မူးပွဲန့ၣ် အဘၣ်ကစၢ်ယွၤအသး ခဲလၢာ်ဧါ

လၢပတၢ်အိၣ်မူအပူၤန့ၣ် ယဟိဝၤယွၤ အဲၣ်ဒိးလၢ ပကအိၣ်ဒီးတၢ်သူၣ်ဖှံသးညီ ဒီးတဘျီတခီၣ် အအဲၣ်ဒိးဝဲလၢ ပကမၤစ့ၢ်ကီးမူးပွဲ. ဘၣ်ဆၣ် မူးပွဲန့ၣ် အဘၣ်ကစၢ်ယွၤအသး ခဲလၢာ်ဧါ. ဖဲပဆၢတဲာ်တၢ် ဘၣ်ဃးဒီးမူးပွဲအခါ ပပာ်ဖျါထီၣ် ပတၢ်အဲၣ်လၢ ယဟိဝၤယွၤအဖီခိၣ် ကသ့ဒ်လဲၣ်.

၁. ဘၣ်မနုၤအဃိ မူးပွဲအါတက့ၢ်န့ၣ် တဘၣ် ယဟိဝၤယွၤအသးဘၣ်လဲၣ်.

နမ့ၢ်သ့ၣ်ညါဘၣ်လၢ မူးပွဲအါတက့ၢ်န့ၣ် အခီၣ်ထံးခီၣ်ဘိ ဟဲလၢ တၢ်စူၢ်တၢ်နာ်လၢအကမၣ် ဒီးဘၣ်ထွဲလိာ်သးဒီး တၢ်ဘူၣ်တၢ်ဘါလၢ အကမၣ်န့ၣ် နကဖုးဘၣ်နသး. မူးပွဲတဖၣ်အံၤ ဘၣ်ထွဲလိာ်သးဒီး တၢ်ဝံတၢ်နါ အတၢ်ဖံးတၢ်မၤ မ့တမ့ၢ် တၢ်သိၣ်လိလၢ အဘၣ်ဃးဒီး ပှၤကညီမ့ၢ်သံန့ၣ် အသးတသံဘၣ်. ဒီးမူးပွဲတနီၤနီၤန့ၣ် အခီၣ်ထံးခီၣ်ဘိဟဲလၢ တၢ်ဒုၣ်တၢ်ထု မ့တမ့ၢ် တၢ်စူၢ်တၢ်နာ် ဘၣ်ဃးဒီးတၢ်ဟဲဝံ. (ယၡါယၤ ၆၅:၁၁) အဃိ ယဟိဝၤယွၤ ဟ့ၣ်ပလီၢ်ဝဲ ပှၤလၢ အဘူၣ်ထီၣ်ဘါထီၣ်အီၤတဖၣ်လၢ “အိၣ်လီၤဆီဒီး အဝဲသ့ၣ် . . . [ဒီး]တၢ်တကဆှီဘၣ်န့ၣ် ထိးဘၣ်အီၤလၢၤတဂ့ၤ.”​—၂ ကရံၣ်သူး ၆:၁၇.a

၂. မူးပွဲလၢ အဘၣ်ဃးဒီး တၢ်မၤလၤကပီၤ ပှၤဟီၣ်ခိၣ်ဖိန့ၣ် ယဟိဝၤယွၤ ထံၣ်ဝဲဒ်လဲၣ်.

