ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါမ့ၤ ၇–၁၃
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | မၢ်ကူး ၇–၈
“ဟံးန့ၢ်နထူၣ်စုညါ, ဒီးပိာ်ယခံ”
(မၢ်ကူး ၈:၃၄) ဒီးကိးန့ၢ်ပှၤဂီၢ်မုၢ်ဒီး အပျဲၢ်အဘီၣ်ဆူအအိၣ်, ဒီးစံးဘၣ်အီၤ, ဖဲဒၣ်ပှၤလၢတၢ်မိၣ်ဟဲပိာ်အသးလၢ ယခံတဂၤဂၤန့ၣ်, မ်အညိကွံာ်အသးဒၣ်ဝဲ, ဒီးဟံးန့ၢ်အထူၣ်စုညါ, ဒီးပိာ်ယခံတက့ၢ်.
nwtsty တၢ်မၤနီၣ်လၢ မၢ်. ၈:၃၄
မ်အညိကွံာ်အသးဒၣ်ဝဲ– မ့တမ့ၢ် “မ်အတူၢ်ၡူကွံာ် အနီၢ်ကစၢ် တၢ်ခွဲးတၢ်ယာ်ခဲလၢာ်တက့ၢ်.” အဲၣ်ဒိးစံးဝဲပှၤတဂၤ ညိကွံာ်အသးလၢာ်လၢာ်ဆ့ဆ့ မ့တမ့ၢ် ဟ့ၣ်လီၤကွံာ် အသးလၢာ်လၢာ်ဆ့ဆ့လၢ ယဟိဝၤယွၤအအိၣ်လီၤ. ပမ့ၢ်ကွၢ်လၢ ကြံးအတၢ်ကတိၤန့ၣ် ဘၣ်သ့ၣ်သ့ၣ် ကအဲၣ်ဒိးတဲဝဲ “ဘၣ်တဲလီၤက့ၤပနီၢ်ကစၢ်လၢ မၤတဂ့ၤ” ဒီးတၢ်ကတိၤအံၤ ကြၢးဝဲဘၣ်ဝဲ မ့ၢ်လၢပကဘၣ်ဂ့ၢ်လိာ်ကွံာ် ပတၢ်ဘၣ်သးတဖၣ်, ပတၢ်တိာ်ပာ်တဖၣ် မ့တမ့ၢ် တၢ်ကွၢ်လီၤထဲ ပနီၢ်ကစၢ်အတၢ်လိၣ်ဘၣ်တဖၣ်လီၤ. (၂ ကရံၣ်. ၅:၁၄, ၁၅) ဖဲမၢ်ကူးကွဲးဝဲ တၢ်ဂ့ၢ်ဘၣ်ဃးဒီး စီၤပ့းတရူး သမၢဝဲယ့ၣ်ၡူးအခါစ့ၢ်ကီး သူဝဲကြံးအတၢ်ကတိၤအံၤလီၤ.—မၢ်. ၁၄:၃၀, ၃၁, ၇၂.
တၢး၉၂ ၈/၁ ကဘျံးပၤ ၁၇ အဆၢ ၁၄
မ့ၢ်နဃ့ၢ်ပြၢတၢ်လၢ နကဒိးန့ၢ်သးသမူအဂီၢ်ဧါ
၁၄ ယ့ၣ်ၡူးတဲဘၣ်ဝဲ အပျဲၢ်အဘီၣ်တဖၣ်ဒီး ပှၤအဂၤတဖၣ်လၢ “ဖဲဒၣ်ပှၤလၢတၢ်မိၣ်ဟဲပိာ်အသးလၢ ယခံတဂၤဂၤန့ၣ်, မ်အညိကွံာ်အသးဒၣ်ဝဲ, (မ့တမ့ၢ်, “ကဘၣ်စံးလီၤအသးလၢ ‘မၤတဂ့ၤ’ ” Charles B. Williams) ဒီးဟံးန့ၢ်အထူၣ်စုညါ, ဒီးပိာ်ယခံ [ထီဘိ, nwt] တက့ၢ်.” (မၢ်ကူး ၈:၃၄) ဖဲပတူၢ်လိာ်တၢ်ကွဲမုာ်အံၤအခါ တဘၣ်မ့ၢ်လၢ ပသူၣ်ဟူးသးဂဲၤထီၣ်သတူၢ်ကလာ်အဃိ ပတူၢ်လိာ်နါစိၤတၢ်န့ၣ်ဘၣ်. ပမ့ၢ်တပလီၢ်သူၣ်ပလီၢ်သး ဒီးပဆၢတဲာ်တၢ် မ့ၢ်ကမၣ်ဘၣ်ဖုးတဘျီဧိၤဒၣ်လဲာ် ပတၢ်မူအထူအယိာ်ၡူကွံာ်ဝဲသ့အဃိ ဒ်သိးပတၢ်ဂုာ်ကျဲးစၢးတဖၣ် သုတကဲထီၣ်ထဲ တၢ်ကလီကလီတဂ့ၤအဂီၢ် ပကဘၣ် ပိာ်ယ့ၣ်ၡူးအခံ “ထီဘိ” န့ၣ်လီၤ. ဒ်သိးပကဒိၣ်ထီၣ်ထီထီၣ် လၢနီၢ်သးတကပၤအဂီၢ် ပကဘၣ် ထဲးဂံၢ်ထဲးဘါဖးယံာ်ညါ ဘၣ်ဆၣ်ထဲတစိၢ်ဖိဒၣ်လဲာ် ပမ့ၢ်တပလီၢ်ပသးဘၣ်န့ၣ် ပနီၢ်သးအဂံၢ်အဘါ လီၤစၢ်က့ၤဝဲညီညီဖိလီၤ.
(မၢ်ကူး ၈:၃၅-၃၇) အဂ့ၢ်ဒ်အံၤ, ဖဲဒၣ်ပှၤလၢအသးအိၣ် အုၣ်က့ၤခီၣ်က့ၤ အသးတဂၤဂၤန့ၣ်, ကမၤဟါမၢ်ကွံာ်အီၤလီၤ. ဒီးဖဲဒၣ်ပှၤလၢအသးဟါမၢ် ကွံာ်ဝဲလၢယဃိ, ဒီးလၢတၢ်သးခုအကစီၣ်အဃိတဂၤဂၤန့ၣ်, ကအုၣ်က့ၤခီၣ်က့ၤအသးလီၤ. ၃၆ အဂ့ၢ်ဒ်အံၤ, ပှၤကညီမ့ၢ်န့ၢ်ဘၣ်ဟီၣ်ခိၣ်ဒီဘ့ၣ်ညါ, ဒီးမၤဟါမၢ်ကွံာ်အသးဒီး, မ့ၢ်အန့ၢ်ဘျုးမနုၤလဲၣ်. ၃၇ မ့တမ့ၢ်ဘၣ်ဒီး, ပှၤကညီကဟ့ၣ်အပှ့ၤလၢ အသးအဂီၢ်လၢမနုၤတမံၤလဲၣ်.
တၢး၀၈ ၁၀/၁၅ ကဘျံးပၤ ၂၅-၂၆ အဆၢ ၃-၄
ဒ်သိးနကဆဲးအိၣ်မူဘၣ်အဂီၢ် နကဟ့ၣ်တၢ်မနုၤလဲၣ်
၃ ဖဲန့ၣ်အဆၢကတီၢ် ယ့ၣ်ၡူးသံကွၢ်ဝဲ တၢ်သံကွၢ်လၢ အလီၤဆိကမိၣ်ခံဖျၢၣ်လၢအမ့ၢ်– “ပှၤကညီမ့ၢ်န့ၢ်ဘၣ်ဟီၣ်ခိၣ်ဒီဘ့ၣ်ညါ, ဒီးမၤဟါမၢ်ကွံာ်အသးဒီး, မ့ၢ်အန့ၢ်ဘျုးမနုၤလဲၣ်.” ဒီး “ပှၤကညီကဟ့ၣ်အပှ့ၤလၢ အသးအဂီၢ်လၢမနုၤတမံၤလဲၣ်.” (မၢ်ကူး ၈:၃၆, ၃၇) တၢ်သံကွၢ်တၢတဖျၢၣ်န့ၣ် ပှၤစံးဆၢအီၤကသ့ကိးဂၤဒဲးလီၤ. မ့ၢ်လၢ ပမ့ၢ်မၤန့ၢ်တၢ်လၢအအိၣ်လၢဟီၣ်ခိၣ်ဒီဘ့ၣ်ဘၣ်ဆၣ် ပမ့ၢ်သံန့ၣ် အဘျုးတအိၣ်နီတမံၤဘၣ်. တၢ်လၢအအိၣ်ဒီးပှၤန့ၣ် ကဲဘျုးလၢပဂီၢ်ထဲလၢ ပအိၣ်မူအဆၢကတီၢ်လီၤ. ယ့ၣ်ၡူးအတၢ်သံကွၢ် ခံဖျၢၣ်တဖျၢၣ်လၢအမ့ၢ် “ပှၤကညီကဟ့ၣ်အပှ့ၤလၢ အသးအဂီၢ်လၢမနုၤတမံၤလဲၣ်” န့ၣ်ကဒုးသ့ၣ်နီၣ်ထီၣ်က့ၤ ပှၤဒိကနၣ်တၢ်တဖၣ်လၢ မုၣ်ကီၤလံၢ်အတၢ်ကတိၤ လၢစီၤယိၤဘးအစိၤ လၢအတဲဝဲလၢ “ကယဲၢ်တၢ်လၢအအိၣ်ဒီးအီၤန့ၣ် ပှၤကဟ့ၣ်ဝဲလၢအသးသမူအဂီၢ်လီၤ.” (ယိၤဘး ၂:၄) ပှၤလၢအတဘူၣ်ထီၣ်ဘါထီၣ် ယဟိဝၤယွၤတဖၣ်န့ၣ် ဒ်သိးကဆဲးအိၣ်မူဘၣ်ဝဲအဂီၢ် မ့ၢ်ဘၣ်မၤဝဲတၢ်တမံၤဂ့ၤတမံၤဂ့ၤ မ့တမ့ၢ် မ့ၢ်ဘၣ်လုၢ်သ့ၣ်ခါပတာ်ဝဲ တၢ်ဘျၢတမံၤဂ့ၤတမံၤဂ့ၤသနာ်က့ ကမၤဝဲလီၤ. မ့မ့ၢ်ပှၤခရံာ်ဖိတဖၣ်န့ၣ် အတၢ်ထံၣ်လီၤဆီဒီး အဝဲသ့ၣ်ဒိၣ်မးလီၤ.
၄ ပသ့ၣ်ညါလၢ ယ့ၣ်ၡူးဟဲလီၤလၢဟီၣ်ခိၣ်န့ၣ် တမ့ၢ်ဒ်သိးအဝဲကမၤဘျါန့ၢ်ပှၤတၢ်ဆါ, ဟ့ၣ်ပှၤတၢ်ထူးတၢ်တီၤ ကမၤထီထီၣ်ပသးသမူအဂီၢ်ဘၣ်. အဝဲဟဲလီၤလၢဟီၣ်ခိၣ်ဒ်သိး ကအိးထီၣ်န့ၢ်ပှၤကျဲလၢ ပကအိၣ်မူဘၣ်လၢ ဟီၣ်ခိၣ်သီအပူၤလီၤထူလီၤယိာ်အဃိ တၢ်ခွဲးတၢ်ယာ်အံၤပပာ်လုၢ်ပာ်ပှ့ၤအီၤဒိၣ်မးလီၤ. (ယိၤဟၣ် ၃:၁၆) ယ့ၣ်ၡူးသံကွၢ်ဝဲလၢ “ပှၤကညီမ့ၢ်န့ၢ်ဘၣ် ဟီၣ်ခိၣ်ဒီဘ့ၣ်ညါ, ဒီးမၤဟါမၢ်ကွံာ်အသးဒီး, မ့ၢ်အန့ၢ်ဘျုးမနုၤလဲၣ်.” ခရံာ်ဖိတဖၣ်န့ၣ် သ့ၣ်ညါဝဲလၢ ပမ့ၢ်ထူးတီၤ ထဲလဲၣ်ဂ့ၤထဲလဲၣ်ဂ့ၤ ပမ့ၢ်သံန့ၣ် အဘျုးတအိၣ်နီတမံၤဘၣ်. (၁ ယိၤဟၣ် ၂:၁၅-၁၇) ဒ်သိးပကစံးဆၢ ယ့ၣ်ၡူးအတၢ်သံကွၢ် ခံဖျၢၣ်တဖျၢၣ်ကသ့အဂီၢ် ပကဘၣ်သံကွၢ်လီၤပသးလၢ ‘ဒ်သိး ယကအိၣ်မူဘၣ်လၢ ဟီၣ်ခိၣ်သီအဂီၢ် ယဟ့ၣ်လီၤယသးလၢ တၢ်သူၣ်အိၣ်သးအိၣ်အပူၤထဲလဲၣ်.’ ပတၢ်စံးဆၢဒီး ပတၢ်အိၣ်မူန့ၣ် ပာ်ဖျါထီၣ်ဝဲလၢ ပတၢ်မုၢ်လၢ်လၢ ပသးပူၤန့ၣ် ဂၢၢ်ကျၢၤဝဲ ထဲလဲၣ်န့ၣ်လီၤ.—ထိၣ်သတြီၤဒီး ယိၤဟၣ် ၁၂:၂၅.
