ပကြၢးတဲတၢ် လၢဆၢကတီၢ်ဖဲလဲၣ်

၁. စံၣ်တဲၤတဲလီၤတၢ် ၃:၁, ၇ သိၣ်လိပှၤ တၢ်မနုၤလဲၣ်.

ပဝဲတနီၤန့ၣ်​ ပတဲတၢ်ဆူၣ်လီၤ. ဒီးတနီၤန့ၣ်​ အဲၣ်ဒိးအိၣ်​ ကစုဒုလီၤ. လံာ်စီဆှံအဆၢလၢ တၢ်မၤလိအခီၣ်ထံးန့ၣ်​ ပာ်ဖျါထီၣ်ဝဲလၢ တၢ်ဆၢကတီၢ်အိၣ်ဝဲလၢ ပကတဲတၢ်အဂီၢ် ဒီးတၢ်ဆၢကတီၢ်လၢ ပကအိၣ်ဘှီၣ်အဂီၢ်လီၤ. (ဖး စံၣ်တဲၤတဲလီၤတၢ် ၃:၁, ၇ တက့ၢ်.) ဘၣ်သ့ၣ်သ့ၣ်​ ပကအဲၣ်ဒိးလၢ ပဒီပုၢ်ဝဲၢ်မုၣ်ခွါတနီၤ ကတဲတၢ်အါထီၣ်​ ဒီးမ့မ့ၢ် ပဒီပုၢ်ဝဲၢ်မုၣ်ခွါလၢ အဂၤတနီၤန့ၣ်​ ပကအဲၣ်ဒိးလၢ အဝဲသ့ၣ်​ ကတဲစှၤလီၤတၢ်လီၤ.

၂. ပကြၢးတဲတၢ်လၢ ဆၢကတီၢ်ဖဲလဲၣ်​ ဒီးပကြၢးတဲအီၤ ဒ်လဲၣ်န့ၣ်​ မတၤတဂၤ အိၣ်ဒီးတၢ်ခွဲးတၢ်ယာ်လၢ ကပာ်လီၤတၢ်ဘျၢလဲၣ်.

^၂ ယဟိဝၤယွၤ ဟ့ၣ်လီၤပှၤ တၢ်ဟ့ၣ်လၢအမ့ၢ် တၢ်သ့တၢ်ဘၣ်လၢ ပကတဲတၢ်န့ၣ်လီၤ. (၂ မိၤၡ့ ၄:၁၀, ၁၁; လီၣ်ဖျါ ၄:၁၁) ကစၢ်ယွၤ အကလုၢ်ကထါ မၤစၢၤပှၤဒ်သိး ပသူပတၢ်သ့တၢ်ဘၣ်အံၤ လၢကျဲလၢအကြၢးအဘၣ်​ ကသ့အဂီၢ်လီၤ. လၢတၢ်မၤလိအံၤအပူၤ ပကတဲသကိး ပှၤအဒိအတဲာ်လၢ လံာ်စီဆှံအပူၤ လၢကမၤစၢၤပှၤဒ်သိး ပကသ့ၣ်ညါလၢ ပကြၢးတဲတၢ်လၢ ဆၢကတီၢ်ဖဲလဲၣ်​ ဒီးပကြၢးအိၣ်ဘှီၣ်လၢ ဆၢကတီၢ်ဖဲလဲၣ်န့ၣ်လီၤ. ဒီးပကတဲသကိးစ့ၢ်ကီး ဘၣ်ဃးဒီးတၢ်လၢ ပတဲပှၤဂၤတဖၣ်န့ၣ်​ ယဟိဝၤယွၤ တူၢ်ဘၣ်ဝဲဒ်လဲၣ်န့ၣ်လီၤ. အဆိကတၢၢ်န့ၣ်​ ပကတဲသကိး ဘၣ်ဃးဒီး ပကြၢးတဲတၢ် လၢဆၢကတီၢ် ဖဲလဲၣ်န့ၣ်လီၤ.

ပကြၢးတဲတၢ် လၢဆၢကတီၢ်ဖဲလဲၣ်

၃. ဒ် ရိမ့ၤ ၁၀:၁၄ ပာ်ဖျါထီၣ်ဝဲအသိး ပကြၢးတဲတၢ် လၢဆၢကတီၢ်ဖဲလဲၣ်.

^၃ ထီဘိန့ၣ်​ ပကြၢးအိၣ်ကတဲာ်ကတီၤပာ်စၢၤပသး လၢပကတဲ ယဟိဝၤယွၤ ဒီးအဘီအမုၢ်အဂ့ၢ်လီၤ. (မးသဲ ၂၄:၁၄; ဖး ရိမ့ၤ ၁၀:၁၄ တက့ၢ်.) ဖဲပမၤဒ်န့ၣ်အခါ မ့ၢ်ဒၣ်ပကွၢ်လိမၤဒိး ယ့ၣ်ၡူးလီၤ. ဘၣ်မနုၤအဃိ ယ့ၣ်ၡူးဟဲလီၤလၢ ဟီၣ်ခိၣ်လဲၣ်န့ၣ်​ တၢ်ဂ့ၢ်လၢအရ့ဒိၣ်​ အိၣ်ဝဲအါမံၤလီၤ. လၢတၢ်ဂ့ၢ်တဖၣ်အံၤအကျါတခါန့ၣ်​ မ့ၢ်ဒ်သိး အကတဲဘၣ်ပှၤဂၤလၢ တၢ်မ့ၢ်တၢ်တီလၢ ဘၣ်ဃးဒီး အပၢ်န့ၣ်လီၤ. (ယိၤဟၣ်​ ၁၈:၃၇) ပကဘၣ်သ့ၣ်နီၣ်ထီၣ်လၢ ပတဲတၢ် ဒ်လဲၣ်ဒ်လဲၣ်​ န့ၣ်မ့ၢ်တၢ်လၢ အရ့ဒိၣ်စ့ၢ်ကီးလီၤ. အဃိ ဖဲပတဲဘၣ်ပှၤဂၤ လၢယဟိဝၤယွၤအဂ့ၢ်အခါ ပကဘၣ်တဲအီၤ “ကပုာ်လုး” ဒီးလၢ “တၢ်ပာ်ကဲအပူၤ” ဒီးပကဘၣ်ဆိကမိၣ်န့ၢ်တၢ်လၢ အဝဲသ့ၣ်အဂီၢ် ဘၣ်ဃးဒီး အဝဲသ့ၣ်​ ကတူၢ်ဘၣ်ဝဲဒ်လဲၣ်​ ဒီးအတၢ်နာ် အိၣ်ဒ်လဲၣ်န့ၣ်လီၤ. (၁ ပ့းတရူး ၃:၁၅, ခ့ခါစှီၤကျိာ်) ဖဲပတဲတၢ်ဒီး ပှၤဂၤအခါ ပမ့ၢ်မၤဒ်န့ၣ်န့ၣ်​ ကလီၤဂာ်ဒ်သိး ပတဲသကိးတၢ်ဒီး အဝဲသ့ၣ်​ တကးဒံးဘၣ်​ ကလီၤဂာ်ဒ် ပသိၣ်လိအဝဲသ့ၣ်​ ဒီးဘၣ်သ့ၣ်သ့ၣ်​ အဝဲသ့ၣ်​ ကဘၣ်သူၣ်ဘၣ်သးဝဲ တၢ်ဂ့ၢ်လၢ ပတဲအီၤတဖၣ်လီၤ.

