ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါနိၣ်ဝ့ဘၢၣ် ၇–၁၃
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ကတိၤဒိ ၂၇-၃၁
“လံာ်စီဆှံပာ်ဖျါထီၣ်ဝဲ မါလၢအကူၣ်တၢ်သ့အဂ့ၢ်”
(ကတိၤဒိ ၃၁:၁၀-၁၂) မ့ၢ်မတၤထံၣ်န့ၢ်အမါလၢ အမၤတၢ်သ့တဂၤလဲၣ်. အဂ့ၢ်ဒ်အံၤ, အပှ့ၤဒိၣ်န့ၢ်တၢ်မျၢ်တက့ၢ်လီၤ. ၁၁ အဝၤအသး သန့ၤအသးလၢအီၤ, ဒီးအတၢ်အါထီၣ်တစှၤလီၤဘၣ်. ၁၂ မၤအီၤလၢတၢ်ဂ့ၤဒီး တမ့ၢ်ဘၣ်လၢတၢ်အၢတစိၤဒၣ်အီၤလီၤ.
တၢး၁၅ ၁/၁၅ ကဘျံးပၤ ၂၀ အဆၢ ၁၀
သူၣ်ထီၣ် ဟံၣ်ဃီလၢအဂၢၢ်ကျၢၤ ဒီးပှဲၤဒီးတၢ်သူၣ်ခုသးခု
၁၀ မါတဂၤန့ၣ် အိၣ်ဒီးတၢ်ခွဲးတၢ်ယာ် အကြၢးအဘၣ်လၢ ဟံၣ်ပူၤဃီပူၤ ဒီးအဝဲမ့ၢ်အဝၤအ “သကိး” လီၤ. (မၤလကံ ၂:၁၄) လၢဟံၣ်ဖိဃီဖိ အတၢ်ဆၢတဲာ်အပူၤ မါတဂၤတဲဖျါထီၣ်ဝဲ အတၢ်ထံၣ်ဒီး အတၢ်ဆိကမိၣ်လၢ တၢ်ယူးယီၣ် ပာ်ကဲအပူၤသ့ ဘၣ်ဆၣ် ကဘၣ် ဆဲးဒိးပၢအသးလၢ အဝၤအဖီလာ် ထီဘိလီၤ. ဝၤလၢအိၣ်ဒီး တၢ်ကူၣ်သ့တဂၤန့ၣ် ကဒိကနၣ် အမါအတၢ်ကတိၤ လီၤတံၢ်လီၤဆဲးလီၤ. (ကတိၤဒိ ၃၁:၁၀-၃၁) တၢ်ဒိးပၢသးလၢ တၢ်သူၣ်အိၣ်သးအိၣ်အပူၤန့ၣ် မၤဒိၣ်ထီၣ်အါထီၣ် တၢ်သူၣ်ခုသးခု, တၢ်ဃူတၢ်ဖိးလၢ ဟံၣ်ဖိဃီဖိအပူၤလီၤ. တကးဒံးဘၣ် မ့ၢ်လၢမါဒီးဝၤ ခံဂၤလၢာ် သ့ၣ်ညါဝဲလၢ မၤမုာ်ယွၤအသးအဃိ အဝဲသ့ၣ်အိၣ်ဒီး တၢ်သူၣ်မံသးမုာ်လီၤ.—အ့းဖ့းစူး ၅:၂၂.
တၢး၀၀ ၂/၁ ကဘျံးပၤ ၃၁ အဆၢ ၂
မိၢ်တဂၤ အတၢ်ဟ့ၣ်ကူၣ်လၢ ပှဲၤဒီးတၢ်ကူၣ်သ့
ဘၣ်ဃးဒီးမါလၢ အိၣ်ဒီးတၢ်သ့တၢ်ဘၣ်တဂၤန့ၣ် စီၤလမူၤအ့လး စံးဝဲလၢ- “အဝၤအသး သန့ၤအသးလၢအီၤ” လီၤ. (အဆၢ ၁၁) ပမ့ၢ်တဲကဒီးတမံၤန့ၣ် ဝၤတဂၤ တကြၢး မၢဆူၣ်အမါလၢ ကတူၢ်လိာ် အတၢ်ဆၢတဲာ်လၢ တၢ်ဂ့ၢ်ကိးမံၤဒဲး အပူၤဘၣ်. ဘၣ်ဆၣ် ပှၤနီၢ်ဒီမါဝၤတဖၣ်န့ၣ် တချုးလၢ မၤဝဲ တၢ်ဆၢတဲာ်လၢ အရ့ဒိၣ် ဒ်သိးဒီး တၢ်ပှ့ၤတၢ်ပီးတၢ်လီလၢ အပှ့ၤဒိၣ် မ့တမ့ၢ် တၢ်သိၣ်ဖိသိၣ်လံၤအဂ့ၢ်န့ၣ် ကဘၣ်တၢၣ်ပီၣ်တၢၣ်ပီ လိာ်အသးလီၤ. အဝဲသ့ၣ် မ့ၢ်တၢၣ်ပီၣ်သကိးတၢ်လၢ တၢ်ဂ့ၢ်တဖၣ်အံၤအဂီၢ်န့ၣ် အတၢ်ရ့လိာ်သး ကဘူးဒိၣ်ထီၣ်ဝဲလီၤ.
it-2 ကဘျံးပၤ ၁၁၈၃
မါ
တၢ်သိၣ်တၢ်သီ ဒီသဒၢဝဲ မါတဖၣ်. ဝၤန့ၣ်မ့ၢ်ဝဲ ဟံၣ်ခိၣ်ဒီး ကစၢ်ယွၤဟ့ၣ်အီၤ မူဒါလၢ ကဘၣ်လုၢ်အီၣ်လုၢ်အီ အဟံၣ်ဖိဃီဖိလၢ နီၢ်ခိဒီးနီၢ်သးလီၤ. ဟံၣ်ဖိဃီဖိ မ့ၢ်မၤတၢ်ကမၣ် တမံၤမံၤန့ၣ် ကလီၤတီလၢ ဝၤအလိၤအဃိ အဝဲအိၣ်ဒီးမူဒါလၢ အရ့ဒိၣ်ဒိၣ်မးလီၤ. အဝဲအိၣ်ဒီး တၢ်ခွဲးတၢ်ယာ် ဒိၣ်န့ၢ်အမါသနာ်က့ ယွၤအတၢ်သိၣ်တၢ်သီ ဒီသဒၢဝဲမါတဖၣ်ဒီး ဟ့ၣ်အီၤ တၢ်ခွဲးတၢ်ယာ် လီၤဆီဒ်သိး မါတဂၤ ကအိၣ်ဒီး တၢ်သူၣ်ခုသးခုအဂီၢ်လီၤ.
တၢ်အဒိတနီၤလၢ ဘၣ်ဃးဒီး စီၤမိၤၡ့ အတၢ်သိၣ်တၢ်သီလၢ နီၢ်ဒီမါဝၤတဖၣ်အဂီၢ်– ပှၤဒီမါဝၤတဖၣ် မ့ၢ်အဲၣ်ဘၢလိာ်အသးန့ၣ် ကဘၣ်တၢ်မၤသံအီၤလီၤ. ဝၤတဂၤ မ့ၢ်ဆိကမိၣ်ဝဲလၢ အမါအဲၣ်ဘၢအီၤန့ၣ် ကဘၣ်လဲၤကိးဝဲဆူ ပှၤလုၢ်တၢ်အဒိၣ်အအိၣ် ဒ်သိးကစၢ်ယွၤ ကစံၣ်ညီၣ် တၢ်ဂ့ၢ်အံၤအဂီၢ်လီၤ. ဒီးပိာ်မုၣ် မ့ၢ်မၤတၢ်ကမၣ်န့ၣ် အဟၢဖၢကညိးထီၣ်ဝဲလီၤ. ဘၣ်ဆၣ် ပိာ်မုၣ် မ့ၢ်တမၤ ကမၣ်ဘၣ်တၢ်န့ၣ် အဝၤ ကဘၣ်က့ၤ အိၣ်ဃုာ်ဒီးအီၤ ဒ်သိးအဟုးကအိၣ်ထီၣ်အဂီၢ် ဒီးပှၤကသ့ၣ်ညါလၢ အဝဲအတၢ်ကမၣ် တအိၣ်ဘၣ်န့ၣ်လီၤ. (၄ မိၤၡ့ ၅:၁၂-၃၁) မါတဂၤ မ့ၢ်အိၣ်ဒီး လုၢ်လၢ်လၢအတဂ့ၤ တမံၤမံၤန့ၣ် အဝၤမၤပတုာ်ကွံာ် တၢ်ဆီဟံၣ်ဆီဃီ ဒီးအီၤသ့လီၤ. ဘၣ်သ့ၣ်သ့ၣ် ကမ့ၢ်အဝဲ တယူးယီၣ်ပာ်ကဲအဝၤ မ့တမ့ၢ် ကတိၤအၢကတိၤသီ ဟံၣ်ဖိဃီဖိ မ့တမ့ၢ် အမံၤပှၢ်န့ၣ်လီၤ. ဘၣ်ဆၣ် မါတဂၤ ဘၣ်တၢ်ဒီသဒၢအီၤ ခီဖျိတၢ်သိၣ်တၢ်သီအိၣ်လၢ အဝၤကဘၣ်ဟ့ၣ်အီၤ လံာ်လီၤဖှၣ်န့ၣ်လီၤ. အဃိ အဝဲဆီဟံၣ်ဆီဃီဒီး ပှၤအဂၤသ့ဝဲန့ၣ်လီၤ. (၅ မိၤၡ့ ၂၄:၁, ၂) မါတဂၤ မ့ၢ်မၤတၢ်ဆိၣ်လၢ အဝၤဆိကမိၣ်ဝဲလၢ တကြၢးတဘၣ် မ့တမ့ၢ် မၤဘၣ်ဒိ ဟံၣ်ဖိဃီဖိန့ၣ် အဝၤမၤဟးဂီၤကွံာ် တၢ်ဆိၣ်အံၤသ့ဝဲလီၤ. (၄ မိၤၡ့ ၃၀:၁၀-၁၅) တၢ်အံၤ ကဲထီၣ်တၢ်ဒီသဒၢလၢ အမါအဂီၢ်ဒီး ဒ်သိးသုတထံၣ်ဘၣ် တၢ်ကီတၢ်ခဲတဂ့ၤန့ၣ်လီၤ.
စီၤမိၤၡ့ အတၢ်သိၣ်တၢ်သီ ဟ့ၣ်အခွဲးလၢ ပိာ်ခွါတဂၤဟံးန့ၢ်အမါ အါန့ၢ်ဒံးတဂၤသ့ သနာ်က့ တၢ်သိၣ်တၢ်သီလၢ အဒီသဒၢမါတဖၣ်န့ၣ် အိၣ်စ့ၢ်ကီးလီၤ. ပိာ်ခွါတဂၤ အမါဖးဒိၣ်အဖိဝဲၢ်ကိအလီၢ်န့ၣ် ဟ့ၣ်လီၤဝဲ အမါအဂၤလၢ အအဲၣ်ဝဲဒိၣ်ကတၢၢ်တဂၤ အဖိခွါတသ့ဘၣ်. (၅ မိၤၡ့ ၂၁:၁၅-၁၇) အံၣ်စရ့လးမုၣ်တဂၤ အပၢ်မ့ၢ်ဆါကွံာ်အီၤ ဒ်ကုၢ် ဒီးအကစၢ် မ့ၢ်ဟံးန့ၢ်အီၤဒ် အသံၣ်မါအသိးန့ၣ် လၢခံအကစၢ် မ့ၢ်တဘၣ်သူၣ်ဘၣ်သးလၢၤအီၤ သနာ်က့ ဆါကွံာ်အီၤဆူ ပှၤတခီဘီမုၢ်ဖိအအိၣ် တသ့ဘၣ်. ကဘၣ်ပျဲတၢ်ပှ့ၤက့ၤအီၤလီၤ. (၂ မိၤၡ့ ၂၁:၇, ၈) ကုၢ်အကစၢ် မ့တမ့ၢ် အဖိခွါ ဟံးန့ၢ်ကုၢ်မုၣ်အံၤ မ့ၢ်ဝံၤအလီၢ်ခံ အဝဲသ့ၣ် မ့ၢ်ဟံးန့ၢ်အမါအသီတဂၤ သနာ်က့ ကဘၣ်လုၢ်အီၣ်လုၢ်အီဒံး ပိာ်မုၣ်အံၤ ဒီးဟ့ၣ်အီၤ တၢ်အိၣ်တၢ်ဆိးအလီၢ် ဒ်ဝၤအမူဒါ အိၣ်ဝဲအသိးန့ၣ်လီၤ.—၂ မိၤၡ့ ၂၁:၉-၁၁.
ဝၤတဂၤ မ့ၢ်စံးအၢစံးသီအမါလၢ အတမ့ၢ်မုၣ်ကနီၤစီဆှံဘၣ် သနာ်က့ တၢ်အုၣ်အသး မ့ၢ်အိၣ်လၢ အဝဲမ့ၢ် မုၣ်ကနီၤန့ၣ် ဝၤအံၤကဘၣ် တၢ်စံၣ်ညီၣ်အီၤ ဒီးအဝဲ ကဘၣ်လိးစ့ ခံစးလၢ ပိာ်မုၣ်အံၤအဂီၢ် ဒီးကဘၣ်အိၣ်ဃုာ်ဝဲ တစိၤသးလီၤ. (၅ မိၤၡ့ ၂၂:၁၃-၁၉) ပိာ်ခွါတဂၤ မ့ၢ်ဖိးဆူၣ်ပိာ်မုၣ်န့ၣ် အဝဲကဘၣ်လိးစ့ဆူ ပိာ်မုၣ် အပၢ်အအိၣ်လီၤ. ပိာ်မုၣ်အပၢ် မ့ၢ်ဟ့ၣ်အခွဲးလၢ ကဖျီအသးဒီးအဖိမုၣ်န့ၣ် ကဘၣ်အိၣ်ဃုာ်ဝဲ တစိၤသးလီၤ.—၅ မိၤၡ့ ၂၂:၂၈, ၂၉; ၂ မိၤၡ့ ၂၂:၁၆, ၁၇.
ပှၤဧ့ၤဘြံၤမုၣ်တဖၣ် အတၢ်အိၣ်သး လီၤဆီလိာ်အသးဒီး စိၤခဲအံၤ ပိာ်မုၣ်လၢ ကီၢ်မုၢ်နုာ်တဖၣ် သနာ်က့ ဧ့ၤဘြံၤမုၣ်လၢ အိၣ်ဒီးတၢ်သးတီတဖၣ် အိၣ်ဒီး တၢ်သူၣ်ခုသးခုလၢ အတၢ်အိၣ်သး ဒီးအတၢ်မၤအပူၤလီၤ. အဝဲမၤစၢၤအဝၤ, လုၢ်ဒိၣ်ထီၣ်အဖိ, ရဲၣ်ကျဲၤတၢ်လၢ ဟံၣ်ဃီအပူၤလီၤ. အဝဲအိၣ်ဒီး တၢ်သူၣ်ခုသးခု ဒီးတၢ်သူၣ်မံသးမုာ် တကးဘၣ် ပာ်ဖျါထီၣ်ဝဲ အတၢ်သ့တၢ်ဘၣ် ဒီးအတၢ်ဂ့ၤတၢ်ဝါ န့ၢ်ဝဲ လၢလၢပှဲၤပှဲၤလီၤ.
မါလၢအဖၠဲးတဂၤ. မါလၢအအိၣ်ဒီး တၢ်သးတီတဂၤ အတၢ်အိၣ်သးဒီး အတၢ်ဖံးတၢ်မၤအဂ့ၢ်န့ၣ် ဘၣ်တၢ်ပာ်ဖျါအီၤဖဲ ကတိၤဒိ ၃၁ အပူၤလီၤ. အဝၤ ပာ်လုၢ်ပာ်ပှ့ၤအီၤဒိၣ်န့ၢ် တၢ်မျၢ်လီၤ. အဝၤနာ်န့ၢ်အီၤ သ့လီၤ. အဝဲမ့ၢ်ပှၤလၢ အမၤတၢ်ဆူၣ်တဂၤလီၤ. အဝဲထါထၣ်, မၤဆ့ကၤလၢ အဟံၣ်ဖိဃီဖိအဂီၢ်, သးစၢၢ်ဆၢ ဟံၣ်ဖိဃီဖိ အတၢ်လိၣ်ဘၣ်, မၤတၢ်လၢ စပံးကျိး, ရဲၣ်ကျဲၤတၢ်ဒီး အခ့အပှၤတဖၣ်, မၤစၢၤပှၤလၢ အလိၣ်ဘၣ်တၢ်မၤစၢၤ, ဒုးကူဒုးသိး အဟံၣ်ဖိဃီဖိ ဃံဃံလၤလၤ, မၤတၢ်မၤဒ်သိး စ့ဟဲနုာ်ကအိၣ် တဆံးတက့ၢ်, ကတဲာ်ကတီၤပာ်တၢ်လၢ ခါဆူညါ တၢ်မ့ၢ်ကဲထီၣ်အသး သတူၢ်ကလာ်အဂီၢ်, ပာ်ဖျါထီၣ်ဝဲလၢ အအိၣ်ဒီး တၢ်ကူၣ်သ့ဒီး တၢ်သးကညီၤ တကးဒံးဘၣ် ပျံၤယွၤဒီးမၤတၢ်ဂ့ၤအဃိ အဝၤဒီးအဖိတဖၣ် စံးထီၣ်ပတြၢၤအီၤလီၤ. လၢတၢ်န့ၣ်အဃိ အဝၤဒီးအဟံၣ်ဖိဃီဖိ ဘၣ်တၢ်စံးထီၣ်ပတြၢၤအီၤလၢ အလီၢ်ကဝီၤအပူၤလီၤ. ပှၤလၢဒိးန့ၢ်ဘၣ် မါလၢအဂ့ၤတဂၤန့ၣ် မ့ၢ်ပှၤလၢအဒိးန့ၢ်ဘၣ် တၢ်လၢအဂ့ၤဒီး ဒိးန့ၢ်ဘၣ်ယဟိဝၤယွၤ အတၢ်ဆိၣ်ဂ့ၤလီၤ.—ကတိၤဒိ ၁၈:၂၂.
