုစၢၤသုသွဲၣ်အဂီၢ်န့ၣ်တက့ၢ်.” တၢ်ကွဲးနီၣ် ပာ်ဖျါဝဲလၢ “ဒ်ယွၤမၤလိာ်စီၤမိၤၡ့အသိးန့ၣ်, စီၤအၤဟရိၣ်ပာ်အီၤလၢ တၢ်အၢၣ်လီၤအီလီၤ [တလါလၢပှၤပာ်ဃာ် တၢ်ကွဲးနီၣ်ကွဲးဃါလၢအရ့ဒိၣ်] အမဲာ်ညါ ဒ်သိးအကဘၣ်တၢ်ပာ်ဃာ်အီၤလီၤ.” (၂ မိၤ. ၁၆:၃၃, ၃၄) ဖဲန့ၣ်အခါ စီၤအၤဟရိၣ် ကထၢနုာ်ဝဲ ကိၣ်မၤနၤလၢ လီခီတဖျၢၣ်အပူၤသနာ်က့ တၢ်ပာ်ဃာ်အီၤဖဲ တၢ်အၢၣ်လီၤအီလီၤအမဲာ်ညါန့ၣ် ကမ့ၢ်တုၤဒၣ်ဖဲ စီၤမိၤၡ့မၤဝဲ တလါဒီးထၢနုာ်ဝဲ လၢၢ်ဘ့ၣ်ဘၣ်တဖၣ်ဝံၤအခါန့ၣ်လီၤ.
တၢ်ဖးလံာ်စီဆှံ
လါအီကူး ၁၇–၂၃
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ မိၤၡ့ ၁၇–၁၈
“ပိာ်ခွါလၢအိၣ်ဒီးတၢ်ဆီၣ်လီၤသးတဖၣ်န့ၣ် သိၣ်လိ ဒီးဟ့ၣ်လီၤမူဒါလၢ ပှၤအဂၤတဖၣ်”
(၂ မိၤၡ့ ၁၈:၁၇, ၁၈) ဒီးစီၤမိၤၡ့ အမံၤပှၢ်စံးဘၣ်အီၤ, တၢ်လၢနမၤန့ၣ်တဂ့ၤဘၣ်. ၁၈ နၤမ့ၢ်ဂ့ၤ, ပှၤဂီၢ်မုၢ်လၢအအိၣ်ဒီးနၤအံၤမ့ၢ်ဂ့ၤ, ကလီၤဘှံးလီၤတီၤသပှၢ်တၢၢ်လီၤ. အဂ့ၢ်ဒ်အံၤ, တၢ်အံၤတမံၤဃၢကဲၣ်ဆိးလၢနဂီၢ်လီၤ. နမၤအီၤတဂၤဃီတကဲဘၣ်.
တၢး၁၃ ၂/၁ ၆
စီၤမိၤၡ့—ပှၤလၢအိၣ်ဒီးတၢ်အဲၣ်တၢ်ကွံ
စီၤမိၤၡ့ ပာ်ဖျါထီၣ်တၢ်အဲၣ်လၢ ပှၤအံၣ်စရ့လးဖိလၢ အပိာ်အခံတဖၣ်အဖီ ခိၣ်လီၤ. အဝဲသ့ၣ်သ့ၣ်ညါဝဲလၢ ယဟိဝၤယွၤ သူဝဲစီၤမိၤၡ့ ဒ်သိးကဟံးစုနဲၣ်ကျဲ အပှၤကလုာ်အဃိ ဖဲအဝဲသ့ၣ်အိၣ်ဒီး တၢ်ကီတၢ်ခဲအခါ လဲၤဝဲလၢ စီၤမိၤၡ့အအိၣ်ဒ်သိးကဘှါၡဲန့ၣ်အီၤအဂီၢ်လီၤ. ပဖးဘၣ်လၢ “ပှၤဂီၢ်မုၢ်ဆၢထၢၣ်လၢ အဃၢၤလၢမုၢ်ဂီၤတုၤလီၤလၢမုၢ်ဟါလီၤ.” (၂ မိၤၡ့ ၁၈:၁၃-၁၆) ထံၣ်တမှံကွၢ်လၢ စီၤမိၤၡ့ ဒိကနၣ်န့ၢ်ဝဲ ပှၤအံၣ်စရ့လးဖိတဖၣ် အတၢ်ကီတၢ်ခဲအဂ့ၢ် ဒီတနံၤအဃိ ကလီၤဘှံးလီၤတီၤဝဲ ထဲလဲၣ်န့ၣ်တက့ၢ်. ဘၣ်ဆၣ် မ့ၢ်လၢစီၤမိၤၡ့ အဲၣ်အဝဲသ့ၣ်အဃိ အဲၣ်ဒိးမၤစၢၤအဝဲသ့ၣ်လီၤ.
(၂ မိၤၡ့ ၁၈:၂၁, ၂၂) ဒီးနဘၣ် ကွၢ်ဃုန့ၢ်ပှၤလၢ အမၤတၢ်သ့, လၢအပျံၤယွၤ, ပှၤအမ့ၢ်အတီ, ပှၤလၢအသးဟ့ တၢ်အီၣ်ကဘျံးအီၣ်ကဘျၣ်တၢ်တဖၣ်လၢ ပှၤဂီၢ်မုၢ်ခဲလၢာ်အကျါလီၤ. ဒီးနဘၣ်ပာ်အီၤလၢ ပှၤတကထိအခိၣ်, ပှၤတကယၤအခိၣ်, ပှၤယဲၢ်ဆံအခိၣ်, ဒီးပှၤဆံဆဲၣ်အခိၣ်လၢအဖီခိၣ်လီၤ. ၂၂ ဒီးမ်အစံၣ်ညီၣ် ပှၤဂီၢ်မုၢ်ကိးအဆၢအကတီၢ်ဒဲးတက့ၢ်. ဒီးတၢ်ကမၤအသးလၢ အဘၣ်ဒုးဟဲထီၣ် တၢ်အဒိၣ်ကိးအမံၤဒဲးဆူနအိၣ်, မ့မ့ၢ်တၢ်အဆံးကိးအမံၤဒဲးန့ၣ် ကစံၣ်ညီၣ်ဒၣ်ဝဲလီၤ. ဒီးကညီတက့ၢ်လၢနဂီၢ်, ဒီးပှၤကဝံစၢၤတၢ်ဒီးနၤလီၤ.
တၢး၀၃ ၁၁/၁ ၆ ¶၁
တၢ်နာ်န့ၢ်ပှၤဂၤန့ၣ် မ့ၢ်တၢ်အရ့ဒိၣ်လၢ တၢ်သူၣ်ခုသးခုအဂီၢ်
ပှၤသ့ၣ်တဖၣ်အံၤ တချုးလၢအဒိးန့ၢ်ဘၣ် တၢ်နာ်န့ၢ်ဒံးဘၣ်န့ၣ် အဝဲသ့ၣ်ပာ်ဖျါထီၣ်ဝဲ နီၢ်သးအတၢ်ဂ့ၤတၢ်ဝါတနီၤ ဒီးပာ်ဖျါထီၣ်ဝဲလၢ အပျံၤယွၤန့ၣ်လီၤ. အဝဲသ့ၣ်န့ၣ် ယူးယီၣ်ပာ်ကဲ တၢ်ဘၣ်တ့ကစၢ်လၢအသးပူၤ ဒီးဘၣ်ယိၣ်ဝဲလၢ ကစၢ်ယွၤ တဘၣ်သူၣ်ဘၣ်သးအဝဲသ့ၣ်ဘၣ်လီၤ. တသ့ဖဲအသ့ အဝဲသ့ၣ်မၤထွဲဝဲ ကစၢ်ယွၤအတၢ်စံးစုနဲၣ်ကျဲန့ၣ် ပှၤကိးဂၤသ့ၣ်ညါဝဲလီၤ. အဝဲသ့ၣ်သးဟ့ဝဲ တၢ်ဖံးတၢ်မၤလၢ တတီတလိၤတဖၣ်အဃိ ပာ်ဖျါထီၣ်ဝဲလၢ အဝဲသ့ၣ် တသူကမၣ်တၢ်ခွဲးတၢ်ယာ်ဘၣ်. တကးဒံးဘၣ် လၢအနီၢ်ကစၢ်အဘျုးအဂီၢ်မ့ၢ်ဂၤ, အဘူးအတံၢ် မ့တမ့ၢ် အတံၤသကိးတဖၣ်အဂီၢ်မ့ၢ်ဂ့ၤ အဝဲသ့ၣ်တသူကမၣ်ဝဲ တၢ်နာ်န့ၢ်အီၤဘၣ်.
