တူၢ်လိာ် ယဟိဝၤယွၤ ဒ်အမ့ၢ်ပှၤတ့သပၢၤတက့ၢ်

၁. ဘၣ်မနုၤအဃိ ယဟိဝၤယွၤ မ့ၢ်ပှၤတ့သပၢၤလၢ အဂ့ၤကတၢၢ်တဂၤလဲၣ်.

ဖဲ ၂၀၁၀ လါနိၣ်ဝ့ဘၢၣ်, လၢကီၢ်အဲကလံးအပူၤန့ၣ် တရူး အဖီကိလၢပျၢၤတဖျၢၣ် ဘၣ်တၢ်ဆါအီၤလၢ ဒီလၣ်အကကွဲၢ် ၇၀ ဃၣ်ဃၣ်လီၤ. ပှၤတ့ဖီကိတဂၤအံၤ အိၣ်ဒီးတၢ်စုသ့ခီၣ်ဘၣ် မ့ၢ်လၢ ကပံာ်လၢအလုၢ်အပှ့ၤတအိၣ်ဒၣ်လဲာ် အဝဲမၤကဲထီၣ်ဝဲလၢ ဖီကိလၢအဃံၤအလၤ ဒီးအလုၢ်ဒိၣ်ပှ့ၤဒိၣ်တဖျၢၣ်သ့ဝဲအဃိန့ၣ်လီၤ. ယဟိဝၤယွၤန့ၣ် မ့ၢ်ပပှၤတ့သပၢၤ လၢအတၢ်သ့တၢ်ဘၣ် အိၣ်အါန့ၢ်ဒံး ပှၤဟီၣ်ခိၣ်ဖိလၢ အတ့သပၢၤတဂၤန့ၣ်လီၤ. လံာ်စီဆှံ စံးဝဲလၢ ယဟိဝၤယွၤ တ့လီၤပှၤလၢပှၤပှဲၤတဂၤလၢ “ဟီၣ်ခိၣ်အကမူၣ်” မ့တမ့ၢ် ကပံာ်လီၤ. (၁ မိၤၡ့ ၂:၇) စီၤအၤဒၣ်န့ၣ်မ့ၢ်ဝဲ “ယွၤအဖိခွါ” ဒီးအဝဲအိၣ်ဒီး တၢ်သ့တၢ်ဘၣ်လၢ ကကွၢ်လိကစၢ်ယွၤ အတၢ်ဂ့ၤတၢ်ဝါတဖၣ်လီၤ.—လူၤကၣ် ၃:၃၈.

၂, ၃. ပကွၢ်လိ ပှၤအံၣ်စရ့လးဖိလၢ အပီၢ်ယၢ်လီၤအသးသ့ၣ်တဖၣ် အတၢ်ပာ်သူၣ်ပာ်သးကသ့ဒ်လဲၣ်.

^၂ ဖဲစီၤအၤဒၣ် ပူထီၣ်တၢ်ဘၣ်တ့ကစၢ်အခါ အဝဲတမ့ၢ် ယွၤအဖိခွါလၢၤဘၣ်. ဘၣ်ဆၣ် စီၤအၤဒၣ်အစၢၤအသွဲၣ်အါဂၤန့ၣ် ဃုထၢယဟိဝၤယွၤ ဒ်အဝဲသ့ၣ် အတၢ်ပၢကစၢ်အသိးလီၤ. (ဧ့ၤဘြံၤ ၁၂:၁) ခီဖျိလၢအဝဲသ့ၣ် သးအိၣ်ဒိကနၣ် တၢ်ဘၣ်တ့ကစၢ် အကလုၢ်အဃိ ပာ်ဖျါထီၣ်ဝဲလၢ အဝဲသ့ၣ် တတူၢ်လိာ်မုၣ်ကီၢ်လံၢ်ဘၣ်, တူၢ်လိာ်ဝဲ ယဟိဝၤယွၤ ဒ်အပၢ် ဒီးပှၤတ့သပၢၤအသိးန့ၣ်လီၤ. (ယိၤဟၣ် ၈:၄၄) အဝဲသ့ၣ် အတၢ်သးတီဒီး ကစၢ်ယွၤန့ၣ် ဒုးသ့ၣ်နီၣ်ထီၣ်ပှၤလၢ ပှၤအံၣ်စရ့လးဖိလၢ အပီၢ်ယၢ်လီၤက့ၤအသးတဖၣ် အတၢ်ကတိၤလၢအမ့ၢ်– “ယွၤဧၢ, နမ့ၢ်ပပၢ်လီၤ. ပဝဲဒၣ်အံၤပမ့ၢ်ကပံာ်ဟီၣ်ခိၣ်, ဒီးနဲဒၣ်နမ့ၢ်ပှၤတ့သပၢၤလီၤ. ဒီးပမ့ၢ်တၢ်လၢ နမၤလၢနစုန့ၣ်ခဲလၢာ်လီၤ.”—ယၡါယၤ ၆၄:၈.

^၃ မုၢ်မဆါတနံၤအံၤ ပှၤလၢ အဘူၣ်ထီၣ်ဘါထီၣ် ယဟိဝၤယွၤန့ၣ် ဂုာ်ကျဲးစၢးပာ်ဖျါထီၣ် တၢ်ဆီၣ်လီၤသး ဒီးတၢ်ဒိကနၣ်လီၤ. အဝဲသ့ၣ် ထံၣ်ယဟိဝၤယွၤ ဒ်အမ့ၢ်ပၢ် ဒီးပှၤလၢအဘှီဂ့ၤထီၣ်အီၤ ဒ်ပှၤတ့သပၢၤတဂၤအသိးန့ၣ်လီၤ. မ့ၢ်နသးအိၣ်ကဲထီၣ် ကပံာ်အကပုာ် ဒ်သိးကစၢ်ယွၤ ကဘှီဂ့ၤထီၣ်နၤ တုၤလၢနလီၤဂာ် ဖီကိလၢအလုၢ်ဒိၣ်ပှ့ၤဒိၣ်စ့ၢ်ကီးဧါ. မ့ၢ်နထံၣ် နဒီပုၢ်ဝဲၢ်မုၣ် ဒီပုၢ်ဝဲၢ်ခွါတဂၤစုာ်စုာ် ဒ်ကပံာ်လၢ ကစၢ်ယွၤတ့အီၤ လၢအကကဲထီၣ်ဒ်ဖီကိလၢ အဃံလၤအသိးဧါ. ဒ်သိးပကအိၣ်ဒီး တၢ်ထံၣ်လၢအဂ့ၤအဂီၢ် ပကတဲသကိး ဘၣ်ဃးဒီး ပှၤလၢယဟိဝၤယွၤ ဘှီဂ့ၤထီၣ်က့ၤအီၤတဖၣ်အဂ့ၢ်, ဘၣ်မနုၤအဃိ ယဟိဝၤယွၤ ဘှီအဝဲသ့ၣ်လဲၣ် ဒီးယဟိဝၤယွၤ ဘှီအဝဲသ့ၣ်ဒ်လဲၣ်အဂ့ၢ်န့ၣ်လီၤ.

