ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါအ့ဖြ့ၣ် ၃–၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယံးရမံယၤ ၁၇-၂၁
“ပျဲယဟိဝၤယွၤဘှီ နတၢ်ဆိကမိၣ်ဒီး နသကဲာ်ပဝး”
(ယံးရမံယၤ ၁၈:၁-၄) ယွၤအကလုၢ်ဘၣ် စီၤယံးရမံယၤဒီးစံးဝဲဒၣ်, ၂ ဂဲၤဆၢထၢၣ်, ဒီးလဲၤလီၤဆူပှၤတ့သပၢၤအဟံၣ်, ဒီးယကဒုးနၢ်ဟူနၤလၢ ယကလုၢ်ဖဲန့ၣ်လီၤ. ၃ ဒီးယလဲၤလီၤဆူ ပှၤတ့သပၢၤအဟံၣ်, ဒီးကွၢ်ကွၢ်, မၤသပၢၤလၢသ့ၣ်ဘၣ်အဖီခိၣ်လီၤ. ၄ ဒီးသပၢၤလၢအတ့ဝဲလၢကပံာ်န့ၣ် ဟးဂီၤဝဲလၢ ပှၤတ့သပၢၤအစုပူၤ, ဒီးမၤကဒီးသပၢၤတဖျၢၣ် ဒ်အဘၣ်ပှၤတ့သပၢၤအသးလၢ အကမၤဝဲအသိးန့ၣ်လီၤ.
တၢး၉၉ ၄/၁ ကဘျံးပၤ ၂၂ အဆၢ ၃
မတၤဘှီနတၢ်ဆိကမိၣ်လဲၣ်
ပမ့ၢ်ကွၢ် ယဟိဝၤယွၤ ဟ့ၣ်ဝဲတၢ်အဒိ ခီဖျိမၢ ဝံယံးရမံယၤလဲၤဆူ ပှၤတ့သပၢၤအလီၢ်န့ၣ် ပသ့ၣ်ညါဘၣ်လၢ ပှၤလၢအဲၣ်ဒိး ဒိးန့ၢ်ဘၣ်တၢ်အဘျုးလၢ ယဟိဝၤယွၤ အတၢ်ဘှီဘၣ်ထီၣ်အီၤန့ၣ် ကဘၣ်ဒိကနၣ်တၢ်လၢ တၢ်သူၣ်အိၣ်သးအိၣ်အပူၤလီၤ. ဝံယံးရမံယၤ ထံၣ်ဘၣ်ဝဲလၢ ပှၤတ့သပၢၤတဂၤ တ့သပၢၤအခါ သပၢၤမ့ၢ် ‘ဟးဂီၤဝဲလၢ အစုပူၤ’ န့ၣ်ပှၤတဂၤအံၤ အသးဆီတလဲဒီး အဝဲဘှီက့ၤဝဲ သပၢၤအံၤလီၤ. ဒီးယဟိဝၤယွၤစံးဝဲလၢ “အံၣ်စရ့လးအပှၤဟံၣ်ဖိသ့ၣ်ဧၢ, ယမၤသုဒ် ပှၤတ့သပၢၤတဂၤအံၤ အသိးန့ၣ်တသ့ဘၣ်ဧါ, . . . ကွၢ်ကွၢ်, ဒ်ကပံာ်အိၣ်ဝဲလၢ ပှၤတ့သပၢၤအစုပူၤအသိးန့ၣ် သုအိၣ်ဝဲလၢယစု ပူၤဒ်န့ၣ်သိး, အံၣ်စရ့လးအပှၤဟံၣ်ဖိသ့ၣ်ဧၢ.” (ယံးရမံယၤ ၁၈:၁-၆) တၢ်အံၤအဲၣ်ဒိးတဲဝဲလၢ ပှၤအံၣ်စရ့လးဖိတဖၣ်န့ၣ် လီၤဂာ်ဒ်ကပံာ်လၢ အတအိၣ်ဒီး အသးသမူဒီး ဖဲယဟိဝၤယွၤ အဲၣ်ဒိးဘှီဝဲန့ၣ်ဘှီဝဲသ့ဧါ.
(ယံးရမံယၤ ၁၈:၅-၁၀) ဒီးယွၤအကလုၢ်ဘၣ်ယၤ ဒီးစံးဝဲဒၣ်, ၆ အံၣ်စရ့လးအပှၤဟံၣ်ဖိသ့ၣ်ဧၢ, ယမၤသုဒ် ပှၤတ့သပၢၤတဂၤအံၤအသိးန့ၣ် တသ့ဘၣ်ဧါ, ယွၤစံးဝဲဒၣ်. ကွၢ်ကွၢ်, ဒ်ကပံာ်အိၣ်ဝဲလၢ ပှၤတ့သပၢၤအစုပူၤအသိးန့ၣ် သုအိၣ်ဝဲလၢယစု ပူၤဒ်န့ၣ်သိး, အံၣ်စရ့လးအပှၤဟံၣ်ဖိသ့ၣ်ဧၢ. ၇ ယမ့ၢ်ကတိၤတၢ်တဘျီလၢ ပှၤတကလုာ်အဂ့ၢ်, လၢတၢ်အဘီမုၢ်အဂ့ၢ်, ဒ်သိးတၢ်ကထဲးထီၣ်ကွံာ်, ဒီးမၤလီၤပှီၢ်, ဒီးမၤဟးဂီၤန့ၣ်ဒီး, ၈ ပှၤတကလုာ်လၢ ယကတိၤတၢ်လၢအဂ့ၢ်န့ၣ် မ့ၢ်ဟဲက့ၤလၢအတၢ်အၢဒီး, ယကပီၢ်ယၢ်လီၤက့ၤယသးလၢ တၢ်အၢလၢယတိာ်မၤအီၤလီၤ. ၉ ဒီးယမ့ၢ်ကတိၤတၢ် တဘျီလၢပှၤတကလုာ်အဂ့ၢ်, တၢ်အဘီမုၢ်အဂ့ၢ် လၢယကမၤထီၣ်အီၤ, ဒီးသူၣ်လီၤအီၤန့ၣ်ဒီး, ၁၀ မ့ၢ်မၤတၢ်အၢလၢယမဲာ်ညါ, ဒီးတဒိကနၣ်ဘၣ်ယကလုၢ်ဘၣ်ဒီး, ယကပီၢ်ယၢ်လီၤက့ၤယသးလၢ တၢ်ဂ့ၤလၢယစံးယကမၤအီၤန့ၣ်လီၤ.
it-2 ကဘျံးပၤ ၇၇၆ အဆၢ ၄
တၢ်ပီၢ်ယၢ်လီၤက့ၤသး
ဖဲပှၤတ့သပၢၤတဂၤ တ့ဝဲသပၢၤအခါ သပၢၤမ့ၢ် ‘ဟးဂီၤဝဲလၢအစုပူၤ’ န့ၣ်အဝဲတ့က့ၤဝဲ သပၢၤလၢ အသီတဖျၢၣ်လီၤ. (ယံးရမံယၤ ၁၈:၃, ၄) လၢတၢ်အဒိအံၤအပူၤ ဖဲပှၤတ့သပၢၤတဂၤတ့သပၢၤအခါ အသပၢၤဟးဂီၤဝဲသ့ဘၣ်ဆၣ် မ့မ့ၢ်ယဟိဝၤယွၤန့ၣ် တမ့ၢ်ဒ်န့ၣ်ဘၣ်. ယဟိဝၤယွၤ အိၣ်ဒီးတၢ်စိတၢ်ကမီၤလၢ ပှၤဟီၣ်ခိၣ်ဖိတဖၣ် အဖီခိၣ်အဃိ ဖဲအဝဲပာ်ဖျါထီၣ် တၢ်တီတၢ်လိၤဒီး တၢ်သးကညီၤလၢ ပှၤဟီၣ်ခိၣ်ဖိတဖၣ် အဖီခိၣ်အခါ ပှၤဟီၣ်ခိၣ်ဖိတဖၣ် မၤဝဲ ဒ်လဲၣ်ဒ်လဲၣ်န့ၣ် ကစၢ်ယွၤကွၢ်ဝဲ ဒီးဆီတလဲ အတၢ်ရ့လိာ်သးဒီးအဝဲသ့ၣ် သ့ဝဲလီၤ. (ထိၣ်သတြီၤကွၢ်ဒီး ယၡါယၤ ၄၅:၉; ရိမ့ၤ ၉:၁၉-၂၁ တက့ၢ်.) အဝဲသ့ၣ် အတၢ်ရ့လိာ်သးဒီး ယဟိဝၤယွၤအိၣ်ပာ်စၢၤလံ ဘၣ်ဆၣ်ယဟိဝၤယွၤကွၢ်ဝဲအဝဲသ့ၣ် အတၢ်အိၣ်သးဒီးအဝဲ ‘ပီၢ်ယၢ်လီၤ က့ၤအသးလၢ တၢ်အၢလၢအတိာ်မၤဝဲ’ မ့တမ့ၢ် ‘ပီၢ်ယၢ်လီၤက့ၤအသးလၢ တၢ်ဂ့ၤလၢအစံးဝဲလၢ ကမၤဝဲ’ န့ၣ်လီၤ. (ယံးရမံယၤ ၁၈:၅-၁၀) တမ့ၢ်လၢ ပှၤတ့သပၢၤ ယဟိဝၤယွၤ မၤကမၣ်တၢ်အဃိ ဆီတလဲ အတၢ်ပာ်သူၣ်ပာ်သးဒ်အံၤဘၣ်, မ့ၢ်လၢ “ကပံာ်” လၢအမ့ၢ်ပှၤဟီၣ်ခိၣ်ဖိတဖၣ် ပီၢ်ယၢ်လီၤက့ၤအသးဒီး ဆီတလဲအတၢ်ပာ်သူၣ်ပာ်သးအဃိ ယဟိဝၤယွၤစ့ၢ်ကီး ဆီတလဲအတၢ်ပာ်သူၣ်ပာ်သးလီၤ.
(ယံးရမံယၤ ၁၈:၁၁) ဒီးခဲကနံၣ်အံၤ ကတိၤတၢ်ဒီးယူဒၤအပှၤကညီ, ဒီးပှၤယရူၤၡလ့ၣ်ဖိ, ဒီးစံး, ယွၤစံးဒ်အံၤ, ကွၢ်ကွၢ်, ယတိာ်တၢ်အၢထီဒါသု, ဒီးကူၣ်တၢ်ကူၣ်ထီဒါသုလီၤ. ဟဲက့ၤကဒါက့ၤတဂၤလၢ အကျဲအၢစုာ်စုာ်, ဒီးမၤဂ့ၤထီၣ်က့ၤသုကျဲ ဒီးသုတၢ်မၤတဖၣ်တက့ၢ်.
တၢး၉၉ ၄/၁ ကဘျံးပၤ ၂၂ အဆၢ ၄–၅
မတၤဘှီနတၢ်ဆိကမိၣ်လဲၣ်
ယဟိဝၤယွၤ တသူအစိအကမီၤဒ်သိး ကမၢဆူၣ် ပှၤဟီၣ်ခိၣ်ဖိတဖၣ်လၢ ကမၤတၢ်လၢ အတအဲၣ်ဒိးမၤဝဲန့ၣ်ဘၣ်. ဖဲပှၤတ့သပၢၤတဂၤ တ့သပၢၤအခါ သပၢၤအဘၣ်ဒိအလီၢ်အိၣ်ဝဲသ့ဘၣ်ဆၣ် မ့မ့ၢ်ယဟိဝၤယွၤန့ၣ် တမ့ၢ်ဒ်န့ၣ်ဘၣ်. (၅ မိၤၡ့ ၃၂:၄) ယဟိဝၤယွၤ ဂုာ်ကျဲးစၢးတ့ထီၣ်ပှၤဟီၣ်ခိၣ်ဖိ ဂ့ၤဂ့ၤဘၣ်ဆၣ် အဝဲသ့ၣ်တဒိကနၣ်ကစၢ်ယွၤ အတၢ်ဟံးစုနဲၣ်ကျဲဒီး တခီၣ်ဘှီအသးအဃိ ကဲထီၣ်ဝဲသပၢၤလၢ အတဂ့ၤဘၣ်တဖၣ်သ့ဝဲလီၤ. တၢ်အံၤပာ်ဖျါထီၣ်ဝဲ ပဝဲသ့ၣ်တဖၣ် လီၤဆီဒီး ကပံာ်လၢတအိၣ်ဒီး အသးသမူအံၤ န့ၣ်လီၤ. မ့မ့ၢ်ပဝဲသ့ၣ်တဖၣ်န့ၣ် ပအိၣ်ဒီးတၢ်သဘျ့အဃိ ပဃုထၢလၢပကဒိကနၣ်အကလုၢ် မ့တမ့ၢ် ပတဒိကနၣ်ဘၣ်န့ၣ် သ့ဝဲလီၤ.
မ့ၢ်ဝဲတၢ်မၤလိလၢ ပကြၢးဆိကမိၣ်ကွၢ်တခါလီၤ. ပကတဲလၢ “ယကဘၣ်မၤဒ်လဲၣ်န့ၣ် တလိၣ်ပှၤတဲယၤ နီတဂၤဘၣ်” အလီၢ် ပမ့ၢ်ဒိကနၣ် ယဟိဝၤယွၤ အတၢ်ကတိၤန့ၣ် ကဂ့ၤဝဲလီၤ. ပဝဲခဲလၢာ် ပကဘၣ်ဒိကနၣ် ကစၢ်ယွၤအတၢ်ဟံးစုနဲၣ်ကျဲလီၤ. (ယိၤဟၣ် ၁၇:၃) မ်ပကမၤဒ်သိး စီၤဒၤဝံးလၢ အစံးဝဲ– “ယွၤဧၢ, ဘိးဘၣ်သ့ၣ်ညါယၤလၢ နကျဲတဖၣ်န့ၣ်တက့ၢ်. သိၣ်လိယၤလၢနကျဲဧိၤကပူၤဧိၤတက့ၢ်.” (စံးထီၣ်ပတြၢၤ ၂၅:၄) သ့ၣ်နီၣ်ထီၣ်က့ၤ စီၤၡလိၤမိၤအတၢ်ကတိၤလၢအမ့ၢ်– “ပှၤကူၣ်သ့ကနၣ်တက့ၢ်. ဒီးအမၤလိတၢ်ကအါထီၣ်” လီၤ. (ကတိၤဒိ ၁:၅) နတၢ်ဒိကနၣ်န့ၣ် မ့ၢ်တၢ်လၢအရ့ဒိၣ်လီၤ. နမ့ၢ်မၤဒ်န့ၣ်န့ၣ် “တၢ်ကူၣ်သ့ကဟဲနုာ်လၢနသးကံၢ်ပူၤ, ဒီးတၢ်သ့ၣ်ညါကဘၣ်နသး” လီၤ.—ကတိၤဒိ ၂:၁၀.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ယံးရမံယၤ ၁၇:၉) ပှၤကညီအသးန့ၣ် လီန့ၢ်တၢ်ဒိၣ်န့ၢ်အါန့ၢ်တၢ်ခဲလၢာ်တက့ၢ်, ဒီးအၢဝဲဒိၣ်မးလီၤ. မ့ၢ်မတၤသ့ၣ်ညါအီၤသ့တဂၤလဲၣ်.