လၢခရံာ်ဖိ တၢ်အိၣ်ဖှိၣ်အပူၤ. လၢခရံာ်ဖိတၢ်အိၣ်ဖှိၣ်အပူၤ တၢ်ဘျၢအိၣ်ဝဲလၢ ဝၤတဂၤ ကဘၣ်အိၣ်ဒီး အမါထဲတဂၤဧိၤလီၤ. (၁ ကရံၣ်သူး ၇:၂; ၁ တံၤမသ့း ၃:၂) မါတဖၣ်န့ၣ် အဝၤမ့မ့ၢ် ပှၤစူၢ်တၢ်နာ်တၢ်မ့ၢ်ဂ့ၤ, တစူၢ်တၢ်နာ်တၢ်မ့ၢ်ဂ့ၤ, ကဘၣ်ဒိးပၢအသးလၢ အဝၤအဖီလာ်လီၤ. (အ့းဖ့းစူး ၅:၂၂-၂၄) မါတဖၣ် ကဘၣ်မၤလၢပှဲၤ အဝၤအတၢ်လိၣ်ဘၣ်လီၤ. မ့ၢ်လၢအဝဲ “တအိၣ်ဘၣ်ဒီး အစိအကမီၤလၢ အနီၢ်ခိဒၣ်ဝဲအဖီခိၣ်” ဘၣ်. (၁ ကရံၣ်သူး ၇:၃, ၄) မါတဖၣ် ဘၣ်တၢ်ဟ့ၣ်ကူၣ်အီၤလၢ ကဘၣ်ကယၢကယဲ အပှၤလၢညါ ဘၣ်ဃးဒီးသး ဒီးကဘၣ်သၣ်ထီၣ် သးအတၤသၣ်လီၤ. အဝဲသ့ၣ် မ့ၢ်မၤဝဲဒ်န့ၣ်န့ၣ် ဘၣ်သ့ၣ်သ့ၣ် အဝၤလၢ တမ့ၢ်ပှၤစူၢ်တၢ်နာ်တၢ်တဂၤ ကဲထီၣ်ခရံာ်ဖိသ့ ခီဖျိလၢ အဝဲသ့ၣ် အသကဲာ်ပဝးအဃိလီၤ.—၁ ပ့းတရူး ၃:၁-၆.
တၢ်အဒိ. မ့ၢ်လၢ ယဟိဝၤယွၤ မၤတၢ်အၢၣ်လီၤအီလီၤ ဒီးပှၤအံၣ်စရ့လးဖိအဃိ ဒိလီၤအဝဲသ့ၣ် ဒ်အမါလီၤ. (ယၡါယၤ ၅၄:၆) စီၤပီလူးစံးဝဲလၢ ယဟိဝၤယွၤ မ့ၢ်ခရံာ်ဖိလၢ ဘၣ်တၢ်ဒိးဖှူအီၤတဖၣ်အပၢ် ဒီးကိးဝဲ “ယရူၤၡလ့ၣ်လၢထး” လၢအဝဲသ့ၣ်အမိၢ်လီၤ. မ့ၢ်လၢယဟိဝၤယွၤ ဒိးတ့ဒိးဖျီအသးဒီး “ယရူၤၡလ့ၣ်လၢထး” ဒ်သိးခရံာ်ဖိလၢ ဘၣ်တၢ်ဒိးဖှူအီၤတဖၣ် ကဟဲအိၣ်ထီၣ်အဂီၢ်အဃိလီၤ. (ကလၤတံ ၄:၆, ၇, ၂၆) ခရံာ်ဖိ တၢ်အိၣ်ဖှိၣ်န့ၣ် ဘၣ်တၢ်ကိးအီၤလၢ ယ့ၣ်ၡူးခရံာ် အတလးမူးပိာ်မုၣ် မ့တမ့ၢ် အမါလီၤ.—အ့းဖ့းစူး ၅:၂၃, ၂၅; လီၣ်ဖျါ ၁၉:၇; ၂၁:၂, ၉.
(ကတိၤဒိ ၃၁:၁၃-၂၇) ဃုန့ၢ်သိအဆူၣ်ဒီးဘဲ, ဒီးမၤဒၣ်တၢ်လၢအစုလီၤ. ၁၄ မၤသးဒ်ပှၤကၤတၢ်ဖိ အကဘီအသိးန့ၣ်, ဟဲစိာ်တၢ်အီၣ်လၢအယံၤလီၤ. ၁၅ လၢတၢ်ခံးဒံးန့ၣ် ဂဲၤဆၢထၢၣ်ဒီး ဒုးအီၣ်အပှၤဟံၣ်ဖိ, ဒီးဟ့ၣ်လီၤအခ့အပှၤ ပိာ်မုၣ်အဂီၢ်လီၤ. ၁၆ ကွၢ်ဆိကမိၣ်ဝဲလၢ ဟီၣ်ခိၣ်တကဝီၤ, ဒီးပှ့ၤန့ၢ်ဝဲလီၤ. သူၣ်စပံးလီၢ်လၢ အစုအတၤသၣ်လီၤ. ၁၇ ကံၢ်တူာ်အယီၢ်ဒ့လၢ တၢ်ဂံၢ်တၢ်ဘါ, ဒီးပာ်ဆူၣ်ထီၣ်အစုဒုၣ်လီၤ. ၁၈ သ့ၣ်ညါဝဲလၢကၤတၢ်မ့ၢ်အဂ့ၤလီၤ. အမ့ၢ်အူဒၢ တလီၤပံာ်လၢ မုၢ်နၤဘၣ်. ၁၉ ပာ်အစုလၢ နီၣ်ဘ့ဘဲအလိၤ, ဒီးအစုဟံးဃာ် ကဟၣ်စု ဝံာ်ဘဲလီၤ. ၂၀ သလၣ်ထီၣ်အစုလၢ ပှၤဘၣ်နးဘၣ်ဖှီၣ်အဂီၢ်, ဒီးယူာ်ထီၣ်အစုဆူပှၤဖှီၣ်ဖိယာ်ဖိအအိၣ်လီၤ. ၂၁ တပျံၤဘၣ်မူခိၣ်ဖီလၢ အပှၤဟံၣ်ဖိအဂီၢ်ဘၣ်. အဂ့ၢ်ဒ်အံၤ, အပှၤဟံၣ်ဖိကူဝဲသိးဝဲဒီးတၢ်ဂီၤလီၤ. ၂၂ မၤဝဲဒီးယၣ်လုးလၢ အလီၢ်မံအဂီၢ်လီၤ. အကူအသိး မ့ၢ်ဖှီဝါကဆှၣ်, ဒီးလုးတကုာ်လီၤ. ၂၃ တုၤအဝၤဆ့ၣ်နီၤဝဲလၢ ပဲတရီအပူၤ, လၢထံဧိၤကီၢ်ဧိၤ အပှၤသးပှၢ်အကျါန့ၣ်ဒီး, ပှၤသ့ၣ်ညါအီၤလီၤ. ၂၄ မၤဝဲလၢတၢ်အကူအသိးဖှီဝါကဆှၣ်, ဒီးဆါကွံာ်ဝဲ, ဒီးဟ့ၣ်လီၤ ယီၢ်တကိးတဖၣ် လၢပှၤကၤတၢ်ဖိလီၤ. ၂၅ တၢ်ဂံၢ်တၢ်ဘါ, ဒီးတၢ်လၤကပီၤန့ၣ် မ့ၢ်အကူအသိးလီၤ. ဒီးနံၤဘၣ်မုၢ်နံၤလၢ အကဟဲတဖၣ်န့ၣ်လီၤ. ၂၆ အဲးထီၣ်အထးခိၣ် အိၣ်ဒီးတၢ်ကူၣ်သ့, ဒီးတၢ်ဘျုးတၢ်ဖှိၣ် အတၢ်သိၣ်တၢ်သီန့ၣ် အိၣ်ဝဲလၢအပျ့ၤလိၤလီၤ. ၂၇ ကွၢ်ဝဲလၢအပှၤဟံၣ်ဖိအကျဲကစီဒီ, တအီၣ်တၢ်အကၢၣ်အကိၣ်ဘၣ်.
တၢး၀၀ ၂/၁ ကဘျံးပၤ ၃၁ အဆၢ ၃-၄
မိၢ်တဂၤ အတၢ်ဟ့ၣ်ကူၣ်လၢ အပှဲၤဒီးတၢ်ကူၣ်သ့
မါလၢအိၣ်ဒီး တၢ်ကူၣ်သ့တဂၤန့ၣ် ကဘၣ်မၤတၢ် အိၣ်ဝဲအါမးလီၤ. အဆၢဖိ ၁၃ တုၤလၢ ၂၇ အပူၤန့ၣ် အိၣ်ဒီးတၢ်ဟ့ၣ်ကူၣ်ဒီး တၢ်သိၣ်တၢ်သီတဖၣ်လၢ မါတဖၣ်အဂီၢ် ဒ်သိးအဟံၣ်ဖိဃိဖိတဖၣ် ကဒိးန့ၢ်ဘၣ်အဘျုးအဂီၢ်လီၤ. အဒိ, တၢ်ကူတၢ်ကၤတဖၣ် ဒီးဟံၣ်အတၢ်ပီးတၢ်လီတဖၣ် အပှ့ၤဒိၣ်ထီၣ်အဃိ မါလၢအအိၣ်ဒီး တၢ်ကူၣ်သ့န့ၣ် ကအံးထွဲကွၢ်ထွဲဝဲ အဟံၣ်ဖိဃီဖိဂ့ၤဂ့ၤဘၣ်ဘၣ်အဂီၢ် ကသူဝဲကျိၣ်စ့လၢ တၢ်ကူၣ်သ့အပူၤလီၤ. (အဆၢ ၁၃, ၁၉, ၂၁, ၂၂) ဟံၣ်ဖိဃီဖိ တၢ်အီၣ်တၢ်အီ ဒီးတၢ်လၢာ်ဘူၣ်လၢာ်စ့ၤ ကစှၤလီၤအဂီၢ် အဝဲကသူၣ်အီၣ်ဖျးအီၣ်တၢ်ဒီး ကပှ့ၤအီၣ်ပှ့ၤအီတၢ်လၢ တၢ်ကူၣ်သ့အပူၤလီၤ.—အဆၢ ၁၄, ၁၆.
ပိာ်မုၣ်အံၤန့ၣ် ဖျါလၢ “တအီၣ်တၢ်အကၢၣ်အကိၣ်ဘၣ်.” အဝဲဂုာ်ကျဲးစၢး မၤတၢ်ဆူၣ်ဆူၣ် ဒီးဟံၣ်အတၢ်မၤတဖၣ် ကလဲၤအသးလၢ အဂ့ၢ်အဝီအဂီၢ် အဝဲသုးကျဲၤဝဲ ဂ့ၤဂ့ၤဘၣ်ဘၣ်လီၤ. (အဆၢ ၂၇) အဝဲ “ကံၢ်တူၢ်အယီၢ်ဒ့လၢ တၢ်ဂံၢ်တၢ်ဘါ,” န့ၣ်အဲၣ်ဒိးစံးဝဲလၢ အဝဲသူဝဲ အနီၢ်ခိအဂံၢ်အဘါလၢ ကကတဲာ်ကတီၤတၢ်အဂီၢ်လီၤ. (အဆၢ ၁၇) အဝဲဂဲၤဆၢထၢၣ်လၢ တချုးမုၢ်ဆ့ၣ်ဝါ ဒီးမၤတၢ်မၤဒီတနံၤ တုၤလီၤလၢ တၢ်ခံးယိာ်န့ၣ်လီၤ. အတၢ်ဖံးတၢ်မၤန့ၣ် လီၤဂာ်ဒ်မ့ၣ်အူဒၢလၢ အတလီၤပံာ်ဘၣ် နီတဘျီဘၣ်န့ၣ်လီၤ.—အဆၢ ၁၅, ၁၈.
(ကတိၤဒိ ၃၁:၂၈-၃၁) အဖိဂဲၤဆၢထၢၣ်, ဒီးဆိၣ်ဂ့ၤအီၤ, အဝၤန့ၣ်စံးထီၣ်ပတြၢၤအီၤလီၤ. ၂၉ ပှၤဖိမုၣ်အါဂၤ မၤဂ့ၤဂ့ၤ ဘၣ်ဘၣ်လံဘၣ်ဆၣ်ဒီး, နတလၢကွံာ်အီၤခဲလၢာ်လီၤ. ၃၀ တၢ်အဃံအလၤန့ၣ် လီန့ၢ်တၢ်, ဒီးတၢ်အက့ၢ်ဂ့ၤအဂီၤဂ့ၤ မ့ၢ်တၢ်ကလီကလီလီၤ. မ့မ့ၢ်ပိာ်မုၣ်လၢ အပျံၤယွၤန့ၣ် တၢ်ကစံးထီၣ်ပတြၢၤအီၤလီၤ. ၃၁ ဟ့ၣ်အီၤလၢ အစုအတၤသၣ်, ဒီးမ်အတၢ်မၤဒၣ်ဝဲ စံးထီၣ်ပတြၢၤအီၤလၢ ပဲတရီအပူၤတက့ၢ်.
တၢး၁၅ ၁/၁၅ ကဘျံးပၤ ၂၀ အဆၢ ၈
သူၣ်ထီၣ်ဟံၣ်ဃီလၢ အဂၢၢ်ကျၢၤဒီး ပှဲၤဒီးတၢ်သူၣ်ခုသးခု
၈ ဝၤလၢအမ့ၢ် ခရံာ်ဖိတဖၣ်န့ၣ် တမၢဆူၣ်ဝဲ အမါလၢ ကယူးယီၣ်ပာ်ကဲအီၤဘၣ်. လၢတၢ်န့ၣ်အလီၢ် အဝဲသ့ၣ် “ယူးယီၣ်ပိာ်မုၣ်န့ၣ် ဒ်တၢ်လၢအဂံၢ်အဘါစၢ် တက့ၢ်အသိး” လီၤ. (၁ ပ့းတရူး ၃:၇) လၢပှၤမဲာ်ညါမ့ၢ်ဂ့ၤ ပှၤလီၢ်ခံမ့ၢ်ဂ့ၤ အဝၤပာ်လုၢ်ပာ်ပှ့ၤအမါ ခီဖျိပာ်ဖျါထီၣ် အတၢ်ကတိၤဒီး အတၢ်မၤလၢ အိၣ်ဒီး တၢ်ယူးယီၣ်ပာ်ကဲန့ၣ်လီၤ. (ကတိၤဒိ ၃၁:၂၈) ဝၤဒ်အံၤန့ၣ် ကဒိးန့ၢ်ဘၣ် အမါအတၢ်အဲၣ်ဒီး တၢ်ယူးယီၣ်ပာ်ကဲ တကးဘၣ် ကစၢ်ယွၤ ကဆိၣ်ဂ့ၤ အဝဲသ့ၣ် အဟံၣ်အဃီလီၤ.
တၢး၀၀ ၂/၁ ကဘျံးပၤ ၃၁ အဆၢ ၅
မိၢ်တဂၤ အတၢ်ဟ့ၣ်ကူၣ်လၢ အပှဲၤဒီးတၢ်ကူၣ်သ့
လၢတၢ်န့ၣ်အမဲာ်ညါ မါလၢအအိၣ်ဒီး တၢ်ကူၣ်သ့န့ၣ် မ့ၢ်ပှၤလၢအအဲၣ်ယွၤလီၤ. ဒီးအဝဲမ့ၢ်ပိာ်မုၣ်လၢ အပျံၤယွၤ ဒီးယူးယီၣ်ပာ်ကဲ ကစၢ်ယွၤ လၢသူၣ်လၢသးလီၤ. (အဆၢ ၃၀) ပိာ်မုၣ်အံၤ ကမၤစၢၤအဝၤ ခီဖျိလၢ သိၣ်လိနဲၣ်လိ အဖိတဖၣ်လီၤ. အဆၢ ၂၆ စံးဝဲလၢ- “အဲးထီၣ်အထးခိၣ် အိၣ်ဒီးတၢ်ကူၣ်သ့, ဒီးတၢ်ဘျုးတၢ်ဖှိၣ် အတၢ်သိၣ်တၢ်သီန့ၣ် အိၣ်ဝဲလၢအပျ့ၤလိၤလီၤ.”