၄. ဒ် ကတိၤဒိ ၉:၉ တဲဝဲအသိး တၢ်လၢပတဲအီၤတဖၣ်န့ၣ်​ ကဲထီၣ်တၢ်မၤစၢၤ လၢပှၤဂၤအဂီၢ်သ့ဒ်လဲၣ်.

^၄ တၢ်အိၣ်ဖှိၣ်သးပှၢ်တဖၣ်​ မ့ၢ်ထံၣ်ဝဲလၢ ဒီပုၢ်ဝဲၢ်မုၣ်ခွါတဂၤဂၤ လိၣ်ဘၣ်တၢ်ဟ့ၣ်ကူၣ်န့ၣ်​ အဝဲသ့ၣ်​ တကြၢးမၤယံာ်မၤနီၢ်အသး လၢကဟ့ၣ်ကူၣ်အီၤဘၣ်. ဘၣ်ဆၣ်​ ဒ်သိးပှၤတဂၤအံၤ သုတတူၢ်ဘၣ်​ တၢ်မဲာ်ဆှးတဂ့ၤအဂီၢ် အဝဲသ့ၣ်​ တဟ့ၣ်ကူၣ်ဝဲလၢ ပှၤမဲာ်ညါဘၣ်​ ဒီးကအဲၣ်ဒိးအိၣ်ခိးဝဲ တၢ်ဆၢကတီၢ်လၢ အကြၢးအဘၣ်လီၤ. ထီဘိန့ၣ်​ တၢ်အိၣ်ဖှိၣ်သးပှၢ်တဖၣ်​ ကတဲတၢ်ဒီးပှၤဂၤ လၢတၢ်ပာ်ကဲအပူၤလီၤ. တၢ်အိၣ်ဖှိၣ်သးပှၢ်တဖၣ်​ ကပၠးပှၤဂၤလၢ လံာ်စီဆှံအတၢ်ဟံးစုနဲၣ်ကျဲ ဒ်သိးကမၤစၢၤ အဝဲသ့ၣ်လၢ ကမၤတၢ်လၢ တၢ်ကူၣ်သ့အပူၤအဂီၢ်လီၤ. (ဖး ကတိၤဒိ ၉:၉ တက့ၢ်.) ဖဲပဟ့ၣ်ကူၣ်ပှၤဂၤအခါ ဘၣ်မနုၤအဃိ အရ့ဒိၣ်လၢ ပကဘၣ်အိၣ်ဒီး တၢ်သူၣ်ဒူသးဒူလဲၣ်. ဆိကမိၣ်ကွၢ် တၢ်အိၣ်သးလၢ အလီၤဆီလိာ်အသး ခံမံၤအံၤန့ၣ်တက့ၢ်. တၢတမံၤန့ၣ်​ ပှၤပိာ်ခွါတဂၤ ကဘၣ်ဘှီဘၣ်ထီၣ်က့ၤအဖိခွါ ဒီးတၢ်အိၣ်သးလၢအဂၤတမံၤန့ၣ်​ ပှၤပိာ်မုၣ်တဂၤ ကဘၣ်လဲၤတဲဝဲလၢ ပှၤလၢအကကဲထီၣ်စီၤပၤတဂၤန့ၣ်​ အတၢ်ဆၢတဲာ်ကမၣ်လီၤ.

၅. စီၤဧ့လံၤ ကြၢးတဲတၢ် လၢဆၢကတီၢ်ဖဲလဲၣ်​ ဒီးအဝဲတဲဝဲဧါ.

^၅ ပှၤလုၢ်တၢ်ခိၣ်အဒိၣ်ကတၢၢ် စီၤဧ့လံၤန့ၣ်​ အိၣ်ဒီးအဖိခွါခံဂၤလၢ အအဲၣ်ဝဲဒိၣ်မးလီၤ. ဘၣ်ဆၣ်​ အဖိခွါခံဂၤအံၤ တပာ်ကဲ ယဟိဝၤယွၤဘၣ်. အဝဲသ့ၣ်​ မ့ၢ်ပှၤလုၢ်တၢ်အဒိၣ်​ လၢအမၤတၢ် လၢဒဲစီဆှံအဃိ အဝဲသ့ၣ်​ အိၣ်ဒီးမူဒါ လၢအရ့ဒိၣ်ဒိၣ်မးလီၤ. ဘၣ်ဆၣ်​ အဝဲသ့ၣ်​ သူကမၣ်အတၢ်ခွဲးတၢ်ယာ်, တပာ်ကဲဝဲ တၢ်လုၢ်လၢ ပှၤဟဲဟ့ၣ်လုၢ်ထီၣ်လၢ ယဟိဝၤယွၤအဂီၢ်န့ၣ်ဘၣ်​ ဒီးမၤကမၣ်မုၣ်ကမၣ်ခွါလီၤ. (၁ ၡမူၤအ့လး ၂:၁၂-၁၇, ၂၂) လၢတၢ်န့ၣ်အဃိ ဒ်စီၤမိၤၡ့ အတၢ်သိၣ်တၢ်သီအိၣ်ဝဲအသိး စီၤဧ့လံၤအဖိခွါတဖၣ်အံၤန့ၣ်​ ကြၢးသံဝဲလီၤ. ဘၣ်ဆၣ်​ စီၤဧ့လံၤန့ၣ်​ တသိၣ်အဖိခွါတဖၣ်အံၤ ဃံးဃံးဘၣ်​ ဒီးဟ့ၣ်အခွဲးလၢ အဝဲသ့ၣ်​ ကဆဲးမၤယွၤအတၢ်မၤ လၢဒဲစီဆှံလီၤ. (၅ မိၤၡ့ ၂၁:၁၈-၂၁) လၢတၢ်န့ၣ်အဃိ ယဟိဝၤယွၤတဲဝဲ စီၤဧ့လံၤလၢန “မၤလၤကပီၤ နဖိခွါတဖၣ်လၢ ယဖီခိၣ်” လီၤ. ဒီးယဟိဝၤယွၤ ဆၢတဲာ်လီၤအသးလၢ ကစံၣ်ညီၣ်သံ စီၤဧ့ၤလံၤအဖိခွါ လၢအအၢအသီခံဂၤအံၤလီၤ.—၁ ၡမူၤအ့လး ၂:၂၉, ၃၄.

