မၤသးခု ယဟိဝၤယွၤအသး ခီဖျိ နတၢ်စံးတၢ်ကတိၤ

ဖဲယဟိဝၤယွၤ တ့လီၤပှၤအခါ အဟ့ၣ်ပှၤတၢ်ဟ့ၣ်လီၤဆီတခါ လၢအမ့ၢ် တၢ်သ့တၢ်ဘၣ်လၢ ပကတဲတၢ်. ပသူတၢ်ဟ့ၣ်တခါအံၤ ဒ်လဲၣ်န့ၣ် ယဟိဝၤယွၤထံၣ်ဝဲလၢ အရ့ဒိၣ်စ့ၢ်ကီးဧါ. အရ့ဒိၣ်ဝဲ သပှၢ်တၢၢ်လီၤ. (ဖး ယၤကိာ် ၁:၂၆.) အဃိ ပသူပတၢ်ကတိၤ ဒ်သိးကမၤသးခု ယဟိဝၤယွၤအသး ကသ့ဒ်လဲၣ်.

၁. ပကဘၣ်သူ ပတၢ်ကတိၤဒ်လဲၣ်.

လံာ်စီဆှံ တဲဘၣ်ပှၤလၢ “ဆဲးဟ့ၣ်ဂံၢ်ဟ့ၣ်ဘါလိာ်သး တဂၤဒီးတဂၤ ဒီးမၤမုာ်ထီၣ်လိာ်သး တဂၤဒီးတဂၤ . . . တက့ၢ်.” (၁ သ့းစၤလနံ ၅:၁၁) နသ့ၣ်ညါ ပှၤလၢအလိၣ်ဘၣ် တၢ်ဟ့ၣ်ဂံၢ်ဟ့ၣ်ဘါ အိၣ်တဂၤဂၤဧါ. နကဟ့ၣ်ဂံၢ်ဟ့ၣ်ဘါအီၤ ဒ်လဲၣ်. တဲဘၣ်အီၤလၢ နသူၣ်အိၣ်သးအိၣ်အီၤ ဒီးတဲဘၣ်အီၤ ဘၣ်ဃးဒီး အတၢ်ဂ့ၤတၢ်ဝါ လၢနကၠဲးတခါခါ. နဟ့ၣ်ဂံၢ်ဟ့ၣ်ဘါ ပှၤတဂၤဂၤလၢ လံာ်စီဆှံ တဆၢဆၢကသ့ဧါ. ဒ်သိး နကဟ့ၣ်ဂံၢ်ဟ့ၣ်ဘါ ပှၤဂၤအဂီၢ် လံာ်စီဆှံအဆၢလၢ နသူအီၤသ့န့ၣ် အိၣ်အါမး. ဘၣ်ဆၣ် နကဘၣ်သ့ၣ်နီၣ်ထီၣ်စ့ၢ်ကီးလၢ ဒ်ပတၢ်ကတိၤလၢ ပတဲအီၤန့ၣ် အကဲဘျုး မ့တမ့ၢ် အမၤဘၣ်ဒိ ပှၤဂၤသ့အသိး ပတဲတၢ်လၢ ပကလုၢ်ဒ်လဲၣ်န့ၣ် အကဲဘျုး မ့တမ့ၢ် အမၤဘၣ်ဒိ ပှၤဂၤသ့. အဃိ ဂုာ်ကျဲးစၢးတဲတၢ်မုာ်မုာ် ထီဘိ.​—ကတိၤဒိ ၁၅:၁.

၂. ပကဘၣ်ဟးဆှဲး တၢ်ကတိၤ ဒ်လဲၣ်တကလုာ်လဲၣ်.

