ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါယနူၤအါရံၤ ၂–၈
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယၡါယၤ ၂၄-၂၈
“ယဟိဝၤယွၤ အံးထွဲကွၢ်ထွဲ အပှၤဂီၢ်မုၢ်”
(ယၡါယၤ ၂၅:၄, ၅) အဂ့ၢ်ဒ်အံၤ, နမ့ၢ်တိာ်ဧိၤတာ်ဧိၤလၢ ပှၤဖှီၣ်ဖိယာ်ဖိအဂီၢ်, တိာ်ဧိၤတာ်ဧိၤလၢ ပှၤဘၣ်နးဘၣ်ဖှီၣ်အဂီၢ်လၢ အဘၣ်တၢ်ကီအဖၢမုၢ်, တၢ်အိၣ်တဒၢအလီၢ်လၢ ကလံၤအမဲာ်ညါ, တၢ်ကဒုလၢ တၢ်ကိၢ်အမဲာ်ညါလၢ ပှၤမၤပျံၤတၢ်ဖုးတၢ် အအူသဖှိ မၤသးဒ် ကလံၤမုၢ် ဘၣ်တၢ်အဒူၣ်အသိးန့ၣ် အဖၢမုၢ်လီၤ. ၅ ဒ်တၢ်ကိၢ်လၢ အလီၢ်ဃ့အသိး, ပှၤတခီဘီမုၢ်ဖိအသီၣ်န့ၣ် နကမၤစၢ်လီၤလီၤ. ဒ်တၢ်ကိၢ်လၢ တၢ်အၢၣ်အကဒုအသိး, ပှၤမၤပျံၤတၢ် အတၢ်သးဝံၣ်န့ၣ် ဘှီၣ်လီၤဝဲ ဒ်န့ၣ်သိးလီၤ.
ip-1 ကဘျံးပၤ ၂၇၂ အဆၢ ၅
ယဟိဝၤယွၤ ယူာ်ထီၣ်အစု
၅ ပှၤလၢအထီဒါ ယဟိဝၤယွၤတဖၣ် ကပျံၤတၢ်ဘၣ်ဆၣ် ပှၤလၢအအဲၣ်ဒိးမၤ ကစၢ်အတၢ်ဘၣ်သးလၢ တၢ်ဆီၣ်လီၤသးအပူၤတဖၣ်န့ၣ် ယဟိဝၤယွၤ ကဒီသဒၢအီၤလီၤ. တၢ်ဘူၣ်တၢ်ဘါဒီး ပှၤပၢတၢ်လၢ အအၢအသီတဖၣ် ဂုာ်ကျဲးစၢးမၤဟးဂီၤကွံာ် ပှၤလၢအဘူၣ်ထီၣ်ဘါထီၣ်တၢ် အမ့ၢ်အတီတဖၣ် အတၢ်နာ် ဘၣ်ဆၣ် မၤဝဲတန့ၢ်ဘၣ်. မ့ၢ်လၢအဝဲသ့ၣ် နာ်န့ၢ်ယဟိဝၤယွၤ လၢလၢပှဲၤပှဲၤအဃိလီၤ. လၢခံကတၢၢ်န့ၣ် ယဟိဝၤယွၤ ကမၤဘှ့ၣ်ဝဲ ပှၤလၢအထီဒါတၢ်တဖၣ် အကလုၢ် ခီဖျိလၢ အဝဲကဒီသဒၢပှၤ ဒ်တၢ်အၢၣ်လၢ အမၤဘၢကွံာ် မုၢ်အတၢ်ကိၢ်တဖၣ် မ့တမ့ၢ် ဒ်တၢ်အဒူၣ်တခါလၢ အဒီသဒၢ ပှၤလၢကလံၤမုၢ်အသိးအဃိလီၤ.—ဖး ယၡါယၤ ၂၅:၄, ၅ တက့ၢ်.
(ယၡါယၤ ၂၅:၆) ဒီးတၢ်သုးမုၢ်ဂီၢ်မုၢ်အယွၤ ကမၤတၢ်အီၣ်ဘီၣ်သိ, တၢ်အီလၢ စပံးထံ အိၣ်ဒီး အသံးအဃါလၢအပူၤ, တၢ်ဘီၣ်သိလၢ အဝံၣ်, စပံးထံအိၣ်ဒီး အသံးအဃါလၢ အပူၤလၢ အဆှံဝဲလၢ ပှၤကိးကလုာ်ဒဲးအဂီၢ် လၢကစၢၢ်အံၤ အလိၤလီၤ.
ယဟိဝၤယွၤ အတၢ်လုၢ်အီၣ်လုၢ်အီပှၤ လၢနီၢ်သးတခီန့ၣ် ဟံးန့ၢ်အီၤလၢလၢပှဲၤပှဲၤတက့ၢ်
၄ ပလံာ်လဲၢ်အါဒၣ်တက့ၢ်န့ၣ် ဘၣ်တၢ်ထုးထီၣ်အီၤလၢ ယဟိဝၤပှၤအုၣ်အသးခဲလၢာ် အဂီၢ်လီၤ. ဘၣ်ဆၣ် လံာ်လဲၢ်တနီၤန့ၣ် ဘၣ်တၢ်ထုးထီၣ်အီၤ လီၤဆီဒၣ်တၢ်လၢ ပှၤသးစၢ်အဂီၢ် မ့တမ့ၢ် မိၢ်ပၢ်အဂီၢ်န့ၣ်လီၤ. လံာ်လဲၢ်ဒီး တၢ်ဂီၤမူအါတက့ၢ်လၢ ပပှာ်ယဲၤသန့အပူၤန့ၣ် ဘၣ်တၢ်ထုးထီၣ်အီၤလၢ ပှၤလၢတမ့ၢ် ယဟိဝၤပှၤအုၣ်အသးတဖၣ် အဂီၢ်လီၤ. နီၢ်သးတၢ်အီၣ်တၢ်အီ အါထဲထဲအံၤန့ၣ် ပာ်ဖျါထီၣ်ဝဲလၢ ယဟိဝၤယွၤ မၤလၢထီၣ်ပှဲၤထီၣ် အတၢ်အၢၣ်လီၤအီလီၤလၢ ကလုၢ်အီၣ်လုၢ်အီ အပှၤဂီၢ်မုၢ်လၢ နီၢ်သးတခီလီၤ.—ယၡါယၤ ၂၅:၆.
ip-1 ကဘျံးပၤ ၂၇၃ အဆၢ ၆-၇
ယဟိဝၤယွၤ ယူာ်ထီၣ်အစု
‘တၢ်အီၣ်တၢ်အီ အမူးပွဲဖးဒိၣ်တခါလၢပှၤကိးကလုာ်ဒဲးအဂီၢ်’
၆ ဒ်ပၢ်လၢအပှဲၤဒီး တၢ်အဲၣ်တၢ်ကွံတဂၤအသိး ယဟိဝၤယွၤ ဒီသဒၢ အဖိအလံၤတဖၣ် တကးဒံးဘၣ် လုၢ်အီၣ်လုၢ်အီဝဲစ့ၢ်ကီးလီၤ. လီၤဆီဒၣ်တၢ် လုၢ်အီၣ်လုၢ်အီဝဲလၢ နီၢ်သးတခီလီၤ. ဖဲ ၁၉၁၉, ယဟိဝၤယွၤ မၤထူၣ်ဖျဲးထီၣ် အခ့အပှၤတဖၣ်ဝံၤအလီၢ်ခံ အဝဲကတဲာ်ကတီၤန့ၢ်အီၤ နီၢ်သးအတၢ်အီၣ်တၢ်အီ အမူးပွဲဖးဒိၣ်တခါ ဒ်အမ့ၢ်တၢ်ပနီၣ်လၢ အဝဲသ့ၣ်မၤနၢၤတၢ်လီၤ- “ဒီးတၢ်သုးမုၢ်ဂီၢ်မုၢ်အယွၤ ကမၤတၢ်အီၣ်ဘီၣ်သိ, တၢ်အီလၢ စပံးထံ အိၣ်ဒီး အသံးအဃါလၢအပူၤ, တၢ်ဘီၣ်သိလၢ အဝံၣ်, စပံးထံအိၣ်ဒီး အသံးအဃါလၢ အပူၤလၢ အဆှံဝဲလၢ ပှၤကိးကလုာ်ဒဲးအဂီၢ် လၢကစၢၢ်အံၤ အလိၤလီၤ.”—ယၡါယၤ ၂၅:၆.
၇ တၢ်အီၣ်တၢ်အီတဖၣ်န့ၣ် အိၣ်ပှဲၤလၢ ယဟိဝၤယွၤအ “ကစၢၢ်” လိၤလီၤ. ကစၢၢ်အံၤ မ့ၢ်ကစၢၢ်မနုၤလဲၣ်. မ့ၢ်ဝဲ “ယွၤအဟံၣ်အကစၢၢ်” လၢပှၤဂီၢ်မုၢ်တဖၣ် လဲၤထီၣ်ဝဲဖဲ “မုၢ်နံၤလၢခံကတၢၢ်” အပူၤန့ၣ်လီၤ. ဒီးကစၢၢ်အံၤ မ့ၢ်ဝဲယဟိဝၤယွၤအ “ကစၢၢ်စီဆှံ” ဒီးဖဲန့ၣ် ပှၤလၢအဘူၣ်ထီၣ်ဘါထီၣ်ယွၤ လၢတၢ်သးတီအပူၤတဖၣ်န့ၣ် တဘၣ်တၢ်မၤနးမၤဖှီၣ် ဒီးမၤဟးဂီၤအီၤဘၣ်. (ယၡါယၤ ၂:၂; ၁၁:၉) ဖဲတၢ်ဘူၣ်ထီၣ်ဘါထီၣ်တၢ် အလီၢ်စီဆှံအံၤ ယဟိဝၤယွၤ ကတဲာ်ကတီၤဃာ် နီၢ်သးအတၢ်အီၣ်တၢ်အီ အါအါဂီၢ်ဂီၢ်လၢ ပှၤလၢအအိၣ်ဒီး တၢ်သးတီတဖၣ်အဂီၢ်လီၤ. နီၢ်သးအတၢ်အီၣ်လၢ ယဟိဝၤယွၤ ကတဲာ်ကတီၤဃာ်ဝဲ အါအါဂီၢ်ဂီၢ်အံၤ ဒုနာ်န့ၢ်ပှၤလၢ ဖဲယွၤအဘီအမုၢ်ပၢဟီၣ်ခိၣ်အခါ အဝဲ ကမၤစၢၤပှၤလၢ နီၢ်ခိတကပၤ လၢလၢပှဲၤပှဲၤလီၤ. ဒီးတၢ်သၣ်ဝံၤလီၤဒိ တအိၣ်လၢၤဘၣ်. “ဘုတစှီၤ ကအိၣ်လၢဟီၣ်ခိၣ်အပူၤလၢ ကစၢၢ်ခိၣ်, ဒီးအသၣ် ကဟူးဝး” ဝဲလီၤ.—စံးထီၣ်ပတြၢၤ ၇၂:၈, ၁၆.
(ယၡါယၤ ၂၅:၇, ၈) ဒီးလၢကစၢၢ်အလိၤအံၤ ကမၤဟးဂီၤတၢ်မၤဘၢမဲာ်, တၢ်မၤဘၢမဲာ်လၢ အအိၣ်လၢ ပှၤကိးကလုာ်ဒဲး အဖီခိၣ်, ဒီးထၣ်တဘ့ၣ်လၢ အထါထၣ် အသးလၢ ပှၤကိးကလုာ်ဒဲး အဖီခိၣ်လီၤ.၈ တၢ်သံလီၤဘျၢလံ လီၤထူလီၤယိာ်လံ, ဒီးကစၢ်ယွၤထွါကွံာ် မဲာ်ထံလၢ ကယဲၢ်ပှၤအမဲာ်, ဒီးကဟံးထီၣ်ကွံာ် အပှၤဂီၢ်မုၢ် အတၢ်ဒုၣ်ဒွဲၣ်လၢ ဟီၣ်ခိၣ်ဒီဘ့ၣ်ညါလီၤ. အဂ့ၢ်ဒ်အံၤ, ယွၤကတိၤတၢ်လီၤ.
ဒုၣ်ဒါလၢခံကတၢၢ်လၢ အမ့ၢ်တၢ်သံ ကလီၤမၢ်ကွံာ်
၁၅ ဖဲယွၤအဘီအမုၢ်ပၢတၢ် အနံၣ်တကထိအကတၢၢ်န့ၣ် ပှၤဟီၣ်ခိၣ်ဖိလၢ အအိၣ်ဒီး တၢ်ဒိကနၣ်တဖၣ် ကပူၤဖျဲးထီၣ်လၢ ဒုၣ်ဒါလၢအမ့ၢ် တၢ်သံဒီးတၢ်ဒဲးဘး အစုပူၤလီၤ. လံာ်စီဆှံစံးဝဲလၢ– “အဂ့ၢ်ဒ်အံၤ, ဒ်ပှၤခဲလၢာ်သံဝဲလၢ စီၤအၤဒၣ်အပူၤ အသိးန့ၣ်, ပှၤခဲလၢာ် ကဘၣ် တၢ်မၤမူထီၣ်က့ၤအီၤလၢ ခရံာ်အပူၤ, ဒ်န့ၣ်အသိးလီၤ. ဘၣ်ဆၣ်ဒီး ပှၤကညီတဂၤဒီးတဂၤ လၢအတီၤဒၣ်ဝဲ အပူၤစုာ်စုာ်, တၤသၣ်ဆိခရံာ်, လၢခံက့ၤပှၤဘၣ်ဃးဒီး ခရံာ်ဖဲ အဟဲလီၤက့ၤ အကတီၢ်လီၤ. တုၤနုၤတစု, တုၤအမၤဟးဂီၤကွံာ် ကယဲၢ်တၢ်အခိၣ်, ဒီးတၢ်အစိအကမီၤ, ဒီးတၢ်အဂံၢ်အဘါခဲလၢာ်, တုၤအဟ့ၣ်က့ၤဘီမုၢ်လၢ ပၢ်ယွၤအစုပူၤဒီး, တၢ်အကတၢၢ်ကဘၣ်လီၤ. အဂ့ၢ်ဒ်အံၤ, ခရံာ်ဘၣ်ပၢတၢ် တုၤအပာ်လီၤ ကယဲၢ်အဒုၣ်အဒါလၢ အခီၣ်ဖီလာ်ခဲလၢာ်လီၤ. ဒုၣ်ဒါလၢ အကဘၣ် တၢ်ဟးဂီၤလၢ ခံကတၢၢ်န့ၣ်, မ့ၢ်တၢ်သံလီၤ.” (၁ ကရံၣ်သူး ၁၅:၂၂-၂၆) လၢခံကတၢၢ်န့ၣ် တၢ်သံလၢ ပန့ၢ်သါဘၣ်လၢ စီၤအၤဒၣ်အအိၣ်န့ၣ် ကလီၤမၢ်ကွံာ်ဝဲလီၤ. “တၢ်မၤဘၢမဲာ်” လၢအမၤဘၢဃာ် ပှၤဟီၣ်ခိၣ်ဖိတဖၣ်န့ၣ် ကဘၣ်တၢ်သုးကွံာ်အီၤ လီၤထူလီၤယိာ်လီၤ.—ယၡါယၤ ၂၅:၇, ၈.
ip-1 ကဘျံးပၤ ၂၇၃-၂၇၄ အဆၢ ၈-၉
ယဟိဝၤယွၤ ယူာ်ထီၣ်အစု
၈ ဆၢကတီၢ်ခဲအံၤ ပှၤလၢအအီၣ်အီဝဲ နီၢ်သးအတၢ်အီၣ်လၢ ယဟိဝၤယွၤ ကတဲာ်ကတီၤဝဲန့ၣ် အိၣ်ဒီးတၢ်မုၢ်လၢ်လၢ အဂ့ၤဒိၣ်မးလီၤ. ဝံယၡါယၤ ထိၣ်သတြီၤဝဲ တၢ်သံဒီးတၢ်ဒဲးဘးလၢ “တၢ်မၤဘၢမဲာ်” မ့တမ့ၢ် “ထၣ်တဘ့ၣ်” လၢအမၤကတံာ် ပှၤသါထီၣ်သါလီၤ န့ၣ်လီၤ. အဝဲစံးဝဲလၢ– “ဒီးလၢကစၢၢ်အလိၤအံၤ [ယဟိဝၤ] ကမၤဟးဂီၤ တၢ်မၤဘၢမဲာ်, တၢ်မၤဘၢမဲာ်လၢ အအိၣ်လၢ ပှၤကိးကလုာ်ဒဲး အဖီခိၣ်, ဒီးထၣ်တဘ့ၣ်လၢ အထါထၣ် အသးလၢ ပှၤကိးကလုာ်ဒဲး အဖီခိၣ်လီၤ. တၢ်သံလီၤဘျၢလံ လီၤထူလီၤယိာ်လံ, ဒီးကစၢ်ယွၤထွါကွံာ် မဲာ်ထံလၢ ကယဲၢ်ပှၤအမဲာ်” လီၤ.—ယၡါယၤ ၂၅:၇, ၈က.
၉ တၢ်သံဒီးတၢ်ဒဲးဘး တအိၣ်လၢၤဘၣ်. (လီၣ်ဖျါ ၂၁:၃, ၄) တကးဒံးဘၣ် တၢ်ဒုၣ်ဒွဲၣ်စံးအၢ လၢယဟိဝၤယွၤ အခ့အပှၤတဖၣ် တူၢ်ဘၣ်ဝဲလၢ အနံၣ်လၢအကထိတဖၣ်န့ၣ် ကလီၢ်မၢ်ကွံာ်ဝဲ ခဲလၢာ်လီၤ. “ဒီးကဟံးထီၣ်ကွံာ် အပှၤဂီၢ်မုၢ် အတၢ်ဒုၣ်ဒွဲၣ်လၢ ဟီၣ်ခိၣ်ဒီဘ့ၣ်ညါလီၤ. အဂ့ၢ်ဒ်အံၤ, ယွၤကတိၤတၢ်လီၤ.” (ယၡါယၤ ၂၅:၈ခ) တၢ်အံၤကဟဲကဲထီၣ်ဒ်လဲၣ်. ယဟိဝၤယွၤ ကမၤဟးဂီၤကွံာ် ပှၤဒုၣ်ဒွဲၣ်စံးအၢတၢ် အခိၣ်ဆၢၣ် မုၣ်ကီၢ်လံၢ် ဒီးအခ့အပှၤတဖၣ်လီၤ. (လီၣ်ဖျါ ၂၀:၁-၃) ကစၢ်ယွၤ အခ့အပှၤတဖၣ် ကစံးဝဲလၢ– “ကွၢ်ကွၢ်, အဝဲဒၣ်အံၤ မ့ၢ်ပကစၢ်လီၤ. ပကွၢ်လၢ်တ့ၢ်အကျဲ, ဒီးကအုၣ်က့ၤခီၣ်က့ၤပှၤလီၤ. အဝဲဒၣ်အံၤ မ့ၢ်ယွၤလီၤ. ပကွၢ်လၢ်တ့ၢ်အကျဲလီၤ. ပကသူၣ်ဖှံသးညီ, ဒီးပကသးခုလၢ အတၢ်အုၣ်က့ၤခီၣ်က့ၤအပူၤလီၤ.”—ယၡါယၤ ၂၅:၉.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ယၡါယၤ ၂၆:၁၅) နမၤအါထီၣ်လံ ပှၤတကလုာ်လံ, ယွၤဧၢ, နမၤအါထီၣ်လံ ပှၤတကလုာ်လံ, နမၤလၤကပီၤ နသးလံ, နပာ်ယံၤထီၣ်လံ ထံသနၢၣ် ကီၢ်သနၢၣ်ခဲလၢာ်လံ.
ဂုာ်ကျဲးစၢးမၤဂ့ၤထီၣ် နီၢ်သးပၤရဒံစူးတက့ၢ်
ပဝဲသ့ၣ်တဖၣ် ပမၤဃံမၤလၤဒိၣ်ထီၣ်နီၢ်သးပၤရဒံစူးကသ့ဒ်လဲၣ်
၁၈ ယဟိဝၤယွၤ ဟ့ၣ်လီၤပှၤ တၢ်ခွဲးတၢ်ယာ်လၢ ပကမၤဂ့ၤထီၣ် နီၢ်သးပၤရဒံစူးန့ၣ်လီၤ. ဘၣ်ဆၣ် ပမၤအီၤကသ့ဒ်လဲၣ်. ခီဖျိ ပစံၣ်တဲၤတဲလီၤဘီမုၢ်တၢ်သးခုကစီၣ် ဒီးဒုးကဲထီၣ်ပှၤဂၤလၢ ကစၢ်အပျဲၢ်အဘီၣ်န့ၣ်လီၤ. ဖဲပမၤစၢၤပှၤဂၤ ဒ်သိးကကဲထီၣ် ယွၤအခ့အပှၤအခါ မ့ၢ်ပမၤဃံမၤလၤဒိၣ်ထီၣ် နီၢ်သးပၤရဒံစူးန့ၣ်လီၤ.—ယၡါယၤ ၂၆:၁၅; ၅၄:၂.
(ယၡါယၤ ၂၆:၂၀) ဟဲ, ယပှၤဂီၢ်မုၢ်သ့ၣ်ဧၢ, လဲၤနုာ်လၢ နဒၢးပူၤ, ဒီးကးတံာ်ဃာ်တြဲၤလၢ နလီၢ်ခံတက့ၢ်. ပာ်ခူသူၣ်နသးတစိၢ်ဖိ တုၤတၢ်သးကဲၤထီၣ် လဲၤပူၤကွံာ်န့ၣ်တက့ၢ်.
တၢး၁၃ ၃/၁၅ ကဘျံးပၤ ၂၃ အဆၢ ၁၅-၁၆
ယဟိဝၤယွၤမ့ၢ် ပတၢ်အိၣ်ကဒုအလီၢ်
ဒ်တၢ်အကတၢၢ်ဘူးထီၣ်အသိး အဝဲမ့ၢ်“တၢ်အိၣ်တၢ်ဆိးအလီၢ်လၢပဂီၢ်”
၁၅ ဒ်မုၣ်ကီၤလံၢ် အတၢ်ရဲၣ်တၢ်ကျဲၤ ကကတၢၢ်ဘူးထီၣ်ဝဲအသိး “တၢ်နးတၢ်ဖှီၣ်” တဖၣ်ကနးဒိၣ်ထီၣ်ဝဲလီၤ. (မးသဲ ၂၄:၇, ၈) ကနးထီၣ်ဝဲဒိၣ်ကတၢၢ် ဖဲတၢ်နးတၢ်ဖှီၣ်ဖးဒိၣ် အဆၢကတီၢ်လီၤ. တၢ်သူၣ်ထီၣ်ဘှီထီၣ်တဖၣ် ကလီၤဟိလီၤပှီၢ်ကွံာ်ဒီး ပှၤဟီၣ်ခိၣ်ဖိတဖၣ် ကပျံၤတၢ်ဒိၣ်မးလီၤ. (ဃဘးကူာ် ၃:၁၆, ၁၇) အဝဲသ့ၣ် ကဃ့ၢ်အိၣ်သဒၢလၢ “တၢ်အိပူၤ, ဒီးလၢကစၢၢ်တဖၣ် အလၢၢ်အိပူၤလီၤ.” (လီၣ်ဖျါ ၆:၁၅-၁၇) ဘၣ်ဆၣ် တၢ်အိပူၤမ့ၢ်ဂ့ၤ, တၢ်ပၢတၢ်ပြးဒီး တၢ်ပနံာ်တၢ်ကၤ အတၢ်ကရၢကရိလၢ အလီၤဂာ်ဒ် ကစၢၢ်ကလိမ့ၢ်ဂ့ၤ ဒီသဒၢအဝဲသ့ၣ် တန့ၢ်ဘၣ်.
၁၆ ဘၣ်ဆၣ် ယဟိဝၤယွၤ အခ့အပှၤတဖၣ် ကဆဲးဒိးန့ၢ်ဘၣ် တၢ်ဒီသဒၢဒီး တၢ်သူၣ်ခုသးခုလၢ အဝဲသ့ၣ်အ “တၢ်အိၣ်တၢ်ဆိးအလီၢ်” လၢအမ့ၢ်ယဟိဝၤယွၤအအိၣ်လီၤ. ဒ်ဝံဃဘးကူာ်အသိး အဝဲသ့ၣ် ‘အသူၣ်ကပိၢ် အသးကဝးလၢ ယွၤအပူၤ, ဒီးကသူၣ်ဖှံသးညီလၢ တၢ်အုၣ်က့ၤခီၣ်က့ၤ အကစၢ်အပူၤလီၤ.’ (ဃဘးကူာ် ၃:၁၈) ဖဲတၢ်သဘံၣ်သဘုၣ်ဖးဒိၣ် ကဲထီၣ်အဆၢကတီၢ် ယဟိဝၤယွၤ ကပာ်ဖျါထီၣ်ဝဲလၢ အဝဲမ့ၢ် “တၢ်အိၣ်တၢ်ဆိးအလီၢ်” လၢကျဲဒ်လဲၣ်. ပကဘၣ်အိၣ်ခိးကွၢ်လီၤ. ဘၣ်ဆၣ် ပနာ်သ့လၢ ဒ်ပှၤအံၣ်စရ့လးဖိလၢ အဟးထီၣ်လၢ ကီၢ်အဲၤကူပတူးအသိး ကစၢ်ယွၤအ “ပှၤဂီၢ်မုၢ်ဖးဒိၣ်” ကဘၣ်တၢ်ကရၢကရိအီၤဂ့ၤဂ့ၤ ဒီးကအိၣ်ခိးဝဲ ကစၢ်ယွၤ အတၢ်ဟံးစုနဲၣ်ကျဲထီဘိလီၤ. (လီၣ်ဖျါ ၇:၉; ဖး ၂ မိၤၡ့ ၁၃:၁၈ တက့ၢ်.) တၢ်ဟံးစုနဲၣ်ကျဲအံၤ ကဟဲခီဖျိလၢကစၢ်ယွၤ အတၢ်ရဲၣ်တၢ်ကျဲၤ, ဘၣ်သ့ၣ်သ့ၣ် ကဟဲခီဖျိလၢတၢ်အိၣ်ဖှိၣ် အတၢ်ရဲၣ်တၢ်ကျဲၤလီၤ. လၢတၢ်န့ၣ်အဃိ ယၡါယၤ ၂၆:၂၀ တဲဆိပာ်ဝဲ “ဒၢးပူၤ” န့ၣ်ဘၣ်သ့ၣ်သ့ၣ် ကမ့ၢ်တၢ်အိၣ်ဖှိၣ်လၢ ဟီၣ်ခီၣ်ဒီဘ့ၣ်လီၤ. (ဖးတက့ၢ်.) မ့ၢ်နပာ်လုၢ်ပာ်ပှ့ၤ တၢ်အိၣ်ဖှိၣ်ရိဖှိၣ်ဧါ. မ့ၢ်နမၤထွဲ ယဟိဝၤယွၤ အတၢ်ဟံးစုနဲၣ်ကျဲလၢ အဟဲလၢတၢ်အိၣ်ဖှိၣ် အတၢ်ရဲၣ်တၢ်ကျဲၤ လီၤတံၢ်လီၤဆဲးဧါ.—ဧ့ၤဘြံၤ ၁၃:၁၇.
