ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါဖ့ၤဘြူၤအါရံၤ ၆–၁၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယၡါယၤ ၄၇-၅၁
“တၢ်ဒိကနၣ် ယဟိဝၤယွၤ အကလုၢ်န့ၣ်ဒုးအိၣ်ထီၣ် တၢ်ဆိၣ်ဂ့ၤ”
(ယၡါယၤ ၄၈:၁၇) ပှၤပှ့ၤက့ၤနၤ, အံၣ်စရ့လးအတၢ်စီဆှံယွၤစံးဒ်အံၤ, ယဲဒၣ်အံၤ, ယမ့ၢ်ယွၤ, နကစၢ်လၢအသိၣ်လိနၤ ဒ်သိးနကဘၣ်ဘျုးဘၣ်ဖှိၣ်, ဒီးယဒုးလဲၤနၤလၢကျဲလၢနဂ့ၤလဲၤန့ၣ်လီၤ.
ip-2 ကဘျံးပၤ ၁၃၁ အဆၢ ၁၈
ယဟိဝၤယွၤ သိၣ်လိပှၤလၢပကဒိးန့ၢ်ဘၣ် အဘျုးအဂီၢ်
“နကနၣ်တ့ၢ် ယတၢ်မၤလိာ်”
၁၈ ခီဖျိလၢ ယဟိဝၤယွၤ အသးစီဆှံအဃိ ဝံတဂၤအံၤစံးဝဲလၢ– “ခဲကနံၣ်အံၤ ကစၢ်ယွၤမၢလီၤယၤဒီးအသးလီၤ. ပှၤပှ့ၤက့ၤနၤ, အံၣ်စရ့လးအတၢ်စီဆှံယွၤစံးဒ်အံၤ, ယဲဒၣ်အံၤ, ယမ့ၢ်ယွၤ, နကစၢ်လၢအသိၣ်လိနၤ ဒ်သိးနကဘၣ်ဘျုးဘၣ်ဖှိၣ်, ဒီးယဒုးလဲၤနၤလၢကျဲလၢနဂ့ၤလဲၤန့ၣ်လီၤ.” (ယၡါယၤ ၄၈:၁၆ခ, ၁၇) တၢ်ကတိၤလၢ အပာ်ဖျါထီၣ်ဝဲ ယဟိဝၤယွၤ အတၢ်ကဟုကယာ်အံၤ ကြၢးထိၣ်ဟူးထိၣ်ဂဲၤထီၣ် ပှၤအံၣ်စရ့လးဖိတဖၣ်လၢ ကနာ်ဝဲလၢ ယဟိဝၤယွၤ ကမၤထူၣ်ဖျဲးထီၣ်အီၤလၢ ဝ့ၢ်ဘၤဘူၤလိၣ်အပူၤလီၤ. ယဟိဝၤယွၤမ့ၢ် ပှၤလၢအပှ့ၤက့ၤအီၤလီၤ. (ယၡါယၤ ၅၄:၅) ယဟိဝၤယွၤအဲၣ်ဒိးလၢ ပှၤအံၣ်စရ့လးဖိတဖၣ် ကမၤဂ့ၤထီၣ်က့ၤ အတၢ်ရ့လိာ်သးဒီးအီၤ ဒီးကဒိကနၣ်အကလုၢ်လီၤ. တၢ်ဘူၣ်ထီၣ်ဘါထီၣ်တၢ် အမ့ၢ်အတီန့ၣ် ဒိးသန့ၤထီၣ်အသးလၢ ကစၢ်ယွၤ အတၢ်ဟံးစုနဲၣ်ကျဲအဖီခိၣ်လီၤ. ပှၤအံၣ်စရ့လးဖိတဖၣ် မ့ၢ်တဘၣ်တၢ် သိၣ်လိအီၤဒ်သိးကလဲၤ ‘ကျဲလၢအဂ့ၤလဲၤန့ၣ်’ အဝဲသ့ၣ် လဲၤဒၣ်အတၢ်လၢ ကျဲလၢအဘၣ် တသ့ဝဲဘၣ်.
(ယၡါယၤ ၄၈:၁၈) အိ, မ်နကနၣ်တ့ၢ်ယတၢ်မၤလိာ်တက့ၢ်. မ့မ့ၢ်ဒ်န့ၣ်ဒီးနတၢ်ဃူတၢ်ဖိး ကမၤသးဒ်ထံမိၢ်ပှၢ်အသိး, ဒီးနတၢ်တီတၢ်လိၤ ဒ်ပီၣ်လဲၣ်အလပီအသိးန့ၣ်လီၤ.
ip-2 ကဘျံးပၤ ၁၃၁ အဆၢ ၁၉
ယဟိဝၤယွၤ သိၣ်လိပှၤလၢပကဒိးန့ၢ်ဘၣ် အဘျုးအဂီၢ်
၁၉ ယဟိဝၤယွၤ တအဲၣ်ဒိးလၢ အပှၤဂီၢ်မုၢ်တဖၣ် ကထံၣ်တၢ်ကီတၢ်ခဲဘၣ်. ဘၣ်ဃးဒီး အဝဲအဲၣ်ဒိးလၢ အပှၤဂီၢ်မုၢ်တဖၣ် ပှဲၤဒီးတၢ်သူၣ်ဖှံသးညီန့ၣ် တဲဝဲဒၣ်လၢ– “အိ, မ်နကနၣ်တ့ၢ်ယတၢ်မၤလိာ်တက့ၢ်. မ့မ့ၢ်ဒ်န့ၣ်ဒီးနတၢ်ဃူတၢ်ဖိး ကမၤသးဒ်ထံမိၢ်ပှၢ်အသိး, ဒီးနတၢ်တီတၢ်လိၤ ဒ်ပီၣ်လဲၣ်အလပီအသိးန့ၣ်လီၤ.” (ယၡါယၤ ၄၈:၁၈) မ့ၢ်သ့တၢ်လၢာ် တၢ်ဘၣ်တ့ကစၢ် အတၢ်ကွဲမုာ်လၢ အလီၤဘၣ်သူၣ်ဘၣ်သးလီၤ. (၅ မိၤၡ့ ၅:၂၉; စံးထီၣ်ပတြၢၤ ၈၁:၁၃) လၢပှၤအံၣ်စရ့လးဖိတဖၣ် ကကဲကုၢ်အလီၢ် အဝဲသ့ၣ်အိၣ်ဒီး တၢ်ဃူတၢ်ဖိး ဒ်ထံကျိဖိလၢ အယွၤလီၤအသိးသ့ဝဲလီၤ. (စံးထီၣ်ပတြၢၤ ၁၁၉:၁၆၅) ဒီးအဝဲသ့ၣ် အတၢ်တီတၢ်လိၤတဖၣ် အါဝဲဒ် ပီၣ်လဲၣ်အလပီတဖၣ်အသိးသ့ဝဲလီၤ. (ဧၤမိၣ် ၅:၂၄) ယဟိဝၤယွၤ အဲၣ်ဒိးလၢ အပှၤဂီၢ်မုၢ်တဖၣ် ကအိၣ်ဘၣ်ဝဲဒ်န့ၣ်အဃိ အဝဲကွဲမုာ်ဝဲလၢ ကပိာ်ကျဲလၢအဂ့ၤလဲၤဝဲန့ၣ်လီၤ. အဝဲသ့ၣ် မ့ၢ်အိၣ်ဒီးတၢ်ဒိကနၣ်န့ၣ် ကဂ့ၤဆံးဒိၣ်လဲၣ်.
(ယၡါယၤ ၄၈:၁၉) ဒီးနချံနသၣ်ကမၤသးဒ် မဲးဧိၤဟီၣ်ဧိၤအသိး, ဒီးနစၢၤနသွဲၣ်, ဒ်အဖျၢၣ်တဖၣ်အသိးန့ၣ်လီၤ. တၢ်တဒီၣ်တဲာ်ဘၣ်, ဒီးတမၤဟးဂီၤဘၣ်အမံၤ လၢယမဲာ်ညါဘၣ်.
ip-2 ကဘျံးပၤ ၁၃၂ အဆၢ ၂၀-၂၁
ယဟိဝၤယွၤ သိၣ်လိပှၤလၢပကဒိးန့ၢ်ဘၣ် အဘျုးအဂီၢ်
၂၀ ပှၤအံၣ်စရ့လးဖိတဖၣ် မ့ၢ်ပီၢ်ယၢ်လီၤက့ၤအသးန့ၣ် ကဒိးန့ၢ်ဘၣ် တၢ်ဆိၣ်ဂ့ၤမနုၤတဖၣ်လဲၣ်. ယဟိဝၤယွၤ စံးဝဲလၢ– “ဒီးနချံနသၣ်ကမၤသးဒ် မဲးဧိၤဟီၣ်ဧိၤအသိး, ဒီးနစၢၤနသွဲၣ်, ဒ်အဖျၢၣ်တဖၣ်အသိးန့ၣ်လီၤ. တၢ်တဒီၣ်တဲာ်ဘၣ်, ဒီးတမၤဟးဂီၤဘၣ်အမံၤလၢ ယမဲာ်ညါဘၣ်.” (ယၡါယၤ ၄၈:၁၉) ယဟိဝၤယွၤ ဒုးသ့ၣ်နီၣ်ထီၣ်က့ၤ အပှၤကလုာ်တဖၣ်လၢ စီၤအၤဘြၤဟၣ် အစၢၤအသွဲၣ် ကအါထီၣ် “ဒ်ဆၣ်ဧိၤဖီဧိၤလၢ မူခိၣ်အသိး, ဒီးမဲးဧိၤဟီၣ်ဧိၤလၢ ပီၣ်လဲၣ်နံၤအသိးန့ၣ်လီၤ.” (၁ မိၤၡ့ ၂၂:၁၇; ၃၂:၁၂) ဘၣ်ဆၣ် ကလုာ်ဒူၣ်လၢ အဟဲလီၤစၢၤလီၤသွဲၣ်လၢ စီၤအၤဘြၤဟၣ်န့ၣ် ပူထီၣ်ယွၤအဃိ အဝဲသ့ၣ် တဒိးန့ၢ်ဘၣ် တၢ်ဆိၣ်ဂ့ၤလၢ တၢ်စံးပာ်အံၤဘၣ်. ပမ့ၢ်ကွၢ်လၢ စီၤမိၤၡ့ အတၢ်သိၣ်တၢ်သီန့ၣ် အဝဲသ့ၣ် ကြၢးဒိးန့ၢ်ဘၣ် မံၤလၢအအၢအသီ တုၤဒၣ်လဲာ် အကလုာ်ဒူၣ်အမံၤ ကြၢးဘၣ်တၢ်ဒီၣ်တဲာ်ကွံာ်အီၤလီၤ. (၅ မိၤၡ့ ၂၈:၄၅) ဘၣ်ဆၣ် ယဟိဝၤယွၤတအဲၣ်ဒိး မၤလီၤမၢ်ကွံာ်အပှၤကလုာ်ဒီး စူးကွံာ်အဝဲသ့ၣ်ဘၣ်.
၂၁ တၢ်ဘျၢအံၤ ဘၣ်ထွဲလိာ်အသးဒီး ပှၤလၢအဘူၣ်ထီၣ်ဘါထီၣ် ယဟိဝၤယွၤလၢ မုၢ်မဆါတနံၤအံၤစ့ၢ်ကီးလီၤ. ဒီးအဝဲမ့ၢ် သးသမူအဂံၢ်ခီၣ်ထံးအဃိ ပကဘၣ်သူပတၢ်အိၣ်မူဒ်လဲၣ်န့ၣ် အဝဲသ့ၣ်ညါဝဲအါန့ၢ်ပှၤ ကိးဂၤဒဲးလီၤ. (စံးထီၣ်ပတြၢၤ ၃၆:၉) အဝဲဟ့ၣ်ပှၤ တၢ်ဟံးစုနဲၣ်ကျဲန့ၣ် တမ့ၢ်လၢကမၤသးအုးပှၤအဂီၢ်ဘၣ်, မ့ၢ်လၢပကဒိးန့ၢ်ဘၣ်အဘျုးအဂီၢ်လီၤ. ခရံာ်ဖိနီၢ်နီၢ်တဖၣ် စံးဘျုးယဟိဝၤယွၤ ခီဖျိဃုဝဲအတၢ်ဟံးစုနဲၣ်ကျဲလီၤ. (မံကၤ ၄:၂) ဒီးအဝဲအတၢ်ဟံးစုနဲၣ်ကျဲန့ၣ် ဒီသဒၢ ပတၢ်ရ့လိာ်သးဒီးအီၤ တကးဒံးဘၣ် ဒီသဒၢပှၤလၢ မုၣ်ကီၤလံၢ် အတၢ်ကွဲန့ၢ်လွဲန့ၢ်တဖၣ်လီၤ. ဖဲပပာ်လုၢ်ပာ်ပှ့ၤ ယဟိဝၤယွၤ အတၢ်ဘျၢတဖၣ်အခါ ပသ့ၣ်ညါထီၣ်လၢ ယဟိဝၤယွၤ သိၣ်လိပှၤလၢ ပကဒိးန့ၢ်ဘၣ် အဘျုးအဂီၢ်လီၤ. ဒီးပသ့ၣ်ညါဘၣ်လၢ “အတၢ်မၤလိာ်န့ၣ် တကီတခဲဘၣ်လီၤ.” ဒီးပတတုၤလၢ တၢ်ဟးဂီၤဘၣ်.—၁ ယိၤဟၣ် ၂:၁၇; ၅:၃.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ယၡါယၤ ၄၉:၆) ဒီးစံးဝဲဒၣ်, လၢနကကဲထီၣ်ယခ့ယပှၤ ဒ်သိးနကဒုးဂဲၤဆၢထၢၣ်ယၤကိာ်အဒူၣ်တဖၣ်, ဒီးဒုးဟဲက့ၤပှၤလၢ အအိၣ်ဒံးလၢအံၣ်စရ့လးအကျါန့ၣ် မ့ၢ်တၢ်ဆံးကဲၣ်ဆိးလီၤ. ဒီးယကပာ်နၤလၢ တၢ်ကပီၤလၢပှၤကလုာ်တဖၣ်အဂီၢ်, ဒ်သိးနကကဲထီၣ် ယတၢ်အုၣ်က့ၤခီၣ်က့ၤ ပၢၢ်လၢဟီၣ်ခိၣ်အကတၢၢ်န့ၣ်လီၤ.
တၢး၀၇ ၁/၁၅ ကဘျံးပၤ ၉ အဆၢ ၈
လံာ်စီဆှံ အတၢ်ပာ်ဖျါလၢ လံာ်ယၡါယၤ—၂
၄၉:၆—မ့းၡံအၤ စံၣ်တဲၤတဲလီၤတၢ်ထဲလၢ ပှၤအံၣ်စရ့လးဖိတဖၣ် အကျါသနာ်က့ အဝဲကဲထီၣ် “တၢ်ကပီၤလၢ ပှၤကလုာ်တဖၣ်” အဂီၢ်လၢကျဲဒ်လဲၣ်. မ့ၢ်လၢတၢ်မၤအသးဖဲ ယ့ၣ်ၡူးသံဝံၤ အလီၢ်ခံအဃိလီၤ. လံာ်စီဆှံပာ်ဖျါဝဲလၢ ဝံယၡါယၤ ၄၉:၆ န့ၣ်ဘၣ်ထွဲလိာ်အသးဒီး ယ့ၣ်ၡူးအပျဲၢ်အဘီၣ်တဖၣ် စ့ၢ်ကီးလီၤ. (မၤတၢ် ၁၃:၄၆, ၄၇) မုၢ်မဆါတနံၤအံၤ ခရံာ်ဖိလၢ အဘၣ်တၢ်ဒိးဖှူအီၤတဖၣ် မၤတၢ်ဒ် “ပှၤကလုာ်တဖၣ် အတၢ်ကပီၤ” ဒီးဟ့ၣ်ထီၣ် တၢ်ကပီၤလၢ “ဟီၣ်ခိၣ်ဒီဘ့ၣ်ညါ,” ဒီးပှၤဂီၢ်မုၢ်ဖးဒိၣ် မၤစၢၤအဝဲသ့ၣ်လီၤ.—မးသဲ ၂၄:၁၄; ၂၈:၁၉, ၂၀.