တၢး၀၀ ၂/၁ ကဘျံးပၤ ၃၁ အဆၢ ၈
မိၢ်တဂၤ အတၢ်ဟ့ၣ်ကူၣ်လၢ အပှဲၤဒီးတၢ်ကူၣ်သ့
စီၤလမူၤအ့လးအမိၢ် ဒုးသ့ၣ်နီၣ်ထီၣ်က့ၤအဖိခွါလၢ တၢ်ပာ်လုၢ်ပာ်ပှ့ၤမါ မ့ၢ်တၢ်လၢအရ့ဒိၣ်န့ၣ် ပနာ်သ့လၢ အမိၢ်တဲအီၤ တၢ်လၢအလဲၤခီဖျိဘၣ်ဝဲန့ၣ်လီၤ. လၢဟီၣ်ခိၣ်ချၢ ပှၤလၢအဝဲကဘၣ်အဲၣ်ဝဲ ဒိၣ်န့ၢ်ဒံးအမါန့ၣ် တအိၣ်ဘၣ်. အဃိ ထံၣ်တမှံကွၢ် စီၤလမူၤအ့လး အတၢ်တူၢ်ဘၣ် ဖဲအတဲဝဲ တၢ်ကတိၤအံၤလၢ ပှၤခဲလၢာ် အမဲာ်ညါအခါန့ၣ်တက့ၢ်. အဝဲစံးဝဲလၢ– “ပှၤဖိမုၣ်အါဂၤ မၤဂ့ၤဂ့ၤ ဘၣ်ဘၣ်လံဘၣ်ဆၣ်ဒီး, နတလၢကွံာ်အီၤခဲလၢာ်လီၤ.”—ကတိၤဒိ ၃၁:၂၉.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ကတိၤဒိ ၂၇:၁၂) ပှၤကူၣ်တၢ်ဘၣ်န့ၣ် ထံၣ်ဘၣ်တၢ်အၢ, ဒီးပာ်တဒၢအသးလီၤ. မ့မ့ၢ်ပှၤလၢ အတမၤလိဘၣ်တၢ်ဘၣ်န့ၣ် လဲၤဒၣ်တၢ်, ဒီးဘၣ်တၢ်နးတၢ်ဖှီၣ်လီၤ.
တၢ်သူၣ်ကိၢ်သးဂီၤလၢ ပသးသမူအတၢ်ဘၣ်ယိၣ်အဃိ
ပသ့ၣ်ညါလၢ ဖဲတၢ်တဂ့ၤတဘၣ်သ့ၣ်တဖၣ် ကဲထီၣ်အသးအခါန့ၣ် “ပှၤကူၣ်တၢ်ဘၣ်န့ၣ် ထံၣ်ဘၣ်တၢ်အၢ, ဒီးပာ်တဒၢအသးလီၤ. (ကတိၤဒိ ၂၇:၁၂) ဒ်ပဂုာ်ကျဲးစၢးဒီသဒၢ ပနီၢ်ခိအတၢ်အိၣ်ဆူၣ်အိၣ်ချ့အသိး ပကဘၣ်ဒီသဒၢစ့ၢ်ကီး ပတၢ်ဆိကမိၣ်ဒီးပသးန့ၣ်လီၤ. တၢ်ဂီၤမူဒီး တၢ်ကစီၣ်တဖၣ် ပှဲၤဝဲဒီးတၢ်မၤဆူၣ်မၤစိးအဂီၤတဖၣ်အဃိ ဒုးအိၣ်ထီၣ် တၢ်သူၣ်ကိၢ်သးဂီၤလၢ ပဝဲဒီးပဖိပလံၤတဖၣ်သ့န့ၣ်လီၤ. တၢ်ဟးဆှဲးတၢ်ဂီၤတဖၣ်အံၤန့ၣ် အခီပညီတမ့ၢ်လၢ ပကွၢ်ကပာ် တၢ်အိၣ်အသးနီၢ်နီၢ်န့ၣ်ဘၣ်. ကစၢ်ယွၤ တတ့လီၤပခိၣ်နူာ်လၢ ပကဆိကမိၣ်ထဲ တၢ်အၢသ့ၣ်တဖၣ်န့ၣ်ဘၣ်. လၢတၢ်န့ၣ်အလီၢ် ပကြၢးမၤပှဲၤ ပတၢ်ဆိကမိၣ်ဒီး “ဖဲဒၣ်တၢ်မ့ၢ်တၢ်တီ, . . . တၢ်တီတၢ်လိၤ, . . . တၢ်စီတၢ်ဆှံ, . . . တၢ်လၢတၢ်အဲၣ်အီၤ” လီၤ. ပမ့ၢ်မၤဒ်န့ၣ်ဒီး “တၢ်ဃူတၢ်ဖိးအကစၢ်” ကဟ့ၣ်ပှၤ တၢ်ဃူတၢ်ဖိးဒီး တၢ်သူၣ်မံသးမုာ်လီၤ.—ဖံလံးပံၤ ၄:၈, ၉.
(ကတိၤဒိ ၂၇:၂၁) ဒ်သပၢၤသိတၢ်လၢစ့အဂီၢ်, ဒီးဖၣ်ကပူၤလၢထူအဂီၢ်အသိးန့ၣ်, ပှၤကညီဒီး အတၢ်စံးထီၣ်ပတြၢၤ မၤသးဒ်န့ၣ်သိးလီၤ.
တၢး၁၁ ၈/၁ ကဘျံးပၤ ၂၉ အဆၢ ၂
မုၢ်နံၤတနံၤလၢ ပအိၣ်ခိးကွၢ်လၢ်အီၤလၢ တၢ်သူၣ်ခုသးခုအပူၤ
ခံမံၤတမံၤ ဒီပုၢ်ဝဲၢ်မီရံး(စ်) ဖးပၠးဝဲ ကတိၤဒိ ၂၇:၂၁ ဒ်အံၤ– “ဒ်သပၢၤသိတၢ်လၢစ့အဂီၢ်, ဒီးဖၣ်ကပူၤလၢထူအဂီၢ်အသိးန့ၣ်, ပှၤကညီဒီး အတၢ်စံးထီၣ်ပတြၢၤ မၤသးဒ်န့ၣ်သိးလီၤ.” အဝဲတဲနၢ်ပၢၢ်ပှၤလၢ ဒ်ထူဒီးစ့ ကဘၣ် တၢ်မၤကဆှီထီၣ်က့ၤအီၤအသိး ပဝဲစ့ၢ်ကီး ပဘၣ်တၢ်မၤကဆှီထီၣ်က့ၤပှၤလၢ တၢ်စံးပတြၢၤန့ၣ်လီၤ. လၢကျဲဒ်လဲၣ်. တၢ်စံးပတြၢၤန့ၣ် မ့ၢ်တၢ်မၤကွၢ်တခါ လၢပဂီၢ်လီၤ. တၢ်စံးပတြၢၤန့ၣ် ကဒုးအိၣ်ထီၣ် တၢ်ပာ်ထီၣ်ထီသး ဒီးကမၤဟးဂီၤ ပတၢ်ရ့လိာ်သးဒီးယွၤလီၤ. မ့တမ့ၢ် တၢ်စံးပတြၢၤန့ၣ် ကထိၣ်ဟူးထိၣ်ဂဲၤထီၣ်ပှၤလၢ ပကစံးပတြၢၤယွၤလၢ တၢ်သ့တၢ်ဘၣ်လၢ အအိၣ်ဒီးပှၤဒီး ပကဆၢတဲာ်ပသးလၢပကအိၣ်မူမၤထွဲ ဒ်ကစၢ်ယွၤ အတၢ်သိၣ်တၢ်သီအသိးန့ၣ်လီၤ. ဒီပုၢ်ဝဲၢ် မီရံး(စ်) ဟ့ၣ်ကူၣ်ဝဲ ပှၤကၠိဖိတဖၣ်လၢ ပှၤလၢအဒိးန့ၢ်ဘၣ် တၢ်စံးပတြၢၤန့ၣ် ကဘၣ်သူ တၢ်စံးပတြၢၤအံၤလၢ ကျဲလၢအဘၣ်လီၤ. တၢ်စံးပတြၢၤန့ၣ် ပကဘၣ်ထံၣ်အီၤဒ် တၢ်ခွဲးတၢ်ယာ်လီၤဆီလၢ ပကပာ်ဖျါထီၣ်လၢ ပကပျံၤ ယဟိဝၤယွၤအဂီၢ်န့ၣ်လီၤ.
တၢး၀၆ ၉/၁၅ ကဘျံးပၤ ၁၉ အဆၢ ၁၂
လံာ်စီဆှံ အတၢ်ပာ်ဖျါလၢ လံာ်တၢ်ကတိၤဒိ
၂၇:၂၁. တၢ်စံးပတြၢၤန့ၣ် ကဲထီၣ်တၢ်မၤကွၢ်လၢ ပဂီၢ်သ့လီၤ. ဒီးလၢတၢ်စံးပတြၢၤအဃိ ပပာ်ထီၣ်ထီပသး ဒီးပတၢ်ရ့လိာ်သးဒီးယဟိဝၤယွၤ ဟးဂီၤဝဲသ့လီၤ. ဒီးတၢ်စံးထီၣ်ပတြၢၤန့ၣ် ထိၣ်ဟူးထိၣ်ဂဲၤထီၣ်ပှၤလၢ ပကပာ်ဖျါထီၣ် တၢ်စံးဘျုးယဟိဝၤယွၤ ဒီးမၤဂၢၢ်ကျၢၤထီၣ် ပတၢ်ဆၢတဲာ်လၢ ပကအိၣ်မူဒ် အတၢ်ဘျၢအသိး သ့ဝဲလီၤ.
လါနိၣ်ဝ့ဘၢၣ် ၁၄–၂၀
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | စံၣ်တဲၤတဲလီၤတၢ် ၁-၆
“မုာ်လၤတၢ်ဂ့ၤလၢ နမၤတၢ်ခဲလၢာ်အပူၤ”
(စံၣ်တဲၤတဲလီၤတၢ် ၃:၁၂, ၁၃) လၢပှၤကညီသးခု, ဒီးမၤတၢ်ဂ့ၤ တစိၤဒၣ်အီၤအမဲာ်ညါန့ၣ် ယသ့ၣ်ညါလၢတၢ်ဂ့ၤ အဂၤတအိၣ်ဘၣ်လၢအဂီၢ် နီတမံၤဘၣ်. ၁၃ လၢပှၤကညီကိးဂၤဒဲး ကအီၣ်တၢ်, ဒီးအီတၢ်, ဒီးမုာ်လၤ တၢ်ဂ့ၤလၢ အမၤတၢ်ခဲလၢာ်အပူၤန့ၣ်, မ့ၢ်ယွၤအတၢ်ဟ့ၣ်စ့ၢ်ကီးလီၤ.
တၢး၁၅ ၂/၁ ကဘျံးပၤ ၄-၆
ပမုာ်လၤတၢ်ဂ့ၤလၢ တၢ်မၤအပူၤကသ့ဒ်လဲၣ်
“လၢပှၤကညီကိးဂၤဒဲး ကအီၣ်တၢ်, ဒီးအီတၢ်, ဒီးမုာ်လၤ တၢ်ဂ့ၤလၢ အမၤတၢ်ခဲလၢာ်အပူၤန့ၣ်, မ့ၢ်ယွၤအတၢ်ဟ့ၣ်စ့ၢ်ကီးလီၤ.” (စံၣ်တဲၤတဲလီၤတၢ် ၃:၁၃) ကစၢ်ယွၤမ့ၢ်အဲၣ်ဒိးလၢ ပကဒိးန့ၢ်ဘၣ် တၢ်သူၣ်ခုသးခုလၢ ပတၢ်မၤအပူၤန့ၣ် ဒ်သိးပကဒိးန့ၢ်ဘၣ် တၢ်သူၣ်ခုသးခုအဂီၢ် ပကဘၣ်မၤဒ်လဲၣ်န့ၣ် အဝဲကဟံးစုနဲၣ်ကျဲပှၤလီၤ. (ယၡါယၤ ၄၈:၁၇) အတၢ်ဟံးစုးနဲၣ်ကျဲ အိၣ်လၢ အကလုၢ်ကထါ လံာ်စီဆှံပူၤအဃိ လီၤစံးဘျုးဒိၣ်မးလီၤ. နကဒိးန့ၢ်ဘၣ် တၢ်သူၣ်မံသးမုာ်လၢ နတၢ်မၤပူၤအဂီၢ် ဆိကမိၣ်ကွၢ် လံာ်စီဆှံ အတၢ်ဟ့ၣ်ကူၣ်တဖၣ်အံၤတက့ၢ်.
အိၣ်ဒီးတၢ်ထံၣ်အဂ့ၤလၢ နတၢ်မၤအဖီခိၣ်တက့ၢ်
တၢ်မၤလၢ ပဘၣ်သူခိၣ်နူာ်မ့ၢ်ဂ့ၤ, ပဘၣ်သူဂံၢ်ဘါမ့ၢ်ဂ့ၤ, ပဘၣ်သူခိၣ်နူာ်ဒီး ဂံၢ်ဘါခံမံၤလၢာ်မ့ၢ်ဂ့ၤ ပကဘၣ်သ့ၣ်ညါလၢပ “မၤတၢ်ဖံးတၢ်ခဲလၢာ်န့ၣ် အိၣ်ဒီးအဘျုးလီၤ.” (ကတိၤဒိ ၁၄:၂၃) လၢကျဲဒ်လဲၣ်. အဘျုးတမံၤန့ၣ် ပမ့ၢ်မၤတၢ်ဆူၣ်ဆူၣ်န့ၣ် ပကအီၣ်ဘၣ်အီဘၣ် ဒီးဒိးန့ၢ်ဘၣ်တၢ်လၢပလိၣ်ဘၣ်လီၤ. ကစၢ်ယွၤအၢၣ်လီၤဝဲလၢ ကမၤလၢပှဲၤပှၤလၢ အဘူၣ်ထီၣ်ဘါထီၣ်အီၤတဖၣ် အတၢ်လိၣ်ဘၣ်လီၤ. (မးသဲ ၆:၃၁, ၃၂) ဘၣ်ဆၣ် အဝဲမုၢ်လၢ်ဝဲလၢ ပကဂုာ်ကျဲးစၢးမၤတၢ် တီတီလိၤလိၤလီၤ.—၂ သ့းစၤလနံ ၃:၁၀.
ပကဘၣ်ထံၣ် ပတၢ်မၤဒ် တၢ်လၢကမၤစၢၤပှၤ ဒ်သိးပကတုၤဆူ ပဖီတၢၣ်န့ၣ်လီၤ. တၢ်မၤန့ၣ် မ့ၢ်ကျဲတဘိလၢ ပကမၤလၢပှဲၤ ပမူဒါတဖၣ်အဂီၢ်လီၤ. ကၠီးၡူဝၤ လၢအသးအိၣ် ၂၅ နံၣ်တဂၤစံးဝဲလၢ “နဆၢထၢၣ်လၢ နခီၣ်မ့ၢ်သ့န့ၣ် မ့ၢ်တၢ်လၢ အလီၢ်သူၣ်မံသးမုာ်လီၤ. နမ့ၢ်ဂုာ်ကျဲးစၢးမၤတၢ်ဆူၣ်ဆူၣ်န့ၣ် တလိၣ်နဃ့ပှၤဂၤ အတၢ်မၤစၢၤလၢၤဘၣ်.”
အါန့ၢ်အန့ၣ် နမ့ၢ်မၤတၢ်ဆူၣ်ဆူၣ်န့ၣ် နကအိၣ်ဒီးတၢ်ပာ်ကဲလီၤက့ၤနသးလီၤ. ပမ့ၢ်မၤတၢ်ဆူၣ်ဆူၣ်န့ၣ် ပကလီၤဘှံးလီၤ. ဘၣ်ဆၣ် ပမ့ၢ်ပာ်ဆူၣ်ပသးလၢ ပတၢ်မၤအပူၤန့ၣ် ပတၢ်မၤ မ့ၢ်လီၤကၢၣ်ဘၣ်ပှၤ မ့တမ့ၢ် မ့ၢ်ကီခဲလၢ ပဂီၢ်ဒၣ်လဲာ် ပကမၤတုၤအဝံၤဒီး ပကအိၣ်ဒီး တၢ်သူၣ်မံသးမံ ဒီးပကမၤနၢၤ တၢ်ဝံတၢ်ကၢၣ်န့ၣ်လီၤ. (ကတိၤဒိ ၂၆:၁၄) တကးဒံးဘၣ် နကအိၣ်ဒီး တၢ်သူၣ်ခုသးခုလၢ တၢ်မၤအပူၤလီၤ. အ့ၣ်ရိၣ် လၢဘၣ်တၢ်ပာ်ဖျါထီၣ်အဂ့ၢ်လၢ ထးတဂၤစံးဝဲလၢ “ယမၤတၢ်ဒီတနံၤအဃိ ယလီၤဘှံးညါ. ဘၣ်သ့ၣ်သ့ၣ် တမ့ၢ်လၢ ပှၤကသ့ၣ်ညါထွဲ နီတဂၤဘၣ်. ဘၣ်ဆၣ် ယဘၣ်သူၣ်ဘၣ်သး တၢ်တူၢ်ဘၣ်လၢ ယမၤတၢ်မၤဝံၤလံမၢၣ်.”