တၢ်ဖးလံာ်စီဆှံ
(ယၡါယၤ ၂၈:၁-၁၃) အ့ဖရဲၣ်အပှၤအီမူၤသံးတဖၣ် အသးထီၣ်ထီ အခိၣ်သလုးဒီး အဃံအလၤ, အလၤကပီၤ အသံၣ်အဖီလီၤညွံးလၢ အအိၣ်ဝဲလၢ ပှၤဘၣ်တၢ်ကျီအီၤလၢ စပံးထံအကစၢၢ်ကဆူး ဘီၣ်သိအခိၣ်န့ၣ် ဘၣ်အဖှီၣ်လီၤ. ၂ ကွၢ်ကွၢ်, တၢ်အဒိၣ်အဆူၣ်တဂၤ အိၣ်ဒီးယွၤ, မၤသးဒ် ကလံၤမုၢ်အိၣ်ဒီး သူၣ်အသိး, မၤသးဒ် ကလံၤမုၢ်လၢ အမၤဟးဂီၤတၢ်အသိး, မၤသးဒ်ထံဟဲဆူၣ် လုၣ်ဘၢတၢ်အသိးန့ၣ် မၤလီၤဃံၤဝဲလၢ ဟီၣ်ခိၣ်လိၤလၢ အစုလီၤ. ၃ အ့ဖရဲၣ်အပှၤအီမူၤသံးတဖၣ် အသးထီၣ်ထီ အခိၣ်သလုးန့ၣ် ကဘၣ် တၢ်ယီၢ်လီၤတံၢ်အီၤလၢ ပှၤအခီၣ်အဖီလာ်လီၤ. ၄ ဒီးအဃံအလၤ အလၤကပီၤ အသံၣ်အဖီလီၤညွံးလၢ အအိၣ်လၢ အကစၢၢ်ကဆူးဘီၣ်သိအခိၣ်န့ၣ် ကမၤသးဒ် ချၢၣ်ဒၢသၣ်လၢ အမံဆိ တချုးတၢ်ကိၢ်ခါဘၣ်ဒံးဘၣ် တဖျၢၣ်လၢ ပှၤလၢအကွၢ်အီၤထံၣ်ဝဲဒီး, အိၣ်ဝဲလၢအစုပူၤ အဖၢမုၢ်န့ၣ် အီၣ်ယူၢ်လီၤကွံာ်ဝဲအသိးန့ၣ်လီၤ. ၅ တၢ်လၢမုၢ်တနံၤန့ၣ် တၢ်သုးမုၢ်ဂီၢ်မုၢ်အယွၤ ကကဲထီၣ် တၢ်ခိၣ်သလုး အဃံအလၤ, ဒီးခိၣ်ကျီၤအလၤကပီၤလၢ အပှၤဂီၢ်မုၢ်လၢ အအိၣ်လီၤတဲာ်တဖၣ်အဂီၢ်, ၆ ဒီးတၢ်စံၣ်ညီၣ်အသးလၢ ပှၤလၢအဆ့ၣ်နီၤစံၣ်ညီၣ်တၢ်အဂီၢ်, ဒီးတၢ်အဂံၢ်အဘါလၢ ပှၤလၢ အဘိးဃၣ်ကဒါ တၢ်ဒုးသုးဆူ ပဲတရီအအိၣ်တဖၣ် အဂီၢ်န့ၣ်လီၤ. ၇ ဒီးအဝဲသ့ၣ်တဖၣ်န့ၣ် လီၤကမၣ်စ့ၢ်ကီးလၢ စပံးထံအဃိ, ဒီးဟးဖျိးကျဲလၢသံးအဃိလီၤ. ပှၤလုၢ်တၢ်အဒိၣ်, ဒီးဝံလီၤကမၣ်တၢ်လၢ သံးအဃိ, ဘၣ်တၢ် ယူၢ်လီၤကွံာ်အီၤလၢ စပံးထံ, ဟးဖျိးကျဲလၢ သံးအဃိ, ကမၣ်တၢ်လၢ အထံၣ်တၢ်အပူၤ, သးဒ့ဒီလၢ အစံၣ်ညီၣ်တၢ်အပူၤလီၤ. ၈ အဂ့ၢ်ဒ်အံၤ, စီၢ်နီၤခိၣ်ခဲလၢာ် ပှဲၤဒီးတၢ်ဘှိးဒီး တၢ်ဘၣ်အၢ, တၢ်ကဆှီအလီၢ်န့ၣ် တအိၣ်ဘၣ်ဝဲဘၣ်. ၉ ကသိၣ်လိ တၢ်သ့ၣ်ညါလၢ မတၤလဲၣ်, ဒီးကဒုးပၢၢ်မတၤအနၢ်လၢ တၢ်နၢ်ဟူတၢ်န့ၣ်လဲၣ်. ပှၤလၢအလီၤဖှၣ်ဒီး တၢ်နုၢ်ထံ, ဒီးလီၤဖးဒီး အမိၢ်အနုၢ်ဧါ. ၁၀ အဂ့ၢ်ဒ်အံၤ, မ့ၢ်တၢ်သိၣ်လၢ တၢ်သိၣ်, တၢ်သိၣ်လၢ တၢ်သိၣ်, တဘိလၢတဘိ, တဘိလၢတဘိ, တဆံးတက့ၢ် ဖဲအံၤ, တဆံးတက့ၢ် ဖဲန့ၣ်လီၤ. ၁၁ အဂ့ၢ်ဒ်အံၤ, ကကတိၤတၢ်ဒီး ပှၤတကလုာ်အံၤလၢ ပျုၤလၢအအုးအး, ဒီးတၢ်ကတိၤတကျိာ်ဒၣ်လီၤ. ၁၂ အဝဲဒၣ်စံးဘၣ်အီၤ, အဝဲအံၤ, မ့ၢ်တၢ်အိၣ်ဘှံးလီၤ. ဒုးအိၣ်ဘှံးပှၤ တၢ်ဘှံးအသးတက့ၢ်. ဒီးအဝဲအံၤ မ့ၢ်တၢ်မၤမုာ်ထီၣ်တၢ်လီၤ. ဒီးဒိကနၣ်ဝဲန့ၣ် အသးတအိၣ်ဘၣ်. ၁၃ မၤသးဒ်န့ၣ်ဒီး ယွၤအကလုၢ်န့ၣ် ကဲထီၣ်လၢအဂီၢ်လၢ တၢ်သိၣ်လၢတၢ်သိၣ်, တၢ်သိၣ်လၢတၢ်သိၣ်, တဘိလၢတဘိ, တဘိလၢတဘိ, တဆံးတက့ၢ်ဖဲအံၤ, တဆံးတက့ၢ်ဖဲန့ၣ်, ဒ်သိးအကလဲၤတၢ်, ဒီးလီၤဃံၤအီထီခိၣ်, ဒီးလီၤကၢ်ကွံာ်, ဒီးဘၣ်ပျံၤသကွီၤ, ဒီးဘၣ်တၢ်ဖီၣ်န့ၢ်အီၤလီၤ.
လါယနူၤအါရံၤ ၉–၁၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယၡါယၤ ၂၉-၃၃
“စီၤပၤတဂၤ ကပၢတၢ်လၢ တၢ်တီတၢ်လိၤအဂီၢ်”
(ယၡါယၤ ၃၂:၁) ကွၢ်ကွၢ်, စီၤပၤတဂၤ ကပၢတၢ်လၢ တၢ်တီတၢ်လိၤအဂီၢ်, ဒီးပဒိၣ်တဂၤ ကစံၣ်ညီၣ်တၢ်လၢ တၢ်တီအဂီၢ်လီၤ.
တၢး၁၄ ၂/၁၅ ကဘျံးပၤ ၆ အဆၢ ၁၃
စံးထီၣ်ပတြၢၤခရံာ်, တၢ်လၤကပီၤအစီၤပၤ
၁၃ ယ့ၣ်ၡူးကဒုးတၢ်လၢ “တၢ်တီတၢ်လိၤ” အဂီၢ်စ့ၢ်ကီးလီၤ. စီၤပၤအံၤဒုးတၢ်လၢ “ယွၤအတၢ်တီတၢ်လိၤ” လၢအမ့ၢ် ယဟိဝၤယွၤအတၢ်ဘျၢလၢ ဘၣ်ဃးဒီး တၢ်အဘၣ်ဒီး တၢ်အကမၣ်အဂီၢ်လီၤ. (ရိမ့ၤ ၃:၂၁; ၅ မိၤၡ့ ၃၂:၄) ဘၣ်ဃးဒီး စီၤပၤယ့ၣ်ၡူးခရံာ်န့ၣ် ဝံယၡါယၤ တဲဆိပာ်ဝဲလၢ “စီၤပၤတဂၤ ကပၢတၢ်လၢ တၢ်တီတၢ်လိၤအဂီၢ်” လီၤ. (ယၡါယၤ ၃၂:၁) ယ့ၣ်ၡူးအတၢ်ပၢ ကဒုးအိၣ်ထီၣ် “မူခိၣ်အသီ” ဒီး “ဟီၣ်ခိၣ်အသီ” လၢ “တၢ်တီတၢ်လိၤ အိၣ်ဝဲဆိးဝဲလၢအပူၤ” လီၤ. (၂ ပ့းတရူး ၃:၁၃) ပှၤကိးဂၤဒဲးလၢ အအိၣ်မူလၢ ဟီၣ်ခိၣ်သီအပူၤန့ၣ် ကဘၣ်အိၣ်မူဝဲဒ် ယဟိဝၤယွၤ အတၢ်ဘျၢအသိးလီၤ.—ယၡါယၤ ၁၁:၁-၅.
(ယၡါယၤ ၃၂:၂) ဒီးပှၤတဂၤ ကမၤသးဒ် တၢ်အိၣ်တဒၢအလီၢ်လၢ ကလံၤအမဲာ်ညါ, ဒီးတၢ်တဒီအလီၢ်လၢ တၢ်ဟဲစူၤ အမဲာ်ညါအသိး, ဒ်ထံကျိလၢ အလီၢ်ဃ့အသိး, ဒ်လၢၢ်ဒိၣ်အကဒုလၢ တၢ်ဘှံးသး အကီၢ်ပူၤအသိးန့ၣ်လီၤ.
ip-1 ကဘျံးပၤ ၃၃၂-၃၃၄ အဆၢ ၇-၈
စီၤပၤဒီး အပဒိၣ်တဖၣ်
၇ ဝံအတၢ်စံးပာ် ဘၣ်ဃးဒီး “ဟီၣ်ခိၣ်အကတၢၢ်” အဂ့ၢ်န့ၣ် ယ့ၣ်ၡူးစံးဝဲလၢ “သုတသူၣ်ကိၢ်သးဂီၤတဂ့ၤ.” (မးသဲ ၂၄:၃-၈) ဘၣ်ဃးဒီး ဟီၣ်ခိၣ်အတၢ်အိၣ်သးလၢ အလီၤဘၣ်ယိၣ်ဒ်အံၤန့ၣ် ဘၣ်မနုၤအဃိ ယ့ၣ်ၡူးအပျဲၢ်အဘီၣ်တဖၣ် တသူၣ်ကိၢ်သးဂီၤဝဲလဲၣ်. တၢ်ဂ့ၢ်တၢတမံၤန့ၣ် ပှၤလၢ အဘၣ်တၢ်ဒိးဖှူအီၤဃုာ်ဒီး “သိလၢအဂုၤအဂၤ” တနီၤလၢအမ့ၢ် “ပဒိၣ်တဖၣ်” န့ၣ်ဒီသဒၢဝဲအသိတဖၣ်လၢ တၢ်သးတီအပူၤလီၤ. (ယိၤဟၣ် ၁၀:၁၆) ဖဲတၢ်သဘံၣ်ဘုၣ် ဒ်သိးဒီးကလုာ်ဒူၣ် တၢ်ဒုးတၢ်ယၤဒီး တၢ်မၤသံလီၤတူာ်ကလုာ်ဒူၣ် ကဲထီၣ်အသးအခါဒၣ်လဲာ် အဝဲသ့ၣ် အံးထွဲကွၢ်ထွဲ အဒီပုၢ်ဝဲၢ်တဖၣ်လၢ တၢ်သူၣ်ဒူသးဒူအပူၤလီၤ. ဟီၣ်ခိၣ်လၢ အလီၤဒိလၢနီၢ်သးတခီအံၤအပူၤ အဝဲသ့ၣ် မၤမုာ်ထီၣ်ဝဲ ပှၤလၢ အသူၣ်လီၤဘှံးသးလီၤတီၤတဖၣ် ခီဖျိတဲဘၣ်ဝဲ ယွၤအကလုၢ်ကထါ တၢ်မ့ၢ်တၢ်တီလီၤ.
၈ ပူၤကွံာ်အနံၣ် ၅၀ အတီၢ်ပူၤ “ပဒိၣ်တဖၣ်” ဘၣ်တၢ်သ့ၣ်ညါထီၣ်အီၤ ဂ့ၤဂ့ၤလီၤ. သိလၢအဂုၤအဂၤ တနီၤလၢအမ့ၢ် “ပဒိၣ်တဖၣ်” န့ၣ်ဘၣ်တၢ်သိၣ်လိအီၤဒီး ဒုးကဲထီၣ်အီၤဒ် “ပဒိၣ်ဖးဒိၣ်” လီၤ. အဃိ တၢ်နးတၢ်ဖှီၣ်ဖးဒိၣ် မ့ၢ်ဝံၤအလီၢ်ခံ အဝဲသ့ၣ်အကျါတနီၤန့ၣ် ကအိၣ်ကတဲာ်ကတီၤအသးလၢ မူဒါလၢ ကမၤတၢ်ဒ် ပှၤပၢဆှၢရဲၣ်ကျဲၤတၢ်လၢ “ဟီၣ်ခိၣ်အသီ” ပူၤန့ၣ်လီၤ. (ယဃ့းစက့လး ၄၄:၂, ၃; ၂ ပ့းတရူး ၃:၁၃) ခီဖျိ အဝဲသ့ၣ်ကဲခိၣ်ကဲနၢ်လၢ ဘီမုၢ်အတၢ်မၤအပူၤ ဒီးကတဲာ်ကတီၤဝဲ နီၢ်သးအတၢ်ဟံးစုနဲၣ်ကျဲ, တၢ်ဟ့ၣ်ဂံၢ်ဟ့ၣ်ဘါအဃိ ပာ်ဖျါထီၣ်ဝဲလၢ အဝဲသ့ၣ်မ့ၢ် “လၢၢ်ဒိၣ်အကဒု” ဒီးမ့ၢ်ပှၤလၢ အမၤမုာ်ထီၣ်ဝဲ သိတဖၣ်လီၤ.
(ယၡါယၤ ၃၂:၃, ၄) ဒီးပှၤလၢအထံၣ်တၢ်တဖၣ် အမဲာ်တခံးဘၣ်, ဒီးပှၤလၢအနၢ်ဟူတၢ်တဖၣ် အနၢ်ကနၢ်ဟူတၢ်လီၤ. ၄ ဒီးပှၤလၢအတဒိးတိၢ်ဘၣ်အသးတဖၣ် အနၢ်ကပၢၢ်တၢ်သ့ၣ်ညါ, ဒီးပှၤလၢ အကတိၤ တၢ်အုးအးတဖၣ် အပျ့ၤကကတိၤတၢ်ကျါလီၤ.
ip-1 ကဘျံးပၤ ၃၃၄-၃၃၅ အဆၢ ၁၀-၁၁
စီၤပၤဒီး အပဒိၣ်တဖၣ်
အိၣ်ဒီးတၢ်သးစၢၢ်ဆၢလၢ မဲာ်ချံ, နၢ် ဒီးသး
၁၀ ဘၣ်ဃးဒီး ယဟိဝၤယွၤ အတၢ်ရဲၣ်တၢ်ကျဲၤန့ၣ် ပှၤဂီၢ်မုၢ်ဖးဒိၣ် အတၢ်ပာ်သူၣ်ပာ်သးအိၣ်ဒ်လဲၣ်. ဝံအတၢ်စံးပာ် ပာ်ဖျါကဒီးဝဲလၢ-“ဒီးပှၤလၢအထံၣ်တၢ်တဖၣ် အမဲာ်တခံးဘၣ်, ဒီးပှၤလၢအနၢ်ဟူတၢ်တဖၣ် အနၢ်ကနၢ်ဟူတၢ်လီၤ.” (ယၡါယၤ ၃၂:၃) ပူၤကွံာ်အနံၣ်တဖၣ်အတီၢ်ပူၤ ယဟိဝၤဟံးစုနဲၣ်ကျဲ အခ့အပှၤတဖၣ် ဒီးမၤစၢၤဝဲဒ်သိး ကဒိၣ်တုာ်ခိၣ်ပှဲၤအဂီၢ်လီၤ. အဝဲသိၣ်လိပှၤခီဖျိ တၢ်စံၣ်တဲၤတဲလီၤတၢ်ကၠိ လၢယဟိဝၤပှၤအုၣ်အသးတဖၣ် မၤဝဲလၢဟီၣ်ခိၣ်ဒီဘ့ၣ်, ကီၢ်ရ့ၣ်တၢ်အိၣ်ဖှိၣ်, တၢ်အိၣ်ဖှိၣ်ဖးဒိၣ်တဖၣ် တကးဒံးဘၣ် ကတဲာ်ကတီၤဝဲ တၢ်သိၣ်လိနဲၣ်လိအကၠိလၢ “ပဒိၣ်တဖၣ်” အဂီၢ် ဒ်သိးကကွၢ်ထွဲသိလၢ တၢ်အဲၣ်တၢ်ကွံပူၤအဂီၢ်လီၤ. တၢ်သ့ၣ်တဖၣ်န့ၣ် ကဲထီၣ်တၢ်မၤစၢၤလၢ ပဒီပုၢ်ဝဲၢ်လၢ ဟီၣ်ခိၣ်ဒီဘ့ၣ်အဂီၢ်လီၤ. ပှၤကွၢ်သိတဖၣ်အံၤ မ့ၢ်အိၣ်လၢ တၢ်လီၢ်တပူၤဂ့ၤတပူၤဂ့ၤ အဝဲသ့ၣ်ဒိးအနၢ်လၢ ကနၢ်ပၢၢ်ဝဲ လံာ်စီဆှံ အတၢ်မ့ၢ်တၢ်တီလၢ ဘၣ်တၢ်တဲနၢ်ပၢၢ်က့ၤအီၤ လၢအသီတဖၣ်လီၤ. ဒီးအဝဲသ့ၣ် အိၣ်ဒီးခရံာ်ဖိအသးလၢ အသ့ၣ်ညါဒၣ်တၢ် ဒီးအိၣ်ကတဲာ်ကတီၤအသးထီဘိလၢ ကဒိကနၣ်တၢ်အဂီၢ်လီၤ.—စံးထီၣ်ပတြၢၤ ၂၅:၁၀.
၁၁ လၢခံဝံအတၢ်စံးပာ် တဲဝဲဒ်အံၤ– “ဒီးပှၤလၢအတဒိးတိၢ်ဘၣ်အသးတဖၣ် အနၢ်ကပၢၢ်တၢ်သ့ၣ်ညါ, ဒီးပှၤလၢ အကတိၤ တၢ်အုးအးတဖၣ် အပျ့ၤကကတိၤတၢ်ကျါလီၤ.” (ယၡါယၤ ၃၂:၄) ဘၣ်ဃးဒီး တၢ်အဘၣ်ဒီး တၢ်အကမၣ်န့ၣ် မ်ပှၤသုတဆၢတဲာ်လၢ အဆိအချ့ နီတဂၤတဂ့ၤ. လံာ်စီဆှံစံးဝဲလၢ “နထံၣ်ဘၣ်ပှၤလၢ အကတိၤတၢ်ချ့ချ့စ့ၢ်ကီးဧါ. ပမုၢ်လၢ်တၢ်လၢ ပှၤဟးဂီၤဖိအဂီၢ် အါန့ၢ်အီၤတက့ၢ်လီၤ.” (ကတိၤဒိ ၂၉:၂၀; စံၣ်တဲၤတဲလီၤတၢ် ၅:၂) တချုးလၢ ၁၉၁၉ နံၣ်ဒံးဘၣ်န့ၣ် ယဟိဝၤပှၤအုၣ်အသးတဖၣ်ဒၣ်လဲာ် ဘၣ်အၢဒီးဘၤဘူၤလိၣ် အတၢ်နာ်တဖၣ်လီၤ. စးထီၣ်ဖဲနံၣ်အဝဲန့ၣ်န့ၣ် ယဟိဝၤယွၤ ဒုးနၢ်ပၢၢ်အါထီၣ်ပှၤ အတၢ်တိာ်ပာ်အဂ့ၢ်လီၤ. အဝဲသ့ၣ်ထံၣ်န့ၢ်ဝဲ တၢ်မ့ၢ်တၢ်တီလၢ ကစၢ်ပာ်ဖျါထီၣ်ဝဲဒီး ဆိကမိၣ်ထံဝဲ လီၤတံၢ်လီၤဆဲး ဒီးခဲအံၤအဝဲသ့ၣ် စံၣ်တဲၤတဲလီၤတၢ်လၢ တၢ်နာ်နီၢ်နီၢ်အပူၤလီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ယၡါယၤ ၃၀:၂၁) ဒီးနနၢ်ကနၢ်ဟူ တၢ်ကတိၤလၢ နလီၢ်ခံန့ၣ်စံးဝဲ, အဝဲအံၤ မ့ၢ်ကျဲန့ၣ်လီၤ. လဲၤတၢ်လၢ အပူၤတက့ၢ်, ဖဲသုကဃၣ်ဆူ စုထွဲ, ဒီးဖဲသုကဃၣ်ဆူ စုစ့ၣ်န့ၣ်လီၤ.
နမ့ၢ်အိၣ်လၢ တၢ်လီၢ်တပူၤဂ့ၤ တပူၤဂ့ၤဒိကနၣ်ယဟိဝၤယွၤ အကလုၢ်တက့ၢ်
၂ မုၢ်မဆါတနံၤအံၤ ယဟိဝၤယွၤ ဟံးစုနဲၣ်ကျဲအပှၤဂီၢ်မုၢ်တဖၣ် ခီဖျိအသးစီဆှံ, လံာ်စီဆှံ ဒီးတၢ်အိၣ်ဖှိၣ်န့ၣ်လီၤ. (မၤတၢ် ၉:၃၁; ၁၅:၂၈; ၂ တံၤမသ့း ၃:၁၆, ၁၇) တၢ်ဟံးစုနဲၣ်ကျဲလၢ ပဒိးန့ၢ်ဘၣ်လၢအအိၣ်န့ၣ် ပနၢ်ပၢၢ်အီၤဂ့ၤဂ့ၤဒီး လီၤဂာ်ဒ် ‘ပနၢ်ဟူတၢ်ကတိၤလၢ ပလီၢ်ခံလၢအစံးဝဲ’ “အဝဲအံၤမ့ၢ်ကျဲန့ၣ်လီၤ. လဲၤတၢ်လၢအပူၤတက့ၢ်.” (ယၡါယၤ ၃၀:၂၁) ယဟိဝၤယွၤသူဝဲယ့ၣ်ၡူး ဒ်သိးပကနၢ်ဟူ အကလုၢ်အဂီၢ်လီၤ. ကစၢ်ယွၤ ပာ်လီၤယ့ၣ်ၡူး ဒ်သိးကကဲခိၣ်ကဲနၢ် တၢ်အိၣ်ဖှိၣ်ခီဖျိ “အကုၢ်အပှၤလၢ အကလုၢ်တီဒီး အကူၣ်တၢ်သ့” လီၤ. (မးသဲ ၂၄:၄၅) ပကဒိးန့ၢ်ဘၣ် တၢ်မူအထူအယိာ်အဂီၢ် ဒိးသန့ၤထီၣ်အသးလၢ ပတၢ်ဒိကနၣ် အဖီခိၣ်အဃိ ပကြၢးဒိကနၣ် တၢ်ဟံးစုနဲၣ်ကျဲဒီး တၢ်သိၣ်လိနဲၣ်လိတဖၣ်အံၤလၢ တၢ်သူၣ်အိၣ်သးအိၣ်အပူၤလီၤ.—ဧ့ၤဘြံၤ ၅:၉.
(ယၡါယၤ ၃၃:၂၂) အဂ့ၢ်ဒ်အံၤ, ယွၤမ့ၢ်ပပှၤစံၣ်ညီၣ်ကွီၢ်, ယွၤမ့ၢ်ပပှၤဟ့ၣ်လီၤ တၢ်သိၣ်တၢ်သီ, ယွၤမ့ၢ်ပစီၤပၤ, အဝဲဒၣ် ကအုၣ်က့ၤခီၣ်က့ၤပှၤလီၤ.
နကကဲထီၣ် “ပှၤလုၢ်တၢ်အဒိၣ်တဖၣ် အဘီအမုၢ်”
၄ တၢ်မၤလိာ် တၢ်အၢၣ်လီၤအီလီၤ န့ၣ် အဘျုးအိၣ်စးထီၣ် ဖဲ ချ.ခ.န ၁၅၁၃ နံၣ် ကစၢၢ်စံၤနါအလိၤန့ၣ်လီၤ. ခီဖျိလၢ တၢ်အၢၣ်လီၤအီလီၤအံၤအဃိ ယဟိဝၤယွၤ ဃုထၢထီၣ်ဝဲ ပှၤအံၣ်စရ့လးဖိလၢပျၢၤတဖၣ်လၢ အတၢ်တိာ်ပာ် အဂီၢ်လီၤ. ဖဲန့ၣ်အခါ ယဟိဝၤယွၤကဲထီၣ် အဝဲသ့ၣ် ‘အစံၣ်ညီၣ်ကွီၢ်, ပှၤဟ့ၣ်လီၤတၢ်သိၣ်တၢ်သီ ဒီးစီၤပၤ’ လီၤ. (ယၡါယၤ ၃၃:၂၂) ပှၤအံၣ်စရ့လးဖိ အတၢ်စံၣ်စိၤတဲစိၤ ပာ်ဖျါထီၣ်ဝဲလၢ ပမ့ၢ်ဒိကနၣ် ကစၢ်ယွၤအကလုၢ်န့ၣ် တၢ်ကကဲထီၣ်အသးဒ်လဲၣ်, ဒီးပမ့ၢ်တဒိကနၣ်တၢ်ဘၣ်န့ၣ် တၢ်ကကဲထီၣ်အသးဒ်လဲၣ်န့ၣ်လီၤ. တၢ်မၤလိာ် တြီဝဲတၢ်ဒိးတ့ဒိးဖျီအသးဒီး ပှၤလၢအဘူၣ်ထီၣ်ဘါထီၣ် ယွၤလၢအကမၣ်တဖၣ် ဒီးတၢ်ပၣ်ဃုာ်လၢ တၢ်ဘူၣ်ထီၣ်ဘါထီၣ်လၢ အကမၣ်န့ၣ်လီၤ. ကစၢ်ယွၤဟ့ၣ်လီၤဝဲ တၢ်မၤလိာ်တဖၣ်အံၤ ဒ်သိးစီၤအၤဘြၤဟၣ် အစၢၤအသွဲၣ် သုတလီၤမၢ်တဂ့ၤန့ၣ်လီၤ.—၂ မိၤၡ့ ၂၀:၄-၆; ၃၄:၁၂-၁၆.
