၂၀, ၂၁. (က) ဖဲဝံအ့ၤလံယၤ ဆၢထၢၣ်လၢ လ့ကအိအခိၣ်ထိးအခါ အဝဲထံၣ်ဘၣ်ဝဲတၢ်မနုၤလဲၣ်န့ၣ် တဲဖျါထီၣ်တက့ၢ်. (ခ) ယဟိဝၤယွၤ ဒုးထံၣ်ဝံအ့ၤလံယၤလၢ န့ဆၢၣ်အတၢ်စိကမီၤတဖၣ်အဃိ အဝဲသ့ၣ်ညါထီၣ်ဝဲတၢ်မနုၤလဲၣ်.

^၂၀ ခီဖျိလၢ ဝံအ့ၤလံယၤ သူၣ်ကိၢ်သးဂီၤဒီးပျံၤတၢ်အဃိ ယဟိဝၤယွၤမၤစၢၤအီၤဒ်လဲၣ်. မူခိၣ်ကလူး တဲဘၣ်ဝံအ့ၤလံယၤလၢ လဲၤဂဲၤဆၢထၢၣ်လၢလ့ကအိအခိၣ်ထိးတက့ၢ်. တၢ်ကမၤအသးဒ်လဲၣ်န့ၣ် အဝဲမ့ၢ်တသ့ၣ်ညါ တၢ်ခိၣ်တၢ်ခံနီတမံၤဘၣ် သနာ်က့ အဝဲဒိကနၣ်ဝဲလီၤ. တကတီၢ်ဃီန့ၣ် ကလံၤမုၢ်ဖးဒိၣ်ဟဲအူထီၣ် သတူၢ်ကလာ်ဒီး သီၣ်လီၤသထြူးဝဲသကုၤဆးဒးန့ၣ်လီၤ. ဒီးခီဖျိလၢ ကလံၤမုၢ်အဂံၢ်ဆူၣ်ဝဲအဃိ ကစၢၢ်ဒီးလၢၢ်တဖၣ် ပိၢ်မုၢ်ပိၢ်ဖးထီၣ်ဝဲလီၤ. ထံၣ်ကမှံကွၢ်လၢ ဝံအ့ၤလံယၤ ယၤထီၣ်အစု, ဒီသဒၢအမဲာ်, ဒီးဖီၣ်ဃာ်အဆ့ကၤဖးထီ ဒ်သိးအသုတဒံပိာ်ထွဲကလံၤမုၢ်အခံတဂ့ၤအဂီၢ်တက့ၢ်. ဖဲတၢ်မၤအသးအံၤဝံၤအလီၢ်ခံ ဟီၣ်ခိၣ်ဟူးဝးထီၣ်ဝဲဆူၣ်ဆူၣ် လၢတၢ်လီၢ်သကုၤဆးဒးန့ၣ်လီၤ. လၢတၢ်န့ၣ်အဃိ အဝဲကဂုာ်ကျဲးစၢး ကၢၤဃာ်အသးဒ်သိး အသုတလီၤဃံၤတဂ့ၤအဂီၢ်လီၤ. လၢတၢ်တပာ်သူၣ်ပာ်သးအပူၤန့ၣ် မ့ၣ်အူဟဲဖျိးထီၣ်ဝဲ ဒီဒူၣ်ဒီထၢအဃိ ဝံအ့ၤလံယၤ သုးလီၤအသးဆူအလီၢ်ခံ ဒ်သိးမ့ၣ်အူတဟဲဘၣ်အီၤတဂ့ၤအဂီၢ်လီၤ.—၁ စီၤပၤ. ၁၉:၁၁, ၁၂.

^၂၁ ဖဲတၢ်မၤအသးတဖၣ်အံၤ တခါစုာ်စုာ်ဝံၤအလီၢ်ခံ လံာ်စီဆှံဒုးသ့ၣ်နီၣ်ထီၣ်ပှၤလၢ ယဟိဝၤယွၤတအိၣ်လၢ န့ဆၢၣ်အတၢ်စိတၢ်ကမီၤသ့ၣ်တဖၣ်အံၤအကျါဘၣ်. ဝံအ့ၤလံယၤ သ့ၣ်ညါဝဲလၢ ယဟိဝၤယွၤ တလီၤဂာ်ဒ်သိးန့ဆၢၣ်အယွၤ လၢအမ့ၢ်ဘဧၤလးဘၣ်. ပှၤအါဂၤနာ်ဝဲလၢဘဧၤလး “ဒိးဝဲတၢ်အၢၣ်” ဒီးဒုးစူၤလီၤဝဲမူခိၣ်ထံလီၤ. ဘၣ်ဆၣ်သနာ်က့ န့ဆၢၣ် အတၢ်စိတၢ်ကမီၤခဲလၢာ် အဂံၢ်ခိၣ်သ့ၣ် မ့ၢ်ဝဲဒၣ်ယဟိဝၤယွၤလီၤ. ဒီးကစၢ်ယွၤအစိကမီၤဒိၣ်န့ၢ် အတၢ်ဘၣ်တ့စၢၢ်တလၢၢ်လီၤ. (၁ စီၤပၤ. ၈:၂၇) တၢ်မၤအသးလၢ ဝံအ့ၤလံယၤ ထံၣ်ဘၣ်ဝဲန့ၣ် ကဲထီၣ်တၢ်မၤစၢၤလၢအဂီၢ်ဒ်လဲၣ်. သ့ၣ်နီၣ်ထီၣ်က့ၤလၢ ဝံအ့ၤလံယၤ လဲၤဃ့ၢ်အိၣ်ခူသူၣ်အသးလၢ လ့ကအိပူၤမ့ၢ်လၢ အသူၣ်ပျံၤသးဖုးတၢ်ဒိၣ်မးအဃိလီၤ. ဘၣ်ဆၣ် ဒ်ယဟိဝၤယွၤ ပာ်ဖျါထီၣ်ဝဲအသိး အဝဲမ့ၢ်ကစၢ်လၢ အပၢၤဃာ်ဝဲန့ဆၢၣ်အတၢ်စိတၢ်ကမီၤသ့ဝဲလီၤ. လၢတၢ်န့ၣ်အဃိ ယဟိဝၤယွၤမ့ၢ်အိၣ်လၢဝံအ့ၤလံယၤ အအိၣ်တခီန့ၣ် တလိၣ်လၢ အဝဲပျံၤဝဲစီၤအၤဃာ် ဒီးနီၢ်အံၤစ့ဘ့ၤလးဘၣ်.—ဖး စံးထီၣ်ပတြၢၤ ၁၁၈:၆ တက့ၢ်.