တၢး၀၁ ၁၀/၁၅ ကဘျံးပၤ ၂၅ အဆၢ ၁၃
ပၢၤနသး
၁၃ ဝံယံးရမံယၤစံးဝဲလၢ “ပှၤကညီအသးန့ၣ် လီန့ၢ်တၢ်ဒိၣ်န့ၢ်အါန့ၢ်တၢ်ခဲလၢာ်တက့ၢ်, ဒီးအၢဝဲဒိၣ်မးလီၤ.” (ယံးရမံယၤ ၁၇:၉) ပသးလီန့ၢ်တၢ်န့ၣ် ဟဲအိၣ်ဖျါထီၣ်ဖဲ ပတဲပူၤဖျဲးပသးလၢ ပတၢ်ကမၣ်, ပတဲတၢ်ဒ်သိး ပတၢ်ကမၣ်ကဆံးလီၤအဂီၢ်, ပဟံးန့ၢ်တၢ်ခွဲးတၢ်ယာ် လၢပတၢ်ဂံၢ်စၢ်ဘါစၢ်အဃိ ဒီးပတဲအါထီၣ်တၢ်ဂ့ၢ် ဖဲပမၤတၢ် ကဲထီၣ်လိၣ်ထီၣ်အခါလီၤ. သးလၢအလီန့ၢ်တၢ်န့ၣ် တဲဝဲတမၠိ မၤဝဲတမၠိလီၤ. (စံးထီၣ်ပတြၢၤ ၁၂:၂; ကတိၤဒိ ၂၃:၇) လၢတၢ်န့ၣ်အဃိ အရ့ဒိၣ်ဒိၣ်မးလၢ ပကသမံသမိးလီၤက့ၤ တၢ်လၢအဟဲဟးထီၣ်လၢပသးပူၤ လၢတၢ်သူၣ်ဘျၢသးဘျၢအပူၤလီၤ.
(ယံးရမံယၤ ၂၀:၇) ယွၤဧၢ, နကလံာ်ယၤ, ဒီးယဒိးကလံာ်ယသး, နဆူၣ်န့ၢ်ယၤတက့ၢ်, ဒီးနမၤနၢၤတၢ်လီၤ. ယဘၣ်တၢ်ဒုၣ်ဒွဲၣ် ကိးမုၢ်နံၤမုၢ်နၤဒဲး, ပှၤကတိၤဒိးယၤကိးဂၤဒဲးလီၤ.
တၢး၀၇ ၃/၁၅ ကဘျံးပၤ ၉ အဆၢ ၆
လံာ်စီဆှံ အတၢ်ပာ်ဖျါလၢ လံာ်ယံးရမံယၤ
၂၀:၇—ယဟိဝၤယွၤ ကလံာ်န့ၢ် ဝံယံးရမံယၤဒီး မၤနၢၤအီၤလၢကျဲဒ်လဲၣ်. မ့ၢ်လၢဖဲဝံယံးရမံယၤ စံၣ်တဲၤတဲလီၤ တၢ်စံၣ်ညီၣ်အကစီၣ်အခါ ပှၤတကနၣ်ဃုာ်အီၤ, ပှၤတတူၢ်လိာ်အီၤဒီး ပှၤမၤအၢမၤနးအီၤအဃိ အဝဲကတူၢ်ဘၣ်ဝဲလၢ ဆဲးမၤဝဲတကဲလၢၤဘၣ်. အဃိ ယဟိဝၤယွၤ ဟ့ၣ်ဂံၢ်ဟ့ၣ်ဘါအီၤ ဒ်သိးတြီဆၢကွံာ် အတၢ်ပာ်သူၣ်ပာ်သးအံၤကန့ၢ်ဒီး ဆဲးမၤကစၢ်ယွၤ အတၢ်မၤကန့ၢ်အဂီၢ်လီၤ. ယဟိဝၤယွၤ ကလံာ်န့ၢ် ဝံယံးရမံယၤခီဖျိ တၢ်လၢဝံယံးရမံယၤ ဆိကမိၣ်ဝဲလၢ အမၤဝဲတန့ၢ်ဘၣ်န့ၣ် အဝဲမၤစၢၤအီၤ ဒ်သိးမၤဝဲကန့ၢ်အဂီၢ်လီၤ.
တၢ်ဖးလံာ်စီဆှံ
(ယံးရမံယၤ ၂၁:၃-၁၄) ဒီးစီၤယံးရမံယၤစံးဘၣ်အီၤ, သုဘၣ်စံးဘၣ် စီၤစံးဒကံယၤဒ်အံၤ, ၄ ယွၤအံၣ်စရ့လးအကစၢ်စံးဒ်အံၤ, ကွၢ်ကွၢ်, ယကဘိးဃၣ်ကဒါက့ၤသုစုကဝဲၤ အိၣ်လၢသုစုပူၤလၢသုဒုးတၢ်ဒီး ဘၤဘူၤလိၣ်အစီၤပၤ, ဒီးပှၤက့ၤစ့းဖိလၢ အကဝီၤဃာ်သုလၢ သုဝ့ၢ်ခိၣ်ဒူလၢခိလၢအီၤ, ဒီးယကဒုးအိၣ်ဖှိၣ်အဝဲသ့ၣ်တဖၣ်န့ၣ် လၢဝ့ၢ်အံၤအသးကံၢ်ပူၤလီၤ. ၅ ဒီးယဲဒၣ်ယကစၢ်ဒၣ်ယဲ ယကဒုးတၢ်ဒီးသုလၢ ယစုယူာ်ထီၣ်အသး, ဒီးယစုဒုၣ်ဆူၣ်အိၣ်ဒီးသးထီၣ်, ဒီးသးကဲၤထီၣ်, ဒီးသးကိၢ်လူးဒိၣ်ဒိၣ်ကလဲာ်လီၤ. ၆ ဒီးယကတီၢ်တၢ်အိၣ်ဝဲဆိးဝဲလၢ ဝ့ၢ်အံၤအပူၤ, ပှၤကညီဒီးဆၣ်ဖိကီၢ်ဖိ, ဒီးကသံဝဲလၢတၢ်သံသတြိာ်ဖးဒိၣ်လီၤ. ၇ ဒီးယွၤစံးဝဲဒၣ်, လၢအလီၢ်ခံန့ၣ် ယကဟ့ၣ်လီၤကွံာ် ယူဒၤအစီၤပၤစံးဒကံယၤဒီးအခ့အပှၤ, ဒီးပှၤဂီၢ်မုၢ်, ပှၤအိၣ်လီၤတဲာ်လၢတၢ်သံသတြိာ်, ဒီးလၢနး, ဒီးလၢတၢ်သၣ်ဝံၤလီၤဒိလၢဝ့ၢ်အံၤအပူၤ, ဆူဘၤဘူၤလိၣ်အစီၤပၤ နဘူၤကးန့စၢ်အစုပူၤ, ဒီးဆူအဒုၣ်အဒါအစုပူၤ, ဒီးဆူပှၤလၢအဃုအသးသမူအစုပူၤ, ဒီးကကျီအီၤလၢနးအကနၣ်, ဒီးတသးလီဘၣ်, ဒီးတလိးကီဘၣ်, ဒီးတသးကညီၤဘၣ်အီၤဘၣ်လီၤ. ၈ ဒီးနဘၣ်စံးဘၣ်ပှၤဂီၢ်မုၢ်အံၤ, ယွၤစံးဒ်အံၤ, ကွၢ်ကွၢ်, ယပာ်တၢ်မူအကျဲ, ဒီးတၢ်သံအကျဲလၢသုမဲာ်ညါလီၤ. ၉ ပှၤလၢအအိၣ်အဆိးလၢဝ့ၢ်အံၤအပူၤန့ၣ် ကသံလၢနး, ဒီးလၢတၢ်သၣ်ဝံၤလီၤဒိ, ဒီးလၢတၢ်သံသတြိာ်လီၤ. မ့မ့ၢ်ပှၤလၢအဟးထီၣ် ဒီးဟ့ၣ်လီၤဒၣ်အသးလၢ ပှၤက့ၤစ့းဖိအစုလၢ အကဝီၤဃာ်သုန့ၣ်ကမူဝဲ, ဒီးအသးသမူန့ၣ် ကကဲထီၣ်ဝဲလၢအတၢ်ဂုာ်န့ၢ်လီၤ. ၁၀ အဂ့ၢ်ဒ်အံၤ, ယပာ်ယမဲာ်လၢဝ့ၢ်အံၤအဖီခိၣ် လၢတၢ်အၢအဂီၢ်, ဒီးတမ့ၢ်ဘၣ်လၢ တၢ်ဂ့ၤအဂီၢ်ဘၣ်, ယွၤစံးဝဲဒၣ်, တၢ်ကဟ့ၣ်လီၤကွံာ်အီၤလၢ ဘၤဘူၤလိၣ်အစီၤပၤအစုပူၤ, ဒီးကဆူးထီၣ်ကွံာ်အီၤလၢမ့ၣ်အူလီၤ. ၁၁ ဒီးစံးယူဒၤအစီၤပၤ အပှၤဟံၣ်ဖိန့ၣ်, ကနၣ်ယွၤအကလုၢ်တက့ၢ်. ၁၂ စီၤဒၤဝံးအပှၤဟံၣ်ဖိသ့ၣ်ဧၢ, ယွၤစံးဒ်အံၤ, မၤတၢ်စံၣ်ညီၣ်ချ့ချ့, ဒီးမၤပူၤမၤဖျဲးပှၤလၢ အဘၣ်တၢ်ဂုာ်န့ၢ်အီၤလၢ ပှၤမၤအၢတၢ်အစုပူၤတက့ၢ်. ယသးကဲၤထီၣ် ကလဲၤထီၣ်ဘၣ်ဖုးဒ်မ့ၣ်အူအသိး, ဒီးအီၣ်ကွံာ်တၢ်, ဒီးတၢ်မၤလီၤပံာ်အီၤတအိၣ်ဘၣ်လၢ သုမၤတၢ်အၢအဃိလီၤ. ၁၃ ကွၢ်ကွၢ်, ယထီဒါနၤ, ပှၤအိၣ်ဝဲဆိးဝဲလၢကစၢၢ်ကဆူး, တၢ်ပျီပူၤအလၢၢ်ဧိၤလ့ဧိၤတဂၤဧၢ, ယွၤစံးဝဲဒၣ်, ပှၤလၢအစံး, မ့ၢ်မတၤကဟဲလီၤထီဒါ ပှၤတဖၣ်လဲၣ်, ဒီးမ့ၢ်မတၤကဟဲနုာ်လၢ ပအိၣ်ပဆိးအလီၢ်တဖၣ်န့ၣ်လဲၣ်. ၁၄ ဒီးယွၤစံးဝဲဒၣ်, ယကအိၣ်သကိးသုဒ် သုမၤတၢ်အတၤသၣ်အသိးန့ၣ်, ဒီးယကဆိၣ်ကဲၤမ့ၣ်အူ လၢအပှၢ်လၢ်ကျါ, ဒီးကအီၣ်ကွံာ် ကယဲၢ်တၢ်အိၣ်ဝးတရံးဝဲလီၤ.
လါအ့ဖြ့ၣ် ၁၀–၁၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယံးရမံယၤ ၂၂-၂၄
“မ့ၢ်နအိၣ်ဒီး ‘သးလၢအသ့ၣ်ညါ’ ယဟိဝၤယွၤဧါ”
(ယံးရမံယၤ ၂၄:၁-၃) ယွၤဒုးနဲၣ်ယၤ, ဒီးကွၢ်ကွၢ်, ချၢၣ်ဒၢသၣ်အနာ်ခံဖျၢၣ်အိၣ်ပာ်အသးလၢ ယွၤအနူၢ်အစီၤအမဲာ်ညါ လၢဘၤဘူၤလိၣ် အစီၤပၤနဘူၤကးန့စၢ် စိာ်ယူဒၤအစီၤပၤစီၤယဟိယါကံၣ် အဖိခွါစီၤယံးကၤနံယၤ, ဒီးယူဒၤအပဒိၣ်ဖးဒိၣ်, ဒီးပှၤစုသ့, ဒီးပှၤပိာ်တၢ်ဖိလၢယရူၤၡလ့ၣ်, ဒီးစိာ်မၢကဲကုၢ်အီၤဆူ ဘၤဘူၤလိၣ်အလီၢ်ခံန့ၣ်လီၤ. ၂ နာ်တဖျၢၣ်အိၣ်ဝဲဒီးချၢၣ်ဒၢသၣ်ဂ့ၤမး, ဒ်ချၢၣ်ဒၢသၣ်လၢအမံဆိအသိးန့ၣ်လီၤ. ဒီးနာ်တဖျၢၣ်ဒၣ်အိၣ်ဝဲဒီး ချၢၣ်ဒၢသၣ်အၢနးမးလီၤ. အၢန့ၢ်ပှၤအီၣ်ဝဲကဲတက့ၢ်လီၤ. ၃ ဒီးယွၤစံးဘၣ်ယၤ, စီၤယံးရမံယၤဧၢ, နထံၣ်ဘၣ်မနုၤလဲၣ်. ဒီးယစံး, ချၢၣ်ဒၢသၣ်လီၤ. ချၢၣ်ဒၢသၣ်အဂ့ၤန့ၣ်ဂ့ၤဒိၣ်မးလီၤ. ဒီးချၢၣ်ဒၢသၣ်အအၢန့ၣ် အၢဒိၣ်မးလီၤ. အၢန့ၢ်ပှၤအီၣ်ဝဲကဲတက့ၢ်လၢ အအၢအဃိလီၤ.