(မၢ်ကူး ၈:၃၈) အဂ့ၢ်ဒ်အံၤ, ဖဲဒၣ်ပှၤလၢအမဲာ်ဆှးယၤဒီး ယကလုၢ်ယကထါလၢပှၤအဲၣ်ဘၢတၢ် ဒီးပှၤတၢ်ဒဲးဘးဖိတစိၤအံၤအကျါဒီး, ပှၤကညီဖိခွါအံၤ ကမဲာ်ဆှးအီၤ, ဖဲအဟဲလၢအပၢ်အလၤကပီၤ, အိၣ်ဒီးအကလူးစီဆှံတဖၣ်န့ၣ်လီၤ.
jy ကဘျံးပၤ ၁၄၃ အဆၢ ၄
ပှၤကညီဖိခွါန့ၣ် မ့ၢ်မတၤလဲၣ်
ဒ်သိးယ့ၣ်ၡူး အပျဲၢ်အဘီၣ်တဖၣ် ကဒိးန့ၢ်ဘၣ် ယ့ၣ်ၡူးအတၢ်ဘၣ်သးအဂီၢ် အဝဲသ့ၣ် ကဘၣ်အိၣ်ဒီးတၢ်သူၣ်ဒူသးဒူ ဒီးဟ့ၣ်လီၤအသးလီၤ. ယ့ၣ်ၡူးတဲဝဲလၢ “ဖဲဒၣ်ပှၤလၢအမဲာ်ဆှးယၤဒီး ယကလုၢ်ယကထါလၢပှၤအဲၣ်ဘၢတၢ် ဒီးပှၤတၢ်ဒဲးဘးဖိတစိၤအံၤအကျါဒီး, ပှၤကညီဖိခွါအံၤ ကမဲာ်ဆှးအီၤ, ဖဲအဟဲလၢအပၢ်အလၤကပီၤ, အိၣ်ဒီးအကလူးစီဆှံတဖၣ်န့ၣ်လီၤ.” (မၢ်ကူး ၈:၃၈) ယ့ၣ်ၡူးမ့ၢ်ဟဲလီၤန့ၣ် “ကဟ့ၣ်လီၤတၢ်လၢ ပှၤကညီစုာ်စုာ်, ဒ်အမၤတၢ်အသိးန့ၣ်လီၤ.”—မးသဲ ၁၆:၂၇.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(မၢ်ကူး ၇:၅-၈) တုၤနုၤတစု ပှၤဖၤရံၤၡဲ, ဒီးပှၤကွဲးလံာ်သ့ၣ်တဖၣ်န့ၣ် သံကွၢ်အီၤ, ဘၣ်မနုၤလၢနပျဲၢ်နဘီၣ် တလဲၤဘၣ်ဒ်ပမှံၤပပှၢ် အတၢ်စံၣ်စိၤတဲစိၤအသိးဘၣ်, ဒီးအီၣ်တၢ်အီတၢ်ဒီးအစုတသ့ကွံာ်ဘၣ်န့ၣ်လဲၣ်. ၆ ဒီးအဝဲဒၣ်စံးဆၢတၢ်ဒီးစံးဘၣ်အီၤ, စီၤယၡါယၤကတိၤတၢ် လၢဝံအကျိာ် လၢပှၤလီတၢ်ဖိ သုဝဲသ့ၣ်အဂ့ၢ်အကျိၤ, ဘၣ်မးလီၤ. တၢ်ကွဲးအသးဒ်အံၤ, ပှၤတကလုာ်အံၤယူးယီၣ်ယၤလၢအပျုၤ, မ့မ့ၢ်အသးန့ၣ်ယံၤဝဲဒီးယၤလီၤ, ၇ မ့ၢ်အဝဲသ့ၣ် သိၣ်လိတၢ်လၢ ပှၤကညီအတၢ်မၤလိာ် လၢတၢ်သိၣ်တၢ်သီအလီၢ်ဒီး, ဘူၣ်ထီၣ်ဘါထီၣ်ယၤ ကလီကလီလီၤ. ၈ သုပာ်ကွံာ်ယွၤအတၢ်သိၣ်တၢ်သီ, ဒီးသုတိၢ်န့ၢ်ပှၤကညီအတၢ်စံၣ်စိၤတဲစိၤလီၤ.
ပှၤဖးလံာ်ဖိတဖၣ် အတၢ်သံကွၢ်
ဘၣ်မနုၤအဃိ ယ့ၣ်ၡူးအဒုၣ်အဒါတဖၣ် ဃုတၢ်ကမၣ် ဘၣ်ဃးဒီးတၢ်သ့စုအဂ့ၢ်န့ၣ်လဲၣ်.
▪ ပှၤသ့ၣ်တဖၣ်အံၤ ပာ်ဒ့ၣ်ပာ်ကမၣ် ယ့ၣ်ၡူးဒီး အပျဲၢ်အဘီၣ်သ့ၣ်တဖၣ် လၢတၢ်ဂ့ၢ်အါမံၤလီၤ. လၢအကျါတခါန့ၣ် မ့ၢ်ဝဲအတၢ်သ့စုအဂ့ၢ်န့ၣ်လီၤ. ပမ့ၢ်ကွၢ်လၢ စီၤမိၤၡ့အတၢ်သိၣ်တၢ်သီအပူၤန့ၣ် ပထံၣ်ဘၣ်လၢ ပှၤကဲထီၣ် ပှၤလၢတကဆှီဘၣ် သ့လၢကျဲအါမံၤလီၤ. အဒိ ဖဲပိာ်မုၣ်တဂၤ အလုၢ်အလၢ်ဟဲအခါ, ဖဲတၢ်အထံဟဲလီၤလၢ ပိာ်မုၣ်ပိာ်ခွါ အက့ၢ်အဂီၤအခါ, ဒီးပှၤလၢအအိၣ်ဒီးတၢ်ဆါအၢ တကးဒံးဘၣ်ပှၤလၢအထိးဘၣ်ပှၤသံ မ့တမ့ၢ် ဆၣ်ဖိကီၢ်ဖိအသံသ့ၣ်တဖၣ်န့ၣ် ကကဲထီၣ်ဝဲ ပှၤလၢအတကဆှီဘၣ်လီၤ. စီၤမိၤၡ့အတၢ်သိၣ်တၢ်သီ ပာ်ဖျါထီၣ်စ့ၢ်ကီးဝဲလၢ ဒ်သိးအဝဲသ့ၣ် ကကဆှီထီၣ်အဂီၢ် ကဘၣ်မၤဝဲဒ်လဲၣ်န့ၣ်လီၤ. ဒ်သိးအဝဲသ့ၣ် ကကဆှီထီၣ်အဂီၢ် ကဘၣ်လုၢ်ထီၣ်တၢ်, လုၢ်ထံ မ့တမ့ၢ် ကဘၣ်ဖှံဝဲဒီးထံန့ၣ်လီၤ.—၃ မိၤၡ့ အဆၢဒိၣ် ၁၁-၁၅; ၄ မိၤၡ့အဆၢဒိၣ် ၁၉.
ပှၤယူဒၤဖိအသရၣ်လၢ အမ့ၢ်ရၤဘံတဖၣ်စ့ၢ်ကီး မၤအါထီၣ်တၢ်သိၣ်တၢ်သီ ဘၣ်ဃးဒီးတၢ်ဂ့ၢ်အံၤလီၤ. လံာ်တဘ့ၣ် ပာ်ဖျါထီၣ်ဝဲလၢ အဝဲသ့ၣ် မၤအါထီၣ် တၢ်သိၣ်တၢ်သီ ဘၣ်ဃးဒီး ပှၤကဲထီၣ် ပှၤလၢတကဆှီဘၣ်ဒ်လဲၣ်အဂ့ၢ်, ဒီးပှၤလၢအတကဆှီတဖၣ် မၤဘၣ်အၢပှၤလၢ အကဆှီတဖၣ် သ့ဒ်လဲၣ်အဂ့ၢ်န့ၣ်လီၤ. တကးဒံးဘၣ် အဝဲသ့ၣ်ထုးထီၣ် တၢ်သိၣ်တၢ်သီလၢ တၢ်ပီးတၢ်လီတနီၤနီၤန့ၣ် ကဲထီၣ်တၢ်တကဆှီဘၣ် သ့ဝဲစ့ၢ်ကီးလီၤ. ဒ်သိးပှၤကကဆှီထီၣ်က့ၤအဂီၢ် ကဘၣ်မၤဝဲဒ်လဲၣ်န့ၣ် အဝဲသ့ၣ်မၤအါထီၣ် တၢ်သိၣ်တၢ်သီစ့ၢ်ကီးလီၤ.
ယ့ၣ်ၡူးအဒုၣ်အဒါတဖၣ် သံကွၢ်အီၤလၢ– “ဘၣ်မနုၤလၢနပျဲၢ်နဘီၣ် တလဲၤဘၣ်ဒ်ပမှံၤပပှၢ် အတၢ်စံၣ်စိၤတဲစိၤအသိးဘၣ်, ဒီးအီၣ်တၢ်အီတၢ်ဒီးအစုတသ့ကွံာ်ဘၣ်န့ၣ်လဲၣ်.” (မၢ်ကူး ၇:၅) ပှၤဖၤရံၤၡဲသ့ၣ်တဖၣ် တဲဝဲဒ်အံၤန့ၣ် တမ့ၢ်လၢယ့ၣ်ၡူးအပျဲၢ်အဘီၣ်တဖၣ် အစုဘၣ်အၢအဃိဘၣ်. အဝဲသ့ၣ်တဲဝဲလၢ တချုးပှၤကအီၣ်တၢ် ပှၤကဘၣ်လူလီၤထံလၢပှၤစုအလိၤန့ၣ် မ့ၢ်ဒၣ်တၢ်လုၢ်တၢ်လၢ်တခါလၢ အဝဲသ့ၣ်ဒုးအိၣ်ထီၣ်ဝဲလီၤ. ဘၣ်ဃးဒီးတၢ်ဂ့ၢ်အံၤန့ၣ် လံာ်တဘ့ၣ် ပာ်ဖျါထီၣ်စ့ၢ်ကီးဝဲလၢ “အဝဲသ့ၣ်တဲသကိးဝဲလၢ ဖဲသ့စုအခါ ကဘၣ်သူဝဲ ထံခွးဒ်လဲၣ်တကလုာ်လဲၣ်န့ၣ်လီၤ. ဒီးကဘၣ်သူဝဲထံဒ်လဲၣ်တကလုာ်လဲၣ် ဒီးမတၤကဘၣ်လူလီၤဝဲလဲၣ် ဒီးစုကြၢးဘၣ်စီၣ်ဝဲထဲလဲၣ်န့ၣ်လီၤ.”
အဝဲသ့ၣ်မၤအါထီၣ် တၢ်သိၣ်တၢ်သီတဖၣ်အံၤအဃိ ယ့ၣ်ၡူးတဲအဝဲသ့ၣ်ဒ်လဲၣ်. ယ့ၣ်ၡူးတဲ ပှၤယူဒၤဖိ တၢ်ဘူၣ်တၢ်ဘါခိၣ်နၢ်တဖၣ်လၢ– “စီၤယၡါယၤကတိၤတၢ် လၢဝံအကျိာ် လၢပှၤလီတၢ်ဖိ သုဝဲသ့ၣ်အဂ့ၢ်အကျိၤ, ဘၣ်မးလီၤ. တၢ်ကွဲးအသးဒ်အံၤ, ပှၤတကလုာ်အံၤယူးယီၣ်ယၤလၢအပျုၤ, မ့မ့ၢ်အသးန့ၣ်ယံၤဝဲဒီးယၤလီၤ. မ့ၢ်အဝဲသ့ၣ် သိၣ်လိတၢ်လၢ ပှၤကညီအတၢ် မၤလိာ်လၢတၢ်သိၣ်တၢ်သီအလီၢ်ဒီး, ဘူၣ်ထီၣ်ဘါထီၣ်ယၤ ကလီကလီလီၤ. သုပာ်ကွံာ်ယွၤအတၢ်သိၣ်တၢ်သီ, ဒီးသုတိၢ်န့ၢ်ပှၤကညီအတၢ်စံၣ်စိၤတဲစိၤလီၤ.”—မၢ်ကူး ၇:၆-၈.
(မၢ်ကူး ၇:၃၂-၃၅) ဒီးပှၤဟဲစိာ်ပှၤလၢအနၢ်တအၢ ဒီးအုးအးကတာ်ပျ့ၤတဂၤ, ဆူအအိၣ်, ဒီးဃ့ကညးအီၤ, ဒ်သိးအကပာ်ထီၣ်အစုလၢအလိၤလီၤ. ၃၃ ဒီးဟံးန့ၢ်ဒီးဆှၢထီၣ်ကွံာ်အီၤလၢ ပှၤဂီၢ်မုၢ်အကျါ, ဆူတၢ်တဒၢ, ဒီးအူနုာ်အစုနၢဆူအနၢ်ပူၤ, ဒီးထူးပှဲာ်ဝဲ, ဒီးထိးဘၣ်အပျ့ၤလီၤ. ၃၄ ဒီးကွၢ်ထီၣ်တၢ်ဆူမူခိၣ် ဒီးကအုကစွါဝဲ, ဒီးစံးဘၣ်အီၤ, အ့ၤဖၤသါ, ဒ်ပစံးတၢ်အသိး, အိးထီၣ်တက့ၢ်. ၃၅ ဒီးအနၢ်ကပီၤထီၣ်တကီၢ်ခါ, ဒီးအပျ့ၤအထူၣ်အပျၢ် လီၤဆှၣ်က့ၤဝဲ, ဒီးကတိၤက့ၤတၢ်ကစီဒီလီၤ.
