ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါစဲးပတ့ဘၢၣ် ၅–၁၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | စံးထီၣ်ပတြၢၤ ၁၁၉
“လဲၤတၢ်လၢယွၤ အတၢ်သိၣ်တၢ်သီအပူၤ”
(စံးထီၣ်ပတြၢၤ ၁၁၉:၁–၈) ပှၤလၢအလၢအပှဲၤလၢကျဲန့ၣ်, ဒီးလဲၤတၢ်လၢယွၤ အတၢ်သိၣ်တၢ်သီအပူၤန့ၣ် ဘၣ်ဆိၣ်ဂ့ၤဝဲလီၤ. ၂ ပှၤလၢအတိၢ်န့ၢ်ဖံးဃာ်အတၢ်အုၣ်အသး, ဒီးဃုယွၤလၢအသးဒီဖျၢၣ်ညါန့ၣ် ဘၣ်ဆိၣ်ဂ့ၤဝဲလီၤ. ၃ တမၤစ့ၢ်ကီး တၢ်အၢနီတမံၤဘၣ်. လဲၤဝဲလၢအကျဲဧိၤကပူၤဧိၤန့ၣ်လီၤ. ၄ နမၤလိာ်လၢပဘၣ်တိၢ်န့ၢ်ဖံးဃာ် နတၢ်သိၣ်တၢ်သီထံထံဆးဆးလီၤ. ၅ ဒ်သိး ယကတိၢ်န့ၢ်ဖံးဃာ် နတၢ်မၤလိာ်န့ၣ် မ်ယကျဲအိၣ်ဂၢၢ်ဆိးကျၢၤတက့ၢ်. ၆ တုၤယကွၢ်မဲာ် နတၢ်မၤလိာ်ခဲလၢာ်ဒီး, ယမဲာ်တဆှးဘၣ်. ၇ တုၤယမၤလိနစံၣ်ညီၣ်တၢ်တီတဖၣ်ဒီး, ယကစံးထီၣ်ပတြၢၤနၤလၢ ယသးစၢၢ်ဆၢလီၤ. ၈ ယကတိၢ်န့ၢ် နတၢ်မၤလိာ်လီၤ. မ်နသုတလဲၤသဒၣ်ကွံာ်ယၤ တုၤအလၢာ်တဂ့ၤ.
တၢး၀၅ ၄/၁၅ ကဘျံးပၤ ၁၀ အဆၢ ၃–၄
သန့ၤနသးလၢ ယဟိဝၤယွၤ အကလုၢ်ကထါ
ဒိကနၣ်ယွၤအကလုၢ်ကထါ ဒီးအိၣ်ဒီးတၢ်သးခု
၃ ဒ်သိးပကအိၣ်ဒီး တၢ်သူၣ်ခုသးခုနီၢ်နီၢ်အဂီၢ် ပကဘၣ် အိၣ်မူထွဲဒ် ကစၢ်ယွၤအတၢ်သိၣ်တၢ်သီအသိးလီၤ. (စံးထီၣ်ပတြၢၤ ၁၁၉:၁-၈) ပမ့ၢ်မၤဒ်န့ၣ်န့ၣ် ယဟိဝၤယွၤ ကထံၣ်ပှၤဒ် ‘ပှၤအလၢအပှဲၤ’ အသိးလီၤ. (စံးထီၣ်ပတြၢၤ ၁၁၉:၁) ပှၤအလၢအပှဲၤန့ၣ် အဲၣ်ဒိးစံးဝဲလၢ ပဂုာ်ကျဲးစၢးမၤ ယဟိဝၤယွၤ အတၢ်ဘၣ်သးလီၤ. စီၤနိအၤမ့ၢ် “ပှၤအလၢအပှဲၤလၢ ပှၤတစိၤဒၣ်အီၤအကျါ” လၢအ “လဲၤတၢ်ဒီးယွၤလီၤ.” မ့ၢ်လၢစီၤနိအၤဒီး အဟံၣ်ဖိဃီဖိတဖၣ် အိၣ်မူဒ်ကစၢ်ယွၤ အတၢ်ဘၣ်သးအဃိ ဖဲထံလုၢ်ဘၢတၢ်အခါ အဝဲသ့ၣ်ပူၤဖျဲးဝဲလီၤ. (၁ မိၤၡ့ ၆:၉; ၁ ပ့းတရူး ၃:၂၀) ဖဲတၢ်အကတၢၢ် ဟဲအခါ ဒ်သိးပကပူၤဖျဲးအဂီၢ် ပဝဲစ့ၢ်ကီးပကဘၣ် ‘တိၢ်န့ၢ်ဖံးဃာ် ယွၤအတၢ်သိၣ်တၢ်သီ ထံထံဆးဆး’ ဒီးမၤအတၢ်ဘၣ်သးလီၤ.—စံးထီၣ်ပတြၢၤ ၁၁၉:၄.
၄ ပမ့ၢ် ‘မၤလိယွၤစံၣ်ညီၣ်တၢ်တီတဖၣ် ဒီးစံးထီၣ်ပတြၢၤအီၤလၢ ပသးစၢၢ်ဆၢ’ န့ၣ်ယဟိဝၤယွၤ တပာ်တ့ၢ်ပှၤဘၣ်. (စံးထီၣ်ပတြၢၤ ၁၁၉:၇, ၈) မ့ၢ်လၢပှၤအံၣ်စရ့လးဖိ အခိၣ်အနၢ် စီၤယိၤၡူဒိကနၣ်ဝဲ ကစၢ်ယွၤအတၢ်ဟ့ၣ်ကူၣ်လၢအမ့ၢ် “မ့မ့ၢ်နဘၣ်ဆိကမိၣ်လၢ အပူၤလၢ မုၢ်ဆါဒီးလၢမုၢ်နၤ, ဒ်သိးနကပလီၢ်နသး, ဒီးမၤတၢ်ဒ် ကယဲၢ်တၢ်ကွဲးအသးလၢအပူၤ” အဃိ ကစၢ်ယွၤ တလဲၤသဒၣ်အီၤဘၣ်. အဃိအဝဲမၤတၢ် ကဲထီၣ်လိၣ်ထီၣ် ဒီးမၤဝဲလၢ တၢ်ကူၣ်သ့အပူၤသ့ဝဲလီၤ. (ယိၤၡူ ၁:၈) ဖဲအဝဲဘူးကသံအခါဒၣ်လဲာ် စံးထီၣ်ပတြၢၤကစၢ်ယွၤ ဒီးဟ့ၣ်ဂံၢ်ဟ့ၣ်ဘါ ပှၤအံၣ်စရ့လးဖိတဖၣ်လၢ– “သုသ့ၣ်ညါလၢ သုသးခဲလၢာ်, ဒီးလၢသုသူၣ်ကံၢ်သးလဲအပူၤခဲလၢာ်, လၢတၢ်တဟါမၢ်ဘၣ်နီတမံၤလၢ ကယဲၢ်တၢ်ဂ့ၤလၢယွၤသုကစၢ်ကတိၤတၢ်လၢ သုဂ့ၢ်သုကျိၤန့ၣ်ဘၣ်.” (ယိၤၡူ ၂၃:၁၄) ဒ်သိးပကအိၣ်ဒီး တၢ်သူၣ်ခုသးခု ဒီးပမၤတၢ်ကကဲထီၣ်လိၣ်ထီၣ်အဂီၢ် ပကဘၣ်စံးထီၣ်ပတြၢၤ ယဟိဝၤယွၤ ဒီးနာ်န့ၢ်အီၤ ဒ်စီၤယိၤၡူ ဒီးပှၤကွဲးထါစံးထီၣ်ပတြၢၤ ၁၁၉ မၤဝဲအသိးလီၤ.
(စံးထီၣ်ပတြၢၤ ၁၁၉:၃၃–၄၀) ယွၤဧၢ, သိၣ်လိယၤလၢ နတၢ်မၤလိာ်အကျဲန့ၣ်တက့ၢ်. ဒီးယကတိၢ်န့ၢ်ဖံးဃာ် တုၤအကတၢၢ်လီၤ. ၃၄ ဒုးနၢ်ပၢၢ်ယၤတက့ၢ်, ဒီးယကတိၢ်န့ၢ်ဖံးဃာ် နတၢ်သိၣ်တၢ်သီန့ၣ်, ယကတိၢ်န့ၢ်လၢ ယသးဒီဖျၢၣ်ညါလီၤ. ၃၅ ဒုးလဲၤယၤလၢနတၢ်မၤလိာ်အကျဲန့ၣ်တက့ၢ်. အဂ့ၢ်ဒ်အံၤ, ယမုာ်လၤတၢ်လၢအပူၤလီၤ. ၃၆ ဘိးဃၣ်ယသးဆူတၢ်သးကွံတဂ့ၤ. မ့ၢ်ဆူနတၢ်အုၣ်နသးတဖၣ်တက့ၢ်. ၃၇ ဒုးဃၣ်ကွံာ်ယမဲာ်လၢ တၢ်ကလီကလီန့ၣ်တက့ၢ်. ဒုးမူထီၣ်က့ၤယၤလၢ နကျဲနကပူၤန့ၣ်တက့ၢ်. ၃၈ ဒုးအိၣ်ဂၢၢ်ဆိးကျၢၤ နကလုၢ်ကထါလၢ နခ့နပှၤလၢ အပျံၤနၤတဂၤအဂီၢ်အံၤတက့ၢ်. ၃၉ မၤပူၤမၤဖျဲးယၤလၢ တၢ်ဒုၣ်ဒွဲၣ်လၢ ယပျံၤအီၤန့ၣ်တက့ၢ်. အဂ့ၢ်ဒ်အံၤ, နတၢ်စံၣ်ညီၣ်တဖၣ်န့ၣ် မ့ၢ်အဂ့ၤအဘၣ်လီၤ. ၄၀ ကွၢ်ကွၢ်, ယဆၢန့ၢ်ဘၣ်နတၢ်မၤလိာ်လီၤ. မၤမူထီၣ်က့ၤယၤလၢ နတၢ်တီတၢ်လိၤန့ၣ်တက့ၢ်.
တၢး၀၅ ၄/၁၅ ကဘျံးပၤ ၁၂ အဆၢ ၁၂
သန့ၤနသးလၢ ယဟိဝၤယွၤ အကလုၢ်ကထါ
ယဟိဝၤယွၤ အကလုၢ်ကထါ ဟ့ၣ်ပှၤတၢ်သူၣ်ဒူသးဒူ
၁၂ ပမ့ၢ်အိၣ်မူဒ် ကစၢ်ယွၤအကလုၢ်ကထါ အတၢ်ဟံးစုနဲၣ်ကျဲအသိးန့ၣ် ပကဒိးန့ၢ်ဘၣ် တၢ်ဂံၢ်တၢ်ဘါ ဒ်သိးပလဲၤခီဖျိ တၢ်ကီတၢ်ခဲတဖၣ် ကန့ၢ်အဂီၢ်လီၤ. (စံးထီၣ်ပတြၢၤ ၁၁၉:၃၃-၄၀) လၢတၢ်ဆီၣ်လီၤသးအပူၤ ပကဘၣ်ဃု ယဟိဝၤယွၤ အတၢ်ဟံးစုနဲၣ်ကျဲ ဒ်သိးပဒိကနၣ် အတၢ်သိၣ်တၢ်သီလၢပ “သးဒီဖျၢၣ်” ကသ့အဂီၢ်လီၤ. (စံးထီၣ်ပတြၢၤ ၁၁၉:၃၃, ၃၄) ဒ်ပှၤကွဲးထါစံးထီၣ်ပတြၢၤအသိး ပဃ့ဘါထုကဖၣ်လၢ– “ဘိးဃၣ်ယသးဆူ တၢ်သးကွံတဂ့ၤ. မ့ၢ်ဆူနတၢ်အုၣ်နသးတဖၣ်တက့ၢ်.” (စံးထီၣ်ပတြၢၤ ၁၁၉:၃၆) ဒ်တၢ်မၢဖိပီလူးအသိး “တၢ်မိၣ်မၤပသးလၢ တၢ်အဂ့ၤလၢ တၢ်ခဲလၢာ်အပူၤလီၤ.” (ဧ့ၤဘြံၤ ၁၃:၁၈) ပတၢ်မၤခိၣ်တဂၤ မ့ၢ်အဲၣ်ဒိးလၢ ပကမၤတၢ်တတီတလိၤန့ၣ် ပကဘၣ်အိၣ်ဒီး တၢ်သူၣ်ဒူသးဒူ ဒ်သိးပအိၣ်မူ ဒ်ကစၢ်ယွၤ အတၢ်ဟံးစုနဲၣ်ကျဲကသ့အဂီၢ်လီၤ. ပမ့ၢ်မၤဒ်န့ၣ်န့ၣ် ယဟိဝၤယွၤ ကဆိၣ်ဂ့ၤပှၤထီဘိလီၤ. နီၢ်နီၢ်န့ၣ် ယဟိဝၤယွၤ မၤစၢၤပှၤဒ်သိး ပတြီဆၢကွံာ် ပတၢ်မိၣ်န့ၢ်သးလီလၢ အတဂ့ၤတဖၣ်ကန့ၢ်အဂီၢ်လီၤ. မ်ပကဃ့ဘါထုကဖၣ်သကိးလၢ– “ဒုးဃၣ်ကွံာ်ယမဲာ်လၢ တၢ်ကလီကလီန့ၣ်တက့ၢ်.” (စံးထီၣ်ပတြၢၤ ၁၁၉:၃၇) တၢ်လၢယဟိဝၤယွၤသးဟ့ဝဲတဖၣ်န့ၣ် ပတအဲၣ်ဒိးထံၣ်အီၤဒ် တၢ်လၢအလီၤဘၣ်သူၣ်ဘၣ်သး နီတဘျီဘၣ်. (စံးထီၣ်ပတြၢၤ ၉၇:၁၀) ပမ့ၢ်မၤဒ်န့ၣ်န့ၣ် ကထိၣ်ဟူးထိၣ်ဂဲၤထီၣ်ပှၤလၢ ပကဟးဆှဲး တၢ်ဂီၤဘ့ၣ်ဆ့ ဒီးတၢ်ဝံတၢ်နါ အတၢ်ဖံးတၢ်မၤတဖၣ်လီၤ.—၁ ကရံၣ်သူး ၆:၉, ၁၀; လီၣ်ဖျါ ၂၁:၈.
(စံးထီၣ်ပတြၢၤ ၁၁၉:၄၁–၄၈) ဒီးယွၤဧၢ, မ်နဘျုးနဖှိၣ်, နတၢ်အုၣ်က့ၤခီၣ်က့ၤဟဲဘၣ်ယၤ ဒ်နကလုၢ်ကထါအသိးန့ၣ်တက့ၢ်. ၄၂ ဒီးယကစံးဆၢပှၤလၢ အဒုၣ်ဒွဲၣ်ယၤလီၤ. အဂ့ၢ်ဒ်အံၤ, ယသန့ၤယသးလၢနကလုၢ်လီၤ. ၄၃ ဒီးဟံးထီၣ်ကွံာ် နတၢ်ကတိၤအမ့ၢ်အတီ လၢယထးခိၣ်တုၤအလၢာ်န့ၣ်တဂ့ၤ. အဂ့ၢ်ဒ်အံၤ, ယမုၢ်လၢ်လၢ နတၢ်စံၣ်ညီၣ်တဖၣ်န့ၣ်လီၤ. ၄၄ ဒီးယကတိၢ်န့ၢ်ဖံးဃာ်နတၢ်သိၣ်တၢ်သီတထံၣ်ဃီ အစိၤစိၤအဃၣ်ဃၣ်လီၤ. ၄၅ ဒီးယကလဲၤတၢ်လၢ အလီၢ်ဖးလဲၢ်လီၤ. အဂ့ၢ်ဒ်အံၤ, ယဃုနတၢ်မၤလိာ်လီၤ. ၄၆ ဒီးယကကတိၤတၢ်လၢ နတၢ်အုၣ်အသးအဂ့ၢ်လၢ စီၤပၤတဖၣ်အမဲာ်ညါ, ဒီးယမဲာ်တဆှးဘၣ်. ၄၇ ဒီးယကသူၣ်ဖှံသးညီလၢ နတၢ်မၤလိာ်လၢ ယအဲၣ်အီၤအပူၤန့ၣ်လီၤ. ၄၈ ဒီးယကယူာ်ထီၣ် ယစုဆူ နတၢ်မၤလိာ်လၢ ယအဲၣ်အီၤအအိၣ်န့ၣ်, ဒီးယကဆိကမိၣ် တၢ်လၢနတၢ်မၤလိာ်အဂ့ၢ်လီၤ.