တၢး၁၃ ၃/၁၅ ကဘျံးပၤ ၈ အဆၢ ၂
မ့ၢ်နအိၣ်ဒီး “သးလၢအသ့ၣ်ညါ” ယဟိဝၤယွၤဧါ
၂ ဘၣ်တဘျီ ယဟိဝၤယွၤ ထိၣ်သတြီၤဝဲ ပှၤသးဒီးချၢၣ်ဒၢသၣ်လီၤ. တမ့ၢ်အဲၣ်ဒိးတဲဝဲ တၢ်န့ၢ်ဂံၢ်န့ၢ်ဘါလၢ တၢ်အီၣ်ချၢၣ်ဒၢသၣ်အဃိဘၣ်. မ့ၢ်ဒၣ်တဲဝဲတၢ်အဒိလီၤ. တၢ်လၢကစၢ်ယွၤ စံးဝဲခီဖျိလၢ ဝံယံးရမံယၤန့ၣ် ဘၣ်ထွဲလိာ်အသးဒီးနသးဒီး ပှၤလၢနအဲၣ်ဘၣ်အီၤတဖၣ်အသးလီၤ. ဖဲပသမံသမိးကွၢ်တၢ်လၢ ကစၢ်ယွၤစံးဝဲအခါ ဆိကမိၣ်ကွၢ်လၢ တၢ်အံၤအခီပညီအိၣ်လၢ ခရံာ်ဖိတဖၣ်အဂီၢ်ဒ်လဲၣ်န့ၣ်တက့ၢ်.
(ယံးရမံယၤ ၂၄:၄-၇) ဒီးယွၤအကလုၢ်ဘၣ်ယၤဒီးစံးဝဲဒၣ်, ၅ ယွၤအံၣ်စရ့လးအကစၢ်စံးဒ်အံၤ, ဒ်ချၢၣ်ဒၢသၣ်အဂ့ၤအံၤအသိးန့ၣ် ယကပာ်ပှၤလၢတၢ်စိာ်မၢကဲကုၢ်အီၤ လၢယူဒၤအကျါ လၢယဟီထီၣ်ကွံာ်လၢအလီၢ်အံၤ, ဆူပှၤက့ၤစ့းဖိအကီၢ်ပူၤ လၢအတၢ်ဂ့ၤအဂီၢ်လီၤ. ၆ ဒီးယကပာ်ယမဲာ်လၢ အလိၤလၢတၢ်ဂ့ၤအဂီၢ်, ဒီးယကဒုးဟဲက့ၤအီၤဆူ ကီၢ်တဘ့ၣ်အံၤအပူၤ ဒီးယကမၤထီၣ်မၤထီအီၤ, ဒီးယတမၤလီၤပှီၢ်ဘၣ်အီၤဘၣ်, ဒီးယကသူၣ်အီၤ, ဒီးယတထဲးကွံာ်ဘၣ်အီၤဘၣ်. ၇ ယကဟ့ၣ်လီၤအီၤလၢ အသးသ့ၣ်ညါယၤလၢယမ့ၢ်ယွၤလီၤ. ဒီးအဝဲသ့ၣ်ကကဲထီၣ်ယပှၤဂီၢ်မုၢ်, ဒီးယဲဒၣ်အံၤယကကဲထီၣ်အကစၢ်လီၤ. အဂ့ၢ်ဒ်အံၤ, ကဟဲက့ၤကဒါက့ၤဆူယအိၣ် ဒီးအသးဒီဖျၢၣ်ညါလီၤ.
တၢး၁၃ ၃/၁၅ ကဘျံးပၤ ၈ အဆၢ ၄
မ့ၢ်နအိၣ်ဒီး “သးလၢအသ့ၣ်ညါ” ယဟိဝၤယွၤဧါ
၄ ပှၤလၢ ဘၣ်တၢ်ဒိလီၤအီၤလၢ ချၢၣ်ဒၢသၣ် လၢအဂ့ၤတဖၣ်န့ၣ် ယဟိဝၤယွၤစံးဝဲလၢ– “ယကဟ့ၣ်လီၤအီၤလၢ အသးသ့ၣ်ညါယၤလၢ ယမ့ၢ်ယွၤလီၤ. ဒီးအဝဲသ့ၣ် ကကဲထီၣ်ယပှၤဂီၢ်မုၢ်” လီၤ. (ယံးရမံယၤ ၂၄:၇) လံာ်စီဆှံအဆၢအံၤ မ့ၢ်ဝဲတၢ်မၤလိအံၤ အတၢ်ဂ့ၢ်မိၢ်ပှၢ် ဒီးကဲထီၣ်တၢ်ဂံၢ်တၢ်ဘါဒ်လဲၣ်. ကစၢ်ယွၤ သးအိၣ်ဟ့ၣ်ဝဲ ပှၤတဂၤစုာ်စုာ်လၢ ‘သးလၢအသ့ၣ်ညါ’ အီၤလီၤ. ဖဲအံၤ “သး” န့ၣ်အဲၣ်ဒိးစံးဝဲ ပှၤတဂၤ အတၢ်ပာ်သူၣ်ပာ်သးလီၤ. နကအဲၣ်ဒိးအိၣ်ဒီး သးဒ်သိးအံၤ ဒီးနကအဲၣ်ဒိးကဲဘၣ် ယွၤအပှၤဂီၢ်မုၢ်လီၤ. မ့မ့ၢ်ဒ်န့ၣ်န့ၣ် နကဘၣ်မၤလိ အကလုၢ်ကထါ ဒီးမၤထွဲအီၤ, နကဘၣ်ပီၢ်ယၢ်လီၤက့ၤနသးဒီး ဆီတလဲနသး, ဟ့ၣ်လုၢ်ထီၣ်နသးဆူ ယဟိဝၤယွၤအအိၣ် ဒီးဒိးဘျၢထံလၢ ပၢ်, ဖိခွါ ဒီးသးစီဆှံလီၤ. (မးသဲ ၂၈:၁၉, ၂၀; မၤတၢ် ၃:၁၉) ဘၣ်သ့ၣ်သ့ၣ် နကလဲၤထီၣ် ယဟိဝၤပှၤအုၣ်အသးတဖၣ် အတၢ်အိၣ်ဖှိၣ်ဒီး မၤတ့ၢ်လံ တၢ်သ့ၣ်တဖၣ်အံၤလံ.
(ယံးရမံယၤ ၂၄:၈-၁၀) မ့မ့ၢ်ချၢၣ်ဒၢသၣ်အအၢ, လၢအအၢန့ၢ်ပှၤအီၣ်ဝဲကဲတက့ၢ် လၢအအၢအဃိန့ၣ်မ့ၢ်မးယွၤစံးဒ်အံၤ, ယကဟ့ၣ်လီၤကွံာ် ယူဒၤအစီၤပၤစံးဒကံယၤ, ဒီးအပဒိၣ်ဖးဒိၣ်တဖၣ်, ဒီးပှၤယရူၤၡလ့ၣ်ဖိ အတၢ်အိၣ်လီၤတဲာ်လၢ အအိၣ်လီၤတဲာ်ဝဲလၢ ကီၢ်အံၤအပူၤ, ဒီးပှၤလၢအအိၣ်ဝဲဆိးဝဲလၢ ကီၢ်အဲၤကူပတူးအပူၤန့ၣ်, ၉ ယကဟ့ၣ်လီၤကွံာ်အီၤဆူ တၢ်မၤကိၢ်မၤဂီၤ, ဒီးဆူတၢ်နးတၢ်ဖှီၣ်လၢ ဟီၣ်ခိၣ်အဘီမုၢ်ခဲလၢာ်အပူၤ ဒ်သိးအကကဲထီၣ် တၢ်ဒုၣ်ဒွဲၣ်အလီၢ်, ဒီးတၢ်ကတိၤဒိအလီၢ်, ဒီးတၢ်မၤတရီတပါအလီၢ်, ဒီးတၢ်ဆိၣ်အၢအလီၢ်လၢ ကယဲၢ်တၢ်အလီၢ်ဖဲ ယကဟီထီၣ်ကွံာ်အီၤလီၤ. ၁၀ ဒီးယကမၢလီၤနးဧိၤဘီဧိၤ, ဒီးတၢ်သၣ်ဝံၤလီၤဒိ, ဒီးတၢ်သံသတြိာ်လၢအကျါ တုၤအလၢာ်ကွံာ်ဝဲလၢ ကီၢ်တဘ့ၣ်အပူၤလၢယဟ့ၣ်လီၤအီၤ, ဒီးအပၢ်တဖၣ်န့ၣ်လီၤ.
တၢး၁၃ ၃/၁၅ ကဘျံးပၤ ၈ အဆၢ ၃
မ့ၢ်နအိၣ်ဒီး “သးလၢအသ့ၣ်ညါ” ယဟိဝၤယွၤဧါ
၃ ဘၣ်ဃးဒီးချၢၣ်ဒၢသၣ်န့ၣ် အဆိကတၢၢ် ပကဆိကမိၣ်ကွၢ်သကိးတၢ်လၢ ကစၢ်ယွၤစံးဝဲ ဘၣ်ဃးဒီး ဝံယံးရမံယၤအစိၤန့ၣ်တက့ၢ်. ဖဲချ.ခ.န ၆၁၇ န့ၣ် ကီၢ်ယူဒၤ အတၢ်ရ့လိာ်သးဒီးကစၢ်ယွၤန့ၣ် တဂ့ၤအါအါဘၣ်. ကစၢ်ယွၤ ဟ့ၣ်အဝဲသ့ၣ် တၢ်ထံၣ်လၢညါခီလၢ ဘၣ်ဃးဒီး ခါဆူညါ ဒီးဟ့ၣ်ဝဲတၢ်အဒိလၢ ချၢၣ်ဒၢသၣ်ခံကလုာ်, ချၢၣ်ဒၢသၣ်လၢအ “ဂ့ၤ” ဒီးချၢဒၢသၣ်လၢအ “အၢ” န့ၣ်လီၤ. (ဖး ယံးရမံယၤ ၂၄:၁-၃ တက့ၢ်.) ချၢၣ်ဒၢသၣ်လၢအအၢန့ၣ် မ့ၢ်ဝဲစီၤပၤစံးဒကံယၤ ဒီးပှၤအဂၤလၢ အဒ်သိးဒီးအီၤလၢ အတူၢ်ဘၣ် နဘူၤကးန့စၢ် ဒီးအသုးဖိတဖၣ် အတၢ်မၤအၢမၤနးန့ၣ်လီၤ. ချၢၣ်ဒၢသၣ်လၢ အဂ့ၤတဖၣ်န့ၣ် မ့ၢ်ဝဲစီၤယဃ့းစက့လး, စီၤဒၤနံးယ့လး ဒီးအသကိးသၢဂၤလၢ အလဲၤအိၣ်ပာ်စၢၤလၢ ဘၤဘူၤလိၣ် ဒီးပှၤယူဒၤဖိအဂၤတနီၤလၢ လၢခံဘၣ်တၢ်လဲၤကိးအီၤဆူ ဘၤဘူၤလိၣ်တဖၣ်န့ၣ်လီၤ. အဝဲသ့ၣ်အကျါတနီၤန့ၣ် ကက့ၤသူၣ်ထီၣ်ကဒါကၤ ဝ့ၢ်ယရူၤၡလ့ၣ်ဒီး အတၢ်လုၢ်ဟံၣ်လီၤ.—ယံးရမံယၤ ၂၄:၈-၁၀; ၂၅:၁၁, ၁၂; ၂၉:၁၀.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ယံးရမံယၤ ၂၂:၃၀) ယွၤစံးဒ်အံၤ, ကွဲးန့ၢ်ပှၤအံၤလၢပှၤတူာ်ဖိတဂၤ, ပှၤလၢအတဘီၣ်ထီၣ်တညီထီၣ်ဘၣ် တစိၤဒၣ်အီၤန့ၣ်တက့ၢ်. အဂ့ၢ်ဒ်အံၤ, ပှၤလၢအချံအသၣ်အကျါန့ၣ် တဘီၣ်ထီၣ်ညီထီၣ်ဘၣ်, ဒီးတဆ့ၣ်နီၤဘၣ်လၢ စီၤဒၤဝံးအလီၢ်ပစိာ်အဖီခိၣ်ဘၣ်. ဒီးတပၢလၢၤဘၣ်တၢ်လၢ ယူဒၤအပူၤနီတဂၤဘၣ်.
တၢး၀၇ ၃/၁၅ ကဘျံးပၤ ၁၀ အဆၢ ၉
လံာ်စီဆှံ အတၢ်ပာ်ဖျါလၢ လံာ်ယံးရမံယၤ
၂၂:၃၀—ဘၣ်မနုၤအဃိ တၢ်ကလုၢ်အံၤ တမၤလီၤမၢ်ကွံာ် ယ့ၣ်ၡူးအတၢ်ခွဲးတၢ်ယာ်လၢ အကဆ့ၣ်နီၤဝဲလၢ စီၤဒၤဝံးအလီၢ်ပစိာ်န့ၣ်လဲၣ်. (မးသဲ ၁:၁, ၁၁) တၢ်ကလုၢ်အံၤ အဲၣ်ဒိးစံးဝဲလၢ စီၤပၤယဟိၤယါကံၣ် အစၢၤအသွဲၣ်န့ၣ် “တဆ့ၣ်နီၤဘၣ်လၢ စီၤဒၤဝံး အလီၢ်ပစိာ်အဖီခိၣ်ဘၣ်.” မ့မ့ၢ်ယ့ၣ်ၡူးန့ၣ် ကပၢတၢ်လၢမူခိၣ် ဒီးတမ့ၢ်လၢ ယူဒၤအလီၢ်ပစိာ်အဖီခိၣ်ဘၣ်.