(၂ မိၤၡ့ ၁၈:၂၄, ၂၅) ဒီးစီၤမိၤၡ့ဒိကနၣ် အမံၤပှၢ်အကလုၢ်, ဒီးမၤကယဲၢ် တၢ်လၢအစံးဝဲန့ၣ်လီၤ. ၂၅ ဒီးစီၤမိၤၡ့ဃုထၢပှၤလၢ အမၤတၢ်သ့လၢ အံၣ်စရ့လးခဲလၢာ်အကျါ, ဒီးပာ်အီၤလၢပှၤတကထိအခိၣ်, ပှၤတကယၤအခိၣ်, ပှၤယဲၢ်ဆံအခိၣ်, ဒီးပှၤဆံဆဲၣ်အခိၣ်, လၢပှၤဂီၢ်မုၢ်အဖီခိၣ်လီၤ.
တၢး၀၂ ၅/၁၅ ၂၅ ¶၅
တၢ်တီတၢ်လိၤန့ၣ် တီခိၣ်ရိၤမဲဝဲ ပှၤလၢအသူၣ်ဘျၢသးဘျၢတဖၣ်
စီၤမိၤၡ့မ့ၢ်ပှၤတဂၤလၢ အိၣ်ဒီးတၢ်ဆီၣ်လီၤသးလီၤ. အဝဲဘၣ်ဘှါၡဲန့ၢ်ဝဲ ပှၤအဂၤတဖၣ် အတၢ်ကီတၢ်ခဲ ဒီးလီၤဘှံးလီၤတီၤဝဲအခါ အမံၤပှၢ် စီၤယံးသရိၤ ဟ့ၣ်ကူၣ်အီၤလၢ ကဟ့ၣ်လီၤဝဲမူဒါလၢ ပိာ်ခွါလၢအိၣ်ဒီး တၢ်သ့တၢ်ဘၣ်တဖၣ်လီၤ. အဝဲအၢၣ်လီၤတူၢ်လိာ်ဝဲလၢ အမၤတၢ်တသ့ခဲလၢာ်ဘၣ် အဃိတူၢ်လိာ်ဝဲ တၢ်ဟ့ၣ်ကူၣ်န့ၣ်လီၤ. (၂ မိၤၡ့ ၁၈:၁၇-၂၆; ၄ မိၤၡ့ ၁၂:၃) ပှၤလၢအိၣ်ဒီး တၢ်ဆီၣ်လီၤသးတဂၤန့ၣ် တထုးယံာ်တၢ်ဆၢကတီၢ်လၢ ကဟ့ၣ်လီၤပှၤဂၤမူဒါအဂီၢ်ဘၣ်. ဒီးတဘၣ်ယိၣ်တၢ်စ့ၢ်ကီးလၢ ခီဖျိလၢအဟ့ၣ်လီၤပှၤဂၤမူဒါအဃိ အဝဲအတၢ်စိတၢ်ကမီၤ ကစှၤလီၤဝဲဘၣ်. (၄ မိၤၡ့ ၁၁:၁၆, ၁၇, ၂၆-၂၉) လၢတၢ်န့ၣ်အလီၢ် အဝဲအဲၣ်ဒိးမၤစၢၤပှၤဂၤ ဒ်သိးအဝဲသ့ၣ် ကဒိၣ်ထီၣ်ထီထီၣ်လၢ နီၢ်သးတခီလီၤ. (၁ တံၤမသ့း ၄:၁၅) ပဝဲသ့ၣ်တဖၣ်စ့ၢ်ကီး ပကြၢးမၤဒ်န့ၣ်အသိး တမ့ၢ်ဘၣ်ဧါ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၂ မိၤၡ့ ၁၇:၁၁-၁၃) ဒီးတုၤစီၤမိၤၡ့ယူာ်ထီၣ်အစုဒီး, တၢ်မၤအသးလၢ အံၣ်စရ့လးမၤနၢၤတၢ်, ဒီးတုၤအယၤလီၤအစုဒီး ပှၤဧမၤလ့းဖိမၤနၢၤတၢ်လီၤ. ၁၂ ဒီးစီၤမိၤၡ့အစုဃၢဝဲ, ဒီးအဝဲသ့ၣ်တဖၣ်န့ၣ် ဟံးန့ၢ်လၢၢ်တဖျၢၣ်, ဒီးပာ်လၢအဖီလာ်, ဒီးဆ့ၣ်နီၤဝဲလၢအဖီခိၣ်, ဒီးစီၤအၤဟရိၣ်, ဒီးစီၤဃူၢ်ဟံးစိာ်ထီၣ်အစု တဂၤတခီတဂၤတခီ, ဒီးအစုအိၣ်ဂၢၢ်ဆိးကျၢၤ တုၤမုၢ်လီၤနုာ်လီၤ. ၁၃ ဒီးစီၤယိၤၡူ မၤနၢၤမၤဃၣ် ပှၤဧမၤလ့းဖိ, ဒီးအပှၤဂီၢ်မုၢ်လၢ နးအကနၣ်လီၤ.
“မ်နစုအဂံၢ်အဘါန့ၣ် သုတစၢ်လီၤတဂ့ၤ”
၁၄ စီၤအၤဟရိၣ်ဒီး စီၤဃူၢ်န့ၣ်မၤစၢၤဝဲ စီၤမိၤၡ့ ဖဲအဝဲသ့ၣ်ဒုးတၢ်ဒီး ပှၤဧမၤလ့းဖိ အဆၢကတီၢ်လီၤ. မုၢ်မဆါတနံၤအံၤ ပဝဲစ့ၢ်ကီးပဃုကျဲလၢ ပကမၤစၢၤပှၤဂၤသ့ဝဲလီၤ. ပဒီပုၢ်ဝဲၢ်တနီၤနီၤန့ၣ် အဝဲသ့ၣ်အိၣ်ဒီး တၢ်ကီတၢ်ခဲ မ့ၢ်လၢအသးပှၢ်, တၢ်အိၣ်ဆူၣ်အိၣ်ချ့တဂ့ၤဘၣ်, ဟံၣ်ဖိဃီဖိအတၢ်မၤအၢမၤနး, ဘၣ်အိၣ်သယုၢ်သညိ ဒီးပှၤလၢအဲၣ်ဘၣ်ဝဲတဂၤ သံသဒၣ်အီၤအဃိလီၤ. ဒီးပှၤသးစၢ်လၢ ဘၣ်တၢ်ဆီၣ်သနံးအီၤ ဒ်သိးကမၤတၢ်ကမၣ် မ့တမ့ၢ် ကဃုတၢ်မံၤဟူသၣ်ဖျါလၢ ဟီၣ်ခိၣ်တဖၣ်န့ၣ် ပမၤစၢၤအီၤသ့စ့ၢ်ကီးလီၤ. (၁ သ့းစၤလနံ ၃:၁-၃; ၅:၁၁, ၁၄) ပဃုကျဲလၢ ပကပာ်ဖျါထီၣ် တၢ်သူၣ်အိၣ်သးအိၣ်ပှၤဂၤသ့လၢ ဘီမုၢ်ဘျီၣ်ဒိၣ်အပူၤ, ဖဲပဟးစံၣ်တဲၤတဲလီၤတၢ်အခါ, အီၣ်သကိးအီသကိးတၢ် မ့တမ့ၢ် ဖဲပတဲ လီတဲစိအခါန့ၣ်လီၤ.
(၂ မိၤၡ့ ၁၇:၁၄) ဒီးယွၤစံးဘၣ် စီၤမိၤၡ့, ကွဲးတၢ်န့ၣ်လၢ တၢ်သ့ၣ်နီၣ်ထီၣ်က့ၤလၢလံာ်ပူၤ, ဒီးစံၣ်ဃဲၤအီၤလၢ စီၤယိၤၡူအနၢ်ပူၤ လၢယကတြူာ်ကွံာ် တၢ်သ့ၣ်နီၣ်ထီၣ်က့ၤဧမၤလ့း လၢမူခိၣ်အဖီလာ် သပှၢ်တၢၢ်န့ၣ်တက့ၢ်.