ပှၤလၢယဟိဝၤယွၤ ဘှီဂ့ၤထီၣ်က့ၤအီၤတဖၣ်

၄. ယဟိဝၤယွၤဃုထၢ ပှၤလၢအကဟဲဆူအအိၣ်တဖၣ်ဒ်လဲၣ်. ဟ့ၣ်တၢ်အဒိတက့ၢ်.

^၄ ယဟိဝၤယွၤ တထံၣ်ပှၤဟီၣ်ခိၣ်ဖိ ဒ်ပထံၣ်အီၤအသိးဘၣ်. ယဟိဝၤယွၤ သမံသမိးကွၢ်ပသး ဒီးသ့ၣ်ညါဝဲလၢ ပမ့ၢ်ပှၤဒ်လဲၣ်တဂၤလဲၣ်န့ၣ်လီၤ. (ဖး ၁ ၡမူၤအ့လး ၁၆:၇ ခ တက့ၢ်.) ယဟိဝၤယွၤ ပာ်ဖျါထီၣ်ဝဲတၢ်ဂ့ၢ်အံၤ ဖဲအဒုးအိၣ်ထီၣ် ခရံာ်ဖိတၢ်အိၣ်ဖှိၣ်အခါန့ၣ်လီၤ. ပှၤအါဂၤလၢ ဘၣ်တၢ်ထံၣ်အီၤဒ် ပှၤလၢအတကျၢတခီဒၣ်လဲာ်န့ၣ် ယဟိဝၤယွၤ မိၤဃီၤအဝဲသ့ၣ်ဆူအအိၣ် ဒီးအဖိခွါအအိၣ်န့ၣ်လီၤ. (ယိၤဟၣ် ၆:၄၄) အဒိ, ပှၤဖၤရံၤၡဲတဂၤလၢ အမံၤမ့ၢ်စီၤစီလူးန့ၣ် “မ့ၢ်ပှၤဒုၣ်ဒွဲၣ်တၢ်, ဒီးပှၤမၤအၢမၤသီတၢ်, ဒီးပှၤအဒူ” တဂၤလီၤ. (၁ တံၤမသ့း ၁:၁၃) ဘၣ်ဆၣ် ယဟိဝၤယွၤ ထံၣ်ဝဲတၢ်ဂ့ၤလၢ စီၤစီလူးအသးကံၢ်ပူၤ ဒီးတထံၣ်အီၤဒ်အမ့ၢ်ကပံာ်လၢ ပှၤသူအီၤတသ့လၢၤဘၣ်အသိးန့ၣ်ဘၣ်. (ကတိၤဒိ ၁၇:၃) ဘၣ်ဆၣ် ယဟိဝၤယွၤ ထံၣ်စီၤစီလူး ဒ်အမ့ၢ်ကပံာ်လၢအဂ့ၤ ဒီးတ့ထီၣ်အီၤလၢ “တၢ်ဃုထၢ အသပၢၤ” လၢကဘၣ် စံၣ်တဲၤတဲလီၤတၢ် “ဆူပှၤကလုာ်တဖၣ်, ဒီးစီၤပၤတဖၣ်, ဒီးပှၤအံၣ်စရ့လးဖိတဖၣ်” အအိၣ်န့ၣ်လီၤ. (မၤတၢ် ၉:၁၅) ယဟိဝၤယွၤ ဃုထၢစ့ၢ်ကီးပှၤအဂၤတဖၣ် လၢကတ့ထီၣ်အဝဲသ့ၣ် ဒ်အမ့ၢ်သပၢၤလၢ “တၢ်လၤကပီၤအဂီၢ်” စ့ၢ်ကီးန့ၣ်လီၤ. ပှၤတဖၣ်အံၤ ပၣ်ဃုာ်ဒီး ပှၤအီလုၢ်ကိလုၢ်ကပာ်, ပှၤမၤကမၣ်မုၣ်ကမၣ်ခွါ, ဒီးပှၤဟုၣ်တၢ်တဖၣ်န့ၣ်လီၤ. (ရိမ့ၤ ၉:၂၁; ၁ ကရံၣ်သူး ၆:၉-၁၁) အဝဲသ့ၣ် မၤလိဝဲလံာ်စီဆှံ, အတၢ်နာ် ယဟိဝၤယွၤအါထီၣ်ဝဲ ဒီးပျဲကစၢ်ယွၤလၢ ကဘှီဂ့ၤထီၣ်က့ၤအဝဲသ့ၣ်န့ၣ်လီၤ.

၅, ၆. (က) ပမ့ၢ်နာ်န့ၢ် ယဟိဝၤယွၤဒ် ပပှၤတ့သပၢၤအသိးန့ၣ် ပတၢ်ပာ်သူၣ်ပာ်သးလၢ ပှၤလၢပလီၢ်ကဝီၤပူၤတဖၣ်အဖီခိၣ် ကအိၣ်ဒ်လဲၣ်. (ခ) ပမ့ၢ်နာ်န့ၢ် ယဟိဝၤယွၤဒ် ပပှၤတ့သပၢၤအသိးန့ၣ် ပတၢ်ပာ်သူၣ်ပာ်သး လၢပဒီပုၢ်ဝဲၢ်တဖၣ် အဖီခိၣ်ကအိၣ်ဒ်လဲၣ်.