မၤနတၢ်မၤလၢ တၢ်သူၣ်ဆူၣ်သးဆူၣ်အပူၤတက့ၢ်
လံာ်စီဆှံ ပာ်ဖျါထီၣ်ဝဲ ပိာ်ခွါလၢ “အခု” ဒီး ပိာ်မုၣ်လၢ “မၤဒၣ်တၢ်လၢအစု” အဂ့ၢ်န့ၣ်လီၤ. (ကတိၤဒိ ၂၂:၂၉; ၃၁:၁၃) တၢ်ဖံးတၢ်မၤန့ၣ် ပှၤတသ့ထီၣ်အီၤ တဘျီဃီဘၣ်. တၢ်ဖံးတၢ်မၤလၢ ပမၤတသ့ဂ့ၤဂ့ၤတခါန့ၣ် ပတအဲၣ်ဒိးမၤဘၣ်. ပှၤအါဂၤ တဒိးန့ၢ်ဘၣ် တၢ်သူၣ်မံသးမံလၢ အတၢ်မၤအပူၤန့ၣ် ဘၣ်သ့ၣ်သ့ၣ် ကမ့ၢ်လၢ တဂုာ်ကျဲးစၢးမၤတၢ် တုၤအမၤဝဲသ့ ဂ့ၤဂ့ၤဘၣ်အဃိလီၤ.
နီၢ်နီၢ်, တၢ်မၤတခါဂ့ၤတခါဂ့ၤ နမ့ၢ်မၤလိပာ်အီၤဂ့ၤဂ့ၤန့ၣ် နအိၣ်ဒီးတၢ်သူၣ်ခုသးခုလၢ နတၢ်ဖံးတၢ်မၤ ကိးမံၤဒဲးအပူၤသ့ဝဲလီၤ. ဝ့လံယၢၤ လၢအသးအိၣ် ၂၄ နံၣ်တဂၤစံးဝဲလၢ “တၢ်ဖံးတၢ်မၤလၢ နမၤအီၤန့ၣ် နမ့ၢ်မၤအီၤ အဂ့ၤကတၢၢ်ဒီး ဖဲနထံၣ်ဘၣ် အကဲဘျုးဒ်လဲၣ်အခါ နကအိၣ်ဒီး တၢ်သူၣ်မံသးမုာ်လီၤ. နမ့ၢ်မၤဝံၤတၢ်မံၤန့ၣ် နတအိၣ်ဒီး တၢ်သူၣ်မံသးမံဘၣ်.”
သ့ၣ်ညါလၢ နတၢ်မၤန့ၣ် အဘျုးအိၣ်လၢ ပှၤဂၤအဂီၢ်တက့ၢ်
တဘၣ်ဆိကမိၣ်ထဲလၢ နဒိးန့ၢ်ဘၣ်စ့ထဲလဲၣ် အဂ့ၢ်န့ၣ်တဂ့ၤ. လၢတၢ်န့ၣ်အလီၢ် သံကွၢ်လီၤနသးလၢ ‘ဘၣ်မနုၤအဃိ တၢ်ဖံးတၢ်မၤအံၤ မ့ၢ်တၢ်လၢအရ့ဒိၣ်လဲၣ်. တၢ်မၤအံၤ မ့ၢ်တဝံၤ မ့တမ့ၢ် မ့ၢ်တဝံၤဂ့ၤဂ့ၤဘၣ်န့ၣ် တၢ်ကကဲထီၣ်အသးဒ်လဲၣ်. ယတၢ်မၤအံၤ အဘျုးကအိၣ်လၢ ပှၤဂၤအဂီၢ်ဒ်လဲၣ်.’
တၢ်သံကွၢ် လၢခံကတၢၢ်တခါန့ၣ် ကြၢးလၢပဆိကမိၣ်အီၤလီၤ. မ့ၢ်လၢ ဖဲပထံၣ်ဘၣ်လၢ ပတၢ်ဖံးတၢ်မၤ ကဲဘျုးလၢ ပှၤဂၤအဂီၢ်အခါ ပအိၣ်ဒီး တၢ်သူၣ်ခုသးခုအဃိလီၤ. ယ့ၣ်ၡူး အနီၢ်ကစၢ်ဒၣ်ဝဲ စံးဝဲလၢ– “ဟ့ၣ်တၢ်န့ၣ်ဘၣ် တၢ်ဆိၣ်ဂ့ၤအါန့ၢ်ဒိးန့ၢ် တၢ်တက့ၢ်လီၤ.” (မၤတၢ် ၂၀:၃၅) ပှၤလၢအဒိးန့ၢ်ဘၣ် အဘျုးလၢ ပတၢ်ဂုာ်ကျဲးစၢးန့ၣ် မ့ၢ်တၢ်မၤကစၢ်ဒီး ပှၤပှ့ၤတၢ်ဖိတဖၣ်လီၤ. တကးဒံးဘၣ် ပဟံၣ်ဖိဃီဖိဒီး ပှၤလၢအလိၣ်ဘၣ် တၢ်မၤစၢၤတဖၣ်စ့ၢ်ကီး ဒိးန့ၢ်ဘၣ်အဘျုးလီၤ.
ပဟံၣ်ဖိဃီဖိတဖၣ်. ဖဲဟံၣ်ခိၣ်တဂၤ ဂုာ်ကျဲးစၢးမၤတၢ်အခါ အစှၤကတၢၢ် အဘျုးအိၣ်လၢ ကျဲခံမံၤလီၤ. တၢတမံၤန့ၣ် အဝဲအဟံၣ်ဖိဃီဖိတဖၣ် ကအီၣ်ဘၣ်အီဘၣ်, ကကူဘၣ်သိးဘၣ် ဒီးကအိၣ်ဘၣ်ဂ့ၤဂ့ၤလီၤ. ဒီးအဝဲ မၤလၢပှဲၤဝဲ အမူဒါလၢ ကစၢ်ယွၤဟ့ၣ်အီၤ လၢအမ့ၢ် ကဘၣ်အံးထွဲကွၢ်ထွဲဝဲ “အတၢ်ဒၣ်ဝဲ” လီၤ. (၁ တံၤမသ့း ၅:၈) ခံမံၤတမံၤ တၢ်ဂုာ်ကျဲးစၢး မ့ၢ်တၢ်လၢအရ့ဒိၣ်ဝဲန့ၣ် ဟံၣ်ခိၣ်လၢ အမၤတၢ်ဆူၣ်တဂၤ သိၣ်လိဝဲအဟံၣ်ဖိဃီဖိတဖၣ် ခီဖျိလၢအဒိအတဲာ်လီၤ. ၡ့ လၢဘၣ်တၢ်တဲဖျါတ့ၢ် အဂ့ၢ် လၢညါတဂၤ စံးဝဲလၢ “ယပါမ့ၢ် ပှၤဒိဂ့ၤတဲာ်ဘၣ်ဖးဒိၣ် လၢတၢ်မၤအပူၤလီၤ. အဝဲမ့ၢ် ပှၤလၢအမၤတၢ်တီတီ ဒီးမၤတၢ်ဆူၣ်လၢ အတၢ်အိၣ်မူ ဒီတကတီၢ်အပူၤလီၤ. အဝဲမ့ၢ် ပှၤစုသ့ဖိတဂၤလီၤ. ယသ့ၣ်ညါဘၣ် တၢ်မၤတၢ်လၢစု အဘျုးအဖှိၣ် ဒီးယမၤတၢ်ပီးတၢ်လီလၢ ပှၤသူအီၤသ့တဖၣ် သ့ထီၣ်လီၤ.”
ပှၤလၢအလိၣ်ဘၣ် တၢ်မၤစၢၤတဖၣ်. တၢ်မၢဖိပီလူး ဟ့ၣ်ကူၣ်ဝဲ ခရံာ်ဖိတဖၣ်လၢ “ဒ်သိးအကဟ့ၣ်နီၤတၢ်လၢ ပှၤဖှီၣ်ဖိယာ်ဖိဒီး မ်အကျဲးစၢး မၤတၢ်ဂ့ၤလၢအစု သပှၢ်ပှၢ်တက့ၢ်.” (အ့းဖ့းစူး ၄:၂၈) ပမ့ၢ်ဂုာ်ကျဲးစၢး မၤတၢ်ဆူၣ်ဆူၣ်န့ၣ် ပလုၢ်အီၣ်လုၢ်အီ ပဟံၣ်ဖိဃီဖိကန့ၢ်ဝဲဂ့ၤဂ့ၤ တကးဒံးဘၣ် ပမၤစၢၤပှၤဂၤ ကန့ၢ်စ့ၢ်ကီးလီၤ. (ကတိၤဒိ ၃:၂၇) ပမ့ၢ်အဲၣ်ဒိး ဒိးန့ၢ်ဘၣ် တၢ်သးခု ခီဖျိပဟ့ၣ်တၢ်န့ၣ် ပကဘၣ် မၤတၢ်ဆူၣ်ဆူၣ်လီၤ.
လဲၤယုၤအီၤခံတီၤလဲၤ
ယ့ၣ်ၡူး အတၢ်စံၣ်တဲၤတဲလီၤတၢ်လၢ တၢ်လူၢ်ခိၣ်န့ၣ် စံးဝဲလၢ– “ဒီးဖဲဒၣ်ပှၤလၢအမၢဆူၣ်နလဲၤဒီးအီၤ တတီၤလဲၤန့ၣ် လဲၤယုၤအီၤခံတီၤလဲၤတက့ၢ်.” (မးသဲ ၅:၄၁) နမၤထွဲတၢ်ဟ့ၣ်ကူၣ်အံၤ လၢနတၢ်မၤအပူၤ ကသ့ဒ်လဲၣ်. တဘၣ်မၤထဲ ပှၤမၢနမၤန့ၣ်တဂ့ၤ, ဃုကျဲဒ်သိး နမၤအါန့ၢ်အလီၢ် ကသ့န့ၣ်တက့ၢ်. ပာ်လီၤဖီတၢၣ်တဖၣ်တက့ၢ်. ပာ်ဆူၣ်နသး ဒ်သိးနကမၤတၢ် ဂ့ၤန့ၢ်အလီၢ် မ့တမ့ၢ် ချ့န့ၢ်အလီၢ်တက့ၢ်. မၤတၢ်မၤ တုၤလီၤတီၤလီၤတက့ၢ်.
နမ့ၢ်မၤတၢ်အါန့ၢ်ဒံး ပှၤမၢနမၤန့ၣ် နကအိၣ်ဒီး တၢ်သးခုလၢ နတၢ်မၤအပူၤလီၤ. ဘၣ်မနုၤအဃိလဲၣ်. မ့ၢ်လၢနမၤတၢ်လၢ နသးဒၣ်ဝဲအဃိ ဒီးတမ့ၢ်လၢ ပှၤမၢဆူၣ်နၤဘၣ် အဃိလီၤ. (ဖံၤလ့မိၣ် ၁၄) ပကဘၣ် သ့ၣ်နီၣ်ထီၣ်က့ၤ တၢ်ကတိၤဖဲ ကတိၤဒိ ၁၂:၂၄ လၢအစံးဝဲ– “ပှၤအခုအစုန့ၣ် ကပၢတၢ်လီၤ. မ့မ့ၢ်ပှၤအကၢၣ်န့ၣ် ကဘၣ်ဟ့ၣ်သွဲလီၤ.” ဆၢကတီၢ်ခဲအံၤ ပှၤဘၣ်ကဲကုၢ် မ့တမ့ၢ် ပှၤဘၣ်တၢ်မၢဆူၣ်အီၤန့ၣ် တအိၣ်ကဲၣ်ဆိးဘၣ်. ဘၣ်ဆၣ် ပှၤတဂၤလၢ အမၤထဲဒၣ် ပှၤမၢအီၤန့ၣ် ကတူၢ်ဘၣ်ဝဲလၢ အကဲပှၤကုၢ်န့ၣ်လီၤ. ပှၤလၢမၤဝဲ အါန့ၢ်ဒံးပှၤမၢအီၤန့ၣ် မ့ၢ်လၢမၤဝဲလၢ အသးဒၣ်ဝဲအဃိ တူၢ်ဘၣ်ဝဲလၢ ပၢလီၤက့ၤအသးဒၣ်ဝဲလီၤ.
ပာ်တၢ်မၤလၢ အလီၢ်ဒၣ်ဝဲ
တၢ်ဂုာ်ကျဲးစၢးမၤတၢ်န့ၣ် လီၤပတြၢၤဒိၣ်မးလီၤ. ဘၣ်ဆၣ် ပကဘၣ်သ့ၣ်နီၣ်ထီၣ်လၢ ပသးသမူန့ၣ် အရ့ဒိၣ်န့ၢ်ဒံး တၢ်မၤလီၤ. လံာ်စီဆှံ ဟံၣ်ဂံၢ်ဟ့ၣ်ဘါပှၤလၢ ပကဘၣ်ခုဖံးခုမၤလီၤ. (ကတိၤဒိ ၁၃:၄) ဘၣ်ဆၣ်တၢ်အံၤတအဲၣ်ဒိးစံးဝဲလၢ ပကဘၣ်မၤထဲတၢ်မၤ ဒီးကဲထီၣ် တၢ်မၤအကုၢ်န့ၣ်ဘၣ်. စံၣ်တဲၤတဲလီၤတၢ် ၄:၆ စံးဝဲလၢ– “တၢ်အိၣ်ဘှံးပှဲၤပစုတတၢၤဒုၣ်ဂ့ၤန့ၢ် တၢ်ဖံးတၢ်မၤဒီး တၢ်ဂုာ်မၤန့ၢ်ကလံၤပှဲၤ ပစုခံတၢၤဒုၣ်တက့ၢ်လီၤ.” ဟ့ၣ်ပှၤတၢ်မၤလိမနုၤလဲၣ်. ပှၤလၢအကဲ တၢ်မၤအကုၢ်န့ၣ် ဂုာ်ကျဲးစၢးဟ့ၣ်လီၤ အတၢ်ဆၢကတီၢ်ဒီး အဂံၢ်အဘါထဲလဲၣ် သနာ်က့ တဒိးန့ၢ်ဘၣ်တၢ်သးခုလၢ အတၢ်မၤနီတဘျီဘၣ်. အဃိ အတၢ်မၤန့ၣ် “မ့ၢ်တၢ်ကလီကလီ” ဒ်ဃဲာ်ပဲာ်ထံအလီၢ်တဖျါဘၣ် အသိးလီၤ.
လံာ်စီဆှံ ဟ့ၣ်ကူၣ်ပှၤလၢ ဘၣ်ဃးဒီး တၢ်ဖံးတၢ်မၤန့ၣ် ပကဘၣ်အိၣ်ဒီး တၢ်ထံၣ်လၢ အကြၢးအဘၣ်လီၤ. လံာ်စီဆှံ ဟ့ၣ်ကူၣ်ပှၤလၢ ပကဘၣ်ခုဖံးခုမၤ သနာ်က့ ပကဘၣ်သ့ၣ်ညါ ‘နီၤဖးတၢ်လၢ အရ့ဒိၣ်တဖၣ်’ လီၤ. (ဖံလံးပံၤ ၁:၁၀) တၢ်လၢအရ့ဒိၣ်တဖၣ်န့ၣ် ကမ့ၢ်မနုၤလဲၣ်. မ့ၢ်ဝဲ တၢ်ဟ့ၣ် တၢ်ဆၢကတီၢ်လၢ ဟံၣ်ဖိဃီဖိဒီး တံၤဖိသကိးဖိအဂီၢ်လီၤ. တၢ်လၢအရ့ဒိၣ်န့ၢ်ဒံး တၢ်အံၤန့ၣ် မ့ၢ်ဝဲနီၢ်သး အတၢ်ဖံးတၢ်မၤတဖၣ် ဒ်သိးဒီး တၢ်ဖးလံာ်စီဆှံ ဒီးဆိကမိၣ်ထံက့ၤအီၤန့ၣ်လီၤ.