ယဟိဝၤယွၤ ဟ့ၣ်ပလီၢ်ပှၤလၢ တဘၣ် “နာ်န့ၢ် ပှၤဟီၣ်ခိၣ်ဖိ” တဂ့ၤ. (ဖး ယံးရမံယၤ ၁၇:၅.) မူးပွဲတနီၤနီၤန့ၣ် အမၤလၤကပီၤဝဲ ပှၤပၢတၢ်တဖၣ် ဒီးသုးဖိတဖၣ်. ဒီးမူးပွဲအဂၤတနီၤန့ၣ် မၤလၤကပီၤဝဲ ထံကီၢ်အတၢ်ပနီၣ် ဒ်သိးဒီးနီၣ်တယၢ် ဒီးထံကီၢ်အတၢ်သဘျ့. (၁ ယိၤဟၣ် ၅:၂၁) မ့မ့ၢ်လၢ မူးပွဲအဂၤတနီၤန့ၣ် အမၤလၤကပီၤဝဲ တၢ်ကရၢကရိတဖၣ်လၢ အဆီၣ်ထွဲမၤစၢၤ ထံဂ့ၢ်ကီၢ်ဂ့ၢ် ဒီးပှၤထံဖိကီၢ်ဖိ. အဃိ ပမ့ၢ်မၤမူးပွဲလၢ အမၤလၤကပီၤ ပှၤတဂၤဂၤ မ့တမ့ၢ် တၢ်ကရၢကရိတဖုဖု လီၤဆီဒၣ်တၢ် အမ့ၢ်ကဲမူးပွဲလၢ အထီဒါလိာ်သးဒီး ယဟိဝၤယွၤ အတၢ်တိာ်ပာ်န့ၣ် ယဟိဝၤယွၤ ကသးခုဧါ.

၃. ဘၣ်မနုၤအဃိ မူးပွဲတနီၤန့ၣ် ကစၢ်ယွၤ တဘၣ်သးဝဲဘၣ်လဲၣ်.

လံာ်စီဆှံတြီဝဲ “တၢ်အီသံးအါတလၢ, မူးပွဲလၢ အလီၤရၢၢ်လီၤစၢၢ် [ဒီး]တၢ်အီပြၢလိာ်သးလၢသံး.” (၁ ပ့းတရူး ၄:၃) လၢမူးပွဲတနီၤနီၤန့ၣ် အိၣ်ဒီး ပှၤလၢ အတပၢၤသူၣ်ပၢၤသးဘၣ် အဃိ အဝဲသ့ၣ် မၤကမၣ်မုၣ်ကမၣ်ခွါ. ဒ်သိး ပကဆဲးကဲဘၣ် ယဟိဝၤယွၤ အသကိးအဂီၢ် ပတဘၣ်မၤဘၣ်ဃးပသးဒီး မူးပွဲတဖၣ်အံၤဘၣ်.

ဃုသ့ၣ်ညါအါထီၣ်

၄. မူးပွဲတဖၣ်လၢ ယဟိဝၤယွၤ တဘၣ်သူၣ်ဘၣ်သးဝဲဘၣ်န့ၣ် မၤအီၤတဂ့ၤ

ဖး အ့းဖ့းစူး ၅:၁၀ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• ဖဲပဆၢတဲာ်လီၤပသးလၢ ပကမၤမူးပွဲအံၤဧါ တမၤဘၣ်ဧါအခါ ပကဘၣ်ဆိကမိၣ်ထံ တၢ်ဂ့ၢ်မနုၤလဲၣ်.

• လၢနအိၣ်တၢ်လီၢ်န့ၣ် မူးပွဲလၢ ပှၤမၤဝဲအါန့ၣ် မ့ၢ်မနုၤလဲၣ်.

• နဆိကမိၣ် မူးပွဲတဖၣ်န့ၣ် အဘၣ်ယဟိဝၤယွၤအသးဧါ.

အဒိ ဘၣ်ဃးဒီး ပှၤမၤနံၤအိၣ်ဖျဲၣ်အမူးန့ၣ် ကစၢ်ယွၤ ထံၣ်ဝဲဒ်လဲၣ်န့ၣ် နဆိကမိၣ်ဘၣ် တဘျီဘျီဧါ. လၢလံာ်စီဆှံအပူၤ ပထံၣ်ဘၣ်လၢ ပှၤလၢအဘူၣ်ထီၣ်ဘါထီၣ် ယဟိဝၤယွၤန့ၣ် တမၤဝဲ နံၤအိၣ်ဖျဲၣ်အမူးပွဲဘၣ်. ဘၣ်ဆၣ် ပှၤလၢအတဘူၣ်ထီၣ်ဘါထီၣ် ယဟိဝၤယွၤဘၣ်တဖၣ် မၤဝဲ နံၤအိၣ်ဖျဲၣ်အမူးပွဲန့ၣ် လံာ်စီဆှံ ပာ်ဖျါထီၣ်ဝဲခံဘျီ. ဖး ၁ မိၤၡ့ ၄၀:​၂၀-၂၂ ဒီး မးသဲ ၁၄:​၆-၁၀. ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• ဖဲပှၤမၤနံၤအိၣ်ဖျဲၣ်အမူးပွဲ ခံခါအံၤအခါ တၢ်ကဲထီၣ်အသးဒ်လဲၣ်.