တၢး၀၅ ၄/၁၅ ကဘျံးပၤ ၁၃ အဆၢ ၁၃–၁၄
သန့ၤနသးလၢ ယဟိဝၤယွၤ အကလုၢ်ကထါ
၁၃ တၢ်သ့ၣ်ညါနၢ်ပၢၢ် ကစၢ်ယွၤအကလုၢ်ကထါ လီၤတံၢ်လီၤဆဲးန့ၣ် မၤစၢၤပှၤ ဒ်သိးပကအိၣ်ဒီး တၢ်သူၣ်ဒူသးဒူ ဖဲပဟးစံၣ်တဲၤတဲလီၤတၢ်အခါန့ၣ်လီၤ. (စံးထီၣ်ပတြၢၤ ၁၁၉:၄၁-၄၈) ဒီးပလိၣ်ဘၣ် တၢ်ဂံၢ်တၢ်ဘါ ဒ်သိးပစံးဆၢ ‘ပှၤလၢအဒုၣ်ဒွဲၣ်ပှၤ’ ကသ့အဂီၢ်လီၤ. (စံးထီၣ်ပတြၢၤ ၁၁၉:၄၂) တဘျီတခီၣ် ပအဲၣ်ဒိးဃ့ဘါထုကဖၣ်တၢ် ဒ်ယ့ၣ်ၡူးအပျဲၢ်အဘီၣ်လၢ ဘၣ်တၢ်မၤနးမၤဖှီၣ်အီၤတဖၣ် ဃ့ဝဲအသိးလီၤ. အဝဲသ့ၣ်ဃ့ဝဲလၢ– “ကစၢ်ဧၢ, အဝဲသ့ၣ် အတၢ်ကတိၤ မၤပျံၤတၢ်န့ၣ်, ကွၢ်တက့ၢ်.” အဃိ အဝဲသ့ၣ် “ခဲလၢာ် လၢထီၣ်ပှဲၤထီၣ်ဒီးသးစီဆှံဒီး စံၣ်တဲၤတဲလီၤယွၤ အကလုၢ်ကထါလၢ အသးခူတလ့ၢ်လီၤ.” တၢ်ပၢကစၢ်အဒိၣ်ကတၢၢ် ဟ့ၣ်ပှၤတၢ်ဂံၢ်တၢ်ဘါ ဒ်သိးပစံၣ်တဲၤတဲလီၤ အကလုၢ်ကထါလၢ တၢ်သးဒူအပူၤကသ့အဂီၢ်လီၤ.—မၤတၢ် ၄:၂၄-၃၁.
၁၄ ပမ့ၢ်အဲၣ် “တၢ်ကတိၤအမ့ၢ်အတီ” ဒီး ‘တိၢ်န့ၢ်ဖံးဃာ် ယွၤအတၢ်သိၣ်တၢ်သီ တထံၣ်ဃီ’ န့ၣ်ဖဲပစံၣ်တဲၤတဲလီၤတၢ်အခါ ပကအိၣ်ဒီး တၢ်သူၣ်ဒူသးဒူ ဒီးပတမဲာ်ဆှးဘၣ်. (စံးထီၣ်ပတြၢၤ ၁၁၉:၄၃, ၄၄) ပမ့ၢ်ဂုာ်ကျဲးစၢး ဃုသ့ၣ်ညါ ယွၤအကလုၢ်ကထါန့ၣ် ကမၤစၢၤပှၤဒ်သိးပက ‘ကတိၤတၢ်လၢ ယွၤအတၢ်အုၣ်အသးအဂ့ၢ်လၢ စီၤပၤတဖၣ်အမဲာ်ညါ’ လီၤ. (စံးထီၣ်ပတြၢၤ ၁၁၉:၄၆) တၢ်ထုကဖၣ် ဒီးယဟိဝၤယွၤအသးစီဆှံန့ၣ် ကမၤစၢၤပှၤ ဒ်သိးပကတဲတၢ်လၢအဘၣ် ဒီးကျဲလၢအကြၢးအဘၣ်လီၤ. (မးသဲ ၁၀:၁၆-၂၀; ကလီးစဲ ၄:၆) စီၤပီလူးစံၣ်တဲၤတဲလီၤဝဲ ယွၤအကလုၢ်ကထါလၢတၢ်သူၣ်ဒူသးဒူအပူၤ ဆူပှၤပၢတၢ်လၢ တၢယၤဖှိၣ်အစိၤတဖၣ်အအိၣ်န့ၣ်လီၤ. အဒိ အဝဲစံၣ်တဲၤတဲလီၤဝဲ ရိမ့ၤအပဒိၣ်ဖ့လံးလၢအ “ဒိကနၣ် အကလုၢ်လၢတၢ်စူၢ်က့ၤနာ်က့ၤ ခရံာ်အဂ့ၢ်အကျိၤလီၤ.” (မၤတၢ် ၂၄:၂၄, ၂၅) ဒီးအဝဲစံၣ်တဲၤတဲလီၤတၢ်လၢ ပဒိၣ်စီၤဖ့စတူး ဒီးစီၤပၤအကြံးပၤအမဲာ်ညါစ့ၢ်ကီးလီၤ. (မၤတၢ် ၂၅:၂၂–၂၆:၃၂) ခီဖျိ ယဟိဝၤယွၤ အတၢ်မၤစၢၤအဃိ ပဝဲစ့ၢ်ကီး ပစံၣ်တဲၤတဲလီၤတၢ်လၢ တၢ်သူၣ်ဒူသးဒူအပူၤသ့ ဒီးပ “မဲာ်တဆှးဘၣ်လၢ . . . တၢ်သးခုအကစီၣ်ဘၣ်.”—ရိမ့ၤ ၁:၁၆.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(စံးထီၣ်ပတြၢၤ ၁၁၉:၇၁) ယဘၣ်တၢ်နးတၢ်ဖှီၣ်န့ၣ်ဂ့ၤဝဲလၢ ယဂီၢ်လၢယကမၤလိ နတၢ်မၤလိာ်အဂ့ၢ်လီၤ.
တၢး၀၆ ၉/၁ ကဘျံးပၤ ၁၄ အဆၢ ၄
လံာ်စီဆှံ အတၢ်ပာ်ဖျါလၢ ထါစံးထီၣ်ပတြၢၤအကူာ်ယဲၢ်
၁၁၉:၇၁ —ပမ့ၢ်တူၢ်တၢ်နးတၢ်ဖှီၣ်န့ၣ် ကကဲဘျုးလၢပဂီၢ်ဒ်လဲၣ်. တၢ်ကီတၢ်ခဲတဖၣ်န့ၣ် သိၣ်လိပှၤလၢ ပကသန့ၤအါထီၣ် ပသးလၢ ယဟိဝၤယွၤအအိၣ်, ပကဃ့ဘါထုကဖၣ်လၢ တၢ်သူၣ်ဆူၣ်သးဆူၣ်, ဂုာ်ကျဲးစၢးအါထီၣ်လၢ တၢ်မၤလိလံာ်စီဆှံအဂီၢ်ဒီး မၤထွဲအီၤန့ၣ်လီၤ. တကးဒံးဘၣ် ဖဲပတူၢ်ဘၣ်တၢ်နးတၢ်ဖှီၣ်အခါ ပကွၢ်ဆၢၣ်မဲာ်အီၤဒ်လဲၣ်န့ၣ် ပာ်ဖျါထီၣ်ဝဲ ပတၢ်ပာ်သူၣ်ပာ်သးလၢ ပကဘၣ်ဘှီဂ့ၤထီၣ်က့ၤအီၤသ့ဝဲန့ၣ်လီၤ. ပမ့ၢ်ထံၣ်တၢ်ကီတၢ်ခဲဒ် တၢ်လၢအမၤဂ့ၤထီၣ်ပှၤန့ၣ် ပတၢ်ကီတၢ်ခဲအံၤ တမ့ၢ်ကကီလၢပဂီၢ်ထဲထဲန့ၣ်ဘၣ်.
(စံးထီၣ်ပတြၢၤ ၁၁၉:၉၆) တၢ်လၢတၢ်ပှဲၤခဲလၢာ်အကတၢၢ်န့ၣ် ယထံၣ်ဘၣ်လံ, မ့မ့ၢ်နတၢ်မၤလိာ်န့ၣ်လဲၢ်မးဝဲလီၤ.
တၢး၀၆ ၉/၁ ကဘျံးပၤ ၁၄ အဆၢ ၅
လံာ်စီဆှံ အတၢ်ပာ်ဖျါလၢ ထါစံးထီၣ်ပတြၢၤအကူာ်ယဲၢ်
၁၁၉:၉၆—“တၢ်လၢတၢ်ပှဲၤခဲလၢာ် အကတၢၢ်န့ၣ် ယထံၣ်ဘၣ်လံ” န့ၣ်အဲၣ်ဒိးစံးဝဲ တၢ်မနုၤလဲၣ်. ဘၣ်ဃးဒီး တၢ်လၢတၢ်ပှဲၤလၢ ပှၤကွဲးထါစံးထီၣ်ပတြၢၤ ပာ်ဖျါဝဲန့ၣ် အဝဲတဲဝဲလၢ ပှၤဟီၣ်ခိၣ်ဖိ အတၢ်ထံၣ်လီၤ. အဝဲကသ့ၣ်ညါဝဲလၢ ပှၤဟီၣ်ခိၣ်ဖိ အတၢ်ထံၣ်လၢ ဘၣ်ဃးဒီးတၢ်လၢတၢ်ပှဲၤန့ၣ် အိၣ်ဒီးအပတီၢ်လီၤ. ဘၣ်ဆၣ် ကစၢ်ယွၤ အတၢ်မၤလိာ်န့ၣ် အတၢ်လီၤတူာ်လီၤကာ်တအိၣ်ဘၣ်. ကစၢ်ယွၤ အတၢ်ဟံးစုနဲၣ်ကျဲန့ၣ် ဘၣ်ထွဲလိာ်အသးဒီး ပတၢ်အိၣ်မူထီဘိလီၤ. New International Version ပာ်ဖျါထီၣ်ဝဲလၢ “ယထံၣ်ဘၣ်လၢ တၢ်လၢတၢ်ပှဲၤခဲလၢာ်န့ၣ် အိၣ်ဒီးအပတီၢ်, မ့မ့ၢ်နတၢ်မၤလိာ်န့ၣ် အတၢ်လီၤတူာ်လီၤကာ်တအိၣ်ဘၣ်.”
လါစဲးပတ့ဘၢၣ် ၁၂–၁၈
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | စံးထီၣ်ပတြၢၤ ၁၂၀–၁၃၄
“တၢ်မၤစၢၤယၤန့ၣ် ဟဲဝဲလၢယွၤ”
(စံးထီၣ်ပတြၢၤ ၁၂၁:၁, ၂) ယကကျ့ထီၣ်ယမဲာ်ဆူ ကစၢၢ်ကလိဖဲ တၢ်မၤစၢၤယၤဟဲဝဲလီၤ. ၂ တၢ်မၤစၢၤယၤန့ၣ် ဟဲဝဲလၢ ယွၤလၢအတ့လီၤမူခိၣ်, ဒီးဟီၣ်ခိၣ်တဂၤအအိၣ်လီၤ.
တၢး၀၄ ၁၂/၁၅ ကဘျံးပၤ ၁၂ အဆၢ ၃
ယဟိဝၤယွၤ မ့ၢ်ကစၢ်လၢ အမၤစၢၤပှၤ
တၢ်မၤစၢၤ အဂံၢ်ခီၣ်ထံး
၃ ပှၤကွဲးထါစံးထီၣ်ပတြၢၤ ပာ်ဖျါဝဲလၢ ယဟိဝၤယွၤမ့ၢ် တၢ်ဘၣ်တ့ကစၢ်လၢ ပနာ်န့ၢ်အီၤသ့လီၤ. အဝဲကွဲးဝဲလၢ– “ယကကျ့ထီၣ်ယမဲာ်ဆူ ကစၢၢ်ကလိဖဲ တၢ်မၤစၢၤယၤဟဲဝဲလီၤ. တၢ်မၤစၢၤယၤန့ၣ် ဟဲဝဲလၢ ယွၤလၢအတ့လီၤမူခိၣ်, ဒီးဟီၣ်ခိၣ်တဂၤအအိၣ်လီၤ.” (စံးထီၣ်ပတြၢၤ ၁၂၁:၁, ၂) ပှၤကွဲးထါစံးထီၣ်ပတြၢၤ တကျ့ထီၣ်အမဲာ်ဆူ ကစၢၢ်ကလိအဂၤအအိၣ်ဘၣ်. ဖဲအဝဲကွဲးဝဲ တၢ်ကတိၤအံၤအခါ ယဟိဝၤယွၤ အတၢ်လုၢ်ဟံၣ်န့ၣ် အိၣ်လၢဝ့ၢ်ယရူၤၡလ့ၣ်လီၤ. ဝ့ၢ်အံၤအိၣ်လၢ ယူဒၤအကစၢၢ်ခိၣ် ဒီးဒိလီၤဝဲ ယဟိဝၤယွၤ အတၢ်အိၣ်တၢ်ဆိးအလီၢ်လီၤ. (စံးထီၣ်ပတြၢၤ ၁၃၅:၂၁) ဘၣ်သ့ၣ်သ့ၣ် ပှၤကွဲးထါစံးထီၣ်ပတြၢၤ ကကျ့ထီၣ်အမဲာ်ဆူ ကစၢၢ်ခိၣ်လၢ ဝ့ၢ်ယရူၤၡလ့ၣ် ဒီးယဟိဝၤယွၤ အတၢ်လုၢ်ဟံၣ်အိၣ်အလီၢ် ဒီးနာ်ဝဲလၢ ယဟိဝၤယွၤ ကမၤစၢၤအီၤ သပှၢ်ကတၢၢ်လီၤ. ဘၣ်မနုၤအဃိ ပှၤကွဲးထါစံးထီၣ်ပတြၢၤ နာ်ဝဲလၢ ယဟိဝၤယွၤ ကမၤစၢၤအီၤသပှၢ်ကတၢၢ်လဲၣ်. မ့ၢ်လၢကစၢ်မ့ၢ် “ယွၤလၢအတ့လီၤမူခိၣ်, ဒီးဟီၣ်ခိၣ်” အဃိလီၤ. နီၢ်နီၢ်န့ၣ် ပှၤကွဲးထါစံးထီၣ်ပတြၢၤတဂၤအံၤ တဲဝဲလၢ ‘ဒ်သိးတၢ်ဘၣ်တ့ကစၢ် လၢအစိဒိၣ်အကမီၤထီတဂၤ ကမၤစၢၤယၤအဂီၢ် တၢ်တြီအီၤတသ့ နီတမံၤဘၣ်.’—ယၡါယၤ ၄၀:၂၆.
(စံးထီၣ်ပတြၢၤ ၁၂၁:၃, ၄) တဟ့ၣ်နခီၣ်လီၤတလံာ်ဘၣ်. ပှၤလၢအကွၢ်လီၤနၤတဂၤန့ၣ် တမံဘၣ်ဝဲဘၣ်. ၄ ကွၢ်ကွၢ်, ပှၤလၢအကွၢ်အံၣ်စရ့လးတဂၤန့ၣ်တမံဘၣ်, ဒီးတမံခ့ဘၣ်.
တၢး၀၄ ၁၂/၁၅ ကဘျံးပၤ ၁၂ အဆၢ ၄
ယဟိဝၤယွၤ မ့ၢ်ကစၢ်လၢ အမၤစၢၤပှၤ
၄ ပှၤကွဲးထါစံးထီၣ်ပတြၢၤ တဲကဒီးဝဲလၢ ယဟိဝၤယွၤ အိၣ်ကတဲာ်ကတီၤအသးလၢ ကမၤစၢၤအခ့အပှၤအဂီၢ်ထီဘိလီၤ. အဝဲတဲဝဲလၢ– “တဟ့ၣ်နခီၣ်လီၤတလံာ်ဘၣ်. ပှၤလၢအကွၢ်လီၤနၤတဂၤန့ၣ် တမံဘၣ်ဝဲဘၣ်. ကွၢ်ကွၢ်, ပှၤလၢအကွၢ်အံၣ်စရ့လးတဂၤန့ၣ် တမံဘၣ်, ဒီးတမံခ့ဘၣ်.” (စံးထီၣ်ပတြၢၤ ၁၂၁:၃, ၄) ယဟိဝၤယွၤ တဟ့ၣ်အခွဲးလၢ ပှၤလၢအသန့ၤအသးလၢအီၤတဖၣ် ‘အခီၣ်ကလီၤတလံာ်’ မ့တမ့ၢ် ကလီၤဃံၤဝဲ တုၤဒၣ်လဲာ်ဆၢထၢၣ်က့ၤဝဲတန့ၢ်န့ၣ်ဘၣ်. (ကတိၤဒိ ၂၄:၁၆) ဘၣ်မနုၤအဃိလဲၣ်. မ့ၢ်လၢ ယဟိဝၤယွၤ လီၤဂာ်ဒ် ပှၤကွၢ်သိလၢ အတမံခ့ဘၣ် ဒီးအံးထွဲကွၢ်ထွဲဝဲအသိဂ့ၤဂ့ၤအဃိလီၤ. တၢ်အံၤလီၤသူၣ်မံသးမုာ်ဒိၣ်မးလီၤ. ထဲတစိၢ်ဖိဒၣ်လဲာ် ယဟိဝၤယွၤတမံခ့ဝဲဘၣ် ဒီးအိၣ်ကတဲာ်ကတီၤအသးလၢ ကမၤစၢၤအပှၤဂီၢ်မုၢ်အဂီၢ်န့ၣ်လီၤ. ယဟိဝၤယွၤ အံးထွဲကွၢ်ထွဲ အဝဲသ့ၣ် မုၢ်ဆါဆဲးလၢမုၢ်နၤလီၤ.