(ယၡါယၤ ၅၀:၁) ယွၤစံးဒ်အံၤ, သုမိၢ်လၢယပာ်မၢ်အီၤတဂၤ အလံာ်လီၤဖှၣ်တဘ့ၣ်န့ၣ် အိၣ်ဖဲလဲၣ်. ဒီးယဆါကွံာ်သုလၢ ယကမၢ်အကစၢ်ဖဲလဲၣ်တဂၤလဲၣ်. ကွၢ်ကွၢ်, သုဘၣ်တၢ်ဆါကွံာ်သုလၢ သုတၢ်အၢအဃိ, ဒီးသုမိၢ်ဘၣ်တၢ်ပာ်မၢ်အီၤလၢ သုတၢ်ကမၣ်အဃိလီၤ.
it-1 ကဘျံးပၤ ၆၄၃ အဆၢ ၄-၅
တၢ်မၤကတၢၢ် တၢ်ဆီဟံၣ်ဆီဃီ
တၢ်အဒိလၢ ဘၣ်ဃးဒီး တၢ်မၤကတၢၢ် တၢ်ဆီဟံၣ်ဆီဃီ. လံာ်စီဆှံပူၤ ပာ်ဖျါထီၣ်ဝဲ တၢ်အဒိလၢ ဘၣ်ဃးဒီး တၢ်ဆီဟံၣ်ဆီဃီလီၤ. (ယၡါယၤ ၅၄:၁, ၅, ၆; ၆၂:၁-၆) ဒီးပာ်ဖျါထီၣ်ဝဲ တၢ်အဒိလၢ ဘၣ်ဃးဒီး တၢ်မၤကတၢၢ်ကွံာ် တၢ်ဆီဟံၣ်ဆီဃီ မ့တမ့ၢ် တၢ်ပာ်မၢ်ကွံာ်မါန့ၣ်လီၤ.—ယံးရမံယၤ ၃:၈.
ဖဲ ချ.ခ.န ၆၀၇ ယူဒၤအဘီအမုၢ်လီၤပှီၢ်ဒီး ဝ့ၢ်ယရူၤၡလ့ၣ် ဘၣ်တၢ်မၤဟးဂီၤကွံာ်အီၤအခါ ပှၤအိၣ်လၢဝ့ၢ်ပူၤတဖၣ် ဘၣ်တၢ်စိာ်မၢကဲကုၢ်အီၤဆူ ဝ့ၢ်ဘၤဘူၤလိၣ်လီၤ. တချုးလၢတၢ်မၤအသးဒ်အံၤ လၢအပူၤကွံာ်အနံၣ်တဖၣ်န့ၣ် ယဟိဝၤယွၤ တဲဘၣ်ပှၤယူဒၤဖိတဖၣ်လၢ– “သုမိၢ်လၢ ယပာ်မၢ်အီၤတဂၤ အလံာ်လီၤဖှၣ်တဘ့ၣ်န့ၣ် အိၣ်ဖဲလဲၣ်. ဒီးယဆါကွံာ်သုလၢ ယကမၢ် အကစၢ် ဖဲလဲၣ်တဂၤလဲၣ်.” (ယၡါယၤ ၅၀:၁) တမ့ၢ်လၢ ယဟိဝၤယွၤ မၤဟးဂီၤကွံာ် အတၢ်အၢၣ်လီၤအီလီၤဒီး ပာ်မၢ်ကွံာ် အဝဲသ့ၣ်အ “မိၢ်” မ့တမ့ၢ် အကလုာ်ဒူၣ်ဘၣ်. အဝဲသ့ၣ် အနီၢ်ကစၢ်ဒၣ်ဝဲ မၤဟးဂီၤကွံာ် အတၢ်အၢၣ်လီၤအီလီၤလၢ ဘၣ်ဃးဒီးစီၤမိၤၡ့ အတၢ်သိၣ်တၢ်သီအဃိ ယဟိဝၤယွၤ မၤဝဲဒ်န့ၣ်လီၤ. ဘၣ်ဆၣ် ပှၤအံၣ်စရ့လးဖိလၢ အအိၣ်လီၤတဲာ်တ့ၢ်တဖၣ် ပီၢ်ယၢ်လီၤက့ၤအသးဒီး ဃ့ထုကဖၣ်ဒ်သိး ယဟိဝၤယွၤ ကကဲက့ၤအဝၤလၢ အဝဲသ့ၣ် အထံအကီၢ်ပူၤလီၤ. ကစၢ်ယွၤဒုးအိၣ်သယုၢ် အဝဲသ့ၣ် အထံအကီၢ် အနံၣ် ၇၀ ဝံၤဒီး ဒ်အတၢ်စံးပာ်အိၣ်ဝဲအသိး ဖဲ ချ.ခ.န ၅၃၇ န့ၣ်ယဟိဝၤယွၤ ဒုးဟဲက့ၤအပှၤကလုာ်တဖၣ်လၢ အထံအကီၢ် လၢအနီၢ်ကစၢ်အမံၤအဂီၢ်လီၤ.—စံးထီၣ်ပတြၢၤ ၁၃၇:၁-၉; ကွၢ် တၢ်ဆီဟံၣ်ဆီဃီ.
တၢ်ဖးလံာ်စီဆှံ
(ယၡါယၤ ၅၁:၁၂-၂၃) ယဲဒၣ်, ယၤအံၤယမ့ၢ်ပှၤလၢအမၤမုာ်ထီၣ်က့ၤသုလီၤ. နမ့ၢ်မတၤလၢ နကပျံၤပှၤကညီလၢ အကသံ, ဒီးပှၤကညီအဖိလၢ အကကဲထီၣ် ဒ်နီၣ်ဧိၤမံၤဧိၤအသိးန့ၣ် တဂၤလဲၣ်. ၁၃ ဒီးနသးပ့ၤနီၣ်ယွၤလၢ အတ့လီၤနၤ, လၢအသလၣ်ထီၣ်မူခိၣ်, ဒီးပာ်လီၤဟီၣ်ခိၣ် အခီၣ်ထံးတဖၣ်, ဒီးနဘၣ်ယိၣ်တၢ် တထံၣ်ဃီ ကိးမုၢ်နံၤဒဲး, လၢပှၤမၤအၢ တၢ်အသးထီၣ်အဃိ, ဒ်အကတဲာ်ကတီၤတၢ်လၢ အကမၤဟးဂီၤတၢ် အသိးန့ၣ်စ့ၢ်ကီးဧါ. ဒီးပှၤမၤအၢတၢ်အသးထီၣ်န့ၣ် မ့ၢ်အအိၣ်ဖဲလဲၣ်. ၁၄ ပှၤတၢ်မၢကဲကုၢ်အီၤ ကထူၣ်ဖျဲးချ့ချ့, ဒီးတသံဘၣ်လၢတၢ်ပူၤဘၣ်, ဒီးအကိၣ်တလီၤစှၤဘၣ်. ၁၅ ဒီးယဲဒၣ်အံၤ ယမ့ၢ်ယွၤနကစၢ်လၢ အထိၣ်ဂဲၤပီၣ်လဲၣ်, ဒီးအလပီသီၣ်ထီၣ်လီၤ. တၢ်သုးမုၢ်ဂီၢ်မုၢ်အယွၤ မ့ၢ်အမံၤလီၤ. ၁၆ ဒီးယပာ်ယတၢ်ကတိၤလၢ နထးခိၣ်အပူၤ, ဒီးယကျၢၢ်ဘၢနၤလၢ ယစုအကဒု, ဒ်သိး ယကသူၣ်မူခိၣ်, ဒီးပာ်ဟီၣ်ခိၣ်အခီၣ်ထံးတဖၣ်, ဒီးစံးလၢစံယိၣ်, နဲဒၣ်အံၤနမ့ၢ် ယပှၤဂီၢ်မုၢ်လီၤ. ၁၇ ထိၣ်ဂဲၤနသး, ထိၣ်ဂဲၤနသး, ဂဲၤဆၢထၢၣ်, ယရူၤၡလ့ၣ်လၢအအီလံ ယွၤအသးထီၣ်အလီခီလၢအစု, နၤဧၢ. နအီလံ တၢ်ကနူၤကပၤအလီခီလံ, ဒီးစူၢ်ထီၣ်ကွံာ်အီၤလံလီၤ. ၁၈ လၢကယဲၢ်အဖိခွါလၢ အဆံးစၢ်ဝဲအကျါန့ၣ် ပှၤဆှၢအီၤတအိၣ်ဘၣ် နီတဂၤဘၣ်. ပှၤဟံးထီၣ်အစု တအိၣ်ဘၣ်လၢ ကယဲၢ်အဖိခွါလၢအလုၢ်ဒိၣ်ထီၣ်ဝဲ အကျါနီတဂၤဘၣ်. ၁၉ တၢ်ခံမံၤအံၤဟဲဘၣ်နၤ, မ့ၢ်မတၤကဟီၣ်ကယၢၤလၢ နဂီၢ်တဂၤလဲၣ်. တၢ်အိၣ်သယုၢ်, ဒီးတၢ်လီၤပှီၢ်, ဒီးတၢ်သၣ်ဝံၤလီၤဒိ, ဒီးနးဧိၤဘီဧိၤလီၤ. မ့တမ့ၢ်ဘၣ်ယၤဘၣ်ဒီး မ့ၢ်မတၤ ကမၤမုာ်ထီၣ်က့ၤနၤလဲၣ်. ၂၀ နဖိခွါလီၤဘှါဝဲ, မံလီၤဝဲလၢကျဲခီၣ်ထံး ဒ်တၤဖးသအိလၢ ပှာ်ပူၤအသိးန့ၣ်လီၤ. ပှဲၤဝဲဒီးယွၤအသးထီၣ်, နကစၢ်အသိၣ်ဃီၣ်တၢ်လီၤ. ၂၁ မၤသးဒ်န့ၣ်ဒီး, ဒိကနၣ်လၢ်တၢ်အံၤ, ပှၤလၢအဘၣ်နးဘၣ်ဖှီၣ် ဒီးအီမူၤအသးဘၣ်ဆၣ်ဒီး တမ့ၢ်ဘၣ်လၢ စပံးထံဘၣ်န့ၣ်ဧၢ. ၂၂ နကစၢ်, ကစၢ်ယွၤ ဒီးနကစၢ်လၢ အကတိၤလိာ်ကွီၢ်လၢ အပှၤဂီၢ်မုၢ်အဂီၢ်န့ၣ်, စံးဝဲဒ်အံၤ, ကွၢ်ကွၢ်, ယဟံးန့ၢ်ကွံာ် တၢ်လဲၤကနူၤကပၤ အလီခီလၢနစုပူၤ, ယသးထီၣ်အလီခီလီၤ. နတအီလၢၤဘၣ်အီၤဘၣ်. ၂၃ ဒီးယကပာ်အီၤလၢ ပှၤလၢအမၤနးမၤဖှီၣ်နၤအစုပူၤ, လၢအစံးဘၣ်နသး, တီၤလီၤကဒွံကျိာ်တက့ၢ်, ဒီးပကခီဂာ်နၤလီၤ. ဒီးနပာ်နနီၢ်ခိဒ်ဟီၣ်ခိၣ်အသိး, ဒီးဒ်ကျဲအသိး, လၢပှၤလၢအလဲၤခီဂာ်ဝဲ အဂီၢ်န့ၣ်လီၤ.
လါဖ့ၤဘြူၤအါရံၤ ၁၃–၁၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယၡါယၤ ၅၂-၅၇
“ခရံာ်တူၢ်တၢ်နးတၢ်ဖှီၣ်လၢပဂီၢ်”
(ယၡါယၤ ၅၃:၃-၅) ပှၤကညီမၤတရီတပါ, ဒီးလဲၤသဒၣ်အီၤလီၤ. မ့ၢ်ဝဲလၢ ပှၤတၢ်သူၣ်အုးသးအုး, ဒီးသ့ၣ်ညါတၢ်နးတၢ်ဖှီၣ်, ဒ်ပှၤတဂၤလၢ ပှၤမၤဘၢအမဲာ်လၢအီၤအသိး, ပှၤမၤအီၤတရီတပါ, ဒီးပတပာ်ဘၣ်အလီၢ်ဘၣ်. ၄ မ့ၢ်မးစိာ်ဝဲပတၢ်ဆူးတၢ်ဆါ, ဒီးဝံပတၢ်သူၣ်အုးသးအုးလီၤ. ဒီးပဆိကမိၣ်လၢတၢ်ကျီအီၤ, လၢယွၤတီၢ်အီၤ, ဒီးလၢအဘၣ်တၢ်နးတၢ်ဖှီၣ်လီၤ. ၅ ဒီးဘၣ်တၢ်ဆဲးဖျိအီၤလၢ ပတၢ်ကမၣ်အဃိ, ဒီးဘၣ်တၢ်မၤသဘှံးအီၤလၢ ပတၢ်ဒဲးဘးအဃိလီၤ. တၢ်သိၣ်ဃီၣ်ဘၣ်ဃးဒီး ပတၢ်ဃူတၢ်ဖိးန့ၣ် အိၣ်ဝဲလၢအလိၤ, ဒီးပဘျါက့ၤလၢအဘၣ်တီၢ်အဃိန့ၣ်လီၤ.
တၢး၀၉ ၁/၁၅ ကဘျံးပၤ ၂၆ အဆၢ ၃-၅
ယဟိဝၤယွၤအခ့အပှၤတဂၤ“ဘၣ်တၢ်ဆဲးဖျိအီၤလၢ ပတၢ်ကမၣ်အဃိ”
“ပှၤမၤအီၤတရီတပါ” “ဒီးတပာ်ဘၣ်အလီၢ်ဘၣ်”
၃ ဖး ယၡါယၤ ၅၃:၃ တက့ၢ်. ဖဲယွၤအဖိခွါတဂၤ ပာ်တ့ၢ်ကွံာ်ဝဲ တၢ်မၤလၢအပှဲၤဒီး တၢ်သူၣ်ခုသးခုလၢ အမၤဘၣ်ဝဲလၢ အပၢ်အကပၤဒီး ဟဲလီၤဝဲဆူဟီၣ်ခိၣ်ချၢ ဒ်သိးကအုၣ်က့ၤခီၣ်က့ၤ ပှၤဟီၣ်ခိၣ်ဖိလၢ တၢ်ဒဲးဘးဒီး တၢ်သံအခါ အဝဲအသးကမၤအသးဒ်လဲၣ်န့ၣ် ဆိကမိၣ်ကွၢ်တက့ၢ်. (ဖံလံးပံၤ ၂:၅-၈) အဝဲအတၢ်လုၢ်ထီၣ်အံၤ မ့ၢ်ဝဲတၢ်လုၢ်လၢ ပတၢ်ဒဲးဘး ကဘၣ်တၢ်ပျၢ်ကွံာ်အီၤ လၢာ်လၢာ်ဆ့ဆ့အဂီၢ်လီၤ. စီၤမိၤၡ့အတၢ်သိၣ်တၢ်သီလၢ ပှၤဘၣ်လုၢ်ထီၣ်ဆၣ်ဖိကီၢ်ဖိန့ၣ် မ့ၢ်ဒၣ်တၢ်အကဒုလၢ တၢ်လုၢ်အံၤအဂီၢ်လီၤ. (ဧ့ၤဘြံၤ ၁၀:၁-၄) အစှၤကတၢၢ်န့ၣ် ပှၤယူဒၤဖိလၢ အကွၢ်လၢ်မ့းၡံအၤတဖၣ် ကြၢးတူၢ်လိာ်အီၤဒီး မၤလၤကပီၤအီၤလီၤ. (ယိၤဟၣ် ၆:၁၄) ဘၣ်ဆၣ် ပှၤယူဒၤဖိတဖၣ် “မၤအီၤတရီတပါ” ဒီး “တပာ်ဘၣ်အလီၢ်” ဒ်ဝံယၡါယၤ တဲဆိပာ်ဝဲအသိးလီၤ. တၢ်မၢဖိယိၤဟၣ် ကွဲးဝဲလၢ– “ဟဲဆူအတၢ်ဒၣ်ဝဲ, ဒီးအပှၤဒၣ်ဝဲတတူၢ်လိာ်ဘၣ်အီၤဘၣ်.” (ယိၤဟၣ် ၁:၁၁) တၢ်မၢဖိ ပ့းတရူး တဲဘၣ်ပှၤယူဒၤဖိတဖၣ်လၢ– “ပပၢ်သ့ၣ်အကစၢ်, လီၣ်ဖျါထီၣ်အခ့အပှၤယ့ၣ်ၡူး အလၤအကပီၤလီၤ. အဝဲဒၣ်န့ၣ်သုဟ့ၣ်လီၤကွံာ်, ဒီးသမၢအီၤလၢ စီၤပံၤလးအမဲာ်ညါ, ဖဲအစံၣ်ညီၣ်လၢ အကပျၢ်အီၤလီၤ. ဒီးသုသမၢ တၢ်စီတၢ်ဆှံဒီး တၢ်တီတၢ်လိၤတဂၤန့ၣ်, ဒီးသုဃ့လၢ တၢ်ကဟ့ၣ်သုလၢပှၤမၤ သံပှၤကညီတဂၤလီၤ.”—မၤတၢ် ၃:၁၃, ၁၄.