တၢ်ဖးလံာ်စီဆှံ
(ယၡါယၤ ၃၀:၂၂-၃၃) ဒီးသုကမၤဘၣ်အၢ နတၢ်ဂီၤစ့အတၢ်ကျၢၢ်ဘၢ, ဒီးနတၢ်ဂီၤထူအနီၣ်ကျၢၢ်ဃာ်, ဒီးနကမၤလီၤပြံလီၤပြါအီၤဒ် တၢ်သးဘၣ်အၢ အသိးန့ၣ်လီၤ. ဟးတ့ၢ်, နကစံးဘၣ်အီၤလီၤ. ၂၃ ဒီးကဟ့ၣ်လီၤတၢ်စူၤလၢ နတၢ်ချံလၢနကဖှံအီၤလၢဟီၣ်ခိၣ်အဂီၢ်, ဒီးတၢ်အီၣ်လၢဟီၣ်ခိၣ်ဟ့ၣ်ဝဲန့ၣ် ကဘီၣ်သိ, ဒီးဝံၣ်ဝဲလီၤ. တၢ်လၢမုၢ်တနံၤန့ၣ် နဆၣ်ဖိကီၢ်ဖိ ကအီၣ်တၢ်လၢ တၢ်အီၣ်ဆၣ်အလီၢ်ဖးလဲၢ် အပူၤလီၤ. ၂၄ ဒီးဂီၤဖံး, ဒီးကသ့ၣ်ယီၤလၢ အမၤဟီၣ်ခိၣ်တဖၣ် ကအီၣ်တၢ်အီၣ်ဃါဃုာ်ဒီး အံသၣ်လၢပှၤဂုၤဝဲလၢနီၣ်ဂုၤဃၤ, ဒီးကီၢ်လဲၢ်န့ၣ်လီၤ. ၂၅ ဒီးလၢ တၢ်မၤသံဖးဒိၣ် အမုၢ်နံၤန့ၣ်, တုၤတိာ်ဧိၤတာ်ဧိၤလီၤပှီၢ်ဝဲဒီး, ထံမိၢ်ပှၢ်ဒီးထံဖိကျိတဖၣ် ကအိၣ်ဝဲလၢ ကယဲၢ်ကစၢၢ်ထီအလိၤ, ဒီးလၢကယဲၢ် တၢ်စိခိၣ်ထီအလိၤ ကိးဖျၢၣ်ဒဲးလီၤ. ၂၆ ဒီးမုၢ်တနံၤလၢယွၤဘိၣ်ထီၣ် အပှၤတကလုာ်အပူၤလီၢ်, ဒီးမၤဘျါက့ၤ အဘၣ်တီၢ်အလီၢ်န့ၣ် လါအတၢ်ကပီၤကမၤသးဒ် မုၢ်အတၢ်ကပီၤအသိး, ဒီးမုၢ်အတၢ်ကပီၤ ကအါထီၣ်နွံစး, ဒ်မုၢ်နွံနံၤအတၢ်ကပီၤအသိးန့ၣ်လီၤ. ၂၇ ကွၢ်ကွၢ်, ယွၤအမံၤဟဲလၢအယံၤ, အသးထီၣ်ကဲၤထီၣ်, မ့ၣ်အူခုၣ်ထီၣ်ဝဲလီၤ. အပျုၤပှဲၤဒီးသးထီၣ်, အပျ့ၤမၤသးဒ်မ့ၣ်အူလၢ အအီၣ်တၢ်အသိးန့ၣ်လီၤ. ၂၈ ဒီးအသါ မၤသးဒ် ထံကျိဆူၣ်လၢ အလုၣ်ဘၢအနံၤအသိးန့ၣ်, ကထီၣ်တုၤလၢပှၤအကိာ်, ဒ်သိးအကဂံၤဂုၤပှၤကလုာ်တဖၣ် လၢတၢ်ကဘျံးကဘျၣ်အနီၣ်ဂုၤ, ဒီးထးအ့ၣ်ပျံၤဆှၢကမၣ် တၢ်လၢပှၤဂီၢ်မုၢ်အခၣ်ဃံအလိၤန့ၣ်လီၤ. ၂၉ တၢ်သးဝံၣ် ကအိၣ်ဒီးသုဒ်မုၢ်တနၤလၢ တၢ်ပာ်စီဆှံတၢ်မၤဘူၣ်အသိးန့ၣ်, ဒီးတၢ်သူၣ်ခုသးခုမၤသးဒ် ပှၤလဲၤတၢ်ဒီး ပံဧိၤတြၤဧိၤအသီၣ်, ဒ်သိးအကလဲၤထီၣ်ဘးယွၤအကစၢၢ်, ဆူအံၣ်စရ့လး အလၢၢ်အအိၣ်အသိးန့ၣ်လီၤ. ၃၀ ဒီးယွၤကဒုးနၢ်ဟူ အကလုၢ်အကဟုအကညီၢ်, ဒီးကဒုးထံၣ်ဘၣ် အစုဟဲလီၤအိၣ်ဒီး သးထီၣ်ကဲၤထီၣ်, ဒီးမ့ၣ်လၣ်လၢအအီၣ်တၢ်, ဒီးကလံၤမုၢ်တွၤအတၢ်စူၤ ဒီးသူၣ်အလၢၢ်လီၤ. ၃၁ အဂ့ၢ်ဒ်အံၤ, ပှၤအၤၡူၢ်ဖိကကၢ်လီၤဝဲလၢ ယွၤအကလုၢ်အဃိ, ကတီၢ်ဝဲလၢနီၣ်တီၢ်လီၤ. ၃၂ ဒီးနီၣ်တီၢ်လၢ အတိာ်အသးတဘိ အတၢ်တီၢ်တဘီလၢ်လၢ် လၢယွၤပာ်လၢအလိၤန့ၣ် ကအိၣ်ဒီးဒၢဧိၤမိၤဧိၤ, ဒီးတနၢ်တဖီ, ဒီးလၢတၢ်ဒုးသုးလိာ်အသး ဆူၣ်ဆူၣ်ကလဲာ်န့ၣ် ကဒုးလိာ်အသးဒီးအီၤလီၤ. ၃၃ အဂ့ၢ်ဒ်အံၤ, လၢမုၢ်ဟါတနံၤ လံၤလံၤန့ၣ် တိဖ့းကတဲာ်ကတီၤတ့ၢ်အသး, ဒီးလၢစီၤပၤအဂီၢ်န့ၣ် ကတဲာ်ကတီၤလီၤအသးလီၤ. တၢ်မၤယိာ်ဒံးအီၤ, မၤလဲၢ်ထီၣ်ဝဲ, အပူမ့ၢ်မ့ၣ်အူဒီး သ့ၣ်မုၣ်အိၣ်အါလံလၢအပူၤလံ. ယွၤအသါ မၤသးဒ် ကးအကျိၤသိးန့ၣ် ဆိၣ်ကဲၤထီၣ်အီၤလီၤ.
လါယနူၤအါရံၤ ၁၆–၂၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယၡါယၤ ၃၄-၃၇
“ခီဖျိလၢတၢ်နာ်အဃိ စီၤပၤဃံးစကံယၤဒိးန့ၢ်ဘၣ်ဝဲ တၢ်ဆိၣ်ဂ့ၤ”
(ယၡါယၤ ၃၆:၁) ဒီးလၢစီၤပၤဃံးစကံယၤအနံၣ်ပှဲၤထီၣ် တဆံလွံၢ်နံၣ်တနံၣ်န့ၣ် တၢ်မၤအသးလၢ အၤၡူၢ်အစီၤပၤ စၤနဃ့ရံာ် ဟဲထီဒါယူဒၤအဝ့ၢ် အိၣ်ဒီးအခိၣ်ဒူခဲလၢာ်, ဒီးမၤန့ၢ်အီၤလီၤ.
(ယၡါယၤ ၃၆:၄-၁၀) ဒီးစီၤရၤဘၡါက့ၤစံးဘၣ်အီၤ, စံးလၢ်စီၤဃံးစကံယၤ, တၢ်ဒိၣ်စီၤပၤ, အၤၡူၢ်အစီၤပၤ စံးဒ်အံၤ, တၢ်သန့ၤအသးအိၣ်ဒီးနၤလၢ နသန့ၤနသးလၢအီၤ မ့ၢ်မနုၤတမံၤလဲၣ်. ၅ ယစံး, မ့ၢ်ထဲတၢ်ကတိၤကလီကလီလၢနစံး, ယအိၣ်ဒီးတၢ်ကူၣ်တၢ်ဖး ဒီးတၢ်အဂံၢ်အဘါလၢဒုးသုးအဂီၢ်န့ၣ်လီၤ. ခဲကနံၣ်အံၤ နသန့ၤနသးလၢ မတၤတဂၤလၢနပူထီၣ်ယၤန့ၣ်လဲၣ်. ၆ ကွၢ်ကွၢ်, နသန့ၤနသးလၢနီၣ်ထိးဘိအံၤ, တပိၢ်လၢ အကၢ်ပိၤအသး တဘိ, လၢအဲၤကူပတူးလၢ ပှၤမ့ၢ်သန့ၤအသးလၢအီၤဒီး, ကနုာ်လၢအစုပူၤ, ဒီးဆဲးနုာ်အီၤလီၤ. အဲၤကူပတူး အစီၤပၤဖၤရိၤ မၤအသးဒ်န့ၣ် လၢကယဲၢ်ပှၤလၢအသန့ၤအသးလၢအီၤလီၤ. ၇ ဒီးနမ့ၢ်စံးဘၣ်ယၤ, ပသန့ၤပသးလၢ ယွၤပကစၢ်န့ၣ်ဒီး, အဝဲဒၣ်မ့ၢ်ပှၤလၢ စီၤဃံးစကံယၤ ဟံးထီၣ်ကွံာ် အလီၢ်ထီၣ်ထီတဖၣ်, ဒီးအတၢ်လုၢ်လီၢ်တဖၣ်, ဒီးစံးလၢယူဒၤဒီးယရူၤၡလ့ၣ်, သုဘၣ်ဘူၣ်တၢ်ဘါတၢ်လၢ တၢ်လုၢ်လီၢ်အံၤ အမဲာ်ညါန့ၣ် တမ့ၢ်ဘၣ်ဧါ. ၈ ဒီးခဲကနံၣ်အံၤ အၢၣ်လီၤအီလီၤလၢ်တၢ်ဒီး ယကစၢ် အၤၡူၢ်အစီၤပၤန့ၣ်တက့ၢ်, ဒီးနဲဒၣ်တခီနပာ် ပှၤဒိးကသ့ၣ်လၢအလိၤမ့ၢ်သ့ဒီး, ယကဟ့ၣ်နၤလၢ ကသ့ၣ်ခံကထိလီၤ. ၉ မၤသးဒ်န့ၣ်ဒီး နကဘိးဃၣ်ကဒါ ယကစၢ်အပဒိၣ်လၢ အဆံးကတၢၢ်အကျါတဂၤ, ဒီးသန့ၤနသးလၢ အဲၤကူပတူးလၢ လ့ၣ်ကဟၣ်အဂ့ၢ်, ဒီးလၢကသ့ၣ်အဂ့ၢ်န့ၣ်ဒ်လဲၣ်. ၁၀ ဒီးခဲကနံၣ်အံၤ ယွၤတအိၣ်ဘၣ်ဒီး, ယဟဲထီဒါကီၢ်တဘ့ၣ်အံၤ ဒ်သိးယကမၤဟးဂီၤအီၤဧါ. ယွၤစံးဘၣ်ယၤ, လဲၤထီၣ်ဆူ ကီၢ်တဘ့ၣ်အံၤ ဒီးမၤဟးဂီၤအီၤတက့ၢ်လီၤ.
(ယၡါယၤ ၃၆:၁၅) ဒီးစီၤဃံးစကံယၤ စံးဘၣ်သု, ယွၤကအုၣ်က့ၤခီၣ်က့ၤပှၤသပှၢ်တၢၢ်, ဝ့ၢ်တဖျၢၣ်အံၤ တၢ်တဟ့ၣ်လီၤကွံာ်ဘၣ်အီၤလၢ အၤၡူၢ်အစီၤပၤ အစုဘၣ်န့ၣ်သတးဒီး, မ်အသု တဒုးသန့ၤသုသးလၢ ယွၤတဂ့ၤ.
(ယၡါယၤ ၃၆:၁၈-၂၀) စီၤဃံးစကံယၤစံး, ယွၤကမၤပူၤမၤဖျဲးပှၤသတးဒီး, မ်အသု တလွဲန့ၢ်သုတဂ့ၤ, ပှၤကလုာ်တဖၣ်အကစၢ် တဂၤဂၤမၤပူၤမၤဖျဲးအထံအကီၢ်လၢ အၤၡူၢ်အစီၤပၤ အစုပူၤန့ၣ်စ့ၢ်ကီးဧါ. ၁၉ ဃမါသး, ဒီးအၢ်ပးအကစၢ်တဖၣ်အိၣ်ဖဲလဲၣ်. စဖၤရဝံၣ်အကစၢ်တဖၣ်အိၣ်ဖဲလဲၣ်. ဒီးတၢ်မၤပူၤမၤဖျဲးၡၤမရံလၢ ယစုပူၤစ့ၢ်ကီးဧါ. ၂၀ ဒ်သိးယွၤကမၤပူၤမၤဖျဲး ယရူၤၡလ့ၣ်လၢ ယစုပူၤန့ၣ် ဒီးလၢကီၢ်တဖၣ်န့ၣ် အကစၢ်ခဲလၢာ်အကျါန့ၣ် မ့ၢ်မတၤမၤပူၤအထံအကီၢ်လၢ ယစုပူၤတဂၤလဲၣ်.
ip-1 ကဘျံးပၤ ၃၈၆-၃၈၈ အဆၢ ၇-၁၄
လၢတၢ်နာ်အဃိ စီၤပၤတဂၤ ဒိးန့ၢ်ဘၣ်တၢ်ဆိၣ်ဂ့ၤ
စီၤရၤဘၡါက့ၤ တဲဖျါထီၣ်အတၢ်ဂ့ၢ်တၢ်ကျိၤ
၇ အၤၡူၢ်အစီၤပၤ စၤနဃ့ရံာ် မၢလီၤဝဲ စီၤရၤဘၡါက့ၤ (မ့ၢ်အမံၤလၤသၣ်ကပီၤ လၢဘၣ်ဃးဒီးသုး, တမ့ၢ်အမံၤဘၣ်) ဒီးသုးခိၣ်အဂၤခံဂၤ ဆူဝ့ၢ်ယရူၤၡလ့ၣ် ဒ်သိးကမၢ ပှၤဝ့ၢ်ဖိတဖၣ် ပာ်လီၤစုကဝဲၤအဂီၢ်လီၤ. (၂ စီၤပၤ ၁၈:၁၇) အဝဲသ့ၣ် ထံၣ်လိာ်အသးဒီး စီၤဃံးစကံယၤ အပှၤခၢၣ်စးတၢ်ဖိသၢဂၤ လၢအမ့ၢ် စီၤဃံးစကံယၤ အဟံၣ်ခိၣ် စီၤအ့လယါကံၣ်, ပှၤကွဲးလံာ်ဖိ စီၤၡ့ၤဘနၤ ဒီးပှၤကွဲးနီၣ်တၢ် စီၤအၤစာ်အဖိခွါ စီၤယိၤအၤ လၢဝ့ၢ်ခိၣ်ဒူအချၢန့ၣ်လီၤ.—ယၡါယၤ ၃၆:၂, ၃.
၈ စီၤရၤဘၡါက့ၤ အတၢ်တိာ်ပာ်မ့ၢ်ဝဲ ကမၤဝဲဒ်သိး ပှၤဝ့ၢ်ယရူၤၡလ့ၣ်ဖိတဖၣ် တဒုးတၢ်ဒီး အဝဲသ့ၣ်ဘၣ်ဒီး ကပာ်လီၤအစုကဝဲၤအဂီၢ်လီၤ. အဆိကတၢၢ်န့ၣ် အဝဲကိးပသူထီၣ်ဒီး တဲဝဲလၢ ဧ့ၤဘြံၤအကျိာ်လၢ– “တၢ်သန့ၤအသးအိၣ်ဒီးနၤလၢ နသန့ၤနသးလၢအီၤမ့ၢ်မနုၤတမံၤလဲၣ်. . . . နသန့ၤနသးလၢ မတၤတဂၤလၢနပူထီၣ်ယၤန့ၣ်လဲၣ်.” (ယၡါယၤ ၃၆:၄, ၅) စီၤရၤဘၡါက့ၤ ဒုၣ်ဒွဲၣ်စံးအၢဝဲ ပှၤယူဒၤဖိလၢ အပျံၤတၢ်ဒီး ဟ့ၣ်ပလီၢ်ဝဲလၢ ပှၤမၤစၢၤအဝဲသ့ၣ် တအိၣ်ဘၣ်. မ့ၢ်အဝဲသ့ၣ် ကဃ့တၢ်မၤစၢၤလၢ မတၤအအိၣ်လဲၣ်. လၢကီၢ်အဲၤကူပတူးလၢ အလီၤဂာ်ဒ် “တပိၢ်လၢအကၢ်ပိၤအသးတဘိ” ဧါ. (ယၡါယၤ ၃၆:၆) ဖဲန့ၣ်အဆၢကတီၢ် ကီၢ်အဲၤကူပတူး လီၤဂာ်ဒ် တပိၢ်လၢအကၢ်ပိၤအသးတဘိလီၤ. လၢအပူၤကွံာ် အဲၤကူပတူးမ့ၢ် ထံကီၢ်လၢအဒိၣ်စိလၢ ဟီၣ်ခိၣ်ဒီဘ့ၣ်ဘၣ်ဆၣ် ခဲအံၤ အဝဲသ့ၣ်လီၤလၢ အံးသံးယိဖၠံယါ အစုပူၤဒီး အစီၤပၤဖၤရိၤ, စီၤပၤ တံရဟၤန့ၣ်တမ့ၢ် ပှၤအဲၤကူပတူးဖိဘၣ်, မ့ၢ်ပှၤအံးသံးယိဖၠံယါဖိလီၤ. ဒီးအဲၤကူပတူး ကလီၤလၢ အၤၡူၢ်အစုပူၤဘူးထီၣ်လံ. (၂ စီၤပၤ ၁၉:၈, ၉) မ့ၢ်လၢကီၢ်အဲၤကူပတူး မၤစၢၤလီၤအသးတသ့ဘၣ်အဃိ မၤစၢၤပှၤယူဒၤဖိတဖၣ်တသ့ဘၣ်.
၉ စီၤရၤဘၡါက့ၤ တဲဝဲလၢ ယဟိဝၤယွၤ တမၤစၢၤအပှၤကလုာ်တဖၣ်ဘၣ်, မ့ၢ်လၢကစၢ် တဘၣ်သူၣ်ဘၣ်သး အဝဲသ့ၣ်အဃိလီၤ. အဝဲတဲဝဲလၢ- “ဒီးနမ့ၢ်စံးဘၣ်ယၤ, ပသန့ၤပသးလၢ ယွၤပကစၢ်န့ၣ်ဒီး, အဝဲဒၣ်မ့ၢ်ပှၤလၢ စီၤဃံးစကံယၤ ဟံးထီၣ်ကွံာ် အလီၢ်ထီၣ်ထီတဖၣ်, ဒီးအတၢ်လုၢ်လီၢ်တဖၣ်, ဒီးစံးလၢယူဒၤဒီးယရူၤၡလ့ၣ်, သုဘၣ်ဘူၣ်တၢ်ဘါတၢ်လၢ တၢ်လုၢ်လီၢ်အံၤ အမဲာ်ညါန့ၣ် တမ့ၢ်ဘၣ်ဧါ.” (ယၡါယၤ ၃၆:၇) နီၢ်နီၢ်န့ၣ် တမ့ၢ်အဝဲသ့ၣ် စူးကွံာ်ညိကွံာ် ယဟိဝၤယွၤဘၣ်, မ့ၢ်ဒၣ်အဝဲသ့ၣ် ဟဲက့ၤဆူယွၤအအိၣ်လီၤ.
၁၀ ဒီးစီၤရၤဘၡါက့ၤ တဲစ့ၢ်ကီးဝဲလၢ အဝဲသ့ၣ်မ့ၢ်ကွၢ်ဝဲလၢ သုးမုၢ်သံၣ်ဘိတကပၤစ့ၢ်ကီး ပှၤယူဒၤဖိတဖၣ် ကၡူဝဲလီၤ. အဝဲပာ်ထီၣ်ထီအသးဒီး တဲဝဲလၢ– “ဒီးခဲကနံၣ်အံၤ အၢၣ်လီၤအီလီၤလၢ်တၢ်ဒီး ယကစၢ် အၤၡူၢ်အစီၤပၤန့ၣ်တက့ၢ်, ဒီးနဲဒၣ်တခီနပာ် ပှၤဒိးကသ့ၣ်လၢအလိၤမ့ၢ်သ့ဒီး, ယကဟ့ၣ်နၤလၢ ကသ့ၣ်ခံကထိလီၤ.” (ယၡါယၤ ၃၆:၈) ပှၤဒိးကသ့ၣ်ဖိ အိၣ်ဆံးအါဆံးအါလဲၣ်န့ၣ် မ့ၢ်တၢ်အရ့ဒိၣ်လၢ ပှၤယူဒၤဖိတဖၣ်အဂီၢ်ဧါ. တမ့ၢ်ဘၣ်. မ့ၢ်လၢပှၤယူဒၤဖိတဖၣ် အတၢ်အုၣ်က့ၤခီၣ်က့ၤန့ၣ် တဒိးသန့ၤထီၣ်အသးလၢ သုးမုၢ်သံၣ်ဘိတဖၣ် အဂံၢ်အဘါအဖီခိၣ်အဃိလီၤ. ကတိၤဒိ ၂၁:၃၁ စံးဝဲလၢ– “ကသ့ၣ် ကတဲာ်ကတီၤအသးလၢ ဒုးသုး မုၢ်တနံၤအဂီၢ်, မ့မ့ၢ်တၢ်မၤနၢၤတၢ်ဟဲလၢယွၤလီၤ.” စီၤရၤဘၡါက့ၤ တဲကဒီးဝဲလၢ ယဟိဝၤယွၤ ဆိၣ်ဂ့ၤဝဲအၤၡူၢ် ဒီးတဆိၣ်ဂ့ၤဝဲ ပှၤယူဒၤဖိတဖၣ်ဘၣ်. အဝဲတဲဝဲလၢ ယဟိဝၤယွၤ ဆိၣ်ဂ့ၤအီၤအဃိ အဝဲသ့ၣ်ဟဲနုာ်လီၤဝဲလၢ ပှၤယူဒၤဖိတဖၣ် အထံအကီၢ်ပူၤန့ၢ်ဝဲထဲအံၤလီၤ.—ယၡါယၤ ၃၆:၉, ၁၀.
၁၁ မ့မ့ၢ်စီၤဃံးစကံယၤ အပှၤခၢၣ်စးတၢ်ဖိတဖၣ် ဘၣ်ယိၣ်ဝဲလၢ ပှၤယူဒၤဖိလၢ အအိၣ်လၢ ဝ့ၢ်ခိၣ်ဒူအဖီခိၣ်လၢ အနၢ်ဟူ စီၤရၤဘၡါက့ၤ အတၢ်ကတိၤတဖၣ်န့ၣ် ကပျံၤတၢ်လီၤ. အဃိ ပှၤယူဒၤခိၣ်နၢ်တဖၣ်အံၤ ဃ့ကညး စီၤရၤဘၡါက့ၤလၢ– “ကတိၤလၢ်လၢအၤရၣ်အကျိာ် ဒီးနခ့နပှၤတက့ၢ်. အဂ့ၢ်ဒ်အံၤ, ပနၢ်ပၢၢ်လီၤ. ဒီးကတိၤတၢ်လၢ ယူဒၤအကျိာ်ဒီး ပှၤလၢပှၤဂီၢ်မုၢ်လၢ အအိၣ်လၢ ခိၣ်ဒူအဖီခိၣ်န့ၣ် အနၢ်ပူၤတဂ့ၤ.” (ယၡါယၤ ၃၆:၁၁) ဘၣ်ဆၣ် စီၤရၤဘၡါက့ၤ တအဲၣ်ဒိးတဲဝဲလၢ အၤရၣ်အကျိာ်ဘၣ်. အဝဲအဲၣ်ဒိးမၤပျံၤမၤဖုးဒီး မၤဒ့ဒီဝဲပှၤယူဒၤဖိတဖၣ်အသး ဒ်သိးပှၤယူဒၤဖိတဖၣ် ကပာ်လီၤစုကဝဲၤဒီး အဝဲသ့ၣ်တဒုးဘၣ်တၢ်ဒီး ကမၤနၢၤ ဝ့ၢ်ယရူၤၡလ့ၣ်အဂီၢ်လီၤ. (ယၡါယၤ ၃၆:၁၂) ဒီးပှၤအၤၡူၢ်ဖိတဖၣ် တဲကဒီးတၢ်လၢ “ယူဒၤအကျိာ်” လီၤ. အဝဲတဲဝဲ ပှၤလၢအအိၣ်အဆိးလၢ ဝ့ၢ်ယရူၤၡလ့ၣ်တဖၣ်လၢ “မ်သုသုတဟ့ၣ် စီၤဃံးစကံယၤ လီန့ၢ်သုတဂ့ၤ, အဂ့ၢ်ဒ်အံၤ, မၤပူၤမၤဖျဲးသုတသ့ဘၣ်.” ဒီးအဝဲဂုာ်ကျဲးစၢး ကွဲန့ၢ်လွဲန့ၢ်ဝဲ ပှၤလၢအဒိကနၣ်တၢ်တဖၣ် ခီဖျိတဲဝဲလၢ အဝဲသ့ၣ် မ့ၢ်ဒိးပၢအသးလၢ အၤၡူၢ်အတၢ်ပၢအဖီလာ်န့ၣ် ကအိၣ်ဘၣ်ဝဲ ဒ်လဲၣ်န့ၣ်လီၤ. အဝဲတဲဝဲဒ်အံၤ– “မၤဒီးယၤလၢတၢ်ဆိၣ်ဂ့ၤ, ဒီးဟဲထီၣ်ဆူယအိၣ်, ဒီးအီၣ်တဂၤလၢအစပံးမုၢ်ဒၣ်ဝဲ, တဂၤလၢအချၢၣ်ဒၢဒၣ်ဝဲ, ဒီးအီတဂၤလၢအထံပူၤဒၣ်ဝဲကိးဂၤဒဲး, တုၤယဟဲဒီးစိာ်ထီၣ်သုဆူကီၢ်တဘ့ၣ် မၤသးဒ်သုကီၢ်ဒၣ်သုဝဲအသိး, ကီၢ်တဘ့ၣ်အိၣ်ဒီး ဘုကၠူၣ်ဒီးစပံးထံ, ကီၢ်တဘ့ၣ်အိၣ်ဒီးကိၣ်, ဒီးစပံးအလီၢ်တဖၣ်န့ၣ်လီၤ.”—ယၡါယၤ ၃၆:၁၃-၁၇.
