ခရံာ်ဖိအတၢ်အိၣ်မူဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိတၢ်ဂ့ၢ်ဘျးစဲ
လါစဲးပတ့ဘၢၣ် ၅-၁၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ စီၤပၤ ၉-၁၀
“စံးပတြၢၤယဟိဝၤယွၤ လၢအတၢ်ကူၣ်သ့အဃိ”
တၢး၉၉ ၇/၁ ၃၀ ¶၆
တၢ်လဲၤဟးအိၣ်သကီးလၢ အကဲဘျုးဒိၣ်မးတခါ
ဖဲၡဘၤဘီမုၢ် အနီၢ်ပၤမုၣ် လဲၤအိၣ်သကိး စီၤၡလိၤမိၤအခါ အဝဲသံကွၢ်ဝဲ စီၤၡလိၤမိၤ “တၢ်သံကွၢ်လၢ အကီဒိၣ်မးတဖၣ်.” (၁ စီၤပၤ ၁၀:၁) ဧ့ၤဘြံၤအတၢ်ကတိၤတဖျၢၣ်အံၤ ပှၤကွဲးကျိာ်ထံက့ၤအီၤလၢ “တၢ်ကတိၤလီၤဘၢ” သ့စ့ၢ်ကီး. ဘၣ်ဆၣ် တၢ်ကတိၤတဖျၢၣ်အံၤန့ၣ် တအဲၣ်ဒိးတဲဝဲလၢ နီၢ်ပၤမုၣ်တဂၤအံၤ သံကွၢ်ဝဲ စီၤၡလိၤမိၤ တၢ်သံကွၢ်လၢ အတကဲဘျုးဘၣ်န့ၣ်ဘၣ်. ပထံၣ်ဘၣ်တၢ်ကတိၤတဖျၢၣ်အံၤဖဲ စံးထီၣ်ပတြၢၤ ၄၉:၄ အပူၤစ့ၢ်ကီး. ဒီးဖဲန့ၣ်န့ၣ် အအဲၣ်ဒိးတဲဝဲ ဘၣ်ဃးဒီးတၢ်ဒဲးဘး, တၢ်သံ ဒီးတၢ်ပှ့ၤက့ၤ. အဃိ လီၤဂာ်လၢ နီၢ်ပၤမုၣ်တဂၤအံၤန့ၣ် တဲသကီးဝဲ တၢ်ဂ့ၢ်လၢ အဒိၣ်အယိာ် ဒ်သိးဒီး ကမၤကွၢ်ဝဲ စီၤၡလိၤမိၤ အတၢ်ကူၣ်သ့အိၣ်အါထဲလဲၣ်. လံာ်စီဆှံ တဲဝဲလၢ ၡဘၤဘီမုၢ် အနီၢ်ပၤမုၣ် “တဲအီၤ တၢ်လၢအအိၣ်လၢ အသးပူၤ ကိးမံၤဒဲးလီၤ.” ဒီးစီၤၡလိၤမိၤ “စံးဆၢ နီၢ်ပၤမုၣ် အတၢ်သံကွၢ် ခဲလၢာ်လီၤ. တၢ်လၢအကီတလၢ” လၢစီၤပၤၡလိၤမိၤ “ကတဲနၢ်ပၢၢ်အီၤန့ၣ် တအိၣ်နီတမံၤဘၣ်.”—၁ စီၤပၤ ၁၀:၂, ၃.
တၢး၉၉ ၁၁/၁ ၂၀ ¶၆
ဟ့ၣ်တၢ်လၢ တၢ်သးအိၣ်အပူၤ
နီၢ်ပၤမုၣ်တဂၤအံၤန့ၣ် ခီဖျိ တၢ်လၢအထံၣ်ဘၣ်ဝဲ ဒီးနၢ်ဟူဘၣ်ဝဲအဃိ ကမၢကမၣ်ဝဲဒိၣ်မး. ဒီးလၢတၢ်ဆီၣ်လီၤသးအပူၤ အဝဲတဲဘၣ် စီၤၡလိၤမိၤလၢ “နပှၤဂီၢ်မုၢ် ဒီးနခ့နပှၤတဖၣ်လၢ အမၤတၢ်လၢ နမဲာ်ညါထီဘိ ဒီးနၢ်ဟူဘၣ် နတၢ်ကူၣ်သ့န့ၣ် ကသးခုဝဲလီၤ.” (၁ စီၤပၤ ၁၀:၄-၈) အဝဲတတဲဝဲလၢ စီၤၡလိၤမိၤ အခ့အပှၤတဖၣ် သးခုန့ၣ် မ့ၢ်လၢတၢ်ထူးတၢ်တီၤလၢ အအိၣ်ဝးတရံး အဝဲသ့ၣ်အဃိဘၣ်. အဝဲတဲဝဲလၢ စီၤၡလိၤမိၤ အခ့အပှၤတဖၣ် သးခုန့ၣ် မ့ၢ်လၢအနၢ်ဟူဘၣ်ဝဲ စီၤၡလိၤမိၤ အတၢ်ကူၣ်သ့လၢ အဟဲလၢ ကစၢ်ယွၤအအိၣ်အဃိ. ကစၢ်ယွၤ အခ့အပှၤ လၢမုၢ်မဆါတနံၤအံၤန့ၣ် ဒိးန့ၢ်ဘၣ်ဝဲ တၢ်ကူၣ်သ့လၢ အဟဲလၢ တၢ်ဘၣ်တ့ကစၢ် ဒီးအဖိခွါအအိၣ်အဃိ နီၢ်ပၤမုၣ်တဂၤအံၤ ကဲထီၣ်တၢ်အဒိအတဲာ်လၢအဂ့ၤ လၢ ကစၢ်ယွၤ အခ့အပှၤတဖၣ်အဂီၢ်ဒိၣ်မး.
တၢး၉၉ ၇/၁ ၃၀-၃၁
တၢ်လဲၤဟးအိၣ်သကီးလၢ အကဲဘျုးဒိၣ်မးတခါ
ၡဘၤဘီမုၢ် အနီၢ်ပၤမုၣ် ထံၣ်ဘၣ်စီၤၡလိၤမိၤ အတၢ်ကူၣ်သ့ ဒီးအတၢ်ထူးတၢ်တီၤလၢ အဘီအမုၢ်အပူၤအဃိ “အသးလီၤကတုၤဝဲ တုၤလၢ အတဲတၢ်မး တထီၣ်လၢၤဘၣ်.” (၁ စီၤပၤ ၁၀:၄, ၅) လံာ်စီဆှံ အတၢ်ကတိၤတဖျၢၣ်အံၤန့ၣ် ပှၤတနီၤတဲဝဲလၢ အအဲၣ်ဒိးတဲဝဲ နီၢ်ပၤမုၣ်တဂၤအံၤ “ကသါတထီၣ်” လၢၤဘၣ်. မ့မ့ၢ် ပှၤကူၣ်ဘၣ်ကူၣ်သ့တဂၤ တဲဝဲလၢ နီၢ်ပၤမုၣ်တဂၤအံၤ သးပ့ၤနီၣ်ဘၣ်အသး. ဒ်လဲၣ်ဂ့ၤဒ်လဲၣ်ဂ့ၤ ပသ့ၣ်ညါဘၣ်လၢ နီၢ်ပၤမုၣ်တဂၤအံၤ ကမၢကမၣ် ခီဖျိတၢ်လၢ အထံၣ်ဒီးနၢ်ဟူဝဲတဖၣ်အဃိ. အဝဲတဲဝဲလၢ စီၤပၤၡလိၤမိၤ အခ့အပှၤတဖၣ်န့ၣ်သးခု, မ့ၢ်လၢ အနၢ်ဟူဘၣ်ဝဲ စီၤၡလိၤမိၤ အတၢ်ကူၣ်သ့အဃိ. ဒီးအဝဲစံးထီၣ်ပတြၢၤ ယဟိဝၤယွၤ, မ့ၢ်လၢယဟိဝၤယွၤ ပာ်ထီၣ် စီၤၡလိၤမိၤလၢစီၤပၤအဃိ. ဒီးအဝဲဟ့ၣ်ဝဲ စီၤၡလိၤမိၤ တၢ်ဟ့ၣ်လၢ အလုၢ်ဒိၣ်ပှ့ၤဒိၣ်တဖၣ်. ဒီးထဲဒၣ်ထူလၢ အဟ့ၣ်ဝဲ စီၤၡလိၤမိၤန့ၣ် လီၤလၢဝဲ စ့ဒီၤလၤလၢပစိၤခဲအံၤ အကကွဲၢ်လွံၢ်ဆံ. စီၤၡလိၤမိၤနာ်က့ ဟ့ၣ်က့ၤဝဲ နီၢ်ပၤမုၣ်လၢ “ကယဲၢ်တၢ်လၢ နီၢ်ပၤမုၣ်လီကီဝဲဒီး ဃ့ဝဲတဖၣ်လီၤ.”—၁ စီၤပၤ ၁၀:၆-၁၃.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၈ ၁၁/၁ ၂၂ ¶၄-၆
မ့ၢ်နသ့ၣ်ညါဧါ
စီၤၡလိၤမိၤ အိၣ်ဒီးထူအါထဲန့ၣ် အနီၢ်ကီၢ်ဧါ
လံာ်စီဆှံတဲဝဲလၢ ဝ့ၢ်စိၢ် အစီၤပၤ စီၤဃံရၣ် ဆှၢလီၤန့ၢ်ဝဲ စီၤၡလိၤမိၤ ထူလွံၢ်တၣ် (tons) ဒီးၡဘၤဘီမုၢ် အနီၢ်ပၤမုၣ်နာ်က့ ဟ့ၣ်ဝဲစီၤပၤၡလိၤမိၤ ထူလွံၢ်တၣ်စ့ၢ်ကီး. တကးဒံးဘၣ် ပှၤဟဲစိာ်န့ၢ် စီၤၡလိၤမိၤလၢ အိဖ့ၢ်အထူ ၁၅ တၣ်. လံာ်စီဆှံတဲဝဲလၢ “လၢတနံၣ်အတီၢ်ပူၤ ထူလၢပှၤဟဲစိာ်လၢ စီၤၡလိၤမိၤအအိၣ်န့ၣ် အတယၢၢ်အိၣ်ဝဲ အတၤလၣ် ၆၆၆ လီၤ.” အဃိ ထူန့ၣ် ကအိၣ်ဝဲ ၂၅ တၣ်ဘျဲၣ်. (၁ စီၤပၤ ၉:၁၄, ၂၈; ၁၀:၁၀, ၁၄) ထူအိၣ်အါထဲအံၤန့ၣ် မ့ၢ်အမ့ၢ်စ့ၢ်ကီးဧါ. စီၤပၤလၢပျၢၤတဖၣ်န့ၣ် အထူအိၣ်အါထဲလဲၣ်.
တၢ်ကွဲးနီၣ်လၢပျၢၤလၢ ပှၤစိးပျၤအီၤလၢလၢၢ်အလိၤ လၢပှၤကူၣ်ဘၣ်ကူၣ်သ့တဖၣ် တဲဝဲလၢ ပနာ်န့ၢ်အီၤသ့န့ၣ် တဲဝဲလၢ အဲၤကူပတူးအစီၤပၤ ဖၤရိၤ သၢးမိ ၃ (ချ.ခ.န ၂၀၀၀) န့ၣ်ဟ့ၣ်မၤဘူၣ်လီၤဝဲ ထူ ၁၃.၅ တၣ်လၢ အၤမူၢ်ရၤ တၢ်လုၢ်ဟံၣ်လၢအအိၣ်လၢ ကၤနၤ. ဖဲ ချ.ခ.န ၈၀၀ န့ၣ် အၤၡူၢ် အစီၤပၤ ထံကလၤဖါစၤ ၃ ဒိးန့ၢ်ဘၣ်ဝဲ ထူ ၄ တၣ်လၢ ဝ့ၢ်စိၢ်အအိၣ်. ဒီးစၤရကိၣ် ၂ (Sargon II) နာ်က့ ဟ့ၣ်ဝဲ ဘၤဘူၤလိၣ် အယွၤတဖၣ်လၢ ထူထဲန့ၣ်စ့ၢ်ကီး. ကီၢ်မၤက့းဒနံ အစီၤပၤ ဖံလံး ၂ (ချ.ခ.န ၃၅၉-၃၃၆) စ့ၢ်ကီး တနံၣ်ဘၣ်တနံၣ်န့ၣ် ဒိးန့ၢ်ဘၣ်ဝဲ ထူ ၂၈ တၣ် လၢအဟဲလၢ ဖဲကၠံၢ်ယၢၤ ပှၤခူၣ်တၢ်ထူးတၢ်တီၤအလီၢ် လၢအအိၣ်လၢ သရ့း.
ဖဲဖံလံးအဖိခွါ အဲလ့ၤစါဒၢၤ သၢၤကြ့း (ချ.ခ.န ၃၃၆-၃၂၃) မၤနၢၤဝဲ ဖၢၡၢၣ် အဝ့ၢ်ၡူၡၤအခါ ဟံန့ၢ်ဝဲ ထူအတၣ် ၁,၁၈၀ ဒီးလၢဖၢၡၢၣ် ကီၢ်ဒီဘ့ၣ်အပူၤန့ၣ် အဝဲဟံန့ၢ်ဝဲထူန့ၣ် ကအိၣ်ဝဲ အတၣ် ၇,၀၀၀ ဃၣ်ဃၣ်. ပမ့ၢ်ထိၣ်သတြီၤကွၢ်ဒီး တၢ်သ့ၣ်တဖၣ်အံၤန့ၣ် စီၤၡလိၤမိၤအထူလၢ လံာ်စီဆှံ ပာ်ဖျါထီၣ်ဝဲန့ၣ် တမ့ၢ်တၢ်လၢ အတလီၤနာ်ဘၣ်.
လါစဲးပတ့ဘၢၣ် ၁၂-၁၈
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ စီၤပၤ ၁၁-၁၂
“ဃုထၢနသးသမူတံၤသကိး လီၤတံၢ်လီၤဆဲး”
“မတၤအိၣ်လၢ ယွၤအအိၣ်တခီလဲၣ်”
၇ ဖဲစီၤၡလိၤမိၤ အသးစၢ်ဒံးအခါ အတၢ်ရ့လိာ်သးဒီး ယဟိဝၤယွၤ ဂ့ၤဝဲလီၤ. လၢတၢ်န့ၣ်အဃိ ယဟိဝၤယွၤ ဟ့ၣ်အီၤတၢ်ကူၣ်သ့ ဒီးဟ့ၣ်အီၤမူဒါလၢ အရ့ဒိၣ်လၢ ကဘၣ်တ့ထီၣ် တၢ်လုၢ်ဟံၣ်လၢ ဝ့ၢ်ယရူၤၡလ့ၣ် အပူၤန့ၣ်လီၤ. ဘၣ်ဆၣ်လၢခံ စီၤၡလိၤမိၤ အတၢ်ရ့လိာ်သးဒီး ယဟိဝၤယွၤ ဟးဂီၤဝဲလီၤ. (၁ စီၤပၤ ၃:၁၂; ၁၁:၁, ၂) ကစၢ်ယွၤ အတၢ်သိၣ်တၢ်သီအိၣ်ဝဲလၢ စီၤပၤတဖၣ် တဘၣ် “မၤအါထီၣ်အမါတဖၣ်လၢ အဂီၢ်ဒၣ်ဝဲ, ဒ်သိးအသးသုတဃၣ်ကပၤ အသးတဂ့ၤ” န့ၣ်လီၤ. (၅ မိၤၡ့ ၁၇:၁၇) စီၤၡလိၤမိၤ တဒိကနၣ် တၢ်သိၣ်တၢ်သီတခါအံၤဘၣ်. ဒီးဟံအမါအဂၤ ၇၀၀ ဒီးအသံၣ်မါ ၃၀၀ လီၤ. (၁ စီၤပၤ ၁၁:၃) ဒီးကစၢ်ယွၤ အတၢ်သိၣ်တၢ်သီအိၣ်ဝဲလၢ အဝဲသ့ၣ် တဘၣ်ဆီဟံၣ်ဆီဃီဒီး ပှၤတခီဘီမုၢ်ဖိတဖၣ်ဘၣ်. ဘၣ်ဆၣ် ပိာ်မုၣ်အါဂၤလၢ အဝဲဟံန့ၢ်ဝဲန့ၣ် မ့ၢ်ဝဲပှၤတခီဘီမုၢ်ဖိ လၢ အဘူၣ်ထီၣ်ဘါထီၣ် ယွၤလၢအကမၣ်တဖၣ်အဃိ ပသ့ၣ်ညါဘၣ်လၢ အဝဲတဒိကနၣ် ယွၤအတၢ်သိၣ်တၢ်သီတခါအံၤ စ့ၢ်ကီးဘၣ်.—၅ မိၤၡ့ ၇:၃, ၄.
နဒီသဒၢနသး ကသ့ဒ်လဲၣ်
၆ မုၣ်ကီၤလံၢ်လၢအမ့ၢ် ပှၤလၢအပူထီၣ်တၢ်, ပှၤလၢအထီဒါ ကစၢ်ယွၤအတၢ်သိၣ်တၢ်သီ ဒီးအဲၣ်လီၤထဲအသးန့ၣ် အဲၣ်ဒိးဝဲလၢ ပကလီၤဂာ်ဒ်သိးဒီးအီၤလီၤ. ဘၣ်ဆၣ် မုၣ်ကီၤလံၢ်မၤဆူၣ်ပှၤ ဒ်န့ၣ်တန့ၢ်ဘၣ်. လၢတၢ်န့ၣ်အဃိ အဝဲကမၤဝဲလၢ ကျဲလၢအဂၤတဖၣ်လီၤ. အဒိ အဝဲသူဝဲ ပှၤလၢပခိၣ်ပဃၢၤ လၢအတၢ်ဆိကမိၣ် လီၤဂာ်ဒ်သိးဒီးအီၤတဖၣ်လီၤ. (၁ ယိၤဟၣ် ၅:၁၉) ပသ့ၣ်ညါလၢ တၢ်ရ့လိာ်သးလၢအအၢအသီန့ၣ်က “မၤအၢလီၤ” မ့တမ့ၢ် “မၤဘၣ်ဒိ” ပတၢ်ဆိကမိၣ် ဒီးပတၢ်မၤတဖၣ်ဒၣ်လဲာ် မုၣ်ကီၤလံၢ်မုၢ်လၢ်ဝဲလၢ ပကရ့တံၤရ့သကိးဒီး ပှၤတဖၣ်န့ၣ်ဒံးလီၤ. (၁ ကရံၣ်သူး ၁၅:၃၃) စီၤၡလိၤမိၤ လီၤဘၣ်လၢ တၢ်လ့ပစီအံၤအပူၤလီၤ. အဝဲဆီဟံၣ်ဆီဃီဒီး ပှၤပိာ်မုၣ်လၢ အဘူၣ်ထီၣ်ဘါထီၣ် တၢ်ဂီၤတၢ်ဖှီၣ်တဖၣ် ဒီးလၢခံန့ၣ်အမါတဖၣ် လွဲန့ၢ်အီၤဒီး “ဘိးဃၣ်ကွံာ်အသး” လၢကယံၤထီၣ်ဒီး ယဟိဝၤယွၤလီၤ.—၁ စီၤပၤ ၁၁:၃.