it-1 ၄၀၆
လံာ်လၢလံာ်စီဆှံအပူၤ
တၢ်လၢစီၤမိၤၡ့ ကွဲးဝဲတဖၣ်န့ၣ် မ့ၢ်တၢ်ကတိၤလၢအဟဲလၢ ကစၢ်ယွၤအအိၣ် ဒီးကစၢ်ယွၤအသးစီဆှံ ထိၣ်ဟူးထိၣ်ဂဲၤထီၣ် အဝဲသ့ၣ်လၢ ကကွဲးဝဲတၢ်ကတိၤတဖၣ်အံၤလီၤ. လံာ်စီဆှံအတၢ်အုၣ်သးတဖၣ်န့ၣ် ပာ်ဖျါထီၣ်ဝဲ လီၤတံၢ်လီၤဆဲးလၢ တၢ်ကတိၤတဖၣ်အံၤ မ့ၢ်တၢ်နဲၣ်ကျဲလၢ တၢ်ဘူၣ်တၢ်ဘါစီဆှံအဂီၢ်န့ၣ် ပနာ်န့ၢ်သ့သပှၢ်တၢၢ်လီၤ. ဒ်သိး စီၤမိၤၡ့ကကဲထီၣ် ပှၤအံၣ်စရ့လးဖိတဖၣ် အခိၣ်နၢ်အဂီၢ် အဝဲတစးထီၣ်မၤဝဲလၢညါဘၣ်. အခီၣ်ထံးခါန့ၣ် အဝဲဂ့ၢ်လိာ်ဝဲလၢ ကကဲထီၣ်ခိၣ်နၢ်အဂီၢ်လီၤ. (၂ မိၤ. ၃:၁၀, ၁၁; ၄:၁၀-၁၄) လၢတၢ်န့ၣ်အလီၢ် ကစၢ်ယွၤဃုထၢထီၣ် စီၤမိၤၡ့ ဒီးမၤစၢၤအီၤဒ်သိး မၤဝဲတၢ်လီၤလးကသ့အဂီၢ်လီၤ. ဖၤရိၤအပှၤမၤကဒါမဲာ်တဖၣ်န့ၣ် တူၢ်လိာ်ဝဲလၢ ခီဖျိလၢ ကစၢ်ယွၤအစိအကမီၤအဃိ စီၤမိၤၡ့ မၤဝဲတၢ်လီၤလးန့ၢ်လီၤ. (၂ မိၤ. ၄:၁-၉; ၈:၁၆-၁၉) စီၤမိၤၡ့ တမုၢ်လၢ်ဝဲလၢ ကကဲထီၣ်ဘၣ် ပှၤစံၣ်တဲၤတဲလီၤတၢ် ဒီးပှၤကွဲးလံာ်စီဆှံဘၣ်. လၢတၢ်န့ၣ်အလီၢ် ခီဖျိလၢ စီၤမိၤၡ့ ဒိကနၣ်ဝဲ ယွၤအတၢ်မၤလိာ် ဒီးသးစီဆှံ အတၢ်မၤစၢၤအဃိ အဆိကတၢၢ်န့ၣ် အဝဲကတဲတၢ် ဒီးလၢခံ ဘၣ်တၢ်ထိၣ်ဟူးထိၣ်ဂဲၤထီၣ်အီၤလၢ ကကွဲးဝဲလံာ်စီဆှံအကူာ်တဖၣ် လၢအအိၣ်လၢလံာ်စီဆှံပူၤလီၤ.—၂ မိၤ. ၁၇:၁၄.
တၢ်ဖးလံာ်စီဆှံ
လါအီကူး ၂၄–၃၀
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ မိၤၡ့ ၁၉–၂၀
“တၢ်မၤလိာ်အဘီတဆံ အခီပညီအိၣ်လၢ နဂီၢ်ဒ်လဲၣ်”
(၂ မိၤၡ့ ၂၀:၃-၇) လၢယၤအမဲာ်ညါန့ၣ် ဘါထီၣ်ကစၢ်နီတဂၤတဂ့ၤ. ၄ တ့ တၢ်ဂီၤတၢ်ဖီၣ်လၢနဂီၢ်တဂ့ၤ. တၢ်အိၣ်လၢမူခိၣ်ထးမ့ၢ်ဂ့ၤ, တၢ်အိၣ်လၢဟီၣ်ခိၣ်လာ်မ့ၢ်ဂ့ၤ, တၢ်အိၣ်လၢထံကျါ လၢဟီၣ်ခိၣ်အဖီလာ်မ့ၢ်ဂ့ၤ, တ့အက့ၢ်အဂီၤလၢ နဂီၢ်နီတမံၤတဂ့ၤ. ၅ ဘါအီၤတဂ့ၤ. မၤအတၢ်တဂ့ၤ. အဂ့ၢ်ဒ်အံၤ, ယဲဒၣ်ယွၤနကစၢ်အံၤ, ယမ့ၢ်ကစၢ်လၢအသးက့ၣ်တၢ်, လၢအဒုးအိၣ်သကိး ပၢ်တဖၣ်အတၢ်ဒဲးဘး လၢဖိတဖၣ်တုၤလီၤလၢ ပှၤသးဟ့ယၤသၢစိၤတစိၤ, ဒီးလၢလွံၢ်စိၤတစိၤ, ၆ ဒီးလၢအမၤဘျုးမၤဖှိၣ် ပှၤကထိသ့ၣ်တဖၣ်, ပှၤလၢအအဲၣ်ယၤဒီး တိၢ်န့ၢ်ယတၢ်မၤလိာ်တဖၣ်န့ၣ်လီၤ. ၇ ပှ့ၤဘၣ်ယွၤနကစၢ်အမံၤ လၢတၢ်ကလီကလီတဂ့ၤ. အဂ့ၢ်ဒ်အံၤ, ပှၤလၢအပှ့ၤဘၣ်ယွၤအမံၤလၢ တၢ်ကလီကလီန့ၣ် ယွၤတပာ်ဘၣ်အီၤလၢ အတၢ်ဒဲးဘးတအိၣ်ဘၣ်န့ၣ်ဘၣ်.
တၢး၈၉ ၁၁/၁၅ ၆ ¶၁
တၢ်မၤလိာ်အဘီတဆံ အခီပညီအိၣ်လၢနဂီၢ်ဒ်လဲၣ်
တၢ်မၤလိာ်လၢ အဆိကတၢၢ်လွံၢ်ခါန့ၣ် ပာ်ဖျါထီၣ်ဝဲ ပမူဒါအိၣ်လၢ ယဟိဝၤယွၤ အဖီခိၣ်ဒ်လဲၣ်န့ၣ်လီၤ. (တၢ) ကစၢ်ယွၤ မ့ၢ်ဝဲယွၤလၢ အဃ့ဝဲလၢ ပှၤကဘူၣ်ထီၣ်ဘါထီၣ်ထဲအီၤတဂၤဧိၤ ဒံးအဖၢလီၤ. (မးသဲ ၄:၁၀) (ခံ) ပှၤလၢအဘူၣ်ထီၣ်ဘါထီၣ်အီၤန့ၣ် တဘၣ်သူတၢ်ဂီၤတၢ်ဖှီၣ်ဘၣ်. (၁ ယိၤဟၣ် ၅:၂၁) (သၢ) ပကဘၣ်သူအမံၤလၢ ကျဲလၢအကြၢးဝဲဘၣ်ဝဲ ဒီးမၤလၤကပီၤအီၤလီၤ. ပကဘၣ် ယူးယီၣ်ပာ်ကဲ အမံၤထီဘိလီၤ. (ယိၤဟၣ် ၁၇:၂၆; ရိမ့ၤ ၁၀:၁၃) (လွံၢ်) ပတၢ်အိၣ်မူဒီတကတီၢ်ညါန့ၣ် ကဘၣ်ဘၣ်ထွဲလိာ်အသးဒီး တၢ်စီဆှံတဖၣ်လီၤ. ပမ့ၢ်မၤဒ်န့ၣ်န့ၣ် ကဒုးအိၣ်ဘှံးပှၤလၢ ကျဲလၢပဆိကမိၣ်လၢ ပအိၣ်ဒီးတၢ်တီတၢ်လိၤလီၤ. မ့တမ့ၢ် ဒုး “အိၣ်ဘှံးစ့ၢ်ကီး” ပှၤလီၤ.—ဧ့ၤဘြံၤ ၄:၉, ၁၀.
(၂ မိၤၡ့ ၂၀:၈-၁၁) သ့ၣ်နီၣ်ထီၣ်မုၢ်အိၣ်ဘှံးအနံၤလၢ နကပာ်စီဆှံအီၤ အဂ့ၢ်န့ၣ်တက့ၢ်. ၉ နကမၤဘၣ်တၢ်ဃုနံၤ, ဒီးမၤနတၢ်မၤခဲလၢာ်လီၤ. ၁၀ မ့မ့ၢ်မုၢ်နွံနံၤတနံၤန့ၣ် မ့ၢ်ယွၤနကစၢ်အတၢ်အိၣ်ဘှံးအနံၤလီၤ. နဲဒၣ်ဂ့ၤ, နဖိခွါဂ့ၤ, နဖိမုၣ်ဂ့ၤ, နကုၢ်နပှၤပိာ်ခွါဂ့ၤ, နကုၢ်နပှၤပိာ်မုၣ်ဂ့ၤ, နဆၣ်ဖိကီၢ်ဖိအဒၢဂ့ၤ, ပှၤတခီဘီမုၢ်ဖိ လၢအအိၣ်လၢ နပဲတြီအပူၤဂ့ၤ, သုတမၤတၢ်မၤနီတမံၤတဂ့ၤ. ၁၁ အဂ့ၢ်ဒ်အံၤ, ဃုနံၤအတီၢ်ပူၤန့ၣ်ယွၤတ့လီၤမူခိၣ်, ဒီးဟီၣ်ခိၣ်, ပီၣ်လဲၣ်, ဒီးကယဲၢ်တၢ်အိၣ်လၢအဝဲသ့ၣ်တဖၣ်အပူၤ, ဒီးအိၣ်ဘှံးဝဲလၢမုၢ်နွံနံၤတနံၤန့ၣ်လီၤ. မၤသးဒ်န့ၣ်ဒီး ယွၤဆိၣ်ဂ့ၤမုၢ်နွံနံၤတနံၤ, ဒီးပာ်စီဆှံအီၤလီၤ.
