ခရံာ်ဖိအတၢ်အိၣ်မူဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ တၢ်ဂ့ၢ်ဘျးစဲ

လါမ့ၤ ၁-၇

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ ကွဲးနီၣ်တၢ် ၁၇-၁၉

“ထံၣ်ပှၤဂၤဒ် ယဟိဝၤယွၤ ထံၣ်ဝဲအသိး”

မ့ၢ်နကမၤပိာ်ထွဲဒ် တၢ်ကွဲးအသးအသိးဧါ

^၇ ခဲအံၤ ပကဆိကမိၣ်ကွၢ် စီၤအၤစါအဖိခွါ စီၤယဟိၡၤဖးအဂ့ၢ်လီၤ. အဝဲအိၣ်ဒီး တၢ်ဂ့ၤတၢ်ဝါအါမံၤလၢ ယဟိဝၤယွၤ ဘၣ်သူၣ်ဘၣ်သးဝဲန့ၣ်လီၤ. ဒီးဖဲအဝဲသန့ၤအသးလၢ ယဟိဝၤယွၤအခါ အဝဲမၤဝဲတၢ်ဂ့ၤအါမးလီၤ. ဘၣ်ဆၣ် အဝဲမၤဘၣ် တၢ်ဆၢတဲာ်လၢ အကမၣ်စ့ၢ်ကီးလီၤ. အဒိ, အဝဲရဲၣ်ကျဲၤဝဲလၢ အဖိခွါကဆီဟံၣ်ဆီဃီဒီး စီၤပၤအၤဃာ်လၢအမ့ၢ် ပှၤအၢပှၤသီတဂၤ အဖိမုၣ်န့ၣ်လီၤ. လၢခံဝံမံၤကါယၤ ဟ့ၣ်ပလီၢ်အီၤလၢ တဘၣ်လဲၤဒုးသကိးတၢ်ဒီး စီၤအၤဃာ်ဘၣ် ဘၣ်ဆၣ် ဖဲစီၤအၤဃာ်လဲၤဒုး ပှၤစူၤရံဖိအခါ စီၤယဟိၡၤဖး လဲၤဒုးစၢၤဝဲလီၤ. လၢတၢ်ဒုးပျီပူၤန့ၣ် ပှၤစူၤရံဖိဒုး စီၤယဟိၡၤဖး ဒီးဂုာ်ကျဲးစၢးမၤသံအီၤလီၤ. (၂ ကွဲးနီၣ်တၢ် ၁၈:၁-၃၂) ဖဲအဝဲဟဲက့ၤလၢ ဝ့ၢ်ယရူၤၡလ့ၣ်အခါ ဝံယ့ၤဟူ သံကွၢ်အီၤလၢ– “နကမၤစၢၤပှၤတတီတလိၤ, ဒီးအဲၣ်ပှၤလၢအသးဟ့ယွၤန့ၣ်ဧါ.”—ဖး ၂ ကွဲးနီၣ်တၢ် ၁၉:၁-၃ တက့ၢ်.

တၢး၁၅ ၈/၁၅ ၁၁-၁၂ ¶၈-၉

ဆိကမိၣ်ထံ ယဟိဝၤယွၤ အတၢ်အဲၣ်အထူအယိာ်

^၈ ယဟိဝၤယွၤအဲၣ်ဒိးဝဲလၢ ပကသ့ၣ်ညါလၢ အဝဲအဲၣ်ပှၤဒီး ကွၢ်ကပာ်ကွံာ်ဝဲ ပတၢ်လီၤတူာ်လီၤကာ်တဖၣ်လီၤ. တကးဒံးဘၣ် အဝဲဃုထံၣ်န့ၢ် ပတၢ်ဂ့ၤတဖၣ်လီၤ. (၂ ကွဲးနီၣ်တၢ် ၁၆:၉) ခဲအံၤပကတဲသကိး ကစၢ်ယွၤဃုထံၣ်ဝဲ ယူဒၤစီၤပၤယဟိၡၤဖး အတၢ်ဂ့ၤတၢ်ဝါဒ်လဲၣ် အဂ့ၢ်န့ၣ်လီၤ. စီၤပၤယဟိၡၤဖး ဆၢတဲာ်တၢ်လၢအကမၣ် မ့ၢ်လၢအလဲၤအိၣ်ဃူအိၣ်ဖိးဒီး အံၣ်စရ့လးအစီၤပၤအၤဃာ် ဖဲအဝဲလဲၤဒုးဝဲ ပှၤစူၤရံဖိ လၢရၤမိးကံးလဧးအခါန့ၣ်လီၤ. ဝံအဘျၣ်အဂၤ ၄၀၀ စံးဘၣ်စီၤပၤအၤဃာ်လၢ ဖဲနလဲၤဒုးတၢ်အခါ နကမၤနၢၤတၢ်န့ၣ်လီၤ. ဘၣ်ဆၣ် ယဟိဝၤယွၤအဝံ စီၤမံၤကါယၤစံးဘၣ် စီၤပၤယဟိၡၤဖးဒီး စီၤအၤဃာ်လၢ အဝဲသ့ၣ်မ့ၢ်ဒုးဆၢ ပှၤစူၤရံဖိန့ၣ်ကၡူဝဲလီၤ. တၢ်အံၤကဲထီၣ်အသး ဒ်ဝံမံၤကါယၤ စံးဝဲအသိးန့ၣ်လီၤ. စီၤပၤအၤဃာ်သံဝဲလၢတၢ်ဒုးပျီပူၤ ဒီးမ့မ့ၢ် စီၤပၤယဟိၡၤဖးန့ၣ် ပူၤဖျဲးဝဲလီၤ. တၢ်ဒုးဝံၤအလီၢ်ခံ ယဟိဝၤယွၤသူဝဲ စီၤယ့ၤဟူလၢ ကလဲၤသိၣ်က့ၤသီက့ၤ စီၤပၤယဟိၡၤဖး လၢအတၢ်ဆၢတဲာ် ကမၣ်အဃိန့ၣ်လီၤ. ဘၣ်ဆၣ် စီၤယ့ၤဟူ တဲစ့ၢ်ကီးလၢ “တၢ်အဂ့ၤတဖၣ်န့ၣ် တၢ်ထံၣ်န့ၢ်ဝဲလၢနပူၤလီၤ.”—၂ ကွဲးနီၣ်တၢ် ၁၈:၄, ၅, ၁၈-၂၂, ၃၃, ၃၄; ၁၉:၁-၃.

^၉ လၢအပူၤကွံာ်အနံၣ်တဖၣ်န့ၣ် စီၤပၤယဟိၡၤဖး စံးဘၣ်စီၤပၤအဖိခွါတဖၣ်, ပှၤလ့ၤဝံဖိတဖၣ်, ဒီးပှၤလုၢ်တၢ်အဒိၣ်တဖၣ် ဒ်သိးကလဲၤအိၣ်သကိး ယူဒၤအဝ့ၢ်ခဲလၢာ် လၢကသိၣ်လိ ပှၤဂီၢ်မုၢ်လၢ ယဟိဝၤယွၤ အတၢ်သိၣ်တၢ်သီအဂီၢ်န့ၣ်လီၤ. ခီဖျိလၢအဝဲသ့ၣ် မၤဝဲဒ်န့ၣ်အဃိ ပှၤလၢထံကီၢ်အဂၤတဖၣ်ဒၣ်လဲာ် သ့ၣ်ညါထီၣ်ယဟိဝၤယွၤလီၤ. (၂ ကွဲးနီၣ်တၢ် ၁၇:၃-၁၀) စီၤပၤယဟိၡၤဖး ဆၢတဲာ်တၢ်အကမၣ်သနာ်က့ ယဟိဝၤယွၤတသးပ့ၤနီၣ်ကွံာ်ဝဲ တၢ်ဂ့ၤလၢအမၤတ့ၢ်ဝဲ လၢညါတဖၣ်န့ၣ်ဘၣ်. တၢ်အဒိအတဲာ်အံၤ ကဲထီၣ်တၢ်သူၣ်မံသးမံ လၢပဂီၢ်ဒိၣ်မး မ့ၢ်လၢတဘျီတခီၣ် ပမၤကမၣ်ဘၣ်တၢ်သ့အဃိန့ၣ်လီၤ. ဘၣ်ဆၣ် ပမ့ၢ်ဂုာ်ကျဲးစၢးမၤ ယဟိဝၤယွၤအတၢ်မၤ လၢအဂ့ၤကတၢၢ်န့ၣ် အဝဲကအဲၣ်ပှၤ ဒီးအဝဲတသးပ့ၤနီၣ် တၢ်ဂ့ၤလၢပမၤတ့ၢ် နီတဘျီဘၣ်.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၁၇.၀၃ ၁၇-၁၈ ¶၁၀-၁၁

မၤယဟိဝၤယွၤအတၢ်မၤလၢ သူၣ်ဒီဖျၢၣ်သးဒီဖျၢၣ်တက့ၢ်

^၁၀ စီၤယဟိၡၤဖး “ပိာ်အပၢ်စီၤအၤစါအကျဲ, ဒ်သိးအကမၤတၢ်ဂ့ၤ လၢယွၤအမဲာ်” လီၤ. (၂ ကွဲးနီၣ်တၢ် ၂၀:၃၁, ၃၂) အဝဲမၤဝဲဒ်လဲၣ်. ဒ်အပၢ်အသိး စီၤယဟိၡၤဖး ဟ့ၣ်ဂံၢ်ဟ့ၣ်ဘါပှၤဂၤလၢ ကဆဲးဘူၣ်ထီၣ်ဘါထီၣ် ယဟိဝၤယွၤလီၤ. အဝဲဆှၢလီၤပိာ်ခွါတဖၣ်လၢ ကလဲၤဆူဝ့ၢ်လၢအအိၣ်လၢ ကီၢ်ယူဒၤအပူၤခဲလၢာ် ဒ်သိးကသိၣ်လိပှၤဂၤလၢ “ယွၤအလံာ်တၢ်သိၣ်တၢ်သီ” အဂီၢ်လီၤ. (၂ ကွဲးနီၣ်တၢ် ၁၇:၇-၁၀) တကးဒံးဘၣ်အဝဲလဲၤလၢ အံၣ်စရ့လးအဘီမုၢ်လၢ ကလံၤစိးတခီ လၢ အအိၣ်လၢ ကစၢၢ်အ့ဖရဲၣ် “ဒ်သိးကကိး ကဒါက့ၤပှၤဂီၤမုၢ်ဆူယွၤ” အအိၣ်လီၤ. (၂ ကွဲးနီၣ်တၢ် ၁၉:၄, ခ့ခါစှီၤကျိာ်) စီၤယဟိၡၤဖး မ့ၢ်ဝဲစီၤပၤလၢ “အဃုယွၤလၢ အသးဒီဖျၢၣ်ညါ” လီၤ.—၂ ကွဲးနီၣ်တၢ် ၂၂:၉.

^၁၁ မုၢ်မဆါတနံၤအံၤ ယဟိဝၤယွၤအဲၣ်ဒိးဝဲလၢ ကယဲၢ်ပှၤလၢဟီၣ်ခိၣ်ချၢခဲလၢာ် ကမၤလိဘၣ်အဂ့ၢ်လီၤ. ဒီးပဝဲခဲလၢာ်ပပၣ်ဃုာ်လၢ တၢ်မၤအံၤအပူၤသ့ဝဲလီၤ. မ့ၢ်နဖီတၢၣ်အိၣ်လၢ နကပၣ်ဃုာ်လၢ တၢ်မၤအံၤအပူၤကိးလါဒဲးဧါ. ဒ်သိးပှၤအဂၤတဖၣ် ကဘူၣ်ထီၣ်ဘါထီၣ် ယဟိဝၤယွၤအဂီၢ် မ့ၢ်နအဲၣ်ဒိးမၤလိအဝဲသ့ၣ် လံာ်စီဆှံဧါ. ဒ်သိးနမၤဒ်အံၤကသ့အဂီၢ် မ့ၢ်နဃ့ထုကဖၣ်ဧါ. နမ့ၢ်ဂုာ်ကျဲးစၢးန့ၣ် ယဟိဝၤယွၤကမၤစၢၤနၤဒ်သိး နစးထီၣ်တၢ်မၤလိလံာ်စီဆှံ ဒီးပှၤဂၤကသ့လီၤ. ဒ်သိးနကမၤလိပှၤဂၤ လံာ်စီဆှံအဂီၢ် မ့ၢ်နဟ့ၣ်လီၤ နတၢ်ဆၢကတီၢ်တနီၤကကဲဧါ. ဒီးဒ်စီၤယဟိၡၤဖး ဂုာ်ကျဲးစၢးမၤစၢၤပှၤဂၤလၢ ကဟဲက့ၤဘူၣ်ထီၣ်ဘါထီၣ်ကဒါက့ၤ ယဟိဝၤယွၤအသိး ပဝဲစ့ၢ်ကီးပမၤစၢၤ ပှၤလၢအပတုာ်တၢ် ဟးစံၣ်တဲၤတဲလီၤတၢ်တဖၣ်သ့ဝဲလီၤ. လၢပတၢ်စံၣ်တဲၤတဲလီၤတၢ် ဟီၣ်ကဝီၤအပူၤ ပှၤလၢအဘၣ် တၢ်ဟီထီၣ်ကွံာ်အီၤ ကအိၣ်ဝဲလီၤ. ဒီးအဝဲသ့ၣ်တဖၣ် ဘၣ်သ့ၣ်သ့ၣ် ကပာ်တ့ၢ်ကွံာ်တၢ်ကမၣ်လၢ အမၤဝဲလၢညါတဖၣ်န့ၣ်လီၤ. တၢ်အိၣ်ဖှိၣ်သးပှၢ်တဖၣ် ကရဲၣ်ကျဲၤဝဲလၢ ကလဲၤဟးဆူပှၤတဖၣ်အံၤအအိၣ် ဒ်သိးကမၤစၢၤ အဝဲသ့ၣ်အဂီၢ်လီၤ.

တၢး၂၁.၀၅ ၁၇-၁၈ ¶၁၁-၁၅

^၁၁ ပှၤတနီၤတသးအိၣ် ပတၢ်ကစီၣ်ဘၣ်. အဝဲသ့ၣ်တအဲၣ်ဒိးသ့ၣ်ညါ ကစၢ်ယွၤဒီးလံာ်စီဆှံဘၣ်. အဝဲသ့ၣ်တနာ်ကစၢ်ယွၤဘၣ် မ့ၢ်လၢအဝဲသ့ၣ်ထံၣ်ဘၣ်ဝဲလၢ ဟီၣ်ခိၣ်ဒီဘ့ၣ် ပှဲၤဝဲဒီးတၢ်ကီတၢ်ခဲတဖၣ်လီၤ. တကးဒံးဘၣ် အဝဲသ့ၣ်တတူၢ်လိာ်လံာ်စီဆှံဘၣ် မ့ၢ်လၢအဝဲသ့ၣ်ထံၣ်ဘၣ်ဝဲ တၢ်ဘူၣ်တၢ်ဘါခိၣ်နၢ်တဖၣ် တဲတမံၤဒီးမၤတမံၤ ဒီးမၤတၢ်လၢအတလီၤပလိာ်ဒီး လံာ်စီဆှံဘၣ်. ပှၤအဂၤတနီၤ သးစၢၢ်ဆၢထဲလၢ အတၢ်ဖံးတၢ်မၤ, အဟံၣ်ဖိဃီဖိ ဒီးအနီၢ်ကစၢ်တၢ်ကီတၢ်ခဲတဖၣ် အဃိ ဆိကမိၣ်ဝဲလၢ လံာ်စီဆှံမၤစၢၤအဝဲသ့ၣ်တသ့ဘၣ်. ပမ့ၢ်ထံၣ်ပှၤလၢ အတပာ်လုၢ်ပာ်ပှ့ၤ ပတၢ်ကစီၣ်ဘၣ်န့ၣ် ပကဆဲးပၢၤဃာ် ပတၢ်သးခုကသ့ဒ်လဲၣ်.

^၁၂ ပာ်ဖျါထီၣ် တၢ်သူၣ်အိၣ်သးအိၣ်ပှၤဂၤတက့ၢ်. ပှၤအါဂၤလၢတသးအိၣ်ပတၢ်ကစီၣ် လၢအခီၣ်ထံးခါဘၣ်န့ၣ် လၢခံအဝဲသ့ၣ်တူၢ်လိာ်ပတၢ်သးခုကစီၣ် ခီဖျိလၢ အဝဲသ့ၣ်သ့ၣ်ညါဝဲလၢ ပသးအိၣ်အဝဲသ့ၣ်အဃိလီၤ. (ဖး ဖံလံးပံၤ ၂:၄ တက့ၢ်.) အဒိ, ဒီပုၢ်ဝဲၢ်ခွါဒ့ဘ့း တဲဝဲလၢ “ပှၤတဂၤမ့ၢ်တဲလၢ အတသးအိၣ်တၢ်ကစီၣ်ဘၣ်န့ၣ် ပတတဲပၠးအဝဲသ့ၣ်လံာ်စီဆှံ မ့တမ့ၢ် ဟ့ၣ်လီၤအဝဲသ့ၣ်ပလံာ်လဲၢ်တဖၣ် တဘျီဃီဘၣ်. ပသံကွၢ်အီၤလၢ ‘ယအဲၣ်ဒိးသ့ၣ်ညါ ဘၣ်မနုၤအဃိ နတအဲၣ်ဒိး ဒိကနၣ်ပတၢ်ကစီၣ်ဘၣ်လဲၣ်.’” အဝဲသ့ၣ်ကပာ်သူၣ်ပာ်သးဘၣ်ဝဲလၢ ပသးအိၣ်အီၤလီၤ. တၢ်လၢပတဲဘၣ်အီၤတဖၣ်န့ၣ် ဘၣ်သ့ၣ်သ့ၣ်အကသးပ့ၤနီၣ်ဝဲလီၤ. ဘၣ်ဆၣ် ပပာ်လုၢ်ပာ်ပှ့ၤအဝဲသ့ၣ်န့ၣ် အဝဲသ့ၣ်တသးပ့ၤနီၣ်ဝဲဘၣ်. ပှၤတနီၤမ့ၢ်တအဲၣ်ဒိး ဒိကနၣ်ပတၢ်ကစီၣ်ဘၣ်န့ၣ် ပပာ်ဖျါထီၣ်လၢ ပသးအိၣ်အဝဲသ့ၣ်ခီဖျိ ပရ့ဒီးအဝဲသ့ၣ်ဂ့ၤဂ့ၤဒီး ပအိၣ်ဒီးတၢ်မဲာ်မုာ်နါဆၢလီၤ.

^၁၃ ဖဲပဆီတလဲ တၢ်စံၣ်တဲၤတဲလီၤတၢ်မၤ အကျိၤအကျဲ ဒ်သိးကထုးန့ၢ် ဟံၣ်ကစၢ်အသးအခါ မ့ၢ်ဒၣ် ပသူၣ်အိၣ်သးအိၣ်အဝဲသ့ၣ်လီၤ. အဒိ, မ့ၢ်ပထံၣ်ဘၣ်လၢ ဟံၣ်တဖျၢၣ်န့ၣ်အိၣ်ဒီးဖိသၣ်ဧါ. ဘၣ်သ့ၣ်သ့ၣ် အမိအပါ ကသးအိၣ် လံာ်စီဆှံအတၢ်ဟ့ၣ်ကူၣ် ဘၣ်ဃးဒီး တၢ်ကွၢ်လုၢ်ဒိၣ်ထီၣ်ဖိ ဒီးတၢ်ဟ့ၣ်ကူၣ်လၢ ကအိၣ်ဒီးဟံၣ်မုာ်ဃီပၢၤအဂီၢ်လီၤ. မ့ၢ်နထံၣ်ဘၣ်လၢ ဟံၣ်တဖျၢၣ်အံၤအခးတံၢ်ဃာ်သီးဧါ. မ့မ့ၢ်ဒ်န့ၣ်န့ၣ် ပကတဲသကိး တၢ်လၢအကဲထီၣ်အသးလၢ ပခိၣ်ပဃၢၤ ဒီးတၢ်လၢဟံၣ်ကစၢ် ဘၣ်ယိၣ်ဘၣ်ဘှီဝဲတဖၣ်လီၤ. ဒီးဘၣ်သ့ၣ်သ့ၣ် ဟံၣ်ကစၢ်ကအဲၣ်ဒိးသ့ၣ်ညါဝဲလၢ တၢ်သ့ၣ်တဖၣ်အံၤ ကလီၤမၢ်ကွံာ်လၢကျဲဒ်လဲၣ်န့ၣ်လီၤ. ဒ်လဲၣ်ဂ့ၤဒ်လဲၣ်ဂ့ၤ ဂုာ်ကျဲးစၢး မၤစၢၤအဝဲသ့ၣ်ဒ်သိး ကတူၢ်လိာ်လံာ်စီဆှံ အတၢ်ဟံးစုနဲၣ်ကျဲန့ၣ်တက့ၢ်. ဒီပုၢ်ဝဲၢ်မုၣ်ခဲးထရံနၤ တဲဝဲလၢ “ယဆိကမိၣ်ထီၣ်က့ၤလၢ လံာ်စီဆှံန့ၣ် အမၤစၢၤတ့ၢ်ယၤထဲလဲၣ်န့ၣ်လီၤ.” အဃိ တၢ်လၢဒီပုၢ်ဝဲၢ်မုၣ်ခဲးထရံနၤ စံၣ်တဲၤတဲလီၤဝဲတဖၣ်န့ၣ် အနာ်ဝဲသပှၢ်ကတၢၢ် ဒီးပှၤဂၤစ့ၢ်ကီးထံၣ်အီၤဒ်န့ၣ်လီၤ.