“မတၤအိၣ်လၢ ယွၤအအိၣ်တခီလဲၣ်”
၉ ဘၣ်ဆၣ် ယဟိဝၤယွၤ တကွၢ်ကပာ်ကွံာ် အတၢ်ကမၣ်ဘၣ်. လံာ်စီဆှံတဲဝဲလၢ “ယွၤအသးထီၣ်ဘၣ် စီၤၡလိၤမိၤ အဂ့ၢ်ဒ်အံၤ, အသးဃၣ်ကွံာ်လံအသးလၢယွၤ” အအိၣ်အဃိလီၤ. လၢအပူၤကွံာ်န့ၣ် ယဟိဝၤယွၤဂုာ်ကျဲးစၢး မၤစၢၤအီၤခီဖျိ “အိၣ်ဖျါလၢအမဲာ်ညါခံဘျီလံ. ဒီးမၤလိာ်ဝဲလၢ တၢ်တမံၤန့ၣ်အဂ့ၢ်အကျိၤ, ဒ်သိးအသုတပိာ် ကစၢ်အဂၤတဖၣ်အခံတဂ့ၤလီၤ. ဒီးတတိၢ်န့ၢ်ဘၣ်တၢ်လၢ ယွၤမၤလိာ်အီၤ” ဘၣ်. လၢတၢ်န့ၣ်အဃိ အဝဲတဒိးန့ၢ်ဘၣ်ကစၢ်ယွၤ အတၢ်ဘၣ်သးလၢၤဘၣ်. ယဟိဝၤယွၤ တဟ့ၣ်အခွဲးလၢ စီၤၡလိၤမိၤအစၢၤအသွဲၣ် ကပၢဝဲပှၤအံၣ်စရ့လးဖိ ကလုာ်ဒူၣ်ခဲလၢာ်လၢၤဘၣ်. ဒီးအဝဲသ့ၣ် ထံၣ်ဘၣ်ဝဲ တၢ်ကီတၢ်ခဲဒိၣ်ဒိၣ်မုၢ်မုၢ် လၢအနံၣ်လၢအကယၤတဖၣ်လီၤ.—၁ စီၤပၤ ၁၁:၉-၁၃.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
အဝဲတန့ၢ်ဘၣ် ယွၤအတၢ်ဘၣ်သးလၢၤဘၣ်
စီၤရဃၤဘၣ် ရဲၣ်လီၤကျဲၤလီၤဝဲ အသုးမုၢ်သံၣ်ဘိတဖၣ် ဒ်သိးကလဲၤဒုးဝဲ ပှၤလၢအပူထီၣ်ထီဒါတၢ်တဖၣ်န့ၣ်လီၤ. ဘၣ်ဆၣ် ယဟိဝၤယွၤဆှၢလီၤဝဲ ဝံစီၤၡမၤဒ်သိး ကတဲဘၣ်အဝဲသ့ၣ်လၢ “သုတလဲၤထီၣ်, ဒီးသုတဒုး သုးဒီး သုဒီပုၢ်ဝဲၢ်ပှၤအံၣ်စရ့လးဖိတဂ့ၤ. က့ၤက့ၤတဂၤဆူအဟံၣ်ဒၣ်ဝဲ, တဂၤဆူအဟံၣ်ဒၣ်ဝဲတက့ၢ်. အဂ့ၢ်ဒ်အံၤ, တၢ်တမံၤအံၤ ဟဲလၢယၤလီၤ.”—၁ စီၤပၤ ၁၂:၂၁-၂၄.
စီၤရဃၤဘၣ် ကဒိကနၣ် ယဟိဝၤယွၤအကလုၢ်အဂီၢ် မ့ၢ်တၢ်ညီလၢအဂီၢ်ဧါ. ပှၤကထံၣ် စီၤပၤအသီတဂၤအံၤဒ်လဲၣ်. လၢအခီၣ်ထံးန့ၣ် အဝဲတဲဝဲလၢ ကစံၣ်ညီၣ်ပှၤဂၤခီဖျိ ကတီၢ်ဝဲလၢ “နီၢ်တီၢ်တဖၣ်” ဘၣ်ဆၣ်ခဲအံၤ အဝဲတမၤဆၢ ပှၤလၢပူထီၣ်ထီဒါတၢ်တဖၣ် တၢ်နီတမံၤဘၣ်အဃိ ပှၤကထံၣ်အီၤဒ်လဲၣ်. (ထိၣ်သတြီၤဒီး ၂ ကွဲးနီၣ်တၢ် ၁၃:၇ တက့ၢ်.) ဒ်လဲၣ်ဂ့ၤဒ်လဲၣ်ဂ့ၤ စီၤပၤဒီးအသုးမုၢ်သံၣ်ဘိတဖၣ် “ဒိကနၣ်ယွၤအကလုၢ်, ဒီးက့ၤက့ၤဝဲဒ်သိးကဟးထီၣ်, ဒ်ယွၤအကလုၢ်အသိးန့ၣ်လီၤ.”
ပန့ၢ်ဘၣ်တၢ်မၤလိဒ်လဲၣ်. ပှၤဂၤမ့ၢ်ထံၣ်ပှၤ ဒ်လဲၣ်ဂ့ၤဒ်လဲၣ်ဂ့ၤ ပမ့ၢ်ဒိကနၣ် ယွၤအကလုၢ်န့ၣ် ပကမ့ၢ်ပှၤကူၣ်တၢ်သ့လီၤ. ပမ့ၢ်ဒိကနၣ်ယွၤအကလုၢ်န့ၣ် အဝဲကဆိၣ်ဂ့ၤပှၤထီဘိလီၤ.—၅ မိၤၡ့ ၂၈:၂.
စီၤရဃၤဘၣ် အိၣ်ဒီးတၢ်ဒိကနၣ်အဃိ ဒိးန့ၢ်ဘၣ်တၢ်ဆိၣ်ဂ့ၤဧါ. အဝဲကဲဘၣ်ဒံးစီၤပၤလၢ ယူဒၤဒီးဘံၣ်ယၤမံၣ် အကလုာ်ဒူၣ်အဖီခိၣ်လီၤ. တကးဒံးဘၣ် အဝဲဆၢတဲာ်လီၤအသးလၢ ကသူၣ်ထီၣ်ဝဲ ဝ့ၢ်အသီတဖၣ်လီၤ. အဝဲမၤဂၢၢ်ကျၢၤထီၣ်ဝဲဝ့ၢ်တဖၣ် “ဆူၣ်ဆူၣ်ကလဲာ်” လီၤ. (၂ ကွဲးနီၣ်တၢ် ၁၁:၅-၁၂) ဒီးအဝဲဒိကနၣ်ဝဲ ယဟိဝၤယွၤအတၢ်သိၣ်တၢ်သီ တစိၢ်တလီၢ်လီၤ. လၢတၢ်န့ၣ်အဃိ ပှၤအံၣ်စရ့လးဖိ အဒူၣ်တဆံလၢ အဘူၣ်ထီၣ်ဘါထီၣ်ဝဲ တၢ်ဂီၤတၢ်ဖှီၣ်တဖၣ်န့ၣ် ဟဲက့ၤကဒါက့ၤဝဲဆူ ဝ့ၢ်ယရူၤၡလ့ၣ် ဒ်သိးကဆီၣ်ထွဲဝဲ စီၤရဃၤဘၣ် ဒီးတၢ်ဘူၣ်တၢ်ဘါလၢ အမ့ၢ်အတီန့ၣ်လီၤ. (၂ ကွဲးနီၣ်တၢ် ၁၁:၁၆, ၁၇) မ့ၢ်လၢစီၤရဃၤဘၣ် ဒိကနၣ်ဝဲယဟိဝၤယွၤ အကလုၢ်အဃိ အဘီအမုၢ်ဆူၣ်ထီၣ်ဝဲလီၤ.
လါစဲးပတ့ဘၢၣ် ၁၉-၂၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ စီၤပၤ ၁၃-၁၄
“ဘၣ်မနုၤအဃိ ပဘၣ်သးမံဒီးတၢ်လၢအအိၣ်ဒီးပှၤ ဒီးအိၣ်ဒီးတၢ်ဆီၣ်လီၤသးလဲၣ်”
တၢး၀၈ ၈/၁၅ ၈ ¶၄
အိၣ်ဒီးတၢ်သးတီလၢ နသးဒီဖျၢၣ်
၄ စီၤယၤရၤဘၣ် တဲဘၣ်ဝဲ ယွၤလၢအမ့ၢ်အတီ အဝံလၢ “ဟဲလၢယဟံၣ် ဒီးအီၣ်တၢ်ဒီးယၤမီၤ. ဒီးယကဟ့ၣ်နၤ တၢ်ဟ့ၣ်တခါ.” (၁ စီၤပၤ ၁၃:၇) ဖဲဝံတဂၤအံၤ တဲဘၣ် စီၤယၤရၤဘၣ်လၢ တၢ်စံၣ်ညီၣ်အကစီၣ်ဝံၤအခါ စီၤပၤကွဲမုာ်အီၤဒ်န့ၣ်. အဃိ မ့ၢ်အဝဲကတူၢ်လိာ်ဝဲဧါ. (စံး. ၁၁၉:၁၁၃) စီၤပၤယၤရၤဘၣ်န့ၣ် ဖျါလၢအပီၢ်ယၢ်လီၤအသးအဃိ မ့ၢ်ဝံတဂၤအံၤ ကဂ့ၢ်လိာ်ဝဲ စီၤပၤအတၢ်ကွဲမုာ်တခါအံၤဧါ. စီၤယၤရၤဘၣ်န့ၣ် ကမ့ၢ်ပှၤလၢ အထူးအတီၤလၢ အဟ့ၣ်ဝဲ အသကိး တၢ်ဟ့ၣ်လၢ အလုၢ်ဒိၣ်ပှ့ၤဒိၣ်တဖၣ်န့ၢ်ဝဲ. အဃိ ကစၢ်ယွၤအဝံတဂၤအံၤ မ့မ့ၢ်ဘၣ်ဖုး ပှၤလၢအသူၣ်လီသးကွံ တၢ်ထူးတၢ်တီၤန့ၣ် စီၤပၤ အတၢ်ကွဲမုာ်အံၤ ကကဲထီၣ်တၢ်လ့ပစီ လၢအဂီၢ်ဖးဒိၣ်ညါ. ဘၣ်ဆၣ် လၢအခီၣ်ထံးန့ၣ် ယဟိဝၤယွၤ တဲပာ်စၢၤ ဝံတဂၤအံၤလၢအ တဘၣ်အီၣ်ကိၣ် ဒီးအီထံဘၣ် ဒီးအတဘၣ် က့ၤကဒါက့ၤလၢ ကျဲလၢ အဟဲတဘိန့ၣ်ဘၣ်. အဃိ ဝံတဂၤအံၤ တဲဆၢစီၤပၤလၢ “နမ့ၢ်ဟ့ၣ်ယၤ နဟံၣ် တဝာ်ဒၣ်လဲာ် ယတလဲၤပိာ်နခံ ဒီးအီၣ်ကိၣ် ဒီးအီထံလၢ တၢ်လီၢ်ဖဲအံၤဘၣ်.” ဒီးဝံတဂၤအံၤ ဟးထီၣ်လၢ ဘ့ၤသ့လး ဒီးက့ၤကဒါက့ၤ လၢကျဲလၢအဂၤတဘိ. (၁ စီၤပၤ ၁၃:၈-၁၀) ဘၣ်ဃးဒီး တၢ်သးတီလၢသးဒီဖျၢၣ်န့ၣ် ပန့ၢ်ဘၣ်တၢ်မၤလိလၢ ဝံတဂၤအံၤအအိၣ်ဒ်လဲၣ်.—ရိမ့ၤ ၁၅:၄.
တၢး၀၈ ၈/၁၅ ၁၁ ¶၁၅
အိၣ်ဒီးတၢ်သးတီလၢ နသးဒီဖျၢၣ်
၁၅ ပန့ၢ်ဘၣ် တၢ်မၤလိမနုၤလၢ ဝံလၢ အမၤကမၣ်တၢ်တဂၤအံၤအအိၣ်လဲၣ်. ကတိၤဒိ ၃:၅ တဲဝဲလၢ “နာ်န့ၢ် ယဟိဝၤယွၤလၢ နသးဒီဖျၢၣ် ဒီးတဘၣ် သန့ၤနသးလၢ နနီၢ်ကစၢ် အတၢ်နၢ်ပၢၢ်တဂ့ၤ.” ဝံတဂၤအံၤ တသန့ၤအသးလၢ ယဟိဝၤယွၤ ဒ်လၢအပူၤကွံာ်အသိးဘၣ်. တဘျီအံၤန့ၣ် အဝဲဆၢတဲာ်တၢ်လၢအနီၢ်ကစၢ်. ဒီးခီဖျိလၢ အတၢ်ကမၣ်တခါအံၤအဃိ အဝဲဘၣ်သံ ဒီးတန့ၢ်ဘၣ် ကစၢ်ယွၤ အတၢ်ဘၣ်သးလၢၤဘၣ်. ပမ့ၢ်ကွၢ်ဝံတဂၤအံၤန့ၣ် ပသ့ၣ်ညါဘၣ်လၢ ပကဘၣ် မၤယဟိဝၤယွၤ အတၢ်မၤလၢ တၢ်သးတီအပူၤန့ၣ် မ့ၢ်တၢ်လၢ အရ့ဒိၣ်ဒိၣ်မး.
တၢး၀၈ ၈/၁၅ ၉ ¶၁၀
အိၣ်ဒီးတၢ်သးတီလၢ နသးဒီဖျၢၣ်
၁၀ ဝံလၢအဟဲလၢ ကီၢ်ယူဒၤတဂၤအံၤန့ၣ် ကြၢးသ့ၣ်ညါဝဲလၢ ဝံသးပှၢ်တဂၤအံၤ ဟဲတဲလံၣ်အီၤလီၤ. အဝဲမ့ၢ်သံကွၢ်လီၤအသးဒ်အံၤသ့. ‘ဘၣ်မနုၤအဃိ ယဟိဝၤယွၤ ဆှၢလီၤမူခိၣ်ကလူး လၢပှၤအဂၤတဂၤအအိၣ် ဒ်သိး ကဟ့ၣ်ယၤ တၢ်ဟံးစုနဲၣ်ကျဲအသီလဲၣ်.’ အဝဲမ့ၢ်သံကွၢ် လီၤတံၢ် ယဟိဝၤယွၤန့ၣ်သ့. ဘၣ်ဆၣ် လံာ်စီဆှံတတဲဝဲလၢ အသံကွၢ် ယဟိဝၤယွၤဘၣ် ဒီး “အဝဲ က့ၤပိာ်ဝံသးပှၢ်အခံ ဒီးအီၣ်ကိၣ် ဒီးအီထံလၢ အဟံၣ်ပူၤလီၤ.” အဝဲမၤဝဲဒ်အံၤန့ၣ် ကစၢ်ယွၤ တဘၣ်သူၣ်ဘၣ်သးဝဲဘၣ်. အဃိ ဖဲအဝဲက့ၤလၢ ကီၢ်ယူဒၤအခါ လၢကျဲန့ၣ် ခ့ယုၢ်အ့ၣ်သံအီၤ အဃိလီၤသးအုးဒိၣ်မး.—၁ စီၤပၤ ၁၃:၁၉-၂၅.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၁၀ ၇/၁ ၂၉ ¶၅
အဝဲဃုကွၢ်တၢ်လၢ အဂ့ၤတကပၤ
တၢ်ကတိၤလၢ အအိၣ်ဖဲ ၁ စီၤပၤ ၁၄:၁၃ အပူၤန့ၣ် သိၣ်လိပှၤဘၣ်ဃးဒီး ယဟိဝၤယွၤန့ၣ် ဃုကွၢ်တၢ်အဂ့ၤ လၢအအိၣ်လၢ ပသးပူၤ. လံာ်စီဆှံတဆၢအံၤ ပာ်ဖျါထီၣ်ဝဲလၢ ကစၢ်ယွၤ “ထံၣ်န့ၢ်” တၢ်အဂ့ၤတမံၤလၢ စီၤအဘံယၤအသးပူၤ. ကစၢ်ယွၤ ဃုကွၢ်တၢ်လၢ စီၤအဘံယၤအသးပူၤ တုၤလၢအထံၣ်ဝဲ အတၢ်ဂ့ၤတၢ်ဝါ. ပှၤကူၣ်ဘၣ်ကူၣ်သ့တဂၤ တဲဝဲလၢ ပမ့ၢ်ထိၣ်သတြီၤစီၤအဘံယၤ ဒီးအဟံၣ်ဖိဃီဖိန့ၣ် စီၤအဘံယၤ လီၤဂာ်ဒ် ပလဲတဖျၢၣ်လၢအအိၣ်လၢ “လၢၢ်တပူၣ်အကျါ.” စီၤအဘံယၤ အိၣ်လၢ ဒူၣ်ဖိထၢဖိလၢ အအၢအသီတဒူၣ်အကျါနာ်က့ ကစၢ်ယဟိဝၤယွၤ ပာ်လုၢ်ပာ်ပှ့ၤ အတၢ်ဂ့ၤတၢ်ဝါ ဒီးဆိၣ်ဂ့ၤအီၤ ခီဖျိ ပာ်ဖျါထီၣ်တၢ်သးကညီၤ လၢအဖီခိၣ်.
လါစဲးပတ့ဘၢၣ် ၂၆–လါအီးကထိဘၢၣ် ၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ စီၤပၤ ၁၅-၁၆
“ကွၢ်လိ စီၤအၤစါ အတၢ်သးဒူ”
တၢး၁၂ ၈/၁၅ ၈ ¶၄
“ယကဟ့ၣ်နၤ ခိၣ်ဖးလၢ တၢ်လၢနမၤတဖၣ် အဃိ”
ဖဲအံၣ်စရ့လးအဘီအမုၢ် လီၤဖးဝံၤအလီၢ်ခံ အနံၣ် ၂၀ အတီၢ်ပူၤန့ၣ် ပှၤအံၣ်စရ့လးဖိတဖၣ် ဘူၣ်ထီၣ်ဘါထီၣ်ဝဲ ယွၤလၢအကမၣ်တဖၣ် ကယီကယီလီၤ. ဖဲစီၤအၤစါ ကဲထီၣ်စီၤပၤ ဖဲ ချ.ခ.န ၉၇၇ အခါ ပှၤလၢအအိၣ်လၢ စီၤပၤအနီပူၤတဖၣ်န့ၣ် ဘူၣ်ထီၣ်ဘါထီၣ်ဝဲ ပှၤကနၤဧၣ်ဖိ အတၢ်ချံဂ့ၤသၣ်ဂ့ၤ အယွၤတဖၣ်. လံာ်စီဆှံတဲဝဲလၢ ဖဲစီၤအၤစါ ပၢတၢ်အခါန့ၣ် အဝဲ “မၤတၢ်လၢ အကစၢ် ယဟိဝၤယွၤ ထံၣ်ဝဲလၢ အဂ့ၤဒီးအဘၣ်လီၤ. အဝဲမၤဟးဂီၤကွံာ်ဝဲ ပှၤထံဂၤကီၢ်ဂၤဖိ အတၢ်လုၢ်လီၢ်တဖၣ် ဒီးတၢ်လီၢ်ထီၣ်ထီတဖၣ်လီၤ. အဝဲမၤကၢ်လီၤကွံာ် လၢၢ်ထူၣ်စီဆှံတဖၣ် ဒီးမၤလီၤကူၢ်ကွံာ်ဝဲ တၢ်စီဆှံအထူၣ်တဖၣ်လီၤ.” (၂ ကွဲးနီၣ်တၢ် ၁၄:၂, ၃) စီၤအၤစါ ဟီထီၣ်ကွံာ်ဝဲ “ပိာ်ခွါတဖၣ်လၢ အဆါလီၤအီၣ်သး” လၢတၢ်ဘူၣ်ထီၣ်ဘါထီၣ်အလီၢ်တဖၣ်. တကးဒံးဘၣ် အဝဲမၤဝဲ တၢ်လၢအဂၤတဖၣ်ဒံး. အဝဲ ဟ့ၣ်ဂံၢ်ဟ့ၣ်ဘါ ပှၤဂီၢ်မုၢ်တဖၣ်လၢ “ကဘူၣ်ထီၣ်ဘါထီၣ်အဝဲသ့ၣ် အမိၢ်ပၢ်ဖံဖု လၢပျၢၤတဖၣ် အကစၢ်ယဟိဝၤယွၤ ဒီးအိၣ်မူမၤထွဲ စီၤမိၤၡ့အတၢ်သိၣ်တၢ်သီ ဒီးအတၢ်မၤလိာ်လီၤ.”—၁ စီၤပၤ. ၁၅:၁၂, ၁၃; ၂ ကွဲးနီၣ်တၢ် ၁၄:၄.