၁၂ တနံၣ်အံၤ မ့ၢ်လၢပှၤအၤၡူၢ်ဖိတဖၣ် ဟဲနုာ်လီၤလၢ ပှၤယူဒၤဖိတဖၣ် အထံလီၢ်ကီၢ်ပူၤအဃိ အဝဲသ့ၣ် သူၣ်အီၣ်ဖျးအီၣ်တၢ်တသ့ဘၣ်ဒီး ဘုတအိၣ်လၢကကူးဝဲအဂီၢ်ဘၣ်. လၢတၢ်န့ၣ်အဃိ တၢ်မုၢ်လၢ်လၢ အဝဲသ့ၣ် ကအီၣ်ဘၣ် စပံးသၣ်ဒီးအီဘၣ် ထံခုၣ်ခုၣ်န့ၣ် ကထုးန့ၢ်ပှၤလၢအနၢ်ဟူတၢ်လၢ ဝ့ၢ်ခိၣ်ဒူတဖၣ် အသးလီၤ. ဒီးစီၤရၤဘၡါက့ၤ ဂုာ်ကျဲးစၢးမၤလီၤစၢ်ဝဲ ပှၤယူဒၤဖိတဖၣ်အသး ထဲအံၤဒီးတဝံၤဒံးဘၣ်.
၁၃ စီၤရၤဘၡါက့ၤ တဲဝဲထဲတၢ်စုကဝဲၤအဂ့ၢ်တကးဘၣ် တဲကဒီးဝဲ တၢ်ဂ့ၢ်လၢအဂၤတမံၤလီၤ. အဝဲတဲဝဲ ပှၤယူဒၤဖိတဖၣ် လၢတဘၣ်ဒိကနၣ် စီၤဃံးစကံယၤ အတၢ်ကတိၤလၢအမ့ၢ် “ယွၤကမၤပူၤမၤဖျဲးပှၤ” န့ၣ်တဂ့ၤ. ဒီးတဲဝဲလၢ ၡၤမရံ အကစၢ်ယွၤန့ၣ် ဒီသဒၢဝဲ ပှၤအံၣ်စရ့လးဖိအဒူၣ်တဆံလၢ ပှၤအၤၡူၢ်ဖိတဖၣ် အစုပူၤတန့ၢ်ဘၣ်. ဘၣ်ဃးဒီး ထံကီၢ်လၢ အၤၡူၢ်အစီၤပၤ မၤနၢၤဝဲတဖၣ် အကစၢ်ယွၤန့ၣ် စီၤရၤဘၡါက့ၤ စံးဝဲလၢ “ဃမါသး, ဒီးအၢ်ပးအကစၢ်တဖၣ်အိၣ်ဖဲလဲၣ်. စဖၤရဝံၣ်အကစၢ်တဖၣ်အိၣ်ဖဲလဲၣ်. ဒီးတၢ်မၤပူၤမၤဖျဲးၡၤမရံလၢယစုပူၤစ့ၢ်ကီးဧါ.”—ယၡါယၤ ၃၆:၁၈-၂၀.
၁၄ စီၤရၤဘၡါက့ၤ လၢအဘူၣ်ထီၣ်ဘါထီၣ် ယွၤလၢအကမၣ်န့ၣ် တသ့ၣ်ညါဝဲလၢ ပှၤၡၤမရံဖိလၢ အသးတတီဒီးယွၤ ဒီးပှၤဝ့ၢ်ယရူၤၡလ့ၣ်ဖိတဖၣ် အတၢ်လီၤဆီအိၣ်ဝဲဒ်လဲၣ်န့ၣ်ဘၣ်. ၡၤမရံ အယွၤလၢ အကမၣ်န့ၣ် တအိၣ်ဒီးတၢ်စိတၢ်ကမီၤလၢ ကမၤပူၤဖျဲးဝဲ ပှၤအံၣ်စရ့လး အဒူၣ်တဆံန့ၣ်ဘၣ်. (၂ စီၤပၤ ၁၇:၇, ၁၇, ၁၈) မ့မ့ၢ် ပှၤဝ့ၢ်ယရူၤၡလ့ၣ်ဖိလၢ အအိၣ်လၢ စီၤဃံးစကံယၤ အတၢ်ပၢအဖီလာ်န့ၣ် ပာ်တ့ၢ်ကွံာ်ဝဲ ယွၤလၢအကမၣ်ဒီး ဟဲက့ၤဆူ ယဟိဝၤယွၤအအိၣ်လီၤ. ဒ်လဲၣ်ဂ့ၤ, ဒ်လဲၣ်ဂ့ၤ ယူဒၤအပှၤခၢၣ်စးတၢ်သၢဂၤ တတဲဆၢက့ၤအီၤ တၢ်နီတမံၤဘၣ်. “အဝဲသ့ၣ်အိၣ်ဘှီၣ်ကလာ်ဒီး တစံးဆၢတၢ်နီတမံၤဘၣ်. အဂ့ၢ်ဒ်အံၤ, စီၤပၤမၤလိာ်တၢ်, ဒီးစံးဝဲဒၣ်, စံးဆၢအီၤနီတမံၤတဂ့ၤန့ၣ်လီၤ.” (ယၡါယၤ ၃၆:၂၁) စီၤအ့လယါကံၣ်, စီၤၡ့ၤဘနၤ ဒီးစီၤယိၤအၤ ဟဲက့ၤဆူ စီၤဃံးစကံယၤ အအိၣ်ဒီးတဲဘၣ်က့ၤအီၤ စီၤရၤဘၡါက့ၤ အတၢ်ကတိၤခဲလၢာ်လီၤ.—ယၡါယၤ ၃၆:၂၂.
(ယၡါယၤ ၃၇:၁, ၂) ဒီးတုၤစီၤဃံးစကံယၤ နၢ်ဟူတၢ်န့ၣ်ဒီး, တၢ်မၤအသးလၢ အဖှီအဆ့, ဒီးကၤဝဲလၢ ထၢၣ်အတၢ်ကံးညာ်, ဒီးလဲၤနုာ်လၢယွၤအဟံၣ်ပူၤလီၤ. ၂ ဒီးမၢလီၤ စီၤအ့ၤလယါကံၣ်လၢ အအိၣ်လၢ ဟံၣ်အဖီခိၣ်, ဒီးပှၤကွဲးလံာ်စီၤၡ့ၤဘနၤ, ဒီးပှၤလုၢ်တၢ်အဒိၣ်တဖၣ် အပှၤသူၣ်က့သးပှၢ် ကၤဝဲလၢ ထၢၣ်အတၢ်ကံးညာ်, ဆူစီၤအၤမိာ်အဖိခွါ ဝံယၡါယၤအအိၣ်န့ၣ်လီၤ.
(ယၡါယၤ ၃၇:၁၄-၂၀) ဒီးစီၤဃံးစကံယၤန့ၣ် ဟံးန့ၢ်လံာ်လၢကလူးတဖၣ်အစုပူၤ, ဒီးဖးဝဲ, ဒီးလဲၤထီၣ်ဝဲဆူယွၤအဟံၣ်ပူၤ, ဒီးစီၤဃံးစကံယၤသလၣ်ထီၣ်ဝဲလၢ ယွၤအမဲာ်ညါလီၤ. ၁၅ ဒီးစီၤဃံးစကံယၤ ဘါထုကဖၣ်ယွၤ, ဒီးစံးဝဲဒၣ်, ၁၆ တၢ်သုးမုၢ်ဂီၢ်မုၢ်အယွၤ, အံၣ်စရ့လးအကစၢ်လၢ အအိၣ်ဝဲလၢ ခ့ရူာ်အဘၢၣ်စၢၤ တဂၤဧၢ, နဲဒၣ်နမ့ၢ်ကစၢ်တဂၤဃီလၢ ဟီၣ်ခိၣ်အဘီမုၢ်ခဲလၢာ်အဖီခိၣ်လီၤ. နတ့လီၤ မူခိၣ်, ဒီးဟီၣ်ခိၣ်လီၤ. ၁၇ ပာ်ဒိးနနၢ်, ယွၤဧၢ, ဒီးကနၣ်တက့ၢ်. အိးထီၣ်နမဲာ်, ယွၤဧၢ, ဒီးထံၣ်တၢ်, ဒီးကနၣ် စီၤစၤနဃ့ရံာ် အတၢ်ကတိၤခဲလၢာ်လၢအဟ့ၣ်ယုၢ်ဝဲ ဒ်သိးအကဒုၣ်ဒွဲၣ်ကစၢ်လၢ အမူဝဲန့ၣ်တက့ၢ်. ၁၈ မ့ၢ်မး, ယွၤဧၢ, အၤၡူၢ်အစီၤပၤတဖၣ် မၤဟးဂီၤဘီမုၢ်ခဲလၢာ်, ဒီးအထံအကီၢ်, ၁၉ ဒီးကွံာ်တ့ၢ် အကစၢ်တဖၣ်လၢ မ့ၣ်အူပူၤ, (အဂ့ၢ်ဒ်အံၤ, တမ့ၢ်ဘၣ်ကစၢ်ဘၣ်, မ့ၢ်သ့ၣ်ဧိၤဝၣ်ဧိၤ, ဒီးလၢၢ်ဧိၤလ့ဧိၤ, ပှၤကညီ အမၤတၢ်လၢ အစုလီၤ), ဒီးမၤဟးဂီၤကွံာ်အီၤလီၤ. ၂၀ ဒီးခဲကနံၣ်အံၤ, ယွၤပကစၢ်ဧၢ, အုၣ်က့ၤခီၣ်က့ၤ ပှၤလၢ အစုပူၤတက့ၢ်. ဒီးဟီၣ်ခိၣ် အဘီအမုၢ်ခဲလၢာ် ကသ့ၣ်ညါလၢနမ့ၢ်ယွၤ, ထဲနၤတဂၤဧိၤလီၤ.
ip-1 ကဘျံးပၤ ၃၈၉-၃၉၁ အဆၢ ၁၅-၁၇
လၢတၢ်နာ်အဃိ စီၤပၤတဂၤ ဒိးန့ၢ်ဘၣ်တၢ်ဆိၣ်ဂ့ၤ
စီၤဃံးစကံယၤ မၤတၢ်ဆၢတဲာ်တခါ
၁၅ ခဲအံၤ စီၤပၤဃံးစကံယၤ ကဘၣ်မၤတၢ်ဆၢတဲာ်လီၤ. မ့ၢ်ဝ့ၢ်ယရူၤၡလ့ၣ် ကပာ်လီၤအစုကဝဲၤလၢ ပှၤအၤၡူၢ်ဖိအစုပူၤဧါ. မ့တမ့ၢ် ကဃ့ဝဲတၢ်မၤစၢၤလၢ အဲၤကူပတူးအအိၣ်ဧါ, မ့တမ့ၢ်ဘၣ်န့ၣ် အဝဲကဒုးတၢ်ဧါ. စီၤဃံးစကံယၤ ပှဲၤဒီးတၢ်သူၣ်ကိၢ်သးဂီၤလီၤ. ဖဲအဝဲမၢလီၤဝဲ စီၤအ့လယါကံၣ် ဒီးစီၤၡ့ၤဘနၤ ဒီးပှၤလုၢ်တၢ်အဒိၣ်လၢ အသးပှၢ်တဖၣ် လဲၤဆူဝံယၡါယၤအအိၣ် ဒ်သိးကသံကွၢ်တၢ်လၢ ယဟိဝၤယွၤ အအိၣ်အခါ အဝဲလဲၤဝဲဆူ ယဟိဝၤယွၤအတၢ်လုၢ်ဟံၣ်လီၤ. (ယၡါယၤ ၃၇:၁, ၂) စီၤပၤအပှၤလၢ အကူအသိး ထၢၣ်အတၢ်ကံးယာ်တဖၣ်အံၤ လဲၤလၢဝံယၡါယၤအအိၣ်ဒီး စံးဝဲလၢ– “တၢ်လၢမုၢ်မဆါတနံၤအံၤ မ့ၢ်တၢ်ကိၢ်တၢ်ဂီၤ, ဒီးတၢ်သိၣ်ဃီၣ်, ဒီးတၢ်မၤတရီတပါအနံၤလီၤ . . . ဘၣ်တဘၣ် ယွၤနကစၢ်ကနၢ်ဟူ စီၤရၤဘၡါက့ၤအတၢ်ကတိၤ, လၢအကစၢ်အၤၡူၢ်အစီၤပၤမၢလီၤ ဒ်သိး အကဒုၣ်ဒွဲၣ် ကစၢ်လၢအမူဝဲန့ၣ်, ဒီးကသိၣ်ဃီၣ်တၢ်ကတိၤန့ၣ် လၢယွၤနကစၢ်နၢ်ဟူတ့ၢ်လီၤ.” (ယၡါယၤ ၃၇:၃-၅) ပှၤအၤၡူၢ်ဖိတဖၣ် တၤဝဲယဟိဝၤယွၤလီၤ. မ့ၢ်ယဟိဝၤယွၤ ပာ်သူၣ်ပာ်သး အဝဲသ့ၣ် အတၢ်ကတိၤဧါ. ယဟိဝၤယွၤ ဟ့ၣ်ဂံၢ်ဟ့ၣ်ဘါဝဲ ပှၤယူဒၤဖိတဖၣ်လၢ– “ပျံၤတၢ်ကတိၤလၢ နနၢ်ဟူလၢ အၤၡူၢ် အစီၤပၤအခ့အပှၤ ဒုၣ်ဒွဲၣ်ယၤန့ၣ်တဂ့ၤ, ကွၢ်ကွၢ်, ယကပာ်သးတမံၤလၢအပူၤ, ဒီးကနၢ်ဟူ တၢ်အကစီၣ် ဒီးက့ၤကဒါက့ၤဆူအကီၢ်ဒၣ်ဝဲ, ဒီးယကဒုးလီၤဃံၤအီၤလၢ နးလၢအကီၢ်ဒၣ်ဝဲအပူၤလီၤ.”—ယၡါယၤ ၃၇:၆, ၇.
၁၆ ဖဲန့ၣ်အဆၢကတီၢ် အၤၡူၢ်အစီၤပၤ စၤနဃ့ရံာ် လဲၤဒုးဝဲ ဝ့ၢ်လံးဘနၤဒီး မၢဝဲစီၤရၤဘၡါက့ၤ ဟဲက့ၤအိၣ်လၢအကပၤလီၤ. မ့မ့ၢ် ဝ့ၢ်ယရူၤၡလ့ၣ်န့ၣ် စီၤပၤစၤနဃ့ရံာ် ကကွၢ်မၤဝဲလၢခံလီၤ. (ယၡါယၤ ၃၇:၈) စီၤရၤဘၡါက့ၤ က့ၤဝဲဘၣ်ဆၣ် စီၤဃံးစကံယၤ အတၢ်သူၣ်ကိၢ်သးဂီၤ တလီၤစှၤဝဲဒံးဘၣ်. စီၤစၤနဃ့ရံာ် ဆှၢလီၤလံာ်ဒီး တဲပျံၤတဲဖုး ပှၤယူဒၤဖိတဖၣ်လၢ အဝဲသ့ၣ် မ့ၢ်တပာ်လီၤစုကဝဲၤန့ၣ် တၢ်ကမၤအသးဒီးအီၤ ဒ်လဲၣ်န့ၣ်လီၤ. “တၢ်လၢအၤၡူၢ်အစီၤပၤတဖၣ် မၤထံဧိၤကီၢ်ဧိၤခဲလၢာ်, လၢအမၤဟးဂီၤအီၤစီဖ့ကလ့ၤန့ၣ် နနၢ်ဟူလံ, ဒီးနကပူၤဖျဲးနဲစ့ၢ်ကီးဧါ. ပှၤအကလုာ်လၢ ယပၢ်တဖၣ်မၤဟးဂီၤအီၤ, . . . အကစၢ်တဖၣ်မၤပူၤဖျဲးအီၤစ့ၢ်ကီးဧါ. ဃမါသးအစီၤပၤ, ဒီးအၢ်ပးအစီၤပၤ, ဒီးဝ့ၢ်စဖၤရဝံၣ်, ဟ့နၤဒီးဧးဝါအစီၤပၤန့ၣ် မ့ၢ်အအိၣ်ဖဲလဲၣ်.” (ယၡါယၤ ၃၇:၉-၁၃) နီၢ်နီၢ်န့ၣ် အၤၡူၢ် အဲၣ်ဒိးတဲဝဲလၢ ပှၤယူဒၤဖိတဖၣ် မ့ၢ်ထီဒါအီၤန့ၣ် ကကမၣ်ဖးဒိၣ် ဒီးကထံၣ်န့ၢ်တၢ်ကီတၢ်ခဲ ဒိၣ်န့ၢ်အလီၢ်လီၤ.
၁၇ တၢ်ဆၢတဲာ်လၢ ကမၤဝဲဒီး တၢ်ကဟဲပိာ်ထွဲထီၣ်အသးဒ်လဲၣ်န့ၣ် စီၤဃံးစကံယၤ ဆိကမိၣ်ဝဲ ထံထံဆးဆးလီၤ. အဃိ အဝဲလဲၤစိာ်ဝဲ စီၤစၤနဃ့ရံာ် အလံာ်တဖၣ်ဆူ ယဟိဝၤယွၤ အတၢ်လုၢ်ဟံၣ်လီၤ. (ယၡါယၤ ၃၇:၁၄) အဝဲဃ့ဘါထုကဖၣ်လၢ ယဟိဝၤယွၤ ကပာ်သူၣ်ပာ်သးဝဲ ပှၤအၤၡူၢ်ဖိတဖၣ် အတၢ်တဲပျံၤတဲဖုး ဒီးဃ့ဝဲလၢ– “ဒီးခဲကနံၣ်အံၤ, ယွၤပကစၢ်ဧၢ, အုၣ်က့ၤခီၣ်က့ၤပှၤလၢအစုပူၤတက့ၢ်. ဒီးဟီၣ်ခိၣ်အဘီအမုၢ်ခဲလၢာ် ကသ့ၣ်ညါလၢနမ့ၢ်ယွၤ, ထဲနၤတဂၤဧိၤလီၤ.” (ယၡါယၤ ၃၇:၁၅-၂၀) လၢတၢ်ထုကဖၣ်အံၤအပူၤ ပထံၣ်ဘၣ်လၢ စီၤဃံးစကံယၤ တသူၣ်ကိၢ်သးဂီၤတၢ်လၢ ကပူၤဖျဲးအဂီၢ်ဘၣ်. လၢတၢ်န့ၣ်အလီၢ် အဝဲဘၣ်ယိၣ်ဝဲလၢ ပှၤအၤၡူၢ်ဖိတဖၣ် မ့ၢ်မၤနၢၤကွံာ် ဝ့ၢ်ယရူၤၡလ့ၣ်န့ၣ် ယဟိဝၤယွၤအမံၤ ကဘၣ်တၢ်ဒုၣ်ဒွဲၣ်စံးအၢအီၤလီၤ.
(ယၡါယၤ ၃၇:၃၃-၃၈) မၤသးဒ်န့ၣ်ဒီး ယွၤစံးလၢ အၤၡူၢ်အစီၤပၤ အဂ့ၢ်ဒ်အံၤ, တဘၣ် ဟဲနုာ်ဘၣ်လၢ ဝ့ၢ်တဖျၢၣ်အံၤအပူၤဘၣ်, တဘၣ်ခးဘၣ်ပျၢ်တဘိဖဲန့ၣ်ဘၣ်, ဒီးတဘၣ်ဟဲထီၣ်လၢအမဲာ်ညါ ဒီးကတီၤဘၣ်, ဒီးတဘၣ်မၤထီၣ်တၢ်ခိၣ်ဒူလၢအမဲာ်ညါဘၣ်. ၃၄ ဒီးကျဲလၢအဟဲန့ၣ် ကက့ၤက့ၤလၢကျဲတဘိန့ၣ်, ဒီးတဘၣ်ဟဲနုာ်ဘၣ်ဆူ ဝ့ၢ်ပူၤအံၤဘၣ်, ယွၤစံးဝဲ, ၃၅ ဒီးယကအိၣ်ပှိၤ ဝ့ၢ်တဖျၢၣ်အံၤ ဒ်သိး ယကအုၣ်က့ၤခီၣ်က့ၤအီၤ, လၢယဂီၢ်ဒၣ်ယဲ, ဒီးလၢယခ့ယပှၤစီၤဒၤဝံးအဃိလီၤ. ၃၆ ဒီးယွၤအကလူးန့ၣ်ဟးထီၣ်, ဒီးကျီကွံာ်ပှၤကညီ တကလီၤဃိးကလးယဲၢ်ကထိလၢ အၤၡူၢ်သူၣ်ဒဲအပူၤန့ၣ်, ဒီးမုၢ်ဆ့ၣ်ထီၣ်န့ၣ် ပှၤဂဲၤဆၢထၢၣ်ဂီၤဂီၤ, ဒီးကွၢ်ကွၢ်, ပှၤတဖၣ်န့ၣ်ခဲလၢာ်မ့ၢ်ပှၤအစိၣ်လီၤ. ၃၇ တုၤနုၤတစုအၤၡူၢ်အစီၤပၤ စၤနဃ့ရံာ်ဟးထီၣ်, ဒီးလဲၤဝဲ, ဒီးက့ၤဝဲ, ဒီးအိၣ်ဝဲလၢနံၤနဝ့လီၤ. ၃၈ ဒီးအဝဲဒၣ်ဘူၣ်တၢ်ဘါတၢ်လၢ အကစၢ်နံးစရိး အဟံၣ်ပူၤအဖၢမုၢ်ဒီး, အဖိခွါစီၤအဒြၤမ့ၤလ့း, ဒီးစီၤၡၢ်အ့စ့ၢ်န့ၣ်ကျီကွံာ်အီၤလၢနး, ဒီးအဝဲသ့ၣ် ထူၣ်ဖျဲးဆူ ကီၢ်အရၤရးအပူၤ, ဒီးအဖိခွါစီၤအ့ၤစၢ်ဃးဒိၣ် ကဲထီၣ်စီၤပၤလၢအလီၢ်န့ၣ်လီၤ.
ip-1 ကဘျံးပၤ ၃၉၁-၃၉၄ အဆၢ ၁၈-၂၂
လၢတၢ်နာ်အဃိ စီၤပၤတဂၤ ဒိးန့ၢ်ဘၣ်တၢ်ဆိၣ်ဂ့ၤ
၁၈ ယဟိဝၤယွၤ စံးဆၢဝဲ စီၤပၤဃံးစကံယၤ အတၢ်ထုကဖၣ် ခီဖျိလၢဝံယၡါယၤလီၤ. ဝ့ၢ်ယရူၤၡလ့ၣ် တဘၣ်ပာ်လီၤအစုကဝဲၤဘၣ်, ကဘၣ်အိၣ်ဆၢထၢၣ်ဝဲကျၢၤကျၢၤလီၤ. ဘၣ်ဃးဒီး စီၤစၤနဃ့ရံာ်န့ၣ် ဝံယၡါယၤ တဲဝဲပှၤအၤၡူၢ်ဖိတဖၣ် လၢတၢ်သူၣ်ဒူသးဒူအပူၤဒ်အံၤ– “ပှၤမုၣ်လိၣ်ဘိ, စံယိၣ်အဖိမုၣ်န့ၣ် တပးကဲဘၣ်နၤဘၣ်, နံၤဘၣ်ဖၣ်လဲဘၣ်နၤ, ယရူၤၡလ့ၣ်အဖိမုၣ် ကျၢၢ်ကျာ်အခိၣ်လၢနၤလံ.” (ယၡါယၤ ၃၇:၂၁, ၂၂) ဒီးယဟိဝၤယွၤ စံးဝဲလၢ– ‘နမ့ၢ်မတၤတဂၤအဃိ နဘၣ်ဒုၣ်ဒွဲၣ်ပယွဲ အံၣ်စရ့လးအယွၤလဲၣ်. ယသ့ၣ်ညါနဂ့ၢ် ဂ့ၤဂ့ၤလီၤ. နအဲၣ်ဒိး ဒိၣ်စိဒိၣ်ကမီၤ ဒီးအိၣ်ဒီးတၢ်ပာ်ထီၣ်ထီသးလီၤ. နသန့ၤနသးလၢ နသုးမုၢ်သံၣ်ဘိတဖၣ်ဒီး နမၤနၢၤကွံာ်ထံကီၢ်အါဘ့ၣ်လီၤ. ဘၣ်ဆၣ် နတမ့ၢ်ပှၤလၢ အလီၤဃံၤတသ့ဘၣ်န့ၣ်ဘၣ်. ယကမၤဟးဂီၤကွံာ် နတၢ်ကူၣ်ထီၣ်ဖးလီၤတဖၣ်လီၤ. ဒီးယကမၤနၢၤကွံာ်နၤလီၤ. ယကမၤနၤဒ် နမၤပှၤအဂၤအသိးလီၤ. ယကပာ်ယနီၣ်ကွးလၢနနါဒ့ပူၤ, ဒီးယထးအ့ၣ်ပျံၤလၢနခၣ်ပူၤ, ဒီးယကဒုးက့ၤနၤဆူ အၤၡူၢ်လီၤ.’—ယၡါယၤ ၃၇:၂၃-၂၉.