တၢး၀၀ ၂/၁၅ ကဘျံးပၤ ၁၇-၁၈ အဆၢ ၉-၁၁
မ့ၢ်နအိၣ်ဒီး “ခရံာ်အသး” ဧါ
၉ ပှၤပိာ်ခွါတဂၤန့ၣ် အနၢ်တအၢဒီး ကတိၤတၢ်တသ့အါအါဘၣ်. ယ့ၣ်ၡူးကသ့ၣ်ညါဝဲလၢ အဝဲပျံၤတၢ် မ့တမ့ၢ် မဲာ်ဆှးလီၤ. ဒီးဖဲန့ၣ်အဆၢကတီၢ် ယ့ၣ်ၡူးမၤဝဲ တၢ်လၢအတမၤညီနုၢ်ဝဲတခါလီၤ. အဝဲလဲၤကိးဝဲ ပှၤပိာ်ခွါတဂၤအံၤ လၢအယံၤဒီးပှၤဂီၢ်မုၢ် လၢပှၤမဲာ်တဒၢအလီၢ်န့ၣ်လီၤ. ဒီးယ့ၣ်ၡူး “အူနုာ်အစုနၢဆူအနၢ်ပူၤ, ဒီးထူးပှဲာ်ဝဲ, ဒီးထိးဘၣ်အပျ့ၤ” ဒ်သိး ကဒုးသ့ၣ်ညါဝဲ ပှၤတဂၤအံၤလၢ အဝဲကမၤန့ၢ်အီၤတၢ်မနုၤလဲၣ်န့ၣ်လီၤ. (မၢ်ကူး ၇:၃၃) ဒီးယ့ၣ်ၡူး ကွၢ်ထီၣ်ဆူမူခိၣ်ဒီး ဃ့ဘါထုကဖၣ်တၢ်လီၤ. အဝဲမၤဝဲဒ်န့ၣ်အဃိ လီၤဂာ်ဒ်အတဲဝဲပှၤတဂၤန့ၣ်လၢ ‘တၢ်လၢယကမၤန့ၢ်လၢ နဂီၢ်အံၤ မ့ၢ်လၢယွၤအစိကမီၤအဃိလီၤ.’ လၢခံကတၢၢ် ယ့ၣ်ၡူးစံးဝဲလၢ– “အိးထီၣ်တက့ၢ်.” (မၢ်ကူး ၇:၃၄) ဒီးပှၤတဂၤန့ၣ် နၢ်ဟူက့ၤတၢ်ဒီး ကတိၤတၢ်သ့ထီၣ်ဝဲလီၤ.
၁၀ ယ့ၣ်ၡူး ဆိကမိၣ်န့ၢ်တၢ်လၢ ပှၤဂၤအဂီၢ်လီၤ. အဝဲသ့ၣ်ညါ ပှၤဂၤအတၢ်တူၢ်ဘၣ် အိၣ်ဝဲဒ်လဲၣ်အဃိ အတၢ်သးကညီၤအံၤ ထိၣ်ဟူးထိၣ်ဂဲၤထီၣ်အီၤ လၢကမၤစၢၤဝဲပှၤဂၤလၢ တၢ်အဲၣ်တၢ်ကွံအပူၤလီၤ. ဒ်ပမ့ၢ်ခရံာ်ဖိတဖၣ်အသိး ပဂုာ်ကျဲးစၢး မၤဒိၣ်ထီၣ်အါထီၣ် ဒီးပာ်ဖျါထီၣ် တၢ်ပာ်သူၣ်ပာ်သး ဒ်သိးခရံာ်လီၤ. လံာ်စီဆှံ ဟ့ၣ်သဆၣ်ထီၣ်ပှၤလၢ “မ်ပှၤခဲလၢာ်ကဲထီၣ် ပှၤသးတဖျၢၣ်ဃီ, ပှၤဒိးဃုာ်တၢ်, ပှၤအဲၣ်ဒီပုၢ်ဝဲၢ်, ပှၤသးကညီၤတၢ်, ပှၤဆီၣ်လီၤအသးန့ၣ်တက့ၢ်.” (၁ ပ့းတရူး ၃:၈) အဃိပသ့ၣ်ညါဘၣ်လၢ ဖဲပတဲတၢ်ဒီးမၤတၢ်တမံၤမံၤအခါ ပကဘၣ်ဆိကမိၣ်န့ၢ်တၢ်လၢ ပှၤဂၤအဂီၢ်လီၤ.
၁၁ လၢတၢ်အိၣ်ဖှိၣ်အပူၤ ပပာ်ဖျါထီၣ်လၢ ပဆိကမိၣ်န့ၢ်တၢ်လၢ ပှၤဂၤအတၢ်တူၢ်ဘၣ်အဂီၢ် ခီဖျိပရ့ဒီးအဝဲသ့ၣ်လၢ တၢ်ယူးယီၣ်ပာ်ကဲအပူၤ ဒီးရ့ဒီးအီၤဒ် ကျဲလၢပအဲၣ်ဒိးလၢ ပှၤရ့ဒီးပှၤအသိးန့ၣ်လီၤ. (မးသဲ ၇:၁၂) အဃိ ပကဘၣ်ပလီၢ်သူၣ်ပလီၢ်သး ဘၣ်ဃးဒီး ပတဲတၢ်မနုၤလဲၣ်ဒီး ပတဲအီၤဒ်လဲၣ်န့ၣ်လီၤ. (ကလီးစဲ ၄:၆) သ့ၣ်နီၣ်ထီၣ်လၢ “တၢ်ကတိၤတၢ်လၢတအိၣ်ဒီး တၢ်ဆိကမိၣ်ဆိကမးဘၣ်န့ၣ် မၤဆါတၢ်ယိာ်ဝဲထဲသိးသိးနး” န့ၣ်တက့ၢ်. (ကတိၤဒိ ၁၂:၁၈, ခ့ခါစှီၤကျိာ်) မ့မ့ၢ်လၢ ဟံၣ်ဖိဃီဖိအပူၤမီၤ. ပှၤနီၢ်ဒီမါဝၤလၢ အဲၣ်လိာ်အသးနီၢ်နီၢ်တဖၣ်န့ၣ် ဆိကမိၣ်န့ၢ်တၢ်လၢ တဂၤဒီးတဂၤအဂီၢ်လီၤ. (အ့းဖ့းစူး ၅:၃၃) အဝဲသ့ၣ် ဟးဆှဲး တၢ်တဲဆါလိာ်သး, တၢ်ကဒူးကဒ့ၣ်တၢ်, တၢ်ကတိၤဆဲးအဲးလီၤ. မ့ၢ်လၢတၢ်ကတိၤသ့ၣ်တဖၣ်အံၤ မၤဆါပှၤသးသ့ဒီး ပှၤသးပ့ၤနီၣ်ကွံာ်တသ့ညီညီဘၣ်အဃိလီၤ. ဖိသၣ်တဖၣ်စ့ၢ်ကီး အိၣ်ဒီးတၢ်တူၢ်ဘၣ်အဃိ မိၢ်ပၢ်လၢအိၣ်ဒီး တၢ်အဲၣ်တၢ်ကွံတဖၣ်န့ၣ် ဆိကမိၣ်န့ၢ်တၢ်လၢ အဖိတဖၣ်အဂီၢ်လီၤ. ဖဲဖိတဖၣ် လိၣ်ဘၣ်တၢ်သိၣ်ဃီၣ်အခါ မိၢ်ပၢ်တဖၣ်သိၣ် အဝဲသ့ၣ်လၢ တၢ်အဲၣ်တၢ်ကွံအပူၤ ဒီးတမၤမဲာ်ဆှးအဝဲသ့ၣ်ဘၣ်. (ကလီးစဲ ၃:၂၁) ဖဲပဆိကမိၣ်န့ၢ်တၢ်လၢပှၤဂၤအဂီၢ်အခါ မ့ၢ်ဒၣ်ပပာ်ဖျါထီၣ်လၢ ပအိၣ်ဒီး တၢ်ပာ်သူၣ်ပာ်သး ဒ်ခရံာ်အသိးလီၤ.
တၢ်ဖးလံာ်စီဆှံ
(မၢ်ကူး ၇:၁-၁၅) ဒီးပှၤဖၤရံၤၡဲတဖၣ်, ဒီးပှၤကွဲးလံာ်တနီၤနီၤလၢအဟဲလၢယရူၤၡလ့ၣ်န့ၣ်, အိၣ်ဖှိၣ်ရိဖှိၣ်လၢအအိၣ်, ၂ ဒီးထံၣ်ဘၣ်လၢအပျဲၢ်အဘီၣ်တနီၤနီၤအီၣ်ကိၣ်လၢအစုတကဆှီဘၣ်, ဒ်ပစံးတၢ်အသိး, အစုလၢအတသ့ကွံာ်ဘၣ်လီၤ. ၃ အဂ့ၢ်ဒ်အံၤ, ပှၤဖၤရံၤၡဲ, ဒီးပှၤယူဒၤဖိခဲလၢာ်န့ၣ်, မ့ၢ်အတိၢ်ပမှံၤပပှၢ်အတၢ်စံၣ်စိၤတဲစိၤဒီး, မ့ၢ်တသ့ကွံာ်ဘၣ်အစုလၢအစုခိၣ်ဒီး, တအီၣ်ဘၣ်တၢ်ဘၣ်. ၄ ဒီးတုၤအဟဲက့ၤလၢဖၠါပူၤန့ၣ်, မ့ၢ်တဘျၢဘၣ်အသးဒီး, တအီၣ်ဘၣ်တၢ်ဘၣ်. လၢန့ၣ်အမဲာ်ညါ, အိၣ်ဒံးတၢ်အဂုၤအဂၤအါမံၤ, လၢအဒိးန့ၢ်ဝဲ ဒ်သိးအကတိၢ်န့ၢ်လီၤ. ဘျၢလီခီ, ဒီးသလူသ့ၣ်, ဒီးသလူတိၢ်ဘီ, (ဒီးစီၢ်နီၤခိၣ်) လီၤ. ၅ တုၤနုၤတစု ပှၤဖၤရံၤၡဲ, ဒီးပှၤကွဲးလံာ်သ့ၣ်တဖၣ်န့ၣ် သံကွၢ်အီၤ, ဘၣ်မနုၤလၢနပျဲၢ်နဘီၣ် တလဲၤဘၣ်ဒ်ပမှံၤပပှၢ် အတၢ်စံၣ်စိၤတဲစိၤအသိးဘၣ်, ဒီးအီၣ်တၢ်ဒီးအစုတသ့ကွံာ်ဘၣ်န့ၣ်လဲၣ်. ၆ ဒီးအဝဲဒၣ်စံးဆၢတၢ်ဒီးစံးဘၣ်အီၤ, စီၤယၡါယၤကတိၤတၢ် လၢဝံအကျိာ် လၢပှၤလီတၢ်ဖိ သုဝဲသ့ၣ်အဂ့ၢ်အကျိၤ, ဘၣ်မးလီၤ. တၢ်ကွဲးအသးဒ်အံၤ, ပှၤတကလုာ်အံၤယူးယီၣ်ယၤလၢအပျုၤ, မ့မ့ၢ်အသးန့ၣ်ယံၤဝဲဒီးယၤလီၤ, ၇ မ့ၢ်အဝဲသ့ၣ် သိၣ်လိတၢ်လၢ ပှၤကညီအတၢ်မၤလိာ် လၢတၢ်သိၣ်တၢ်သီအလီၢ်ဒီး, ဘူၣ်ထီၣ်ဘါထီၣ်ယၤ ကလီကလီလီၤ. ၈ သုပာ်ကွံာ်ယွၤအတၢ်သိၣ်တၢ်သီ, ဒီးသုတိၢ်န့ၢ်ပှၤကညီအတၢ်စံၣ်စိၤတဲစိၤလီၤ. ၉ ဒီးစံးဘၣ်အီၤ, ဒ်သိးသုကတိၢ်န့ၢ် သုတၢ်စံၣ်စိၤတဲစိၤဒီး, သုမၤယွၤအတၢ်သိၣ်တၢ်သီလၢတၢ်ကလီကလီ, ဘၣ်မးလဲၣ်. ၁၀ အဂ့ၢ်ဒ်အံၤ, စီၤမိၤၡ့စံးဝဲဒၣ်, ယူးယီၣ်နမိၢ်ဒီးနပၢ်တက့ၢ်. ဒီးအမိၢ်မ့ၢ်ဂ့ၤ, အပၢ်မ့ၢ်ဂ့ၤ, ပှၤလၢအကတိၤအၢအီၤန့ၣ်, မ်အသံသပှၢ်တၢၢ်တက့ၢ်. ၁၁ မ့မ့ၢ်သုဝဲသ့ၣ်အံၤ သုစံး, ပှၤကညီမ့ၢ်စံးဘၣ်အမိၢ်အပၢ်, ဖဲဒၣ်တၢ်လၢနဂ့ၤန့ၢ်ဘၣ်လၢယၤတမံၤမံၤအံၤ, မ်အကကဲလၢကီၤဘၣ် (ဒ်ပစံးတၢ်အသိးတၢ်မၤဘူၣ်) တက့ၢ်န့ၣ်ဒီး, ၁၂ သုတဒုးမၤစၢၤလၢၤဘၣ်အီၤလၢ အမိၢ်အပၢ်ဘၣ်. ၁၃ အန့ၣ်ဒီး သုမၤဟးဂီၤယွၤအကလုၢ်အကထါလၢ သုတၢ်စံၣ်စိၤတဲစိၤလၢ သုစံၣ်ဃဲၤက့ၤန့ၣ်လီၤ. ဒီးတၢ်ဂုၤတၢ်ဂၤဒ်န့ၣ်အသိး, သုမၤအါမံၤလီၤ. ၁၄ ဒီးကိးန့ၢ်ပှၤဂီၢ်မုၢ်ခဲလၢာ်ဆူအအိၣ် ဒီးစံးဘၣ်အီၤ, ကနၣ်ယကလုၢ်သုဝဲခဲလၢာ်, ဒီးနၢ်ပၢၢ်တက့ၢ်. ၁၅ တၢ်အိၣ်လၢခိလၢ အလဲၤနုာ်ဝဲဆူ ပှၤကညီအပူၤန့ၣ်, မၤတကဆှီဘၣ်အီၤတသ့ဘၣ် နီတမံၤဘၣ်. မ့မ့ၢ်တၢ်လၢအဟဲထီၣ်လၢ အပူၤတဖၣ်န့ၣ်, မ့ၢ်တၢ်လၢအမၤတကဆှီဘၣ် ပှၤကညီလီၤ.