ပမ့ၢ်အိၣ်ဒီးတၢ်ထံၣ် အကြၢးအဘၣ်လၢ ပတၢ်ဖံးတၢ်မၤအဖီခိၣ်န့ၣ် ပကအိၣ်ဒီး တၢ်သူၣ်ခုသးခု လၢပတၢ်မၤအဖီခိၣ်လီၤ. ဝ့လံယၢၤ စံးဝဲလၢ “ယတၢ်မၤကစၢ်န့ၣ် အဒိဂ့ၤတဲာ်ဘၣ်ခီဖျိ အိၣ်ဒီးတၢ်ထံၣ်လၢ အကြၢးအဘၣ်လၢ အတၢ်မၤအဖီခိၣ်အဃိလီၤ. အဝဲမၤတၢ်ဆူၣ်မး ဒီးအိၣ်ဒီးတၢ်သ့တၢ်ဘၣ်လၢ အတၢ်မၤအဖီခိၣ်အဃိ ပှၤလၢအဟဲမၤသကိး ဃုာ်တၢ်ဒီးအီၤန့ၣ် သူၣ်မံသးမုာ်ဝဲဒိၣ်မးလီၤ. ဘၣ်ဆၣ် တၢ်မၤလၢအဘၣ်မၤဝဲ တနံၤအဂီၢ်တနံၤအဂီၢ်ဝံၤအခါ တဖၢနုာ်ဝဲတၢ်ဖံးတၢ်မၤအဂ့ၢ် လၢအခိၣ်နူာ်ပူၤလၢၤဘၣ်. မ့ၢ်လၢအဝဲသ့ၣ်ညါဝဲလၢ ကဘၣ်ဟ့ၣ်တၢ်ဆၢကတီၢ်လၢ အဟံၣ်ဖိဃီဖိဒီး ကဘၣ်သးစၢၢ်ဆၢဝဲ အဟံၣ်ဖိဃီဖိ တၢ်မၤလိလံာ်စီဆှံအဃိန့ၣ်လီၤ. ပှၤလၢယသ့ၣ်ညါခဲလၢာ်အကျါန့ၣ် အဝဲမ့ၢ်ပှၤလၢ အသူၣ်ခုသးခု ဒိၣ်ကတၢၢ်လီၤ.”
[တၢ်လွံၢ်နၢၣ်လၢ ကဘျံပၤ ၅]
ဘၣ်ဃးဒီး တၢ်ဂုာ်ကျဲးစၢးမၤတၢ်န့ၣ် အဝဲသ့ၣ်အတၢ်ထံၣ်အိၣ်ဒ်လဲၣ်
နံး(ခ်) စံးဝဲလၢ— “ဖဲယဂုာ်ကျဲးစၢး မၤတၢ်ဒီတနံၤဝံၤအလီၢ်ခံ ယတူၢ်ဘၣ်လၢ ယတၢ်မၤဝံၤလံဒီး ယသးခုလီၤ. တနံၤအံၤ ယမၤတ့ၢ်တၢ်ဂ့ၤဂ့ၤလီၤမၢၣ်.”
ခရံး(စ်)ၡ့ၣ် စံးဝဲလၢ— “တၢ်ဂုာ်ကျဲးစၢး မၤတၢ်ဆူၣ်ဆူၣ်န့ၣ် အခီပညီမ့ၢ်ပမၤ ပတၢ်ဖံးတၢ်မၤလၢ အဂ့ၤကတၢၢ်လီၤ. နမ့ၢ်ကမၤတၢ်လၢ အဘျုးအိၣ် တမံၤမံၤန့ၣ် မၤအီၤလၢ အဆိအချ့တက့ၢ်.”
ဒ့ဘ့း စံးဝဲလၢ— “ပနီၢ်ခိအံၤ မၤတၢ်မၤလၢ အလီၤကမၢကမၣ်သ့ဝဲလီၤ. ယအဲၣ်ဒိးပာ်ဖျါထီၣ် ယတၢ်စံးဘျုးစံးဖှိၣ် ကစၢ်ယွၤလၢ အဟ့ၣ်ယၤသးသမူ ခီဖျိယသူယနီၢ်ခိလၢ ယကဂုာ်ကျဲးစၢး မၤတၢ်ဆူၣ်ဆူၣ် ဒီးမၤစၢၤပှၤဂၤန့ၣ်လီၤ.”
(စံၣ်တဲၤတဲလီၤတၢ် ၄:၆) တၢ်အိၣ်ဘှံးပှဲၤပစုတတၢၤဒုၣ်ဂ့ၤန့ၢ် တၢ်ဖံးတၢ်မၤဒီး တၢ်ဂုာ်မၤန့ၢ်ကလံၤပှဲၤ ပစုခံတၢၤဒုၣ်တက့ၢ်လီၤ.
တၢး၁၅ ၂/၁ ကဘျံးပၤ ၆ အဆၢ ၃-၅
ပမုာ်လၤတၢ်ဂ့ၤလၢ တၢ်မၤအပူၤကသ့ဒ်လဲၣ်
ပာ်တၢ်မၤလၢ အလီၢ်ဒၣ်ဝဲ
တၢ်ဂုာ်ကျဲးစၢးမၤတၢ်န့ၣ် လီၤပတြၢၤဒိၣ်မးလီၤ. ဘၣ်ဆၣ် ပကဘၣ်သ့ၣ်နီၣ်ထီၣ်လၢ ပသးသမူန့ၣ် အရ့ဒိၣ်န့ၢ်ဒံးတၢ်မၤလီၤ. လံာ်စီဆှံ ဟံၣ်ဂံၢ်ဟ့ၣ်ဘါပှၤလၢ ပကဘၣ်ခုဖံးခုမၤလီၤ. (ကတိၤဒိ ၁၃:၄) တၢ်အံၤတအဲၣ်ဒိးစံးဝဲလၢ ပကဘၣ်မၤထဲတၢ်မၤ ဒီးကဲထီၣ်တၢ်မၤအကုၢ်န့ၣ်ဘၣ်. စံၣ်တဲၤတဲလီၤတၢ် ၄:၆ စံးဝဲလၢ– “တၢ်အိၣ်ဘှံးပှဲၤပစုတတၢၤဒုၣ်ဂ့ၤန့ၢ် တၢ်ဖံးတၢ်မၤဒီး တၢ်ဂုာ်မၤန့ၢ်ကလံၤပှဲၤ ပစုခံတၢၤဒုၣ်တက့ၢ်လီၤ.” ဟ့ၣ်ပှၤတၢ်မၤလိမနုၤလဲၣ်. ပှၤလၢအကဲ တၢ်မၤအကုၢ်န့ၣ် ဂုာ်ကျဲးစၢးဟ့ၣ်လီၤ အတၢ်ဆၢကတီၢ်ဒီး အဂံၢ်အဘါထဲလဲၣ် သနာ်က့ တဒိးန့ၢ်ဘၣ်တၢ်သးခုလၢ အတၢ်မၤနီတဘျီဘၣ်. အဃိ အတၢ်မၤန့ၣ် “မ့ၢ်တၢ်ကလီကလီ” ဒ်ဃဲာ်ပဲာ်ထံအလီၢ်တဖျါဘၣ်အသိးလီၤ.
လံာ်စီဆှံ ဟ့ၣ်ကူၣ်ပှၤလၢ ဘၣ်ဃးဒီးတၢ်ဖံးတၢ်မၤန့ၣ် ပကဘၣ်အိၣ်ဒီးတၢ်ထံၣ်လၢ အကြၢးအဘၣ်လီၤ. လံာ်စီဆှံ ဟ့ၣ်ကူၣ်ပှၤလၢ ပကဘၣ်ခုဖံးခုမၤသနာ်က့ ပကဘၣ်သ့ၣ်ညါ ‘နီၤဖးတၢ်လၢ အရ့ဒိၣ်တဖၣ်’ လီၤ. (ဖံလံးပံၤ ၁:၁၀) တၢ်လၢအရ့ဒိၣ်တဖၣ်န့ၣ် ကမ့ၢ်မနုၤလဲၣ်. မ့ၢ်ဝဲတၢ်ဟ့ၣ်တၢ်ဆၢကတီၢ်လၢ ဟံၣ်ဖိဃီဖိဒီး တံၤဖိသကိးဖိအဂီၢ်လီၤ. တၢ်လၢအရ့ဒိၣ်န့ၢ်ဒံးတၢ်အံၤန့ၣ် မ့ၢ်ဝဲနီၢ်သး အတၢ်ဖံးတၢ်မၤတဖၣ် ဒ်သိးဒီး တၢ်ဖးလံာ်စီဆှံ ဒီးဆိကမိၣ်ထံက့ၤအီၤန့ၣ်လီၤ.
ပမ့ၢ်အိၣ်ဒီးတၢ်ထံၣ် အကြၢးအဘၣ်လၢ ပတၢ်ဖံးတၢ်မၤအဖီခိၣ်န့ၣ် ပကအိၣ်ဒီးတၢ်သူၣ်ခုသးခု လၢပတၢ်မၤအဖီခိၣ်လီၤ. ဝ့လံယၢၤ စံးဝဲလၢ “ယတၢ်မၤကစၢ်န့ၣ် အဒိဂ့ၤတဲာ်ဘၣ်ခီဖျိ အိၣ်ဒီးတၢ်ထံၣ်လၢ အကြၢးအဘၣ်လၢ အတၢ်မၤအဖီခိၣ်အဃိလီၤ. အဝဲမၤတၢ်ဆူၣ်မး ဒီးအိၣ်ဒီးတၢ်သ့တၢ်ဘၣ်လၢ အတၢ်မၤအဖီခိၣ်အဃိ ပှၤလၢအဟဲမၤသကိးဃုာ်တၢ်ဒီးအီၤန့ၣ် သူၣ်မံသးမုာ်ဝဲဒိၣ်မးလီၤ. ဘၣ်ဆၣ် တၢ်မၤလၢအဘၣ်မၤဝဲ တနံၤအဂီၢ်တနံၤအဂီၢ်ဝံၤအခါ တဖၢနုာ်ဝဲတၢ်ဖံးတၢ်မၤအဂ့ၢ် လၢအခိၣ်နူာ်ပူၤလၢၤဘၣ်. မ့ၢ်လၢအဝဲသ့ၣ်ညါဝဲလၢ ကဘၣ်ဟ့ၣ်တၢ်ဆၢကတီၢ်လၢ အဟံၣ်ဖိဃီဖိဒီး ကဘၣ်သးစၢၢ်ဆၢ ဝဲအဟံၣ်ဖိဃီဖိ တၢ်မၤလိလံာ်စီဆှံအဃိန့ၣ်လီၤ. ပှၤလၢယသ့ၣ်ညါခဲလၢာ်အကျါန့ၣ် အဝဲမ့ၢ်ပှၤလၢ အသူၣ်ခုသးခုဒိၣ်ကတၢၢ်လီၤ.”
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(စံၣ်တဲၤတဲလီၤတၢ် ၂:၁၀, ၁၁) ဒီးကယဲၢ်တၢ်လၢ ယမဲာ်ဆၢတၢ်န့ၣ် ယဒုးန့ၢ်ဘၣ်အီၤ, ယတတြီယသးလၢ တၢ်ဒုးခုယသးနီတမံၤဘၣ်. အဂ့ၢ်ဒ်အံၤ, ယသးခုလၢ ယမၤတၢ်ခဲလၢာ်အပူၤ, ဒီးအဝဲန့ၣ် မ့ၢ်ယဂီၢ်လၢ ယမၤတၢ်အဃိလီၤ. ၁၁ ဒီးယကွၢ်ကယဲၢ်တၢ်မၤလၢ ယစုမၤဝဲ, ဒီးတၢ်မၤလၢယမၤဒီး တၢ်ဘှံးယသး, ဒီးကွၢ်ကွၢ်, ကယဲၢ်တၢ်ခဲလၢာ် မ့ၢ်တၢ်ကလီကလီ, ဒီးတၢ်မၤ တဂိာ်တသီၣ်ဘၣ်တၢ်ဘၣ်, ဒီးတၢ်ဘျုးတၢ်ဖှိၣ် တအိၣ်ဘၣ်လၢ မုၢ်အဖီလာ်ဘၣ်.
တၢး၀၈ ၄/၁၅ ကဘျံးပၤ ၂၂ အဆၢ ၉-၁၀
တၢ်လၢကဒုးအိၣ်ထီၣ် ပတၢ်အိၣ်မူအခီပညီန့ၣ် ကမ့ၢ်မနုၤလဲၣ်
တၢ်ထူးတၢ်တီၤ ကဟ့ၣ်ပှၤတၢ်သူၣ်မံသးမုာ်ဧါ.
၉ ဖဲစီၤၡလိၤမိၤ ကွဲးဝဲစံၣ်တဲၤတဲလီၤတၢ်အခါ အဝဲမ့ၢ် ပှၤကဲဒိၣ်ကတၢၢ်လၢ ဟီၣ်ခိၣ်ချၢလီၤ. (၂ ကွဲးနီၣ်တၢ် ၉:၂၂) တၢ်လၢ အဲၣ်ဒိးဝဲခဲလၢာ်န့ၣ် ဒိးန့ၢ်ဘၣ်ဝဲလီၤ. အဝဲကွဲးဝဲလၢ “ဒီးကယဲၢ်တၢ်လၢ ယမဲာ်ဆၢတၢ်န့ၣ် ယဒုးန့ၢ်ဘၣ်အီၤ, ယတတြီယသးလၢ တၢ်ဒုးခုယသးနီတမံၤဘၣ်.” (စံၣ်တဲၤတဲလီၤတၢ် ၂:၁၀) အဝဲသ့ၣ်ညါဘၣ်ဝဲလၢ တၢ်ထူးတၢ်တီၤန့ၣ် တဟ့ၣ်ပှၤ တၢ်သူၣ်မံသးမုာ်ဘၣ်. အဝဲအၢၣ်လီၤတူၢ်လိာ်ဝဲလၢ “ပှၤလၢအအဲၣ်စ့န့ၣ် အသးတမံဘၣ်လၢ စ့အဃိဘၣ်, ဒီးပှၤလၢအအဲၣ် တၢ်အစုလီၢ်အခီၣ်ခိၣ်န့ၣ် အသးတမံဘၣ်လၢ တၢ်အါအဃိဘၣ်.”—စံၣ်တဲၤတဲလီၤတၢ် ၅:၁၀.
၁၀ တၢ်ထူးတၢ်တီၤန့ၣ် အိၣ်ဒၣ်တစိၢ်တလီၢ် သနာ်က့ မ့ၢ်ဒံးတၢ်လၢအထုးန့ၢ်ပှၤသးဒိၣ်မးလီၤ. ပူၤကွံာ်တယံာ်ဒံးဘၣ် ဖဲကီၢ်အမဲရကၤန့ၣ် ပှၤသံကွၢ် ကၠိဖိတဖၣ်လၢ အထီၣ်ဖၠၣ်စိမိၤ အခီၣ်ထံးတနံၣ်တဖၣ် အတၢ်တိာ်ပာ်အိၣ်ဒ်လဲၣ်န့ၣ်လီၤ. ကၠိဖိ ၇၅ မျးကယၤ စံးဆၢဝဲလၢ အဝဲသ့ၣ်အဖီတၢၣ်မ့ၢ် “ကဃုကျိၣ်စ့အါအါ လၢကကဲဒိၣ်အဂီၢ်လီၤ.” အဝဲသ့ၣ်မ့ၢ်တုၤလၢ အဖီတၢၣ်ဒၣ်လဲာ် ကအိၣ်ဒီးတၢ်သူၣ်ခုသးခု နီၢ်နီၢ်ဧါ. တအိၣ်ဘၣ်. တၢ်လူၤ တၢ်ထူးတၢ်တီၤန့ၣ် ကဲထီၣ် တၢ်တြီမၤတံာ်တာ်လၢ တၢ်သူၣ်ခုသးခု ဒီးတၢ်သူၣ်မံသးမုာ်အဂီၢ်လီၤ. လၢပူၤကွံာ် အနံၣ်တဖၣ်လံၤလံၤန့ၣ် စီၤၡလိၤမိၤစ့ၢ်ကီး အၢၣ်လီၤတူၢ်လိာ်ဝဲ ဒ်အံၤလီၤ. အဝဲကွဲးဝဲလၢ– “ဒီးယပာ်ဖှိၣ်ကျိၣ်ဧိၤစ့ဧိၤ, ဒီးထူဧိၤလွဲဧိၤ, ဒီးတၢ်လုၢ်ဒိၣ်ပှ့ၤဒိၣ်ဘၣ်ဃးဒီး စီၤပၤဒီးထံဧိၤကီၢ်ဧိၤတဖၣ်လီၤ. . . . ဒီးကွၢ်ကွၢ်, ကယဲၢ်တၢ်ခဲလၢာ် မ့ၢ်တၢ်ကလီကလီ” လီၤ. (စံၣ်တဲၤတဲလီၤတၢ် ၂:၈, ၁၁) လၢပတၢ်အိၣ်မူအပူၤ ပမ့ၢ်မၤယဟိဝၤယွၤ အတၢ်မၤလၢ ပသးဒီဖျၢၣ် ဒီးဒိးန့ၢ်ဘၣ် အတၢ်ဆိၣ်ဂ့ၤန့ၣ် ပကဒိးန့ၢ်ဘၣ် တၢ်ထူးတၢ်တီၤနီၢ်နီၢ်လီၤ.—ဖး ကတိၤဒိ ၁၀:၂၂ တက့ၢ်.
