“ဒိကနၣ်အကလုၢ်”

၇. ဖဲ မးသဲ ၁၇:၁-၅ န့ၣ်ယဟိဝၤယွၤ တဲတၢ်လၢဆၢကတီၢ်ဖဲလဲၣ်​ ဒီးအဝဲတဲဝဲ တၢ်မနုၤလဲၣ်.

^၇ ဖး မးသဲ ၁၇:၁-၅ တက့ၢ်. ယဟိဝၤယွၤ ကတိၤတၢ်လၢမူခိၣ်​ ခံဘျီတဘျီ ဖဲယ့ၣ်ၡူး “အက့ၢ်အဂီၤလဲလိာ်အသး” အခါလီၤ. ယ့ၣ်ၡူးကိးထီၣ်​ စီၤပ့းတရူး, စီၤယၤကိာ် ဒီးစီၤယိၤဟၣ်​ လၢကလဲၤပိာ်အခံဆူ ကစၢၢ်ဒီခိၣ်လီၤ. ဖဲန့ၣ်အဆၢကတီၢ် အဝဲသ့ၣ်​ ထံၣ်ဘၣ်ဝဲ တၢ်ထံၣ်လၢညါခီ လၢအလီၤကမၢကမၣ်တခါလီၤ. ဖဲန့ၣ်န့ၣ်​ ယ့ၣ်ၡူးအမဲာ် ဒီးအကူအကၤတဖၣ်​ ကပီၤထီၣ်ဝဲလီၤ. ဒီးပှၤခံဂၤလၢအလီၤဂာ်ဒ်သိး စီၤအ့ၤလံယၤ ဒီးစီၤမိၤၡ့န့ၣ်​ ကတိၤတၢ်ဒီးယ့ၣ်ၡူး ဒီးတဲသကိးဝဲဘၣ်ဃးဒီး ယ့ၣ်ၡူးကဘၣ်သံ ဒီးကဂဲၤဆၢထၢၣ်သမူထီၣ်က့ၤအဂ့ၢ်လီၤ. တၢ်မၢဖိသၢဂၤ “အမဲာ်ဖံးဃၢဒီးမံခ့ဝဲ” ဘၣ်ဆၣ်​ ဖဲအဝဲသ့ၣ်​ နီၣ်ထီၣ်အသးအခါ ထံၣ်ဘၣ်ဝဲ တၢ်ထံၣ်လၢညါခီအံၤလီၤ. (လူၤကၣ်​ ၉:၂၉-၃၂) ဒီးတၢ်အၢၣ်လၢ အကပြုၢ်ကပြီၤလုၢ်ဘၢအဝဲသ့ၣ်​ ဒီးအဝဲသ့ၣ်နၢ်ဟူဘၣ်ဝဲ ကစၢ်ယွၤအကလုၢ်လီၤ. ဖဲန့ၣ်န့ၣ်​ ယဟိဝၤယွၤ တဲဝဲတၢ်ကတိၤ ဒ်အတဲဝဲ ဖဲယ့ၣ်ၡူးဒိးဘျၢထံအခါန့ၣ်လီၤ. အဝဲပာ်ဖျါထီၣ်ဝဲလၢ အဘၣ်သူၣ်ဘၣ်သး ဒီးအအဲၣ်အဖိခွါ ခီဖျိတဲဝဲလၢ “အဝဲတဂၤအံၤ မ့ၢ်ယဖိခွါလၢ ယအဲၣ်, ဒီးဘၣ်ယသးလၢအီၤလီၤ.” ဘၣ်ဆၣ်​ တၢ်တဘျီအံၤန့ၣ်​ အဝဲတဲအါထီၣ်ဝဲလၢ “ဒိကနၣ်အကလုၢ်တက့ၢ်.”

၉. ယ့ၣ်ၡူး ဟ့ၣ်ကူၣ်ဝဲ အပျဲၢ်အဘီၣ်တဖၣ်ဒ်လဲၣ်.

^၉ “ဒိကနၣ်အကလုၢ်တက့ၢ်.” ယဟိဝၤယွၤ တဲဝဲၡဲၡဲဖိလၢ အဝဲအဲၣ်ဒိးလၢ ပကဒိကနၣ်​ အဖိခွါအကလုၢ် ဒီးမၤထွဲအီၤလီၤ. ဖဲယ့ၣ်ၡူးအိၣ်လၢ ဟီၣ်ခိၣ်ချၢအခါ အဝဲတဲဝဲတၢ်မနုၤလဲၣ်. အဝဲတဲဝဲ တၢ်ဂ့ၢ်အါမံၤလၢ အရ့ဒိၣ်လၢ ပကဘၣ်မၤထွဲအီၤန့ၣ်လီၤ. အဒိ အဝဲသိၣ်လိဝဲ အပျဲၢ်အဘီၣ်တဖၣ်လၢ ကဘၣ်စံၣ်တဲၤတဲလီၤတၢ်ဒ်လဲၣ်​ ဒီးဟ့ၣ်သဆၣ်ထီၣ်​ အဝဲသ့ၣ်လၢ ကအိၣ်ခိးဆိးသီအဂီၢ်လီၤ. (မးသဲ ၂၄:၄၂; ၂၈:၁၉, ၂၀) ဒီးအဝဲဟ့ၣ်ဂံၢ်ဟ့ၣ်ဘါ အပျဲၢ်အဘီၣ်တဖၣ်လၢ ကဂုာ်ကျဲးစၢးဆူၣ်ဆူၣ်​ ဒီးအသုတဟ့ၣ်အၡူတဂ့ၤအဂီၢ်လီၤ. (လူၤကၣ်​ ၁၃:၂၄) တကးဒံးဘၣ်​ အဝဲဟ့ၣ်ဂံၢ်ဟ့ၣ်ဘါစ့ၢ်ကီးဝဲလၢ အဝဲသ့ၣ်​ ကအဲၣ်လိာ်ကွံလိာ်အသး တဂၤဒီးတဂၤ, ကအိၣ်ဃူဃူဖိးဖိးထီဘိ ဒီးကဒိကနၣ်​ အတၢ်မၤလိာ်တဖၣ်အဂီၢ်လီၤ. (ယိၤဟၣ်​ ၁၅:၁၀, ၁၂, ၁၃) ယ့ၣ်ၡူး အတၢ်ဟ့ၣ်ကူၣ်တဖၣ်အံၤန့ၣ်​ ကဲဘျုးဝဲဒိၣ်မးလီၤ. ဒီးလၢပစိၤခဲအံၤစ့ၢ်ကီး တၢ်ဟ့ၣ်ကူၣ်တဖၣ်အံၤန့ၣ်​ မ့ၢ်တၢ်လၢအရ့ဒိၣ်ဒိၣ်မးလီၤ.