၆. ပန့ၢ်ဘၣ်​ တၢ်မၤလိမနုၤလၢ စီၤဧ့လံၤအဒိအတဲာ်လဲၣ်.

^၆ ပန့ၢ်ဘၣ်​ တၢ်မၤလိမနုၤလၢ စီၤဧ့လံၤအအိၣ်လဲၣ်. ပမ့ၢ်သ့ၣ်ညါလၢ ပသကိး မ့တမ့ၢ် ပဘူးပတံၢ်တဂၤဂၤ မၤကမၣ်​ ကစၢ်ယွၤ အတၢ်သိၣ်တၢ်သီန့ၣ်​ ပကဘၣ်​ ဒုးသ့ၣ်နီၣ်ထီၣ်အီၤလၢ ယဟိဝၤယွၤ အတၢ်ဘျၢတဖၣ်လီၤ. ဒီးပကဘၣ်မၤစၢၤအီၤဒ်သိး အဝဲကဒိးန့ၢ်ဘၣ်​ တၢ်မၤစၢၤလၢ ပှၤလၢယဟိဝၤယွၤ ဃုထၢထီၣ်အီၤတဖၣ်​ အအိၣ်လီၤ. (ယၤကိာ် ၅:၁၄) ပတအဲၣ်ဒိး လီၤဂာ်ဒ် စီၤဧ့လံၤဘၣ်အဃိ ပတမၤလၤကပီၤ ပသကိးတဂၤဂၤ မ့တမ့ၢ် ပဘူးပတံၢ်တဂၤဂၤ ဒိၣ်န့ၢ်ဒံး ယဟိဝၤယွၤနီတဘျီဘၣ်. ဒ်သိးပကတဲတၢ်ဒီး ပှၤလၢအလိၣ်ဘၣ်​ တၢ်ဘှီဘၣ်ထီၣ်က့ၤအီၤတဂၤအဂီၢ် ပလိၣ်ဘၣ်​ တၢ်သူၣ်ဒူသးဒူ ဘၣ်ဆၣ်​ ပမ့ၢ်ဂုာ်ကျဲးစၢးမၤဒ်န့ၣ်န့ၣ်​ ကကဲဘျုးဝဲ ဒိၣ်မးလီၤ. ဆိကမိၣ်ကွၢ် စီၤဧ့လံၤ ဒီးအံၣ်စရ့လးမုၣ်​ နီၢ်အဘံၤကါယံးလး အဒိအတဲာ်န့ၣ်​ လီၤဆီလိာ်သး ဒ်လဲၣ်န့ၣ်တက့ၢ်.

၇. ဘၣ်မနုၤအဃိ နီၢ်အဘံၤကါယံးလး လဲၤတဲတၢ်ဒီး စီၤဒၤဝံးလဲၣ်.

^၇ နီၢ်အဘံၤကါယံးလးမ့ၢ်ဝဲ စီၤနၤဘလး အမါလီၤ. စီၤနၤဘလး မ့ၢ်ပှၤလၢအအိၣ်ဒီး ဟီၣ်ခိၣ်လီၢ်အါမးလီၤ. ဖဲစီၤဒၤဝံး ဒီးအခ့အပှၤတဖၣ်​ ဃ့ၢ်ပူၤဖျဲးအသးလၢ စီၤပၤစီလူး အစုပူၤအခါ အဝဲသ့ၣ်​ ကွၢ်ထွဲစၢၤ စီၤနၤဘလး အသိဒီး ဒီသဒၢန့ၢ် အဆၣ်ဖိကီၢ်ဖိတဖၣ်လၢ တမျာ်တဖၣ်လီၤ. ဘၣ်ဆၣ်​ မ့ၢ်စီၤနၤဘလး ပာ်ဖျါထီၣ်​ တၢ်စံးဘျုးစံးဖှိၣ်လၢ အဝဲသ့ၣ်အဖီခိၣ်ဧါ. တပာ်ဖျါထီၣ်ဝဲဘၣ်. ဖဲစီၤဒၤဝံးဃ့ဝဲ စီၤနၤဘလး လၢကဟ့ၣ်အီၤဒီးအခ့အပှၤတဖၣ်​ လၢတၢ်အီၣ်တၢ်အီ တစဲးတမှဲးအခါ စီၤနၤဘလး အသးဒိၣ်ထီၣ်ဒိၣ်မး ဒီးကိးဃါအဝဲသ့ၣ်လီၤ. (၁ ၡမူၤအ့လး ၂၅:၅-၈, ၁၀-၁၂, ၁၄) လၢတၢ်န့ၣ်အဃိ စီၤဒၤဝံး ပာ်လီၤအသးလၢ ကလဲၤမၤသံ ပိာ်ခွါလၢအအိၣ်လၢ စီၤနၤဘလး အဟံၣ်ကိးဂၤဒဲးလီၤ. (၁ ၡမူၤအ့လး ၂၅:၁၃, ၂၂) ပှၤပူၤဖျဲးဒီး တၢ်အိၣ်သးလၢ အလီၤဘၣ်ယိၣ်တခါအံၤ ကသ့ဒ်လဲၣ်. နီၢ်အဘံၤကါယံးလး သ့ၣ်ညါဝဲလၢ တၢ်ဆၢကတီၢ် လၢအကဘၣ်တဲတၢ် တုၤဃီၤလံအဃိ လၢတၢ်သူၣ်ဒူသးဒူအပူၤ အဝဲလဲၤသဂၢၢ် ပှၤပိာ်ခွါ ၄၀၀ လၢအသးဒိၣ်ထီၣ်တၢ်, အအဲၣ်ဒိးအီၣ်တၢ်, အအိၣ်ဒီးတၢ်စုကဝဲၤ ဒီးတဲတၢ်ဒီးစီၤဒၤဝံးလီၤ.