^၁၄ တူၢ်လိာ်ပှၤဂၤ အတၢ်မၤစၢၤတက့ၢ်. ခရံာ်ဖိလၢညါအစိၤန့ၣ် စီၤပီလူးသိၣ်လိ စီၤတံၤမသ့းလၢ ကဘၣ်စံၣ်တဲၤတဲလီၤတၢ် ဒီးသိၣ်လိပှၤဂၤဒ်လဲၣ်န့ၣ်လီၤ. ဒီးအဝဲဟ့ၣ်ဂံၢ်ဟ့ၣ်ဘါ စီၤတံၤမသ့းလၢ ကမၤစၢၤက့ၤပှၤဂၤတဖၣ်လီၤ. (၁ ကရံၣ်သူး ၄:၁၇) ဒ်စီၤတံၤမသ့းအသိး ပမၤလိန့ၢ်တၢ်လၢ ဒီပုၢ်ဝဲၢ်လၢတၢ်အိၣ်ဖှိၣ်အပူၤတဖၣ် အအိၣ်သ့ဝဲလီၤ. (ဖး ကတိၤဒိ ၂၇:၁၇ တက့ၢ်.) ခဲအံၤပကကွၢ်သကိး ဒီပုၢ်ဝဲၢ်ခွါၡီ အတၢ်လဲၤခီဖျိလီၤ. အဝဲမၤပှၤလဲၤလၢညါလၢ တၢ်လီၢ်လၢပှၤလဲၤတတုၤညီညီဘၣ်. ဒီးပှၤဖဲန့ၣ်တဖၣ်န့ၣ် တသးအိၣ် တၢ်ဘူၣ်တၢ်ဘါအဂၤတဖၣ်ဘၣ်. အဃိ ဒီပုၢ်ဝဲၢ်ခွါအံၤ အဆဲးပၢၤဃာ် အတၢ်သးခုဒ်လဲၣ်. အဝဲတဲဝဲလၢ “ယလဲၤစံၣ်တဲၤတဲလီၤသကိးတၢ်ဒီး ဒီပုၢ်ဝဲၢ်တဂၤဂၤ ဒီးဖဲပလဲၤလၢကျဲအခါ ပမၤစၢၤလိာ်သးဒ်သိး ပကဘၣ်မၤဂ့ၤထီၣ် ပတၢ်စံၣ်တဲၤတဲလီၤတၢ်မၤဒ်လဲၣ်န့ၣ်လီၤ. အဒိ, ပကတဲသကိးဝဲ ဟံၣ်ကစၢ်သူၣ်အိၣ်သးအိၣ် တၢ်မနုၤလဲၣ်. ဒီးပစံးဆၢက့ၤအီၤဒ်လဲၣ်န့ၣ်လီၤ. ဒီးပတဲသကိးစ့ၢ်ကီးလၢ ပမ့ၢ်ထံၣ်ဘၣ် တၢ်အိၣ်သးဒ်အလီၢ်လီၢ်န့ၣ် ပကမၤဂ့ၤထီၣ် ပတၢ်စံၣ်တဲၤတဲလီၤအကျိၤအကျဲဒ်လဲၣ်.”

^၁၅ ဃ့ယဟိဝၤယွၤ အတၢ်မၤစၢၤတက့ၢ်. ဖဲပလဲၤစံၣ်တဲၤတဲလီၤတၢ် တဘျီလၢ်လၢ်အခါ ဃ့ယဟိဝၤယွၤအတၢ်မၤစၢၤတက့ၢ်. ယဟိဝၤယွၤအသးစီဆှံ မ့ၢ်တမၤစၢၤပှၤဘၣ်န့ၣ် ပမၤတၢ်တကဲထီၣ်လိၣ်ထီၣ်နီတမံၤဘၣ်. (စံးထီၣ်ပတြၢၤ ၁၂၇:၁; လူၤကၣ် ၁၁:၁၃) ဖဲပဃ့ယဟိဝၤယွၤအတၢ်မၤစၢၤလၢ ပတၢ်ထုကဖၣ်အပူၤအခါ ပကဘၣ်တဲဘၣ်အီၤပျီပျီလီၤ. အဒိ, ပကဃ့ယဟိဝၤယွၤ ဒ်သိးပကထံၣ်န့ၢ် ပှၤလၢအသူၣ်ဘျၢသးဘျၢ ဒီးသးအိၣ်တူၢ်လိာ် တၢ်မ့ၢ်တၢ်တီတဖၣ်လီၤ. ဝံၤဒီး ပကဘၣ်လဲၤစံၣ်တဲၤတဲလီၤတၢ်ဆူၣ်ဆူၣ် ဒ်သိးပကထံၣ်န့ၢ် ပှၤသ့ၣ်တဖၣ်အံၤအဂီၢ်လီၤ.

လါမ့ၤ ၈-၁၄

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ ကွဲးနီၣ်တၢ် ၂၀-၂၁

“နာ်န့ၢ်ယဟိဝၤယွၤ”

တၢး၁၄ ၁၂/၁၅ ၂၃ ¶၈

ပကလဲၤခီဖျိ ဟီၣ်ခိၣ်လၢအပှဲၤဒီး တၢ်ကီတၢ်ခဲတဖၣ်အံၤ ဒ်သိးသိး

^၈ လၢစီၤပၤ ယဟိၤၡၤဖးအစိၤန့ၣ် ကစၢ်ယွၤ အပှၤဂီၢ်မုၢ်တဖၣ်ထံၣ်ဘၣ်ဒီး “သုးမုၢ်ဖးဒိၣ်တဒူၣ်” လၢအအိၣ်လၢ အဝဲသ့ၣ် အခိၣ်အဃၢၤလီၤ. (၂ ကွဲး ၂၀:၁, ၂) ဘၣ်ဆၣ် ကစၢ်ယွၤ အပှၤဂီၢ်မုၢ်သ့ၣ်တဖၣ်န့ၣ် တဂုာ်ကျဲးစၢးဒုးဝဲ အဒုၣ်အဒါတဖၣ်လၢ အဝဲသ့ၣ် အဂံၢ်အဘါဘၣ်. လၢတၢ်န့ၣ်အလီၢ် အဝဲသ့ၣ် သန့ၤအသးလၢ ယဟိဝၤယွၤ အဃိ လီၤပတြၢၤဒိၣ်မး. (ဖး ၂ ကွဲးနီၣ်တၢ် ၂၀:၃, ၄) ကစၢ်ယွၤ အပှၤဂီၢ်မုၢ်သ့ၣ်တဖၣ်န့ၣ် တမၤဖဲဒၣ်အသးဘၣ်. လံာ်စီဆှံ ပာ်ဖျါထီၣ်န့ၢ်ပှၤလၢ “ဖဲန့ၣ်အခါ ပှၤလၢအအိၣ်လၢ ယူဒၤဘီမုၢ်အပူၤခဲလၢာ် ဆၢထၢၣ်ဝဲလၢ ယဟိဝၤယွၤ အမဲာ်ညါ ဃုာ်ဒီး အဖိအမါတဖၣ် ဒီးအဖိဆံးတဖၣ်လီၤ.” (၂ ကွဲး ၂၀:၁၃) အဝဲသ့ၣ်တဖၣ် အသးပှၢ်မ့ၢ်ဂ့ၤ, အသးစၢ်မ့ၢ်ဂ့ၤ အဝဲသ့ၣ် ပာ်ဖျါထီၣ် တၢ်နာ်လၢ ယဟိဝၤယွၤအဖီခိၣ် ခီဖျိ ဒိကနၣ် ကစၢ်ယွၤ အတၢ်ဟံးစုနဲၣ်ကျဲ အဃိ ယဟိဝၤယွၤ ဒီသဒၢအဝဲသ့ၣ် လၢအဒုၣ်အဒါတဖၣ် အစုပူၤ. (၂ ကွဲး ၂၀:၂၀-၂၇) မုၢ်မဆါတနံၤအံၤ ပမ့ၢ်ထံၣ်ဘၣ်ဒီး တၢ်ကီတၢ်ခဲတဖၣ်န့ၣ် ပကွၢ်လိမၤဒိး အဝဲသ့ၣ် အဒိအတဲာ်သ့.

တၢး၂၁.၁၁ ၁၆ ¶၇

ပှၤလၢအထီၣ်ပှၢ်သီသီတဖၣ် ပာ်ဆိယဟိဝၤယွၤ အတၢ်မၤလၢနီၣ်ဂံၢ်တၢ ကသ့ဒ်လဲၣ်

^၇ ယဟိဝၤယွၤမၢ ပှၤလ့ၤဝံဖိ စီၤယၤဃစအ့လး တဲဘၣ် စီၤပၤယဟိၤၡၤဖးလၢ “ပာ်ဆၢထၢၣ်သုသး, ဒီးဆၢထၢၣ်, ဒီးထံၣ်ဘၣ် ယွၤအတၢ်အုၣ်က့ၤခီၣ်က့ၤ အိၣ်ဒီးသုတက့ၢ်.” (၂ ကွဲးနီၣ်တၢ် ၂၀:၁၃-၁၇) စီၤယဟိၤၡၤဖး နာ်န့ၢ်ယဟိဝၤယွၤ လၢလၢပှဲၤပှဲၤ ဒီးအမၤဝဲဒ် ကစၢ်ယွၤ တဲအီၤအသိးလီၤ. ဖဲအီၤဒီး အပှၤဂီၢ်မုၢ်တဖၣ် လဲၤထံၣ်လိာ်သးဒီး အဒုၣ်အဒါတဖၣ်အခါ အဝဲတမၢ ပှၤသုးဖိလၢ အအိၣ်ဒီး တၢ်သ့တၢ်ဘၣ်တဖၣ် လဲၤလၢတၢ်မဲာ်ညါဘၣ်. အမၢပှၤသးဝံၣ်တၢ်ဖိလၢ အတအိၣ်ဒီး တၢ်စုကဝဲၤတဖၣ် လဲၤလၢ တၢ်မဲာ်ညါကတၢၢ်. ညီနုၢ်န့ၣ် ဖဲပှၤလဲၤဒုးတၢ်အခါ ပှၤတမၤဝဲဒ်န့ၣ်ဘၣ်. ဘၣ်ဆၣ် တၢ်ဟံးစုနဲၣ်ကျဲအံၤ တဟဲလၢ ပှၤဟီၣ်ခိၣ်ဖိအအိၣ်ဘၣ်, ဟဲလၢကစၢ်ယွၤအအိၣ်ဟီ. အဃိ ယဟိဝၤယွၤမၤစၢၤ စီၤယဟိၤၡၤဖး ဒ်အအၢၣ်လီၤပာ်စၢၤအီၤ အသိးလီၤ. ဒီးစီၤယဟိၤၡၤဖး မၤနၢၤကွံာ် အဒုၣ်အဒါတဖၣ်လီၤ.—၂ ကွဲးနီၣ်တၢ် ၂၀:၁၈-၂၃.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

it-1 ၁၂၇၁ ¶၁-၂

စီၤယဟိရၣ်

စီၤယဟိရၣ် တလဲၤတၢ်လၢ တၢ်မ့ၢ်တၢ်တီအကျဲ ဒ်အပါစီၤယဟိၤၡၤဖး အသိးဘၣ်န့ၣ် မ့ၢ်လၢအမါ နီၢ်ဧသၤလယၤ အဃိစ့ၢ်ကီး. (၂ စီၤပၤ ၈:၁၈) စီၤယဟိရၣ်န့ၣ် မၤသံဝဲ အဒီပုၢ်ဝဲၢ်ခွါဃုဂၤ ဒီးမၤသံစ့ၢ်ကီး ယူဒၤအပဒိၣ်တနီၤလီၤ. တကးဒံးဘၣ် အဝဲဆှၢကမၣ် အထံဖိကီၢ်ဖိ ဒ်သိး ကပာ်တ့ၢ်ကွံာ် ယဟိဝၤယွၤ ဒီးဘူၣ်ထီၣ်ဘါထီၣ် ယွၤလၢအကမၣ်တဖၣ်. (၂ ကွဲး ၂၁:၁-၆, ၁၁-၁၄) လၢစီၤယဟိၤရၣ် အတၢ်ပၢ ဒီတစိၤန့ၣ် ပှၤကလုာ်အဂၤ ထီဒါအီၤ တကးဒံးဘၣ် အထံဖိကီၢ်ဖိ ထီဒါအီၤ. အဆိကတၢၢ်န့ၣ် ပှၤအဒိၣ်ဖိ ထီဒါအီၤ ဒီးလၢခံန့ၣ် ပှၤလံးဘနၤဖိတဖၣ် ထီဒါအီၤ. (၂ စီၤပၤ ၈:၂၀-၂၂) ဝံအ့ၤလံယၤကွဲးန့ၢ် စီၤယဟိရၣ် လံာ်ပရၢလၢ အဟ့ၣ်ပလီၢ်အီၤလၢ “ယဟိဝၤယွၤ ကဒုးလီၤဘၣ် တၢ်နးတၢ်ဖှီၣ်ဖးဒိၣ်တခါလၢ နပှၤဂီၢ်မုၢ်, နဖိခွါတဖၣ်, နမါတဖၣ် ဒီးနတၢ်ဖိတၢ်လံၤ ခဲလၢာ်အလိၤလီၤ.” ထဲန့ၣ်တကးဒံးဘၣ် အတဲစီၤပၤယဟိရၣ်လၢ န “ကတူၢ်ဘၣ် တၢ်ဆူးတၢ်ဆါအါမံၤ ပၣ်ဃုာ်ဒီး ပှံာ်တၢ်ဆါတခါလၢ အကအၢထီၣ်နးထီၣ်ဝဲ တနံၤဘၣ်တနံၤ တုၤလၢ နပှံာ်ဖျိးထီၣ်လီၤ.”—၂ ကွဲး ၂၁:၁၂-၁၅.

တၢ်သ့ၣ်တဖၣ်န့ၣ် ကဲထီၣ်အသး ဒ်ယဟိဝၤယွၤ တဲပာ်စၢၤဝဲအသိးလီၤ. ယဟိဝၤယွၤ ဟ့ၣ်အခွဲးလၢ ပှၤဧ့ရ့းဖိ ဒီးပှၤဖလ့ၡသးဖိတဖၣ် ကဟဲထီဒါဝဲယူဒၤ ဒီးအဝဲသ့ၣ်န့ၣ် က့ၤဖီၣ်ဝဲ စီၤယဟိရၣ်အမါ ဒီးအဖိခွါတဖၣ်လီၤ. ဘၣ်ဆၣ် ယဟိဝၤယွၤ ပျဲဝဲလၢ စီၤယဟိရၣ် အဖိခွါသဒါ စီၤယဟိအါဃး (ပှၤကိးစ့ၢ်ကီးအီၤလၢ စီၤအဃၤစယၤ) ဒ်သိးကပူၤဖျဲး မ့ၢ်လၢယဟိဝၤယွၤ မၤတ့ၢ်ဘီမုၢ်တၢ်အၢၣ်လီၤဒီး စီၤဒၤဝံးအဃိလီၤ. “တၢ်မၤအသးတဖၣ်န့ၣ်ခဲလၢာ် ဝံၤအလီၢ်ခံ ယဟိဝၤယွၤ ဒုးလီၤဘၣ် စီၤပၤလၢ ပှံာ်တၢ်ဆါတခါလၢ အဘျါက့ၤ တသ့ဘၣ်လီၤ.” ခံနံၣ်ဝံၤအလီၢ်ခံ “အပှံာ်ဖျိးထီၣ်” ဒီးအတၢ်ဆါနးထီၣ်ဝဲ ကယီကယီ ဒီးသံဝဲလီၤ. အဝဲမ့ၢ် ပှၤအၢပှၤသီတဂၤအဃိ “ဖဲအသံအခါ ပှၤတသူၣ်အုးသးအုး နီတဂၤဘၣ်.” ဒီးပှၤလဲၤခူၣ်လီၤအီၤလၢ စီၤဒၤဝံးအဝ့ၢ် “ဘၣ်ဆၣ် တမ့ၢ်လၢ စီၤပၤတဖၣ် အတၢ်သွၣ်ခိၣ်အပူၤဘၣ်.” လၢခံအဖိခွါ စီၤအဃၤစယၤ ကဲထီၣ်စီၤပၤ လၢအလီၢ်လီၤ.—၂ ကွဲး ၂၁:၇, ၁၆-၂၀; ၂၂:၁; ၁ ကွဲး ၃:၁၀, ၁၁.

လါမ့ၤ ၁၅-၂၁

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ ကွဲးနီၣ်တၢ် ၂၂-၂၄

“ယဟိဝၤယွၤ ကဆိၣ်ဂ့ၤ ပှၤလၢအအိၣ်ဒီး တၢ်သးဒူ”

တၢး၀၉ ၄/၁ ၂၄ ¶၁-၂

စီၤယိၤအၣ် ပာ်တ့ၢ်ယဟိဝၤယွၤ ခီဖျိအသကီး လၢအတဂ့ၤဘၣ်အဃိ

ယရူၤၡလ့ၣ်န့ၣ် မ့ၢ်ဝဲဝ့ၢ်တဖျၢၣ်လၢ ကစၢ်ယွၤ အတၢ်လုၢ်ဟံၣ် အိၣ်လၢအပူၤ. ဘၣ်ဆၣ် တၢ်လၢအလီၤသးအုး ကဲထီၣ်အသးတခါ. စီၤပၤအဃၤစယၤန့ၣ် ပှၤမၤသံအီၤ. ဒီးစီၤအဃၤစယၤအမိၢ် နီၢ်ဧသၤလယၤန့ၣ် မၤတၢ်လၢ အတလီၤဆိကမိၣ်ဘၣ်တခါ. အဝဲ မၤသံဝဲ အလံၤခွါသ့ၣ်တဖၣ်. ဘၣ်မနုၤအဃိ အမၤဝဲဒ်န့ၣ်လဲၣ်. မ့ၢ်လၢအတအဲၣ်ဒိးလၢ အလံၤခွါ ကဲထီၣ်စီၤပၤ နီတဂၤဘၣ်, လၢတၢ်န့ၣ်အလီၢ် အဝဲအဲၣ်ဒိးကဲထီၣ် နီၢ်ပၤမုၣ်အဃိလီၤ.

ပမ့ၢ်ကွၢ် နီၢ်ဧသၤလယၤန့ၣ် အလံၤခွါ စီၤယိၤအၣ် အိၣ်မူဒံးန့ၣ် အတသ့ၣ်ညါဝဲဘၣ်. စီၤယိၤအၣ် ပူၤဖျဲးလၢအစုပူၤဒ်လဲၣ်. စီၤယိၤအၣ်န့ၣ် အမုၢ်ဂၢ် နီၢ်ယဟိၡ့ဘၤ ပာ်ခူသူၣ်အီၤလၢ ကစၢ်ယွၤ အတၢ်လုၢ်ဟံၣ်ပူၤ. အမၤဝဲ ဒ်န့ၣ်သ့ခီဖျိ အဝၤစီၤယဟိၤယဒါန့ၣ် ကဲဝဲ ပှၤလုၢ်တၢ်ခိၣ် အဒိၣ်ကတၢၢ်အဃိ. အဝဲသ့ၣ် ပာ်ခူသူၣ်ဝဲ စီၤယိၤအၣ် ဘံၣ်ဘံၣ်ဘၢဘၢလီၤ.

တၢး၀၉ ၄/၁ ၂၄ ¶၃-၅

စီၤယိၤအၣ် ပာ်တ့ၢ်ယဟိဝၤယွၤ ခီဖျိအသကီး လၢအတဂ့ၤဘၣ်အဃိ

ပှၤပာ်ခူသူၣ် စီၤယိၤအၣ်လၢ တၢ်လုၢ်ဟံၣ်အပူၤ အိၣ်ဝဲ ဃုနံၣ်လံ. ဖဲန့ၣ်န့ၣ် ပှၤသိၣ်လိအီၤ ဘၣ်ဃးဒီး ယဟိဝၤယွၤ ဒီးအတၢ်သိၣ်တၢ်သီအဂ့ၢ်တဖၣ်ခဲလၢာ်. လၢခံ ဖဲစီၤယိၤအၣ် ပှဲၤထီၣ်နွံနံၣ်အခါ စီၤယဟိၤယဒါန့ၣ် ပာ်လီၤအသးလၢ အကဒုးကဲထီၣ်အီၤလၢ စီၤပၤလီၤ. အဃိ စီၤယဟိၤယဒါ မၤဝဲဒ်လဲၣ် ဒီးတၢ်ကဲထီၣ်အသးဒီး နီၢ်ပၤမုၣ် နီၢ်ဧသၤလယၤ ဒ်လဲၣ်န့ၣ် နအဲၣ်ဒိးသ့ၣ်ညါဧါ.—

စီၤယဟိၤယဒါ ကိးခူသူၣ်ဝဲ ပှၤလၢအဒီသဒၢ စီၤပၤအသးသမူ လၢအအိၣ်လၢ ဝ့ၢ်ယရူၤၡလ့ၣ်အပူၤ ဒီးအတဲဘၣ် အဝဲသ့ၣ်လၢ အဝဲဒီးအမါန့ၣ် ပာ်ခူသူၣ်ဝဲ စီၤအဃၤစယၤ အဖိခွါ စီၤယိၤအၣ်. ဒီးစီၤယဟိၤယဒါ ပၠးအဝဲသ့ၣ်လၢ စီၤယိၤအၣ်လီၤ. ဒီးဖဲန့ၣ်န့ၣ် အဝဲသ့ၣ်တဖၣ် သ့ၣ်ညါဝဲလၢ စီၤယိၤအၣ် မ့ၢ်ပှၤလၢအကြၢးထီၣ် စီၤပၤလီၤ. အဃိ အဝဲသ့ၣ် ရဲၣ်လီၤကျဲၤလီၤဝဲတၢ်တမံၤ.