• ဒ်လံာ်စီဆှံ ပာ်ဖျါထီၣ်ဝဲအသိး ဘၣ်ဃးဒီး နံၤအိၣ်ဖျဲၣ်အမူးပွဲန့ၣ် နဆိကမိၣ် ယဟိဝၤယွၤ ထံၣ်ဝဲဒ်လဲၣ်.

သနာ်က့ နကဆိကမိၣ်ဘၣ်လၢ ‘ယမၤနံၤအိၣ်ဖျဲၣ်အမူးပွဲ ဒီးယမၤမူးပွဲအဂၤ လၢအတလီၤပလိာ်ဒီး လံာ်စီဆှံအတၢ်သိၣ်လိဧါ တမၤဘၣ်ဧါန့ၣ် ယဟိဝၤယွၤ ထံၣ်ဝဲလၢ အရ့ဒိၣ်စ့ၢ်ကီးဧါ.’ ဖး ၂ မိၤၡ့ ၃၂:​၁-၈ ဒီး ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ.

တၢ်ဂီၤမူ– တၢ်မၤမူးပွဲလၢတဘၣ်ယွၤအသး (၅:၀၇)

• ဘၣ်မနုၤအဃိ ပဘၣ်ဆိကမိၣ်ထံ ဒီးနီၤဖး တၢ်လၢ အဘၣ်ယဟိဝၤယွၤအသးလဲၣ်.

• ပဆိကမိၣ်ထံ ဒီးနီၤဖး တၢ်လၢ အဘၣ်ယဟိဝၤယွၤအသး ကသ့ဒ်လဲၣ်.

မူးပွဲတခါ အဘၣ်ကစၢ်ယွၤ အသးဧါ တဘၣ်အသးဘၣ်ဧါန့ၣ် ပသ့ၣ်ညါဘၣ်ကသ့ဒ်လဲၣ်.

• မူးပွဲတခါအံၤ အဒိးသန့ၤထီၣ်အသးလၢ လံာ်စီဆှံအတၢ်သိၣ်လိဧါ. ဒ်သိးနကသ့ၣ်ညါအဂီၢ် ဃုသ့ၣ်ညါ မူးပွဲတခါအံၤ အခီၣ်ထံးခီၣ်ဘိအဂ့ၢ်.

• မူးပွဲတခါအံၤ အမၤလၤကပီၤ ပှၤဟီၣ်ခိၣ်ဖိဧါ, တၢ်ကရၢကရိဧါ မ့တမ့ၢ် ထံကီၢ်အတၢ်ပနီၣ် တခါခါဧါ. ပမၤလၤကပီၤ ထဲယဟိဝၤယွၤတဂၤလီၤ. ဒီးပနာ်လၢ အဝဲကမၤဘၣ်ဂီၢ်က့ၤ ဟီၣ်ခိၣ် အတၢ်ကီတၢ်ခဲတဖၣ်.

• တၢ်မၤဒီး လုၢ်လၢ်လၢ အဘၣ်ထွဲဒီး မူးပွဲတခါအံၤန့ၣ် အထီဒါလိာ်သးဒီး လံာ်စီဆှံ အတၢ်သိၣ်တၢ်သီဧါ. ပတၢ်ဆိကမိၣ် ဒီးပလုၢ်လၢ်သကဲာ်ပဝးန့ၣ် ကဘၣ်ကဆှီ.

၅. မၤစၢၤပှၤဂၤဒ်သိး အဝဲသ့ၣ် ကပာ်ကဲ နတၢ်စူၢ်တၢ်နာ်

တၢ်ဂီၤမူ– တဲဖျါထီၣ်နတၢ်နာ် သ့သ့ဘၣ်ဘၣ် (၂:၀၁)

ဖး မးသဲ ၇:၁၂ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• ဒ်လံာ်စီဆှံ တဆၢအံၤ ပာ်ဖျါထီၣ်ဝဲအသိး မ့ၢ်နကြၢးတဲ နဟံၣ်ဖိဃီဖိလၢ အတၢ်စူၢ်တၢ်နာ် တဒ်သိးဒီးနၤဘၣ်တဖၣ်လၢ အဝဲသ့ၣ် မၤဝဲမူးပွဲတန့ၢ်လၢၤဘၣ်ဧါ.