လံာ်စီဆှံ တဲဝဲလၢ “တဘၣ်ဒုးဟဲထီၣ် တၢ်ကတိၤ အအၢအသီ လၢသုကိာ်ပူၤတဂ့ၤ.” (ဖး အ့းဖ့းစူး ၄:၂၉.) လံာ်စီဆှံ တဆၢအံၤ အဲၣ်ဒိးတဲဝဲလၢ တၢ်ကတိၤလၢ အတဂ့ၤဘၣ်, တၢ်ကတိၤလၢ အလီၤရၢၢ် ဒီးတၢ်ကတိၤလၢ အမၤဆါပှၤသးန့ၣ် ပတဘၣ်တဲဘၣ်. ဒီးပကဘၣ်ဟးဆှဲး စ့ၢ်ကီး တၢ်တဲအီၣ်ခူသူၣ်ပှၤဂ့ၢ် ဒီးတၢ်တဲဟးဂီၤပှၤဂ့ၢ်.​—ဖး ကတိၤဒိ ၁၆:၂၈.

၃. ပတဲတၢ်လၢ အကဲထီၣ် တၢ်ဟ့ၣ်ဂံၢ်ဟ့ၣ်ဘါလၢ ပှၤဂၤအဂီၢ် ကသ့ဒ်လဲၣ်.

ညီနုၢ်န့ၣ် တၢ်လၢပတဲတဖၣ် ပာ်ဖျါထီၣ်ဝဲ ပတၢ်ဆိကမိၣ် ဒီးတၢ်လၢအအိၣ်လၢပသးပူၤ. (လူၤကၣ် ၆:၄၅) အဃိ ပကဘၣ်မၤလိပသးလၢ ပကဆိကမိၣ်တၢ်လၢအဂ့ၤ ဒ်သိးဒီး တၢ်လၢအတီအလိၤ, တၢ်လၢအစီအဆှံ, တၢ်လၢ အထိၣ်ဟူးထိၣ်ဂဲၤထီၣ်ပှၤလၢ ပကအဲၣ်တၢ် ဒီးတၢ်လၢ အလီၤစံးပတြၢၤတဖၣ်. (ဖံလံးပံၤ ၄:၈) ဒ်သိး ပကမၤဒ်န့ၣ်အဂီၢ် ပကဘၣ်ဃုထၢ တၢ်မၤမုာ်မၤဖှံသး လီၤတံၢ်လီၤဆဲး ဒီးပကဘၣ်ဃုထၢ ပသကိး လီၤတံၢ်လီၤဆဲး. (ကတိၤဒိ ၁၃:၂၀) ပမ့ၢ်မၤဒ်န့ၣ်မၣ် အကမၤစၢၤပှၤဒ်သိး တချုးလၢ ပတဲတၢ်ဒံးဘၣ်န့ၣ် ပကဆိကမိၣ်ထံဆိလၢ ပကတဲတၢ်မနုၤလဲၣ် ဒီးပကတဲတၢ် လၢပကလုၢ်ဒ်လဲၣ်. လံာ်စီဆှံတဲဝဲလၢ “တၢ်ကတိၤလၢ ပှၤတဆိကမိၣ်ဆိအီၤဘၣ်ဒီး တဲအီၤန့ၣ် လီၤဂာ်ဒ်သိးဒီး နးလၢအဆဲးတၢ်တဘ့ၣ်, မ့မ့ၢ် ပှၤကူၣ်တၢ်သ့ အပျ့ၤန့ၣ် မၤဘျါက့ၤတၢ်လီၤ.” (ကတိၤဒိ ၁၂:၁၈) အဃိ ဆိကမိၣ်ထံ ဘၣ်ဃးဒီး တၢ်လၢနကတဲတဖၣ်န့ၣ် ပှၤဂၤကတူၢ်ဘၣ်ဒ်လဲၣ်.