လါမ့ၤ ၁၄–၂၀
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | မၢ်ကူး ၉–၁၀
“တၢ်ထံၣ်လၢညါခီ လၢအမၤဂၢၢ်ကျၢၤထီၣ် ပတၢ်နာ်”
(မၢ်ကူး ၉:၁) ဒီးစံးဘၣ်အီၤ, ယစံးဘၣ်တဲဘၣ်သုတီတီအံၤ, ပှၤတနီၤနီၤအိၣ်ဝဲလၢ ပှၤဆၢထၢၣ်ဖဲအံၤ အကျါလၢအတချုးထံၣ်ဒံးဘၣ်ယွၤအဘီအမုၢ် ဟဲဒီးအစိအကမီၤန့ၣ်ဒီး, တလ့ၣ်ကွၢ်ဘၣ်တၢ်သံဘၣ်.
တၢး၀၅ ၁/၁၅ ကဘျံးပၤ ၁၂ အဆၢ ၉-၁၀
ခရံာ်မ့ၢ်ပှၤအရ့ဒိၣ်ကတၢၢ်လၢ ဝံအတၢ်စံးပာ်အဂီၢ်
၉ ယ့ၣ်ၡူး ပာ်ဖျါထီၣ်တၢ်အုၣ်အသးလၢ အဝဲမ့ၢ်မ့းၡံအၤန့ၣ် ပူၤကွံာ်ကအိၣ်တနံၣ်ဘျဲၣ်လံ. ခ.န ၃၂ ဘူၣ်လဲၤကပာ်စ့ၢ်ကီးဝံၤဝဲလံလီၤ. ယ့ၣ်ၡူးအပျဲၢ်အဘီၣ်အါဂၤ တပိာ်အခံလၢၤဘၣ်. ဘၣ်သ့ၣ်သ့ၣ် ကမ့ၢ်လၢ တၢ်မၤအၢမၤနး, တၢ်သးစၢၢ်ဆၢလၢတၢ်ထူးတၢ်တီၤ မ့တမ့ၢ် တၢ်ဘၣ်ယိၣ်ဘၣ်ဘီလၢ တၢ်အိၣ်မူအဂီၢ်အဃိလီၤ. ပှၤအဂၤတနီၤန့ၣ် အသးကဒ့ဒီ မ့တမ့ၢ် အသးကဟးဂီၤဝဲ မ့ၢ်လၢ ဖဲပှၤအဲၣ်ဒိးပာ်ထီၣ် ယ့ၣ်ၡူးလၢစီၤပၤအခါ အဝဲဂ့ၢ်လိာ်ကွံာ်ဝဲအဃိလီၤ. ဖဲပှၤယူဒၤ တၢ်ဘူၣ်တၢ်ဘါခိၣ်နၢ်တဖၣ် မၢအမၤပၠးအီၤ တၢ်လီၤလးအခါ အဝဲတမၤဝဲဘၣ်. (မးသဲ ၁၂:၃၈, ၃၉) အဝဲ ဂ့ၢ်လိာ်ဝဲဒ်အံၤအဃိ ပှၤတနီၤ အသးဒံဝ့ၤဒံဝီၤဝဲလီၤ. တကးဒံးဘၣ် ယ့ၣ်ၡူး တဲဖျါထီၣ်ဝဲ တၢ်ဂ့ၢ်တမံၤလၢ အပျဲၢ်အဘီၣ်တဖၣ် နၢ်ပၢၢ်ဘၣ်အီၣ်ကီမးလီၤ. တဲဝဲ “လၢအကဘၣ်လဲၤဆူယရူၤၡလ့ၣ်, ဒီးဘၣ်တၢ်နးတၢ်ဖှီၣ်အါမံၤလၢ ပှၤသူၣ်က့သးပှၢ်, ဒီးပှၤလုၢ်တၢ်အခိၣ်, ဒီးပှၤကွဲးလံာ်သ့ၣ်တဖၣ်အစုပူၤ, ဒီးဘၣ်တၢ်မၤသံအီၤ” လီၤ.—မးသဲ ၁၆:၂၁-၂၃
၁၀ လၢခံခွံလါဘျဲၣ် မ့တမ့ၢ် အလါတဆံန့ၣ် ကမ့ၢ်တၢ်ဆၢကတီၢ်လၢ “[ယ့ၣ်ၡူး] ကဟးထီၣ်လၢဟီၣ်ခိၣ်ချၢအံၤ ဆူပၢ်အအိၣ်” လီၤ. (ယိၤဟၣ် ၁၃:၁) ယ့ၣ်ၡူး ဘၣ်ယိၣ်တၢ်လၢ အပျဲၢ်အဘီၣ်အဂီၢ်ဒိၣ်မး ဒီးအဝဲအၢၣ်လီၤ အပျဲၢ်အဘီၣ်တနီၤလၢ ကဒုးထံၣ်ဝဲ တၢ်ပနီၣ်လၢမူခိၣ် လၢပှၤယူဒၤဖိလၢ တအိၣ်ဒီးတၢ်သးတီတဖၣ် တထံၣ်ဘၣ်ဝဲန့ၣ်လီၤ. ယ့ၣ်ၡူးစံးဝဲလၢ “ယစံးဘၣ်တဲဘၣ်သုတီတီအံၤ, ပှၤဆၢထၢၣ်ဖဲအံၤတနီၤနီၤလၢ အတချုးထံၣ်ဒံးဘၣ် ပှၤကညီဖိခွါအံၤ ဟဲလၢအဘီအမုၢ်အပူၤန့ၣ်ဒီး, တလ့ၣ်ကွၢ်ဘၣ်တၢ်သံဘၣ်လီၤ.” (မးသဲ ၁၆:၂၈) တမ့ၢ်ယ့ၣ်ၡူး တဲဝဲလၢ အပျဲၢ်အဘီၣ်တနီၤ ကအိၣ်မူတုၤလၢ ၁၉၁၄, ဖဲမ့းၡံအၤအဘီအမုၢ် သူၣ်ထီၣ်အသးအခါန့ၣ်ဘၣ်. မ့ၢ်လၢ အဝဲအဲၣ်ဒိးဒုးထံၣ်ဝဲ အပျဲၢ်အဘီၣ်သၢဂၤ တၢ်ထံၣ်လၢညါခီလၢ အပာ်ဖျါထီၣ်အီၤလၢ အဝဲအိၣ်ဒီး တၢ်လၤကပီၤလၢ မ့းၡံအၤအဘီမုၢ်ပူၤအခါန့ၣ်လီၤ. တၢ်ထံၣ်လၢညါခီအံၤ ဘၣ်တၢ်ကိးစ့ၢ်ကီးလၢ တၢ်ပျိာ်လဲအသးလီၤ.
(မၢ်ကူး ၉:၂-၆) လၢန့ၣ် အလီၢ်ခံဃုနံၤဒီး, ယ့ၣ်ၡူးဟံးန့ၢ်စီၤပ့းတရူး, ဒီးစီၤယၤကိာ်, ဒီးစီၤယိၤဟၣ်, ဒီးလဲၤဆှၢထီၣ်အီၤဆူ ကစၢၢ်ဖးထီတဖျၢၣ်အလိၤ, ထဲအကစၢ်ဒၣ်ဝဲတဖၣ်လီၤ. ဒီးအက့ၢ်အဂီၤလဲလိာ်အသးလၢ အဝဲသ့ၣ်အမဲာ်ညါ, ၃ ဒီးအကူအသိး ကယဲၢ်ကယူာ်ဒီးဝါဒိၣ်မး ဒ်မူခိၣ်ဖီ အသိးလီၤ. ပှၤဆှုၣ်တၢ်ဖိလၢ ဟီၣ်ခိၣ်ချၢ မၤဝါထီၣ်တၢ်ဒ်န့ၣ်အသိးတသ့ဘၣ်လီၤ. ၄ ဒီးစီၤအ့ၤလံယၤ, ဒီးစီၤမိၤၡ့အိၣ်ဖျါထီၣ်လၢ အဝဲသ့ၣ်အမဲာ်ညါ, ဒီးကတိၤလိာ်အသးဒီးယ့ၣ်ၡူးလီၤ. ၅ ဒီးစီၤပ့းတရူးကတိၤတၢ်ဒီး စံးဘၣ်ယ့ၣ်ၡူး, ရၤဘံဧၢ, ပအိၣ်ဖဲအံၤဂ့ၤမးလီၤ. ဒီးမ်ပမၤဒဲသၢဖျၢၣ်, လၢနဂီၢ်တဖျၢၣ်, ဒီးလၢစီၤမိၤၡ့အဂီၢ်တဖျၢၣ်, ဒီးလၢစီၤအ့ၤလံယၤအဂီၢ်တဖျၢၣ်န့ၣ်တက့ၢ်. ၆ အဂ့ၢ်ဒ်အံၤ, ကစံးတၢ်ဒ်လဲၣ်ဒ်လဲၣ်န့ၣ်, တသ့ၣ်ညါဝဲဘၣ်. အဂ့ၢ်ဒ်အံၤ, အဝဲသ့ၣ်ပျံၤတၢ်ဒိၣ်မးလီၤ.
တၢး၀၅ ၁/၁၅ ကဘျံးပၤ ၁၂ အဆၢ ၁၁
ခရံာ်မ့ၢ်ပှၤအရ့ဒိၣ်ကတၢၢ်လၢ ဝံအတၢ်စံးပာ်အဂီၢ်
၁၁ ပူၤကွံာ်ဃုသီဝံၤအလီၢ်ခံ, ယ့ၣ်ၡူး လဲၤကိးဝဲ စီၤပ့းတရူး, စီၤယၤကိာ် ဒီးစီၤယိၤဟၣ် ဆူကစၢၢ်ဖးထီတဖျၢၣ်, ဘၣ်သ့ၣ်သ့ၣ် ကမ့ၢ်ကစၢၢ်ဃ့ရမိၣ်အဒီခိၣ်လီၤ. ဖဲန့ၣ်ယ့ၣ်ၡူး “အက့ၢ်အဂီၤလဲလိာ်အသးလၢ အဝဲသ့ၣ်အမဲာ်ညါ, ဒီးအမဲာ်ကဲၤကပီၤဒ်မုၢ်အသိးလီၤ.” စီၤမိၤၡ့ဒီး ဝံအ့ၤလံယၤ စ့ၢ်ကီးဟဲအိၣ်ဖျါထီၣ် ဒီးတဲသကိးတၢ်ဒီးယ့ၣ်ၡူးလီၤ. တၢ်မၤအသးလၢ အလီၤကမၢကမၣ်အံၤ ဘၣ်သ့ၣ်သ့ၣ် ကမ့ၢ်ဖဲမုၢ်နၤခီ ဒီးကဖျါကပြုၢ်ကပြီၤဝဲလီၤ. စီၤပ့းတရူး တဲဝဲလၢကမၤထီၣ်ဒဲသၢဖျၢၣ်လၢ ယ့ၣ်ၡူး, စီၤမိၤၡ့ဒီး ဝံအ့ၤလံယၤအဂီၢ်လီၤ. ဖဲစီၤပ့းတရူး တဲတၢ်အခါ တၢ်အၢၣ်ကဲၤကပီၤဆဲးလီၤဆူ အဝဲသ့ၣ်အလိၤဒီး တၢ်ကလုၢ်သီၣ်ထီၣ်လၢတၢ်အၢၣ်ပူၤ စံးဝဲလၢ “အဝဲတဂၤအံၤ မ့ၢ်ယဖိခွါလၢ ယအဲၣ်, ဒီးဘၣ်ယသးလၢအီၤလီၤ. ဒိကနၣ်အကလုၢ်တက့ၢ်.”—မးသဲ ၁၇:၁-၆.
(မၢ်ကူး ၉:၇) ဒီးတၢ်အၢၣ်တလိၣ်ကဒုဘၣ်အီၤ, ဒီးတၢ်အကလုၢ်သီၣ်လီၤ လၢတၢ်အၢၣ်အပူၤစံးဝဲဒၣ်, အဝဲတဂၤအံၤ မ့ၢ်ယဖိခွါလၢယအဲၣ်အီၤ, ကနၣ်အကလုၢ်တက့ၢ်.
nwtsty တၢ်မၤနီၣ်လၢ မၢ်. ၉:၇
တၢ်အကလုၢ်– ယဟိဝၤယွၤ အနီၢ်ကစၢ်ဒၣ်ဝဲ ကတိၤတၢ်ဒီး ပှၤဟီၣ်ခိၣ်ဖိန့ၣ် လံာ်တၢ်သးခုကစီၣ်ပာ်ဖျါထီၣ်ဝဲ သၢဘျီ ဒီးတၢ်အံၤမ့ၢ် ခံဘျီတဘျီလီၤ.—ကွၢ်တၢ်မၤနီၣ်လၢ မၢ်. ၁:၁၁; ယိၤ. ၁၂:၂၈.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(မၢ်ကူး ၁၀:၆-၉) လၢအတ့လီၤ တၢ်အခီၣ်ထံးန့ၣ် ယွၤတ့လီၤပိာ်မုၣ် ဒီးပိာ်ခွါလီၤ. ၇ အကူၢ်မ့ၢ်ဒ်န့ၣ်ဒီး, ပိာ်ခွါကဟးသဒၣ်အမိၢ်ဒီးအပၢ်, ဒီးကဘျုးအသးဒီးအမါ, ဒီးတၢ်လၢပှၤခံဂၤန့ၣ်ကကဲထီၣ် ပှၤတသွံၣ်ဃီတညၣ်ဃီလီၤ. ၈ မၤသးဒ်န့ၣ်ဒီး, တမ့ၢ်လၢၤ ဘၣ်ပှၤခံဂၤဘၣ်, မ့ၢ်ပှၤတသွံၣ်ဃီတညၣ်ဃီလီၤ. ၉ မၤသးဒ်န့ၣ်ဒီး, တၢ်လၢယွၤပာ်ဃုာ်ဝဲန့ၣ်, မ်ပှၤကညီသုတထုးဖှၣ်တဂ့ၤ.
