ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါယူၤလံ ၅-၁၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၅ မိၤၡ့ ၁၁-၁၂
“ယဟိဝၤယွၤ အဲၣ်ဒိးလၢ အပှၤဂီၢ်မုၢ်တဖၣ် ကဘူၣ်ထီၣ်ဘါထီၣ်အီၤဒ်လဲၣ်”
it-2 ၁၀၀၇ ¶၄
စိ(လ်)
တၢ်ဘူၣ်ထီၣ်ဘါထီၣ်ယွၤလၢ သးဒီဖျၢၣ် (Whole Soul). “သးဒီဖျၢၣ်” အခီပညီမ့ၢ်ဝဲ တၢ်လၢပှၤတဂၤမၤဝဲ သ့ခဲလၢာ်န့ၣ်လီၤ. လံာ်စီဆှံအဆၢတနီၤ ဟ့ၣ်ဂံၢ်ဟ့ၣ်ဘါပှၤလၢ ပကဘၣ်အဲၣ်ကစၢ်ယွၤလၢ ‘ပသူၣ်ကံၢ်သးလဲ, ဒီးပသးဒီဖျၢၣ်ညါ’ လီၤ. (၅ မိၤ. ၄:၂၉; ၁၁:၁၃, ၁၈), ၅ မိၤၡ့ ၆:၅ ပာ်ဖျါဝဲလၢ “ဒီးနဘၣ်အဲၣ်ယွၤနကစၢ်လၢ နသူၣ်ကံၢ်သးလဲ, ဒီးနသးဒီဖျၢၣ်ညါ ဒီးနဂံၢ်နဘါခဲလၢာ်လီၤ.” ယ့ၣ်ၡူး တဲဝဲလၢ နဘၣ်အဲၣ် ယွၤနကစၢ်လၢ နသူၣ်ကံၢ်သးလဲ, ဒီးနသးဒီဖျၢၣ်ညါ, တကးဒံးဘၣ် “နတၢ်ကူၣ်တၢ်ဆးတုၤအလၢာ်” လီၤ. (မၢ်. ၁၂:၃၀; လူၤ. ၁၀:၂၇) တၢ်သံကွၢ်အိၣ်ထီၣ်လၢ တၢ်ကတိၤလၢအမ့ၢ် စိ(လ်) န့ၣ် ပၣ်ဃုာ်ဒီး တၢ်သ့ၣ်တဖၣ်န့ၣ် ခဲလၢာ်အဃိ ဘၣ်မနုၤအဃိ လိၣ်လၢပှၤဘၣ်တဲဖျါထီၣ်အီၤ လီၤလီၤဆီဆီလဲၣ်. ပဟ့ၣ်တၢ်အဒိဒ်အံၤသ့လီၤ– ပှၤတဂၤ မ့ၢ်ဆါလီၤကွံာ် အနီၢ်ကစၢ် (စိ(လ်)) ဒ်ကုၢ်အသိးန့ၣ် ကဲထီၣ်ဝဲ အကစၢ်အတၢ်လီၤ. သနာ်က့ ဘၣ်သ့ၣ်သ့ၣ် အဝဲတမၤန့ၢ်အကစၢ်အတၢ်လၢ အသးဒီဖျၢၣ်ဘၣ်. ဘၣ်သ့ၣ်သ့ၣ် အဝဲကမၤဝံၤတၢ်မံၤ ဒီးတမၤတၢ်လၢ အတၢ်ကူၣ်တၢ်ဆးခဲလၢာ် ဒီးအဂံၢ်အဘါခဲလၢာ်ဘၣ်. (ထိၣ်သတြီၤဒီး အ့း. ၆:၅; ကလီး. ၃:၂၂) အဃိ တၢ်ကတိၤလၢ သူၣ်ကံၢ်သးလဲ, သးဒီဖျၢၣ်ညါ, တၢ်ကူၣ်တၢ်ဆးတုၤအလၢာ်လၢ ဘၣ်တၢ်တဲဖျါထီၣ်အီၤ တခါစုာ်စုာ်န့ၣ် မ့ၢ်ဒ်သိး ပကသ့ၣ်နီၣ်ထီၣ်က့ၤလၢ ကယဲၢ်တၢ်လၢအအိၣ်ဒီးပှၤန့ၣ် မ့ၢ်ဝဲယဟိဝၤယွၤ ဒီးအဖိခွါလၢ အပှ့ၤက့ၤပှၤလၢအသးသမူတဂၤ အတၢ်န့ၣ်လီၤ. တၢ်ဘူၣ်ထီၣ်ဘါထီၣ်ယွၤလၢ “သးဒီဖျၢၣ်” န့ၣ် ပၣ်ဃုာ်ဒီး နီၢ်ခိဒီတဂၤ, ပတၢ်ဖံးတၢ်မၤ, ပတၢ်သ့တၢ်ဘၣ် ဒီးတၢ်သူၣ်အိၣ်သးအိၣ် လၢလၢပှဲၤပှဲၤန့ၣ်လီၤ.—ထိၣ်သတြီၤဒီး မး. ၅:၂၈-၃၀; လူၤ. ၂၁:၃၄-၃၆; အ့း. ၆:၆-၉; ဖံလံး. ၃:၁၉; ကလီး. ၃:၂၃, ၂၄.
it-1 ၈၄ ¶၃
တၢ်လုၢ်လီၢ်
ပှၤအံၣ်စရ့လးဖိတဖၣ် ဘၣ်တၢ်မၤလိာ်အဝဲသ့ၣ်လၢ ကဘၣ်မၤဟးဂီၤကွံာ်ဝဲ တၢ်ဘူၣ်တၢ်ဘါကမၣ်တဖၣ် အတၢ်လုၢ်လီၢ်, အလၢၢ်ထူၣ်တဖၣ် ဒီးတၢၣ်လၢ တၢ်ဘူၣ်ထီၣ်ဘါထီၣ် အဂီၢ်တဖၣ်လီၤ. (၂ မိၤ. ၃၄:၁၃; ၅ မိၤ. ၇:၅, ၆; ၁၂:၁-၃) ပှၤအံၣ်စရ့လးဖိတဖၣ် တဘၣ်ကွၢ်လိမၤဒိး ပှၤကနၤဧၣ်ဖိတဖၣ် ဒီးဟ့ၣ်လုၢ်ထီၣ် အဖိလၢမ့ၣ်အူဘၣ်. (၅ မိၤ. ၁၂:၃၀, ၃၁; ၁၆:၂၁) ပှၤအံၣ်စရ့လးဖိတဖၣ် တဘၣ်သူၣ်ထီၣ်ဝဲ တၢ်လုၢ်လီၢ်အါဖျၢၣ်ဘၣ်. အဝဲသ့ၣ် ဘၣ်သူၣ်ထီၣ်ဝဲ တၢ်လုၢ်လီၢ်ထဲတဖျၢၣ် လၢကဘူၣ်ထီၣ်ဘါထီၣ်ဝဲ ယွၤလၢအမ့ၢ်အတီအဂီၢ် ဒီးကဘၣ်လဲၤသူၣ်ထီၣ်ဝဲလၢ တၢ်လီၢ်လၢ ယဟိဝၤယွၤဃုထၢဝဲန့ၣ်လီၤ. (၅ မိၤ. ၁၂:၂-၆, ၁၃, ၁၄, ၂၇; ထဲဘၤဘူၤလိၣ် အယွၤမုၣ် အဲးၡတၢ်တဂၤအဂီၢ်န့ၣ် တၢ်လုၢ်လီၢ်အိၣ်ဝဲ ၁၈၀ လီၤ.) ပှၤအံၣ်စရ့လးဖိတဖၣ် ဒိးန့ၢ်ဘၣ်ဝဲ တၢ်ဟံးစုနဲၣ်ကျဲ အဆိကတၢၢ်တဘျီလၢ ကသူၣ်ထီၣ်ဝဲတၢ်လုၢ်လီၢ်လၢ လၢၢ်လၢတဘၣ် တၢ်ဘုးတဲာ်အီၤန့ၣ် မ့ၢ်ဝဲဖဲ အဝဲသ့ၣ် ခီဂာ်ဝဲထံကျိယၢ်ဒ့ၣ် ဝံၤအလီၢ်ခံလီၤ. (၅ မိၤ. ၂၇:၄-၈) တၢ်လုၢ်လီၢ်အံၤ စီၤယိၤၡူ သူၣ်ထီၣ်ဝဲလၢ ကစၢၢ်ဧ့ၤဘါလး အဒီခိၣ်လီၤ. (ၡူ. ၈:၃၀-၃၂) ဖဲအဝဲသ့ၣ် နီၤလီၤလိာ်အသးလၢ ကီၢ်ဝံၤအလီၢ်ခံ ရူၤဘ့ၣ်အဒူၣ်, ကးအဒူၣ် ဒီးမနၤၡ့ၤ အဒူၣ်တဝာ်န့ၣ် သူၣ်ထီၣ်ဝဲ တၢ်လုၢ်လီၢ်တခါလၢ ထံကျိယၢ်ဒ့ၣ်အကပၤလီၤ. အဃိ တၢ်သဘံၣ်သဘုၣ် အိၣ်ထီၣ်ဝဲဒီး ကလုာ်ဒူၣ်အဂၤလီၤ. ဘၣ်ဆၣ် လၢခံအဝဲသ့ၣ် သ့ၣ်ညါထီၣ်ဘၣ်ဝဲလၢ တၢ်လုၢ်လီၢ်အံၤန့ၣ် တမ့ၢ်တၢ်ပနီၣ်လၢ တၢ်စူးကွံာ်ညိကွံာ်တၢ်နာ်အဂီၢ်ဘၣ်, မ့ၢ်ဒၣ်တၢ်ပနီၣ်လၢ လၢတၢ်သ့ၣ်နီၣ်ထီၣ်က့ၤ ယွၤလၢအမ့ၢ်အတီအဂီၢ်လီၤ.—ၡူ. ၂၂:၁၀-၃၄.
it-1 ၉၂၅-၉၂၆
ကစၢၢ်ကရံးစံၣ်
စီၤယိၤၡူ မၤန့ၢ်ဝဲ ဝ့ၢ်ဂဲဝံၤအလီၢ်ခံ ဒ်စီၤမိၤၡ့ မၤလိာ်တ့ၢ်အီၤအသိး အဝဲဒုးအိၣ်ဖှိၣ်ဝဲ ပှၤအံၣ်စရ့လးဖိတဖၣ်လၢ ကစၢၢ်ကရံးစံၣ် ဒီးကစၢၢ်ဧ့ၤဘါလးအလိၤလီၤ. အဝဲသ့ၣ်နၢ်ဟူဘၣ်ဝဲလၢ မ့ၢ်ဒိကနၣ် ယဟိဝၤယွၤအကလုၢ်န့ၣ် ကဒိးန့ၢ်ဘၣ်တၢ်ဆိၣ်ဂ့ၤတဖၣ် ဒီးမ့ၢ်တဒိကနၣ် ယဟိဝၤယွၤအကလုၢ်ဘၣ်န့ၣ် ကဒိးန့ၢ်ဘၣ်ဝဲ တၢ်ဆိၣ်အၢတဖၣ်အဂ့ၢ်လီၤ. စူၤမ့းအိၣ်, လ့ၤဝံ, ယူဒၤ, ယံးစၣ်ကၢ်, ယိၤသး ဒီးဘံၣ်ယၤမံၣ်အဒူၣ်တဖၣ်န့ၣ် ဘၣ်ဆၢထၢၣ်ဝဲလၢ ကစၢၢ်ကရံးစံၣ်အမဲာ်ညါလီၤ. လ့ၤဝံအဒူၣ် ဒီးတလါစီဆှံန့ၣ် ဘၣ်အိၣ်လၢ ကစၢၢ်ကဆူး ဒီးကလုာ်ဒူၣ်အဂၤ ဃုဒူၣ်န့ၣ် ဘၣ်အိၣ်ဆၢထၢၣ်လၢ ကစၢၢ်ဧ့ၤဘါလးအမဲာ်ညါန့ၣ်လီၤ. (၅ မိၤ. ၁၁:၂၉, ၃၀; ၂၇:၁၁-၁၃; ၡူ. ၈:၂၈-၃၅) ဖျါလၢကလုာ်ဒူၣ်လၢ အဆၢထၢၣ်လၢ ကစၢၢ်ကရံးစံၣ် အမဲာ်ညါတဖၣ်န့ၣ် ဖဲပှၤဖးဖျါထီၣ် တၢ်ဆိၣ်ဂ့ၤတဖၣ်အခါ အဝဲသ့ၣ်ဘၣ်စံးဆၢက့ၤဝဲ ဒီးကလုာ်ဒူၣ်အဂၤတဖၣ်န့ၣ် ဖဲပှၤဖးဖျါထီၣ် တၢ်ဆိၣ်အၢအခါ ဘၣ်စံးဆၢက့ၤဝဲလီၤ. ပှၤတဲလၢ ကစၢၢ်ကရံးစံၣ်န့ၣ် ဟီၣ်ခိၣ်ညၣ်ဂ့ၤ ဒီးဖျါဃံလၤအဃိ ပှၤဘၣ်ဖးဖျါထီၣ် တၢ်ဆိၣ်ဂ့ၤတဖၣ်ဖဲန့ၣ် ဒီးကစၢၢ်ဧ့ၤဘါလးန့ၣ် အိၣ်ဒီးလၢၢ် ဒီးတၢ်ထူၣ်တၢ်ဘိ တအိၣ်အါအါဘၣ်အဃိ ပှၤဘၣ်ဖးဖျါထီၣ် တၢ်ဆိၣ်အၢတဖၣ်ဖဲန့ၣ်လီၤ. သနာ်က့ လံာ်စီဆှံ တတဲဝဲဒ်န့ၣ်ဘၣ်. တၢ်မၤလိာ်တဖၣ်န့ၣ် ပှၤဘၣ်ဖး သီၣ်အီၤလၢ ကလုၢ်ဒိၣ်ဒိၣ်လၢ “အံၣ်စရ့လးအတၢ်အိၣ်ဖှိၣ်အမဲာ်ညါ, အိၣ်ဒီးပိာ်မုၣ်ပိာ်မၢၤ, ဒီးဖိဒံဖိသၣ်, ဒီးပှၤတခီဘီမုၢ်ဖိလၢ အလဲၤတၢ်လၢအကျါတဖၣ်” အမဲာ်ညါလီၤ. (ၡူ. ၈:၃၅) ပှၤခံဖုလၢာ်လၢ အဆၢထၢၣ်လၢကစၢၢ်အမဲာ်ညါန့ၣ် နၢ်ဟူဝဲပှၤဖးဖျါထီၣ် တၢ်ဂ့ၢ်တဖၣ်သ့ဂ့ၤဂ့ၤလီၤ. ဘၣ်သ့ၣ်သ့ၣ် တၢ်လီၢ်အဝဲန့ၣ် အတၢ်အိၣ်သးန့ၣ် ကကဲထီၣ်တၢ်မၤစၢၤလၢ ပှၤကနၢ်ဟူတၢ်ဂ့ၤဂ့ၤအဂီၢ်လီၤ.—See EBAL, MOUNT
လါယူၤလံ ၁၂-၁၈
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၅ မိၤၡ့ ၁၃-၁၅
“ယဟိဝၤယွၤ ဆိကမိၣ်န့ၢ်တၢ်လၢ ပှၤဖှီၣ်ဖိယာ်ဖိတဖၣ်အဂီၢ်န့ၣ် တၢ်မၤလိာ် ပာ်ဖျါဝဲဒ်လဲၣ်”
it-2 ၁၁၁၀ ¶၃
တၢ်ဆံဆဲၣ်ပူတပူ
လီၤဂာ်လၢပှၤဘၣ်ပာ် တၢ်ဆံဆဲၣ်ပူတပူလၢ တၢ်မၤစၢၤ ပှၤလ့ၤဝံဖိ အပှၤလုၢ်တၢ်ဒိၣ်တဖၣ်အဂီၢ် တကးဒံးဘၣ် ပှၤဘၣ်ပာ်ဒံး တၢ်ဆံဆဲၣ်ပူတပူအဂၤတခါလၢ ပှၤကအီၣ်သကိးတၢ်ဒီး ပှၤလ့ၤဝံဖိတဖၣ်အဂီၢ်လီၤ. ညီနုၢ်န့ၣ် ဖဲပှၤအံၣ်စရ့လးဖိ အဟံၣ်ဖိဃီဖိတဖၣ် ပာ်ဖှိၣ်ထီၣ်အသးတပူၤဃီ လၢဘူၣ်တဖၣ်အဂီၢ်အခါ အဝဲသ့ၣ်အီၣ်သကိးဝဲ တၢ်ဆံဆဲၣ်ပူတပူအံၤလၢ တၢ်သူၣ်ခုသးခုအပူၤလီၤ. မ့ၢ်လၢတၢ်ဒ့ၣ်စၢၤယံၤအဃိ ပှၤလဲၤစိာ် တၢ်ဆံဆဲၣ်ပူတပူအံၤဆူ ဝ့ၢ်ယရူၤၡလ့ၣ် မ့ၢ်တသ့ဘၣ်န့ၣ် ပှၤဆါကွံာ်အီၤ ဒီးလဲၤစိာ်စ့သ့ဝဲလီၤ. ဖဲအဝဲသ့ၣ် လဲၤတုၤလၢ ဝ့ၢ်ယရူၤၡလ့ၣ် လၢပှၤမၤဘူၣ်အလီၢ်အခါ အဝဲသ့ၣ် ဘၣ်ပှ့ၤဝဲတၢ်လၢ အဟံၣ်ဖိဃီဖိတဖၣ် လိၣ်ဘၣ်ဝဲ ဒီးအီၣ်သကိးဝဲလၢ တၢ်သူၣ်ခုသးခုအပူၤလီၤ. (၅ မိၤ. ၁၂:၄-၇, ၁၁, ၁၇, ၁၈; ၁၄:၂၂-၂၇) ဖဲနွံနံၣ်အတီၢ်ပူၤ သၢနံၣ်အကတၢၢ် ဒီးဃုနံၣ်အကတၢၢ်န့ၣ် ပှၤတဘၣ်သူ တၢ်ဆံဆဲၣ်ပူတပူအံၤလၢ ဘူၣ်အဂီၢ်လၢၤဘၣ်. လၢတၢ်န့ၣ်အလီၢ် ပှၤဘၣ်ဟ့ၣ် ပှၤလ့ၤဝံဖိ, ပှၤတခီဘီမုၢ်ဖိ, ဖိၣ်ဃဲ ဒီးမုၣ်ကမဲတဖၣ်လီၤ.—၅ မိၤ. ၁၄:၂၈, ၂၉; ၂၆:၁၂.