စီၤယဟိၤယဒါန့ၣ် ဒုးထီၣ်ဝဲ စီၤယိၤအၣ်လၢ စီၤပၤလီၤ. ဒီးဖဲန့ၣ် ပှၤဂီၢ်မုၢ်တဖၣ် “ဒဲစု ဒီးတဲဝဲလၢ “မ်စီၤပၤအိၣ်မူဘၣ် ယံာ်ယံာ်တက့ၢ်.”” ဒီးပှၤလၢ အဒီသဒၢ စီၤပၤအသးသမူတဖၣ် ကဝီၤဃာ်ဝဲ စီၤယိၤအၣ် ဒ်သိး ကဒီသဒၢအီၤလီၤ. ဖဲနီၢ်ပၤမုၣ် နီၢ်ဧသၤလယၤ နၢ်ဟူဝဲ ပှၤသူၣ်ဖှံသးညီသီၣ်အခါ အဝဲ ဟဲဟးထီၣ် ဒီးဂုာ်ကျဲးစၢးထီဒါဝဲလီၤ. ဘၣ်ဆၣ် စီၤယဟိၤယဒါ ဟ့ၣ်လီၤတၢ်ကလုၢ်လၢ ပှၤလၢအဒီသဒၢ စီၤပၤအသးသမူသ့ၣ်တဖၣ် ကမၤသံကွံာ်ဝဲ နီၢ်ပၤမုၣ် နီၢ်ဧသၤလယၤလီၤ.—၂ စီၤပၤ ၁၁:၁-၁၆.

it-1 ၃၇၉ ¶၅

တၢ်ခူၣ်လီၤပှၤသံ, ပှၤခူၣ်လီၤပှၤသံအလီၢ်

ပှၤလုၢ်တၢ်ခိၣ် အဒိၣ်ကတၢၢ် စီၤယဟိၤယဒါန့ၣ် မ့ၢ်လၢအအိၣ်ဒီး တၢ်သးတီအဃိ အဒိးန့ၢ်ဘၣ် တၢ်ခွဲးတၢ်ယာ်လၢ ပှၤက “ပှၤခူၣ်လီၤကွံာ်အီၤ တပူၤဃီဒီး စီၤပၤတဖၣ် လၢစီၤဒၤဝံးအဝ့ၢ်ပူၤ.” အဝဲန့ၣ် တမ့ၢ်ဝဲ စီၤပၤအစၢၤအသွဲၣ် သနာ်က့ ထဲဒၣ်အဝဲတဂၤဧိၤ န့ၢ်ဘၣ်တၢ်ခွဲးတၢ်ယာ်လီၤဆီဒ်အံၤ.—၂ ကွဲး ၂၄:၁၅, ၁၆.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

it-2 ၁၂၂၃ ¶၁၃

စီၤစကၤရယၤ

၁၂. မ့ၢ်ဝဲ ပှၤလုၢ်တၢ်ခိၣ် အဒိၣ်ကတၢၢ် စီၤယဟိၤယဒါ အဖိခွါ. ဖဲစီၤယဟိၤယဒါ သံဝံၤအလီၢ်ခံ စီၤပၤယိၤအၣ်န့ၣ် တကနၣ်ဃုာ် တၢ်ဘူၣ်တၢ်ဘါ အမ့ၢ်အတီလၢၤဘၣ်. လၢတၢ်န့ၣ်အလီၢ် အဝဲဒိကနၣ်ဝဲ တၢ်ဟ့ၣ်ကူၣ်လၢ အကမၣ် ဒီးတဒိကနၣ်ဝဲ ယဟိဝၤယွၤအဝံတဖၣ်ဘၣ်. စီၤစကၤရယၤန့ၣ် မ့ၢ်ဝဲစီၤပၤယိၤအၣ် အတခွါ. (၂ ကွဲး ၂၂:၁၁) စီၤစကၤရယၤ ဟ့ၣ်ပလီၢ်ဝဲ ပှၤယူဒၤဖိသ့ၣ်တဖၣ် ဘၣ်ဆၣ် အဝဲသ့ၣ် တပီၢ်ယၢ်လီၤက့ၤအသးဘၣ် အမဲာ်ညါ အဝဲသ့ၣ် ကွံာ်သံဝဲ စီၤစကၤရယၤလၢလၢၢ် လၢတၢ်လုၢ်ဟံၣ် အတၢ်ပျီပူၤ မ့တမ့ၢ် အဂၢၤပူၤလီၤ. ဖဲစီၤစကၤရယၤ တချုးသံအခါ အဝဲတဲဝဲလၢ “မ်ယဟိဝၤယွၤ ကွၢ်ကျဲၤ ဒီးဟံးန့ၢ်နၤအရ့ တက့ၢ်.” ဝံအတၢ်စံးပာ်တခါအံၤ ဟဲလၢထီၣ်ပှဲၤထီၣ်ဝဲဖဲ ပှၤအၤၡူၢ်ဖိသ့ၣ်တဖၣ် ဟဲဒုးဝဲယူဒၤအခါ, ဒီးတကးဒံးဘၣ် စီၤယိၤအၣ်န့ၣ် အပျဲၢ်ခံဂၤ မၤသံကွံာ်အီၤ “မ့ၢ်လၢ စီၤယိၤအၣ် မၤသံပှၤလုၢ်တၢ်ဒိၣ် စီၤယဟိၤယဒါ အဖိခွါတဖၣ် အဃိ” လီၤ. ကြံးစဲးထူးကၠ့း ဒီး လးတ့ၣ် ဘၢက့း The Greek Septuagint and the Latin Vulgate တဲဝဲလၢ စီၤယိၤအၣ် ဘၣ်တၢ်မၤသံအီၤ မ့ၢ်လၢအီၤန့ၣ် ဘၣ်တၢ်မၤကၣ်အီၤ ခီဖျိလၢ အမၤသံဝဲ စီၤယဟိၤယဒါအ “ဖိခွါ” လီၤ. မဲၣ်စိၣ်ရၢးထံး ဒီး ဆံရံယါ ဖဲၡံတၤ The Masoretic text and the Syriac Peshitta အသူဝဲ တၢ်ကတိၤလၢအမ့ၢ် “အဖိခွါတဖၣ်.” ဖဲအံၤသူဝဲ တၢ်ကတိၤလၢ ဖိခွါတဖၣ်န့ၣ် မ့ၢ်လၢစီၤစကၤရယၤန့ၣ် အကဲဝံ ဒီးပှၤလုၢ်တၢ်အဒိၣ် ဒီးအအိၣ်ဒီး အလၤကပီၤလၢ ပှၤကကိးအီၤလၢ စီၤယဟိၤယဒါ အဖိခွါအဃိလီၤ.—၂ ကွဲး ၂၄:၁၇-၂၂, ၂၅.

တၢး၁၀ ၂/၁၅ ၆-၈ ¶၆-၁၀

^၆ ဒ်သိး ပကဒိးန့ၢ်ဘၣ် ကစၢ်ယွၤ အသးစီဆှံအဂီၢ် ကျဲလၢအဂ့ၤကတၢၢ်တဘိန့ၣ် မ့ၢ်ဝဲ ပကဘၣ်ဃ့ ကစၢ်ယွၤ အသးစီဆှံ. ယ့ၣ်ၡူးတဲဘၣ် အပှၤဒိကနၣ်တၢ်ဖိသ့ၣ်တဖၣ်လၢ “သုကဲပှၤအၢပှၤသီမး သုမ့ၢ်သးအိၣ်ဟ့ၣ် သုဖိတၢ်ဟ့ၣ်လၢအဂ့ၤန့ၣ် သုပၢ်အိၣ်လၢမူခိၣ် ကဟ့ၣ်ဝဲ ပှၤလၢအဃ့အီၤသးစီဆှံ အါန့ၢ်အန့ၣ်တမ့ၢ်ဧီၤ.” (လူၤကၣ် ၁၁:၁၃) အဃိ ဒ်သိးပကန့ၢ်ဘၣ် ကစၢ်ယွၤ အသးစီဆှံအဂီၢ် ပကဘၣ် ဃ့ဘါထုကဖၣ်တၢ်ဆူၣ်ဆူၣ်. အဒိ ပမ့ၢ်ဘၣ်ယိၣ်တၢ်လၢ ပကလဲၤ စံၣ်တဲၤတဲလီၤတၢ် လၢကျဲမ့ၢ်ဂ့ၤ, တၢ်စံၣ်တဲၤတဲလီၤတၢ်လၢ တၢ်လီၢ်တပူၤလၢ်လၢ်မ့ၢ်ဂ့ၤ ဒီးလၢပှၤဆါတၢ်ပှ့ၤတၢ်အလီၢ်န့ၣ် ပမ့ၢ်ဘၣ်ယိၣ်တၢ်န့ၣ် ဒ်သိးပကအိၣ်ဒီး တၢ်သးဒူအဂီၢ် ပဃ့ယဟိဝၤယွၤ အသးစီဆှံ လၢကဟ့ၣ်ပှၤ တၢ်သးဒူအဂီၢ်သ့.—၁ သ့းစၤလနံ ၅:၁၇.

^၇ ဒီပုၢ်ဝဲၢ်မုၣ်ရိစၤ မၤဝဲဒ်န့ၣ်လီၤ. ဘၣ်တနံၤ လၢရိစၤ အတၢ်မၤလီၢ်န့ၣ် အထံၣ်ဝဲ သရၣ်မုၣ်တဂၤ ဖးဝဲတၢ်ကစီၣ် လၢဘၣ်ဃးဒီး ကၠိအဂၤတဖျၢၣ်န့ၣ် မၤနၢၤအီၣ် ပှၤဖိသၣ်အဂ့ၢ်အခါ အတဲထီၣ်ဝဲလၢ “ဟီၣ်ခိၣ်တဖျၢၣ်အံၤ နးထီၣ်ရးလဲၣ်.” ဖဲန့ၣ် ရိစၤထံၣ်ဝဲ တၢ်ခွဲးတၢ်ယာ်တခါအံၤအဃိ ဂုာ်ကျဲးစၢး စံၣ်တဲၤတဲလီၤဝဲ သရၣ်မုၣ်တဂၤအံၤ. ဒ်သိး ရိစၤကတဲတၢ်လၢ တၢ်သးဒူအပူၤအဂီၢ် တၢ်မနုၤ မၤစၢၤအီၤလဲၣ်. ရိစၤတဲဝဲလၢ “ယဃ့ဘါထုကဖၣ် လၢယဟိဝၤယွၤအအိၣ် ဒ်သိး အကဟ့ၣ်လီၤယၤ အသးစီဆှံလၢ ကမၤစၢၤယၤအဂီၢ်.” အဃိ အဝဲစံၣ်တဲၤတဲလီၤဘၣ် သရၣ်မုၣ်တဂၤအံၤဂ့ၤဂ့ၤ ဒီးရဲၣ်ကျဲၤဝဲလၢ ကက့ၤဟးအိၣ်သကိးကဒါက့ၤ သရၣ်မုၣ်. ခဲအံၤ ပကတဲသကီး ဒီပုၢ်ဝဲၢ်မုၣ်ဖိတဂၤလၢ အအိၣ်ယဲၢ်နံၣ်အဂ့ၢ်. အဝဲအမံၤမ့ၢ် မလံ ဒီးအဝဲအိၣ်လၢ ဝ့ၢ်နူယီးအပူၤ. မလံတဲဝဲလၢ “တချုးလၢ ယလဲၤထီၣ်ကၠိဘၣ်န့ၣ် ယၤဒီးယမိမိ ပဃ့ထုကဖၣ်လၢ ယဟိဝၤယွၤအအိၣ်ထီဘိ.” အဝဲသ့ၣ်ဃ့ဝဲ တၢ်ဂ့ၢ်မနုၤလဲၣ်. အဝဲသ့ၣ် ဃ့ဒ်သိးမလံ ကအိၣ်ဒီး တၢ်သးဒူ, ကဆၢထၢၣ်ဂၢၢ်ကျၢၤ ဒီးကတဲဘၣ် ကစၢ်ယဟိဝၤယွၤအဂ့ၢ်ဒူဒူ ကဘူၣ်အဂီၢ်. မလံ အမိတဲဝဲလၢ “ခီဖျိလၢ ပမၤဒ်အံၤအဃိ မၤစၢၤဝဲမလံလၢ ကတဲဖျါထီၣ်ဝဲလၢ အတမၤဝဲ တၢ်အိၣ်ဖျဲၣ်ဆၢက့ၤ ဒီးမူးပွဲအဂၤဘၣ်လီၤ.” ဖဲအံၤ ပထံၣ်ဘၣ်လၢ ပမ့ၢ်လိၣ်ဘၣ် တၢ်သးဒူန့ၣ် ပတၢ်ထုကဖၣ် ကမၤစၢၤပှၤ သပှၢ်ကတၢၢ်.

^၈ ခဲအံၤ ပကဆိကမိၣ်ကွၢ် ဝံယံးရမံယၤအဂ့ၢ်. ဒ်သိး ဝံယံးရမံယၤ ကအိၣ်ဒီး တၢ်သးဒူအဂီၢ် တၢ်မနုၤ မၤစၢၤအီၤလဲၣ်. ဖဲကစၢ်ယဟိဝၤယွၤ ဃုထၢထီၣ် ဝံယံးရမံယၤလၢ အဝံတဂၤ ဒ်သိး ကဟ့ၣ်ပလီၢ်ဝဲ အပှၤဂီၢ်မုၢ်အခါ ဝံယံးရမံယၤ တဲဆၢက့ၤဝဲလၢ “ယကဲပှၤလၢ အသးစၢ်ဒံးလီၤ, ယတဲတၢ် တဘၣ်ဘၣ်.” (ယံး ၁:၄-၆) လၢခံ ပထံၣ်ဘၣ်လၢ စီၤယံးရမံယၤန့ၣ် ကဲထီၣ်ဝဲ ပှၤလၢအစံၣ်တဲၤတဲလီၤတၢ် လၢတၢ်သးဒူပူၤ ဒီးတၢ်သးဆူၣ်ပူၤအဃိ ပှၤအါဂၤထံၣ်အီၤလၢ အဒုးအိၣ်ထီၣ် တၢ်ကီတၢ်ခဲတဂၤလီၤ. (ယံး ၃၈:၄) အဝဲစံၣ်တဲၤတဲလီၤဝဲ ယဟိဝၤယွၤ အတၢ်စံၣ်ညီၣ်အဂ့ၢ် အိၣ်ဝဲ ၆၅ နံၣ်ဘျဲၣ်ညါ. ဝံယံးရမံယၤန့ၣ် မ့ၢ်ပှၤလၢ အတၢ်သးဒူအိၣ် ဒီးအမံၤဟူသၣ်ဖျါလၢ အံၣ်စရ့လးအပူၤ တုၤဒၣ်လဲာ် အသံဝံၤ အနံၣ် ၆၀၀ ဝံၤအလီၢ်ခံန့ၣ် ဖဲယ့ၣ်ၡူး စံၣ်တဲၤတဲလီၤတၢ်လၢ တၢ်သးဒူပူၤအခါ ပှၤတနီၤ ဆိကမိၣ်ဝဲလၢ ဝံယံးရမံယၤ ဟဲက့ၤဂဲၤဆၢထၢၣ်သမူထီၣ်က့ၤဝဲ. (မးသဲ ၁၆:၁၃, ၁၄) ဝံလၢ အတၢ်သးဒူတအိၣ်ဘၣ်တဂၤအံၤ အတၢ်သးဒူအိၣ်ထီၣ် ဒ်လဲၣ်. ဝံယံးရမံယၤ တဲဝဲလၢ “အကလုၢ်ကထါန့ၣ် ကဲထီၣ်ဒ်သိးဒီး မ့ၣ်အူလၢ အအီၣ်တၢ်လၢယသးပူၤ ဒီးမ့ၣ်အူလၢ အကးတံာ်ဃာ်သးလၢ ယဃံပူၤ အဃိ ယတူၢ်တပှဲၤလၢၤဘၣ်.” (ယံး ၂၀:၉) ဖဲအံၤပထံၣ်ဘၣ်လၢ ယဟိဝၤယွၤ အကလုၢ်ကထါန့ၣ် မၤစၢၤဝံယံးရမံယၤ လၢအကစံၣ်တဲၤတဲလီၤတၢ်လၢ တၢ်သးဒူအပူၤလီၤ.

^၉ ဖဲတၢ်မၢဖိပီလူးကွဲးဝဲ လံာ်ဧ့ၤဘြံၤအခါ အကွဲးဝဲလၢ “ကစၢ်ယွၤ အကလုၢ်ကထါန့ၣ်မူဝဲ, အိၣ်ဒီးအစိကမီၤ ဒီးအကနၣ်အ့ၣ်န့ၢ် ကယဲၢ်နးလၢအကနၣ် အိၣ်ခံကပၤလၢာ်လီၤ. ဒီးအဆဲးဖျိတၢ် ပၢၢ်တုၤလၢအနီၤဖး ပတၢ်အိၣ်ဖျါလၢခိ, တၢ်အိၣ်လၢ ပသးပူၤနီၢ်ကီၢ်, အနီၤဖးဝဲ တၢ်အကမဲာ်, တၢ်ဃံအကံၢ်, အပာ်ဖျါထီၣ် ပတၢ်ဆိကမိၣ်တဖၣ် ဒီးတၢ်လၢပလီကီအီၤ လၢပသးပူၤလီၤ.” (ဧ့ၤ ၄:၁၂) ကစၢ်ယွၤအကလုၢ်ကထါန့ၣ် ကဲဘျုးလၢပဂီၢ် ဒ်အကဲဘျုးလၢ ဝံယံးရမံယၤအဂီၢ်အသိးသ့. ကစၢ်ယွၤအသးစီဆှံ ထိၣ်ဟူးထိၣ်ဂဲၤထီၣ် ပှၤဟီၣ်ခိၣ်ဖိလၢ ကကွဲးဝဲလံာ်စီဆှံအဃိ လံာ်စီဆှံန့ၣ် ပှၤဟီၣ်ခိၣ်ဖိ ကွဲးဝဲဘၣ်ဆၣ် တၢ်ဂ့ၢ်လၢအဝဲသ့ၣ် ကွဲးဝဲတဖၣ်န့ၣ် တမ့ၢ်အဝဲသ့ၣ် အတၢ်ဆိကမိၣ်ဘၣ်. ၂ ပ့းတရူး ၁:၂၁ တဲဝဲလၢ “ဒီးဝံအတၢ်စံးပာ် တဟဲအိၣ်ထီၣ် ဖဲဒၣ်ပှၤဟီၣ်ခိၣ်ဖိအသး နီတဘျီဘၣ်. ဘၣ်ဆၣ် ပှၤဟီၣ်ခိၣ်ဖိတဖၣ် တဲတၢ်လၢအဟဲလၢ ကစၢ်ယွၤအအိၣ် ဒ်သးစီဆှံ ထိၣ်ဟူးထိၣ်ဂဲၤထီၣ် အဝဲသ့ၣ် အသးအသိးလီၤ.” ပမ့ၢ်ဟံးန့ၢ် တၢ်ဆၢကတီၢ်လၢ ပကမၤ နီၢ်ကစၢ်တၢ်မၤလိလံာ်စီဆှံ မူာ်မူာ်နီၢ်နီၢ်န့ၣ် ပသးပူၤန့ၣ် ကပှဲၤဒီး ကစၢ်ယွၤအကလုၢ်ကထါလၢ ဘၣ်တၢ်ကွဲးအီၤလၢသးစီဆှံ. (ဖး ၁ ကရံၣ်သူး ၂:၁၀) ဒီးကစၢ်ယွၤ အကလုၢ်ကထါန့ၣ် ကလီၤဂာ်ဒီး “မ့ၣ်အူလၢ အအီၣ်တၢ်” လၢပသးပူၤ. အဃိ ပပာ်ဃာ်အီၤလၢ ပသးပူၤ တကဲလၢၤဘၣ် ဒီးပကအဲၣ်ဒိးတဲဘၣ် ပှၤဂၤလီၤ.