၈. ပမၤလိန့ၢ် တၢ်မနုၤလၢ နီၢ်အဘံၤကါယံးလးအအိၣ်လဲၣ်.

^၈ ဖဲနီၢ်အဘံၤကါယံးလး ထံၣ်လိာ်သးဒီး စီၤဒၤဝံးအခါ လၢတၢ်သူၣ်ဒူသးဒူအပူၤ အဝဲတဲတၢ်ဒီး စီၤဒၤဝံးလၢ တၢ်ပာ်ကဲ ဒီးတဲဝဲဒ်သိး စီၤဒၤဝံး အသးကလီၤအဂီၢ်လီၤ. နီၢ်အဘံၤကါယံးလး တဒုးအိၣ်ထီၣ်​ တၢ်ကီတၢ်ခဲတခါအံၤဘၣ်​ သနာ်က့ အဝဲဃ့ဝံသးစူၤ စီၤဒၤဝံးလီၤ. နီၢ်အဘံၤကါယံးလး တဲဖျါထီၣ်​ စီၤဒၤဝံးအတၢ်ဂ့ၤတၢ်ဝါတဖၣ်​ ဒီးသန့ၤအသးလၢ ယဟိဝၤယွၤလီၤ. (၁ ၡမူၤအ့လး ၂၅:၂၄, ၂၆, ၂၈, ၃၃, ၃၄) ဒ်နီၢ်အဘံၤကါယံးလးအသိး ဖဲပသ့ၣ်ညါလၢ ပှၤတဂၤ လဲၤကျဲလၢ အလီၤဘၣ်ယိၣ်အခါ ပကဘၣ်အိၣ်ဒီး တၢ်သူၣ်ဒူသးဒူ ဒ်သိးပကတဲတၢ်ဒီးအီၤအဂီၢ်လီၤ. (စံးထီၣ်ပတြၢၤ ၁၄၁:၅) ပကဘၣ်တဲတၢ်လၢ တၢ်ပာ်ကဲအပူၤ ဘၣ်ဆၣ်ပကဘၣ်အိၣ်ဒီး တၢ်သးဒူစ့ၢ်ကီးလီၤ. ဖဲပသ့ၣ်ညါလၢ ပှၤတဂၤလိၣ်ဘၣ်​ တၢ်ဟ့ၣ်ကူၣ်အခါ ပမ့ၢ်ဟ့ၣ်ကူၣ်အီၤလၢ တၢ်အဲၣ်တၢ်ကွံအပူၤန့ၣ်​ ပပာ်ဖျါထီၣ်လၢ ပမ့ၢ်အတံၤသကိးလၢ အဂ့ၤတဂၤလီၤ.—ကတိၤဒိ ၂၇:၁၇.

၉-၁၀. ဖဲတၢ်အိၣ်ဖှိၣ်သးပှၢ်တဖၣ်​ ဟ့ၣ်ကူၣ်ပှၤဂၤအခါ အဝဲသ့ၣ်​ ကြၢးသ့ၣ်နီၣ်ထီၣ်ဝဲ တၢ်မနုၤလဲၣ်.

^၉ လီၤဆီဒၣ်တၢ် တၢ်အိၣ်ဖှိၣ်သးပှၢ်တဖၣ်​ ကဘၣ်အိၣ်ဒီး တၢ်သူၣ်ဒူသးဒူ ဒ်သိးကတဲတၢ်ဒီး ဒီပုၢ်ဝဲၢ်မုၣ်ခွါလၢ အလဲၤကျဲကမၣ်တဖၣ်အဂီၢ်လီၤ. (ကလၤတံ ၆:၁) တၢ်အိၣ်ဖှိၣ်သးပှၢ်တဖၣ်န့ၣ်​ အိၣ်ဒီးတၢ်ဆီၣ်လီၤသး ဒီးအဝဲသ့ၣ်​ သ့ၣ်ညါဝဲလၢ အမ့ၢ်ပှၤလၢ အတလၢတပှဲၤဘၣ်အဃိ မုၢ်ကအိၣ်တနံၤန့ၣ်​ ဘၣ်သ့ၣ်သ့ၣ်​ အဝဲသ့ၣ်​ ကလိၣ်ဘၣ်​ ပှၤဂၤအတၢ်ဟ့ၣ်ကူၣ်လီၤ. ဘၣ်ဆၣ်​ အဝဲသ့ၣ်​ တကြၢးပျဲဝဲလၢ တၢ်ဂ့ၢ်တဖၣ်အံၤ ကထုးဃၢအီၤဒ်သိး ကသိၣ်က့ၤသီက့ၤဝဲ ပှၤလၢအလိၣ်ဘၣ်​ တၢ်သိၣ်က့ၤသီက့ၤန့ၣ်ဘၣ်. (၂ တံၤမသ့း ၄:၂; တံတူး ၁:၉) ဖဲအဝဲသ့ၣ်​ ဟ့ၣ်ကူၣ်ပှၤဂၤအခါ အဝဲသ့ၣ်ဂုာ်ကျဲးစၢး တဲတၢ်သ့သ့ဘၣ်ဘၣ်​ ဒီးအိၣ်ဒီးတၢ်သူၣ်စူၤသးစူၤလီၤ. တၢ်အိၣ်ဖှိၣ်သးပှၢ်တဖၣ်​ အဲၣ်ဝဲအဒီပုၢ်ဝဲၢ်အံၤအဃိ သးအိၣ်မၤစၢၤဝဲလီၤ. (ကတိၤဒိ ၁၃:၂၄) ဘၣ်ဆၣ်​ တၢ်လၢအရ့ဒိၣ်ကတၢၢ်န့ၣ်​ တၢ်အိၣ်ဖှိၣ်သးပှၢ်တဖၣ်​ အဲၣ်ဒိးမၤလၤကပီၤ ယဟိဝၤယွၤလီၤ. အဃိ အဝဲသ့ၣ်​ မၤထွဲကစၢ်ယွၤ အတၢ်ဘျၢ ဒီးဒီသဒၢဝဲ တၢ်အိၣ်ဖှိၣ်လီၤ.—မၤတၢ် ၂၀:၂၈.

