မၤတၢ်တီတီလိၤလိၤ လၢတၢ်ခဲလၢာ်အပူၤ

ပှၤကိးဂၤဒဲးန့ၣ် လီကီအသကိး လၢအမၤတၢ်တီတီလိၤလိၤ. ဒီးယဟိဝၤယွၤစ့ၢ်ကီး မုၢ်လၢ်ဝဲလၢ အသကိးတဖၣ် ကမၤတၢ်တီတီလိၤလိၤ. ဘၣ်ဆၣ် ပှၤလၢအမၤတၢ် တတီတလိၤဘၣ်န့ၣ် အိၣ်ဝဲအါဂၤအဃိ ပကမၤတၢ် တီတီလိၤလိၤအဂီၢ် တညီဝဲထီဘိဘၣ်. သနာ်က့ ပမ့ၢ်မၤတၢ် တီတီလိၤလိၤ လၢတၢ်ခဲလၢာ်အပူၤန့ၣ် ကကဲဘျုးဒ်လဲၣ်.

၁. ဘၣ်မနုၤအဃိ အရ့ဒိၣ်လၢ ပကဘၣ် မၤတၢ်တီတီလိၤလိၤလဲၣ်.

ပမ့ၢ်မၤတၢ် တီတီလိၤလိၤန့ၣ် ပပာ်ဖျါထီၣ်န့ၢ် ယဟိဝၤယွၤလၢ ပအဲၣ်အီၤ ဒီးပာ်ကဲအီၤ. ဆိကမိၣ်ကွၢ်မီၤ, တၢ်ကိးမံၤဒဲးလၢ ပဆိကမိၣ်ထီၣ် ဒီးပမၤအီၤန့ၣ် ယဟိဝၤယွၤသ့ၣ်ညါဝဲ. (ဧ့ၤဘြံၤ ၄:၁၃) ဒီးပမ့ၢ်ပာ်လီၤပသးလၢ ပကမၤတၢ် တီတီလိၤလိၤန့ၣ် ကစၢ်ယွၤထံၣ်ဝဲ ဒီးအကသးခု. တကးဒံးဘၣ် လံာ်စီဆှံတဲဝဲလၢ “ယဟိဝၤယွၤ သးဘၣ်အၢ ပှၤလၢအလံၣ်အီၣ်လီအီၣ်တၢ်တဖၣ် ဘၣ်ဆၣ် ပှၤလၢအသူၣ်ဘျၢသးဘျၢန့ၣ် ကစၢ်ယွၤ ရ့ဒီးအီၤဘူးဘူးလီၤ.”​—ကတိၤဒိ ၃:၃၂.

၂. လၢပတၢ်အိၣ်မူ တနံၤဘၣ်တနံၤန့ၣ် ပမၤတၢ်တီတီလိၤလိၤ ကသ့ဒ်လဲၣ်.

ယဟိဝၤယွၤ အဲၣ်ဒိးဝဲလၢပ “တဲလိာ်သးတၢ် တီတီလိၤလိၤ.” (စကၤရယၤ ၈:​၁၆, ၁၇) အဃိ ဖဲပတဲတၢ်ဒီး ပဟံၣ်ဖိဃီဖိမ့ၢ်ဂ့ၤ, ပှၤလၢ ပမၤသကိးတၢ်ဒီးအီၤမ့ၢ်ဂ့ၤ, ခရံာ်ဖိဒီပုၢ်ဝဲၢ်မုၣ်ခွါတဖၣ် မ့ၢ်ဂ့ၤ ဒီးဖဲပတဲတၢ်ဒီးပဒိၣ် အပှၤဘၣ်မူဘၣ်ဒါတဖၣ်မ့ၢ်ဂ့ၤ ယဟိဝၤယွၤ တအဲၣ်ဒိးဝဲလၢ ပတဲလံၣ်တဲလီအဝဲသ့ၣ် ဒီးဟ့ၣ်အဝဲသ့ၣ် တၢ်ဂ့ၢ်တၢ်ကျိၤ လၢအကမၣ်ဘၣ်. ပှၤလၢအမၤတၢ် တီတီလိၤလိၤန့ၣ် အတလံၣ်အီၣ်လီအီၣ်တၢ်ဘၣ် ဒီးအတဟုၣ်အီၣ် ပှၤဂၤအတၢ်ဘၣ်. (ဖး ကတိၤဒိ ၂၄:၂၈ ဒီး အ့းဖ့းစူး ၄:၂၈.) ဒီးအဝဲသ့ၣ်ဟ့ၣ်ဝဲ တၢ်ခိတၢ်သွဲ လၢအဘၣ်ဟ့ၣ်ဝဲ ခဲလၢာ်လီၤ. (ရိမ့ၤ ၁၃:​၅-၇) အဃိ ပမ့ၢ်မၤတၢ် တီတီလိၤလိၤဒ်အံၤ ကိးဆၢကတီၢ်ဒဲးန့ၣ် မ့ၢ်ဝဲ ပပာ်ဖျါထီၣ်လၢပ “မၤတၢ်တီတီလိၤလိၤလၢ တၢ်ခဲလၢာ်အပူၤ.”​—ဧ့ၤဘြံၤ ၁၃:၁၈.