(ယံးရမံယၤ ၂၃:၃၃) ဒီးတုၤပှၤဂီၢ်မုၢ်အံၤမ့ၢ်ဂ့ၤ, ဝံမ့ၢ်ဂ့ၤ, ပှၤလုၢ်တၢ်အဒိၣ်မ့ၢ်ဂ့ၤ, ကသံကွၢ်နၤ, ဒီးစံး, ယွၤအတၢ်ဝံတၢ်ယိး မ့ၢ်မနုၤလဲၣ်န့ၣ်ဒီး, နဘၣ်စံးဆၢအီၤ, တၢ်ဝံတၢ်ယိးမနုၤလဲၣ်, ယကညိကွံာ်သု, ယွၤစံးဝဲဒၣ်.
တၢး၀၇ ၃/၁၅ ၁၁ အဆၢ ၁
လံာ်စီဆှံ အတၢ်ပာ်ဖျါလၢ လံာ်ယံးရမံယၤ
၂၃:၃၃ “ယွၤအတၢ်ဝံတၢ်ယိး” န့ၣ်မ့ၢ်မနုၤလဲၣ်” ဝံယံးရမံယၤ အတၢ်ကစီၣ်လၢ ဘၣ်ဃးဒီး ဝ့ၢ်ယရူၤၡလ့ၣ် ကဘၣ်တၢ်မၤဟးဂီၤအီၤန့ၣ် ကဲထီၣ်တၢ်ဝံတၢ်ယိးလၢ ပှၤဝ့ၢ်ဖိတဖၣ်အဂီၢ်လီၤ. ပှၤလၢတအိၣ်ဒီး တၢ်ဒိကနၣ်တဖၣ်န့ၣ် ကဲထီၣ်တၢ်ဝံတၢ်ယိးလၢ ယဟိဝၤယွၤအဂီၢ်ဒီး ကဘၣ်တၢ်ညိကွံာ်အီၤလီၤ. ဒ်န့ၣ်အသိး တၢ်ကစီၣ်လၢ ပှၤလၢအကိးလီၤအသးလၢခရံာ်ဖိတဖၣ် ကဘၣ်တၢ်စံၣ်ညီၣ်န့ၣ် ကဲထီၣ်တၢ်ဝံတၢ်ယိးလၢ အဝဲသ့ၣ်အဂီၢ်လီၤ. ဒီးပှၤလၢတဒိကနၣ် တၢ်ကစီၣ်အံၤတဖၣ်န့ၣ် ကဲထီၣ်တၢ်ဝံတၢ်ယိးလၢ ယဟိဝၤယွၤအဂီၢ်လီၤ.
တၢ်ဖးလံာ်စီဆှံ
(ယံးရမံယၤ ၂၃:၂၅-၃၆) ဝံတဖၣ်လၢ အကတိၤတၢ်လၢ ဝံကျိာ်ကဘျံးကဘျၣ် လၢယမံၤန့ၣ် ယနၢ်ဟူလံတၢ်လၢအစံးဝဲလံ. စံးဝဲ, ယမံမီၢ်တၢ်, ယမံမီၢ်တၢ်လီၤ. ၂၆ တၢ်န့ၣ်ကအိၣ်လၢ ဝံလၢအကတိၤတၢ်လၢ ဝံကျိာ်ကဘျံးကဘျၣ်အသးကံၢ်ပူၤ ဆံးယံာ်လဲၣ်. မ့ၢ်လၢအသးလီတၢ်အဝံလီၤ. ၂၇ ဆိကမိၣ်ဝဲလၢ အကဒုးသးပ့ၤနီၣ်ယပှၤဂီၢ်မုၢ်လၢ ယမံၤလၢအတၢ်မံမီၢ်တဖၣ် လၢအစံၣ်တဲၤတဲလီၤတဂၤပှၤလၢအဃၢၤ, တဂၤပှၤလၢအဃၢၤ, ဒ်အပၢ်သးပ့ၤနီၣ်ယမံၤလၢ ဘဧၤလးအဃိအသိးန့ၣ်လီၤ. ၂၈ ဝံလၢအအိၣ်ဒီးတၢ်မံမီၢ်, မ်အစံၣ်တဲၤတဲလီၤဒၣ်ဝဲလၢ တၢ်မံမီၢ်တက့ၢ်. ဒီးပှၤလၢအအိၣ်ဒီးယကလုၢ်န့ၣ်, မ်အစံၣ်တဲၤတဲလီၤယကလုၢ်တီတီတက့ၢ်. ဖ့ထိၣ်သတြီၤဒီးဟုန့ၣ် မ့ၢ်မနုၤတမံၤလဲၣ်, ယွၤစံးဝဲဒၣ်. ၂၉ ယကလုၢ်မၤသးဒ်မ့ၣ်အူအသိးန့ၣ် တမ့ၢ်ဘၣ်ဧါ, ယွၤစံးဝဲဒၣ်, ဒီးမၤသးဒ်ခံၣ်ခူၣ်လၢ အမၤလီၤကလဲလၢၢ်ဧိၤလ့ဧိၤ အသိးတမ့ၢ်ဘၣ်ဧါ. ၃၀ မၤသးဒ်န့ၣ်ဒီး, ကွၢ်ကွၢ်, ယထီဒါဝံတဖၣ်လၢ အဟုၣ်န့ၢ်ယကလုၢ်တဂၤလၢပှၤလၢအဃၢၤ, တဂၤလၢပှၤလၢအဃၢၤ, ယွၤစံးဝဲဒၣ်. ၃၁ ကွၢ်ကွၢ်, ယွၤစံးဝဲဒၣ်, ယထီဒါဝံတဖၣ်လၢအဟံးန့ၢ်အပျ့ၤဒီးစံး, အဝဲဒၣ်စံးဝဲဒၣ်န့ၣ်လီၤ. ၃၂ ကွၢ်ကွၢ်, ယွၤစံးဝဲဒၣ်, ယထီဒါပှၤလၢအကတိၤလၢဝံအကျိာ် လၢတၢ်မံမီၢ်ကဘျံးကဘျၣ်, ဒီးစံၣ်တဲၤတဲလီၤဝဲ, ဒီးဒုးလီၤကမၣ်ယပှၤဂီၢ်မုၢ်လၢ အတၢ်ကတိၤကဘျံးကဘျၣ်, ဒီးလၢအပာ်ကဖိအသးန့ၣ်လီၤ. ဘၣ်ဆၣ်ဒီးယတမၢလီၤဘၣ်အီၤဘၣ်, ဒီးတမၤလိာ်ဘၣ်အီၤဘၣ်, ဒီးပှၤဂီၢ်မုၢ်အံၤတဘၣ်ဘျုးဘၣ်ဖှိၣ်လၢအီၤ နီတမံၤဘၣ်, ယွၤစံးဝဲဒၣ်. ၃၃ ဒီးတုၤပှၤဂီၢ်မုၢ်အံၤမ့ၢ်ဂ့ၤ, ဝံမ့ၢ်ဂ့ၤ, ပှၤလုၢ်တၢ်အဒိၣ်မ့ၢ်ဂ့ၤ, ကသံကွၢ်နၤ, ဒီးစံး, ယွၤအတၢ်ဝံတၢ်ယိး မ့ၢ်မနုၤလဲၣ်န့ၣ်ဒီး, နဘၣ်စံးဆၢအီၤ, တၢ်ဝံတၢ်ယိးမနုၤလဲၣ်, ယကညိကွံာ်သု, ယွၤစံးဝဲဒၣ်. ၃၄ ဒီးဝံဂ့ၤ, ပှၤလုၢ်တၢ်အဒိၣ်ဂ့ၤ, ပှၤဂီၢ်မုၢ်ဂ့ၤ, လၢအစံးယွၤအတၢ်ဝံတၢ်ယိးန့ၣ်, ယကအိၣ်သကိးပှၤတဂၤန့ၣ်, ဒီးအပှၤဟံၣ်ဖိလီၤ. ၃၅ သုဘၣ်စံးဒ်အံၤ, တဂၤတဂၤ, ယွၤစံးဆၢတၢ်ဒ်လဲၣ်, ဒီးယွၤကတိၤတၢ်ဒ်လဲၣ်န့ၣ်လီၤ. ၃၆ ဒီးယွၤအတၢ်ဝံတၢ်ယိးန့ၣ် သုတစံးဘၣ်လၢၤဘၣ်. အဂ့ၢ်ဒ်အံၤ, ပှၤကညီအကလုၢ်န့ၣ် ကကဲထီၣ်တဂၤအတၢ်ဝံတၢ်ယိးစုာ်စုာ်လီၤ. အဂ့ၢ်ဒ်အံၤ, သုမၤကဒံကဒါကစၢ်လၢ အမူဝဲအကလုၢ်, တၢ်သုးမုၢ်ဂီၢ်မုၢ်အယွၤ, ပကစၢ်လီၤ.
လါအ့ဖြ့ၣ် ၁၇–၂၃
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယံးရမံယၤ ၂၅-၂၈
“အိၣ်ဒီး တၢ်သူၣ်ဒူသးဒူ ဒ်ဝံယံးရမံယၤအသိး”
(ယံးရမံယၤ ၂၆:၂-၆) ယွၤစံးဒ်အံၤ, ဆၢထၢၣ်လၢယွၤအဟံၣ်အဂၢၤပူၤ, ဒီးစံးဘၣ်ကယဲၢ်ယူဒၤအဝ့ၢ်ခဲလၢာ် လၢအဟဲဘူၣ်ထီၣ်ဘါထီၣ် တၢ်လၢယွၤအဟံၣ်, လၢကယဲၢ်တၢ်ကတိၤလၢ ယမၤလိာ်နၤတက့ၢ်. ပာ်လီၤတဲာ်နီတဘီတဂ့ၤ. ၃ ဘၣ်တဘၣ်ကကနၣ်ဝဲ, ဒီးပှၤကဃၣ်ကွံာ်အသးတဂၤလၢ အကျဲအၢဒၣ်ဝဲ, တဂၤလၢအကျဲအၢဒၣ်ဝဲစုာ်စုာ်, ဒ်သိးယကပီၢ်ယၢ်လီၤက့ၤယသး လၢတၢ်အၢလၢ ယကူၣ်ထီၣ်လၢ ယကဒုးဘၣ်အီၤလၢ အမၤတၢ်အၢအဃိန့ၣ်လီၤ. ၄ ဒီးနဘၣ်စံးဘၣ်အီၤ, ယွၤစံးဒ်အံၤ, သုမ့ၢ်တကနၣ်ယကလုၢ် ဒ်သိးသုကလဲၤလၢ တၢ်သိၣ်တၢ်သီအပူၤ လၢယပာ်လီၤလၢသုမဲာ်ညါ, ၅ သုမ့ၢ်တကနၣ်ဘၣ်ယခ့ယပှၤဝံတဖၣ် အကလုၢ်လၢယမၢလီၤဆူသုအိၣ်ဒီး, (ယဂဲၤဆၢထၢၣ်ဂီၤဂီၤ, ဒီးမၢလီၤအီၤ, ဒီးသုတကနၣ်ဘၣ်,) ၆ ယကပာ်ဟံၣ်တဟံၣ်အံၤ ဒ်ၡံလိၤအသိး, ဒီးယကပာ်ဝ့ၢ်တဝ့ၢ်အံၤလၢ တၢ်ဆိၣ်အၢအလီၢ်လၢ ဟီၣ်ခိၣ်အကလုာ်ခဲလၢာ်အဂီၢ်လီၤ.
တၢး၀၉ ၁၂/၁ ကဘျံးပၤ ၂၄ အဆၢ ၆
ဝံယံးရမံယၤ တတူၢ်ၡူအသးဘၣ်
ယဟိဝၤယွၤ တဲဘၣ် ဝံယံးရမံယၤ လၢကဟ့ၣ်ပလီၢ်ဝဲ ပှၤဂီၢ်မုၢ်တဖၣ်လၢ အဝဲသ့ၣ် မ့ၢ်တလဲၤသဒၣ်အကျဲအၢဘၣ်န့ၣ် ဝ့ၢ်ယရူၤၡလ့ၣ် ကဘၣ်တၢ်မၤဟးဂီၤအီၤန့ၣ်လီၤ. ဖဲဝံယံးရမံယၤ လဲၤတဲဝဲတၢ်ကစီၣ်အံၤအခါ ပှၤသးထီၣ်အီၤ ဒီးတဲအီၤလၢ– “ပှၤတဂၤအံၤ ကြၢးဘၣ်တၢ်စံၣ်ညီၣ်သံလီၤ.” ဝံယံးရမံယၤ ဃ့ကညးအဝဲသ့ၣ်လၢ “ကနၣ်ယွၤသုကစၢ်အကလုၢ်” တက့ၢ်. ဒီးစံးကဒီးဝဲလၢ– ‘သ့ၣ်ညါသပှၢ်တၢၢ်လၢ သုမ့ၢ်မၤသံယၤန့ၣ် မ့ၢ်ဒၣ်သုမၤသံ ပှၤလၢအတၢ်ကမၣ်တအိၣ်တဂၤလီၤ. မ့ၢ်လၢကစၢ်ယွၤ မၢလီၤယၤအဃိလီၤ.’ လၢခံတၢ်မၤအသးဒ်လဲၣ် နသ့ၣ်ညါဧါ.
(ယံးရမံယၤ ၂၆:၈, ၉) ဒီးတုၤစီၤယံးရမံယၤ ကတိၤဝံၤလၢာ်ကယဲၢ်တၢ်လၢ ယွၤမၤလိာ်အီၤလၢ အဘၣ်ကတိၤဒီးပှၤဂီၢ်မုၢ်ခဲလၢာ်ဒီး, တၢ်မၤအသးလၢ ပှၤလုၢ်တၢ်အဒိၣ်တဖၣ်, ဒီးဝံတဖၣ်, ဒီးပှၤဂီၢ်မုၢ်ခဲလၢာ်ဟံးဃာ်အီၤ, ဒီးစံးဝဲဒၣ်, သံဒီးနကသံလီၤ. ၉ နကတိၤတၢ်လၢဝံကျိာ်လၢယွၤအမံၤ, ဒီးစံး, ဟံၣ်တဖျၢၣ်အံၤကမၤသးဒ်ၡံလိၤအသိး, ဒီးဝ့ၢ်တဝ့ၢ်အံၤကအိၣ်သယုၢ်, ပှၤအိၣ်ဝဲဆိးဝဲလၢအပူၤတအိၣ်ဘၣ်န့ၣ် မ့ၢ်အဘၣ်မနုၤလဲၣ်. ဒီးပှၤဂီၢ်မုၢ်ခဲလၢာ်အိၣ်ဖှိၣ်ရိဖှိၣ်ထီဒါ စီၤယံးရမံယၤလၢယွၤအဟံၣ်ပူၤန့ၣ်လီၤ.