၄ ဝံယၡါယၤ တဲဆိပာ်စ့ၢ်ကီးဝဲလၢယ့ၣ်ၡူး “သ့ၣ်ညါတၢ်နးတၢ်ဖှီၣ်” လီၤ. ဖဲယ့ၣ်ၡူး ဟးစံၣ်တဲၤတဲလီၤတၢ်အခါ တဘျီတခီၣ်တၢ်ဘှံးအသး ဘၣ်ဆၣ် တၢ်ဆါတအီၣ်အီၤဘၣ်. (ယိၤဟၣ် ၄:၆) ဘၣ်ဆၣ် အဝဲသ့ၣ်ညါဝဲ ပှၤလၢအစံၣ်တဲၤတဲလီၤဝဲတဖၣ် အတၢ်နးတၢ်ဖှီၣ်လီၤ. ယ့ၣ်ၡူးသးကညီၤ အဝဲသ့ၣ်ဒီး မၤဘျါအီၤလီၤ. (မၢ်ကူး ၁:၃၂-၃၄) ယ့ၣ်ၡူး မၤလၢပှဲၤဝံအတၢ်စံးပာ် လၢအမ့ၢ်– “မ့ၢ်မးစိာ်ဝဲပတၢ်ဆူးတၢ်ဆါ, ဒီးဝံပတၢ်သူၣ်အုးသးအုးလီၤ. ဒီးပဆိကမိၣ်လၢတၢ်ကျီအီၤ, လၢယွၤတီၢ်အီၤ” လီၤ.—ယၡါယၤ ၅၃:၄ က; မးသဲ ၈:၁၆, ၁၇.
ဒ် “ယွၤတီၢ်အီၤ”
၅ ဖး ယၡါယၤ ၅၃:၄ခ. ပှၤအါဂၤလၢအအိၣ်မူတစိၤဃီဒီး ယ့ၣ်ၡူးန့ၣ် တနၢ်ပၢၢ်ဝဲ တၢ်ဂ့ၢ်လၢ ယ့ၣ်ၡူးဘၣ်တူၢ်တၢ်နးတၢ်ဖှီၣ်ဒီး ဘၣ်သံဝဲဘၣ်. အဝဲသ့ၣ်နာ်ဝဲလၢ ယွၤစံၣ်ညီၣ်အီၤဒီး မၤဆါအီၤလၢ တၢ်ဆါအၢလီၤ. (မးသဲ ၂၇:၃၈-၄၄) ပှၤယူဒၤဖိတဖၣ် စံးဝဲလၢ ယ့ၣ်ၡူးကတိၤကမၣ်ယွၤလီၤ. (မၢ်ကူး ၁၄:၆၁-၆၄; ယိၤဟၣ် ၁၀:၃၃) နီၢ်နီၢ် ယ့ၣ်ၡူးတမ့ၢ်ပှၤလၢ အမၤတၢ်ဒဲးဘးဒီး ကတိၤကမၣ်ယွၤဘၣ်. ဒ်ယဟိဝၤယွၤ အခ့အပှၤတဂၤအသိး မ့ၢ်လၢယ့ၣ်ၡူးအဲၣ်အပၢ်အဃိ အဝဲကဘၣ်သံဝဲဒ် ပှၤလၢအကတိၤကမၣ်ယွၤန့ၣ် အသးကဘၣ်ဒိဝဲလီၤ. သနာ်က့ အဝဲသးအိၣ်မၤဝဲဒ် တၢ်ဘၣ်ယဟိဝၤယွၤအသး အသိးလီၤ.—မးသဲ ၂၆:၃၉.
(ယၡါယၤ ၅၃:၇, ၈) ဘၣ်တၢ်မၤအၢမၤသီအီၤ, ဘၣ်ဆၣ်ဒီးဆီၣ်လီၤအသး, ဒီးတအဲးထီၣ်ဘၣ် အထးခိၣ်ဘၣ်, ဒ်သိဖိလၢပှၤမိၤမၤသံအီၤအသိး, ဒ်သိလၢအအိၣ်ဘှီၣ်ကလာ်လၢ ပှၤတံာ်အဆူၣ်အမဲာ်ညါအသိးန့ၣ်, တအဲးထီၣ်ဘၣ်အထးခိၣ်ဘၣ်. ၈ တၢ်ထုးထီၣ်ကွံာ်အီၤလၢ တၢ်နးတၢ်ဖှီၣ်အပူၤ, ဒီးလၢတၢ်စံၣ်ညီၣ်ကွီၢ်အပူၤလီၤ. ဒီးလၢအပှၤတစိၤတဃၣ်အကျါန့ၣ် မ့ၢ်မတၤကဆိကမိၣ်လၢ အဒိးတၢ်ဒီၣ်တဲာ်ကွံာ်အီၤလၢ ကီၢ်မူလၢယပှၤဂီၢ်မုၢ် အတၢ်ကမၣ်အဃိ, လၢအဘၣ်ဆိၣ်အၢလၢ အဝဲသ့ၣ်အလီၢ်န့ၣ်တဂၤလဲၣ်.
တၢး၀၉ ၁/၁၅ ကဘျံးပၤ ၂၇ အဆၢ ၁၀
ယဟိဝၤယွၤအခ့အပှၤတဂၤ“ဘၣ်တၢ်ဆဲးဖျိအီၤလၢ ပတၢ်ကမၣ်အဃိ”
“ဒ်သိဖိလၢ ပှၤမိၤမၤသံအီၤအသိး”
၁၀ ဖး ယၡါယၤ ၅၃:၇, ၈. ဖဲပှၤဘျၢတၢ်စီၤယိၤဟၣ် ထံၣ်ဘၣ်ယ့ၣ်ၡူး ဟဲဆူအအိၣ်အခါ အဝဲကိးထီၣ်ဝဲလၢ “ကွၢ်ကွၢ်, ယွၤအသိဖိလၢ အစိာ်ထီၣ်ကွံာ်ပှၤဟီၣ်ခိၣ်ဖိ အတၢ်ဒဲးဘးလီၤ.” (ယိၤဟၣ် ၁:၂၉) ဖဲစီၤယိၤဟၣ် ကိးဝဲယ့ၣ်ၡူးလၢ သိဖိအခါ ဘၣ်သ့ၣ်သ့ၣ် အဝဲကဆိကမိၣ်ထီၣ်ဝဲ ဝံယၡါယၤ အတၢ်ကတိၤလၢအမ့ၢ် “ဒ်သိလၢ အအိၣ်ဘှီၣ်ကလာ်လၢ ပှၤတံာ်အဆူၣ်အမဲာ်ညါအသိးန့ၣ်, တအဲးထီၣ်ဘၣ်အထးခိၣ်ဘၣ်.” (ယၡါယၤ ၅၃:၇) ဝံယၡါယၤ တဲဆိပာ်ဝဲလၢ “လူလီၤအသး တုၤအသံ” လီၤ. (ယၡါယၤ ၅၃:၁၂) ဖဲယ့ၣ်ၡူးမၤဝဲ တၢ်သ့ၣ်နီၣ်ထီၣ်က့ၤ အတၢ်သံအမူးအခါန့ၣ် ဟ့ၣ်ဝဲအပျဲၢ် ၁၁ ဂၤလၢစပံးထံအခွးဒီး တဲဘၣ်အဝဲသ့ၣ်လၢ– “အဂ့ၢ်ဒ်အံၤ, အအံၤမ့ၢ်ယသွံၣ်ဘၣ်ဃးဒီး တၢ်အၢၣ်လီၤအီလီၤအသီ, လၢအဘၣ်လူလီၤ.”—မးသဲ ၂၆:၂၈.
(ယၡါယၤ ၅၃:၁၁, ၁၂) ကထံၣ်ဘၣ်အသူၣ်အသးအတၢ်မၤ, ဒီးကမံသူၣ်မံသးလီၤ. ယခ့တီယပှၤလိၤ ကပာ်တီပာ်လိၤ ပှၤအါဂၤလၢအတၢ်သ့ၣ်ညါ, ဒီးကစိာ်အတၢ်အၢတၢ်သီလီၤ. ၁၂ မၤသးဒ်န့ၣ်ဒီး ယကဟ့ၣ်နီၤဖးအဂီၢ်ဒီးပှၤအဒိၣ်, ဒီးကနီၤဖးဃုာ်တၢ်ဂုာ်န့ၢ်ဒီး ပှၤအဂံၢ်ဆူၣ်အဘါဆူၣ်လီၤ. အဂ့ၢ်ဒ်အံၤ, လူလီၤအသးတုၤအသံ, ဒီးတၢ်ဂံၢ်အီၤလၢ ပှၤမၤကမၣ်တၢ်ဖိအကျါ, ဒီးစိာ်ထီၣ်ကွံာ် ပှၤအါဂၤအတၢ်ဒဲးဘး, ဒီးကဃ့ညးတၢ်လၢ ပှၤမၤကမၣ်တၢ်အဂီၢ်လီၤ.
တၢး၀၉ ၁/၁၅ ကဘျံးပၤ ၂၈ အဆၢ ၁၃
ယဟိဝၤယွၤအခ့အပှၤတဂၤ“ဘၣ်တၢ်ဆဲးဖျိအီၤလၢ ပတၢ်ကမၣ်အဃိ”
အခ့အပှၤ “ကပာ်တီပာ်လိၤ ပှၤအါဂၤ”
၁၃ ဖး ယၡါယၤ ၅၃:၁၁, ၁၂. ဘၣ်ဃးဒီး အခ့အပှၤလၢ အဃုထၢထီၣ်ဝဲန့ၣ် ယဟိဝၤယွၤစံးဝဲလၢ “ယခ့တီယပှၤလိၤ ကပာ်တီပာ်လိၤ ပှၤအါဂၤ” လီၤ. ပာ်တီပာ်လိၤဝဲလၢ ကျဲဒ်လဲၣ်. အဆၢဖိ ၁၂ ပာ်ဖျါထီၣ်ဝဲ တၢ်စံးဆၢလီၤ. အဝဲ “ကဃ့ညးတၢ်လၢ ပှၤမၤကမၣ်တၢ်အဂီၢ်” လီၤ. စီၤအၤဒၣ်အစၢၤအသွဲၣ်ခဲလၢာ် မ့ၢ်ပှၤတၢ်ဒဲးဘးဖိ, “ပှၤမၤကမၣ်တၢ်ဖိ” အဃိ အဝဲသ့ၣ်ဒိးန့ၢ်ဘၣ် “တၢ်ဒဲးဘးအဘူးအလဲ” လၢအမ့ၢ်တၢ်သံလီၤ. (ရိမ့ၤ ၅:၁၂; ၆:၂၃) ပှၤတၢ်ဒဲးဘးဖိတဖၣ် လိၣ်ဘၣ်တၢ်မၤဘၣ်လိာ်က့ၤ ဒီးယဟိဝၤယွၤလီၤ. ဘၣ်ဃးဒီး ယ့ၣ်ၡူး ‘ဃ့ကညး’ တၢ်လၢပှၤတၢ်ဒဲးဘးဖိအဂီၢ်န့ၣ် ယၡါယၤ ၅၃ တဲဆိတ့ၢ်ဝဲလၢ “တၢ်သိၣ်ဃီၣ်ဘၣ်ဃးဒီး ပတၢ်ဃူတၢ်ဖိးန့ၣ် အိၣ်ဝဲလၢအလိၤ, ဒီးပဘျါက့ၤလၢ အဘၣ်တီၢ်အဃိန့ၣ်လီၤ.”—ယၡါယၤ ၅၃:၅.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ယၡါယၤ ၅၄:၁) သးဝံၣ်ထီၣ်, ပှၤတူာ်ဖိလၢ အတဆံးစၢ်ဘၣ်တၢ်ဧၢ, ကိးပသူ, ဒီးထုထီၣ်နကလုၢ်, ပှၤလၢအတဘၣ်တၢ်ဟုးဆါဘၣ်တဂၤဧၢ. အဂ့ၢ်ဒ်အံၤ, ပှၤလၢအအိၣ်သယုၢ်တဂၤန့ၣ် အဖိအါန့ၢ်ပိာ်မုၣ်အိၣ်ဒီး အဝၤအဖိတက့ၢ်လီၤ, ယွၤစံးဝဲဒၣ်.
တၢး၀၆ ၃/၁၅ ကဘျံးပၤ ၁၁ အဆၢ ၂
တၢ်“အဒိအတဲာ်” လၢအလုၢ်ဒိၣ်ပှ့ၤဒိၣ် လၢပဂီၢ်
“သဘျ့မုၣ်” နီၢ်စၤရါဒီး အဖိခွါစီၤအံၤစဲးန့ၣ် ခၢၣ်စးဝဲတၢ်မနုၤလဲၣ်. စီၤပီလူးပာ်ဖျါဝဲလၢ နီၢ်စၤရါလၢအမ့ၢ် “ပှၤတူာ်ဖိ” န့ၣ်ဒိလီၤဝဲ ကစၢ်ယွၤအမါ လၢအမ့ၢ် ကစၢ်ယွၤအတၢ်ကရၢကရိ လၢမူခိၣ်န့ၣ်လီၤ. ဖဲယ့ၣ်ၡူးတချုးဟဲဒံးဘၣ်အခါန့ၣ် ပိာ်မုၣ်လၢမူခိၣ်အံၤ မ့ၢ်ပှၤတူာ်ဖိ ခီဖျိလၢ “အဖိ” လၢဟီၣ်ခိၣ်ချၢအပူၤ လၢဘၣ်တၢ်ဒိးဖှူအီၤလၢ သးစီဆှံန့ၣ် တအိၣ်ဒံးဘၣ်အဃိလီၤ. (ကလၤတံ ၄:၂၇; ယၡါယၤ ၅၄:၁-၆) ဘၣ်ဆၣ်ဖဲ ခ.န. ၃၃ ဘူၣ်ယဲၢ်ဆံအနံၤန့ၣ် သးစီဆှံ ဘၣ်တၢ်လူလီၤအီၤလၢ ပိာ်မုၣ်ဒီးပိာ်ခွါတဖုအလိၤအဃိ အဝဲသ့ၣ် အိၣ်ဖျဲၣ်ကဒီးတစုဒီး ကဲထီၣ်ပိာ်မုၣ်လၢမူခိၣ်အဖိတဖၣ်လီၤ. ဖိတဖၣ်အံၤန့ၣ် ယွၤလုၢ်ဖိအီၤဒီး န့ၢ်သါဃုာ်ဘၣ်တၢ်ဒီး ခရံာ်လၢ တၢ်အၢၣ်လီၤအီလီၤအသီ အဖီလာ်လီၤ. (ရိမ့ၤ ၈:၁၅-၁၇) အဖိအကျါတဂၤလၢ အမ့ၢ်တၢ်မၢဖိပီလူး ကွဲးဝဲလၢ– “မ့မ့ၢ်ယရူၤၡလ့ၣ်လၢထးန့ၣ်, အိၣ်သဘျ့ဒီး မ့ၢ်ပဝဲဒၣ်ခဲလၢာ် အမိၢ်လီၤ.”—ကလၤတံ ၄:၂၆.