“အအံၤ ကကဲထီၣ် တၢ်ပနီၣ်လၢနဂီၢ်”
၁၉ ဝံယၡါယၤ အတၢ်စံးပာ် ကဟဲလၢထီၣ်ပှဲၤထီၣ်န့ၣ် မ့ၢ်စီၤဃံးစကံယၤ နာ်ဝဲကသ့ဧါ. ယဟိဝၤယွၤ တဲဝဲလၢ– “အအံၤကကဲထီၣ် တၢ်အပနီၣ်လၢနဂီၢ်, အအံၤတနံၣ်အံၤအီၣ်တၢ်လၢ အမဲထီၣ်ဒၣ်တၢ်, ဒီးပှဲၤထီၣ်ခံနံၣ်တနံၣ်န့ၣ် တၢ်လၢအမဲထီၣ်ဒၣ်တၢ်လၢအဝဲန့ၣ်, ဒီးပှဲၤထီၣ်သၢနံၣ်တနံၣ်ဖှံတၢ်, ဒီးကူးတၢ်, ဒီးသူၣ်စပံးမုၢ်တဖၣ်, ဒီးအီၣ်အတၤသၣ်န့ၣ်တက့ၢ်.” (ယၡါယၤ ၃၇:၃၀) ယဟိဝၤယွၤ ကဒုးအီၣ်ဒုးအီဝဲ ပှၤယူဒၤဖိလၢ အဘၣ်ကီဘၣ်ခဲတဖၣ်အံၤလီၤ. မ့ၢ်လၢပှၤအၤၡူၢ်ဖိတဖၣ် ဟဲနုာ်လီၤအိၣ်ဆိးလၢ အဝဲသ့ၣ်အထံကီၢ်ပူၤအဃိ သူၣ်အီၣ်ဖျးအီၤတၢ်တသ့ဘၣ်. အပူၤကွံာ်တနံၣ်န့ၣ် ဖဲအဝဲသ့ၣ် ကူးတၢ်အခါ တၢ်အချံလၢ အလီၢ်တဲာ်သ့ၣ်တဖၣ် ဟဲက့ၤမဲထီၣ်ဒီး ကအီၣ်ဘၣ်ဝဲ တၢ်သ့ၣ်တဖၣ်န့ၣ်လီၤ. ဒီးလၢခံတနံၣ်န့ၣ် ကဘၣ်လၢတၢ်အိၣ်ဘှံးအနံၣ်အဃိ အဝဲသ့ၣ် အတၢ်အိၣ်သးကီခဲဘၣ်ဆၣ် သူၣ်အီၣ်ဖျးအီၣ်တၢ် တန့ၢ်ဘၣ်. (၂ မိၤၡ့ ၂၃:၁၁) ယဟိဝၤယွၤ အၢၣ်လီၤဝဲလၢ အဝဲသ့ၣ် မ့ၢ်ဒိကနၣ် အကလုၢ်န့ၣ် အဝဲကဒုးမဲထီၣ် တၢ်အီၣ်တၢ်အီ လၢလၢပှဲၤပှဲၤလၢ အဝဲသ့ၣ်အဂီၢ်လီၤ. ဒီးလၢခံတနံၣ်န့ၣ် အဝဲသ့ၣ် ကသူၣ်အီၣ်ဖျးအီၣ်ဘၣ်တၢ်ဒီးကအီၣ်ဘၣ်အီဘၣ်ဝဲ တၢ်လၢအဝဲသ့ၣ်သူၣ်ဝဲန့ၣ်လီၤ.
၂၀ ယဟိဝၤယွၤ ထိၣ်သတြီၤဝဲ အပှၤကလုာ် ဒ်သ့ၣ်တထူၣ်လၢ ပှၤထဲးထီၣ်ကွံာ်အီၤ တညီဘၣ်န့ၣ်လီၤ– “တၢ်ပူၤဖျဲးလၢယူဒၤအပှၤဟံၣ်ဖိအကျါ . . . ကစဲၤလီၤအဂံၢ်ဆူတၢ်အဖီလာ်, ဒီးသၣ်ထီၣ်တၢ်ဆူတၢ်အဖီခိၣ်လီၤ.” (ယၡါယၤ ၃၇:၃၁, ၃၂) ပှၤလၢအသန့ၤအသးလၢ ယဟိဝၤယွၤန့ၣ် တပျံၤဘၣ် တၢ်နီတမံၤဘၣ်. အဝဲသ့ၣ်ဒီး အဖိအလံၤတဖၣ် ကအိၣ်ကဆိးဘၣ်လၢ ထံကီၢ်ပူၤလီၤ.
၂၁ ဘၣ်ဃးဒီး ပှၤအၤၡူၢ်ဖိတဖၣ် တဲပျံၤတဲဖုးဝဲ ဝ့ၢ်ယရူၤၡလ့ၣ်န့ၣ် ယဟိဝၤယွၤတဲဝဲလၢ အဝဲသ့ၣ်– “တဘၣ် ဟဲနုာ်ဘၣ်လၢ ဝ့ၢ်တဖျၢၣ်အံၤအပူၤဘၣ်, တဘၣ်ခးဘၣ်ပျၢ်တဘိဖဲန့ၣ်ဘၣ်, ဒီးတဘၣ်ဟဲထီၣ်လၢအမဲာ်ညါ ဒီးကတီၤဘၣ်, ဒီးတဘၣ်မၤထီၣ်တၢ်ခိၣ်ဒူလၢအမဲာ်ညါဘၣ်. ဒီးကျဲလၢအဟဲန့ၣ် ကက့ၤက့ၤလၢ ကျဲတဘိန့ၣ်, ဒီးတဘၣ်ဟဲနုာ်ဘၣ်ဆူ ဝ့ၢ်ပူၤအံၤဘၣ်.” (ယၡါယၤ ၃၇:၃၃, ၃၄) အၤၡူၢ် တဒုးဘၣ်တၢ်ဒီး ဝ့ၢ်ယရူၤၡလ့ၣ်ဘၣ်. လၢတၢ်န့ၣ်အလီၢ် ပှၤယူဒၤဖိတဖၣ် တဒုးဘၣ်တၢ်ဒီး မၤနၢၤဝဲအၤၡူၢ်လီၤ.
၂၂ ဒ်ယဟိဝၤယွၤ တဲဝဲအသိး အဝဲဆှၢလီၤ မူခိၣ်ကလူးတဂၤလၢ ကမၤသံကွံာ် စီၤစၤနဃ့ရံာ် အပှၤသုးဖိလၢအဂ့ၤကတၢၢ်, အဂၤ ၁၈၅,၀၀၀ လီၤ. လီၤဂာ်လၢ တၢ်မၤအသးအံၤ ဟဲကဲထီၣ်ဝဲဖဲ ဝ့ၢ်လံးဘနၤအဃိ ဖဲစီၤစၤနဃ့ရံာ် မံပၢၢ်ထီၣ်အခါ ထံၣ်ဝဲလၢ အသုးခိၣ်တဖၣ်ဒီး အသုးဖိတဖၣ်သံဝဲလီၤ. အဃိ အဝဲဘၣ်က့ၤဝဲဆူ ဝ့ၢ်နံၤနဝ့ လၢတၢ်မဲာ်ဆှး အပူၤလီၤ. တၢ်ကစီၣ်အံၤ ဟူထီၣ်သါလီၤဝဲဘၣ်ဆၣ် အဝဲဆဲးဘူၣ်ထီၣ်ဘါထီၣ်ဒံး အကစၢ်ယွၤလၢအကမၣ်, နံးစရိးလီၤ. ဒီးစှၤနံၣ်ဝံၤအလီၢ်ခံ ဖဲအဝဲဘူၣ်ထီၣ်ဘါထီၣ်တၢ်လၢ နံးစရိးတၢ်လုၢ်ဟံၣ်အခါ အဖိခွါခံဂၤ မၤသံအီၤလီၤ. တဘျီညါအံၤစ့ၢ်ကီး နံးစရိးလၢ အသးသမူတအိၣ်ဘၣ်န့ၣ် တအိၣ်ဒီးတၢ်စိတၢ်ကမီၤဒီး ဒီသဒၢတၢ်တသ့ဘၣ်.—ယၡါယၤ ၃၇:၃၅-၃၈.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ယၡါယၤ ၃၅:၈) ဒီးဖဲန့ၣ်ကျဲမုၢ်ဒီး ကျဲဖိကအိၣ်, ဒီးတၢ်ကကိးအီၤလၢကျဲစီဆှံ, ဒီးတၢ်တကဆှီဘၣ် တပိာ်ဘၣ်အီၤဘၣ်, ဒီးကအိၣ်ထဲလၢ အဝဲသ့ၣ်အဂီၢ်, ဒီးပှၤပိာ်ကျဲ, ဒီးပှၤလၢ အတမၤလိဘၣ်တၢ်ဘၣ်န့ၣ် တဟးဖျိးကျဲန့ၣ်ဘၣ်.
တၢး၀၈ ၅/၁၅ ကဘျံးပၤ ၂၆ အဆၢ ၄
“လၢတၢ်ပျံၤယွၤအပူၤန့ၣ်, မ်ပမၤလၢထီၣ်ပှဲၤထီၣ်တၢ်စီဆှံတက့ၢ်”
‘ဖဲန့ၣ် ကျဲစီဆှံကအိၣ်’
ယဟိဝၤယွၤ တဲဆိပာ်ဝဲလၢ အခ့အပှၤလၢ ဝ့ၢ်ဘၤဘူၤလိၣ်တဖၣ် ကဟဲက့ၤသူၣ်ထီၣ်က့ၤဝဲ အထံအကီၢ်လီၤ. ဝံအတၢ်စံးပာ်လၢ အဘၣ်ဃးဒီး တၢ်သူၣ်ထီၣ်က့ၤထံကီၢ်အဂ့ၢ်န့ၣ် ပၣ်ဃုာ်ဒီး တၢ်အုၣ်ကီၤလၢ– “ဒီးဖဲန့ၣ်ကျဲမုၢ်ဒီး ကျဲဖိကအိၣ်, ဒီးတၢ်ကကိးအီၤလၢကျဲစီဆှံ, ဒီးတၢ်တကဆှီဘၣ် တပိာ်ဘၣ်အီၤဘၣ်, ဒီးကအိၣ်ထဲလၢ အဝဲသ့ၣ်အဂီၢ်, ဒီးပှၤပိာ်ကျဲ” လီၤ. (ယၡါယၤ ၃၅:၈က) တၢ်ကတိၤတဖၣ်အံၤ ပာ်ဖျါထီၣ်ဝဲလၢ ယဟိဝၤယွၤ ကအိးထီၣ်ကျဲ ဒ်သိး အဝဲသ့ၣ်ကဟဲက့ၤဘၣ်ဆူ အထံအကီၢ် တကးဒံးဘၣ် ဖဲအဝဲသ့ၣ်ဟဲက့ၤအခါ ကစၢ်ယွၤ ကဒီသဒၢအီၤလၢကျဲဒီဘိလီၤ.
တၢး၀၈ ၅/၁၅ ကဘျံးပၤ ၂၇ အဆၢ ၁
“လၢတၢ်ပျံၤယွၤအပူၤန့ၣ်, မ်ပမၤလၢထီၣ်ပှဲၤထီၣ်တၢ်စီဆှံတက့ၢ်”
“တၢ်တကဆှီဘၣ် တပိာ်ဘၣ်အီၤဘၣ်”
ဖဲ ချ.ခ.န ၅၃၇ နံၣ်န့ၣ် ပှၤအံၣ်စရ့လးဖိလၢ ဟဲက့ၤလၢအထံအကီၢ်တဖၣ် ကဘၣ်တုၤထီၣ်ထီၣ်ဘးလၢ တၢ်ဂ့ၢ်တခါလီၤ. အဝဲသ့ၣ်ကဘၣ် မၤထွဲဝဲတၢ်လၢ ယဟိဝၤယွၤ မၢအမၤတခါလီၤ. ဘၣ်ဃးဒီး ပှၤလၢ အတုၤထီၣ်ထီၣ်ဘးလၢ ကျဲစီဆှံအပူၤန့ၣ် ဝံယၡါယၤ ၃၅:၈ တဲဝဲလၢ– “တၢ်တကဆှီဘၣ် တပိာ်ဘၣ်အီၤဘၣ်, ဒီးကအိၣ်ထဲလၢ အဝဲသ့ၣ်အဂီၢ်, ဒီးပှၤပိာ်ကျဲ, ဒီးပှၤလၢအတမၤလိဘၣ်တၢ်ဘၣ်န့ၣ် တဟးဖျိးကျဲန့ၣ်ဘၣ်.” ပှၤယူဒၤဖိတဖၣ် ဟဲက့ၤဆူ ဝ့ၢ်ယရူၤၡလ့ၣ်န့ၣ် အတၢ်တိာ်ပာ်မ့ၢ်ဝဲ ကသူၣ်ထီၣ်က့ၤ တၢ်ဘူၣ်တၢ်ဘါလၢ အကဆှီအဃိ ပှၤလၢအအဲၣ်လီၤထဲအသး, ပှၤလၢအတပာ်လုၢ်ပာ်ပှ့ၤ တၢ်စီဆှံတဖၣ် မ့တမ့ၢ် ပှၤလၢအတကဆှီဘၣ်လၢ နီၢ်သးတကပၤန့ၣ် အိၣ်ဝဲဖဲန့ၣ်တသ့ဘၣ်. ဘၣ်ဃးဒီး တၢ်အိၣ်မူသကဲာ်ပဝးန့ၣ် ပှၤလၢအဟဲက့ၤတဖၣ် ကဘၣ်အိၣ်မူဒ် ယွၤအတၢ်ဘျၢအသိးလီၤ. မုၢ်မဆါတနံၤအံၤ ပှၤလၢအအဲၣ်ဒိးဒိးန့ၢ်ဘၣ် ကစၢ်ယွၤ အတၢ်ဘၣ်သးန့ၣ် ကဘၣ်အိၣ်မူဝဲ ဒ်န့ၣ်စ့ၢ်ကီးလီၤ. “လၢတၢ်ပျံၤယွၤန့ၣ်” အဝဲသ့ၣ်ကဘၣ် “မၤလၢထီၣ်ပှဲၤထီၣ်တၢ်စီဆှံ” လီၤ. (၂ ကရံၣ်သူး ၇:၁) မ့မ့ၢ်ဒ်န့ၣ်န့ၣ် တၢ်သကဲာ်ပဝးလၢ အတကဆှီဘၣ်လၢ ပကြၢးဟးဆှဲးအီၤန့ၣ် မ့ၢ်မနုၤတဖၣ်လဲၣ်.
(ယၡါယၤ ၃၆:၂, ၃) ဒီးအၤၡူၢ်အစီၤပၤမၢလီၤ စီၤရၤဘၡါက့ၤအိၣ်ဒီးပှၤသုးမုၢ်တဖုဖးဒိၣ်လၢ လၤကံၣ်ဆူယရူၤၡလ့ၣ်, ဆူစီၤပၤဃံးစကံယၤအအိၣ်လီၤ. ဒီးအဝဲဒၣ်ဆၢထၢၣ်ဝဲဖဲ နိၣ်လၢထးခီတပူၤအထံကျိၤ ဖဲပှၤစုၣ် တၢ်ကံးညာ်အဟီၣ်ခိၣ် အကဝီၤအကျဲမုၢ်လီၤ. ၃ ဒီးစီၤဃံးလကံယၤ အဖိခွါ စီၤအ့လယါကံၣ် လၢအအိၣ်လၢ ဟံၣ်အဖီခိၣ်, ဒီးပှၤကွဲးလံာ်စီၤၡ့ၤဘနၤ, ဒီးပှၤကွဲးနီၣ်တၢ်စီၤအၤစာ် အဖိခွါစီၤယိၤအၤန့ၣ် ဟဲထီၣ်ဝဲဆူအအိၣ်.
(ယၡါယၤ ၃၆:၂၂) ဒီးစီၤဃံးလကံယၤ အဖိခွါစီၤအ့ၤလယါကံၣ်လၢ အအိၣ်လၢဟံၣ်အဖီခိၣ်, ဒီးပှၤကွဲးလံာ်စီၤၡ့ၤဘနၤ, ဒီးပှၤကွဲးနီၣ်တၢ် စီၤအၤစာ်အဖိခွါ စီၤယိၤအၤတဖၣ်န့ၣ် က့ၤက့ၤဆူ စီၤဃံးစကံယၤအအိၣ်, အိၣ်ဒီးအဆ့ယာ်, ဒီးစံးဘၣ်အီၤလၢ စီၤရၤဘၡါက့ၤ အတၢ်ကတိၤတဖၣ်န့ၣ်လီၤ.
တၢး၀၇ ၁/၁၅ ကဘျံးပၤ ၈ အဆၢ ၆
လံာ်စီဆှံ အတၢ်ပာ်ဖျါလၢ လံာ်ယၡါယၤ—၂
တၢ်မၤလိတဖၣ်လၢ ပဂီၢ်-
၃၆:၂, ၃, ၂၂. စီၤၡ့ၤဘနၤ ဘၣ်တၢ်ထုးထီၣ်ကွံာ်အီၤလၢ ဟံၣ်ခိၣ်အလီၢ် သနာ်က့ အဝဲဆဲးမၤဝဲ စီၤပၤအတၢ်မၤခီဖျိ ကဲဝဲပှၤလၢ အနုာ်လီၤမၤတၢ်လၢအလီၢ်တဂၤ အပှၤကွဲးလံာ်ဖိလီၤ. (ယၡါယၤ ၂၂:၁၅, ၁၉) လၢယဟိဝၤယွၤ အတၢ်ကရၢကရိအပူၤ ပမ့ၢ်ဘၣ်တၢ်ပာ်ပတုာ်ပှၤလၢ ပမူဒါလီၤဆီတခါခါန့ၣ် ပကြၢးဆဲးမၤ ကစၢ်ယွၤအတၢ်မၤလၢ ကစၢ်သူပှၤအလီၢ်န့ၣ်လီၤ.
တၢ်ဖးလံာ်စီဆှံ
(ယၡါယၤ ၃၆:၁-၁၂) ဒီးလၢစီၤပၤဃံးစကံယၤအနံၣ်ပှဲၤထီၣ် တဆံလွံၢ်နံၣ်တနံၣ်န့ၣ် တၢ်မၤအသးလၢ အၤၡူၢ်အစီၤပၤ စၤနဃ့ရံာ်ဟဲထီဒါယူဒၤအဝ့ၢ် အိၣ်ဒီးအခိၣ်ဒူခဲလၢာ်, ဒီးမၤန့ၢ်အီၤလီၤ. ၂ ဒီးအၤၡူၢ်အစီၤပၤမၢလီၤ စီၤရၤဘၡါက့ၤ အိၣ်ဒီး ပှၤသုးမုၢ်တဖုဖးဒိၣ်လၢ လၤကံၣ်ဆူယရူၤၡလ့ၣ်, ဆူစီၤပၤဃံးစကံယၤ အအိၣ်လီၤ. ဒီးအဝဲဒၣ်ဆၢထၢၣ်ဝဲဖဲ နိၣ်လၢထးခီတပူၤအထံကျိၤ ဖဲပှၤစုၣ် တၢ်ကံးညာ်အဟီၣ်ခိၣ် အကဝီၤအကျဲမုၢ်လီၤ. ၃ ဒီးစီၤဃံးလကံယၤ အဖိခွါစီၤအ့လယါကံၣ် လၢအအိၣ် လၢဟံၣ်အဖီခိၣ်, ဒီးပှၤကွဲးလံာ်စီၤၡ့ၤဘနၤ, ဒီးပှၤကွဲးနီၣ်တၢ်စီၤအၤစာ် အဖိခွါစီၤယိၤအၤန့ၣ် ဟဲထီၣ်ဝဲဆူအအိၣ်, ၄ ဒီးစီၤရၤဘၡါက့ၤ စံးဘၣ်အီၤ, စံးလၢ်စီၤဃံးစကံယၤ, တၢ်ဒိၣ်စီၤပၤ, အၤၡူၢ်အစီၤပၤစံးဒ်အံၤ, တၢ်သန့ၤအသး အိၣ်ဒီးနၤလၢ နသန့ၤနသးလၢအီၤမ့ၢ်မနုၤတမံၤလဲၣ်. ၅ ယစံး, မ့ၢ်ထဲတၢ်ကတိၤကလီကလီလၢနစံး, ယအိၣ်ဒီး တၢ်ကူၣ်တၢ်ဖး ဒီးတၢ်အဂံၢ်အဘါလၢဒုးသုးအဂီၢ်န့ၣ်လီၤ. ခဲကနံၣ်အံၤ နသန့ၤနသးလၢ မတၤတဂၤလၢ နပူထီၣ်ယၤန့ၣ်လဲၣ်. ၆ ကွၢ်ကွၢ်, နသန့ၤနသးလၢနီၣ်ထိးဘိအံၤ, တပိၢ်လၢအကၢ်ပိၤအသးတဘိ, လၢအဲၤကူပတူး လၢပှၤမ့ၢ်သန့ၤအသးလၢအီၤဒီး, ကနုာ်လၢအစုပူၤ, ဒီးဆဲးနုာ်အီၤလီၤ. အဲၤကူပတူး အစီၤပၤဖၤရိၤ မၤအသးဒ်န့ၣ် လၢကယဲၢ်ပှၤလၢအသန့ၤအသးလၢအီၤလီၤ. ၇ ဒီးနမ့ၢ်စံးဘၣ်ယၤ, ပသန့ၤပသးလၢ ယွၤပကစၢ်န့ၣ်ဒီး, အဝဲဒၣ်မ့ၢ်ပှၤလၢ စီၤဃံးစကံယၤဟံးထီၣ်ကွံာ်အလီၢ်ထီၣ်ထီတဖၣ်, ဒီးအတၢ်လုၢ်လီၢ်တဖၣ်, ဒီးစံးလၢယူဒၤဒီးယရူၤၡလ့ၣ်, သုဘၣ်ဘူၣ်တၢ်ဘါတၢ်လၢ တၢ်လုၢ်လီၢ်အံၤ အမဲာ်ညါန့ၣ် တမ့ၢ်ဘၣ်ဧါ. ၈ ဒီးခဲကနံၣ်အံၤ အၢၣ်လီၤအီလီၤလၢ်တၢ်ဒီး ယကစၢ်အၤၡူၢ်အစီၤပၤန့ၣ်တက့ၢ်, ဒီးနဲဒၣ်တခီနပာ် ပှၤဒိးကသ့ၣ်လၢအလိၤမ့ၢ်သ့ဒီး, ယကဟ့ၣ်နၤလၢကသ့ၣ်ခံကထိလီၤ. ၉ မၤသးဒ်န့ၣ်ဒီး နကဘိးဃၣ်ကဒါ ယကစၢ်အပဒိၣ်လၢ အဆံးကတၢၢ်အကျါတဂၤ, ဒီးသန့ၤနသးလၢအဲၤကူပတူး လၢလ့ၣ်ကဟၣ်အဂ့ၢ်, ဒီးလၢကသ့ၣ်အဂ့ၢ်န့ၣ်ဒ်လဲၣ်. ၁၀ ဒီးခဲကနံၣ်အံၤ ယွၤတအိၣ်ဘၣ်ဒီး, ယဟဲထီဒါ ကီၢ်တဘ့ၣ်အံၤ ဒ်သိးယကမၤဟးဂီၤအီၤဧါ. ယွၤစံးဘၣ်ယၤ, လဲၤထီၣ်ဆူ ကီၢ်တဘ့ၣ်အံၤ ဒီးမၤဟးဂီၤအီၤ တက့ၢ်လီၤ. ၁၁ ဒီးစီၤအ့ၤလယါကံၣ်, ဒီးစီၤၡ့ၤဘနၤ, ဒီးစီၤယိၤအၤတဖၣ် စံးဘၣ်စီၤရၤဘၡါက့ၤ, ကတိၤလၢ်လၢ အၤရၣ်အကျိာ် ဒီးနခ့နပှၤတက့ၢ်. အဂ့ၢ်ဒ်အံၤ, ပနၢ်ပၢၢ်လီၤ. ဒီးကတိၤတၢ်လၢ ယူဒၤအကျိာ် ဒီးပှၤလၢ ပှၤဂီၢ်မုၢ်လၢ အအိၣ်လၢ ခိၣ်ဒူအဖီခိၣ်န့ၣ်အနၢ်ပူၤတဂ့ၤ. ၁၂ ဒီးစီၤရၤဘၡါက့ၤစံးဝဲဒၣ်, ယကစၢ်မၢလီၤ ယကတိၤ တၢ်ကတိၤအံၤ ဒီးနကစၢ်ဒီးနၤစ့ၢ်ကီးဧါ. မ့ၢ်လၢပှၤဆ့ၣ်နီၤလၢခိၣ်ဒူအဖီခိၣ်လၢ အကအီၣ်အအ့ၣ်ဒၣ်ဝဲ, ဒီးအီအဆံၣ်ထံဒၣ်ဝဲ အိၣ်ဒီးသု တမ့ၢ်ဘၣ်ဧါ.
လါယနူၤအါရံၤ ၂၃–၂၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယၡါယၤ ၃၈-၄၂
“ပှၤလၢအလီၤဘှါန့ၣ် ယွၤဟ့ၣ်ဝဲလၢ အဂံၢ်အဘါ”
(ယၡါယၤ ၄၀:၂၅, ၂၆) ဒီးသုကဒိလီၤယၤဒီး မတၤတဂၤလဲၣ်. ဒီးယကဒ်သိးဒီးမတၤတဂၤလဲၣ်, တၢ်စီဆှံတဂၤစံးဝဲဒၣ်. ၂၆ ကျ့ထီၣ်သုမဲာ်ဆူ တၢ်ထီၣ်ထီ, ဒီးမ့ၢ်မတၤမတၤ တ့တၢ်တဖၣ်အံၤန့ၣ် ကွၢ်တက့ၢ်. ပှၤလၢအဆှၢထီၣ် အသုးမုၢ်ဂီၢ်မုၢ်, ဒ်အတၢ်ဂံၢ်အသိးန့ၣ် မ့ၢ်မတၤတဂၤလဲၣ်. ကိးအီၤလၢ အမံၤခဲလၢာ်လီၤ. မ့ၢ်လၢအဂံၢ်ဆူၣ်အဘါဆူၣ်, ဒီးအစိဒိၣ်အကမီၤထီသတးဒီး, တဟါမၢ်ဘၣ်နီတမံၤဘၣ်.
ip-1 ကဘျံးပၤ ၄၀၉-၄၁၀ အဆၢ ၂၃-၂၅
“မၤမုာ်ထီၣ်က့ၤ ယပှၤဂီၢ်မုၢ်တက့ၢ်”
“မ့ၢ်မတၤမတၤ တ့တၢ်တဖၣ်အံၤန့ၣ် ကွၢ်တက့ၢ်”
၂၃ တၢ်ဂ့ၢ်အဂၤတမံၤလၢ ပှၤယူဒၤဖိတဖၣ် ပာ်ဆူၣ်အသးသ့န့ၣ် အိၣ်ဝဲလီၤ. မ့ၢ်လၢပှၤလၢ အအၢၣ်လီၤဝဲလၢ အဝဲသ့ၣ် ကထူၣ်ဖျဲးထီၣ်က့ၤန့ၣ် မ့ၢ်ယွၤလၢအတ့လီၤ တၢ်ခဲလၢာ်ဒီး တၢ်စိတၢ်ကမီၤခဲလၢာ် အဂံၢ်ခီၣ်ထံးအဃိလီၤ. ဒ်သိးယဟိဝၤယွၤ ကပာ်ဖျါထီၣ်ဝဲ အတၢ်သ့တၢ်ဘၣ်လၢ အလီၤကမၢကမၣ်အံၤအဂီၢ် အဝဲမၢပှၤကွၢ် အတၢ်ဘၣ်တ့တဖၣ်လၢ အပာ်ဖျါထီၣ်အတၢ်သ့တၢ်ဘၣ် ဒီးစံးဝဲ– “‘ဒီးသုကဒိလီၤယၤဒီး မတၤတဂၤလဲၣ်. ဒီးယကဒ်သိးဒီးမတၤတဂၤလဲၣ်, တၢ်စီဆှံတဂၤစံးဝဲဒၣ်. ကျ့ထီၣ်သုမဲာ်ဆူ တၢ်ထီၣ်ထီ, ဒီးမ့ၢ်မတၤမတၤ တ့တၢ်တဖၣ်အံၤန့ၣ် ကွၢ်တက့ၢ်. ပှၤလၢအဆှၢထီၣ် အသုးမုၢ်ဂီၢ်မုၢ်, ဒ်အတၢ်ဂံၢ်အသိးန့ၣ် မ့ၢ်မတၤတဂၤလဲၣ်. ကိးအီၤလၢ အမံၤခဲလၢာ်လီၤ. မ့ၢ်လၢအဂံၢ်ဆူၣ်အဘါဆူၣ်, ဒီးအစိဒိၣ်အကမီၤထီသတးဒီး, တဟါမၢ်ဘၣ်နီတမံၤဘၣ်.”—ယၡါယၤ ၄၀:၂၅, ၂၆.