it-2 ၈၃၃
နွံနံၣ်တနံၣ်
နွံနံၣ်စစစစတနံၣ်န့ၣ် ဘၣ်တၢ်ကိးအီၤလၢ “တၢ်ပျၢ်အနံၣ် [hash·shemit·tahʹ].” (၅ မိၤ. ၁၅:၉; ၃၁:၁၀) တၢ်တနံၣ်န့ၣ် ပှၤဘၣ်ပာ်ကလီဟီၣ်ခိၣ် ဒီးပှၤတဘၣ်သူၣ်အီၣ်ဖျးအီၣ်တၢ်ဘၣ်, ပှၤဘၣ်ဟံးန့ၢ်တၢ်အိၣ်ဘှံးလၢလၢပှဲၤပှဲၤ ဒီးပှၤကဘၣ်ပျၢ်ကွံာ်တၢ်လီၤ. (၂ မိၤ. ၂၃:၁၁) ပှၤတဘၣ်ဃ့က့ၤ တၢ်ဒ့ၣ်တၢ်ကမၢ်လၢၤဘၣ်. တၢ်န့ၣ်မ့ၢ်ဝဲ “ယွၤအတၢ်ပျၢ်” ဒီး မ့ၢ်တၢ်လၢ အမၤလၤကပီၤအီၤလီၤ. ပှၤတနီၤ နၢ်ပၢၢ်ကမၣ်ဝဲ တၢ်ဂ့ၢ်အံၤလီၤ. အဝဲသ့ၣ်တဲဝဲလၢ တၢ်တနံၣ်န့ၣ် ပှၤမၤစံာ်ဖိတဖၣ် အစ့ဟဲနုာ်လီၤ တအိၣ်ဘၣ်အဃိ ပှၤလၢအဟ့ၣ်လိၢ်စ့တဂၤန့ၣ် တဃ့က့ၤဝဲစ့လၢ ပှၤဧ့ၤဘြံၤဖိလၢ အဃ့လိၣ်တၢ်တဖၣ်အအိၣ် သနာ်က့ တမ့ၢ်လၢ အဝဲဟ့ၣ်ဆူကွံာ်ဝဲန့ၣ်ဘၣ်. ဘၣ်ဆၣ် မ့မ့ၢ်လၢပှၤတခီဘီမုၢ်ဖိတဖၣ်အအိၣ်န့ၣ် အဝဲသ့ၣ်ဃ့က့ၤဝဲ သ့လီၤ. (၅ မိၤ. ၁၅:၁-၃) ရၤဘံတနီၤ အိၣ်ဒီးတၢ်ထံၣ်လၢ ပှၤမ့ၢ်ဟ့ၣ်လိၢ်တၢ်လၢ ပှၤဖီၣ်ဖိယာ်ဖိတဖၣ်န့ၣ် ပှၤတဃ့က့ၤလၢၤဘၣ်. ဘၣ်ဆၣ် တၢ်အံၤလီၤဆီဒီး ပှၤဟ့ၣ်လိၢ်တၢ်လၢ ပှၤကမၤမုၢ်ကျိၤဝဲၤကွာ် (စံပွါယ့) အဂီၢ်န့ၣ်လီၤ. ဖဲတၢယၤဖှိၣ်အစိၤန့ၣ် ပှၤယူဒၤဖိ တၢ်ဘူၣ်တၢ်ဘါခိၣ်နၢ် ဟ့လဲၣ် ဒုးအိၣ်ထီၣ်ဝဲ တၢ်သိၣ်တၢ်သီတခါလၢ ပှၤလၢအဟ့ၣ်လိၢ်တၢ်တဂၤ ဒ်သိးအစ့သုတဆူတဂ့ၤအဂီၢ် လဲၤဝဲဆူ စံၣ်ညီၣ်ကွီၢ်အရူဒီး မၤဝဲတၢ်ဆိၣ်သ့လီၤ.—The Pentateuch and Haftorahs, edited by J. Hertz, London, 1972, pp. 811, 812.
it-2 ၉၇၈ ¶၆
ကုၢ်
တၢ်မၤလိာ်လၢ ဘၣ်ဃးဒီး ကုၢ်ဒီးကစၢ် အတၢ်ရ့လိာ်သး. လၢပှၤအံၣ်စရ့လးဖိအကျါ ကုၢ်လၢအမ့ၢ် ပှၤဧ့ၤဘြံၤဖိ, ကုၢ်လၢအမ့ၢ်ပှၤတခီဘီမုၢ်ဖိ ဒီးကုၢ်လၢအမ့ၢ် ပှၤတခီဘီမုၢ်ဖိလၢအဟဲအိၣ် ဖဲန့ၣ်တဖၣ်န့ၣ် အတၢ်အိၣ်သးလီၤဆီလိာ်အသးလီၤ. ကုၢ်လၢတမ့ၢ် ပှၤဧ့ၤဘြံၤဖိတဖၣ်န့ၣ် ဘၣ်ကဲကုၢ် စးထီၣ်လၢအပၢ် ဒီးတုၤလီၤလၢအဖိအစိၤလီၤ. (၃ မိၤ. ၂၅:၄၄-၄၆) မ့မ့ၢ်ကုၢ်လၢအမ့ၢ် ပှၤဧ့ၤဘြံၤဖိတဖၣ်န့ၣ် မ့ၢ်တုၤလၢနွံနံၣ်တနံၣ် မ့တမ့ၢ် နံၣ်ယဲၢ်ဆံပှဲၤထီၣ်အနံၣ်န့ၣ် ပှၤတဘၣ်ဃ့အဘူးအလဲဘၣ် ဒီးပှၤကဘၣ်ပျၢ်ထီၣ်ကွံာ် အဝဲသ့ၣ်လီၤ. ကုၢ်လၢအမ့ၢ် ပှၤဧ့ၤဘြံၤဖိတဂၤ ဖဲအဝဲကဲကုၢ် အဆၢကတီၢ် ပှၤကဘၣ်ရ့အီၤဒ် ပှၤမၤတၢ်ဖိလၢ အဒိးလဲအသးတဂၤအသိးလီၤ. (၂ မိၤ. ၂၁:၂; ၃ မိၤ. ၂၅:၁၀; ၅ မိၤ. ၁၅:၁၂) ပှၤဧ့ၤဘြံၤဖိတဂၤ မ့ၢ်လဲၤဆါလီၤအီၣ်အသးဒ် ကုၢ်တဂၤအသိး လၢပှၤတခီဘီမုၢ်ဖိ မ့တမ့ၢ် ပှၤလၢအဟဲအိၣ်လၢ အဝဲသ့ၣ်အကျါတဂၤဂၤအအိၣ်န့ၣ် အနီၢ်ကစၢ် မ့တမ့ၢ် ပှၤလၢအိၣ်ဒီးတၢ်ခွဲးတၢ်ယာ်လၢ ကပှ့ၤက့ၤအီၤမ့ၢ်အိၣ်န့ၣ် ပှၤပှ့ၤက့ၤအီၤ ကိးဆၢကိးကတီၢ်ဒဲး သ့ဝဲလီၤ. တၢ်ဒွးစ့လၢ ပှၤကပှ့ၤက့ၤအီၤအဂီၢ်န့ၣ် သန့ၤထီၣ်အသးလၢ အနံၣ်ယဲၢ်ဆံ မ့တမ့ၢ် နွံနံၣ်တနံၣ် ကပှဲၤထီၣ်အဂီၢ် ကလိၣ်ထဲလဲၣ်န့ၣ်လီၤ. (၃ မိၤ. ၂၅:၄၇-၅၂; ၅ မိၤ. ၁၅:၁၂) ကစၢ်တဂၤ မ့ၢ်ပျၢ်လီၤဝဲ အကုၢ်လၢအမ့ၢ် ပှၤဧ့ၤဘြံၤဖိတဂၤန့ၣ် ကဘၣ်ဟ့ၣ်လီၤဝဲ တၢ်ဟ့ၣ်ဒ်သိး ကမၤစၢၤအီၤလၢ ကသူၣ်ထီၣ်က့ၤဝဲ အတၢ်အိၣ်မူ ကန့ၢ်အဂီၢ်လီၤ. (၅ မိၤ. ၁၅:၁၃-၁၅) ကုၢ်တဂၤ မ့မ့ၢ်ပှၤလၢ အဆီဟံၣ်ဆီဃီဝံၤန့ၣ် ပှၤကဘၣ်ပျၢ်လီၤအီၤဃုာ်ဒီးအမါလီၤ. ဘၣ်ဆၣ် အကစၢ်မ့ၢ်ဟ့ၣ်ဒုးအဲၣ်အီၤအမါန့ၣ် (ဘၣ်သ့ၣ်သ့ၣ်ကမ့ၢ် ပှၤတခီဘီမုၢ်ဖိ, ပိာ်မုၣ်တဂၤလၢ တအိၣ်ဒီးတၢ်ခွဲးတၢ်ယာ်လၢ ကထူၣ်ဖျဲးထီၣ်ဖဲ နွံနံၣ်တနံၣ်န့ၣ်ဘၣ်) အဖိဒီးအမါန့ၣ် မ့ၢ်ဝဲအကစၢ်အတၢ်လီၤ. ဘၣ်ဆၣ် ကုၢ်လၢအမ့ၢ် ပှၤဧ့ၤဘြံၤဖိတဂၤ မ့ၢ်အဲၣ်ဒိးဆဲးအိၣ်ဒီး အကစၢ်န့ၣ် ပှၤကဘၣ်ပျံာ်ဖျိအနၢ်လၢ ထးပျံာ်လီၤ. အဝဲကကဲထီၣ်ကုၢ် တစိၤအသးလီၤ.—၂ မိၤ. ၂၁:၂-၆; ၅ မိၤ. ၁၅:၁၆, ၁၇.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၆ ၄/၁ ၃၁
ပှၤဖးလံာ်ဖိတဖၣ် အတၢ်သံကွၢ်
တၢ်မၤလိာ်လၢ ၂ မိၤၡ့ ၂၃:၁၉ အပူၤလၢ “ချီမဲာ်တဲးလဲးဖိ လၢအမိၢ်နုၢ်ထံပူၤတဂ့ၤ” န့ၣ် ပန့ၢ်ဘၣ်တၢ်မၤလိ မနုၤလဲၣ်.
လံာ်စီဆှံ ပာ်ဖျါထီၣ်ဝဲသၢဘျီလၢ ဘၣ်ဃးဒီး စီၤမိၤၡ့ အတၢ်မၤလိာ်အံၤန့ၣ် မၤစၢၤပှၤလၢ ပကနၢ်ပၢၢ် ယဟိဝၤယွၤ အတၢ်ထံၣ်လၢ ဘၣ်ဃးဒီး တၢ်လၢအကြၢးအဘၣ်, တၢ်လၢအတကြၢးတဘၣ်, ကစၢ်ယွၤ အတၢ်သးကညီၤ ဒီးအတၢ်အဲၣ်တၢ်ကွံလီၤ. တကးဒံးဘၣ် ပာ်ဖျါထီၣ်န့ၢ်ပှၤ ဖျိဖျိဖျါဖျါလၢ ကစၢ်ယွၤသးဘၣ်အၢဝဲ တၢ်ဘူၣ်တၢ်ဘါလၢ အကမၣ်တဖၣ်န့ၣ်လီၤ.—၂ မိၤၡ့ ၃၄:၂၆; ၅ မိၤၡ့ ၁၄:၂၁.
မဲာ်တဲးလဲးဖိ မ့တမ့ၢ် ဆၣ်ဖိကီၢ်ဖိအဂၤတဖၣ် ပှၤမ့ၢ်ချီအီၤဒီးအမိၢ်အနုၢ်ထံန့ၣ် မ့ၢ်တၢ်လၢ အထီဒါလိာ်အသးဒီး ယဟိဝၤယွၤ အတၢ်ရဲၣ်တၢ်ကျဲၤလၢ ဘၣ်ဃးဒီးန့ဆၢၣ်န့ၣ်လီၤ. ကစၢ်ယွၤဟ့ၣ်ဝဲ မိၢ်အနုၢ်ထံလၢ အဖိတဖၣ်ကန့ၢ်ဂံၢ်န့ၢ်ဘါ ဒီးကဒိၣ်ထီၣ်အဂီၢ်လီၤ. ပှၤကူၣ်ဘၣ်ကူၣ်သ့တဂၤတဲဝဲလၢ “ပှၤမ့ၢ်ချီဖိလၢ မိၢ်အနုၢ်ထံန့ၣ် မ့ၢ်ဒၣ်တၢ်တယူးယီၣ်ပာ်ကဲ တၢ်ရဲၣ်တၢ်ကျဲၤလၢ ကစၢ်ယွၤဒုးအိၣ်ထီၣ်ဝဲလၢ မိၢ်ပၢ် ဒီးဖိအဘၢၣ်စၢၤ အတၢ်ရ့လိာ်သးန့ၣ်လီၤ.”
တကးဒံးဘၣ် ပှၤတနီၤတဲဝဲလၢ ပှၤချီဖိလၢအမိၢ်အနုၢ်ထံန့ၣ် မ့ၢ်ဝဲတၢ်ဘူၣ်တၢ်ဘါကမၣ်တဖၣ် မၤဝဲဒ်သိးမူခိၣ်ကစူၤအဂီၢ်လီၤ. မ့မ့ၢ်ဒ်န့ၣ် ကစၢ်ယွၤဟ့ၣ်လီၤဝဲ တၢ်သိၣ်တၢ်သီအံၤန့ၣ် မ့ၢ်ဒ်သိး ကဒီသဒၢဝဲ ပှၤအံၣ်စရ့လးဖိတဖၣ်လၢ ထံကီၢ်လၢအခိၣ်အဃၢၤတဖၣ် အတၢ်ဘူၣ်တၢ်ဘါလုၢ်လၢ်လၢ အတကြၢးတဘၣ်တဖၣ်န့ၣ်လီၤ. စီၤမိၤၡ့ အတၢ်သိၣ်တၢ်သီ အိၣ်ဝဲလီၤတံၢ်လီၤဆဲးလၢ ပှၤအံၣ်စရ့လးဖိတဖၣ် တဘၣ်မၤဝဲဒ် ထံကီၢ်လၢအခိၣ်အဃၢၤတဖၣ် အတၢ်ဘူၣ်တၢ်ဘါ အလုၢ်အလၢ်အသိးဘၣ်.—၃ မိၤၡ့ ၂၀:၂၃.