၂၂. (က) “တၢ်ကလုၢ်ကပုာ်လုးတထံၣ်” လၢဝံအ့ၤလံယၤ နၢ်ဟူဝဲန့ၣ် ဒုးနာ်န့ၢ်အီၤလၢ ယဟိဝၤယွၤပာ်လုၢ်ပာ်ပှ့ၤအီၤလၢကျဲဒ်လဲၣ်. (ခ) “တၢ်ကလုၢ်ကပုာ်လုး” အံၤဘၣ်သ့ၣ်သ့ၣ် ကမ့ၢ်မတၤတဂၤ အကလုၢ်လဲၣ်. (ကွၢ်တၢ်ဂ့ၢ်အဘျဲၣ်တက့ၢ်.)

^၂၂ ဖဲမ့ၣ်အူဟဲဖျိးထီၣ် ဝံၤအလီၢ်ခံန့ၣ် တၢ်ခဲလၢာ်ဘှ့ၣ်ဘှီၣ်ဝဲလီၤ. ဒီးဝံအ့ၤလံယၤ နၢ်ဟူဝဲ “တၢ်ကလုၢ်ကပုာ်လုးတထံၣ် သီၣ်ထီၣ်ဝဲဒၣ်န့ၣ်လီၤ.” ခီဖျိလၢ တၢ်ကလုၢ်အံၤအဃိ အဝဲအိၣ်ဒီးတၢ်ခွဲးတၢ်ယာ်လၢ ကတဲဖျါထီၣ်ဝဲ အတၢ်တူၢ်ဘၣ် လၢအသီတဘျီလီၤ.a လၢတၢ်န့ၣ်အဃိ ဝံအ့ၤလံယၤ အတၢ်တူၢ်ဘၣ်ကကိညၢ်ထီၣ်ဝဲတစဲးဖိလီၤ. ဒီး “တၢ်ကလုၢ်ကပုာ်လုး” ဒုးနာ်န့ၢ်ဝံအ့ၤလံယၤလၢ ယဟိဝၤယွၤပာ်လုၢ်ပာ်ပှ့ၤအီၤအဃိ ကဲထီၣ်တၢ်ဟ့ၣ်ဂံၢ်ဟ့ၣ်ဘါ လၢအဂီၢ်ဒိၣ်မးလီၤ. ကစၢ်ယွၤ ဒုးနာ်န့ၢ်ဝံအ့ၤလံယၤလၢ ကျဲဒ်လဲၣ်. ကစၢ်ယွၤပာ်ဖျါထီၣ် အတၢ်တိာ်ပာ်လၢကမၤဟးဂီၤကွံာ်ဝဲ ဘဧၤလး အတၢ်ဘူၣ်တၢ်ဘါလၢ အံၣ်စရ့လးအထံလီၢ်ကီၢ်ပူၤလီၤ. လၢတၢ်န့ၣ်အဃိ တၢ်လၢဝံအ့ၤလံယၤ မၤတ့ၢ်ဝဲလၢအပူၤကွံာ်န့ၣ် တကဲထီၣ်တၢ်ကလီကလီဘၣ်. တကးဒံးဘၣ် ကစၢ်ယွၤပာ်ဖျါထီၣ်ဝဲလၢ ကဆဲးသူဝဲဝံအ့ၤလံယၤလီၤ. ကစၢ်ယွၤ ဆှၢလီၤက့ၤအီၤလၢအသီတဘျီဒီး တဲဘၣ်အီၤတၢ်လၢ အဝဲကဘၣ်မၤဝဲ လီၤတံၢ်လီၤဆဲးန့ၣ်လီၤ.—၁ စီၤပၤ. ၁၉:၁၂-၁၇, ခ့ခါစှီၤကျိာ်.