မ့ၢ်နကမၤဘၣ်လိာ်က့ၤ တၢ်သဘံၣ်သဘုၣ်ဒီး ဒုးအိၣ်ထီၣ်တၢ်ဃူတၢ်ဖိးဧါ

ယဟိဝၤယွၤ အဲၣ်ဒိးဝဲလၢ ပှၤလၢအဘူၣ်ထီၣ်ဘါထီၣ်အီၤတဖၣ် ကအိၣ်ဒီးတၢ်ဃူတၢ်ဖိးလီၤ. အဝဲအဲၣ်ဒိးစ့ၢ်ကီးဝဲလၢ အပှၤဂီၢ်မုၢ်တဖၣ် ကအိၣ်ဃူအိၣ်ဖိးလိာ်အသး တဂၤဒီးတဂၤလီၤ. အဝဲသ့ၣ်မ့ၢ်မၤဝဲ ဒ်န့ၣ်န့ၣ် တၢ်ဃူတၢ်ဖိးကအိၣ်ထီၣ်လၢ တၢ်အိၣ်ဖှိၣ်အပူၤလီၤ. ဒီးခီဖျိလၢ တၢ်ဃူတၢ်ဖိးအိၣ်ဝဲအဃိ ကထုးန့ၢ်ပှၤအါဂၤအသးလီၤ.

အဒိ, လၢကီၢ်မၤဒၤကါစကၤန့ၣ် ပှၤမၤတၢ်ဝံတၢ်နါ သရၣ်တဂၤထံၣ်ဘၣ်ဝဲလၢ ယဟိဝၤပှၤအုၣ်အသးတဖၣ် အိၣ်ဒီးတၢ်ဃူတၢ်ဖိးအဃိ ဆိကမိၣ်ထီၣ်ဝဲလၢ ‘ယမ့ၢ်ဃုထၢတၢ်ဘူၣ်တၢ်ဘါန့ၣ် ယကဃုထၢတၢ်ဘူၣ်တၢ်ဘါတခါအံၤလီၤ.’ လၢခံအဝဲတဘူၣ်ထီၣ်ဘါထီၣ် တၢ်ဝံတၢ်နါလၢၤဘၣ်. အဝဲဆီတလဲအတၢ်အိၣ်မူဒီး ဘူၣ်ထီၣ်ဘါထီၣ်က့ၤဝဲယဟိဝၤယွၤ လၢအမ့ၢ်တၢ်ဃူတၢ်ဖိး အကစၢ်န့ၣ်လီၤ.

ဒ်ပှၤတဂၤအံၤအသိး တနံၣ်ဘၣ်တနံၣ်န့ၣ် ပှၤလၢအကထိတဖၣ် ကဲထီၣ်ပှၤလၢအဘူၣ်ထီၣ်ဘါထီၣ် ယဟိဝၤယွၤဒီး ထံၣ်န့ၢ်ဝဲတၢ်ဃူတၢ်ဖိးနီၢ်နီၢ်န့ၣ်လီၤ. ဘၣ်ဆၣ် လံာ်စီဆှံပာ်ဖျါထီၣ်ဝဲလၢ– ‘တၢ်သူၣ်က့ၣ်သးကါ ဒီးတၢ်သးဆါ’ န့ၣ်မၤဟးဂီၤဒီပုၢ်ဝဲၢ်တဖၣ် အတၢ်ရ့လိာ်သး ဒီးဒုးအိၣ်ထီၣ်တၢ်သဘံၣ်သဘုၣ်လၢ တၢ်အိၣ်ဖှိၣ်ပူၤသ့ဝဲလီၤ. (ယၤကိာ် ၃:၁၄-၁၆) ဘၣ်ဆၣ် လံာ်စီဆှံန့ၣ် အိၣ်ဒီးတၢ်ဟ့ၣ်ကူၣ်တဖၣ် လၢကမၤစၢၤပှၤ ဒ်သိးပကဟးဆှဲး တၢ်လၢအဒုးအိၣ်ထီၣ် တၢ်သဘံၣ်သဘုၣ် တဖၣ်န့ၣ်လီၤ. တကးဒံးဘၣ် လံာ်စီဆှံပာ်ဖျါထီၣ်ဝဲလၢ ပကဘှီဘၣ်က့ၤတၢ်ဂ့ၢ်ကီတဖၣ်ဒီး ပဒီပုၢ်ဝဲၢ်မုၣ်ဒီပုၢ်ဝဲၢ်ခွါတဖၣ် ဒ်လဲၣ်န့ၣ်လီၤ. ခဲအံၤပကတဲသကိး ဘၣ်ဃးဒီးလံာ်စီဆှံ အတၢ်ဟ့ၣ်ကူၣ်တဖၣ်အံၤ ကဲဘျုးလၢပှၤဂၤအဂီၢ်ဒ်လဲၣ်အဂ့ၢ်န့ၣ်လီၤ.