လၢခံကတၢၢ်န့ၣ် ပသ့ၣ်ညါဘၣ်လၢ တၢ်သိၣ်တၢ်သီတခါအံၤ ပာ်ဖျါထီၣ်ဝဲ ယဟိဝၤယွၤ အတၢ်သးကညီၤန့ၣ်လီၤ. နီၢ်နီၢ် စီၤမိၤၡ့ အတၢ်သိၣ်တၢ်သီန့ၣ် အိၣ်ဒီးတၢ်မၤလိာ်လၢ အလီၤဂာ်လိာ်အသးလၢ ပှၤသုတမၤအၢမၤနး ဆၣ်ဖိကီၢ်ဖိတဖၣ်တဂ့ၤန့ၣ် အိၣ်ဝဲအါမး ဒီးဒီသဒၢဝဲ ဒ်သိးပှၤသုတမၤ တၢ်လၢအထီဒါလိာ်အသးဒီး န့ဆၢၣ်တဂ့ၤအဂီၢ်လီၤ. လၢစီၤမိၤၡ့ အတၢ်သိၣ်တၢ်သီအပူၤန့ၣ် ဆၣ်ဖိကီၢ်လၢ အဖှံလီၤတဒု အိၣ်ဒီးအမိၢ် မ့ၢ်တပှဲၤထီၣ်နွံသီဘၣ်န့ၣ် ပှၤတဘၣ်ဟ့ၣ်လုၢ်ထီၣ်အီၤဘၣ်. လၢတနံၤဃီအတီၢ်ပူၤန့ၣ် ပှၤတဘၣ်မၤသံ အဖိဒီးအမိၢ်တဘျီဃီဘၣ်. ပှၤတဘၣ်ဟံးန့ၢ် ထိၣ်မိၢ်ပှၢ် ဃုာ်ဒီးအဒံၣ် မ့တမ့ၢ် အဖိတဖၣ် လၢထိၣ်အသွံပူၤဘၣ်.—၃ မိၤၡ့ ၂၂:၂၇, ၂၈; ၅ မိၤၡ့ ၂၂:၆, ၇.
ပသ့ၣ်ညါဘၣ်လၢ စီၤမိၤၡ့ အတၢ်သိၣ်တၢ်သီန့ၣ် တမ့ၢ်ထဲလၢ တၢ်ပာ်ဖှိၣ်တၢ်မၤလိာ် ဒီးတၢ်တြီဃာ်အဂီၢ်ဘၣ်. တၢ်သိၣ်တၢ်သီတဖၣ်အံၤ ကဲဘျုးဝဲအါမးလီၤ. လၢအကျါတခါန့ၣ် မၤစၢၤပှၤလၢပကမၤဂ့ၤထီၣ် ပတၢ်ဆိကမိၣ်လၢ ဘၣ်ဃးဒီးပတၢ်သကဲာ်ပဝး ဒီးတၢ်အံၤပာ်ဖျါထီၣ်က့ၤဝဲ ယဟိဝၤယွၤ အတၢ်ဂ့ၤတၢ်ဝါလၢ အလီၤကမၢကမၣ်တဖၣ်လီၤ.—စံးထီၣ်ပတြၢၤ ၁၉:၇-၁၁.
လါယူၤလံ ၁၉-၂၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၅ မိၤၡ့ ၁၆-၁၈
“တၢ်ဟံးစုနဲၣ်ကျဲလၢ တၢ်စံၣ်ညီၣ်တၢ် တီတီလိၤလိၤအဂီၢ်”
it-1 ၃၄၃ ¶၅
မဲာ်ဘျီၣ်
တၢ်စံၣ်ညီၣ်တတီတလိၤ ခီဖျိလၢ တၢ်အီၣ်ကဘျံးကဘျၣ်အဃိန့ၣ် ဘၣ်တၢ်ထိၣ်သတြီၤအီၤဒီး ပှၤမဲာ်ဘျီၣ်လီၤ. စီၤမိၤၡ့ အတၢ်သိၣ်တၢ်သီ ဟ့ၣ်ပလီၢ်ဝဲလၢ တၢ်အီၣ်ကျိၣ်အီၣ်စ့, တၢ်တူၢ်လိာ်တၢ်ဟ့ၣ် ဒီးတၢ်ကွၢ်တလီၤပှၤဂၤန့ၣ် မၤဘျီၣ်ဝဲ စံၣ်ညီၣ်ကွီၢ်တဖၣ်အမဲာ် လၢဘၣ်ဃးဒီး တၢ်စံၣ်ညီၣ်တကပၤ ဒီးကဲထီၣ်တၢ်တြီမၤတံာ်တာ်လၢ အဝဲသ့ၣ်ကစံၣ်ညီၣ်တၢ် တီတီလိၤလိၤအဂီၢ်လီၤ. “တၢ်ခိၣ်ဖးမၤဘျီၣ်မဲာ် ပှၤလၢအမဲာ်ဆးတဖၣ်အသး” (၂ မိၤ. ၂၃:၈) ဒီး “ခိၣ်ဖးန့ၣ်မၤဘျီၣ်ပှၤကူၣ်တၢ်သ့အမဲာ်” လီၤ. (၅ မိၤ. ၁၆:၁၉) စံၣ်ညီၣ်ကွီၢ်တဂၤ မ့မ့ၢ်ပှၤတီပှၤလိၤ ဒီးအိၣ်ဒီးတၢ်ကူၣ်သ့ဒၣ်လဲာ် အဝဲမ့ၢ်ဟံးန့ၢ်ဝဲ တၢ်ဟ့ၣ်လၢဘၣ်ဃးဒီး တၢ်မူးတၢ်ရၢ်အဂီၢ်န့ၣ် လၢတၢ်ပာ်သူၣ်ပာ်သးအပူၤမ့ၢ်ဂ့ၤ လၢတၢ်တပာ်သူၣ်ပာ်သးအပူၤမ့ၢ်ဂ့ၤ မၤဘၣ်ဒိအီၤသ့ဝဲလီၤ. ကစၢ်ယွၤ အတၢ်မၤလိာ်ပာ်ဖျါထီၣ်ဝဲလၢ တမ့ၢ်ထဲလၢတၢ်အီၣ်ကျိၣ်အီၣ်စ့တခါဘၣ် သးအတၢ်တူၢ်ဘၣ်စ့ၢ်ကီး မၤဘျီၣ်ပှၤမဲာ်ချံသ့လီၤ. “ကွၢ်မဲာ်ပှၤဖှီၣ်ဖိယာ်ဖိတဂ့ၤ. ဒီးပာ်လၤကပီၤပှၤအဒိၣ်တဂ့ၤ.” (၅ မိၤ. ၁၉:၁၅) လၢတၢ်န့ၣ်အဃိ စံၣ်ညီၣ်ကွီၢ်တဂၤ တဘၣ်စံၣ်ညီၣ်ဝဲ ပှၤကဲဒိၣ်တဂၤ ဒ်အသးအတၢ်တူၢ်ဘၣ်မ့ၢ်ဂ့ၤ ပှၤဂၤအတၢ်ဆီၣ်သနံးအဃိ မ့ၢ်ဂ့ၤန့ၣ်ဘၣ်.—၂ မိၤ. ၂၃:၂, ၃.
it-2 ၅၁၁ ¶၇
နီၣ်ဂံၢ်, နီၣ်ဂံၢ်ဖျၢၣ်
ခံ. နီၣ်ဂံၢ်ခံန့ၣ် ပထံၣ်ဘၣ်အီၤခဲအံၤခဲအံၤလၢ တၢ်ဂ့ၢ်လၢအဘၣ်ဃးဒီး သဲစးတဖၣ်လီၤ. ပှၤအုၣ်အသးမ့ၢ်အိၣ်ခံဂၤန့ၣ် တၢ်အုၣ်အသးတခါအံၤ ဂၢၢ်ကျၢၤဝဲလီၤ. ဒ်သိးပှၤကပာ်ဂၢၢ်ပာ်ကျၢၤ တၢ်အမူးလၢ စံၣ်ညီၣ်ကွီၢ်အမဲာ်ညါအဂီၢ် ပှၤလိၣ်ဘၣ်ပှၤအုၣ်အသး ခံဂၤသၢဂၤလီၤ. တၢ်ဟံးစုနဲၣ်ကျဲၤအံၤ ဘၣ်တၢ်မၤထွဲအီၤလၢ ခရံာ်ဖိတၢ်အိၣ်ဖှိၣ်အပူၤစ့ၢ်ကီးလီၤ. (၅ မိၤ. ၁၇:၆; ၁၉:၁၅; မး. ၁၈:၁၆; ၂ ကရံၣ် ၁၃:၁; ၁ တံၤ. ၅:၁၉; ဧ့ၤ. ၁၀:၂၈) ကစၢ်ယွၤ မၤထွဲဝဲ တၢ်ဟံးစုနဲၣ်ကျဲအံၤ ဖဲအဝဲဆှၢလီၤဝဲအဖိခွါ ဒ်တၢ်အုၣ်က့ၤခီၣ်က့ၤ ကစၢ်အသိးအခါန့ၣ်လီၤ. ယ့ၣ်ၡူးတဲဝဲဒ်အံၤ “တကးဒံးဘၣ် လၢသု တၢ်သိၣ်တၢ်သီအပူၤန့ၣ် တၢ်ကွဲးအသး အိၣ်ဝဲစ့ၢ်ကီးလၢ ‘ပှၤခံဂၤ အတၢ်အုၣ်အသးန့ၣ် မ့ၢ်ဝဲတီဝဲလီၤ.’ ယမ့ၢ်ပှၤတဂၤလၢ အုၣ်အသးလၢ ယနီၢ်ကစၢ်အဂ့ၢ် ဒီးပၢ်လၢ အဆှၢလီၤယၤန့ၣ် အုၣ်အသးလၢ ယဂ့ၢ်လီၤ.”—ယိၤ. ၈:၁၇, ၁၈.
it-2 ၆၈၅ ¶၆
ပှၤလုၢ်တၢ်ဒိၣ်
ပှၤလုၢ်တၢ်ဒိၣ်တဖၣ်န့ၣ် ဘၣ်တဲနၢ်ပၢၢ်ပှၤဂၤလၢ ကစၢ်ယွၤအတၢ်သိၣ်တၢ်သီလီၤ. အဝဲသ့ၣ်ဘၣ်မၤဝဲ မူဒါလၢအဘၣ်ဃးဒီး တၢ်မူးတၢ်ရၢ်တကပၤ စ့ၢ်ကီးလီၤ. ဝ့ၢ်လၢအိၣ်ဒီး ပှၤလုၢ်တၢ်ဒိၣ်တဖၣ်န့ၣ် အဝဲသ့ၣ်ဘၣ်မၤစၢၤဝဲ စံၣ်ညီၣ်ကွီၢ်တဖၣ်လီၤ. တၢ်မူးတၢ်ရၢ်လၢအကီအခဲ လၢလီၢ်ကဝီၤ စံၣ်ညီၣ်ကွီၢ်တဖၣ် မၤဝဲမ့ၢ်တန့ၢ်ဘၣ်န့ၣ် အဝဲသ့ၣ် ဘၣ်ပာ်ဖှိၣ်မၤသကိးတၢ်လီၤ. (၅ မိၤ. ၁၇:၈, ၉) တၢ်အမူးလၢဘၣ်ဃးဒီး ပှၤဃုပှၤလၢအမၤသံတၢ်တဂၤ မ့ၢ်တဘၣ်ဘၣ်န့ၣ် ပှၤလုၢ်တၢ်ဒိၣ် ဒီးဝ့ၢ်အပှၤသူၣ်က့သးပှၢ်တဖၣ် ဘၣ်ပာ်ဖှိၣ်ထီၣ်အသး ဒီးဆၢတဲာ်ဝဲတၢ်ဂ့ၢ်အံၤလီၤ. ဒ်သိးဝ့ၢ်ကကဆှီအဂီၢ် အဝဲသ့ၣ် ကဘၣ်မၤဝဲဒ် တၢ်ဟံးစုနဲၣ်ကျဲအိၣ်ဝဲအသိးလီၤ. (၅ မိၤ. ၂၁:၁, ၂, ၅) ပိာ်ခွါလၢအသးက့ၣ်တဂၤ မ့ၢ်တဲဝဲလၢ အမါအဲၣ်ဘၢအီၤန့ၣ် ကဘၣ်လဲၤကိးအမါဆူ ပှၤလုၢ်တၢ်ဒိၣ်အအိၣ် ဒီးပှၤလုၢ်တၢ်ဒိၣ်အံၤ ကဘၣ်မၤဝဲဒ် တၢ်ဟံးစုနဲၣ်ကျဲလၢ အပာ်ဖျါထီၣ်ဝဲ ယဟိဝၤယွၤ သ့ၣ်ညါဝဲလၢ ပိာ်မုၣ်အံၤ အတၢ်ကမၣ်အိၣ်ဧါ တအိၣ်ဧါန့ၣ်လီၤ. (၄ မိၤ. ၅:၁၁-၃၁) အဝဲသ့ၣ် ကဘၣ်ပာ်ကဲဝဲ ပှၤလုၢ်တၢ်ဒိၣ် ဒီးစံၣ်ညီၣ်ကွီၢ်တဖၣ် အတၢ်ဆၢတဲာ်လီၤ. အဝဲသ့ၣ်မ့ၢ်တဒိကနၣ်ဝဲဘၣ်န့ၣ် ကဘၣ်တၢ်မၤသံအီၤလီၤ.—၄ မိၤ. ၁၅:၃၀; ၅ မိၤ. ၁၇:၁၀-၁၃.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1 ၇၈၇
တၢ်ဟီထီၣ်ကွံာ်
ဒ်တၢ်သိၣ်တၢ်သီအိၣ်ဝဲအသိး ပှၤကဟီထီၣ်ကွံာ် ပှၤတဂၤအဂီၢ် ပှၤအုၣ်အသးကဘၣ်အိၣ်ဝဲ အစှၤကတၢၢ်ခံဂၤလီၤ. (၅ မိၤ. ၁၉:၁၅) ပှၤအုၣ်အသးခံဂၤအံၤ ကဘၣ်ကွံာ်ဝဲ ပှၤလၢအမၤ တၢ်ကမၣ်တဂၤလၢလၢၢ် လၢညါလီၤ. (၅ မိၤ. ၁၇:၇) တၢ်အံၤပာ်ဖျါထီၣ်ဝဲလၢ အဝဲသ့ၣ်အိၣ်ဒီး တၢ်သူၣ်ဆူၣ်သးဆူၣ်လၢ ကဒိကနၣ် ကစၢ်ယွၤအတၢ်မၤလိာ် ဒီးပှၤအံၣ်စရ့လးဖိ အတၢ်အိၣ်ဖှိၣ် ကဆဲးအိၣ်ကဆှဲကဆှီအဂီၢ်လီၤ. ဒီးမၤစၢၤစ့ၢ်ကီး အဝဲသ့ၣ်လၢ သုတအုၣ်အသးလၢ အကမၣ်, တလီၤတံၢ်လီၤဆဲး ဒီးချ့ချ့တဂ့ၤအဂီၢ်လီၤ.