(စံၣ်တဲၤတဲလီၤတၢ် ၃:၁၆, ၁၇) မၤကဒီးတစု, ယကွၢ်တၢ်လၢ မုၢ်အဖီလာ်, လၢတၢ်စံၣ်ညီၣ်အလီၢ်, ဒီးတၢ်တတီတလိၤအိၣ်ဖဲန့ၣ်, ဒီးဖဲတၢ်တီတၢ်လိၤအလီၢ်န့ၣ် တၢ်အၢတၢ်သီအိၣ်ဝဲလီၤ. ၁၇ ယစံးလၢယသးကံၢ်ပူၤ, ယွၤကစံၣ်ညီၣ်ပှၤတီ, ဒီပှၤတတီဘၣ်လီၤ. အဂ့ၢ်ဒ်အံၤ, အဆၢအကတီၢ်အိၣ်ဖဲန့ၣ် လၢကယဲၢ်တၢ်ကူၣ်တၢ်ဖးဒီး တၢ်ဖံးတၢ်မၤတမံၤလၢ်လၢ် အဂီၢ်န့ၣ်လီၤ.
တၢး၀၆ ၁၁/၁ ကဘျံးပၤ ၁၄ အဆၢ ၉
လံာ်စီဆှံ အတၢ်ပာ်ဖျါလၢ လံာ်စံၣ်တဲၤတဲလီၤတၢ်
၃:၁၆, ၁၇. ပမုၢ်လၢ်လၢ တၢ်ခဲလၢာ်ကမၤအသးတီတီလိၤလိၤန့ၣ် တသ့ဝဲဘၣ်. အဃိပတကြၢးသူၣ်ကိၢ်သးဂီၤလၢ တၢ်မၤအသးတဖၣ်လၢ ဟီၣ်ခိၣ်အံၤဘၣ်. လၢတၢ်န့ၣ်အလီၢ် ပကြၢးအိၣ်ခိးတၢ်ဆၢကတီၢ်လၢ ယဟိဝၤယွၤ ကမၤဘၣ်လိာ်က့ၤ တၢ်ကီတၢ်ခဲတဖၣ်န့ၣ်လီၤ.
လါနိၣ်ဝ့ဘၢၣ် ၂၁–၂၇
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | စံၣ်တဲၤတဲလီၤတၢ် ၇-၁၂
“လၢနသးစၢ်ဒံးအမုၢ်နံၤန့ၣ် သ့ၣ်နီၣ်ထီၣ်က့ၤပှၤလၢ အတ့လီၤနၤတက့ၢ်”
(စံၣ်တဲၤတဲလီၤတၢ် ၁၂:၁) လၢမုၢ်နံၤ အအၢတချုး ဟဲဒံးဘၣ်, ဒီးနံၣ်တချုးသုးဘူးဒံးဘၣ် အသးဖဲနကစံး တၢ်အမုာ်တအိၣ်ဘၣ်လၢအပူၤဘၣ်, လၢနသးစၢ်ဒံးအမုၢ်နံၤန့ၣ် သ့ၣ်နီၣ်ထီၣ်က့ၤပှၤလၢ အတ့လီၤနၤတက့ၢ်.
တၢး၁၄ ၁/၁၅ ကဘျံးပၤ ၁၈ အဆၢ ၃
ဖဲနသးစၢ်အခါ ဆၢတဲာ်တၢ်လၢအဘၣ်
တၢ်ဆၢတဲာ်လၢ အရ့ဒိၣ်ကတၢၢ်
၃ သးစၢ်အဆၢကတီၢ်န့ၣ် မ့ၢ်ဆၢကတီၢ်လၢ နကဘၣ်မၤတၢ်ဆၢတဲာ်လၢ အရ့ဒိၣ်တဖၣ်လီၤ. ဘၣ်ဆၣ် တၢ်ဆၢတဲာ်လၢ အရ့ဒိၣ်ကတၢၢ်န့ၣ် မ့ၢ်ဝဲတၢ်မၤ ယဟိဝၤယွၤအတၢ်မၤလီၤ. တၢ်ဆၢကတီၢ် အဂ့ၤကတၢၢ်လၢ နကဆၢတဲာ်တၢ်အံၤအဂီၢ်န့ၣ် မ့ၢ်ဖဲလဲၣ်အခါလဲၣ်. ယဟိဝၤယွၤစံးဝဲ– “လၢနသးစၢ်ဒံးအမုၢ်နံၤန့ၣ် သ့ၣ်နီၣ်ထီၣ်က့ၤပှၤလၢ အတ့လီၤနၤတက့ၢ်.” (စံၣ်တဲၤတဲလီၤတၢ် ၁၂:၁) ကျဲထဲတဘိလၢနက “သ့ၣ်နီၣ်ထီၣ်က့ၤ” ယဟိဝၤယွၤန့ၣ် မ့ၢ်ဝဲ နမၤအတၢ်မၤလၢ သးဒီဖျၢၣ်န့ၣ်လီၤ. (၅ မိၤၡ့ ၁၀:၁၂) နတၢ်ဆၢတဲာ်လၢ နကမၤယွၤအတၢ်မၤလၢ နသးဒီဖျၢၣ်ညါန့ၣ် မ့ၢ်တၢ်ဆၢတဲာ်လၢ အရ့ဒိၣ်ကတၢၢ်လၢ နကဘၣ်မၤအီၤအကျါတမံၤလီၤ. တၢ်ဆၢတဲာ်အံၤ အဘျုးကအိၣ်လၢ နတၢ်အိၣ်မူ ဒီတစိၤလီၤ.—စံးထီၣ်ပတြၢၤ ၇၁:၅.
တၢး၁၄ ၁/၁၅ ကဘျံးပၤ ၂၂ အဆၢ ၁
မၤယဟိဝၤယွၤ အတၢ်မၤဖဲ မုၢ်နံၤအအၢတချုးဟဲဒံးဘၣ်အခါ
သးစီဆှံထိးဘၣ် စီၤပၤ စီၤၡလိၤမိၤလၢ ကတဲဘၣ်သးစၢ်တဖၣ်လၢ– “လၢမုၢ်နံၤ အအၢတချုး ဟဲဒံးဘၣ်, ဒီးနံၣ်တချုးသုးဘူးဒံးဘၣ် . . . လၢနသးစၢ်ဒံးအမုၢ်နံၤန့ၣ် သ့ၣ်နီၣ်ထီၣ်က့ၤပှၤလၢ အတ့လီၤနၤတက့ၢ်.” “မုၢ်နံၤအအၢ” န့ၣ်မ့ၢ်မနုၤလဲၣ်. အဲၣ်ဒိးစံးဝဲဖဲ ပှၤသးပှၢ်ထီၣ် အဆၢကတီၢ်န့ၣ်လီၤ. ဖဲပှၤသးပှၢ်ထီၣ်အခါ ပှၤစုပှၤခီၣ်ကနိး, ပှၤမဲပိာ်ခီဖျု, ပှၤမဲာ်ယူာ်, ပှၤနၢ်ဃၢ, ပှၤခိၣ်ဝါထီၣ် ဒီးပှၤပျိၢ်တကုးဝဲအဂ့ၢ်န့ၣ် စီၤၡလိၤမိၤကွဲးဝဲ ဒ်ထါအသိးလီၤ. လၢတၢ်န့ၣ်အဃိ တချုးလၢ တၢ်ဆၢကတီၢ်ဒ်အံၤ ဟဲတုၤဒံးဘၣ်န့ၣ် ကြၢးလၢ ပမၤယဟိဝၤယွၤ အတၢ်မၤလီၤ.—ဖး စံၣ်တဲၤတဲလီၤတၢ် ၁၂:၁-၅ တက့ၢ်.
(စံၣ်တဲၤတဲလီၤတၢ် ၁၂:၂-၇) ဖဲမုၢ်, ဒီးတၢ်ကပီၤ, ဒီးလါ, ဒီးဆၣ်ဧိၤဖီဧိၤ တချုးခံးလီၤဒံးဘၣ်, ဒီးတၢ်အၢၣ်တချုးဟဲက့ၤဒံးဘၣ်လၢ တၢ်ဟဲစူၤအလီၢ်ခံ, ၃ လၢမုၢ်တနံၤဖဲ ပှၤပၢၤဟံၣ်ကကနိး, ဒီးပှၤအဆူၣ် ကသကူးလီၤအသး, ဒီးပှၤဂူာ်ဆၢၣ်ဂူာ် ကအိၣ်ဃိကလာ်လၢ အအိၣ်စှၤအဃိ, ဒီးပှၤလၢအကွၢ်ထီၣ်တၢ်လၢ တၢ်ထူၣ်ဖျိကခံးလီၤဝဲ, ၄ ဒီးတြဲၤကကးတံာ်ဃာ်အသးလၢ ကျဲပူၤ, တုၤဂူာ်ဆၢၣ်ဂူာ်အသီၣ်စၢ်လီၤဝဲ, ဒီးပှၤဂဲၤဆၢထၢၣ်လၢ ထိၣ်ဖိအပှ့ၤအဃိ, ဒီးတၢ်သးဝံၣ်အဖိမုၣ် ဘၣ်တၢ်ဆီၣ်လီၤအီၤခဲလၢာ်လီၤ. ၅ ဒီးပျံၤစ့ၢ်ကီး တၢ်လၢအအိၣ်ထီၣ်ထီ, ဒီးတၢ်ပျံၤအလီၢ်ကအိၣ်ဝဲလၢကျဲပူၤ, ဒီးၡၤကးသၣ်အဖီဖးထီၣ်, ဒီးဒွဲၣ်ဃၤကာ်ကဲထီၣ်တၢ်အဃၢ, တၢ်သးကွံကဟါမူၤဟါမၢ်လီၤ. အဂ့ၢ်ဒ်အံၤ, ပှၤကညီလဲၤဝဲဆူ အဟံၣ်အထူအယိာ်, ဒီးပှၤဟီၣ်တၢ်ဖိ လဲၤတၢ်လၢကျဲပူၤန့ၣ်လီၤ. ၆ ဖဲပျံၤစ့တထီၣ်တဲာ်ဒံးဘၣ်, ဒီးသလၢထူတသ့ၣ်ဖးဒံးဘၣ်, ဒီးဖဲအထံစဲၤတဟးဂီၤဒံးဘၣ်လၢ ထံထီၣ်ပၢၢ်, ဒီးစဲးတဟးဂီၤဒံးဘၣ် ဖဲထံပူၤအဃၢၤဘၣ်. ၇ တုၤနုၤတစုအကမူၣ် ကက့ၤဆူဟီၣ်ခိၣ် ဒ်အအိၣ်တ့ၢ်ဝဲအသိးန့ၣ်, ဒီးအသးကက့ၤဆူ ယွၤလၢအဟ့ၣ်လီၤအီၤလီၤ.
တၢး၀၈ ၁၁/၁၅ ကဘျံးပၤ ၂၃ အဆၢ ၂
မၤထွဲလံာ်စီဆှံအတၢ်တၢ်ဘျၢလၢ ဘၣ်ဃးဒီး တၢ်ကတီၤတၢ်အိၣ်ဆူၣ်အိၣ်ချ့
၂ စံၣ်တဲၤတဲလီၤ အဆၢဒိၣ် ၁၂ ပာ်ဖျါထီၣ်ဝဲ “မုၢ်နံၤအအၢ” အဂ့ၢ်လၢအဘၣ်ထွဲလိာ်အသးဒီး ပှၤကညီတလၢပှဲၤတဖၣ် အသးပှၢ်ထီၣ်ဝဲ အဆၢကတီၢ်န့ၣ်လီၤ. (ဖး စံၣ်တဲၤတဲလီၤတၢ် ၁၂:၁-၇ တက့ၢ်.) ခိၣ်သူအဝါ ဘၣ်တၢ်ထိၣ်သတြီၤအီၤဒီး “ၡၤကးသၣ်” အထူၣ်လီၤ. ပှၤခီၣ်လၢဘၣ်တၢ်ဒိလီၤအီၤလၢ “ပှၤအဆူၣ်” တဖၣ်န့ၣ် ခဲအံၤသကုးလီၤအသး ဒီးကနိးထီၣ်ဝဲလီၤ. ပှၤမဲာ်ယူာ်န့ၣ် ဘၣ်တၢ်ဒိလီၤအီၤလၢ ပှၤလၢအလဲၤဝဲဆူ ပဲတြီဖိလၢ ကထံၣ်တၢ်ကပီၤအဂီၢ် ဘၣ်ဆၣ် ထံၣ်ဝဲထဲ တၢ်ခံးန့ၣ်လီၤ. အမဲတနီၤ ပိာ်ကွံာ်အဃိ “ပှၤဂူာ်ဆၢၣ်ဂူာ် ကအိၣ်ဃိကလာ်လၢ အအိၣ်စှၤအဃိ” လီၤ.
တၢး၀၆ ၁၁/၁ ကဘျံးပၤ ၁၆ အဆၢ ၉
လံာ်စီဆှံ အတၢ်ပာ်ဖျါလၢ လံာ်စံၣ်တဲၤတဲလီၤတၢ်
၁၁:၉; ၁၂:၁-၇. သးစၢ်တဖၣ် ကဘၣ်ဟ့ၣ်တၢ်စံးဆၢ လၢယဟိဝၤယွၤလီၤ. လၢတၢ်န့ၣ်အဃိ တချုးလၢအသးပှၢ်ထီၣ်ဒီး အဂံၢ်လီၤစၢ်ဒံးဘၣ်န့ၣ် ကြၢးသူဝဲ အတၢ်ဆၢကတီၢ် ဒီးအဂံၢ်အဘါလၢ ကစၢ်ယွၤအဂီၢ်လီၤ.
(စံၣ်တဲၤတဲလီၤတၢ် ၁၂:၁၃, ၁၄) တၢ်ခဲလၢာ်အခိၣ်ကျၢၢ်န့ၣ် မ်ပနၢ်ဟူတက့ၢ်. ပျံၤယွၤဒီးတိၢ်န့ၢ်အတၢ်မၤလိာ်တက့ၢ်. အဂ့ၢ်ဒ်အံၤ, အဝဲန့ၣ်မ့ၢ်ပှၤကညီအတၢ်ခဲလၢာ်လီၤ. ၁၄ အဂ့ၢ်ဒ်အံၤ, ယွၤကဒုးဟဲ ကယဲၢ်တၢ်မၤအိၣ်ဒီး တၢ်ခူသူၣ်ခဲလၢာ်, ဂ့ၤမ့ၢ်ဂ့ၤ, အၢမ့ၢ်ဂ့ၤ, ဆူတၢ်စံၣ်ညီၣ်အပူၤန့ၣ်လီၤ.
တၢး၁၁ ၁၁/၁ ကဘျံးပၤ ၂၁ အဆၢ ၁-၆
သုးဘူးနသးဆူ ကစၢ်ယွၤအအိၣ်
မၤလၢပှဲၤနမူဒါလၢ ယွၤအဖီခိၣ်
ပတၢ်အိၣ်မူ အတၢ်တိာ်ပာ်န့ၣ် မ့ၢ်မနုၤလဲၣ် နသံကွၢ်ဘၣ်ဒ်န့ၣ် တဘျီဘျီဧါ. ယဟိဝၤယွၤ ဟ့ၣ်ပှၤသးလၢ ကသံကွၢ်တၢ်သံကွၢ် ဒ်သိးန့ၣ် တကးဘၣ် ဟ့ၣ်စ့ၢ်ကီးပှၤလၢ အဲၣ်ဒိးသ့ၣ်ညါ တၢ်သံကွၢ်ဝဲန့ၣ်အတၢ်စံးဆၢန့ၣ်လီၤ. ပကထံၣ်န့ၢ် တၢ်စံးဆၢအံၤအဂီၢ် အဝဲကတဲာ်ကတီၤန့ၢ်ပှၤအဃိ ပသးခု စံးဘျုးဘၣ်အီၤလီၤ. တၢ်စံးဆၢလၢ ပအဲၣ်ဒိးသ့ၣ်ညါန့ၣ် အိၣ်လၢ အကလုၢ်ကထါ လံာ်စီဆှံပူၤလီၤ. ဆိကမိၣ်ကွၢ် စီၤၡလိၤမိၤ အတၢ်ကတိၤဖဲ စံၣ်တဲၤတဲလီၤ ၁၂:၁၃ အပူၤန့ၣ်တက့ၢ်.