မၤယဟိဝၤယွၤအတၢ်မၤလၢ သူၣ်ဒီဖျၢၣ်သးဒီဖျၢၣ် တက့ၢ်
၇ မ့ၢ်ပသန့ၤပသးလၢ ယဟိဝၤယွၤလၢ ပသူၣ်ဒီဖျၢၣ်ပသးဒီဖျၢၣ်ဧါန့ၣ် ပသ့ၣ်ညါအီၤကသ့ဒ်လဲၣ်. ပသံကွၢ်လီၤပသးဒ်အံၤ သ့ဝဲလီၤ– ‘ယကဒိကနၣ် ယဟိဝၤယွၤအကလုၢ်အဂီၢ် မ့ၢ်ကီလၢယဂီၢ်ဒၣ်လဲာ် မ့ၢ်ယကဒိကနၣ်အီၤဒံးဧါ. ဒ်သိးတၢ်အိၣ်ဖှိၣ်ကစီဆှံအဂီၢ် တၢ်လၢယကဘၣ်မၤတဖၣ် မ့ၢ်ယပာ်လီၤယသး ဂၢၢ်ဂၢၢ်ကျၢၤကျၢၤလၢ ယကမၤအီၤလၢ တၢ်သူၣ်ဆူၣ်သးဆူၣ်အပူၤဧါ.’ ဆိကမိၣ်ကွၢ် ဖဲစီၤအၤစါ ကသုးကွံာ်အဖံလၢ နီၢ်ပၤမုၣ်အလီၢ်အခါ အဝဲကလိၣ်ဘၣ်တၢ်သူၣ်ဒူသးဒူ ထဲလဲၣ်န့ၣ်တက့ၢ်. ဘၣ်သ့ၣ်သ့ၣ် တဘျီတခီၣ် နကလိၣ်ဘၣ်တၢ်သူၣ်ဒူသးဒူဒ် စီၤအၤစါအသိးလီၤ. အဒိ, နဘူးနတံၢ် မ့တမ့ၢ် နတံၤသကိးလၢ နအဲၣ်အီၤတဂၤ မၤတၢ်ကမၣ်ဖးဒိၣ်ဒီး တပီၢ်ယၢ်လီၤအသးဘၣ်အဃိ ဘၣ်တၢ်ဟီထီၣ်ကွံာ်အီၤလၢ တၢ်အိၣ်ဖှိၣ်အပူၤလီၤ. ဖဲန့ၣ်အခါ မ့ၢ်နကပာ်လီၤနသး ဂၢၢ်ဂၢၢ်ကျၢၤကျၢၤ လၢနတရ့ဒီးအီၤလၢၤဘၣ်န့ၣ်ဧါ. နကမၤဒ်လဲၣ်.
it-1 ၁၈၄-၁၈၅
စီၤအၤစါ
တဘျီတခီၣ် စီၤအၤစါ ပာ်ဖျါထီၣ်ဝဲလၢ အတအိၣ်ဒီး တၢ်ကူၣ်သ့ဘၣ်. ဒီးအတၢ်သ့ၣ်ညါနၢ်ပၢၢ်လၢ နီၢ်သးတကပၤန့ၣ်တအိၣ်ဘၣ်. ဘၣ်ဆၣ် အဝဲအိၣ်ဒီး နီၢ်သးအတၢ်ဂ့ၤတၢ်ဝါတဖၣ် ဒီးမၤဟးဂီၤကွံာ် တၢ်ဘူၣ်တၢ်ဘါလၢ အကမၣ်အဃိ ကစၢ်ယွၤ ကွၢ်ကပာ်ကွံာ် အတၢ်ကမၣ် ဒီးလၢယူဒၤ အစီၤပၤတဖၣ်အကျါန့ၣ် ကစၢ်ယွၤထံၣ်အီၤဒ် ပှၤလၢအအိၣ်ဒီးတၢ်သးတီ. (၂ ကွဲး. ၁၅:၁၇) စီၤအၤစါပၢတၢ် အိၣ်ဝဲ ၄၁ နံၣ် ဒီးအတၢ်ပၢန့ၣ် ယံာ်ဝဲထဲသိးဒီး အံၣ်စရ့လးအစီၤပၤဃိးဂၤ ပၢတၢ်ညါ. အံၣ်စရ့လး အစီၤပၤတဖၣ်အံၤန့ၣ် မ့ၢ်ဝဲ စီၤယၤရၤဘၣ်, စီၤနၤဒး, စီၤဘါၡၤ, စီၤအ့လၤ, စီၤစံၣ်ရံၤ, စီၤဧိၣ်ရံၤ, စီၤတံးဘနံၤ (ပၢအံၣ်စရ့လးအတၢ်လီၢ်တနီၤ ဒီးထီဒါလိာ်အသးဒီး စီၤဧိၣ်ရံၤ) ဒီးစီၤအၤဃာ်. (၁ စီၤပၤ ၁၅:၉, ၂၅, ၃၃; ၁၆:၈, ၁၅, ၁၆, ၂၁, ၂၃, ၂၉) ဖဲစီၤအၤစါ သံဝံၤအလီၢ်ခံ အဖိခွါ စီၤယဟိၤၡၤဖးပၢတၢ်.—၁ စီၤပၤ ၁၅:၂၄.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၉၈ ၉/၁၅ ၂၁-၂၂
ကစၢ်ယွၤ မ့ၢ်ပှၤနီၢ်ကီၢ်လၢနဂီၢ်ဧါ
အဒိ, ဖးကွၢ်ဝံအတၢ်စံးပာ်လၢ ဘၣ်ဃးဒီး ပှၤမ့ၢ်သူၣ်ထီၣ်က့ၤ ဝ့ၢ်ယရံၤဃိန့ၣ် ပှၤကထံၣ်ဘၣ် တၢ်ကီတၢ်ခဲဒ်လဲၣ် ဒီးဆိကမိၣ်ထံ ဝံအတၢ်စံးပာ်အံၤ ဟဲလၢထီၣ်ပှဲၤထီၣ်ဒ်လဲၣ်. ယိၤၡူ ၆:၂၆ တဲဝဲလၢ “စီၤယိၤၡူ မၤဝဲတၢ်အၢၣ်လီၤ ဒ်အံၤလီၤ. “ပှၤတဂၤလၢ အသူၣ်ထီၣ်ကဒါက့ၤ ဝ့ၢ်ယရံၤဃိန့ၣ် မ်အဘၣ်တၢ်ဆိၣ်အၢလၢ ယဟိဝၤယွၤ အမဲာ်ညါတက့ၢ်. ဖဲအဝဲသူၣ်ထီၣ် ဝ့ၢ်အခီၣ်ထံးအခါ မ်အဘၣ်တူၢ်ၡူကွံာ် အဖိဝဲၢ်ကိတက့ၢ်. ဒီးဖဲအဝဲသူၣ်ထီၣ် ဝ့ၢ်အတြဲၤတဖၣ်အခါ မ်အဘၣ်တူၢ်ၡူကွံာ် အဖိသဒါတက့ၢ်.” လၢခံ အနံၣ် ၅၀၀ ဝံၤအလီၢ်ခံ ဝံအတၢ်စံးပာ်အံၤ ဟဲလၢထီၣ်ပှဲၤထီၣ်ဝဲလီၤ. ၁ စီၤပၤ ၁၆:၃၄ တဲဝဲလၢ “ဖဲအဝဲ [စီၤပၤအၤဃာ်] ပၢတၢ် အဆၢကတီၢ်န့ၣ် ပှၤဘ့ၤသ့လးဖိ စီၤဃံၤအ့လး သူၣ်ထီၣ်ကဒါက့ၤ ဝ့ၢ်ယရံၤဃိလီၤ. ဒ်ယဟိဝၤယွၤ တဲဆိပာ်စၢၤ ခီဖျိ စီၤနိၣ်အဖိခွါ စီၤယိၤၡူအသိးန့ၣ် ဖဲအဝဲသူၣ်ထီၣ် ဝ့ၢ်အခီၣ်ထံးအခါ အဝဲတူၢ်ၡူကွံာ် အဖိဝဲၢ်ကိ စီၤအဘံရၣ် ဒီးဖဲအဝဲသူၣ်ထီၣ် ဝ့ၢ်အတြဲၤတဖၣ်အခါ အဝဲတူၢ်ၡူကွံာ် အဖိသဒါ စီၤစကံာ်လီၤ.” ထဲဒၣ် ကစၢ်ယွၤလၢ အမ့ၢ်အတီန့ၣ် တဲဝဲဝံအတၢ်စံးပာ်ဒ်အံၤ ဒီးအမၤလၢပှဲၤဝဲသ့လီၤ.
လါအီးကထိဘၢၣ် ၃-၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ စီၤပၤ ၁၇-၁၈
“သုကထုးယံာ် တၢ်ဆၢကတီၢ် ဒီးအိၣ်ဒီး တၢ်ထံၣ်ခံခါ ဆံးယံာ်ဒံးလဲၣ်”
ပာ်ဖျါထီၣ်တၢ်နာ် ဒီးဆၢတဲာ်တၢ်လၢ တၢ်ကူၣ်သ့အပူၤ
၆ ဖဲပှၤအံၣ်စရ့လးဖိတဖၣ် အိၣ်လၢကီၢ်တၢ်စံးပာ်အခါ အဝဲသ့ၣ် ဘၣ်ဃုထၢဝဲလၢ ကဘူၣ်ထီၣ်ဘါထီၣ် ယဟိဝၤယွၤဧါ မ့တမ့ၢ် ယွၤလၢအဂၤတဖၣ်န့ၣ်ဧါ. (ဖး ယိၤၡူ ၂၄:၁၅ တက့ၢ်.) ဘၣ်သ့ၣ်သ့ၣ် ပကဆိကမိၣ်လၢ တၢ်ဆၢတဲာ်လၢ အဝဲသ့ၣ်ကဘၣ်မၤဝဲန့ၣ် မ့ၢ်တၢ်ညီညီဖိလီၤ. ဘၣ်ဆၣ် အဝဲသ့ၣ်အသးသမူန့ၣ် ဒိးသန့ၤထီၣ်အသးလၢ အတၢ်ဃုထၢအံၤ အဖီခိၣ်လီၤ. ဖဲပှၤစံၣ်ညီၣ်ကွီၢ်ပၢတၢ်အစိၤန့ၣ် ပှၤအံၣ်စရ့လးဖိတဖၣ် မၤဝဲတၢ်ဆၢတဲာ်လၢ အကမၣ်တဖၣ်တလီၢ်လီၢ်လီၤ. လၢတၢ်န့ၣ်အဃိအဝဲသ့ၣ် တဘူၣ်ထီၣ်ဘါထီၣ် ယဟိဝၤယွၤလၢၤဘၣ် ဒီးစးထီၣ်ဘူၣ်ထီၣ်ဘါထီၣ်ဝဲ ယွၤလၢအကမၣ်တဖၣ်လီၤ. (စံၣ်ညီၣ်ကွီၢ် ၂:၃, ၁၁-၂၃) လၢခံ ဖဲဝံအ့ၤလံယၤအစိၤန့ၣ် ယွၤအပှၤဂီၢ်မုၢ်တဖၣ် ကဘၣ်ဃုထၢဝဲလၢ မ့ၢ်အဝဲသ့ၣ် ကဘူၣ်ထီၣ်ဘါထီၣ် ယဟိဝၤယွၤဧါ မ့တမ့ၢ် ယွၤလၢအကမၣ်လၢအမ့ၢ် ဘဧၤလးဧါန့ၣ်လီၤ. (၁ စီၤပၤ ၁၈:၂၁) ပသ့ၣ်ညါလၢ တၢ်မၤယဟိဝၤယွၤအတၢ်မၤန့ၣ် မ့ၢ်တၢ်ဃုထၢလၢအဂ့ၤကတၢၢ်အဃိ ဘၣ်သ့ၣ်သ့ၣ် ပကဆိကမိၣ်လၢ တၢ်ဆၢတဲာ်လၢ အဝဲသ့ၣ်ကဘၣ်မၤဝဲန့ၣ် မ့ၢ်တၢ်ညီညီဖိလီၤ. ဘဧၤလးမ့ၢ်ယွၤလၢ အသးသမူတအိၣ်ဘၣ်အဃိ ပှၤလၢအိၣ်ဒီးတၢ်ကူၣ်သ့န့ၣ် တမ့ၢ်လၢကအဲၣ်ဒိး ဘူၣ်ထီၣ်ဘါထီၣ်အီၤဘၣ်. ဘၣ်ဆၣ် ပှၤအံၣ်စရ့လးဖိတဖၣ် ဆၢတဲာ်ဝဲတဘၣ်ဘၣ်. လံာ်စီဆှံတဲဝဲလၢ အဝဲသ့ၣ် “လဲၤတကျဲၢ်တကျဲၢ်လၢ တၢ်ခံမံၤအဘၢၣ်စၢၤ” လီၤ. လၢတၢ်ကူၣ်သ့အပူၤ ဝံအ့ၤလံယၤ ဟ့ၣ်ဂံၢ်ဟ့ၣ်ဘါအဝဲသ့ၣ်လၢ ကဃုထၢဝဲလၢ ကဘူၣ်ထီၣ်ဘါထီၣ် ယွၤအမ့ၢ်အတီလၢအမ့ၢ် ယဟိဝၤယွၤန့ၣ်လီၤ.
အဝဲဆၢထၢၣ်ဂၢၢ်ဂၢၢ်ကျၢၤကျၢၤလၢ တၢ်ဘူၣ်တၢ်ဘါအမ့ၢ်အတီအဂီၢ်
၁၅ မ့ၢ်လၢဝံအ့ၤလံယၤ ဒုၣ်ဒွဲၣ်အဝဲသ့ၣ်အဃိ ဘဧၤလးအဝံတဖၣ် ဂဲၤပျုၢ်ဂဲၤဆှးအါထီၣ်ဝဲဒီး “ကိးပသူထီၣ်, ဒီးဂဲာ်လီၤအသးလၢ ဃဲာ်လၢဒီဒ်အလုၢ်အလၢ်အသိးန့ၣ် တုၤအသွံၣ်ဟဲထီၣ်လၢအလိၤလီၤ.” ဘၣ်ဆၣ် တၢ်လၢအဝဲသ့ၣ်မၤဝဲခဲလၢာ်န့ၣ် ကဲထီၣ်တၢ်ကလီကလီလီၤ. လံာ်စီဆှံစံးဝဲလၢ “တၢ်အကလုၢ်တအိၣ်ဘၣ်, ဒီးတၢ်တစံးဆၢဘၣ်တၢ်ဘၣ်, ဒီးတၢ်တပးကဲဘၣ်တၢ်ဘၣ်လီၤ.” (၁ စီၤပၤ. ၁၈:၂၈, ၂၉) ဘဧၤလးန့ၣ် တမ့ၢ်ကစၢ် လၢအအိၣ်ဝဲနီၢ်ကီၢ်ဘၣ်. မုၣ်ကီၤလံၢ် ဒုးအိၣ်ထီၣ်ဝဲဘဧၤလး လၢကဆှၢကမၣ်ဝဲ ပှၤဂီၢ်မုၢ်ဒ်သိးအဝဲသ့ၣ် ကဟးဖးဒီးယဟိဝၤယွၤန့ၣ်လီၤ. ပမ့ၢ်တဲတီတီန့ၣ် ပှၤလၢအဃုထၢဝဲ ကစၢ်လၢအတမ့ၢ် ယဟိဝၤယွၤန့ၣ် ကထံၣ်ဘၣ်ဝဲ တၢ်သူၣ်ဟးဂီၤသးဟးဂီၤ ဒီးတၢ်မဲာ်ဆှးန့ၣ်လီၤ.—ဖး စံးထီၣ်ပတြၢၤ ၂၅:၃; ၁၁၅:၄-၈ တက့ၢ်.
အဝဲဆၢထၢၣ်ဂၢၢ်ဂၢၢ်ကျၢၤကျၢၤလၢ တၢ်ဘူၣ်တၢ်ဘါအမ့ၢ်အတီအဂီၢ်
၁၈ တချုးလၢ ဝံအ့ၤလံယၤ ဃ့ဘါထုကဖၣ်တၢ်အဆၢကတီၢ်န့ၣ် ဘၣ်သ့ၣ်သ့ၣ် ပှၤဂီၢ်မုၢ်တဖၣ် ကဆိကမိၣ်ဝဲလၢ မ့ၢ်ယဟိဝၤယွၤ ကလီၤဂာ်ဒ်ဘဧၤလးလၢ အတစံးဆၢက့ၤတၢ်ဘၣ်န့ၣ်ဧါ. ဘၣ်ဆၣ် ဖဲဝံအ့ၤလံယၤ ဘါထုကဖၣ်တၢ်ဝံၤအလီၢ်ခံ ပှၤဂီၢ်မုၢ်တဖၣ် အတၢ်သးဒ့ဒီန့ၣ် လီၤမၢ်ကွံာ်ဝဲသတူၢ်ကလာ်လီၤ. လံာ်စီဆှံပာ်ဖျါထီၣ်န့ၢ်ပှၤလၢ ဖဲဝံအ့ၤလံယၤ ဘါထုကဖၣ်တၢ်ဝံၤအလီၢ်ခံန့ၣ်– “ယွၤအမ့ၣ်အူလီၤတဲာ်ဝဲ, ဒီးအီၣ်ကွံာ်တၢ်လုၢ်မ့ၣ်အူ, ဒီးသ့ၣ်မုၣ်, ဒီးလၢၢ်ဧိၤလ့ဧိၤ, ဒီးဟီၣ်ခိၣ်အကမူၣ်, ဒီးလ့ၣ်ထီၣ်ကွံာ်ထံလၢ အအိၣ်ဝဲလၢတၢ်ကျိၤပူၤန့ၣ်လီၤ.” (၁ စီၤပၤ. ၁၈:၃၈) ယွၤစံးဆၢက့ၤတၢ်ဒ်အံၤန့ၣ် မ့ၢ်တၢ်လၢ အလီၤသူၣ်ဟူးသးဂဲၤဝဲ ဒိၣ်မးလီၤ. ဒီးပှၤဂီၢ်မုၢ် ဖဲန့ၣ်သ့ၣ်တဖၣ်န့ၣ် မၤဆၢက့ၤဝဲဒ်လဲၣ်.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၈ ၄/၁ ၁၉, တၢ်လွံၢ်နၢၣ်
အဝဲအိၣ်ခိးဒီးဆိးသီ
တၢ်ယီၤဃ့လၢ ဝံအ့ၤလံယၤအစိၤန့ၣ် ယံာ်ဝဲထဲလဲၣ်
လံာ်စီဆှံစံးဝဲလၢ ဖဲတၢ်ယီၤဃ့ “သၢနံၣ်တနံၣ်” အတီၢ်ပူၤန့ၣ် ဝံအ့ၤလံယၤတဲဘၣ်ဝဲ စီၤပၤအၤဃာ်လၢ တယံာ်တမီၢ်န့ၣ် တၢ်ယီၤဃ့ကကတၢၢ်ကွံာ်ဝဲလီၤ. (၁ စီၤပၤ ၁၈:၁) ဒီးဖဲဝံအ့ၤလံယၤ တဲဝဲလၢကစၢ်ယွၤ ကဒုးစူၤလီၤဝဲမူခိၣ်ထံအခါ တယံာ်တမီၢ်န့ၣ်တၢ်စူၤလီၤဝဲလီၤ. ခီဖျိလၢ တၢ်ယီၤဃ့ပတုာ်ဝဲလၢ သၢနံၣ်တနံၣ်အတီၢ်ပူၤအဃိ ပှၤတနီၤနီၤနာ်ဝဲလၢ တၢ်ယီၤဃ့ယံာ်ဝဲထဲခံနံၣ်ဘျဲၣ်န့ၣ်လီၤ. ဒ်လဲၣ်ဂ့ၤဒ်လဲၣ်ဂ့ၤ ယ့ၣ်ၡူးဒီးစီၤယၤကိာ်စံးဝဲလၢ တၢ်ယီၤဃ့ယံာ်ဝဲ “သၢနံၣ်ဒီးဃုလါ.” (လူၤကၣ် ၄:၂၅; ယၤ ၅:၁၇) အဃိ မ့ၢ်လံာ်စီဆှံအတၢ်ကတိၤန့ၣ် ထီဒါလိာ်အသးဧါ.