^၅ ပနာ်သပှၢ်ကတၢၢ်လၢ ယဟိဝၤယွၤ ဃုထၢဒီးမိၤပှၤလၢအဂ့ၤ ဆူအအိၣ်သ့ဝဲလီၤ. လၢတၢ်န့ၣ်အဃိ ပှၤအိၣ်လၢ ပလီၢ်ကဝီၤအပူၤမ့ၢ်ဂ့ၤ, လၢပတၢ်အိၣ်ဖှိၣ်အပူၤမ့ၢ်ဂ့ၤ ပတကြၢးစံၣ်ညီၣ်ဆိအဝဲသ့ၣ်ဘၣ်. အဒိ, ဆိကမိၣ်ကွၢ် မၢၣ်ခဲၣ် အတၢ်အိၣ်သး ဖဲယဟိဝၤပှၤအုၣ်အသးတဖၣ် ဟဲအိၣ်သကိးအီၤအခါတက့ၢ်. အဝဲတဲဝဲလၢ– “ဖဲအဝဲသ့ၣ်ဟဲအခါ ယတကနၣ်ဃုာ်အီၤဘၣ် ဒီးယပာ်မၤယသးဒ်သိး ယတထံၣ်အဝဲသ့ၣ်ဘၣ်. ယတပာ်ကဲ အဝဲသ့ၣ်နီတစဲးဘၣ်. ဘၣ်တဘျီ ယထံၣ်လိာ်သးဒီး ဟံၣ်ဖိဃီဖိတဒူၣ် ဒီးအဝဲသ့ၣ်လီၤပတြၢၤဒိၣ်မး မ့ၢ်လၢ အဝဲသ့ၣ် အလုၢ်လၢ်သကဲာ်ပဝးဂ့ၤအဃိန့ၣ်လီၤ. ဘၣ်တနံၤန့ၣ် ယသ့ၣ်ညါဘၣ်လၢ အဝဲသ့ၣ်မ့ၢ် ယဟိဝၤပှၤအုၣ်အသးအဃိ ယဖုးဘၣ်ယသးဒိၣ်မးလီၤ. အဝဲသ့ၣ် အတၢ်ပာ်သူၣ်ပာ်သးန့ၣ် ထိၣ်ဟူးထိၣ်ဂဲၤထီၣ်ယၤလၢ ယကသမံသမိးလီၤက့ၤ ယတၢ်ထံၣ်န့ၣ်လီၤ. ယသ့ၣ်ညါလီၤယသးလၢ ယဟးနာ်ကြီတၢ် ဒီးယတသ့ၣ်ညါ တၢ်ဂ့ၢ်လီၤတံၢ်လီၤဆဲးအဃိန့ၣ်လီၤ.” မၢၣ်ခဲၣ် အဲၣ်ဒိးသ့ၣ်ညါအါထီၣ်တၢ်ဒီး တူၢ်လိာ်ဝဲ ပှၤလၢကမၤလိအီၤ လံာ်စီဆှံန့ၣ်လီၤ. လၢခံအဝဲ ဒိးဘျၢထံ ဒီးကဲထီၣ် ပှၤစံၣ်တဲၤတဲလီၤတၢ်လၢ ဆၢကတီၢ်လၢပှဲၤတဂၤလီၤ.

^၆ ပမ့ၢ်ထံၣ်ယဟိဝၤယွၤ ဒ်ပှၤတ့သပၢၤန့ၣ် ပတၢ်ပာ်သူၣ်ပာ်သး လၢပဒီပုၢ်ဝဲၢ်တဖၣ် အဖီခိၣ်န့ၣ် ကဆီတလဲစ့ၢ်ကီးလီၤ. ပကထံၣ် အဝဲသ့ၣ် ဒ်သပၢၤလၢ လိၣ်ဘၣ်တၢ်ဘှီဂ့ၤထီၣ်ဒံးအီၤလီၤ. ယဟိဝၤယွၤ ထံၣ်အဝဲသ့ၣ်အသး ဒီးသ့ၣ်ညါဝဲလၢ အတလၢတပှဲၤဒံးဘၣ်န့ၣ်လီၤ. ပှၤတဂၤစုာ်စုာ် ကကဲထီၣ်ပှၤဒ်လဲၣ်တဂၤလဲၣ်န့ၣ် သ့ၣ်ညါဝဲစ့ၢ်ကီးလီၤ. (စံးထီၣ်ပတြၢၤ ၁၃၀:၃) ပကွၢ်လိမၤဒိး ယဟိဝၤယွၤသ့ ခီဖျိပအိၣ်ဒီး တၢ်ထံၣ်လၢအဂ့ၤ လၢပဒီပုၢ်ဝဲၢ်တဖၣ် အဖီခိၣ်န့ၣ်လီၤ. ပမၤသကိးတၢ်ဒီး ပပှၤတ့သပၢၤ ဒ်သိးပကမၤစၢၤ ပဒီပုၢ်ဝဲၢ်တဖၣ်လၢ ကဒိၣ်ထီၣ်ထီထီၣ် လၢနီၢ်သးတခီအဂီၢ်န့ၣ်လီၤ. (၁ သ့းစၤလနံ ၅:၁၄, ၁၅) လၢတၢ်အိၣ်ဖှိၣ်အပူၤန့ၣ် တၢ်အိၣ်ဖှိၣ်သးပှၢ်တဖၣ် ကြၢးပာ်လီၤဒိဂ့ၤတဲာ်ဘၣ်လၢ ကမၤစၢၤ တၢ်အိၣ်ဖှိၣ်ဖိတဖၣ်အဂီၢ်န့ၣ်လီၤ.—အ့းဖ့းစူး ၄:၈, ၁၁-၁၃.

ဘၣ်မနုၤအဃိ ယဟိဝၤယွၤ ဘှီဂ့ၤထီၣ်ပှၤလဲၣ်

၇. ဘၣ်မနုၤအဃိ နပာ်လုၢ်ပာ်ပှ့ၤ ယဟိဝၤယွၤ အတၢ်သိၣ်က့ၤသီက့ၤလဲၣ်.