(စံးထီၣ်ပတြၢၤ ၁၂၁:၅–၈) ယွၤမ့ၢ်ပှၤလၢ အကွၢ်လီၤနၤလီၤ. ယွၤမ့ၢ်နတၢ်ကဒု အိၣ်လၢနစုထွဲတခီလီၤ. ၆ မုၢ်တမၤဆါဘၣ်နၤလၢ မုၢ်ဆါခီဘၣ်, ဒီးလါန့ၣ်လၢမုၢ်နၤဘၣ်. ၇ ယွၤကခိးတြီကွံာ်တၢ်အၢလၢနၤခဲလၢာ်လီၤ. ကအံးလီၤကကွၢ်လီၤနသးလီၤ. ၈ နဟးထီၣ်တၢ်, ဒီးနဟဲက့ၤတၢ်န့ၣ် တုၤအံၤဆူညါ ယွၤကအံးက့ၤကကွၢ်က့ၤဝဲ လီၤထူလီၤယိာ်လီၤ.
တၢး၀၄ ၁၂/၁၅ ကဘျံးပၤ ၁၃ အဆၢ ၅–၇
ယဟိဝၤယွၤ မ့ၢ်ကစၢ်လၢ အမၤစၢၤပှၤ
၅ ပှၤကွဲးထါစံးထီၣ်ပတြၢၤ နာ်ဝဲလၢ ယဟိဝၤယွၤ ဒီသဒၢအပှၤဂီၢ်မုၢ်လၢ တၢ်သးတီအပူၤအဃိ ကွဲးဝဲလၢ– “ယွၤမ့ၢ်ပှၤလၢအကွၢ်လီၤနၤလီၤ. ယွၤမ့ၢ်နတၢ်ကဒုအိၣ်လၢ နစုထွဲတခီလီၤ. မုၢ်တမၤဆါဘၣ်နၤလၢ မုၢ်ဆါခီဘၣ်, ဒီးလါန့ၣ်လၢမုၢ်နၤဘၣ်.” (စံးထီၣ်ပတြၢၤ ၁၂၁:၅, ၆) ပှၤလဲၤတၢ်ဖိလၢ အလဲၤတၢ်လၢအခီၣ် လၢမုၢ်ထီၣ်တၢ်ခၢၣ်သး အလီၢ်ကဝီၤ (Middle East) တဂၤအဂီၢ် တၢ်အိၣ်ကဒုအလီၢ်န့ၣ် ဒီသဒၢအီၤလၢ တၢ်ကိၢ်ဆါလီၤ. ယဟိဝၤယွၤ လီၤဂာ်ဒ်တၢ်ကဒုအလီၢ်လၢ အပှၤဂီၢ်မုၢ်အဂီၢ် ဒီးဒီသဒၢအဝဲသ့ၣ်လၢ တၢ်ကိၢ်တၢ်ဂီၤလၢ အတူၢ်ဝဲတကဲဘၣ်န့ၣ်လီၤ. ပာ်သူၣ်ပာ်သးလၢ ယဟိဝၤယွၤ အိၣ်လၢပ “စုထွဲ” တခီန့ၣ်တက့ၢ်. လၢပျၢၤ ဖဲပှၤသုးဖိတဖၣ် ဒုးတၢ်အခါ အဝဲသ့ၣ်စိာ်ဃာ်ဝဲကတီၤ လၢအစုစ့ၣ်အဃိ ဒီသဒၢဝဲအစုထွဲတခီတသ့ လၢလၢပှဲၤပှဲၤဘၣ်. အတံၤသကိးလၢ အိၣ်ဒီးတၢ်သးတီတဂၤန့ၣ် ကဆၢထၢၣ်ဒုးတၢ်လၢ အဝဲအစုထွဲတကပၤ ဒီးဒီသဒၢအီၤလီၤ. ဒ်တံၤသကိးတဂၤအံၤအသိး ယဟိဝၤယွၤ အိၣ်ဆၢထၢၣ်လၢ ပှၤလၢအဘူၣ်ထီၣ်ဘါထီၣ်အီၤတဖၣ် အကပၤလၢ တၢ်သးတီအပူၤ ဒီးအိၣ်ကတဲာ်ကတီၤအသး လၢကမၤစၢၤအီၤလီၤ.
၆ မ့ၢ်ယဟိဝၤယွၤ အိၣ်ပတုာ်လၢတၢ်မၤစၢၤ အခ့အပှၤတဖၣ်တဘျီဘျီဧါ. တအိၣ်ပတုာ်ဝဲနီတဘျီဘၣ်. ပှၤကွဲးထါစံးထီၣ်ပတြၢၤကွဲးဝဲလၢ– “ယွၤကခိးတြီကွံာ် တၢ်အၢလၢနၤခဲလၢာ်လီၤ. ကအံးလီၤကကွၢ်လီၤနသးလီၤ. နဟးထီၣ်တၢ်, ဒီးနဟဲက့ၤတၢ်န့ၣ် တုၤအံၤဆူညါ ယွၤကအံးက့ၤကကွၢ်က့ၤဝဲ လီၤထူလီၤယိာ်လီၤ.” (စံးထီၣ်ပတြၢၤ ၁၂၁:၇, ၈) ပာ်သူၣ်ပာ်သးလၢ ပှၤကွဲးထါစံးထီၣ်ပတြၢၤ ပာ်ဖျါဝဲတၢ်ကတိၤလၢအမ့ၢ် တုၤအံၤဒီးဆူညါတက့ၢ်. ဖဲအဆၢဖိ ၅ တဲဝဲလၢ– “ယွၤမ့ၢ်ပှၤလၢအကွၢ်လီၤနၤလီၤ.” ဘၣ်ဆၣ် လၢအဆၢဖိခံဆၢအံၤအပူၤ တဲဝဲလၢ ယဟိဝၤယွၤ “ကအံးလီၤကကွၢ်လီၤနသးလီၤ.” အဃိ ပှၤလၢအဘူၣ်ထီၣ်ဘါထီၣ်တၢ် အမ့ၢ်အတီတဖၣ် နာ်န့ၢ်ဝဲသ့လၢ ယဟိဝၤယွၤ ကမၤစၢၤအဝဲသ့ၣ်လၢ ခါဆူညါစ့ၢ်ကီးလီၤ. ဖဲအဝဲသ့ၣ် လဲၤတၢ်လီၢ်တပူၤဂ့ၤတပူၤဂ့ၤ, ကွၢ်ဆၢၣ်မဲာ်ဘၣ် တၢ်ကီတၢ်ခဲ တခါဂ့ၤတခါဂ့ၤ ကဒိးန့ၢ်ဘၣ် ယဟိဝၤယွၤ အစုအတၢ်မၤစၢၤထီဘိလီၤ.—ကတိၤဒိ ၁၂:၂၁.
၇ ပှၤကွဲးထါစံးထီၣ်ပတြၢၤ ၁၂၁ နာ်ဝဲလၢ တၢ်ဘၣ်တ့ကစၢ်လၢ အသ့တၢ်လၢာ်တဂၤ အံးထွဲကွၢ်ထွဲဝဲ အခ့အပှၤတဖၣ် ဒ်ပှၤကွၢ်သိလၢ အပှဲၤဒီးတၢ်အဲၣ်တၢ်သးကညီၤ ဒီးပှၤခိးတၢ်ဖိလၢ အတမံခ့ဘၣ်တဂၤအသိးန့ၣ်လီၤ. မ့ၢ်လၢယဟိဝၤယွၤ တကဒံကဒါဘၣ်အဃိ ပဝဲသ့ၣ်စ့ၢ်ကီး ပနာ်န့ၢ်အီၤဒ် ပှၤကွဲးထါစံးထီၣ်ပတြၢၤအသိးသ့ဝဲလီၤ. (မၤလကံ ၃:၆) တၢ်အံၤအဲၣ်ဒိးစံးဝဲ ယဟိဝၤယွၤ ကဒီသဒၢပှၤလၢ နီၢ်ခိတကပၤထီဘိဧါ. တမ့ၢ်ဘၣ်. ဘၣ်ဆၣ် ဒ်ပဆဲးဃ့တၢ်မၤစၢၤ လၢယဟိဝၤယွၤအအိၣ်အသိး အဝဲကဒီသဒၢပှၤလၢ တၢ်လၢကမၤဘၣ်ဒိပနီၢ်သး ခဲလၢာ်လီၤ. ညီနုၢ်ပှၤအါဂၤသံကွၢ်ဝဲလၢ ‘မ့ၢ်ယဟိဝၤယွၤ ကမၤစၢၤပှၤလၢ ကျဲဒ်လဲၣ်.’ ပကသမံသမိးကွၢ် ကျဲလွံၢ်ဘိလၢ အဝဲမၤစၢၤပှၤလီၤ. လၢတၢ်မၤလိအံၤအပူၤ ပကတဲသကိးတၢ်ဂ့ၢ်လၢ ဘၣ်ဃးဒီးလၢပျၢၤ ယဟိဝၤယွၤ မၤစၢၤတ့ၢ်အခ့အပှၤတဖၣ်ဒ်လဲၣ် ဒီးတၢ်မၤလိလၢခံတခါန့ၣ် ပကမၤလိဘၣ် တၢ်ဂ့ၢ်လၢဘၣ်ဃးဒီး မုၢ်မဆါတနံၤအံၤ ယဟိဝၤယွၤ မၤစၢၤအခ့အပှၤတဖၣ် ဒ်လဲၣ်န့ၣ်လီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(စံးထီၣ်ပတြၢၤ ၁၂၃:၂) ကွၢ်ကွၢ်, ဒ်အခ့အပှၤပိာ်ခွါအမဲာ်ကွၢ်ဆူ အကစၢ်ပိာ်ခွါ အစုအသိး, ဒ်အခ့အပှၤပိာ်မုၣ် အမဲာ်ကွၢ်ဆူအကစၢ်မုၣ် အစုအသိးန့ၣ် ပမဲာ်ကွၢ်ဆူယွၤပကစၢ်အအိၣ်ဒ်န့ၣ်သိး, တုၤအသူၣ်ကညီၤသးကညီၤပှၤလီၤ.
တၢး၀၆ ၉/၁ ကဘျံးပၤ ၁၅ အဆၢ ၄
လံာ်စီဆှံ အတၢ်ပာ်ဖျါလၢ ထါစံးထီၣ်ပတြၢၤအကူာ်ယဲၢ်
၁၂၃:၂—တၢ်အဒိလၢဘၣ်ဃးဒီး အခ့အပှၤအမဲာ် န့ၣ်အဲၣ်ဒိးစံးဝဲတၢ်မနုၤလဲၣ်. ကုၢ်တဖၣ်ကွၢ်လၢ်အကစၢ်လၢ တၢ်ဂ့ၢ်ခံမံၤအံၤအဃိလီၤ. တၢတမံၤန့ၣ် ဒ်သိးအဝဲသ့ၣ်ကသ့ၣ်ညါ အကစၢ်အတၢ်ဘၣ်သး ဒီးခံမံၤတမံၤန့ၣ် ဒ်သိးကဒိးန့ၢ်ဘၣ်အကစၢ် အတၢ်ဒီသဒၢဒီး တၢ်မၤစၢၤလၢအတၢ်အိၣ်မူပူၤအဂီၢ်လီၤ. ဒ်န့ၣ်အသိး ပဝဲခဲလၢာ်ပကွၢ်လၢ် ယဟိဝၤယွၤ ဒ်သိးပကသ့ၣ်ညါကစၢ်ယွၤအတၢ်ဘၣ်သးဒီး ဒိးန့ၢ်ဘၣ်အတၢ်ဆိၣ်ဂ့ၤအဂီၢ်လီၤ.
(စံးထီၣ်ပတြၢၤ ၁၃၃:၁–၃) ဒီပုၢ်ဝဲၢ်အိၣ်ဝဲဆိးဝဲလၢ အသးတဖျၢၣ်ဃီအံၤ, ဂ့ၤဆံးဒိၣ်လဲၣ်, ဒီးမုာ်ဆံးဒိၣ်လဲၣ် ဆံးဒိၣ်လဲၣ်န့ၣ် ကွၢ်ကွၢ်တက့ၢ်. ၂ မၤသးဒ်သိလုၢ်ဒိၣ်ပှ့ၤဒိၣ် အိၣ်လၢအခိၣ်လၢ အယွၤလီၤပၢၢ်လၢ အခၣ်ဆူၣ်, စီၤအၤဟရိၣ် အခၣ်ဆူၣ်, လၢအယွၤလီၤပၢၢ်လၢ အဆ့အခီၣ်ထံးအသိးန့ၣ်, ၃ မၤသးဒ်ကစၢၢ်ဃ့ၤရမိၣ်အပစီၤထံလၢ အလီၤဘၣ်လၢစံယိၣ်အကစၢၢ်ကလိအလိၤအသိးန့ၣ်လီၤ. အဂ့ၢ်ဒ်အံၤ, ယွၤမၤလိာ်တၢ်ဆိၣ်ဂ့ၤ, တၢ်မူအထူအယိာ်ဖဲန့ၣ်လီၤ.
တၢး၀၆ ၉/၁ ကဘျံးပၤ ၁၆ အဆၢ ၃
လံာ်စီဆှံ အတၢ်ပာ်ဖျါလၢ ထါစံးထီၣ်ပတြၢၤအကူာ်ယဲၢ်
၁၃၃:၁–၃. ယဟိဝၤယွၤ အပှၤဂီၢ်မုၢ် အတၢ်ဃူတၢ်ဖိးန့ၣ် ဒုးအိၣ်ထီၣ် တၢ်မုာ်တၢ်ခုၣ်, တၢ်ဘျုးတၢ်ဖှိၣ် ဒီးတၢ်သူၣ်ဖှံသးညီလီၤ. ပတကြၢးမၤဟးဂီၤ တၢ်သ့ၣ်တဖၣ်အံၤ ခီဖျိလၢ ပဃုတၢ်ကမၣ်, တၢ်အ့ၣ်လိာ်ဆိးက့ ဒီးတၢ်ကဒူးကဒ့ၣ်တၢ်ဘၣ်.
လါစဲးပတ့ဘၢၣ် ၁၉–၂၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | စံးထီၣ်ပတြၢၤ ၁၃၅–၁၄၁
“တၢ်တ့လီၤယၤအိၣ်ဒီး . . . ကမၢကမၣ်အလီၢ်”
(စံးထီၣ်ပတြၢၤ ၁၃၉:၁၄) တၢ်တ့လီၤယၤအိၣ်ဒီး ပျံၤတၢ်အလီၢ်, ဒီးကမၢကမၣ်တၢ်အလီၢ်လီၤ. မၤသးဒ်န့ၣ်ဒီး ယကစံးထီၣ်ပတြၢၤနၤလီၤ. နတၢ်မၤတဖၣ် လီၤလးဝဲန့ၣ်ယသ့ၣ်ညါသပှၢ်ပှၢ်လီၤ.
တၢး၀၇ ၆/၁၅ ကဘျံးပၤ ၂၁ အဆၢ ၁–၄
“တၢ်တ့လီၤယၤအိၣ်ဒီး . . . ကမၢကမၣ်အလီၢ်”
ဟီၣ်ခိၣ်အံၤပှဲၤဝဲဒီး တၢ်ဘၣ်တ့လၢ အလီၤကမၢကမၣ်တဖၣ်လီၤ. တၢ်သ့ၣ်တဖၣ်အံၤ ဟဲကဲထီၣ်အသးဒ်လဲၣ်. ပှၤတနီၤနီၤနာ်ဝဲလၢ ပမ့ၢ်တနာ်တၢ်ဘၣ်တ့ကစၢ် သနာ်က့ ပဃုထံၣ်န့ၢ် တၢ်စံးဆၢသ့ဝဲလီၤ. မ့မ့ၢ် ပှၤတနီၤနီၤနာ်ဝဲလၢ ပမ့ၢ်တနာ် တၢ်ဘၣ်တ့ကစၢ်န့ၣ် ပကနၢ်ပၢၢ်တၢ်ဘၣ်တ့အဂ့ၢ် ထဲဒၣ်တစဲးဖိလီၤ. ဒီးအဝဲသ့ၣ် နာ်ဝဲလၢ တၢ်ဘၣ်တ့တဖၣ်န့ၣ် ပနၢ်ပၢၢ်ဘၣ်အီၤကီ, အိၣ်အါအါဂီၢ်ဂီၢ် ဒီးလီၤကမၢကမၣ်ဒိၣ်မးအဃိ ဟဲကဲထီၣ်ဒၣ်အတၢ်ဒၣ်ဝဲတသ့ဘၣ်. ပှၤအါဂၤဒီး ပှၤစဲအ့ၣ်ဖိတဖၣ်စ့ၢ်ကီး တူၢ်လိာ်ဝဲလၢ တၢ်အုၣ်အသးတဖၣ် ပာ်ဖျါထီၣ်ဝဲလၢ တၢ်ဘၣ်တ့ကစၢ်လၢ အပှဲၤဒီးတၢ်အဲၣ်, တၢ်ကူၣ်သ့ဒီး တၢ်စိတၢ်ကမီၤ တဂၤတ့လီၤဝဲ မူဟီၣ်ကယၢလီၤ.