တၢး၀၈ ၂/၁၅ ကဘျံးပၤ ၃၀ အဆၢ ၈
လံာ်စီဆှံ အတၢ်ပာ်ဖျါလၢ လံာ်မၢ်ကူး
၁၀:၆-၉. ကစၢ်ယွၤ အတၢ်တိာ်ပာ်န့ၣ်မ့ၢ်ဝဲ ပှၤနီၢ်ဒီမါဝၤတဖၣ် ကဘၣ်အိၣ်တပူၤဃီလီၤ. အဃိ တၢ်ကီတၢ်ခဲ မ့ၢ်အိၣ်ထီၣ်ဒၣ်လဲာ် ပှၤနီၢ်ဒီမါဝၤတဖၣ် တကြၢးမၤကတၢၢ်ကွံာ် တၢ်ဆီဟံၣ်ဆီဃီလၢ အဆိအချ့ဘၣ်. လၢတၢ်န့ၣ်အလီၢ် အဝဲသ့ၣ်ကဘၣ် ဂုာ်ကျဲးစၢးမၤထွဲဝဲ လံာ်စီဆှံ အတၢ်ဟံးစုနဲၣ်ကျဲတဖၣ် ဒ်သိးလဲၤခီဖျိတၢ်ကီတၢ်ခဲတဖၣ်ကန့ၢ်အဂီၢ်လီၤ.—မး. ၁၉:၄-၆.
(မၢ်ကူး ၁၀:၁၇, ၁၈) ဒီးတုၤအဟးထီၣ်ဝဲဆူကျဲအပူၤဒီး, ပှၤတဂၤဟဲဃ့ၢ်ဆူအအိၣ်, ဒီးချံးလီၤအခီၣ်, ဒီးသံကွၢ်အီၤ, သရၣ်လၢအဂ့ၤဧၢ, ဒ်သိးယကန့ၢ်ဘၣ်သါတၢ်မူအထူအယိာ်ဒီး, ယဘၣ်မၤတၢ်မနုၤတမံၤလဲၣ်. ၁၈ ဒီးယ့ၣ်ၡူးစံးဘၣ်အီၤ, ဘၣ်မနုၤလၢနကိးယၤလၢအဂ့ၤလဲၣ်. ပှၤအဂ့ၤတအိၣ်ဘၣ်, အိၣ်ထဲယွၤတဂၤဧိၤလီၤ.
nwtsty တၢ်မၤနီၣ်တဖၣ်လၢ မၢ်. ၁၀:၁၇, ၁၈
သရၣ်လၢအဂ့ၤ– ပှၤတဂၤအံၤ သူဝဲတၢ်ကတိၤလၢအမ့ၢ် “သရၣ်လၢအဂ့ၤ” န့ၣ်မ့ၢ်ဝဲတၢ်ကတိၤလၢ ပှၤကတိၤဒိၣ်ပှၤဂၤ ဒီးညီနုၢ် တၢ်ဘူၣ်တၢ်ဘါခိၣ်နၢ်တဖၣ် အဲၣ်ဒိးဝဲလၢ ပှၤကကတိၤဒိၣ်အဝဲသ့ၣ်ဒ်န့ၣ်လီၤ. ယ့ၣ်ၡူး ကြၢးဘၣ်တၢ်ကိးအီၤလၢ “သရၣ်” ဒီး “ကစၢ်” (ယိၤ ၁၃:၁၃), ဘၣ်ဆၣ် အဝဲဟ့ၣ်ဝဲ တၢ်လၤကပီၤခဲလၢာ် ဆူအပၢ်အအိၣ်လီၤ.
ပှၤအဂ့ၤတအိၣ်ဘၣ်, အိၣ်ထဲယွၤတဂၤဧိၤလီၤ– ယ့ၣ်ၡူးန့ၣ်သ့ၣ်ညါဝဲဒၣ် လၢယဟိဝၤယွၤန့ၣ် ဆၢတဲာ်တၢ် လၢအဂ့ၤကတၢၢ်ဒီး အဝဲမ့ၢ်ယွၤတဂၤလၢ အသ့တၢ်လၢာ်အဃိ အိၣ်ဒီးတၢ်ခွဲးတၢ်ယာ်လၢ ကဆၢတဲာ်တၢ်လၢ တၢ်ဂ့ၤဒီးတၢ်အၢအဂီၢ်န့ၣ်လီၤ. ခီဖျိနီၢ်အံၣ်အုဒီးစီၤအၤဒၣ် အီၣ်ဘၣ်ဝဲ တၢ်သ့ၣ်ညါတၢ်ဂ့ၤဒီးတၢ်အၢ အသ့ၣ်တထူၣ်အသၣ် ဒီးမၤကမၣ်တၢ်ဝံၤအလီၢ်ခံ အဝဲသ့ၣ် အဲၣ်ဒိးဆၢတဲာ်တၢ်လၢ အနီၢ်ကစၢ်လီၤ. ဘၣ်ဆၣ် မ့မ့ၢ်ယ့ၣ်ၡူးန့ၣ် တဒ်သိးဒီးအဝဲသ့ၣ်ဘၣ်, အဝဲ ဒိကနၣ်အပၢ် အတၢ်ဆၢတဲာ် လၢတၢ်ဆီၣ်လီၤသးအပူၤလီၤ. တၢ်ဆၢတဲာ်အဂ့ၤကတၢၢ်လၢ ကစၢ်ယွၤအဲၣ်ဒိးလၢ ပကလူၤပိာ်ထွဲတဖၣ်န့ၣ် ပာ်ဖျါထီၣ်ဝဲ ခီဖျိလၢအကလုၢ်ကထါ လံာ်စီဆှံအပူၤန့ၣ်လီၤ.—မၢ်. ၁၀:၁၉.
တၢ်ဖးလံာ်စီဆှံ
(မၢ်ကူး ၉:၁-၁၃) ဒီးစံးဘၣ်အီၤ, ယစံးဘၣ်တဲဘၣ်သုတီတီအံၤ, ပှၤတနီၤနီၤအိၣ်ဝဲလၢ ပှၤဆၢထၢၣ်ဖဲအံၤ အကျါလၢအတချုးထံၣ်ဒံးဘၣ်ယွၤအဘီအမုၢ် ဟဲဒီးအစိအကမီၤန့ၣ်ဒီး, တလ့ၣ်ကွၢ်ဘၣ်တၢ်သံဘၣ်. ၂ လၢန့ၣ် အလီၢ်ခံဃုနံၤဒီး, ယ့ၣ်ၡူးဟံးန့ၢ်စီၤပ့းတရူး, ဒီးစီၤယၤကိာ်, ဒီးစီၤယိၤဟၣ်, ဒီးလဲၤဆှၢထီၣ်အီၤဆူ ကစၢၢ်ဖးထီတဖျၢၣ်အလိၤ, ထဲအကစၢ်ဒၣ်ဝဲတဖၣ်လီၤ. ဒီးအက့ၢ်အဂီၤလဲလိာ်အသးလၢ အဝဲသ့ၣ်အမဲာ်ညါ, ၃ ဒီးအကူအသိး ကယဲၢ်ကယူာ်ဒီးဝါဒိၣ်မး ဒ်မူခိၣ်ဖီ အသိးလီၤ. ပှၤဆှုၣ်တၢ်ဖိလၢ ဟီၣ်ခိၣ်ချၢ မၤဝါထီၣ်တၢ်ဒ်န့ၣ်အသိးတသ့ဘၣ်လီၤ. ၄ ဒီးစီၤအ့ၤလံယၤ, ဒီးစီၤမိၤၡ့အိၣ်ဖျါထီၣ်လၢ အဝဲသ့ၣ်အမဲာ်ညါ, ဒီးကတိၤလိာ်အသးဒီးယ့ၣ်ၡူးလီၤ. ၅ ဒီးစီၤပ့းတရူးကတိၤတၢ်ဒီး စံးဘၣ်ယ့ၣ်ၡူး, ရၤဘံဧၢ, ပအိၣ်ဖဲအံၤဂ့ၤမးလီၤ. ဒီးမ်ပမၤဒဲသၢဖျၢၣ်, လၢနဂီၢ်တဖျၢၣ်, ဒီးလၢစီၤမိၤၡ့အဂီၢ်တဖျၢၣ်, ဒီးလၢစီၤအ့ၤလံယၤအဂီၢ်တဖျၢၣ်န့ၣ်တက့ၢ်. ၆ အဂ့ၢ်ဒ်အံၤ, ကစံးတၢ်ဒ်လဲၣ်ဒ်လဲၣ်န့ၣ်, တသ့ၣ်ညါဝဲဘၣ်. အဂ့ၢ်ဒ်အံၤ, အဝဲသ့ၣ်ပျံၤတၢ်ဒိၣ်မးလီၤ. ၇ ဒီးတၢ်အၢၣ်တလိၣ်ကဒုဘၣ်အီၤ, ဒီးတၢ်အကလုၢ်သီၣ်လီၤ လၢတၢ်အၢၣ်အပူၤစံးဝဲဒၣ်, အဝဲတဂၤအံၤ မ့ၢ်ယဖိခွါလၢယအဲၣ်အီၤ, ကနၣ်အကလုၢ်တက့ၢ်. ၈ ဒီးကွၢ်တရံးတၢ်သတူၢ်ကလာ်, ဒီးတထံၣ်ဘၣ်ပှၤနီတဂၤဘၣ်. ထံၣ်ထဲယ့ၣ်ၡူးဒီးအကစၢ်ပှၢ်ဒၣ်ဝဲသ့ၣ်တဖၣ်န့ၣ်ဧိၤလီၤ. ၉ ဒီးအဝဲသ့ၣ်ဟဲက့ၤလီၤလၢကစၢၢ်လိၤအဖၢမုၢ်ဒီး, အဝဲဒၣ်မၤလိာ်အီၤ ဒ်သိးတၢ်လၢအထံၣ်ဝဲတဖၣ်န့ၣ်, မ့တမ့ၢ်ဘၣ်လၢပှၤကညီဖိခွါ ဂဲၤဆၢထၢၣ်က့ၤလၢ တၢ်သံအလီၢ်ခံဒီး, အသုတစံးဘၣ်တဲဘၣ်ပှၤနီတဂၤတဂ့ၤ. ၁၀ ဒီးတၢ်ကတိၤတဘီန့ၣ်, အဝဲသ့ၣ်ဟံးဃာ်လၢအကျါဒၣ်ဝဲ, ဒီးသံကွၢ်လိာ်အသး, တၢ်ဂဲၤဆၢထၢၣ်က့ၤလၢတၢ်သံန့ၣ်, မ့ၢ်အမ့ၢ်မနုၤလဲၣ်. ၁၁ ဒီးအဝဲသ့ၣ် သံကွၢ်အီၤဒီးစံးဝဲဒၣ်, ဘၣ်မနုၤ လၢပှၤကွဲးလံာ်စံးဝဲလၢ စီၤအ့ၤလံယၤဘၣ်ဟဲဆိလဲၣ်. ၁၂ ဒီးအဝဲဒၣ်စံးဆၢတၢ် ဒီးစံးဘၣ်အီၤ, စီၤအ့ၤလံယၤဟဲဆိဝဲသပှၢ်တၢၢ်ဒီးမၤက့ၤတၢ်ခဲလၢာ်လီၤ. ဒီးတၢ်ကွဲးအသးလၢပှၤကညီဖိခွါအံၤအဂ့ၢ်, လၢအကဘၣ်တၢ်အါမံၤ, ဒီးပှၤကမၤအီၤတရီတပါန့ၣ်ဒ်လဲၣ်. ၁၃ မ့မ့ၢ်ယစံးဘၣ်တဲဘၣ်သုလၢ စီၤအ့ၤလံယၤဟဲတုၤလံဝဲလံ. ဒီးဒ်တၢ်ကွဲးအသးလၢအဂ့ၢ်အသိးန့ၣ်, အဝဲသ့ၣ်မၤအီၤဖဲဒၣ်အသးလီၤ.