တၢ်သဘံၣ်သဘုၣ်ဒီး တၢ်မၤဃူမၤဖိး

ခရံာ်(စ်) တဲဝဲလၢ “ယၤဒီးဒီပုၢ်ဝဲၢ်လၢ အမၤသကိးတၢ်ဒီးယၤတဂၤ ပတတဲးလိာ်သးအါအါဘၣ်. ဘၣ်တဘျီ ဖဲပကိးဃါလိာ်သးအခါ ပှၤခံဂၤဟဲထံၣ်ချုးပှၤလီၤ.”

ကၠဲနဲး တဲဝဲလၢ “ဒီပုၢ်ဝဲၢ်မုၣ်လၢ ညီနုၢ်ယဟးစံၣ်တဲၤတဲလီၤတၢ်ဒီးအီၤတဂၤန့ၣ် လၢခံအဝဲ တအဲၣ်ဒိးဟးစံၣ်တဲၤတဲလီၤတၢ်ဒီးယၤလၢၤဘၣ်. တကးဒံးဘၣ် အဝဲတကတိၤတၢ်ဒီးယၤ စ့ၢ်ကီးလၢၤဘၣ်. ဘၣ်မနုၤအဃိ အဝဲမၤဝဲဒ်အံၤလဲၣ်န့ၣ် ယတသ့ၣ်ညါဘၣ်.”

မၢၣ်ခဲၣ် တဲဝဲလၢ “ပတဲသကိးတၢ်လၢ လီတဲစိအပူၤ သၢဂၤလီၤ. လၢပကျါတဂၤန့ၣ် ပဆိကမိၣ်လၢ အတဲတၢ်ဝံၤဒီးပံးအလီတဲစိလံအဃိ ပအိၣ်တ့ၢ်ခံဂၤန့ၣ် ပတဲအီၣ်ဘၣ်အဂ့ၢ်လီၤ. ဘၣ်ဆၣ် ဖဲန့ၣ်အခါ အဝဲတပံးအလီတဲစိဒံးဘၣ်.”

ကဲရံး တဲဝဲလၢ “လၢပတၢ်အိၣ်ဖှိၣ်ပူၤန့ၣ် တၢ်သဘံၣ်သဘုၣ်အိၣ်ထီၣ်လၢ ပှၤလဲၤလၢညါခံဂၤ အဘၢၣ်စၢၤလီၤ. လၢတၢ်န့ၣ်အဃိ အဝဲသ့ၣ်တဲအါလိာ်အသး ဒီးကဲထီၣ်တၢ်သးတံာ်တာ်လၢ ပှၤဂၤအဂီၢ်လီၤ.”

တၢ်ကဲထီၣ်အသးဒ်အံၤန့ၣ် တဖျါလၢအမ့ၢ် တၢ်ကီတၢ်ခဲဒိၣ်ဒိၣ်မုၢ်မုၢ်ဘၣ်. ဘၣ်ဆၣ်တၢ်အိၣ်သးအံၤန့ၣ် ဒုးအိၣ်ထီၣ်တၢ်သူၣ်တမုာ်သးတမုာ် ဒီးမၤဟးဂီၤတၢ်အိၣ်ဖှိၣ် အတၢ်ဃူတၢ်ဖိးသ့ဝဲလီၤ. လီၤသးခုဒိၣ်မးလၢ ဒီပုၢ်ဝဲၢ်လၢဘၣ်တၢ်ပာ်ဖျါထီၣ် အဂ့ၢ်တဖၣ်အံၤ လူၤပိာ်ထွဲဝဲလံာ်စီဆှံ အတၢ်ဟံးစုနဲၣ်ကျဲအဃိ အဝဲသ့ၣ်က့ၤအိၣ်ဃူအိၣ်ဖိး လိာ်က့ၤအသးလီၤ. နဆိကမိၣ်လၢ လံာ်စီဆှံအတၢ်ဟံးစုနဲၣ်ကျဲ မနုၤတဖၣ် ကမၤစၢၤအဝဲသ့ၣ်လဲၣ်.