(ယၡါယၤ ၅၇:၁၅) အဂ့ၢ်ဒ်အံၤ, ပှၤလၢအထီၣ်ထီ, ဒီးအိၣ်ဝဲထီၣ်ထီ, လၢအအိၣ်ဝဲဆိးဝဲလၢ တၢ်အထူအယိာ်ပူၤ, ဒီးအမံၤမ့ၢ်တၢ်စီဆှံတဂၤစံးဝဲဒ်အံၤ, ယအိၣ်ယဆိးလၢတၢ်ထီၣ်ထီ, လၢတၢ်စီဆှံအလီၢ်, ဒီးယအိၣ်စ့ၢ်ကီးလၢ ပှၤအသူၣ်ကၢ်အသးလီၤ ဒီးပှၤဆီၣ်လီၤအသးအသိး, ဒ်သိးယကမၤမူထီၣ် ပှၤဆီၣ်လီၤအသးတဖၣ်အသးဒီး ဒ်သိးယကမၤမူထီၣ်ပှၤလၢ အသူၣ်ကၢ်အသးလီၤတဖၣ်အသးလီၤ.
တၢး၀၅ ၁၀/၁၅ ကဘျံးပၤ ၂၆ အဆၢ ၃
ဒုးအိၣ်ထီၣ် တၢ်ဆီၣ်လီၤသးနီၢ်နီၢ်
တၢ်ဆီၣ်လီၤသး အဒိအတဲာ်လၢ အဂ့ၤကတၢၢ်
၃ ယဟိဝၤယွၤန့ၣ် အစိအကမီၤထီတုၤဒၣ်လဲာ် ပဃုကွၢ်အီၤတလၢာ်ဘၣ်. ဘၣ်ဆၣ် “ယွၤအမဲာ်ဟးဝ့ၤဝီၤတၢ်လၢ ဟီၣ်ခိၣ်ချၢဒီဘ့ၣ်ညါ, ဒ်သိးအကပာ်ဆူၣ်ထီၣ်အသးလၢ ပှၤလၢအအိၣ်ဒီး အသးဒီဖျၢၣ်ဒီးအီၤတဖၣ် အဂီၢ်န့ၣ်လီၤ.” (၂ ကွဲးနီၣ်တၢ် ၁၆:၉) ယဟိဝၤယွၤ မ့ၢ်ထံၣ်ဘၣ်ဝဲ ပှၤလၢအဘူၣ်ထီၣ်ဘါထီၣ်အီၤ လၢအိၣ်ဒီး တၢ်ဆီၣ်လီၤသးတဖၣ် အဂံၢ်အဘါလီၤစၢ် ခီဖျိတၢ်မၤကွၢ်န့ၣ် အဝဲမၤဝဲဒ်လဲၣ်. အဝဲ “အိၣ်ဝဲ” ဒီးပှၤဒ်န့ၣ်တဖၣ် ခီဖျိအသးစီဆှံ ‘ဒ်သိးကမၤမူထီၣ် ပှၤဆီၣ်လီၤအသးတဖၣ်အသးဒီး မၤမူထီၣ်ပှၤလၢ အသူၣ်ကၢ်အသးလီၤတဖၣ်အသးလီၤ.’ (ယၡါယၤ ၅၇:၁၅) အဃိ ပှၤလၢအဘူၣ်ထီၣ်ဘါထီၣ်အီၤတဖၣ် အဂံၢ်အဘါဆူၣ်ထီၣ်က့ၤလၢ ကမၤအတၢ်မၤလၢ တၢ်သူၣ်ခုသးခုပူၤအဂီၢ်လီၤ. ကစၢ်ယွၤအိၣ်ဒီး တၢ်ဆီၣ်လီၤသးနီၢ်နီၢ်လီၤ.
တၢ်ဖးလံာ်စီဆှံ
(ယၡါယၤ ၅၇:၁-၁၁) ပှၤအတီအလိၤဟါမၢ်, ဒီးပှၤတတိၢ်န့ၢ်ဘၣ်လၢ အသးနီတဂၤဘၣ်. ဒီးပှၤမၤဂ့ၤတၢ်န့ၣ် ဘၣ်တၢ်ထုးထီၣ်ကွံာ်ဝဲ, ဒီးပှၤတဆိကမိၣ်လၢပှၤတီပှၤလိၤဘၣ် တၢ်ထုးထီၣ်ကွံာ်အီၤလၢ တၢ်အၢအပူၤဘၣ်, ၂ ကလဲၤနုာ်လၢတၢ်ဃူတၢ်ဖိးအပူၤလီၤ. ပှၤလၢအလဲၤတၢ်စၢၢ်ဆၢလၢအမဲာ်ညါန့ၣ် ကအိၣ်ဘှံးလၢအလီၢ်မံပူၤလီၤ. ၃ ဒီးသုဝဲသ့ၣ်အံၤ သုးဘူးသုသးဖဲအံၤ, ပှၤမၤကဒါပမဲာ်အဖိခွါတဖၣ်, ပှၤမၤကမၣ်ပဖိပမါ, ဒီးပှၤဃဲသဲမုၣ်အချံအသၣ်သ့ၣ်ဧၢ. ၄ သုမၤတရီတပါမတၤတဂၤလဲၣ်, သုအဲးထီၣ်ဖးလဲၢ်သုထးခိၣ်, သုဆဲးထီၣ်သုပျ့ၤလၢမတၤအလိၤလဲၣ်. သုမ့ၢ်ပှၤမၤကမၣ်တၢ်အဖိ, ပှၤလီတၢ်အချံအသၣ်န့ၣ် တမ့ၢ်ဘၣ်ဧါ. ၅ သုသးဆူၣ်ထီၣ်လၢဃီမုၢ်ပျဲၢ်အကျါ, လၢသ့ၣ်သံကစဲာ် ကိးထူၣ်ဒဲးအဖီလာ်, သုမၤသံဖိသၣ်တဖၣ်လၢ ကစၢၢ်ကဆူးအပူၤ, လၢလၢၢ်အိပူၤန့ၣ်တမ့ၢ်ဘၣ်ဧါ. ၆ လၢကစၢၢ်ကဆူးအလၢၢ်ဘျ့အကျါန့ၣ် နဂီၢ်အိၣ်လီၤ. အဝဲသ့ၣ်တဖၣ်, အဝဲသ့ၣ်န့ၣ် မ့ၢ်တၢ်နီၤဖးန့ၢ်လၢ နဂီၢ်လီၤ. နလူလီၤနတၢ်လုၢ်အီလၢအဂီၢ်, နဟဲစိာ်တၢ်မၤဘူၣ်ကိၣ်လီၤ. ယသူၣ်ကမံယသးကမံလၢ တၢ်န့ၣ်တဖၣ်အဃိစ့ၢ်ကီးဧါ. ၇ နပာ်နလီၢ်မံလၢကစၢၢ်ဖးထီတဖျၢၣ်, ဒီးဖဲန့ၣ်ဒၣ်လဲာ်နလဲၤထီၣ်လုၢ်တၢ်လီၤ. ၈ ဒီးလၢတြဲၤဒီး ကျဲစၢၤအချၢဃံန့ၣ် နပာ်ထီၣ်နတၢ်ဒုးသ့ၣ်နီၣ်ထီၣ်က့ၤတၢ်လီၤ. အဂ့ၢ်ဒ်အံၤ, နလီၣ်ဖျါ နသးအိၣ်တဒၢလၢအမဲာ်ညါလီၤ. ဒီးနလဲၤထီၣ်, ဒီးမၤလဲၢ်ထီၣ်နလီၢ်မံ, နအၢၣ်လီၤအီလီၤတၢ်ဒီးအီၤ, နအဲၣ်ဒိးအလီၢ်မံ, နကတဲာ်ကတီၤအလီၢ်လၢအဂီၢ်လီၤ. ၉ နလဲၤဆူစီၤပၤအအိၣ်, အိၣ်ဒီးသိဖှူတၢ်, ဒီးမၤအါထီၣ်နသိနၢမူ, ဒီးနမၢလီၤနကလူးတဖၣ်ဆူတၢ်အယံၤ, ဒီးနမၤလီၤရၢၢ်နသးဆူပျုၤပူၤလီၤ. ၁၀ နကျဲယံၤ, ဒီးနကျဲးစၢးမၤတၢ်ဘၣ်ဆၣ်ဒီး, နတစံးဘၣ်, မုၢ်လၢ်တၢ်တအိၣ်ဘၣ်န့ၣ်ဘၣ်. နထံၣ်န့ၢ်ဘၣ် နစုအသးသမူလီၤ. မၤသးဒ်န့ၣ်ဒီး နတသူၣ်အုးသးအုးဘၣ်. ၁၁ ဒီးလၢနကတိၤတၢ်ကဘျံးကဘျၣ်, ဒီးတသ့ၣ်နီၣ်ထီၣ်က့ၤဘၣ်ယၤ, ဒီးတတိၢ်န့ၢ်ဘၣ်လၢနသးဘၣ်န့ၣ်မ့ၢ်နဘၣ်ယိၣ်တၢ်ဒီး နပျံၤမတၤတဂၤလဲၣ်. မ့ၢ်ယအိၣ်ဘှီၣ်ကလာ်လၢ ပျၢၤလံၤလံၤန့ၣ်ဒီး, နတပျံၤဘၣ်ယၤ, တမ့ၢ်ဘၣ်ဧါ.
လါဖ့ၤဘြူၤအါရံၤ ၂၀–၂၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယၡါယၤ ၅၈-၆၂
“ကိးထီၣ်နံၣ် တၢ်ဘၣ်ယွၤအသး”
(ယၡါယၤ ၆၁:၁, ၂) ကစၢ်ယွၤအသးအိၣ်လၢယလိၤလီၤ. အဂ့ၢ်ဒ်အံၤ, ယွၤဖှူလံယၤဒ်သိး ယကစံၣ်တဲၤတဲလီၤ တၢ်သးခုအကစီၣ် လၢပှၤဖှီၣ်ဖိယာ်ဖိ, မၢလီၤယၤ ဒ်သိးယကမၤဘျါက့ၤ ပှၤအသူၣ်ကၢ်အသးလီၤ, ဒ်သိးယကကိးထီၣ်တၢ်ထူၣ်ဖျဲးလၢ ပှၤဘၣ်တၢ်မၢကဲကုၢ်အီၤအဂီၢ်, ဒီးတၢ်အိးထီၣ်တၢ်လၢ ပှၤဘၣ်တၢ်စၢဃာ်အဂီၢ်န့ၣ်, ၂ ဒ်သိးယကကိးထီၣ်နံၣ်တၢ်ဘၣ်ယွၤအသး, ဒီးပကစၢ် မၤဆၢတၢ်အၢ အမုၢ်တနံၤ, ဒ်သိး ယကမၤမုာ်ထီၣ်က့ၤ ကယဲၢ်ပှၤလၢ အသူၣ်အုးအသးအုးခဲလၢာ်,
ip-2 ကဘျံးပၤ ၃၂၂ အဆၢ ၄
တၢ်တီတၢ်လိၤ ဟဲပၢၢ်ထီၣ်လၢ စံယိၣ်အပူၤ
“နံၣ်တၢ်ဘၣ်ယွၤအသး”
၄ ဝံယၡါယၤကွဲးဝဲလၢ– “ကစၢ်ယွၤအသးအိၣ်လၢယလိၤလီၤ. အဂ့ၢ်ဒ်အံၤ, ယွၤဖှူလံယၤဒ်သိး ယကစံၣ်တဲၤတဲလီၤ တၢ်သးခုအကစီၣ် လၢပှၤဖှီၣ်ဖိယာ်ဖိ, မၢလီၤယၤ ဒ်သိးယကမၤဘျါက့ၤ ပှၤအသူၣ်ကၢ်အသးလီၤ, ဒ်သိးယကကိးထီၣ်တၢ်ထူၣ်ဖျဲးလၢ ပှၤဘၣ်တၢ်မၢကဲကုၢ်အီၤအဂီၢ်, ဒီးတၢ်အိးထီၣ်တၢ်လၢ ပှၤဘၣ်တၢ်စၢဃာ်အဂီၢ်န့ၣ်.” (ယၡါယၤ ၆၁:၁) မတၤတဂၤ အိၣ်ဒီးမူဒါလၢ ကတဲဝဲ တၢ်သးခုကစီၣ်အံၤလဲၣ်. အဆိကတၢၢ်န့ၣ် ကမ့ၢ်ဝဲ ဝံယၡါယၤလၢ သးစီဆှံထိးဘၣ်အီၤ ဒ်သိးကတဲဝဲ တၢ်သးခုကစီၣ်လၢ ပှၤလၢအဘၣ် တၢ်စိာ်မၢကဲကုၢ်အီၤ လၢဝ့ၢ်ဘၤဘူၤလိၣ်တဖၣ်န့ၣ်လီၤ. ဘၣ်ဆၣ် ဖဲယ့ၣ်ၡူးတဲဝဲလၢ ဝံယၡါယၤ အတၢ်ကတိၤတဖၣ်န့ၣ် ဘၣ်ထွဲလိာ်အသးဒီးအီၤအခါ အဝဲတဲဖျါထီၣ်ဝဲ တၢ်ဂ့ၢ်အရ့ဒိၣ်ကတၢၢ်လၢ အဟဲလၢထီၣ်ပှဲၤထီၣ်န့ၣ်လီၤ. (လူၤကၣ် ၄:၁၆-၂၁) လၢတၢ်န့ၣ်အဃိ ယ့ၣ်ၡူး ဘၣ်တၢ်ဆှၢလီၤအီၤ ဒ်သိးကတဲဘၣ်ဝဲ တၢ်သးခုကစီၣ်လၢ ပှၤလၢအအိၣ်ဒီး တၢ်ဆီၣ်လီၤသးတဖၣ်အဂီၢ်လီၤ. ဒီးဖဲအဝဲ ဒိးဘျၢထံလၢ ကစံၣ်တဲၤတဲလီၤဝဲ တၢ်သးခုကစီၣ်အံၤအခါ ဘၣ်တၢ်ဒိးဖှူအီၤလၢ သးစီဆှံလီၤ.—မးသဲ ၃:၁၆, ၁၇.