၂၄ အံၣ်စရ့လးအကစၢ်ယွၤလၢ အစီအဆှံအံၤ တဲဖျါထီၣ်အဂ့ၢ်လၢ အနီၢ်ကစၢ်လီၤ. ယဟိဝၤယွၤ မၢပှၤကွၢ်ဆၣ်တဖၣ် ဒ်သိးကပာ်ဖျါထီၣ်ဝဲလၢ ပှၤဒ်သိးဒီးအီၤတအိၣ်ဘၣ်န့ၣ်လီၤ. ဒ်သုးခိၣ်တဂၤ ပာ်လီၤအသုးမုၢ်လၢ အလီၢ်ဒၣ်ဝဲအသိး ယဟိဝၤယွၤ ပၢဝဲဆၣ်တဖၣ်န့ၣ်လီၤ. အဝဲမ့ၢ်ထၢဖှိၣ်ထီၣ်ဝဲ ဆၣ်သ့ၣ်တဖၣ်န့ၣ် ‘တမ့ၢ်ကဟါမၢ် နီတဖျၢၣ်ဘၣ်.’ ဆၣ်တဖၣ် အိၣ်အါအါဂီၢ်ဂီၢ်သနာ်က့ ကစၢ်ကိးဝဲ ဆၣ်တဖျၢၣ်စုာ်စုာ်လၢ အမံၤလီၤ. ဒ်သုးဖိလၢ အအိၣ်ဒီးတၢ်ဒိကနၣ်အသိး အဝဲသ့ၣ်အိၣ်လၢ အလီၢ်ဒၣ်ဝဲဒီး ဒိကနၣ်တၢ်ကလုၢ်န့ၣ်လီၤ. မ့ၢ်လၢအဝဲသ့ၣ် အခိၣ်န့ၣ် “အဂံၢ်ဆူၣ်အဘါဆူၣ်” ဒီး “အစိဒိၣ်အကမီၤထီ” အဃိလီၤ. လၢတၢ်န့ၣ်အဃိ ပှၤယူဒၤဖိလၢ အဘၣ်တၢ်စိာ်မၢကဲကုၢ်အီၤတဖၣ် အတၢ်နာ်ကဂၢၢ်ကျၢၤဝဲလီၤ. တၢ်ဘၣ်တ့ကစၢ်လၢ အဟ့ၣ်လီၤအကလုၢ်လၢ ဆၣ်တဖၣ်န့ၣ် အိၣ်ဒီးတၢ်စိတၢ်ကမီၤလၢ ကဆီၣ်ထွဲမၤစၢၤ အခ့အပှၤတဖၣ်လီၤ.
၂၅ ကစၢ်ယွၤအတၢ်ကတိၤဖဲ ဝံယၡါယၤ ၄၀:၂၀ အပူၤန့ၣ် ပထီဒါတသ့နီတဂၤဘၣ်. ဖဲန့ၣ်တဲဝဲလၢ “ကျ့ထီၣ်သုမဲာ်ဆူ တၢ်ထီၣ်ထီ” လီၤ. ပှၤသ့မူကပိာ်ပီညါလၢ မုၢ်မဆါတနံၤအံၤတဖၣ် အတၢ်ဃုသ့ၣ်ညါ နၢ်ပၢၢ်န့ၣ် ပာ်ဖျါဝဲလၢ မူခိၣ်လၢအပှဲၤဒီးဆၣ်အံၤ လီၤကမၢကမၣ်ဒိၣ်န့ၢ်ဒံး တၢ်လၢဝံယၡါယၤ ထံၣ်ဘၣ်ဝဲလၢ အစိၤအခါန့ၣ်လီၤ. ပှၤသ့မူကပိာ်ပီညါလၢ အသူဝဲမၢ်ဘလူ (telescope) လၢအဂ့ၤ ဒီးဃုသ့ၣ်ညါ မူကပိာ်တဖၣ်န့ၣ် တယာ်ဝဲလၢ မူဟီၣ်ကယၢလၢ ပထံၣ်အီၤသ့အပူၤန့ၣ် ကလဲးစံၣ်ကအိၣ်ဝဲ အကကွဲၢ် ၁၂၅ ကထိလီၤ. လၢကလဲးစံၣ်တဖၣ်န့ၣ်အကျါ မ့းလခံၣ်ဝ့ ကလဲးစံၣ်တခါဧိၤအပူၤန့ၣ် ပှၤတနီၤတယာ်ဝဲလၢ ဆၣ်ကအိၣ်ဝဲ အကကွဲၢ် ၁၀၀၀ အဘျီ ၁၀၀ ဘျဲၣ်လီၤ. မ့ၢ်လၢပသ့ၣ်ညါဘၣ် ဒ်အံၤအဃိ ကြၢးထိၣ်ဟူးထိၣ်ဂဲၤထီၣ်ပှၤလၢ ပကယူးယီၣ်ပာ်ကဲ ပတၢ်ဘၣ်တ့ကစၢ် လၢပသးပူၤဒီး နာ်န့ၢ်အတၢ်စံးပာ် လၢလၢပှဲၤပှဲၤလီၤ.
(ယၡါယၤ ၄၀:၂၇, ၂၈) နဲဒၣ်နစံး, ယၤကိာ်ဧၢ, ဒီးနကတိၤတၢ်, အံၣ်စရ့လးဧၢ, ယကျဲ အိၣ်တဒၢလၢယွၤ, ဒီးယတၢ်စံၣ်ညီၣ် လဲၤပူၤကွံာ်လၢ ယကစၢ်န့ၣ် မ့ၢ်အဘၣ်မနုၤလဲၣ်. ၂၈ နတသ့ၣ်ညါဘၣ်ဧါ, နတနၢ်ဟူဘၣ်ဧါ. ယွၤမ့ၢ်ကစၢ်အထူအယိာ်, တၢ်တ့လီၤ ဟီၣ်ခိၣ်အကတၢၢ်တဖၣ်န့ၣ် တလီၤဘှါဘၣ်, ဒီးတၢ်တဘှံးဘၣ် အသးဘၣ်. အသူၣ်ဆးအသးဆးန့ၣ် ပှၤဃုတဘၣ်ဘၣ်.
ip-1 ကဘျံးပၤ ၄၁၃ အဆၢ ၂၇
“မၤမုာ်ထီၣ်က့ၤ ယပှၤဂီၢ်မုၢ်တက့ၢ်”
၂၇ ဝံယၡါယၤကွဲးဖျါထီၣ်ဝဲ ယဟိဝၤယွၤ အတၢ်ကတိၤတဖၣ်လၢ အပာ်ဖျါထီၣ် ပှၤဘၣ် တၢ်စိာ်မၢကဲကုၢ် လၢအအိၣ်ယံၤဒီး အထံအကီၢ်လၢ အမံးလာ်လၢ အကယၤတဖၣ် အတၢ်တူၢ်ဘၣ်လီၤ. အဝဲသ့ၣ်တနီၤ ဆိကမိၣ်ဝဲလၢ ကစၢ်ယွၤတသ့ၣ်ညါအ “ကျဲ” လၢအမ့ၢ်အတၢ်အိၣ်မူလၢ အကီအခဲန့ၣ်ဘၣ်. ဒီးဆိကမိၣ်ဝဲလၢ ယဟိဝၤယွၤတပာ်သူၣ်ပာ်သးဝဲ တၢ်တတီတလိၤလၢ အဝဲသ့ၣ် ကွၢ်ဆၢၣ်မဲာ်ဘၣ်ဝဲန့ၣ်ဘၣ်. ပှၤအံၣ်စရ့လးဖိတဖၣ် ကြၢးပာ်သူၣ်ပာ်သးဝဲ တၢ်လၢဝံယၡါယၤကွဲးဝဲဒီး တဲဝဲတဖၣ်လီၤ, တမ့ၢ်ကဘၣ်သးစၢၢ်ဆၢဝဲ အဝဲသ့ၣ် အတၢ်လဲၤခီဖျိဖဲ ဝ့ၢ်ဘၤဘူၤလိၣ်အပူၤဘၣ်. ယဟိဝၤယွၤ မၤပူၤဖျဲးအပှၤဂီၢ်မုၢ်န့ၢ်ဝဲ ဒီးသးအိၣ်မၤဝဲစ့ၢ်ကီးလီၤ. အဝဲမ့ၢ် ယွၤလၢအမူဝဲ လီၤထူလီၤယိာ်ဒီး အတ့လီၤဟီၣ်ခိၣ် ဒီဖျၢၣ်လီၤ. အဝဲအိၣ်ဒီး တၢ်စိတၢ်ကမီၤလၢ အအိၣ်ဖျါလၢ အတၢ်ဘၣ်တ့အပူၤ ဒီးဘၤဘူၤလိၣ်လၢ အဂံၢ်ဆူၣ်ဘါဆူၣ်အံၤဒၣ်လဲာ် မၤနၢၤဝဲသ့လီၤ. ကစၢ်ယွၤ ဒ်အံၤတဂၤန့ၣ် တၢ်ဘှံးအသးတသ့ဘၣ်ဒီး အတၢ်လီၤတူာ်လီၤကာ်တအိၣ်လၢ အပှၤဂီၢ်မုၢ်အဖီခိၣ်ဘၣ်. အဝဲသ့ၣ် တကြၢးမုၢ်လၢ်ဝဲလၢ ကဘၣ်နၢ်ပၢၢ်ဝဲ တၢ်လၢကစၢ်ယွၤမၤဝဲ ခဲလၢာ်န့ၣ်ဘၣ်, မ့ၢ်လၢကစၢ်ယွၤအတၢ်နၢ်ပၢၢ်ဒီး အတၢ်ထံၣ်သ့ၣ်ညါန့ၣ် အပတီၢ်ထီန့ၢ်ဒံး အဝဲသ့ၣ်အဃိလီၤ.
(ယၡါယၤ ၄၀:၂၉-၃၁) ပှၤလၢအလီၤဘှါန့ၣ် ယွၤဟ့ၣ်ဝဲလၢ အဂံၢ်အဘါလီၤ. ဒီးပှၤလၢ အဂံၢ်အဘါ တအိၣ်ဘၣ်န့ၣ် ဒုးဆူၣ်ထီၣ်ဝဲ အဂံၢ်အဘါလီၤ. ၃၀ ဒီးပှၤဖိၣ်သၣ်ခွါန့ၣ် ကလီၤဘှါ, ဒီးတၢ်ကဘှံးအသး, ဒီးပှၤဃုထၢဖိန့ၣ် အဂံၢ်အဘါကစၢ်လီၤ, ကစၢ်လီၤဝဲလီၤ. ၃၁ မ့မ့ၢ်ပှၤလၢ အမုၢ်လၢ်တၢ်လၢ ယွၤန့ၣ် အဂံၢ်အဘါကဆူၣ်ထီၣ်လီၤ. ကယူာ်ထီၣ်အဒံးဆ့ဒ် လံာ်ဧိၤတြၤဧိၤအသိး, ကဃ့ၢ်ဝဲဒီး တၢ်တဘှံးဘၣ်အသးဘၣ်, ဒီးကလဲၤတၢ်ဒီး တလီၤဘှံးလီၤတီၤဘၣ်လီၤ.
ip-1 ကဘျံးပၤ ၄၁၃-၄၁၅ အဆၢ ၂၉-၃၁
“မၤမုာ်ထီၣ်က့ၤ ယပှၤဂီၢ်မုၢ်တက့ၢ်”
၂၉ ဖဲယဟိဝၤယွၤ တဲဝဲလၢ ကဟ့ၣ်ပှၤလၢ အလီၤဘှါတဖၣ်လၢ အဂံၢ်အဘါအခါ ဘၣ်သ့ၣ်သ့ၣ် ကဆိကမိၣ်ဝဲ တၢ်ကီတၢ်ခဲလၢ ပှၤဘၣ်တၢ်စိာ်မၢကဲကုၢ်အီၤတဖၣ် ကထံၣ်ဘၣ်ဝဲ ဖဲအဟဲက့ၤလၢကျဲအခါလီၤ. ယဟိဝၤယွၤဒုးသ့ၣ်ညါ အပှၤဂီၢ်မုၢ်တဖၣ်လၢ အဝဲအိၣ်ဒီး တၢ်ဂ့ၤတၢ်ဝါလီၤဆီတခါလၢ အအဲၣ်ဒိးမၤစၢၤ ပှၤလၢအလီၤဘှါ လၢအမုၢ်လၢ်အတၢ်မၤစၢၤတဖၣ်န့ၣ်လီၤ. ပှၤလၢအဂံၢ်ပှဲၤဘါပှဲၤလၢအမ့ၢ် “ပှၤဖိၣ်သၣ်ခွါ” ဒီး “ပှၤဃုထၢဖိ” တဖၣ်န့ၣ် ကလီၤဘှံးလီၤတီၤလၢ တၢ်မၤအဃိဒီး အဂံၢ်အဘါ လၢာ်ကွံာ်ဝဲသ့လီၤ. ဘၣ်ဆၣ် ယဟိဝၤယွၤအၢၣ်လီၤဝဲလၢ ပှၤလၢအသန့ၤအသးလၢအီၤတဖၣ် မ့ၢ်ဃ့ၢ်မ့ၢ်ဂ့ၤ မ့ၢ်ဟးဝဲမ့ၢ်ဂ့ၤ ကဟ့ၣ်ဝဲ တၢ်ဂံၢ်တၢ်ဘါ ဒ်သိးတၢ်သုတဘှံးအသးတဂ့ၤန့ၣ်လီၤ. ယဟိဝၤယွၤ ကဟ့ၣ်ဂံၢ်ဟ့ၣ်ဘါဝဲ အပှၤဂီၢ်မုၢ်အဂ့ၢ်န့ၣ် ဟ့ၣ်ဝဲအဒိလၢ လံာ်ကြီကြာ်လီၤ. မ့ၢ်လၢလံာ်ကြီကြာ်န့ၣ် ဖျါလၢတထဲးဂံၢ်ထဲးဘါဘၣ်ဆၣ် ယူၤဝဲန့ၢ် အနၣ်ရံၣ်အါမးအဃိလီၤ. မ့ၢ်လၢယွၤကမၤစၢၤ အဝဲသ့ၣ်အဃိ ပှၤယူဒၤဖိလၢ အဘၣ်တၢ်စိာ်မၢကဲကုၢ်အီၤတဖၣ် အသးဟးဂီၤ အလီၢ်တအိၣ်ဘၣ်.
၃၀ ယၡါယၤ အဆၢဒိၣ် ၄၀ အပူၤအဆၢဖိ လၢခံကတၢၢ်တဖၣ်န့ၣ် ပၣ်ဃုာ်ဒီး တၢ်ကတိၤလၢ အမၤမုာ်ထီၣ် ခရံာ်ဖိလၢ အအိၣ်မူဘၣ်လၢ ဆၢကတီၢ်ကီခဲတဖၣ်အံၤ အဂီၢ်လီၤ. တၢ်ဆီၣ်သနံးဒီး တၢ်ကီတၢ်ခဲလၢ အမၤဟးဂီၤပသး အိၣ်ဝဲအါမးအဃိ လံာ်စီဆှံအဆၢတဖၣ်အံၤ ဒုးနာ်န့ၢ်ပှၤလၢ တၢ်ကီတၢ်ခဲဒီး တၢ်တတီတလိၤလၢ ပကွၢ်ဆၢၣ်မဲာ်ဘၣ်တဖၣ်န့ၣ် ပကစၢ်ယွၤ ပာ်သူၣ်ပာ်သးဝဲလီၤ. အဃိ ပနာ်သ့သပှၢ်ကတၢၢ်လၢ တၢ်ဘၣ်တ့ကစၢ်လၢ “အတၢ်ကူၣ်သ့ကူၣ်ဘၣ်န့ၣ် တၢ်ထိၣ်အီၤတဲာ်အီၤ တသ့” တဂၤအံၤ အဆၢကတီၢ်မ့ၢ်ဘၣ်န့ၣ် ကမၤဘၣ်လိာ်က့ၤဝဲ တၢ်တတီတလိၤတဖၣ်လီၤ. (စံးထီၣ်ပတြၢၤ ၁၄၇:၅, ၆, ခ့ခါစှီၤကျိာ်) ဖဲပထံၣ်ဘၣ် တၢ်ကီတၢ်ခဲအတီၢ်ပူၤန့ၣ် တလိၣ်လၢ ပကဘၣ်တြီဆၢအီၤထဲလၢ ပနီၢ်ကစၢ် အဂံၢ်အဘါဘၣ်. ယဟိဝၤယွၤ အတၢ်စိတၢ်ကမီၤ တလၢာ်နီတဘျီဘၣ်အဃိ ဖဲအခ့အပှၤတဖၣ် ကွၢ်ဆၢၣ်မဲာ်ဘၣ် တၢ်မၤကွၢ်အခါ ဟ့ၣ်ဝဲ “အစိအကမီၤ ဒိၣ်ကဲၣ်ဆိး” သ့န့ၣ်လီၤ.—၂ ကရံၣ်သူး ၄:၇.
၃၁ ဆိကမိၣ်ကွၢ်ဖဲ ချ.ခ.န ဃုယၤဖှိၣ်, ပှၤယူဒၤဖိလၢ ဘၣ်တၢ်စိာ်မၢကဲကုၢ်အီၤလၢ ဝ့ၢ်ဘၤဘူၤလိၣ်အဂ့ၢ်န့ၣ်တက့ၢ်. ဝ့ၢ်ယရူၤၡလ့ၣ်လၢ အဝဲသ့ၣ်အဲၣ်ဘၣ်ဝဲအံၤ အိၣ်စီၤစုၤဒီးအဝဲသ့ၣ် အမံးလာ်လၢ အကယၤဒီး ဝ့ၢ်အံၤဘၣ်အိၣ်လီၤဃီဒီး အတၢ်လုၢ်ဟံၣ် ဟးဂီၤကွံာ်ဝဲလီၤ. လၢအဝဲသ့ၣ်အဂီၢ် ဝံယၡါယၤ အတၢ်စံးပာ်န့ၣ် အိၣ်ဒီးတၢ်အၢၣ်လီၤဒီး တၢ်မုၢ်လၢ်အတၢ်ကပီၤ လၢအမၤမုာ်အသးလီၤ. မ့ၢ်လၢယဟိဝၤယွၤ ကဆှၢကဒါက့ၤ အဝဲသ့ၣ်ဆူ အထံအကီၢ်အဃိလီၤ. ဖဲ ချ.ခ.န ၅၃၇ န့ၣ်ယဟိဝၤယွၤ ဆှၢကဒါက့ၤ အပှၤဂီၢ်မုၢ်တဖၣ်ဆူ အထံအကီၢ်အဃိ အဝဲပာ်ဖျါထီၣ်ဝဲလၢအမ့ၢ် ကစၢ်လၢအမၤလၢပှဲၤ အတၢ်အၢၣ်လီၤတဖၣ်လီၤ. ပဝဲစ့ၢ်ကီး ပနာ်ယဟိဝၤယွၤ လၢပသးဒီဖျၢၣ်သ့လီၤ. ဘီမုၢ်အတၢ်ဆိၣ်ဂ့ၤတဖၣ်လၢ ဝံယၡါယၤ တဲဆိပာ်ဝဲန့ၣ် ကကဲထီၣ်အနီၢ်ကီၢ်လီၤ. တၢ်ကစီၣ်အံၤ မ့ၢ်တၢ်သးခုကစီၣ် နီၢ်နီၢ်လၢ ပှၤဟီၣ်ခိၣ်ဖိခဲလၢာ် အဂီၢ်လီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ယၡါယၤ ၃၈:၁၇) ကွၢ်ကွၢ်, ယတၢ်ကိၢ်တၢ်ဂီၤန့ၣ် ကဲထီၣ်တၢ်မုာ်တၢ်ပၢၤ ဒီးနအဲၣ်ယၤဒီး မၤပူၤဖျဲးယသးလၢ တၢ်ဟးဂီၤအပူၤ, နကွံာ်တ့ၢ်ကွံာ် ယတၢ်ဒဲးဘးခဲလၢာ်လၢ နချၢဃံလီၤ.
တၢး၀၃ ၇/၁ ကဘျံးပၤ ၁၇ အဆၢ ၁၇
“ယွၤမ့ၢ်တၢ်အဲၣ်တၢ်ကွံလီၤ”
၁၇ ဖဲစီၤဃံးစကံယၤ အတၢ်ဆါဘျါက့ၤဝံၤအလီၢ်ခံ အဝဲကွဲးဝဲ တၢ်စံးဘျုးစံးဖှိၣ် အတၢ်သးဝံၣ်ဒီး စံးဘၣ်ယဟိဝၤယွၤလၢ– “နကွံာ်တ့ၢ်ကွံာ် ယတၢ်ဒဲးဘးခဲလၢာ်လၢ နချၢဃံ” လီၤ. (ယၡါယၤ ၃၈:၁၇) ယဟိဝၤယွၤ ဘၣ်တၢ်ပာ်ဖျါထီၣ်အီၤဒ် ကစၢ်လၢအဟံးထီၣ်ကွံာ် ပှၤလၢအပီၢ်ယၢ်လီၤက့ၤအသးတဂၤ အတၢ်ဒဲးဘး ဒီးကွံာ်ဝဲဆူ အချၢဃံ လၢအတထံၣ်ဝဲဒီး တပာ်သူၣ်ပာ်သးလၢၤဝဲ အလီၢ်န့ၣ်လီၤ. ဘၣ်ဃးဒီး တၢ်ကတိၤအံၤန့ၣ် လံာ်တဘ့ၣ်ကွဲးဝဲလၢ “နမၤလီၤမၢ်ကွံာ် ယတၢ်ကမၣ် ဒ်ယတမၤတ့ၢ်အီၤ နီတဘျီဘၣ်အသိး” လီၤ. မ့ၢ်တၢ်ကတိၤလၢ အမၤမုာ်ထီၣ်ပသး ဒိၣ်မးလီၤ.
(ယၡါယၤ ၄၂:၃) တပိၢ်တဘိလၢ အသဘှံးန့ၣ် တမၤတဲာ်ကွံာ်ဘၣ်ဝဲဘၣ်, ဒီးတမၤပံာ်ဘၣ် မ့ၣ်အူဒၢအပှံာ်လၢ အကပီၤပံာ်လ့ပံာ်လ့ဘၣ်. ကဒုးဟဲထီၣ် တၢ်စံၣ်ညီၣ်လၢ တၢ်မ့ၢ်တၢ်တီလီၤ.
တၢး၁၅ ၂/၁၅ ကဘျံးပၤ ၈ အဆၢ ၁၃
ကွၢ်လိမၤဒိး ယ့ၣ်ၡူးအတၢ်ဆီၣ်လီၤသးဒီး အတၢ်သးကညီၤ
၁၃ ယ့ၣ်ၡူးအတၢ်ကတိၤလၢ အပှဲၤဒီးတၢ်သးကညီၤ. ယ့ၣ်ၡူးအိၣ်ဒီး တၢ်သးကညီၤအဃိ အဝဲကတိၤတၢ်ဒီးပှၤဂၤ မုာ်မုာ်, လီၤဆီဒၣ်တၢ် ပှၤလၢအဘၣ် တၢ်ဆီၣ်သနံးအီၤတဖၣ်န့ၣ်လီၤ. တၢ်မၢဖိမးသဲ ယၢၤထီၣ်ဝဲ ဝံယၡါယၤအတၢ်ကတိၤဒီး စံးဝဲလၢ– “တပိၢ်တဘိလၢ အသဘှံးန့ၣ် တမၤတဲာ်ကွံာ်ဘၣ်ဝဲဘၣ်, ဒီးမ့ၣ်အူဒၢအပှံာ်လၢအခုၣ်, တမၤလီၤပံာ်ဘၣ်” ဝဲဘၣ်. (ယၡါယၤ ၄၂:၃; မးသဲ ၁၂:၂၀) ယ့ၣ်ၡူးတဲဝဲ တၢ်ကတိၤလၢ အမၤမုာ်ထီၣ် ပှၤလၢအလီၤဂာ်ဒ် တပိၢ်လၢအသဘှံး မ့တမ့ၢ် မ့ၣ်အူဒၢအပှံာ်လၢ အကပီၤပံာ်လ့ပံာ်လ့တဖၣ်န့ၣ်လီၤ. အဝဲစံၣ်တဲၤတဲလီၤ တၢ်သးခုကစီၣ်ဒ်သိး “ကမၤဘျါက့ၤ ပှၤအသူၣ်ကၢ်အသးလီၤ” အဂီၢ်လီၤ. (ယၡါယၤ ၆၁:၁) အဝဲကွဲမုာ် “ပှၤလၢတၢ်ဘှံးအသးဒီး ဝံတၢ်ယိးတၢ်ဃၢခဲလၢာ်” ဆူအအိၣ်ဒီး စံးဝဲလၢ အဝဲသ့ၣ်က “ထံၣ်န့ၢ်တၢ်အိၣ်ဘှံး” လီၤ. (မးသဲ ၁၁:၂၈-၃၀) ယ့ၣ်ၡူးဒုးသ့ၣ်ညါဝဲ အပျဲၢ်အဘီၣ်တဖၣ်လၢ ကစၢ်ယွၤဘၣ်ယိၣ်တၢ်လၢ ပှၤလၢအဘူၣ်ထီၣ်ဘါထီၣ်အီၤ တဂၤစုာ်စုာ်အဂီၢ် ဃုာ်ဒီး “ပှၤတဂၤလၢအဆံး” လၢပှၤထံၣ်အီၤဒ် ပှၤလၢအရ့တဒိၣ်တဂၤ အဂီၢ်လီၤ.—မးသဲ ၁၈:၁၂-၁၄; လူၤကၣ် ၁၂:၆, ၇.