^၁၀ ဒ်သိး ပကဒိးန့ၢ်ဘၣ်အဘျုးလၢ နီၢ်ကစၢ် တၢ်မၤလိလံာ်စီဆှံအဂီၢ် ပကဘၣ်မၤလိလံာ်စီဆှံ တုၤအနုာ်လီၤလၢပသးပူၤ ဒီးမၤအီၤတုၤလၢ အထိၣ်ဟူးထိၣ်ဂဲၤထီၣ်ပသး. အဒိ ဖဲဝံယဃ့းစက့လး ထံၣ်တၢ်ထံၣ်လၢညါခီအခါ ကစၢ်ယွၤမၢအအီၣ် လံာ်ထူလၢ အအိၣ်ဒီး တၢ်စံၣ်ညီၣ်အကစီၣ်လၢ ပှၤလၢအခိၣ်ကိၤတဖၣ်အဂီၢ်. အအဲၣ်ဒိးတဲဝဲ ဝံယဃ့းစက့လး ကဘၣ်နၢ်ပၢၢ်ဝဲ တၢ်ကစီၣ်လၢ အကတဲဝဲ လီၤတံၢ်လီၤဆဲး ဒီးနာ်န့ၢ်ဝဲ တၢ်ကစီၣ်တခါန့ၣ် သပှၢ်ကတၢၢ်. ဒီးအဝဲ မ့ၢ်မၤဝဲ ဒ်န့ၣ်န့ၣ် အကဘၣ်သူၣ်ဘၣ်သးဝဲ အမူဒါတခါအံၤဒိၣ်မး, လီၤဂာ်ဒ်သိးဒီး အအီၣ်ဘၣ် ကနဲစီလၢအဆၢ.—ဖး ယဃ့းစက့လး ၂:၈–၃:၄, ၇-၉.

လါမ့ၤ ၂၂-၂၈

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ ကွဲးနီၣ်တၢ် ၂၅-၂၇

“ယဟိဝၤယွၤ ဟ့ၣ်နၤသ့ အါန့ၢ်အန့ၣ် စၢၢ်တလၢၢ်ဒံး”

it-1 ၁၂၆၆ ¶၆

စီၤယိၤအၣ်

စီၤယိၤအၣ် ငါလီၤဝဲ ပှၤသုးဖိအဂၤ တကလီၢ်လၢ ယူဒၤအစီၤပၤအအိၣ် ဒ်သိးကလဲၤဒုးဝဲ ပှၤအဒိၣ်ဖိအဂီၢ်. သနာ်က့ ခီဖျိလၢ “ယွၤလၢအမ့ၢ်အတီ အပှၤတဂၤ” အတၢ်ဟ့ၣ်ကူၣ်အဃိ ပှၤပျဲက့ၤသုးဖိတဖၣ်အံၤ. ပှၤဟ့ၣ်ပာ်စၢၤအဝဲသ့ၣ် စ့ညၣ် အတၤလၣ် တကယၤ (ဒီၤလၤ ၆၆၀,၆၀၀) ဘၣ်ဆၣ် ဖဲအဝဲသ့ၣ် က့ၤအခါ အသးဒိၣ်ထီၣ်တၢ်. ဘၣ်သ့ၣ်သ့ၣ် ကမ့ၢ်လၢ အဝဲသ့ၣ် ဆိကမိၣ်ဝဲလၢ အမ့ၢ်လဲၤဒုးတၢ်န့ၣ် အကန့ၢ်ဘၣ်အါထီၣ် တၢ်ဖိတၢ်လံၤဒံး. အဃိ ဖဲအဝဲသ့ၣ် ဟဲက့ၤလၢ ကလံၤစိးအဘီအမုၢ်အခါ အဝဲသ့ၣ် နုာ်လီၤဂုာ်န့ၢ်ဆူၣ်တၢ်လၢ ဝ့ၢ်လၢကလံၤထံးဘီမုၢ်အပူၤ စးထီၣ်လၢ ၡၤမရံ (ဘၣ်သ့ၣ်သ့ၣ် ကမ့ၢ်တၢ်လီၢ်လၢ အဝဲသ့ၣ် အသုးမုၢ် ဆီလီၤသးအလီၢ်) တုၤလၢ ဘ့ၤသဃိရိၣ်.—၂ ကွဲး ၂၅:၆-၁၀, ၁၃.

တၢး၂၁.၀၈ ၃၀ ¶၁၆

“လ့ၣ်ကွၢ်” ယဟိဝၤယွၤ အတၢ်ဂ့ၤတက့ၢ်

^၁၆ ဟ့ၣ်လီၤသးလၢ ယဟိဝၤယွၤအဂီၢ်တက့ၢ်. ပကမၤတၢ်ဘၣ် ယဟိဝၤယွၤသးအဂီၢ် ပတဘၣ် ဟ့ၣ်ၡူကွံာ် တၢ်ခဲလၢာ်ဘၣ်. (စံၣ်တဲၤတဲလီၤတၢ် ၅:၁၉, ၂၀) ဘၣ်ဆၣ် ပမ့ၢ်တမၤအါထီၣ် ယဟိဝၤယွၤအတၢ်မၤ ခီဖျိပတအဲၣ်ဒိး ဟ့ၣ်ၡူကွံာ် တၢ်တမံၤမံၤဘၣ်န့ၣ် ပကလီၤဂာ်ဒ် ပှၤပိာ်ခွါလၢ ယ့ၣ်ၡူးဟ့ၣ်ဝဲ တၢ်အဒိလၢ အဝဲမၤတၢ်ဆူၣ်ဆူၣ်လၢ အကအိၣ်မူဘၣ် မုာ်မုာ်ခုၣ်ခုၣ်အဂီၢ် သနာ်က့ အဝဲတမၤ ယဟိဝၤယွၤတၢ်မၤဘၣ်. (ဖး လူၤကၣ် ၁၂:၁၆-၂၁ တက့ၢ်.) ဒီပုၢ်ဝဲၢ်ခွါခရံာ်ၡၢၤ လၢအအိၣ်လၢ ကီၢ်ဖြၣ်စ့ၣ်န့ၣ် တဲဝဲလၢ “ယတဟ့ၣ် ယဟိဝၤယွၤ ဒီးယဟံၣ်ဖိဃီဖိ တၢ်ဆၢကတီၢ်ဒီး တၢ်ဂံၢ်တၢ်ဘါလၢ အဂ့ၤကတၢၢ်ဘၣ်.” ဒီးဒီပုၢ်ဝဲၢ်ခွါဒီးအမါအံၤ ဆၢတဲာ်လီၤအသးလၢ ကမၤဝဲ ပှၤလဲၤလၢညါလီၤ. ဘၣ်ဆၣ် ဒ်သိးမၤဝဲ ပှၤလဲၤလၢညါကန့ၢ်အဂီၢ် ကဘၣ်ပာ်တ့ၢ်ကွံာ် အတၢ်မၤတဖၣ်လီၤ. အဝဲသ့ၣ်စးထီၣ် မၤဝဲ တၢ်ကဆှဲကဆှီတၢ်မၤ ဒ်သိးကလုၢ်အီၣ် သးသမူအဂီၢ်လီၤ. အဝဲသ့ၣ်တဒိးန့ၢ်ဘၣ် ကျိၣ်စ့အါအါဘၣ် သနာ်က့ သးမံဝဲလီၤ. ဒ်သိးအဝဲသ့ၣ်ကမၤဘၣ် ပှၤလဲၤလၢညါအဂီၢ် ဘၣ်တူၢ်ဆါအသးန့ၣ် မ့ၢ်အဝဲသ့ၣ်သးခုဧါ. ဒီပုၢ်ဝဲၢ်ခွါတဲဝဲလၢ “ပဟးစံၣ်တဲၤတဲလီၤတၢ် မုာ်ဒိၣ်ထီၣ် ဒီးပထံၣ်ဘၣ် ပှၤမၤလိလံာ်စီဆှံ ဒီးပှၤလၢပက့ၤဟးကဒါက့ၤ လၢအအိၣ်တဖၣ် မၤလိယဟိဝၤယွၤအဂ့ၢ်န့ၣ် ပသးခုဒိၣ်မးလီၤ.”

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၀၇ ၁၂/၁၅ ၁၀ ¶၁-၂

နအိၣ်ဒီး ပှၤလၢအဟံးစုနဲၣ်ကျဲနၤ လၢနီၢ်သးတခီဧါ

ဖဲစီၤဧူးစံယါ အိၣ်တဆံဃုနံၣ်အခါ အဝဲကဲထီၣ် ကလံၤထံး ယူဒၤအဘီမုၢ်စီၤပၤ. အဝဲပၢတၢ်န့ၢ် အနံၣ် ၅၀ ဘျဲၣ် စးထီၣ်လၢ ချ.ခ.န ခွံကယၤ ဘူးကလၢာ် တုၤလၢ ချ.ခ.န ဃိးကယၤဘျဲၣ် ဖဲစီၤဧူးစံယါ အသးစၢ်အခါန့ၣ် အဝဲ “ဆဲးမၤတၢ်လၢ ယဟိဝၤယွၤ ထံၣ်ဝဲလၢအဂ့ၤ.” တၢ်မနုၤ မၤစၢၤအီၤလၢ အဝဲကမၤတၢ်လၢ အဘၣ်လဲၣ်. တၢ်ကွဲးနီၣ် ပာ်ဖျါထီၣ်ဝဲလၢ “စီၤစကၤရယၤ မ့ၢ်ပှၤတဂၤလၢ အသိၣ်လိအီၤ တၢ်ပျံၤယွၤ ဖဲစီၤစကၤရယၤ အိၣ်မူဒံးအခါ စီၤဧူးစံယါ ဃုကစၢ်ယွၤထီဘိလီၤ. ဖဲအဝဲဃု ယဟိဝၤယွၤ အဆၢကတီၢ်န့ၣ် ယွၤလၢ အမ့ၢ်အတီတဂၤ ဆိၣ်ဂ့ၤအီၤလီၤ.”—၂ ကွဲးနီၣ်တၢ် ၂၆:၁, ၄, ၅.

စီၤစကၤရယၤ လၢအကဲပှၤလၢအသိၣ်လိ စီၤပၤဧူးစံယါအဂ့ၢ်န့ၣ် လံာ်စီဆှံ တပာ်ဖျါထီၣ် အဂ့ၢ်အါအါဘၣ်. စီၤဧူးစံယါန့ၣ် စီၤစကၤရယၤ “အသိၣ်လိအီၤ တၢ်ပျံၤယွၤ.” စီၤစကၤရယၤ မၤစၢၤပှၤပၢတၢ်လၢ အသးစၢ်တဂၤအံၤ လၢကမၤတၢ်အဘၣ်အဂီၢ်. လံာ်စီဆှံတဘ့ၣ် လၢအမ့ၢ် The Expositor’s Bible န့ၣ်ပာ်ဖျါထီၣ်ဝဲလၢ “စီၤစကၤရယၤန့ၣ် မ့ၢ်ပှၤလၢ အသ့ၣ်ညါလံာ်စီဆှံအါ ဒီးတၢ်လဲၤခီဖျိလၢ နီၢ်သးတကပၤန့ၣ် အိၣ်အါမး. ဒီးအမ့ၢ်ဝဲ ပှၤတဂၤလၢ အဟ့ၣ်နီၤလီၤ တၢ်သ့ၣ်ညါနၢ်ပၢၢ်သ့ဂ့ၤဂ့ၤ.” ပှၤကူၣ်ဘၣ်ကူၣ်သ့ ဘၣ်ဃးဒီး လံာ်စီဆှံတဂၤန့ၣ် တဲဝဲလၢ “စီၤစကၤရယၤန့ၣ် အသ့ၣ်ညါ ဝံအတၢ်ကွဲးတဖၣ်ဂ့ၤဂ့ၤ ဒီး . . . အိၣ်ဒီး တၢ်သ့ၣ်ညါနၢ်ပၢၢ်အါမး, အအဲၣ်ကစၢ်ယွၤ, အကဲပှၤလၢအဂ့ၤ ဒီးဖျါလၢအဒိအတဲာ် လၢအဂ့ၤန့ၣ် ကဲထီၣ်တၢ်မၤစၢၤလၢ စီၤဧူးစံယါအဂီၢ်ဒိၣ်မး.”

လါမ့ၤ ၂၉–လါယူၤ ၄

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ ကွဲးနီၣ်တၢ် ၂၈-၂၉

“နမ့ၢ်ဒိၣ်ထီၣ်ဘၣ်ဒီး မိပါလၢ အတအဲၣ် ယဟိဝၤယွၤဘၣ် သနာ်က့ နမၤယဟိဝၤယွၤ အတၢ်မၤသ့”

တၢး၁၆.၀၂ ၁၀ ¶၈

ကွၢ်လိယဟိဝၤယွၤ အတံၤသကိးတဖၣ်တက့ၢ်

^၈ စီၤဃံးစကံယၤဒီးနီၢ်ရူၤသး အတၢ်အိၣ်မူန့ၣ် လီၤဆီလိာ်သးဒိၣ်မးလီၤ. စီၤဃံးစကံယၤ ဟဲလီၤစၢၤလီၤသွဲၣ်လၢ ပှၤအံၣ်စရ့လးဖိ လၢအမ့ၢ်ကစၢ်ယွၤအပှၤကလုာ်လီၤ. ဘၣ်ဆၣ် ပှၤအံၣ်စရ့လးဖိ တတီဒီးကစၢ်ယွၤကိးဂၤဒဲးဘၣ်. စီၤဃံးစကံယၤ အပၢ်စီၤပၤအၤဃးန့ၣ် မ့ၢ်ပှၤလၢအအၢအသီတဂၤလီၤ. အဝဲတပာ်ကဲ ယွၤအတၢ်လုၢ်ဟံၣ်ဘၣ် ဒီးကွဲန့ၢ်လွဲန့ၢ် ပှၤဂၤလၢကဘူၣ်ထီၣ်ဘါထီၣ် ယွၤလၢအကမၣ်တဖၣ်စ့ၢ်ကီးလီၤ. စီၤပၤအၤဃး လုၢ်ထီၣ်ဝဲ စီၤဃံးစကံယၤ အဒီပုၢ်ဝဲၢ်တဖၣ်လၢမ့ၣ်အူ ဆူယွၤလၢအကမၣ်တဖၣ်အအိၣ်န့ၣ်လီၤ. ဖဲစီၤဃံးစကံယၤ အနီၢ်ဆံးဒံးအခါ အတၢ်အိၣ်မူန့ၣ် ကပှဲၤဒီးတၢ်သူၣ်ပျံၤသးဖုးလီၤ. —၂ စီၤပၤ ၁၆:၂-၄, ၁၀-၁၇; ၂ ကွဲးနီၣ်တၢ် ၂၈:၁-၃.

တၢး၁၆.၀၂ ၁၁ ¶၉-၁၁

ကွၢ်လိယဟိဝၤယွၤ အတံၤသကိးတဖၣ်တက့ၢ်

^၉ ခီဖျိအပၢ်စီၤအၤဃးပာ်လီၤတၢ်ဒိတၢ်တဲာ်လၢ အတဂ့ၤဘၣ်အဃိ စီၤဃံးစကံယၤ အတၢ်အိၣ်မူကပှဲၤဝဲဒီး တၢ်သးအုး မ့တမ့ၢ် ဘၣ်သ့ၣ်သ့ၣ် ကသးထီၣ်ယဟိဝၤယွၤလီၤ. မုၢ်မဆါတနံၤအံၤ ပှၤတနီၤ လဲၤခီဖျိဘၣ်တၢ်ဒ် စီၤဃံးစကံယၤအသိးလီၤ. အဃိ အဝဲသ့ၣ် “ကဒူးကဒ့ၣ်တၢ်လၢယွၤအလိၤ” မ့တမ့ၢ် သးဆါကစၢ်ယွၤ အတၢ်ကရၢကရိသ့ဝဲန့ၣ်လီၤ. (ကတိၤဒိ ၁၉:၃) ပှၤတနီၤနာ်ဝဲလၢ အဝဲသ့ၣ်ကဲထီၣ် ပှၤအၢပှၤသီ မ့တမ့ၢ် အိၣ်ဒီးလုၢ်လၢ်လၢအတဂ့ၤဘၣ်တဖၣ် မ့ၢ်လၢအဟံၣ်ဖိဃီဖိအဃိန့ၣ်လီၤ. (ယဃ့းစက့လး ၁၈:၂, ၃) ဘၣ်ဆၣ် တၢ်ထံၣ်ဒ်အံၤန့ၣ် မ့ၢ်အဘၣ်ဧါ.

^၁၀ စီၤဃံးစကံယၤ အတၢ်အိၣ်မူ ပာ်ဖျါထီၣ်ဝဲလၢ တၢ်ထံၣ်ဒ်အံၤန့ၣ် တဘၣ်ဘၣ်. အဃိ ပကသးထီၣ် ယဟိဝၤယွၤ အလီၢ်တအိၣ်ဘၣ်. မ့ၢ်လၢကစၢ်ယွၤ တဒုးအိၣ်ထီၣ် တၢ်အၢတၢ်သီလၢ ပှၤဟီၣ်ခိၣ်ဖိအဂီၢ်အဃိလီၤ. (ယိၤဘး ၃၄:၁၀) မိၢ်ပၢ်တဖၣ်သိၣ်လိအဖိတဖၣ်လၢ ကမၤတၢ်ဂ့ၤ မ့တမ့ၢ် ကမၤတၢ်အၢသ့ဝဲလီၤ. (ကတိၤဒိ ၂၂:၆; ကလီးစဲ ၃:၂၁) ဘၣ်ဆၣ် ပကကဲထီၣ် ပှၤဒ်လဲၣ်တဂၤလဲၣ်န့ၣ် တဒိးသန့ၤထီၣ်အသး လၢပဟံၣ်ဖိဃီဖိ အတၢ်အိၣ်သးအဖီခိၣ်ဘၣ်. ဘၣ်မနုၤအဃိလဲၣ်. မ့ၢ်လၢယဟိဝၤယွၤ ဟ့ၣ်ပှၤတၢ်သ့တၢ်ဘၣ် ဒီးတၢ်သဘျ့လၢ ပကဃုထၢမၤတၢ်အဂ့ၤ မ့တမ့ၢ် တၢ်အအၢလီၤ. (၅ မိၤၡ့ ၃၀:၁၉) တၢ်ဟ့ၣ်လၢအလုၢ်ဒိၣ်ပှ့ၤဒိၣ်အံၤ စီၤဃံးစကံယၤသူအီၤဒ်လဲၣ်.