(ယၡါယၤ ၆၁:၃, ၄) ဒ်သိးယကပာ်လီၤတၢ်လၢ ပှၤအသူၣ်အုးအသးအုးလၢ စံယိၣ်အပူၤအဂီၢ်, ဒ်သိးယကဟ့ၣ်လီၤအခိၣ်သလုးလၢ ဖၣ်ဆါအလီၢ်, တၢ်သးခုအသိလၢ တၢ်သးအုးအလီၢ်, တၢ်စံးထီၣ်ပတြၢၤအဆ့လၢ တၢ်သးဃၢအလီၢ်န့ၣ်လီၤ. ဒီးတၢ်ကကိးအီၤလၢ တၢ်တီတၢ်လိၤ အသ့ထိးဖၣ်တဖၣ်, တၢ်လၢယွၤသူၣ်ဝဲ ဒ်သိးအကဒိးတၢ်လၤကပီၤလီၤ. ၄ ဒီးအဝဲသ့ၣ်ကမၤက့ၤ တၢ်အလီၢ်လီၤပှီၢ်လၢသီ, ဒီးကမၤထီၣ်က့ၤ တၢ်အိၣ်သယုၢ်လၢပျၢၤ, ဒီးကတ့လီၤက့ၤဝ့ၢ်လီၤပှီၢ်တဖၣ်, တၢ်အိၣ်သယုၢ်လၢ ကစၢၤကစၢၤန့ၣ်လီၤ.
ip-2 ကဘျံးပၤ ၃၂၆-၃၂၇ အဆၢ ၁၃-၁၅
တၢ်တီတၢ်လိၤ ဟဲပၢၢ်ထီၣ်လၢ စံယိၣ်အပူၤ
၁၃ ဖဲ ခ.န ၃၃ ဘူၣ်ယဲၢ်ဆံအနံၤန့ၣ် ယဟိဝၤယွၤ သူၣ်လီၤဝဲ “တၢ်တီတၢ်လိၤ အသ့ထိးဖၣ်တဖၣ်” လၢအမ့ၢ် ပှၤခရံာ်ဖိလၢ အဘၣ်တၢ်ဒိးဖှူအီၤတဖၣ်, အပှၤကလုာ်အသီလၢ “ယွၤအအံၣ်စရ့လး” အနီၢ်သးဟီၣ်ကဝီၤအပူၤလီၤ. (ကလၤတံ ၆:၁၆) ဖဲယၤဖှိၣ်နံၣ် တဖၣ်အတီၢ်ပူၤ “သ့ထိးဖၣ်တဖၣ်” အံၤအနီၣ်ဂံၢ် ဟဲအါထီၣ်ဝဲတုၤလၢ ၁၄၄,၀၀၀ လီၤ. ဒီးဒ်သိးအဝဲသ့ၣ် ကကဲထီၣ်တၢ်ဃံတၢ်လၤဒီး တၢ်မၤလၤကပီၤလၢ ယဟိဝၤယွၤအဂီၢ်န့ၣ် အဝဲသ့ၣ် သၣ်ထီၣ်ဝဲ တၢ်တီတၢ်လိၤ အတၤသၣ်လီၤ. (လီၣ်ဖျါ ၁၄:၃) “သ့ထိးဖၣ်” လၢလီၢ်ခံကတၢၢ်တဖၣ်န့ၣ် ဟဲဒိးထီၣ်စးထီၣ်ဖဲ ၁၉၁၉ လီၤ. မ့ၢ်လၢယွၤအအံၣ်စရ့လး လၢအအိၣ်လီၤတဲာ်သ့ၣ်တဖၣ် တဟူးတဂဲၤဘၣ် တစိၢ်တလီၢ်အဃိ ၁၉၁၉ န့ၣ်ကစၢ် မၤဆူၣ်ထီၣ် အဝဲသ့ၣ်အဂံၢ်အဘါလီၤ. ကစၢ်ယွၤ ဒုးအီအီၤ နီၢ်သးအထံလၢလၢပှဲၤပှဲၤအဃိ အဝဲသ့ၣ် ကဲထီၣ် တၢ်တီတၢ်လိၤ အပှၢ်မုၢ်ကနၢလၢ အပှဲၤဒီးသ့ၣ်ထူၣ်လၢ အဖီထီၣ်သၣ်ထီၣ်တဖၣ်န့ၣ်လီၤ.—ယၡါယၤ ၂၇:၆.
၁၄ ဘၣ်ဃးဒီး “သ့ထိးဖၣ်တဖၣ်” အံၤအတၢ်မၤ အိၣ်ဝဲဒ်လဲၣ်န့ၣ် ဝံယၡါယၤ ဆဲးတဲဝဲလၢ– “ဒီးအဝဲသ့ၣ်ကမၤက့ၤ တၢ်အလီၢ်လီၤပှီၢ်လၢသီ, ဒီးကမၤထီၣ်က့ၤတၢ်အိၣ်သယုၢ်လၢပျၢၤ, ဒီးကတ့လီၤက့ၤဝ့ၢ်လီၤပှီၢ်တဖၣ်, တၢ်အိၣ်သယုၢ်လၢကစၢၤကစၢၤန့ၣ်လီၤ.” (ယၡါယၤ ၆၁:၄) ဖၢၡၢၣ် အစီၤပၤ ကိရ့ၣ် ဟ့ၣ်လီၤတၢ်ကလုၢ်အဃိ ပှၤယူဒၤဖိလၢ အသးတီလၢအဟဲက့ၤဟးထီၣ်ဆူ ဝ့ၢ်ဘၤဘူၤလိၣ်တဖၣ်န့ၣ် ဟဲက့ၤဘှီထီၣ်က့ၤဝဲ ဝ့ၢ်ယရူၤၡလ့ၣ်ဒီး အတၢ်လုၢ်ဟံၣ် လၢအလီၤပှီၢ်တ့ၢ်လၢ အနံၣ်တဖၣ်အနံၣ်လီၤ. ဆၢကတီၢ်ဖဲ ခ.န ၃၃ အလီၢ်ခံဒီး ၁၉၁၉ အလီၢ်ခံ အတီၢ်ပူၤ တၢ်သူၣ်ထီၣ်ဘှီထီၣ်က့ၤ အတၢ်ရဲၣ်တၢ်ကျဲၤ အိၣ်စ့ၢ်ကီးလီၤ.
၁၅ ဖဲ ခ.န ၃၃ န့ၣ်ယ့ၣ်ၡူး ဘၣ်တၢ်ဖီၣ်အီၤ ဒီးမၤသံအီၤအဃိ အပျဲၢ်အဘီၣ်တဖၣ် သူၣ်အုးသးအုးဒိၣ်မးလီၤ. (မးသဲ ၂၆:၃၁) ဘၣ်ဆၣ် ဖဲယ့ၣ်ၡူး ဂဲၤဆၢထၢၣ်သမူထီၣ်က့ၤဒီး လီၣ်ဖျါထီၣ်အသး လၢအမဲာ်ညါအခါ အဝဲသ့ၣ် အတၢ်ထံၣ်ဆီတလဲဝဲလီၤ. ဒီးအဝဲသ့ၣ် ဒိးန့ၢ်ဘၣ်သးစီဆှံ ဒီးမၤဝဲတၢ်သးခုကစီၣ်တၢ်မၤလၢ “ယရူၤၡလ့ၣ်, ဒီးကီၢ်ယူဒၤဒီကီၢ်ညါ, ဒီးၡၤမရံ, ဒီးပၢၢ်လၢဟီၣ်ခိၣ်အကတၢၢ်လီၤ.” (မၤတၢ် ၁:၈) အဃိ တၢ်ဘူၣ်တၢ်ဘါ အမ့ၢ်အတီ ဘၣ်တၢ်စးထီၣ် သူၣ်ထီၣ်က့ၤအီၤလီၤ. ဒ်န့ၣ်အသိးဖဲ ၁၉၁၉ န့ၣ်ယ့ၣ်ၡူးမၢဝဲ အဒီပုၢ်ဝဲၢ်လၢအဘၣ် တၢ်ဒိးဖှူအီၤတဖၣ် လၢကသူၣ်ထီၣ်က့ၤဝဲ “တၢ်အိၣ်သယုၢ်လၢ ကစၢၤကစၢၤ” လီၤ. ဖဲယၤဖှိၣ်နံၣ်တဖၣ် အတီၢ်ပူၤ ပှၤခရံာ်ဖိခိၣ်နၢ်တဖၣ် တသိၣ်လိဝဲ တၢ်ကူၣ်ဘၣ်ကူၣ်သ့လၢ ဘၣ်ဃးဒီး ယဟိဝၤယွၤဘၣ်. လၢတၢ်န့ၣ်အလီၢ် အဝဲသ့ၣ် သိၣ်လိဝဲ ပှၤဟီၣ်ခိၣ်ဖိ အလုၢ်လၢ်ထူသနူ ဒီးတၢ်သိၣ်တၢ်သီလၢ အထီဒါလိာ်သးဒီး လံာ်စီဆှံလီၤ. ဒ်သိး တၢ်ဘူၣ်တၢ်ဘါ အမ့ၢ်အတီလၢ ဘၣ်တၢ်သူၣ်ထီၣ်က့ၤအီၤအံၤ ကလဲၤထီၣ်လဲၤထီအဂီၢ် ခရံာ်ဖိလၢ အဘၣ်တၢ်ဒိးဖှူအီၤတဖၣ် ကဘၣ်မၤကဆှီထီၣ်က့ၤ တၢ်အိၣ်ဖှိၣ်အလုၢ်အလၢ်လၢ အဟဲလၢတၢ်ဘူၣ်တၢ်ဘါ အကမၣ်လီၤ. တကးဒံးဘၣ် အဝဲသ့ၣ်စးထီၣ်မၤဝဲ တၢ်စံၣ်တဲၤတဲလီၤတၢ် ခဲၣ်ဖ့လီၤ.—မၢ်ကူး ၁၃:၁၀.
(ယၡါယၤ ၆၁:၅, ၆) ဒီးပှၤတခီဘီမုၢ်ဖိကဆၢထၢၣ်, ဒီးကွၢ်သုသိအဖုတဖၣ်, ဒီးပှၤတခီဘီမုၢ်ဖိအဖိခွါတဖၣ် ကကဲထီၣ်သုပှၤထဲၣ်တၢ်ဖိ, ဒီးပှၤကကတဲာ်ကတီၤသု စပံးမုၢ်လီၤ. ၆ မ့မ့ၢ်သုဝဲသ့ၣ်အံၤ, တၢ်ကကိးသုလၢ ယွၤအပှၤလုၢ်တၢ်အဒိၣ်, ပှၤကကိးသုလၢ ပှၤမၤကစၢ်အတၢ်လီၤ. သုကအီၣ်ပှၤကလုာ်တဖၣ် အစုလီၢ်အခီၣ်ခိၣ်, ဒီးသုကပာ်ကဖိသုသးလၢ အလၤကပီၤအပူၤလီၤ.
တၢး၁၂ ၁၂/၁၅ ကဘျံးပၤ ၂၅ အဆၢ ၅-၆
“ပှၤတမှံၤ”တဖၣ် ပာ်ဖှိၣ်ထီၣ်အသးလၢတၢ်ဘူၣ်တၢ်ဘါ အမ့ၢ်အတီ
၅ ပှၤတနီၤနီၤ ကတဲဝဲဘၣ်ဃးဒီး ဝံယၡါယၤ အဆၢဒိၣ် ၆၁ လၢအဟဲလၢထီၣ်ပှဲၤထီၣ်လၢ ခရံာ်ဖိတၢ်အိၣ်ဖှိၣ်အပူၤန့ၣ်လီၤ. ဖဲအဆၢဖိ ၆ န့ၣ်ပာ်ဖျါထီၣ်ဝဲ ပှၤလၢအမၤတၢ်ဒ် “ယွၤအပှၤလုၢ်တၢ်အဒိၣ်” လီၤ. မ့မ့ၢ်အဆၢဖိ ၅ န့ၣ်ပာ်ဖျါထီၣ်ဝဲလၢ “ပှၤတခီဘီမုၢ်ဖိ” လၢကမၤစၢၤဝဲ ပှၤလုၢ်တၢ်အဒိၣ်လီၤ. လံာ်စီဆှံတဆၢအံၤ ပကြၢးနၢ်ပၢၢ်အီၤဒ်လဲၣ်.
၆ ပသ့ၣ်ညါလၢ “ပှၤလုၢ်တၢ်အဒိၣ်န့ၣ်” မ့ၢ်ခရံာ်ဖိလၢ ဘၣ်တၢ်ဒိးဖှူအီၤတဖၣ်လၢအ “အိၣ်လၢ တၢ်ဂဲၤဆၢထၢၣ် အခီၣ်ထံးတတီၤ” ဒီးအဝဲသ့ၣ် “ကကဲထီၣ်ပှၤလုၢ်တၢ်အခိၣ် ဘၣ်ဃးဒီးယွၤ, ဒီးခရံာ်, ဒီးကပၢဘၣ်တၢ်ဒီးအီၤ အနံၣ်တကထိလီၤ.” (လီၣ်ဖျါ ၂၀:၆) တကးဒံးဘၣ် ခရံာ်ဖိလၢ အအိၣ်ဒီးတၢ်သးတီအါမး ကအိၣ်မူဘၣ်လၢ ဟီၣ်ခိၣ်ချၢလီၤ. အဝဲသ့ၣ် မၤတၢ်ဒီး ရ့လိာ်အသးဘူးဘူး တံၢ်တံၢ်ဒီး ပှၤလၢကထီၣ်ဘၣ်ဆူ မူခိၣ်တဖၣ်လီၤ. အဝဲသ့ၣ်မ့ၢ် ပှၤတခီဘီမုၢ်ဖိလၢ အမၤတၢ်ဒီး “ယွၤအပှၤလုၢ်တၢ်အဒိၣ်” ဒ် “ပှၤထဲၣ်တၢ်ဖိ, ဒီးပှၤကကတဲာ်ကတီၤသု စပံးမုၢ်လီၤ.” အဝဲသ့ၣ် မၤစၢၤပှၤလၢ အဘၣ်တၢ်ဒိးဖှူအီၤ လၢအမၤလၤကပီၤကစၢ်ယွၤ, ခီဖျိလၢ တၢ်စံၣ်တဲၤတဲလီၤဒီး တၢ်သိၣ်လိနဲၣ်လိတၢ်လီၤ. လၢတၢ်အဲၣ်တၢ်ကွံအပူၤ ပှၤဘၣ်တၢ်ဒိးဖှူအီၤဒီး “သိလၢအဂုၤအဂၤ” တဖၣ်သိၣ်လိပှၤဂၤလၢ တၢ်မ့ၢ်တၢ်တီဒီး မၤစၢၤအဝဲသ့ၣ်ဒ်သိး ကအိၣ်မူဒ် တၢ်မ့ၢ်တၢ်တီအကျဲအသိးလီၤ.—ယိၤဟၣ် ၁၀:၁၆.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ယၡါယၤ ၆၀:၁၇) လၢတိၢ်ဂီၤအလီၢ်န့ၣ် ယကဟဲစိာ်ထူ, ဒီးလၢထးအလီၢ်န့ၣ် ယကဟဲစိာ်စ့, ဒီးလၢသ့ၣ်အလီၢ်န့ၣ် တိၢ်ဂီၤ, ဒီးလၢလၢၢ်အလီၢ်န့ၣ်ထးလီၤ. ဒီးယကပာ် ပှၤကွၢ်နၤတဖၣ် လၢတၢ်ဃူတၢ်ဖိး, ဒီးနပဒိၣ်တဖၣ်လၢ တၢ်တီတၢ်လိၤလီၤ.