“အ့ၣ်လိာ်သုသးလၢ ကျဲတဂ့ၤ” (၁ မိၤၡ့ ၄၅:၂၄, ခ့ခါစှီၤကျိာ်) ဖဲစီၤယိၤသးအဒီပုၢ်ဝဲၢ်တဖၣ် က့ၤဆူအပၢ်အအိၣ်အခါ စီၤယိၤသးဟ့ၣ်ကူၣ်အဝဲသ့ၣ်ဒ်အံၤလီၤ. ပှၤတဂၤမ့ၢ်တပၢၤဃာ် အတၢ်တူၢ်ဘၣ် ဒီးအသးထီၣ်တၢ်မ့ၢ်ချ့န့ၣ် မၤဘၣ်ဒိပှၤဂၤသ့ညီမးလီၤ. ဒီးပှၤအဂၤစ့ၢ်ကီး ကသးဒိၣ်ထီၣ်တၢ်လီၤ. ခရံာ်(စ်) သ့ၣ်ညါလီၤအသးလၢ တဘျီတခီၣ် ကဒိကနၣ်တၢ်ဟံးစုနဲၣ်ကျဲလၢ တၢ်ဆီၣ်လီၤသးအပူၤန့ၣ် တညီလၢအဂီၢ်ဘၣ်. အဝဲအဲၣ်ဒိးဆီတလဲအသးအဃိ လဲၤဃ့ကညးဝဲ ဒီပုၢ်ဝဲၢ်လၢအတဲအါလိာ်အသး ဒီးအီၤတဂၤန့ၣ်လီၤ. ဖဲဒီပုၢ်ဝဲၢ်တဂၤအံၤ ထံၣ်ဘၣ်ဝဲလၢ ခရံာ်(စ်) ဂုာ်ကျဲးစၢးပၢၤအသးအဃိ အဝဲစ့ၢ်ကီးဂုာ်ကျဲးစၢး ဆီတလဲအသးလီၤ. ခဲအံၤအဝဲသ့ၣ်မၤသကိး ယဟိဝၤယွၤအတၢ်မၤလၢ တၢ်ဃူတၢ်ဖိးလီၤ.

“တၢ်ကူၣ်လိာ်အသးတအိၣ်ဘၣ်ဒီး, တၢ်ကူၣ်ထီၣ်ဖးလီၤန့ၣ် တကဲထီၣ်ဘၣ်.” (ကတိၤဒိ ၁၅:၂၂) ဖဲကၠဲနဲး အသကိးတတဲတၢ်ဒီးအီၤလၢၤဘၣ်အခါ အဝဲဂုာ်ကျဲးစၢးမၤဝဲဒ် လံာ်စီဆှံတဆၢအံၤ အတၢ်ဟ့ၣ်ကူၣ်အသိးလီၤ. အဝဲလဲၤတဲသကိးတၢ်ဒီး ဒီပုၢ်ဝဲၢ်မုၣ်အံၤ ဒီးသံကွၢ်အီၤလၢ မ့ၢ်အမၤသးထီၣ်ဘၣ်အီၤတမံၤမံၤဧါ. ဖဲအဝဲသ့ၣ်တဲသကိးတၢ်သီသီအခါ ကီဝဲလၢအဝဲသ့ၣ်အဂီၢ်လီၤ. ဘၣ်ဆၣ်အဝဲသ့ၣ် ဆဲးတဲသကိးတၢ်မုာ်မုာ်အဃိ တၢ်ခဲလၢာ်လဲၤအသးဂ့ၤဂ့ၤဘၣ်ဘၣ်လီၤ. လၢတၢ်န့ၣ်အဃိ ဒီပုၢ်ဝဲၢ်မုၣ်တဂၤအံၤ သ့ၣ်ညါထီၣ်ဝဲလၢ ကၠဲနဲးန့ၣ် တမၤကမၣ်ဘၣ်အီၤနီတမံၤဘၣ်. မ့ၢ်ဒၣ်အဝဲနၢ်ပၢၢ်ကမၣ် ကၠဲနဲးန့ၣ်လီၤ. လၢခံအဝဲဃ့ကညးက့ၤဝဲ ကၠဲနဲးဒီး အဝဲသ့ၣ်မၤသကိး ယဟိဝၤယွၤအတၢ်မၤလၢ တၢ်ဃူတၢ်ဖိးလီၤ.

“နမ့ၢ်လဲၤစိာ်နတၢ်မၤဘူၣ်ဆူတၢ်လုၢ်လီၢ်, ဒီးဖဲန့ၣ်နမ့ၢ်သ့ၣ်နီၣ်ထီၣ်က့ၤလၢ နဒီပုၢ်ဝဲၢ်ပာ်တၢ်ကမၣ်လၢ နလိၤတမံၤမံၤဒီး, ပာ်တ့ၢ်နတၢ်မၤဘူၣ်ဖဲန့ၣ် လၢတၢ်လုၢ်လီၢ်အမဲာ်ညါ, ဒီးက့ၤက့ၤတက့ၢ်. အိၣ်ဃူလိာ်ဒီးနဒီပုၢ်ဝဲၢ်တက့ၢ်.” (မးသဲ ၅:၂၃, ၂၄) တၢ်ဟ့ၣ်ကူၣ်အံၤ ယ့ၣ်ၡူးဟ့ၣ်ဝဲဖဲ အစံၣ်တဲၤတဲလီၤတၢ်လၢ တၢ်လူၢ်ခိၣ်အခါန့ၣ်လီၤ. မၢၣ်ခဲၣ် တဲဆါဘၣ်ဝဲ ဒီပုၢ်ဝဲၢ်တဂၤအံၤအဃိ အသးတမုာ်ဘၣ်. အဝဲပာ်လီၤအသးလၢ ကမၤဘၣ်လိာ်က့ၤ တၢ်သဘံၣ်သဘုၣ်န့ၣ်လီၤ. လၢတၢ်န့ၣ်အဃိ အဝဲလဲၤဃ့ကညးဝဲဒီပုၢ်ဝဲၢ်တဂၤအံၤလီၤ. ဒီးလၢခံတၢ်ကဲထီၣ်အသးဒ်လဲၣ်. မၢၣ်ခဲၣ် တဲဝဲလၢ “ယဒီပုၢ်ဝဲၢ်ပျၢ်ယတၢ်ကမၣ် နီၢ်နီၢ်လီၤ.” ခဲအံၤအဝဲသ့ၣ် ကဲဒံးတံၤသကိးလီၤ.