လါမ့ၤ ၂၁–၂၇
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | မၢ်ကူး ၁၁–၁၂
“မုၣ်ကမဲအဖှီၣ်အယာ်တဂၤ တ့ၢ်လီၤတၢ်အါန့ၢ်အဝဲသ့ၣ်ခဲလၢာ်”
(မၢ်ကူး ၁၂:၄၁, ၄၂) ဒီးယ့ၣ်ၡူးဆ့ၣ်နီၤသဃီၤဒီးစ့ပာ်ဖှိၣ်အလီၢ်, ဒီးကွၢ်ဝဲလၢပှၤဂီၢ်မုၢ်ခဲလၢာ်တ့ၢ်လီၤတိၢ်လၢ တၢ်ပာ်ဖှိၣ်အလီၢ်အပူၤလီၤ. ဒီးပှၤအထူးအတီၤအါဂၤတ့ၢ်လီၤဝဲလၢအအါလီၤ. ၄၂ ဒီးပှၤမုၣ်ကမဲအဖှီၣ်အယာ်တဂၤဟဲဝဲ, ဒီးတ့ၢ်လီၤကးခံဘ့ၣ်. လၢအမ့ၢ်တိၢ်တဘ့ၣ်လီၤ.
nwtsty တၢ်မၤနီၣ်တဖၣ်လၢ မၢ်. ၁၂:၄၁, ၄၂
စ့ပာ်ဖှိၣ်အလီၢ်– လၢပျၢၤပှၤယူဒၤဖိတဖၣ် စံးဝဲလၢစ့ပာ်ဖှိၣ်အလီၢ် မ့တမ့ၢ် တိၢ်မၤဘူၣ်ဒၢတဖၣ်န့ၣ် လီၤဂာ်ဒ်သိး ပံကွဲၤ မ့တမ့ၢ် တၢ်အနၢၤလၢ အပူၤအံၣ်အိၣ်ဝဲလၢအခိၣ်ထိးလီၤ. ပှၤကညီတဖၣ်လဲၤထၢနုာ်လီၤ တၢ်မၤဘူၣ်အကလုာ်ကလုာ်ဖဲန့ၣ်လီၤ. တကးဒံးဘၣ် ကြံးအတၢ်ကတိၤတဖျၢၣ်အံၤ ပထံၣ်အီၤဖဲ ယိၤဟၣ် ၈:၂၀ ဒီးဖဲန့ၣ် ပှၤကွဲးကျိာ်ထံအီၤလၢ “စ့ပာ်ဖှိၣ်” စ့ၢ်ကီးလီၤ. တၢ်လီၢ်အဝဲန့ၣ် ဖျါလၢအဲၣ်ဒိးစံးဝဲတၢ်လီၢ်တတီၤလၢ အိၣ်ဖဲပိာ်မုၣ်အဟံၣ်အဂၢၤပူၤလီၤ. (ကွၢ်တၢ်မၤနီၣ်လၢ မး. ၂၇:၆ ဒီး App. B11.) ပမ့ၢ်ကွၢ်လၢရၤဘံ အတၢ်ကွဲးနီၣ်တဖၣ်အပူၤန့ၣ် ပာ်ဖျါဝဲလၢ တိၢ်မၤဘူၣ်ဒၢ ၁၃ ဖျၢၣ်ဘၣ်တၢ်ပာ်လီၤအီၤဖဲ ဂၢၤအဂီၤပၤဒူၣ် အခီၣ်ထံးန့ၣ်လီၤ. စံးစ့ၢ်ကီးဝဲလၢ စ့ပာ်ဖှိၣ်အလီၢ်ခိၣ်သ့ၣ်အိၣ်ဝဲတဖျၢၣ်ဒီး တိၢ်မၤဘူၣ်လၢ တိၢ်မၤဘူၣ်ဒၢအပူၤတဖၣ်န့ၣ် ဘၣ်တၢ်က့ၤပာ်ဖှိၣ်က့ၤအီၤဖဲန့ၣ်လီၤ.
ကးခံဘ့ၣ်– မ့တမ့ၢ် စ့ခံဘ့ၣ် “လဲးတၤ (lepta) ခံဘ့ၣ် န့ၣ်ပှဲၤသိးဝဲဒီး ခွါဒြ့ၤ (quadrans) တဘ့ၣ်လီၤ.” ကြံးအတၢ်ကတိၤလၢအမ့ၢ် လဲးတၢၤ (le·ptonʹ) န့ၣ်အခီပညီမ့ၢ်ဝဲ တၢ်တမံၤမံၤလၢ ဆံးဆံးဖိဒီးဘူဘူဖိလီၤ. လဲးတၢၤ တဘ့ၣ်န့ၣ် ပှဲၤသိးသိးဒီး စ့ဒန့ၤရံၤတဘ့ၣ် ၁၂၈ ပူတပူ ဒီးမ့ၢ်စ့တိၢ်ဘီလၢ အဆံးကတၢၢ်လၢ ပှၤအံၣ်စရ့လးဖိတဖၣ် သူဝဲလီၤ. ကြံးအတၢ်ကတိၤ ခိၤဒြဲၣ် (ko·dranʹtes) (ဟဲလၢ လဲးတ့ၣ် အတၢ်ကတိၤ ခွါဒြ့ၤ) မ့ၢ်ဝဲရိမ့ၤအစ့တိၢ်ဘီတဘ့ၣ်လၢ အလုၢ်အပှ့ၤအိၣ်ဝဲ ထဲသိးဒီး စ့ဒန့ၤရံၤ ၆၄ ပူတပူလီၤ. ဖဲအံၤန့ၣ် စီၤမၢ်ကူး သူဝဲရိမ့ၤအစ့ ဒ်သိး ပှၤကနၢ်ပၢၢ်ထီၣ်ဝဲ စ့တဖၣ်လၢပှၤယူဒၤဖိတဖၣ်သူဝဲ အလုၢ်အပှ့ၤန့ၣ်လီၤ.—ကွၢ်လၢ Glossary, “Lepton,” ဒီး App. B14.
(မၢ်ကူး ၁၂:၄၃) ဒီးကိးန့ၢ်အပျဲၢ်အဘီၣ် ဆူအအိၣ်ဒီးစံးဘၣ်အီၤ, ယစံးဘၣ်သုတီတီ, လၢပှၤလၢ အတ့ၢ်လီၤတၢ်လၢ တၢ်ပာ်ဖှိၣ်အလီၢ်ပူၤန့ၣ်, ပှၤမုၣ်ကမဲအဖှီၣ်အယာ်တဂၤအံၤ, တ့ၢ်လီၤတၢ်အါန့ၢ် အဝဲသ့ၣ်ခဲလၢာ်တက့ၢ်လီၤ.
တၢး၉၇ ၁၀/၁၅ ကဘျံးပၤ ၁၆-၁၇ အဆၢ ၁၆-၁၇
ယဟိဝၤယွၤ ဘၣ်သူၣ်ဘၣ်သးဝဲ တၢ်လၢနမၤတၢ်လၢနသးဒီဖျၢၣ်
၁၆ ပူၤကွံာ်စှၤသီဝံၤအလီၢ်ခံ ကဘၣ်ဖဲလါနံစၣ် ၁၁ သီန့ၣ် ယ့ၣ်ၡူးအိၣ်လၢ တၢ်လုၢ်ဟံၣ်ပူၤ ဒီတနံၤ ဒီးဖဲန့ၣ်ပှၤဟဲသံကွၢ်အီၤ ဘၣ်ဃးဒီးအဝဲအတၢ်န့ၢ်စိန့ၢ်ကမီၤ ဒီးအဝဲစံးဆၢက့ၤဝဲ တၢ်သံကွၢ်ကီခဲတဖၣ်လၢ ဘၣ်ဃးဒီး တၢ်ဟ့ၣ်တၢ်ခိတၢ်သွဲ, တၢ်ဂဲၤဆၢထၢၣ်သမူထီၣ် ဒီးတၢ်ဂ့ၢ်အဂၤတဖၣ်လီၤ. အဝဲပာ်ဒ့ၣ်ပာ်ကမၣ် ပှၤဖၤရံၤၡဲဒီး ပှၤကွဲးလံာ်တဖၣ်လၢ တၢ်ဂ့ၢ်အါမံၤဒီး အကျါတခါန့ၣ် တဲဝဲလၢအဝဲသ့ၣ် “အီၣ်ကွံာ်ပှၤမုၣ်ကမဲအဟံၣ်,” ဃုာ်ဒီးတၢ်အဂုၤအဂၤတဖၣ်လီၤ. (မၢ်ကူး ၁၂:၄၀) ဝံၤဒီး လီၤဂာ်လၢယ့ၣ်ၡူး လဲၤဆ့ၣ်နီၤဝဲဒၣ်လၢ တၢ်လီၢ်တတီၤလၢ တၢ်လုၢ်ဟံၣ်ပူၤ, ဒီးဒ်ပှၤယူဒၤဖိ အလုၢ်အလၢ်အိၣ်ဝဲအသိး ပှၤပာ်လီၤ တိၢ်မၤဘူၣ်ဒၢ ၁၃ ဖျၢၣ်ဖဲန့ၣ်လီၤ. အဝဲဆ့ၣ်နီၤဝဲ ဖဲန့ၣ်အခါ ကွၢ်ဃီၤဝဲ ပှၤဟဲတ့ၢ်လီၤစ့လၢ တၢ်မၤဘူၣ်ဒၢတဖၣ်အပူၤလီၤ. ပှၤထူးပှၤတီၤအါဂၤ ဟဲဝဲ ဒီးတနီၤနီၤန့ၣ် ပာ်ဖျါအသး ဒ်ပှၤအတီအလိၤ ဒီးပာ်ဒိၣ်လီၤအသးန့ၣ်လီၤ. (ထိၣ်သတြီၤဒီး မးသဲ ၆:၂.) ယ့ၣ်ၡူး အမဲာ်ကွၢ်တၢ်လိၤဝဲဆူ မုၣ်ကမဲတဂၤအအိၣ်န့ၣ်လီၤ. ပှၤအဂၤတဖၣ် မ့ၢ်ကွၢ်ဝဲန့ၣ် အဝဲအတၢ်မၤဘူၣ်အံၤ အတၢ်လီၤဆီအိၣ်ဒ်လဲၣ်န့ၣ် တမ့ၢ်ကပာ်သူၣ်ပာ်သးဝဲဘၣ်. ဘၣ်ဆၣ် ယ့ၣ်ၡူးမ့ၢ်ပှၤတဂၤလၢ အသ့ၣ်ညါပှၤဂၤအသး ဒီးသ့ၣ်ညါဝဲလၢ အဝဲမ့ၢ် “ပှၤမုၣ်ကမဲအဖှီၣ်အယာ်” တဂၤလီၤ. အဝဲသ့ၣ်ညါစ့ၢ်ကီးဝဲလၢ မုၣ်ကမဲအံၤ အတၢ်ဟ့ၣ် အလုၢ်အပှ့ၤလၢအိၣ်ထဲ “ကးခံဘ့ၣ်, လၢအမ့ၢ်တိၢ်တဘ့ၣ်လီၤ.”—မၢ်ကူး ၁၂:၄၁, ၄၂.
၁၇ ယ့ၣ်ၡူး အဲၣ်ဒိးသိၣ်လိဝဲ အပျဲၢ်အဘီၣ်တဖၣ်အဃိ ကိးန့ၢ် အဝဲသ့ၣ်တဖၣ်ဆူအအိၣ် ဒ်သိး ကထံၣ်ဒီးကဟံးန့ၢ်တၢ်မၤလိအဂီၢ်လီၤ. ယ့ၣ်ၡူးစံးဝဲလၢ ပှၤမုၣ်ကမဲတဂၤအံၤ “တ့ၢ်လီၤတၢ်အါန့ၢ် အဝဲသ့ၣ်ခဲလၢာ်တက့ၢ်လီၤ.” ယ့ၣ်ၡူးထံၣ်ဝဲလၢ မုၣ်ကမဲအတိၢ်မၤဘူၣ်န့ၣ် အလုၢ်အပှ့ၤဒိၣ်န့ၢ်ဒံး ပမ့ၢ်ပာ်ဖှိၣ် ပှၤဂၤအတိၢ်မၤဘူၣ်ခဲလၢာ်ဒံးလီၤ. အဝဲဟ့ၣ်လီၤဝဲစ့ “ဖဲဒၣ်အတၢ်အိၣ်ဒီးအီၤခဲလၢာ်” လီၤ. မုၣ်ကမဲတဂၤအံၤမၤဝဲဒ်အံၤန့ၣ် မ့ၢ်ဒၣ်ပျဲဝဲ ယဟိဝၤယွၤ လၢကအံးထွဲကွၢ်ထွဲအီၤအဂီၢ်န့ၣ်လီၤ. တၢ်ဟ့ၣ်လၢ မုၣ်ကမဲတဂၤအံၤ ဟ့ၣ်ဝဲန့ၣ် ဖျါလၢအလုၢ်အပှ့ၤတအိၣ်လၢ ပှၤဂၤအဂီၢ်ဘၣ်. ဘၣ်ဆၣ် ယဟိဝၤယွၤ ထံၣ်ဝဲလၢ အတၢ်ဟ့ၣ်န့ၣ် အလုၢ်အပှ့ၤဒိၣ် ဒိၣ်နီၢ်မးလီၤ.—မၢ်ကူး ၁၂:၄၃, ၄၄; ယၤကိာ် ၁:၂၇.
(မၢ်ကူး ၁၂:၄၄) အဂ့ၢ်ဒ်အံၤ, အဝဲသ့ၣ်ခဲလၢာ်တ့ၢ်လီၤဝဲလၢအတၢ်ပှဲၤလုၢ်ကွံာ်န့ၣ်လီၤ. မ့မ့ၢ်ပိာ်မုၣ်တဂၤအံၤ, လၢအတၢ်တလၢဘၣ်အပူၤန့ၣ်, တ့ၢ်လီၤဖဲဒၣ်အတၢ်အိၣ်ဒီးအီၤခဲလၢာ်, လၢအမ့ၢ်အတၢ်လုၢ်အီၣ်လုၢ်အီအီၤခဲလၢာ်လီၤ.