(၂ မိၤၡ့ ၂၀:၁၂-၁၇) ဒ်သိးနမုၢ်နံၤတဖၣ်ကထီထီၣ်လၢကီၢ်ပူၤ လၢယွၤနကစၢ်ဟ့ၣ်လီၤနၤဒီး, ယူးယီၣ်နမိၢ်နပၢ်တက့ၢ်. ၁၃ မၤသံတၢ်တဂ့ၤ. ၁၄ အဲၣ်ဘၢမါအဲၣ်ဘၢဝၤတဂ့ၤ. ၁၅ ဟုၣ်တၢ်တဂ့ၤ. ၁၆ အုၣ်နသးကဘျံးကဘျၣ် လၢပှၤလၢနဃၢၤအဂ့ၢ်တဂ့ၤ. ၁၇ သးကွံပှၤလၢနဃၢၤအဟံၣ်တဂ့ၤ. ပှၤလၢနဃၢၤအမါဂ့ၤ, အကုၢ်အပှၤပိာ်ခွါဂ့ၤ, အကုၢ်အပှၤပိာ်မုၣ်ဂ့ၤ, အဂီၤဖံးဂ့ၤ, အကသ့ၣ်ယီၤဂ့ၤ, ဖဲဒၣ်ပှၤလၢနဃၢၤအတၢ်တမံၤမံၤဂ့ၤ, သုတသးကွံအီၤတဂ့ၤ.
တၢး၈၉ ၁၁/၁၅ ၆ ¶၂-၃
တၢ်မၤလိာ်အဘီတဆံ အခီပညီအိၣ်လၢနဂီၢ်ဒ်လဲၣ်
(ယဲၢ်) ဒ်သိးဟံၣ်ဖိဃီဖိ ကအိၣ်ဒီးတၢ်ဃူတၢ်ဖိးအဂီၢ် တၢ်ဒိကနၣ်မိၢ်ပၢ်အကလုၢ်န့ၣ် မ့ၢ်ဒံးတၢ်အရ့ဒိၣ်လၢ မုၢ်မဆါတနံၤအံၤလီၤ. တၢ်အံၤဘၣ်ထွဲလိာ်အသးဒီး ယဟိဝၤယွၤအတၢ်ဆိၣ်ဂ့ၤလီၤ. တၢ်မုၢ်လၢ်လၢအလီၤကမၢကမၣ်လၢ ဘၣ်ဃးဒီး “တၢ်မၤလိာ်အခီၣ်ထံးတဘီလၢ အအိၣ်ဒီးတၢ်စံးပာ်” အံၤမ့ၢ်တၢ်လၢအဂ့ၤဒိၣ်မးလီၤ. တၢ်အံၤတမ့ၢ်ထဲပ “ကဘီၣ်ထီၣ်ညီထီၣ်” အဂီၢ်ဘၣ်ပ “သးကကၢကခိးလၢ ဟီၣ်ခိၣ်ချၢ” စ့ၢ်ကီးလီၤ. (အ့းဖ့းစူး ၆:၁-၃) ပအိၣ်မူဘၣ်လၢ ဟီၣ်ခိၣ်အတၢ်ရဲၣ်တၢ်ကျဲၤလၢ အအၢအသီအံၤအ “မုၢ်နံၤအခံကတၢၢ်” အဃိ ပှၤသးစၢ်လၢအိၣ်ဒီး တၢ်ယူးယီၣ်ယွၤတဖၣ်န့ၣ် အိၣ်ဒီးတၢ်မုၢ်လၢ်လၢ တသံဘၣ်နီတဘျီလၢၤဘၣ်န့ၣ်လီၤ.—၂ တံၤမသ့း ၃:၁; ယိၤဟၣ် ၁၁:၂၆.
မ့ၢ်လၢပအဲၣ်ပှၤလၢပဃၢၤတဖၣ်အဃိ ပတမၤတၢ်မၤလၢအတဂ့ၤတဘၣ် ဒ်သိးဒီး (ဃု) တၢ်မၤသံတၢ်, (နွံ) အဲၣ်ဘၢမါအဲၣ်ဘၢဝၤ, (ဃိး) တၢ်ဟုၣ်တၢ် ဒီး (ခွံ) အုၣ်ပသးကဘျံးကဘျၣ်လၢ ပှၤလၢပဃၢၤအဂ့ၢ်န့ၣ်ဘၣ်. (၁ ယိၤဟၣ် ၃:၁၀-၁၂, ဧ့ၤဘြံၤ ၁၃:၄; အ့းဖ့းစူး ၄:၂၈; မးသဲ ၅:၃၇; ကတိၤဒိ ၆:၁၆-၁၉) ဘၣ်ဆၣ် ပတၢ်တိာ်ပာ်မ့ၢ်မနုၤလဲၣ်. မ့မ့ၢ် တၢ်မၤလိာ် (တဆံ) ဟ့ၣ်ပလီၢ်ပှၤ ဘၣ်ဃးဒီး ယဟိဝၤယွၤ အဲၣ်ဒိးလၢ ပကအိၣ်တီအိၣ်လိၤလၢ အမဲာ်ညါထီဘိအဂီၢ်လီၤ.—ကတိၤ. ၂၁:၂.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၂ မိၤၡ့ ၁၉:၅, ၆) ဒီးခဲကနံၣ်အံၤ သုမ့ၢ်ဒိကနၣ်ယကလုၢ်သပှၢ်တၢၢ်, ဒီးတိၢ်န့ၢ် ယတၢ်အၢၣ်လီၤအီလီၤဒီး, သုကကဲထီၣ်တၢ်လုၢ်ဒိၣ်ပှ့ၤဒိၣ်လၢယဂီၢ်ဒိၣ်န့ၢ် ပှၤကလုာ်ခဲလၢာ်တက့ၢ်လီၤ. အဂ့ၢ်ဒ်အံၤ, ဟီၣ်ခိၣ်ဒီဘ့ၣ်ညါမ့ၢ်ယတၢ်လီၤ. ၆ ဒီးသုကကဲထီၣ်ပှၤလုၢ်တၢ်အဒိၣ်တဖၣ်အဘီအမုၢ်, ဒီးပှၤတကလုာ်စီဆှံလီၤ. အဝဲအံၤမ့ၢ်တၢ်ကတိၤ လၢနဘၣ်စံးဘၣ်ပှၤအံၣ်စရ့လးဖိလီၤ.
it-2 ၆၈၇ ¶၁-၂
ပှၤလုၢ်တၢ်အဒိၣ်
ခရံာ်ဖိအပှၤလုၢ်တၢ်အဒိၣ်မူဒါ. ယဟိဝၤယွၤ အၢၣ်လီၤအီလီၤဝဲ ပှၤအံၣ်စရ့လးဖိတဖၣ်လၢ အဝဲသ့ၣ်မ့ၢ်ဒိကနၣ် တၢ်သိၣ်တၢ်သီန့ၣ် “ကကဲထီၣ်ပှၤလုၢ်တၢ်အဒိၣ်တဖၣ် အဘီအမုၢ်” လၢကစၢ်ယွၤအဂီၢ်လီၤ. (၂ မိၤ. ၁၉:၆) ဘၣ်ဆၣ် ပှၤလုၢ်တၢ်အဒိၣ်အမူဒါလၢ စီၤအၤဟရိၣ် အစၢၤအသွဲၣ်တဖၣ်မၤဝဲန့ၣ် မ့ၢ်တၢ်အကဒူလၢ ပှၤလုၢ်တၢ်အဒိၣ်အခိၣ်တဂၤ အမူဒါလၢကမၤဝဲအဃိ မူဒါအံၤကအိၣ်တုၤဖဲ ပှၤလုၢ်တၢ်အဒိၣ်အခိၣ်တဂၤအံၤ ဟဲတုၤဝဲလီၤ. (ဧ့ၤ. ၈:၄, ၅) ကအိၣ်တုၤလၢ တၢ်အၢၣ်လီၤအီလီၤ အလီၢ်လံာ်ကတၢၢ် ဒီးတၢ်အၢၣ်လီၤအီလီၤအသီ စးထီၣ်အသးအဆၢကတီၢ်လီၤ. (ဧ့ၤ. ၇:၁၁-၁၄; ၈:၆, ၇, ၁၃) ကစၢ်ယွၤ အတၢ်အၢၣ်လီၤအီလီၤလၢ ဘၣ်ဃးဒီးဘီမုၢ်အတၢ်ရဲၣ်တၢ်ကျဲၤန့ၣ် ပှၤလၢကကဲထီၣ် ယဟိဝၤယွၤ အပှၤလုၢ်တၢ်အဒိၣ်တဖၣ်န့ၣ် အဆိကတၢၢ် ဘၣ်တၢ်ဃုထၢထီၣ်အီၤလၢ ပှၤအံၣ်စရ့လးဖိတဖၣ်အကျါလီၤ. လၢခံဘၣ်တၢ်ဃုထၢထီၣ်စ့ၢ်ကီး ပှၤတခီဘီမုၢ်ဖိတဖၣ်လီၤ.—မၤတၢ်. ၁၀:၃၄, ၃၅; ၁၅:၁၄; ရိ. ၁၀:၂၁.