^၁၁ စီၤဃံးစကံယၤ အပၢ်မ့ၢ်ယူဒၤအစီၤပၤလၢ အအၢကတၢၢ်တဂၤ သနာ်က့ အဝဲဒၣ်ကဲထီၣ်စီၤပၤလၢ အဂ့ၤကတၢၢ်တဂၤလီၤ. (ဖး ၂ စီၤပၤ ၁၈:၅, ၆ တက့ၢ်.) အဝဲတလူၤပိာ်ထွဲ အပၢ်အဒိအတဲာ်လၢ အအၢအသီဘၣ်. စီၤဃံးစကံယၤ ဒိကနၣ်ဝဲ ယဟိဝၤယွၤ အဝံတဖၣ် လၢအမ့ၢ် ဝံယၡါယၤ, ဝံမၤလကံ ဒီးဝံဟိၤၡ့ အကလုၢ်လီၤတံၢ်လီၤဆဲးလီၤ. အဝဲဒိကနၣ်ဝဲ ဝံတဖၣ်အံၤ အတၢ်ဟ့ၣ်ကူၣ်ဒီး အတၢ်သိၣ်ဃီၣ်န့ၣ်လီၤ. တၢ်သ့ၣ်တဖၣ်အံၤ ထိၣ်ဟူးထိၣ်ဂဲၤထီၣ်အီၤလၢ ကမၤဘၣ်လိာ်က့ၤ တၢ်ကီတၢ်ခဲတဖၣ်လၢ အပၢ်ဒုးအိၣ်ထီၣ်ဝဲလီၤ. အဝဲမၤကဆှီထီၣ်က့ၤ တၢ်လုၢ်ဟံၣ်, ဃ့ကစၢ်ယွၤလၢ ကပျၢ်ကွံာ် ပှၤဂီၢ်မုၢ်အတၢ်ကမၣ်တဖၣ် ဒီးမၤဟးဂီၤကွံာ် တၢ်ဂီၤတၢ်ဖီၣ်လၢ ထံကီၢ်ဒီဘ့ၣ်အပူၤလီၤ. (၂ ကွဲးနီၣ်တၢ် ၂၉:၁-၁၁, ၁၈-၂၄; ၃၁:၁) လၢခံဖဲအၤၡူၢ် အစီၤပၤစၤနဃ့ရံာ် တဲပျံၤဝဲလၢ ကဟဲဒုးဝ့ၢ်ယရူၤၡလ့ၣ်အခါ အဝဲပာ်ဖျါထီၣ် တၢ်သးဒူဒီး တၢ်နာ်လၢအဆူၣ်လီၤ. အဝဲနာ်ဝဲလၢယဟိဝၤယွၤ ကဒီသဒၢအဝဲသ့ၣ်ဒီး ဟ့ၣ်ဆူၣ်ထီၣ် အပှၤဂီၢ်မုၢ်အဂံၢ်အဘါလီၤ. (၂ ကွဲးနီၣ်တၢ် ၃၂:၇, ၈) ဘၣ်တဘျီ စီၤဃံးစကံယၤ ပာ်ထီၣ်ထီအသး ဘၣ်ဆၣ် ဖဲယဟိဝၤယွၤ သိၣ်ဃီၣ်အီၤအခါ အဝဲအိၣ်ဒီးတၢ်ဆီၣ်လီၤသးလီၤ. (၂ ကွဲးနီၣ်တၢ် ၃၂:၂၄-၂၆) ပသ့ၣ်ညါဘၣ်လၢ စီၤဃံးစကံယၤမ့ၢ် ပှၤဒိဂ့ၤတဲာ်ဘၣ်လၢ ပကကွၢ်လိအဂီၢ်လီၤ. အဝဲတပျဲ အဟံၣ်ဖိဃီဖိ အတၢ်အိၣ်သး ကမၤဟးဂီၤ အတၢ်အိၣ်မူဘၣ်. လၢတၢ်န့ၣ်အလီၢ် စီၤဃံးစကံယၤ ပာ်ဖျါထီၣ်ဝဲလၢ အဝဲမ့ၢ်ယဟိဝၤယွၤ အတံၤသကိးလီၤ.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၁၂ ၂/၁၅ ၂၄-၂၅

စီၤနၤသၣ် ဆီၣ်ထွဲတၢ်ဘူၣ်တၢ်ဘါ အမ့ၢ်အတီ လၢတၢ်သးတီအပူၤ

ဝံနၤသၣ်န့ၣ် အသးတီဒီး ယဟိဝၤယွၤ ဒီးဆီၣ်ထွဲစီၤဒၤဝံး အတၢ်ရဲၣ်တၢ်ကျဲၤလၢကတ့ထီၣ်ဝဲ တၢ်သူၣ်ထီၣ်လၢ တၢ်ဘူၣ်တၢ်ဘါ အမ့ၢ်အတီအဂီၢ်. ဖဲန့ၣ်အခါ တၢ်လၢဝံနၤသၣ် တဲဘၣ်စီၤဒၤဝံးန့ၣ် အိၣ်ဒၣ်အနီၢ်ကစၢ် အတၢ်ထံၣ်လီၤ တမ့ၢ်ယဟိဝၤယွၤ အတၢ်ထံၣ်ဘၣ်. လၢခံဖဲတၢ်တနၤန့ၣ် ယဟိဝၤယွၤတဲဘၣ် ဝံနၤသၣ်လၢ ကတဲဘၣ်စီၤဒၤဝံးလၢ အဝဲတဘၣ်တ့ထီၣ် ယဟိဝၤယွၤ အတၢ်လုၢ်ဟံၣ်ဘၣ်. ပှၤလၢအကဘၣ်တ့ထီၣ် တၢ်လုၢ်ဟံၣ်န့ၣ် မ့ၢ်ဝဲ စီၤဒၤဝံးအဖိခွါ. ဒီးဝံနၤသၣ်တဲဝဲလၢ မ့ၢ်လၢယဟိဝၤယွၤ မၤတ့ၢ်တၢ်အၢၣ်လီၤဒီး စီၤဒၤဝံးအဃိ စီၤဒၤဝံးအလီၢ်ပစိာ်န့ၣ် “ကအိၣ်ဂၢၢ်ဆိးကျၢၤဝဲ လီၤထူလီၤယိာ်.”—၂ မူၤ ၇:၄-၁၆.

ဘၣ်ဃးဒီး ပှၤကတ့ထီၣ် တၢ်လုၢ်ဟံၣ်န့ၣ် ဝံနၤသၣ် အတၢ်ထံၣ်လီၤဆီလိာ်အသးဒီး ကစၢ်ယွၤ. ဘၣ်ဆၣ် အဝဲတကဒူးကဒ့ၣ်တၢ်ဘၣ် အဝဲအိၣ်ဒီးတၢ်ဆီၣ်လီၤသး ဒီးတူၢ်လိာ်ဝဲ ယဟိဝၤယွၤ အတၢ်ဘၣ်သး ဒီးဆီၣ်ထွဲဝဲ. စီၤနၤသၣ် အဒိအတဲာ်န့ၣ် ကဲထီၣ်တၢ်ဒိတၢ်တဲာ် လၢအဂ့ၤ ဖဲကစၢ်ယွၤ ဘှီဘၣ်ထီၣ်က့ၤပှၤအခါ. လၢခံန့ၣ် စီၤနၤသၣ်ကဲဒံးဝံအဃိ ပသ့ၣ်ညါဘၣ်လၢ အဝဲဆဲးဒိးန့ၢ်ဘၣ် ကစၢ်ယွၤ အတၢ်ဘၣ်သးဒံး. လီၤဂာ်လၢ ယဟိဝၤယွၤမၢ ဝံနၤသၣ် ဒီးစီၤကးလၢ ကတဲဘၣ်စီၤဒၤဝံး လၢကကရၢကရိထီၣ်ဝဲ ပှၤအဂၤ ၄,၀၀၀ လၢကမၤတၢ်လၢ တၢ်ဒ့တၢ်အူတကပၤ လၢတၢ်လုၢ်ဟံၣ်အဂီၢ်.—၁ ကွဲး ၂၃:၁-၅; ၂ ကွဲး ၂၉:၂၅.

လါယူၤ ၅-၁၁

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ ကွဲးနီၣ်တၢ် ၃၀-၃၁

“ပအိၣ်ဖှိၣ်တပူၤဃီန့ၣ် ဂ့ၤလၢပဂီၢ်ဒိၣ်မး”

it-1 ၁၁၀၃ ¶၂

စီၤဃံးစကံယၤ

အသးဆူၣ်လၢ တၢ်ဘူၣ်တၢ်ဘါ အမ့ၢ်အတီအဂီၢ်. ဖဲစီၤဃံးစကံယၤ အသးနံၣ်အိၣ် ၂၅ နံၣ်အခါ အဝဲကဲထီၣ်စီၤပၤ ဒီးအဝဲပာ်ဖျါထီၣ် တၢ်သးဆူၣ်လၢ တၢ်ဘူၣ်ထီၣ်ဘါထီၣ် ယဟိဝၤယွၤအဂီၢ် တဘျီဃီ. တၢ်လၢအမၤဝဲ အဆိကတၢၢ်န့ၣ် အဝဲအိးထီၣ်က့ၤ တၢ်လုၢ်ဟံၣ်အတြဲၤတဖၣ် ဒီးဘှီဂ့ၤထီၣ်က့ၤ တၢ်လုၢ်ဟံၣ်. ဒီးအကိးဖှိၣ်ဝဲ ပှၤလုၢ်တၢ်ဒိၣ် ဒီးပှၤလ့ၤဝံဖိတဖၣ် ဒီးတဲဝဲလၢ “ယသးဆူၣ်လၢ ယကမၤ တၢ်အၢၣ်လီၤအီလီၤဒီး” “အံၣ်စရ့လး အကစၢ် ယဟိဝၤယွၤ” လီၤ. တၢ်အၢၣ်လီၤတခါအံၤ မ့ၢ်ဝဲတၢ်အၢၣ်လီၤလၢ ကတီဒီး ကစၢ်ယွၤအဂီၢ်. တၢ်အၢၣ်လီၤအံၤ အိၣ်ပာ်စၢၤ ဖဲကစၢ်ယွၤဟ့ၣ်လီၤဝဲ စီၤမိၤၡ့အတၢ်သိၣ်တၢ်သီ အခါလံ. ဘၣ်ဆၣ် ခီဖျိလၢ ပှၤအံၣ်စရ့လးဖိတဖၣ် တဒိကနၣ်ဝဲဘၣ်အဃိ စီၤပၤက့ၤအၢၣ်လီၤကဒါတဝီ လၢပှၤအံၣ်စရ့လးဖိအဂီၢ်လီၤ. လၢတၢ်သးဆူၣ်အပူၤ စီၤပၤဃံးစကံယၤ ရဲၣ်ကျဲၤဝဲ ပှၤလ့ၤဝံဖိတဖၣ် ဒ်သိးကမၤကဒါက့ၤတၢ်လၢ တၢ်လုၢ်ဟံၣ်အဂီၢ် ဒီးထဲန့ၣ်တကးဒံးဘၣ် အရဲၣ်ကျဲၤစ့ၢ်ကီးတၢ်လၢ တၢ်ဒ့တၢ်အူတဖၣ် ဒီးတၢ်သးဝံၣ်စံးထီၣ်ပတြၢၤ ကစၢ်ယွၤအဂီၢ်. ဖဲလါနံစၣ်န့ၣ် ပှၤကဘၣ်မၤ ဘူၣ်လဲၤကပာ်ဘၣ်ဆၣ် တၢ်လုၢ်ဟံၣ်, ပှၤလုၢ်တၢ်ဒိၣ်တဖၣ် ဒီးပှၤလ့ၤဝံဖိတဖၣ် တကဆှီဒံးဘၣ်. ဖဲလါနံစၣ် ၁၆ သီတုၤဝဲအခါ ပှၤမၤကဆှီတၢ်လုၢ်ဟံၣ်ဝံၤဝဲ ဒီးပှၤပာ်လီၤက့ၤ တၢ်ဖိတၢ်လံၤတဖၣ် ဝံၤဝဲလီၤ. ဖဲန့ၣ်ဝံၤအလီၢ်ခံ ပှၤကဘၣ်မၤ တၢ်မၤဘၣ်လိာ်ဖိးဒ့က့ၤတၢ်လၢ ပှၤအံၣ်စရ့လးဖိတဖၣ်အဂီၢ်. အဆိကတၢၢ် ပဒိၣ်ပပှၢ်သ့ၣ်တဖၣ် ဟဲစိာ်ဝဲ တၢ်လုၢ်သ့ၣ်တဖၣ် ဒ်သိး ကလုၢ်ထီၣ်တၢ်လၢ ထံဖိကီၢ်ဖိအဂီၢ်, တၢ်လုၢ်ဟံၣ်အဂီၢ် ဒီးပှၤခဲလၢာ်အဂီၢ်အဃိ တၢ်လုၢ်တၢ်ပာ်သ့ၣ်တဖၣ် အိၣ်လၢအကထိညါ.—၂ ကွဲး ၂၉:၁-၃၆.

it-1 ၁၁၀၃ ¶၃

စီၤဃံးစကံယၤ

ပှၤယူဒၤဖိတဖၣ် ကဘၣ်မၤဝဲဘူၣ်လဲၤကပာ် ဒ်တၢ်သ့ၣ်နံၤသီအသိးဘၣ်ဆၣ် မ့ၢ်လၢ ပှၤဂီၢ်မုၢ်တဖၣ် တကဆှီဘၣ်အဃိ အဝဲသ့ၣ် မၤဝဲတန့ၢ်ဘၣ်. ဘၣ်ဆၣ် စီၤမိၤၡ့ အတၢ်သိၣ်တၢ်သီ ဟ့ၣ်အခွဲးလၢ ပှၤမ့ၢ်တကဆှီဘၣ်န့ၣ် မၤကဒါက့ၤ လၢခံတလါသ့အဃိ စီၤပၤဃံးစကံယၤ ဟံးန့ၢ်တၢ်ခွဲးတၢ်ယာ် လၢကမၤဝဲဒ်န့ၣ်. အဃိ အဝဲကွဲမုာ်ဝဲ ပှၤယူဒၤဖိ ဒီးပှၤအံၣ်စရ့လးဖိတဖၣ် ခီဖျိလၢလံာ်ပရၢဆူ ဝ့ၢ်ဘ့ၢ်ၡဘၤ တုၤလၢဝ့ၢ်ဒၣ်. ဒီးပှၤလဲၤစိာ်လံာ်ပရၢသ့ၣ်တဖၣ်န့ၣ် ထံၣ်ဘၣ်ဒီး တၢ်မၤကွၢ်အါမံၤ ဘၣ်ဆၣ် ပှၤလၢအအိၣ်လၢ အၤၡ့ၢ်, မနၤၡ့ၤ ဒီးစဘူလိၣ်, အ့ဖရဲၣ် ဒီးယံးစၣ်ကၢ်တနီၤန့ၣ် အိၣ်ဒီးတၢ်ဆီၣ်လီၤသး ဒီးဟဲထီၣ်ဝဲ ဘူၣ်လဲၤကပာ်လီၤ. တကးဒံးဘၣ် ပှၤလၢအတကဲ ပှၤအံၣ်စရ့လးဖိတဖၣ်စ့ၢ်ကီး ဟဲထီၣ်ဝဲလီၤ. ပှၤလၢအအိၣ်လၢ ကလံၤစိးအဘီအမုၢ် လၢအဘူၣ်ထီၣ်ဘါထီၣ် ယဟိဝၤယွၤ သ့ၣ်တဖၣ်န့ၣ် ကထံၣ်ဘၣ် တၢ်ကီတၢ်ခဲ ဒ်ပှၤလဲၤစိာ် လံာ်ပရၢတဖၣ်အသိး. ခီဖျိလၢ အဝဲသ့ၣ်အိၣ်လၢ ထံကီၢ်လၢ ပှၤအါတက့ၢ်န့ၣ် ဘူၣ်ထီၣ်ဘါထီၣ်ဝဲ ယွၤလၢအကမၣ် တကးဒံးဘၣ် ပှၤအၤၡူၢ်ဖိ မၤနၢၤအီၣ်ဃီၣ် အဝဲသ့ၣ်အဃိ အဝဲသ့ၣ် ကထံၣ်ဘၣ်ဒီး တၢ်ထီဒုၣ်ထီဒါ ဒီးပှၤကတဲဟးဂီၤ အဝဲသ့ၣ်.—၂ ကွဲး ၃၀:၁-၂၀; ၄ မိၤ ၉:၁၀-၁၃.

it-1 ၁၁၀၃ ¶၄-၅

စီၤဃံးစကံယၤ

ဖဲပှၤမၤ ဘူၣ်လဲၤကပာ် ဝံၤအလီၢ်ခံ ပှၤဆဲးမၤဝဲ ဘူၣ်ကိၣ်လၢအတပၣ်ဒီး ကိၣ်မံၣ်ဘၣ်နွံသီ. ဒီးခီဖျိလၢ ပှၤဂီၢ်မုၢ်တဖၣ် ပှဲၤဒီးတၢ်သူၣ်ဖှံသးညီအဃိ တၢ်အိၣ်ဖှိၣ်ဒီတဖု ဆၢတဲာ်ဝဲလၢ ကမၤအါထီၣ်ဝဲ နွံသီလီၤ. ဒီးဖဲန့ၣ် အဆၢကတီၢ်န့ၣ် အဝဲသ့ၣ်အိၣ်မူဘၣ် တၢ်ဆၢကတီၢ်န့ၣ် ကီကီခဲခဲဘၣ်ဆၣ် ခီဖျိလၢ ယဟိဝၤယွၤ ဆိၣ်ဂ့ၤအဝဲသ့ၣ် အဃိ “စးထီၣ်လၢ အံၣ်စရ့လး အစီၤပၤဒၤဝံး အဖိခွါ စီၤၡလိၤမိၤ ပၢတၢ်အခါ တုၤလၢခဲအံၤန့ၣ် တၢ်တကဲထီၣ်အသးဒ်အံၤလၢ ဝ့ၢ်ယရူၤၡလ့ၣ်အပူၤ နီတဘျီဘၣ်. အဃိ တၢ်သးခုဖးဒိၣ် အိၣ်ထီၣ်ဝဲလၢ ဝ့ၢ်ယရူၤၡလ့ၣ်အပူၤလီၤ.”—၂ ကွဲး ၃၀:၂၁-၂၇.

ဖဲပှၤအံၣ်စရ့လးဖိတဖၣ် ဒီးပှၤယူဒၤဖိတဖၣ် ဟဲထီၣ်ဝဲ ဘူၣ်လဲၤကပာ်ဝံၤအလီၢ်ခံ အဝဲသ့ၣ် မၤဟးဂီၤကွံာ်ဝဲ လၢၢ်ထူၣ်စီဆှံတဖၣ်, တၢ်လီၢ်ထီၣ်ထီတဖၣ်, တၢ်လုၢ်လီၢ်တဖၣ် ဒီးတၢ်စီဆှံအထူၣ်တဖၣ်. (၂ ကွဲး ၃၁:၁) အဃိ အဝဲသ့ၣ် မၤဝဲဘူၣ်ဒ်အံၤန့ၣ် တမ့ၢ်ထဲလၢ အဝဲသ့ၣ် ပာ်ဖှိၣ်ထီၣ်အသးလၢ ကမၤတၢ်သူၣ်ဖှံသးညီအဂီၢ်ဘၣ်, အဝဲသ့ၣ် ဒုးအိၣ်ထီၣ်က့ၤဝဲ တၢ်ဘူၣ်တၢ်ဘါ အမ့ၢ်အတီနီၢ်ကီၢ်. စီၤပၤဃံးစကံယၤန့ၣ် ပာ်လီၤဝဲ ဒိဂ့ၤတဲာ်ဘၣ် ခီဖျိမၤသဘှံးက့ၤဝဲ ဂုၢ်တိၢ်ဘီတဘိ လၢစီၤမိၤၡ့တ့ဝဲ, မ့ၢ်လၢ ပှၤဂီၢ်မုၢ်တဖၣ်န့ၣ် ဘူၣ်ထီၣ်ဘါထီၣ်ဝဲ ဒ်တၢ်ဂီၤတၢ်ဖှီၣ် ဒီးအဝဲသ့ၣ် လဲၤလုၢ်ထီၣ်တၢ်လၢ ဂုၢ်တဘိန့ၣ်အအိၣ် အဃိလီၤ. (၂ စီၤပၤ ၁၈:၄) ဖဲဘူၣ်ဖးဒိၣ် ဝံၤအလီၢ်ခံန့ၣ် စီၤဃံးစကံယၤ မၤဝဲဒ်သိး တၢ်ဘူၣ်တၢ်ဘါ အစီအဆှံအံၤ ကဆဲးအိၣ်ဝဲအဂီၢ်. အဝဲရဲၣ်လီၤကျဲၤလီၤဝဲ ပှၤလုၢ်တၢ်ဒိၣ်တဖၣ် ဒ်သိးပှၤဆဲးမၤတၢ်လၢ တၢ်လုၢ်ဟံၣ်ပူၤကသ့အဂီၢ်. ထဲန့ၣ်တကးဒံးဘၣ် အဟ့ၣ်ဂံၢ်ဟ့ၣ်ဘါ ပှၤဂီၢ်မုၢ်တဖၣ်လၢ ကဒိကနၣ်ဝဲ တၢ်သိၣ်တၢ်သီလၢအမ့ၢ် ကဘၣ်ဟ့ၣ် တၢ်ဆံဆဲၣ်ပူ ဒီးတၤသၣ်ဆိ လၢပှၤလ့ၤဝံဖိ ဒီးပှၤလုၢ်တၢ်ဒိၣ်တဖၣ်အဂီၢ်. ဒီးပှၤဂီၢ်မုၢ်တဖၣ်န့ၣ် ဒိကနၣ်ဝဲ လၢအသးဒီဖျၢၣ်လီၤ.—၂ ကွဲး ၃၁:၂-၁၂.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၁၈.၀၉ ၆ ¶၁၄-၁၅

“တၢ်န့ၣ်တဖၣ် သုမ့ၢ်သ့ၣ်ညါဒီးသုမ့ၢ်မၤအီၤဒီး, သုဘၣ်ဆိၣ်ဂ့ၤသုဝဲလီၤ”

^၁၄ ဒီးကျဲအဂၤတဘိလၢ ပပာ်ဖျါထီၣ်လၢ ပအိၣ်ဒီးတၢ်ဆီၣ်လီၤသးန့ၣ် မ့ၢ်ဝဲပဒိကနၣ်တၢ်ဂ့ၤဂ့ၤလီၤ. ယၤကိာ် ၁:၁၉ တဲဝဲလၢ “မ်ပှၤနၢ်ဟူတၢ်ချ့သဒံး” တက့ၢ်. ယဟိဝၤယွၤ မ့ၢ်ပှၤဒိကနၣ်တၢ် လၢအဂ့ၤကတၢၢ်တဂၤလီၤ. (၁ မိၤၡ့ ၁၈:၃၂; ယိၤၡူ ၁၀:၁၄) အဒိ ဖးကွၢ်တၢ်ကတိၤသကိးတၢ်ဖဲ ၂ မိၤၡ့ ၃၂:၁၁-၁၄ အပူၤတက့ၢ်. (ဖးတက့ၢ်.) နီၢ်နီၢ်န့ၣ် ဖဲစီၤမိၤၡ့တဲဖျါထီၣ် အတၢ်ထံၣ်အခါ ယဟိဝၤယွၤတလိၣ်ဒိကနၣ်ဝဲဘၣ်. ဘၣ်ဆၣ် ယဟိဝၤယွၤဟ့ၣ်အခွဲးလၢ စီၤမိၤၡ့ကတဲဖျါထီၣ် အတၢ်တူၢ်ဘၣ်လီၤ. ပှၤလၢအကမၣ်တ့ၢ်ဝဲလၢညါတဂၤ မ့ၢ်ဟ့ၣ်ကူၣ်နၤန့ၣ် မ့ၢ်နကဒိကနၣ်အီၤလၢ တၢ်သးစူၤအပူၤ ဒီးမၤထွဲ အတၢ်ဟ့ၣ်ကူၣ်ဧါ. ဘၣ်ဆၣ် မ့ၢ်မ့ၢ်ယဟိဝၤယွၤန့ၣ် ဒိကနၣ်ဝဲ ပှၤလၢအဃ့ဘါထုကဖၣ်တၢ်လၢ တၢ်နာ်အပူၤ ကိးဂၤဒဲးလီၤ.