တမ့ၢ်ဒ်န့ၣ်ဘၣ်. လၢညါအံၣ်စရ့လးအစိၤန့ၣ် ညီနုၢ်တၢ်ကိၢ်ခါန့ၣ် ယံာ်ဝဲဃုလါဃၣ်ဃၣ်လီၤ. ဒီးဖဲဝံအ့ၤလံယၤ လဲၤတဲဘၣ်စီၤပၤအၤဃာ် လၢတၢ်ယီၤဃ့အဂ့ၢ် အဆိကတၢၢ်တဘျီန့ၣ် တၢ်ကိၢ်ခါစးထီၣ်အသး ယံာ်တ့ၢ်လံဃုလါဃၣ်ဃၣ်လံ. လၢတၢ်န့ၣ်အဃိ ဖဲဝံအ့ၤလံယၤ ဘိးဘၣ်သ့ၣ်ညါဝဲလၢ တၢ်ယီၤဃ့ကကတၢၢ်ဝဲလၢ “သၢနံၣ်တနံၣ်” န့ၣ်တၢ်ယီၤဃ့အိၣ်ထီၣ်အသး သၢနံၣ်ဒီးဃုလါဃၣ်ဃၣ်လံန့ၣ်လီၤ. မ့ၢ်လၢဖဲတၢ်ကိၢ်ခါစးထီၣ်အသးန့ၣ် တၢ်ယီၤဃ့အံၤ စးထီၣ်အသးတဘျီဃီလီၤ. ဒီး “သၢနံၣ်ဒီးဃုလါ” ပှဲၤထီၣ်ဝဲဖဲ ပှၤဂီၢ်မုၢ်တဖၣ် ဟဲပာ်ဖှိၣ်ထီၣ်အသး လၢကစၢၢ်ကၢ်မ့ၤလးအလိၤ.
ထံၣ်ကမှံကွၢ်, ဖဲဝံအ့ၤလံယၤ လဲၤထံၣ်လိာ်အသး ဒီးစီၤပၤအၤဃာ် အဆိကတၢၢ်တဘျီအခါန့ၣ်တက့ၢ်. ဖဲန့ၣ်အဆၢကတီၢ် ပှၤဂီၢ်မုၢ်တဖၣ်နာ်ဝဲလၢ ဘဧၤလး “ဒိးဝဲတၢ်အၢၣ်” ဒီးမ့ၢ်ယွၤတဂၤလၢ အဒုးစူၤလီၤဝဲမူခိၣ်ထံ ဒ်သိးတၢ်ကိၢ်ခါ ကကတၢၢ်ကွံာ်ဝဲအဂီၢ်. အဃိ တၢ်ကိၢ်ခါမ့ၢ်ယံာ်ဝဲန့ၣ် ပှၤဂီၢ်မုၢ်တဖၣ်ကဆိကမိၣ်ဘၣ်ဝဲလၢ– “မ့ၢ်ဘဧၤလး လဲၤဝဲဖဲလဲၣ်. ဒီးအဝဲ ကဒုးစူၤလီၤဝဲမူခိၣ်ထံ ဆံးယံာ်လဲၣ်.” တကးဒံးဘၣ် ဝံအ့ၤလံယၤ တဲဝဲလၢမ့တမ့ၢ်လၢ ယတၢ်ကတိၤန့ၣ် မူခိၣ်တစူၤဘၣ်. ဝံအ့ၤလံယၤ အတၢ်ကတိၤအံၤ ကမၤဘၣ်ဒိဝဲပှၤလၢ အဘူၣ်ထီၣ်ဘါထီၣ်ဝဲ ဘဧၤလးတဖၣ်အသးဒိၣ်မး.—၁ စီၤပၤ ၁၇:၁.
တၢး၁၄ ၂/၁၅ ၁၄-၁၅
မုၣ်ကမဲတဂၤအံၤ တဲဘၣ်ဝံအ့ၤလံယၤလၢ အီၤဒီးအဖိခွါန့ၣ် အတၢ်အီၣ်အိၣ်တ့ၢ် လၢခံကတၢၢ်တဘျီအဂီၢ် ဒီးအဝဲသ့ၣ် အီၣ်ဝဲမ့ၢ်ဝံၤအလီၢ်ခံ အတၢ်အီၣ်တအိၣ်လၢၤဘၣ်အဃိ အဝဲသ့ၣ်ကသံလီၤ. ဘၣ်ဆၣ် ဝံအ့ၤလံယၤတဲဆၢဝဲ မုၣ်ကမဲတဂၤအံၤဒ်လဲၣ်. အဝဲတဲဝဲလၢ “ဘၣ်ယိၣ်တၢ်တဂ့ၤ. က့ၤမၤဒ် နတဲအသိးဟီ. ဘၣ်ဆၣ် ဟံးန့ၢ်တၢ်လၢ အအိၣ်ဒီးနၤဖဲန့ၣ် ဒီးတ့ဆိန့ၢ်ယၤ ကိၣ်ဖိတလိၣ် ဒီးဟဲစိာ်လၢ ယအိၣ်တက့ၢ်. ဝံၤဒီး နမၤအီၣ်တၢ်လၢ နၤဒီးနဖိခွါအဂီၢ် တမံၤမံၤသ့လီၤ. ဒီးအံၣ်စရ့လး အကစၢ် ယဟိဝၤယွၤ တဲဝဲလၢ ‘ကိၣ်ကမူၣ် လၢအအိၣ်လၢ ကိဖးဒိၣ်အပူၤန့ၣ် တလၢာ်ကွံာ်ဘၣ် ဒီးသိလၢအအိၣ်လၢ ကိဆံးဆံးဖိအပူၤန့ၣ် တလၢာ်ကွံာ်ဘၣ် တုၤလၢ မုၢ်နံၤလၢ ယဟိဝၤယွၤ ဒုးစူၤလီၤ မူခိၣ်လၢ ဟီၣ်ခိၣ်လိၤလီၤ.’”—၁ စီၤပၤ ၁၇:၁၁-၁၄.
မ့မ့ၢ်ပှၤတနီၤဒု ကတဲဆၢက့ၤ ဝံအ့ၤလံယၤလၢ ‘ပဘၣ်ဟ့ၣ်ဒုးအီၣ်နၤ ပတၢ်အီၣ်လၢခံကတၢၢ်တဘျီအဂီၢ်န့ၣ်. နတဲလိာ်ကွဲတၢ်ဟီဧါသၢၤ.’ ဘၣ်ဆၣ် မုၣ်ကမဲတဂၤန့ၣ် တတဲဆၢ ဝံအ့ၤလံယၤဒ်န့ၣ်ဘၣ်. အဝဲမ့ၢ်တသ့ၣ်ညါ ယဟိဝၤယွၤအဂ့ၢ် အါအါဘၣ်သနာ်က့ အဝဲနာ်ဝဲဝံအ့ၤလံယၤ ဒီးမၤဝဲဒ် ဝံအ့ၤလံယၤတဲအီၤအသိး. တၢ်လၢဝံအ့ၤလံယၤမၢအီၤန့ၣ် ကကဲထီၣ်တၢ်မၤကွၢ်လၢအဂီၢ်. ဘၣ်ဆၣ် အဝဲအတၢ်ဆၢတဲာ်န့ၣ် ပာ်ဖျါထီၣ်လၢ အအိၣ်ဒီးတၢ်ကူၣ်သ့.
ယဟိဝၤယွၤ တပာ်တ့ၢ်ကွံာ် မုၣ်ကမဲလၢအဖှီၣ်တဂၤအံၤဘၣ်. ဒ်ဝံအ့ၤလံယၤတဲဝဲအသိး ယဟိဝၤယွၤ ဒုးအီၣ်ဒုးအီဝဲ ဝံအ့ၤလံယၤ, မုၣ်ကမဲ ဒီးအဖိခွါ တုၤလၢအဒုးစူၤလီၤတၢ်လၢဟီၣ်ခိၣ်လီၤ. လံာ်စီဆှံတဲဝဲလၢ “ဒ်ယဟိဝၤယွၤ တဲပာ်စၢၤ စီၤအ့ၤလံယၤအသိး ကိၣ်ကမူၣ် လၢအအိၣ်လၢ ကိဖးဒိၣ်အပူၤန့ၣ် တလၢာ်ကွံာ်ဘၣ် ဒီးသိလၢအအိၣ်လၢ ကိဆံးဆံးဖိအပူၤန့ၣ် တလၢာ်ကွံာ်ဘၣ်.” (၁ စီၤပၤ ၁၇:၁၆; ၁၈:၁) မုၣ်ကမဲတဂၤအံၤ မ့ၢ်တမၤဝဲဒ်သိး ဝံအ့ၤလံယၤ တဲအီၤဘၣ်န့ၣ် အတၢ်အီၣ်တခါန့ၣ် ဘၣ်သ့ၣ်သ့ၣ် ကမ့ၢ်ဝဲတၢ်အီၣ်လၢခံကတၢၢ်လၢအဂီၢ်. ဘၣ်ဆၣ် အဝဲအိၣ်ဒီးတၢ်နာ် ဒီးနာ်န့ၢ်ယဟိဝၤယွၤအဃိ ဒုးအီၣ်ဆိ ဝံအ့ၤလံယၤလၢညါလီၤ.
ပမ့ၢ်ကွၢ်မုၣ်ကမဲတဂၤအံၤအဂ့ၢ်န့ၣ် ပသ့ၣ်ညါဘၣ်လၢ ယဟိဝၤယွၤန့ၣ် ဆိၣ်ဂ့ၤပှၤလၢအနာ်န့ၢ်အီၤ. ဖဲပထံၣ်ဘၣ် တၢ်မၤကွၢ်အခါ ပမ့ၢ်နာ်န့ၢ် ယဟိဝၤယွၤန့ၣ် အဝဲကမၤစၢၤပှၤ. ဒီးဒ်သိး ပလဲၤခီဖျိ တၢ်ကီတၢ်ခဲတဖၣ်ကန့ၢ်အဂီၢ် အဝဲကဆီၣ်ထွဲပှၤ, ဒီသဒၢပှၤ ဒီးကကဲထီၣ်ပသကီး.—၂ မိၤ. ၃:၁၃-၁၅.
ဘၣ်ဃးဒီး မုၣ်ကမဲတဂၤအံၤန့ၣ် စံယိၣ် တၢးထီၣ်ခိးတၢ်လၢ ၁၈၉၈ န့ၣ်တဲဝဲလၢ “မုၣ်ကမဲတဂၤအံၤ မ့ၢ်အိၣ်ဒီး တၢ်နာ် ဒီးဒိကနၣ်တၢ်န့ၣ် ကစၢ်ယွၤ ကမၤစၢၤအီၤခီဖျိလၢအဝံ. ဘၣ်ဆၣ် အဝဲမ့ၢ်တအိၣ်ဒီးတၢ်နာ်ဘၣ်န့ၣ် ဘၣ်သ့ၣ်သ့ၣ် ယဟိဝၤယွၤကဃုဝဲ မုၣ်ကမဲလၢအဂၤတဂၤ. ပဝဲသ့ၣ်တဖၣ်စ့ၢ်ကီး ဒ်န့ၣ်အသိးလီၤ. လၢပတၢ်အိၣ်မူပူၤန့ၣ် ကစၢ်ယွၤ ကပျဲလၢပကထံၣ်ဘၣ် တၢ်ကီတၢ်ခဲ လၢအမၤကွၢ် ပတၢ်နာ် အဃိ ပမ့ၢ်အိၣ်ဒီးတၢ်နာ်န့ၣ် ပကဒိးန့ၢ်ဘၣ် တၢ်ဆိၣ်ဂ့ၤ. ဘၣ်ဆၣ် ပမ့ၢ်တအိၣ်ဒီး တၢ်နာ်ဘၣ်န့ၣ် ပတဒိးန့ၢ်ဘၣ် တၢ်ဆိၣ်ဂ့ၤဘၣ်.”
ဖဲပထံၣ်ဘၣ် တၢ်ကီတၢ်ခဲအခါ ပကဘၣ်ဃုယဟိဝၤယွၤ အတၢ်ဟံးစုနဲၣ်ကျဲလၢ လံာ်စီဆှံပူၤ ဒီးလံာ်လဲၢ်လၢ အဒိးသန့ၤထီၣ်အသးလၢ လံာ်စီဆှံအပူၤ ဒီးပကဘၣ်မၤထွဲအီၤ. ယဟိဝၤယွၤ အတၢ်ဟံးစုနဲၣ်ကျဲန့ၣ် မ့ၢ်ကီလၢ ပကမၤထွဲအီၤအဂီၢ်နာ်က့ ပကဘၣ်မၤ. ကတိၤဒိ ၃:၅, ၆ တဲဝဲလၢ “နာ်န့ၢ် ယဟိဝၤယွၤလၢ နသးဒီဖျၢၣ် ဒီးတဘၣ် သန့ၤနသးလၢ နနီၢ်ကစၢ် အတၢ်နၢ်ပၢၢ်တဂ့ၤ. လၢနတၢ်အိၣ်မူ ကိးသနၢၣ်ဒဲးန့ၣ် ဆိကမိၣ်ထံ အတၢ်ထံၣ်တက့ၢ်. ဒီးအဝဲ ကဒုးနဲၣ်နၤ ကျဲလၢအဘၣ်လီၤ.” အဃိ ပမ့ၢ်မၤထွဲ ကစၢ်ယွၤ အတၢ်ဟံးစုနဲၣ်ကျဲန့ၣ် ပကဒိးန့ၢ်ဘၣ် တၢ်ဆိၣ်ဂ့ၤ သပှၢ်ကတၢၢ်.
‘မ့ၢ်နဟဲ ဒ်သိးနက . . . မၤသံ ယဖိခွါအဂီၢ်ဧါ’
မုၣ်ကမဲတဂၤအံၤန့ၣ် ထံၣ်ဘၣ်ဒီး တၢ်မၤကွၢ်လၢ အဂၤတခါဒံး. လံာ်စီဆှံတဲဝဲလၢ “လၢခံ ဟံၣ်ကစၢ်မုၣ်န့ၣ် အဖိခွါ ဆိးက့ထီၣ် ဒီးအဆိးက့ နးထီၣ် တုၤလၢ အတကသါလၢၤဘၣ်.” အဝဲ ဆိကမိၣ်ဘၣ်ဝဲလၢ ဘၣ်မနုၤအဃိ အထံၣ်ဘၣ်ဒီး တၢ်လီၤသးအုးဒ်အံၤလဲၣ်. အဃိ အဝဲသံကွၢ် ဝံအ့ၤလံယၤလၢ “ယွၤလၢ အမ့ၢ်အတီ အပှၤတဂၤဧၢ, ယမၤကမၣ်ဘၣ်နၤဒ်လဲၣ်. မ့ၢ်နဟဲ ဒ်သိးနကဒုးသ့ၣ်နီၣ်ထီၣ်ယၤလၢ ယတၢ်ကမၣ် ဒီးမၤသံ ယဖိခွါအဂီၢ်ဧါ.” (၁ စီၤပၤ ၁၇:၁၇, ၁၈) ဘၣ်မနုၤအဃိ မုၣ်ကမဲတဂၤအံၤ တဲဝဲတၢ်ကတိၤလၢ အဆူၣ်အကိၤ ဒ်အံၤလဲၣ်.
မ့ၢ်မုၣ်ကမဲတဂၤအံၤ သ့ၣ်နီၣ်ဘၣ်ဝဲ တၢ်ကမၣ်လၢ အမၤတ့ၢ်ဝဲတမံၤမံၤဧါ, မ့တမ့ၢ် မ့ၢ်အဆိကမိၣ်ဝဲလၢ ကစၢ်ယွၤစံၣ်ညီၣ်အဖိခွါဧါ. မ့တမ့ၢ်ဘၣ်န့ၣ် အဆိကမိၣ်ဝဲလၢ ဝံအ့ၤလံယၤ မ့ၢ်ပှၤလၢ ကစၢ်ယွၤဆှၢလီၤအီၤ လၢကမၤသံအဖိခွါအဂီၢ်ဧါ. လံာ်စီဆှံ တပာ်ဖျါထီၣ်န့ၢ်ပှၤလီၤတံၢ်ဘၣ်. ဘၣ်ဆၣ် ပသ့ၣ်ညါလၢ မုၣ်ကမဲတဂၤအံၤ တတဲဝဲလၢ ကစၢ်ယွၤ မၤတၢ်တတီတလိၤန့ၣ်ဘၣ်.
မုၣ်ကမဲတဂၤအံၤ အဖိခွါသံ ဒီးတၢ်လၢ မုၣ်ကမဲတဲဝဲန့ၣ် ဝံအ့ၤလံယၤ ကဖုးဘၣ်အသးလီၤ. ဝံအ့ၤလံယၤ လဲၤစိာ်ထီၣ်မုၣ်ကမဲအဖိခွါတဂၤအံၤ အစိၣ်လၢဟံၣ်ခိၣ် ဝံၤအလီၢ်ခံဃ့ဘါထုကဖၣ်ဝဲလၢ “အိ ယကစၢ် ယဟိဝၤယွၤဧၢ, မုၣ်ကမဲလၢ ယဟဲအိၣ်လၢ အဟံၣ်တဂၤအံၤ မ့ၢ်နဒုးလီၤဘၣ်စ့ၢ်ကီးအီၤလၢ တၢ်နးတၢ်ဖှီၣ် ခီဖျိ နပျဲသံ အဖိခွါန့ၣ်ဧါ.” မုၣ်ကမဲတဂၤအံၤ အသးဂ့ၤ ဒီးတူၢ်လိာ်မုာ် ဝံအ့ၤလံယၤအဃိ ယဟိဝၤယွၤ မ့ၢ်ပျဲဝဲလၢအ ကတူၢ်ဘၣ်တၢ်နးတၢ်ဖှီၣ်ဒ်အံၤန့ၣ် ဝံအ့ၤလံယၤ ဘၣ်ယိၣ်ဝဲလၢ ကစၢ်ယွၤအမံၤ ကဘၣ်တၢ်ဒုၣ်ဒွဲၣ်စံးအၢအီၤ. အဃိ ဝံအ့ၤလံယၤ တဲဝဲလၢ “အိ ယကစၢ် ယဟိဝၤယွၤဧၢ, ဝံသးစူၤ မ်ဖိသၣ်တဂၤအံၤ သမူထီၣ်က့ၤတက့ၢ်.”—၁ စီၤပၤ ၁၇:၂၀, ၂၁.
“ကွၢ်လၢအံၤ, နဖိခွါ မူထီၣ်က့ၤလံ”
ယဟိဝၤယွၤ ဒိကနၣ်ဝဲ ဝံအ့ၤလံယၤ အတၢ်ထုကဖၣ်. မုၣ်ကမဲတဂၤအံၤန့ၣ် ကွၢ်ထွဲဝဲ ဝံအ့ၤလံယၤဂ့ၤဂ့ၤ ဒီးအိၣ်ဒီးတၢ်နာ်. ဒီးမုၣ်ကမဲတဂၤအံၤ အဖိခွါ ဂဲၤဆၢထၢၣ်သမူထီၣ်က့ၤန့ၣ် မ့ၢ်ဝဲ တၢ်ဂဲၤဆၢထၢၣ်သမူထီၣ်က့ၤအဂ့ၢ် အဆိကတၢၢ်တခါလၢ လံာ်စီဆှံပာ်ဖျါထီၣ်ဝဲ. ကစၢ်ယွၤ ပျဲဝဲလၢ မုၣ်ကမဲတဂၤအံၤအဖိခွါ ကသံဒီး ကဂဲၤဆၢထၢၣ်သမူထီၣ်က့ၤန့ၣ် ဘၣ်သ့ၣ်သ့ၣ် ကမ့ၢ်ဒ်သိး တၢ်လဲၤခီဖျိတခါအံၤ ကကဲထီၣ်တၢ်ဂံၢ်တၢ်ဘါ လၢပှၤလၢကဟဲခါဆူညါတဖၣ်အဂီၢ်. ဝံအ့ၤလံယၤ ဃ့ကညးယဟိဝၤယွၤ ဝံၤအလီၢ်ခံ ယဟိဝၤယွၤ မၤသမူထီၣ်က့ၤ မုၣ်ကမဲအဖိခွါ. ဖဲဝံအ့ၤလံယၤ တဲမုၣ်ကမဲတဂၤအံၤလၢ “ကွၢ်လၢအံၤ, နဖိခွါ မူထီၣ်က့ၤလံ” အခါ မုၣ်ကမဲတဂၤအံၤ ကသးခုဒိၣ်မး. ဒီးအဝဲတဲဆၢက့ၤ ဝံအ့ၤလံယၤလၢ “ခဲအံၤ ယသ့ၣ်ညါလၢ နမ့ၢ် ကစၢ်ယွၤ အပှၤနီၢ်ကီၢ် ဒီးယဟိဝၤယွၤ အတၢ်ကတိၤလၢ နတဲတဖၣ်န့ၣ် မ့ၢ်ဝဲတီဝဲလီၤ.”—၁ စီၤပၤ ၁၇:၂၂-၂၄.