ထဲဒၣ်ပှၤယူဒၤဖိတနီၤန့ၣ် တူၢ်လိာ်ဝဲ ခရံာ်လီၤ. အဃိ ဒ်ပှၤတကလုာ်အသိး အဝဲသ့ၣ် ကဲထီၣ်ဝဲပှၤလုၢ်တၢ်အဒိၣ်အဘီအမုၢ် နီၢ်ကီၢ်, ပှၤစီဆှံတကလုာ်တသ့လၢၤဘၣ်. (ရိ. ၁၁:၇, ၂၀) ဘၣ်ဃးဒီး ပှၤအံၣ်စရ့လးဖိလၢ တအိၣ်ဒီးတၢ်သးတီတဖၣ်အဂ့ၢ်န့ၣ် ကစၢ်ယွၤတဲဆိပာ်ဝဲ ခီဖျိလၢ ဝံဟိၤၡ့ ဒ်အံၤလီၤ. “မ့ၢ်နညိကွံာ်တၢ်သ့ၣ်ညါဒီး, ယကညိကွံာ်နၤလီၤ. ဒီးနတကဲလၢၤဘၣ် ပှၤလုၢ်တၢ်အဒိၣ်လၢ ယဂီၢ်ဘၣ်. မ့ၢ်နသးပ့ၤနီၣ် ယွၤအတၢ်သိၣ်တၢ်သီဒီး, ယကသးပ့ၤနီၣ် နဖိနလံၤလီၤ.” (ဟိၤ. ၄:၆) ဒ်န့ၣ်အသိး ယ့ၣ်ၡူးစ့ၢ်ကီး တဲဝဲပှၤယူဒၤဖိခိၣ်နၢ်တဖၣ်လၢ “တၢ်ကဟံးထီၣ်ကွံာ်ယွၤ အဘီအမုၢ် လၢသုအိၣ်, ဒီးကဟ့ၣ်လီၤဝဲလၢ ပှၤတကလုာ်လၢအကဒုးကဲထီၣ် အတၤသၣ်တဖၣ်လီၤ.” (မး. ၂၁:၃၄) ဘၣ်ဆၣ် ဖဲယ့ၣ်ၡူးအိၣ်လၢဟီၣ်ခိၣ်ချၢအဆၢကတီၢ် အဝဲအိၣ်ဒံးလၢ တၢ်သိၣ်တၢ်သီအဖီလာ်အဃိ အဝဲမၤထွဲဝဲ ပှၤလုၢ်တၢ်အဒိၣ်မူဒါလၢ စီၤအၤဟရိၣ်အစၢၤအသွဲၣ်မၤဝဲန့ၣ်လီၤ. ဖဲအဝဲမၤဘျါဝဲ ပှၤလၢအဘၣ်တၢ်ဆါအၢတဂၤဝံၤအခါ မၢအလဲၤလၢပှၤလုၢ်တၢ်အဒိၣ်အအိၣ် ဒီးမၤဘူၣ်တၢ်လီၤ.—မး. ၈:၄; မၢ်. ၁:၄၄; လူၤ. ၁၇:၁၄.
(၂ မိၤၡ့ ၂၀:၄, ၅) တ့ တၢ်ဂီၤတၢ်ဖီၣ်လၢနဂီၢ်တဂ့ၤ. တၢ်အိၣ်လၢမူခိၣ်ထးမ့ၢ်ဂ့ၤ, တၢ်အိၣ်လၢဟီၣ်ခိၣ်လာ်မ့ၢ်ဂ့ၤ, တၢ်အိၣ်လၢထံကျါ လၢဟီၣ်ခိၣ်အဖီလာ်မ့ၢ်ဂ့ၤ, တ့အက့ၢ်အဂီၤလၢ နဂီၢ်နီတမံၤတဂ့ၤ. ၅ ဘါအီၤတဂ့ၤ. မၤအတၢ်တဂ့ၤ. အဂ့ၢ်ဒ်အံၤ, ယဲဒၣ်ယွၤနကစၢ်အံၤ, ယမ့ၢ်ကစၢ်လၢအသးက့ၣ်တၢ်, လၢအဒုးအိၣ်သကိးပၢ်တဖၣ်အတၢ်ဒဲးဘး လၢဖိတဖၣ်တုၤလီၤလၢ ပှၤသးဟ့ယၤသၢစိၤတစိၤ, ဒီးလၢလွံၢ်စိၤတစိၤ,
တၢး၀၄ ၃/၁၅ ၂၇ ¶၁
လံာ်စီဆှံ အတၢ်ပာ်ဖျါလၢ လံာ် ၂ မိၤၡ့
၂၀:၅—ယဟိဝၤယွၤတဲဝဲလၢ “ပၢ်တဖၣ်အတၢ်ဒဲးဘး” န့ၣ် ‘အဖိအလံၤ’ တဖၣ်ဘၣ်ဟ့ၣ်က့ၤဝဲ လၢကျဲဒ်လဲၣ်. ပှၤလၢအဒိၣ်တုာ်ခိၣ်ပှဲၤကိးဂၤဒဲးန့ၣ် ကဘၣ်တၢ်စံၣ်ညီၣ်အဝဲသ့ၣ် ဒ်အတၢ်ဖံးတၢ်မၤ ဒီးအတၢ်ပာ်သူၣ်ပာ်သးအိၣ်အသိးလီၤ. ဘၣ်ဆၣ် ဖဲပှၤအံၣ်စရ့လးဖိတဖၣ် ဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ်အခါ အဝဲသ့ၣ်အဖိအလံၤတဖၣ် တူၢ်ဘၣ်ဝဲတၢ်နးတၢ်ဖှီၣ်လီၤ. တၢ်ကီတၢ်ခဲလၢအဟဲကဲထီၣ် ခီဖျိပှၤအံၣ်စရ့လးဖိလၢ အဘူၣ်ထီၣ်ဘါထီၣ် တၢ်ဂီၤတၢ်ဖှီၣ်တဖၣ်အဃိန့ၣ် ပှၤအံၣ်စရ့လးဖိလၢ အိၣ်ဒီးတၢ်သးတီတဖၣ်စ့ၢ်ကီး တူၢ်ဘၣ်ဝဲလီၤ. အဃိ အဝဲသ့ၣ်တဖၣ် ကဆဲးလဲၤလၢ ကျဲမ့ၢ်ကျဲတီအပူၤအဂီၢ်န့ၣ် ကီခဲဝဲလီၤ.
တၢ်ဖးလံာ်စီဆှံ
လါအီကူး ၃၁–လါစဲးပတ့ဘၢၣ် ၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ မိၤၡ့ ၂၁–၂၂
“ဘၣ်ဃးဒီးသးသမူန့ၣ် ယဟိဝၤယွၤ အတၢ်ထံၣ်အိၣ်ဒ်လဲၣ်”
(၂ မိၤၡ့ ၂၁:၂၀) ဒီးပှၤမ့ၢ်တီၢ်အကုၢ်ပိာ်ခွါ အကုၢ်ပိာ်မုၣ်, လၢနီၣ်တီၢ်, ဒီးမ့ၢ်သံလၢ အစုဖီလာ်ဒီး, တၢ်ကမၤဆၢတၢ်သပှၢ်တၢၢ်လီၤ.