၃. ပမ့ၢ်မၤတၢ် တီတီလိၤလိၤန့ၣ် ကကဲဘျုးဒ်လဲၣ်.

ပှၤမ့ၢ်သ့ၣ်ညါလၢ ပကဲပှၤလၢ အမၤတၢ်တီတီလိၤလိၤန့ၣ် ပှၤဂၤကနာ်န့ၢ်ပှၤ. ဒီးပမ့ၢ်မၤတၢ် တီတီလိၤလိၤန့ၣ် တၢ်အိၣ်ဖှိၣ်ဖိတဖၣ် ကအိၣ်ဘၣ် မုာ်မုာ်ခုၣ်ခုၣ် လီၤဂာ်ဒ်သိးဒီး ဟံၣ်ဖိဃီဖိတဒူၣ် လၢအအိၣ်ဒီး တၢ်အဲၣ်တၢ်ကွံ. ဒီးပကအိၣ်စ့ၢ်ကီးဒီး သးလၢအသ့ၣ်ညါဒၣ်တၢ် လၢအကဆှီ. တကးဒံးဘၣ် ပမ့ၢ်မၤတၢ် တီတီလိၤလိၤန့ၣ် မ့ၢ်ဒၣ်ပ “မၤဃံမၤလၤထီၣ် ကစၢ်ယွၤလၢအမ့ၢ် ပှၤလၢ အအုၣ်က့ၤခီၣ်က့ၤပှၤတဂၤ အတၢ်သိၣ်လိတဖၣ်” ဒီးပကထုးန့ၢ် ပှၤဂၤအသး ဒီးအဝဲသ့ၣ် ကအဲၣ်ဒိးသ့ၣ်ညါအါထီၣ် ယဟိဝၤယွၤအဂ့ၢ်.​—တံတူး ၂:၁၀.

ဃုသ့ၣ်ညါအါထီၣ်

၄. ယဟိဝၤယွၤ ဘၣ်သူၣ်ဘၣ်သးဝဲ ပှၤလၢအမၤတၢ် တီတီလိၤလိၤ

ဖး စံးထီၣ်ပတြၢၤ ၄၄:၂၁ ဒီး မၤလကံ ၃:၁၆ ဝံၤဒီး တဲသကိး တၢ်သံကွၢ် လၢလာ် တဖၣ်အံၤ–

• ဘၣ်မနုၤအဃိ ပပာ်ခူသူၣ် တၢ်မ့ၢ်တၢ်တီလၢ ယဟိဝၤယွၤအမဲာ်ညါ တဘၢဘၣ်လဲၣ်.

• ပကတဲတၢ် တီတီလိၤလိၤအဂီၢ် မ့ၢ်ကီသနာ်က့ ပမ့ၢ်တဲတၢ် တီတီလိၤလိၤန့ၣ် နဆိကမိၣ် ယဟိဝၤယွၤ ကသးခုဧါ.

၅. မၤတၢ်တီတီလိၤလိၤ ထီဘိ

တၢ်ဂီၤမူ– သးလၢအသ့ၣ်ညါဒၣ်တၢ် လၢအကဆှီန့ၣ် ဟ့ၣ်ပှၤတၢ်သးခု (၂:၃၂)

ဖး ဧ့ၤဘြံၤ ၁၃:၁၈ ဝံၤဒီး တဲသကိး တၢ်အိၣ်သး လၢလာ်တဖၣ်အံၤ.

• လၢပဟံၣ်ပူၤဃီပူၤန့ၣ် ပမၤတၢ်တီတီလိၤလိၤ ကသ့ဒ်လဲၣ်.

• လၢပတၢ်မၤလီၢ် ဒီးလၢကၠိန့ၣ် ပမၤတၢ်တီတီလိၤလိၤ ကသ့ဒ်လဲၣ်.

• လၢတၢ်အိၣ်သး အဂၤတဖၣ်စ့ၢ်ကီး ပမၤတၢ်တီတီလိၤလိၤ ကသ့ဒ်လဲၣ်.