တၢ်ဖးလံာ်စီဆှံ
(ယၡါယၤ ၄၀:၆-၁၇) တၢ်ကလုၢ်န့ၣ်စံး, ကိးထီၣ်တက့ၢ်. ဒီးပှၤစံး, ယဘၣ်ကိးထီၣ်လၢ မနုၤတမံၤလဲၣ်. ကယဲၢ်တၢ်ဖံးတၢ်ညၣ်န့ၣ် မ့ၢ်နီၣ်ဧိၤမံၤဧိၤခဲလၢာ်, ဒီးကယဲၢ်အဘျုးအဖှိၣ်ဒ် ပျီပူၤ အသံၣ်ဧိၤဖီဧိၤ အသိးန့ၣ် ခဲလၢာ်လီၤ. ၇ နီၣ်ဧိၤမံၤဧိၤန့ၣ်ဃ့ထီၣ်ကွံာ်, သံၣ်ဧိၤဖီဧိၤန့ၣ်လီၤညွံးလီၤဘဲဝဲလီၤ. အဂ့ၢ်ဒ်အံၤ, ယွၤအသါ အူထီၣ်ဘၣ်အီၤလီၤ, မ့ၢ်မးပှၤဂီၢ်မုၢ်မ့ၢ်နီၣ်ဧိၤမံၤဧိၤလီၤ. ၈ နီၣ်ဧိၤမံၤဧိၤန့ၣ်ဃ့ထီၣ်ကွံာ်, သံၣ်ဧိၤဖီဧိၤန့ၣ် လီၤညွံးလီၤဘဲဝဲလီၤ. မ့မ့ၢ်ပကစၢ်အကလုၢ်ကထါန့ၣ် ကအိၣ်ဝဲကဆိးဝဲ လီၤစိၤလီၤထီလီၤ. ၉ ပှၤလၢအဟဲစိာ် တၢ်သးခုအကစီၣ်ဆူ စံယိၣ်တဂၤဧၢ. လဲၤထီၣ်ဆူကစၢၢ်ထီအဒီခိၣ်, ထုထီၣ်နကလုၢ်ဒီး တၢ်အဂံၢ်အဘါ, ပှၤလၢအဟဲစိာ် တၢ်သးခုအကစီၣ်ဆူ ယရူၤၡလ့ၣ်တဂၤဧၢ, ထုထီၣ်အီၤတက့ၢ်. ပျံၤတၢ်တဂ့ၤ. စံးလၢ ယူဒၤအဝ့ၢ်တဖၣ်, ကွၢ်ကွၢ်, သုကစၢ်န့ၣ်တက့ၢ်. ၁၀ ကွၢ်ကွၢ်, ယွၤကဟဲဒီးအစိအကမီၤ, ဒီးအစုဒုၣ်ကပၢတၢ်လၢ အဂီၢ်ဒၣ်ဝဲလီၤ. ကွၢ်ကွၢ်, အဘူးအလဲအိၣ်ဒီးအီၤ, ဒီးအဘူးအလဲအိၣ်ဝဲလၢ အမဲာ်ညါလီၤ. ၁၁ ကအံးကကွၢ် အသိတဖု ဒ်ပှၤကွၢ်သိတဂၤအသိး, ဒီးကထၢဖှိၣ်သိဖိတဖၣ်လၢ အစု, ဒီးကစိာ်အီၤလၢ အသးနါပှၢ်အပူၤ, ဒီးကဆှၢကယီကယီ သိမိၢ်ပှၢ်လၢအဒုးအီၣ်နုၢ်တၢ်လီၤ. ၁၂ ပှၤလၢအဃီၣ်ထံလၢအစုညါသးအပူၤ, ဒီးထိၣ်မူခိၣ်လၢအစုထါတထါ, ဒီးပာ်ဖှိၣ်ဟီၣ်ခိၣ်အကမူၣ်လၢ နီၣ်ဃီၣ်အပူၤ, ဒီးစီၤကစၢၢ်ကလိလၢစီၤပီၢ်ပူၤ, ဒီးတၢ်စိခိၣ်တဖၣ်န့ၣ် လၢစီၤပီၢ်စီၤရွဲၤပူၤန့ၣ် မ့ၢ်မတၤတဂၤလဲၣ်. ၁၃ မ့ၢ်မတၤထိၣ်ယွၤအသးတဂၤလဲၣ်. ဒီးမ့ၢ်မတၤ ကဲပှၤကူၣ်လိာ်အသးဒီးအီၤ သတးဒီးကသိၣ်လိအီၤတဂၤလဲၣ်. ၁၄ ကူၣ်လိာ်အသးဒီးပှၤတဂၤ, ဒီးအတၢ်သိၣ်လိအီၤ, ဒီးနဲၣ်လိအီၤလၢ တၢ်စံၣ်ညီၣ်အကျဲ, ဒီးဘိးဘၣ်သ့ၣ်ညါအီၤလၢ တၢ်သ့ၣ်ညါန့ၣ် မ့ၢ်မတၤတဂၤလဲၣ်. ဒီးမ့ၢ်မတၤကနဲၣ်လိအီၤလၢ တၢ်သူၣ်ဆးသးဆးအကျဲန့ၣ်တဂၤလဲၣ်. ၁၅ ကွၢ်ကွၢ်, ပှၤကလုာ်တဖၣ်မၤသးဒ် ထံလီၤစီၤတဖျၢၣ်လၢထံစဲၤ, ဒီးတၢ်ပာ်အီၤဒ်တၢ်ကမှံၤလၢ စီၤပီၢ်အပူၤအသိးန့ၣ်လီၤ. ကွၢ်ကွၢ်, ကီးတဖၣ်န့ၣ် ဒ်ဟီၣ်ခိၣ်အကမူၣ် တဖျၢၣ်အသိးန့ၣ်ထၢထီၣ်ဝဲလီၤ. ၁၆ ဒီးလဘၤနိၣ်လၢ တၢ်ဆိၣ်ကဲၤမ့ၣ်အူအဂီၢ်န့ၣ် တအါဘၣ်, ဒီးအဆၣ်ဖိကီၢ်ဖိလၢ တၢ်လုၢ်မ့ၣ်အူအဂီၢ်န့ၣ် တအါဘၣ်လီၤ. ၁၇ ကယဲၢ်ပှၤကလုာ်ခဲလၢာ်န့ၣ် မၤသးဒ်တၢ်နီတမံၤလၢ အမဲာ်ညါအသိးန့ၣ်လီၤ. ပာ်ဝဲဒ်တၢ်ဆံးန့ၢ်တၢ်နီတမံၤ, ဒီးဒ်တၢ်တမ့ၢ်ဘၣ်တၢ်ဘၣ်အသိးန့ၣ်လီၤ.
လါယနူၤအါရံၤ ၃၀–လါဖ့ၤဘြူၤအါရံၤ ၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယၡါယၤ ၄၃-၄၆
“ယဟိဝၤယွၤ အတၢ်စံးပာ်တဖၣ် ဟဲလၢထီၣ်ပှဲၤထီၣ်ထီဘိ”
(ယၡါယၤ ၄၄:၂၆-၂၈) ပှၤလၢအဒုးအိၣ်ဂၢၢ်ဆိကျၢၤ အခ့အပှၤအတၢ်ကတိၤ, ဒီးမၤလၢထီၣ်ပှဲၤထီၣ် အကလူးအတၢ်ကူၣ်လီၤ. မ့ၢ်ပှၤလၢအစံးလၢယရူၤၡလ့ၣ်အဂ့ၢ်, ပှၤကအိၣ်ကဆိးလၢအပူၤ, ဒီးလၢယူဒၤအဝ့ၢ်တဖၣ်အဂ့ၢ်န့ၣ်, ပှၤကတ့က့ၤအီၤ, ဒီးအလီၢ်လီၤပှီၢ်န့ၣ်, ယကမၤက့ၤအီၤလီၤ. ၂၇ ပှၤလၢအစံး တၢ်ယိာ်ပူၤန့ၣ် လီၤသံးကွံာ်တက့ၢ်, ဒီးယကမၤလီၤသံးကွံာ် သုထံမိၢ်ပှၢ်လီၤန့ၣ်, ၂၈ လၢအစံးလၢ စီၤကိရ့ၣ်အဂ့ၢ်, ယပှၤကွၢ်သိ, ဒီးကမၤဝဲလၢ ကယဲၢ်တၢ်ဘၣ်ယသးလီၤ. ဒီးစံးလၢယရူၤၡလ့ၣ်အဂ့ၢ်န့ၣ် နကဘၣ် တၢ်တ့က့ၤနၤလီၤ. ဒီးလၢတၢ်လုၢ်အဟံၣ်အဂ့ၢ်န့ၣ်, နခီၣ်ထံးတဖၣ် ကဘၣ်တၢ်ပာ်လီၤအီၤလီၤ.
ip-2 ကဘျံးပၤ ၇၁-၇၂ အဆၢ ၂၂-၂၃
ယွၤအမ့ၢ်အတီ တဲဆိပာ်ဝဲ တၢ်ထူၣ်ဖျဲးအဂ့ၢ်
၂၂ ပှၤလၢအဒွးတၢ်တဖၣ်န့ၣ် တဒိးန့ၢ်ဘၣ် သးစီဆှံအဃိ အဝဲသ့ၣ်ဘၣ်ယိၣ်တၢ်လၢ အတၢ်ကတိၤ ကကမၣ်ဒီး တဲဆိတၢ်လီၤတံၢ်လီၤဆဲးတသ့ဘၣ်. ဘၣ်ဆၣ် မ့မ့ၢ်ယဟိဝၤယွၤန့ၣ် တဲဆိပာ်ဝဲလၢ အပှၤကလုာ်တဖၣ် ကထူၣ်ဖျဲးထီၣ်လၢ ကုၢ်အလီၢ်ဒီး ကက့ၤသူၣ်ထီၣ်က့ၤဝဲ ဝ့ၢ်ယရူၤၡလ့ၣ်ဒီး တၢ်လုၢ်ဟံၣ်လီၤ. ဒီးပှၤလၢကမၤထူၣ်ဖျဲးထီၣ် အဝဲသ့ၣ်န့ၣ် ယဟိဝၤယွၤပာ်ဖျါထီၣ်ဝဲ အမံၤခီဖျိလၢ ဝံယၡါယၤလီၤ. အဝဲအမံၤမ့ၢ် စီၤကိရ့ၣ်ဒီး ဘၣ်တၢ်သ့ၣ်ညါအီၤဒ် ဖၢၡၢၣ် အသုးခိၣ်ဖးဒိၣ် ကိရ့ၣ်လီၤ. ဝ့ၢ်ဘၤဘူၤလိၣ်လၢ ဘၣ်တၢ် ဒီသဒၢပာ်အီၤဂ့ၤဂ့ၤအံၤ စီၤကိရ့ၣ်ကနုာ်လီၤဒီး မၤနၢၤဝဲဒ်လဲၣ်အဂ့ၢ်န့ၣ် ယဟိဝၤယွၤ တဲဆိပာ်ဝဲ လီၤတံၢ်လီၤဆဲးလီၤ. ဝ့ၢ်ဘၤဘူၤလိၣ် ဘၣ်တၢ်ဒီသဒၢအီၤလၢ ဝ့ၢ်ခိၣ်ဒူဖးထီတဖၣ် ဒီးထံကျိၤကဝီၤဃာ်အီၤလီၤ. စီၤကိရ့ၣ်ကသူဝဲထံကျိ ဖရၤသးအံၤ လၢကမၤနၢၤတၢ်အဂီၢ်လီၤ. ပှၤကူၣ်ဘၣ်ကူၣ်သ့လၢ တၢ်စံၣ်စိၤတဲစိၤ ဟၢၣ်ရိၣ်တထၢး (Herodotus) ဒီး စၣ်နဖိၣ် (Xenophon) စံးဝဲလၢ စီၤကိရ့ၣ် ဒုးယွၤကပၤကွံာ်ဝဲ ထံကျိထံလၢ ထးခီဒီး မၤလီၤသံးကွံာ်ဝဲထံကျိထံ တုၤအသုးဖိတဖၣ် လဲၤခီဂာ်ဝဲလၢအခီၣ်န့ၢ်ဝဲလီၤ. ထံကျိဖရၤသးလၢ အဒီသဒၢ ဝ့ၢ်ဘၤဘူၤလိၣ်အံၤ လီၤသံးကွံာ်ဝဲလံ.
၂၃ တၢ်စံးပာ်ဘၣ်ဃးဒီး စီၤကိရ့ၣ်ကမၤထူၣ်ဖျဲးထီၣ် ယွၤအပှၤဂီၢ်မုၢ်ဒီး ကသုးကျဲၤဝဲဒ်သိး ပှၤကသူၣ်ထီၣ်က့ၤ ဝ့ၢ်ယရူၤၡလ့ၣ်ဒီး အတၢ်လုၢ်ဟံၣ်န့ၣ် ဟဲလၢပှဲၤထီၣ်ဝဲဧါ. လံာ်စီဆှံပာ်ဖျါထီၣ်ဝဲ စီၤကိရ့ၣ်အနီၢ်ကစၢ် အတၢ်ကတိၤလၢ အစံးဝဲ– “ပၤရၣ်အစီၤပၤကိရ့ၣ် စံးဝဲဒ်အံၤ, ယွၤမူခိၣ်အကစၢ် ဟ့ၣ်လီၤယၤလၢ ဟီၣ်ခိၣ်အဘီမုၢ်ခဲလၢာ်, ဒီးမၤလိာ်ယၤ ဒ်သိးယကသူၣ်ထီၣ် အဟံၣ်လၢ ယရူၤၡလ့ၣ်အပူၤ လၢအအိၣ်ဝဲလၢ ယူဒၤလီၤ. လၢသုကျါန့ၣ် မ့ၢ်မတၤအိၣ်ဝဲလၢ အပှၤဂီၢ်မုၢ်ခဲလၢာ်အကျါတဂၤလဲၣ်. မ်ယွၤ, အကစၢ် အိၣ်ဒီးအီၤတက့ၢ်. ကလဲၤထီၣ်ဒၣ်ဝဲဆူ ယရူၤၡလ့ၣ်လၢ အအိၣ်ဝဲလၢ ယူဒၤအပူၤ, ဒီးသူၣ်အံၣ်စရ့လး အကစၢ် (အဝဲဒၣ်မ့ၢ်ကစၢ်) အဟံၣ်လၢ ယရူၤၡလ့ၣ်အပူၤန့ၣ်တက့ၢ်.” (ဧ့စြၤ ၁:၂, ၃) ယဟိဝၤယွၤ အတၢ်ကတိၤလၢ အတဲဆိပာ်ဝဲ ခီဖျိလၢ ဝံယၡါယၤန့ၣ် ဟဲလၢပှဲၤထီၣ်ဝဲ ခဲလၢာ်လီၤ.
(ယၡါယၤ ၄၅:၁, ၂) ယွၤစံးလၢ အပှၤဒိးဖှူအသး စီၤကိရ့ၣ်ဒ်အံၤ, ယဟံးဃာ်အီၤလၢယစုထွဲ ဒ်သိးအကယီၢ်လီၤတံၢ် ပှၤကလုာ်တဖၣ်လၢအမဲာ်ညါ, ဒီးယကဃ့ၣ်လီၤ စီၤပၤတဖၣ်အယီၢ်တကိး, ဒီးအိးထီၣ်တြဲၤခံဘ့ၣ်လၢအမဲာ်ညါ, ဒီးတြဲၤတဖၣ် တကးတံာ်ဃၣ်ဘၣ်အသးဘၣ်. ၂ ယကလဲၤလၢနမဲာ်ညါ, ဒီးမၤဃူလိာ်တၢ်ထီၣ်စိလီၤနုာ်, ဒီးယကမၤကၢ်ကွံာ်တြဲၤ တိၢ်ဘီတဖၣ်, ဒီးယကကူးတဲာ်အနီၣ်ဘိထးလီၤ.
ip-2 ကဘျံးပၤ ၇၇-၇၈ အဆၢ ၄-၆
ယဟိဝၤယွၤမ့ၢ် “ကစၢ်အတီအလိၤ,ပှၤအုၣ်က့ၤခီၣ်က့ၤတၢ်”
၄ ဖဲဝံယၡါယၤအစိၤန့ၣ် စီၤကိရ့ၣ် တအိၣ်ဖျဲၣ်ဒံးဘၣ်ဆၣ် ယဟိဝၤယွၤ တဲဝဲဝံယၡါယၤလၢ စီၤကိရ့ၣ်အဂ့ၢ် ဒ်သိးစီၤကိရ့ၣ် မ့ၢ်ပှၤလၢအအိၣ်မူဝဲဖဲန့ၣ်ခါ တဂၤအသိးလီၤ. (ရိမ့ၤ ၄:၁၇) ယဟိဝၤယွၤ ဟ့ၣ်လီၤဆိပာ်ဝဲ စီၤကိရ့ၣ် မူဒါလၢအလီၤတံၢ်လီၤဆဲးတမံၤအဃိ ပတဲလၢစီၤကိရ့ၣ်န့ၣ်မ့ၢ်ဝဲယွၤ “အပှၤဒိးဖှူအသး” တဂၤသ့ဝဲလီၤ. ယဟိဝၤယွၤ ကတီခိၣ်ရိၤမဲအီၤ ဒီးအဝဲကမၤနၢၤကွံာ် ပှၤကလုာ်အါမး, မၤစၢ်လီၤ စီၤပၤတဖၣ်အဂံၢ်အဘါဒီး အဝဲသ့ၣ်မၤဆၢက့ၤအီၤတန့ၢ်ဘၣ်. ဒီးဖဲစီၤကိရ့ၣ် လဲၤဒုးဝ့ၢ် ဘၤဘူၤလိၣ်အခါ ယဟိဝၤယွၤ ကမၤဝဲဒ်သိး ဝ့ၢ်အပဲတြီတဖၣ် ကအိးထီၣ်အသးလီၤ. အဃိ ဝ့ၢ်အပဲတြီတဖၣ် ကမၤအသးဒ် ပဲတြီလၢအကၢ်တူာ်ကၢ်ဘျဲးလၢ ပှၤသူအီၤတန့ၢ်ဘၣ်အသိးလီၤ. အဝဲကလဲၤတၢ်လၢ စီၤကိရ့ၣ်အမဲာ်ညါဒီး ကမၤလီၤမၢ်ဝဲ တၢ်တြီမၤတံာ်တာ်တဖၣ်လီၤ. ဝံယၡါယၤ တဲဆိပာ်စၢၤဝဲလၢ စီၤကိရ့ၣ်အသုးဖိတဖၣ် ကမၤနၢၤကွံာ်ဝ့ၢ်ဒီး ကက့ၤစိာ်ကွံာ်ဝဲ တၢ်လုၢ်ဒိၣ်ပှ့ၤဒိၣ်လၢ အပာ်ဖှိၣ်ဝဲလၢတၢ်ခံးကျါဒီး “တၢ်အစုလီၢ်အခီၣ်ခိၣ် အိၣ်ဘံၣ်အသးလၢ အလီၢ်အိၣ်ခူသူၣ်တဖၣ်” လီၤ. မ့ၢ်အဝဲ အတၢ်စံးပာ်တဖၣ်အံၤ ဟဲလၢထီၣ်ပှဲၤထီၣ်ဝဲဧါ.
၅ ဖဲ ချ.ခ.န ၅၃၉ န့ၣ်စီၤကိရ့ၣ် ဟဲတုၤလၢ ဝ့ၢ်ဘၤဘူၤလိၣ်အခိၣ်ဒူ ဒ်သိးလၢ ကဒုးအီၤအဂီၢ်လီၤ. ဝံယၡါယၤ တဲဆိပာ်ဝဲတၢ်ဂ့ၢ်အံၤ ပူၤကွံာ်အနံၣ် ၂၀၀ ဃၣ်ဃၣ်လီၤ. (ယံးရမံယၤ ၅၁:၁၁, ၁၂) ဒ်လဲၣ်ဂ့ၤ ဒ်လဲၣ်ဂ့ၤ ဝ့ၢ်ဘၤဘူၤလိၣ် အတၢ်ကိၢ်တၢ်ဂီၤတအိၣ်ဘၣ်. အဝဲသ့ၣ် ဆိကမိၣ်ဝဲလၢ ပှၤမၤနၢၤကွံာ် အဝ့ၢ်အံၤတန့ၢ်ဘၣ်. ဝ့ၢ်ခိၣ်ဒူဖးထီလၢ အလီၤဘီလီၤမုၢ်ဒီး ထံကျိၤဖးယိာ်လၢ အပှဲၤဒီးထံကျိ ဖရၤသးအထံန့ၣ် ဒီသဒၢ အဝဲသ့ၣ်အဝ့ၢ်လီၤ. ဒီးလၢအနံၣ် တကယၤအတီၢ်ပူၤ ပှၤမၤနၢၤကွံာ် အဝဲသ့ၣ်တအိၣ်နီတဂၤဘၣ်. ဒီးဖဲန့ၣ်အဆၢကတီၢ် ဘၤဘူၤလိၣ်အစီၤပၤ ဘ့ၤလၡါစၢ်န့ၣ် မၤဝဲမူးပွဲဖးဒိၣ်, အီၣ်သကိးတၢ်ဒီး အခ့အပှၤတဖၣ်ဒီး တၢ်ဘၣ်ယိၣ်တအိၣ်နီတစဲးဘၣ်. (ဒၤနံးယ့လး ၅:၁) ဒီးလါအီးကထိဘၢၣ် ၅/၆ နၤအဝဲန့ၣ် စီၤကိရ့ၣ် ကတဲာ်ကတီၤထီၣ်ဝဲ တၢ်ကူၣ်ထီၣ်ဖးလီၤ လၢအဒိၣ်အမုၢ်တခါ ဒ်သိးကဒုးတၢ်အဂီၢ်လီၤ.
၆ စီၤကိရ့ၣ် မၢဝဲအပှၤအံၣ်ကၠနယၢၢ်ဖိတဖၣ် ဘိးကပၤထံကျိလၢ ဝ့ၢ်ဘၤဘူၤလိၣ်အထးခီတကပၤဒီး ဒုးယွၤလီၤကွံာ်ထံဖဲန့ၣ် ဒ်သိးထံကျိထံ သုတယွၤလီၤဆူ ဝ့ၢ်အအိၣ်တဂ့ၤလီၤ. တယံာ်ဘၣ်ဒီး ထံကျိထံလၢ ဝ့ၢ်ပူၤဒီးထံကျိလၢ အအိၣ်ဝးတရံးဝ့ၢ်န့ၣ် လီၤသံးကွံာ်ဝဲအဃိ စီၤကိရ့ၣ်ဒီး အပှၤသုးဖိတဖၣ် လဲၤဝဲဆူထံကျိလၢ ဝ့ၢ်ဘၤဘူၤလိၣ်အခၢၣ်သးအပူၤသ့ဝဲလီၤ. (ယၡါယၤ ၄၄:၂၇; ယံးရမံယၤ ၅၀:၃၈) လီၤကမၢကမၣ်ဒိၣ်မးလၢ ဒ်ဝံယၡါယၤ တဲဝဲအသိး ဝ့ၢ်အပဲတြီတဖၣ် အိးထီၣ်ပာ်စၢၤအသးလီၤ. စီၤကိရ့ၣ်ဒီးအသုးဖိတဖၣ် နုာ်လီၤဆူ ဝ့ၢ်ပူၤဒီးဂုာ်ဟံးန့ၢ်နီဝံၤ မၤသံကွံာ်စီၤပၤ ဘ့ၤလၡါစၢ်လီၤ. (ဒၤနံးယ့လး ၅:၃၀) အဝဲမၤနၢၤတၢ်ဖဲ တနၤဃီအတီၢ်ပူၤလီၤ. ဝ့ၢ်ဘၤဘူၤလိၣ်လီၤဝဲဒီး ဝံအတၢ်စံးပာ် ဟဲလၢထီၣ်ပှဲၤထီၣ်ဝဲ လီၤတံၢ်လီၤဆဲးလီၤ.
(ယၡါယၤ ၄၅:၃-၆) ဒီးယကဟ့ၣ်လီၤနၤလၢ တၢ်လုၢ်ဒိၣ်ပှ့ၤဒိၣ်လၢ တၢ်ခံးကျါ, ဒီးတၢ်အစုလီၢ်အခီၣ်ခိၣ် အိၣ်ဘံၣ်အသးလၢ အလီၢ်အိၣ်ခူသူၣ်တဖၣ်, ဒ်သိးနကသ့ၣ်ညါလၢယၤ, ပှၤလၢအကိးထီၣ်နၤ လၢနမံၤ, မ့ၢ်ယွၤအံၣ်စရ့လးအကစၢ်လီၤ. ၄ လၢယခ့ယပှၤယၤကိာ်အဂီၢ်, ဒီးလၢပှၤလၢ ယဃုထၢအီၤ အံၣ်စရ့လးအဂီၢ်, ယကိးနၤလၢနမံၤ, ယကိးက့ၤနၤလၢနမံၤသီ, ဒီးနတသ့ၣ်ညါဘၣ်ယၤဘၣ်လီၤ. ၅ ယဲဒၣ်အံၤယမ့ၢ်ယွၤလီၤ. ဒီးအဂၤတအိၣ်ဘၣ်. လၢယၤအမဲာ်ညါကစၢ်တအိၣ်ဘၣ်. ယကကံၢ်တူာ်နယီၢ်ဒ့, ဒီးနတသ့ၣ်ညါဘၣ်ယၤဘၣ်, ၆ ဒ်သိးပှၤကသ့ၣ်ညါလၢ မုၢ်ထီၣ်ပၢၢ်လၢမုၢ်နုာ်န့ၣ် လၢယၤအမဲာ်ညါ တၢ်တအိၣ်ဘၣ်, ယမ့ၢ်ယွၤ, ဒီးအဂၤတအိၣ်ဘၣ်.
ip-2 ကဘျံးပၤ ၇၉-၈၀ အဆၢ ၈-၁၀
ယဟိဝၤယွၤမ့ၢ် “ကစၢ်အတီအလိၤပှၤအုၣ်က့ၤခီၣ်က့ၤတၢ်”
ဘၣ်မနုၤအဃိ ယဟိဝၤယွၤ မၤစၢၤစီၤကိရ့ၣ်လဲၣ်
၈ ဖဲယဟိဝၤယွၤ တဲဘၣ်ဝံယၡါယၤလၢ မတၤကမၤနၢၤ ဝ့ၢ်ဘၤဘူၤလိၣ်ဒီး ကမၤနၢၤဝဲ ဒ်လဲၣ်အဂ့ၢ်ဝံၤအခါ ယဟိဝၤယွၤ တဲကဒီးဝဲလၢ ဘၣ်မနုၤအဃိ စီၤကိရ့ၣ်ကဒုးနၢၤတၢ်လဲၣ်န့ၣ်လီၤ. ယဟိဝၤယွၤ စံးပာ်စီၤကိရ့ၣ်လၢ ဝံအတၢ်စံးပာ်အပူၤဒ်အံၤ “ဒ်သိးနကသ့ၣ်ညါလၢယၤ ပှၤလၢအကိးထီၣ်နၤ လၢနမံၤ, မ့ၢ်ယွၤအံၣ်စရ့လးအကစၢ်လီၤ.” (ယၡါယၤ ၄၅:၃ခ) လၢလံာ်စီဆှံအပူၤ ဘီမုၢ်လၢအဒိၣ်စိဟီၣ်ခိၣ်ဒီဘ့ၣ် လွံၢ်ခါတခါအံၤ ကြၢးနၢ်ပၢၢ်ဝဲလၢ အဝဲမၤနၢၤတၢ်န့ၣ် မ့ၢ်လၢမူဟီၣ်ကယၢ တၢ်ပၢကစၢ် ယဟိဝၤယွၤ မၤစၢၤအီၤအဃိလီၤ. ဒီးစီၤကိရ့ၣ်စ့ၢ်ကီး ကြၢးနၢ်ပၢၢ်ဝဲလၢ ပှၤလၢအကိးအီၤ မ့တမ့ၢ် အဟ့ၣ်လီၤအီၤမူဒါန့ၣ် မ့ၢ်ပှၤအံၣ်စရ့လးဖိအယွၤ ယဟိဝၤယွၤလီၤ. လံာ်စီဆှံ ပာ်ဖျါထီၣ်ဝဲလၢ စီၤကိရ့ၣ် သ့ၣ်ညါဝဲလၢ အတၢ်မၤနၢၤဖးဒိၣ်အံၤန့ၣ် ဟဲလၢယဟိဝၤယွၤအအိၣ်လီၤ.—ဧ့စြၤ ၁:၂, ၃.