ဝံၤဒီး ဘၣ်ဃးဒီး မုၣ်ကမဲတဂၤအံၤအဂ့ၢ်န့ၣ် ၁ စီၤပၤ အဆၢဒိၣ် ၁၇ တဆဲးတဲဝဲ တၢ်ဂ့ၢ်နီတမံၤလၢၤဘၣ်. ဘၣ်ဆၣ် ဘၣ်ဃးဒီး မုၣ်ကမဲတဂၤအံၤန့ၣ် ယ့ၣ်ၡူးတဲဝဲလၢ အဂ့ၤတကပၤအဃိ ပသ့ၣ်ညါသ့လၢ မုၣ်ကမဲတဂၤအံၤ ကဆဲးတီဒီး ယဟိဝၤယွၤလၢအတၢ်အိၣ်မူ ဒီတစိၤ. (လူၤ. ၄:၂၅, ၂၆) ပမ့ၢ်ကွၢ် မုၣ်ကမဲတဂၤအံၤအဂ့ၢ်န့ၣ် ပသ့ၣ်ညါဘၣ်လၢ ကစၢ်ယွၤဆိၣ်ဂ့ၤ ပှၤလၢအမၤစၢၤ အခ့အပှၤတဖၣ်. (မး. ၂၅:၃၄-၄၀) ဒီးပသ့ၣ်ညါဘၣ်လၢ ပှၤလၢအတီဒီး ယဟိဝၤယွၤန့ၣ် မ့ၢ်ထံၣ်ဘၣ် တၢ်အိၣ်သးလၢ အနးထဲလဲၣ်ဂ့ၤထဲလဲၣ်ဂ့ၤ ကစၢ်ယွၤကဆဲးမၤစၢၤ အဝဲသ့ၣ်. (မး. ၆:၂၅-၃၄) တကးဒံးဘၣ် ပသ့ၣ်ညါဘၣ်လၢ ယဟိဝၤယွၤ အသးအိၣ် မၤဂဲၤဆၢထၢၣ် သမူထီၣ်က့ၤ ပှၤသံ ဒီးအဝဲအိၣ်ဒီး တၢ်စိတၢ်ကမီၤလၢကမၤဝဲဒ်န့ၣ်. (မၤတၢ်. ၂၄:၁၅) အဃိ ပကြၢးသ့ၣ်နီၣ် မုၣ်ကမဲလၢ စၤရဖၤသးတဂၤအံၤ အဒိအတဲာ်.
လါအီးကထိဘၢၣ် ၁၀-၁၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ စီၤပၤ ၁၉-၂၀
“ဃုတၢ်မၤမုာ်ထီၣ် လၢယဟိဝၤယွၤအအိၣ်”
ဃုတၢ်မၤမုာ်ထီၣ် လၢယဟိဝၤယွၤအအိၣ်
၅ ဖး ၁ စီၤပၤ ၁၉:၁-၄ တက့ၢ်. ဖဲနီၢ်ပၤမုၣ် အံၤစ့ဘ့ၤလး အဲၣ်ဒိးမၤသံ ဝံအ့ၤလံယၤအခါ ဝံအ့ၤလံယၤ ပျံၤတၢ်လီၤ. အဃိ အဝဲဃ့ၢ်ပူၤဖျဲးအသးလၢ ဘ့ၢ်ၡဘၤလီၤ. အဝဲအသးဟးဂီၤဒိၣ်မးအဃိ “ဃ့ဝဲ” လၢ “အကသံလီၤ.” ဘၣ်မနုၤအဃိ အဝဲတူၢ်ဘၣ်ဝဲ ဒ်န့ၣ်လဲၣ်. စီၤအ့ၤလံယၤမ့ၢ် “ပှၤကညီ” လၢအတလၢတပှဲၤ လၢအအိၣ်ဒီး တၢ်တူၢ်ဘၣ် “ဒ်ပဝဲအသိး” လီၤ. (ယၤကိာ် ၅:၁၇) ဘၣ်သ့ၣ်သ့ၣ် အဝဲကသူၣ်ကိၢ်သးဂီၤ ဒီးကလီၤဘှံးလီၤတီၤ ဒိၣ်တလၢန့ၣ်လီၤ. ဒီးဖျါလၢ အဝဲဆိကမိၣ်ဝဲ လၢ ပှၤအံၣ်စရ့လးဖိတဖၣ် တဆီတလဲအသးဘၣ် ဒီးပှၤလၢအဘူၣ်ထီၣ်ဘါထီၣ် ယဟိဝၤယွၤန့ၣ် အိၣ်တ့ၢ်ထဲအီၤတဂၤအဃိ တၢ်လၢအဂုာ်ကျဲးစၢး မၤဝဲလၢ တၢ်ဘူၣ်တၢ်ဘါအစီဆှံအဂီၢ်န့ၣ် တကဲဘျုးနီတမံၤဘၣ်. (၁ စီၤပၤ ၁၈:၃, ၄, ၁၃; ၁၉:၁၀, ၁၄) ဖဲပသ့ၣ်ညါဘၣ်လၢ ဝံလၢအအိၣ်ဒီး တၢ်သးတီတဂၤအံၤ တူၢ်ဘၣ်ဝဲဒ်အံၤအခါ ဘၣ်သ့ၣ်သ့ၣ် ပကကမၢကမၣ်လီၤ. ဘၣ်ဆၣ် ယဟိဝၤယွၤ နၢ်ပၢၢ်ဝဲ ဝံအ့ၤလံယၤ အတၢ်တူၢ်ဘၣ်လီၤ.
အဝဲဒိးန့ၢ်ဘၣ် တၢ်သူၣ်မံသးမုာ်လၢယွၤအအိၣ်
၁၃ ဖဲဝံအ့ၤလံယၤ ဃ့ကညးဝဲယဟိဝၤယွၤလၢ အကသံဝဲအဂီၢ်န့ၣ် ယဟိဝၤယွၤ ကကွၢ်လီၤတၢ်လၢဟီၣ်ခိၣ်ချၢ ဒီးထံၣ်ဘၣ်ဝဲအဝံလၢ အအဲၣ်ဘၣ်ဝဲတဂၤ မံနီၤဝဲလၢသ့ၣ်အခီၣ်ထံး လၢပှၢ်မုၢ်ကနၢအပူၤလီၤ. ဖဲန့ၣ်အဆၢကတီၢ် နဆိကမိၣ်လၢ ကစၢ်ယွၤကတူၢ်ဘၣ်ဝဲဒ်လဲၣ်. ဖဲဝံအ့ၤလံယၤ မံဘၣ်အသးအခါ ယဟိဝၤယွၤ ဆှၢလီၤဝဲမူခိၣ်ကလူး ဒီးကလူးထိးဘၣ်ဝံအ့ၤလံယၤ ကယီကယီ, ကိးပၢၢ်ထီၣ်အီၤ ဒီးစံးဘၣ်အီၤလၢ– “ဂဲၤဆၢထၢၣ်အီၣ်တၢ်တက့ၢ်.” ဝံအ့ၤလံယၤ ဂဲၤဆၢထၢၣ်အီၣ်ဝဲ ကိၣ်လၢအကိၢ်ကိၢ်လၢၤလၢၤဒီးထံလၢ မူခိၣ်ကလူးကတဲာ်ကတီၤပာ်ဝဲန့ၣ်လီၤ. မ့ၢ်အဝဲစံးဘျုးဝဲ မူခိၣ်ကလူးတဂၤန့ၣ်စ့ၢ်ကီးဧါ. လံာ်စီဆှံပာ်ဖျါထီၣ်န့ၢ်ပှၤထဲလၢ ဝံအ့ၤလံယၤ ဂဲၤဆၢထၢၣ်အီၣ်တၢ် ဝံၤဒီးမံကဒါက့ၤဝဲလီၤ. ဘၣ်သ့ၣ်သ့ၣ် ခီဖျိလၢ အသးလီၤဘှံးလီၤဘှါဝဲဒိၣ်မးအဃိ အဝဲတဲတၢ်တကဲလၢၤဘၣ်. ဒ်လဲၣ်ဂ့ၤဒ်လဲၣ်ဂ့ၤ မူခိၣ်ကလူးတဂၤအံၤ ကိးပၢၢ်ထီၣ်ဝံအ့ၤလံယၤ လၢအသီတဘျီန့ၣ် ဘၣ်သ့ၣ်သ့ၣ်ကဘၣ်ဖဲ မုၢ်ဆ့ၣ်ဝါထီၣ်လီၤ. ဒီးတဲဘၣ်အီၤလၢ “ဂဲၤဆၢထၢၣ်အီၣ်တၢ်တက့ၢ်.” တဘျီအံၤန့ၣ် မူခိၣ်ကလူးတဲစ့ၢ်ကီးလၢ “ကျဲဧိၤကပူၤဧိၤ ယံၤကဲၣ်ဆိးလၢနဂီၢ်လီၤ.”—၁ စီၤပၤ. ၁၉:၅-၇.
အဝဲဒိးန့ၢ်ဘၣ် တၢ်သူၣ်မံသးမုာ်လၢယွၤအအိၣ်
၂၁ ဖဲတၢ်မၤအသးတဖၣ်အံၤ တခါစုာ်စုာ်ဝံၤအလီၢ်ခံ လံာ်စီဆှံဒုးသ့ၣ်နီၣ်ထီၣ်ပှၤလၢ ယဟိဝၤယွၤတအိၣ်လၢ န့ဆၢၣ်အတၢ်စိတၢ်ကမီၤသ့ၣ်တဖၣ်အံၤအကျါဘၣ်. ဝံအ့ၤလံယၤ သ့ၣ်ညါဝဲလၢ ယဟိဝၤယွၤ တလီၤဂာ်ဒ်သိးန့ဆၢၣ်အယွၤ လၢအမ့ၢ်ဘဧၤလးဘၣ်. ပှၤအါဂၤနာ်ဝဲလၢဘဧၤလး “ဒိးဝဲတၢ်အၢၣ်” ဒီးဒုးစူၤလီၤဝဲမူခိၣ်ထံလီၤ. ဘၣ်ဆၣ်သနာ်က့ န့ဆၢၣ် အတၢ်စိတၢ်ကမီၤခဲလၢာ် အဂံၢ်ခိၣ်သ့ၣ် မ့ၢ်ဝဲဒၣ်ယဟိဝၤယွၤလီၤ. ဒီးကစၢ်ယွၤအစိကမီၤဒိၣ်န့ၢ် အတၢ်ဘၣ်တ့စၢၢ်တလၢၢ်လီၤ. (၁ စီၤပၤ. ၈:၂၇) တၢ်မၤအသးလၢ ဝံအ့ၤလံယၤ ထံၣ်ဘၣ်ဝဲန့ၣ် ကဲထီၣ်တၢ်မၤစၢၤလၢအဂီၢ်ဒ်လဲၣ်. သ့ၣ်နီၣ်ထီၣ်က့ၤလၢ ဝံအ့ၤလံယၤ လဲၤဃ့ၢ်အိၣ်ခူသူၣ်အသးလၢ လ့ကအိပူၤမ့ၢ်လၢ အသူၣ်ပျံၤသးဖုးတၢ်ဒိၣ်မးအဃိလီၤ. ဘၣ်ဆၣ် ဒ်ယဟိဝၤယွၤ ပာ်ဖျါထီၣ်ဝဲအသိး အဝဲမ့ၢ်ကစၢ်လၢ အပၢၤဃာ်ဝဲန့ဆၢၣ်အတၢ်စိတၢ်ကမီၤသ့ဝဲလီၤ. လၢတၢ်န့ၣ်အဃိ ယဟိဝၤယွၤမ့ၢ်အိၣ်လၢဝံအ့ၤလံယၤ အအိၣ်တခီန့ၣ် တလိၣ်လၢ အဝဲပျံၤဝဲစီၤအၤဃာ် ဒီးနီၢ်အံၤစ့ဘ့ၤလးဘၣ်.—ဖး စံးထီၣ်ပတြၢၤ ၁၁၈:၆ တက့ၢ်.
အဝဲဒိးန့ၢ်ဘၣ် တၢ်သူၣ်မံသးမုာ်လၢယွၤအအိၣ်
၂၂ ဖဲမ့ၣ်အူဟဲဖျိးထီၣ် ဝံၤအလီၢ်ခံန့ၣ် တၢ်ခဲလၢာ်ဘှ့ၣ်ဘှီၣ်ဝဲလီၤ. ဒီးဝံအ့ၤလံယၤ နၢ်ဟူဝဲ “တၢ်ကလုၢ်ကပုာ်လုးတထံၣ် သီၣ်ထီၣ်ဝဲဒၣ်န့ၣ်လီၤ.” ခီဖျိလၢ တၢ်ကလုၢ်အံၤအဃိ အဝဲအိၣ်ဒီးတၢ်ခွဲးတၢ်ယာ်လၢ ကတဲဖျါထီၣ်ဝဲ အတၢ်တူၢ်ဘၣ် လၢအသီတဘျီလီၤ. လၢတၢ်န့ၣ်အဃိ ဝံအ့ၤလံယၤ အတၢ်တူၢ်ဘၣ်ကကိညၢ်ထီၣ်ဝဲတစဲးဖိလီၤ. ဒီး “တၢ်ကလုၢ်ကပုာ်လုး” ဒုးနာ်န့ၢ်ဝံအ့ၤလံယၤလၢ ယဟိဝၤယွၤပာ်လုၢ်ပာ်ပှ့ၤအီၤအဃိ ကဲထီၣ်တၢ်ဟ့ၣ်ဂံၢ်ဟ့ၣ်ဘါ လၢအဂီၢ်ဒိၣ်မးလီၤ. ကစၢ်ယွၤ ဒုးနာ်န့ၢ်ဝံအ့ၤလံယၤလၢ ကျဲဒ်လဲၣ်. ကစၢ်ယွၤပာ်ဖျါထီၣ် အတၢ်တိာ်ပာ်လၢကမၤဟးဂီၤကွံာ်ဝဲ ဘဧၤလး အတၢ်ဘူၣ်တၢ်ဘါလၢ အံၣ်စရ့လးအထံလီၢ်ကီၢ်ပူၤလီၤ. လၢတၢ်န့ၣ်အဃိ တၢ်လၢဝံအ့ၤလံယၤ မၤတ့ၢ်ဝဲလၢအပူၤကွံာ်န့ၣ် တကဲထီၣ် တၢ်ကလီကလီဘၣ်. တကးဒံးဘၣ် ကစၢ်ယွၤပာ်ဖျါထီၣ်ဝဲလၢ ကဆဲးသူဝဲဝံအ့ၤလံယၤလီၤ. ကစၢ်ယွၤ ဆှၢလီၤက့ၤအီၤလၢအသီတဘျီဒီး တဲဘၣ်အီၤတၢ်လၢ အဝဲကဘၣ်မၤဝဲ လီၤတံၢ်လီၤဆဲးန့ၣ်လီၤ.—၁ စီၤပၤ. ၁၉:၁၂-၁၇, ခ့ခါစှီၤကျိာ်.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၉၇ ၁၁/၁ ၃၁ ¶၂
တၢ်အဒိလၢ ဘၣ်ဃးဒီး တၢ်ဆီၣ်လီၤသးဒီး တၢ်သးတီ
ကစၢ်ယွၤ အခ့အပှၤလၢ ပစိၤခဲအံၤစ့ၢ်ကီး ဟ့ၣ်လီၤအသး ဒီးအဝဲသ့ၣ်တနီၤန့ၣ် ပာ်တ့ၢ်ကွံာ် “အစံာ်ဧိၤပှဲၤဧိၤ” လၢအမ့ၢ် တၢ်လၢကလုၢ်အီၣ်အသးသမူ ဒ်သိးဒီး ကလဲၤစံၣ်တဲၤတဲလီၤဘၣ်တၢ် လၢတၢ်လီၢ်အဂၤ မ့တမ့ၢ် ကမၤတၢ်လၢ ဘ့ၤသ့လးအဂီၢ်. တနီၤန့ၣ် လဲၤမၤ တၢ်သူၣ်ထီၣ်ဘှီထီၣ် အတၢ်မၤလၢထံဂၤကီၢ်ဂၤ. တနီၤန့ၣ် ဒ်သိး ကမၤဘၣ် ကစၢ်ယွၤအတၢ်မၤအဂီၢ် မၤဝဲတၢ်မၤလၢ အပတီၢ်ဖုၣ်. ဘၣ်ဆၣ် ပှၤလၢအမၤ ယဟိဝၤယွၤ အတၢ်မၤလၢ တၢ်သူၣ်အိၣ်သးအိၣ်အပူၤန့ၣ် ယဟိဝၤယွၤ ကဆိၣ်ဂ့ၤ အဝဲသ့ၣ် အတၢ်သးအိၣ်ဟ့ၣ်လီၤသး. အဃိ အဝဲသ့ၣ် မၤယဟိဝၤယွၤ အတၢ်မၤန့ၣ် တကဲထီၣ် တၢ်ကလီကလီဘၣ်.—မၢ်. ၁၀:၂၉, ၃၀.