“ဝံသးစူၤလိာ်သုသး, ဒီးပှၤအတၢ်ကမၣ်မ့ၢ်အိၣ်ဒီး, ပျၢ်လိာ်သုသးတက့ၢ်.” (ကလီးစဲ ၃:၁၂-၁၄) ပှၤလဲၤလၢညါခံဂၤ လၢအတဲအါလိာ်အသးန့ၣ် မ့ၢ်နသ့ၣ်နီၣ်ထီၣ်ဒံးဧါ. တၢ်အိၣ်ဖှိၣ်သးပှၢ်လၢအိၣ်ဒီး တၢ်အဲၣ်တၢ်ကွံတဂၤ မၤစၢၤအဝဲသ့ၣ် ဒ်သိးကသ့ၣ်ညါဝဲလၢ အဝဲသ့ၣ်အတၢ်ဂ့ၢ်သဘံၣ်သဘုၣ်န့ၣ် ကဲထီၣ်တၢ်သးတံာ်တာ်လၢ ပှၤဂၤအဂီၢ်လီၤ. ဒီးတၢ်အိၣ်ဖှိၣ်သးပှၢ်အံၤ ဒုးသ့ၣ်နီၣ်ထီၣ်အဝဲသ့ၣ်လၢ ကဝံသးစူၤလိာ်အသး ဒီးမၤစၢၤတၢ်အိၣ်ဖှိၣ် ဒ်သိးကအိၣ်ဒီးတၢ်ဃူတၢ်ဖိးအဂီၢ်လီၤ. အဝဲသ့ၣ်တူၢ်လိာ်ဝဲ တၢ်ဟ့ၣ်ကူၣ်အံၤအဃိ ဆဲးစံၣ်တဲၤတဲလီၤ ဘီမုၢ်တၢ်သးခုကစီၣ်လၢ တၢ်ဃူတၢ်ဖိးလီၤ.

တၢ်ဟ့ၣ်ကူၣ်လၢ ကလီးစဲ ၃:၁၂-၁၄ အပူၤစ့ၢ်ကီး ကမၤစၢၤပှၤဒ်သိး ပကအိၣ်ဒီးတၢ်ဆီၣ်လီၤသး ဒီးပျၢ်ပှၤဂၤအတၢ်ကမၣ် ဖဲပှၤမၤဘၣ်ဒိပှၤအခါန့ၣ်လီၤ. ဘၣ်ဆၣ် ပမ့ၢ်ဂုာ်ကျဲးစၢးထဲလဲၣ်သနာ်က့ ပပျၢ်အတၢ်ကမၣ် မ့ၢ်တန့ၢ်ဘၣ်န့ၣ် ပကဘၣ်မၤဒ်လဲၣ်. လံာ်စီဆှံအတၢ်ဟ့ၣ်ကူၣ်လၢ မးသဲ ၁၈:၁၅ အံၤကမၤစၢၤပှၤလီၤ. ဖဲလံာ်စီဆှံတဆၢအံၤအပူၤ ယ့ၣ်ၡူးအဲၣ်ဒိးစံးဝဲ ဘၣ်ဃးဒီးတၢ်ကမၣ် ဒိၣ်ဒိၣ်မုၢ်မုၢ်သနာ်က့ ကမၤစၢၤစ့ၢ်ကီးပှၤ ဖဲတၢ်သဘံၣ်သဘုၣ်အိၣ်ထီၣ်လၢ ပှၤဒီးပဒီပုၢ်ဝဲၢ်တဖၣ် အဘၢၣ်စၢၤအခါန့ၣ်လီၤ. ပမ့ၢ်လဲၤတဲသကိးတၢ်ဒီးအီၤလၢ တၢ်အဲၣ်တၢ်ကွံ ဒီးတၢ်ဆီၣ်လီၤသးအပူၤန့ၣ် ပမၤဘၣ်လိာ်က့ၤ တၢ်သဘံၣ်သဘုၣ်တဖၣ်ကသ့ဝဲလီၤ.