(ယံးရမံယၤ ၂၆:၁၂, ၁၃) ဒီးစီၤယံးရမံယၤကတိၤတၢ်ဒီး ပဒိၣ်ဖးဒိၣ်ခဲလၢာ်, ဒီးပှၤဂီၢ်မုၢ်ခဲလၢာ်, ဒီးစံးဝဲဒၣ်, ယွၤမၢယကတိၤတၢ်လၢဝံကျိာ် ထီဒါဟံၣ်တဖျၢၣ်အံၤ, ဒီးဝ့ၢ်တဝ့ၢ်အံၤလၢကယဲၢ် တၢ်ကတိၤလၢသုနၢ်ဟူလီၤ. ၁၃ ဒီးခဲကနံၣ်အံၤ, မၤဂ့ၤထီၣ်သုကျဲဒီးသုမၤတၢ်, ဒီးကနၣ်ယွၤသုကစၢ်အကလုၢ်တက့ၢ်. ဒီးယွၤကပီၢ်ယၢ်လီၤက့ၤအသးလၢ ကယဲၢ်တၢ်အၢလၢ အကတိၤတၢ်လၢသုဂ့ၢ်လီၤ.
jr ကဘျံးပၤ ၂၁ အဆၢ ၁၃
တၢ်မၤကစၢ်ယွၤအတၢ်မၤလၢ ‘မုၢ်နံၤခံကတၢၢ်အတီၢ်ပူၤ’
၁၃ ပမ့ၢ်ကွၢ် ကီၢ်ယူဒၤ အတၢ်ဘူၣ်တၢ်ဘါ ဒီးထံဂ့ၢ်ကီၢ်ဂ့ၢ် အတၢ်အိၣ်သးန့ၣ် နဆိကမိၣ်လၢ တၢ်ဘူၣ်တၢ်ဘါခိၣ်နၢ်တဖၣ် မ့ၢ်အဝဲသ့ၣ် ဒိကနၣ်ဝဲ ဝံယံးရမံယၤ အတၢ်ကတိၤဧါ. ဝံယံးရမံယၤ အနီၢ်ကစၢ် ကွဲးဝဲလၢ “ပှၤလုၢ်တၢ်အဒိၣ်တဖၣ်, ဒီးဝံတဖၣ်, ဒီးပှၤဂီၢ်မုၢ်ခဲလၢာ်ဟံးဃာ်အီၤ, ဒီးစံးဝဲဒၣ်, သံဒီးနကသံလီၤ.” အဝဲသ့ၣ် ကိးသတြီထီၣ်လၢ “ပှၤတဂၤအံၤ ကြၢးဘၣ်တၢ်စံၣ်ညီၣ်သံလီၤ.” (ဖး ယံးရမံယၤ ၂၆:၈-၁၁ တက့ၢ်.) ပှၤတဖၣ်အံၤ ကမၤသံ ဝံယံးရမံယၤ ဘၣ်ဆၣ် မၤဝဲတန့ၢ်ဘၣ်. မ့ၢ်လၢ ယဟိဝၤယွၤ အိၣ်ဒီးဝံယံးရမံယၤ ဒီးမၤပူၤဖျဲးအီၤအဃိလီၤ. ပှၤထီဒါတၢ်အိၣ်ဝဲအါ ဒီးအိၣ်ဒီးအစိအကမီၤ သနာ်က့ ဝံယံးရမံယၤတပျံၤအဝဲသ့ၣ်ဘၣ်. နၤစ့ၢ်ကီးနပျံၤတၢ်အလီၢ်တအိၣ်ဘၣ်.
(ယံးရမံယၤ ၂၆:၁၆) ဒီးပဒိၣ်ဖးဒိၣ်တဖၣ်, ဒီးပှၤဂီၢ်မုၢ်ခဲလၢာ် စံးဘၣ်ပှၤလုၢ်တၢ်အဒိၣ်, ဒီးဝံတဖၣ်န့ၣ်, ပှၤတဂၤအံၤတကြၢးဘၣ်တၢ်စံၣ်ညီၣ်သံဘၣ်. အဂ့ၢ်ဒ်အံၤ, ကတိၤတၢ်ဒီးပှၤလၢ ပကစၢ်အမံၤလီၤ.
(ယံးရမံယၤ ၂၆:၂၄) ဘၣ်ဆၣ်ဒီးစီၤၡၤဖၣ်အဖိခွါ စီၤအဃံကၣ်အစုအိၣ်ဝဲဒီး စီၤယံးရမံယၤ ဒ်သိးပှၤအသုတဟ့ၣ်လီၤကွံာ်အီၤဆူ ပှၤဂီၢ်မုၢ်အစုပူၤလၢ အကမၤသံအီၤတဂ့ၤန့ၣ်လီၤ.
တၢး၀၉ ၁၂/၁ ကဘျံးပၤ ၂၅ အဆၢ ၁
ဝံယံးရမံယၤ တတူၢ်ၡူအသးဘၣ်
လံာ်စီဆှံ ပာ်ဖျါဝဲလၢ– “ဒီးပဒိၣ်ဖးဒိၣ်တဖၣ်, ဒီးပှၤဂီၢ်မုၢ်ခဲလၢာ်စံးဘၣ်ပှၤလုၢ်တၢ်အဒိၣ်, ဒီးဝံတဖၣ်န့ၣ်, ပှၤတဂၤအံၤတကြၢးဘၣ် တၢ်စံၣ်ညီၣ်သံဘၣ်. အဂ့ၢ်ဒ်အံၤ, ကတိၤတၢ်ဒီးပှၤလၢ ပကစၢ်အမံၤလီၤ.” မ့ၢ်လၢ ဝံယံးရမံယၤ တပျဲဝဲတၢ်ပျံၤတၢ်ဖုး မၤပတုာ်အီၤအဃိ ယဟိဝၤယွၤ ဒီသဒၢအီၤလီၤ. ပကကွၢ်သကိး ယဟိဝၤယွၤအဝံအဂၤတဂၤလၢ အမံၤမ့ၢ် အူၤရံယၤ အဂ့ၢ်လီၤ. အဝဲတဒ်သိးဒီး ဝံယံးရမံယၤ နီတစဲးဘၣ်.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ယံးရမံယၤ ၂၇:၂, ၃) ယွၤစံးဘၣ်ယၤဒ်အံၤ, မၤတၢ်စၢဃာ်အပျံၤဒီးနီၣ်ယိးဘိ, ဒီးပာ်အီၤလၢနကိာ်လိၤ, ၃ ဒီးဟ့ၣ်ယုၢ်အီၤဆူအဒိၣ်အစီၤပၤ, ဒီးမိၤအးအစီၤပၤ, ဒီးပှၤဧၣ်မိၣ်ဖိအစီၤပၤ, ဒီးစိၢ်အစီၤပၤ, ဒီးစံဒိၣ်အစီၤပၤလၢ ကလူးတဖၣ်အစုပူၤ လၢအဟဲဆူယရူၤၡလ့ၣ်, ဆူယူဒၤအစီၤပၤ စံးဒကံယၤအအိၣ်န့ၣ်တက့ၢ်.
jr ကဘျံးပၤ ၂၇ အဆၢ ၂၁
တၢ်မၤကစၢ်ယွၤအတၢ်မၤလၢ ‘မုၢ်နံၤခံကတၢၢ်အတီၢ်ပူၤ’
၂၁ ဖဲစီၤပၤ စံးဒကံယၤ ကဲထီၣ်စီၤပၤသီသီန့ၣ် အဒိၣ်စီၤပၤ, မိၤအးစီၤပၤ, ဧၣ်မိၣ်စီၤပၤ, စိၢ်အစီၤပၤ ဒီး စံဒိၣ်အစီၤပၤတဖၣ် ဟဲဆူဝ့ၢ်ယရူၤၡလ့ၣ်လီၤ. ဘၣ်သ့ၣ်သ့ၣ် အဝဲသ့ၣ် အတၢ်တိာ်ပာ်န့ၣ် အဲၣ်ဒိးဝဲ စီၤပၤစံးဒကံယၤ ကဟဲအိၣ်ဃူဒီး အဝဲသ့ၣ် ဒ်သိးကထီဒါဝဲ စီၤပၤနဘူၤကးန့စၢ်အဂီၢ်လီၤ. ဘၣ်ဆၣ်, ဝံယံးရမံယၤ ဟ့ၣ်ဂံၢ်ဟ့ၣ်ဘါ စီၤပၤစံးဒကံယၤလၢ ကဒိးပၢအသးလၢ ဘၤဘူၤလိၣ် အတၢ်ပၢအဖီလာ်လီၤ. ဝံယံးရမံယၤ ဟ့ၣ်လီၤဝဲ ပှၤစိာ်တၢ်ကစီၣ်တဖၣ်လၢ နီၣ်ယိးဘိ ဒ်သိးကသ့ၣ်ညါဝဲလၢ အဝဲသ့ၣ်စ့ၢ်ကီး ကြၢးဒိးပၢအသးလၢ ဘၤဘူၤလိၣ်အတၢ်ပၢဖီလာ်န့ၣ်လီၤ. (ယံးရမံယၤ ၂၇:၁-၃, ၁၄) ဝံယံးရမံယၤ အတၢ်ကတိၤတဖၣ်န့ၣ် ပှၤတဘၣ်သူၣ်ဘၣ်သးဘၣ်. တကးဒံးဘၣ် လၢစီၤဃနၤနယၤအဃိ ပှၤတယာ်တၢ်တဘၣ်လၢၤဘၣ်. မ့ၢ်လၢအဝဲမ့ၢ်ဝံအဘျၣ် ဒီးသူဝဲကစၢ်ယွၤအမံၤဒီး တဲဝဲလၢ ဘၤဘူၤလိၣ်အနီၣ်ယိးဘိ ကကၢ်ကွံာ်ဝဲအဃိလီၤ. ဘၣ်ဆၣ် ယဟိဝၤယွၤစံးဘၣ် စီၤဃနၤနယၤ ခီဖျိဝံယံးရမံယၤ ဒီးတဲဘၣ်အီၤလၢ ကဘၣ်သံလၢ တနံၣ်အတီၢ်ပူၤလီၤ. ဒ်ကစၢ်ယွၤစံးဝဲအသိး စီၤဃနၤနယၤ ဘၣ်သံဝဲလီၤ.—ယံးရမံယၤ ၂၈:၁-၃, ၁၆, ၁၇.
(ယံးရမံယၤ ၂၈:၁၁) ဒီးစီၤဃနၤနယၤကတိၤတၢ်လၢ ပှၤဂီၢ်မုၢ်ခဲလၢာ်အမဲာ်ညါ ဒီးစံးဝဲဒၣ်, ယွၤစံးဒ်အံၤ, ယကမၤကၢ်ကွံာ် ဘၤဘူၤလိၣ်အစီၤပၤ နဘူၤကးန့စၢ်အနီၣ်ယိးဘိလၢ ပှၤကိးကလုာ်ဒဲးအကိာ်လိၤ ဒ်န့ၣ်သိးလၢခံနံၣ် အမုၢ်နံၤတဖၣ်အတီၢ်ပူၤလီၤ. ဒီးဝံယံးရမံယၤဟးထီၣ်ဝဲလီၤ.
jr ကဘျံးပၤ ၁၈၇-၁၈၈ အဆၢ ၁၁-၁၂
“ယအိၣ်ဘှီၣ်ကလာ်တကဲဘၣ်”
၁၁ ပကဘၣ်သ့ၣ်ညါလၢ ဝံယံးရမံယၤန့ၣ် တမ့ၢ်ပှၤလၢအဟးမၤနါစိၤတၢ်ဘၣ်. ဖဲအဝဲကွၢ်ဆၢၣ်မဲာ်ဘၣ် ပှၤလၢအထီဒါအီၤတဖၣ်အခါ သူဝဲအခိၣ်နူာ်လီၤ. အဝဲ ကဘၣ်ပဒ့ၣ်အသးဖဲလဲၣ်, အဆၢကတီၢ်ဖဲလဲၣ်န့ၣ် သ့ၣ်ညါဝဲလီၤ. အဒိ, ဖဲအဝဲထံၣ်လိာ်အသးဒီး စီၤဃနၤနယၤအခါ တၢ်မၤအသးဒ်လဲၣ်န့ၣ် ဆိကမိၣ်ကွၢ်တက့ၢ်. ဝံအဘျၣ်အံၤ ထီဒါဝဲယဟိဝၤယွၤ အတၢ်ကတိၤလၢ ဝံယံးရမံယၤတဲဝဲတဖၣ်ဝံၤ အလီၢ်ခံ ယံးရမံယၤ သိၣ်က့ၤသီက့ၤအီၤ ဒီးတဲနၢ်ပၢၢ်ဝဲ လၢပှၤနီၤဖးဝံအမ့ၢ်အတီသ့ဒ်လဲၣ်န့ၣ်လီၤ. ဝံယံးရမံယၤ ယိးဝဲနီၣ်ယိးဘိသ့ၣ်တဘိ ဒ်သိးကပာ်ဖျါဝဲလၢ အဝဲသ့ၣ်ကဘၣ်ယိးဝဲ ဘၤဘူၤလိၣ်အနီၣ်ယိးဘိန့ၣ်လီၤ. စီၤဃနၤနယၤ အသးထီၣ်ဒီး မၤကၢ်ကွံာ် နီၣ်ယိးဘိန့ၣ်လီၤ. စီၤဃနၤနယၤ ကဆဲးမၤတၢ်မနုၤလဲၣ်န့ၣ် ဝံယံးရမံယၤ တယာ်ဝဲဘၣ်လီၤ. လၢတၢ်န့ၣ်အဃိ ဝံယံးရမံယၤ မၤဝဲတၢ်မနုၤလဲၣ်. ပဖးဘၣ်လၢ– “ဝံယံးရမံယၤ ဟးထီၣ်ဝဲလီၤ.” အဃိ ပသ့ၣ်ညါဘၣ်လၢ ဝံယံးရမံယၤ ဟးထီၣ်ကွံာ်ဝဲလၢ တၢ်လီၢ်အဝဲန့ၣ်လီၤ. လၢခံယဟိဝၤယွၤ မၢဝံယံးရမံယၤ ဟဲက့ၤဆူ စီၤဃနၤနယၤအအိၣ်ဒီး တဲဘၣ်အီၤလၢ ပှၤယူဒၤဖိတဖၣ် ကဘၣ်လဲၤကဲကုၢ်လၢ ကီၢ်ဘၤဘူၤလိၣ် ဒီးစီၤဃနၤနယၤ ကဘၣ်သံအဂ့ၢ်န့ၣ်လီၤ.—ယံးရမံယၤ ၂၈:၁-၁၇.