လၢပှၤဟီၣ်ခိၣ်ဖိအကျါ ပှၤကဒ်သိးဒီး စီၤၡလိၤမိၤ တအိၣ်နီတဂၤဘၣ်. ပဃုထံၣ်န့ၢ် တၢ်သူၣ်ခုသးခု ဒီးတၢ်အိၣ်မူ အခီပညီသ့ဒ်လဲၣ်အဂ့ၢ်န့ၣ် အဝဲတဲပၠးပှၤသ့လီၤ. အဝဲမ့ၢ်စီၤပၤဒီး အိၣ်ဒီးတၢ်ကူၣ်သ့လီၤဆီ, တၢ်ထူးတၢ်တီၤအါအါဂီၢ်ဂီၢ် တကးဘၣ် အဝဲဃုသ့ၣ်ညါဘၣ်ဝဲ တၢ်လၢပှၤဟီၣ်ခိၣ်ဖိဃုဝဲ ဃုာ်ဒီးတၢ်ထူးတၢ်တီၤ ဒီးတၢ်မံၤဟူသၣ်ဖျါန့ၣ်လီၤ. (စံၣ်တဲၤတဲလီၤတၢ် ၂:၄-၉; ၄:၄) လၢခံသးစီဆှံ ထိးဘၣ်အီၤဒ်သိး ကကွဲးဝဲတၢ်လၢ အဃုထံၣ်န့ၢ်ဝဲတဖၣ်လီၤ. စံးဝဲလၢ– “တၢ်ခဲလၢာ်အခိၣ်ကျၢၢ်န့ၣ် မ်ပနၢ်ဟူတက့ၢ်. ပျံၤယွၤဒီးတိၢ်န့ၢ်အတၢ်မၤလိာ်တက့ၢ်. အဂ့ၢ်ဒ်အံၤ, အဝဲန့ၣ်မ့ၢ် ပှၤကညီအတၢ်ခဲလၢာ်လီၤ.” တၢ်ကတိၤတဖၣ်အံၤ ပာ်ဖျါထီၣ်ဝဲ ပှၤဟီၣ်ခိၣ်ဖိ အတၢ်ဂုာ်ကျဲးစၢးအကျါ တၢ်လၢအဂ့ၤကတၢၢ်ဒီး အဘျုးအိၣ်ဒိၣ်ကတၢၢ်န့ၣ်လီၤ.
“ပျံၤယွၤတက့ၢ်.” တၢ်ကတိၤလၢအမ့ၢ် တၢ်ပျံၤယွၤန့ၣ် အဆိကတၢၢ် တမ့ၢ်ကလီၤဘၣ်သူၣ်ဘၣ်သး လၢပဂီၢ်ဘၣ်. ဘၣ်ဆၣ် တၢ်ပျံၤအံၤန့ၣ် အဲၣ်ဒိးစံးဝဲ ပအဲၣ်အီၤအဃိ ပပျံၤအီၤဒီး ပယူးယီၣ်ပာ်ကဲအီၤလီၤ. တမ့ၢ်ဒ်သိး ကုၢ်တဂၤလၢ ဘၣ်ပျံၤအကစၢ်လၢ အအၢအသီတဂၤ န့ၣ်ဘၣ်, မ့ၢ်ဒ်သိးဖိသၣ်တဂၤလၢ အဲၣ်ဒိးမၤမုာ်အပၢ်လၢ အိၣ်ဒီးတၢ်အဲၣ်တဂၤအသးန့ၣ်လီၤ. လံာ်တဘ့ၣ် စံးဝဲလၢ တၢ်ပျံၤယွၤန့ၣ်မ့ၢ် “တၢ်ပျံၤဒီးတၢ်ယူးယီၣ်ပာ်ကဲလၢ ပှၤလၢဘူၣ်ထီၣ်ဘါထီၣ်အီၤတဖၣ် ပာ်ဖျါထီၣ်ဝဲ ခီဖျိလၢအဲၣ်ဘၣ်အီၤဒီး ပာ်ဒိၣ်ပာ်ကဲ အစိကမီၤဒီး အတၢ်ဂ့ၤတဖၣ် အဃိလီၤ. မ့ၢ်လၢပအဲၣ်ကစၢ်ယွၤဒီး ပသ့ၣ်ညါလၢ အဝဲအဲၣ်ပှၤအဃိ တၢ်အဲၣ်အံၤ ထိၣ်ဟူးထိၣ်ဂဲၤထီၣ်ပှၤလၢ ပကမၤအတၢ်ဘၣ်သးအဂီၢ်လီၤ. တၢ်ပျံၤအံၤ တမ့ၢ်ထဲ သးအတၢ်တူၢ်ဘၣ်ဘၣ်. ပကဘၣ် ပာ်ဖျါထီၣ်အီၤလၢ တၢ်မၤလီၤ. ပကဘၣ် ပာ်ဖျါထီၣ်အီၤဒ်လဲၣ်.
“တိၢ်န့ၢ်အတၢ်မၤလိာ်.” တၢ်ပျံၤယွၤန့ၣ် ထိၣ်ဟူးထိၣ်ဂဲၤထီၣ်ပသးလၢ ပကစူၢ်အကလုၢ်န့ၣ်လီၤ. တၢ်န့ၣ်အဲၣ်ဒိးစံးဝဲ ပကဘၣ်ဒိကနၣ် အကလုၢ်န့ၣ်လီၤ. ဒ်ပှၤထုးထီၣ် တၢ်ပီးတၢ်လီတဂၤ သ့ၣ်ညါဝဲ ကျဲအဂ့ၤကတၢၢ်လၢ ပှၤကဘၣ်သူ အတၢ်ပီးတၢ်လီတဖၣ်အံၤ ဒ်လဲၣ်အသိး ပကစၢ်ယွၤလၢ အတ့လီၤပှၤန့ၣ် သ့ၣ်ညါဝဲ ကျဲအဂ့ၤကတၢၢ်လၢ ပကဘၣ်အိၣ်မူဒ်လဲၣ်န့ၣ်လီၤ. တကးဒံးဘၣ် ယဟိဝၤယွၤ အဲၣ်ဒိးတၢ်အဂ့ၤလၢ ပဂီၢ်လီၤ. အဝဲအဲၣ်ဒိးလၢ ပကအိၣ်ဒီး တၢ်သူၣ်ခုသးခု ဒီးတၢ်လၢအဃ့ပှၤတဖၣ်န့ၣ် မ့ၢ်ဒၣ်လၢပဂီၢ်လီၤ. (ယၡါယၤ ၄၈:၁၇) တၢ်မၢဖိ ယိၤဟၣ် ပာ်ဖျါထီၣ်ဝဲလၢ– “အဂ့ၢ်ဒ်အံၤ, တၢ်အဲၣ်ယွၤမ့ၢ်အအံၤ, လၢပတိၢ်န့ၢ်အတၢ်မၤလိာ်လီၤ. ဒီးအတၢ်မၤလိာ်န့ၣ် တကီတခဲဘၣ်လီၤ.” (၁ ယိၤဟၣ် ၅:၃) ပတၢ်ဒိကနၣ်န့ၣ် ပာ်ဖျါထီၣ် ပတၢ်အဲၣ်ယွၤ ဒီးယွၤအတၢ်မၤလိာ်တဖၣ်န့ၣ် ပာ်ဖျါထီၣ်ဝဲ အတၢ်အဲၣ်ပှၤလီၤ.
“အဝဲန့ၣ်မ့ၢ် ပှၤကညီအတၢ်ခဲလၢာ်လီၤ.” တၢ်ကတိၤတဖၣ်အံၤ ပာ်ဖျါထီၣ်ဝဲ တၢ်ဂ့ၢ်အရ့ဒိၣ်လၢ ပကဘၣ်ပျံၤယွၤ ဒီးဒိကနၣ်အကလုၢ်လီၤ. ပမူဒါအိၣ်လၢ ပကဘၣ်မၤဒ်န့ၣ်လီၤ. ယဟိဝၤယွၤ မ့ၢ်ပတၢ်ဘၣ်တ့ကစၢ်အဃိ ပမ့ၢ်အတၢ်လီၤ. (စံးထီၣ်ပတြၢၤ ၃၆:၉) ပမူဒါအိၣ်လၢ ပကဘၣ်ဒိကနၣ် အကလုၢ်စ့ၢ်ကီးလီၤ. ပမ့ၢ်အိၣ်မူဒ် အဝဲအတၢ်ဘၣ်သးအသိးန့ၣ် မ့ၢ်ပမၤလၢပှဲၤ ပမူဒါလီၤ.
မ့မ့ၢ်ဒ်န့ၣ်န့ၣ် ပတၢ်အိၣ်မူ အတၢ်တိာ်ပာ် မ့ၢ်မနုၤလဲၣ်. ပမ့ၢ်တဲယိယိဖိန့ၣ် ပအိၣ်မူလၢ ဟီၣ်ခိၣ်အံၤန့ၣ် မ့ၢ်ဒ်သိး ပကမၤအတၢ်ဘၣ်သးအဂီၢ်လီၤ. ပတၢ်အိၣ်မူ ကပှဲၤဒီးအခီပညီအဂီၢ် ကျဲလၢအဂ့ၤန့ၢ်တၢ်အံၤ တအိၣ်ဘၣ်. မ့ၢ်နအဲၣ်ဒိးသ့ၣ်ညါအါထီၣ် ယဟိဝၤယွၤ အတၢ်ဘၣ်သးဒီး အိၣ်မူဒ် အတၢ်ဘၣ်အသးအသိးဧါ. ယဟိဝၤပှၤအုၣ်အသးတဖၣ် သးအိၣ်မၤစၢၤနၤလီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(စံၣ်တဲၤတဲလီၤတၢ် ၁၀:၁) သၣ်ဘုလါသံန့ၣ် ဒုးနၢအုၣ်ပှၤမၤတၢ်နၢမူတဂၤ အသိအချါလီၤ. ဒီးပှၤဟးဂီၤဖိ အတၢ်တစဲးဖိ ဃၢန့ၢ် တၢ်ကူၣ်သ့, ဒီးတၢ်လၤကပီၤတက့ၢ် ဒ်န့ၣ်အသိးလီၤ.
တၢး၀၆ ၁၁/၁ ကဘျံးပၤ ၁၆ အဆၢ ၅
လံာ်စီဆှံ အတၢ်ပာ်ဖျါလၢ လံာ်စံၣ်တဲၤတဲလီၤတၢ်
၁၀:၁. ပကဘၣ်အိၣ်ဒီး တၢ်ပလီၢ်သူၣ်ပလီၢ်သးလၢ ပတၢ်စံးတၢ်ကတိၤ ဒီးပတၢ်မၤတဖၣ်န့ၣ်လီၤ. ပှၤလၢအဘၣ်တၢ်ပာ်ကဲအီၤတဂၤ မ့ၢ်သးထီၣ်တၢ်ဒိၣ်ဒိၣ်ကလဲာ်, မ့ၢ်အီမူၤသံး ဒီးအသကဲာ်ပဝး မ့ၢ်လီၤရၢၢ်ထဲတဘျီဧိၤဒၣ်လဲာ် အမံၤဂ့ၤသၣ်ဂ့ၤဟးဂီၤဝဲသ့လီၤ.
(စံၣ်တဲၤတဲလီၤတၢ် ၁၁:၁) ကွံာ်နကိၣ်လၢ ထံဖံးခိၣ်တက့ၢ်. အဂ့ၢ်ဒ်အံၤ, အါနံၤအါသီအလီၢ်ခံန့ၣ် နကထံၣ်န့ၢ်က့ၤအီၤလီၤ.
တၢး၀၆ ၁၁/၁ ကဘျံးပၤ ၁၆ အဆၢ ၇
လံာ်စီဆှံ အတၢ်ပာ်ဖျါလၢ လံာ်စံၣ်တဲၤတဲလီၤတၢ်
၁၁:၁, ၂. ပကြၢးပာ်ဖျါထီၣ် တၢ်သူၣ်အိၣ်သးအိၣ်ပှၤဂၤ လၢပသးဒီဖျၢၣ်ညါလီၤ. ပမ့ၢ်မၤဒ်န့ၣ်န့ၣ်ပှၤဂၤကသူၣ်အိၣ်သးအိၣ်ပှၤစ့ၢ်ကီးလီၤ.—လူၤကၣ် ၆:၃၈.
လါနိၣ်ဝ့ဘၢၣ် ၂၈–လါဒံၣ်စ့ဘၢၣ် ၄
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | တၢ်သးဝံၣ်တဖၣ်အတၢ်သးဝံၣ် ၁-၈
“ၡူလမး—ပာ်လီၤဒိဂ့ၤတဲာ်ဘၣ်လၢ ပကြၢးကွၢ်လိ”
(တၢ်သးဝံၣ်တဖၣ်အတၢ်သးဝံၣ် ၂:၇) ယရူၤၡလ့ၣ်အဖိမုၣ်သ့ၣ်ဧၢ, ယဒုးဆိၣ်သုလၢတၤဟိစဘံ, ဒီးတၤဟိမိၢ်လၢ ပှၢ်လၢ်ကျါအမဲာ်ညါ, လၢသုသုတထိၣ်ဂဲၤ, ဒီးလၢအတချုးဘၣ်ဒံးဘၣ် အသးဘၣ်ဒီး, လၢသုသုတမၤဖုသံနီၣ်ထီၣ်ပှၤလၢ ယအဲၣ်အီၤတဂ့ၤ.
(တၢ်သးဝံၣ်တဖၣ်အတၢ်သးဝံၣ် ၃:၅) ယဒုးဆိၣ်သု, ယရူၤၡလ့ၣ်အဖိမုၣ်သ့ၣ်ဧၢ, လၢတၤဟိစဘံ, ဒီးတၤဟိမိၢ်လၢ ပှၢ်လၢ်ကျါအမဲာ်ညါ, လၢသုသုတထိၣ်ဂဲၤ, ဒီးလၢအတချုးဘၣ်ဒံးဘၣ်အသးန့ၣ် လၢသုသုတမၤဖုသံနီၣ်ထီၣ်ပှၤလၢ ယအဲၣ်အီၤတဂ့ၤ.
တၢး၁၅ ၁/၁၅ ကဘျံးပၤ ၃၁ အဆၢ ၁၁-၁၃
တၢ်အဲၣ်လၢ ဆီတလဲအသးတသ့ဘၣ်န့ၣ် ကအိၣ်ဝဲဧါ.
သုတထိၣ်ဂဲၤထီၣ် တၢ်အဲၣ်လၢ “အတချုးဘၣ်ဒံးဘၣ် အသး” န့ၣ်တဂ့ၤ
၁၁ တၢ်သးဝံၣ်တဖၣ်အတၢ်သးဝံၣ် ပာ်ဖျါထီၣ် တၢ်မၤလိတဖၣ်လၢ ခရံာ်ဖိလၢ အသဘျ့တဖၣ်အဂီၢ် လီၤဆီဒၣ်တၢ် ပှၤလၢအဃု အသးသမူတံၤသကိးတဖၣ် အဂီၢ်န့ၣ်လီၤ. ပိာ်မုၣ်သးစၢ်လၢအမ့ၢ် ၡူလမးန့ၣ် တအဲၣ်ဝဲ စီၤၡလိၤမိၤဘၣ်. အဃိ အဝဲဆိၣ်တၢ်ဒီး ယရူၤၡလ့ၣ်အဖိမုၣ်တဖၣ် ဒီးစံးဝဲလၢ– “လၢသုသုတထိၣ်ဂဲၤ, ဒီးလၢအတချုး ဘၣ်ဒံးဘၣ်အသးန့ၣ် လၢသုသုတမၤဖုသံနီၣ်ထီၣ်ပှၤလၢ ယအဲၣ်အီၤတဂ့ၤ.” (တၢ်သးဝံၣ်တဖၣ်အတၢ်သးဝံၣ် ၂:၇; ၃:၅) ဘၣ်မနုၤအဃိလဲၣ်. မ့ၢ်လၢပှၤတဂၤဂ့ၤ, တဂၤဂ့ၤ ပမ့ၢ်ထံၣ်အီၤခဲအံၤဒီး ပမ့ၢ်အဲၣ်အီၤန့ၣ် တကြၢးဘၣ်. ခရံာ်ဖိတဂၤန့ၣ် ကဘၣ်ဃုဝဲ ပှၤလၢအဲၣ်ဝဲကဲနီၢ်နီၢ်တဂၤလၢ တၢ်သူၣ်စူၤသးစူၤအပူၤလီၤ.
၁၂ ဘၣ်မနုၤအဃိ ၡူလမး အဲၣ်ဝဲပှၤကွၢ်သိဖိလဲၣ်. ပှၤကွၢ်သိဖိန့ၣ် ဒိၣ်တၢ်ဂ့ၤဒ် “တၤဟိစဘံ” လီၤ. အစုတဖၣ် လီၤဂာ်ဒ် “လၢၢ်ဝါကံၣ်ဃ့အထူၣ်” လီၤ. ဘၣ်ဆၣ် အဝဲတမ့ၢ်ထဲ ပိာ်ခွါလၢ အဒုၣ်အဒ့ဂ့ၤ တဂၤဘၣ်, အဝဲအဲၣ် ယဟိဝၤယွၤဒီး အိၣ်ဒီးတၢ်ဂ့ၤတၢ်ဝါတဖၣ်လီၤ. အဃိ လၢၡူလမးအဂီၢ်န့ၣ် အဝဲလီၤဂာ်ဒ် ‘ဖီသၣ်အထူၣ်လၢ သ့ၣ်တဖၣ်အကျါ’ လီၤ.—တၢ်သးဝံၣ်တဖၣ်အတၢ်သးဝံၣ် ၂:၃, ၉; ၅:၁၄, ၁၅.