^၁၀ ပတဲသကိး တၢ်ဂ့ၢ်လၢ ဘၣ်ဃးဒီး ပကဘၣ်တဲတၢ်လၢ ဆၢကတီၢ်ဖဲလဲၣ်ဝံၤလံ. ဘၣ်ဆၣ်​ တဘျီတခီၣ်​ ပမ့ၢ်တတဲတၢ်နီတမံၤဘၣ်န့ၣ်​ မ့ၢ်တၢ်လၢ အဂ့ၤကတၢၢ် လၢပဂီၢ်လီၤ. ဖဲပထံၣ်ဘၣ်​ တၢ်အိၣ်သးဒ်န့ၣ်အခါ ဘၣ်မနုၤအဃိ ကကီလၢ ပကပၢၤဃာ်ပထးခိၣ်အဂီၢ်လဲၣ်.

ပကြၢးအိၣ်ဘှီၣ်​ လၢဆၢကတီၢ်ဖဲလဲၣ်

၁၁. စီၤယၤကိာ် တဲဘၣ်ပှၤ တၢ်အဒိမနုၤလဲၣ်​ ဒီးတၢ်အဒိတခါအံၤန့ၣ်​ ဘၣ်ထွဲလိာ်အသးဒီး ပတၢ်စံးတၢ်ကတိၤ ဒ်လဲၣ်.

^၁၁ တဘျီတခီၣ်​ ပကပၢၤပထးခိၣ်အဂီၢ် တညီဘၣ်. ဘၣ်ဃးဒီး တၢ်ဂ့ၢ်ကီတခါအံၤန့ၣ်​ စီၤယၤကိာ်သူဝဲ တၢ်အဒိလၢ အကြၢးအဘၣ်တခါလီၤ. အဝဲတဲဝဲလၢ “ပှၤမ့ၢ်တမၤကမၣ်​ ဘၣ်လၢတၢ်ကတိၤ ဘၣ်တဂၤဂၤဒီး, အဝဲဒၣ်န့ၣ်​ မ့ၢ်ပှၤအလၢအပှဲၤတဂၤ, ဒီးမၤနၢၤ အနီၢ်ခိဒီဂၤညါ သ့စ့ၢ်ကီးလီၤ.” (ယၤကိာ် ၃:၂, ၃) တၢ်လၢကသ့ၣ်ထးအ့ၣ်န့ၣ်​ ပှၤထီထီၣ်အီၤလၢ ကသ့ၣ်အခိၣ်လိၤ ဒီးဘျးအီၤလၢ အကိာ်ပူၤလီၤ. ပှၤနီကသ့ၣ်တဖၣ်​ မ့ၢ်ထုးဝဲကသ့ၣ်အပျံၤန့ၣ်​ အမၢကသ့ၣ်ဃ့ၢ် မ့တမ့ၢ် မၢအအိၣ်ပတုာ်သ့လီၤ. အဝဲမ့ၢ်တဖီၣ်ဃာ် ကသ့ၣ်အပျံၤန့ၣ်​ ကသ့ၣ်ဃ့ၢ် ဖဲအသးသ့လီၤ. အဃိ ကသ့ၣ်ဒီးပှၤဒိးကသ့ၣ်​ ကဘၣ်ဒိဘၣ်ထံးလီၤ. ဒ်န့ၣ်အသိး ပမ့ၢ်တပၢၤ ပပျ့ၤဘၣ်န့ၣ်​ ပကဒုးအိၣ်ထီၣ်​ တၢ်ကီတၢ်ခဲအါမးလီၤ. ပကတဲသကိး ဘၣ်ဃးဒီး တၢ်ဆၢကတီၢ်လၢ ပကဘၣ်ပၢၤဃာ် ပထးခိၣ်​ ဒီးပတဘၣ်တဲတၢ်ဘၣ်န့ၣ်လီၤ.

၁၂. ပကြၢးပၢၤဃာ်ပထးခိၣ်​ လၢဆၢကတီၢ်ဖဲလဲၣ်.

^၁၂ နမ့ၢ်ထံၣ်ဘၣ်ဒီး ဒီပုၢ်ဝဲၢ်မုၣ်​ မ့တမ့ၢ် ဒီပုၢ်ဝဲၢ်ခွါတဂၤဂၤ လၢအသ့ၣ်ညါ တၢ်ဂ့ၢ်ခူသူၣ်န့ၣ်​ နကမၤဒ်လဲၣ်. အဒိ နမ့ၢ်ထံၣ်ဘၣ်ဒီး ပှၤတဂၤဂၤ လၢအအိၣ်လၢ ထံကီၢ်လၢပှၤတြီဃာ် ပတၢ်ဖံးတၢ်မၤန့ၣ်​ မ့ၢ်နကအဲၣ်ဒိးသံကွၢ်အီၤလၢ ဖဲအဝဲအထံအကီၢ်န့ၣ်​ ပှၤမၤပတၢ်ဖံးတၢ်မၤတဖၣ်​ ဒ်လဲၣ်န့ၣ်ဧါ. တမ့ၢ်လၢ နအဲၣ်ဒိးမၤဘၣ်ဒိအီၤအဃိ နသံကွၢ်အီၤဘၣ်. ပအဲၣ်ပဒီပုၢ်ဝဲၢ်မုၣ်ခွါတဖၣ်​ ဒီးပအဲၣ်ဒိးသ့ၣ်ညါ တၢ်လၢအကဲထီၣ်အသးဒီး အဝဲသ့ၣ်န့ၣ်လီၤ. ဒီးပအဲၣ်ဒိး ဃ့ထုကဖၣ်န့ၢ်တၢ်လၢအဂီၢ် လီၤတံၢ်လီၤဆဲးအဃိ ပကအဲၣ်ဒိးသံကွၢ်အီၤဒ်န့ၣ်လီၤ. ဘၣ်ဆၣ်​ ဖဲန့ၣ်အဆၢကတီၢ် ပကဘၣ်ပၢၤဃာ် ပထးခိၣ်လီၤ. ပမ့ၢ်မၢဆူၣ်ပှၤတဂၤဂၤ လၢအသ့ၣ်ညါပာ်စၢၤ တၢ်ဂ့ၢ်ခူသူၣ်န့ၣ်​ မ့ၢ်ဒၣ်ပပာ်ဖျါထီၣ်လၢ ပတအဲၣ်ပဒီပုၢ်ဝဲၢ်တဂၤအံၤ ဒီးပဒီပုၢ်ဝဲၢ်မုၣ်ခွါအဂၤလၢ အနာ်လၢ အကပာ်ခူသူၣ်​ တၢ်ဂ့ၢ်တဖၣ်အံၤန့ၣ်လီၤ. ပဝဲတဂၤဂ့ၤတဂၤဂ့ၤ ပတအဲၣ်ဒိးမၤအါထီၣ်​ ပဒီပုၢ်ဝဲၢ်မုၣ်ခွါလၢ အအိၣ်လၢတၢ်လီၢ်လၢ ပှၤတြီဃာ်ပတၢ်ဖံးတၢ်မၤတဖၣ်​ အတၢ်ကီတၢ်ခဲဘၣ်. ဒ်န့ၣ်အသိး ဒီပုၢ်ဝဲၢ်မုၣ်ခွါ လၢအအိၣ်လၢ ထံကီၢ်ဖဲန့ၣ်တဖၣ်စ့ၢ်ကီး တမ့ၢ်လၢကတဲဘၣ်ပှၤဂၤလၢ ပဒီပုၢ်ဝဲၢ်လၢ အအိၣ်ဖဲန့ၣ်တဖၣ်​ ဟးစံၣ်တဲၤတဲလီၤတၢ် မ့တမ့ၢ် မၤပတၢ်ဖံးတၢ်မၤတဖၣ်​ ဒ်လဲၣ်န့ၣ်ဘၣ်.