• နတမၤမူးပွဲလၢ နဟံၣ်ဖိဃီဖိမၤဝဲဘၣ် သနာ်က့ နပာ်ဖျါထီၣ်လၢ နအဲၣ်အဝဲသ့ၣ် ဒီးသူၣ်အိၣ်သးအိၣ်အဝဲသ့ၣ် ကသ့ဒ်လဲၣ်.

၆. ယဟိဝၤယွၤ အဲၣ်ဒိးလၢ ပကအိၣ်ဒီး တၢ်သးခု

ယဟိဝၤယွၤ အဲၣ်ဒိးဝဲလၢ ပကမၤတၢ်သူၣ်ဖှံသးညီ ဃုာ်ဒီးပဟံၣ်ဖိဃီဖိ ဒီးပသကိးတဖၣ်. ဖး စံၣ်တဲၤတဲလီၤတၢ် ၈:၁၅ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• ဒ်လံာ်စီဆှံတဆၢအံၤ ပာ်ဖျါထီၣ်ဝဲအသိး ဘၣ်မနုၤအဃိ ပတဲသ့လၢ ယဟိဝၤယွၤ အဲၣ်ဒိးဝဲလၢ ပကအိၣ်ဒီး တၢ်သးခုလဲၣ်.

ယဟိဝၤယွၤ အဲၣ်ဒိးဝဲလၢ ပှၤလၢအဘူၣ်ထီၣ်ဘါထီၣ်အီၤတဖၣ်န့ၣ် ကသူၣ်ဖှံသးညီသကိး တပူၤဃီ. ကွၢ်တၢ်ဂီၤမူ လၢအပာ်ဖျါထီၣ်ဝဲလၢ ပသူၣ်ဖှံသးညီသကိး တပူၤဃီလၢ ဟီၣ်ခိၣ်ဒီဘ့ၣ် တၢ်အိၣ်ဖှိၣ်ဖးဒိၣ်.

တၢ်ဂီၤမူ– ပာ်ဖျါထီၣ် တၢ်တူၢ်လိာ် တမှံၤလၢ ဟီၣ်ခိၣ်ဒီဘ့ၣ် တၢ်အိၣ်ဖှိၣ်ဖးဒိၣ် (၅:၄၀)

ဖး ကလၤတံ ၆:၁၀ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• ဒ်သိးပက “မၤဂ့ၤတၢ်” လၢပှၤဂၤအဖီခိၣ်အဂီၢ် ပကဘၣ်မၤမူးပွဲလၢ ပှၤမၤဝဲအါန့ၣ်ဧါ.

• ဖဲပဟ့ၣ်တၢ်အခါ ပကသးခုဒိၣ် လၢအဆၢကတီၢ်ဖဲလဲၣ်, ဖဲပဟ့ၣ်တၢ်လၢ မူးပွဲဘၣ်အဆၢကတီၢ်ဧါ မ့တမ့ၢ် ဖဲပဟ့ၣ်တၢ်လၢ တၢ်သးအိၣ်အပူၤဧါ.

• တဘျီတခီၣ်န့ၣ် ယဟိဝၤပှၤအုၣ်အသးတဖၣ် ဒ်သိးကမၤသးခုအဖိတဖၣ်အသးအဂီၢ် အဝဲသ့ၣ် မၤန့ၢ်တၢ်လီၤလီၤဆီဆီ တမံၤမံၤ လၢအဖိတဖၣ်အဂီၢ် မ့တမ့ၢ် ဟ့ၣ်ဝဲအဖိတဖၣ် တၢ်ဟ့ၣ်လီၤလီၤဆီဆီတခါခါ. နဖိမ့ၢ်အိၣ်န့ၣ် ဒ်သိးနကမၤသးခု အဝဲသ့ၣ်အသးအဂီၢ် နမၤန့ၢ်တၢ်လီၤလီၤဆီဆီ လၢအဝဲသ့ၣ်အဂီၢ် သ့ဒ်လဲၣ်.