၁၃ မ့မ့ၢ် ၡူလမးမီၣ်. မ့ၢ်လၢစီၤပၤလၢအိၣ်ဒီး ‘နီၣ်ပၤမုၣ်ဃုဆံ, ဒီးပှၤသံၣ်မါဃိးဆံ, ဒီးပှၤမုၣ်ကနီၤ ပဂံၢ်တသ့ဘၣ်’ ဒၣ်လဲာ် အဲၣ်ဘၣ်အီၤအဃိ အဝဲကမ့ၢ်ပှၤလၢအဃံလၤတဂၤလီၤ. မ့ၢ်လၢအဝဲအိၣ်ဒီး တၢ်ဆီၣ်လီၤသးအဃိ စံးလီၤအသးလၢ အလီၤဂာ်ဒၣ် “ၡၤရိၣ်အဖီဝံဒံၣ်, တၢ်ကစၢၢ်ကဆူးအဖီဒ့ၣ်ညါ” န့ၣ်လီၤ. လၢပှၤကွၢ်သိဖိအဂီၢ် အဝဲလီၤဂာ်ဒ် “ဖီဒ့ၣ်ညါလၢတၤဆှူၣ်ကျါအသိး” လီၤ. အဝဲမ့ၢ်ပှၤလၢ အတီဒီးယဟိဝၤယွၤလီၤ.—တၢ်သးဝံၣ်တဖၣ်အတၢ်သးဝံၣ် ၂:၁, ၂; ၆:၈.
(တၢ်သးဝံၣ်တဖၣ်အတၢ်သးဝံၣ် ၄:၁၂) ယဒီပုၢ်ဝဲၢ်မုၣ်ဧၢ, ယမါဧၢ, နမ့ၢ်တၤသၣ်အလီၢ်ကရၢအသး, ထံထီၣ်ပၢၢ်ထိးဝးတံာ်အသး, ထံမူအိၣ်ဒီးအစဲဃာ်ပနီၣ်လီၤ.
(တၢ်သးဝံၣ်တဖၣ်အတၢ်သးဝံၣ် ၈:၈-၁၀) ပအိၣ်ဒီး ပဒီပုၢ်ဝဲၢ်မုၣ် အဆံးတဂၤ, ဒီးအနုၢ်တအိၣ်ဘၣ်. လၢမုၢ်တနံၤလၢ ပှၤကကတိၤတၢ်လၢ အဂ့ၢ်အကျိၤန့ၣ် ပကမၤပဒီပုၢ်ဝဲၢ်မုၣ်အဂီၢ်လၢ မနုၤတမံၤလဲၣ်. ၉ မ့မ့ၢ်တၢ်အဒူၣ်ဒီး, ပကမၤထီၣ်တၢးထီစ့လၢ အဖီခိၣ်လီၤ. မ့မ့ၢ်တြဲၤတဘ့ၣ်ဒီး, ပကကရၢအီၤလၢ သ့ၣ်ဆှိအ့ရ့းအသ့ၣ်ဘၣ်လီၤ. ၁၀ ယဲဒၣ်အံၤယမ့ၢ်တၢ်အဒူၣ်, ဒီးယနုၢ်မၤသးဒ် တၢးထီတဖၣ်အသိးန့ၣ်လီၤ. မၤသးဒ်န့ၣ်ဒီး ယအိၣ်လၢအမဲာ်ညါ ဒ်ပှၤလၢအထံၣ်န့ၢ် တၢ်အမုာ်အဖိးအသိးန့ၣ်လီၤ.
တၢး၁၅ ၁/၁၅ ကဘျံးပၤ ၃၂ အဆၢ ၁၄-၁၆
တၢ်အဲၣ်လၢ အဆီတလဲအသးတသ့ဘၣ်န့ၣ် ကအိၣ်ဝဲဧါ
၁၄ လံာ်စီဆှံ ပာ်ဖျါဝဲလၢ ယွၤအခ့အပှၤတဖၣ် ကဘၣ်ဒိးတ့ဒိးဖျီအသးလၢ “ကစၢ်အပူၤ” လီၤ. (၁ ကရံၣ်သူး ၇:၃၉) ပှၤသဘျ့လၢ အဲၣ်ဒိးဆီဟံၣ်ဆီဃီတဖၣ်န့ၣ် ကဘၣ်ပာ်အဲၣ်တီ ဒီးဖျီအသးလၢ ခရံာ်ဖိလၢ အဒိးဘျၢထံဝံၤတဂၤလီၤ. ပှၤဒီမါဝၤတဖၣ် ကအိၣ်ဒီးတၢ်ကီတၢ်ခဲလၢ ဟံၣ်ဃီပူၤလီၤ. ဘၣ်ဆၣ် အဝဲသ့ၣ်ခံဂၤလၢာ် အတၢ်ရ့လိာ်သးဒီးယွၤ မ့ၢ်အိၣ်ဝဲဘူးဘူးတံၢ်တံၢ်န့ၣ် အဟံၣ်ဃီပူၤ ကအိၣ်ဒီး တၢ်မုာ်တၢ်ခုၣ်လီၤ. လၢတၢ်န့ၣ်အဃိ နမ့ၢ်အဲၣ်ဒိး ဆီဟံၣ်ဆီဃီန့ၣ် ဃုပှၤလၢအအဲၣ် ယဟိဝၤယွၤနီၢ်နီၢ် ဒီးအိၣ်ဒီးတၢ်ဂ့ၤတၢ်ဝါတဖၣ်န့ၣ်တက့ၢ်. ပှၤကွၢ်သိဖိဒီး သးစၢ်မုၣ်ၡူလမး ခံဂၤလၢာ် အိၣ်ဒီး တၢ်ဂ့ၤတၢ်ဝါတဖၣ်အံၤလီၤ.
ယပှၤသးဘိမ့ၢ် “တၤသၣ်အလီၢ်ကရၢအသး”
၁၅ ဖး တၢ်သးဝံၣ်တဖၣ် အတၢ်သးဝံၣ် ၄:၁၂ တက့ၢ်. ဘၣ်မနုၤအဃိ ပှၤကွၢ်သိဖိ တဲဝဲလၢအတၢ်အဲၣ်သးဘိ လီၤဂာ်ဒ် “တၤသၣ်အလီၢ်ကရၢအသး” လဲၣ်. တၤသၣ်အလီၢ်လၢ အကရၢဃာ်အသးန့ၣ် ပှၤဝာ်နုာ်တသ့ ကိးဂၤဒဲးဘၣ်. ၡူလမးစ့ၢ်ကီး လီၤဂာ်ဒ် တၤသၣ်အလီၢ်ဝဲန့ၣ်လီၤ. အဝဲအဲၣ်ဝဲဒၣ်ထဲ ပှၤကွၢ်သိဖိတဂၤဧိၤ ဒီးအဲၣ်ဒိးဖျီအသးဒီးအီၤလီၤ. အဝဲလီၤဂာ်ဒ် “တၢ်အဒူၣ်” ဒီးတလီၤဂာ်ဒ်တြဲၤလၢအိးထီၣ်အသးဘၣ်န့ၣ် ပာ်ဖျါထီၣ်ဝဲခီဖျိ တတူၢ်လိာ်ဝဲ စီၤပၤအတၢ်ကွဲန့ၢ်လွဲန့ၢ်ဘၣ်လီၤ. (တၢ်သးဝံၣ်တဖၣ်အတၢ်သးဝံၣ် ၈:၈-၁၀) ဒ်န့ၣ်အသိး ခရံာ်ဖိလၢ ပာ်လီၤအသးလၢ ကဒိးတ့ ဒိးဖျီလိာ်အသးတဖၣ်န့ၣ် တီလိာ်အသး တဂၤဒီးတဂၤလီၤ.
၁၆ ဖဲပှၤကွၢ်သိဖိ ကိးၡူလမးလၢ ကလဲၤဟးကသုၣ်ကသီအခါ အဝဲၢ်ခွါတဖၣ် တပျဲအီၤဘၣ်. အဝဲၢ်သ့ၣ်တဖၣ် မၢအလဲၤခိး စပံးကျိးန့ၣ်လီၤ. ဘၣ်မနုၤအဃိလဲၣ်. အဝဲသ့ၣ်တနာ်အီၤအဃိဧါ. မ့ၢ်အဝဲသ့ၣ် ဆိကမိၣ်ဝဲလၢ အပုၢ်ဒ့မုၣ်အဲၣ်ဒိးမၤတၢ်တဂ့ၤ တမံၤမံၤအဃိဧါ. မ့ၢ်လၢအဝဲသ့ၣ် အိၣ်ဒီးတၢ်ကူၣ်သ့အဃိ ဒီသဒၢဝဲအပုၢ် ဒ်သိးသုတလီၤနုာ်ဆူ တၢ်လ့ပစီအပူၤတဂ့ၤန့ၣ်လီၤ. (တၢ်သးဝံၣ်တဖၣ်အတၢ်သးဝံၣ် ၁:၆; ၂:၁၀-၁၅) ခရံာ်ဖိလၢ အသဘျ့တဖၣ် မ့ၢ်ပာ်တၢ်အဲၣ်တီန့ၣ် ဟးဆှဲးတၢ်လ့ပစီကသ့ဒ်လဲၣ်. တၢ်လီၢ်လၢ ပှၤတအိၣ်နီတဂၤအလီၢ်န့ၣ် တဘၣ်အိၣ်ထဲခံဂၤဘၣ်. ပာ်ဖျါထီၣ် တၢ်အဲၣ်တၢ်ကွံလၢ ကျဲလၢအကဆှီ ဒီးဟးဆှဲး တၢ်အိၣ်သးလၢ ကကဲထီၣ်တၢ်လ့ပစီန့ၣ်တက့ၢ်.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(တၢ်သးဝံၣ်တဖၣ်အတၢ်သးဝံၣ် ၂:၁) ယမ့ၢ်ၡၤရိၣ်အဖီဝံဒံၣ်, တၢ်ကစၢၢ်ကဆူးအဖီဒ့ၣ်ညါလီၤ.
တၢး၁၅ ၁/၁၅ ကဘျံးပၤ ၃၁ အဆၢ ၁၃
တၢ်အဲၣ်လၢ အဆီတလဲအသးတသ့ဘၣ်န့ၣ် ကအိၣ်ဝဲဧါ
၁၃ မ့မ့ၢ် ၡူလမး တခီလဲၣ်. မ့ၢ်လၢစီၤပၤလၢ “နီၣ်ပၤမုၣ်အိၣ်ဝဲဃုဆံ, ဒီးပှၤသံၣ်မါအိၣ်ဝဲဃိးဆံ, ဒီးပှၤမုၣ်ကနီၤ ပဂံၢ်တသ့ဘၣ်”ဒၣ်လဲာ် အဲၣ်ဘၣ်အီၤအဃိ အဝဲကမ့ၢ်ပှၤလၢအဃံလၤတဂၤလီၤ. မ့ၢ်လၢအဝဲအိၣ်ဒီး တၢ်ဆီၣ်လီၤသးအဃိ စံးလီၤအသးလၢ အလီၤဂာ်ဒၣ် “ၡၤရိၣ်အဖီဝံဒံၣ်, တၢ်ကစၢၢ်ကဆူးအဖီဒ့ၣ်ညါ” န့ၣ်လီၤ. လၢပှၤကွၢ်သိဖိအဂီၢ် အဝဲလီၤဂာ်ဒ် “ဖီဒ့ၣ်ညါလၢတၤဆှူၣ်ကျါအသိး” လီၤ. အဝဲမ့ၢ်ပှၤလၢ အတီဒီးယဟိဝၤယွၤလီၤ.—တၢ်သးဝံၣ်တဖၣ်အတၢ်သးဝံၣ် ၂:၁, ၂; ၆:၈.
(တၢ်သးဝံၣ်တဖၣ်အတၢ်သးဝံၣ် ၈:၆) ပာ်ယၤဒ်တၢ်စဲဃာ်ပနီၣ်လၢ နသးလိၤအသိး, ဒ်တၢ်စဲဃာ်ပနီၣ်လၢ နစုဒုၣ်အလိၤအသိးန့ၣ်တက့ၢ်. အဂ့ၢ်ဒ်အံၤ, တၢ်အဲၣ်န့ၣ်ဆူၣ်ဝဲထဲသိးဒီးတၢ်သံ, တၢ်သးက့ၣ်န့ၣ် ကီဝဲထဲသိးဒီး ပျုၤပူၤလီၤ. အမ့ၣ်လၣ်တဖၣ်န့ၣ် မ့ၢ်မ့ၣ်အူအီၣ်တၢ်အမ့ၣ်လၣ်, ယွၤအမ့ၣ်လၣ်လီၤ.
တၢး၁၅ ၁/၁၅ ကဘျံးပၤ ၂၉ အဆၢ ၃
တၢ်အဲၣ်လၢ အဆီတလဲအသးတသ့ဘၣ်န့ၣ် ကအိၣ်ဝဲဧါ
တၢ်အဲၣ်နီၢ်နီၢ် ကအိၣ်ဝဲဧါ
၃ ဖး တၢ်သးဝံၣ်တဖၣ်အတၢ်သးဝံၣ် ၈:၆ တက့ၢ်. တၢ်အဲၣ်န့ၣ် ဘၣ်တၢ်ပာ်ဖျါထီၣ်အီၤဒ် “ယွၤအမ့ၣ်လၣ်” အသိးလီၤ. ယဟိဝၤယွၤ အတၢ်ဂ့ၢ်တၢ်ဝါ အဒိၣ်ကတၢၢ်န့ၣ် မ့ၢ်ဝဲတၢ်အဲၣ်တၢ်ကွံဒီး အဝဲတ့လီၤပှၤ ဃုာ်ဒီးတၢ်သ့တၢ်ဘၣ်လၢ ပကကွၢ်လိမၤဒိး အတၢ်အဲၣ်န့ၣ်လီၤ. (၁ မိၤၡ့ ၁:၂၆, ၂၇) ဖဲကစၢ်ယွၤ ဟ့ၣ်လီၤဝဲ နီၢ်အံၣ်အုဆူ စီၤအၤဒၣ် အစုပူၤအခါ အဝဲအသူၣ်ခုသးခု တူၤဒၣ်လဲာ် ဒိဝဲထါဖိတယုၢ်န့ၣ်လီၤ. နီၢ်အံၣ်အုစ့ၢ်ကီး အဲၣ်ဘၣ်ဝဲ စီၤအၤဒၣ်ဒိၣ်မးလီၤ. (၁ မိၤၡ့ ၂:၂၁-၂၃) ယဟိဝၤယွၤ ဟ့ၣ်လီၤပှၤတၢ်သ့တၢ်ဘၣ်လၢ ပပာ်ဖျါထီၣ် တၢ်အဲၣ်ကသ့အဂီၢ်န့ၣ်လီၤ. အဝဲဟ့ၣ်လီၤဝဲတၢ်အဲၣ်အံၤ ဒ်သိးပိာ်မုၣ်ဒီးပိာ်ခွါ ကအဲၣ်လိာ်အသး တဂၤဒီးတဂၤ လၢတၢ်အဲၣ် အဂၢၢ်အကျၢၤ ကသ့အဂီၢ်န့ၣ်လီၤ.
တၢး၀၆ ၁၁/၁၅ ကဘျံးပၤ ၂၀ အဆၢ ၇
လံာ်စီဆှံ အတၢ်ပာ်ဖျါလၢ လံာ်တၢ်သးဝံၣ်တဖၣ်အတၢ်သးဝံၣ်
ဘၣ်မနုၤအဃိ တၢ်အဲၣ်နီၢ်နီၢ်မ့ၢ် “ယွၤအမ့ၣ်လၣ်” လဲၣ်. မ့ၢ်လၢတၢ်အဲၣ်ဒ်အံၤန့ၣ် ဟဲလၢ ယဟိဝၤယွၤအိၣ် အဃိန့ၣ်လီၤ. တၢ်အဲၣ်အံၤန့ၣ် မ့ၢ်မ့ၣ်အူကဲၤကပီၤတခါလၢ ပှၤမၤပံာ်အီၤတန့ၢ်ဘၣ်လီၤ. တၢ်သးဝံၣ်တဖၣ်အတၢ်သးဝံၣ် ပာ်ဖျါထီၣ်ဝဲ ပိာ်မုၣ်ဒီးပိာ်ခွါခံဂၤ အတၢ်အဲၣ်လၢ “ဆူၣ်ဝဲထဲသိးဒီး [ဆီတလဲအသးတသ့] တၢ်သံ” န့ၣ်လီၤ.—တၢ်သးဝံၣ်တဖၣ်အတၢ်သးဝံၣ် ၈:၆.