လၢလံာ်စီဆှံအပူၤန့ၣ် တၢ်ဟ့ၣ်ကူၣ်အိၣ်ဝဲအါမးလီၤ. အါတက့ၢ်တၢ်ဟ့ၣ်ကူၣ်တဖၣ်န့ၣ် ဒိးသန့ၤထီၣ်အသးလၢ “သးအတၤသၣ်” လၢအမ့ၢ် “တၢ်အဲၣ်တၢ်ကွံ, တၢ်သူၣ်ခုသးခု, တၢ်ဃူတၢ်ဖိး, တၢ်ဝံသးစူၤ, တၢ်သူၣ်စူၤသးစူၤ, တၢ်မၤဂ့ၤတၢ်, တၢ်စူၢ်တၢ်နာ်, တၢ်ဆီၣ်လီၤပသး, တၢ်ကီၤသူၣ်ကီၤသး” လၢအဟဲကဲထီၣ်အသးလၢ ယွၤအသးစီဆှံအဃိန့ၣ်လီၤ. (ကလၤတံ ၅:၂၂, ၂၃) ဆိကမိၣ်ကွၢ်ဒ်အံၤတက့ၢ်. ဒ်သိးစဲးတဖျၢၣ်ကမၤတၢ် ဘျ့ဘျ့ဆှီဆှီအဂီၢ် လိၣ်ဘၣ်ဝဲသိလီၤ. ဒ်န့ၣ်အသိး ပတၢ်ရ့လိာ်သးဒီး ပဒီပုၢ်ဝဲၢ်တဖၣ်ကဂ့ၤအဂီၢ် ပကဘၣ်ပာ်ဖျါထီၣ် တၢ်ဂ့ၤတၢ်ဝါလၢ အဟဲလၢယဟိဝၤယွၤ အအိၣ်တဖၣ်န့ၣ်လီၤ.

ဒီပုၢ်ဝဲၢ်တဖၣ် အတၢ်ဂ့ၤတၢ်ဝါအိၣ်ဝဲ အကလုာ်ကလုာ်အဃိ မၤဃံမၤလၤဝဲ တၢ်အိၣ်ဖှိၣ်

ပဝဲတဂၤစုာ်စုာ်ပတၢ်ပာ်သူၣ်ပာ်သး တဒ်သိးလိာ်အသးဘၣ်. တကးဒံးဘၣ် ပတၢ်ဂ့ၤတၢ်ဝါ, ပတၢ်ထံၣ် ဒီးပပာ်ဖျါထီၣ် ပသးအတၢ်တူၢ်ဘၣ်စ့ၢ်ကီး တဒ်သိးလိာ်အသးဘၣ်. ပတၢ်ပာ်သူၣ်ပာ်သး မ့ၢ်တဒ်သိးလိာ်အသးသနာ်က့ ပရ့လိာ်ပသးမုာ်ဒိၣ်မး. ဘၣ်ဆၣ်ခီဖျိလၢ ပအိၣ်ဒီးတၢ်ဂ့ၤတၢ်ဝါ တဂၤတမံၤတဂၤတမၠိအဃိ တၢ်နၢ်ပၢၢ်ကမၣ် ဒီးတၢ်သဘံၣ်သဘုၣ် အိၣ်ထီၣ်ဝဲသ့စ့ၢ်ကီးလီၤ. အဒိ, တၢ်အိၣ်ဖှိၣ်သးပှၢ်တဂၤတဲဝဲလၢ “ပှၤလၢအမဲာ်ဆှးသ့တဂၤ ကအိၣ်ဒီးပှၤလၢအတဲတၢ်အါဒီး အကလုၢ်ဒိၣ်ဒိၣ်တဂၤန့ၣ် တညီလၢအဂီၢ်ဘၣ်. တၢ်လီၤဆီလိာ်အသးဒ်အံၤန့ၣ် ပကထံၣ်အီၤလၢ အမ့ၢ်တၢ်လၢအရ့တဒိၣ်ဘၣ်လီၤ. ဘၣ်ဆၣ် ကဲထီၣ်တၢ်သဘံၣ်သဘုၣ်ဖးဒိၣ်သ့ဝဲလီၤ.” နဆိကမိၣ် ပှၤလၢအိၣ်ဒီး တၢ်ဂ့ၤတၢ်ဝါလီၤဆီလိာ်အသးတဖၣ် အိၣ်ဃူဃူဖိးဖိးကသ့ဧါ. ခဲအံၤပကကွၢ်သကိး တၢ်မၢဖိခံဂၤအဒိအတဲာ်လီၤ. ဖဲပဆိကမိၣ်ထီၣ် စီၤပ့းတရူးအဂ့ၢ်အခါ ပကထံၣ်တမှံအီၤလၢ အမ့ၢ်ပှၤလၢအထးခိၣ်ချ့တဂၤလီၤ. မ့မ့ၢ်စီၤယိၤဟၣ်န့ၣ် ပကထံၣ်တမှံအီၤဒ်အမ့ၢ် ပှၤလၢအအိၣ်ဒီးတၢ်အဲၣ်တၢ်ကွံတဂၤ ဒီးတချုးလၢအတဲတၢ် မ့တမ့ၢ် မၤတၢ်တမံၤမံၤဒံးဘၣ်န့ၣ် ဆိကမိၣ်ထံတၢ်လီၤ. စီၤပ့းတရူးဒီး စီၤယိၤဟၣ်န့ၣ် အတၢ်ပာ်သူၣ်ပာ်သးလီၤဆီလိာ်အသး ဘၣ်ဆၣ် မၤသကိးယဟိဝၤယွၤအတၢ်မၤ ဃူဃူဖိးဖိးလီၤ. (မၤတၢ် ၈:၁၄; ကလၤတံ ၂:၉) မုၢ်မဆါတနံၤအံၤစ့ၢ်ကီး ခရံာ်ဖိတဖၣ်အတၢ်ပာ်သူၣ်ပာ်သး လီၤဆီလိာ်အသးသနာ်က့ မၤသကိးကစၢ်ယွၤအတၢ်မၤ ဃူဃူဖိးဖိးလီၤ.