၁၃. ဒ် ကတိၤဒိ ၁၁:၁၃ တဲဝဲအသိး တၢ်အိၣ်ဖှိၣ်သးပှၢ်တဖၣ်​ တဘၣ်မၤဝဲ တၢ်မနုၤလဲၣ်​ ဒီးဘၣ်မနုၤအဃိလဲၣ်.

^၁၃ လီၤဆီဒၣ်တၢ် တၢ်အိၣ်ဖှိၣ်သးပှၢ်တဖၣ်န့ၣ်​ ကဘၣ်မၤထွဲ တၢ်ဟ့ၣ်ကူၣ်ဖဲ ကတိၤဒိ ၁၁:၁၃ အပူၤလီၤ. (ဖးတက့ၢ်.) ပှၤလၢအတကြၢးသ့ၣ်ညါ တၢ်ဂ့ၢ်တၢ်ကျိၤတဖၣ်န့ၣ်​ အဝဲသ့ၣ်​ တတဲပၠးဝဲဘၣ်. လီၤဆီဒၣ်တၢ် တၢ်အိၣ်ဖှိၣ်သးပှၢ်တဖၣ်​ လၢအဆီဟံၣ်ဆီဃီန့ၣ်​ ကကီလၢ အဝဲသ့ၣ်အဂီၢ်တစဲးလီၤ. ပှၤနီၢ်ဒီမါဝၤတဖၣ်န့ၣ်​ မၤဂၢၢ်ကျၢၤထီၣ်အတၢ်ရ့လိာ်သး ခီဖျိတဲသကိး အတၢ်ဆိကမိၣ်, အတၢ်တူၢ်ဘၣ်​ ဒီးအတၢ်ကိၢ်တၢ်ဂီၤတဖၣ်လီၤ. ဘၣ်ဆၣ်​ တၢ်အိၣ်ဖှိၣ်သးပှၢ်တဖၣ်န့ၣ်​ တဘၣ်တဲဘၣ်အမါလၢ ပှၤအဂၤလၢ တၢ်အိၣ်ဖှိၣ်ပူၤတဖၣ်​ အတၢ်ဂ့ၢ်ခူသူၣ်ဘၣ်. အဝဲသ့ၣ်​ မ့ၢ်တဲဝဲန့ၣ်​ ဒီပုၢ်ဝဲၢ်တဖၣ်အံၤ နာ်န့ၢ်အီၤတသ့လၢၤဘၣ်​ ဒီးကမၤဘၣ်ဒိ အမံၤဂ့ၤသၣ်ဂ့ၤလီၤ. ပှၤလၢအဒိးန့ၢ်ဘၣ်မူဒါလၢ တၢ်အိၣ်ဖှိၣ်ပူၤတဖၣ်န့ၣ်​ တကြၢးမ့ၢ်ပှၤလၢ အအိၣ်ဒီး “အပျ့ၤခံဘ့ၣ်” မ့တမ့ၢ် ပှၤလၢအလံၣ်တၢ်လီတၢ်ဘၣ်. (၁ တံၤမသ့း ၃:၈) အခီပညီန့ၣ်​ အဝဲသ့ၣ်​ တကြၢးတဲလံၣ်တဲလီ မ့တမ့ၢ် တဲအီၣ်ပှၤဂၤအဂ့ၢ်ဘၣ်. တၢ်အိၣ်ဖှိၣ်သးပှၢ်တဂၤ မ့ၢ်အဲၣ်အမါန့ၣ်​ အဝဲတတဲဘၣ်အမါလၢ တၢ်ဂ့ၢ်တၢ်ကျိၤလၢ အမါတကြၢးသ့ၣ်ညါဝဲန့ၣ်ဘၣ်.

၁၄. တၢ်အိၣ်ဖှိၣ်သးပှၢ်တဖၣ်န့ၣ်​ အမါမၤစၢၤအီၤ လၢအကပၢၤဃာ် အမံၤဂ့ၤသၣ်ဂ့ၤ ကသ့ဒ်လဲၣ်.

^၁၄ မါတဂၤ ကမၤစၢၤအဝၤ လၢကပၢၤဃာ် မံၤဂ့ၤသၣ်ဂ့ၤ ခီဖျိတမၢဆူၣ်အဝၤလၢ ကတဲဘၣ်အီၤ တၢ်ဂ့ၢ်ခူသူၣ်န့ၣ်ဘၣ်. အဝဲမ့ၢ်မၤဝဲဒ်န့ၣ်န့ၣ်​ မ့ၢ်ဒၣ်အဆီၣ်ထွဲမၤစၢၤအဝၤ တကးဒံးဘၣ်​ အပာ်ကဲ ပှၤလၢအဟဲတဲဘၣ်အဝၤ လၢတၢ်ဂ့ၢ်ခူသူၣ်န့ၣ်လီၤ. ဒီးတၢ်လၢ အရ့ဒိၣ်ကတၢၢ်န့ၣ်​ မ့ၢ်ဒၣ်အဝဲ မၤသးခု ယဟိဝၤယွၤအသး ခီဖျိအမၤစၢၤ တၢ်အိၣ်ဖှိၣ်​ ဒ်သိးကအိၣ်ဒီး တၢ်ဃူတၢ်ဖိးအဂီၢ်လီၤ.—ရိမ့ၤ ၁၄:၁၉.