^၇ ပှၤတနီၤ ကစံးဝဲလၢ– ‘ဖဲယဖိတအိၣ်ဒံးအခါန့ၣ် ယမိၢ်ယပၢ် အတၢ်သိၣ်က့ၤသီက့ၤတဖၣ် ယတပာ်လုၢ်ပာ်ပှ့ၤအီၤ လၢလၢပှဲၤပှဲၤဘၣ်.’ ဖဲပနီၢ်ဒိၣ်ထီၣ်အခါ ပသ့ၣ်ညါပာ်လုၢ်ပာ်ပှ့ၤ တၢ်သိၣ်က့ၤသီက့ၤတဖၣ်လီၤ. ပသ့ၣ်ညါလၢ ပှၤအဲၣ်ပှၤအဃိ ပှၤသိၣ်က့ၤသီက့ၤပှၤလီၤ. (ဖး ဧ့ၤဘြံၤ ၁၂:၅, ၆, ၁၁ တက့ၢ်.) ယဟိဝၤယွၤ အဲၣ်ပှၤဒ်အဖိအလံၤအသိးလီၤ. လၢတၢ်န့ၣ်အဃိ ကစၢ်ယွၤသိၣ်က့ၤသီက့ၤပှၤ ဒီးဘှီဂ့ၤထီၣ်က့ၤပှၤ လၢတၢ်သူၣ်စူၤသးစူၤအပူၤန့ၣ်လီၤ. ယဟိဝၤယွၤအဲၣ်ဒိးလၢ ပကအိၣ်ဒီးတၢ်ကူၣ်သ့, တၢ်သူၣ်ခုသးခု ဒီးကအဲၣ်အီၤဒ် ပၢ်တဂၤအသိးလီၤ. (ကတိၤဒိ ၂၃:၁၅) ကစၢ်တအဲၣ်ဒိးလၢ ပကထံၣ်ဘၣ် တၢ်နးတၢ်ဖှီၣ် ဒီးပကသံဒ် ပှၤတၢ်ဒဲးဘးဖိ လၢတပီၢ်ယၢ်လီၤက့ၤအသးအသိးန့ၣ်ဘၣ်.—အ့းဖ့းစူး ၂:၂, ၃.

၈, ၉. မုၢ်မဆါတနံၤအံၤ ယဟိဝၤယွၤ သိၣ်လိပှၤဒ်လဲၣ်, ဒီးခါဆူညါ အတၢ်သိၣ်လိအံၤ ကဆဲးအိၣ်ဒ်လဲၣ်.

^၈ တချုးလၢ ပသ့ၣ်ညါထီၣ် ယဟိဝၤယွၤအဂ့ၢ်ဒံးဘၣ်န့ၣ် ဘၣ်သ့ၣ်သ့ၣ် ပကအိၣ်ဒီး လုၢ်လၢ်သကဲာ်ပဝးလၢ အတဂ့ၤတဖၣ်လီၤ. ဒ်သိးပဆီတလဲပသးကန့ၢ်အဂီၢ် ယဟိဝၤယွၤ ဘှီဂ့ၤထီၣ်က့ၤပှၤဒီးမၤစၢၤပှၤအဃိ ခဲအံၤ ပအိၣ်ဒီးတၢ်ဂ့ၤတၢ်ဝါတနီၤလံလီၤ. (ယၡါယၤ ၁၁:၆-၈; ကလီးစဲ ၃:၉, ၁၀) ခဲအံၤ ပအိၣ်မူဘၣ်လၢ နီၢ်သးပၤရဒံစူးအပူၤလီၤ. နီၢ်သးပၤရဒံစူးအံၤ ယဟိဝၤယွၤဒုးအိၣ်ထီၣ်ဝဲလၢ ကဘှီဂ့ၤထီၣ်က့ၤပှၤအဂီၢ်လီၤ. တၢ်အၢတၢ်သီ အိၣ်ဝးတရံးပှၤ သနာ်က့ ပအိၣ်ဘၣ်လၢနီၢ်သး ပၤရဒံစူးအပူၤအဃိ ပတပျံၤတၢ် ဒီးတဘၣ်ယိၣ်တၢ်ဘၣ်. ပှၤလၢအဒိၣ်ထီၣ်ဘၣ်လၢ ဟံၣ်ဖိဃီဖိလၢ တၢ်အဲၣ်တၢ်ကွံတအိၣ်ဘၣ်အကျါန့ၣ် ခဲအံၤ အဝဲသ့ၣ် ဒိးန့ၢ်ဘၣ် တၢ်အဲၣ်နီၢ်နီၢ်လၢ ဒီပုၢ်ဝဲၢ်သ့ၣ်တဖၣ်အအိၣ် လၢနီၢ်သးပၤရဒံစူးအပူၤလီၤ. (ယိၤဟၣ် ၁၃:၃၅) ဒီးပသ့ၣ်ညါဘၣ်လၢ ပကဘၣ်ပာ်ဖျါထီၣ် တၢ်အဲၣ်ပှၤလၢပဃၢၤန့ၣ်လီၤ. တကးဒံးဘၣ် တၢ်လၢအရ့ဒိၣ်ကတၢၢ်န့ၣ် မ့ၢ်ပသ့ၣ်ညါထီၣ် ယဟိဝၤယွၤ ဒီး ခဲအံၤဒိးန့ၢ်ဘၣ် အတၢ်အဲၣ်လၢ လီၤဂာ်ဒ်ပၢ်အတၢ်အဲၣ်အသိးန့ၣ်လီၤ. —ယၤကိာ် ၄:၈.