တၢး၉၇ ၁၀/၁၅ ကဘျံးပၤ ၁၇ အဆၢ ၁၇
ယဟိဝၤယွၤ ဘၣ်သူၣ်ဘၣ်သးဝဲ တၢ်လၢနမၤတၢ်လၢနသးဒီဖျၢၣ်
၁၇ ယ့ၣ်ၡူး အဲၣ်ဒိးသိၣ်လိဝဲ အပျဲၢ်အဘီၣ်တဖၣ်အဃိ ကိးန့ၢ် အဝဲသ့ၣ်တဖၣ်ဆူအအိၣ် ဒ်သိး ကထံၣ်ဒီးကဟံးန့ၢ်တၢ်မၤလိအဂီၢ်လီၤ. ယ့ၣ်ၡူးစံးဝဲလၢ ပှၤမုၣ်ကမဲတဂၤအံၤ “တ့ၢ်လီၤတၢ်အါန့ၢ် အဝဲသ့ၣ်ခဲလၢာ်တက့ၢ်လီၤ.” ယ့ၣ်ၡူးထံၣ်ဝဲလၢ မုၣ်ကမဲအတိၢ်မၤဘူၣ်န့ၣ် အလုၢ်အပှ့ၤဒိၣ်န့ၢ်ဒံး ပမ့ၢ်ပာ်ဖှိၣ် ပှၤဂၤအတိၢ်မၤဘူၣ်ခဲလၢာ်ဒံးလီၤ. အဝဲဟ့ၣ်လီၤဝဲစ့ “ဖဲဒၣ်အတၢ်အိၣ်ဒီးအီၤခဲလၢာ်” လီၤ. မုၣ်ကမဲတဂၤအံၤမၤဝဲဒ်အံၤန့ၣ် မ့ၢ်ဒၣ်ပျဲဝဲ ယဟိဝၤယွၤ လၢကအံးထွဲကွၢ်ထွဲအီၤအဂီၢ်န့ၣ်လီၤ. တၢ်ဟ့ၣ်လၢ မုၣ်ကမဲတဂၤအံၤ ဟ့ၣ်ဝဲန့ၣ် ဖျါလၢအလုၢ်အပှ့ၤတအိၣ်လၢ ပှၤဂၤအဂီၢ်ဘၣ်. ဘၣ်ဆၣ် ယဟိဝၤယွၤ ထံၣ်ဝဲလၢ အတၢ်ဟ့ၣ်န့ၣ် အလုၢ်အပှ့ၤဒိၣ် ဒိၣ်နီၢ်မးလီၤ.—မၢ်ကူး ၁၂:၄၃, ၄၄; ယၤကိာ် ၁:၂၇.
တၢး၈၇ ၁၂/၁ ကဘျံးပၤ ၃၀ အဆၢ ၁
နဟ့ၣ်တၢ်န့ၣ် မ့ၢ်တၢ်ဟ့ၣ်လုၢ်ထီၣ်ဧါ
လၢတၢ်ကွဲးနီၣ်အံၤအပူၤ ပဟံးန့ၢ်တၢ်မၤလိသ့ဝဲအါမးလီၤ. အရ့ဒိၣ်ကတၢၢ်တခါန့ၣ် ပဝဲကိးဂၤဒဲး ပအိၣ်ဒီးတၢ်ခွဲးတၢ်ယာ်လၢ ပကသူတၢ်လၢအအိၣ်ဒီးပှၤတဖၣ် လၢတၢ်ဘူၣ်တၢ်ဘါအမ့ၢ်အတီအပူၤန့ၣ်လီၤ. ဘၣ်ဆၣ် တၢ်လၢကစၢ်ယွၤ ပာ်လုၢ်ပာ်ပှ့ၤဝဲန့ၣ် တမ့ၢ်ပဟ့ၣ်အီၤတၢ်လၢ အရ့တဒိၣ်လၢပဂီၢ်န့ၣ်ဘၣ်, ကဘၣ်မ့ၢ်ဝဲ တၢ်လၢပပာ်လုၢ်ပာ်ပှ့ၤအီၤတခါလီၤ. ပမ့ၢ်တဲအဂၤတမံၤန့ၣ် ပဟ့ၣ်အီၤတၢ်လၢ ပတလိၣ်လၢၤဘၣ်တခါဧါ မ့တမ့ၢ် ပဟ့ၣ်အီၤတၢ်လၢ ပဘၣ်တူၢ်ဆါသးနီၢ်နီၢ်တခါဧါ.
cl ကဘျံးပၤ ၁၈၅ အဆၢ ၁၅
တၢ်ကူၣ်သ့လၢ “ယွၤအကလုၢ်ကထါပူၤ”
၁၅ တၢ်တနံၤန့ၣ် ပှၤဟဲဝဲဆူ တၢ်လုၢ်ဟံၣ်ခဲလၢာ်အကျါ ဘၣ်တၢ်ဃုထၢထီၣ် မုၣ်ကမဲအံၤ ဒီးပာ်ဖျါထီၣ်အီၤလၢ လံာ်စီဆှံပူၤအဃိ တလီၤကမၢကမၣ်ဘၣ်ဧါ. ခီဖျိလၢတၢ်အဒိအံၤ ပသ့ၣ်ညါဘၣ်လၢ ယဟိဝၤန့ၣ်မ့ၢ် ယွၤလၢအသ့ၣ်ညါဆၢက့ၤ တၢ်ဘျုးတၢ်ဖှိၣ်တဂၤလီၤ. ပမ့ၢ်ထိၣ်သတြီၤကွၢ် ဒီးပှၤဂၤအတၢ်ဟ့ၣ်န့ၣ် ပှၤဟ့ၣ်တၢ်မ့ၢ်အါထဲလဲၣ်သနာ်က့ ကစၢ်ယွၤဘၣ်သူၣ်ဘၣ်သးဝဲ တၢ်လၢပဟ့ၣ်အီၤလၢပသးဒီဖျၢၣ်န့ၣ်လီၤ. ယဟိဝၤယွၤကသိၣ်လိပှၤ တၢ်မ့ၢ်တၢ်တီလၢ အလီၤသူၣ်မံသးမံအဂီၢ် ကျဲလၢအဂ့ၤန့ၢ်တၢ်အံၤ တအိၣ်လၢၤဘၣ်.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(မၢ်ကူး ၁၁:၁၇) ဒီးသိၣ်က့ၤသီက့ၤတၢ်ဒီးစံးဘၣ်အီၤ, တၢ်ကွဲးအသးလၢယဟံၣ်ကဘၣ်တၢ်ကိးအီၤလၢ တၢ်ဘါထုကဖၣ်အဟံၣ် လၢပှၤကိးကလုာ်ဒဲးအဂီၢ်န့ၣ်, တမ့ၢ်ဘၣ်ဧါ. မ့မ့ၢ်သုမၤအီၤလၢ တၢ်ဟုၣ်တၢ်ဘျၣ်အတၢ်ပူၤလီၤ.
nwtsty တၢ်မၤနီၣ်လၢ မၢ်. ၁၁:၁၇
တၢ်ဘါထုကဖၣ်အဟံၣ် လၢပှၤကိးကလုာ်ဒဲးအဂီၢ်– ပှၤကွဲးလံာ်တၢ်သးခုကစီၣ်သၢဂၤ ပာ်ဖျါဝဲ ယၡါယၤ ၅၆:၇ သနာ်က့ ထဲစီၤမၢ်ကူးတဂၤဧိၤ ကွဲးထၢနုာ်ဝဲ တၢ်ကတိၤလၢအမ့ၢ် “ပှၤကိးကလုာ်ဒဲး” လၢအဆၢဖိပူၤန့ၣ်လီၤ. (မး. ၂၁:၁၃; လူၤ. ၁၉:၄၆) တၢ်လုၢ်ဟံၣ်လၢ ယရူၤၡလ့ၣ်အပူၤန့ၣ် မ့ၢ်တၢ်ဘါထုကဖၣ်ဒီး တၢ်ဘူၣ်ထီၣ်ဘါထီၣ် ယဟိဝၤယွၤအလီၢ် လၢပှၤအံၣ်စရ့လးဖိ ဒီးကလုာ်ဂၤလၢအပျံၤယွၤသ့ၣ်တဖၣ် အဂီၢ်န့ၣ်လီၤ. (၁ စီၤ. ၈:၄၁-၄၃) ယ့ၣ်ၡူး သးဒိၣ်ထီၣ် ပှၤယူဒၤဖိတဖၣ်လၢ အပာ်ဝဲတၢ်လုၢ်ဟံၣ်လၢ တၢ်ဆါတၢ်ပှ့ၤဒီး တၢ်ဟုၣ်တၢ်ဘျၣ်အလီၢ်န့ၣ်လီၤ. တၢ်လၢအဝဲသ့ၣ်မၤဝဲတဖၣ်န့ၣ် ကဲထီၣ်တၢ်တြီမၤတံာ်တာ်လၢ ပှၤကိးကလုာ်ဒဲး ကဟဲဘူၣ်ထီၣ်ဘါထီၣ် ယဟိဝၤယွၤလၢ တၢ်ဃ့ထုကဖၣ်အဟံၣ်အဂီၢ်လီၤ. တကးဒံးဘၣ် မၤယံၤထီၣ်ပှၤဂၤ ဒီးကစၢ်ယွၤန့ၣ်လီၤ.
(မၢ်ကူး ၁၁:၂၇, ၂၈) ဒီးဟဲကဒီးဝဲဆူယရူၤၡလ့ၣ်, ဒီးဟးယဲၤယီၤဝဲလၢတၢ်လုၢ်အဟံၣ်ပူၤအဖၢမုၢ်ဒီး, ပှၤလုၢ်တၢ်အခိၣ်ဒီးပှၤကွဲးလံာ်ဒီး ပှၤသူၣ်က့သးပှၢ်သ့ၣ်တဖၣ်ဟဲဆူအအိၣ်, ဒီးစံးဘၣ်အီၤ, ၂၈ နမၤတၢ်တဖၣ်အံၤလၢ မတၤအစိအကမီၤလဲၣ်. ဒီးဒ်သိးနကမၤတၢ် တဖၣ်အံၤဒီး, မ့ၢ်မတၤဟ့ၣ်နစိနကမီၤအံၤတဂၤလဲၣ်.
jy ကဘျံးပၤ ၂၄၄ အဆၢ ၇
ချၢၣ်ဒၢတထံး ဘၣ်တၢ်သူအီၤလၢ ကသိၣ်လိပှၤဘၣ်ဃးဒီးတၢ်နာ်အဂ့ၢ်
တယံာ်ဘၣ် ယ့ၣ်ၡူးဒီးအပျဲၢ်အဘီၣ်တဖၣ် လဲၤဝဲဆူယရူၤၡလ့ၣ်လီၤ. ဒ်အလုၢ်အလၢ်အိၣ်ဝဲအသိး ယ့ၣ်ၡူးလဲၤနုာ်ဆူတၢ်လုၢ်ဟံၣ်ပူၤ ဒီးသိၣ်က့ၤသီက့ၤတၢ်လီၤ. မဟါတနံၤ ဖဲပှၤဒိးလဲစ့အလီၢ် ယ့ၣ်ၡူးမၤဝဲတၢ်မနုၤလဲၣ်န့ၣ် ပှၤလုၢ်တၢ်အဒိၣ် ဒီးပှၤသူၣ်က့သးပှၢ်တဖၣ် ကနီၣ်ဘၣ်က့ၤဝဲလီၤ. အဝဲသ့ၣ် သံကွၢ်ယ့ၣ်ၡူးလၢ “နမၤတၢ်တဖၣ်အံၤလၢ မတၤအစိအကမီၤလဲၣ်. ဒီးဒ်သိးနကမၤတၢ် တဖၣ်အံၤဒီး, မ့ၢ်မတၤဟ့ၣ်နစိနကမီၤအံၤတဂၤလဲၣ်.”—မၢ်ကူး ၁၁:၂၈.