၆. ပမ့ၢ်မၤတၢ် တီတီလိၤလိၤန့ၣ် ကကဲဘျုးလၢပဂီၢ်

ပမ့ၢ်မၤတၢ် တီတီလိၤလိၤန့ၣ် လၢအခီၣ်ထံးခါ ပကဆိကမိၣ်လၢ အတကဲဘျုး တဘျီဃီဘၣ်. ဘၣ်ဆၣ် ပမ့ၢ်မၤတၢ် တီတီလိၤလိၤန့ၣ် အကဲတၢ်လၢ အဂ့ၤကတၢၢ်လီၤ. ဖး စံးထီၣ်ပတြၢၤ ၃၄:​၁၂-၁၆ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• နမၤတၢ် တီတီလိၤလိၤအဃိ အကဲဘျုးလၢ နတၢ်အိၣ်မူအပူၤ ဒ်လဲၣ်.

1. ၁. ပှၤဒီမိၢ်ဝၤခံဂၤ တဲသကိးတၢ်ပျီပျီ ဒီးအဝဲသ့ၣ် တဲတၢ်တီတီလိၤလိၤအဃိ မၤဂၢၢ်ကျၢၤထီၣ် အတၢ်ဆီဟံၣ်ဆီဃီ

2. ၂. ပှၤမၤတၢ်ဖိတဂၤ မၤတၢ်တီတီလိၤလိၤ အဃိ အတၢ်မၤခိၣ်နာ်န့ၢ်အီၤ

3. ၃. ထံဖိကီၢ်ဖိတဂၤ မၤတၢ်တီတီလိၤလိၤ အဃိ အအိၣ်ဒီး မံၤဂ့ၤသၣ်ဂ့ၤလၢ ပဒိၣ်အပှၤဘၣ်မူဘၣ်ဒါ အမဲာ်ညါ

တၢ်ဂ့ၢ်လၢအရ့ဒိၣ်

ယဟိဝၤယွၤ အဲၣ်ဒိးဝဲလၢ အသကိးတဖၣ်န့ၣ် ကမၤတၢ်တီတီလိၤလိၤ ဒီးတဲတၢ်တီတီလိၤလိၤ ထီဘိ.

တၢ်ကွၢ်ကဒါက့ၤ

• ပမၤတၢ် တီတီလိၤလိၤ သ့ဒ်လဲၣ်.

• ဘၣ်မနုၤအဃိ ပပာ်ခူသူၣ် တၢ်မ့ၢ်တၢ်တီလၢ ကစၢ်ယွၤအမဲာ်ညါ တဘၢဘၣ်လဲၣ်.

• ဘၣ်မနုၤအဃိ နအဲၣ်ဒိးမၤတၢ် တီတီလိၤလိၤ ထီဘိလဲၣ်.

ဃုသ့ၣ်ညါ

ဒ်သိးဖိတဖၣ် ကမၤတၢ် တီတီလိၤလိၤအဂီၢ် မိပါတဖၣ် မၤစၢၤအဝဲသ့ၣ် ကသ့ဒ်လဲၣ်.

တဲတၢ်တီတီလိၤလိၤ (၁:၄၄)

ပမ့ၢ်တီဒီး ပတၢ်အၢၣ်လီၤန့ၣ် ကကဲဘျုးဒ်လဲၣ်.

ပှၤလၢအမၤလၢပှဲၤ အတၢ်အၢၣ်လီၤန့ၣ် အကဒိးန့ၢ်ဘၣ် တၢ်ဆိၣ်ဂ့ၤ (၉:၀၉)

တၢ်ခိတၢ်သွဲတဖၣ်န့ၣ် ပှၤသူအီၤအကျိၤအကျဲ မ့ၢ်တဘၣ်ဘၣ် သနာ်က့ ဘၣ်မနုၤအဃိ ပကြၢးဟ့ၣ်ဒံး တၢ်ခိတၢ်သွဲလဲၣ်.

“ပကဘၣ်ဟ့ၣ် တၢ်ခိတၢ်သွဲဧါ” (တၢးထီခိးတၢ်, လါစဲးပတ့ဘၢၣ် ၁, ၂၀၁၁)

ဘၣ်မနုၤအဃိ ပိာ်ခွါလၢ အလံၣ်အီၣ်လီအီၣ်တၢ်တဂၤ ကဲထီၣ်က့ၤ ပှၤလၢအမၤတၢ် တီတီလိၤလိၤလဲၣ်.

“ယသ့ၣ်ညါဘၣ်လၢ ယဟိဝၤယွၤန့ၣ် အကဲပှၤလၢ အသးကညီၤတၢ် ဒီးပျၢ်ကွံာ်တၢ်ညီ” (တၢးထီခိးတၢ်, လါမ့ၤ ၁, ၂၀၁၅)