လၢတၢ်အိၣ်ဖှိၣ်အပူၤ ပှၤတဂၤဂၤမ့ၢ်မၤသးထီၣ်ဘၣ်နၤ ခီဖျိလၢ အတၢ်ကတိၤ မ့တမ့ၢ် အတၢ်ဖံးတၢ်မၤန့ၣ် နကမၤဒ်လဲၣ်. နကဘၣ်သ့ၣ်နီၣ်ထီၣ်လၢ ဒ်ယ့ၣ်ၡူးသံလၢ နဂီၢ်အသိး ယ့ၣ်ၡူးသံလၢ နဒီပုၢ်ဝဲၢ်တဂၤအံၤ အဂီၢ်စ့ၢ်ကီးအဃိ နကဘၣ်အဲၣ်နဒီပုၢ်ဝဲၢ်လီၤ. (ယိၤဟၣ် ၁၃:၃၄, ၃၅; ရိမ့ၤ ၅:၆-၈) လၢတၢ်န့ၣ်အဃိ ပမ့ၢ်တရ့ဒီးအီၤလၢၤဘၣ် မ့တမ့ၢ် ပမ့ၢ်ဟးဆှဲးအီၤန့ၣ် တမ့ၢ်တၢ်လၢအကြၢးဝဲဘၣ်. ပကြၢးသံကွၢ်လီၤပသးလၢ ‘တၢ်လၢပဒီပုၢ်ဝဲၢ်တဂၤဂၤ မၤဝဲန့ၣ်ထီဒါလိာ်အသးဒီး ယဟိဝၤယွၤအတၢ်သိၣ်တၢ်သီဧါ. မ့ၢ်အဝဲအဲၣ်ဒိးမၤဘၣ်ဒိယၤဧါ. မ့တမ့ၢ် ပတၢ်ပာ်သူၣ်ပာ်သးလီၤဆီလိာ်သးအဃိဧါ. တၢ်ဂ့ၤတၢ်ဝါလၢ အအိၣ်ဒီးအီၤတနီၤန့ၣ် မ့ၢ်ယအဲၣ်ဒိး ကွၢ်လိမၤဒိးအီၤဧါ.’

အဒိ, နမ့မ့ၢ်ပှၤလၢအတဲတၢ်တမုာ်အါအါဘၣ်တဂၤန့ၣ် နလဲၤစံၣ်တဲၤတဲလီၤတၢ်ဒီးပှၤလၢ အတဲတၢ်အါအါတဂၤသ့ဝဲလီၤ. ဘၣ်သ့ၣ်သ့ၣ် နမၤလိန့ၢ်တၢ်လၢအဝဲအအိၣ် ကသ့လီၤ. အဝဲမ့မ့ၢ် ပှၤလၢအဟ့ၣ်တၢ်ညီ ဒီးနမ့မ့ၢ် ပှၤလၢအပံဒံန့ၣ် ပာ်သူၣ်ပာ်သး တၢ်သူၣ်ဖှံသးညီလၢ အဟဲခီဖျိ တၢ်ဟ့ၣ်မၤစၢၤ ပှၤသူၣ်က့သးပှၢ်, ပှၤဆူးပှၤဆါ မ့တမ့ၢ် ပှၤလၢအလိၣ်ဘၣ် တၢ်မၤစၢၤတဖၣ်အဃိန့ၣ်တက့ၢ်. ဒ်သိးနကမ့ၢ်ပှၤလၢ အဟ့ၣ်တၢ်ညီအဂီၢ် နမၤလိအါထီၣ်တၢ်လၢ အဝဲအအိၣ်ကသ့ဧါ. တၢ်လၢအရ့ဒိၣ်ကတၢၢ်န့ၣ် ပမ့ၢ်သးစၢၢ်ဆၢ အဝဲအတၢ်ဂ့ၤတၢ်ဝါတဖၣ်န့ၣ် ပတၢ်ပာ်သူၣ်ပာ်သး မ့ၢ်တလီၤဂာ်လိာ်အသးသနာ်က့ ပမၤတၢ်ဃူဃူဖိးဖိးကန့ၢ်ဝဲလီၤ. အဝဲမ့ၢ်တကဲထီၣ် ပတံၤသကိးလၢ အဂ့ၤကတၢၢ်တဂၤသနာ်က့ ပတၢ်ရ့လိာ်သးတဂၤဒီးတဂၤ ကဂ့ၤထီၣ်ဝဲလီၤ. ပမ့ၢ်မၤဒ်အံၤန့ၣ် ပကအိၣ်ဒီးတၢ်ဃူတၢ်ဖိးလၢ တၢ်အိၣ်ဖှိၣ်အပူၤလီၤ.