it-1 ၅၁၉ ¶၄
လၢခရံာ်ဖိတၢ်အိၣ်ဖှိၣ်အပူၤန့ၣ် အိၣ်ဒီးစံၣ်ညီၣ်ကွီၢ်တဖၣ်ဧါ
ခရံာ်ဖိတၢ်အိၣ်ဖှိၣ်, လၢခရံာ်ဖိတၢ်အိၣ်ဖှိၣ်အပူၤန့ၣ် ပတအိၣ်ဒီး တၢ်စိတၢ်ကမီၤလၢ ပကစံၣ်ညီၣ်တၢ်ဒ်ရူအသိး သနာ်က့ ခရံာ်ဖိတဂၤ မ့ၢ်မၤတၢ်ကမၣ်န့ၣ် ပှၤသိၣ်ဃီၣ်အီၤအခွဲးအိၣ် ဒီးပှၤနီၣ်ဟးထီၣ်အီၤလၢ တၢ်အိၣ်ဖှိၣ်အပူၤသ့ဝဲလီၤ. လၢတၢ်န့ၣ်အဃိ တၢ်မၢဖိပီလူးတဲဝဲ တၢ်အိၣ်ဖှိၣ်တဖၣ်လၢ ပှၤလၢအိၣ်ဒီးမူဒါလၢ တၢ်အိၣ်ဖှိၣ်ပူၤတဖၣ်န့ၣ် ကဘၣ်စံၣ်ညီၣ်ဝဲ ပှၤလၢတၢ်အိၣ်ဖှိၣ်အပူၤတဖၣ်လီၤ. (၁ ကရံၣ်. ၅:၁၂, ၁၃) ဖဲတၢ်မၢဖိပီလူး ဒီးစီၤပ့းတရူး ကွဲးဝဲလံာ်လၢ တၢ်အိၣ်ဖှိၣ် ဒီးပှၤလၢအကွၢ်ထွဲတၢ်တဖၣ်အအိၣ်အခါ ပာ်ဖျါထီၣ်ဝဲလၢ တၢ်အိၣ်ဖှိၣ်သးပှၢ်တဖၣ်န့ၣ် ကဘၣ်ကွၢ်ထွဲဝဲ တၢ်အိၣ်ဖှိၣ်ဖိတဖၣ် အတၢ်ရ့လိာ်သးဒီး ကစၢ်ယွၤအိၣ်ဒ်လဲၣ်. ဒီးကဘၣ်မၤစၢၤ ဒီးသိၣ်က့ၤသီက့ၤဝဲ ပှၤလၢအလဲၤကျဲကမၣ်တဖၣ်လီၤ. (ထိၣ်သတြီၤဒီး ၂ တံၤ. ၄:၂; ၁ ပ့း. ၅:၁, ၂; ကလၤ. ၆:၁) ပှၤလၢအမၤလီၤဖးတၢ်တဖၣ်န့ၣ် တချုးလၢတၢ်အိၣ်ဖှိၣ်ဟံးအီၤအရ့ဒံးဘၣ်န့ၣ် ပှၤဟ့ၣ်ပလီၢ်ဆိအီၤ တဘျီခံဘျီလီၤ. (တံ. ၃:၁၀, ၁၁) ဘၣ်ဆၣ်အဝဲမ့ၢ်ဆဲးမၤ တၢ်ကမၣ်ဒံးန့ၣ် ကဘၣ်တၢ်ဟီထီၣ်ကွံာ်အီၤလၢ တၢ်အိၣ်ဖှိၣ်အပူၤလီၤ. တၢ်သိၣ်ဃီၣ်ဒ်အံၤန့ၣ် ဒုးသ့ၣ်ညါဝဲပှၤလၢအမၤကမၣ်တၢ်တဂၤလၢ တၢ်အိၣ်ဖှိၣ်န့ၣ်တတူၢ်လိာ်ဝဲ ပှၤလၢအမၤကမၣ်တၢ်တဖၣ်ဘၣ်. (၁ တံၤ. ၁:၂၀) စီၤပီလူးဟံးစုနဲၣ်ကျဲဝဲ ပိာ်ခွါလၢအိၣ်ဒီးမူဒါလၢ တၢ်အိၣ်ဖှိၣ်ပူၤတဖၣ်လၢ ကပာ်ဖှိၣ်ထီၣ်အသး ဒီးဒိကနၣ်ဝဲ တၢ်ဂ့ၢ်ဒ်အံၤတဖၣ် ဒ်စံၣ်ညီၣ်ကွီၢ်တဖၣ်အသိးလီၤ. (၁ ကရံၣ်. ၅:၁-၅; ၆:၁-၅) အဝဲသ့ၣ် ကတူၢ်လိာ်ဝဲလၢ တၢ်ပာ်ဒ့ၣ်ပာ်ကမၣ်တခါအံၤ မ့ၢ်အမ့ၢ်ဧါ တမ့ၢ်ဧါအဂီၢ် ပှၤအုၣ်အသးကဘၣ်အိၣ် ခံဂၤ မ့တမ့ၢ် သၢဂၤ, အဝဲသ့ၣ်တဘၣ်စံၣ်ညီၣ်ဆိတၢ်ဘၣ် ဒီးတဘၣ်ကွၢ်မဲာ်တၢ်စ့ၢ်ကီးဘၣ်.—၁ တံၤ. ၅:၁၉, ၂၁.
လါယူၤလံ ၂၆–လါအီကူး ၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၅ မိၤၡ့ ၁၉-၂၁
“ပှၤဟီၣ်ခိၣ်ဖိအသးသမူန့ၣ် မ့ၢ်တၢ်လုၢ်ဒိၣ်ပှ့ၤဒိၣ်လၢ ယဟိဝၤယွၤအဂီၢ်”
ကွၢ်လိမၤဒိး ယဟိဝၤယွၤ အတၢ်စံၣ်ညီၣ်တီ ဒီးအတၢ်သးကညီၤတက့ၢ်
၄ ယဟိဝၤယွၤ ရဲၣ်လီၤကျဲၤလီၤဝဲ ဝ့ၢ်ဃုဖျၢၣ်ဒ်သိး ပှၤလဲၤဃ့ၢ်ပူၤဖျဲးအသး ကညီအဂီၢ်လီၤ. အဝဲမၢပှၤအံၣ်စရ့လးဖိတဖၣ် ပာ်လီၤတၢ်ပူၤဖျဲးအဝ့ၢ်လၢ ထံကျိယၢ်ဒ့ၣ်အကပၤ တခီသၢဖျၢၣ်တခီသၢဖျၢၣ်န့ၣ်လီၤ. ဘၣ်မနုၤအဃိလဲၣ်. ဒ်သိးပှၤလၢအဃ့ၢ်ပူၤဖျဲးအသးတဖၣ် ကလဲၤဘၣ်ဝဲညီညီ ဒီးကတုၤချ့ချ့အဂီၢ်လီၤ. (၄ မိၤၡ့ ၃၅:၁၁-၁၄) ဒီးကျဲလၢအလဲၤဆူ တၢ်ပူၤဖျဲးအဝ့ၢ်တဖၣ်စ့ၢ်ကီး အဝဲသ့ၣ် ကဘၣ်မၤဝဲ ဂ့ၤဂ့ၤဘၣ်ဘၣ်လီၤ. (၅ မိၤၡ့ ၁၉:၃) ဒ်ပှၤယူဒၤဖိအလုၢ်အလၢ်အိၣ်ဝဲသိး လၢကျဲန့ၣ်အဝဲသ့ၣ် ဘၣ်ပာ်လီၤဝဲတၢ်ပနီၣ် ဒ်သိးကမၤစၢၤ ပှၤလၢအဃ့ၢ်ပူၤဖျဲးအသးတဖၣ် လဲၤဆူတၢ်ပူၤဖျဲးအဝ့ၢ်ကဘၣ်အဂီၢ်လီၤ. မ့ၢ်လၢပှၤအံၣ်စရ့လးဖိတဖၣ် အိၣ်ဒီးတၢ်ပူၤဖျဲးအဝ့ၢ်အဃိ အဝဲသ့ၣ်မ့ၢ်မၤသံဘၣ် ပှၤတဂၤဂၤလၢ တၢ်တပာ်သူၣ်ပာ်သးအပူၤန့ၣ် အဝဲသ့ၣ်တလိၣ်လဲၤဃ့ၢ်ပူၤဖျဲးအသးလၢ ထံကီၢ်အဂၤလၢကလ့ပစီအီၤလၢ ကဘူၣ်ထီၣ်ဘါထီၣ် ယွၤလၢအကမၣ်န့ၣ်ဘၣ်.
ကွၢ်လိမၤဒိး ယဟိဝၤယွၤ အတၢ်စံၣ်ညီၣ်တီ ဒီးအတၢ်သးကညီၤတက့ၢ်
၉ တၢ်ပူၤဖျဲးအဝ့ၢ် အတၢ်ရဲၣ်တၢ်ကျဲၤန့ၣ် မ့ၢ်ဒ်သိးကဒီသဒၢဝဲ ပှၤအံၣ်စရ့လးဖိလၢ အမၤသံဘၣ်ပှၤဂၤလၢ တၢ်တပာ်သူၣ်ပာ်သးအပူၤတဖၣ်န့ၣ်လီၤ. (၅ မိၤၡ့ ၁၉:၁၀) ယဟိဝၤယွၤ ပာ်လုၢ်ပာ်ပှ့ၤဝဲသးသမူ ဒီးသးဟ့ဝဲတၢ်မၤသံမၤဝီလီၤ. (ကတိၤဒိ ၆:၁၆, ၁၇) ပှၤတဂၤမ့ၢ်မၤသံဘၣ်ပှၤဂၤလၢ တၢ်တပာ်သူၣ်ပာ်သးအပူၤဒၣ်လဲာ် ကစၢ်ယွၤတပာ်ဝဲလၢ တၢ်ဂ့ၢ်ဆံးဆံးဖိဘၣ် မ့ၢ်လၢအမ့ၢ်ယွၤလၢအတီအလိၤ ဒီးအစီအဆှံတဂၤအဃိလီၤ. ပှၤလၢအမၤသံဘၣ်ပှၤဂၤလၢ တၢ်တပာ်သူၣ်ပာ်သးအပူၤတဂၤ ဒိးန့ၢ်ဘၣ်ဝဲတၢ်သးကညီၤသ့လီၤ. ဘၣ်ဆၣ်အဝဲကဘၣ်လဲၤတဲဘၣ် ပှၤသူၣ်က့သးပှၢ်တဖၣ်လၢ အတၢ်ဂ့ၢ်တၢ်ကျိၤလီၤ. ပှၤလၢအမၤသံတၢ်တဂၤအံၤ ပှၤသူၣ်က့သးပှၢ်တဖၣ် မ့ၢ်စံၣ်ညီၣ်ဝဲလၢ အဝဲမၤသံဘၣ်ပှၤဂၤလၢ တၢ်တပာ်သူၣ်ပာ်သးအပူၤန့ၣ် အဝဲကဘၣ်အိၣ်လၢ တၢ်ပူၤဖျဲးအဝ့ၢ်ပူၤ တုၤလၢပှၤလုၢ်တၢ်အခိၣ်သံဝဲတစုလီၤ. ဘၣ်သ့ၣ်သ့ၣ် ပှၤလၢအဃ့ၢ်ပူၤဖျဲးအသးတဂၤ ကဘၣ်အိၣ်လၢ တၢ်ပူၤဖျဲးအဝ့ၢ်ပူၤ တစိၤအသးလီၤ. တၢ်ရဲၣ်တၢ်ကျဲၤအံၤ ဒုးသ့ၣ်ညါဝဲ ပှၤအံၣ်စရ့လးဖိခဲလၢာ်လၢ သးသမူန့ၣ်မ့ၢ်တၢ်လၢအလုၢ်ဒိၣ်ပှ့ၤဒိၣ်လီၤ. ဒ်သိးကမၤလၤကပီၤ ပှၤလၢအဟ့ၣ်သးသမူတဂၤကသ့အဂီၢ် အဝဲသ့ၣ်ကဘၣ်ဟးဆှဲး တၢ်လၢကကဲထီၣ် တၢ်ဘၣ်ယိၣ်လၢ ပှၤဂၤအသးသမူအဂီၢ်န့ၣ်လီၤ.
it-1 ၃၄၄
တၢ်သွံၣ်
ကစၢ်ယွၤ ဟ့ၣ်ပှၤသးသမူလၢ ပကသးခုအဂီၢ်လီၤ. ပှၤတဂၤဂၤမ့ၢ်မၤသံဘၣ် ပှၤဂၤန့ၣ် အဝဲကဘၣ်ၡဲစရီဒီး ကစၢ်ယွၤလီၤ. တၢ်ဂ့ၢ်အံၤန့ၣ် အိၣ်ဖျါဝဲဖဲ ကစၢ်ယွၤတဲတၢ်ဒီး စီၤကၤယံၣ်အခါန့ၣ်လီၤ. အဝဲတဲဝဲလၢ “နပုၢ်အသွံၣ်အသီၣ်ကိးထီၣ်ယၤလၢ ဟီၣ်ခိၣ်လာ်လီၤ.” (၁ မိၤ. ၄:၁၀) ပှၤတဂၤမ့ၢ်သးဟ့ အဒီပုၢ်ဝဲၢ် ဒီးမ့ၢ်အဲၣ်ဒိးဝဲလၢအသံ, မ့ၢ်တဲဟးဂီၤအီၤ မ့တမ့ၢ် မ့ၢ်အုၣ်အသးကဘျံးကဘျၣ်လၢအဂီၢ် ဒီးမ့ၢ်ဒုးအိၣ်ထီၣ် တၢ်လီၤဘၣ်ယိၣ်လၢ အသးသမူအဂီၢ်န့ၣ် တၢ်သွံၣ်ကလီၤဘၣ်က့ၤလၢ အဝဲအလိၤလီၤ.—၃ မိၤ. ၁၉:၁၆; ၅ မိၤ. ၁၉:၁၈-၂၁; ၁ ယိၤ. ၃:၁၅.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1 ၅၁၈ ¶၁
ရူ, ဘၣ်ဃးဒီးတၢ်စံၣ်ညီၣ်
တၢ်စံၣ်ညီၣ်အလီၢ်န့ၣ် အိၣ်ဝဲဖဲဝ့ၢ်အပဲတရီအခီၣ်ထံးလီၤ. (၅ မိၤ. ၁၆:၁၈; ၂၁:၁၉; ၂၂:၁၅, ၂၄; ၂၅:၇; ရူၤ. ၄:၁) “ပဲတရီ” န့ၣ် အဲၣ်ဒိးတဲဝဲ တၢ်လီၢ်ဖးလဲၢ်လၢ အိၣ်လၢဝ့ၢ်အကိပူၤတကပၤလီၤ. တၢ်လီၢ်ဖးလဲၢ်လၢ ပှၤဂီၢ်မုၢ်ဟဲပာ်ဖှိၣ်ထီၣ်အသးအံၤန့ၣ် ပှၤဖးဝဲ တၢ်သိၣ်တၢ်သီ ဒီးပှၤဘိးဘၣ်သ့ၣ်ညါ တၢ်ဘျၢတဖၣ်လီၤ. (ဃ့. ၈:၁-၃) ခီဖျိလၢ ပှၤနုာ်လီၤဟးထီၣ်လၢ ဝ့ၢ်အပဲတရီအံၤ ဒီတနံၤကျၢၤအဃိ ပှၤလၢအမၤတၢ်ပနံာ်တၢ်ကၤလၢ ဘၣ်ဃးဒီး ဟီၣ်ခိၣ်လီၢ် မ့တမ့ၢ် တၢ်အဂၤတဖၣ်န့ၣ် ဃုဝဲပှၤအုၣ်အသးလၢ ကမၤဝဲ တၢ်ဂ့ၢ်လၢအဖိးသဲစး န့ၢ်ဝဲညီညီဖိလီၤ. စံၣ်ညီၣ်ကွီၢ်လၢ အစံၣ်ညီၣ်တၢ်လၢ ပဲတရီအမဲာ်ညါတဖၣ်န့ၣ် မ့ၢ်လၢပှၤသ့ၣ်ညါအဝဲသ့ၣ် အါအဃိ ကဘၣ်ပလီၢ်အသးလၢ ကစံၣ်ညီၣ်တၢ် တီတီလိၤလိၤအဂီၢ်လီၤ. ဒီးလၢပဲတရီအမဲာ်ညါန့ၣ် အိၣ်စ့ၢ်ကီးဒီး တၢ်လီၢ်လၢ စံၣ်ညီၣ်ကွီၢ်တဖၣ် ကဆ့ၣ်နီၤဒီး စံၣ်ညီၣ်တၢ်အဂီၢ်လီၤ. (ဘး. ၂၉:၇) စီၤၡမူၤအ့လးန့ၣ် “စံၣ်ညီၣ်အံၣ်စရ့လးလၢ” ဝ့ၢ်ရၤမါ တကးဒံးဘၣ်လၢ ဘ့ၤသ့လး, ကံးလကၤလး ဒီးမံးစပၤန့ၣ်လီၤ.—၁ မူၤ. ၇:၁၆, ၁၇.