၂ လၢပျၢၤ ပှၤအံၣ်စရ့လးဖိ အစီၤပၤစီၤဒၤဝံး နာ်ဝဲလၢ တၢ်ဘၣ်တ့ကစၢ် ကြၢးဒိးန့ၢ် တၢ်စံးထီၣ်ပတြၢၤအီၤ ခီဖျိလၢ အတၢ်ဘၣ်တ့လၢ အလီၤလိၢ်လီၤလးတဖၣ်အဃိလီၤ. စီၤဒၤဝံးအိၣ်မူဝဲ တချုးလၢ စဲအ့ၣ်အတၢ်လဲၤထီၣ်လဲၤထီ အိၣ်ထီၣ်ဒံးဘၣ် အပူၤကွံာ် အနံၣ်အါမးသနာ်က့ အဝဲထံၣ်ဘၣ် ကစၢ်ယွၤ အတၢ်ဘၣ်တ့လၢ အလီၤကမၢကမၣ်တဖၣ် လၢအအိၣ်လၢအခိၣ်အဃၢၤလီၤ. အဝဲဆိကမိၣ်လီၤက့ၤ အနီၢ်ဒီဂၤညါအဂ့ၢ် ဒီးကမၢကမၣ်ဝဲလၢ တၢ်ဘၣ်တ့ကစၢ် အတၢ်သ့တၢ်ဘၣ်အဃိလီၤ. ဒီးကွဲးဝဲလၢ “တၢ်တ့လီၤယၤ အိၣ်ဒီးပျံၤတၢ်အလီၢ်, ဒီးကမၢကမၣ်တၢ်အလီၢ်လီၤ. . . . နတၢ်မၤတဖၣ် လီၤလးဝဲန့ၣ်ယသ့ၣ်ညါသပှၢ်ပှၢ်လီၤ.”—စံးထီၣ်ပတြၢၤ ၁၃၉:၁၄.
၃ ခီဖျိလၢ စီၤဒၤဝံးဆိကမိၣ်တၢ် ထံထံဆးဆးအဃိ နာ်ဝဲဒ်န့ၣ်သ့ သပှၢ်ကတၢၢ်လီၤ. မုၢ်မဆါတနံၤအံၤ ကၠိအလံာ်ဒီး မံဒံယါတဖၣ် သိၣ်လိဝဲ တၢ်သိၣ်တၢ်သီလၢ ကမၤဟးဂီၤကွံာ် တၢ်နာ်လၢ ဘၣ်ဃးဒီး ပှၤဟီၣ်ခိၣ်ဖိတဖၣ် ဟဲကဲထီၣ်ဒ်လဲၣ်န့ၣ်လီၤ. အဃိ ဘၣ်ဃးဒီး တၢ်ဘၣ်တ့ကစၢ်ဒီး တၢ်လၢအမၤဝဲတဖၣ်အဂ့ၢ်န့ၣ် ပတဘၣ်ဟးနာ်တၢ် ဒ်ပှၤဂၤနာ်ဝဲအသိးဘၣ်. ဒ်သိးပကအိၣ်ဒီး တၢ်နာ်ဒ်စီၤဒၤဝံးအဂီၢ် ပကဘၣ်ဆိကမိၣ်တၢ်လၢ ပနီၢ်ကစၢ်ထံထံဆးဆးလီၤ.
၄ တကးဒံးဘၣ် ပမ့ၢ်ဆိကမိၣ်ထံ တၢ်လၢယဟိဝၤယွၤ မၤဝဲတဖၣ်န့ၣ် ကကဲထီၣ်တၢ်ဂံၢ်တၢ်ဘါဒ်သိး ပကပာ်လုၢ်ပာ်ပှ့ၤအီၤ ဒီးနာ်န့ၢ်အတၢ်အၢၣ်လီၤအီလီၤလၢ ခါဆူညါအဂီၢ်လီၤ. ပမ့ၢ်မၤဒ်အံၤန့ၣ် ကထိၣ်ဟူးထိၣ်ဂဲၤထီၣ်ပှၤလၢ ပကအဲၣ်ဒိးသ့ၣ်ညါအါထီၣ် ယဟိဝၤယွၤအဂ့ၢ်ဒီး မၤအတၢ်မၤန့ၣ်လီၤ. အဃိ ပကသမံသမိးကွၢ် တၢ်ဂ့ၢ်လၢဘၣ်ဃးဒီး ပှၤစဲအ့ၣ်ဖိလၢ မုၢ်မဆါတနံၤအံၤ တူၢ်လိာ်ဝဲ စီၤဒၤဝံးအတၢ်ကတိၤလၢအမ့ၢ် ပဘၣ်တၢ်တ့လီၤပှၤအိၣ်ဒီး “ကမၢကမၣ်တၢ်အလီၢ်” လီၤ.
(စံးထီၣ်ပတြၢၤ ၁၃၉:၁၅, ၁၆) ဖဲတၢ်တ့လီၤယၤလၢ တၢ်တဒၢ, ဖဲတၢ်တ့ယၤလၢဟီၣ်ခိၣ် အယိာ်ပူၤန့ၣ်ယက့ၢ်ယဂီၤ တအိၣ်ခူသူၣ်ဘၣ်ဒီးနၤဘၣ်. ၁၆ ယတၢ်တလိၣ်န့ၣ် နမဲာ်ထံၣ်အီၤလီၤ. ဒီးဘၣ်ကွဲးအသးလၢ နလံာ်ပူၤခဲလၢာ်မုၢ်နံၤတဖၣ်လၢ အကကဲထီၣ်ဒီး တအိၣ်ဒံးဘၣ်နီတနံၤဘၣ်.
တၢး၀၇ ၆/၁၅ ကဘျံးပၤ ၂၂–၂၃ အဆၢ ၇–၁၁
“တၢ်တ့လီၤယၤအိၣ်ဒီး . . . ကမၢကမၣ်အလီၢ်”
၇ “ဖဲတၢ်တ့လီၤယၤလၢတၢ်တဒၢ, ဖဲတၢ်တ့ယၤလၢဟီၣ်ခိၣ် အယိာ်ပူၤန့ၣ် ယက့ၢ်ယဂီၤတအိၣ်ခူသူၣ်ဘၣ်ဒီးနၤဘၣ်.” (စံးထီၣ်ပတြၢၤ ၁၃၉:၁၅) စဲ(လ်) လၢအခီၣ်ထံးတခါ ကဲထီၣ်အသးဝံၤအလီၢ်ခံ နီၤဖးထီၣ်အသးဒီး စဲ(လ်) လၢအသီတဖၣ် ဟဲအါထီၣ်ဝဲကွ့ၢ်ကွ့ၢ်လီၤ. ဒီးလၢခံစဲ(လ်) တဖၣ်အံၤ ကဲထီၣ်ဝဲ ထူၣ်ပျၢ်အစဲ(လ်), ညၣ်ထူၣ်အစဲ(လ်), ဖံးဘ့ၣ်အစဲ(လ်)တဖၣ် ဒီးစဲ(လ်)လၢအဂၤတဖၣ်လီၤ. ဒီးစဲ(လ်)လၢ အကလုာ်လီၤဂာ်လိာ်အသးတဖၣ်န့ၣ် ပာ်ဖှိၣ်ထီၣ်အသးဒီး ကဲထီၣ်ဝဲထံးၡူ (tissues) ဝံၤကဲထီၣ်ဝဲက့ၢ်ဂီၤတဖၣ်လီၤ. ဖဲပှၤဒၢနၤအိၣ်သၢနွံအခါ နဃံတဖၣ်စးထီၣ်ဟဲကဲထီၣ်အသးလီၤ. ဒ်နမ့ၢ်ပှၤလၢ အဒိၣ်တုာ်ခိၣ်ပှဲၤတဂၤအသိး နဃံအိၣ်ဝဲ ၂၀၆ ဘိလီၤ. ဒီးဖဲပှၤဒၢနၤအိၣ်နွံ,နွံ ဒီးနအိၣ်ဒၣ်ထဲ စုမုၢ်ကျၢၢ်အခါ နဃံတဖၣ်တအိၣ်ဒံးဘၣ်သနာ်က့ နဃံ ၂၀၆ ဘိအံၤ အိၣ်ပာ်စၢၤလၢအလီၢ်ဒၣ်ဝဲလီၤ.
၈ တၢ်မၤအသးလၢ အလီၤကမၢကမၣ်တဖၣ်အံၤ ဟဲကဲထီၣ်အသးလၢ ပှၤဟီၣ်ခိၣ်ဖိအမဲာ်တဒၢအလီၢ်, ဟီၣ်ခိၣ်အယိာ်ပူၤလၢအမ့ၢ် မိၢ်အဒၢလီၢ်ပူၤလီၤ. နီၢ်နီၢ် ပှၤတဂၤဟဲကဲထီၣ်အသးဒ်လဲၣ်အဂ့ၢ်န့ၣ် တၢ်လၢပှၤဟီၣ်ခိၣ်ဖိတဖၣ် တသ့ၣ်ညါဝဲအိၣ်ဒံးအါမးလီၤ. အဒိ ဒ်သိး စဲ(လ်)တဖၣ် ကမၤတၢ်တခါလၢအလီၢ် တခါလၢအလီၢ်အဂီၢ် စၢၤသွဲၣ်ဂံၢ်ထံး လၢအအိၣ်လၢ စဲ(လ်)တဖၣ်အပူၤန့ၣ် တၢ်မနုၤထိၣ်ဟူးထိၣ်ဂဲၤထီၣ်အီၤလဲၣ်. ဘၣ်သ့ၣ်သ့ၣ် လၢခံန့ၣ် ပှၤစဲအ့ၣ်ဖိတဖၣ် ကဃုထံၣ်န့ၢ်ဝဲ တၢ်စံးဆၢလီၤ. ဘၣ်ဆၣ် ဒ်စီၤဒၤဝံးအၢၣ်လီၤတူၢ်လိာ်ဝဲအသိး ထဲဒၣ်ပတၢ်ဘၣ်တ့ကစၢ် ယဟိဝၤယွၤန့ၣ် နၢ်ပၢၢ်ဝဲ တၢ်သ့ၣ်တဖၣ်အံၤ ဂ့ၤဂ့ၤဘၣ်ဘၣ်လီၤ.
၉ “ယတၢ်တလိၣ်န့ၣ် နမဲာ်ထံၣ်အီၤလီၤ. ဒီးဘၣ်ကွဲးအသးလၢ နလံာ်ပူၤခဲလၢာ်မုၢ်နံၤတဖၣ်လၢ အကကဲထီၣ်ဒီး တအိၣ်ဒံးဘၣ်နီတနံၤဘၣ်.” (စံးထီၣ်ပတြၢၤ ၁၃၉:၁၆) နစဲ(လ်) လၢအဆိကတၢၢ်တခါန့ၣ် ပၣ်ဃုာ်ဒီး တၢ်ရဲၣ်တၢ်ကျဲၤလၢ နနီၢ်ဒီဂၤညါ ကကဲထီၣ်အသး ဒ်လဲၣ်ဒ်လဲၣ်အဂီၢ်န့ၣ်လီၤ. တချုးလၢနအိၣ်ဖျဲၣ်ဒံးဘၣ် ခွံလါဒီးပၢၢ်တုၤလၢ နသးအိၣ်အနံၣ်ခံဆံဘျဲၣ်န့ၣ် နဟဲဒိၣ်ထီၣ် ဒ်တၢ်ရဲၣ်တၢ်ကျဲၤတဖၣ်အံၤ အိၣ်ပာ်စၢၤဝဲအသိးလီၤ. ဒီးဖဲန့ၣ်အဆၢကတီၢ် နနီၢ်ဒီဂၤညါ ဆီတလဲအသး တဆီဘၣ်တဆီ ဒ်တၢ်ရဲၣ်တၢ်ကျဲၤ အိၣ်ပာ်စၢၤဝဲအသိးလီၤ.
၁၀ ဘၣ်ဃးဒီး စၢၤသွဲၣ်ဂံၢ်ထံးတဖၣ်အဂ့ၢ်န့ၣ် စီၤဒၤဝံးတသ့ၣ်ညါဝဲဘၣ်, ဒီးဖဲအဝဲအစိၤန့ၣ် မဲးခြိၣ်စကိးစ့ၢ်ကီးတအိၣ်ဘၣ်. ဘၣ်ဆၣ် အဝဲကွၢ်ဝဲ အနီၢ်ကစၢ်ဒီဂၤညါ ဟဲဒိၣ်ထီၣ်တဆီဘၣ်တဆီဒ်လဲၣ် ဒီးနၢ်ပၢၢ်ထီၣ်ဝဲလၢ ပှၤရဲၣ်ကျဲၤဆိပာ်စၢၤအီၤလီၤ. ဘၣ်သ့ၣ်သ့ၣ် ဖိသၣ်ကိၢ်လိၣ်ဖိ ဟဲကဲထီၣ်အသးဒ်လဲၣ်န့ၣ် စီၤဒၤဝံးကသ့ၣ်ညါဝဲ တစဲးလီၤ. အဝဲတဲဝဲလၢ ဖိသၣ်ကိၢ်လိၣ်ဖိ ဟဲကဲထီၣ်အသး တဆီဘၣ်တဆီ ဒ်တၢ်ဆၢကတီၢ် ဒီးတၢ်ရဲၣ်တၢ်ကျဲၤအိၣ်ပာ်စၢၤဝဲအသိးလီၤ. အဃိအဝဲကွဲးဝဲလၢ တၢ်ရဲၣ်တၢ်ကျဲၤတဖၣ်အံၤ “ဘၣ်ကွဲးအသး” လၢယွၤအ “လံာ်ပူၤခဲလၢာ်” လီၤ.
၁၁ မုၢ်မဆါတနံၤအံၤ, နနီၢ်ခိက့ၢ်ဂီၤလၢ နန့ၢ်သါဘၣ်လၢ နမိၢ်နပၢ် ဒီးနဖံနဖုအအိၣ် ဒ်သိးဒီး နနီၢ်အထီ, နမဲာ်သၣ်, မဲာ်ချံ, ခိၣ်သူအလွဲၢ် ဒီးတၢ်အဂၤလၢအကထိတဖၣ်န့ၣ် နစၢၤသွဲၣ်ဂံၢ်ထံး ရဲၣ်ကျဲၤပာ်စၢၤဝဲလီၤ. လၢနစဲ(လ်) တခါစုာ်စုာ်အပူၤန့ၣ် ပၣ်ဃုာ်ဒီးစၢၤသွဲၣ်ဂံၢ်ထံးလၢ အကလးတဖၣ် ဒီးစၢၤသွဲၣ်ဂံၢ်ထံးတခါစုာ်စုာ်န့ၣ် အိၣ်လၢ DNA (deoxyribonucleic acid) အပူၤလီၤ. နနီၢ်ခိက့ၢ်ဂီၤ ကဘၣ်ဟဲကဲထီၣ်အသး ဒ်လဲၣ်ဒ်လဲၣ်န့ၣ် “ဘၣ်ကွဲးအသး” လၢ DNA အပူၤလီၤ. ဖဲစဲ(လ်) အသီတဖၣ် နီၤဖးထီၣ်အသး ဒ်သိးကမၤအါထီၣ် စဲ(လ်) အသီတဖၣ် မ့တမ့ၢ် သုးကွံာ် စဲ(လ်) လၢအပှၢ်တဖၣ်အခါ DNA ဟ့ၣ်လီၤ တၢ်ဂ့ၢ်တၢ်ကျိၤလၢ စဲ(လ်) လၢအသီတဖၣ်အအိၣ်လီၤ. အဃိ နဆဲးအိၣ်မူသ့ဒီး နက့ၢ်နဂီၤစ့ၢ်ကီး တဆီတလဲအသးဘၣ်. ပတၢ်ဘၣ်တ့ကစၢ် အစိအကမီၤဒီး အတၢ်ကူၣ်သ့န့ၣ် လီၤကမၢကမၣ်ဒိၣ်မးလီၤ.