^၁၅ သံကွၢ်လီၤနသးလၢ ‘ယဟိဝၤယွၤ မ့ၢ်အိၣ်ဒီးတၢ်ဆီၣ်လီၤသး ဒီးဒိကနၣ်ဝဲ ပှၤဟီၣ်ခိၣ်ဖိတဖၣ်ဒ် အဒိကနၣ်ဝဲ စီၤအၤဘြၤဟၣ်, နီၢ်ရၤဃ့လး, စီၤမိၤၡ့, စီၤယိၤၡူ, စီၤမၤနိ, စီၤအ့ၤလံယၤ ဒီးစီၤဃံးစကံယၤအသိးန့ၣ် ယတကြၢးမၤဒ်န့ၣ်ဘၣ်ဧါ. မ့ၢ်ယပာ်ဖျါအါထီၣ် တၢ်ယူးယီၣ်ပာ်ကဲ ယဒီပုၢ်ဝဲၢ်ကိးဂၤဒဲး ခီဖျိယဒိကနၣ် အဝဲသ့ၣ်အတၢ်ဟ့ၣ်ကူၣ်ဒီး မၤထွဲအီၤတသ့ဖဲအသ့န့ၣ်ဧါ. လၢယတၢ်အိၣ်ဖှိၣ်အပူၤ မ့တမ့ၢ် လၢယဟံၣ်ဖိဃီဖိအပူၤ ပှၤလၢယကဘၣ်ပာ်ဖျါအါထီၣ် တၢ်သူၣ်အိၣ်သးအိၣ်န့ၣ် မ့ၢ်အအိၣ်ဧါ. မ့ၢ်အိၣ်န့ၣ် ယကဘၣ်မၤအီၤဒ်လဲၣ်.’—၁ မိၤၡ့ ၃၀:၆; စံၣ်ညီၣ်ကွီၢ် ၁၃:၉; ၁ စီၤပၤ ၁၇:၂၂; ၂ ကွဲးနီၣ်တၢ် ၃၀:၂၀.

တၢး၁၉.၀၁ ၁၁-၁၃ ¶၁၃-၁၈

^၁၃ တၢ်ဟ့ၣ်ကူၣ်မနုၤတဖၣ် ကမၤစၢၤနၤဒ်သိး နဟ့ၣ်တၢ်စံးဆၢလၢ အကဲထီၣ်တၢ်ဂံၢ်တၢ်ဘါ ကသ့အဂီၢ်လဲၣ်. ပကမၤလိသကိး တၢ်ဟ့ၣ်ကူၣ်တနီၤလီၤ.

^၁၄ ကတဲာ်ကတီၤ နသးလၢ တၢ်အိၣ်ဖှိၣ်အဂီၢ်တက့ၢ်. နမ့ၢ်ကတဲာ်ကတီၤဆိပာ်စၢၤနသး ဂ့ၤဂ့ၤန့ၣ် နကဟ့ၣ်တၢ်စံးဆၢအဂီၢ် နတသးကနိးအါအါလၢၤဘၣ်. (ကတိၤဒိ ၂၁:၅) ပဝဲတဂၤဒီးတဂၤ ပပာ်လီၤဃာ် တၢ်ဆၢကတီၢ်လၢ ပကတဲာ်ကတီၤပသးလၢ တၢ်အိၣ်ဖှိၣ်အဂီၢ်န့ၣ် တဒ်သိးလိာ်အသးဘၣ်. ဒီပုၢ်ဝဲၢ်မုၣ်အဲဝံၤ လၢအမ့ၢ်မုၣ်ကမဲ ဒီးအသးအိၣ်အနံၣ် ၈၀ န့ၣ် ကတဲာ်ကတီၤဝဲ တၢးထီခိးတၢ် တၢ်မၤလိ ဖဲနွံစးထီၣ်အသးန့ၣ်လီၤ. အဝဲတဲဝဲလၢ “ယမ့ၢ်ကတဲာ်ကတီၤဆိပာ်စၢၤယသးန့ၣ် ယထီၣ်တၢ်အိၣ်ဖှိၣ် မုာ်ဒိၣ်တစဲးလီၤ.” ကၠဝဲ လၢအမၤတၢ်လၢ ဆၢကတီၢ်လၢပှဲၤန့ၣ် ပာ်လီၤဃာ်တၢ်ဆၢကတီၢ်လၢ ကမၤလိ တၢးထီခိးတၢ် လၢမုၢ်ဃုနံၤန့ၣ်လီၤ. အဝဲတဲဝဲလၢ “ယမၤလိဆိပာ်စၢၤတၢ်ဂ့ၢ် တချုးဖဲတၢ်အိၣ်ဖှိၣ်ထီၣ်ဒံးဘၣ် တသီအဃိ ဖဲယလဲၤထီၣ်တၢ်အိၣ်ဖှိၣ်အခါ ယတသးပ့ၤနီၣ်ကွံာ်ဘၣ်.” ဒီးအဲကဲၤ လၢအမ့ၢ် တၢ်အိၣ်ဖှိၣ်သးပှၢ် ဒီးပှၤလဲၤလၢညါလၢ အတၢ်မၤအါတဂၤန့ၣ် တဲဝဲလၢ “ယကမၤလိတၢ်ဂ့ၢ်ခဲလၢာ် တဘျီဃီအလီၢ် တနွံအတီၢ်ပူၤ ယမ့ၢ်မၤလိတၢ်ဂ့ၢ် တဘျီတစဲးတဘျီတစဲးန့ၣ် ယမၤအီၤ မုာ်ဒိၣ်မးလီၤ.”

^၁၅ ဖဲပကတဲာ်ကတီၤပသးလၢ တၢ်အိၣ်ဖှိၣ်အဂီၢ်အခါ ပကဘၣ်မၤတၢ်မနုၤလဲၣ်. တချုးလၢ နစးထီၣ်မၤလိတၢ်ဒံးဘၣ်န့ၣ် ဃ့ယဟိဝၤယွၤ အသးစီဆှံတက့ၢ်. (လူၤကၣ် ၁၁:၁၃; ၁ ယိၤဟၣ် ၅:၁၄) နဃ့ဘါထုကဖၣ် မ့ၢ်ဝံၤန့ၣ် ဟံးန့ၢ်တၢ်ဆၢကတီၢ် စှၤကိာ်မံးနံးဒီး ဖးကွၢ်တၢ်ဂ့ၢ်တၢ်ကျိၤတဖၣ် တစဲးတမွဲး. သမံသမိးကွၢ် တၢ်မၤလိအခိၣ်တီ, အခိၣ်တီဖိတဖၣ်, တၢ်အဒိတဖၣ် ဒီးတၢ်လွံၢ်နၢၣ်တဖၣ်. နမၤဒ်န့ၣ်ဝံၤ ဒီးဖဲနစးထီၣ်မၤလိ လံာ်အဆၢ တဆၢဘၣ်တဆၢအခါ တသ့ဖဲအသ့ ဖးလံာ်စီဆှံအဆၢတဖၣ်အါအါတက့ၢ်. ဒီးဆိကမိၣ်ထံ တၢ်ဂ့ၢ်တၢ်ကျိၤတဖၣ် လီၤဆီဒၣ်တၢ် ဆိကမိၣ်ထံ တၢ်ဂ့ၢ်တၢ်ကျိၤလၢ နအဲၣ်ဒိးဟ့ၣ် တၢ်စံးဆၢန့ၣ်တက့ၢ်. နမ့ၢ်ကတဲာ်ကတီၤဆိပာ်စၢၤနသး ဂ့ၤဂ့ၤန့ၣ် နကဒိးန့ၢ်ဘၣ်အဘျုးအါထီၣ် ဒီးနကဟ့ၣ်တၢ်စံးဆၢအဂီၢ် ကညီထီၣ်လၢနဂီၢ်လီၤ.—၂ ကရံၣ်သူး ၉:၆.

^၁၆ မ့ၢ်သ့န့ၣ် သူအံၣ်လဲးထြီနံး အကျိၤအကျဲတဖၣ် လၢနကျိာ်တက့ၢ်. ယဟိဝၤယွၤသူဝဲ အတၢ်ကရၢကရိဒီး ဟ့ၣ်လီၤပှၤ အံၣ်လဲးထြီနံး အကျိၤအကျဲတဖၣ် ဒ်သိးကကဲထီၣ်တၢ်မၤစၢၤလၢ ပကကတဲာ်ကတီၤပသးလၢ တၢ်အိၣ်ဖှိၣ်အဂီၢ်လီၤ. JW Library^® app မၤစၢၤပှၤဒ်သိး ပဒီလိး လံာ်လဲၢ်လၢတၢ်မၤလိအဂီၢ် လၢအံၣ်လဲးထြီနံး တၢ်ပီးတၢ်လီတဖၣ်အပူၤ ကန့ၢ်အဂီၢ်လီၤ. အဃိ ပမၤလိ, ပဖးအီၤ မ့တမ့ၢ် ပဒိကနၣ်အီၤလၢ တၢ်လီၢ်ကိးပူၤဒဲး ဒီးကိးဆၢကတီၢ်ဒဲးသ့လီၤ. ပှၤတနီၤနီၤန့ၣ် ဖဲအဝဲသ့ၣ် အိၣ်ဘှံးလၢ မုၢ်ထူၣ်ခါ လၢတၢ်မၤလီၢ် မ့တမ့ၢ် လၢကၠိ မ့တမ့ၢ် ဖဲအလဲၤတၢ်က့ၤတၢ်အဆၢကတီၢ် သူဝဲတၢ်ပီးတၢ်လီအံၤ လၢကမၤလိတၢ်အဂီၢ်လီၤ. The Watchtower Library and the Watchtower ONLINE LIBRARY™ မၤစၢၤပှၤဒ်သိး ပဃုသ့ၣ်ညါတၢ်ဂ့ၢ်လၢ ပအဲၣ်ဒိးသ့ၣ်ညါတဖၣ် ကသ့ဝဲညီညီဖိအဂီၢ်လီၤ.

^၁၇ မ့ၢ်သ့န့ၣ် ကတဲာ်ကတီၤဆိပာ်စၢၤ တၢ်စံးဆၢ အါအါတက့ၢ်. ဘၣ်မနုၤအဃိလဲၣ်. မ့ၢ်လၢ ဖဲနယူာ်ထီၣ်နစုအခါ ပှၤတကိးထီၣ်နၤကိးဘျီဒဲးဘၣ်. ဖဲနယူာ်ထီၣ်နစုအခါ ပှၤအဂၤစ့ၢ်ကီး ကယူာ်ထီၣ်အစုအဃိ ပှၤလၢအဖီၣ်မူဒါတဂၤ ကဘၣ်ဃုထၢဝဲလၢ အကကိးထီၣ် မတၤလဲၣ်န့ၣ်လီၤ. ဒ်သိးတၢ်ဆၢကတီၢ် သုတတလၢတဂ့ၤအဂီၢ် ပှၤဖီၣ်မူဒါတဂၤန့ၣ် ကပာ်ပနီၣ်ဃာ်ဝဲလၢ တၢ်ဂ့ၢ်တနီၤန့ၣ် ပှၤဟ့ၣ်တၢ်စံးဆၢ ကသ့ပှဲၤဂၤလဲၣ်န့ၣ်လီၤ. ဒီးဖဲပှၤစးထီၣ်မၤလိတၢ်အခါ နမ့ၢ်ယူာ်ထီၣ်နစုဒီး ပှၤမ့ၢ်တကိးနၤဘၣ်န့ၣ် တဘၣ်သးထီၣ်တၢ် မ့တမ့ၢ် သးဟးဂီၤတဂ့ၤ. ဒီးနမ့ၢ်ကတဲာ်ကတီၤပာ်စၢၤ တၢ်စံးဆၢအါအါန့ၣ် နကအိၣ်ဒီးတၢ်ခွဲးတၢ်ယာ်အါမးလၢ နကဟ့ၣ်တၢ်စံးဆၢအဂီၢ်လီၤ. တၢ်စံးဆၢလၢ နကတဲာ်ကတီၤတဖၣ်အကျါန့ၣ် ကပၣ်ဃုာ်ဒီး နကဖးလံာ်စီဆှံအဆၢလီၤ. ဘၣ်ဆၣ် မ့ၢ်သ့န့ၣ် ဟ့ၣ်ထီၣ်တၢ်စံးဆၢလၢ နနီၢ်ကစၢ်အတၢ်ကတိၤ စ့ၢ်ကီးတက့ၢ်.

^၁၈ ဟ့ၣ်တၢ်စံးဆၢ ဖုၣ်ကိာ်တက့ၢ်. တၢ်စံးဆၢလၢ အကဲထီၣ်တၢ်ဂံၢ်တၢ်ဘါ အဒိၣ်ကတၢၢ်န့ၣ် မ့ၢ်ဝဲတၢ်စံးဆၢ ယိယိဖိဒီး ဖုၣ်ဖုၣ်ဖိလီၤ. လၢတၢ်န့ၣ်အဃိ ပာ်လီၤဖီတၢၣ်လၢ နကဟ့ၣ်တၢ်စံးဆၢ ဖုၣ်ဖုၣ်ဖိန့ၣ်တက့ၢ်. တဘၣ်ဟ့ၣ်တၢ်စံးဆၢ ယံာ်န့ၢ်ဒံး အစဲးကိာ် ၃၀ တဂ့ၤ. (ကတိၤဒိ ၁၀:၁၉; ၁၅:၂၃) နမ့မ့ၢ်ပှၤလၢ အဟ့ၣ်တၢ်စံးဆၢ အိၣ်လံအနံၣ်အါမးလံန့ၣ် အရ့ဒိၣ်ဒိၣ်မးလၢ နကပာ်လီၤဒိဂ့ၤတဲာ်ဘၣ် လၢတၢ်ဟ့ၣ်တၢ်စံးဆၢ ဖုၣ်ဖုၣ်ဖိလီၤ. နမ့ၢ်တဲတၢ်ဂ့ၢ်တဘျုးမံၤ လၢကယံာ်ဝဲ တဘျုးမံးနံးန့ၣ် ဘၣ်သ့ၣ်သ့ၣ် ပှၤဂၤတဖၣ် ကဘၣ်ယိၣ်တၢ် ဒီးကတူၢ်ဘၣ်ဝဲလၢ အဝဲသ့ၣ်တအိၣ်ဒီး တၢ်သ့တၢ်ဘၣ်လၢ ကဟ့ၣ်တၢ်စံးဆၢဒ်သိးဒီးနၤဘၣ်. နမ့ၢ်ဟ့ၣ်တၢ်စံးဆၢ ဖုၣ်ဖုၣ်ဖိန့ၣ် တၢ်ဆၢကတီၢ်ကအိၣ်လၢ ပှၤဂၤတဖၣ်စ့ၢ်ကီး ကဟ့ၣ်တၢ်စံးဆၢအဂီၢ်လီၤ. လီၤဆီဒၣ်တၢ် ပှၤမ့ၢ်ကိးနၤလၢ အဆိကတၢၢ်န့ၣ် ဟ့ၣ်တၢ်စံးဆၢလိၤလိၤ လၢအဘၣ်ထွဲဒီးတၢ်သံကွၢ် ဒီးယိယိဖိန့ၣ်တက့ၢ်. တဘၣ်စံးဆၢ တၢ်ဂ့ၢ်ကိးထံၣ်ဒဲးလၢ လံာ်အဆၢပူၤန့ၣ်တဂ့ၤ. ပှၤတဲသကိး တၢ်ဂ့ၢ်မိၢ်ပှၢ်လၢ လံာ်အဆၢအပူၤ မ့ၢ်ဝံၤန့ၣ် နစံးဆၢအါထီၣ် ဘၣ်ဃးဒီး တၢ်ဂ့ၢ်အဂၤတဖၣ်သ့ဝဲလီၤ.—ကွၢ်တၢ်လွံၢ်နၢၣ်လၢအမ့ၢ် “ယဟ့ၣ်တၢ်စံးဆၢ ကသ့ဒ်လဲၣ်.”

လါယူၤ ၁၂-၁၈

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ ကွဲးနီၣ်တၢ် ၃၂-၃၃

“ဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါတဖၣ် ဖဲဘၣ်ကီဘၣ်ခဲ အဆၢကတီၢ်”

it-1 ၂၀၄ ¶၅

အၤၡူၢ်

စၤနဃ့ရံာ်. စီၤစၤနဃ့ရံာ်န့ၣ် မ့ၢ်ဝဲဒၣ် စၤရကိၣ် ၂ ဂၤတဂၤ အဖိခွါ. အဝဲဟဲဒုးဝဲ ယူၤဒၤအဘီအမုၢ် ဖဲစီၤဃံးစကံယၤ ပၢတၢ် ၁၄ နံၣ်တနံၣ်အခါ. (ချ.ခ.န ၇၃၂) (၂ စီၤပၤ ၁၈:၁၃; ၡါ ၃၆:၁) စီၤဃံးစကံယၤ အပါစီၤအၤဃးန့ၣ် မၤဝဲအၤၡူၢ်အစီၤပၤ အတၢ် ဘၣ်ဆၣ် မ့မ့ၢ် စီၤဃံးစကံယၤန့ၣ် ထီဒါက့ၤဝဲ အၤၡူၢ်. (၂ စီၤပၤ ၁၈:၇) အဃိ စီၤစၤနဃ့ရံာ် ဟဲဒုးဝဲယူဒၤ ဒီးမၤနၢၤဝဲ ဝ့ၢ် ၄၆ ဝ့ၢ်. (ထိၣ်သတြီၤဒီး ၡါ ၃၆:၁, ၂) ဒီးအဝဲလဲၤဆီလီၤအဒဲလၢ ဝ့ၢ်လၤကံၣ် ဒီးဃ့ဝဲ စီၤဃံးစကံယၤလၢ စ့အတၤလၣ် ၃၀ (၁၁,၅၆၀,၀၀၀ ဒီၤလၤဃၣ်ဃၣ်) ဒီးစ့ညၣ်အတၤလၣ် ၃၀၀ (၁,၉၈၂,၀၀၀ ဒီၤလၤဃၣ်ဃၣ်) လီၤ. (၂ စီၤပၤ ၁၈:၁၄-၁၆; ၂ ကွဲး ၃၂:၁; ထိၣ်သတြီၤဒီး ၡါ ၈:၅-၈) စီၤဃံးစကံယၤ ဟ့ၣ်အီၤ တၢ်လၢအဃ့ဝဲ ဘၣ်ဆၣ် စီၤစၤနဃ့ရံာ် ဆှၢလီၤအပျဲၢ် ဒ်သိး ကဟဲတဲဘၣ် စီၤဃံးစကံယၤလၢ ကဟ့ၣ်လီၤကွံာ် ဝ့ၢ်ယရူၤၡလ့ၣ် လၢအစုပူၤ. (၂ စီၤပၤ ၁၈:၁၇–၁၉:၃၄; ၂ ကွဲး ၃၂:၂-၂၀) အဃိ လၢတနၤအတီၢ်ပူၤ ယဟိဝၤယွၤ မၤသံကွံာ်ဝဲ အသုးဖိ ၁၈၅,၀၀ ဒီးပှၤအၤၡူၢ်ဖိတဖၣ် က့ၤကဒါက့ၤလၢ ဝ့ၢ်နံၤနဝ့လီၤ. (၂ စီၤပၤ ၁၉:၃၅, ၃၆) လၢခံ စီၤစၤနဃ့ရံာ်န့ၣ် အဖိခွါခံဂၤ မၤသံက့ၤအီၤ ဒီးလၢခံန့ၣ် အဖိခွါ စီၤအ့ၤစၢ်ဃးဒိၣ် ထီၣ်ကဒါက့ၤလၢအလီၢ်လီၤ. (၂ စီၤပၤ ၁၉:၃၇; ၂ ကွဲး ၃၂:၂၁, ၂၂; ၡါ ၃၇:၃၆-၃၈) စီၤစၤနဃ့ရံာ် ဒီးစီၤအ့ၤစၢ်ဃးဒိၣ် အလၢၢ်ထူၣ်လိၤန့ၣ် အဝဲသ့ၣ် ကွဲးဖျါဝဲ တၢ်ဂ့ၢ်သ့ၣ်တဖၣ်အံၤခဲလၢာ် ဘၣ်ဆၣ် ဘၣ်ဃးဒီး တၢ်ဂ့ၢ်လၢ ပှၤအၤၡူၢ်ဖိ အသုးမုၢ်တဖၣ် ဘၣ်တၢ်မၤဟးဂီၤအီၤအဂ့ၢ်န့ၣ် အဝဲသ့ၣ် တကွဲးဖျါထီၣ်ဝဲဘၣ်.—PICTURES, Vol. 1, p. 957.