လါအီးကထိဘၢၣ် ၁၇-၂၃
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၁ စီၤပၤ ၂၁-၂၂
“ယဟိဝၤယွၤသူ အတၢ်စိတၢ်ကမီၤဒ်လဲၣ်န့ၣ် ကွၢ်လိအီၤ”
it-2 ၂၁
တၢ်သုးမုၢ်ဂီၢ်မုၢ် အကစၢ် ယဟိဝၤယွၤ
ဖဲစီၤယိၤၡူ အိၣ်ဘူးဒီး ဝ့ၢ်ယရံၤဃိအခါ အဝဲထံၣ်ဘၣ်ဝဲ မူခိၣ်ကလူး ဒီးသံကွၢ်မူခိၣ်ကလူးလၢ မ့ၢ်အဝဲအိၣ်လၢ အံၣ်စရ့လး အအိၣ်တကပၤဧါ, မ့တမ့ၢ် အအိၣ်လၢ ဒုၣ်ဒါအအိၣ်တကပၤဧါ. ဖဲန့ၣ်မူခိၣ်ကလူး တဲဆၢအီၤလၢ “တမ့ၢ်ဒ်န့ၣ်ဘၣ်. ဘၣ်ဆၣ် ယဟဲဒ် ယဟိဝၤယွၤ အသုးမုၢ်အခိၣ်တဂၤ အသိးလီၤ.” (ၡူ. ၅:၁၃-၁၅) ဝံမံၤကါယၤ တဲဘၣ် စီၤအၤဃာ် ဒီးစီၤယဟိၤၡၤဖးလၢ “ယထံၣ်တ့ၢ် ယဟိဝၤယွၤ ဆ့ၣ်နီၤလၢ အလီၢ်ပစိာ်အဖီခိၣ် ဒီးမူခိၣ်အသုးမုၢ်ခဲလၢာ် ဆၢထၢၣ်ဘူးဒီးအီၤလၢ အစ့ၣ် ဒီးလၢအထွဲလီၤ.” (၁ စီၤပၤ ၂၂:၁၉-၂၁) လံာ်စီဆှံတဲဝဲ တၢ်ကတိၤလၢအမ့ၢ် “တၢ်သုးမုၢ်ဂီၢ်မုၢ် အကစၢ် ယဟိဝၤယွၤ” န့ၣ်ကြၢးဝဲဘၣ်ဝဲလီၤ. ကစၢ်ယွၤန့ၣ် အိၣ်ဒီးမူခိၣ်ကလူး အကလုာ်ကလုာ်. မူခိၣ်ကလူးတဖၣ်အံၤ မ့ၢ်ဝဲ ခ့ရူာ်, စ့ရၤဖး ဒီးမူခိၣ်ကလူးအဂၤတဖၣ်. (ယၡါယၤ ၆:၂, ၃; ၁ မိၤၡ့ ၃:၂၄; လီၣ်ဖျါ ၅:၁၁) ဒီးမူခိၣ်ကလူးတဖၣ်အံၤ တကလုာ်ဘၣ်တကလုာ်န့ၣ် အဝဲသ့ၣ် အိၣ်ဒီးမူခိၣ်ကလူး အဖုတဖၣ်. အဃိ ဘၣ်တဘျီ ယ့ၣ်ၡူးတဲဝဲလၢ အမ့ၢ်ဃ့အပၢ်လၢ “မူခိၣ်ကလူး အသုးမုၢ်အါန့ၢ်ဒံး ၁၂ ဖု” န့ၣ်သ့. ဖဲစီၤဃံးစကံယၤ ဃ့တၢ်မၤစၢၤလၢ ယဟိဝၤယွၤအခါ အဝဲတဲဝဲလၢ “တၢ်သုးမုၢ်ဂီၢ်မုၢ် အကစၢ် ယဟိဝၤယွၤ လၢအမ့ၢ် အံၣ်စရ့လး အကစၢ်ယွၤ လၢအဆ့ၣ်နီၤလၢ အလီၢ်ပစိာ် လၢခ့ရူာ်တဖၣ် အဖီခိၣ်.” ဖျါလၢအဝဲအဲၣ်ဒိးတဲဝဲ တၢ်အၢၣ်လီၤအီလီၤ အတလါ ဒီးခ့ရူာ်အဂီၤလၢ အအိၣ်လၢ တၢ်အၢၣ်လီၤအီလီၤတလါ အဖီခိၣ်. ဒီးတၢ်သ့ၣ်တဖၣ်အံၤန့ၣ် ဒိလီၤဝဲ ယဟိဝၤယွၤ အလီၢ်ပစိာ်လၢမူခိၣ်. (ၡါ. ၃၇:၁၆; ထိၣ်သတြီၤဒီး ၁ မူၤ. ၄:၄; ၂ မူၤ. ၆:၂) ဝံအလံၤၡါ အပှၤမၤစၢၤတၢ်တဂၤန့ၣ် ပျံၤတၢ်ဒိၣ်မး. ဘၣ်ဆၣ် ဖဲအဝဲထံၣ်ဝဲ “ကသ့ၣ်တဖၣ် ဒီးလ့ၣ်ကဟၣ်သုးလၢ အကပီၤဒ် မ့ၣ်အူ” လၢအမ့ၢ် ယဟိဝၤယွၤ အမူခိၣ်ကလူး အသုးမုၢ်ဂီၢ်မုၢ်တဖၣ် အိၣ်ပှဲၤလၢ ကစၢၢ်လၢ အအိၣ်ဝးတရံး ဝ့ၢ်လၢ ဝံအလံၤၡါ အိၣ်ဝဲအခါ အသးမုာ်ထီၣ်က့ၤ.—၂ စီၤပၤ ၆:၁၅-၁၇.
“ပိာ်ခွါကိးဂၤဒဲးအခိၣ် မ့ၢ်ခရံာ်”
၉ တၢ်ဆီၣ်လီၤသး. ယဟိဝၤယွၤမ့ၢ်ပှၤလၢ အကူၣ်တၢ်သ့အဒိၣ်ကတၢၢ်တဂၤလီၤ. ဘၣ်ဆၣ် အခ့အပှၤတဖၣ် အတၢ်ထံၣ်အိၣ်ဒ်လဲၣ်န့ၣ် အဝဲဒိကနၣ်န့ၢ်ဝဲလီၤ. (၁ မိၤၡ့ ၁၈:၂၃, ၂၄, ၃၂) ယဟိဝၤယွၤပျဲဝဲ ပှၤလၢအအိၣ်လၢ အတၢ်ပၢဖီလာ်သ့ၣ်တဖၣ် ကပာ်ဖျါအတၢ်ထံၣ်န့ၣ်လီၤ. (၁ စီၤပၤ ၂၂:၁၉-၂၂) ယဟိဝၤယွၤ မ့ၢ်ပှၤလၢပှၤပှဲၤ ဘၣ်ဆၣ် အတမုၢ်လၢ်တၢ်လၢတၢ်ပှဲၤ လၢပအိၣ်ဘၣ်. လၢတၢ်န့ၣ်အလီၢ် အဝဲမၤစၢၤပှၤဟီၣ်ခိၣ်ဖိလၢ အမၤအတၢ်မၤသ့ၣ်တဖၣ် ဒ်သိးကမၤတၢ်ကကဲထီၣ်လိၣ်ထီၣ်အဂီၢ်လီၤ. (စံးထီၣ်ပတြၢၤ ၁၁၃:၆, ၇) လံာ်စီဆှံပာ်ဖျါထီၣ်လၢ ယဟိဝၤယွၤမ့ၢ်ပှၤလၢအ “မၤစၢၤ” တၢ်လီၤ. (စံး. ၂၇:၉; ဧ့ၤ. ၁၃:၆) စီၤပၤဒၤဝံးသ့ၣ်ညါဝဲလၢ အတၢ်ဖံးတၢ်မၤတဖၣ် ကဲထီၣ်လိၣ်ထီၣ်န့ၣ် ခီဖျိလၢ ယဟိဝၤယွၤအတၢ်ဆီၣ်လီၤသး ဒီးအတၢ်မၤစၢၤအဃိလီၤ.—၂ ၡမူၤအ့လး ၂၂:၃၆.
it-2 ၂၄၅
တၢ်လံၣ်တၢ်လီ
ပှၤလၢအတဘၣ်သူၣ်ဘၣ်သး တၢ်မ့ၢ်တၢ်တီတဖၣ်န့ၣ် ယဟိဝၤယွၤဟ့ၣ်အခွဲးလၢ အဝဲသ့ၣ် ကဘၣ်တၢ်ကွဲန့ၢ်လွဲန့ၢ်အီၤလၢ “တၢ်သိၣ်လိလၢ အကမၣ်” အဃိ “အဝဲသ့ၣ်ကနာ်ဝဲ တၢ်လံၣ်တၢ်လီ” ဒိၣ်န့ၢ်ဒံး တၢ်သးခုကစီၣ်လၢ ဘၣ်ဃးဒီးယ့ၣ်ၡူး. (၂ သ့း. ၂:၉-၁၂) ပကကွၢ်သကိး တၢ်အဒိတခါလၢ ဘၣ်ဃးဒီး လၢပျၢၤအံၣ်စရ့လးအစီၤပၤ စီၤအၤဃာ်အဂ့ၢ်. စီၤအၤဃာ် မ့ၢ်လဲၤဒုးဝဲ ဝ့ၢ်ရၤမိးကံးလဧးန့ၣ် ဝံလၢအဘျၣ်တဖၣ် တဲဝဲလၢအကမၤနၢၤတၢ်, မ့မ့ၢ် ယဟိဝၤယွၤအဝံ မံၤကါယၤန့ၣ် တဲဝဲလၢ စီၤအၤဃာ် ကထံၣ်ဘၣ် တၢ်ကီတၢ်ခဲ. ပမ့ၢ်ကွၢ်လၢဝံမံၤကါယၤ အတၢ်ထံၣ်လၢညါခီန့ၣ် ယဟိဝၤယွၤဟ့ၣ်အခွဲးလၢ မူခိၣ်ကလူးတဂၤ ကမၤဝဲဒ်သိး စီၤအၤဃာ်အဝံတဖၣ် “ကတဲလံၣ်တဲလီတၢ် အဂီၢ်” ခီဖျိလၢ မူခိၣ်ကလူး မၤဝဲလၢအစိအကမီၤအဃိ အဝဲသ့ၣ် တဲဝဲ တၢ်လၢအအဲၣ်ဒိးတဲဝဲ ဒီးတဲဝဲ တၢ်လၢစီၤပၤ အဲၣ်ဒိးနၢ်ဟူဝဲ. စီၤအၤဃာ် ဒိကနၣ် တၢ်လံၣ်တၢ်လီအဃိ အဘၣ်သံဝဲ.—၁ စီၤပၤ ၂၂:၁-၃၈; ၂ ကွဲး. ၁၈.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢ်ပီၢ်ယၢ်လီၤက့ၤသး အနီၢ်ကီၢ်န့ၣ် မ့ၢ်မနုၤလဲၣ်
၄ လၢခံ ယဟိဝၤယွၤပာ်လီၤသးလၢ ကမၤတၢ်တမံၤမံၤလီၤ. ယဟိဝၤယွၤဆှၢလီၤ ဝံအ့ၤလံယၤလၢ ကတဲဘၣ်စီၤပၤအၤဃာ်ဒီး နီၢ်အံၤစ့ဘ့ၤလးလၢ အကစံၣ်ညီၣ် အဝဲသ့ၣ်ဒ်လဲၣ်လီၤ. အဝဲသ့ၣ်အဟံၣ်ဖိဃီဖိ ခဲလၢာ်ကဘၣ်တၢ်မၤသံအီၤလီၤ. ဖဲစီၤအၤဃာ် နၢ်ဟူဝံအ့ၤလံယၤ အတၢ်ကတိၤအံၤအခါ အသူၣ်အုးသးအုးဒိၣ်မး. အဃိ စီၤအၤဃာ်လၢအအိၣ်ဒီး တၢ်ပာ်ထီၣ်ထီအသးတဂၤအံၤ “ဆီၣ်လီၤအသး” လီၤ.—၁ စီၤပၤ ၂၁:၁၉-၂၉.
၅ စီၤအၤဃာ်ဆီၣ်လီၤအသးလၢ တၢ်တဘျီန့ၣ် ဘၣ်ဆၣ် တၢ်လၢအမၤဝဲလၢခံန့ၣ် ပာ်ဖျါထီၣ်ဝဲလၢ အတပီၢ်ယၢ်လီၤက့ၤအသး နီၢ်ကီၢ်ဘၣ်. အဝဲတဂုာ်ကျဲးစၢး မၤလီၤမၢ်ကွံာ် ဘဧၤလး အတၢ်ဘူၣ်တၢ်ဘါ လၢအဘီမုၢ်အပူၤဘၣ်. ဒီးအတဟ့ၣ်ဂံၢ်ဟ့ၣ်ဘါ ပှၤဂီၢ်မုၢ်လၢ ကဘူၣ်ထီၣ်ဘါထီၣ် ယဟိဝၤယွၤအဂီၢ်ဘၣ်. တၢ်အဂၤလၢစီၤအၤဃာ်မၤဝဲန့ၣ် အပာ်ဖျါထီၣ်စ့ၢ်ကီးလၢ အတပီၢ်ယၢ်လီၤက့ၤအသး နီၢ်ကီၢ်ဘၣ်.
၆ လၢခံ စီၤပၤအၤဃာ် ကွဲမုာ်ယူဒၤအစီၤပၤ ယဟိၡၤဖး လၢကဖီၣ်လိာ်သးစု ဒီးဒုးဝဲပှၤစူၤရံဖိလီၤ. စီၤပၤယဟိၡၤဖးန့ၣ် မ့ၢ်စီၤပၤလၢအဂ့ၤဒီး အနာ်န့ၢ်ယဟိဝၤယွၤ ဒီးအတဲဝဲလၢ တချုးလၢ အဝဲသ့ၣ် လဲၤဒုးတၢ်ဒံးဘၣ်န့ၣ် ကဘၣ်သံကွၢ်ဆိတၢ်လၢ ယဟိဝၤယွၤအဝံလီၤ. အခီၣ်ထံးခါန့ၣ် စီၤအၤဃာ် တအဲၣ်ဒိးမၤဝဲ ဒ်န့ၣ်ဘၣ် ဒီးအတဲဝဲလၢ “ပှၤလၢ ပကသံကွၢ်ယွၤလၢအီၤ အိၣ်ဒံးတဂၤ, . . . ဘၣ်ဆၣ်ဒီး ယသးဟ့အီၤလီၤ. အဂ့ၢ်ဒ်အံၤ, ကတိၤတၢ်လၢဝံအကျိာ်လၢ တၢ်ဂ့ၤလၢယဂ့ၢ်ယကျိၤတမ့ၢ်ဘၣ်, မ့ၢ်တၢ်အၢလီၤ.” ဘၣ်ဆၣ် အဝဲသ့ၣ် သံကွၢ်ဝံမံၤကါယၤလီၤ. ဒ်စီၤအၤဃာ်တဲဝဲအသိး ယွၤအဝံတဂၤန့ၣ် တဲတၢ်ကစီၣ်တဂ့ၤလၢ စီၤအၤဃာ်အဂီၢ်လီၤ. စီၤအၤဃာ်လၢ အအၢသံတဂၤအံၤ အတပီၢ်ယၢ်လီၤအသးဒီး တဃ့ပျၢ်တၢ်ကမၣ်လၢ ယဟိဝၤယွၤ အအိၣ်ဘၣ်အလီၢ် အဝဲထၢနုာ်ဝံတဂၤအံၤလၢ ဃိာ်ပူၤလီၤ. (၁ စီၤပၤ ၂၂:၇-၉, ၂၃, ၂၇) စီၤအၤဃာ်ထၢနုာ် ဝံမံၤကါယၤလၢ ဃိာ်ပူၤသနာ်က့ အမၤဝဲဒ်သိး ဝံအတၢ်စံးပာ်အံၤ တလၢထီၣ်ပှဲၤထီၣ်တဂ့ၤ အဂီၢ်န့ၣ် တသ့ဘၣ်. အဃိ စီၤအၤဃာ်သံဝဲလၢ တၢ်ဒုးအပူၤလီၤ.—၁ စီၤပၤ ၂၂:၃၄-၃၈.
တၢး၁၅ ၃/၁၅ ၉-၁၁ ¶၁၀-၁၂
၁၀ နံၣ်လၢအပူၤကွံာ်တဖၣ်န့ၣ် ယဟိဝၤယွၤ မၤစၢၤ “ကုၢ်လၢအတီ ဒီးအကူၣ်တၢ်သ့” ဒ်သိး အတၢ်သ့ၣ်ညါနၢ်ပၢၢ် ကအါထီၣ်အဂီၢ်. ဖဲအဝဲသ့ၣ် ကၡဲပၠးထီၣ်ဝဲလံာ်စီဆှံ အတၢ်ဂ့ၢ်တၢ်ကျိၤတမံၤမံၤ အခီပညီအခါ တၢ်အုၣ်အသး လၢအဘၣ်ထွဲလိာ်သးလၢ လံာ်စီဆှံအဆၢအဂၤအပူၤ မ့ၢ်တအိၣ်လီၤတံၢ်လီၤဆဲးဘၣ်န့ၣ် အဝဲသ့ၣ် တတဲကြီဝဲဘၣ်. တၢ်နၢ်ပၢၢ် အလီၢ်လံၤလၢ ဘၣ်ဃးဒီး တၢ်အဒိ ဒီးပှၤလၢအဘၣ်တၢ်ဒိလီၤအီၤအဂ့ၢ် တနီၤန့ၣ် ပှၤနၢ်ပၢၢ်ဘၣ်အီၤ တညီဘၣ်. တၢ်ဂ့ၢ်လၢ ဘၣ်ဃးဒီး လံာ်စီဆှံတဆၢန့ၣ် ဒိလီၤဝဲ မတဂၤလဲၣ် ဒီးဘၣ်မနုၤအဃိ ပတဲဒ်န့ၣ်လဲၣ်န့ၣ် အကီလၢ ပှၤကနၢ်ပၢၢ် ဒီးတိၢ်နီၣ်အီၤကန့ၢ်အဂီၢ် ဒီးပှၤကဘၣ်မၤထွဲအီၤဒ်လဲၣ်န့ၣ် ပှၤတသ့ၣ်ညါဘၣ်. တကးဒံးဘၣ် ပှၤပာ်ဖျါထီၣ်အါလၢ လံာ်စီဆှံအခီပညီ လၢပှၤတယာ်အီၤတဖၣ် အဃိ ပှၤတသ့ၣ်နီၣ် ပာ်သူၣ်ပာ်သးလၢ ပှၤကဘၣ်ဟံးန့ၢ် တၢ်မၤလိ ဒ်လဲၣ်န့ၣ်ဘၣ်. မ့မ့ၢ် ပလံာ်လဲၢ်လၢ ဆၢကတီၢ်ခဲအံၤန့ၣ် ပှၤပာ်ဖျါထီၣ်အါလၢ တၢ်မၤလိလၢ ဘၣ်ဃးဒီး တၢ်နာ်, တၢ်တူၢ်န့ၢ်ခီၣ်ကဲ, တၢ်သးတီဒီးယွၤ ဒီးတၢ်ဂ့ၤတၢ်ဝါအဂၤလၢ ပမၤလိန့ၢ်အီၤလၢ ပှၤဂ့ၢ်လၢ လံာ်စီဆှံပူၤ ဒီးပှၤပာ်ဖျါထီၣ်ဝဲ တၢ်ဂ့ၢ်တဖၣ်အံၤ ယိယိဖိ.
၁၁ ဘၣ်ဃးဒီး စီၤနၤဘိးအဂ့ၢ်န့ၣ် ခဲအံၤပနၢ်ပၢၢ်ထီၣ် ၡဲၡဲဖိ ဒီးယိယိဖိလံ. စီၤနၤဘိးသံန့ၣ် မ့ၢ်လၢအဝဲအိၣ်ဒီး တၢ်သးတီအဃိ. တမ့ၢ်လၢ အဝဲဘၣ်တၢ်ဒိလီၤအီၤဒ် ယ့ၣ်ၡူး မ့တမ့ၢ် ပှၤဘၣ်တၢ်ဒိးဖှူအီၤအဃိ ဘၣ်သံန့ၣ်ဘၣ်. ပှၤလၢအအိၣ်ဒီး တၢ်စိတၢ်ကမီၤန့ၣ် မၤအၢမၤနးအီၤဘၣ်ဆၣ် အဝဲဆဲးမၤထွဲ ယဟိဝၤယွၤ အတၢ်သိၣ်တၢ်သီ. (၄ မိၤ. ၃၆:၇; ၁ စီၤပၤ ၂၁:၃) ပဝဲတဂၤဂ့ၤတဂၤဂ့ၤန့ၣ် ပထံၣ်ဘၣ် တၢ်မၤအၢမၤနး ဒ်စီၤနၤဘိးအသိးသ့, အဃိ စီၤနၤဘိး အဒိအတဲာ်န့ၣ် ကဲထီၣ်တၢ်ဂံၢ်တၢ်ဘါလၢပဂီၢ်. (ဖး ၂ တံၤမသ့း ၃:၁၂.) တၢ်ဂ့ၢ်တခါအံၤန့ၣ် ကဲထီၣ်တၢ်ဂံၢ်တၢ်ဘါ လၢခရံာ်ဖိခဲလၢာ်အဂီၢ်. ဒီးညီလၢအဝဲသ့ၣ် ကနၢ်ပၢၢ်, ကတိၢ်နီၣ်ဝဲ ဒီးကမၤထွဲဝဲအဂီၢ်.
၁၂ မ့ၢ်ပကြၢးဆိကမိၣ်လၢ တၢ်ဂ့ၢ်တၢ်ကျိၤလၢ လံာ်စီဆှံပူၤတခါန့ၣ် ပဟံးန့ၢ်တၢ်မၤလိ သ့ထဲတခါလီၤဧါ. ပတကြၢး ဆိကမိၣ်ဒ်န့ၣ်ဘၣ်. ဆၢကတီၢ်ခဲအံၤ ပလံာ်လဲၢ်တဖၣ်န့ၣ် တပာ်ဖျါထီၣ်ဝဲထဲ တၢ်ဂ့ၢ်အခီပညီဘၣ်. အပာ်ဖျါထီၣ်အါလၢ တၢ်မၤလိလၢ ပဟံးန့ၢ်အီၤသ့ ဒီးတၢ်ဂ့ၢ်လၢ အဘၣ်ထွဲလိာ်သးတဖၣ်. အဒိ, စီၤနၤဘိးထံၣ်ဘၣ် တၢ်နးတၢ်ဖှီၣ် ဒီးဘၣ်သံဘၣ်ဆၣ် အိၣ်ဒီးတၢ်သးတီအဃိ ဒုးသ့ၣ်နီၣ်ထီၣ်ပှၤလၢ ယ့ၣ်ၡူး ဒီးပှၤဘၣ်တၢ်ဒိးဖှူအီၤတဖၣ် အတၢ်သးတီ. တကးဒံးဘၣ် ကစၢ်အ “သိလၢအဂၤတဖၣ်” စ့ၢ်ကီးအိၣ်ဒီး တၢ်သးတီ. ပသ့ၣ်ညါဘၣ်လၢ ကစၢ်ယွၤ သိၣ်လိပှၤ ယိယိဖိ ဒီးၡဲၡဲဖိလီၤ.