ဘၣ်ဃးဒီး တၢ်လၢပတဲအီၤတဖၣ်န့ၣ်​ ယဟိဝၤယွၤ တူၢ်ဘၣ်ဝဲဒ်လဲၣ်

၁၅. ဘၣ်ဃးဒီး တၢ်လၢစီၤယိၤဘး အသကိးသၢဂၤတဲဝဲန့ၣ်​ ယဟိဝၤယွၤ တူၢ်ဘၣ်ဝဲဒ်လဲၣ်​ ဒီးဘၣ်မနုၤအဃိလဲၣ်.

^၁၅ ဘၣ်ဃးဒီး ပကြၢးတဲတၢ်ဒ်လဲၣ်​ ဒီးပကြၢးတဲအီၤလၢ ဆၢကတီၢ်ဖဲလဲၣ်န့ၣ်​ ပမၤလိန့ၢ်တၢ်လၢ လံာ်ယိာ်ဘးအပူၤအါမးလီၤ. ဖဲစီၤယိၤဘး ထံၣ်ဘၣ်ဒီး တၢ်လီၤသူၣ်အုးသးအုး ဖးဒိၣ်ဝံၤအလီၢ်ခံ ပှၤပိာ်ခွါလွံၢ်ဂၤ ဟဲမၤမုာ်ထီၣ်အီၤ ဒီးဟ့ၣ်ကူၣ်ဟ့ၣ်ဖးအီၤလီၤ. ပှၤပိာ်ခွါတဖၣ်အံၤန့ၣ်​ အိၣ်ဘှီၣ်ဖးယံာ်ညါလီၤ. လၢအဝဲသ့ၣ်အကျါ သၢဂၤန့ၣ်​ အမံၤမ့ၢ်ဝဲ စီၤအလံဖးစး, စီၤဘံးလဒး ဒီးစီၤစိဖၢ်လီၤ. လၢခံတၢ်လၢ ပှၤသၢဂၤအံၤ တဲဝဲတဖၣ်န့ၣ်​ ပာ်ဖျါထီၣ်ဝဲလၢ ဖဲအဝဲသ့ၣ်​ အိၣ်ဘှီၣ်အခါ တဆိကမိၣ်ဝဲလၢ အကဘၣ်မၤစၢၤ စီၤယိၤဘး ဒ်လဲၣ်န့ၣ်ဘၣ်. လၢတၢ်န့ၣ်အလီၢ် အဝဲသ့ၣ်​ ဆိကမိၣ်ဝဲလၢ အကဘၣ်ပာ်ဖျါထီၣ်ဝဲလၢ စီၤယိၤဘး မၤကမၣ်တ့ၢ်တၢ် ဒ်လဲၣ်န့ၣ်လီၤ. တၢ်လၢအဝဲသ့ၣ်​ တဲဝဲတနီၤန့ၣ်​ ဘၣ်ဘၣ်ဆၣ်​ တၢ်လၢအဝဲသ့ၣ်တဲဝဲ ဘၣ်ဃးဒီး စီၤယိၤဘး ဒီးယဟိဝၤယွၤအဂ့ၢ်န့ၣ်​ အါတက့ၢ် အကမၣ်​ ဒီးတအိၣ်ဒီး တၢ်အဲၣ်တၢ်ကွံဘၣ်. အဝဲသ့ၣ်​ ပာ်ဒ့ၣ်ပာ်ကမၣ်​ စီၤယိၤဘးလၢ စီၤယိၤဘးန့ၣ်​ တမ့ၢ်ပှၤလၢအဂ့ၤဘၣ်. (ယိၤဘး ၃၂:၁-၃) အဃိ ယဟိဝၤယွၤ မၤဝဲဒ်လဲၣ်. အဝဲသးထီၣ်​ ပှၤသၢဂၤအံၤဒိၣ်မး ဒီးတဲဝဲလၢ အဝဲသ့ၣ်​ မ့ၢ်ပှၤလၢ အကတိၤတၢ်ကလီကလီလီၤ. ဒီးကစၢ်ယွၤတဲအဝဲသ့ၣ်​ ဒ်သိးအဝဲသ့ၣ်​ ကမၢစီၤယိၤဘး ဃ့ပျၢ်န့ၢ်အဝဲသ့ၣ်​ အတၢ်ကမၣ်လီၤ.—ယိၤဘး ၄၂:၇-၉.

၁၆. ပမၤလိန့ၢ်တၢ်မနုၤလၢ စီၤအလံဖးစး, စီၤဘံးလဒး ဒီးစီၤစိဖၢ် အအိၣ်လဲၣ်.

^၁၆ ပမ့ၢ်ကွၢ် စီၤအလံဖးစး, စီၤဘံးလဒး ဒီးစီၤစိဖၢ် အဒိအတဲာ်န့ၣ်​ ပန့ၢ်ဘၣ်တၢ်မၤလိ အါမးလီၤ. အဆိကတၢၢ်န့ၣ်​ ပန့ၢ်ဘၣ်တၢ်မၤလိလၢ ပတကြၢးစံၣ်ညီၣ်​ ပဒီပုၢ်ဝဲၢ်မုၣ်ခွါတဖၣ်ဘၣ်. (မးသဲ ၇:၁-၅) တချုးလၢ ပတဲတၢ်ဒီးအဝဲသ့ၣ်န့ၣ်​ ပကြၢးဒိကနၣ်န့ၢ် အဝဲသ့ၣ်​ လီၤတံၢ်လီၤဆဲးလီၤ. ပမ့ၢ်မၤဒ်န့ၣ်မး ပကနၢ်ပၢၢ် အဝဲသ့ၣ်​ အတၢ်အိၣ်သးလီၤ. (၁ ပ့းတရူး ၃:၈) ခံမံၤတမံၤန့ၣ်​ ပန့ၢ်ဘၣ်တၢ်မၤလိလၢ ပကဘၣ်တဲတၢ်ကတိၤ လၢအမုာ် ဒီးပတၢ်ကတိၤတဖၣ်န့ၣ်​ ကဘၣ်မ့ၢ်တၢ်လၢအဘၣ်လီၤ. (အ့းဖ့းစူး ၄:၂၅) တၢ်မၤလိ သၢမံၤတမံၤန့ၣ်​ ပသ့ၣ်ညါဘၣ်လၢ ယဟိဝၤယွၤ သးစၢၢ်ဆၢဝဲ တၢ်ကတိၤလၢ ပတဲလိာ်ပသး တဂၤဒီးတဂၤန့ၣ်လီၤ.