လါအီကူး ၂-၈
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၅ မိၤၡ့ ၂၂-၂၃
“ယဟိဝၤယွၤ သူၣ်အိၣ်သးအိၣ်ဝဲ ဆၣ်ဖိကီၢ်ဖိတဖၣ်န့ၣ် တၢ်မၤလိာ် ပာ်ဖျါထီၣ်ဝဲဒ်လဲၣ်”
it-1 ၃၇၅-၃၇၆
တၢ်ဝံတၢ်ယိး
လၢပျၢၤန့ၣ် ပှၤသူဆၣ်ဖိကီၢ်ဖိတဖၣ်လၢ ပှၤကစိာ်ထီၣ်စိာ်လီၤတၢ်အဂီၢ်လီၤ. ဒီးတၢ်မၤလိာ် အိၣ်ဝဲလၢ ပှၤအံၣ်စရ့လးဖိတဂၤ မ့ၢ်ထံၣ်ဝဲ ပှၤလၢအသးဟ့အီၤတဂၤ အကသ့ၣ်ယီၤဃံၢ် ဒီးတၢ်ဘိၣ်မ့ၢ်အိၣ်လၢအလိၤန့ၣ် ကဘၣ် “မၤစၢၤအီၤသပှၢ်တၢၢ်” လီၤ. (၂ မိၤ. ၂၃:၅) တၢ်ဖိတၢ်လံၤလၢ ဆၣ်ဖိကီၢ်ဖိတဒု စိာ်ဝဲန့ၢ်န့ၣ် ပှၤကိးအီၤလၢ တဒုအဂီၢ် “ခံဒု” အဂီၢ်လီၤ.—၂ စီၤပၤ. ၅:၁၇.
it-1 ၆၂၁ ¶၁
လံာ် ၅ မိၤၡ့
လံာ် ၅ မိၤၡ့ န့ၣ်ပာ်ဖျါထီၣ်ဝဲလၢ ပှၤကဒိသူၣ်ဒိသးန့ၢ်တၢ်လၢ ဆၣ်ဖိကီၢ်ဖိတဖၣ်အဂီၢ်လီၤ. ပှၤအံၣ်စရ့ဖးဖိတဖၣ် ဘၣ်တၢ်တြီဃာ်အဝဲသ့ၣ်လၢ မ့ၢ်ထံၣ်ဝဲ ထိၣ်အသွံန့ၣ် တဘၣ်ဟံးန့ၢ်ဝဲ ထိၣ်ဖိဃုာ် ဒီးအမိၢ်ဘၣ်. တၢ်မၤလိာ်အံၤမ့ၢ်ဒ်သိး ပှၤသုတမၤဘၣ်ဒိ ထိၣ်အမိၢ်လၢအကဟုကယာ်အဖိ တဂ့ၤအဂီၢ်လီၤ. ပှၤဟံးန့ၢ်ထိၣ်ဖိတဖၣ် မ့ၢ်သ့သနာ်က့ ထိၣ်အမိၢ်န့ၣ် ပှၤကဘၣ်ပျၢ်လီၤကွံာ်အီၤလီၤ. ထဲန့ၢ်မးထိၣ်အမိၢ်န့ၣ် ကဖးထီၣ်အဖိ လၢခံတဖၣ်ကသ့ဝဲလီၤ. (၅ မိၤ. ၂၂:၆, ၇) ဒ်သိးပှၤကသးကညီၤ ဆၣ်ဖိကီၢ်ဖိလၢ အဂံၢ်စၢ်တဖၣ်အဂီၢ် ပှၤတဘၣ်ထဲၣ်တၢ်လၢ ဂီၤဖံးဒီးကသ့ၣ်ယီၤဘၣ်. (၂၂:၁၀) ဖဲပှၤယီၢ်ဘုအဆၢကတီၢ် ပှၤတဘၣ်ဖျီၣ်ဃာ် ကျီၣ်အထးခိၣ်ဘၣ်. ဘၣ်မနုၤအဃိလဲၣ်န့ၣ် ကျီၣ်တဖၣ်အံၤ ဘၣ်သူဝဲအဂံၢ်အဘါ ဒီးဘၣ်ယီၢ်ဘုအဃိ ဖဲအဝဲသ့ၣ် သၣ်ဝံၤအဆၣ်အဆၢကတီၢ် မ့ၢ်တအီၣ်ဘၣ်အဆၣ်န့ၣ် လီၤဂာ်ဒ်သိး ပှၤမၤအၢမၤနးအီၤလီၤ.—၂၅:၄.
တၢး၀၃ ၁၀/၁၅ ၃၂ ¶၁-၂
“သုတဘၣ်ယိး နီၣ်ယိးဘိဖုၣ်ထံၣ်ဖုၣ်ထီတဂၤ”
ဒ်နထံၣ်ဘၣ်အသိး ပမ့ၢ်မၢအီၣ် ကီၤလၤအူး ဒီးဂီၤဖံး ဒ်သိးသိးလၢကထဲၣ်တၢ်အဂီၢ်န့ၣ် တညီလၢအဝဲသ့ၣ်အဂီၢ်ဘၣ်. နီၣ်ယိးဘိန့ၣ် ပှၤမၤအီၤလၢ ဆၣ်ဖိကီၢ်ဖိလၢ အမိၢ်ပှၢ် ဒီးအဂံၢ်အဘါ ထဲသိးလိာ်အသးခံဒုအဂီၢ်လီၤ. အဃိ အဝဲသ့ၣ် ကဘၣ်ဒိဝဲ ခံဒုလၢာ်လီၤ. ကစၢ်ယွၤန့ၣ် ကွၢ်န့ၢ်တၢ်လၢ ဆၣ်ဖိကီၢ်ဖိလၢ အယိးတၢ်ဃၢတဖၣ်အဂီၢ် ဒီးတဲဝဲ ပှၤအံၣ်စရ့လးဖိတဖၣ်လၢ “နတဘၣ်ကွးထဲၣ်လၢ ဂီၤဖံးဒီးကသ့ၣ်ယီၤတပူၤဃီဘၣ်.” (၅ မိၤၡ့ ၂၂:၁၀) တၢ်ဟံးစုနဲၣ်ကျဲအံၤ ဘၣ်ထွဲလိာ်အသးဒီး ဂီၤဖံး ဒီးကီၤလၤအူး စ့ၢ်ကီးလီၤ.
ညီနုၢ်န့ၣ် ပှၤထူစံာ်ဖိတဖၣ် တမၤနးဝဲအဆၣ်ဖိကီၢ်ဖိတဖၣ် ဒ်န့ၣ်ဘၣ်. ဘၣ်ဆၣ် အဝဲအကျီၣ်ဖါ မ့ၢ်တအိၣ်ခံဒုဘၣ်န့ၣ် ကသူဝဲ အဆၣ်ဖိကီၢ်ဖိလၢ အအိၣ်ဒီးအီၤလၢ အဒုတဒ်သိးလိာ်အသးခံဒု လၢကတီၣ်တၢ်အဂီၢ်လီၤ. လၢတၢ်ဂီၤပူၤန့ၣ် ပာ်ဖျါဝဲလၢ ပှၤထူစံာ်ဖိလၢ ၁၉ ယၤဖှိၣ်နံၣ်အစိၤတဖၣ် မၤဝဲဒ်န့ၣ်လီၤ. ခီဖျိလၢ အဝဲသ့ၣ်အမိၢ်ပှၢ် ဒီးအဂံၢ်အဘါတဒ်သိးလိာ်အသးအဃိ ဆၣ်ဖိကီၢ်ဖိလၢအဂံၢ်စၢ်တဒုန့ၣ် ဒ်သိးလူၤပိာ်ဝဲ ဆၣ်ဖိကီၢ်ဖိလၢ အဂံၢ်ဆူၣ်တဒုအခံကချုးအဂီၢ် ကဘၣ်ဂုာ်ကျဲးစၢးဝဲ သပှၢ်တၢၢ် ဒီးဆၣ်ဖိကီၢ်လၢ အဂံၢ်ဆူၣ်တဒုစ့ၢ်ကီး ကဘၣ်ယူတၢ်အါမးလီၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1 ၆၀၀
ပှၤဃ့လိၢ်တၢ်, ပှၤဟ့ၣ်လိၢ်တၢ်
နမ့ၢ်ဃ့လိၢ်တၢ်န့ၣ် အခီပညီမ့ၢ်ဝဲ နကဘၣ်ဟ့ၣ်က့ၤအီၤ မ့တမ့ၢ် ဟ့ၣ်က့ၤတၢ်တမံၤမံၤလီၤ. လၢပှၤအံၣ်စရ့လးဖိအစိၤန့ၣ် ပှၤဃ့လိၢ်တၢ်အါတက့ၢ်လၢ ကျိၣ်စ့တၢ်ကီတၢ်ခဲအဃိလီၤ. ပှၤအံၣ်စရ့လးဖိတဂၤ မ့ၢ်ဃ့လိၢ်တၢ်န့ၣ် အဝဲကဲထီၣ်ဝဲ ပှၤလၢအဟ့ၣ်လိၢ်တၢ်တဂၤ အကုၢ်လီၤ. (ကတိၤ. ၂၂:၇) လၢတၢ်န့ၣ်အဃိ တၢ်မၤလိာ်အိၣ်ဝဲလၢ ကစၢ်ယွၤအပှၤဂီၢ်မုၢ်တဖၣ် ကဘၣ်ဟ့ၣ်တၢ်လၢ တၢ်သူၣ်အိၣ်သးအိၣ် ဒီးအဝဲသ့ၣ် တဘၣ်ကွၢ်တၢ်ထဲ အနီၢ်ကစၢ်အဂီၢ်ဘၣ်, ကဘၣ်မၤစၢၤဝဲ ပှၤအံၣ်စရ့လးဖိလၢ အလိၣ်ဘၣ်တၢ်မၤစၢၤတဖၣ် ဒီးအဝဲသ့ၣ်မ့ၢ်ဟ့ၣ်လိၢ်တၢ်န့ၣ် တဘၣ်ဟံးန့ၢ်ဝဲ စ့အ့ၣ်ဘၣ်. (၂ မိၤ. ၂၂:၂၅; ၅ မိၤ. ၁၅:၇, ၈; စံး. ၃၇:၂၆; ၁၁၂:၅) မ့မ့ၢ်လၢပှၤတခီဘီမုၢ်ဖိတဖၣ်အအိၣ်န့ၣ် အဝဲသ့ၣ် ဟံးန့ၢ်ဝဲစ့အ့ၣ်သ့လီၤ. (၅ မိၤ. ၂၃:၂၀) ပှၤယူဒၤဖိလၢ အဟ့ၣ်ကူၣ်ဟ့ၣ်ဖးတၢ်တဖၣ် နၢ်ပၢၢ်ဝဲလၢ ပှၤဃ့လိၢ်တၢ်န့ၣ် ဘၣ်ထွဲလိာ်အသးထဲဒၣ် ပှၤဃ့လိၢ်တၢ်လၢ တၢ်ပနံာ်တၢ်ကၤအဂီၢ်လီၤ. တဘၣ်ထွဲဒီး ပှၤဖှီၣ်ဖိယာ်ဖိတဖၣ်ဘၣ်. ပှၤတခီဘီမုၢ်ဖိလၢ အဟဲအိၣ်လၢ ကီၢ်အံၣ်စရ့လးအပူၤအါတက့ၢ်န့ၣ် ဟဲအိၣ်ဝဲတစိၢ်တလီၢ် ဒီးမၤဝဲတၢ်ပနံာ်တၢ်ကၤလီၤ. ဖဲအဝဲသ့ၣ်ဟ့ၣ်လိၢ်ပှၤဂၤစ့အခါ ဃ့ဝဲစ့အ့ၣ်အဃိ ဖဲအဝဲသ့ၣ်ဃ့လိၢ်ပှၤဂၤစ့အခါ ကဘၣ်ဟ့ၣ်ဝဲ စ့အ့ၣ်စ့ၢ်ကီးလီၤ.
g ၀၄/၁၅ ၁၃
တၢ်မၤသံ ဆၣ်ဖိကီၢ်ဖိတဖၣ်န့ၣ် မ့ၢ်တၢ်လၢအကမၣ်ဧါ
ပှၤတဲဝဲဒ်လဲၣ် ပှၤလူၤအီၣ်တၢ်မံၤလာ် ဒီးပှၤမၤညၣ်တနီၤန့ၣ် မၤဝဲဒ်တၢ်လိာ်ကွဲအဂီၢ်, ကမၤမုာ်မၤဖှံသးအဂီၢ် မ့တမ့ၢ် လၢကလူၤဖီၣ်မၤသံဝဲအဂီၢ်လီၤ. မ့မ့ၢ်ပှၤအဂၤတနီၤန့ၣ် တူၢ်လိာ်ဝဲ ရၢၡါပှၤကွဲးလံာ်ဖိလၢအမ့ၢ် လံၤယိၣ် ထိစတွါ အတၢ်ကတိၤလၢ အကွဲးဝဲလၢ တၢ်မၤသံဆၣ်ဖိကီၢ်ဖိ ဒီးတၢ်အီၣ်ဆၣ်ဖိကီၢ်ဖိအညၣ်န့ၣ် “မ့ၢ်တၢ်လၢအကမၣ်” လီၤ.
လံာ်စီဆှံတဲဝဲဒ်လဲၣ် ကစၢ်ယွၤဟ့ၣ်အခွဲးလၢ ပှၤကမၤသံဆၣ်ဖိကီၢ်ဖိလၢ ပှၤကဒီသဒၢလီၤက့ၤ ပှၤသးသမူအဂီၢ် မ့တမ့ၢ် လၢတၢ်ကူတၢ်ကၤအဂီၢ်လီၤ. (၂ မိၤၡ့ ၂၁:၂၈; မၢ်ကူး ၁:၆) လံာ်စီဆှံ တဲစ့ၢ်ကီးဝဲလၢ ပှၤမၤသံဆၣ်ဖိကီၢ်ဖိလၢ တၢ်အီၣ်အဂီၢ်သ့လီၤ. ၁ မိၤၡ့ ၉:၃ တဲဝဲလၢ “ကယဲၢ်တၢ်ဂဲၤလၢ အမူဝဲတမံၤလၢ်လၢ်န့ၣ် ကကဲထီၣ်တၢ်အီၣ်လၢသုဂီၢ်” လီၤ. ယ့ၣ်ၡူး စ့ၢ်ကီးမၤစၢၤ အပျဲၢ်အဘီၣ်သ့ၣ်တဖၣ် ဒ်သိးကဖီၣ်န့ၢ်ညၣ်အဂီၢ် ဒီးလၢခံအဝဲသ့ၣ်အီၣ်ဝဲလီၤ.—ယိၤဟၣ် ၂၁:၄-၁၄
ဘၣ်ဆၣ်သနာ်က့ လံာ်စီဆှံတဲဝဲလၢ “ပှၤလၢအအဲၣ်ဒိး တၢ်မၤအၢန့ၣ် ယွၤသးဟ့အီၤလီၤ.” (စံး၁၁:၅) အဃိပသ့ၣ်ညါဘၣ်လၢ တၢ်မၤဆူးမၤဆါ ဒီးမၤသံဆၣ်ဖိကီၢ်ဖိလၢ တၢ်မၤမုာ်မၤဖှံသးအဂီၢ်န့ၣ် ကစၢ်ယွၤ တဘၣ်သူၣ်ဘၣ်သးဝဲဘၣ်.
လံာ်စီဆှံပာ်ဖျါဝဲလၢ ကစၢ်ယွၤပာ်လုၢ်ပာ်ပှ့ၤ ဆၣ်ဖိကီၢ်ဖိအသးသမူလီၤ.
လံာ်စီဆှံတဲဝဲလၢ “ဒီးယွၤတ့လီၤ ဟီၣ်ခိၣ်အဆၣ်ဧိၤကီၢ်ဧိၤအမံၤ ဒ်အကလုာ်အသိး, ဒီးဆၣ်ဧိၤကီၢ်ဧိၤအဒၢ ဒ်အကလုာ်အသိး, ဒီးကယဲၢ်တၢ်လၢအစွါလၢ ဟီၣ်ခိၣ်ချၢဒ်အကလုာ် အသိးန့ၣ်လီၤ. ဒီးယွၤထံၣ်ဝဲလၢအဂ့ၤလီၤ.—၁ မိၤၡ့ ၁:၂၅.
လံာ်စီဆှံတဲဝဲလၢ ယဟိဝၤယွၤန့ၣ် “ဟ့ၣ်လီၤတၢ်အီၣ်လၢဆၣ်ဖိကီၢ်ဖိ” အဂီၢ်လီၤ. (စံးထီၣ်ပတြၢၤ ၁၄၇:၉) ကစၢ်ယွၤတ့လီၤဝဲ န့ဆၢၣ်တၢ်မူတဝၢလၢ အဒုးအီၣ်ဒုးအီ ဒီးဒုးအိၣ်ဒုးဆိး ဆၣ်ဖိကီၢ်ဖိတဖၣ်အဂီၢ် အါမးလီၤ.
လၢတၢ်ထုကဖၣ်အပူၤန့ၣ် စီၤပၤဒၤဝံးတဲဝဲလၢ “ပှၤကညီဒီး ဆၣ်ဖိကီၢ်ဖိန့ၣ် နအံးက့ၤကွၢ်က့ၤအီၤလီၤယွၤဧၢ.” (စံးထီၣ်ပတြၢၤ ၃၆:၆) အဒိ ဖဲကစၢ်ယွၤမၤဟးဂီၤ ပှၤအၢပှၤသီတဖၣ်လၢ ထံလုၣ်ဘၢတၢ်အခါ အဝဲမၤပူၤဖျဲးဝဲ ပှၤဃိးဂၤဃုာ်ဒီး ဆၣ်ဖိကီၢ်ဖိ အကလုာ်ကလုာ်လီၤ.—၁ မိၤၡ့ ၆:၁၉.
အဃိပသ့ၣ်ညါဘၣ်လၢ ယဟိဝၤယွၤန့ၣ် အသးအိၣ်ဝဲ ဆၣ်ဖိကီၢ်ဖိလၢ အတ့လီၤဝဲတဖၣ် ဒီးမုၢ်လၢ်စ့ၢ်ကီးဝဲလၢ ပှၤကရ့ဒီးဆၣ်ဖိကီၢ်ဖိတဖၣ် ဒ်သိးအဝဲသ့ၣ် ကြၢးဒိးန့ၢ်ဘၣ်ဝဲအသိးလီၤ. “ပှၤတီပှၤလိၤ ပာ်ကဲအဆၣ်ဖိကီၢ်ဖိအသးသမူလီၤ.”—ကတိၤဒိ ၁၂:၁၀.