လါအီးကထိဘၢၣ် ၂၄-၃၀
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ စီၤပၤ ၁-၂
“တၢ်အဒိအတဲာ်လၢအဂ့ၤ လၢဘၣ်ဃးဒီး တၢ်သိၣ်လိပှၤဂၤ”
ဒီပုၢ်ဝဲၢ်ခွါတဖၣ် ကတုၤထီၣ်ထီၣ်ဘး ဒီးကဟံးန့ၢ်မူဒါအဂီၢ် တၢ်အိၣ်ဖှိၣ်သးပှၢ် သိၣ်လိနဲၣ်လိ အဝဲသ့ၣ်ကသ့ဒ်လဲၣ်
၁၅ ဝံအလံၤၡါ အဂ့ၢ်အကျိၤ ပာ်ဖျါထီၣ်စ့ၢ်ကီးဝဲလၢ မုၢ်မဆါတနံၤအံၤ ဒီပုၢ်ဝဲၢ်ခွါတဖၣ် ကဘၣ်ယူးယီၣ်ပာ်ကဲဝဲ တၢ်အိၣ်ဖှိၣ်သးပှၢ်လၢ အိၣ်ဒီးတၢ်လဲၤခီဖျိအါတဖၣ်လီၤ. ဝံအ့ၤလံယၤ ဒီးဝံအလံၤၡါ လဲၤအိၣ်သကိးဝဲ ဝံတဖၣ်လၢ ဝ့ၢ်ယရံၤဃိဝံၤဒီး အဝဲသ့ၣ်ခံဂၤ လဲၤတုၤဖဲ ထံကျိယၢ်ဒ့ၣ်အကၢၢ်နံၤလီၤ. တၢ်န့ၣ်အလီၢ်ခံ “စီၤအ့ၤလံယၤ ဟံးန့ၢ်အယၣ်ဒီး ထူထီၣ်ဝဲဒီး တီၢ်ထံဒီး ထံသ့ၣ်ဖးလီၤအသးဆူအံၤဆူန့ၣ်” လီၤ. ဖဲအဝဲသ့ၣ်ခံဂၤ ခီဂာ်ဝဲ ယၢ်ဒ့ၣ်ကျိအဃ့ထီအခါန့ၣ် “လဲၤတၢ်ဒီးကတိၤတၢ်” န့ၣ်လီၤ. တၢ်လၢအသရၣ် တဲအီၤတဖၣ်န့ၣ် စီၤအလံၤၡါ ကနၣ်ဝဲထံထံ ဒီးမၤလိအါထီၣ်တၢ်လၢအအိၣ်လီၤ. စီၤအလံၤၡါ တဆိကမိၣ်ဝဲလၢ အဝဲသ့ၣ်ညါတၢ်ခဲလၢာ်န့ၣ်ဘၣ်. ဝံအ့ၤလံယၤ ဘၣ်တၢ်စိာ်ထီၣ်အီၤလၢ ကလံၤသဝံးဝံၤအလီၢ်ခံ စီၤအလံၤၡါ က့ၤကဒါက့ၤဆူ ထံကျိယၢ်ဒ့ၣ်အနံၤန့ၣ်လီၤ. အဝဲတီၢ်ထံ လၢဝံအ့ၤလံယၤအယၣ်ဒီးစံးဝဲ– “ယွၤစီၤအ့ၤလံယၤ အကစၢ်န့ၣ်မ့ၢ်အအိၣ်ဖဲလဲၣ်” ဒီးထံကျိထံသ့ၣ်ဖးကဒီးလီၤ.—၂ စီၤပၤ ၂:၈-၁၄.
ဒီပုၢ်ဝဲၢ်ခွါတဖၣ် ကတုၤထီၣ်ထီၣ်ဘး ဒီးကဟံးန့ၢ်မူဒါအဂီၢ် တၢ်အိၣ်ဖှိၣ်သးပှၢ် သိၣ်လိနဲၣ်လိ အဝဲသ့ၣ်ကသ့ဒ်လဲၣ်
၁၆ စီၤအလံၤၡါ မၤတၢ်လီၤလးအဆိကတၢၢ်အံၤ မ့ၢ်ဝဲဒ်သိးဒီး ဝံအ့ၤလံယၤ မၤဝဲတၢ်လီၤလး လၢအလီၢ်ခံကတၢၢ်တခါန့ၣ် မ့ၢ်နပာ်သူၣ်ပာ်သးစ့ၢ်ကီးဧါ. ပဒိးန့ၢ်ဘၣ်တၢ်မၤလိမနုၤလဲၣ်. စီၤအလံၤၡါ တဆိကမိၣ်ဝဲလၢ အဝဲကဲထီၣ်ခိၣ်နၢ်လံအဃိ ကဘၣ်မၤတၢ်လၢ အလီၤဆီဒီးဝံအ့ၤလံယၤမၤဝဲန့ၣ်ဘၣ်. လၢတၢ်န့ၣ်အလီၢ် အဝဲမၤဝဲဒ် ဝံအ့ၤလံယၤမၤဝဲအသိးလီၤ. ဝံအလံၤၡါ ပာ်ဖျါထီၣ် တၢ်ယူးယီၣ်ပာ်ကဲ အသရၣ်အဃိ ဝံအဂၤတဖၣ်စ့ၢ်ကီး နာ်န့ၢ်အီၤလီၤ. (၂ စီၤပၤ ၂:၁၅) ဝံအလံၤၡါ မၤဝံအတၢ်မၤအနံၣ် ၆၀ ဒီးယဟိဝၤယွၤဟ့ၣ်အီၤ တၢ်စိတၢ်ကမီၤလၢ ကမၤတၢ်လီၤလးအါန့ၢ်ဒံး ဝံအ့ၤလံယၤလီၤ. မုၢ်မဆါတနံၤညါအံၤ ပှၤမၤလိတၢ်ဖိတဖၣ် ဒိးန့ၢ်ဘၣ်တၢ်မၤလိမနုၤလဲၣ်.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၅ ၈/၁ ၉ ¶၁
လံာ်စီဆှံ အတၢ်ပာ်ဖျါလၢလံာ် ၂ စီၤပၤအဂီၢ်
၂:၁၁—လံာ်စီဆှံတဲဝဲ ဝံအ့ၤလံယၤ “ဘၣ်တၢ်ဟံးထီၣ်အီၤလၢ မူခိၣ်လၢကလံၤမုၢ်အပူၤ” အဃိ မူခိၣ်တခါအံၤန့ၣ် အဲၣ်ဒိးတဲဝဲ တၢ်လီၢ်ဖဲလဲၣ်. မူခိၣ်တခါအံၤန့ၣ် တအဲၣ်ဒိးတဲဝဲ တၢ်လီၢ်ဖးယံၤလၢ မုၢ်, လါ, ဆၣ်တဖၣ် အိၣ်ဝဲအလီၢ် မ့တမ့ၢ် ကစၢ်ယွၤ ဒီးမူခိၣ်ကလူးတဖၣ် အိၣ်ဝဲဆိးဝဲအလီၢ်ဘၣ်. (၅ မိၤၡ့ ၄:၁၉; စံးထီၣ်ပတြၢၤ ၁၁:၄; မးသဲ ၆:၉; ၁၈:၁၀) “မူခိၣ်” လၢကစၢ်ယွၤစိာ်ထီၣ်ဝဲ ဝံအ့ၤလံယၤတတီၤန့ၣ် အကဲဝဲ တၢ်ဖးဖီလီၤ. (စံးထီၣ်ပတြၢၤ ၇၈:၂၆; မးသဲ ၆:၂၆) ဖဲတၢ်ဟံးထီၣ် ဝံအ့ၤလံယၤလၢ တၢ်ဖးဖီလၢ ကလံၤကျါအခါ လ့ၣ်ကဟၣ်လၢအကပီၤဒ် မ့ၣ်အူအသိးန့ၣ် လဲၤဆှၢ ဝံအ့ၤလံယၤလၢ တၢ်လီၢ်အဂၤတတီၤ လၢဟီၣ်ခိၣ်လိၤ ဒီးအဝဲဆဲးအိၣ်ဝဲဖဲန့ၣ်လီၤ. အဃိ လၢခံအနံၣ်တဖၣ်န့ၣ် ဝံအ့ၤလံယၤကွဲးလံာ်ဆူ ယူဒၤအစီၤပၤ ယဟိရၣ်အအိၣ်လီၤ.—၂ ကွဲးနီၣ်တၢ် ၂၁:၁, ၁၂-၁၅.
လါအီးကထိဘၢၣ် ၃၁–လါနိၣ်ဝ့ဘၢၣ် ၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ စီၤပၤ ၃-၄
“စိာ်ထီၣ် နဖိခွါတက့ၢ်”
အဝဲကဂဲၤဆၢထၢၣ်သမူထီၣ်က့ၤန့ၣ် “ယသ့ၣ်ညါ”
၇ ပှၤလၢအဂဲၤဆၢထၢၣ်သမူထီၣ်က့ၤ ခံဂၤတဂၤန့ၣ် ဝံအလံၤၡါ မၤဝဲလီၤ. လၢဝ့ၢ်ၡူန့ၣ်အပူၤန့ၣ် ပှၤအံၣ်စရ့လးမုၣ်လၢ အဖိအိၣ်တန့ၢ်ဘၣ် အိၣ်ဝဲတဂၤလီၤ. အဝဲဒီးအဝၤန့ၣ် အသးပှၢ်ဒီးအဖိအိၣ်တန့ၢ်လၢၤဘၣ်. ဘၣ်ဆၣ် ခီဖျိလၢအဝဲတူၢ်လိာ်မုာ်ဝဲ ဝံအလံၤၡါဂ့ၤဂ့ၤအဃိ ယဟိဝၤယွၤ ဆိၣ်ဂ့ၤအီၤဒီးဟ့ၣ်အီၤဖိခွါတဂၤလီၤ. လၢခံစှၤကိာ်နံၣ်န့ၣ် အဖိခွါအံၤသံဝဲလီၤ. ထံၣ်တမှံကွၢ်လၢ မိၢ်အံၤအသးကဘၣ်ဒိဝဲ ထဲလဲၣ်န့ၣ်တက့ၢ်. အဝဲအသးဘၣ်ဒိဒိၣ်မးတုၤဒၣ်လဲာ် အလဲၤဃုဝဲဝံအလံၤၡါလၢ ကစၢၢ်ကၢ်မ့ၤလး လၢအယံၤဝဲအကံလိမံထၢၣ် ၃၀ (၁၉ မံးလာ်) လီၤ. ဝံအလံၤၡါ ဆှၢလီၤဆိဝဲ စီၤက့ၤဃစံလၢ ကလဲၤဆူဝ့ၢ်ၡူန့ၣ် ဒ်သိးကမၤသမူထီၣ်က့ၤ ဖိသၣ်န့ၣ်လီၤ. ဘၣ်ဆၣ် စီၤက့ၤဃစံ မၤဝဲတသ့ဘၣ်. လၢတၢ်န့ၣ်အဃိ မိၢ်အံၤဟဲက့ၤကိးဝဲ ဝံအလံၤၡါလၢအဟံၣ်န့ၣ်လီၤ.—၂ စီၤပၤ ၄:၈-၃၁.
အဝဲကဂဲၤဆၢထၢၣ်သမူထီၣ်က့ၤန့ၣ် “ယသ့ၣ်ညါ”
၈ ဝံအလံၤၡါ လဲၤနုာ်လၢဟံၣ်ပူၤ လၢဖိသၣ်အအိၣ် ဒီးဃ့ဘါထုကဖၣ်တၢ်လီၤ. ယဟိဝၤယွၤ စံးဆၢက့ၤဝံအလံၤၡါ အတၢ်ထုကဖၣ် ဒီးမၤသမူထီၣ်က့ၤဝဲ ဖိသၣ်အံၤန့ၣ်လီၤ. ဖဲမိၢ်အံၤထံၣ်ဘၣ်ဝဲအဖိခွါ ဂဲၤဆၢထၢၣ်သမူထီၣ်က့ၤအခါ အဝဲကသးခုဒိၣ်မးလီၤ. (ဖး ၂ စီၤပၤ ၄:၃၂-၃၇ တက့ၢ်.) ဘၣ်သ့ၣ်သ့ၣ် အဝဲကသ့ၣ်နီၣ်ထီၣ်ဝဲ နီၢ်ဃးနၤအတၢ်ထုကဖၣ်န့ၣ်လီၤ. နီၢ်ဃးနၤန့ၣ် အဖိအိၣ်တန့ၢ်ဘၣ် ဘၣ်ဆၣ် လၢခံယဟိဝၤယွၤ ဟ့ၣ်အီၤအဖိခွါ စီၤၡမူၤအ့လးလီၤ. နီၢ်ဃးနၤ စံးထီၣ်ပတြၢၤ ယဟိဝၤယွၤ မ့ၢ်လၢအဝဲ “ဒုးလဲၤလီၤဆူ ပျုၤပူၤ, ဒီးဒုးဟဲက့ၤထီၣ်” တၢ်လီၤ. (၁ ၡမူၤအ့လး ၂:၆) ကစၢ်ယွၤ မၤသမူထီၣ်က့ၤ ဖိသၣ်ပိာ်ခွါလၢအအိၣ်လၢ ဝ့ၢ်ၡူန့ၣ်န့ၣ် မ့ၢ်ဒၣ်အပာ်ဖျါထီၣ်လၢ အဝဲအိၣ်ဒီး တၢ်သ့တၢ်ဘၣ်လၢ ကမၤသမူထီၣ်က့ၤပှၤသံန့ၣ်လီၤ.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-2 ၆၉၇ ¶၂
ဝံ
“ဝံအဖိခွါတဖၣ်.” လံာ်တဘ့ၣ်လၢအမ့ၢ် Gesenius’ Hebrew Grammar (Oxford, 1952, p. 418) န့ၣ်တဲဝဲလၢ ဧ့ၤဘြံၤအတၢ်ကတိၤလၢအမ့ၢ် ဘဲ (ဖိခွါ) မ့တမ့ၢ် ဘဲနၤ (ဖိခွါတဖၣ်) န့ၣ်ဘၣ်သ့ၣ်သ့ၣ် အဲၣ်ဒိးတဲဝဲ “ပှၤတဖု မ့တမ့ၢ် တၢ်ကရၢကရိတဖုဖု (မ့တမ့ၢ် ပှၤအဒူၣ်တဒူၣ် မ့တမ့ၢ် ပှၤထီၣ်တၢ်မၤလိတခါခါ). “ဝံအဖိခွါတဖၣ်” န့ၣ်ဘၣ်သ့ၣ်သ့ၣ် ကအဲၣ်ဒိးတဲဝဲ ပှၤတဖၣ်လၢ ကထီၣ်ကၠိ ဒ်သိးကကဲထီၣ်ဘၣ်ဝံအဂီၢ် မ့တမ့ၢ် ဝံတဖုလၢအမၤသကိးတၢ်. ဝံအဖိခွါတဖၣ်န့ၣ် ညီနုၢ်လံာ်စီဆှံပာ်ဖျါထီၣ်ဝဲလၢ အအိၣ်လၢ ဘ့ၤသ့လး, ဝ့ၢ်ယရံၤဃိ ဒီးဝ့ၢ်ကံးလကၤလး. (၂ စီၤပၤ ၂:၃, ၅; ၄:၃၈; ထိၣ်သတြီၤဒီး ၁ မူၤ. ၁၀:၅, ၁၀) ဝံၡမူၤအ့လး တီခိၣ်ရိၤမဲဝဲ ဝံတဒူၣ်လၢအအိၣ်လၢ ဝ့ၢ်ရၤမါ. (၁ မူၤ. ၁၉:၁၉, ၂၀) ဒီးဝံအလံၤၡါနာ်က့ လီၤဂာ်လၢ အတီခိၣ်ရိၤမဲဝဲ ဝံတဒူၣ်စ့ၢ်ကီး. (၂ စီၤပၤ ၄:၃၈; ၆:၁-၃; ထိၣ်သတြီၤဒီး ၁ စီၤပၤ ၁၈:၁၃) လံာ်စီဆှံတဲဝဲလၢ အဝဲသ့ၣ် တ့ထီၣ်အတၢ်အိၣ်တၢ်ဆိးအလီၢ် လၢအနီၢ်ကစၢ် ဒီးဃ့ဆိပှၤတၢ်ပီးတၢ်လီအဃိ ဖျါလၢ အဝဲသ့ၣ်အိၣ်မူဝဲ ယိယိဖိ. အဝဲသ့ၣ် အိၣ်ဒ်သိးသိး အီၣ်ဒ်သိးသိးနာ်က့ ဘၣ်သ့ၣ်သ့ၣ် အဝဲသ့ၣ် တဂၤဒီးတဂၤန့ၣ် ဒိးန့ၢ်ဘၣ်မူဒါ ကလီၤဆီလိာ်အသး.—၁ စီၤပၤ ၂၀:၃၅-၄၂; ၂ စီၤပၤ ၄:၁, ၂, ၃၉; ၆:၁-၇; ၉:၁, ၂.
တၢး၁၃ ၈/၁၅ ၂၈-၂၉
စူၤရံအစီၤပၤ ဟးလူၤဃုဝဲ ဝံအလံၤၡါ ဒ်သိးကဖီၣ်န့ၢ်ဝဲအဂီၢ် ဒီးအဝဲနၢ်ဟူဝဲလၢ ဝံအလံၤၡါ အိၣ်လၢဝ့ၢ်ဒိၤသၣ်. ဒီးဝ့ၢ်အံၤ အိၣ်လၢတၢ်လူၢ်ခိၣ်ဒီး အိၣ်ဒီးအဒူၣ်. အဃိ လၢမုၢ်နၤခီန့ၣ် စူၤရံအစီၤပၤ ဆှၢလီၤဝဲ အသုးမုၢ်တဖၣ်, ကသ့ၣ်တဖၣ် ဒီးလ့ၣ်ကဟၣ်သုးတဖၣ် လၢဝ့ၢ်ဒိၤသၣ်. ဒီးဖဲမုၢ်ဟဲထီၣ်အခါ အဝဲသ့ၣ် ကဝီၤဃာ်ဝဲ ဝ့ၢ်အံၤလံ.—၂ စီၤပၤ ၆:၁၃, ၁၄.
ဖဲဝံအလံၤၡါ အပှၤမၤစၢၤတၢ်တဂၤ ဂဲၤဆၢထၢၣ် လဲၤလၢတၢ်ချၢအခါ အထံၣ်ဝဲ အဒုၣ်အဒါ အသုးတဖၣ်အဃိ အဝဲပျံၤတၢ်. အဃိ အဝဲကိးပသူထီၣ်လၢ “အၣ်လါ ကစၢ်ဧၢ, ပကဘၣ်မၤဒ်လဲၣ်.” ဖဲန့ၣ် ဝံအလံၤၡါ တဲဆၢဝဲလၢ “ပှၤလၢအအိၣ်ဒီးပှၤန့ၣ် အိၣ်အါန့ၢ်ဒံး ပှၤလၢအိၣ်ဒီးအဝဲသ့ၣ်လီၤ. အဃိ တဘၣ်ပျံၤတၢ်တဂ့ၤ.” ဝံၤဒီး ဝံအလံၤၡါ ဃ့ထုကဖၣ်ဝဲလၢ “အိ ယဟိဝၤယွၤဧၢ, ဝံသးစူၤအိးထီၣ် အမဲာ်ချံ ဒ်သိးအကထံၣ်ဝဲန့ၣ်တက့ၢ်. ဒီးယဟိဝၤယွၤ အိးထီၣ်ဝဲ ပှၤမၤစၢၤတၢ်န့ၣ် အမဲာ်ချံတဘျီဃီလီၤ. ဒီးအဝဲထံၣ်ဘၣ်ဝဲလၢ လၢကစၢၢ်ကလိကျါန့ၣ် အိၣ်ပှဲၤဝဲဒီး ကသ့ၣ်တဖၣ် ဒီးလ့ၣ်ကဟၣ်သုးလၢ အကပီၤဒ် မ့ၣ်အူ အိၣ်ဝးတရံး အဝဲသ့ၣ်လီၤ.” (၂ စီၤပၤ ၆:၁၅-၁၇) လၢဝံအလံၤၡါအအိၣ်န့ၣ် ပမၤလိန့ၢ် တၢ်မနုၤလဲၣ်.
