၁၆. (က) ဃၤတဖျၢၣ်န့ၣ် ဘၣ်တၢ်မၤအီၤဒ်လဲၣ်. (ကွၢ်တၢ်ဂီၤ ၃ လၢတၢ်မၤလိ အခီၣ်ထံးတက့ၢ်.) (ခ) ပိာ်မုၣ်လၢအိၣ်ဒီးအဒံးဆ့ခံဂၤန့ၣ် လဲၤစိာ်ဝဲဃၤတဖျၢၣ်အံၤလၢ တၢ်လီၢ်ဖဲလဲၣ်.

^၁၆ ဝံစကၤရယၤ ထံၣ်ကဒီးဝဲပိာ်မုၣ်ခံဂၤ လၢအအိၣ်ဒီးအဒံးဆ့ ဒ်ထိၣ်ဖးဒိၣ်အသိးလီၤ. (ဖး စကၤရယၤ ၅:၉-၁၁ တက့ၢ်.) ပိာ်မုၣ်ခံဂၤအံၤလီၤဆီလိာ်အသးဒီး ပိာ်မုၣ်လၢအအိၣ်လၢ ဃၤအပူၤတဂၤန့ၣ်လီၤ. ပိာ်မုၣ်ခံဂၤအံၤအဒံးဆ့န့ၣ် အဂံၢ်ဆူၣ်ဒိၣ်မးအဃိ ယူၤစိာ်ထီၣ်ကွံာ်ဝဲ ဃၤတဖျၢၣ်လၢအအိၣ်ဒီး “တၢ်အၢတၢ်သီ” အံၤလၢအယံၤန့ၣ်လီၤ. အဝဲသ့ၣ်လဲၤစိာ်ကွံာ်ဝဲ ပိာ်မုၣ်အံၤဖဲလဲၣ်. အဝဲသ့ၣ်လဲၤစိာ်ဝဲ ဃၤတဖျၢၣ်အံၤဆူ “ကီၢ်ၡံနၢ်အပူၤ” လၢအအိၣ်လၢ ဘၤဘူၤလိၣ်န့ၣ်လီၤ. ဘၣ်မနုၤအဃိ အဝဲသ့ၣ်လဲၤစိာ်ဝဲ ဖဲန့ၣ်လဲၣ်.

၁၇, ၁၈. (က) ဘၣ်မနုၤအဃိ ဘၤဘူၤလိၣ်န့ၣ် မ့ၢ်ဝဲတၢ် “လီၢ်” အကြၢးအဘၣ်လၢ ပှၤကလဲၤပာ်လီၤ “တၢ်အၢတၢ်သီ” လဲၣ်. (ခ) နပာ်လီၤနသးဂၢၢ်ဂၢၢ်ကျၢၤကျၢၤလၢ နကမၤတၢ်မနုၤလဲၣ်.

^၁၇ ပှၤအံၣ်စရ့လးဖိလၢ အအိၣ်မူဘၣ်လၢ ဝံစကၤရယၤအစိၤတဖၣ် သ့ၣ်ညါဝဲလၢ ဘၣ်မနုၤအဃိ ဘၤဘူၤလိၣ်န့ၣ် မ့ၢ်ဝဲတၢ်လီၢ်လၢအကြၢးအဘၣ်လၢ ပှၤကလဲၤစိာ် “တၢ်အၢတၢ်သီ” လဲၣ်. မ့ၢ်လၢဘၤဘူၤလိၣ်န့ၣ် အိၣ်ပှဲၤထဲ တၢ်မၤကမၣ်မုၣ်ကမၣ်ခွါ ဒီးတၢ်ဘူၣ်တၢ်ဘါလၢအကမၣ်တဖၣ်အဃိန့ၣ်လီၤ. ဝံစကၤရယၤ ဒီးပှၤယူဒၤဖိလၢအအိၣ်လၢ ဘၤဘူၤလိၣ်တဖၣ်န့ၣ် အဝဲသ့ၣ်ဘၣ်ဂ့ၢ်လိာ်ကွံာ်ဝဲ ပှၤလၢအဘူၣ်ထီၣ်ဘါထီၣ် တၢ်ဂီၤတၢ်ဖှီၣ်တဖၣ် အတၢ်လ့ပစီကိးနံၤဒဲးလီၤ. လၢတၢ်န့ၣ်အဃိ တၢ်ထံၣ်လၢညါခီအံၤ ပာ်ဖျါထီၣ်ဝဲလၢ ယဟိဝၤယွၤန့ၣ် ကမၤကဆှီထီၣ် အတၢ်ကရၢကရိန့ၣ်လီၤ.

^၁၈ ဝံစကၤရယၤအတၢ်ထံၣ်လၢညါခီအံၤ ဒုးသ့ၣ်နီၣ်ထီၣ်ပှၤယူဒၤဖိတဖၣ်လၢ ဒ်သိးအဝဲသ့ၣ် အတၢ်ဘူၣ်ထီၣ်ဘါထီၣ် ကစီဆှံလၢ ယဟိဝၤယွၤအမဲာ်ညါအဂီၢ် အဝဲသ့ၣ်ခဲလၢာ်အိၣ်ဒီးမူဒါလီၤ. တၢ်အၢတၢ်သီန့ၣ် အိၣ်လၢယွၤအပှၤဂီၢ်မုၢ်အကျါတသ့ဘၣ်. မုၢ်မဆါတနံၤအံၤ ယဟိဝၤယွၤ မိၤပှၤဆူအတၢ်ကရၢကရိလၢအစီဆှံ လၢအပှဲၤဒီးတၢ်အဲၣ်ဒီး တၢ်ကဟုကယာ်န့ၣ်လီၤ. လၢတၢ်န့ၣ်အဃိ ဒ်သိးယွၤအတၢ်ကရၢကရိကအိၣ်စီဆှံအဂီၢ် ပဝဲခဲလၢာ်ပအိၣ်ဒီးမူဒါလီၤ. တၢ်အၢတၢ်သီန့ၣ် အိၣ်လၢယဟိဝၤယွၤ အပှၤဂီၢ်မုၢ်အကျါ တသ့လ့ၤတက့ၤဘၣ်.