^၉ လၢဟီၣ်ခိၣ်သီအပူၤန့ၣ် ပကဒိးန့ၢ်ဘၣ် တၢ်ဘျုးတၢ်ဖှိၣ် လၢလၢပှဲၤပှဲၤလၢ နီၢ်သးပၤရဒံစူးလီၤ. တယံာ်လၢၤဘၣ် ပကအိၣ်မူဘၣ်စ့ၢ်ကီး လၢဟီၣ်ခိၣ်ပၤရဒံစူး လၢအအိၣ် လၢယွၤအဘီအမုၢ် အတၢ်ပၢအဖီလာ်န့ၣ်လီၤ. ဖဲန့ၣ်အဆၢကတီၢ် ယဟိဝၤယွၤ ကဆဲးဘှီဂ့ၤထီၣ်က့ၤပှၤ ဒီးသိၣ်လိပှၤန့ၣ်လီၤ. (ယၡါယၤ ၁၁:၉) ယဟိဝၤယွၤ ကမၤစၢၤပှၤ ဒ်သိးပကလၢထီၣ်ပှဲၤထီၣ်အဂီၢ်လီၤ. ပမ့ၢ်ကဲထီၣ် ပှၤလၢပှၤပှဲၤန့ၣ် ကညီဝဲလၢပကနၢ်ပၢၢ် ဒီးတူၢ်လိာ်အတၢ်ဟံးစုနဲၣ်ကျဲလီၤ. လၢတၢ်န့ၣ်အဃိ မ်ပကပျဲ ယဟိဝၤယွၤဘှီဂ့ၤထီၣ်ပှၤ ဒီးပာ်ဖျါထီၣ်လၢ ပပာ်လုၢ်ပာ်ပှ့ၤ အတၢ်အဲၣ်လၢပဖီခိၣ်န့ၣ်တက့ၢ်.—ကတိၤဒိ ၃:၁၁, ၁၂.

ယဟိဝၤယွၤ ဘှီဂ့ၤထီၣ်က့ၤပှၤဒ်လဲၣ်

၁၀. ယ့ၣ်ၡူးပာ်ဖျါထီၣ်ဝဲလၢ အကွၢ်လိ ပှၤတ့သပၢၤလၢအဒိၣ်ကတၢၢ် အတၢ်သးစူၤဒီး အတၢ်သ့တၢ်ဘၣ်ဒ်လဲၣ်.

^၁၀ ဒ်ပှၤတ့သပၢၤ အဂ့ၤကတၢၢ်တဂၤ သ့ၣ်ညါဝဲကပံာ်အဂ့ၢ်အသိး ယဟိဝၤယွၤ သ့ၣ်ညါပဂ့ၢ်ပကျိၤဂ့ၤဂ့ၤလီၤ. ယဟိဝၤယွၤ သ့ၣ်ညါပတၢ်ဂံၢ်စၢ်ဘါစၢ်, ပတၢ်လီၤတူာ်လီၤကာ် ဒီးသ့ၣ်ညါဝဲလၢ ပဂုာ်ကျဲးစၢးလၢ အဂ့ၤကတၢၢ်အဃိ ဖဲအဘှီပှၤအခါ အဝဲဆိကမိၣ်ထွဲဃုာ်ဒီး တၢ်ဂ့ၢ်သ့ၣ်တဖၣ်အံၤန့ၣ်လီၤ. (ဖး စံးထီၣ်ပတြၢၤ ၁၀၃:၁၀–၁၄ တက့ၢ်.) ယဟိဝၤယွၤထံၣ်ပှၤဒ်လဲၣ်န့ၣ် ပသ့ၣ်ညါသ့ ခီဖျိယ့ၣ်ၡူးအတၢ်ရ့လိာ်သးဒီး အတၢ်မၢဖိလၢ အတလၢတပှဲၤဘၣ်တဖၣ်န့ၣ်လီၤ. တဘျီတခီၣ်န့ၣ် တၢ်မၢဖိတဖၣ် တဲအါလိာ်အသး ဘၣ်ဃးဒီး မတၤတဂၤ မ့ၢ်ပှၤအဒိၣ်ကတၢၢ်လဲၣ်န့ၣ်လီၤ. နမ့ၢ်အိၣ်ဘၣ်ဖဲန့ၣ်န့ၣ် နကထံၣ် တၢ်မၢဖိသ့ၣ်တဖၣ်အံၤဒ်လဲၣ်. ဘၣ်သ့ၣ်သ့ၣ် နကဆိကမိၣ်လၢ အဝဲသ့ၣ်မ့ၢ် ကပံာ်လၢအဆှိၣ်လီၤ. ဘၣ်ဆၣ် ယ့ၣ်ၡူးသ့ၣ်ညါဝဲလၢ တၢ်မၢဖိတဖၣ် မ့ၢ်ဒိကနၣ် အတၢ်သိၣ်က့ၤသီက့ၤ ဒီးမ့ၢ်ကွၢ်လိမၤဒိး အတၢ်ဆီၣ်လီၤသးန့ၣ် အဝဲသ့ၣ် အတၢ်ပာ်သူၣ်ပာ်သး ကဂ့ၤထီၣ်က့ၤဝဲလီၤ. (မၢ်ကူး ၉:၃၃-၃၇; ၁၀:၃၇, ၄၁-၄၅; လူၤကၣ် ၂၂:၂၄-၂၇) ဖဲယ့ၣ်ၡူးဂဲၤဆၢထၢၣ် သမူထီၣ်က့ၤဝံၤအလီၢ်ခံ တၢ်မၢဖိတဖၣ်ဒိးန့ၢ်ဘၣ် ယွၤအသးစီဆှံလီၤ. ဘၣ်ဃးဒီး မတၤတဂၤ မ့ၢ်ပှၤဒိၣ်ကတၢၢ်လဲၣ်န့ၣ် အဝဲသ့ၣ်တတဲအါလိာ်အသးလၢၤဘၣ်. လၢတၢ်န့ၣ်အလီၢ် အဝဲသ့ၣ်သးစၢၢ်ဆၢ တၢ်မၤလၢ ယ့ၣ်ၡူးဟ့ၣ်တ့ၢ် အဝဲသ့ၣ်န့ၣ်လီၤ.—မၤတၢ် ၅:၄၂.

၁၁. စီၤဒၤဝံးပာ်ဖျါထီၣ်ဝဲလၢ အမ့ၢ်ကပံာ်ကပုာ်လၢ ကျဲဒ်လဲၣ်, ဒီးပကွၢ်လိအီၤ ကသ့ဒ်လဲၣ်.