(စံးထီၣ်ပတြၢၤ ၁၃၉:၁၇, ၁၈) ဒီးကစၢ်ဧၢ, နတၢ်ဆိကမိၣ်န့ၣ် မ့ၢ်တၢ်လုၢ်ဒိၣ်ပှ့ၤဒိၣ်ဒီးယၤဆံးဒိၣ်လဲၣ်, အတၢ်ဂံၢ်မ့ၢ်ဆံးအါလဲၣ်. ၁၈ ယမ့ၢ်ဂံၢ်အီၤ, ဒီးအိၣ်ဝဲအါန့ၢ်မဲးအဖျၢၣ်တက့ၢ်လီၤ. ယဖုသံနီၣ်, ဒီးယကအိၣ်ဒံးဒီးနၤလီၤ.
တၢး၀၇ ၆/၁၅ ကဘျံးပၤ ၂၃ အဆၢ ၁၂–၁၃
“တၢ်တ့လီၤယၤအိၣ်ဒီး . . . ကမၢကမၣ်အလီၢ်”
ပခိၣ်နူာ်လၢ အလီၤကမၢကမၣ်
၁၂ “ဒီးကစၢ်ဧၢ, နတၢ်ဆိကမိၣ်န့ၣ် မ့ၢ်တၢ်လုၢ်ဒိၣ်ပှ့ၤဒိၣ်ဒီး ယၤဆံးဒိၣ်လဲၣ်, အတၢ်ဂံၢ်မ့ၢ်ဆံးအါလဲၣ်. ယမ့ၢ်ဂံၢ်အီၤ, ဒီးအိၣ်ဝဲအါန့ၢ်မဲးအဖျၢၣ်တက့ၢ်လီၤ.” (စံးထီၣ်ပတြၢၤ ၁၃၉:၁၇, ၁၈ က) ဆၣ်ဖိကီၢ်ဖိတနီၤန့ၣ် အတၢ်ထံၣ်, တၢ်ကလၢၢ်, တၢ်နၢ်ဟူ, တၢ်လ့ၣ်, အတၢ်နၢဒီး အတၢ်သ့တၢ်ဘၣ်လၢအဂၤတဖၣ်န့ၣ် ဂ့ၤန့ၢ်ဒံးပှၤဟီၣ်ခိၣ်ဖိလီၤ. ဘၣ်ဆၣ် ထဲဒၣ်ပှၤဟီၣ်ခိၣ်ဖိတဖၣ်န့ၣ် ယဟိဝၤယွၤဟ့ၣ်အီၤ တၢ်သ့တၢ်ဘၣ်လၢ ဆိကမိၣ်ထံတၢ်ကသ့အဂီၢ်အဃိ အပတီၢ်ထီန့ၢ်ဒံး ဆၣ်ဖိကီၢ်ဖိတဖၣ်လီၤ. စဲအ့ၣ်တၢ်မၤလိအလံာ်တဘ့ၣ် ပာ်ဖျါဝဲလၢ “ပှၤဟီၣ်ခိၣ်ဖိ ဒီးတၢ်အဂၤလၢအိၣ်ဒီးအသးသမူတဖၣ်န့ၣ် လီၤဂာ်လိာ်အသးလၢ ကျဲအါမံၤသနာ်က့ ထဲဒၣ်ပှၤဟီၣ်ခိၣ်ဖိတဖၣ်န့ၣ် ကတိၤတၢ်သ့ ဒီးဆိကမိၣ်တၢ်သ့အဃိ လီၤဆီန့ၢ်ဒံးဆၣ်ဖိကီၢ်ဖိတဖၣ်လီၤ. ဒီးပအဲၣ်ဒိးသ့ၣ်ညါလၢ ပနီၢ်ကစၢ် ဘၣ်တၢ်ရဲၣ်လီၤကျဲၤလီၤပာ်အီၤဒ်လဲၣ်, ဒီးပဟဲကဲထီၣ်အသးဒ်လဲၣ်န့ၣ်လီၤ.” စီၤဒၤဝံးစ့ၢ်ကီး ဆိကမိၣ်ဝဲ တၢ်သံကွၢ်ဒ်အံၤလီၤ.
၁၃ ကျဲလၢအဂၤတဘိလၢ ပလီၤဆီန့ၢ်ဒံး ဆၣ်ဖိကီၢ်ဖိန့ၣ် မ့ၢ်ပအိၣ်ဒီးတၢ်သ့တၢ်ဘၣ်လၢ ပကဆိကမိၣ်တၢ်သ့ ဒ်ယဟိဝၤယွၤ ဆိကမိၣ်ဝဲအသိးလီၤ. တၢ်ဟ့ၣ်လၢအလီၤဆီအံၤ ပာ်ဖျါထီၣ်ဝဲ ကျဲတဘိလၢပဘၣ်တၢ် ‘တ့လီၤပှၤလၢယွၤအဂီၤလီၤ.’ (၁ မိၤၡ့ ၁:၂၇) စီၤဒၤဝံးသူဝဲတၢ်ဟ့ၣ်အံၤ ဂ့ၤဂ့ၤဘၣ်ဘၣ်လီၤ. အဝဲဆိကမိၣ်ထံဝဲ တၢ်အုၣ်အသးလၢ အပာ်ဖျါထီၣ်ဝဲ ကစၢ်ယွၤအိၣ်အဂ့ၢ် ဒီးကစၢ်ယွၤအတၢ်ဂ့ၤတၢ်ဝါလၢ အအိၣ်ဖျါထီၣ် ခီဖျိအခိၣ်အဃၢၤန့ၣ်လီၤ. စီၤဒၤဝံးအိၣ်ဒီး လံာ်စီဆှံလၢပျၢၤ လၢအပာ်ဖျါထီၣ်ဝဲ တၢ်ဘၣ်တ့တဖၣ်အဂ့ၢ်စ့ၢ်ကီးလီၤ. ခီဖျိလၢ လံာ်စီဆှံအံၤအဃိ စီၤဒၤဝံးနၢ်ပၢၢ်ထီၣ်ဝဲ ကစၢ်ယွၤအတၢ်ဆိကမိၣ်, အဂ့ၢ်အကျိၤ ဒီးအတၢ်တိာ်ပာ်တဖၣ်လီၤ. ခီဖျိ စီၤဒၤဝံးဆိကမိၣ်ထံဝဲ လံာ်စီဆှံ, တၢ်ဘၣ်တ့တဖၣ် ဒီးအတၢ်ရ့လိာ်သးဒီး ယဟိဝၤယွၤအဃိ တၢ်သ့ၣ်တဖၣ်အံၤ ထိၣ်ဟူးထိၣ်ဂဲၤထီၣ်အီၤလၢ ကစံးထီၣ်ပတြၢၤ တၢ်ဘၣ်တ့ကစၢ်လီၤ.
တၢး၀၆ ၉/၁ ကဘျံးပၤ ၁၆ အဆၢ ၈
လံာ်စီဆှံ အတၢ်ပာ်ဖျါလၢ ထါစံးထီၣ်ပတြၢၤအကူာ်ယဲၢ်
၁၃၉:၁၇, ၁၈. မ့ၢ်တၢ်သ့ၣ်ညါယွၤန့ၣ်မၤသးခုနၤဧါ. (ကတိၤဒိ ၂:၁၀) ပမ့ၢ်အိၣ်ဒီး တၢ်သ့ၣ်ညါယွၤန့ၣ် ပဃုထံၣ်န့ၢ်လံ တၢ်သးခုအဂံၢ်ခီၣ်ထံးလံ. ယဟိဝၤယွၤ အတၢ်ဆိကမိၣ်တဖၣ် “အိၣ်ဝဲအါန့ၢ် မဲးအဖျၢၣ်တက့ၢ်လီၤ.” အဃိပကဃုသ့ၣ်ညါဘၣ်အဂ့ၢ်ထီဘိလီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(စံးထီၣ်ပတြၢၤ ၁၃၆:၁၅) ဒီးတြူၤကွံာ်ဖၤရိၤ, ဒီးအတၢ်သုးမုၢ်ဆူ ပီၣ်လဲၣ်ဆှဲအပူၤလီၤ. အဂ့ၢ်ဒ်အံၤ, အဘျုးအဖှိၣ်အိၣ်ဝဲ လီၤစိၤလီၤထီလီၤ.
it–1 ကဘျံးပၤ ၇၈၃ အဆၢ ၅
၂ မိၤၡ့
ယဟိဝၤယွၤပာ်ဖျါထီၣ် အစိဒိၣ်အကမီၤထီခီဖျိ မၤလၤကပီၤအမံၤဒီး အုၣ်က့ၤခီၣ်က့ၤဝဲပှၤအံၣ်စရ့လးဖိတဖၣ်လီၤ. ဖဲပီၣ်လဲၣ်ဂီၤအကၢၢ်နံၤန့ၣ် စီၤမိၤၡ့ တီခိၣ်ရိၤမဲဝဲ ပှၤအံၣ်စရ့လးဖိတဖၣ်ကသးဝံၣ်တၢ်အခါ အဒီပုၢ်ဝဲမုၣ် နီၢ်မံးရယၣ်လၢ အမ့ၢ်ဝံမုၣ်တဂၤ စိာ်ထီၣ်ဝဲဒၢဒီး ပှၤပိာ်မုၣ်ခဲလၢာ် ဂဲၤကလံၣ်ဒီး သးဝံၣ်တၢ်ဒီးအီၤလီၤ. (၂ မိၤၡ့ ၁၅:၁, ၂၀, ၂၁) ပှၤအံၣ်စရ့လးဖိတဖၣ် ပူၤဖျဲးထီၣ်လၢ အဒုၣ်အဒါအစုပူၤလံ. ဖဲအဝဲသ့ၣ်ဟးထီၣ်လၢ ကီၢ်အဲၤကူပတူးအခါ ပှၤကညီ မ့တမ့ၢ် ဆၣ်ဖိကီၢ်ဖိတဖၣ် တမၤကီမၤခဲအီၤဘၣ်. ထွံၣ်တဒုဒၣ်လဲာ် တမီၤ မ့တမ့ၢ် တအ့ၣ်အီၤဘၣ်. (၂ မိၤၡ့ ၁၁:၇) လံာ် ၂ မိၤၡ့ တပာ်ဖျါထီၣ်ဝဲလၢ စီၤပၤဖၤရိၤန့ၣ် ဘၣ်တၢ်မၤဟးဂီၤကွံာ်အီၤဃုာ်ဒီး အသုးမုၢ်သံၣ်ဘိတဖၣ်လၢ ပီၣ်လဲၣ်ပူၤဘၣ်. ဘၣ်ဆၣ် ထါစံးထီၣ်ပတြၢၤ ၁၃၆:၁၅ ပာ်ဖျါထီၣ်ဝဲလၢ ယဟိဝၤယွၤ “တြူၤကွံာ်ဖၤရိၤ, ဒီးအတၢ်သုးမုၢ်ဆူ ပီၣ်လဲၣ်ဆှဲအပူၤလီၤ.”
(စံးထီၣ်ပတြၢၤ ၁၄၁:၅) မ်ပှၤအတီန့ၣ် တီၢ်ယၤတက့ၢ်. ကကဲထီၣ်ဝဲလၢ တၢ်အဘျုးအဖှိၣ်လီၤ. မ်အသိၣ်ဃီၣ်ယၤတက့ၢ်. ကမ့ၢ်သိလၢယခိၣ်လီၤ. မ်ယခိၣ်သုတတြီအီၤတဂ့ၤ. အဂ့ၢ်ဒ်အံၤ, ယဘါထုကဖၣ်ဒံးလၢ အဝဲသ့ၣ် အတၢ်နးတၢ်ဖှီၣ် အဂ့ၢ်အကျိၤလီၤ.
တၢး၁၅ ၄/၁၅ ကဘျံးပၤ ၃၁ အဆၢ ၁
ဘၣ်မနုၤအဃိ တၢ်ဟီထီၣ်ကွံာ်ပှၤန့ၣ် မ့ၢ်တၢ်ရဲၣ်တၢ်ကျဲၤလၢ အပှဲၤဒီးတၢ်အဲၣ်န့ၣ်လဲၣ်
ဒ်သိး ပှၤလၢအဘၣ်တၢ်ဟီထီၣ်ကွံာ်အီၤတဂၤ ကဟဲက့ၤကဒါက့ၤအဂီၢ် ပကဘၣ်အိၣ်ဒီး တၢ်အဲၣ် ဒီးတၢ်ဆၢတဲာ်လၢအဂၢၢ်ကျၢၤလီၤ. စီၤဒၤဝံးစံးဝဲလၢ “မ်ပှၤအတီန့ၣ် တီၢ်ယၤတက့ၢ်. ကကဲထီၣ်ဝဲလၢ တၢ်အဘျုးအဖှိၣ်လီၤ. မ်အသိၣ်ဃီၣ်ယၤတက့ၢ်. ကမ့ၢ်သိလၢယခိၣ်လီၤ.” (စံးထီၣ်ပတြၢၤ ၁၄၁:၅) အဒိ, ပှၤထီၣ်ကစၢၢ်ဖိတဂၤ ဟးဖျိးကျဲလၢ တၢ်ဂိၢ်ဒိၣ်အနံၤလီၤ. မ့ၢ်လၢတၢ်ဂိၢ်ဒိၣ်အဃိ အဝဲလီၤဘှံးဒီး အဲၣ်ဒိးမံခ့ဝဲလီၤ. အဝဲမ့ၢ်မံဘၣ်အသးလၢ ဘှ့ၣ်အကျါန့ၣ် ကသံဝဲလီၤ. ဖဲအဝဲအိၣ်ခိးဝဲလၢ ပှၤကဟဲမၤစၢၤအီၤအခါ ဒ်သိးအသုတမံခ့တဂ့ၤအဂီၢ် အသကိးလၢ အကပၤတဂၤ ဒဲအမဲာ် ဒီးမၤပၢၢ်ထီၣ်အီၤ တဘျီတဘျီလီၤ. ပှၤဒဲအမဲာ် ဆါသနာ်က့ အဘျုးအိၣ်လၢ အသးသမူအဂီၢ်လီၤ. ဒ်န့ၣ်အသိး စီၤဒၤဝံးအၢၣ်လီၤတူၢ်လိာ်ဝဲလၢ ပှၤတီပှၤလိၤ သိၣ်ဃီၣ်အီၤန့ၣ် ဆါဘၣ်ဆၣ် ကဲဘျုးလၢအဂီၢ်လီၤ.
လါစဲးပတ့ဘၢၣ် ၂၆–လါအီးကထိဘၢၣ် ၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | စံးထီၣ်ပတြၢၤ ၁၄၂–၁၅၀
“ယွၤတဂၤန့ၣ် ဒိၣ်ဝဲဒီးဂ့ၤဝဲလၢ ပှၤစံးထီၣ်ပတြၢၤအီၤ အါအါကလဲာ်”
(စံးထီၣ်ပတြၢၤ ၁၄၅:၁–၉) ယကစၢ်, စီၤပၤဧၢ, ယကပာ်ထီၣ်ထီနၤ, ဒီးယကစံးထီၣ်ပတြၢၤနမံၤ လီၤစိၤလီၤထီလီၤ. ၂ ယကစံးထီၣ်ပတြၢၤနၤ ကိးမုၢ်နံၤမုၢ်နၤဒဲး, ဒီးယကသးဝံၣ်နမံၤ လီၤစိၤလီၤထီလီၤ. ၃ ယွၤတဂၤန့ၣ်ဒိၣ်ဝဲ, ဒီးဂ့ၤလၢပှၤစံးထီၣ်ပတြၢၤအီၤ အါအါကလဲာ်လီၤ. ဒီးမ့ၢ်အဆံးဒိၣ်လဲၣ်ဆံးဒိၣ်လဲၣ်န့ၣ် ပဃုတဘၣ်ဘၣ်. ၄ ပှၤတစိၤကစံးထီၣ်ပတြၢၤနတၢ်မၤလၢ ပှၤတစိၤဒၣ်, ဒီးကဒုးနဲၣ် နတၢ်မၤအဒိၣ်တဖၣ်လီၤ. ၅ ယကဆိကမိၣ်လၢ နကဟု နကညီၢ် အစိအကမီၤအလၤကပီၤ, ဒီးနတၢ်မၤလီၤလးတဖၣ် အဂ့ၢ်အကျိၤလီၤ. ၆ ဒီးပှၤကကတိၤလၢ နမၤလီၤလးတၢ်အစိအကမီၤအဂ့ၢ်အကျိၤ, ဒီးယကစံၣ်တဲၤတဲလီၤ နတၢ်ဒိၣ်တၢ်ထီအဂ့ၢ်န့ၣ်လီၤ. ၇ တၢ်သ့ၣ်နီၣ်ထီၣ်က့ၤ နမၤဂ့ၤတၢ်လၢအအါန့ၣ် ကထီၣ်ဖျဲးလၢအထးခိၣ်, ဒီးကသးဝံၣ်သးဆၢ နတၢ်တီတၢ်လိၤလီၤ. ၈ ယွၤသူၣ်ကညီၤတၢ် သးကညီၤတၢ်, ဒီးသူၣ်အိၣ်တၢ်သးအိၣ်တၢ်, ဒီးအသးထီၣ်ကီ, ဒီးအဘျုးအဖှိၣ်ဒိၣ်နီၢ်မးလီၤ. ၉ ယွၤမၤဂ့ၤတၢ်ခဲလၢာ်, ဒီးအသးအိၣ် ကယဲၢ်အတ့လီၤတၢ်ခဲလၢာ်လီၤ.