တၢး၁၃ ၁၁/၁၅ ၁၉ ¶၁၂

ပှၤကွၢ်သိ လၢအမ့ၢ်ပှၤခိၣ်ပှၤနၢ်နွံဂၤ ဃိးဂၤန့ၣ် မၤစၢၤပှၤဒ်လဲၣ်

^၁၂ ယဟိဝၤယွၤန့ၣ် ထီဘိအသးအိၣ်မၤစၢၤပှၤ တၢ်လၢပမၤအီၤတသ့ သ့ၣ်တဖၣ်. ဘၣ်ဆၣ် အဝဲအဲၣ်ဒိးလၢ ပကမၤ တၢ်လၢပမၤအီၤသ့သ့ၣ်တဖၣ် အဒိ စီၤပၤဃံးစကံယၤန့ၣ် တၢၣ်ပီၣ်ဒီး “အပဒိၣ်ဖးဒိၣ်တဖၣ် ဒီးအသုးဖိလၢ အဂံၢ်ဆူၣ်ဘါဆူၣ်တဖၣ်.” ဝံၤဒီး အဝဲသ့ၣ်ဆၢတဲာ်လီၤအသးလၢ “အကဆွံတံာ် ထံထီၣ်ပၢၢ်တဖၣ်လၢ အအိၣ်ဝဲလၢ ဝ့ၢ်ချၢ . . . တကးဒံးဘၣ် လၢတၢ်သူၣ်ဆူၣ်သးဆူၣ်အပူၤ စီၤပၤတ့ထီၣ်က့ၤ ဝ့ၢ်ဒူၣ်လၢ အဟးဂီၤပာ်စၢၤဝဲ ခဲလၢာ်, တ့ထီၣ်တၢးတဖၣ်လၢ ဝ့ၢ်ခိၣ်ဒူအလိၤ ဒီးအဝဲတ့ထီၣ်တၢ်ဒူၣ်လၢ တၢ်ချၢတခါလီၤ. . . . ဒီးတ့ထီၣ်တၢ်စုကဝဲၤ ဒီးကတီၤဒီဒူၣ်လီၤ.” (၂ ကွဲး ၃၂:၃-၅) ဒ်သိး ယဟိဝၤယွၤ ကဒီသဒၢ ဒီးကအံးထွဲကွၢ်ထွဲ အပှၤဂီၢ်မုၢ် ဖဲန့ၣ်အဆၢကတီၢ်အဂီၢ် ယဟိဝၤယွၤသူဝဲ ပှၤလၢအသးဒူတဖၣ် ဒ်သိးဒီး စီၤဃံးစကံယၤ, ပဒိၣ်တဖၣ် ဒီးဝံလၢအနီၢ်သးဆူၣ်တဖၣ်.

တၢး၁၃ ၁၁/၁၅ ၁၉ ¶၁၃

ပှၤကွၢ်သိ လၢအမ့ၢ်ပှၤခိၣ်ပှၤနၢ်နွံဂၤ ဃိးဂၤန့ၣ် မၤစၢၤပှၤဒ်လဲၣ်

^၁၃ တၢ်လၢစီၤပၤဃံးစကံယၤ မၤဝဲလၢခံတခါန့ၣ် အဘျုးအဖှိၣ် အိၣ်ဒိၣ်န့ၢ်ဒံး အဆွံတံာ်ဃာ် ထံထီၣ်ပၢၢ်တဖၣ် ဒီးအမၤကျၢၤထီၣ်ဝဲ ဝ့ၢ်အဒူၣ်တဖၣ်. ဒ်အမ့ၢ် ပှၤလၢအတီခိၣ်ရိၤမဲတၢ် လၢအဂ့ၤတဂၤအသိး အကိးဖှိၣ်ဝဲ ပှၤဂီၢ်မုၢ်တဖၣ် ဒီးဟ့ၣ်ဂံၢ်ဟ့ၣ်ဘါ အဝဲသ့ၣ် လၢနီၢ်သးတခီ ဒီးတဲအဝဲသ့ၣ်လၢ “တဘၣ်ပျံၤ ကီၢ်အၤၡူၢ် အစီၤပၤ . . . တဂ့ၤ. ပှၤလၢအအိၣ်ဒီးပှၤန့ၣ် အိၣ်အါန့ၢ်ဒံး ပှၤလၢအိၣ်ဒီးအီၤလီၤ. အဝဲသန့ၤအသးလၢ ပှၤကညီ အတၢ်ဂံၢ်တၢ်ဘါ မ့မ့ၢ်ပဝဲန့ၣ် ပအိၣ်ဒီး ပကစၢ်ယဟိဝၤယွၤ လၢအကမၤစၢၤပှၤ ဒီးဒုးန့ၢ်တၢ်လၢ ပဂီၢ်လီၤ.” အဃိ ဖဲအံၤ ပာ်ဖျါထီၣ်န့ၢ်ဝဲလၢ ယဟိဝၤယွၤ ကဒုးတၢ်လၢ အပှၤဂီၢ်မုၢ်အဂီၢ်အဃိ ဖဲပှၤယူဒၤဖိတဖၣ် နၢ်ဟူဝဲဒ်န့ၣ်အခါ အဂံၢ်ကထီၣ် ဖးဒိၣ်ညါနီၤ. ဖဲအံၤ လံာ်စီဆှံတဲဝဲလၢ “ပှၤဂီၢ်မုၢ် န့ၢ်ဂံၢ်န့ၢ်ဘါလၢ ယူဒၤအစီၤပၤဃံးစကံယၤ အတၢ်ကတိၤတဖၣ်အဃိလီၤ.” ဖဲအံၤ ပထံၣ်ဘၣ်လၢ ပှၤဂီၢ်မုၢ်တဖၣ် အဂံၢ်အဘါထီၣ် ခီဖျိလၢ “စီၤပၤဃံးစကံယၤ အတၢ်ကတိၤတဖၣ်အဃိလီၤ.” စီၤဃံးစကံယၤ ဒီးအပဒိၣ်သ့ၣ်တဖၣ် ဒီးပှၤလၢအဂံၢ်ဆူၣ်ဘါဆူၣ် ဒီးဝံမံကၤ ဒီးဝံယၡါယၤန့ၣ် အဝဲသ့ၣ် ကဲဝဲပှၤကွၢ်သိလၢ အဂ့ၤသ့ၣ်တဖၣ် ဒ်ယဟိဝၤယွၤ တဲဆိပာ်စၢၤ ခီဖျိလၢ အဝံတဂၤ အဃိလီၤ.—၂ ကွဲး ၃၂:၇, ၈; ဖး မံကၤ ၅:၅, ၆.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၂၁.၁၀ ၄-၅ ¶၁၁-၁၂

တၢ်ပီၢ်ယၢ်လီၤက့ၤသး အနီၢ်ကီၢ်န့ၣ် မ့ၢ်မနုၤလဲၣ်

^၁၁ လၢခံ ယဟိဝၤယွၤ စံးဆၢစီၤမနၤၡ့ၤ အတၢ်ထုကဖၣ်. ယဟိဝၤယွၤထံၣ်ဝဲလၢ စီၤမနၤၡ့ၤ ဆီတလဲအသးနီၢ်ကီၢ် ခီဖျိတၢ်လၢ စီၤမနၤၡ့ၤဃ့ဝဲတဖၣ်လီၤ. အဃိ ဖဲစီၤမနၤၡ့ၤဃ့ပျၢ်ကွံာ် အတၢ်ကမၣ်အခါ ယဟိဝၤယွၤ ဒိကနၣ်အီၤဒီး ပာ်ထီၣ်က့ၤအီၤလၢစီၤပၤလီၤ. စီၤမနၤၡ့ၤ ဂုာ်ကျဲးစၢး ပီၢ်ယၢ်လီၤသး သပှၢ်ကတၢၢ်လီၤ. အမၤဝဲ တၢ်လၢစီၤအၤဃာ်တမၤဝဲ နီတဘျီဘၣ်. အဆီတလဲက့ၤအသး ဒီးထီဒါက့ၤ တၢ်ဘူၣ်ထီၣ်ဘါထီၣ် လၢအကမၣ်တဖၣ် ဒီးဟ့ၣ်ဂံၢ်ဟ့ၣ်ဘါ ပှၤဂီၢ်မုၢ်လၢ ကဘူၣ်ထီၣ်ဘါထီၣ် ယဟိဝၤယွၤအဂီၢ်လီၤ. (ဖး ၂ ကွဲးနီၣ်တၢ် ၃၃:၁၅, ၁၆.) စီၤမနၤၡ့ၤ ကမၤဝဲဒ်န့ၣ်အဂီၢ် လိၣ်ဘၣ်ဝဲ တၢ်သးဒူဒီးတၢ်နာ် သပှၢ်တၢၢ်. တချုးလၢ အပီၢ်ယၢ်လီၤက့ၤသးဒံးဘၣ်န့ၣ် အဝဲတအိၣ်ဒီး ဒိဂ့ၤတဲာ်ဘၣ်လၢ အဟံၣ်ဖိဃီဖိအဖီခိၣ်, အပှၤဒိၣ်ပှၤပှၢ်တဖၣ် ဒီးပှၤဂီၢ်မုၢ်တဖၣ်အဂီၢ် လၢအနံၣ်အါမး. ဘၣ်ဆၣ် ဖဲအသးပှၢ်ထီၣ်အခါ အဝဲဂုာ်ကျဲးစၢး မၤဂ့ၤထီၣ်က့ၤ တၢ်လၢအမၤကမၣ်ဘၣ်ဝဲတဖၣ်လီၤ. အဃိ လီၤဂာ်လၢ အဝဲအဒိအတဲာ်န့ၣ် ကဲဘျုးလၢ အလံၤခွါ စီၤယိၤၡံယၤအဂီၢ် ဒီးလၢခံစီၤယိၤၡံယၤ ကဲထီၣ်စီၤပၤ လၢအဂ့ၤတဂၤလီၤ.—၂ စီၤပၤ ၂၂:၁, ၂.

^၁၂ ပမၤလိန့ၢ်တၢ်လၢ စီၤမနၤၡ့ၤအအိၣ် ကသ့ဒ်လဲၣ်. အဝဲဆီၣ်လီၤအသးဒီး မၤဝဲအါန့ၢ်အန့ၣ်ဒံး. အဝဲဃ့ကညး ယဟိဝၤယွၤ ဒ်သိးဒီး အကဒိးန့ၢ်ဘၣ် တၢ်သးကညီၤ ဒီးအဆီတလဲက့ၤအသးလီၤ. တၢ်လၢအမၤကမၣ်ဘၣ်ဝဲန့ၣ် အဝဲဂုာ်ကျဲးစၢး မၤဘၣ် ဂီၢ်က့ၤဝဲ ဒီးအဘူၣ်ထီၣ်ဘါထီၣ်က့ၤ ယဟိဝၤယွၤဒီး အမၤစၢၤပှၤဂၤလၢ ကဘူၣ်ထီၣ်ဘါထီၣ် ယဟိဝၤယွၤစ့ၢ်ကီးလီၤ. စီၤမနၤၡ့ၤ အဒိအတဲာ်န့ၣ် ကမၤစၢၤပှၤလၢ အမၤကမၣ်တၢ် ဖးဒိၣ်တဖၣ်လီၤ. စီၤမနၤၡ့ၤ အတၢ်လဲၤခီဖျိန့ၣ် ပာ်ဖျါထီၣ်ဝဲလၢ ယဟိဝၤယွၤ “မ့ၢ်တၢ်ဂ့ၤ, ဒီး . . . ပျၢ်ကွံာ်တၢ်ညီ” လီၤ. (စံးထီၣ်ပတြၢၤ ၈၆:၅) ပှၤလၢအပီၢ်ယၢ်လီၤအသးနီၢ်ကီၢ်န့ၣ် ယဟိဝၤယွၤပျၢ်ကွံာ် အဝဲသ့ၣ်အတၢ်ကမၣ်လီၤ.

လါယူၤ ၁၉-၂၅

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ၂ ကွဲးနီၣ်တၢ် ၃၄-၃၆

“ဟံန့ၢ်တၢ်အဘျုးလၢ ကစၢ်ယွၤအကလုၢ်ကထါ လၢလၢပှဲၤပှဲၤ”

it-1 ၁၁၅၇ ¶၄

နီၢ်ဃူးလဒါ

စီၤယိၤၡံယၤနၢ်ဟူဝဲပှၤဖး “လံာ်တၢ်သိၣ်တၢ်သီတဘ့ၣ်” လၢစီၤဃံးလကံယၤလၢအမ့ၢ်ပှၤလုၢ်တၢ်ခိၣ် အဒိၣ်ကတၢၢ် ထံၣ်ဝဲဖဲအဝဲသ့ၣ်ဘှီဂ့ၤထီၣ်က့ၤတၢ်လုၢ်ဟံၣ်အခါ စီၤယိၤၡံယၤန့ၣ်ဆှၢလီၤဝဲ ပှၤခၢၣ်စးတဖၣ်ဒ်သိးကလဲၤသံကွၢ် တၢ်လၢ ယဟိဝၤယွၤလီၤ. အဝဲသ့ၣ်လဲၤဝဲလၢ နီၢ်ဃူးလဒါအအိၣ်ဒီး နီၢ်ဃူးလဒါတဲဖျါထီၣ်န့ၢ်အဝဲသ့ၣ်လၢ ယဟိဝၤယွၤအတၢ်ကတိၤဒီးတဲဝဲလၢ ခီဖျိလၢပှၤယူဒၤဖိတဖၣ်တၢ်ဒိကနၣ်တအိၣ်ဘၣ်အဃိ တၢ်ကီတၢ်ခဲလၢအဘၣ်တၢ်ယၢၤထီၣ်အီၤလၢ လံာ်တဘ့ၣ်အံၤအပူၤန့ၣ် ကဘၣ်ဝဲပှၤယူဒၤဖိတဖၣ်. နီၢ်ဃူးလဒါတဲစ့ၢ်ကီးဝဲလၢ မ့ၢ်လၢစီၤယိၤၡံယၤန့ၣ် အိၣ်ဒီးတၢ်ဆီၣ်လီၤသးလၢ ယဟိဝၤယွၤမဲာ်ညါအဃိ တၢ်ကီတၢ်ခဲတဖၣ်န့ၣ် တဘၣ်အီၤဘၣ်. ဒီးပှၤကပာ်ဖှိၣ်အီၤဃုာ်ဒီး အမိၢ်ပၢ်ဖံဖုလၢပျၢၤတဖၣ် ဒီးပှၤကခူၣ်လီၤအီၤဂ့ၤဂ့ၤ.—၂ စီၤပၤ ၂၂:၈-၂၀; ၂ ကွဲး ၃၄:၁၄–၂၈.

တၢး၀၉ ၆/၁၅ ၁၀ ¶၂၀

သးဆူၣ်လၢ ယဟိဝၤယွၤအဟံၣ်အဂီၢ်

^၂၀ ဖဲစီၤပၤယိၤၡံယၤရဲၣ်ကျဲၤဝဲလၢ ပှၤကဘှီဂ့ၤထီၣ်တၢ်လုၢ်ဟံၣ်အခါ ပှၤလုၢ်တၢ်ခိၣ် အဒိၣ်ကတၢၢ် စီၤဃံးလကံယၤန့ၣ် “ထံၣ်န့ၢ်ဝဲ ယဟိဝၤယွၤ အလံာ် တၢ်သိၣ်တၢ်သီတဘ့ၣ်လၢ အဟ့ၣ်လီၤဝဲ ခီဖျိလၢ စီၤမိၤၡ့လီၤ.” ဒီးပှၤလုၢ်တၢ်ခိၣ် အဒိၣ်ကတၢၢ်တဂၤအံၤ ဟ့ၣ်လီၤဝဲလံာ်အံၤဆူ စီၤပၤအနဲၣ်ရွဲၣ် စီၤၡၤဖၣ်အအိၣ် ဒီးအဝဲဖးန့ၢ်ဝဲ စီၤယိၤၡံယၤလီၤ. (ဖး ၂ ကွဲးနီၣ်တၢ် ၃၄:၁၄-၁၈) ဖဲစီၤယိၤၡံယၤနၢ်ဟူဝဲအခါ တၢ်မၤသးဒီးအီၤဒ်လဲၣ်. စီၤပၤယိၤၡံယၤ သးဘၣ်ဒိဒိၣ်မးအဃိ အဖှီညာ်လီၤအဆ့ကၤ ဒီးအမၢလီၤဝဲအပှၤတဖၣ်လၢ ကလဲၤဃုသ့ၣ်ညါဝဲ ယဟိဝၤယွၤတၢ်ဘၣ်သးအဂီၢ်လီၤ. ဒီးအဝဲသ့ၣ်လဲၤလၢ ဝံမုၣ်နီၢ်ဃူးလဒါအအိၣ် ဒီးဝံမုၣ်ပာ်ဖျါထီၣ်ဝဲလၢ ခီဖျိလၢပှၤယူဒၤဖိတဖၣ် ဘူၣ်ထီၣ်ဘါထီၣ်ယွၤလၢအကမၣ်အဃိ အဝဲသ့ၣ်ကထံၣ်ဘၣ်တၢ်ကီတၢ်ခဲလီၤ. ဖဲန့ၣ်ယဟိဝၤယွၤ တဲဆိပာ်စၢၤဝဲလၢ အပှၤဂီၢ်မုၢ်ဒီတကလုာ်ကထံၣ်ဘၣ်ဒီး တၢ်ကီတၢ်ခဲခီဖျိလၢ တဒိကနၣ်ယဟိဝၤယွၤ ကလုၢ်ဘၣ်အဃိ ဘၣ်ဆၣ်စီၤယိၤၡံယၤန့ၣ် မ့ၢ်လၢအဂုာ်ကျဲးစၢးမၤဟးဂီၤဝဲ တၢ်ဘူၣ်တၢ်ဘါ လၢအကမၣ်အဃိ ယဟိဝၤယွၤ ဘၣ်သူၣ်ဘၣ်သးအီၤ. (၂ ကွဲး ၃၄:၁၉-၂၈) ပဟံန့ၢ်တၢ်မၤလိ သ့ဒ်လဲၣ်. ပဝဲသ့ၣ်တဖၣ်ပအဲၣ်ဒိးမၤ ဒ်စီၤယိၤၡံယၤအသိးလီၤ. ဖဲပဒိးန့ၢ်ဘၣ် တၢ်ဟံးစုနဲၣ်ကျဲလၢယဟိဝၤယွၤအအိၣ်အခါ ပအဲၣ်ဒိးမၤထွဲအီၤတဘျီဃီ. ဒီးပန့ၢ်ဘၣ်တၢ်မၤလိလၢ ပမ့ၢ်ပျဲလၢ တၢ်စူၢ်တၢ်နာ်လၢအကမၣ် အတၢ်သိၣ်လိတဖၣ် ဟဲနုာ်လီၤလၢ တၢ်ဘူၣ်တၢ်ဘါအမ့ၢ်အတီပူၤန့ၣ် ကမၤဘၣ်ဒိပှၤ. ဘၣ်ဆၣ် ပနာ်သပှၢ်တၢၢ်လၢ ပမ့ၢ်သးဆူၣ်လၢ တၢ်ဘူၣ်တၢ်ဘါအမ့ၢ်အတီဂီၢ်န့ၣ် ယဟိဝၤယွၤ ကဘၣ်သူၣ်ဘၣ်သးပှၤ ဒ်အဘၣ်သူၣ်ဘၣ်သး စီၤယိၤၡံယၤအသိး.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၁၇.၀၃ ၂၅-၂၆ ¶၁၅-၁၇

မ့ၢ်နကမၤပိာ်ထွဲဒ် တၢ်ကွဲးအသးအသိးဧါ

^၁၅ ပဟံးန့ၢ်တၢ်မၤလိလၢ စီၤယိၤၡံယၤအအိၣ်ကသ့ဒ်လဲၣ်. စီၤယိၤၡံယၤ မ့ၢ်ဝဲစီၤပၤလၢ အဂ့ၤဘၣ်ဆၣ် အဝဲမၤဘၣ်ဝဲတၢ်ကမၣ်တခါလၢ အဆှၢအီၤဆူတၢ်သံန့ၣ်လီၤ. (ဖး ၂ ကွဲးနီၣ်တၢ် ၃၅:၂၀-၂၂ တက့ၢ်.) တၢ်မနုၤကဲထီၣ်အသးလဲၣ်. တၢ်ဂ့ၢ်တအိၣ်လၢ စီၤယိၤၡံယၤ ကဘၣ်လဲၤဒုးဝဲ ပှၤအဲၤကူပတူးဖိအစီၤပၤနကိၤ သနာ်က့ အဝဲလဲၤဒုးဝဲလီၤ. ဒီးစီၤနကိၤ အနီၢ်ကစၢ်ဒၣ်ဝဲ တဲဘၣ်စီၤယိၤၡံယၤလၢ အဝဲတအဲၣ်ဒိး ဒုးတၢ်ဒီးအီၤဘၣ်. လံာ်စီဆှံပာ်ဖျါဝဲလၢ စီၤနကိၤ အတၢ်ကတိၤန့ၣ် ဟဲလၢ “ယွၤအထးခိၣ်” လီၤ. ဘၣ်ဆၣ် စီၤယိၤၡံယၤ လဲၤဒုးဒံးဝဲ စီၤနကိၤအဃိ စီၤယိၤၡံယၤ ဘၣ်တၢ်မၤသံအီၤန့ၣ်လီၤ. ဘၣ်မနုၤအဃိ စိၤယိၤၡံယၤ လဲၤဒုးဝဲစီၤနကိၤလဲၣ်န့ၣ် လံာ်စီဆှံတပာ်ဖျါထီၣ်ဝဲဘၣ်.