ဝံအလံၤၡါ နာ်န့ၢ်ယဟိဝၤယွၤ ဒီးအဝဲနာ်ဝဲလၢ ယဟိဝၤယွၤ ကဒီသဒၢအီၤအဃိ ဖဲစူၤရံအသုးဖိတဖၣ် ဟဲကဝီၤဃာ်အီၤအခါ အဝဲပာ်အသး မုာ်မုာ်ခုၣ်ခုၣ်သ့. ဆၢကတီၢ်ခဲအံၤ ကစၢ်ယွၤ တမၤန့ၢ်ပှၤတၢ်လီၤလးလၢၤဘၣ်. ဘၣ်ဆၣ် ပသ့ၣ်ညါဘၣ်လၢ ယဟိဝၤယွၤ ကဒီသဒၢ အပှၤဂီၢ်မုၢ်ဒီတဖု. ပဝဲစ့ၢ်ကီး ပမ့ၢ်သန့ၤပသးလၢ ယဟိဝၤယွၤထီဘိ ဒီးနာ်လၢ ယဟိဝၤယွၤ ကဒီသဒၢ အပှၤဂီၢ်မုၢ်န့ၣ် ပကတူၢ်ဘၣ်လၢ ကသ့ၣ်တဖၣ် ဒီးလ့ၣ်ကဟၣ်သုးလၢ အကပီၤဒ်မ့ၣ်အူန့ၣ် ဒီသဒၢပှၤ. အဃိ ပကတူၢ်ဘၣ်လၢ ပအိၣ်ဘၣ်ဘံၣ်ဘံၣ်ဘၢဘၢ ဒီးပကဒိးန့ၢ်ဘၣ် ကစၢ်ယွၤ အတၢ်ဆိၣ်ဂ့ၤ. (စံးထီၣ်ပတြၢၤ ၄:၈) ပကတဲသကီး ဘၣ်ဃးဒီး တၢ်ကဲထီၣ်အသးဒီး ဝံအလံၤၡါအဂ့ၢ်န့ၣ် ပဒိးန့ၢ်ဘၣ်အဘျုးကသ့ဒ်လဲၣ်.
စီၤအလံၤၡါ စးထီၣ်ပိာ် စီၤအ့ၤလံယၤအခံ
ဘၣ်တနံၤဖဲ စီၤအလံၤၡါ ထဲၣ်တၢ်လၢစံာ်ပျီပူၤအခါ ဝံအ့ၤလံယၤ ဟဲလၢအအိၣ်ဒီး ပာ်ထီၣ်ဝဲအဆ့ကၤလၢ စီၤအလံၤၡါအလိၤ. အမၤဝဲဒ်န့ၣ်န့ၣ် မ့ၢ်ဝဲအကွဲမုာ် စီၤအလံၤၡါလၢ ကမၤန့ၢ်တၢ်လၢအဂီၢ်. စီၤအလံၤၡါ မၤဝဲတၢ်အီၣ်အမူးဖးဒိၣ်တခါ ဒီးကွဲမုာ်ဝဲ အသကီးတဖၣ်, ဆၢဂ့ၤဆၢဝါဝဲ အမိအပါ ဝံၤဘျီ လဲၤပိာ်ဝဲ ဝံအ့ၤလံယၤအခံ. (၁ စီၤပၤ ၁၉:၁၆, ၁၉, ၂၁) စီၤအလံၤၡါ သးအိၣ်မၤဝဲ တၢ်လၢယဟိဝၤယွၤ မၢအီၤခဲလၢာ်အဃိ ယဟိဝၤယွၤ သူအီၤလၢကျဲအါဘိ ဒီးလၢခံန့ၣ် ယဟိဝၤယွၤ ဒုးကဲထီၣ်အီၤလၢဝံတဂၤ လၢဝံအ့ၤလံယၤအလီၢ်.
ဘၣ်သ့ၣ်သ့ၣ် စီၤအလံၤၡါ မၤန့ၢ်တၢ်လၢ ဝံအ့ၤလံယၤအဂီၢ် ကအိၣ်ဃုနံၣ်ညါ. ဒီးဖဲတၢ်ဃုနံၣ်န့ၣ်အတီၢ်ပူၤန့ၣ် လံာ်စီဆှံ ပာ်ဖျါထီၣ်လၢ စီၤအလံၤၡါ “လူလီၤထံလၢ စီၤအ့ၤလံယၤ အစုလိၤ.” (၂ စီၤပၤ ၃:၁၁) အဲၣ်ဒိးတဲဝဲအခီပညီဒ်လဲၣ်. ဖဲစိၤအဝဲန့ၣ်န့ၣ် ပှၤအီၣ်မ့ၤလၢပှၤစု. ဒီးဖဲပှၤအီၣ်မ့ၤဝံၤန့ၣ် ပျဲၢ်တဂၤ ဘၣ်လူလီၤန့ၢ်ထံလၢ အကစၢ်အစုလိၤ လၢအကစၢ် ကသ့စီအစုအဂီၢ်. အဃိဖျါလၢ စီၤအလံၤၡါအတၢ်မၤအံၤ အပတီၢ်ဖုၣ် ဒီးအရ့တဒိၣ်ဘၣ်. ဘၣ်ဆၣ် လၢစီၤအလံၤၡါအဂီၢ်န့ၣ် အကဲဘၣ် ဝံအ့ၤလံယၤ အခ့အပှၤအဃိ အထံၣ်ဝဲလၢ အမ့ၢ်တၢ်ခွဲးတၢ်ယာ်ဖးဒိၣ်.
ဒ်န့ၣ်အသိး ခရံာ်ဖိလၢဆၢကတီၢ်ခဲအံၤန့ၣ် အဝဲသ့ၣ် တူၢ်လိာ်ဝဲမူဒါအါမံၤလၢ ကမၤကစၢ်ယွၤအတၢ်မၤလၢ ဆၢကတီၢ်လၢပှဲၤ. အဝဲသ့ၣ် မၤဝဲဒ်န့ၣ် မ့ၢ်လၢအဝဲသ့ၣ် နာ်န့ၢ်ယဟိဝၤယွၤ ဒီးအဲၣ်ဒိးဟ့ၣ်ယဟိဝၤယွၤ တၢ်လၢအဂ့ၤကတၢၢ်. အဃိ အဝဲသ့ၣ်တနီၤန့ၣ် လဲၤမၤတၢ်လၢ ဘ့ၤသ့လး ဒီးတနီၤန့ၣ် မၤတၢ်လၢ တၢ်သူၣ်ထီၣ်ဘှီထီၣ်တၢ်မၤ. ဒီးအဝဲသ့ၣ်တနီၤန့ၣ် ကမၤဝဲတၢ်မၤလၢ ပှၤအါဂၤထံၣ်ဝဲလၢ အကဲတၢ်မၤလၢ အပတီၢ်ဖုၣ် ဒီးအရ့တဒိၣ်ဘၣ်. ဘၣ်ဆၣ် ပဝဲဒၣ်န့ၣ် ပတအိၣ်ဒီးတၢ်ထံၣ်ဒ်န့ၣ်ဘၣ်, မ့ၢ်လၢ ယဟိဝၤယွၤန့ၣ် ပာ်လုၢ်ပာ်ပှ့ၤဝဲ တၢ်ဖံးတၢ်မၤခဲလၢာ်လၢ အခ့အပှၤမၤဝဲတဖၣ်.—ဧ့ၤဘြံၤ. ၆:၁၀.
စီၤအလံၤၡါ တအဲၣ်ဒိးပတုာ်အမူဒါဘၣ်
တချုးလၢ တၢ်ဟံးထီၣ်ကွံာ် ဝံၤအ့ၤလံယၤလၢ “မူခိၣ်လၢ ကလံၤမုၢ်အပူၤအခါ” အဝဲမၢဝံအ့ၤလံယၤ လဲၤလၢတၢ်လီၢ်တတီၤ. ဝံအ့ၤလံယၤတဲဘၣ် စီၤအလံၤၡါလၢ အတဘၣ်လဲၤပိာ်အခံဘၣ်. ဘၣ်ဆၣ် စီၤအလံၤၡါ တဲဆၢက့ၤအီၤလၢ “ယတပာ်တ့ၢ်နၤဘၣ်.” ဖဲအဝဲသ့ၣ် လဲၤလၢကျဲအခါ ဝံအ့ၤလံယၤမၢ စီၤအလံၤၡါအိၣ်တ့ၢ် ခံဘျီညါ, ဘၣ်ဆၣ် စီၤအလံၤၡါ တကနၣ်ဝဲဘၣ်. (၂ စီၤပၤ ၂:၁-၆) စီၤအလံၤၡါ သးတီဒီး ဝံအ့ၤလံယၤ ဒ်သိးနီၢ်ရူၤသး သးတီဒီး နီၢ်နၤဧမံ. (ရူၤသး ၁:၈, ၁၆, ၁၇) စီၤအလံၤၡါ ဘၣ်မၤန့ၢ်တၢ်လၢ ဝံအ့ၤလံယၤအဂီၢ်န့ၣ် အဝဲထံၣ်ဝဲဒ် မူဒါလၢ ယဟိဝၤယွၤဟ့ၣ်အီၤ အဃိအဝဲပာ်လုၢ်ပာ်ပှ့ၤဝဲမူဒါအံၤဒိၣ်မး.
စီၤအလံၤၡါ ပာ်လီၤတၢ်အဒိ လၢအဂ့ၤလၢပဂီၢ်. ထီဘိန့ၣ် ပမ့ၢ်သ့ၣ်နီၣ်ထီၣ်လၢ ပမၤန့ၢ်တၢ်လၢ ယဟိဝၤယွၤအဂီၢ်န့ၣ် ပကပာ်လုၢ်ပာ်ပှ့ၤဝဲ မူဒါတခါဂ့ၤတခါဂ့ၤ လၢပဒိးန့ၢ်ဘၣ်လၢ ယဟိဝၤယွၤ အတၢ်ကရၢကရိပူၤ. တၢ်မၤလၢ အဂ့ၤဒိၣ်န့ၢ်ဒံး ယဟိဝၤယွၤအတၢ်မၤန့ၣ် တအိၣ်နီတခါဘၣ်.—စံးထီၣ်ပတြၢၤ ၆၅:၄; ၈၄:၁၀.
“နကဃ့လၢ ယကမၤန့ၢ်နၤ တၢ်မနုၤလဲၣ်”
ဖဲအဝဲသ့ၣ် လဲၤတၢ်အခါ ဝံအ့ၤလံယၤတဲဘၣ် စီၤအလံၤၡါလၢ “တချုးလၢ တၢ်ဟံးန့ၢ်ကွံာ်ယၤလၢ နအိၣ်ဒံးဘၣ်န့ၣ် နကဃ့လၢ ယကမၤန့ၢ်နၤ တၢ်မနုၤလဲၣ်.” ဒီးစီၤအလံၤၡါ တဲဆၢဝဲလၢ “ဝံသးစူၤ မ်ယဒိးန့ၢ်ဘၣ် သးလၢအအိၣ်ဒီးနၤ ခံစးတက့ၢ်.” ဒ်စီၤၡလိၤမိၤ ဃ့တ့ၢ်ဝဲလၢညါအသိး စီၤအလံၤၡါ ဃ့ဝဲတၢ်လၢ ကမၤစၢၤအီၤဒ်သိး အမၤယဟိဝၤယွၤအတၢ်မၤ ကသ့ဂ့ၤဂ့ၤအဂီၢ်. (၁ စီၤပၤ ၃:၅, ၉; ၂ စီၤပၤ ၂:၉) တၢ်လၢစီၤအလံၤၡါ ဃ့ဝဲန့ၣ်မ့ၢ်မနုၤလဲၣ်. လၢညါ ပှၤအံၣ်စရ့လးဖိအစိၤန့ၣ် ဖိဝဲၢ်ကိတဖၣ်န့ၣ် န့ၢ်ဘၣ်ဝဲ တၢ်န့ၢ်သါခံစး. (၅ မိၤ. ၂၁:၁၅-၁၇) အဃိ စီၤအလံၤၡါဃ့ဝဲလၢ ဝံအ့ၤလံယၤ ကဟ့ၣ်အီၤ တၢ်န့ၢ်သါ မ့တမ့ၢ် ဃ့ဝဲလၢ အကကဲထီၣ်ဝံလၢ ဝံၤအ့ၤလံယၤအလီၢ်. တကးဒံးဘၣ် ခီဖျိလၢ စီၤအလံၤၡါ အဲၣ်ဒိးအိၣ်ဒီး တၢ်သးဒူ ဒီးတၢ်သးဆူၣ်လၢ တၢ်ဘူၣ်တၢ်ဘါအမ့ၢ်အတီ ဒ်ဝံအ့ၤလံယၤအသိးအဃိ အဝဲဃ့ဝဲလၢ အကအိၣ်ဒီး တၢ်သးဆူၣ် ဒီးတၢ်ပာ်သူၣ်ပာ်သး ဒ်ဝံအ့ၤလံယၤအသိး.—၁ စီၤပၤ ၁၉:၁၃, ၁၄.
ဝံအ့ၤလံယၤစံးဆၢ စီၤအလံၤၡါလၢ “နဃ့တၢ်လၢ အကီတမံၤ. ဖဲတၢ်ဟံးန့ၢ်ကွံာ်ယၤလၢ နအိၣ်အခါ နမ့ၢ်ထံၣ်ယၤန့ၣ် အခီပညီမ့ၢ်ဝဲဒၣ် တၢ်ကကဲထီၣ်အသးဒီးနၤ ဒ်နဃ့အသိးလီၤ. ဘၣ်ဆၣ် နမ့ၢ်တထံၣ်ယၤဘၣ်န့ၣ် တၢ်တကဲထီၣ်အသးဘၣ်.” (၂ စီၤပၤ ၂:၁၀) ဝံအ့ၤလံယၤ တဲအီၤဒ်အံၤန့ၣ် အခီပညီအိၣ်ခံမံၤ. တၢ, တၢ်လၢ စီၤအလံၤၡါ ဃ့ဝဲန့ၣ် အကဒိးန့ၢ်ဝဲဧါ တဒိးန့ၢ်ဘၣ်ဝဲဧါန့ၣ် ယဟိဝၤယွၤ ကဆၢတဲာ်ဝဲ. ခံ, စီၤအလံၤၡါ မ့ၢ်အဲၣ်ဒိး ဒိးန့ၢ်ဘၣ် တၢ်လၢအဃ့ဝဲန့ၣ် အကဘၣ်အိၣ်ဒီး ဝံအ့ၤလံယၤ.
စီၤအလံၤၡါ ထံၣ်ဘၣ်ဝဲ တၢ်မနုၤလဲၣ်
တၢ်လၢ စီၤအလံၤၡါဃ့ဝဲန့ၣ် အဒိးန့ၢ်ဘၣ်ဝဲဧါ. လံာ်စီဆှံတဲဝဲလၢ “ဖဲအဝဲသ့ၣ်လဲၤတၢ်တခီခီ တဲတၢ်တခီခီအခါ သတူၢ်ကလာ်န့ၣ် လ့ၣ်ကဟၣ်တခိၣ် ဒီးကသ့ၣ်တဖၣ်လၢ အကပီၤဒ် မ့ၣ်အူအသိးန့ၣ် မၤလီၤဖး အဝဲသ့ၣ်ခံဂၤလီၤ. ဒီးစီၤအ့ၤလံယၤ ဘၣ်တၢ်ဟံးထီၣ်အီၤလၢ မူခိၣ် လၢကလံၤမုၢ်အပူၤလီၤ.” ဒီး “စီၤအလံၤၡါ ကွၢ်ဝဲ” လီၤ. အဃိ ပသ့ၣ်ညါဘၣ်လၢ ယဟိဝၤယွၤ ဟ့ၣ်လီၤဝဲ တၢ်လၢစီၤအလံၤၡါ ဃ့ဝဲလီၤ. စီၤအလံၤၡါ ထံၣ်ဘၣ်ဝဲ တၢ်ဟံးထီၣ်ကွံာ် ဝံအ့ၤလံယၤ. ဒီးအဝဲဒိးန့ၢ်ဘၣ် ဝံအ့ၤလံယၤ အသးခံစး ဒီးအဝဲ ကဲထီၣ်ဘၣ် ကစၢ်ယွၤအဝံလၢ ဝံအ့ၤလံယၤအလီၢ်.—၂ စီၤပၤ ၂:၁၁-၁၄.
စီၤအလံၤၡါ ထၢထီၣ်ဝဲ ဝံအ့ၤလံယၤ အဆ့ကၤလၢအအိၣ်တ့ၢ် ဒီးကၤထီၣ်ဝဲဒၣ်. ဖဲပှၤထံၣ်လၢ အကၤထီၣ် ဝံအ့ၤလံယၤ အဆ့ကၤအခါ ပှၤသ့ၣ်ညါလၢ အဝဲကဲထီၣ်ကစၢ်ယွၤအဝံ. ဒီးလၢခံ အဝဲမၤသ့ၣ်ဖးဝဲ ယၢ်ဒ့ၣ်အထံကျိအဃိ ပာ်ဖျါထီၣ်ဝဲလၢ အကဲထီၣ် ကစၢ်ယွၤအဝံ.
စီၤအလံၤၡါ ထံၣ်ဘၣ်ဝဲ တၢ်ဟံးထီၣ် ဝံအ့ၤလံယၤလၢ ကလံၤမုၢ်အကျါန့ၣ် တမ့ၢ်လၢ အကသးပ့ၤနီၣ်ဝဲ နီတဘျီဘၣ်. ပှၤတဂၤဂ့ၤတဂၤဂ့ၤ မ့ၢ်ထံၣ်ဘၣ်ဝဲ လ့ၣ်ကဟၣ်ဒုးသုး ဒီးကသ့ၣ်လၢအကပီၤဒ် မ့ၣ်အူအသိးန့ၣ် ကကမၢကမၣ်ဝဲလီၤ. အဃိ ပသ့ၣ်ညါဘၣ်လၢ ယဟိဝၤယွၤ ဟ့ၣ်လီၤဝဲ စီၤအလံၤၡါလၢ တၢ်လၢအဃ့ဝဲတဖၣ်. မ့မ့ၢ်ပဝဲသ့ၣ်တဖၣ်န့ၣ် ဖဲကစၢ်ယွၤ စံးဆၢပတၢ်ထုကဖၣ်အခါ တဒုးထံၣ်ပှၤ တၢ်ထံၣ်လၢညါခီ ဒ်သိးဒီး လ့ၣ်ကဟၣ် ဒုးသုးဒီး ကသ့ၣ်လၢ အကပီၤဒ်မ့ၣ်အူအသိးဘၣ်. ဘၣ်ဆၣ် ပသ့ၣ်ညါလီၤတံၢ်လီၤဆဲးလၢ ကစၢ်ယွၤစံးဆၢပတၢ်ထုကဖၣ် ခီဖျိပထံၣ်ဘၣ်လၢ အဝဲသူဝဲအစိအကမီၤလၢ ကမၤစၢၤပှၤ ဒီးကမၤလၢပှဲၤအတၢ်တိာ်ပာ်အဂီၢ်. ဒီးဖဲပထံၣ်ဘၣ်လၢ ယဟိဝၤယွၤ ဆိၣ်ဂ့ၤအတၢ်ကရၢကရိလၢဟီၣ်ခိၣ်အခါ လီၤဂာ်ဒ်သိးဒီး ပထံၣ်ဘၣ် အလ့ၣ်ကဟၣ်လၢမူခိၣ်န့ၣ် လဲၤတၢ်.—ယဃ့းစက့လး ၁၀:၉-၁၃.