it-1 ၂၇၁
တၢ်တီၢ်
ဧ့ၤဘြံၤ ကုၢ်အကစၢ်တဖၣ်န့ၣ် အကုၢ်ပိာ်မုၣ် မ့တမ့ၢ် ကုၢ်ပိာ်ခွါ မ့ၢ်တဒိကနၣ် အကလုၢ် မ့တမ့ၢ် မ့ၢ်ပူထီၣ်ထီဒါအီၤန့ၣ် တီၢ်ဝဲအခွဲးအိၣ်လီၤ. ဘၣ်ဆၣ် တီၢ်ဝဲဝံၤ အကုၢ်မ့ၢ်သံန့ၣ် အဝဲကဘၣ်တၢ်စံၣ်ညီၣ်လီၤ. ဘၣ်ဆၣ် ကုၢ်တဂၤ ဘၣ်တၢ်တီၢ်အီၤဝံၤအလီၢ်ခံ မ့ၢ်ဆဲးမူဒံးဝဲ တသီ, ခံသီန့ၣ် ဖျါလၢအဝဲတတိာ်ပာ်ဝဲလၢ ကတီၢ်ဝဲတုၤလၢ အသံတစုဘၣ်လီၤ. မ့ၢ်လၢကုၢ်အကစၢ် ဘၣ်ပှ့ၤကုၢ်လၢ စ့အဃိ အဝဲသိၣ်ဝဲအခွဲးအိၣ်လီၤ. ပှၤတဂၤန့ၣ်တမ့ၢ်လၢ ကအဲၣ်ဒိးတူၢ်ၡူကွံာ် အတၢ်လုၢ်ဒိၣ်ပှ့ၤဒိၣ်ဘၣ်. ပူၤကွံာ်တသီ မ့တမ့ၢ် တၢ်န့ၣ်အလီၢ်ခံမး ကုၢ်တဂၤ မ့ၢ်သံန့ၣ် မ့ၢ်အဝဲဘၣ်တၢ်တီၢ်အဃိသံဧါ မ့တမ့ၢ် သံလၢတၢ်ဂ့ၢ်အဂၤအဃိဧါန့ၣ် တလီၤတံၢ်ဘၣ်. အဃိ ကုၢ်တဂၤ မ့ၢ်ဆဲးမူဒံး တသီခံသီန့ၣ် အကစၢ်အတၢ်ကမၣ်တအိၣ်ဘၣ်.—၂ မိၤ. ၂၁:၂၀, ၂၁.
(၂ မိၤၡ့ ၂၁:၂၂, ၂၃) ဒီးပှၤကညီမ့ၢ်တီၢ်လိာ်အသးဒီး ဘၣ်ပိာ်မုၣ်လၢအဒၢထီၣ်, ဒီးအဟုးဟးဂီၤ, ဒီးတဘၣ်လၢၤတၢ်နီတမံၤဘၣ်ဒီး, ကလိးစ့သပှၢ်တၢၢ် ဒ်ပိာ်မုၣ်အဝၤကပာ်လၢအလိၤအသိး, ဒီးဘၣ်ဟ့ၣ်လီၤတၢ်ဖဲဒၣ် ပှၤစံၣ်ညီၣ်ကွီၢ်အသးလီၤ. ၂၃ ဒီးပိာ်မုၣ်မ့ၢ်ဘၣ်တၢ်တမံၤမံၤဒီး, နဘၣ်ဟ့ၣ်သးလၢသးအဂီၢ်,
မ့ၢ်နပာ်လုၢ်ပာ်ပှ့ၤ သးသမူဒ်ကစၢ်ယွၤအသိးဧါ
၁၆ ယဟိဝၤယွၤ ပာ်လုၢ်ပာ်ပှ့ၤဝဲ ပှၤကိးဂၤဒဲးအသးသမူလီၤ. ဖိသၣ်လၢ တအိၣ်ဖျဲၣ်ထီၣ်ဒံးဘၣ်တဖၣ် အသးသမူဒၣ်လဲာ် ကစၢ်ယွၤ ပာ်လုၢ်ပာ်ပှ့ၤဝဲဒိၣ်မးလီၤ. စီၤမိၤၡ့အတၢ်သိၣ်တၢ်သီ ပာ်ဖျါထီၣ်ဝဲလၢ ပှၤတဂၤမ့ၢ်မၤဘၣ်ဒိ ပိာ်မုၣ်လၢအအိၣ်ဒီး အဟုးအသး, ဒီးပိာ်မုၣ်အံၤ မ့တမ့ၢ် အဖိလၢအဟၢဖၢပူၤမ့ၢ်သံဝဲန့ၣ် ကစၢ်ယွၤပာ်ပနီၣ်ပှၤတဂၤအံၤဒ် ပှၤမၤသံတၢ်အသိးလီၤ. ဒီးအဝဲမ့ၢ်မၤဘၣ်ဝဲလၢ တၢ်တပာ်သူၣ်ပာ်သးအပူၤသနာ်က့ အဝဲကဘၣ်လိးက့ၤ “သးလၢသးအဂီၢ်” လီၤ. (ဖး ၂ မိၤၡ့ ၂၁:၂၂, ၂၃ တက့ၢ်.) အဃိ လၢကစၢ်ယွၤအမဲာ်ညါန့ၣ် ဖိသၣ်လၢ အတအိၣ်ဖျဲၣ်ဒံးဘၣ်တဂၤ အသးသမူန့ၣ် အလုၢ်အပှ့ၤထဲသိးဒီး ပှၤကညီတဂၤ အသးသမူလီၤ. ခီဖျိလၢ နသ့ၣ်ညါတၢ်ဂ့ၢ်အံၤအဃိ ဘၣ်ဃးဒီးတၢ်မၤဟးဂီၤဟုးန့ၣ် မ့ၢ်နဆိကမိၣ်လၢ ကစၢ်ယွၤထံၣ်ဝဲဒ်လဲၣ်. ဒီးကိးနံၣ်ဒဲးန့ၣ် ကစၢ်ယွၤထံၣ်ဝဲ ဖိသၣ်လၢအတအိၣ်ဖျဲၣ်ဒံးဘၣ်တဖၣ် ဘၣ်တၢ်မၤသံအီၤလၢ အကကွဲၢ်အဃိ မ့ၢ်နဆိကမိၣ်လၢ အဝဲကတူၢ်ဘၣ်ဝဲဒ်လဲၣ်.
(၂ မိၤၡ့ ၂၁:၂၈, ၂၉) ဒီးဂီၤဖံးမ့ၢ်ဘျၢၣ်ပိာ်မုၣ်ဂ့ၤ, ပိာ်ခွါဂ့ၤ, ဒီးမ့ၢ်သံဒီး, ကဘၣ်တၢ်ကွံာ်သံအီၤလၢ လၢၢ်သပှၢ်တၢၢ်, ဒီးပှၤတဘၣ်အီၣ်ဘၣ် အညၣ်ဘၣ်. မ့မ့ၢ်ဂီၤဖံးအကစၢ်န့ၣ် ကပူၤဖျဲးလီၤ. ၂၉ ဘၣ်ဆၣ်ဒီး ဂီၤဖံးန့ၣ်မ့ၢ်ဘျၢၣ်တၢ် မဟါမဟိဒီး ပှၤဘိးဘၣ်သ့ၣ်ညါအကစၢ်, ဒီးအဝဲတကွၢ်ဘၣ်အီၤ, ဒီးဂီၤဖံးမၤသံတ့ၢ်ပိာ်မုၣ်ဂ့ၤ, ပိာ်ခွါဂ့ၤဒီး, ဂီၤဖံးကဘၣ် တၢ်ကွံာ်သံအီၤလၢလၢၢ်, ဒီးအကစၢ်ကဘၣ် တၢ်မၤသံစ့ၢ်ကီးအီၤလီၤ.