ဃုသ့ၣ်ညါအါထီၣ်

၄. ပလီၢ်နသးလၢ နတၢ်ကတိၤတဖၣ်

တဘျီတခီၣ်န့ၣ် ပတဲတၢ် တမံၤမံၤ ဝံၤဒီး လၢခံပတူၢ်ဘၣ်က့ၤ တမုာ်ဘၣ်. (ယၤကိာ် ၃:၂) ဖး ကလၤတံ ၅:​၂၂, ၂၃ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• ဒ်သိး နပလီၢ်နသးလၢ နတၢ်ကတိၤတဖၣ် ကသ့အဂီၢ် နအဲၣ်ဒိးဃ့ ယဟိဝၤယွၤလၢ အကဟ့ၣ်နၤ တၢ်ဂ့ၤတၢ်ဝါ ဖဲလဲၣ်တခါလဲၣ်. တၢ်ဂ့ၤတၢ်ဝါအံၤ ကမၤစၢၤနၤဒ်လဲၣ်.

ဖး ၁ ကရံၣ်သူး ၁၅:၃၃ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• နသကိးလၢနဃုထၢအီၤ ဒီးတၢ်မၤမုာ်မၤဖှံသးလၢ နဃုထၢအီၤန့ၣ် အမၤဟးဂီၤ နလုၢ်လၢ်လၢအဂ့ၤ သ့ဒ်လဲၣ်.

ဖး စံၣ်တဲၤတဲလီၤတၢ် ၃:​၁, ၇ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ပကဘၣ်အိၣ်ဘှ့ၣ်လၢ အဆၢကတီၢ်ဖဲလဲၣ် ဒီးပမ့ၢ်အိၣ်ခိး တုၤလၢ တၢ်ဆၢကတီၢ်လၢအဂ့ၤ မ့ၢ်ဘၣ်မၣ် ပတဲတၢ်န့ၣ် အကကဲဘျုးဒ်လဲၣ်.

၅. တဲပှၤဂ့ၢ်လၢအဂ့ၤ

တၢ်ဂီၤမူ– “ကတိၤတၢ်ဂ့ၤလၢ တၢ်မၤထီၣ်မၤထီပှၤဂၤတဖၣ်တက့ၢ်” (၄:၀၇)

• လၢတၢ်ဂီၤမူအပူၤ ဒီပုၢ်ဝဲၢ်ခွါတဂၤလၢ အတဲပှၤဂ့ၢ်လၢအတဂ့ၤဘၣ်န့ၣ် ဘၣ်မနုၤအဃိ အအဲၣ်ဒိး ဆီတလဲအသးလဲၣ်.

• ဒ်သိး အကဆီတလဲအသးအဂီၢ် အမၤဝဲဒ်လဲၣ်.

ဖး စံၣ်တဲၤတဲလီၤတၢ် ၇:၁၆ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ပမ့ၢ်အဲၣ်ဒိး တဲအီၣ်ပှၤဂ့ၢ်လၢ အတဂ့ၤဘၣ်န့ၣ် ပကဘၣ်သ့ၣ်နီၣ်ထီၣ် မနုၤလဲၣ်.

ဖး စံၣ်တဲၤတဲလီၤတၢ် ၇:​၂၁, ၂၂ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ပှၤတဂၤဂၤ မ့ၢ်တဲနဂ့ၢ်လၢ အတဂ့ၤဘၣ်န့ၣ် ဒ်သိးနသု တသးထီၣ်တၢ်တဂ့ၤအဂီၢ် လံာ်စီဆှံအဆၢတဖၣ်အံၤ မၤစၢၤနၤကသ့ဒ်လဲၣ်.

၆. ဖဲနတဲတၢ်ဒီး နဟံၣ်ဖိဃီဖိအခါ တဲတၢ်ဒီးအဝဲသ့ၣ်မုာ်မုာ်

တၢ်ဂီၤမူ– တၢ်အဲၣ် ဒီးတၢ်ယူးယီၣ်ပာ်ကဲန့ၣ် မၤဃူမၤဖိးဟံၣ်ဖိဃီဖိ (၃:၀၈)

• ဒ်သိး နကတဲတၢ်ဒီး နဟံၣ်ဖိဃီဖိ မုာ်မုာ်အဂီၢ် တၢ်မနုၤကမၤစၢၤနၤလဲၣ်.