^၁၁ မုၢ်မဆါတနံၤအံၤ ယဟိဝၤယွၤ သူဝဲလံာ်စီဆှံ, အသးစီဆှံ ဒီးတၢ်အိၣ်ဖှိၣ်လၢ ကဘှီဂ့ၤထီၣ်ပှၤအဂီၢ်လီၤ. လံာ်စီဆှံ ဘှီပှၤကသ့ဒ်လဲၣ်. ပကဘၣ်ဖးအီၤ, ဆိကမိၣ်ထံ တၢ်လၢပဖးအီၤတဖၣ် ဒီးဃ့တၢ်မၤစၢၤလၢ ယဟိဝၤယွၤအအိၣ် ဒ်သိးပမၤထွဲတၢ်လၢ ပမၤလိဘၣ်အီၤတဖၣ်ကန့ၢ်အဂီၢ်န့ၣ်လီၤ. စီၤပၤဒၤဝံးကွဲးဝဲလၢ– “ယသ့ၣ်နီၣ်ထီၣ်က့ၤနၤလၢ ယလီၢ်မံအဖီခိၣ်ဒီး, ယဆိကမိၣ်လၢ နဂ့ၢ်နကျိၤလၢ ပှၤဆိးသီ အကတီၢ်တဖၣ် အဖၢမုၢ်လီၤ.” (စံးထီၣ်ပတြၢၤ ၆၃:၆) ဒီးကွဲးစ့ၢ်ကီးဝဲလၢ– “ယစံးထီၣ်ပတြၢၤယွၤ, မ့ၢ်လၢအဝဲဒၣ်နဲၣ်လိယၤအဃိလီၤ. ဒီးလၢမုၢ်နၤန့ၣ် ယသးလၢအသ့ၣ်ညါဒၣ်တၢ် ဟ့ၣ်ပလီၢ်ယၤလီၤ.” (စံးထီၣ်ပတြၢၤ ၁၆:၇, ခ့ခါစှီၤကျိာ်) မ့ၢ်ကီလၢ စီၤဒၤဝံးအဂီၢ်ဘၣ်ဆၣ် အဝဲဆိကမိၣ်ထံ ယဟိဝၤယွၤ အတၢ်သိၣ်က့ၤသီက့ၤ ဒီးပျဲဝဲလၢ ကစၢ်ယွၤကဘှီအတၢ်ဆိကမိၣ်လီၤ. (၂ ၡမူၤအ့လး ၁၂:၁-၁၃) စီၤဒၤဝံး ပာ်လီၤန့ၢ်ပှၤ ဒိဂ့ၤတဲာ်ဘၣ် ဘၣ်ဃးဒီး တၢ်ဆီၣ်လီၤသး ဒီးတၢ်ဒိကနၣ်လီၤ. လၢတၢ်န့ၣ်အဃိ သံကွၢ်လီၤနသးလၢ– ‘ဖဲယဖးလံာ်စီဆှံအခါ မ့ၢ်ယဆိကမိၣ်ထံအီၤ ဒီးမ့ၢ်ယပျဲကစၢ်ယွၤ အတၢ်သိၣ်က့ၤသီက့ၤ ဆီတလဲယတၢ်ဆိကမိၣ် ဒီးယတၢ်တူၢ်ဘၣ်န့ၣ်ဧါ. မ့ၢ်ယဂုာ်ကျဲးစၢးအါထီၣ်ကသ့ဧါ.’—စံးထီၣ်ပတြၢၤ ၁:၂, ၃.

၁၂, ၁၃. ယဟိဝၤယွၤ ဘှီပှၤခီဖျိလၢ သးစီဆှံ ဒီးခရံာ်ဖိတၢ်အိၣ်ဖှိၣ်လၢကျဲဒ်လဲၣ်

^၁၂ သးစီဆှံဘှီဘၣ်က့ၤပှၤလၢ ကျဲအါဘိသ့ဝဲလီၤ. အဒိ, သးစီဆှံမၤစၢၤပှၤ ဒ်သိးပကကွၢ်လိ ယ့ၣ်ၡူးအတၢ်ပာ်သူၣ်ပာ်သး ဒီးပာ်ဖျါထီၣ် သးအတၤသၣ်န့ၣ်လီၤ. (ကလၤတံ ၅:၂၂, ၂၃) သးအတၤသၣ် အတၢ်အိၣ်ဖျါ တမံၤန့ၣ် မ့ၢ်ဝဲတၢ်အဲၣ်တၢ်ကွံလီၤ. ပအဲၣ်ကစၢ်ယွၤ ဒီးပအဲၣ်ဒိး ဒိကနၣ်အကလုၢ်လီၤ. ဒီးပပျဲကစၢ်ယွၤဘှီဂ့ၤထီၣ်က့ၤပှၤ ခီဖျိလၢ ပသ့ၣ်ညါလၢ အတၢ်မၤလိာ်တဖၣ်န့ၣ် အဘျုးအဖှိၣ်အိၣ်လၢပဂီၢ်လီၤ. တကးဒံးဘၣ် သးစီဆှံ ဟ့ၣ်ပှၤတၢ်ဂံၢ်တၢ်ဘါ လၢပကဟးဆှဲး တၢ်အၢတၢ်သီသ့ဝဲလီၤ. (အ့းဖ့းစူး ၂:၂) ဖဲတၢ်မၢဖိ ပီလူး အနီၢ်ဆံးအခါ ဘၣ်တၢ်လုၢ်ဘၢအီၤလၢ ပှၤယူဒၤဖိ တၢ်ဘူၣ်တၢ်ဘါခိၣ်နၢ်လၢ အိၣ်ဒီးတၢ်ပာ်ထီၣ်ထီသးတဖၣ်န့ၣ်လီၤ. ဘၣ်ဆၣ်သးစီဆှံ မၤစၢၤစီၤပီလူးလၢ ကဆီတလဲအတၢ်အိၣ်မူလီၤ. လၢခံ စီၤပီလူးကွဲးဝဲလၢ– “ယမၤတၢ်ခဲလၢာ်သ့လၢ ပှၤလၢအဒုးဆူၣ်ထီၣ်ယဂံၢ်ယဘါတဂၤအပူၤလီၤ.” (ဖံလံးပံၤ ၄:၁၃) ပဝဲစ့ၢ်ကီး ပလိၣ်ဘၣ် သးစီဆှံ ဒီးပသ့ၣ်ညါလၢ ပမ့ၢ်ဃ့ထုကဖၣ် လၢတၢ်သူၣ်ဘျၢသးဘျၢအပူၤန့ၣ် ယဟိဝၤယွၤ ကစံးဆၢပှၤလီၤ.—စံးထီၣ်ပတြၢၤ ၁၀:၁၇.