၁၂ တၢ်မၤအသးအံၤ ပာ်ဖျါဝဲလၢ ဖဲပစံၣ်တဲၤတဲလီၤတၢ်အခါ ပကဘၣ်အိၣ်ဒီး တၢ်သူၣ်ဒူသးဒူ တကးဒံးဘၣ် ပကဘၣ်အိၣ်ဒီး တၢ်ကူၣ်သ့န့ၣ်လီၤ. ဖဲပစံၣ်တဲၤတဲလီၤတၢ်အခါ ဟံၣ်ကစၢ်တဂၤ မ့ၢ်တတူၢ်လိာ် ပတၢ်သးခုကစီၣ်, မ့ၢ်သးထီၣ်တၢ် မ့တမ့ၢ် မၤအၢမၤနးပှၤန့ၣ် ပကြၢးတဲဆၢက့ၤအီၤလၢ တၢ်ပာ်ကဲအပူၤဒီး ဆဲးလဲၤဆူဟံၣ်အသီတဖျၢၣ်လီၤ. ဘၣ်ဃးဒီး ဘီမုၢ်အတၢ်သးခုကစီၣ်န့ၣ် တလိၣ်ပတဲအါတဲစှၤတၢ်ဒီးပှၤ နီတဂၤဘၣ်. ပမ့ၢ် ‘ကီၤပသး’ န့ၣ်လၢခံ ပဟဲက့ၤတဲသကိးတၢ်ဒီး ဟံၣ်ကစၢ်လၢ ဆၢကတီၢ်အဂၤကန့ၢ်ဝဲလီၤ.—ဖး ၂ တံၤမသ့း ၂:၂၃-၂၅ တက့ၢ်; ကတိၤဒိ ၁၇:၁၄.
တၢ်ဖးလံာ်စီဆှံ
(ယံးရမံယၤ ၂၇:၁၂-၂၂) ဒီးယကတိၤတၢ်ဒီး ယူဒၤအစီၤပၤစံးဒကံယၤ ဒ်တၢ်ကတိၤအံၤခဲလၢာ်အသိးန့ၣ်, ဒီးယစံး, ပာ်သုကိာ်လၢဘၤဘူၤလိၣ်အစီၤပၤ အနီၣ်ယိးဘိအဖီလာ်, ဒီးမၤအတၢ်, ဒီးအပှၤဂီၢ်မုၢ်အတၢ်, ဒီးမူတက့ၢ်. ၁၃ သုကသံ, နဲဒၣ်ဒီးနပှၤဂီၢ်မုၢ်, လၢနးဧိၤဘီဧိၤ, ဒီးလၢတၢ်သၣ်ဝံၤလီၤဒိ, ဒီးလၢတၢ်သံသတြိာ်, ဒ်ယွၤကတိၤတၢ်လၢ ပှၤတကလုာ်အဂ့ၢ်လၢ အတမၤဘၣ်ဘၤဘူၤလိၣ်အစီၤပၤ အတၢ်အသိးန့ၣ် မ့ၢ်အဘၣ်မနုၤလဲၣ်. ၁၄ မၤသးဒ်န့ၣ်ဒီး ဝံတဖၣ်လၢအစံးဘၣ်သုဒီးစံး, သုတမၤဘၣ်ဘၤဘူၤလိၣ်အစီၤပၤအတၢ်ဘၣ်န့ၣ် ကနၣ်အကလုၢ်တဂ့ၤ. အဂ့ၢ်ဒ်အံၤ, ကတိၤတၢ်လၢဝံကျိာ်လၢ တၢ်ကဘျံးကဘျၣ်ဒီးသုလီၤ. ၁၅ အဂ့ၢ်ဒ်အံၤ, ယတမၢလီၤဘၣ်အီၤဘၣ်, ယွၤစံးဝဲဒၣ်, မ့မ့ၢ်ကတိၤတၢ်လၢဝံကျိာ် လၢတၢ်ကဘျံးကဘျၣ်လၢယမံၤ ဒ်သိးယကဟီထီၣ်ကွံာ်သု, ဒီးဒ်သိးသုကတုၤလၢတၢ်ဟးဂီၤ, သုဝဲ, ဒီးဝံတဖၣ်လၢအကတိၤတၢ်လၢ ဝံကျိာ်ဒီးသုစ့ၢ်ကီးလီၤ. ၁၆ ဒီးယကတိၤတၢ်ဒီးပှၤလုၢ်တၢ်အဒိၣ်, ဒီးပှၤဂီၢ်မုၢ်ခဲလၢာ်အံၤ, ဒီးယစံး, ယွၤစံးဒ်အံၤ, ဝံတဖၣ်လၢအကတိၤတၢ်လၢဝံကျိာ် ဒီးသုဒီးစံး, ကွၢ်ကွၢ်, ယွၤအဟံၣ်အဃၢၤအဃိၢ်န့ၣ် ပှၤတဟဲက့ၤစိာ်အီၤချ့ချ့လၢ ဘၤဘူၤလိၣ်အပူၤန့ၣ် ကနၣ်အကလုၢ်တဂ့ၤ. အဂ့ၢ်ဒ်အံၤ, ကတိၤတၢ်လၢဝံကျိာ် ကဘျံးကဘျၣ်ဒီးသုလီၤ. ၁၇ ကနၣ်အကလုၢ်တဂ့ၤ. မၤဘၤဘူၤလိၣ်စီၤပၤအတၢ် ဒီးမူတက့ၢ်. ဝ့ၢ်တဝ့ၢ်အံၤကဘၣ်တၢ်မၤသယုၢ်အီၤ မ့ၢ်အဘၣ်မနုၤလဲၣ်. ၁၈ ဘၣ်ဆၣ်ဒီး အဝဲသ့ၣ်မ့မ့ၢ်ဝံတဖၣ်, ဒီးယွၤအကလုၢ်မ့ၢ်အိၣ်ဒီးအီၤဒီး, မ်အဃ့ကညးတၢ်သုးမုၢ်ဂီၢ်မုၢ်အယွၤ ဒ်သိးတၢ်အဃၢၤအဃိၢ် လၢအအိၣ်လီၤတဲာ်တဖၣ် လၢယွၤအဟံၣ်ပူၤ, ဒီးလၢယူဒၤအစီၤပၤအဟံၣ်ပူၤ, ဒီးလၢယရူၤၡလ့ၣ်အပူၤ အသုတလဲၤစ့ၢ်ကီးဆူ ဘၤဘူၤလိၣ်န့ၣ်တဂ့ၤ. ၁၉ အဂ့ၢ်ဒ်အံၤ, တၢ်သုးမုၢ်ဂီၢ်မုၢ်အယွၤစံးဒ်အံၤ လၢထူၣ်တဖၣ်အဂ့ၢ်, ဒီးလၢပီၣ်လဲၣ်တဖျၢၣ်အဂ့ၢ်, ဒီးလၢအခီၣ်တဖၣ်အဂ့ၢ်, ဒီးလၢတၢ်အဃၢၤအဃိၢ်လၢ အအိၣ်လီၤတဲာ်လၢ ဝ့ၢ်တဝ့ၢ်အံၤအပူၤအဂ့ၢ်, ၂၀ လၢဘၤဘူၤလိၣ်အစီၤပၤနဘူၤကးန့စၢ် တစိာ်ထီၣ်ဘၣ်ဖဲအကတီၢ်လၢ အစိာ်ထီၣ်မၢကဲကုၢ် ယူဒၤအစီၤပၤစီၤယဟိၤယါကံၣ်အဖိခွါ စီၤယံးကၤနံယၤလၢယရူၤၡလ့ၣ် ဆူဘၤဘူၤလိၣ်အအိၣ်, ဒီးယူဒၤဒီးယရူၤၡလ့ၣ် အပဒိၣ်ဖးဒိၣ်ခဲလၢာ်န့ၣ်ဒ်အံၤ, ၂၁ မ့ၢ်မးတၢ်သုးမုၢ်ဂီၢ်မုၢ်အယွၤ, အံၣ်စရ့လးအကစၢ်စံးဒ်အံၤ, လၢတၢ်အဃၢၤအဃိၢ်လၢ အအိၣ်လီၤတဲာ်လၢယွၤအဟံၣ်ပူၤ, ဒီးလၢယူဒၤအစီၤပၤအဟံၣ်ပူၤ, ဒီးလၢယရူၤၡလ့ၣ်အပူၤအဂ့ၢ်န့ၣ်, ၂၂ ပှၤကစိာ်ထီၣ်ကွံာ်အီၤဆူဘၤဘူၤလိၣ်, ဒီးကအိၣ်ဖဲန့ၣ်တုၤမုၢ်တနံၤလၢ ယကအိၣ်သကိးအီၤလီၤ. ယွၤစံးဝဲဒၣ်. တုၤနုၤတဘျီယကဟဲက့ၤစိာ်အီၤ, ဒီးပာ်က့ၤအီၤလၢအလီၢ်ဖဲအံၤလီၤ.
လါအ့ဖြ့ၣ် ၂၄–၃၀
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယံးရမံယၤ ၂၉-၃၁
“ယဟိဝၤယွၤ တဲဆိပာ်ဝဲ တၢ်အၢၣ်လီၤအီလီၤအသီ”
(ယံးရမံယၤ ၃၁:၃၁) ကွၢ်ကွၢ်, ယွၤစံးဝဲဒၣ်, မုၢ်နံၤတဖၣ်ကဟဲဝဲလၢ ယကအၢၣ်လီၤအီၤလီၤတၢ်အသီ ဒီးအံၣ်စရ့လးအပှၤဟံၣ်ဖိ, ဒီးယူဒၤအပှၤဟံၣ်ဖိလီၤ.
it-1 ကဘျံးပၤ ၅၂၄ အဆၢ ၃-၄
တၢ်အၢၣ်လီၤအီလီၤ
တၢ်အၢၣ်လီၤအီလီၤအသီ. ဖဲ ချ.ခ.န ယၤဖှိၣ်နံၣ် ၇၀၀ န့ၣ်ယဟိဝၤယွၤ တဲဆိပာ်စၢၤဝဲ ဝံယံးရမံယၤလၢ တၢ်အၢၣ်လီၤအီလီၤအသီအဂ့ၢ်လီၤ. ဒီးအဝဲတဲဝဲလၢ တၢ်အၢၣ်လီၤအီလီၤအသီအံၤ တဒ်သိးဒီး တၢ်အၢၣ်လီၤအီလီၤ အလီၢ်လံၤလၢ ပှၤအံၣ်စရ့လးဖိတဖၣ် မၤဟးဂီၤကွံာ်ဝဲဘၣ်. (ယံးရမံယၤ ၃၁:၃၁-၃၄) ဖဲ ခ.န ၃၃, လါနံစၣ် ၁၄ သီ, တချုးလၢ ယ့ၣ်ၡူးသံအနၤ, အဝဲမၤဝဲ ကစၢ်အတၢ်အီၣ်လၢဟါအီၣ်အခါ ဘိးဘၣ်သ့ၣ်ညါဝဲ တၢ်အၢၣ်လီၤအီလီၤအသီအဂ့ၢ်ဒီး တၢ်အၢၣ်လီၤအီလီၤအသီအံၤ ကဘၣ်တၢ်ပာ်ဂၢၢ်ကျၢၤအီၤ ခီဖျိလၢ အဝဲအတၢ်ဟ့ၣ်လုၢ်ထီၣ်သးန့ၣ်လီၤ. (လူၤကၣ် ၂၂:၂၀) ယ့ၣ်ၡူး ဂဲၤဆၢထၢၣ်သမူထီၣ်က့ၤ ပှဲၤထီၣ်အသီ ၅၀ လံ ဒီးဖဲန့ၣ်အဆၢကတီၢ် က့ၤထီၣ်ဝဲဆူ အပၢ်အအိၣ် အိၣ်ဝဲအသီ ၁၀ လံလီၤ. ဖဲန့ၣ်အခါ အဝဲလူလီၤဝဲ သးစီဆှံလၢအဒိးန့ၢ်ဘၣ်ဝဲလၢ အပၢ်အအိၣ် ဖဲအပျဲၢ်အဘီၣ်တဖၣ် အိၣ်ဖှိၣ်ရိဖှိၣ်လၢ ဝ့ၢ်ယရူၤၡလ့ၣ် အဒၢးလၢ ဟံၣ်ဖီခိၣ်အခါန့ၣ်လီၤ.—မၤတၢ်. ၂:၁-၄, ၁၇, ၃၃; ၂ ကရံၣ်သူး ၃:၆, ၈, ၉; ဧ့ၤဘြံၤ ၂:၃, ၄.