တၢး၀၄ ၁/၁၅ ကဘျံးပၤ ၁၀ အဆၢ ၃–၄
ယဟိဝၤယွၤ အစိဒိၣ်အကမီၤထီန့ၣ် ပဃုကွၢ်အီၤတလၢာ်ဘၣ်
‘ယကစံးထီၣ်ပတြၢၤ ယကစၢ်စီၤပၤ’
၃ စီၤဒၤဝံးမ့ၢ်စီၤပၤလၢ ကစၢ်ယွၤဃုထၢအီၤဘၣ်ဆၣ် အဝဲထံၣ်ဝဲ ယဟိဝၤယွၤ ဒ်အမ့ၢ်ပှၤအံၣ်စရ့လးဖိ အစီၤပၤနီၢ်နီၢ်အသိးလီၤ. အဃိ အဝဲစံးဝဲလၢ– “တၢ်အဘီအမုၢ်န့ၣ်မ့ၢ်နတၢ်, ကစၢ်ဧၢ, ဒီးနအိၣ်လၢတၢ်ခဲလၢာ်အဖီခိၣ်လၢအခိၣ်လီၤ.” (၁ ကွဲးနီၣ်တၢ် ၂၉:၁၁) တကးဒံးဘၣ် စီၤဒၤဝံး ပာ်လုၢ်ပာ်ပှ့ၤဝဲ ယဟိဝၤယွၤ ဒ်စီၤပၤအသိး ဒီးစံးဝဲ “ယကစၢ်, စီၤပၤဧၢ, ယကပာ်ထီၣ်ထီနၤ, ဒီးယကစံးထီၣ်ပတြၢၤနမံၤလီၤစိၤလီၤထီလီၤ. ယကစံးထီၣ်ပတြၢၤနၤ ကိးမုၢ်နံၤမုၢ်နၤဒဲး, ဒီးယကသးဝံၣ်နမံၤ လီၤစိၤလီၤထီလီၤ.” (စံးထီၣ်ပတြၢၤ ၁၄၅:၁, ၂) စီၤဒၤဝံး အဲၣ်ဒိးစံးထီၣ်ပတြၢၤ ယဟိဝၤယွၤ ကိးမုၢ်နံၤမုၢ်နၤ တကးဒံးဘၣ် လီၤထူလီၤယိာ်လီၤ.
၄ မုၣ်ကီၢ်လံၢ် တဲဝဲလၢ ယဟိဝၤယွၤ မ့ၢ်တၢ်ပၢကစၢ်လၢ အအဲၣ်လီၤထဲအသး ဒီးတဟ့ၣ်ပှၤတၢ်သဘျ့ဘၣ်. ထါစံးထီၣ်ပတြၢၤ ၁၄၅ ပာ်ဖျါထီၣ်ဝဲလၢ မုၣ်ကီၤလံၢ် အတၢ်ကတိၤအံၤ ကမၣ်ဝဲလီၤ. (၁ မိၤၡ့ ၃:၁-၅) ဒီးပာ်ဖျါထီၣ်စ့ၢ်ကီးဝဲ မုၣ်ကီၤလံၢ်အတၢ်ကတိၤ ကဘျံးကဘျၣ်လၢအမ့ၢ် ပှၤဟီၣ်ခိၣ်ဖိတဖၣ် ဒိကနၣ်ကစၢ်ယွၤ အကလုၢ်ခီဖျိ ဒိးန့ၢ်ဘၣ်တၢ်အဘျုးအဃိလီၤ. တမ့ၢ်လၢအဲၣ်ယွၤအဃိဘၣ်. (ယိၤဘး ၁:၉-၁၁; ၂:၄, ၅) ဒ်စီၤဒၤဝံးအသိး ခရံာ်ဖိလၢ မုၢ်မဆါတနံၤအံၤစ့ၢ်ကီး ပာ်ဖျါထီၣ်ဝဲလၢ မုၣ်ကီၤလံၢ် အတၢ်ကတိၤအံၤ ကမၣ်ဝဲလီၤ. အဝဲသ့ၣ် ပာ်လုၢ်ပာ်ပှ့ၤဝဲ တၢ်မုၢ်လၢ်လၢအမ့ၢ် ကအိၣ်မူဘၣ် လီၤထူလီၤယိာ်လၢ ဘီမုၢ်အတၢ်ပၢဖီလာ်န့ၣ် မ့ၢ်လၢ အဲၣ်ဒိးစံးထီၣ်ပတြၢၤ ယဟိဝၤယွၤ လီၤထူလီၤယိာ်အဃိလီၤ. ပှၤလၢအကကွဲၢ်တဖၣ် မၤဝဲဒ်န့ၣ် ခီဖျိ နာ်ဝဲယ့ၣ်ၡူး အတၢ်ပှ့ၤက့ၤ, ဟ့ၣ်လုၢ်ထီၣ်အသး, ဘျၢထံ ဒီးမၤယွၤအတၢ်မၤလၢ တၢ်အဲၣ်တၢ်သးတီအပူၤလီၤ.—ရိမ့ၤ ၅:၈; ၁ ယိၤဟၣ် ၅:၃.
တၢး၀၄ ၁/၁၅ ကဘျံးပၤ ၁၁ အဆၢ ၇–၈
ယဟိဝၤယွၤ အစိဒိၣ်အကမီၤထီန့ၣ် ပဃုကွၢ်အီၤတလၢာ်ဘၣ်
တၢ်အဒိအတဲာ်လၢ ဘၣ်ဃးဒီး ယွၤအစိဒိၣ်အကမီၤထီ
၇ ထါစံးထီၣ်ပတြၢၤ ၁၄၅:၃ ပာ်ဖျါထီၣ်ဝဲ တၢ်ဂ့ၢ်အရ့ဒိၣ်လၢ ပကြၢးစံးထီၣ်ပတြၢၤ ယဟိဝၤယွၤန့ၣ်လီၤ. စီၤဒၤဝံး သးဝံၣ်ထီၣ်ဝဲလၢ– “ယွၤတဂၤန့ၣ်ဒိၣ်ဝဲ, ဒီးဂ့ၤလၢပှၤစံးထီၣ်ပတြၢၤအီၤ အါအါကလဲာ်လီၤ.” ယဟိဝၤယွၤ အစိဒိၣ်အကမီၤထီန့ၣ် အကတၢၢ်တအိၣ်ဘၣ်. ပှၤဃုကွၢ်အီၤတလၢာ်, နၢ်ပၢၢ်အီၤတလၢာ် မ့တမ့ၢ် ထိၣ်ဒွးအီၤတသ့ဘၣ်. ပမ့ၢ်သမံသမိးကွၢ် တၢ်အဒိတနီၤလၢ ဘၣ်ဃးဒီး ကစၢ်ယွၤ အစိဒိၣ်အကမီၤထီ လၢပဃုကွၢ်အီၤတလၢာ်ဘၣ်န့ၣ် ကကဲဘျုးလၢပဂီၢ်လီၤ.
၈ ထံၣ်တမှံကွၢ်လၢ မုၢ်တနၤဖဲ နအိၣ်ယံၤဒီး ဝ့ၢ်အတၢ်ကပီၤ ဒီးနကွၢ်ထီၣ်ဆူ မူခိၣ်လၢအပှဲၤဒီးဆၣ်တဖၣ်န့ၣ်တက့ၢ်. ဖဲန့ၣ်အခါ နကကမၢကမၣ်လၢ နထံၣ်ဘၣ် ဆၣ်ဒီဒူၣ်ဒီထၢ လၢမူခိၣ်တၢ်ခံးကျါအဃိလီၤ. ဒီးနအဲၣ်ဒိး စံးထီၣ်ပတြၢၤ ယဟိဝၤယွၤ အစိဒိၣ်အကမီၤထီ လၢအတၢ်ဘၣ်တ့တဖၣ်အဃိအံၤ တမ့ၢ်ဧါ. ဆၣ်တဖၣ်လၢ နထံၣ်အီၤ ဒီးဟီၣ်ခိၣ်န့ၣ် အိၣ်လၢ ဆၣ်ကရူၢ်ဆံးဆံးဖိလၢ ကလဲးစံၣ်တခါအပူၤလီၤ. ကလဲးစံၣ်တဖၣ်န့ၣ် အိၣ်ဝဲအကထိတဖၣ်အကထိ ဒီးထဲဒၣ်သၢခါဧိၤန့ၣ် ပထံၣ်အီၤလၢ ပမဲာ်ချံသ့လီၤ. ဆၣ်တဖၣ်လၢ ပဂံၢ်အီၤတသ့ဒီး ကလဲးစံၣ်တဖၣ် ပာ်ဖျါထီၣ်ဝဲ တၢ်ဘၣ်တ့ကစၢ် အစိဒိၣ်အကမီၤထီ လၢပဃုကွၢ်အီၤတလၢာ်ဘၣ်လီၤ.—ယၡါယၤ ၄၀:၂၆.
တၢး၀၄ ၁/၁၅ ကဘျံးပၤ ၁၄ အဆၢ ၂၀–၂၁
ယဟိဝၤယွၤ အစိဒိၣ်အကမီၤထီန့ၣ် ပဃုကွၢ်အီၤတလၢာ်ဘၣ်
ယဟိဝၤယွၤ အတၢ်ဂ့ၤတၢ်ဝါလၢ အပတီၢ်ထီ
၂၀ ဒ်စံးထီၣ်ပတြၢၤ အဆၢဒိၣ် ၁၄၅ အဆၢဖိ အဆိကတၢၢ်ဃုဆၢ ပာ်ဖျါထီၣ်ဝဲအသိး ပအိၣ်ဒီးတၢ်ဂ့ၢ်အါမးလၢ ပကစံးထီၣ်ပတြၢၤ ယဟိဝၤယွၤအစိဒိၣ်အကမီၤထီ လၢပဃုကွၢ်အီၤတလၢာ်ဘၣ်န့ၣ်လီၤ. အဆၢဖိ ၇ တုၤလၢ ၉ ပာ်ဖျါထီၣ်ဝဲ တၢ်ဂ့ၤတၢ်ဝါလၢ ကစၢ်ယွၤ အစိဒိၣ်အကမီၤထီအဂ့ၢ်လီၤ. စီၤဒၤဝံး သးဝံၣ်ထီၣ်ဝဲလၢ– “တၢ်သ့ၣ်နီၣ်ထီၣ်က့ၤ နမၤဂ့ၤတၢ်လၢအအါန့ၣ် ကထီၣ်ဖျဲးလၢအထးခိၣ်, ဒီးကသးဝံၣ်သးဆၢ နတၢ်တီတၢ်လိၤလီၤ. ယွၤသူၣ်ကညီၤတၢ်သးကညီၤတၢ်, ဒီးသူၣ်အိၣ်သးအိၣ်တၢ်, ဒီးအသးထီၣ်ကီ, ဒီးအဘျုးအဖှိၣ်ဒိၣ်နီၢ်မးလီၤ. ယွၤမၤဂ့ၤတၢ်ခဲလၢာ်, ဒီးအသးအိၣ်ကယဲၢ်အတ့လီၤတၢ် ခဲလၢာ်လီၤ.”
၂၁ အဆိကတၢၢ် စီၤဒၤဝံးပာ်ဖျါထီၣ်ဝဲ ယဟိဝၤယွၤအတၢ်မၤဂ့ၤ ဒီးတၢ်တီတၢ်လိၤလၢ မုၣ်ကီၤလံၢ် ဒုးအိၣ်ထီၣ်ဝဲ တၢ်သံကွၢ်န့ၣ်လီၤ. တၢ်ဂ့ၤတၢ်ဝါတဖၣ်အံၤ ကဲဘျုးလၢ ပှၤလၢအဲၣ်ယွၤဒီး ဒိးပၢအသးလၢအီၤတဖၣ်အဂီၢ်ဒ်လဲၣ်. မ့ၢ်လၢ ယဟိဝၤယွၤမၤဂ့ၤတၢ် ဒီးပၢတၢ်တီတီလိၤလိၤအဃိ ပှၤလၢဘူၣ်ထီၣ်ဘါထီၣ်အီၤတဖၣ် အိၣ်ဒီးတၢ်သူၣ်ခုသးခု ဒီးအဲၣ်ဒိးစံးထီၣ်ပတြၢၤအီၤထီဘိလီၤ. တကးဒံးဘၣ် ယဟိဝၤယွၤအတၢ်မၤဂ့ၤတဖၣ်န့ၣ် မ့ၢ်လၢပှၤ “ခဲလၢာ်” အဂီၢ်လီၤ. အဃိ တၢ်အံၤကမၤစၢၤ ပှၤအါဂၤလၢ ကပီၢ်ယၢ်လီၤက့ၤအသးဒီး ကဲထီၣ်ပှၤဘူၣ်ထီၣ်ဘါထီၣ် ယဟိဝၤယွၤ တချုးလၢတၢ်အကတၢၢ် ဟဲဒံးဘၣ်န့ၣ်လီၤ.—မၤတၢ် ၁၄:၁၅-၁၇.
တၢး၀၄ ၁/၁၅ ကဘျံးပၤ ၁၅ အဆၢ ၂
ယဟိဝၤယွၤ အိၣ်ဒီးတၢ်အဲၣ်လၢအတီ
၂ ယဟိဝၤယွၤ ပာ်ဖျါထီၣ်တၢ်အဲၣ်လၢအတီ လၢပှၤလၢအဘူၣ်ထီၣ်ဘါထီၣ်အီၤတဖၣ် အဖီခိၣ်လီၤ. ဧ့ၤဘြံၤအတၢ်ကတိၤလၢ ဘၣ်ဃးဒီးတၢ်အဲၣ်အံၤန့ၣ် ဘၣ်တၢ်ကွဲးကျိာ်က့ၤအီၤလၢ “တၢ်အဲၣ်တၢ်သးကညီၤ” မ့တမ့ၢ် “တၢ်အဲၣ်လၢအတီ” လီၤ. လၢပျၢၤ ပှၤအံၣ်စရ့လးဖိအစီၤပၤ စီၤဒၤဝံး ပာ်လုၢ်ပာ်ပှ့ၤဝဲ ကစၢ်ယွၤ အတၢ်အဲၣ်တၢ်သးကညီၤ ဒိၣ်ဒိၣ်ကလဲာ်လီၤ. မ့ၢ်လၢအဝဲအနီၢ်ကစၢ် အတၢ်လဲၤခီဖျိ ဒီးဆိကမိၣ်ထံဝဲ ကစၢ်ယွၤရ့ဒီးပှၤဂၤဒ်လဲၣ်အဃိ လၢတၢ်နာ်အပူၤ အဝဲသးဝံၣ်ဝဲဒ်အံၤသ့လီၤ. “ယွၤသူၣ်ကညီၤတၢ်သးကညီၤတၢ်, [မ့တမ့ၢ် အိၣ်ဒီး, “တၢ်အဲၣ်လၢအတီ”].”—စံးထီၣ်ပတြၢၤ ၁၄၅:၈.
(စံးထီၣ်ပတြၢၤ ၁၄၅:၁၀–၁၃) ယွၤဧၢ, နတၢ်မၤခဲလၢာ်ကစံးထီၣ်ပတြၢၤနၤ, ဒီးနပှၤစီဆှံတဖၣ်ကသးဝံၣ်နၤလီၤ. ၁၁ ကကတိၤတၢ်လၢ နဘီနမုၢ်အလၤကပီၤအဂ့ၢ်အကျိၤ, ဒီးကစံးဘၣ် တဲဘၣ်တၢ်လၢ နစိနကမီၤအဂ့ၢ်အကျိၤ, ၁၂ ဒ်သိးအကဘိးဘၣ်သ့ၣ်ညါပှၤကညီဖိလၢ အတၢ်မၤအဒိၣ်, ဒီးလၢအဘီအမုၢ်န့ၣ် အကဟုအကညီၢ် အိၣ်ဒီးအလၤကပီၤလီၤ. ၁၃ နဘီနမုၢ်န့ၣ်မ့ၢ်ဘီမုၢ်အထူအယိာ်, ဒီးနပၢတၢ်န့ၣ် အိၣ်ဝဲအစိၤစိၤအဃၣ်ဃၣ်လီၤ.