တၢး၁၅ ၀၇/၀၁ ကဘျံးပၤ ၁၃-၁၅ အဆၢ ၁၄-၁၇
ဂုာ်ကျဲးစၢးမၤဂ့ၤထီၣ် နီၢ်သးပၤရဒံစူးတက့ၢ်
၁၄ ဒီပုၢ်ဝဲၢ်လၢအသးပှၢ်တဖၣ် လဲၤခီဖျိဘၣ်တၢ်ဆီတလဲ လၢတၢ်အိၣ်ဖှိၣ်ပူၤ ဒီးတူၢ်ဘၣ်ဝဲလၢ တၢ်ဆီတလဲတဖၣ်အံၤ မၤဃံမၤလၤဒိၣ်ထီၣ်ကစၢ်ယွၤ အတၢ်ကရၢကရိလၢ ဟီၣ်ခိၣ်ချၢန့ၣ်လီၤ. အဝဲသ့ၣ်တဖၣ် သ့ၣ်နီၣ်ထီၣ်က့ၤ တၢ်ဆီတလဲတဖၣ်လၢ ဘၣ်တၢ်ပာ်ဖျါထီၣ်အီၤ ဒ်လာ်အံၤအသိးန့ၣ်လီၤ. လၢအပူၤကွံာ်န့ၣ် တၢ်အိၣ်ဖှိၣ်တဖုစုာ်စုာ် အိၣ်ဒီးတၢ်အိၣ်ဖှိၣ်အခ့အပှၤထဲတဂၤ ဒီးမ့မ့ၢ်အခါခဲအံၤ အိၣ်ဒီးတၢ်အိၣ်ဖှိၣ်သးပှၢ်ကရူၢ်လီၤ. လၢညါဝဲၤတြၢ်တဖၣ်အိၣ်ဒီး ဝဲၤတြၢ်အခ့အပှၤတဂၤ ဒီးတမ့ၢ် ဝဲၤတြၢ်ကမံးတံာ် ဒ်ပစိၤခဲအံၤအသိးဘၣ်. လၢအပူၤကွံာ်န့ၣ် တၢးထီခိးတၢ် တၢ်ကရၢကရိအခိၣ်တဂၤ ပၢဆှၢရဲၣ်ကျဲၤ ပတၢ်ကရၢကရိ ဘၣ်ဆၣ်ခဲကနံၣ်အံၤ ယဟိဝၤပှၤအုၣ်အသး အပှၤပၢဆှၢတၢ်ကမံးတံာ် အိၣ်ဝဲလီၤ. လၢညါ ဒီပုၢ်ဝဲၢ်ခွါတဖၣ်အံၤ အိၣ်ဒီးပှၤလၢအမၤစၢၤအီၤ သနာ်က့ အနီၢ်နီၢ်န့ၣ် ပှၤလၢ အဆၢတဲာ်တၢ်လၢ တၢ်အိၣ်ဖှိၣ်တဖၣ်, ဝဲၤတြၢ် ဒီးဝဲၤလီၢ်ခိၣ်သ့ၣ်န့ၣ် မ့ၢ်ဒၣ်ထဲဒီပုၢ်ဝဲၢ်ခွါတဂၤန့ၣ်လီၤ. ဖဲ ၁၉၇၀ အလီၢ်ခံန့ၣ် ပတၢ်ကရၢကရိ အတၢ်ရဲၣ်တၢ်ကျဲၤ ဘၣ်တၢ်ဆီတလဲအီၤအဃိ တၢ်အိၣ်ဖှိၣ်သးပှၢ် အကရူၢ်တဖၣ် ဒိးန့ၢ်ဘၣ်မူဒါလၢကဆၢတဲာ်တၢ်အဂီၢ်န့ၣ်လီၤ.
၁၅ ဘၣ်မနုၤအဃိ တၢ်ဆီတလဲတဖၣ်အံၤ ကဲဘျုးလၢ ပတၢ်ကရၢကရိအဂီၢ်လဲၣ်. မ့ၢ်လၢ တၢ်ဆီတလဲတဖၣ်အံၤ ဟဲခီဖျိပဃုသ့ၣ်ညါနၢ်ပၢၢ်အါထီၣ် လံာ်စီဆှံအဃိန့ၣ်လီၤ. လၢအပူၤကွံာ် ပှၤဆၢတဲာ်တၢ်ထဲတဂၤလီၤ. မ့မ့ၢ်ခဲအံၤ ပတၢ်ကရၢကရိ ဒိးန့ၢ်ဘၣ်အဘျုးလၢ တၢ်အိၣ်ဖှိၣ်သးပှၢ် ကိးဂၤဒဲး အတၢ်သ့တၢ်ဘၣ်တဖၣ်အဃိန့ၣ်လီၤ. အဝဲသ့ၣ်မ့ၢ် “တၢ်ဘျုးတၢ်ဖှိၣ်လၢ ပှၤကညီ” လၢယဟိဝၤယွၤဟ့ၣ်လီၤဝဲလီၤ.—အ့းဖ့းစူး ၄:၈; ကတိၤဒိ ၂၄:၆.
၁၆ ဆိကမိၣ်ကွၢ် ပလံာ်ပလဲၢ် အတၢ်ဆီတလဲတဖၣ် လၢဟဲအိၣ်ထီၣ်ဝဲတယံာ်ဒံးဘၣ်န့ၣ်တက့ၢ်. ဖဲပစံၣ်တဲၤတဲလီၤတၢ်အခါ ပနီၤလီၤလံာ်လဲၢ်လၢထုးန့ၢ်ပှၤသး ဒီးကဲထီၣ်တၢ်မၤစၢၤလၢပှၤဂီၢ် လၢတၢ်သူၣ်ခုသးခုအပူၤလီၤ. ဆိကမိၣ်ကွၢ်ဘၣ်ဃးဒီး ပသူစဲးဖီကဟၣ်လၢ အလဲၤထီၣ်လဲၤထီဝဲ ဒ်သိးပကစံၣ်တဲၤတဲလီၤ တၢ်သးခုကစီၣ်ဒ်လဲၣ်အဂ့ၢ်န့ၣ်တက့ၢ်. အဒိ, ပှၤအါဂၤဒိးန့ၢ်ဘၣ်တၢ်မၤစၢၤ လၢအဝဲသ့ၣ်လိၣ်ဘၣ်ဝဲခီဖျိလၢ jw.org ပှာ်ယဲၤသန့န့ၣ်လီၤ. တၢ်ဆီတလဲသ့ၣ်တဖၣ်အံၤ ပာ်ဖျါထီၣ်ဝဲ ယဟိဝၤယွၤအတၢ်သးအိၣ် ဒီးတၢ်အဲၣ်နီၢ်နီၢ်လၢ ပှၤဟီၣ်ခိၣ်ဖိတဖၣ်အဂီၢ်န့ၣ်လီၤ.
၁၇ ပသးပှဲၤဒီးတၢ်စံးဘျုးစံးဖှိၣ် ခီဖျိလၢ ပတၢ်အိၣ်ဖှိၣ်ရိဖှိၣ် တၢ်ရဲၣ်တၢ်ကျဲၤ ဘၣ်တၢ်ဆီတလဲအီၤ အဃိလီၤ. လၢတၢ်န့ၣ်အဃိ ပဒိးန့ၢ်ဘၣ်တၢ်ဆၢကတီၢ်လၢ ပကမၤဟံၣ်ဖိဃီဖိ တၢ်မၤလိလံာ်စီဆှံ မ့တမ့ၢ် နီၢ်ကစၢ် တၢ်မၤလိလံာ်စီဆှံအဂီၢ်န့ၣ်လီၤ. ပသးခုစ့ၢ်ကီးလၢ ကဝီၤတၢ်အိၣ်ဖှိၣ်ဒီး တၢ်အိၣ်ဖှိၣ်ဖးဒိၣ် တၢ်ရဲၣ်တၢ်ကျဲၤတဖၣ် ဆီတလဲအသးအဃိန့ၣ်လီၤ. တနံၣ်ဘၣ်တနံၣ် တၢ်အိၣ်ဖှိၣ် အတၢ်ရဲၣ်တၢ်ကျဲၤတဖၣ်အံၤ ဂ့ၤထီၣ်ကွ့ၢ်ကွ့ၢ်လီၤ. ပသးခုစ့ၢ်ကီးလၢပဒိးန့ၢ်ဘၣ် တၢ်သိၣ်လိနဲၣ်လိလၢ ပလံာ်စီဆှံကၠိတဖၣ်န့ၣ်လီၤ. ခီဖျိလၢ တၢ်ဆီတလဲတဖၣ်အံၤအဃိ ပထံၣ်ဘၣ်လၢ ယဟိဝၤယွၤဟံးစုနဲၣ်ကျဲ အတၢ်ကရၢကရိ ဒီးအဝဲမၤဃံမၤလၤဒိၣ်ထီၣ် နီၢ်သးပၤရဒံစူးန့ၣ်လီၤ.
(ယၡါယၤ ၆၁:၈, ၉) အဂ့ၢ်ဒ်အံၤ, ယဲဒၣ်အံၤယမ့ၢ်ယွၤလီၤ. ယအဲၣ်တၢ်စံၣ်ညီၣ်တီ, ယသးဟ့တၢ်မၤန့ၢ်ဆူၣ်လၢ တၢ်လုၢ်တၢ်ပာ်အဂီၢ်လီၤ. ဒီးယကဟ့ၣ်လီၤအဘူးအလဲလၢ တၢ်မ့ၢ်တၢ်တီအပူၤ, ဒီးယကအၢၣ်လီၤအီလီၤ တၢ်အၢၣ်လီၤအီလီၤ အထူအယိာ်ဒီးအီၤလီၤ. ၉ အချံအသၣ်န့ၣ် ပှၤကသ့ၣ်ညါအီၤလၢ ပှၤကလုာ်တဖၣ်အကျါ, ဒီးအစၢၤအသွဲၣ်န့ၣ် လၢပှၤဂီၢ်မုၢ် အသးကံၢ်ပူၤန့ၣ်လီၤ. ကယဲၢ်ပှၤလၢ အထံၣ်ဘၣ်အီၤ ကအၢၣ်လီၤအီလီၤလၢအမ့ၢ် ပှၤအချံအသၣ်လၢ ယွၤဆိၣ်ဂ့ၤလံအီၤလီၤ.
တၢး၀၇ ၁/၁၅ ကဘျံးပၤ ၁၁ အဆၢ ၅
လံာ်စီဆှံ အတၢ်ပာ်ဖျါလၢ လံာ်ယၡါယၤ—၂
လံာ်စီဆှံ အတၢ်သံကွၢ်တဖၣ် အတၢ်စံးဆၢ–
၆၁:၈, ၉—“တၢ်အၢၣ်လီၤအီလီၤ အထူအယိာ်” န့ၣ်မ့ၢ်မနုၤလဲၣ်. “အချံအသၣ်” န့ၣ်မ့ၢ်မတၤတဖၣ်လဲၣ်. “တၢ်အၢၣ်လီၤအီလီၤ အထူအယိာ်” န့ၣ်မ့ၢ်ဝဲ တၢ်အၢၣ်လီၤအီလီၤအသီလၢ ယဟိဝၤယွၤ မၤဒီးခရံာ်ဖိလၢ ဘၣ်တၢ်ဒိးဖှူအီၤတဖၣ်န့ၣ်လီၤ. “အချံအသၣ်” န့ၣ်မ့ၢ်ဝဲ “သိလၢအဂုၤအဂၤ” လၢအကကွဲၢ်တဖၣ်လၢ အတူၢ်လိာ် ခရံာ်ဖိလၢ ဘၣ်တၢ်ဒိးဖှူအီၤတဖၣ် အတၢ်စံၣ်တဲၤတဲလီၤန့ၣ်လီၤ.—ယိၤဟၣ် ၁၀:၁၆.
တၢ်ဖးလံာ်စီဆှံ
(ယၡါယၤ ၆၂:၁-၁၂) လၢစံယိၣ်အဃိန့ၣ် ယတအိၣ်ဘှီၣ်ကလာ်ဘၣ်, ဒီးလၢယရူၤၡလ့ၣ်အဃိန့ၣ် ယတအိၣ်ဘှံးဘၣ်, တုၤလီၤလၢ အတၢ်တီတၢ်လိၤ လဲၤထီၣ်ဝဲဒ် တၢ်ကယဲၢ်ကယူာ်အသိး, ဒီးအတၢ်အုၣ်က့ၤခီၣ်က့ၤ ဒ်မ့ၣ်အူဒၢလၢအကဲၤကပီၤထီၣ်အသိးန့ၣ်လီၤ. ၂ ဒီးပှၤကလုာ်တဖၣ် ကထံၣ်ဘၣ် နတၢ်တီတၢ်လိၤ, ဒီးစီၤပၤခဲလၢာ်န့ၣ်နလၤကပီၤလီၤ. ဒီးတၢ်ကကိးနၤလၢ နမံၤသီလၢ ယွၤအထးခိၣ် ကယုၢ်ဝဲလီၤ. ၃ ဒီးနကကဲထီၣ်တၢ်ခိၣ်သလုး အိၣ်ဒီးအဃံအလၤလၢယွၤအစုပူၤ, ဒီးစီၤပၤအခိၣ်ဒၢလၢ နကစၢ်အစုပူၤလီၤ. ၄ တၢ်တကိးလၢၤဘၣ်နၤလၢ တၢ်လဲၤသဒၣ်ဘၣ်, ဒီးနကီၢ်န့ၣ်တၢ်အိၣ်သယုၢ်ဘၣ်. မ့မ့ၢ်တၢ်ကကိးနၤလၢဃ့ပစံဘၤ, ဒီးနကီၢ်န့ၣ်လၢဘဧူလၤလီၤ. အဂ့ၢ်ဒ်အံၤ, ယွၤမုာ်လၤတၢ်လၢနပူၤ, ဒီးနထံနကီၢ် ကန့ၢ်ဝၤလီၤ. ၅ အဂ့ၢ်ဒ်အံၤ, ဒ်ဖိၣ်သၣ်ခွါန့ၢ်မါလၢ ပှၤမုၣ်လိၣ်ဘိအသိးန့ၣ်, နဖိခွါတဖၣ် ကန့ၢ်မါလၢနၤဒ်န့ၣ်သိး, ဒီးဒ်တလးမူးပိာ်ခွါ သူၣ်ဖှံသးညီလၢ အတလးမူးပိာ်မုၣ်အသိးန့ၣ် နကစၢၢ် ကသူၣ်ဖှံသးညီလၢနဃိ ဒ်န့ၣ်အသိးလီၤ. ၆ ယပာ်ပှၤခိးတၢ်ဖိလၢနခိၣ်ဒူ, ယရူၤၡလ့ၣ်ဧၢ, သ့တနံၤကျၢၤဒီး သီတနၤကျၢၤတအိၣ်ဘှီၣ်ဘၣ်. ပှၤလၢအဒုးသ့ၣ်နီၣ်ထီၣ်က့ၤယွၤသ့ၣ်ဧၢ, အိၣ်ဘှီၣ်ကလာ်တဂ့ၤ. ၇ ဒီးဒုးအိၣ်ဘှီၣ်ကလာ်အီၤတဂ့ၤ, တုၤလီၤလၢအဒုးအိၣ်ဂၢၢ်ဆိးကျၢၤ, တုၤလီၤလၢအပာ်ယရူၤၡလ့ၣ်လၢ တၢ်စံးထီၣ်ပတြၢၤလၢဟီၣ်ခိၣ်ချၢန့ၣ်လီၤ. ၈ ယွၤဆိၣ်လီၤအသးလၢအစုထွဲအမဲာ်ညါ, ဒီးလၢအစုဒုၣ်ဆူၣ် အမဲာ်ညါ, မ့ၢ်မးယတဟ့ၣ်လၢၤဘၣ် နဘုဧိၤဟုဧိၤလၢတၢ်အီၣ်လၢ နဒုၣ်နဒါအဂီၢ်ဘၣ်, ဒီးတခီဘီမုၢ်ဖိ တအီလၢၤဘၣ် နစပံးထံအသီလၢနမၤအီၤန့ၣ်ဘၣ်. ၉ အဂ့ၢ်ဒ်အံၤ, ပှၤလၢအကူးဘုတဖၣ်ကအီၣ်အတၢ်, ဒီးစံးထီၣ်ပတြၢၤယွၤလီၤ. ဒီးပှၤလၢအထၢဖှိၣ်တၢ်တဖၣ် ကအီအတၢ်လၢယလီၢ်စီဆှံအဂၢၤပူၤလီၤ. ၁၀ လဲၤထီၣ်, လဲၤထီၣ်လၢပဲတရီန့ၣ်, ကတဲာ်ကတီၤပှၤဂီၢ်မုၢ်အကျဲ, မၤထီၣ်ထီ, မၤထီၣ်ထီကျဲမုၢ်တဘိ, ထၢထီၣ်လၢၢ်ဧိၤမဲးဧိၤ, ယူာ်ထီၣ်ထီသုးဖိအလၣ်လၢ ပှၤဂီၢ်မုၢ်တဖၣ်အဂီၢ်တက့ၢ်. ၁၁ ကွၢ်ကွၢ်, ယွၤဒုးနၢ်ဟူ တၢ်ပၢၢ်လၢ ဟီၣ်ခိၣ်အကတၢၢ်, စံးဘၣ်စံယိၣ်အဖိမုၣ်, ကွၢ်ကွၢ်, နတၢ်အုၣ်က့ၤခီၣ်က့ၤဟဲဝဲ, ကွၢ်ကွၢ်, အိၣ်ဝဲဒီးတၢ်အဘူးအလဲ, ဒီးတၢ်လၢအဟ့ၣ်ကၣ်န့ၣ် အိၣ်ဝဲလၢအမဲာ်ညါလီၤ. ၁၂ ဒီးတၢ်ကကိးအီၤလၢ ပှၤစီဆှံတကလုာ်, ပှၤဒိးပှ့ၤက့ၤအသးလၢယွၤ, ဒီးတၢ်ကကိးနၤလၢပှၤလၢတၢ်ဃုအီၤ, ဝ့ၢ်လၢ တၢ်တလဲၤသဒၣ်ဘၣ်အီၤတဖျၢၣ်န့ၣ်လီၤ.