^၁၃ ယဟိဝၤယွၤ သူစ့ၢ်ကီးဝဲ တၢ်အိၣ်ဖှိၣ် ဒီးတၢ်အိၣ်ဖှိၣ်သးပှၢ်တဖၣ်လၢ ကဘှီပှၤအဂီၢ်လီၤ. အဒိ, တၢ်အိၣ်ဖှိၣ်သးပှၢ်တဖၣ် မ့ၢ်ပာ်သူၣ်ပာ်သးဝဲလၢ ပအိၣ်ဒီး တၢ်ဂံၢ်စၢ်ဘါစၢ်န့ၣ် အဝဲသ့ၣ် ဂုာ်ကျဲးစၢးမၤစၢၤပှၤလီၤ. ဘၣ်ဆၣ် အဝဲသ့ၣ် တသိၣ်က့ၤသီက့ၤပှၤ လၢအနီၢ်ကစၢ်အတၢ်ဆိကမိၣ်ဘၣ်. (ကလၤတံ ၆:၁) လၢတၢ်ဆီၣ်လီၤသးအပူၤ အဝဲသ့ၣ် ဃ့တၢ်မၤစၢၤ လၢယဟိဝၤယွၤအအိၣ် ဒ်သိးကအိၣ်ဒီး တၢ်သ့ၣ်ညါနၢ်ပၢၢ် ဒီးတၢ်ကူၣ်သ့အဂီၢ်န့ၣ်လီၤ. ဒီးအဝဲသ့ၣ် ဃုသ့ၣ်ညါတၢ်, သူဝဲလံာ်စီဆှံ ဒီးပလံာ်လဲၢ်တဖၣ် ဒ်သိးကဃုထံၣ်န့ၢ် တၢ်ဂ့ၢ်တၢ်ကျိၤတဖၣ်လၢ ကကဲတၢ်မၤစၢၤလၢပဂီၢ်န့ၣ်လီၤ. တၢ်အိၣ်ဖှိၣ်သးပှၢ်တဖၣ် မ့ၢ်ဟ့ၣ်ကူၣ်နၤ ဘၣ်ဃးဒီးနတၢ်ကူတၢ်သိးန့ၣ် သ့ၣ်နီၣ်ထီၣ်လၢ အဝဲသ့ၣ်အတၢ်ဟ့ၣ်ကူၣ်န့ၣ် ပာ်ဖျါထီၣ် ကစၢ်ယွၤ အတၢ်အဲၣ်နၤလီၤ. ဖဲနမၤထွဲ တၢ်ဟ့ၣ်ကူၣ်အခါ နကလီၤဂာ်ဒ် ကပံာ်ကပုာ်လၢ ယဟိဝၤယွၤဘှီဝဲသ့ ဒီးနကဒိးန့ၢ်ဘၣ် တၢ်ဘျုးတၢ်ဖှိၣ်လီၤ.

၁၄. ယဟိဝၤယွၤ အိၣ်ဒီးအစိအကမီၤလၢ ကဘှီပှၤသနာ်က့, အဝဲဟ့ၣ်ပှၤ တၢ်သဘျ့ဒ်လဲၣ်.

^၁၄ ပမ့ၢ်သ့ၣ်ညါလၢ ယဟိဝၤယွၤဘှီပှၤန့ၣ် တၢ်အံၤကကဲထီၣ် တၢ်မၤစၢၤဒ်သိး ပတၢ်ရ့လိာ်သးဒီး ပဒီပုၢ်ဝဲၢ်မုၣ် ဒီပုၢ်ဝဲၢ်ခွါတဖၣ်ကဂ့ၤဝဲအဂီၢ်လီၤ. တကးဒံးဘၣ် ပကအိၣ်ဒီး တၢ်ထံၣ်လၢအဂ့ၤ ဘၣ်ဃးဒီး ပှၤလၢပလီၢ်ကဝီၤပူၤ ဒီးပပှၤမၤလိ လံာ်စီဆှံဖိတဖၣ်လီၤ. လၢပျၢၤန့ၣ် တချုးလၢပှၤတ့သပၢၤတဂၤ တ့သပၢၤဒံးဘၣ်န့ၣ် အဝဲဘၣ်မၤကဆှီဝဲကပံာ် ဒီးထုးထီၣ်ကွံာ်လၢၢ် ဒီးတၢ်ကမှံၤလၢကပံာ်အပူၤလီၤ. ပှၤတ့သပၢၤလၢအဒိၣ်ကတၢၢ် လၢအမ့ၢ်ယဟိဝၤယွၤန့ၣ် အဲၣ်ဒိးမၤစၢၤ ပှၤလၢအတူၢ်လိာ် အတၢ်မၤစၢၤတဖၣ်န့ၣ်လီၤ. ကစၢ်ယွၤ တမၢန့ၢ်ဆူၣ်ပှၤဂၤလၢ ကဆီတလဲအသးဘၣ်. လၢတၢ်န့ၣ်အလီၢ် ကစၢ်ယွၤ ပာ်ဖျါထီၣ် အတၢ်သိၣ်တၢ်သီလၢ အကဆှီလီၤ. လၢခံ အဝဲသ့ၣ်ကဘၣ်ဆီတလဲ အတၢ်အိၣ်မူလၢ အနီၢ်ကစၢ်လီၤ.

၁၅, ၁၆. ပှၤမၤလိလံာ်စီဆှံဖိတဖၣ် အဲၣ်ဒိးလၢ ယဟိဝၤယွၤ ကဘှီဂ့ၤထီၣ်က့ၤအီၤန့ၣ် ပာ်ဖျါထီၣ်ဝဲဒ်လဲၣ်.