လၢတၢ်မၢဖိအစိၤန့ၣ် ဒီပုၢ်ဝဲၢ်မုၣ်အိၣ်ဝဲခံဂၤ အမံၤမ့ၢ် နီၢ်အူၤအိဒံၤဒီးနီၢ်စူၣ်တူဃ့ၤလီၤ. အဝဲသ့ၣ်အတၢ်ပာ်သူၣ်ပာ်သး တလီၤဂာ်လိာ်အသးဘၣ်. လၢတၢ်န့ၣ်အဃိ စီၤပီလူး ဟ့ၣ်ဂံၢ်ဟ့ၣ်ဘါအဝဲသ့ၣ်ဒ်သိး ‘ကအိၣ်ဒီးသးတဖျၢၣ်ဃီလၢ ကစၢ်အပူၤ’ အဂီၢ်လီၤ. (ဖံလံးပံၤ ၄:၂) လၢတၢ်န့ၣ်အဃိ ပဝဲသ့ၣ်တဖၣ်စ့ၢ်ကီး ပအဲၣ်ဒိးဘူၣ်ထီၣ်ဘါထီၣ် ယဟိဝၤယွၤ တပူၤဃီဒီးပဒီပုၢ်ဝဲၢ်တဖၣ် ဒီးဒုးအိၣ်ထီၣ် တၢ်ဃူတၢ်ဖိးလၢ တၢ်အိၣ်ဖှိၣ်အပူၤလီၤ.

တဘၣ်ပျဲ တၢ်သးတလီၤပလိာ် မၤဟးဂီၤတၢ်ဃူတၢ်ဖိးတဂ့ၤ

ပသးမ့ၢ်တမုာ်လၢ ပဒီပုၢ်ဝဲၢ်တဂၤဂၤအဃိန့ၣ် ဘၣ်မနုၤအဃိ ပကဘၣ်မၤလီၤမၢ်ကွံာ်အီၤလၢ အဆိအချ့လဲၣ်. တၢ်သးတမုာ်န့ၣ် လီၤဂာ်ဒ်တၢ်ဆှုၣ်တၢ်မဲလၢ အမဲထီၣ်လၢ ဖီကရၢလၢအဃံအလၤအပူၤန့ၣ်လီၤ. ပမ့ၢ်တကျီကွံာ်တၢ်ဆှုၣ်တၢ်မဲတဖၣ်အံၤ တဘျီဃီဘၣ်န့ၣ် လၢခံကခဲဘၢကွံာ် ဖီလၢအဃံအလၤတဖၣ်လီၤ. ဒ်န့ၣ်အသိး ပမ့ၢ်တမၤလီၤမၢ်ကွံာ် ပတၢ်တူၢ်ဘၣ်လၢ အတဂ့ၤတဖၣ်အံၤတဘျီဃီဘၣ်န့ၣ် အဝဲကဒိၣ်ထီၣ်ဝဲဒီး မၤဘၣ်ဒိတၢ်အိၣ်ဖှိၣ် အတၢ်ဃူတၢ်ဖိးသ့ဝဲလီၤ. ပမ့ၢ်အဲၣ်ယဟိဝၤယွၤ ဒီးပဒီပုၢ်ဝဲၢ်တဖၣ်န့ၣ် ပကပၢၤဃာ်တၢ်ဃူတၢ်ဖိးလၢ တၢ်အိၣ်ဖှိၣ်အပူၤလီၤ.

ပမ့ၢ်ဂုာ်ကျဲးစၢး မၤဃူမၤဖိးတၢ်ဒီးပှၤဂၤန့ၣ် ကကဲဘျုးကဲဖှိၣ်ဝဲလီၤ. ဒီပုၢ်ဝဲၢ်မုၣ်တဂၤ တဲဝဲအတၢ်လဲၤခီဖျိဒ်အံၤလီၤ. အဝဲတဲဝဲလၢ “ဒီပုၢ်ဝဲၢ်မုၣ်တဂၤ ပာ်ယၤဒ်ပှၤဖိသၣ်အသိးလီၤ. အဝဲမၤဒ်အံၤန့ၣ် ဘၣ်ယၤတမုာ်နီတစဲးဘၣ်. ယံာ်ထီၣ်ဒီး ယသးအ့န့ထီၣ်အီၤအဃိ ယက့ၤတဲဆါဘၣ်က့ၤအီၤလီၤ. ယဆိကမိၣ် ‘အဝဲမ့ၢ်တပာ်ကဲယၤဘၣ်န့ၣ် ယၤစ့ၢ်ကီးတလိၣ်ယပာ်ကဲအီၤဘၣ်.’”