လါအီကူး ၉-၁၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၅ မိၤၡ့ ၂၄-၂၆
“ယဟိဝၤယွၤ ကဟုကယာ်ဝဲ ပိာ်မုၣ်တဖၣ်န့ၣ် တၢ်မၤလိာ်ပာ်ဖျါထီၣ်ဝဲဒ်လဲၣ်”
it-2 ၁၁၉၆ ¶၄
ပိာ်မုၣ်
ပှၤခံဂၤဖျီအသး မ့ၢ်တပှဲၤထီၣ်တနံၣ်ဒံးဘၣ်န့ၣ် ပိာ်ခွါန့ၣ်တလိၣ်လဲၤကဲသုဘၣ်. တၢ်အံၤမ့ၢ်ဝဲတၢ်ခွဲးတၢ်ယာ်လၢ အဝဲသ့ၣ်ကဟံးအဖိအဂီၢ်လီၤ. ခီဖျိလၢအဖိအိၣ်အဃိ ဖဲအဝၤမ့ၢ်လဲၤဒုးတၢ်ဒီး သံလၢတၢ်ဒုးပျီအပူၤဒၣ်လဲာ် ကကဲထီၣ်တၢ်မၤမုာ်ထီၣ်က့ၤလၢ မိၢ်တဂၤအံၤအဂီၢ်လီၤ.—၅ မိၤ. ၂၀:၇; ၂၄:၅.
it-1 ၉၆၃ ¶၂
တၢ်ထၢဘုစဲၤ
တၢ်ရဲၣ်တၢ်ကျဲၤလၢအဂ့ၤဒိၣ်မး လၢပှၤဖှီၣ်ဖိယာ်ဖိတဖၣ်အဂီၢ်န့ၣ် ဟ့ၣ်ဂံၢ်ဟ့ၣ်ဘါပှၤလၢ ပကသးအိၣ်ဟ့ၣ်တၢ်, ပသုတအဲၣ်လီၤထဲပသးတဂ့ၤ, ပကမုၢ်လၢ် ယဟိဝၤယွၤအတၢ်ဆိၣ်ဂ့ၤ ဒီးပသုတကၢၣ်တကျူ တဂ့ၤလီၤ. တၢ်အံၤဒုးသ့ၣ်နီၣ်ထီၣ်ပှၤလၢ စီၤဒၤဝံး အတၢ်ကတိၤလၢ “ယမ့ၢ်တ့ၢ်ပှၤအသးစၢ်, ဒီးယကဲထီၣ်လံ ပှၤသးပှၢ်လံ, ဒီးပှၤတီပှၤလိၤ ဘၣ်တၢ်လဲၤသဒၣ်အီၤမ့ၢ်ဂ့ၤ, အချံအသၣ် ဃ့အီၣ်တၢ်မ့ၢ်ဂ့ၤန့ၣ် ယတထံၣ်ဘၣ်.” (စံး. ၃၇:၂၅) ပှၤဖှီၣ်ဖိယာ်ဖိတဖၣ်ဒၣ်လဲာ် မ့ၢ်မၤထွဲဝဲ တၢ်သိၣ်တၢ်သီ အတၢ်ကတဲာ်ကတီၤအံၤန့ၣ် အဝဲသ့ၣ်ကဂုာ်ကျဲးစၢး မၤတၢ်ဆူၣ်ဆူၣ်, တလီၤဒိဘၣ်ဝဲဘၣ် ဒီးအဖိအလံၤတဖၣ်စ့ၢ်ကီး တလိၣ်လၢကဘၣ်ဃ့အီၣ်တၢ်ဘၣ်.
တၢး၁၁ ၃/၁ ၂၃
မ့ၢ်နသ့ၣ်ညါဧါ
လၢပျၢၤပှၤအံၣ်စရ့လးဖိ ပိာ်ခွါတဂၤ မ့ၢ်သံဝဲတချုးလၢ အဖိခွါအိၣ်ဒံးဘၣ်န့ၣ် အဒီပုၢ်ဝဲၢ်ခွါတဂၤ မ့တမ့ၢ် အဘူးအတံၢ်တဂၤ ကဘၣ်ဖျီက့ၤအသးဒီး မုၣ်ကမဲအံၤ ဒ်သိးပှၤလၢအသံတဂၤ အစၢၤအသွဲၣ် သုတလီၤတုာ်တဂ့ၤအဂီၢ်လီၤ. (၁ မိၤၡ့ ၃၈:၈) တၢ်ရဲၣ်တၢ်ကျဲၤအံၤ လၢခံဘၣ်တၢ်ဖၢနုာ်အီၤလၢ စီၤမိၤၡ့ အတၢ်သိၣ်တၢ်သီအပူၤလီၤ. (၅ မိၤၡ့ ၂၅:၅, ၆) လံာ်နီၢ်ရူၤသး ပာ်ဖျါထီၣ်ဝဲ တၢ်လၢစီၤဘိၤဧး မၤဝဲန့ၣ် ဒုးသ့ၣ်ညါပှၤလၢ ပှၤလၢအသံတဂၤ အဒီပုၢ်ဝဲၢ်ခွါ မ့ၢ်တအိၣ်နီတဂၤဘၣ်န့ၣ် အဘူးအတံၢ်တဂၤ ကဘၣ်ဟံးန့ၢ်က့ၤဝဲ အမူဒါန့ၣ်လီၤ.—ရူၤသး ၁:၃, ၄; ၂:၁၉, ၂၀; ၄:၁-၆.
ယ့ၣ်ၡူးအစိၤစ့ၢ်ကီး ပှၤမၤထွဲဝဲ လုၢ်လၢ်အံၤန့ၣ် ပသ့ၣ်ညါဘၣ် ခီဖျိပှၤစးဒူၤကဲတဂၤ အတၢ်ကတိၤဖဲ မၢ်ကူး ၁၂:၂၀-၂၂ အပူၤလီၤ. လၢတၢယၤဖှိၣ်အစိၤ ပှၤကူၣ်ဘၣ်ကူၣ်သ့လၢ ဘၣ်ဃးဒီး ပှၤယူဒၤဖိ အတၢ်စံၣ်စိၤတဲစိၤ ကၠိစံဖး တဲဝဲလၢ လုၢ်လၢ်အံၤတမ့ၢ်ထဲ ကပၢၤဃာ်ဝဲ ဟံၣ်ဖိဃီဖိအမံၤဘၣ်. ပၢၤဃာ်စ့ၢ်ကီး ဟံၣ်ဖိဃီဖိအတၢ်စုလီၢ်ခီၣ်ခိၣ်တဖၣ် တကးဒံးဘၣ် ကျဲၤန့ၢ်ဝဲမုၣ်ကမဲ အတၢ်လိၣ်ဘၣ်တဖၣ်လီၤ. ဖဲန့ၣ်အဆၢကတီၢ် မါတဂၤန့ၣ် အတၢ်ခွဲးတၢ်ယာ် တအိၣ်လၢကဒိးန့ၢ်ဘၣ် အဝၤအတၢ်စုလီၢ်ခီၣ်ခိၣ်ဘၣ်. ဘၣ်ဆၣ် အဘူးအတံၢ်တဂၤ မ့ၢ်ဖျီအသးဒီးအီၤ ဒီးအဝဲအဖိမ့ၢ်အိၣ်န့ၣ် ဖိတဂၤအံၤ အိၣ်ဒီးတၢ်ခွဲးတၢ်ယာ်လၢ ကဒိးန့ၢ်ဘၣ်ဝဲ ပှၤလၢအသံတဂၤ အတၢ်စုလီၢ်ခီၣ်ခိၣ်လီၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1 ၆၄၀ ¶၅
တၢ်မၤကတၢၢ်ကွံာ် တၢ်ဆီဟံၣ်ဆီဃီ
လံာ်လီၤဖှၣ်. စီၤမိၤၡ့ အတၢ်သိၣ်တၢ်သီအိၣ်လၢ ပှၤမၤကတၢၢ်ကွံာ် တၢ်ဆီဟံၣ်ဆီဃီ သ့သနာ်က့ လၢခံပှၤတကြၢးဆိကမိၣ်လၢ အံၣ်စရ့လးပိာ်ခွါတဂၤ မၤကတၢၢ်ဝဲ အတၢ်ဆီဟံၣ်ဆီဃီ ဒီးအမါန့ၢ်ဝဲ ညီညီဖိန့ၣ်ဘၣ်. အဝဲသ့ၣ် မ့ၢ်အဲၣ်ဒိးမၤကတၢၢ် အတၢ်ဆီဟံၣ်ဆီဃီန့ၣ် တၢ်လၢကဘၣ်မၤဝဲ အိၣ်ဒံးလီၤ. အဝဲသ့ၣ် ကဘၣ်ကွဲးဝဲ “လံာ်လီၤဖှၣ်တဘ့ၣ်” လီၤ. ပိာ်ခွါလၢအမၤကတၢၢ် အတၢ်ဆီဟံၣ်ဆီဃီန့ၣ် ကဘၣ်ဟ့ၣ်လီၤ လံာ်လီၤဖှၣ်တဘ့ၣ်လၢ အမါ “အစုပူၤ, ဒီးမၢအဟးထီၣ်ကွံာ်လၢ အဟံၣ်ပူၤ” လီၤ. (၅ မိၤ. ၂၄:၁) ဘၣ်ဃးဒီး တၢ်ဂ့ၢ်အံၤန့ၣ် လံာ်စီဆှံတပာ်ဖျါအါထီၣ်ဝဲ တၢ်ဂ့ၢ်လီၤတံၢ်လီၤဆဲး သနာ်က့ ပှၤသူၣ်က့သးပှၢ်လၢ အိၣ်ဒီးမူဒါတဖၣ်န့ၣ် အဆိကတၢၢ် ကဘၣ်လဲၤသုးကျဲၤန့ၢ်ဝဲ ဒ်သိးအဝဲသ့ၣ်ခံဂၤ ကဘၣ်လိာ်ဖိးဒ့က့ၤအဂီၢ်လီၤ. ဖဲပှၤကတဲာ်ကတီၤ လံာ်လီၤဖှၣ် ဒီးတၢ်မၤကတၢၢ်ကွံာ် တၢ်ဆီဟံၣ်ဆီဃီလၢ အဖိးသဲစးအဆၢကတီၢ် ပိာ်ခွါလၢအဲၣ်ဒိးမၤကတၢၢ် အတၢ်ဆီဟံၣ်ဆီဃီန့ၣ် အိၣ်ဒီးတၢ်ခွဲးတၢ်ယာ်လၢ ကသမံသမိးက့ၤဝဲ အတၢ်ဆၢတဲာ်အဂီၢ်လီၤ. အဝဲကဘၣ်အိၣ်ဒီး တၢ်ဂ့ၢ်လီၤတံၢ်လီၤဆဲးလၢ ကမၤကတၢၢ်ကွံာ် အတၢ်ဆီဟံၣ်ဆီဃီအဂီၢ် ဒီးကဘၣ်မၤထွဲဝဲ တၢ်သိၣ်တၢ်သီအိၣ်အဃိ အဝဲမၤကရီတၢ်တသ့ဘၣ်. တၢ်အံၤဒီသဒၢစ့ၢ်ကီး မါတဂၤ ဒီးအတၢ်ခွဲးယာ်တဖၣ်လီၤ. လံာ်စီဆှံ တပာ်ဖျါထီၣ်ဝဲ တၢ်ဂ့ၢ်လီၤတံၢ်လီၤဆဲးလၢ ပှၤကဘၣ်ဖၢနုာ်အီၤလၢ “လံာ်လီၤဖှၣ်” အပူၤန့ၣ်ဘၣ်.
လါအီကူး ၁၆-၂၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၅ မိၤၡ့ ၂၇-၂၈
“ကယဲၢ်တၢ်ဆိၣ်ဂ့ၤအံၤက . . . ချုးန့ၢ်နၤ”
တၢး၁၀ ၁၂/၁၅ ၁၉ ¶၁၈
ဟံးန့ၢ်တၢ်ဆိၣ်ဂ့ၤလၢ စီၤပၤလၢယွၤအသးစီဆှံ ဟံးစုနဲၣ်ကျဲအီၤအအိၣ်
၁၈ တၢ်ဒိကနၣ်န့ၣ် ပၣ်ဃုာ်ဒီးတၢ်ဆိကမိၣ်ထံ ကစၢ်ယွၤအကလုၢ်ကထါ ဒီးနီၢ်သးတၢ်အီၣ်လၢ အဝဲကတဲာ်ကတီၤဝဲတဖၣ်လီၤ. (မး. ၂၄:၄၅) အခီပညီမ့ၢ်စ့ၢ်ကီး ပဒိကနၣ် ကစၢ်ယွၤ ဒီးအဖိခွါအကလုၢ်လီၤ. ယ့ၣ်ၡူးတဲဝဲလၢ “ပှၤလၢအကိးယၤလၢ ‘ကစၢ်ဧၢ ကစၢ်ဧၢ’ န့ၣ် တလဲၤနုာ်လီၤဘၣ်လၢ မူခိၣ်အဘီအမုၢ်အပူၤ ကိးဂၤဒဲးဘၣ်. ကလဲၤနုာ်ဘၣ်ထဲ ပှၤလၢ အမၤယပၢ်အိၣ်လၢမူခိၣ် အတၢ်ဘၣ်သးန့ၣ်လီၤ.” (မး. ၇:၂၁) တကးဒံးဘၣ် ပဒိကနၣ် ကစၢ်ယွၤအကလုၢ်န့ၣ် အခီပညီမ့ၢ်စ့ၢ်ကီး ပဒိကနၣ် တၢ်အိၣ်ဖှိၣ်သးပှၢ်လၢ “အမ့ၢ်တၢ်ဟ့ၣ်” လၢအိၣ်ဒီးမူဒါလၢ တၢ်အိၣ်ဖှိၣ်အပူၤတဖၣ် ဒီးကစၢ်ယွၤ အတၢ်ရဲၣ်တၢ်ကျဲၤလၢ အဝဲပာ်လီၤဝဲတဖၣ်လီၤ.—အ့း. ၄:၈.
တၢး၀၁ ၉/၁၅ ၁၀ ¶၂
မ့ၢ်ယဟိဝၤယွၤ အတၢ်ဆိၣ်ဂ့ၤ ကချုးန့ၢ်နၤဧါ
၂ ၅ မိၤၡ့ ၂၈:၂ အပူၤ ဧ့ၤဘြံၤအတၢ်ကတိၤလၢ ဘၣ်တၢ်ကွဲးကျိာ်ထံက့ၤအီၤလၢ “ဒိကနၣ်” န့ၣ် အခီပညီမ့ၢ်ဝဲ တၢ်လၢပကဘၣ်ဆဲးမၤအီၤထီဘိလီၤ. ယဟိဝၤယွၤ အပှၤဂီၢ်မုၢ်တဖၣ် တမ့ၢ်ထဲကဘၣ်ဒိကနၣ် ကစၢ်ယွၤအကလုၢ်တဘျီတခီၣ်ဘၣ်, အဝဲသ့ၣ်ကဘၣ်ဒိကနၣ်ဝဲလၢ အတၢ်အိၣ်မူဒီတစိၤလီၤ. အဝဲသ့ၣ်မ့ၢ်မၤဝဲဒ်န့ၣ်မး ယဟိဝၤယွၤ အတၢ်ဆိၣ်ဂ့ၤက “ချုးန့ၢ်” အီၤလီၤ. ဧ့ၤဘြံၤအတၢ်ကတိၤလၢ ဘၣ်တၢ်ကွဲးကျိာ်ထံက့ၤအီၤလၢ “ချုးန့ၢ်” န့ၣ်ညီနုၢ် ပှၤသူအီၤဖဲ ပှၤလဲၤလူၤအီၣ် တၢ်မံၤလာ်အခါ ဒီးအခီပညီအိၣ်လၢ “ချုးန့ၢ်” မ့တမ့ၢ် “ဟံးန့ၢ်” အီၤလီၤ.