လါဖ့ၤဘြူၤအါရံၤ ၂၇–လါမၢ်ၡး ၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယၡါယၤ ၆၃-၆၆
“ခီဖျိလၢ မူခိၣ်အသီဒီး ဟီၣ်ခိၣ်အသီအဃိပကဒိးန့ၢ်ဘၣ် တၢ်သူၣ်ခုသးခုဖးဒိၣ်”
(ယၡါယၤ ၆၅:၁၇) အဂ့ၢ်ဒ်အံၤ, ကွၢ်ကွၢ်, ယတ့လီၤမူခိၣ်အသီ, ဒီးဟီၣ်ခိၣ်အသီ, ဒီးတၢ်အခီၣ်ထံးတဖၣ်န့ၣ် တၢ်တသ့ၣ်နီၣ်ထီၣ်က့ၤဘၣ်အီၤဘၣ်. ဒီးတအိၣ်ထီၣ်လၢၤဘၣ်လၢ ပှၤအသးကံၢ်ပူၤဘၣ်.
ip-2 ကဘျံးပၤ ၃၈၃ အဆၢ ၂၃
“သူၣ်ခုသးခုဒီး သူၣ်ဖှံသးညီလၢ တၢ်လၢယတ့လီၤအီၤ”
၂၃ လံာ်လီၣ်ဖျါ ပာ်ဖျါထီၣ်ဝဲ တၢ်ထံၣ်လၢညါခီတခါလၢ တၢ်မၢဖိယိၤဟၣ်ထံၣ်ဝဲလီၤ. ဖဲန့ၣ်ပာ်ဖျါထီၣ်ဝဲလၢ မုၣ်ကီၤလံၢ်အတၢ်ရဲၣ်တၢ်ကျဲၤ ကဘၣ်တၢ်သုးကွံာ်အီၤ ဖဲယဟိဝၤယွၤအမုၢ်နံၤလၢ အကဟဲန့ၣ်လီၤ. တၢ်န့ၣ်အလီၢ်ခံ မုၣ်ကီၤလံၢ်ကဘၣ် တၢ်တ့ၢ်လီၤအီၤဆူ တၢ်ယိာ်ပူၤလီၤ. (လီၣ်ဖျါ ၁၉:၁၁–၂၀:၃) ဒီးစီၤယိၤဟၣ် ကွဲးက့ၤဝဲ ဝံယၡါယၤအတၢ်ကတိၤလၢ အစံးဝဲ– “ယထံၣ်မူခိၣ်အသီဒီး ဟီၣ်ခိၣ်အသီလီၤ.” လံာ်စီဆှံအဆၢဖိလၢ လီၢ်ခံတဖၣ် ဒုးသ့ၣ်ညါပှၤ တၢ်ဆၢကတီၢ်လၢ ကစၢ်ယွၤကဆီတလဲကွံာ် ဟီၣ်ခိၣ်အတၢ်အိၣ်အသးလီၤ. (လီၣ်ဖျါ ၂၁:၁, ၃-၅) ပသ့ၣ်ညါဘၣ်လၢ ဝံယၡါယၤအတၢ်စံးပာ် ဘၣ်ဃးမူခိၣ်အသီဒီး ဟီၣ်ခိၣ်အသီန့ၣ် ကဟဲလၢပှဲၤထီၣ်ဝဲလၢ ကစၢ်ယွၤ အတၢ်ရဲၣ်တၢ်ကျဲၤလၢ အသီအံၤအပူၤလီၤ. လၢမူခိၣ် အတၢ်ပၢတၢ်ပြးအသီ အဖီလာ်န့ၣ် ပှၤဟီၣ်ခိၣ်ဖိလၢ အတီအလိၤတဖၣ် ကအိၣ်မူဘၣ်လၢ ဟီၣ်ခိၣ်ပၤရဒံစူးလၢ ပှဲၤဒီးတၢ်ဆိၣ်ဂ့ၤလၢ နီၢ်ခိဒီးနီၢ်သးန့ၣ်လီၤ. တၢ်လၢအမၤသူၣ်မံသးမံပသးန့ၣ် မ့ၢ်ဝဲတၢ်စံးပာ်လၢ “တၢ်အခီၣ်ထံးတဖၣ် [တၢ်ဆူးတၢ်ဆါ, တၢ်နးတၢ်ဖှီၣ်ဒီး တၢ်ကီတၢ်ခဲလၢ ပှၤဟီၣ်ခိၣ်ဖိတဖၣ် ကွၢ်ဆၢၣ်မဲာ်ဘၣ်ဝဲ] တၢ်တသ့ၣ်နီၣ်ထီၣ်က့ၤဘၣ်အီၤဘၣ်. ဒီးတအိၣ်ထီၣ်လၢၤဘၣ်လၢ ပှၤအသးကံၢ်ပူၤဘၣ်.” ဖဲန့ၣ်အဆၢကတီၢ် တၢ်လၢပသ့ၣ်နီၣ်ထီၣ်တဖၣ်န့ၣ် တမ့ၢ်ကမၤသးအုးပှၤ ဒီးမၤဘၣ်ဒိပသး ဒ်သိးခဲအံၤလၢၤဘၣ်.
(ယၡါယၤ ၆၅:၁၈, ၁၉) မ့မ့ၢ်သုဝဲသ့ၣ်အံၤ သူၣ်ခုသးခုဒီးသူၣ်ဖှံသးညီလၢ တၢ်လၢယတ့လီၤအီၤအပူၤန့ၣ် လီၤစိၤလီၤထီတက့ၢ်. အဂ့ၢ်ဒ်အံၤ, ကွၢ်ကွၢ်, ယတ့လီၤယရူၤၡလ့ၣ်လၢ တၢ်သူၣ်ဖှံသးညီအလီၢ်, ဒီးအပှၤဂီၢ်မုၢ်လၢတၢ်သူၣ်ပိၢ်သးဝးအလီၢ်န့ၣ်လီၤ. ၁၉ ဒီးယကသူၣ်ဖှံသးညီလၢ ယရူၤၡလ့ၣ်အပူၤ, ဒီးသူၣ်ခုသးခုလၢယပှၤဂီၢ်မုၢ်အပူၤလီၤ. ဒီးတၢ်တနၢ်ဟူလၢၤဘၣ်တၢ်ဟီၣ်အသီၣ်, ဒီးတၢ်ကဲးကိးပသူထီၣ် အသီၣ်လၢ အပူၤဘၣ်.
ip-2 ကဘျံးပၤ ၃၈၄ အဆၢ ၂၅
“သူၣ်ခုသးခုဒီး သူၣ်ဖှံသးညီလၢ တၢ်လၢယတ့လီၤအီၤ”
၂၅ မုၢ်မဆါတနံၤအံၤစ့ၢ်ကီး ယဟိဝၤယွၤ မၤကဲထီၣ်ဝဲ ဝ့ၢ်ယရူၤၡလ့ၣ်လၢ “တၢ်သူၣ်ဖှံသးညီအလီၢ်” လီၤ. လၢကျဲဒ်လဲၣ်. ဒ်ပထံၣ်ဘၣ်တ့ၢ်လၢညါအသိး လၢခံန့ၣ် မူခိၣ်အသီလၢ ဟဲအိၣ်ထီၣ်ဖဲ ၁၉၁၄ နံၣ်န့ၣ်ပှၤပၢဃုာ်တၢ်တဖၣ် ကအိၣ်ဝဲ ၁၄၄,၀၀၀ လီၤ. ဝံအတၢ်စံးပာ် ပာ်ဖျါဝဲ အဝဲသ့ၣ်တဖၣ်လၢ “ယရူၤၡလ့ၣ်အသီ” လီၤ. (လီၣ်ဖျါ ၂၁:၂) ဘၣ်ဃးဒီး ယရူၤၡလ့ၣ်အသီန့ၣ် ကစၢ်ယွၤစံးဝဲ “ယတ့လီၤ ယရူၤၡလ့ၣ်လၢ တၢ်သူၣ်ဖှံသးညီအလီၢ်, ဒီးအပှၤဂီၢ်မုၢ်လၢ တၢ်သူၣ်ပိၢ်သးဝး အလီၢ်န့ၣ်လီၤ.” ကစၢ်ယွၤကသူဝဲ ယရူၤၡလ့ၣ်အသီဒီး ကဟ့ၣ်လီၤဝဲပှၤဟီၣ်ခိၣ်ဖိတဖၣ် လၢတၢ်ဆိၣ်ဂ့ၤလၢ ပဂံၢ်ထီၣ်ဒွးထီၣ် တလၢာ်ဘၣ်န့ၣ်လီၤ. ကစၢ်ယွၤကမၤလၢပှဲၤ ‘ပသးအတၢ်ဃ့တဖၣ်’ အဃိပတနၢ်ဟူဘၣ် တၢ်ဟီၣ်တၢ်ယၢၤဒီး တၢ်ကအုကစွါလၢၤဘၣ်.—စံးထီၣ်ပတြၢၤ ၃၇:၃, ၄.
(ယၡါယၤ ၆၅:၂၁-၂၃) ဒီးကသူၣ်ဟံၣ်, ဒီးကအိၣ်ဝဲဆိးဝဲလၢအပူၤ, ဒီးကသူၣ်စပံးအလီၢ်, ဒီးကအီၣ်အတၤသၣ်လီၤ. ၂၂ တမၤဘၣ်ဟံၣ်ဒီး ပှၤဂၤအိၣ်ဝဲဆိးဝဲလၢအပူၤဘၣ်. တသူၣ်ဘၣ်တၢ်ဒီး ပှၤဂၤအီၣ်အတၤသၣ်ဘၣ်. အဂ့ၢ်ဒ်အံၤ, ဒ်သ့ၣ်တထံးအမုၢ်နံၤအသိးန့ၣ် ယပှၤဂီၢ်မုၢ်အမုၢ်နံၤကအိၣ်လီၤ. ဒီးယပှၤဃုထၢဖိ ကမုာ်လၤတၢ်လၢအမၤဝဲလၢ အစုဃဲးဃဲးလီၤ. ၂၃ တမၤဘၣ်တၢ်ကလီကလီဘၣ်, ဒီးတဆံးစၢ်ဘၣ်တၢ်လၢ ဘၣ်ယိၣ်တၢ်အဂီၢ်ဘၣ်. အဂ့ၢ်ဒ်အံၤ, အဝဲသ့ၣ်တဖၣ်န့ၣ် မ့ၢ်တၢ်အချံအသၣ် ဘၣ်တၢ်ဆိၣ်ဂ့ၤလၢယွၤ, ဒီးအစၢၤအသွဲၣ် အိၣ်ဒီးအီၤလီၤ.
တၢး၁၂ ၉/၁၅ ကဘျံးပၤ ၉ အဆၢ ၄-၅
တၢ်မုာ်တၢ်ခုၣ်လၢ အနံၣ်တကထိအတီၢ်ပူၤဒီးအနံၣ်တကထိ ဝံၤအလီၢ်ခံ
‘အဝဲသ့ၣ်ကသူၣ်ဟံၣ်ဒီး ကသူၣ်စပံးအလီၢ်’
၄ ပှၤလၢတအဲၣ်ဒိးအိၣ်ဒီး အဟံၣ်ဖိဃီဖိလၢ အဟံၣ်ဒၣ်ဝဲအပူၤ ဒီးတအဲၣ်ဒိးအိၣ် မုာ်မုာ်ခုၣ်ခုၣ်ဘၣ်န့ၣ် ကအိၣ်ဝဲဧါ. ဘၣ်ဆၣ် မုၢ်မဆါတနံၤအံၤ ပှၤကအိၣ်ဘၣ်လၢ ပှၤဟံၣ်ဒၣ်ဝဲန့ၣ် တညီဘၣ်. ပှၤကညီတဖၣ် ဘၣ်အိၣ်ကတံာ်ကတူာ်လၢ ဝ့ၢ်တဖၣ်အပူၤလီၤ. ပှၤအါဂၤန့ၣ် ဘၣ်အိၣ်ဖှီၣ်အိၣ်ယာ်လၢ ဝ့ၢ်အချၢဒီး ဘၣ်အိၣ်ပတြီာ်လၢ ဟံၣ်ဆံးဆံးဖိတဖၣ်အပူၤလီၤ. အဝဲသ့ၣ် ကအိၣ်ဘၣ်လၢ အနီၢ်ကစၢ်အဟံၣ်န့ၣ် မ့ၢ်တၢ်မံမီၢ်လၢ အဂီၢ်လီၤ.
၅ လၢဘီမုၢ်အတၢ်ပၢအဖီလာ်န့ၣ် ပှၤကိးဂၤဒဲး ကအိၣ်ဘၣ်လၢ အနီၢ်ကစၢ်အဟံၣ်လီၤ. မ့ၢ်လၢဝံယၡါယၤ အတၢ်စံးပာ် အိၣ်ဝဲလၢ– “ဒီးကသူၣ်ဟံၣ်, ဒီးကအိၣ်ဝဲဆိးဝဲလၢအပူၤ, ဒီးကသူၣ်စပံးအလီၢ်, ဒီးကအီၣ်အတၤသၣ်လီၤ.” (ယၡါယၤ ၆၅:၂၁) ခါဆူညါန့ၣ် ပှၤကအိၣ်ဘၣ်လၢ ပှၤဟံၣ်ဒၣ်ဝဲလီၤ. မုၢ်မဆါတနံၤအံၤ ပှၤတနီၤအိၣ်ဘၣ်လၢ အနီၢ်ကစၢ်အဟံၣ်ဒီး တနီၤနီၤအိၣ်ဘၣ်လၢ ဟံၣ်ဒိၣ်ကျိၤသွါလီၤ. ဘၣ်ဆၣ် ထီဘိန့ၣ် အဝဲသ့ၣ် ဘၣ်အိၣ်ဒီး တၢ်ဘၣ်ယိၣ်ဘၣ်ဘှီလီၤ. မ့ၢ်လၢဟံၣ်သ့ၣ်တဖၣ် လီၤမၢ်ကွံာ်ဝဲသ့ ခီဖျိကျိၣ်စ့ တၢ်ကီတၢ်ခဲဒီး တၢ်ထူးတၢ်တီၤတဖၣ် လီၤမၢ်ကွံာ်ဝဲသ့ ခီဖျိတၢ်ဟုၣ်တၢ်ဘျၣ်တဖၣ် အဃိန့ၣ်လီၤ. မ့မ့ၢ်လၢ ဘီမုၢ်အတၢ်ပၢအဖီလာ်န့ၣ် တမ့ၢ်ဒ်န့ၣ်ဘၣ်. ဝံမံကၤကွဲးဝဲလၢ– “ဒီးပှၤကဆ့ၣ်နီၤလၢ အစပံးမုၢ် အဖီလာ်, ဒီးအသ့ၣ်ချၢၣ်ဒၢအဖီလာ်စုာ်စုာ်, ဒီးတၢ်တမၤပျံၤဘၣ်အီၤ နီတဂၤဘၣ်. အဂ့ၢ်ဒ်အံၤ, တၢ်သုးမုၢ်ဂီၢ်မုၢ်အယွၤ အထးခိၣ် ကတိၤလံတၢ်လံ.”—မံကၤ ၄:၄.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ယၡါယၤ ၆၃:၅) ဒီးယကွၢ်တၢ်ဒီး တၢ်မၤစၢၤတအိၣ်ဘၣ်, ဒီးယပာ်ယသးကမၢကမၣ်လၢ ပှၤဒုးအိၣ်ကျၢၤတၢ်တအိၣ်ဘၣ်အဃိလီၤ. မၤသးဒ်န့ၣ်ဒီး ယစုဒုၣ်ဒၣ်ယဲအုၣ်က့ၤခီၣ်က့ၤတၢ်လၢယဂီၢ်, ဒီးယသးကဲၤထီၣ်ဒုးအိၣ်ကျၢၤယၤလီၤ.