ဒီပုၢ်ဝဲၢ်မုၣ်အံၤ ဆိကမိၣ်ထံက့ၤဝဲ တၢ်လၢအဝဲတဲဝဲတဖၣ်လီၤ. အဝဲတဲဝဲလၢ “ယထံၣ်လီၤက့ၤ ယတၢ်ဂံၢ်စၢ်ဘါစၢ်အဃိ ယသးအုးဒိၣ်မးလီၤ. ယသ့ၣ်ညါလီၤယသးလၢ ယကဘၣ်ဆီတလဲ ယတၢ်ပာ်သူၣ်ပာ်သးလီၤ. လၢတၢ်န့ၣ်အဃိ ယဃ့ထုကဖၣ်လၢ ယဟိဝၤယွၤအအိၣ်ဝံၤဒီး ယလဲၤဟ့ၣ်ဒီပုၢ်ဝဲၢ်မုၣ်အံၤ တၢ်ဟ့ၣ်ဆံးဆံးဖိတခါ ဒီးယကွဲး ဃ့ဝံသးစူၤအီၤလီၤ. ပဖိးဟုလိာ်ပသး ဒီးအၢၣ်လီၤလိာ်ပသးလၢ ပကသးပ့ၤနီၣ်ကွံာ် တၢ်လၢအပူၤကွံာ်တဖၣ်လီၤ. ခဲအံၤလၢအဝဲ ဒီးယၤအဘၢၣ်စၢၤ တၢ်ကီတၢ်ခဲတအိၣ်နီတမံၤလၢၤဘၣ်.”

ပှၤကိးဂၤဒဲးလိၣ်ဘၣ် တၢ်ဃူတၢ်ဖိးလီၤ. ဘၣ်ဆၣ် ပှၤတနီၤနီၤန့ၣ် ခီဖျိအိၣ်ဒီး တၢ်သူၣ်က့ၣ်သးကါ ဒီးတၢ်ပာ်ထီၣ်ထီအသးအဃိ ကအိၣ်ဃူအိၣ်ဖိးဒီးပှၤဂၤအဂီၢ် တညီဘၣ်. မုၢ်မဆါတနံၤအံၤ ပှၤအိၣ်ဒီးတၢ်ပာ်သူၣ်ပာ်သး ဒ်အံၤအိၣ်ဝဲအါမးလီၤ. မ့မ့ၢ်ယဟိဝၤယွၤန့ၣ် ဆၢမုၢ်လၢ်ဝဲလၢ အခ့အပှၤသ့ၣ်တဖၣ် ကလီၤဆီဒီး ပှၤလၢတၢ်ချၢတဖၣ်လီၤ. လၢတၢ်န့ၣ်အဃိ ယဟိဝၤပှၤအုၣ်အသးတဖၣ် ကြၢးအိၣ်ဒီး တၢ်မုာ်တၢ်ခုၣ် ဒီးတၢ်ဃူတၢ်ဖိးလီၤ. ယဟိဝၤယွၤ မၢစီၤပီလူးကွဲးန့ၢ် ခရံာ်ဖိတဖၣ်လၢ– “သုကလဲၤဒ်အကြၢးဒီးတၢ်ကိးလၢ တၢ်ကိးက့ၤသုအသိးလီၤ.” တကးဒံးဘၣ် စီၤပီလူး ဟ့ၣ်သဆၣ်ထီၣ်အဝဲသ့ၣ်ဒ်အံၤလီၤ. အိၣ်ဒီး “တၢ်ဆီၣ်လီၤသုသး, ဒီးသူၣ်စူၤသးစူၤ, အိၣ်ဒီးတၢ်ဝံသးစူၤဃဲးဃဲး, ဒီးကီၤသုသးသကိးသကိးလၢ တၢ်အဲၣ်တၢ်ကွံအပူၤသတးဒီး, ဂုာ်ဟံးဃာ်သုသးတဖျၢၣ်ဃီလၢ တၢ်ဃူတၢ်ဖိးအတၢ်စၢဃာ်အပူၤတက့ၢ်.” (အ့းဖ့းစူး ၄:၁-၃) “တၢ်ဃူတၢ်ဖိး” မ့ၢ်တၢ်လုၢ်ဒိၣ်ပှ့ၤဒိၣ်လၢ ယဟိဝၤယွၤ အပှၤဂီၢ်မုၢ်တဖၣ်အဂီၢ်လီၤ. မ်ပဝဲတဂၤစုာ်စုာ် ပကမၤအါထီၣ် တၢ်ဃူတၢ်ဖိးဒီး မၤဘၣ်လိာ်က့ၤ တၢ်ဂ့ၢ်ကီတဖၣ်န့ၣ်တက့ၢ်.