ဖး အ့းဖ့းစူး ၄:​၃၁, ၃၂ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ဒ်သိး ပဟံၣ်ဖိဃီဖိ ကသ့ၣ်ညါဝဲလၢ ပပာ်လုၢ်ပာ်ပှ့ၤအီၤအဂီၢ် ပကဘၣ်တဲတၢ်ဒီးအီၤဒ်လဲၣ်.

ယဟိဝၤယွၤ တဲဖျါထီၣ်ဝဲလၢ အအဲၣ်အဖိခွါ ယ့ၣ်ၡူး. ဖး မးသဲ ၁၇:၅ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ဖဲနတဲတၢ်ဒီး နဟံၣ်ဖိဃီဖိအခါ နကွၢ်လိ ယဟိဝၤယွၤ ကသ့ဒ်လဲၣ်.

တၢ်ဂ့ၢ်လၢအရ့ဒိၣ်

တၢ်လၢပတဲန့ၣ် အကဲဘျုး မ့တမ့ၢ် အမၤဘၣ်ဒိပှၤဂၤအသးသ့. အဃိ ပကတဲမနုၤလဲၣ်, ပကတဲလၢ အဆၢကတီၢ်ဖဲလဲၣ် ဒီးပကတဲ လၢပကလုၢ်ဒ်လဲၣ်န့ၣ် ပကဘၣ်ဆိကမိၣ်ပာ်စၢၤ.

တၢ်ကွၢ်ကဒါက့ၤ

• ပတဲတၢ်လၢ အကဲထီၣ် တၢ်ဟ့ၣ်ဂံၢ်ဟ့ၣ်ဘါ လၢပှၤဂၤအဂီၢ် ကသ့ဒ်လဲၣ်.

• တၢ်ကတိၤ လၢပတဘၣ်တဲဘၣ်န့ၣ် မ့ၢ်တၢ်ကတိၤ ဒ်လဲၣ်တကလုာ်လဲၣ်.

• ဒ်သိး ပကတဲတၢ်မုာ်မုာ် ဒီးတဲတၢ်လၢ အဟ့ၣ်ဂံၢ်ဟ့ၣ်ဘါ ပှၤဂၤထီဘိအဂီၢ် တၢ်မနုၤကမၤစၢၤပှၤလဲၣ်.

ဃုသ့ၣ်ညါ

ဒ်သိး ပကတဲတၢ်လၢ အကဲထီၣ် တၢ်ဟ့ၣ်ဂံၢ်ဟ့ၣ်ဘါ လၢပှၤဂၤအဂီၢ် တၢ်မနုၤ ကမၤစၢၤပှၤလဲၣ်.

အိၣ်ဒီးပှၤကူၣ်တၢ်သ့အပျ့ၤ (၈:၀၄)

ဒ်သိး နသုတသူ တၢ်ကတိၤ လၢအတဂ့ၤဘၣ်အဂီၢ် တၢ်မနုၤ ကမၤစၢၤနၤလဲၣ်.

“တၢ်လၢ တၢ်ဆိၣ်တၢ်န့ၣ် အအၢဖးဒိၣ်ညါဧါ” (တၢ်မၤလိလၢ အအိၣ်လၢ online အဖီခိၣ်)

ဒ်သိး နသုတတဲအီၣ် ပှၤဂ့ၢ်တဂ့ၤအဂီၢ် နကဘၣ်မၤဒ်လဲၣ်.

ယပတုာ် တၢ်တဲအီၣ်ပှၤဂ့ၢ် ကသ့ဒ်လဲၣ် (၂:၃၆)

ဒ်သိး ပှၤတဂၤ သုတဆိၣ်တၢ်လၢၤတဂ့ၤအဂီၢ် ယဟိဝၤယွၤ မၤစၢၤအီၤဒ်လဲၣ်.

“ယစးထီၣ်ဆိကမိၣ်ထံက့ၤ ယတၢ်အိၣ်မူလၢ ခါဆူညါအဂီၢ်” (တၢ်ဂ့ၢ်လၢ အအိၣ်လၢ တၢးထီခိးတၢ် အပူၤ)