တၢး၁၀ ၉/၁၅ ၈ ¶၄
ဃုယဟိဝၤယွၤ အတၢ်ဆိၣ်ဂ့ၤလၢ တၢ်သူၣ်ဆူၣ်သးဆူၣ်အပူၤ
၄ ဘၣ်ဃးဒီး တၢ်ဒိကနၣ်န့ၣ် ပှၤအံၣ်စရ့လးဖိတဖၣ် အတၢ်ပာ်သူၣ်ပာ်သးအိၣ်ဒ်လဲၣ်. ကစၢ်ယွၤအတၢ်သိၣ်တၢ်သီအိၣ်လၢ အပှၤဂီၢ်မုၢ်တဖၣ် မ့ၢ်တဘူၣ်ထီၣ်ဘါထီၣ်အီၤလၢ ‘တၢ်သူၣ်ဖှံသးညီ ဒီးတၢ်သူၣ်ခုသးခု’ ဘၣ်န့ၣ် အဝဲတဘၣ်သူၣ်ဘၣ်သးဝဲဘၣ်. (ဖး ၅ မိၤၡ့ ၂၈:၄၅-၄၇ တက့ၢ်) ပတကြၢးဒိကနၣ် ယဟိဝၤယွၤအကလုၢ် ခီဖျိလၢပမူဒါအိၣ်အဃိ ဒီးဒ်ဆၣ်ဖိကီၢ်ဖိ ဒီးတၢ်ဝံတၢ်နါတဖၣ် ဒိကနၣ်တၢ်အသိးဘၣ်. (မၢ်. ၁:၂၇; ယၤ. ၃:၃) တၢ်ဒိကနၣ် ကစၢ်ယွၤအကလုၢ်နီၢ်နီၢ်န့ၣ် မ့ၢ်ဝဲပပာ်ဖျါထီၣ် ပတၢ်အဲၣ်အီၤလီၤ. ပှၤလၢအဒိကနၣ်တၢ်နီၢ်နီၢ်န့ၣ် ကအိၣ်ဒီးတၢ်သးခုလီၤ. မ့ၢ်လၢအဝဲနာ်ဝဲလၢ ယဟိဝၤယွၤ အတၢ်မၤလိာ်န့ၣ် တမ့ၢ်တၢ်ဝံတၢ်ယိးဘၣ်, လၢတၢ်န့ၣ်အလီၢ် ကစၢ်ယွၤ “ဟ့ၣ်လီၤခိၣ်ဖးဆူ ပှၤလၢအဃုအီၤလၢ တၢ်သူၣ်ဆူၣ်သးဆူၣ် အပူၤန့ၣ်လီၤ.”—ဧ့ၤ. ၁၁:၆; ၁ ယိၤ. ၅:၃.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1 ၃၆၀
ဟီၣ်ခိၣ်လီၢ်အဆၢ အတၢ်ပနီၣ်
ယဟိဝၤယွၤ အတၢ်သိၣ်တၢ်သီန့ၣ် တြီဃာ်ဝဲလၢ ပှၤတဘၣ်သုးကွံာ် ဟီၣ်ခိၣ်လီၢ်အတၢ်ပနီၣ်တဖၣ်ဘၣ်. (၅ မိၤ. ၁၉:၁၄; ကွၢ်စ့ၢ်ကီး ကတိၤ. ၂၂:၂၈) တကးဒံးဘၣ် ပာ်ဖျါထီၣ်ဝဲလၢ “ပှၤလၢအသုး ပှၤလၢအဃၢၤအဟီၣ်ခိၣ် အပနီၣ်အလီၢ်” န့ၣ်ကဘၣ် တၢ်ဆိၣ်အၢလီၤ. (၅ မိၤ. ၂၇:၁၇) ဟီၣ်ခိၣ်အကစၢ်န့ၣ် သန့ၤအသးလၢ တၤသူတၤသၣ်လၢ အဟးထီၣ်လၢ အတၢ်လီၢ်ပူၤအဃိ ပှၤမ့ၢ်သုးကွံာ် အဟီၣ်ခိၣ်လီၢ် အပနီၣ်န့ၣ် လီၤဂာ်ဒ်ပှၤမၤဟးဂီၤကွံာ် အဝဲအတၢ်ဖံးတၢ်မၤလၢ တၢ်လုၢ်အီၣ်သးသမူအဂီၢ်လီၤ. လၢပျၢၤပှၤမ့ၢ်မၤဒ်အံၤန့ၣ် ပှၤထံၣ်အီၤဒ် ပှၤဟုၣ်တၢ်အသိးလီၤ. (ဘး. ၂၄:၂) လၢပျၢၤန့ၣ် ပှၤမၤဒ်သိးန့ၣ်အိၣ်ဝဲလီၤ. ဖဲဝံဟိၤၡ့အစိၤန့ၣ် ပှၤယူဒၤဖိအပဒိၣ်တဖၣ် ဘၣ်တၢ်ထိၣ်သတြီၤအဝဲသ့ၣ်ဒီး ပှၤလၢအသုးကွံာ် ကီၢ်အဃၢၤအတၢ်ပနီၣ်တဖၣ်လီၤ.—ဟိၤ. ၅:၁၀.
လါအီကူး ၂၃-၂၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၅ မိၤၡ့ ၂၉-၃၀
“တၢ်မၤ ယဟိဝၤယွၤ အတၢ်မၤန့ၣ် တမ့ၢ်တၢ်လၢအကီတလၢဘၣ်”
တၢး၀၉ ၁၁/၁ ၃၁ ¶၂
ယဟိဝၤယွၤ ဟ့ၣ်ပှၤတၢ်ဃုထၢ
ဒ်သိးပကသ့ၣ်ညါ တၢ်လၢကစၢ်ယွၤ အဲၣ်ဒိးလၢပမၤတဖၣ် ဒီးပကမၤအီၤအဂီၢ်န့ၣ် ကီခဲဝဲဧါ. စီၤမိၤၡ့ တဲဝဲလၢ “အဂ့ၢ်ဒ်အံၤ, တၢ်မၤလိာ်အံၤလၢယမၤလိာ်နၤ လၢမုၢ်မဆါတနံၤအံၤ တအိၣ်သဒၢဘၣ်ဒီးနၤဘၣ်, ဒီးတအိၣ်လၢအယံၤဘၣ်.” (အဆၢဖိ ၁၁) တၢ်လၢပမၤတန့ၢ်ဘၣ်န့ၣ် ယဟိဝၤယွၤတမၢပှၤဘၣ်. တၢ်လၢအဝဲမၢ ပမၤတဖၣ်န့ၣ် မ့ၢ်တၢ်လၢအကြၢးဝဲဘၣ်ဝဲ ဒီးပမၤအီၤန့ၢ်ဝဲလီၤ. ဒီးမ့ၢ်တၢ်လၢ ပသ့ၣ်ညါနၢ်ပၢၢ်အီၤသ့န့ၣ်လီၤ. ဒ်သိးပကသ့ၣ်ညါ တၢ်လၢကစၢ်ယွၤ အဲၣ်ဒိးလၢပမၤတဖၣ်အဂီၢ် တလိၣ်လၢပကဘၣ် “လဲၤထီၣ်ဆူမူခိၣ်” မ့တမ့ၢ် လဲၤဆူ “ပီၣ်လဲၣ်ဝၢ်ဘးခီ” န့ၣ်ဘၣ်. (အဆၢဖိ ၁၂, ၁၃) ပကဘၣ်အိၣ်မူဒ်လဲၣ်န့ၣ် လံာ်စီဆှံပာ်ဖျါထီၣ်န့ၢ်ပှၤလီၤ.—မံကၤ ၆:၈.
တၢး၀၉ ၁၁/၁ ၃၁ ¶၁
ယဟိဝၤယွၤ ဟ့ၣ်ပှၤတၢ်ဃုထၢ
ခရံာ်ဖိပိာ်မုၣ်တဂၤ တဲဝဲလၢ “ညီနုၢ်န့ၣ်ယဘၣ်ယိၣ်တၢ်လၢ မ့ၢ်ယဆဲးတီဒီး ယဟိဝၤယွၤ ဘၣ်ကန့ၢ်ဧါ.” ခီဖျိလၢအနီၢ်ဆံးခါ အဝဲထံၣ်ဘၣ်ဒီး တၢ်သူၣ်အုးသးအုးတဖၣ်အဃိ တူၢ်ဘၣ်ဝဲလၢ တမ့ၢ်လၢအဝဲမၤဝဲ ကတုၤထီၣ်ထီၣ်ဘးဘၣ်. တၢ်ကဲထီၣ်အသး ဒ်သိးန့ၣ်သ့ဧါ. ပကြၢးတူၢ်ဘၣ်ဒ် ပိာ်မုၣ်တဂၤအံၤ တူၢ်ဘၣ်ဝဲအသိးဧါ. ပတကြၢးတူၢ်ဘၣ်ဒ်န့ၣ်ဘၣ် မ့ၢ်လၢယဟိၤယွၤ ဟ့ၣ်ပှၤတၢ်ဟ့ၣ်လၢ ပကဃုထၢတၢ်လၢ တၢ်သဘျ့ အဃိပကအိၣ်မူဒ်လဲၣ်န့ၣ် ပဃုထၢလၢ ပနီၢ်ကစၢ်သ့လီၤ. ယဟိဝၤယွၤ အဲၣ်ဒိးလၢ ပကဃုထၢတၢ်လၢအဘၣ် ဒီးပမၤဒ်န့ၣ်ကသ့အဂီၢ် အဝဲပာ်ဖျါထီၣ်န့ၢ်ပှၤလၢ လံာ်စီဆှံအပူၤလီၤ. ဆိကမိၣ်ကွၢ် စီၤမိၤၡ့ အတၢ်ကတိၤလၢ ဘၣ်တၢ်ပာ်ဖျါထီၣ်အီၤလၢ ၅ မိၤၡ့ အဆၢဒိၣ် ၃၀ အပူၤတက့ၢ်.
တၢး၀၉ ၁၁/၁ ၃၁ ¶၄
ယဟိဝၤယွၤ ဟ့ၣ်ပှၤတၢ်ဃုထၢ
ပတၢ်ဃုထၢန့ၣ် မ့ၢ်တၢ်အရ့ဒိၣ်လၢ ယဟိဝၤယွၤ အဂီၢ်ဧါ. မ့ၢ်အရ့ဒိၣ်လီၤ. ခီဖျိလၢ ယွၤအသးစီဆှံအဃိ စီၤမိၤၡ့ တဲဝဲလၢ “ဃုထၢတၢ်မူ” တက့ၢ်. (အဆၢဖိ ၁၉) ဘၣ်ဆၣ် ပဃုထၢတၢ်မူကသ့ဒ်လဲၣ်. စီၤမိၤၡ့ တဲဝဲလၢ “အဲၣ်ယွၤနကစၢ်, ဒ်သိးနကဒိကနၣ်အကလုၢ်, ဒ်သိးနကစဲဘူးဒီးအီၤ” လီၤ. (အဆၢဖိ ၂၀) ပမ့ၢ်အဲၣ် ယဟိဝၤယွၤန့ၣ် ပမ့ၢ်ထံၣ်ဘၣ်ဒီး တၢ်အိၣ်သးဒ်လဲၣ်ဂ့ၤဒ်လဲၣ်ဂ့ၤ ပကအဲၣ်ဒိးဒိကနၣ် အကလုၢ် ဒီးဆဲးတီဒီးအီၤလီၤ. ပမ့ၢ်မၤဒ်န့ၣ်န့ၣ် အခီပညီမ့ၢ်ဝဲ ပဃုထၢတၢ်မူ ဒီးမ့ၢ်ဝဲတၢ်အိၣ်မူအဂ့ၤကတၢၢ်လၢ ဆၢကတီၢ်ခဲအံၤ ဒီးပကအိၣ်မူဘၣ် လီၤထူလီၤယိာ်လၢ ကစၢ်ယွၤအဟီၣ်ခိၣ်သီအပူၤလီၤ.—၂ ပ့းတရူး ၃:၁၁-၁၃; ၁ ယိၤဟၣ် ၅:၃.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1 ၆၆၅ ¶၃
နၢ်
ယဟိဝၤယွၤ တဲဝဲ ပှၤအံၣ်စရ့လးဖိလၢ အခိၣ်ကိၤ, တဒိကနၣ်တၢ် ဒီး “အနၢ်တဒိးတၢ်ကူးတရံးဘၣ်” တဖၣ်အဂ့ၢ်ခီဖျိလၢ အခ့အပှၤတဖၣ်လီၤ. (ယံး. ၆:၁၀; မၤတၢ်. ၇:၅၁) လီၤဂာ်ဒ်အဝဲသ့ၣ် ဆွံတံာ်အနၢ်လၢတၢ်တမံၤမံၤ ဒ်သိးအဝဲသ့ၣ် သုတနၢ်ဟူတၢ်တဂ့ၤအဂီၢ်လီၤ. ယဟိဝၤယွၤ တအိးထီၣ်န့ၢ် အဝဲသ့ၣ်အနၢ်ဘၣ်. မ့မ့ၢ်ပှၤလၢအဃုအီၤတဖၣ်န့ၣ် ယဟိဝၤယွၤ ဟ့ၣ်အဝဲသ့ၣ် တၢ်သ့ၣ်ညါနၢ်ပၢၢ် ဒီးတၢ်ဒိကနၣ်လီၤ. ဘၣ်ဆၣ် အဝဲဒုးဃၢဝဲ ပှၤလၢတဒိကနၣ်တၢ်တဖၣ်အနၢ်လီၤ. (၅ မိၤ. ၂၉:၄; ရိ. ၁၁:၈) တၢ်မၢဖိပီလူး တဲဆိပာ်ဝဲလၢ တၢ်ဆၢကတီၢ်ကဟဲလၢ ပှၤလၢအကိးလီၤအသးလၢ ခရံာ်ဖိတနီၤန့ၣ် တဒိကနၣ် ကစၢ်ယွၤအကလုၢ်လၢၤဘၣ် ဒီးကထီဒါက့ၤ တၢ်မ့ၢ်တၢ်တီလီၤ. ဘၣ်ဆၣ် အဝဲသ့ၣ်အဲၣ်ဒိးဒိကနၣ် တၢ်လၢအဘၣ်အဝဲသ့ၣ်အနၢ်အဃိ ကဒိကနၣ် သရၣ်လၢအကမၣ်တဖၣ်လီၤ. (၂ တံၤ. ၄:၃, ၄; ၁ တံၤ. ၄:၁) ဒီးပာ်ဖျါဝဲလၢ နၢ်လၢအနၢ်ဟူ တၢ်ကစီၣ်လၢအအၢ, လီၤဆီဒၣ်တၢ် တၢ်နးတၢ်ဖှီၣ်အကစီၣ် ဒီး “အနၢ်ကဆါ” န့ၣ်ကအိၣ်စ့ၢ်ကီးလီၤ.—၁ မူၤ. ၃:၁၁; ၂ စီၤပၤ. ၂၁:၁၂; ယံး. ၁၉:၃.
လါအီကူး ၃၀–လါစဲးပတ့ဘၢၣ် ၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၅ မိၤၡ့ ၃၁-၃၂
“တၢ်ကတိၤဒိလၢ အိၣ်လၢတၢ်သးဝံၣ်လၢ စီၤမိၤၡ့ကွဲးဝဲအပူၤန့ၣ် ပမၤလိန့ၢ်ဘၣ် တၢ်မနုၤလဲၣ်”
“ဟ့ၣ်ယၤ တၢ်သးစၢၢ်ဆၢပံၢ်ကလာ် လၢယကပျံၤ နမံၤအဂီၢ်တက့ၢ်”
၈ ဖဲပှၤအံၣ်စရ့လးဖိတဖၣ် ဘူးထီၣ်ကနုာ်လီၤ လၢကီၢ်တၢ်စံးပာ်အပူၤအခါ ယဟိဝၤယွၤ ဟ့ၣ်လီၤစီၤမိၤၡ့ တၢ်သးဝံၣ်တယုၢ်လီၤ. (၅ မိၤၡ့ ၃၁:၁၉) ဒီးစီၤမိၤၡ့ သိၣ်လိကဒါက့ၤဝဲ ပှၤဂီၢ်မုၢ်တဖၣ် လၢတၢ်သးဝံၣ်အံၤလီၤ. (ဖး ၅ မိၤၡ့ ၃၂:၂, ၃ တက့ၢ်.) ပမ့ၢ်ကွၢ်ဖဲ အဆၢဖိ ၂ ဒီး ၃ န့ၣ်ပသ့ၣ်ညါဘၣ်လၢ ယဟိဝၤယွၤ တအဲၣ်ဒိးလၢ ပှၤကပာ်ခူသူၣ်အမံၤ ဒီးပာ်စီဆှံအမံၤ တုၤဒၣ်လဲာ် ပှၤကိးသီၣ်ထီၣ်အီၤ တဘူၣ်လၢၤဘၣ်န့ၣ်လီၤ. အဝဲအဲၣ်ဒိးလၢ ပှၤကိးဂၤဒဲး ကသ့ၣ်ညါအမံၤလီၤ. ပှၤအံၣ်စရ့လးဖိတဖၣ် နၢ်ဟူဘၣ်ဝဲလၢ စီၤမိၤၡ့သိၣ်လိအဝဲသ့ၣ်လၢ ယဟိဝၤယွၤအမံၤ ဒီးယဟိဝၤယွၤအဂ့ၢ်န့ၣ် မ့ၢ်တၢ်ခွဲးတၢ်ယာ်ဖးဒိၣ် လၢအဝဲသ့ၣ်အဂီၢ်လီၤ. ဒ်မူခိၣ်ထံလီၤဘၣ် လၢတၢ်မုၢ်တၢ်ဘိတဖၣ်အလိၤ ဒီးဟဲမဲထီၣ်ဝဲအသိးန့ၣ် တၢ်လၢစီၤမိၤၡ့ သိၣ်လိအဝဲသ့ၣ်တဖၣ်န့ၣ် မၤဂၢၢ်ကျၢၤထီၣ် အဝဲသ့ၣ်အတၢ်နာ် ဒီးကဲထီၣ်တၢ်ဂံၢ်တၢ်ဘါ လၢအဝဲသ့ၣ်အဂီၢ်လီၤ. ဒ်သိး ပတၢ်သိၣ်လိ ကကဲဘျုးဒ်န့ၣ်အဂီၢ် ပမၤအီၤကသ့ဒ်လဲၣ်.