၉ တၢ်ဂ့ၢ်ခံမံတမံၤလၢ ယဟိဝၤယွၤ သူဝဲစီၤကိရ့ၣ်လၢ ကမၤနၢၤကွံာ် ဝ့ၢ်ဘၤဘူၤလိၣ်န့ၣ် မ့ၢ်ဝဲ– “လၢယခ့ယပှၤယၤကိာ်အဂီၢ်, ဒီးလၢပှၤလၢ ယဃုထၢအီၤ အံၣ်စရ့လးအဂီၢ်, ယကိးနၤလၢနမံၤ, ယကိးက့ၤနၤလၢနမံၤသီ, ဒီးနတသ့ၣ်ညါဘၣ်ယၤဘၣ်လီၤ.” (ယၡါယၤ ၄၅:၄) ခီဖျိလၢ စီၤကိရ့ၣ်မၤနၢၤ ဝ့ၢ်ဘၤဘူၤလိၣ်အဃိ ဟီၣ်ခိၣ်ဒီဘ့ၣ် ကမၢကမၣ်ဝဲလီၤ. တၢ်မၤအသးအံၤ မ့ၢ်တၢ်လၢအမၤလီၤကလဲကွံာ် ဘီမုၢ်လၢအဒိၣ်စိဟီၣ်ခိၣ်ဒီဘ့ၣ်တခါ ဒီးဒုးအိၣ်ထီၣ် ဘီမုၢ်လၢအဒိၣ်စိဟီၣ်ခိၣ်ဒီဘ့ၣ် အဂၤတခါဒီး ကဲထီၣ်တၢ်စံၣ်စိၤတဲစိၤတခါလၢ ပှၤဟီၣ်ခိၣ်ဖိလၢ အအိၣ်ဖျဲၣ်ထီၣ်လၢခံတဖၣ်အဂီၢ်လီၤ. ဒီးပှၤလၢအအိၣ်ခိးကွၢ် တၢ်မၤအသးအံၤ လၢတၢ်သူၣ်ကိၢ်သးဂီၤအပူၤတဖၣ် သ့ၣ်ညါဘၣ်ဝဲလၢ တၢ်မၤအသးအံၤ မ့ၢ်လၢပှၤယူဒၤဖိလၢ အဟဲလီၤစၢၤလီၤသွဲၣ်လၢ စီၤယၤကိာ်လၢ အဘၣ်တၢ်စိာ်မၢကဲကုၢ်အီၤလၢ ဝ့ၢ်ဘၤဘူၤလိၣ် ဒီးအနီၣ်ဂံၢ်အိၣ်ထဲအကထိလၢ “တအါဘၣ်” အဂီၢ်န့ၣ်လီၤ. ဒ်လဲၣ်ဂ့ၤ ဒ်လဲၣ်ဂ့ၤ လၢယဟိဝၤယွၤ အတၢ်ထံၣ်န့ၣ် ပှၤအံၣ်စရ့လးဖိလၢ အဟးထီၣ်လၢ ဝ့ၢ်ဘၤဘူၤလိၣ်န့ၣ် တမ့ၢ်ပှၤတဖၣ်လၢအ “တအါဘၣ်,” မ့ၢ်ဝဲ “အခ့အပှၤ” လီၤ. အဝဲသ့ၣ်မ့ၢ် ပှၤတကလုာ်လၢယွၤ “ဃုထၢအီၤ” လၢကယဲၢ်ပှၤကလုာ်တဖၣ်အကျါလီၤ. လၢအပူၤကွံာ်န့ၣ် စီၤကိရ့ၣ် တသ့ၣ်ညါဝဲ ယဟိဝၤယွၤဘၣ်ဆၣ် အဝဲကဲဘၣ်ပှၤလၢ ယွၤဃုထၢအီၤလၢ ကမၤဟးဂီၤကွံာ် ဝ့ၢ်လၢတအဲၣ်ဒိးပျဲလီၤ ပှၤလၢအဘၣ်တၢ်စိာ်မၢကဲကုၢ်အီၤတဖၣ်န့ၣ်လီၤ. ယဟိဝၤယွၤ တအဲၣ်ဒိးဝဲလၢ အပှၤကလုာ်လၢ အဃုထၢပာ်ဝဲတဖၣ် ကဘၣ်နးဘၣ်ဖှီၣ်လၢ ထံဂုၤကီၢ်ဂၤအပူၤ လီၤစိၤလီၤထီဘၣ်.
၁၀ တၢ်ဂ့ၢ်အရ့ဒိၣ် သၢထံၣ်တထံၣ်လၢ ယဟိဝၤယွၤဃုထၢထီၣ် စီၤကိရ့ၣ်လၢ ကမၤဟးဂီၤ ဝ့ၢ်ဘၤဘူၤလိၣ်န့ၣ် ယဟိဝၤယွၤ စံးဝဲဒ်အံၤ– “ယဲဒၣ်အံၤယမ့ၢ်ယွၤလီၤ. ဒီးအဂၤတအိၣ်ဘၣ်. လၢယၤအမဲာ်ညါ ကစၢ်တအိၣ်ဘၣ်. ယကကံၢ်တူာ်နယီၢ်ဒ့, ဒီးနတသ့ၣ်ညါဘၣ်ယၤဘၣ်, ၆ ဒ်သိးပှၤကသ့ၣ်ညါလၢ မုၢ်ထီၣ်ပၢၢ်လၢမုၢ်နုာ်န့ၣ် လၢယၤအမဲာ်ညါ တၢ်တအိၣ်ဘၣ်, ယမ့ၢ်ယွၤ, ဒီးအဂၤတအိၣ်ဘၣ်.” (ယၡါယၤ ၄၅:၅, ၆) ဘၤဘူၤလိၣ် အတၢ်ပၢတၢ်ပြး ဟးဂီၤကွံာ်န့ၣ် ပာ်ဖျါထီၣ်ဝဲ ယဟိဝၤယွၤ အစိကမီၤဒီး အဝဲမ့ၢ်ပှၤထဲတဂၤဧိၤလၢ ပှၤဟီၣ်ခိၣ်ဖိခဲလၢာ် ကြၢးဘူၣ်ထီၣ်ဘါထီၣ်အီၤလီၤ. ခီဖျိလၢ ကစၢ်ယွၤ အပှၤကလုာ်တဖၣ် ပူၤဖျဲးထီၣ်အဃိ ပှၤတဂၤစုာ်စုာ်လၢ အအိၣ်လၢမုၢ်ထီၣ် တုၤလၢမုၢ်နုာ်န့ၣ် ကသ့ၣ်ညါဘၣ်ဝဲလၢ ယဟိဝၤယွၤမ့ၢ် ယွၤအမ့ၢ်အတီထဲတဂၤဧိၤလီၤ.—မၤလကံ ၁:၁၁.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ယၡါယၤ ၄၃:၁၀-၁၂) သုဝဲဒၣ်အံၤ သုမ့ၢ်ယတၢ်အုၣ်အသး, ယွၤစံးဝဲဒၣ်, ဒီးယခ့ယပှၤလၢ ယဃုထၢအီၤ, ဒ်သိးသုကသ့ၣ်ညါ, ဒီးနာ်က့ၤယွၤ, ဒီးနၢ်ပၢၢ်လၢယမ့ၢ်အဝဲဒၣ်လီၤ. လၢယဂံၢ်ခိၣ်န့ၣ် ကစၢ် တဒိးတ့ဘၣ်အသး နီတဂၤဘၣ်, ဒီးလၢယလီၢ်ခံန့ၣ် တအိၣ်ဘၣ်လီၤ. ၁၁ ယဲဒၣ်အံၤ, ယမ့ၢ်ယွၤလီၤ. ဒီးလၢယၤ အမဲာ်ညါန့ၣ် တၢ်အုၣ်က့ၤခီၣ်က့ၤတအိၣ်ဘၣ်. ၁၂ ယဒုးနဲၣ်တၢ်, ဒီးယအုၣ်က့ၤခီၣ်က့ၤတၢ်, ဒီးယဒုးနၢ်ဟူတၢ်, ဒီးပှၤတခီဘီမုၢ်ဖိ တအိၣ်ဘၣ်လၢသုကျါဘၣ်, ဒီးသုမ့ၢ်ယတၢ်အုၣ်အသး, ယွၤစံးဝဲဒၣ်, ဒီးယဲဒၣ်အံၤ, ယမ့ၢ်ယွၤလီၤ.
တၢး၁၄ ၁၁/၁၅ ကဘျံးပၤ ၂၁-၂၂ အဆၢ ၁၄-၁၆
“ပှၤတကလုာ်လၢ ယွၤမ့ၢ်အကစၢ်”
ပှၤတကလုာ်လၢ ကမ့ၢ်ပှၤအုၣ်အသး
၁၄ ဖဲကလုာ်အဂၤတဖၣ် ဘူၣ်ထီၣ်ဘါထီၣ်အယွၤအခါ ပှၤအံၣ်စရ့လးဖိတဖၣ် ဘူၣ်ထီၣ်ဘါထီၣ်ဝဲ အကစၢ်ယဟိဝၤယွၤလီၤ. ဖဲဝံယၡါယၤအစိၤန့ၣ် ယဟိဝၤယွၤ ထိၣ်သတြီၤဝဲ တၢ်မၤအသးအံၤ ဒ်ပှၤထီၣ်ရူအသိးန့ၣ်လီၤ. အဝဲတဲဝဲလၢ ပှၤကလုာ်အဂၤတဖၣ် အကစၢ်ယွၤ မ့မ့ၢ်ယွၤအမ့ၢ်အတီန့ၣ် မၢအဟဲကိး ပှၤအုၣ်အသးတက့ၢ်. ယဟိဝၤယွၤတဲဝဲလၢ “မ်ပှၤကလုာ်ခဲလၢာ်န့ၣ် အိၣ်ဖှိၣ်ရိဖှိၣ်, ဒီးမ်တၢ်ဒုးအိၣ်ဖှိၣ်ပှၤဂီၢ်မုၢ်တက့ၢ်. မ့ၢ်မတၤလၢအကျါန့ၣ် ကဒုးနဲၣ်တၢ်အံၤတဂၤလဲၣ်. ဒုးနၢ်ဟူပှၤလၢ တၢ်လၢအခီၣ်ထံးတဖၣ်န့ၣ်တက့ၢ်. မ်အပာ်လီၤ အတၢ်အုၣ်အသး, ဒီးဒိးတၢ်ပာ်တီအီၤတက့ၢ်. မ့တမ့ၢ်ဘၣ်ဒီး, မ်အကနၣ်တၢ်ဒီးစံး, မ့ၢ်ဝဲတီဝဲလီၤန့ၣ်တက့ၢ်.”—ယၡါယၤ ၄၃:၉.
၁၅ ကလုာ်အဂၤတဖၣ် အကစၢ်ယွၤန့ၣ် ပာ်ဖျါထီၣ်အသးလၢ အမ့ၢ်ယွၤအမ့ၢ်အတီတသ့ဘၣ်. အဝဲသ့ၣ်မ့ၢ် တၢ်ဂီၤလၢအတဲတၢ်တသ့ ဒီးအဟူးဂဲၤတသ့ဘၣ်လီၤ. (ယၡါယၤ ၄၆:၅-၇) မ့မ့ၢ် ယဟိဝၤယွၤန့ၣ် တဲဝဲအပှၤကလုာ်တဖၣ်လၢ– “သုဝဲဒၣ်အံၤ သုမ့ၢ်ယတၢ်အုၣ်အသး, . . . ဒီးယခ့ယပှၤလၢ ယဃုထၢအီၤ, ဒ်သိးသုကသ့ၣ်ညါ, ဒီးနာ်က့ၤယွၤ, ဒီးနၢ်ပၢၢ်လၢ ယမ့ၢ်အဝဲဒၣ်လီၤ. လၢယဂံၢ်ခိၣ်န့ၣ် ကစၢ်တဒိးတ့ဘၣ်အသးနီတဂၤဘၣ်, ဒီးလၢယလီၢ်ခံန့ၣ်တအိၣ်ဘၣ်လီၤ. ယဲဒၣ်အံၤ, ယမ့ၢ်ယွၤလီၤ. ဒီးလၢယၤအမဲာ်ညါန့ၣ် တၢ်အုၣ်က့ၤခီၣ်က့ၤတအိၣ်ဘၣ် . . . . ဒီးသုမ့ၢ် ယတၢ်အုၣ်အသး, . . . ဒီးယဲဒၣ်အံၤ, ယမ့ၢ်ယွၤလီၤ.”—ယၡါယၤ ၄၃:၁၀-၁၂.
၁၆ ယဟိဝၤယွၤ အခ့အပှၤတဖၣ် လီၤဂာ်ဒ်ပှၤအုၣ်အသးလၢရူပူၤဒီး အိၣ်ဒီးတၢ်ခွဲးတၢ်ယာ်လၢ ကတဲဖျါထီၣ်ဝဲလၢ ယဟိဝၤယွၤမ့ၢ် “ယွၤလၢအမ့ၢ်အတီ” လီၤ. လၢတၢ်န့ၣ်အဃိ ယဟိဝၤယွၤ ကိးအဝဲသ့ၣ်လၢ– “ပှၤတကလုာ်အံၤ ယတ့လီၤလၢယဂီၢ်ဒၣ်ယဲ, ကစံၣ်တဲၤတဲလီၤ ယတၢ်စံးထီၣ်ပတြၢၤလီၤ.” (ယၡါယၤ ၄၃:၂၁) အဝဲသ့ၣ် ဟံးန့ၢ်ဝဲ ယဟိဝၤယွၤ အမံၤလီၤ. ယဟိဝၤယွၤ မၤထူၣ်ဖျဲးထီၣ် အဝဲသ့ၣ်လၢ ကီၢ်အဲၤကူပတူးအဃိ ကစၢ်ယွၤ မုၢ်လၢ်ဝဲလၢ အဝဲသ့ၣ် ကမၤလၤကပီၤအီၤဒ် အတၢ်ပၢကစၢ်အသိး ဒီးကဒိကနၣ်အကလုၢ်လီၤ. မုၢ်မဆါတနံၤအံၤစ့ၢ်ကီး ယဟိဝၤယွၤ မုၢ်လၢ်တၢ်လၢ အပှၤဂီၢ်မုၢ်တဖၣ်အအိၣ်ဒ်န့ၣ်လီၤ. ကစၢ်ယွၤ အခ့အပှၤတဖၣ် ကြၢးမၤဝဲဒ်လဲၣ်န့ၣ် ဝံမံကၤ ပာ်ဖျါထီၣ်ဝဲလၢ– “ပှၤဂီၢ်မုၢ်ခဲလၢာ် လဲၤတၢ်တဂၤလၢ အကစၢ် အမံၤပူၤစုာ်စုာ်, ဒီးပကလဲၤတၢ်ပဝဲလၢ ယွၤပကစၢ် အမံၤပူၤ လီၤထူလီၤယိာ်လီၤ.”—မံကၤ ၄:၅.
(ယၡါယၤ ၄၃:၂၅) ယဲဒၣ်အံၤယတြူာ်ကွံာ် နတၢ်သရူးတၢ်ကမၣ် လၢယဂီၢ်ဒၣ်ယဲလီၤ. ယတသ့ၣ်နီၣ်ထီၣ်က့ၤဘၣ် နတၢ်ဒဲးဘးဘၣ်.
ip-2 ကဘျံးပၤ ၆၀ အဆၢ ၂၄
“သုမ့ၢ်ယတၢ်အုၣ်အသး”
၂၄ ဘၣ်ဆၣ် ပာ်သူၣ်ပာ်သးလၢ ယဟိဝၤယွၤ ပာ်ဖျါထီၣ်တၢ်သးကညီၤလၢ ပှၤအံၣ်စရ့လးဖိတဖၣ် အဖီခိၣ်န့ၣ် တမ့ၢ်ထဲလၢ အဝဲသ့ၣ်ပီၢ်ယၢ်လီၤအသးအဃိဘၣ်. မ့ၢ်လၢအမံၤအဂီၢ်စ့ၢ်ကီးလီၤ. ကစၢ်ယွၤ မ့ၢ်စူးကွံာ်ညိကွံာ် ပှၤအံၣ်စရ့လးဖိဒီး စံၣ်ညီၣ်အီၤလၢ ကကဲကုၢ်လီၤထူလီၤယိာ်န့ၣ် ပှၤလၢအခိၣ်အဃၢၤတဖၣ် ကဒုၣ်ဒွဲၣ်စံးအၢယွၤအမံၤလီၤ. (စံးထီၣ်ပတြၢၤ ၇၉:၉; ယဃ့းစက့လး ၂၀:၈-၁၀) ဒ်န့ၣ်အသိး မုၢ်မဆါတနံၤအံၤ စ့ၢ်ကီး ယဟိဝၤယွၤ ကအုၣ်က့ၤခီၣ်က့ၤ ပှၤဟီၣ်ခိၣ်ဖိတဖၣ် ဘၣ်ဆၣ် အဝဲအမံၤ ကဘၣ်တၢ်ပာ်စီဆှံအီၤဒီး ပှၤကသ့ၣ်ညါလၢ မ့ၢ်တၢ်ပၢကစၢ်နီၢ်နီၢ်န့ၣ် မ့ၢ်တၢ်လၢအရ့ဒိၣ်ကတၢၢ်လီၤ. ဒ်လဲၣ်ဂ့ၤ ဒ်လဲၣ်ဂ့ၤ ယဟိဝၤယွၤ အဲၣ်ဝဲပှၤလၢ အတူၢ်လိာ်အတၢ်သိၣ်က့ၤသီက့ၤနီၢ်နီၢ်ဒီး ပှၤလၢ အဘူၣ်ထီၣ်ဘါထီၣ်အီၤလၢ သးဒီး တၢ်မ့ၢ်တၢ်တီလီၤ. ပမ့မ့ၢ်ပှၤလၢအဘၣ် တၢ်ဒိးဖှူအီၤမ့ၢ်ဂ့ၤ, သိလၢအဂုၤအဂၤမ့ၢ်ဂ့ၤ, ယဟိဝၤယွၤအဲၣ်ပှၤန့ၣ် ပာ်ဖျါထီၣ်ဝဲခီဖျိ ပျၢ်ကွံာ်ပတၢ်ကမၣ်လၢ အဖိခွါယ့ၣ်ၡူးခရံာ် အတၢ်ဟ့ၣ်လုၢ်ထီၣ်အသးအဃိလီၤ.—ယိၤဟၣ် ၃:၁၆; ၄:၂၃, ၂၄.
တၢ်ဖးလံာ်စီဆှံ
(ယၡါယၤ ၄၆:၁-၁၃) ဘ့လးကိာ်လီၤ, နဘိသကူးအသး, အတၢ်ဂီၤတၢ်ဖီၣ်န့ၣ် ဘၣ်တၢ်ပာ်အီၤလၢ ဆၣ်ဖိကီၢ်ဖိအလိၤ, ဒီးဆၣ်ဖိကီၢ်ဖိ အဒၢအလိၤလီၤ. သုတၢ်ဝံတၢ်ယိးကတဲာ်ကတီၤလံ, တၢ်ပဒၢးလၢ ဆၣ်ဖိကီၢ်ဖိလၢ တၢ်ဘှံးအသးအဂီၢ်လီၤ. ၂ သကူးအသး, ကိာ်လီၤဝဲတပူၤဃီလီၤ. မၤပူၤဖျဲး တၢ်ပဒၢးတသ့ဘၣ်. လဲၤဝဲဆူတၢ်မၢကဲကုၢ်အပူၤ အကစၢ်ဒၣ်ဝဲလီၤ. ၃ ကနၣ်ယကလုၢ်တက့ၢ်, ယၤကိာ် အပှၤဟံၣ်ဖိ, ဒီးကယဲၢ်ပှၤလၢ အအိၣ်လီၤတဲာ်လၢ အံၣ်စရ့လးအပှၤဟံၣ်ဖိခဲလၢာ်, ပှၤလၢယစိာ်အီၤလၢ ပှၤအဟၢဖၢပူၤလံၤလံၤ, လၢအဘၣ်တၢ်စိာ်အီၤလၢ အမိၢ်ဒၢလီၢ်လံၤလံၤသ့ၣ်ဧၢ. ၄ ဒီးယမ့ၢ် အဝဲဒၣ် တုၤလီၤသုသးပှၢ်, ဒီးတုၤသုခိၣ်ဝါ, ယကစိာ်သုလီၤ. ယဲဒၣ်ယမၤတ့ၢ်, ဒီးယကစိာ်တၢ်, မ့ၢ်မး ယကဝံတၢ်ယိးတၢ်, ဒီးယကမၤပူၤဖျဲးတၢ်လီၤ. ၅ သုကဒိလီၤယၤ, ဒီးပာ်ဒ်သိးသိးဒီးယၤ, ဒီးပာ်သတြီၤယၤဒီး မတၤတဂၤ, ဒ်သိးပကလီၤဂာ်လိာ်ပသးန့ၣ်လဲၣ်. ၆ ပှၤလၢအတသးလီဘၣ် ထူလၢထၢၣ်ပူၤ, ဒီးစီၤစ့လၢ စီၤပီၢ်စီၤရွဲၤ, အဝဲသ့ၣ်ငါပှၤပိာ်ထူ, ဒီးအဝဲဒၣ်တ့ကစၢ်လၢအီၤလီၤ. တီၤလီၤဝဲ, မ့ၢ်မးဘူၣ်ထီၣ်ဘါထီၣ်အီၤလီၤ. ၇ ယိးဝဲလၢ အဖံဘၣ်ခိၣ်, ဒီးစိာ်အီၤ, ပာ်အီၤလၢအလီၢ်ဒၣ်ဝဲ, ဒီးအိၣ်ထူၣ်ကလာ်ဖဲန့ၣ်လီၤ. တသုးဘၣ်အသးလၢ အလီၢ်ဘၣ်. ဒီးပှၤကိးထီၣ်ဆူအအိၣ်, ဘၣ်ဆၣ်ဒီးတစံးဆၢဘၣ်, ဒီးတအုၣ်က့ၤခီၣ်က့ၤအီၤလၢ အတၢ်ကိၢ်တၢ်ဂီၤအပူၤဘၣ်လီၤ. ၈ သ့ၣ်နီၣ်ထီၣ်က့ၤတၢ်န့ၣ်, ဒီးဒုးနဲၣ်သုသးလၢ သုမ့ၢ်ပှၤကညီန့ၣ်တက့ၢ်. တိၢ်န့ၢ်လၢသုသး, ပှၤလၢအသးဟးဂီၤသ့ၣ်ဧၢ. ၉ သ့ၣ်နီၣ်ထီၣ်က့ၤ တၢ်လၢအခီၣ်ထံး လၢပျၢၤန့ၣ်တက့ၢ်. အဂ့ၢ်ဒ်အံၤ, ယမ့ၢ်ကစၢ်, ဒီးအဂၤတအိၣ်ဘၣ်, ယွၤ, ဒီးတၢ်လီၤဂာ်လၢယၤတအိၣ်ဘၣ်. ၁၀ လၢအခီၣ်ထံး ယဒုးနဲၣ်တၢ် တုၤအကတၢၢ်, ဒီးလၢပျၢၤလံၤလံၤန့ၣ် တၢ်လၢအတမၤဒံးဘၣ် အသးဘၣ်, ဒီးယစံး, တၢ်လၢယတိာ်န့ၣ် ကအိၣ်ကျၢၤဝဲ, ဒီးကယဲၢ်တၢ်ဘၣ်ယသးန့ၣ် ယကမၤခဲလၢာ်လီၤ. ၁၁ ယကိးလံာ်ဖးဒိၣ်တဘ့ၣ်လၢ မုၢ်ထီၣ်တခီ, ဒီးပှၤလၢအမၤယကူၣ်ထီၣ်တၢ်တဂၤန့ၣ် လၢထံယံၤကီၢ်ယံၤလီၤ. ယကတိၤတ့ၢ်, မ့ၢ်မးယကမၤအိၣ်ထီၣ်, ယတိာ်တၢ်, မ့ၢ်မးယကဒုးမၤအသးလီၤ. ၁၂ ကနၣ်ယကလုၢ်တက့ၢ်, ပှၤလၢအသးကီလၢ အအိၣ်ယံၤဒီး တၢ်တီတၢ်လိၤသ့ၣ်ဧၢ, ၁၃ ယဒုးဟဲဘူးယတၢ်တီတၢ်လိၤ, တအိၣ်ဘၣ်လၢ အယံၤဘၣ်, ဒီးယတၢ်အုၣ်က့ၤခီၣ်က့ၤတၢ်န့ၣ် တသုးနံၤသုးသီဘၣ်. ဒီးယကပာ်လီၤ ယတၢ်အုၣ်က့ၤခီၣ်က့ၤလၢ စံယိၣ်အပူၤ, ယလၤကပီၤလၢ အံၣ်စရ့လးအလိၤလီၤ.