တၢ်ဂ့ၢ်လၢအရ့ဒိၣ်

ယဟိဝၤယွၤ အဲၣ်ဒိးဝဲလၢ ပကသးခု ဃုာ်ဒီးပဟံၣ်ဖိဃီဖိ ဒီးပသကိးတဖၣ်. ဘၣ်ဆၣ် အဝဲအဲၣ်ဒိးလၢ ပဟးဆှဲးမူးပွဲတဖၣ်လၢ အတဘၣ်သးဝဲဘၣ်.

တၢ်ကွၢ်ကဒါက့ၤ

• မူးပွဲတခါ အဘၣ်ကစၢ်ယွၤအသးဧါ တဘၣ်အသးဘၣ်ဧါန့ၣ် ပသ့ၣ်ညါဘၣ်ကသ့ဒ်လဲၣ်.

• ပမ့ၢ်တမၤမူးပွဲတခါခါဘၣ်န့ၣ် ပတဲနၢ်ပၢၢ် ပဟံၣ်ဖိဃီဖိ ဒီးပသကိးတဖၣ် ကသ့ဒ်လဲၣ်.

• ယဟိဝၤယွၤ အဲၣ်ဒိးလၢ ပကအိၣ်ဒီး တၢ်သးခု ဒီးတၢ်သူၣ်ဖှံသးညီန့ၣ် ပသ့ၣ်ညါဘၣ်ဒ်လဲၣ်.

ဃုသ့ၣ်ညါ

ဖးကွၢ် ဘၣ်ဃးဒီး မူးပွဲတနီၤနီၤလၢ ခရံာ်ဖိတဖၣ် တမၤဝဲဘၣ်.

“ဘၣ်မနုၤအဃိ ယဟိဝၤပှၤအုၣ်အသးတဖၣ် တမၤဝဲ မူးပွဲတနီၤနီၤဘၣ်လဲၣ်” (တၢ်မၤလိလၢ အအိၣ်လၢ online အဖီခိၣ်)

ဖးကွၢ် တၢ်ဂ့ၢ်လွံၢ်မံၤလၢ အပာ်ဖျါထီၣ်ဝဲ ဘၣ်မနုၤအဃိ ပနာ်လၢ နံၤအိၣ်ဖျဲၣ်အမူးပွဲန့ၣ် ကစၢ်ယွၤ တဘၣ်သးဝဲဘၣ်လဲၣ်.

“ဘၣ်မနုၤအဃိ ယဟိဝၤပှၤအုၣ်အသးတဖၣ် တမၤဝဲ တၢ်အိၣ်ဖျဲၣ်ဆၢက့ၤ အမုၢ်နံၤဘၣ်လဲၣ်” (တၢ်မၤလိလၢ အအိၣ်လၢ online အဖီခိၣ်)

ဖဲပှၤမၤမူးပွဲအဆၢကတီၢ် ဖိသၣ်လၢအအဲၣ် ယဟိဝၤယွၤန့ၣ် မၤသးခုယဟိဝၤယွၤအသး ကသ့ဒ်လဲၣ်.

ယဟိဝၤယွၤ ပာ်လုၢ်ပာ်ပှ့ၤနၤ (၁၁:၃၅)

ခရံာ်ဖိလၢ အကကွဲၢ်တဖၣ်န့ၣ် ဆၢတဲာ်လီၤအသးလၢ အဝဲသ့ၣ် တမၤဝဲခရံာ်အိၣ်ဖျဲၣ်အမူးပွဲဘၣ်. အဝဲသ့ၣ် ဆၢတဲာ်လီၤအသးဒ်န့ၣ်အဃိ အဝဲသ့ၣ် သးခုဒံးဧါ.

“အဝဲသ့ၣ် ထံၣ်န့ၢ်ဝဲ တၢ်လၢအဂ့ၤဒိၣ်တခါ” (တၢးထီခိးတၢ်, လါဒံၣ်စ့ဘၢၣ် ၁, ၂၀၁၂)