ပှၤလၢအပၣ်ဃုာ်လၢ တၢ်အၢၣ်လီၤအီလီၤအသီတဖၣ်န့ၣ်မ့ၢ်ဝဲ “ယွၤအအံၣ်စရ့လး” လၢအမ့ၢ် ယ့ၣ်ၡူး အတၢ်အိၣ်ဖှိၣ် မ့တမ့ၢ် အနီၢ်ခိဒီဂၤအက့ၢ်အဂီၤ, ပှၤဘၣ်တၢ်ဒိးဖှူအီၤတဖၣ်လၢ အအိၣ်ဃူအိၣ်ဖိးဒီးအီၤန့ၣ်လီၤ. (ဧ့ၤဘြံၤ ၈:၁၀; ၁၂:၂၂-၂၄; ကလၤတံ ၆:၁၅, ၁၆; ၃:၂၆-၂၈; ရိမ့ၤ ၂:၂၈, ၂၉) တၢ်အၢၣ်လီၤအီလီၤအသီန့ၣ် စးထီၣ်အသးဖဲ ယ့ၣ်ၡူးအသွံၣ် (ယ့ၣ်ၡူးအသးသမူလၢ အအိၣ်လၢဟီၣ်ခိၣ်အခါ) အဃိလီၤ. ယ့ၣ်ၡူးက့ၤထီၣ်ဆူမူခိၣ်ဒီး ဟ့ၣ်လုၢ်ထီၣ်ဝဲ အသွံၣ်အံၤ အလုၢ်အပှ့ၤဆူ ယဟိဝၤယွၤအအိၣ်လီၤ. (မးသဲ ၂၆:၂၈) ဖဲကစၢ်ယွၤဃုထၢထီၣ် ပှၤတဂၤလၢ ကထီၣ်ဆူမူခိၣ်အခါ (ဧ့ၤဘြံၤ ၃:၁) ကစၢ်ယွၤဒုးပၣ်ဃုာ်အီၤလၢ တၢ်အၢၣ်လီၤအီလီၤအသီအပူၤ ခီဖျိလၢ ယ့ၣ်ၡူးအသွံၣ်အဃိလီၤ. (စံး. ၅၀:၅; ဧ့ၤဘြံၤ ၉:၁၄, ၁၅, ၂၆) ယ့ၣ်ၡူးမ့ၢ် ပှၤမၤဃူမၤဖိးတၢ်လၢ တၢ်အၢၣ်လီၤအီလီၤအသီပူၤ (ဧ့ၤဘြံၤ ၈:၆; ၉:၁၅) ဒီးစီၤအၤဘြၤဟၣ် အချံအသၣ်လီၤ. (ကလၤတံ ၃:၁၆) လၢတၢ်န့ၣ်အဃိ အဝဲမၤစၢၤ ပှၤလၢအပၣ်ဃုာ်လၢ တၢ်အၢၣ်လီၤအီလီၤအသီပူၤတဖၣ် ဒ်သိးအတၢ်ကမၣ် ကဘၣ်တၢ်ပျၢ်ကွံာ်အီၤဒီး ကကဲထီၣ်ဘၣ် စီၤအၤဘြၤဟၣ် အချံအသၣ်နီၢ်နီၢ်အဂီၢ်လီၤ. (ဧ့ၤဘြံၤ ၂:၁၆; ကလၤတံ ၃:၂၉) အဃိယဟိဝၤယွၤ ဘိးဘၣ်သ့ၣ်ညါဝဲလၢ အဝဲသ့ၣ်မ့ၢ် ပှၤတီပှၤလိၤလီၤ.—ရိမ့ၤ ၅:၁, ၂; ၈:၃၃; ဧ့ၤဘြံၤ ၁၀:၁၆, ၁၇.
(ယံးရမံယၤ ၃၁:၃၂-၃၃) တမ့ၢ်ဘၣ်ဒ် တၢ်အၢၣ်လီၤအီလီၤလၢ ယအၢၣ်လီၤဒီးအပၢ်တဖၣ်, ဖဲမုၢ်တနံၤလၢယဟံးဃာ်အစု ဒ်သိးယကဒုးဟးထီၣ်ကွံာ်အီၤလၢ ကီၢ်အဲၤကူပတူးအပူၤ အသိးန့ၣ်ဘၣ်. တၢ်အၢၣ်လီၤအီၤန့ၣ် မ့ၢ်အမၤဟးဂီၤလီၤ. ဒီးယညိကွံာ်အီၤ, ယွၤစံးဝဲဒၣ်. ၃၃ မ့မ့ၢ်အအံၤ မ့ၢ်တၢ်အၢၣ်လီၤအီၤလၢ ယကအၢၣ်လီၤအီလီၤဒီး အံၣ်စရ့လးအပှၤဟံၣ်ဖိ, ယကပာ်ယတၢ်သိၣ်တၢ်သီလၢ အသးကံၢ်ပူၤ, ဒီးယကကွဲးအီၤလၢ အသးအလိၤ, ဒီးယကကဲထီၣ်အကစၢ်, ဒီးအဝဲသ့ၣ်တဖၣ်န့ၣ် ကကဲထီၣ်ယခ့ယပှၤလီၤ.
jr ကဘျံးပၤ ၁၇၃-၁၇၄ အဆၢ ၁၁-၁၂
နဒိးန့ၢ်ဘၣ် တၢ်အဘျုးသ့လၢ တၢ်အၢၣ်လီၤအီလီၤအသီ
၁၁ တၢ်အၢၣ်လီၤအီလီၤအသီန့ၣ် လီၤဆီလိာ်အသးဒီး တၢ်အၢၣ်လီၤအီလီၤ အလီၢ်လံၤလၢ ကျဲဒ်လဲၣ်. လီၤဆီလိာ်အသး ခီဖျိလၢ ပှၤကွဲးအီၤအလီၢ်ဖဲလဲၣ်န့ၣ်လီၤ. (ဖး ယံးရမံယၤ ၃၁:၃၃ တက့ၢ်.) တၢ်မၤလိာ်အထံၣ်တဆံလၢ အပၣ်ဃုာ်လၢ တၢ်အၢၣ်လီၤအီလီၤအလီၢ်လံၤအပူၤန့ၣ် ဘၣ်တၢ်ကွဲးအီၤလၢ လၢၢ်ဘ့ၣ်ဘၣ်အလိၤဒီး လၢခံန့ၣ် လၢၢ်ဘ့ၣ်ဘၣ်အံၤ လီၤမၢ်ကွံာ်ဝဲလီၤ. ဘၣ်ဆၣ် မ့မ့ၢ်တၢ်အၢၣ်လီၤအီလီၤအသီ အတၢ်သိၣ်တၢ်သီန့ၣ် ဝံယံးရမံယၤစံးဝဲလၢ ကဘၣ်တၢ်ကွဲးအီၤလၢ ပှၤဟီၣ်ခိၣ်ဖိအသးအလိၤဒီး ကအိၣ်ဝဲလီၤထူလီၤယိာ်လီၤ. ပှၤလၢအဘၣ်တၢ်ဒိးဖှူအီၤလၢ အပၣ်ဃုာ်လၢ တၢ်အၢၣ်လီၤအီလီၤအသီပူၤန့ၣ် ပာ်လုၢ်ပာ်ပှ့ၤဝဲ တၢ်သိၣ်တၢ်သီအံၤဒိၣ်မးလီၤ. “သိလၢအဂုၤအဂၤ” လၢကအိၣ်မူဘၣ်လၢ ဟီၣ်ခိၣ်ပၤရဒံစူးအပူၤ လီၤထူလီၤယိာ် လၢအတပၣ်ဃုာ်လၢ တၢ်အၢၣ်လီၤအီလီၤအသီအံၤ အပူၤတဖၣ်န့ၣ် ထံၣ်ဝဲတၢ်မၤလိာ်အံၤဒ်လဲၣ်. (ယိၤဟၣ် ၁၀:၁၆) အဝဲသ့ၣ်စ့ၢ်ကီး ဘၣ်သူၣ်ဘၣ်သးဝဲ ကစၢ်ယွၤအတၢ်သိၣ်တၢ်သီလီၤ. အဝဲသ့ၣ်လီၤဂာ်ဒ် ပှၤတခီဘီမုၢ်ဖိလၢ အအိၣ်လၢ ပှၤအံၣ်စရ့လးဖိတဖၣ်အထံအကီၢ် လၢအဒိကနၣ်စီၤမိၤၡ့ အတၢ်သိၣ်တၢ်သီဒီး ဒိးန့ၢ်ဘၣ်အဘျုးတဖၣ်န့ၣ်လီၤ.—၃ မိၤၡ့ ၂၄:၂၂; ၄ မိၤၡ့ ၁၅:၁၅.
၁၂ ပှၤမ့ၢ်သံကွၢ်နၤလၢ ‘တၢ်သိၣ်တၢ်သီလၢ ဘၣ်တၢ်ကွဲးအီၤလၢ ခရံာ်ဖိလၢဘၣ်တၢ်ဒိးဖှူအီၤတဖၣ် အသးလိၤန့ၣ် မ့ၢ်မနုၤလဲၣ်’ န့ၣ်နကစံးဆၢဒ်လဲၣ်. တၢ်သိၣ်တၢ်သီအံၤ ဘၣ်တၢ်ကိးအီၤလၢ “ခရံာ် အတၢ်သိၣ်တၢ်သီ” စ့ၢ်ကီးလီၤ. အဆိကတၢၢ်န့ၣ် တၢ်သိၣ်တၢ်သီအံၤ ဘၣ်တၢ်ဟ့ၣ်လီၤအီၤလၢ နီၢ်သးအံၣ်စရ့လးဖိလၢ အပၣ်ဃုာ်လၢ တၢ်အၢၣ်လီၤအီလီၤအသီန့ၣ်လီၤ. (ကလၤတံ ၆:၂; ရိမ့ၤ ၂:၂၈, ၂၉) “ခရံာ်အတၢ်သိၣ်တၢ်သီ” န့ၣ်ပှၤပာ်ဖျါထီၣ်အီၤသ့လၢ တၢ်ကတိၤဖုၣ်ဖုၣ်ဖိတဖျၢၣ် လၢအမ့ၢ် တၢ်အဲၣ်တၢ်ကွံန့ၣ်လီၤ. (မးသဲ ၂၂:၃၆-၃၉) ပှၤလၢအဘၣ်တၢ်ဒိးဖှူအီၤတဖၣ် ဒိးန့ၢ်ဘၣ်ဝဲ တၢ်သိၣ်တၢ်သီလၢ ပှၤကွဲးလီၤလၢအသးပူၤ လၢကျဲဒ်လဲၣ်. ဒိးန့ၢ်ဘၣ်ဝဲခီဖျိ လၢတၢ်မၤလိ ကစၢ်ယွၤအကလုၢ်ကထါဒီး သုးဘူးအသးဆူ ယဟိဝၤယွၤအအိၣ် လၢတၢ်ထုကဖၣ်အဃိလီၤ. ခရံာ်ဖိနီၢ်နီၢ်လၢ အဘူၣ်ထီၣ်ဘါထီၣ်တၢ်အမ့ၢ်အတီတဖၣ် မ့ၢ်တပၣ်ဃုာ်လၢ တၢ်အၢၣ်လီၤအီလီၤအသီပူၤဒၣ်လဲာ် ဒ်သိးအဝဲသ့ၣ် ကဒိးန့ၢ်ဘၣ် တၢ်အဘျုးလၢ တၢ်အၢၣ်လီၤအီလီၤအသီအံၤအဂီၢ် အဝဲသ့ၣ် ကဘၣ်မၤဝဲဒ်န့ၣ်စ့ၢ်ကီးလီၤ.
(ယံးရမံယၤ ၃၁:၃၄) ဒီးတသိၣ်လိလၢၤဘၣ်တဂၤပှၤလၢအဃၢၤ, တဂၤအဒီပုၢ်ဝဲၢ်, ဒီးစံး, သ့ၣ်ညါယွၤတက့ၢ်န့ၣ်ဘၣ်. အဂ့ၢ်ဒ်အံၤ, ပှၤကသ့ၣ်ညါယၤခဲလၢာ်လၢ အဆံးပၢၢ်လၢအဒိၣ်, ယွၤစံးဝဲဒၣ်, အဂ့ၢ်ဒ်အံၤ, ယကပျၢ်အတၢ်ကမၣ်, ဒီးယတသ့ၣ်နီၣ်ထီၣ်က့ၤလၢၤဘၣ် အတၢ်ဒဲးဘးန့ၣ်ဘၣ်.
jr ကဘျံးပၤ ၁၇၇ အဆၢ ၁၈
နဒိးန့ၢ်ဘၣ်တၢ်အဘျုးလၢ တၢ်အၢၣ်လီၤအီလီၤအသီသ့
၁၈ တၢ်အၢၣ်လီၤအီလီၤအသီအံၤ ပာ်ဖျါထီၣ်ဝဲ ယဟိဝၤယွၤ အတၢ်ရ့လိာ်သးဒီး ပှၤတၢ်ဒဲးဘးဖိခဲလၢာ်လၢအမ့ၢ် ပှၤလၢအဘၣ်တၢ်ဒိးဖှူအီၤတဖၣ်လၢ အပၣ်ဃုာ်လၢ တၢ်အၢၣ်လီၤအီလီၤအသီပူၤဒီး ပှၤလၢအိၣ်ဒီးတၢ်မုၢ်လၢ်လၢ ကအိၣ်မူဘၣ်လၢ ဟီၣ်ခိၣ်အပူၤန့ၣ်လီၤ. ယဟိဝၤယွၤ ပျၢ်ကွံာ်နတၢ်ကမၣ်မ့ၢ်ဝံၤန့ၣ် အဝဲ တသ့ၣ်နီၣ်က့ၤဝဲ နီတဘျီလၢၤဘၣ်. လၢတၢ်န့ၣ်အဃိ ပဝဲကိးဂၤဒဲး ပဟံးန့ၢ်တၢ်မၤလိလၢ ကစၢ်ယွၤအတၢ်စံးပာ်လၢ ဘၣ်ဃးဒီး တၢ်အၢၣ်လီၤအီလီၤအသီ သ့ဝဲန့ၣ်လီၤ. ‘မ့ၢ်ယကွၢ်လိမၤဒိး ကစၢ်ယွၤခီဖျိ ယပျၢ်ကွံာ်ပှၤဂၤအတၢ်ကမၣ်ဒီး ယတတဲက့ၤအီၤလၢၤဘၣ်န့ၣ်ဧါ’ (မးသဲ ၆:၁၄, ၁၅) တၢ်အံၤဘၣ်ထွဲလိာ်အသးဒီး တၢ်ကမၣ်ဖးဒိၣ်လၢအမ့ၢ် တၢ်အဲၣ်ဘၢမါအဲၣ်ဘၢဝၤန့ၣ်လီၤ. သးသမူတံၤသကိးလၢ အအဲၣ်ဘၢတၢ်တဂၤ မ့ၢ်ပီၢ်ယၢ်လီၤက့ၤအသးဒီး အသးသမူတံၤသကိးလၢ အတမၤကမၣ်တၢ်တဂၤ ပျၢ်ကွံာ်အတၢ်ကမၣ်မ့ၢ်ဝံၤန့ၣ် အဝဲတကြၢး “သ့ၣ်နီၣ်ထီၣ်က့ၤလၢၤဘၣ်အတၢ်ဒဲးဘး” ဘၣ်တမ့ၢ်ဧါ. ဒီးတၢ်ကမၣ်အံၤ အဝဲကကွံာ်တ့ၢ်ကွံာ်အီၤလၢ အလီၢ်ခံ န့ၣ်တမ့ၢ်တၢ်လၢအညီဘၣ်ဆၣ် အဝဲမ့ၢ်မၤဝဲဒ်န့ၣ်န့ၣ် မ့ၢ်အကွၢ်လိမၤဒိး ယဟိဝၤယွၤလီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ယံးရမံယၤ ၂၉:၄) တၢ်သုးမုၢ်ဂီၢ်မုၢ်အယွၤ အံၣ်စရ့လးအကစၢ် စံးဘၣ်ကယဲၢ်ပှၤလၢတၢ်မၢကဲကုၢ်အီၤလၢ ယဒုးစိာ်အီၤလၢယရူၤၡလ့ၣ်ဆူဘၤဘူၤလိၣ်န့ၣ်,
(ယံးရမံယၤ ၂၉:၇) ဒီးဃုဝ့ၢ်န့ၣ်အတၢ်ဃူတၢ်ဖိး ဖဲယမၢသုလဲၤကဲကုၢ်, ဒီးဘါထုကဖၣ်န့ၢ်ယွၤလၢအဂီၢ်တက့ၢ်. အဂ့ၢ်ဒ်အံၤ, လၢအဝဲန့ၣ်အတၢ်ဃူတၢ်ဖိးအပူၤန့ၣ် သုကန့ၢ်တၢ်ဃူတၢ်ဖိးလီၤ.