တၢး၀၄ ၁/၁၅ ကဘျံးပၤ ၁၆ အဆၢ ၃–၆
ယဟိဝၤယွၤ အိၣ်ဒီးတၢ်အဲၣ်လၢအတီ
တၢ်သ့ၣ်ညါနီၤဖး ပှၤလၢအသးတီဒီးယွၤ
၃ ဘၣ်ဃးဒီး ယဟိဝၤယွၤန့ၣ် ဝံၡမူၤအ့လးအမိၢ် နီၢ်ဃးနၤ စံးဝဲလၢ “ကဟံးဃာ် အပှၤဂ့ၤပှၤဝါ [ပှၤလၢအိၣ်ဒီးတၢ်သးတီ] အခီၣ်” လီၤ. (၁ ၡမူၤအ့လး ၂:၉) “ပှၤလၢအိၣ်ဒီးတၢ်သးတီ” န့ၣ်မ့ၢ်မတၤတဖၣ်လဲၣ်. စီၤဒၤဝံးစံးဆၢဝဲ တၢ်သံကွၢ်အံၤလီၤ. အဝဲစံးထီၣ်ပတြၢၤ ယဟိဝၤယွၤ အတၢ်ဂ့ၤတၢ်ဝါလၢ အလီၤကမၢကမၣ်တဖၣ်ဝံၤ တဲဝဲလၢ– “နပှၤစီဆှံ [ပှၤလၢအိၣ်ဒီးတၢ်သးတီ] တဖၣ်ကသးဝံၣ်နၤလီၤ.” (စံးထီၣ်ပတြၢၤ ၁၄၅:၁၀) နကကမၢကမၣ်လၢ ပှၤဟီၣ်ခိၣ်ဖိတဖၣ် သးဝံၣ်ထီၣ်ယွၤသ့အဃိလီၤ. အဝဲသ့ၣ်သးဝံၣ်ထီၣ်ယွၤသ့ ခီဖျိလၢ စံးပတြၢၤယဟိဝၤယွၤလီၤ.
၄ ပှၤလၢအအိၣ်ဒီး တၢ်သးတီတဖၣ်န့ၣ် သးအိၣ်စံးထီၣ်ပတြၢၤ ယဟိဝၤယွၤလီၤ. ဖဲအဝဲသ့ၣ်ရ့လိာ်အသးအခါမ့ၢ်ဂ့ၤ, ထီၣ်တၢ်အိၣ်ဖှိၣ်အခါမ့ၢ်ဂ့ၤ တဲသကိးဝဲ တၢ်ဂ့ၢ်မနုၤတဖၣ်လဲၣ်. အါတက့ၢ်န့ၣ် တဲသကိးဝဲ ယဟိဝၤယွၤ အဘီအမုၢ်အဂ့ၢ်လီၤ. ကစၢ်ယွၤ အခ့အပှၤလၢ အသးတီတဖၣ် အိၣ်ဒီးတၢ်ပာ်သူၣ်ပာ်သး ဒ်စီၤဒၤဝံးလၢအစံးဝဲ– “ကကတိၤတၢ်လၢ နဘီနမုၢ်အလၤကပီၤအဂ့ၢ်အကျိၤ, ဒီးကစံးဘၣ်တဲဘၣ်တၢ်လၢ နစိနကမီၤအဂ့ၢ်အကျိၤ.”—စံးထီၣ်ပတြၢၤ ၁၄၅:၁၁.
၅ ဖဲပှၤလၢအတီဒီးအီၤတဖၣ် စံးထီၣ်ပတြၢၤအီၤအခါ မ့ၢ်ယဟိဝၤယွၤ ပာ်သူၣ်ပာ်သးဝဲဧါ. ပာ်သူၣ်ပာ်သးဝဲလီၤ. ကစၢ်ယွၤ ပာ်သူၣ်ပာ်သးဝဲ တၢ်လၢအဝဲသ့ၣ်တဲဝဲခဲလၢာ်လီၤ. ဘၣ်ဃးဒီး တၢ်ဘူၣ်ထီၣ်ဘါထီၣ် အမ့ၢ်အတီ လၢမုၢ်မဆါတနံၤအံၤန့ၣ် မၤလကံ တဲဆိပာ်ဝဲဒ်အံၤ– “တုၤနုၤတစု ပှၤလၢအပျံၤယွၤန့ၣ် ကတိၤလိာ်အသးတဂၤဒီးတဂၤ, ဒီးယွၤကနၣ်ဝဲ, ဒီးနၢ်ဟူဝဲ, ဒီးတၢ်ကွဲးလံာ်သ့ၣ်နီၣ်ထီၣ်က့ၤတၢ်လၢအမဲာ်ညါ, လၢပှၤလၢအပျံၤယွၤ ဒီးဆိကမိၣ်တၢ်လၢ အမံၤအဂ့ၢ်အကျိၤအဂီၢ်လီၤ.” (မၤလကံ ၃:၁၆) ယဟိဝၤယွၤ ဘၣ်သူၣ်ဘၣ်သးဝဲ ပှၤလၢအသးတီဒီးအီၤတဖၣ် အတၢ်စံးထီၣ်ပတြၢၤအီၤ ဒီးတသးပ့ၤနီၣ်အဝဲသ့ၣ်ဘၣ်.
၆ ယဟိဝၤယွၤ အခ့အပှၤလၢ အသးတီတဖၣ်န့ၣ် ဃုတၢ်ခွဲးတၢ်ယာ်လၢ ကစံၣ်တဲၤတဲလီၤဝဲ ပှၤလၢတဘူၣ်ထီၣ်ဘါထီၣ် ယွၤအမ့ၢ်အတီ လၢတၢ်သးဒူအပူၤလီၤ. ပှၤလၢအသးတီဒီးယွၤန့ၣ် “ဘိးဘၣ်သ့ၣ်ညါပှၤကညီဖိလၢ အတၢ်မၤအဒိၣ်, ဒီးလၢအဘီအမုၢ်န့ၣ် အကဟုအကညီၢ် အိၣ်ဒီးအလၤကပီၤလီၤ.” (စံးထီၣ်ပတြၢၤ ၁၄၅:၁၂) မ့ၢ်နဃုတၢ်ခွဲးတၢ်ယာ်လၢ နကတဲဘၣ်ပှၤဂၤလၢ ယဟိဝၤယွၤအတၢ်ပၢအဂ့ၢ်ဧါ. အဝဲအဘီအမုၢ်န့ၣ် တဒ်သိးဒီး ပှၤဟီၣ်ခိၣ်ဖိ အဘီအမုၢ်လၢ ကဟးဂီၤကွံာ်ဘၣ်, ကအိၣ်ဝဲလီၤစိၤလီၤထီလီၤ. (၁ တံၤမသ့း ၁:၁၇) အရ့ဒိၣ်, ဒိၣ်မးလၢ ပှၤဟီၣ်ခိၣ်ဖိတဖၣ် ကမၤလိဘၣ် ယဟိဝၤယွၤ အဘီအမုၢ်လၢ ကအိၣ်လီၤစိၤလီၤထီအဂ့ၢ် ဒီးကဆီၣ်ထွဲမၤစၢၤဝဲလီၤ. စီၤဒၤဝံးစံးဝဲ “နဘီနမုၢ်န့ၣ် မ့ၢ်ဘီမုၢ်အထူအယိာ်, ဒီးနပၢတၢ်န့ၣ် အိၣ်ဝဲအစိၤစိၤအဃၣ်ဃၣ်လီၤ.”—စံးထီၣ်ပတြၢၤ ၁၄၅:၁၃.
(စံးထီၣ်ပတြၢၤ ၁၄၅:၁၄–၁၆) ယွၤမၤစၢၤကယဲၢ်ပှၤလၢ အလီၤဃံၤတဖၣ်, ဒီးဝံၣ်ဆၢထၢၣ်ကယဲၢ်ပှၤလၢ အသကူးဝဲခဲလၢာ်လီၤ. ၁၅ ကယဲၢ်တၢ်အမဲာ်ခိးနၤ, ဒီးအဆၢအကတီၢ်ဘၣ်ဒီး, နဟ့ၣ်လီၤအီၤလၢ အတၢ်အီၣ်လီၤ. ၁၆ နသလၣ်ထီၣ်နစု, ဒီးကယဲၢ်တၢ်သးအဆၢတၢ်န့ၣ် နဟ့ၣ်လီၤလီၤ.
တၢး၀၄ ၁/၁၅ ကဘျံးပၤ ၁၇–၁၈ အဆၢ ၁၀–၁၄
ယဟိဝၤယွၤ အိၣ်ဒီးတၢ်အဲၣ်လၢအတီ
၁၀ ဟီၣ်ခိၣ်ပဒိၣ်ပပှၢ်တနီၤ သူၣ်အိၣ်သးအိၣ်ဝဲ အထံဖိကီၢ်ဖိနီၢ်နီၢ်လီၤ. အဝဲသ့ၣ်အကျါ ပှၤလၢအတၢ်ပာ်သူၣ်ပာ်သး အဂ့ၢ်ကတၢၢ်ဒၣ်လဲာ် တသ့ၣ်ညါဝဲ အထံဖိကီၢ်ဖိတဖၣ်အဂ့ၢ် လီၤတံၢ်လီၤဆဲးဘၣ်. ဘၣ်သ့ၣ်သ့ၣ် နကသံကွၢ်ဘၣ်လၢ ဖဲထံဖိကီၢ်ဖိတဂၤစုာ်စုာ် ဘၣ်ကီဘၣ်ခဲအခါ ပဒိၣ်ပပှၢ်လၢ အကဟဲမၤစၢၤအီၤတဘျီဃီန့ၣ် မ့ၢ်အအိၣ်ဝဲတဂၤဂၤဧါ. အိၣ်ဝဲလီၤ. စီၤဒၤဝံးကွဲးဝဲလၢ– “ယွၤမၤစၢၤကယဲၢ်ပှၤလၢ အလီၤဃံၤတဖၣ်, ဒီးဝံၣ်ဆၢထၢၣ် ကယဲၢ်ပှၤလၢအသကူးဝဲခဲလၢာ်လီၤ.”—စံးထီၣ်ပတြၢၤ ၁၄၅:၁၄.
၁၁ ပှၤလၢအသးတီဒီး ယဟိဝၤယွၤတဖၣ်န့ၣ် ကွၢ်ဆၢၣ်မဲာ်ဘၣ်တၢ်ကီတၢ်ခဲတဖၣ် မ့ၢ်လၢအဝဲသ့ၣ်တလၢတပှဲၤဒီး အိၣ်မူဘၣ်လၢဟီၣ်ခိၣ်လၢ မုၣ်ကီၤလံၢ်, “တၢ်အၢတၢ်သီတဂၤ” အစုပူၤအဃိလီၤ. (၁ ယိၤဟၣ် ၅:၁၉; စံးထီၣ်ပတြၢၤ ၃၄:၁၉) ခရံာ်ဖိတဖၣ် ကွၢ်ဆၢၣ်မဲာ်ဘၣ် တၢ်မၤအၢမၤနးလီၤ. တနီၤနီၤ တူၢ်ဘၣ်ဝဲ တၢ်နးတၢ်ဖှီၣ် ခီဖျိလၢ တၢ်ဆါယံာ်ယံာ်ထၢထၢ ဒီးတၢ်သူၣ်အုးသးအုးတဖၣ်အဃိလီၤ. တဘျီတခီၣ် ပှၤလၢအသးတီဒီး ယဟိဝၤယွၤတဖၣ် မၤဘၣ်တၢ်ကမၣ်အဃိ အဝဲသ့ၣ် အသးဟးဂီၤဒီး လီၤဃံၢ်ဝဲသ့လီၤ. အဝဲသ့ၣ် မ့ၢ်ကွၢ်ဆၢၣ်မဲာ်ဘၣ် တၢ်ကီတၢ်ခဲ ဒ်လဲၣ်ဂ့ၤ, ဒ်လဲၣ်ဂ့ၤ ထီဘိန့ၣ် ယဟိဝၤယွၤ အိၣ်ကတဲာ်ကတီၤအသးလၢ ကမၤမုာ်ထီၣ်အသး ဒီးဟ့ၣ်ဂံၢ်ဟ့ၣ်ဘါအီၤလၢနီၢ်သးတခီလီၤ. စီၤပၤယ့ၣ်ၡူး သူၣ်အိၣ်သးအိၣ်ဝဲ ပှၤလၢအဒိးပၢအသးလၢ အဖီလာ်စ့ၢ်ကီးလီၤ.—စံးထီၣ်ပတြၢၤ ၇၂:၁၂-၁၄.
တၢ်အီၣ်ဘၣ်ဆၢဘၣ်ကတီၢ်လၢ အဒုးသူၣ်မံသးမံပှၤ
၁၂ မ့ၢ်လၢယဟိဝၤယွၤ အိၣ်ဒီးတၢ်အဲၣ်တၢ်သးကညီၤအဃိ မၤလၢပှဲၤဝဲ အခ့အပှၤတဖၣ်အတၢ်လိၣ်ဘၣ်ခဲလၢာ်လီၤ. ဒီးဟ့ၣ်လီၤဝဲ တၢ်အီၣ်တၢ်အီလၢ အန့ၢ်ဂံၢ်န့ၢ်ဘါတဖၣ်စ့ၢ်ကီးလီၤ. စီၤပၤဒၤဝံး စံးဝဲလၢ– “ကယဲၢ်တၢ်အမဲာ်ခိးနၤ, ဒီးအဆၢကတီၢ်ဘၣ်ဒီး, န [ယဟိဝၤ] ဟ့ၣ်လီၤအီၤလၢတၢ်အီၣ်လီၤ. နသလၣ်ထီၣ်နစု, ဒီးကယဲၢ်တၢ်သးအဆၢတၢ်န့ၣ် နဟ့ၣ်လီၤလီၤ.” (စံးထီၣ်ပတြၢၤ ၁၄၅:၁၅, ၁၆) ဖဲပှၤလၢအတီဒီးအီၤတဖၣ် ကွၢ်ဆၢၣ်မဲာ်ဘၣ် တၢ်ကီတၢ်ခဲလၢ အဟဲကဲထီၣ်အသး သတူၢ်ကလာ်အခါဒၣ်လဲာ် ယဟိဝၤယွၤ ကတဲာ်ကတီၤန့ၢ် အဝဲသ့ၣ်လၢ “ကိၢ်လၢတနံၤအဂီၢ် တနံၤအဂီၢ်” သ့စ့ၢ်ကီးလီၤ.—လူၤကၣ် ၁၁:၃; ၁၂:၂၉, ၃၀.
၁၃ စီၤဒၤဝံး ပာ်ဖျါထီၣ်ဝဲလၢ “ကယဲၢ်တၢ်သး” ခဲလၢာ် ကဒိးန့ၢ်ဘၣ် တၢ်သူၣ်မံသးမုာ်လီၤ. ကယဲၢ်တၢ်သးန့ၣ် ပာ်ဃုာ်ဒီး ဆၣ်ဖိကီၢ်ဖိတဖၣ်စ့ၢ်ကီးလီၤ. လၢဟီၣ်ခိၣ်ချၢ တၢ်မုၢ်တၢ်ဘိလၢ ပီၣ်လဲၣ်ပူၤ ဒီးသ့ၣ်မုၢ်ဝၣ်ဘိတဖၣ် မ့ၢ်တအိၣ်အါအါဂီၢ်ဂီၢ်ဘၣ်န့ၣ် တၢ်အိၣ်လၢထံကျါတဖၣ်, ထိၣ်ဖိလံာ်ဖိတဖၣ် ဒီးဆၣ်ဖိကီၢ်ဖိတဖၣ်န့ၣ် တမ့ၢ်လၢကဒိးန့ၢ်ဘၣ်ဝဲ တၢ်အီၣ်တၢ်အီ ဒီးကလံၤလၢကသါဝဲအဂီၢ်န့ၣ်ဘၣ်. (စံးထီၣ်ပတြၢၤ ၁၀၄:၁၄) ဒ်လဲၣ်ဂ့ၤ, ဒ်လဲၣ်ဂ့ၤ ယဟိဝၤယွၤ ကတဲာ်ကတီၤတၢ် ဒ်သိးတၢ်သးခဲလၢာ် ကဒိးန့ၢ်ဘၣ် တၢ်လၢအဝဲသ့ၣ်လိၣ်ဘၣ်ဝဲန့ၣ်လီၤ.