^၁၆ စီၤယိၤၡံယၤ ကြၢးဃုသ့ၣ်ညါဝဲတၢ်လၢ စီၤနကိၤတဲအီၤန့ၣ် မ့ၢ်တၢ်ကတိၤလၢ အဟဲလၢ ယဟိဝၤယွၤအအိၣ်နီၢ်နီၢ်ဧါန့ၣ်လီၤ. အဝဲမၤဝဲကသ့ဒ်လဲၣ်. အဝဲသံကွၢ် ယဟိဝၤယွၤအဝံလၢအမ့ၢ် ဝံယံးရမံယၤသ့ဝဲလီၤ. (၂ ကွဲးနီၣ်တၢ် ၃၅:၂၃, ၂၅) အဂၤတမံၤန့ၣ် စီၤယိၤၡံယၤ ကြၢးဃုသ့ၣ်ညါဝဲ လီၤတံၢ်လီၤဆဲးလၢ စီၤနကိၤလဲၤဝဲလၢ ကၢ်ကမံၣ်န့ၣ် ဒ်သိးကလဲၤဒုးဝဲ ထံကီၢ်လၢအဂၤလီၤ. တမ့ၢ်အကလဲၤဒုးဝဲ ယရူၤၡလ့ၣ်ဘၣ်. ဒီးစီၤနကိၤန့ၣ် အဝဲတတဲတရီတပါ ယဟိဝၤယွၤ ဒီးအပှၤဂီၢ်မုၢ်ဘၣ်. စီၤယိၤၡံယၤန့ၣ် တချုးလၢ အဆၢတဲာ်တၢ်ဒံးဘၣ်အခါ အဝဲတဆိကမိၣ်ဆိတၢ် ထံထံဆးဆးဘၣ်. ဖဲအံၤ ပဒိးန့ၢ်ဘၣ်တၢ်မၤလိဒ်လဲၣ်. ပတၢ်ကီတၢ်ခဲမ့ၢ်အိၣ်ထီၣ် ဒီးပမ့ၢ်ဘၣ်ဆၢတဲာ်န့ၣ် အဆိကတၢၢ် ပကဘၣ်ဆိကမိၣ်ထံတၢ်လၢ ယဟိဝၤယွၤအဲၣ်ဒိးလၢ ပမၤဒ်လဲၣ်န့ၣ်လီၤ.

^၁၇ တချုးပဆၢတဲာ်အခါ အဆိကတၢၢ်န့ၣ် ပကဘၣ်ဆိကမိၣ်ထံ လံာ်စီဆှံ အတၢ်ဟံးစုနဲၣ်ကျဲမၤစၢၤယၤသ့လၢ ကျဲဒ်လဲၣ် ဒီးယမၤထွဲအီၤကသ့ဒ်လဲၣ်န့ၣ်လီၤ. ဘၣ်သ့ၣ်သ့ၣ် လၢတၢ်အိၣ်သးတနီၤနီၤအဃိ နကအဲၣ်ဒိး ဃုကွၢ်အါထီၣ်တၢ်ဟ့ၣ်ကူၣ်လၢ ပလံာ်လဲၢ်တဖၣ်အပူၤ မ့တမ့ၢ် ဃ့တၢ်ဟ့ၣ်ကူၣ်လၢ တၢ်အိၣ်ဖှိၣ်သးပှၢ်တဂၤအအိၣ်လီၤ. တၢ်အိၣ်ဖှိၣ်သးပှၢ်မၤစၢၤပှၤဒ်သိး ပကဆိကမိၣ်ထံ လံာ်စီဆှံအတၢ်ဟံးစုနဲၣ်ကျဲလၢ အဂၤသ့ဝဲလီၤ. ဆိကမိၣ်ကွၢ် တၢ်အိၣ်သးတခါအံၤတက့ၢ်– ဒီပုၢ်ဝဲၢ်မုၣ်တဂၤ အဝဲဆီဟံၣ်ဆီဃီဒီး ပှၤတဂၤလၢ အတဘူၣ်ထီၣ်ဘါထီၣ် ယဟိဝၤယွၤလီၤ. ဘၣ်တနံၤန့ၣ် အဝဲအဲၣ်ဒိး လဲၤစံၣ်တဲၤတဲလီၤတၢ်လီၤ. (မၤတၢ် ၄:၂၀) ဘၣ်ဆၣ် ဖဲမုၢ်နံၤအဝဲန့ၣ်န့ၣ် အဝၤတအဲၣ်ဒိးလၢ အဝဲကလဲၤစံၣ်တဲၤတဲလီၤတၢ်ဘၣ်. အဝၤတဲအီၤလၢ အဝဲသ့ၣ်ဟ့ၣ်လီၤလိာ်အသး တၢ်ဆၢကတီၢ် တချုးအါအါဘၣ်အဃိ အဝၤအဲၣ်ဒိးလၢ အကဟ့ၣ်လီၤအတၢ်ဆၢကတီၢ်လၢ ကဟးလိာ်ကွဲဒ်သိးသိး အဂီၢ်လီၤ. လၢတၢ်န့ၣ်အဃိ ဒီပုၢ်ဝဲၢ်မုၣ်အံၤ ကဘၣ်ဆိကမိၣ်ထံဝဲ လံာ်စီဆှံအတၢ်ဟံးစုနဲၣ်ကျဲတဖၣ် ဒ်သိးအကဆၢတဲာ်တၢ်လၢ တၢ်ကူၣ်သ့အပူၤလီၤ. အဝဲသ့ၣ်ညါဝဲလၢ ကဘၣ်ဒိကနၣ် ကစၢ်ယွၤအကလုၢ် ဒီးယ့ၣ်ၡူးမၤလိာ်ပှၤလၢ ပကဘၣ်လဲၤဒုးကဲထီၣ် ပှၤဂၤလၢအပျဲၢ်အဘီၣ်လီၤ. (မးသဲ ၂၈:၁၉, ၂၀; မၤတၢ် ၅:၂၉) ဘၣ်ဆၣ်ဒီး ဒီပုၢ်ဝဲၢ်မုၣ်အံၤ သ့ၣ်နီၣ်ထီၣ်စ့ၢ်ကီးဝဲလၢ မါန့ၣ်ဘၣ်ဒိးပၢအသးလၢ အဝၤအဖီလာ်လီၤ. ဒီးယွၤအခ့အပှၤန့ၣ် တဘၣ်မ့ၢ်ပှၤလၢ အခိၣ်ကိၤစ့ၢ်ကီးဘၣ်. (အ့းဖ့းစူး ၅:၂၂-၂၄; ဖံလံးပံၤ ၄:၅) အဝဲကဘၣ် ဆိကမိၣ်ထံဝဲလၢ မ့ၢ်အဝၤအဲၣ်ဒိးတြီအီၤလၢ အကလဲၤစံၣ်တဲၤတဲလီၤတၢ်ဧါ မ့တမ့ၢ် မ့ၢ်အဝၤအဲၣ်ဒိးလၢ အကဟ့ၣ်အတၢ်ဆၢကတီၢ်လၢ ကဟးလိာ်ကွဲဒ်သိးသိးအဂီၢ်ဧါ. ဒ်ပမ့ၢ် ယဟိဝၤယွၤအခ့အပှၤအသိး ပအဲၣ်ဒိးမၤတၢ်ဆၢတဲာ်လၢ အအိၣ်ဒီးတၢ်ကူၣ်သ့ ဒီးမၤသးခုယွၤအသးလီၤ.

တၢး၁၇.၀၉ ၂၃ ¶၇-၁၀

^၇ ဖဲပလဲၤစံၣ်တဲၤတဲလီၤတၢ် ဒီးသိၣ်လိတၢ်အခါ အရ့ဒိၣ်လၢပကဘၣ်သူ ယွၤအကလုၢ်ကထါလီၤ. ဒီပုၢ်ဝဲၢ်တဂၤ တဲဝဲလၢ “နမ့ၢ်လဲၤစံၣ်တဲၤတဲလီၤတၢ် ဒီးယဟိဝၤယွၤ လၢတဟံၣ်ဘၣ်တဟံၣ်န့ၣ် နကတဲထဲတဂၤဧိၤဧါ မ့တမ့ၢ် နကပျဲ ယဟိဝၤယွၤ တဲစ့ၢ်ကီးဧါ.” ဖဲပဖးပၠးပှၤဂၤ လံာ်စီဆှံအခါ လီၤဂာ်ဒ်ပပျဲ ယဟိဝၤယွၤ တဲတၢ်ဒီးအဝဲသ့ၣ်န့ၣ်လီၤ. ပမ့ၢ်ဃုထၢလံာ်စီဆှံအဆၢလၢ အကြၢးဝဲဘၣ်ဝဲန့ၣ် အသဟီၣ်ဆူၣ်ဒိၣ်န့ၢ်ဒံး ကယဲၢ်တၢ်ကတိၤလၢ ပတဲခဲလၢာ်လီၤ. (၁ သ့းစၤလနံ ၂:၁၃) ဖဲနလဲၤစံၣ်တဲၤတဲလီၤတၢ်အခါ မ့ၢ်နဂုာ်ကျဲးစၢး ဖးပၠးပှၤဂၤ လံာ်စီဆှံ တသ့ဖဲအသ့စ့ၢ်ကီးဧါ.

^၈ ပှၤအါတက့ၢ်န့ၣ် တနၢ်ပၢၢ်ဝဲ လံာ်စီဆှံအခီပညီဘၣ်အဃိ ဖဲပလဲၤစံၣ်တဲၤတဲလီၤတၢ်အခါ ထဲဒၣ်ပဖးပၠးပှၤဂၤလၢ လံာ်စီဆှံန့ၣ် တလၢပှဲၤဒံးဘၣ်. ဒ်တၢ်မၢဖိအစိၤအသိး မုၢ်မဆါတနံၤအံၤစ့ၢ်ကီး ဒ်န့ၣ်အသိးလီၤ. (ရိမ့ၤ ၁၀:၂) လံာ်စီဆှံအဆၢလၢ ပဖးပၠးဟံၣ်ကစၢ်န့ၣ် တဘၣ်ဆိကမိၣ်လၢ အဝဲနၢ်ပၢၢ်ဝဲတဘျီဃီန့ၣ်တဂ့ၤ. က့ၤဖးကဒါက့ၤ တၢ်ကတိၤလၢအရ့ဒိၣ် ဒီးတဲနၢ်ပၢၢ်အီၤ အခီပညီတက့ၢ်. နမ့ၢ်မၤဒ်န့ၣ်န့ၣ် ကစၢ်ယွၤအကလုၢ်ကထါ ကနုာ်လီၤလၢ အဝဲသ့ၣ်အသးပူၤလီၤ.—ဖး လူၤကၣ် ၂၄:၃၂ တက့ၢ်.

^၉ ဒ်သိးဟံၣ်ကစၢ် ကသးစၢၢ်ဆၢဝဲ လံာ်စီဆှံအဂီၢ် တချုးလၢပဖးပၠးအီၤ လံာ်စီဆှံအခါ ပတဲအီၤတၢ်ကတိၤတဖၣ်အံၤသ့လီၤ. အဒိ, ပတဲအီၤလၢ “ဘၣ်ဃးဒီးတၢ်ဂ့ၢ်အံၤန့ၣ် တၢ်ဘၣ်တ့ကစၢ် တဲဝဲဒ်လဲၣ်.” ပမ့ၢ်တဲတၢ်ဒီး ပှၤလၢအတမ့ၢ်ခရံာ်ဖိဘၣ်န့ၣ် ပတဲအီၤဒ်အံၤသ့လီၤ. “ပကကွၢ်သကိး လံာ်လၢအမံၤဟူသၣ်ဖျါတဘ့ၣ် တဲဝဲဒ်လဲၣ်.” ပမ့ၢ်တဲသကိးတၢ်ဒီး ပှၤလၢအတနာ်ယွၤန့ၣ် ပသံကွၢ်အီၤဒ်အံၤသ့လီၤ. “တၢ်ကတိၤလၢပျၢၤအံၤ မ့ၢ်နနၢ်ဟူဘၣ် တဘျီဘျီဧါ.” ပကဘၣ်သ့ၣ်နီၣ်ထီၣ်လၢ ပှၤတဂၤစုာ်စုာ်န့ၣ် အတၢ်အိၣ်သးဒီးအတၢ်နာ် တဒ်သိးလိာ်အသးဘၣ်အဃိ ပကဂုာ်ကျဲးစၢးအဂ့ၤကတၢၢ် ဒ်သိးအဝဲသ့ၣ် ကသူၣ်အိၣ်သးအိၣ် ယွၤကလုၢ်ကထါအဂီၢ်လီၤ.—၁ ကရံၣ်သူး ၉:၂၂, ၂၃.

^၁၀ ပှၤအါဂၤန့ၣ် ဖဲအလဲၤစံၣ်တဲၤတဲလီၤတၢ်အခါ သူဝဲယွၤအကလုၢ်ကထါအဃိ ထံၣ်ဘၣ်ဝဲလၢ အကဲဘျုးဝဲဒိၣ်မးလီၤ. အဒိ, ဒီပုၢ်ဝဲၢ်ခွါတဂၤ လဲၤဟးအိၣ်သကိးဝဲ ပှၤသးပှၢ်လၢ အဟံးန့ၢ်ဖးဝဲပလံာ်လဲၢ် လၢအနံၣ်အါမးတဂၤလီၤ. ဘၣ်တနံၤ လၢကဟ့ၣ်လီၤဝဲ တၢးထီခိးတၢ် ဟဲထီၣ်အသီတဘ့ၣ်အလီၢ် အဝဲဖးပၠးဝဲလံာ်စီဆှံတဆၢလီၤ. အဝဲဖးပၠးဝဲ ၂ ကရံၣ်သူး ၁:၃, ၄ လၢအစံးဝဲ– “တၢ်သးကညီၤအပၢ်, ဒီးတၢ်မၤမုာ်ခဲလၢာ် အကစၢ် . . . အဝဲဒၣ် မၤမုာ်ထီၣ်ပှၤလၢ ပတၢ်နးတၢ်ဖှီၣ်ခဲလၢာ်အပူၤ” လီၤ. တၢ်ကတိၤတဖၣ်အံၤ ထိးဘၣ်ပှၤသးပှၢ်တဂၤအံၤ အသူၣ်အသးအဃိ အဝဲမၢကဒီးဒီပုၢ်ဝဲၢ်လၢ ကဖးဝဲအသီတဘျီလီၤ. ဒီးပှၤသးပှၢ်အံၤ တဲဘၣ်အီၤလၢ အဝဲဒီးအမါန့ၣ် လိၣ်ဘၣ်တၢ်မၤမုာ်ထီၣ်က့ၤန့ၣ်လီၤ. မ့ၢ်လၢလံာ်စီဆှံ တဆၢအံၤအဃိ အဝဲအဲၣ်ဒိးသ့ၣ်ညါအါထီၣ် လံာ်စီဆှံအဂ့ၢ်လီၤ. လၢတၢ်န့ၣ်အဃိ ပမ့ၢ်သူယွၤအကလုၢ်ကထါလၢ ပတၢ်စံၣ်တဲၤတဲလီၤတၢ်မၤအပူၤန့ၣ် ကဲဘျုးဝဲနီၢ်နီၢ်လီၤ.—မၤတၢ် ၁၉:၂၀.

လါယူၤ ၂၆–လါယူၤလံ ၂

တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ဧ့စြၤ ၁-၃

“ပျဲလၢ ယဟိဝၤယွၤ ကသူနၤ”

တၢး၂၂.၀၃ ၁၄ ¶၁

ဝံစကၤရယၤ အတၢ်ထံၣ်လၢညါခီ ကဲဘျုးလၢပဂီၢ်ဒ်လဲၣ်

ဖဲပှၤယူဒၤဖိတဖၣ် အိၣ်လၢဘၤဘူၤလိၣ် အနံၣ်အါမးဝံၤအလီၢ်ခံ ယဟိဝၤယွၤ “ထိၣ်ဂဲၤ ပၤရၣ်အစီၤပၤကိရ့ၣ်အသး” လၢကဒုးက့ၤဝဲ ပှၤအံၣ်စရ့လးဖိတဖၣ်. အဃိ ပှၤယူဒၤဖိတဖၣ် ကသးခုဝဲဒိၣ်မး. စီၤပၤတဂၤအံၤ ပျဲဝဲလၢပှၤယူဒၤဖိတဖၣ် ကက့ၤလၢအထံကီၢ်ဒီး က “သူၣ်အံၣ်စရ့လးအကစၢ် အဟံၣ်” လီၤ. (ဧ့စြၤ ၁:၁, ၃) ပှၤယူဒၤဖိတဖၣ် ကဘူၣ်ထီၣ်ဘါထီၣ်ဘၣ်က့ၤ ကစၢ်ယွၤ လၢအမ့ၢ်အတီ လၢထံကီၢ်လၢ ကစၢ်ယွၤဟ့ၣ်လီၤတ့ၢ်အဝဲသ့ၣ်. အဃိ မ့ၢ်တၢ်လၢအလီၤသးခုဒိၣ်မး လၢအဝဲသ့ၣ်အဂီၢ်.

တၢး၁၇.၁၀ ၂၁ ¶၂

လ့ၣ်ကဟၣ်ဒီး ခိၣ်သလုးန့ၣ် ကဒီသဒၢနၤ

^၂ ဝံစကၤရယၤ သ့ၣ်ညါဝဲလၢ ပှၤယူဒၤဖိလၢအက့ၤလၢ ဝ့ၢ်ယရူၤၡလ့ၣ်တဖၣ်န့ၣ် မ့ၢ်ပှၤလၢအဘူၣ်ထီၣ်ဘါထီၣ် ယဟိဝၤယွၤန့ၣ်လီၤ. အဝဲသ့ၣ်မ့ၢ်ပှၤလၢ “ယွၤထိၣ်ဂဲၤအသး” ဒ်သိးကပာ်တ့ၢ်ကွံာ် အဟံၣ်အဃီ ဒီးအတၢ်ဖံးတၢ်မၤလၢ ဘၤဘူၤလိၣ်အပူၤန့ၣ်လီၤ. (ဧ့စြၤ ၁:၂, ၃, ၅) ပှၤလၢအဝဲသ့ၣ်အကျါ အါတက့ၢ်န့ၣ် တထံၣ်ဘၣ် ဝ့ၢ်ယရူၤၡလ့ၣ်နီတဘျီဘၣ်. တၢ်သူၣ်ထီၣ်က့ၤ ယဟိဝၤယွၤ အတၢ်လုၢ်ဟံၣ်န့ၣ် မ့ၢ်တၢ်အရ့ဒိၣ်ကတၢၢ်လၢ ပှၤယူဒၤဖိတဖၣ်အံၤအဂီၢ်အဃိ အဝဲသ့ၣ်အသးအိၣ်ဟ့ၣ်လီၤအသး ဒီးလဲၤတၢ်လီၤ. အဝဲသ့ၣ်အတၢ်လဲၤကျဲန့ၣ် ယံၤဝဲ ၁,၆၀၀ ကံလိမံထၢၣ် (၁,၀၀၀ မံးလာ်) ဒီးအိၣ်ပှဲၤထဲတၢ်ဘၣ်ယိၣ်ဘၣ်ဘှီ ဒီးဘၣ်လဲၤဝဲကီကီခဲခဲလီၤ.

နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်

တၢး၀၆ ၁/၁၅ ၁၉ ¶၁

လံာ်စီဆှံ အတၢ်ပာ်ဖျါလၢလံာ် ဧ့စြၤ အဂီၢ်

၁:၃-၆. ဒ်ပှၤအံၣ်စရ့လးဖိတနီၤ အိၣ်တ့ၢ်လၢ ဝ့ၢ်ဘၤဘူၤလိၣ်အသိး မုၢ်မဆါတနံၤအံၤ ယဟိဝၤပှၤအုၣ်အသးအါဂၤ အဝဲသ့ၣ်အဲၣ်ဒိးမၤဝဲ ကစၢ်ယွၤတၢ်မၤလၢ တၢ်ဆၢကတီၢ်လၢပှဲၤ ဒီးအဲၣ်ဒိးလဲၤမၤစၢၤတၢ်လၢ တၢ်လီၢ်လၢ အလိၣ်ဘၣ်တၢ်မၤစၢၤ ဘၣ်ဆၣ် အဝဲသ့ၣ်မၤဝဲ တသ့ဘၣ်. ဘၣ်ဆၣ်အဝဲသ့ၣ်ဆီၣ်ထွဲ ဒီးမၤစၢၤဝဲပှၤလၢ အမၤတၢ်ဒ်န့ၣ်သ့ၣ်တဖၣ် ခီဖျိဟ့ၣ်လီၤဝဲတိၢ်မၤဘူၣ် ဒ်သိးပှၤကစံၣ်တဲၤတဲလီၤဝဲ ဘီမုၢ်တၢ်သးခုကစီၣ် ဒီးဒုးကဲထီၣ်ပှၤဂၤလၢ ယ့ၣ်ၡူးပျဲၢ်ဘီၣ်အဂီၢ်.