၉. နီၢ်ဃးနၤသ့ၣ်ညါဝဲလၢ နီၢ်ပနံးနၤကမၤဆါအသး သနာ်က့အဝဲလဲၤဒံးဆူ ဝ့ၢ်ၡံလိၤအဃိ ပမၤလိန့ၢ်တၢ်လၢအအိၣ်ဒ်လဲၣ်.

^၉ ဖဲမုၢ်ဆ့ၣ်ဝါထီၣ်ဂီၤဂီၤအဆၢကတီၢ်န့ၣ် ဟံၣ်ဖိဃီဖိတဒူၣ်အံၤ ဘၣ်ကတဲာ်ကတီၤထီၣ်တၢ် အိၣ်ဒံးအါမးလီၤ. ခဲအံၤ လၢတၢ်လဲၤတၢ်က့ၤအဂီၢ်န့ၣ် ပှၤကိးဂၤဒဲးဃုာ်ဒီးဖိဒံဖိသၣ်တဖၣ် ကတဲာ်ကတီၤထီၣ်အသးဝံၤဝဲလံ. ဟံၣ်ဖိဃီဖိတဒူၣ်အံၤ ဒ်သိးကလဲၤတုၤဝဲလၢ ဝ့ၢ်ၡံလိၤအဂီၢ်န့ၣ် အဝဲသ့ၣ်ဘၣ်လဲၤခီဂာ်ဝဲ ထံကီၢ်အ့ဖရဲၣ်လၢအပှဲၤဒီးတၢ်လူၢ် အမံးလာ် ၂၀ ဘျဲၣ်န့ၣ်လီၤ.b လၢတၢ်န့ၣ်အဃိ ဒ်သိးအဝဲသ့ၣ် လဲၤကတုၤလၢဝ့ၢ်ၡံလိၤအဂီၢ်န့ၣ် ဘၣ်ဟးဝဲလၢအခီၣ် တသီခံသီကျဲန့ၣ်လီၤ. ဖဲန့ၣ်အဆၢကတီၢ် နီၢ်ဃးနၤသ့ၣ်ညါဝဲလီၤတံၢ်လီၤဆဲးလၢ နီၢ်ပနံးနၤကမၤဆါအသးလီၤ. ဘၣ်ဆၣ် နီၢ်ဃးနၤတအိၣ်တ့ၢ်လၢဟံၣ်ဘၣ်. နီၢ်ဃးနၤ ပာ်လီၤဒိဂ့ၤတဲာ်ဘၣ် လၢယွၤအခ့အပှၤတဖၣ်အဂီၢ်လီၤ. ပမ့ၢ်ထုးယံၤထီၣ်ပသးဒီးယဟိဝၤယွၤ ခီဖျိလၢပှၤဂၤမၤကမၣ်ဘၣ်ပှၤအဃိန့ၣ် တကြၢးဝဲဘၣ်ဝဲဘၣ်. ဒီးပမ့ၢ်အိၣ်ဒၣ်လၢပကျိာ်ပကျာ်လၢဟံၣ်န့ၣ် ပတဒိးန့ၢ်ဘၣ်နီၢ်သး အတၢ်ဂံၢ်တၢ်ဘါ လၢပကလဲၤခီဖျိတၢ်ကီတၢ်ခဲအဂီၢ်ဘၣ်.