၁၇. ပမၤလိန့ၢ်ဘၣ်​ တၢ်မနုၤလၢ စီၤအလံဟူၤ အဒိအတဲာ်လဲၣ်.

^၁၇ ပှၤပိာ်ခွါ လွံၢ်ဂၤတဂၤ လၢအလဲၤအိၣ်သကိးဝဲ စီၤယိၤဘးန့ၣ်​ မ့ၢ်ဝဲစီၤအလံဟူၤလီၤ. စီၤအလံဟူၤန့ၣ်​ ဒီဘူးဒီတံၢ်ဒီး စီၤအၤဘြၤဟၣ်လီၤ. လၢတၢ်အဲၣ်တၢ်ကွံအပူၤ စီၤအလံဟူၤဟ့ၣ်ကူၣ်​ စီၤယိၤဘးလိၤလိၤ ဒီးအတၢ်ဟ့ၣ်ကူၣ်န့ၣ်​ ကဲထီၣ်တၢ်မၤစၢၤလၢ စီၤယိၤဘး ကဘှီဘၣ်ထီၣ်​ အတၢ်ဆိကမိၣ်အဃိ ဖျါလၢဖဲစီၤယိၤဘး ဒီးပှၤပိာ်ခွါသၢဂၤ တဲသကိးတၢ်အခါ စီၤအလံဟူၤ ဒိကနၣ်ဝဲဂ့ၤဂ့ၤလီၤ. (ယိၤဘး ၃၃:၁, ၆, ၁၇) စီၤအလံဟူၤ အဲၣ်ဒိးမၤလၤကပီၤ ယဟိဝၤယွၤအဃိ အဝဲတပတြၢၤလီၤအသး မ့တမ့ၢ် ပှၤတဂၤဂၤဘၣ်. (ယိၤဘး ၃၂:၂၁, ၂၂; ၃၇:၂၃, ၂၄) ပမ့ၢ်ကွၢ် စီၤအလံဟူၤ အဒိအတဲာ်န့ၣ်​ ပသ့ၣ်ညါဘၣ်လၢ တဘျီတခီၣ်​ ပကဘၣ်အိၣ်ဘှီၣ်​ ဒီးဒိကနၣ်တၢ်လီၤ. (ယၤကိာ် ၁:၁၉) ဒီးပမၤလိန့ၢ်ဘၣ်တၢ်လၢ ဖဲပဟ့ၣ်ကူၣ်ပှၤဂၤအခါ တၢ်လၢပကြၢးသးစၢၢ်ဆၢအီၤ အဒိၣ်ကတၢၢ်န့ၣ်​ ကဘၣ်မ့ၢ်ဝဲ ပကမၤလၤကပီၤ ယဟိဝၤယွၤ ဒီးတမ့ၢ်ပနီၢ်ကစၢ်ဘၣ်.

၁၈. ပပာ်ဖျါထီၣ်လၢ ပပာ်လုၢ်ပာ်ပှ့ၤ တၢ်ဟ့ၣ်လၢအမ့ၢ် တၢ်သ့တၢ်ဘၣ်လၢ ပကတဲတၢ်အဂီၢ် ကသ့ဒ်လဲၣ်.

^၁၈ ပပာ်ဖျါထီၣ်လၢ ပပာ်လုၢ်ပာ်ပှ့ၤ တၢ်ဟ့ၣ်လၢအမ့ၢ် တၢ်သ့တၢ်ဘၣ်လၢ ပကတဲတၢ်အဂီၢ် ခီဖျိပမၤထွဲ လံာ်စီဆှံ အတၢ်ဟ့ၣ်ကူၣ်လၢ ဘၣ်ဃးဒီး ပကြၢးတဲတၢ်လၢ ဆၢကတီၢ်ဖဲလဲၣ်​ ဒီးပကြၢးတဲအီၤ ဒ်လဲၣ်န့ၣ်လီၤ. စီၤပၤၡလိၤမိၤလၢ အမ့ၢ်ပှၤလၢ အကူၣ်တၢ်သ့တဂၤန့ၣ်​ တဲဝဲလၢ “တၢ်ကတိၤလၢ ပှၤကတိၤလၢ အကတီၢ်ဒၣ်ဝဲန့ၣ်​ မၤသးဒ် သၣ်သွံထူ [မ့တမ့ၢ် ဖီသၣ်ထူ] အိၣ်ဝဲလၢ တၢ်ဂီၤစ့အပူၤအသိးန့ၣ်လီၤ.” (ကတိၤဒိ ၂၅:၁၁) ဖဲပှၤဂၤတဲတၢ်အခါ ပမ့ၢ်ဒိကနၣ်န့ၢ်အီၤ လီၤတံၢ်လီၤဆဲး ဒီးတချုးလၢပတဲတၢ်အခါ ပမ့ၢ်ဆိကမိၣ်ထံအီၤန့ၣ်​ ပတၢ်ကတိၤတဖၣ်​ ကလီၤဂာ်ဒ်ဖီသၣ်ထူအသိး ဒီးပတၢ်ကတိၤတဖၣ်န့ၣ်​ ကအိၣ်ဒီးအလုၢ်အပှ့ၤ ဒီးကမၤမုာ်ပှၤသးလီၤ. ဖဲန့ၣ်န့ၣ်​ ပတဲတၢ် မ့ၢ်အါမ့ၢ်ဂ့ၤ စှၤမ့ၢ်ဂ့ၤ ပတၢ်ကတိၤတဖၣ်​ ကကဲထီၣ်​ တၢ်ဂံၢ်တၢ်ဘါ လၢပှၤဂၤအဂီၢ် ဒီးယဟိဝၤယွၤ ကဘၣ်သူၣ်ဘၣ်သးပှၤလီၤ. (ကတိၤဒိ ၂၃:၁၅; အ့းဖ့းစူး ၄:၂၉) ဒီးပမ့ၢ်တဲတၢ်ဒ်န့ၣ်န့ၣ်​ မ့ၢ်ကျဲအဂ့ၤကတၢၢ်တဘိလၢ ပပာ်ဖျါထီၣ်လၢ ပစံးဘျုးယဟိဝၤယွၤ ခီဖျိလၢ အတၢ်ဟ့ၣ်အံၤအဃိလီၤ.