တၢး၀၇ ၁/၁၅ ကဘျံးပၤ ၁၁ အဆၢ ၆
လံာ်စီဆှံ အတၢ်ပာ်ဖျါလၢ လံာ်ယၡါယၤ—၂
၆၃:၅—ကစၢ်ယွၤ အတၢ်သးကဲၤထီၣ်န့ၣ် ဒုးအိၣ်ကျၢၤအီၤဒ်လဲၣ်. ကစၢ်ယွၤ အတၢ်သးကဲၤထီၣ်န့ၣ် မ့ၢ်တၢ်လၢ အပၢၤဃာ်ဝဲန့ၢ် ဒီးတီဝဲလိၤဝဲလီၤ. ကစၢ်ယွၤ အတၢ်သးကဲၤထီၣ်န့ၣ် ထိၣ်ဟူးထိၣ်ဂဲၤထီၣ်အီၤလၢ ကစံၣ်ညီၣ်တၢ် တီတီလိၤလိၤအဂီၢ်လီၤ.
(ယၡါယၤ ၆၄:၈) ဘၣ်ဆၣ်ဒီးယွၤဧၢ, နမ့ၢ်ပပၢ်လီၤ. ပဝဲဒၣ်အံၤပမ့ၢ်ကပံာ်ဟီၣ်ခိၣ်, ဒီးနဲဒၣ်နမ့ၢ် ပှၤတ့သပၢၤလီၤ. ဒီးပမ့ၢ်တၢ်လၢ နမၤလၢ နစုန့ၣ်ခဲလၢာ်လီၤ.
တၢး၁၃ ၆/၁၅ ကဘျံးပၤ ၂၅ အဆၢ ၃-၅
ပျဲယဟိဝၤယွၤ အတၢ်သိၣ်ဃီၣ်ဘှီနၤ
ပှၤတ့သပၢၤသူဝဲ အတၢ်န့ၢ်စိန့ၢ်ကမီၤဒ်လဲၣ်
၃ ဝံယၡါယၤ ၆၄:၈ ပာ်ဖျါထီၣ်ဝဲ ယဟိဝၤယွၤ အတၢ်န့ၢ်စိန့ၢ်ကမီၤလၢ ပှၤတဂၤစုာ်စုာ်ဒီး ပှၤဒီကလုာ်အဖီခိၣ်န့ၣ် ဘၣ်တၢ်ဒိလီၤအီၤလၢ– “ယွၤဧၢ, နမ့ၢ်ပပၢ်လီၤ. ပဝဲဒၣ်အံၤ ပမ့ၢ်ကပံာ်ဟီၣ်ခိၣ်, ဒီးနဲဒၣ်နမ့ၢ် ပှၤတ့သပၢၤလီၤ. ဒီးပမ့ၢ်တၢ်လၢ နမၤလၢနစုန့ၣ် ခဲလၢာ်လီၤ.” ပှၤတ့သပၢၤတဂၤန့ၣ် အိၣ်ဒီးတၢ်ခွဲးတၢ်ယာ်လၢ ကမၤကဲထီၣ်ကပံာ်လၢ ဖီကိဒ် အဲၣ်ဒိးမၤဝဲအသိးလီၤ. ကပံာ်န့ၣ် ကဲသရၣ်လၢ ပှၤတ့အီၤတဂၤ အဖီခိၣ်တသ့ဘၣ်. ကစၢ်ယွၤဒီး ပှၤကညီစ့ၢ်ကီးဒ်န့ၣ်လီၤ. ဒ်ကပံာ်ဂ့ၢ်လိာ်ဘှီလိာ်တၢ်ဒီး ပှၤတ့အီၤတဂၤတသ့အသိး ပှၤဟီၣ်ခိၣ်ဖိတဖၣ်စ့ၢ်ကီး ဂ့ၢ်လိာ်ဘှီလိာ်တၢ်ဒီး ယဟိဝၤယွၤတသ့ဘၣ်.—ဖး ယံးရမံယၤ ၁၈:၁-၆ တက့ၢ်.
၄ လၢပျၢၤဖဲ ပှၤအံၣ်စရ့လးဖိတဖၣ်အစိၤန့ၣ် ယဟိဝၤယွၤ ပာ်ဖျါထီၣ်ဝဲ အတၢ်သ့တၢ်ဘၣ်လၢ တၢ်လၢပှၤတ့သပၢၤ မၤဝဲကပံာ်န့ၣ်လီၤ. ဘၣ်ဆၣ် တၢ်လီၤဆီအိၣ်ဝဲလီၤ. ပှၤတ့သပၢၤ မၤကဲထီၣ်ဝဲ ကပံာ်ကိၢ်လိၣ်လၢ ဖီကိအကလုာ်ကလုာ်သ့လီၤ. မ့မ့ၢ် ယဟိဝၤယွၤန့ၣ် မၤကဲထီၣ်ပှၤဟီၣ်ခိၣ်ဖိလၢ ပှၤဂ့ၤတနီၤ ပှၤအၢတနီၤဧါ. လံာ်စီဆှံပာ်ဖျါဝဲလၢ တမၤဝဲဒ်န့ၣ်ဘၣ်. ယဟိဝၤယွၤ ဟ့ၣ်ပှၤဟီၣ်ခိၣ်ဖိတဖၣ်လၢ တၢ်ဟ့ၣ်လုၢ်ဒိၣ်ပှ့ၤဒိၣ်လၢ အမ့ၢ်တၢ်သဘျ့လၢ အကဃုထၢတၢ်လၢ အနီၢ်ကစၢ်ဒၣ်ဝဲလီၤ. ကစၢ်ယွၤတသူ အတၢ်န့ၢ်စိန့ၢ်ကမီၤလၢ ကျဲလၢကမၤဟးဂီၤကွံာ် အတၢ်ဟ့ၣ်န့ၣ်ဘၣ်. လၢတၢ်န့ၣ်အဃိ ပှၤဟီၣ်ခိၣ်ဖိတဖၣ် ကဘၣ်ပျဲဝဲ တၢ်ဘၣ်တ့ကစၢ် ယဟိဝၤယွၤဘှီအီၤလီၤ.—ဖး ယံးရမံယၤ ၁၈:၇-၁၀ တက့ၢ်.
၅ ပှၤဟီၣ်ခိၣ်ဖိတဖၣ် မ့ၢ်တဒိးတ့အသးလၢ ပှၤတ့သပၢၤန့ၣ် ပှၤတ့သပၢၤယဟိဝၤယွၤ ကမၤဝဲဒ်လဲၣ်. ဆိကမိၣ်ကွၢ်လၢ ကပံာ်တလိၣ်န့ၣ် ပှၤတ့သပၢၤဖိတဂၤ ဘှီအီၤဒ် အအဲၣ်ဒိးဘှီဝဲအသိး တသ့ဘၣ်န့ၣ်တက့ၢ်. ဖဲန့ၣ်အဝဲ ကဘှီက့ၤသပၢၤလၢ အဂၤတမၠိ မ့တမ့ၢ် ကစူးကွံာ်ဝဲကပံာ်အံၤလီၤ. ပှၤတ့သပၢၤတဂၤ မ့ၢ်တတ့ဝဲသပၢၤလၢ ကျဲလၢအဘၣ်န့ၣ် တၢ်ကဲထီၣ်အသးဒ်န့ၣ်သ့ဝဲလီၤ. ဘၣ်ဆၣ် မ့မ့ၢ်ပဝဲ ပပှၤတ့သပၢၤဖိန့ၣ် တဒ်န့ၣ်အသိး နီတဘျီဘၣ်. (၅ မိၤၡ့ ၃၂:၄) ပှၤတဂၤ မ့ၢ်တပျဲ ယဟိဝၤယွၤ ဘှီအီၤန့ၣ် မ့ၢ်အတၢ်ကမၣ်လီၤ. ယဟိဝၤယွၤကွၢ်ဝဲ သပၢၤတဖျၢၣ် တူၢ်လိာ်အတၢ်ဘှီအီၤ ဒ်လဲၣ်ဒ်လဲၣ်ဒီး အဝဲဆီတလဲဝဲ အတၢ်တ့သပၢၤ အကျိၤအကျဲန့ၣ်လီၤ. ပှၤလၢအဒိကနၣ် အကလုၢ်န့ၣ် ကကဲထီၣ် ပှၤလၢကစၢ်ယွၤ သူအီၤသ့လီၤ. အဒိ, ပှၤလၢအဘၣ် တၢ်ဒိးဖှူအီၤတဖၣ် မ့ၢ်ဝဲ “တၢ်သးကညီၤ အသပၢၤ” လၢအဘၣ်တၢ်တ့အီၤဒ် “သပၢၤလၢ တၢ်လၤကပီၤအဂီၢ်” လီၤ. ဘၣ်ဆၣ် ပှၤလၢအတဒိကနၣ် ကစၢ်ယွၤအကလုၢ်န့ၣ်ကကဲထီၣ် “သပၢၤလၢ အကတီၤအသးလၢ တၢ်ဟးဂီၤအဂီၢ်န့ၣ်” လီၤ.—ရိမ့ၤ ၉:၁၉-၂၃.
တၢ်ဖးလံာ်စီဆှံ
(ယၡါယၤ ၆၃:၁-၁၀) ပှၤလၢအဟဲလၢအဒိၣ်, အိၣ်ဒီးအကူအသိး စုၣ်ဂီၤအသးလၢဘိးစရၤ, ပှၤလၢအကူအသိးအိၣ်ဒီး အဃံအလၤ, ဟဲလၢအဂံၢ်ဆူၣ်အဘါဆူၣ် အိၣ်ဒီးအကဟုအကညီၢ်န့ၣ် မ့ၢ်မတၤတဂၤလဲၣ်. ယၤ, ပှၤလၢအစံၣ်တဲၤတဲလီၤတၢ်တီတၢ်လိၤ, အစိဒိၣ်အကမီၤထီလၢ အကအုၣ်က့ၤခီၣ်က့ၤတၢ် အဂီၢ်လီၤ. ၂ နကူနသိးန့ၣ်ဂီၤဝဲ, ဒီးနဆ့မၤသးဒ်ပှၤလၢအယီၢ်စပံးသၣ် အနီၣ်စံၢ်ပူၤအသိးန့ၣ် မ့ၢ်အဘၣ်မနုၤလဲၣ်. ၃ ယယီၢ်စပံးသၣ်အနီၣ်စံၢ်ပူၤတဂၤဃီ, ဒီးလၢပှၤဂီၢ်မုၢ်အကျါန့ၣ် ပှၤတအိၣ်ဒီးယၤနီတဂၤဘၣ်. ဒီးယယီၢ်အီၤလၢယသးထီၣ်, ဒီးယယီၢ်တံၢ်အီၤလၢ ယသးကဲၤထီၣ်လီၤ. ဒီးအသွံၣ်ဖှံအသးလၢ ယကူယသိးအလိၤ, ဒီးယကမၤဘၣ်အၢ ယကူယသိးခဲလၢာ်လီၤ. ၄ အဂ့ၢ်ဒ်အံၤ, တၢ်မၤဆၢတၢ်အၢအမုၢ်တနံၤ အိၣ်ဝဲလၢယသးကံၢ်ပူၤ, ဒီးယပှၤဒိးပှ့ၤက့ၤအသးတဖၣ် အနံၣ်န့ၣ်ဘၣ်လံဝဲလံ. ၅ ဒီးယကွၢ်တၢ်ဒီး တၢ်မၤစၢၤတအိၣ်ဘၣ်, ဒီးယပာ်ယသးကမၢကမၣ်လၢ ပှၤဒုးအိၣ်ကျၢၤတၢ်တအိၣ်ဘၣ်အဃိလီၤ. မၤသးဒ်န့ၣ်ဒီး ယစုဒုၣ်ဒၣ်ယဲအုၣ်က့ၤခီၣ်က့ၤတၢ်လၢယဂီၢ်, ဒီးယသးကဲၤထီၣ်ဒုးအိၣ်ကျၢၤယၤလီၤ. ၆ ဒီးယယီၢ်လီၤပှၤဂီၢ်မုၢ်လၢယသးထီၣ်, ဒီးယဒုးမူၤအသးလၢယသးကဲၤထီၣ်, ဒီးယဂၢ်လီၤအသွံၣ်လၢဟီၣ်ခိၣ်အဖီခိၣ်လီၤ. ၇ ယွၤအဘျုးအဖှိၣ်န့ၣ် ယကဒုးသ့ၣ်နီၣ်ထီၣ်က့ၤအီၤ, တၢ်စံးထီၣ်ပတြၢၤယွၤန့ၣ် ဒ်ကယဲၢ်တၢ်လၢယွၤမၤဝဲလၢပဂီၢ်, ဒီးအတၢ်ဂ့ၤဖးဒိၣ်လၢ အမၤဝဲလၢအံၣ်စရ့လး အပှၤဟံၣ်ဖိအဂီၢ်ဒ်အသးအိၣ်တၢ်, ဒီးအဘျုးဒိၣ်အဖှိၣ်အါ အသိးန့ၣ်လီၤ. ၈ အဂ့ၢ်ဒ်အံၤ, စံးဝဲဒၣ်, အဝဲသ့ၣ်တဖၣ်မ့ၢ်သပှၢ်တၢၢ်ယပှၤဂီၢ်မုၢ်, ယဖိလၢ အတလီဘၣ်တၢ်ဘၣ်. ဒီးအဝဲဒၣ်ကဲထီၣ်ပှၤအုၣ်က့ၤခီၣ်က့ၤအီၤလီၤ. ၉ လၢအဝဲသ့ၣ် အတၢ်ထီဒုၣ်ထီဒါအီၤ ခဲလၢာ်အပူၤန့ၣ် အဝဲဒၣ်တမ့ၢ်ဘၣ်အဒုၣ်အဒါဘၣ်. ဒီးအမဲာ်ညါအကလူးတဂၤ အုၣ်က့ၤခီၣ်က့ၤအီၤလီၤ. မ့ၢ်အအဲၣ်ဝဲ, ဒီးသးအိၣ်ဝဲဒီး, ပှ့ၤက့ၤအီၤ, ဒီးဟံးန့ၢ်အီၤ, ဒီးစိာ်အီၤမုၢ်နံၤလၢပျၢၤခဲလၢာ်လီၤ. ၁၀ မ့မ့ၢ် အဝဲသ့ၣ်တဖၣ်န့ၣ် ပူထီၣ်တၢ်, ဒီးမၤကိၢ်အသးစီဆှံအသး, ဒီးအဝဲဒၣ် ကဲထီၣ်က့ၤအဒုၣ်အဒါ, ဒီးဒုးသုးလၢ အကစၢ်ဒၣ်ဝဲထီဒါအီၤလီၤ.