တၢး၁၀ ၄/၁၅ ၂၉ ¶၄
ယဟိဝၤယွၤ အဲၣ်ဒိးလၢ နကပူၤဖျဲးလၢ တၢ်ဘၣ်ယိၣ်အလီၢ်
တၢ်မၤလိာ်အံၤ ဘၣ်ထွဲလိာ်အသးဒီး တၢ်ဘၣ်ဒိဘၣ်ထံး ခီဖျိလၢ ဆၣ်ဖိကီၢ်ဖိလၢ ပှၤဘုၣ်လၢဟံၣ်တဖၣ်စ့ၢ်ကီးလီၤ. ဂီၤဖံးတဒု မ့ၢ်ဘျၢၣ်သံပှၤတဂၤန့ၣ် အကစၢ်ကဘၣ်မၤသံကွံာ်အီၤ ဒ်သိးအသုတဟးမၤဘၣ်ဒိ ပှၤဂၤလၢၤတဂ့ၤလီၤ. ဒ်အကစၢ် အီၣ်ဝဲအဂီၤဖံးအံၤအညၣ် တန့ၢ်အသိး ဆါဝဲတန့ၢ်စ့ၢ်ကီးဘၣ် အဃိအဝဲဘၣ်ဒိဆါနီၢ်နီၢ်လီၤ. ဘၣ်ဆၣ် ဂီၤဖံးတဒု မၤဘၣ်ဒိပှၤဝံၤအလီၢ်ခံ အကစၢ်မ့ၢ်တစၢဃာ်အီၤန့ၣ် တၢ်ကမၤအသးဒ်လဲၣ်. လၢခံဂီၤဖံးအံၤ မ့ၢ်ဘျၢၣ်သံဘၣ် ပှၤတဂၤဂၤန့ၣ် ဂီၤဖံးအံၤဒီးအကစၢ် ကဘၣ်တၢ်မၤသံအီၤလီၤ. တၢ်မၤလိာ်အံၤ မ့ၢ်တၢ်ဟ့ၣ်ပလီၢ်လၢ ပှၤလၢအတကွၢ်ထွဲ အဆၣ်ဖိကီၢ်ဖိလၢ အဘုၣ်ဝဲတဖၣ်အဂီၢ်စ့ၢ်ကီးလီၤ.—၂ မိၤ. ၂၁:၂၈, ၂၉.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(၂ မိၤၡ့ ၂၁:၅, ၆) ဒီးကုၢ်တဂၤန့ၣ်မ့ၢ်စံးတီတီ, ယအဲၣ်ယကစၢ်, ယမါ, ဒီးယဖိတဖၣ်, ယတဟးထီၣ်ထူၣ်ဖျဲးဘၣ်န့ၣ်ဒီး, ၆ အကစၢ်ဘၣ်ဆှၢအီၤဆူယွၤအအိၣ်, ဒီးတြဲၤမ့ၢ်ဂ့ၤ, ကျဲစၢၤအထူၣ်မ့ၢ်ဂ့ၤ, ဘၣ်ဆှၢအီၤစ့ၢ်ကီးဖဲန့ၣ်, ဒီးအကစၢ်ဘၣ်ပျံာ်ဖျိအနၢ်လၢ ထးပျံာ်, ဒီးဘၣ်မၤအတၢ် လီၤထူလီၤယိာ်လီၤ.
တၢး၁၀ ၁/၁၅ ၄ ¶၄-၅
ဘၣ်မနုၤအဃိ နဘၣ်ဟ့ၣ်လုၢ်ထီၣ်နသးဆူ ယဟိဝၤယွၤအအိၣ်လဲၣ်
၄ ခရံာ်ဖိအတၢ်ဟ့ၣ်လုၢ်ထီၣ်သးန့ၣ် မ့ၢ်တၢ်လၢအရ့ဒိၣ်ဒိၣ်မးလီၤ. တမ့ၢ်ထဲဒၣ် တၢ်အၢၣ်လီၤတခါဘၣ်. တၢ်ဟ့ၣ်လုၢ်ထီၣ်သးန့ၣ် အဘျုးအိၣ်လၢပဂီၢ်ဒ်လဲၣ်. ပကထိၣ်သတြီၤကွၢ် ဘၣ်ဃးဒီး ပှၤကညီကဒဲကဒဲ မၤတၢ်အၢၣ်လီၤအီလီၤန့ၣ် အဘျုးအိၣ်ဒ်လဲၣ်. အဒိတခါန့ၣ် တၢ်ဒီတံၤဒီသကိးလီၤ. နမ့ၢ်အဲၣ်ဒိးဒိးန့ၢ်တၢ်အဘျုးလၢ နတံၤသကိးတဂၤအအိၣ်န့ၣ် နကဘၣ်တူၢ်လိာ်မူဒါလၢ အိၣ်ဒီးနၤလၢ နမ့ၢ်အတံၤသကိးတဂၤအဃိန့ၣ်လီၤ. နအိၣ်ဒီး မူဒါလၢနကဘၣ် အံးထွဲကွၢ်ထွဲ နတံၤသကိးလီၤ. လံာ်စီဆှံ ပာ်ဖျါထီၣ်ဝဲ ပှၤဒီတံၤဒီသကိးအါမး အကျါတခါန့ၣ်မ့ၢ်ဝဲ စီဒၤဝံး ဒီးစီၤယိနၤသၣ်လီၤ. အဝဲသ့ၣ် ရ့လိာ်အသး တုၤဒၣ်လဲာ် မၤဝဲတၢ်အၢၣ်လီၤအီလီၤန့ၣ်လီၤ. (ဖး ၁ ၡမူၤအ့လး ၁၇:၅၇; ၁၈:၁, ၃ တက့ၢ်) ပှၤဒီတံၤဒီသကိးလၢ အမၤတၢ်အၢၣ်လီၤ ဒ်သိးန့ၣ်န့ၣ် တအိၣ်ကြီကြီဘၣ် သနာ်က့ တၢ်တူၢ်ဘၣ်လၢ အမၤပာ်တၢ်အၢၣ်လီၤန့ၣ် မၤဂၢၢ်ကျၢၤထီၣ် ပှၤတၢ်ရ့လိာ်သး အါန့ၢ်အလီၢ်လီၤ.—ကတိၤ. ၁၇:၁၇; ၁၈:၂၄.
၅ တၢ်သိၣ်တၢ်သီလၢ ကစၢ်ယွၤဟ့ၣ်လီၤ ပှၤအံၣ်စရ့လးဖိတဖၣ်န့ၣ် ပာ်ဖျါထီၣ်ဝဲ တၢ်ရ့လိာ်သးအဂၤတခါလၢ ပှၤဒိးန့ၢ်ဘၣ် တၢ်အဘျုးခီဖျိ ပှၤမၤတၢ်အၢၣ်လီၤန့ၣ်လီၤ. ကုၢ်တဂၤ မ့ၢ်အဲၣ်ဒိးအိၣ်ဒီး တၢ်ဘံၣ်တၢ်ဘၢလၢ အကစၢ်လၢအဂ့ၤတဂၤ အစုဖီလာ်န့ၣ် မၤဝဲတၢ်အၢၣ်လီၤလၢ အဂၢၢ်ကျၢၤ ဒီးအကစၢ်သ့လီၤ. တၢ်မၤလိာ်ပာ်ဖျါဝဲလၢ “ဒီးကုၢ်တဂၤန့ၣ်မ့ၢ်စံးတီတီ, ယအဲၣ်ယကစၢ်, ယမါ, ဒီးယဖိတဖၣ်, ယတဟးထီၣ်ထူၣ်ဖျဲးဘၣ်န့ၣ်ဒီး, အကစၢ်ဘၣ်ဆှၢအီၤဆူယွၤအအိၣ်, ဒီးတြဲၤမ့ၢ်ဂ့ၤ, ကျဲစၢၤအထူၣ်မ့ၢ်ဂ့ၤ, ဘၣ်ဆှၢအီၤစ့ၢ်ကီးဖဲန့ၣ်, ဒီးအကစၢ် ဘၣ်ပျံာ်ဖျိအနၢ်လၢ ထးပျံာ်, ဒီးဘၣ်မၤအတၢ် လီၤထူလီၤယိာ်လီၤ.”—၂ မိၤ. ၂၁:၅, ၆.
(၂ မိၤၡ့ ၂၁:၁၄) မ့မ့ၢ်ပှၤမ့ၢ်ပာ်ထီၣ်ထီအသးလၢ ပှၤလၢအဃၢၤအဖီခိၣ် ဒ်သိးအကမၤသံအီၤဒီးလီတၢ်ဒီး, နဘၣ်ဟံးန့ၢ်အီၤလၢ ယတၢ်လုၢ်လီၢ်အအိၣ်ဒၣ်လဲာ်, ဒ်သိးအကသံလီၤ.
it-1 ၁၁၄၃
တၢ်အနၢၤ
၂ မိၤၡ့ ၂၁:၁၄ န့ၣ်ဘၣ်သ့ၣ်သ့ၣ် ကအဲၣ်ဒိးတဲဝဲ ပှၤလုၢ်တၢ်အဒိၣ်ဒၣ်လဲာ် မ့ၢ်မၤသံပှၤဂၤန့ၣ် ကဘၣ်တၢ်မၤသံအီၤစ့ၢ်ကီးန့ၣ်လီၤ. ပှၤလၢအမၤသံပှၤလၢ အသးဒၣ်ဝဲတဂၤန့ၣ် မ့ၢ်လဲၤဖီၣ်ဃာ်ဝဲ တၢ်လုၢ်လီၢ်အနၢၤဒၣ်လဲာ် ကဘၣ်တၢ်မၤသံအီၤလီၤ.—ထိၣ်သတြီၤဒီး ၁ စီၤပၤ. ၂:၂၈-၃၄.