၉ ဖဲပစံၣ်တဲၤတဲလီၤတၢ်အခါ ပသူလံာ်စီဆှံ ဒီးပပၠးပှၤဂၤလၢ ယဟိဝၤယွၤအမံၤသ့ဝဲလီၤ. တကးဒံးဘၣ် ပဟ့ၣ်လီၤအဝဲသ့ၣ် လံာ်လဲၢ်တဖၣ်, ပၠးအဝဲသ့ၣ် တၢ်ဂီၤမူတဖၣ် ဒီးတၢ်ဂ့ၢ်တၢ်ကျိၤတဖၣ်လၢ ပပှာ်ယဲၤသန့အပူၤ သ့ဝဲလီၤ. တၢ်သ့ၣ်တဖၣ်အံၤ ကဲထီၣ်တၢ်လၤကပီၤ လၢယဟိဝၤယွၤအဂီၢ်လီၤ. ဒီးလၢတၢ်မၤအလီၢ်, လၢကၠိ မ့တမ့ၢ် ဖဲပဟးထီၣ်ဟးလီၤအခါ ပအိၣ်ဒီး တၢ်ခွဲးတၢ်ယာ်လၢ ပကတဲဘၣ်ပှၤဂၤလၢ ကစၢ်ယွၤအဂ့ၢ် ဒီးအဝဲမ့ၢ် ပှၤဒ်လဲၣ်တဂၤလဲၣ်န့ၣ်လီၤ. ပတဲဘၣ်အဝဲသ့ၣ် ဘၣ်ဃးဒီး တၢ်လၢယဟိဝၤယွၤ ကမၤဝဲလၢဟီၣ်ခိၣ်ဒီး ပှၤဟီၣ်ခိၣ်ဖိအဂီၢ်သ့လီၤ. ဒီးဖဲအဝဲသ့ၣ် နၢ်ဟူဘၣ် တၢ်သ့ၣ်တဖၣ်အံၤအခါ ဘၣ်သ့ၣ်သ့ၣ် အဝဲသ့ၣ် ကသ့ၣ်ညါဘၣ်ဝဲ အဆိကတၢၢ်တဘျီလၢ ယဟိဝၤယွၤ အဲၣ်ပှၤထဲလဲၣ်န့ၣ်လီၤ. ဖဲပတဲဘၣ်ပှၤဂၤလၢ တၢ်မ့ၢ်တၢ်တီလၢ ဘၣ်ဃးဒီး ပပၢ်လၢအပှဲၤဒီး တၢ်အဲၣ်တၢ်ကွံတဂၤအံၤ အဂ့ၢ်အခါန့ၣ် မ့ၢ်ဒၣ်ပပာ်စီဆှံ ယဟိဝၤယွၤအမံၤလီၤ. ပမၤစၢၤ အဝဲသ့ၣ် ဒ်သိးအဝဲသ့ၣ် ကနၢ်ပၢၢ်ထီၣ်ဝဲလၢ တၢ်ဂ့ၢ်လၢပှၤဂၤ တဲဘၣ်အဝဲသ့ၣ် ဘၣ်ဃးဒီး ယဟိဝၤယွၤန့ၣ် မ့ၢ်ဝဲတၢ်လံၣ်တၢ်လီန့ၣ်လီၤ. တၢ်ဂ့ၢ်လၢပသိၣ်လိပှၤဂၤ လၢအဟဲလၢ လံာ်စီဆှံအပူၤန့ၣ် ကဲထီၣ်တၢ်လၢ အမၤမုာ်အဝဲသ့ၣ် အသးသ့လီၤ.—ယၡါယၤ ၆၅:၁၃, ၁၄.
တၢး၀၉ ၅/၁ ၁၄ ¶၄
တၢ်ကတိၤဒိလၢ လံာ်စီဆှံအပူၤန့ၣ်—မ့ၢ်နနၢ်ပၢၢ်အီၤဧါ
လံာ်စီဆှံ ထိၣ်သတြီၤဝဲ ယဟိဝၤယွၤ ဒီးတၢ်လၢအသးသမူတအိၣ်တဖၣ်လီၤ. ပာ်ဖျါထီၣ်ဝဲ ကစၢ်ယွၤလၢ “အံၣ်စရ့လးအလၢၢ်,” “လ့” ဒီး “တၢးထီၣ်ထီ” လီၤ. (၂ ၡမူၤအ့လး ၂၃:၃; စံးထီၣ်ပတြၢၤ ၁၈:၂; ၅ မိၤၡ့ ၃၂:၄) လီၤဂာ်လိာ်အသးဒ်လဲၣ်. လၢၢ်ဖးဒိၣ်တဖျၢၣ်န့ၣ် အိၣ်ဝဲဂၢၢ်ဂၢၢ်ကျၢၤကျၢၤ ဒီးတဟူးတဝးဘၣ် ဒ်န့ၣ်အသိး ယဟိဝၤယွၤန့ၣ် မ့ၢ်ဝဲတၢ်ဒီသဒၢလၢနဂီၢ် ဒ်လၢၢ်ဖးဒိၣ်တဖျၢၣ်အသိး လၢတဟူးတဝးနီတဘျီဘၣ်.
တၢး၀၁ ၁၀/၁ ၉ ¶၇
ဖဲနသိၣ်လိနဖိတဖၣ်အခါ ကွၢ်လိမၤဒိး ယဟိဝၤယွၤ
၇ ဆိကမိၣ်ကွၢ် ယဟိဝၤယွၤ ပာ်ဖျါထီၣ်အတၢ်အဲၣ်လၢ ပှၤအံၣ်စရ့လးဖိတဖၣ် အဖီခိၣ်န့ၣ်တက့ၢ်. ဒ်သိးစီၤမိၤၡ့ ကပာ်ဖျါထီၣ်ဝဲလၢ ယဟိဝၤယွၤ အဲၣ်ပှၤအံၣ်စရ့လးဖိလၢ ဘၣ်တၢ်သူၣ်ထီၣ်အီၤသီသီတဒူၣ်အံၤအဂီၢ် အဝဲသူဝဲ တၢ်ကတိၤဒိလၢ အဂ့ၤဒိၣ်မးတခါလီၤ. ပဖးဘၣ်လၢ “ဒ်လံာ်ကြီကြာ်ထိၣ်ဂဲၤအသွံ, ဟုအဖိ, ယၤထီၣ်အဒံးဆ့, ဟံးန့ၢ်အီၤ, စိာ်ထီၣ်အီၤလၢအဒံးဆ့အဖီခိၣ်အသိး ယွၤဆှၢအီၤ [စီၤယၤကိာ်] တဂၤဃီ” လီၤ. (၅ မိၤၡ့ ၃၂:၉, ၁၁, ၁၂) ဖဲလံာ်ကြီကြာ်အမိၢ်တဖၣ် သိၣ်လိဝဲ အဖိလၢကယူၤအခါ အဝဲသ့ၣ် တပျုၢ်ထီၣ်အဒံးဆ့ “ထိၣ်ဂဲၤအသွံ” ဒ်သိးအဖိတဖၣ် ကယူၤဝဲအဂီၢ်လီၤ. ဖဲအဖိတဖၣ် ယူၤထီၣ်လၢအသွံပူၤ လၢလၢၢ်ဖးထီအဖီခိၣ် ဒီးယူၤလီၤလၢတၢ်ဖီလာ်အခါ အမိၢ်န့ၣ်ယူၤဝဲလၢ “အဖီခိၣ်” လီၤ. ဖဲအဖိတဖၣ်ယူၤဝဲ ဒီးဖျါလၢကလီၤတဲာ်လၢ ဟီၣ်ခိၣ်လိၤအခါ အမိၢ်န့ၣ် ယူၤလီၤလၢ အဖိအဖီလာ် ဒီးပာ်ထီၣ်အဖိလၢ အဒံးဆ့အဖီခိၣ်လီၤ. ဒ်န့ၣ်အသိး ယဟိဝၤယွၤ စ့ၢ်ကီးအံးထွဲကွၢ်ထွဲ ပှၤအံၣ်စရ့လးဖိလၢ ဘၣ်တၢ်သူၣ်ထီၣ်အီၤသီသီတဒူၣ်အံၤ လၢတၢ်အဲၣ်တၢ်ကွံအပူၤလီၤ. ဒီးကစၢ်ယွၤ ဟ့ၣ်အဝဲသ့ၣ်လၢ စီၤမိၤၡ့ အတၢ်သိၣ်တၢ်သီလီၤ. (စံးထီၣ်ပတြၢၤ ၇၈:၅-၇) ကစၢ်ယွၤ အံးထွဲကွၢ်ထွဲ အဝဲသ့ၣ်လၢ တၢ်သူၣ်အိၣ်သးအိၣ်နီၢ်နီၢ် ဒီးအိၣ်ကတဲာ်ကတီၤအသးလၢ ကမၤပူၤဖျဲးအဝဲသ့ၣ် ဖဲအဝဲသ့ၣ်ထံၣ်ဘၣ် တၢ်ကီတၢ်ခဲအခါလီၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၄ ၉/၁၅ ၂၇ ¶၁၂
လံာ်စီဆှံ အတၢ်ပာ်ဖျါလၢလံာ် ၅ မိၤၡ့ အဂီၢ်
၃၁:၁၂. လၢတၢ်အိၣ်ဖှိၣ်ရိဖှိၣ်န့ၣ် ပှၤသးစၢ်တဖၣ် ကြၢးဆ့ၣ်နီၤဒီး ပှၤသးပှၢ်တဖၣ် လၢကဒိကနၣ် ဒီးမၤလိတၢ်အဂီၢ်လီၤ.
တၢး၀၇ ၅/၁၅ ၁၅-၁၆
နဖိတဖၣ် ကွၢ်နဒိနတဲာ်
ဒ်သိးနဖိတဖၣ် ကအဲၣ် ဒီးကပျံၤ ယဟိဝၤယွၤအဂီၢ် နမၤစၢၤအဝဲသ့ၣ် ကသ့ဒ်လဲၣ်. ဘၣ်ဃးဒီး တၢ်သံကွၢ်အံၤ အတၢ်စံးဆၢန့ၣ် ပထံၣ်န့ၢ်အီၤဖဲ တၢ်သိၣ်တၢ်သီလၢ ယဟိဝၤယွၤ ဟ့ၣ်လီၤဝဲ ပှၤအံၣ်စရ့လးဖိတဖၣ် ခီဖျိလၢစီၤမိၤၡ့န့ၣ်လီၤ. ပှၤအံၣ်စရ့လးဖိ မိၢ်ပၢ်သ့ၣ်တဖၣ်န့ၣ် ကစၢ်ယွၤ မၤလိာ် အဝဲသ့ၣ်လၢ “နဘၣ်အဲၣ်ယွၤနကစၢ်လၢ နသူၣ်ကံၢ်သးလဲ ဒီးနသးဒီဖျၢၣ်ညါ ဒီးနဂံၢ်နဘါခဲလၢာ်လီၤ ဒီးတၢ်ကတိၤတဖၣ်န့ၣ်လၢ ယမၤလိာ်နၤလၢ မုၢ်မဆါတနံၤအံၤ ဘၣ်အိၣ်လၢနသးကံၢ်ပူၤလီၤ. ဒီးနဘၣ်သိၣ်က့ၤ နဖိနလံၤလၢအီၤ ဒီးတုၤနဆ့ၣ်နီၤလၢ နဟံၣ်ပူၤ ဒီးတုၤနပိာ်ကျဲ ဒီးတုၤနမံလီၤ ဒီးတုၤနဂဲၤဆၢထၢၣ်ဒီး နဘၣ်ကတိၤတၢ်လၢအဂ့ၢ်အကျိၤလီၤ.”—၅ မိၤၡ့ ၆:၅-၇.
လံာ်စီဆှံအဆၢတဖၣ်အံၤ သိၣ်လိမိၢ်ပၢ်တဖၣ် တၢ်ဂ့ၢ်လၢအရ့ဒိၣ်န့ၣ်လီၤ. တၢတထံၣ်န့ၣ် မိၢ်ပၢ်သ့ၣ်တဖၣ် ကဘၣ်ပာ်လီၤဒိဂ့ၤတဲာ်ဘၣ်လီၤ. ဒ်သိးနကသိၣ်လိ နဖိတဖၣ်လၢကအဲၣ် ယဟိဝၤယွၤအဂီၢ် နနီၢ်ကစၢ်ဒၣ်ဝဲ နကဘၣ်အဲၣ် ယဟိဝၤယွၤ ဒီးအကလုၢ်ကထါန့ၣ် ကဘၣ်အိၣ်လၢနသးပူၤလီၤ. ဘၣ်မနုၤအဃိ မ့ၢ်တၢ်လၢအရ့ဒိၣ်လဲၣ်. မ့ၢ်လၢနမ့ၢ် အဝဲသ့ၣ်အသရၣ်လၢ အဆိကတၢၢ်အဃိလီၤ. နဒိနတဲာ်န့ၣ် အဘျုးအိၣ်လၢ အဝဲသ့ၣ်အတၢ်အိၣ်မူအဂီၢ်လီၤ. တၢ်အဂၤလၢ ကဒိၣ်စိလၢ နဖိသ့ၣ်တဖၣ်အဖီခိၣ် အါန့ၢ်ဒံး နဒိနတဲာ်န့ၣ် တအိၣ်နီတမံၤဘၣ်.
နဖီတၢၣ်, နတၢ်ဆိကမိၣ်, တၢ်လၢနပာ်လုၢ်ပာ်ပှ့ၤ ဒီးတၢ်လၢ နဘၣ်သူၣ်ဘၣ်သးတဖၣ်န့ၣ် အိၣ်ဖျါထီၣ်လၢ နတၢ်စံးတၢ်ကတိၤ ဒီးနတၢ်ဖံးတၢ်မၤတဖၣ်အပူၤလီၤ. (ရိမ့ၤ ၂:၂၁, ၂၂) ဖိသၣ်တဖၣ်န့ၣ် ကွၢ်လိမိၢ်ပၢ်တဖၣ်အဒိအတဲာ် စးထီၣ်လၢအအိၣ်ဖျဲၣ်ထီၣ်လံၤလံၤလီၤ. တၢ်လၢအရ့ဒိၣ်လၢ မိၢ်ပၢ်အဂီၢ် မ့ၢ်မနုၤလဲၣ်န့ၣ် အဝဲသ့ၣ်သ့ၣ်ညါဝဲ ဒီးတၢ်သ့ၣ်တဖၣ်အံၤ ညီနုၢ်ကဲထီၣ် တၢ်အရ့ဒိၣ်လၢ အဝဲသ့ၣ်အဂီၢ်စ့ၢ်ကီးလီၤ. နမ့ၢ်အဲၣ်ယဟိဝၤယွၤနီၢ်နီၢ်န့ၣ် နဖိတဖၣ်သ့ၣ်ညါဝဲလီၤ. အဒိ, အဝဲသ့ၣ် ကထံၣ်ဝဲ တၢ်ဖးလံာ်စီဆှံ ဒီးတၢ်မၤလိလံာ်စီဆှံန့ၣ် မ့ၢ်တၢ်အရ့ဒိၣ်လၢ နဂီၢ်လီၤ. အဃိအဝဲသ့ၣ် ကသ့ၣ်ညါဝဲလၢ နပာ်ဆိယွၤအဘီအမုၢ်လၢ နတၢ်အိၣ်မူအပူၤလီၤ. (မၤသဲ ၆:၃၃) နထီၣ်တၢ်အိၣ်ဖှိၣ် ဒီးနပၣ်ဃုာ်လၢ တၢ်စံၣ်တဲၤတဲလီၤ ဘီမုၢ်တၢ်သးခုကစီၣ် တၢ်မၤအပူၤ ထီဘိန့ၣ် မ့ၢ်ဒၣ်နပာ်ဖျါထီၣ်န့ၢ် နဖိတဖၣ်လၢ တၢ်မၤယဟိဝၤယွၤအတၢ်မၤ မ့ၢ်တၢ်အရ့ဒိၣ် ကတၢၢ်လၢနဂီၢ်လီၤ.—မးသဲ ၂၈:၁၉, ၂၀; ဧ့ၤဘြံၤ ၁၀:၂၄, ၂၅.