တၢး၉၆ ၅/၁ ကဘျံးပၤ ၁၁ အဆၢ ၅
ကစၢ်ယွၤ ဒီးကဲစၢ်
၅ နံၣ်တဖၣ်လဲၤပူၤကွံာ်ဝံၤအလီၢ်ခံ ယဟိဝၤယွၤမၢဝဲ ဝံယံးရမံယၤတဲဝဲ ပှၤယူဒၤဖိလၢ အဘၣ်တၢ်စိာ်မၢကဲကုၢ်အီၤတဖၣ် လၢကဒိးပၢအသးလၢ ပှၤလၢအပၢအီၤတဖၣ်အဖီလာ်ဒီး ဃ့ထုကဖၣ်လၢ အဝဲသ့ၣ်အထံအကီၢ် ကအိၣ်ဒီးတၢ်မုာ်တၢ်ခုၣ်အဂီၢ်လီၤ. ဝံယံးရမံယၤ ကွဲးလံာ်ဆူ အဝဲသ့ၣ်အအိၣ်ဒီး ကွဲးဝဲလၢ–“တၢ်သုးမုၢ်ဂီၢ်မုၢ်အယွၤ အံၣ်စရ့လးအကစၢ်စံးဘၣ် ကယဲၢ်ပှၤလၢ တၢ်မၢကဲကုၢ်အီၤ . . . ဃုဝ့ၢ်န့ၣ်အတၢ်ဃူတၢ်ဖိးဖဲယမၢသုလဲၤကဲကုၢ်, ဒီးဘါထုကဖၣ်န့ၢ်ယွၤလၢအဂီၢ်တက့ၢ်. အဂ့ၢ်ဒ်အံၤ, လၢအဝဲန့ၣ်အတၢ်ဃူတၢ်ဖိးအပူၤန့ၣ် သုကန့ၢ်တၢ်ဃူတၢ်ဖိးလီၤ.” (ယံးရမံယၤ ၂၉:၄, ၇) ဒ်သိးယဟိဝၤယွၤအခ့အပှၤတဖၣ် ကဘူၣ်ထီၣ်ဘါထီၣ်ဘၣ် ယဟိဝၤယွၤလၢ တၢ်သဘျ့အဂီၢ် အဝဲသ့ၣ်ကဘၣ် ‘ဃုတၢ်ဃူတၢ်ဖိး’ လၢအနီၢ်ကစၢ်ဒီး ထံကီၢ်လၢအအိၣ်ဝဲဆိးဝဲ အဂီၢ်လီၤ.—၁ ပ့းတရူး ၃:၁၁.
(ယံးရမံယၤ ၂၉:၁၀) အဂ့ၢ်ဒ်အံၤ, ယွၤစံးဝဲဒၣ်, အနံၣ်နွံဆံပှဲၤထီၣ်လၢ ဘၤဘူၤလိၣ်အပူၤအလီၢ်ခံန့ၣ် ယကအိၣ်သကိးသု, ဒီးမၤလၢထီၣ်ပှဲၤထီၣ် ယတၢ်ကတိၤဂ့ၤလၢသုဂီၢ်, ဒီးမၢသုဟဲက့ၤကဒါက့ၤဆူ တၢ်အလီၢ်အံၤလီၤ.
g ၆/၁၂ ကဘျံးပၤ ၁၄ အဆၢ ၁-၂
လံာ်စီဆှံ—မ့ၢ်လံာ်တဘ့ၣ်လၢ အိၣ်ဒီး ဝံအတၢ်စံးပာ်လၢ အလီၤတံၢ်လီၤဆဲး, အကူာ် ၂
တၢ်လၢထီၣ်ပှဲၤထီၣ်– စးထီၣ်ဖဲ ချ.ခ.န ၆၀၇ တုၤလၢ ၅၃၇, ပှၤအံၣ်စရ့လးဖိတဖၣ် ကဲကုၢ်အနံၣ် ၇၀ ဝံၤအလီၢ်ခံ ပၤရၣ်အစီၤပၤကိရ့ၣ် ဒုးက့ၤအဝဲသ့ၣ်လၢ ဝ့ၢ်ယရူၤၡလ့ၣ် ဒ်သိးအကသူၣ်ထီၣ်က့ၤ တၢ်လုၢ်ဟံၣ်အဂီၢ်လီၤ.—ဧ့စြၤ ၁:၂-၄.
တၢ်လၢတၢ်စံၣ်စိၤတဲစိၤ ပာ်ဖျါထီၣ်ဝဲတဖၣ်–
● ဒ်လံာ်စီဆှံတဲဝဲအသိး ပှၤအံၣ်စရ့လးဖိတဖၣ် ကဲဘၣ်ကုၢ်ဖဲဝ့ၢ်ဘၤဘူၤလိၣ် အနံၣ် ၇၀ န့ၣ်မ့ၢ်တၢ်အနီၢ်ကီၢ်ဧါ. ဆိကမိၣ်ကွၢ် ပှၤဃုသ့ၣ်ညါတၢ်ဖိ အံဖရိၤ စတဲ အတၢ်ကတိၤတက့ၢ်. အဝဲတဲဝဲလၢ “စးထီၣ်လၢ ချ.ခ.န ၆၀၄ တုၤလၢ ၅၃၈ န့ၣ် တၢ်အုၣ်အသးလၢ ပှၤမၤတၢ်ဆါတၢ်ပှ့ၤဒီး အံၣ်စရ့အထံအကီၢ်န့ၣ် တအိၣ်နီတမံၤဘၣ်. ဖဲန့ၣ်အဆၢကတီၢ် ဝ့ၢ်လၢဘၤဘူၤလိၣ်မၤဟးဂီၤအီၤတဖၣ်အပူၤန့ၣ် ပှၤတအိၣ်ဝဲဆိးဝဲဘၣ်.” မ့ၢ်လၢတၢ်အုၣ်အသးအံၤ ပာ်ဖျါထီၣ်ဝဲလၢ ဖဲန့ၣ်အဆၢကတီၢ် လၢအံၣ်စရ့လးထံကီၢ်အပူၤ တၢ်ဆါတၢ်ပှ့ၤအတၢ်မၤတအိၣ်ဘၣ် ဒီးပှၤတအိၣ်ဝဲဆိးဝဲဘၣ်အဃိ လီၤပလိာ်လိာ်အသးဒီး တၢ်ဂ့ၢ်လၢ ပှၤအံၣ်စရ့လးဖိတဖၣ် ဘၣ်တၢ်စိာ်မဲကဲကုၢ်အီၤလၢ ဝ့ၢ်ဘၤဘူၤလိၣ် စးထီၣ်ဖဲ ချ.ခ.န ၆၀၇ တုၤလၢ ၅၃၇ န့ၣ်လီၤ.—၂ ကွဲးနီၣ်တၢ် ၃၆:၂၀, ၂၁.
တၢ်ဖးလံာ်စီဆှံ
(ယံးရမံယၤ ၃၁:၃၁-၄၀) ကွၢ်ကွၢ်, ယွၤစံးဝဲဒၣ်, မုၢ်နံၤတဖၣ်ကဟဲဝဲလၢ ယကအၢၣ်လီၤအီၤလီၤတၢ်အသီ ဒီးအံၣ်စရ့လးအပှၤဟံၣ်ဖိ, ဒီးယူဒၤအပှၤဟံၣ်ဖိလီၤ. ၃၂ တမ့ၢ်ဘၣ်ဒ်တၢ်အၢၣ်လီၤအီလီၤလၢ ယအၢၣ်လီၤဒီးအပၢ်တဖၣ်, ဖဲမုၢ်တနံၤလၢယဟံးဃာ်အစု ဒ်သိးယကဒုးဟးထီၣ်ကွံာ်အီၤလၢ ကီၢ်အဲၤကူပတူးအပူၤအသိးန့ၣ်ဘၣ်. တၢ်အၢၣ်လီၤအီၤန့ၣ် မ့ၢ်အမၤဟးဂီၤလီၤ. ဒီးယညိကွံာ်အီၤ, ယွၤစံးဝဲဒၣ်. ၃၃ မ့မ့ၢ်အအံၤမ့ၢ်တၢ်အၢၣ်လီၤအီၤလၢ ယကအၢၣ်လီၤအီလီၤဒီး အံၣ်စရ့လးအပှၤဟံၣ်ဖိ, ယကပာ်ယတၢ်သိၣ်တၢ်သီလၢအသးကံၢ်ပူၤ, ဒီးယကကွဲးအီၤလၢအသးအလိၤ, ဒီးယကကဲထီၣ်အကစၢ်, ဒီးအဝဲသ့ၣ်တဖၣ်န့ၣ် ကကဲထီၣ်ယခ့ယပှၤလီၤ. ၃၄ ဒီးတသိၣ်လိလၢၤဘၣ်တဂၤပှၤလၢအဃၢၤ, တဂၤအဒီပုၢ်ဝဲၢ်, ဒီးစံး, သ့ၣ်ညါယွၤတက့ၢ်န့ၣ်ဘၣ်. အဂ့ၢ်ဒ်အံၤ, ပှၤကသ့ၣ်ညါယၤခဲလၢာ်လၢ အဆံးပၢၢ်လၢအဒိၣ်, ယွၤစံးဝဲဒၣ်, အဂ့ၢ်ဒ်အံၤ, ယကပျၢ်အတၢ်ကမၣ်, ဒီးယတသ့ၣ်နီၣ်ထီၣ်က့ၤလၢၤဘၣ် အတၢ်ဒဲးဘးန့ၣ်ဘၣ်. ၃၅ ယွၤစံးဒ်အံၤ, ပှၤလၢအပာ်မုၢ်လၢတၢ်ကပီၤလၢမုၢ်ဆါအဂီၢ်, ဒီးမၤလိာ်လါဒီးဆၣ်ဧိၤဖီဧိၤလၢ တၢ်ကပီၤလၢမုၢ်နၤအဂီၢ်, လၢအထိၣ်ဂဲၤပီၣ်လဲၣ်အလပီသီၣ် ထီၣ်ရူၢ်ရူၢ်န့ၣ်, တၢ်သုးမုၢ်ဂီၢ်မုၢ်အယွၤမ့ၢ်အမံၤလီၤ. ၃၆ ယွၤစံးဝဲဒၣ်, တၢ်မၤလိာ်တဖၣ်မ့ၢ်ဟးထီၣ်လၢ ယမဲာ်ညါဒီး, အံၣ်စရ့လးအချံအသၣ် တကဲလၢၤဘၣ်ပှၤတကလုာ် လၢယမဲာ်ညါဘၣ်လီၤ. ၃၇ ယွၤစံးဒ်အံၤ, ပှၤထိၣ်မူခိၣ်လၢထးခီ, ဒီးဃုန့ၢ်ဟီၣ်ခိၣ်အခီၣ်ထံးလၢ လာ်ခီန့ၣ်မ့ၢ်သ့ဒီး, ယကညိကွံာ်စ့ၢ်ကီးအံၣ်စရ့လး အချံအသၣ်ခဲလၢာ်လၢ အမၤတၢ်ခဲလၢာ်အဃိန့ၣ်, ယွၤစံးဝဲဒၣ်, ၃၈ ကွၢ်ကွၢ်, ယွၤစံးဝဲဒၣ်, မုၢ်နံၤတဖၣ်ဟဲလၢ ပှၤကတ့ဝ့ၢ်လၢယွၤအဂီၢ်, လၢတၢးထီဃနၤန့လးပၢၢ်လၢ တၢ်ပဲတရီသနၢၣ်လီၤ. ၃၉ ဒီးနီၣ်ထိၣ်ပျံၤကလဲၤထီၣ်အိၣ်သဃီၤအီၤ လၢတၢ်စိခိၣ်ကၢ်ရ့း, ဒီးကလဲၤတရံးတၢ်ဆူကိၤသးလီၤ. ၄၀ ဒီးအစိၣ်တဖၣ်အကစၢၢ်ကဆူးဒီဘ့ၣ်ညါ, ဒီးဖၣ်ဆါ, ဒီးဟီၣ်ခိၣ်အကဝီၤတဖၣ်ခဲလၢာ် ပၢၢ်လၢထံကျိကံဒြိၣ်, ပၢၢ်လၢပဲတရီကသ့ၣ်အနၢၣ်လၢ မုၢ်ထီၣ်တခီန့ၣ် ကစီဆှံထီၣ်လၢယွၤအဂီၢ်လီၤ. တၢ်တထဲးကွံာ်လၢၤဘၣ်အီၤ, ဒီးတၢ်တမၤလီၤပှီၢ်လၢၤဘၣ်အီၤ လီၤထူလီၤယိာ်လီၤ.