၁၄ ပှၤဟီၣ်ခိၣ်ဖိတဖၣ်န့ၣ် တဒ်သိးဒီး ဆၣ်ဖိကီၢ်ဖိတဖၣ်ဘၣ်. အဝဲသ့ၣ်အိၣ်ဒီး တၢ်လိၣ်ဘၣ်လၢ နီၢ်သးတခီလီၤ. (မးသဲ ၅:၃) ယဟိဝၤယွၤ မၤလၢပှဲၤဝဲ ပှၤလၢအသးတီဒီးအီၤတဖၣ် အတၢ်လိၣ်ဘၣ်လၢ နီၢ်သးတခီန့ၣ် လီၤကမၢကမၣ်ဒိၣ်မးလီၤ. တချုးလၢယ့ၣ်ၡူးသံအခါ အဝဲအၢၣ်လီၤအီလီၤပာ်စၢၤဝဲလၢ “အကုၢ်အပှၤလၢအကလုၢ်တီ, ဒီးအကူၣ်တၢ်သ့” ကဒုးအီၣ်ဒုးအီဝဲ ပှၤလၢအပိာ်အခံတဖၣ်လၢ နီၢ်သးအတၢ်အီၣ်လၢ “အဆၢအကတီၢ်ဘၣ်” န့ၣ်လီၤ. (မးသဲ ၂၄:၄၅) မုၢ်မဆါတနံၤအံၤပှၤ ၁၄၄,၀၀၀ လၢအအိၣ်လီၤတဲာ်တဖၣ်န့ၣ် ပၣ်ဃုာ်လၢ အကုၢ်အပှၤလၢအကလုၢ်တီ, ဒီးအကူၣ်တၢ်သ့ အကျါလီၤ. ယဟိဝၤယွၤဒုးအီၣ်ဒုးအီပှၤ နီၢ်သးအတၢ်အီၣ် ခီဖျိလၢအဝဲသ့ၣ်လီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(စံးထီၣ်ပတြၢၤ ၁၄၃:၈) ဒုးနၢ်ဟူယၤလၢ နဘျုးနဖှိၣ်လၢဂီၤဂီၤတက့ၢ်. အဂ့ၢ်ဒ်အံၤ, ယသန့ၤယသးလၢနၤလီၤ. ကျဲလၢယဂ့ၤပိာ်တဘိန့ၣ် ဒုးသ့ၣ်ညါယၤတက့ၢ်. အဂ့ၢ်ဒ်အံၤ, ယစိာ်ထီၣ်ယသးဆူနအိၣ်လီၤ.
တၢး၁၀ ၁/၁၅ ကဘျံးပၤ ၂၁ အဆၢ ၁–၂
လၢနတၢ်အိၣ်မူအပူၤ မၤလၤကပီၤယဟိဝၤယွၤ ကိးနံၤဒဲး
ပှၤကွဲးထါစံးထီၣ်ပတြၢၤ စီၤဒၤဝံးဃ့ထုကဖၣ်လၢ ယဟိဝၤအအိၣ်လၢ “ဒုးနၢ်ဟူယၤလၢ နဘျုးနဖှိၣ်လၢဂီၤဂီၤတက့ၢ်. . . . ကျဲလၢယဂ့ၤပိာ်တဘိန့ၣ် ဒုးသ့ၣ်ညါယၤတက့ၢ်.” (စံးထီၣ်ပတြၢၤ ၁၄၃:၈) ဖဲနပၢၢ်ထီၣ်ဒီး စံးဘျုးစံးဖှိၣ်ယဟိဝၤယွၤအခါ ဒ်စီၤဒၤဝံးအသိး မ့ၢ်နဃ့ထုကဖၣ်လၢ ကစၢ်ယွၤကဟံးစုနဲၣ်ကျဲနၤဒ်သိး နဆၢတဲာ်တၢ်လၢအဘၣ်ဒီး မၤတၢ်လၢအဂ့ၤကသ့အဂီၢ်န့ၣ်ဧါ. နကမၤသပှၢ်ကတၢၢ်လီၤ.
ဒ်ပမ့ၢ် ယဟိဝၤယွၤ အခ့အပှၤအသိး ‘ပအီၣ်တၢ်မ့ၢ်ဂ့ၤ, ပအီတၢ်မ့ၢ်ဂ့ၤ, ကယဲၢ်တၢ်လၢ ပမၤမ့ၢ်ဂ့ၤ, မၤတၢ်ခဲလၢာ်လၢ ယွၤအလၤကပီၤအဂီၢ်တက့ၢ်.’ (၁ ကရံၣ်သူး ၁၀:၃၁) ပသ့ၣ်ညါလၢ ပတၢ်အိၣ်မူ သကဲာ်ပဝးန့ၣ် ကဲထီၣ်တၢ်မၤလၤကပီၤ မ့တမ့ၢ် မၤဘၣ်ဒိ ယဟိဝၤယွၤအမံၤသ့လီၤ. ထီဘိန့ၣ်ပသ့ၣ်နီၣ်ထီၣ် လံာ်စီဆှံအတၢ်ကတိၤလၢ မုၣ်ကီၤလံၢ်စံးအၢစံးသီဝဲ ယ့ၣ်ၡူးအဒီပုၢ်ဝဲၢ်တဖၣ်ဒီး ကစၢ်အခ့အပှၤတဖၣ်လၢ အအိၣ်လၢဟီၣ်ခိၣ်ချၢလၢ “မုၢ်ဆါဆဲးလၢမုၢ်နၤ” လီၤ. (လီၣ်ဖျါ ၁၂:၁၀) လၢတၢ်န့ၣ်အဃိ ပပာ်လီၤပသးလၢ ပကမၤသးခု ယဟိဝၤယွၤအသး ဒီးပာ်ဖျါထီၣ်လၢ မုၣ်ကီၤလံၢ် အတၢ်ကတိၤကမၣ်ဝဲ ခီဖျိ ပမၤကစၢ်ယွၤအတၢ်မၤလၢ “မုၢ်ဆါဆဲးလၢမုၢ်နၤ” လီၤ.—လီၣ်ဖျါ ၇:၁၅; ကတိၤဒိ ၂၇:၁၁.
(စံးထီၣ်ပတြၢၤ ၁၅၀:၆) မ်ကယဲၢ်တၢ်သး စံးထီၣ်ပတြၢၤယွၤတက့ၢ်.
it–2 ကဘျံးပၤ ၄၄၈
ထးခိၣ်
ထးခိၣ်န့ၣ် မ့ၢ်က့ၢ်ဂီၤတခါလၢ ယဟိဝၤယွၤ တ့လီၤဃာ်ဝဲဒ်သိး ကအီၣ်တၢ်ဒီး ကအ့ၣ်ဘျဲးတၢ်လၢ ကဖုအဂီၢ်လီၤ. မ့မ့ၢ် ပှၤဟီၣ်ခိၣ်ဖိတဖၣ်န့ၣ် ကတိၤတၢ်လၢ အထးခိၣ်သ့စ့ၢ်ကီးလီၤ. ပတၢ်ကတိၤခဲလၢာ်န့ၣ် ကြၢးမ့ၢ်လၢ ပကစံးထီၣ်ပတြၢၤယွၤအဂီၢ်လီၤ. (စံးထီၣ်ပတြၢၤ ၃၄:၁; ၅၁:၁၅; ၇၁:၈; ၁၄၅:၂၁) ပှၤကွဲးထါစံးထီၣ်ပတြၢၤ ပာ်ဖျါဝဲလၢ တၢ်လၢအအိၣ်ဒီး အသးသမူခဲလၢာ်န့ၣ် ကစံးထီၣ်ပတြၢၤ ယဟိဝၤယွၤလီၤ. လၢတၢ်န့ၣ်အဃိ ပှၤဟီၣ်ခိၣ်ဖိတဖၣ် မ့ၢ်အဲၣ်ဒိး ဒိးန့ၢ်ဘၣ်ဝဲတၢ်မူန့ၣ် ကဘၣ်သူ အထးခိၣ်လၢ ကစံးထီၣ်ပတြၢၤ ယဟိဝၤယွၤအဂီၢ်လီၤ. တၢ်မၢဖိပီလူး ပာ်ဖျါထီၣ်ဝဲလၢ ထဲဒၣ်ပနာ်ယွၤဒီး အဖိခွါ လၢပသးဒီဖျၢၣ်န့ၣ် တလၢပှဲၤဒံးဘၣ်. ဒ်သိးပကဒိးန့ၢ်ဘၣ် တၢ်အုၣ်က့ၤခီၣ်က့ၤအဂီၢ် ပကဘၣ်စံၣ်တဲၤတဲလီၤတၢ်လၢ ပှၤဂၤအမဲာ်ညါလီၤ.—စံးထီၣ်ပတြၢၤ ၁၅၀:၆; ရိမ့ၤ ၁၀:၁၀.
ဒ်ယဟိဝၤယွၤ မ့ၢ်တၢ်ဘၣ်တ့ကစၢ်အသိး အဝဲဒုးကတိၤဝဲ အခ့အပှၤ တၢ်ကတိၤလၢ အလီၤပလိာ်ဒီး အတၢ်တိာ်ပာ်, အတၢ်ခွဲးတၢ်ယာ်, ဒီးအစိအကမီၤသ့ဝဲလီၤ. အဝဲသူဝဲ သးစီဆှံဒီး မၤတၢ်လီၤလး ခီဖျိလၢဝံတဖၣ်လီၤ. (၂ မိၤၡ့ ၄:၁၁, ၁၂, ၁၅; ယံးရမံယၤ ၁:၉) ဘၣ်တဘျီ အဝဲမၤဝဲဒ်သိး ကသ့ၣ်ယီၤလၢ အကတိၤတၢ်တသ့ ကကတိၤတၢ်အဂီၢ်လီၤ. (၄ မိၤၡ့ ၂၂:၂၈, ၃၀; ၂ ပ့းတရူး ၂:၁၅, ၁၆) မုၢ်မဆါတနံၤအံၤ ကစၢ်ယွၤ အခ့အပှၤတဖၣ် ကတိၤဝဲ ကစၢ်ယွၤ အကလုၢ်ကထါသ့ဝဲလီၤ. ဘၣ်ဆၣ် တမ့ၢ်လၢ သးစီဆှံ ထိးဘၣ်အသးအဃိဘၣ်, မ့ၢ်လၢကစၢ်ယွၤ အကလုၢ်ကထါလၢ အဘၣ်တၢ်ကွဲးအီၤလၢ သးစီဆှံ မၤစၢၤအီၤဒ်သိး ကမၤလၢပှဲၤ ကယဲၢ်တၢ်မၤဂ့ၤ ကိးမံၤဒဲးအဃိလီၤ. (၂ တံၤမသ့း ၃:၁၆, ၁၇) ဘၣ်ဃးဒီး တၢ်သးခုကစီၣ်အဂ့ၢ်န့ၣ် တလိၣ်အဝဲသ့ၣ် အိၣ်ခိးဝဲတုၤလၢ ယ့ၣ်ၡူးကဟဲတဲပၠးအီၤဘၣ် ဒီးတလိၣ်ဟးဃုဝဲ လၢတၢ်လီၢ်အဂၤဘၣ်. ဒ်တၢ်ကွဲးအသးလၢ– “အကလုၢ်အကထါအိၣ်ဘူးဒီးနၤ, အိၣ်ဝဲလၢနကိာ်ပူၤ, ဒီးလၢနသးကံၢ်ပူၤ” အသိး ကစၢ်ယွၤအကလုၢ်ကထါ အိၣ်ပာ်စၢၤလၢအဝဲသ့ၣ် အထးခိၣ်, ဒီးအဝဲသ့ၣ်အိၣ်ဒီး တၢ်ခွဲးတၢ်ယာ်လၢ ကတဲဝဲအဂီၢ်လီၤ.—ရိမ့ၤ ၁၀:၆-၉; ၅ မိၤၡ့ ၃၀:၁၁-၁၄.
မၤမူတၢ်သ့ မ့တမ့ၢ် မၤသံတၢ်သ့. ယဟိဝၤယွၤ စံးဝဲလၢ ပကဘၣ်သူ ပထးခိၣ်လၢကျဲလၢအဘၣ်လီၤ. ကစၢ်အကလုၢ်ကထါ စံးဝဲလၢ– “ပှၤတီပှၤလိၤအထးခိၣ်မ့ၢ်ထံမူအပူၤလီၤ.” (ကတိၤဒိ ၁၀:၁၁) လၢတၢ်န့ၣ်အဃိ ပကဘၣ်အိၣ်ဒီး တၢ်ပလီၢ်သူၣ်ပလီၢ်သး ဒီးပၢၤပထးခိၣ်လီၤ. (စံးထီၣ်ပတြၢၤ ၁၄၁:၃; ကတိၤဒိ ၁၃:၃; ၂၁:၂၃) ပမ့ၢ်သူကမၣ် ပထးခိၣ်န့ၣ် ပကတုၤလၢ တၢ်ဟးဂီၤသ့ဝဲလီၤ. (ကတိၤဒိ ၁၀:၁၄; ၁၈:၇) ယဟိဝၤယွၤ ကစံၣ်ညီၣ်ပှၤလၢ ပတၢ်စံးတၢ်ကတိၤအဖီခိၣ်လီၤ. (မးသဲ ၁၂:၃၆, ၃၇) ဘၣ်သ့ၣ်သ့ၣ် ပှၤတဂၤ ကကတိၤတၢ်ချ့ချ့, ကမၤတၢ်အၢၣ်လီၤအီလီၤညီညီလီၤ. (စံၣ်တဲၤတဲလီၤတၢ် ၅:၄-၆) ဘၣ်သ့ၣ်သ့ၣ် အဝဲကစံးပတြၢၤ ပှၤအဂၤတဂၤ လၢတၢ်သူၣ်တဘျၢသးတဘျၢအပူၤအဃိ ပှၤတဂၤန့ၣ် ကလီၤဃံၢ်ဝဲ ဒီးဘၣ်သ့ၣ်သ့ၣ် အဝဲကတုၤလၢ တၢ်စံၣ်ညီၣ်လီၤ. (ကတိၤဒိ ၂၆:၂၈) လီၤဆီဒၣ်တၢ် ဖဲပအိၣ်လၢ ပှၤအၢပှၤသီအကျါအခါ အရ့ဒိၣ်လၢ ပကဘၣ်ပၢၤပထးခိၣ်လီၤ. မ့ၢ်လၢပတဲတၢ် မ့ၢ်ကမၣ်ထဲတစဲးဖိဒၣ်လဲာ် ကဲထီၣ်တၢ်ဘၣ်ဒိဘၣ်ထံးလၢ ကစၢ်ယွၤအမံၤ ဒီးဘၣ်သ့ၣ်သ့ၣ် ပကတုၤလၢတၢ်သံလီၤ. (စံးထီၣ်ပတြၢၤ ၃၉:၁) ယ့ၣ်ၡူး ပာ်ဖျါထီၣ် တၢ်ဒိဂ့ၤတဲာ်ဘၣ်လၢ ဘၣ်ဃးဒီး တၢ်ဒိကနၣ် ကစၢ်ယွၤအကလုၢ် ခီဖျိတစံးအၢစံးသီဝဲ ပှၤအၢပှၤသီလၢ အထီဒါအီၤတဖၣ်န့ၣ်ဘၣ်.—ယၡါယၤ ၅၃:၇; မၤတၢ် ၈:၃၂; ၁ ပ့းတရူး ၂:၂၃.
မ့ၢ်လၢ ပှၤခရံာ်ဖိတဖၣ် တလၢတပှဲၤအဃိ အဝဲသ့ၣ် ကဘၣ်ပလီၢ်အသးထီဘိ ဒီးပၢၤအသးလီၤ. ယ့ၣ်ၡူး တဲဝဲလၢ တၢ်လၢအမၤဘၣ်အၢ ပှၤကညီန့ၣ် တမ့ၢ်တၢ်လၢ အဟဲနုာ်လၢအထးခိၣ်အပူၤဘၣ်. ဘၣ်ဆၣ် တၢ်လၢအဟဲဟးထီၣ် လၢပထးခိၣ်န့ၣ် မ့ၢ်ဝဲ “ဒ်တၢ်ပှဲၤအသးဒီး လုၣ်ကွံာ်အသိးန့ၣ်, ပထးခိၣ်ကတိၤတၢ်လီၤ.” (မးသဲ ၁၂:၃၄; ၁၅:၁၁) အဃိ တချုးလၢ ပှၤတဂၤတဲတၢ်တမံၤမံၤဒံးဘၣ်န့ၣ် အဝဲကဘၣ်ပလီၢ်အသးဒီး ဆိကမိၣ်ထံဝဲ တၢ်လၢကဟဲကဲထီၣ်အသးတဖၣ်န့ၣ်လီၤ. ပှၤတဂၤအံၤ ကဘၣ်ပာ်လီၤအသး ဒ်သိးကမၤထွဲဝဲ တၢ်ဂ့ၤလၢအမၤလိဘၣ်ဝဲလၢ ကစၢ်ယွၤ အကလုၢ်ကထါအပူၤလီၤ.—ကတိၤဒိ ၁၃:၃; ၂၁:၂၃.