တၢ်ဖးလံာ်စီဆှံ
တၢး၀၉ ၄/၁ ၃၁
ယဟိဝၤယွၤ မ့ၢ်ဖိၣ်ဃဲဖိတဖၣ်အပၢ်
“ယွၤ . . . ပှၤဖိၣ်ဃဲအပၢ်” လီၤ. (စံးထီၣ်ပတြၢၤ ၆၈:၅) တၢ်ကတိၤလၢ ဘၣ်တၢ်ကွဲးအီၤ ခီဖျိယွၤအသးစီဆှံတဖၣ်အံၤ သိၣ်လိပှၤ ယဟိဝၤယွၤအဂ့ၢ်လၢ ဘၣ်ဃးဒီး အဝဲသ့ၣ်ညါဝဲ ပှၤလၢအတၢ်အိၣ်သးကီခဲတဖၣ် အတၢ်လိၣ်ဘၣ် ဂ့ၤဂ့ၤလီၤ. ပမ့ၢ်ကွၢ် တၢ်မၤလိာ်လၢ ကစၢ်ယွၤဟ့ၣ်လီၤဝဲ ပှၤအံၣ်စရ့လးဖိတဖၣ်နၣ် ပသ့ၣ်ညါဘၣ်လၢ ကစၢ်ယွၤ ဘၣ်ယိၣ်တၢ်လၢ ဖိသၣ်လၢအမိၢ် မ့တမ့ၢ် အပၢ် တအိၣ်လၢၤဘၣ် တဂၤအဂီၢ်န့ၣ်လီၤ. ပကကွၢ်သကိး တၢ်ကတိၤလၢအမ့ၢ် “ပှၤဖိၣ်ဃဲ” လၢလံာ်စီဆှံ သူဝဲအဆိကတၢၢ်တဘျီ ဖဲ ၂ မိၤၡ့ ၂၂:၂၂-၂၄ အပူၤန့ၣ်လီၤ.
ကစၢ်ယွၤ ဟ့ၣ်ပလီၢ်ဝဲလၢ “ပှၤဖိၣ်ဃဲမ့ၢ်ဂ့ၤ, မၤနးမၤဖှီၣ်အီၤတဂ့ၤ.” (အဆၢဖိ ၂၂) တၢ်ကတိၤအံၤတမ့ၢ်ထဲ တၢ်ဃ့ကညးတမံၤလၢ ပှၤကပာ်လုၢ်ပာ်ပှ့ၤ ပှၤဟီၣ်ခိၣ်ဖိ အတၢ်ခွဲးတၢ်ယာ်အဂီၢ်ဘၣ်. မ့ၢ်ဝဲ ကစၢ်ယွၤ အတၢ်မၤလိာ်န့ၣ်လီၤ. ဖိသၣ်လၢ အမိၢ် မ့တမ့ၢ် အပၢ်လၢ အဒီသဒၢအီၤ ဒီးလုၢ်အီၣ်လုၢ်အီအီၤ တဂၤဂၤမ့ၢ်တအိၣ်လၢၤဘၣ်န့ၣ် အဝဲကအိၣ်ဒီး တၢ်ကီတၢ်ခဲဖးဒိၣ်လီၤ. အဃိ ဖိသၣ်ဒ်အံၤတဂၤန့ၣ် ပှၤတဘၣ် “မၤနးမၤဖှီၣ်” အီၤလၢကျဲတမံၤမံၤ နီတဂၤဘၣ်. လံာ်စီဆှံ တၢ်ကွဲးကျိာ်ထံလၢအဂၤတဖၣ် ကွဲးကျိာ်ဝဲတၢ်ကတိၤအံၤလၢ “တဘၣ်မၤအၢမၤသီ” ဟံးန့ၢ်တၢ်ခွဲးတၢ်ယာ်လၢ အဖီခိၣ်” ဘၣ်. တၢ်မၤကမၣ် ပှၤဖိၣ်ဃဲန့ၣ် မ့ၢ်တၢ်ကမၣ်ဖးဒိၣ်လၢ ကစၢ်ယွၤအမဲာ်ညါလီၤ. တၢ်ကမၣ်ဒိၣ်ထဲလဲၣ်.
တၢ်မၤလိာ် ဆဲးပာ်ဖျါဝဲလၢ “နမ့ၢ်မၤနးမၤဖှီၣ်အီၤတမံၤမံၤ, ဒီးမ့ၢ်ကိးထီၣ်ယၤတစဲးဧိၤဒီး, ယကဒိကနၣ် အကိးထီၣ်တၢ်သပှၢ်တၢၢ်လီၤ.” (အဆၢဖိ ၂၃) အဆၢဖိ ၂၃ အပူၤ သူဝဲတၢ်ကတိၤ “န” ဒီးအဆၢဖိ ၂၄ “သု” န့ၣ်လီၤ. အဃိ ပှၤတဂၤစုာ်စုာ်မ့ၢ်ဂ့ၤ, ပှၤလၢထံကီၢ်ဒီဘ့ၣ်အပူၤမ့ၢ်ဂ့ၤ ကဘၣ်ဒိကနၣ် ဒီးမၤထွဲဝဲ တၢ်မၤလိာ်အံၤလီၤ. ယဟိဝၤယွၤ ကွၢ်ဝဲပှၤဖိၣ်ဃဲတဖၣ်, ဒိကနၣ် အဝဲသ့ၣ်အတၢ်ဃ့ ဒီးသးအိၣ်မၤစၢၤဝဲထီဘိလီၤ.—စံးထီၣ်ပတြၢၤ ၁၀:၁၄; ကတိၤဒိ ၂၃:၁၀, ၁၁.
မ့မ့ၢ်ဒ်န့ၣ်န့ၣ် ပှၤတဂၤဂၤ မ့ၢ်မၤနးမၤဖှီၣ်ပှၤဖိၣ်ဃဲ တုၤဒၣ်လဲာ် အဝဲမ့ၢ်ဘၣ်ဃ့ တၢ်မၤစၢၤလၢ ကစၢ်ယွၤအအိၣ်န့ၣ် တၢ်ကမၤအသးဒ်လဲၣ်. ယဟိဝၤယွၤတဲဝဲလၢ “ ယသးထီၣ်ကကဲၤထီၣ်, ဒီးယကမၤသံသုလၢနး” လီၤ. (အဆၢဖိ ၂၄) လံာ်တဘ့ၣ် ပာ်ဖျါဝဲလၢ “တၢ်ကတိၤအံၤ အခီပညီလိၤလိၤ မ့ၢ်ဝဲ ‘ယနါစ့ၤ ကကိၢ်ထီၣ်ဖးဒိၣ်’ အဲၣ်ဒိးတဲဝဲ အသးဒိၣ်ထီၣ်တၢ်ဖးဒိၣ်လီၤ.” ပာ်သူၣ်ပာ်သးလၢ ယဟိဝၤယွၤ တဟ့ၣ်လီၤဝဲမူဒါလၢ စံၣ်ညီၣ်ကွီၢ်တဖၣ်အစုပူၤဘၣ်. ပှၤတဂၤဂၤလၢ အဟံးန့ၢ်တၢ်ခွဲးတၢ်ယာ်လၢ ဖိသၣ်လၢ အလိၣ်ဘၣ် တၢ်မၤစၢၤတဂၤအံၤအဖီခိၣ်န့ၣ် ကစၢ်ယွၤ အနီၢ်ကစၢ်ဒၣ်ဝဲ ကစံၣ်ညီၣ်အီၤလီၤ.—၅ မိၤၡ့ ၁၀:၁၇, ၁၈.
ယဟိဝၤယွၤန့ၣ် ဒ်လၢညါအသိးလီၤ. (မၤလကံ ၃:၆) ဖိသၣ်လၢ အမိၢ် မ့တမ့ၢ် အပၢ် မ့တမ့ၢ် ခံဂၤလၢာ်တအိၣ်လၢၤဘၣ်တဖၣ်န့ၣ် ကစၢ်ယွၤသးကညီၤအဝဲသ့ၣ်လီၤ. (ယၤကိာ် ၁:၂၇) အဃိ မ်ပသုတမၤကမၣ်ဘၣ် အဝဲသ့ၣ်တဂ့ၤ. ပှၤမ့ၢ်မၤနးမၤဖှီၣ် ပှၤဖိၣ်ဃဲတဖၣ်န့ၣ် ပှၤဖိၣ်ဃဲတဖၣ်အပၢ် ကသးဒိၣ်ထီၣ်တၢ်လီၤ. ပှၤလၢအဟံးန့ၢ်တၢ်ခွဲးတၢ်ယာ်လၢ ဖိသၣ်လၢအလိၣ်ဘၣ် တၢ်မၤစၢၤတဂၤအဖီခိၣ်န့ၣ် တပူၤဒီး “ယွၤအသးကဲၤထီၣ်” ဘၣ်. (စဖါနယၤ ၂:၂) “တၢ်လီၤတဲာ်ဆူယွၤလၢ အမူဝဲတဂၤအစုပူၤန့ၣ်, မ့ၢ်တၢ်ဘၣ်ပျံၤအလီၢ်” န့ၣ်ပှၤအၢပှၤသီတဖၣ်အံၤ ကထံၣ်သ့ၣ်ညါဘၣ်ဝဲလီၤ.—ဧ့ၤဘြံၤ ၁၀:၃၁.