^၁၅ ပကကွၢ်သကိး ဒီပုၢ်ဝဲၢ်မုၣ် ထဲစံၢ်လၢ အိၣ်လၢကီၢ်အီစထြ့လယါတဂၤ အဂ့ၢ်လီၤ. လံာ်စီဆှံ အတၢ်သိၣ်လိတဖၣ်န့ၣ် အဝဲမၤလိဘၣ်ဝဲညီလီၤ. ဘၣ်ဆၣ် အဝဲတဒိၣ်ထီၣ်ထီထီၣ်လၢနီၢ်သး တခီဘၣ်. ဒီးတလဲၤထီၣ်စ့ၢ်ကီး တၢ်အိၣ်ဖှိၣ်ရိဖှိၣ်ဘၣ်. ဒီပုၢ်ဝဲၢ်မုၣ်လၢ အသိၣ်လိအီၤလံာ်စီဆှံတဂၤ ဃ့ဘါထုကဖၣ်တၢ်ဆူ ယဟိဝၤယွၤအအိၣ် ဒီးဆၢတဲာ်လီၤအသးလၢ ကပတုာ်ကွံာ် တၢ်မၤလိလံာ်စီဆှံဒီးအီၤလီၤ. လၢတၢ်တဆိကမိၣ်အပူၤ တၢ်ကဲထီၣ်အသးတခါလီၤ. ဖဲအဝဲသ့ၣ် မၤလိလံာ်စီဆှံအခါ ထဲစံၢ်တဲဘၣ်အီၤလၢ ဘၣ်မနုၤအဃိ အဝဲတဒိၣ်ထီၣ်ထီထီၣ် လၢနီၢ်သးအဂ့ၢ်န့ၣ်လီၤ. ထဲစံၢ်စံးဝဲလၢ အတူၢ်ဘၣ်ဝဲ လၢအပာ်မၤအသး မ့ၢ်လၢအဝဲတၤကျိၣ်တၤစ့မုာ်အဃိန့ၣ်လီၤ. ဘၣ်ဆၣ် ခဲအံၤ အဝဲပာ်လီၤအသးလၢ ကပတုာ် တၢ်တၤကျိၣ်တၤစ့န့ၣ်လီၤ.

^၁၆ တယံာ်တမီၢ် ထဲစံၢ် လဲၤထီၣ်တၢ်အိၣ်ဖှိၣ်ရိဖှိၣ် ဒီးအဝဲပာ်ဖျါထီၣ် ခရံာ်ဖိအတၢ်ဂ့ၤတၢ်ဝါတဖၣ်လီၤ. အသကိးတနီၤ တဲဆါအီၤသနာ်က့ အဝဲတပတုာ်ဝဲဘၣ်. တယံာ်ဘၣ်ဒီး ထဲစံၢ်ဒိးဘျၢထံဒီး အဝဲအိၣ်ဒီးအဖိဆံးဒၣ်လဲာ် ကဲထီၣ်ပှၤလဲၤလၢညါတဂၤလီၤ. ပထံၣ်ဘၣ်လၢ ဖဲပှၤမၤလိလံာ်စီဆှံဖိတဂၤ ဆီတလဲအသးလၢ ကမၤသးခုယဟိဝၤယွၤအသးအခါ ကစၢ်ယွၤကသုးဘူးအသးဆူ အဝဲသ့ၣ်အအိၣ်ဒီး ဘှီကဲထီၣ်အီၤလၢ ဖီကိလၢအလုၢ်ဒိၣ်ပှ့ၤဒိၣ်တဖၣ်လီၤ.

၁၇. (က) ဘၣ်ဃးဒီး ယဟိဝၤယွၤ မ့ၢ်ပှၤတ့သပၢၤန့ၣ် တၢ်မနုၤထုးန့ၢ်နသးလဲၣ်. (ခ) တၢ်မၤလိလၢခံတခါန့ၣ် ပကတဲသကိး တၢ်ဂ့ၢ်မနုၤတဖၣ်လဲၣ်.

^၁၇ မုၢ်မဆါတနံၤအံၤ ပှၤတ့သပၢၤတနီၤ ဒ်သိးအဖီကိကဖျါဃံဖျါလၤအဂီၢ် တ့ဝဲကယီကယီလီၤ. ဒ်န့ၣ်အသိး ယဟိဝၤယွၤဘှီပှၤ ခီဖျိဟ့ၣ်ကူၣ်ပှၤ လၢတၢ်သူၣ်စူၤသးစူၤအပူၤလီၤ. ဒီးမ့ၢ်ပကတူၢ်လိာ်ဧါ, တတူၢ်လိာ်ဘၣ်ဧါန့ၣ် ကစၢ်ယွၤကွၢ်ဝဲလီၤ. (ဖး စံးထီၣ်ပတြၢၤ ၃၂:၈ တက့ၢ်.) မ့ၢ်နသ့ၣ်ညါလၢ ယဟိဝၤယွၤ သူၣ်အိၣ်သးအိၣ်နၤဧါ. မ့ၢ်နသ့ၣ်ညါလီၤနသးလၢ ယဟိဝၤယွၤဘှီနၤ ကယီကယီစ့ၢ်ကီးဧါ. ယဟိဝၤယွၤမ့ၢ်ဘှီနၤန့ၣ် ဒ်သိးနကကဲကပံာ်လၢ အကပုာ်လၢ ယဟိဝၤယွၤဆဲးဘှီဝဲကသ့အဂီၢ် တၢ်ဂ့ၤတၢ်ဝါမနုၤတဖၣ် မၤစၢၤနၤသ့လဲၣ်. ဒ်သိးနကကဲထီၣ် ကပံာ်အကပုာ်လၢ ပှၤဘှီအီၤကညီအဂီၢ်န့ၣ် နကြၢးဟးဆှဲး လုၢ်လၢ်မနုၤတဖၣ်လဲၣ်. ဒ်သိးမိၢ်ပၢ်တဖၣ် ကသိၣ်လိသီလိအဖိကသ့အဂီၢ် အဝဲသ့ၣ် မၤသကိးတၢ်ဒီးယဟိဝၤယွၤ ကသ့ဒ်လဲၣ်. တၢ်မၤလိလၢခံတခါန့ၣ် ကစံးဆၢ တၢ်သံကွၢ်တဖၣ်အံၤလီၤ.