တၢ်ဖးလံာ်စီဆှံ
(မၢ်ကူး ၁၂:၁၃-၂၇) ဒီးအဝဲသ့ၣ်တဖၣ်န့ၣ်, ဒ်သိးအကတုၢ်န့ၢ်အတၢ်ကတိၤဒီး, မၢလီၤပှၤဖၤရံၤၡဲဒီး ပှၤဟ့ၤရိာ်ဖိတနီၤနီၤ, လဲၤဆူအအိၣ်လီၤ. ၁၄ ဒီးဟဲဝဲဒီးစံးဘၣ်အီၤ, သရၣ်ဧၢ, ပသ့ၣ်ညါလၢနမ့ၢ်ပှၤအမ့ၢ်အတီ, ဒီးနတပျံၤဘၣ်ပှၤကညီနီတဂၤဘၣ်. အဂ့ၢ်ဒ်အံၤ, နတကွၢ်မဲာ်ပှၤကညီဘၣ်. မ့မ့ၢ်နသိၣ်တၢ်သီတၢ်လၢယွၤအကျဲနီၢ်နီၢ်လီၤ. ပဟ့ၣ်သွဲလၢ ကဲစၢ်မ့ၢ်အကြၢး, မ့ၢ်အတကြၢးဘၣ်လဲၣ်. မ့ၢ်ပဘၣ်ဟ့ၣ်, မ့ၢ်ပတဘၣ်ဟ့ၣ်ဘၣ်လဲၣ်. ၁၅ ဒီးအဝဲဒၣ်သ့ၣ်ညါ အတၢ်လီတၢ်ဝ့ၤ, ဒီးစံးဘၣ်အီၤ, ဘၣ်မနုၤလၢ သုလ့ပစီယၤလဲၣ်. ဟဲစိာ်န့ၢ်ယၤလၢစ့ဒန့ၤရံတဘ့ၣ်, ဒ်သိးယကထံၣ်ဘၣ်အီၤတက့ၢ်. ၁၆ ဒီးဟဲစိာ်ဝဲလီၤ. ဒီးစံးဘၣ်အီၤ, အအံၤမ့ၢ်မတၤအက့ၢ်အဂီၤ, ဒီးမ့ၢ်မတၤအတၢ်ကွဲးအိၣ်လၢအလိၤလဲၣ်. ဒီးအဝဲသ့ၣ်စံးဘၣ်အီၤ, ကဲစၢ်အဝဲလီၤ. ၁၇ ဒီးယ့ၣ်ၡူးစံးဆၢတၢ်ဒီးစံးဘၣ်အီၤ, ဟ့ၣ်ကဲစၢ်လၢကဲစၢ်အတၢ်, ဒီးယွၤလၢ ယွၤအတၢ်တက့ၢ်. ဒီးကမၢကမၣ်ဝဲတကူၢ်သ့ၣ်လၢအဃိလီၤ. ၁၈ ဒီးပှၤစးဒူၤကဲလၢအစံးဝဲ, တၢ်ဂဲၤဆၢထၢၣ်က့ၤတအိၣ်ဘၣ်န့ၣ်, ဟဲဆူအအိၣ်, ဒီးသံကွၢ်အီၤ, ဒီးစံးဝဲဒၣ်, ၁၉ သရၣ်ဧၢ, စီၤမိၤၡ့ကွဲးန့ၢ်ပှၤလၢပှၤတဂၤဂၤ အဒီပုၢ်ဝဲခွါမ့ၢ်သံသဒၣ်အမါဒီး အဖိတအိၣ်လီၤတဲာ်ဘၣ်ဒီး, အဒီပုၢ်ဝဲၢ်ခွါဘၣ်ဟံးန့ၢ်အမါ, ဒီးဒုးအိၣ်ထီၣ်န့ၢ်အဒီပုၢ်ဝဲၢ်ခွါအချံအသၣ်လီၤ. ၂၀ ပှၤဒီပုၢ်ဝဲၢ်ခွါအိၣ်နွံဂၤလီၤ. ဒီးအခီၣ်ထံးတဂၤဟံးန့ၢ်အမါ ဒီးသံဝဲ, ဒီးအချံအသၣ်တအိၣ်လီၤတဲာ်ဘၣ်ဝဲဘၣ်. ၂၁ ဒီးခံဂၤတဂၤန့ၣ်ဟံးန့ၢ်ပိာ်မုၣ်န့ၣ်ဒီးသံဝဲ, ဒီးအချံအသၣ်တအိၣ်လီၤတဲာ်စ့ၢ်ကီးဘၣ်. ဒ်န့ၣ်အသိး, သၢဂၤတဂၤလီၤ. ၂၂ ဒီးပှၤနွံဂၤန့ၣ်ဟံးန့ၢ်ပိာ်မုၣ်န့ၣ်ဒီး အချံအသၣ်တပာ်လီၤတဲာ်ဘၣ်လီၤ. ဒီးလၢပှၤခဲလၢာ်န့ၣ် အခံကတၢၢ် ပိာ်မုၣ်န့ၣ် သံစ့ၢ်ကီးဝဲလီၤ. ၂၃ မၤသးဒ်န့ၣ်ဒီးလၢတၢ်ဂဲၤဆၢထၢၣ်က့ၤအပူၤ, တုၤအဂဲၤဆၢထၢၣ်ဝဲဒီး, မ့ၢ်အကကဲဝဲလၢပှၤတဖၣ်န့ၣ်အမါ ဖဲလဲၣ်တဂၤလဲၣ်. အဂ့ၢ်ဒ်အံၤ, ပှၤနွံဂၤန့ၣ်န့ၢ်မါလၢ အီၤလီၤ. ၂၄ ဒီးယ့ၣ်ၡူးစံးဆၢတၢ်ဒီးစံးဘၣ်အီၤ, မ့ၢ်သုတသ့ၣ်ညါဘၣ်တၢ်ကွဲးအသး, ဒီးယွၤအစိအကမီၤဘၣ်သတးဒီး, သုနာ်ကမၣ်တၢ်, တမ့ၢ်ဘၣ်ဧါ. ၂၅ အဂ့ၢ်ဒ်အံၤ, တုၤအဂဲၤဆၢထၢၣ်က့ၤလၢတၢ်သံအပူၤဒီး, ပှၤတန့ၢ်မ်န့ၢ်ဝၤဘၣ်. မ့ၢ်အအိၣ်ဝဲဒ်ယွၤအကလူးတဖၣ်လၢ မူခိၣ်အသိးန့ၣ်လီၤ. ၂၆ ဒီးတၢ်လၢ ပှၤသံအဂ့ၢ်အကျိၤလၢအကဂဲၤဆၢထၢၣ်က့ၤန့ၣ်, မ့ၢ်သုတဖးဘၣ်လၢစီၤမိၤၡ့အလံာ်ပူၤ, ဖဲယွၤစံးဘၣ်အီၤလၢသ့ၣ် တၤဆှုၣ်တခိၣ် အပူၤဘၣ်ဧါ. တၢ်လၢယၤအံၤယမ့ၢ် စီၤအၤဘြၤဟၣ် အကစၢ်, ဒီးစီၤအံၤစဲးအကစၢ်, ဒီးစီၤယၤကိာ်အကစၢ်လီၤ. ၂၇ အဝဲဒၣ်န့ၣ်တမ့ၢ်ဘၣ် ပှၤသံအကစၢ်ဘၣ်, မ့ၢ်ပှၤမူအကစၢ်လီၤ. မၤသးဒ်န့ၣ်ဒီး, သုနာ်ကမၣ်တၢ်ယိာ်မးလီၤ,
လါမ့ၤ ၂၈–လါယူၤ ၃
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | မၢ်ကူး ၁၃–၁၄
“ဟးဆှဲးပျံၤသကွီၤလၢ အမ့ၢ်တၢ်ပျံၤပှၤကညီ”
(မၢ်ကူး ၁၄:၂၉) ဒီးစီၤပ့းတရူးစံးဘၣ်အီၤ, ပှၤအသး မ့ၢ်ဟးဂီၤလၢနဃိခဲလၢာ်ဘၣ်ဆၣ်ဒီး, ယသးတဟးဂီၤဘၣ်.
(မၢ်ကူး ၁၄:၃၁) ဒီးအဝဲဒၣ်ကတိၤတၢ်ဆူၣ်န့ၢ် အန့ၣ်တက့ၢ်, ယမ့ၢ်ဘၣ်သံဃုာ်နာ်သက့ဒီးနၤဒီး, ယတသမၢဘၣ်နၤဘၣ်. ဒီးအဝဲသ့ၣ်ခဲလၢာ်စံးစ့ၢ်ကီးဝဲဒ်န့ၣ်အသိးလီၤ.
(မၢ်ကူး ၁၄:၅၀) ဒီးပှၤခဲလၢာ်န့ၣ်လဲၤသဒၣ်အီၤ, ဒီးဃ့ၢ်ထီၣ်ကွံာ်ဝဲလီၤ.
(မၢ်ကူး ၁၄:၄၇) ဒီးပှၤဆၢထၢၣ်ဖဲန့ၣ်အကျါတဂၤဘ့ၣ်ထီၣ်အနး, ဒီးကျီပှၤလုၢ်တၢ်အခိၣ်အခ့အပှၤတဂၤ, ဒီးအနၢ်တူာ်ကွံာ်တခီလီၤ.
(မၢ်ကူး ၁၄:၅၄) ဒီးစီၤပ့းတရူးပိာ်ထီၣ်စိ အခံပၢၢ်လၢ ပှၤလုၢ်တၢ်အခိၣ်အဂၢၤပူၤ, ဒီးဆ့ၣ်နီၤဝဲအိၣ်ဒီးတၢ်အခ့အပှၤ, ဒီးဆူးမ့ၣ်အူလီၤ.
(မၢ်ကူး ၁၄:၆၆-၇၂) ဒီးစီၤပ့းတရူးအိၣ်ဝဲလၢလာ်ခီလၢ ဂၢၤပူၤအဖၢမုၢ်ဒီး, ပှၤလုၢ်တၢ်အခိၣ် အခ့အပှၤပိာ်မုၣ်တဂၤဟဲဝဲ, ၆၇ ဒီးထံၣ်စီၤပ့းတရူး ဆူးမ့ၣ်အူ, ဒီးကွၢ်ဝဲလီၤတံၢ်လီၤဆဲး ဒီးစံးဝဲဒၣ်, နဲဒၣ်အံၤနအိၣ်တ့ၢ်ဒီးပှၤနစၤရ့းဖိ ယ့ၣ်ၡူးစ့ၢ်ကီးလီၤ. ၆၈ ဒီးအဝဲဒၣ်သမၢဝဲဒီးစံးဝဲဒၣ်, ယတသ့ၣ်ညါဘၣ်, ဒီးနကတိၤတၢ်န့ၣ်ယနၢ်တပၢၢ်ဘၣ်. ဒီးဟးထီၣ်ဝဲဆူဂၢၤလၢခိ, ဒီးဆီဖါအိၣ်အိထီၣ်ဝဲလီၤ. ၆၉ ဒီးအခ့အပှၤပိာ်မုၣ်ထံၣ်ကဒီးအီၤ, ဒီးစံးဘၣ်ပှၤလၢအဆၢထၢၣ် လၢအဃၢၤတဖၣ်န့ၣ်, အဝဲတဂၤအံၤအိၣ်တ့ၢ်လၢပှၤတဖၣ်န့ၣ်အကျါလီၤ. ဒီးအဝဲဒၣ်သမၢကဒီးဝဲလီၤ. ၇၀ ဒီးတစိၢ်ဖိပူၤကွံာ်ဒီး, ပှၤဆၢထၢၣ်လၢအဃၢၤတဖၣ်န့ၣ် စံးဘၣ်ကဒီးစီၤပ့းတရူး, နဲဒၣ်အံၤ, နဘၣ်ဃးဒီးအဝဲသ့ၣ်တဖၣ်န့ၣ်သပှၢ်တၢၢ်လီၤ. အဂ့ၢ်ဒ်အံၤ, နမ့ၢ်စ့ၢ်ကီးပှၤကၤလံၤလါဖိ, ဒီးနကလုၢ်လီၤပလိာ်ဝဲန့ၣ်လီၤ. ၇၁ ဒီးအဝဲဒၣ်ဆိၣ်အၢဆိၣ်သီတၢ်, ဒီးဆိၣ်လီၤအသးလၢယတသ့ၣ်ညါဘၣ်ပှၤလၢ သုစံးတဂၤန့ၣ်ဘၣ်. ၇၂ ဒီးဆီဖါ အိၣ်အိထီၣ်တကီၢ်ခါခံစုတစုလီၤ. ဒီးစီၤပ့းတရူး သ့ၣ်နီၣ်ထီၣ်က့ၤအသး, လၢတၢ်ကတိၤတထံၣ်လၢ ယ့ၣ်ၡူးစံးတ့ၢ်အီၤလၢ ဆီဖါတချုးအိၣ်အိထီၣ်ဒံးဘၣ်ခံစုဒီး, နကသမၢယၤသၢစုလီၤ. ဒီးဆိကမိၣ်ထီၣ်ဝဲ, ဒီးဟီၣ်ဝဲလီၤ.
အဝဲမၤလိ တၢ်ပျၢ်တၢ်ကမၣ်လၢ အသရၣ်အအိၣ်
၁၄ စီၤပ့းတရူး ခါထီၣ်အခီၣ်ဆူညါလၢ တၢ်ပလီၢ်သူၣ်ပလီၢ်သးအပူၤ ဒီးလဲၤဝဲဆူ ဟံၣ်လီၤဘီလီၤမုၢ်တဖျၢၣ်လၢ ဝ့ၢ်ယရူၤၡလ့ၣ်အပူၤလီၤ. မ့ၢ်ဒၣ်ပှၤဒိၣ်ပှၤပှၢ် စီၤကၤယါဖၤအဟံၣ်လီၤ. အဝဲမ့ၢ်ပှၤလုၢ်တၢ်အခိၣ်ဒီး အဟံၣ်န့ၣ်အိၣ်ဒီးတၢ်ပျီလၢ အဘၣ်တၢ်ကရၢၢ်ဃာ်အီၤန့ၣ်လီၤ. စီၤပ့းတရူး ဆၢထၢၣ်ဝဲလၢ တၢ်ချၢလၢပဲတြီအဃၢၤဘၣ်ဆၣ် ပှၤတပျဲနုာ်အီၤဘၣ်. မ့မ့ၢ်စီၤယိၤဟၣ်န့ၣ် သ့ၣ်ညါလိာ်အသးဒီး ပှၤလုၢ်တၢ်အခိၣ်အဃိ နုာ်လီၤပာ်စၢၤလၢ စီၤပ့းတရူးအမဲာ်ညါလံ. အဝဲက့ၤဟးထီၣ်က့ၤဝဲဒီး ကတိၤတၢ်ဒီး ပိာ်မုၣ်လၢအပၢၤပဲတြီတဂၤအံၤ ဒ်သိးစီၤပ့းတရူးနုာ်လီၤဝဲကန့ၢ်အဂီၢ်လီၤ. ဖျါလၢစီၤပ့းတရူး တလဲၤတပူၤဃီဒီး စီၤယိၤဟၣ်ဘၣ်. ဒီးအဝဲတကျဲးစၢးနုာ်လီၤလၢဟံၣ်ပူၤ ဒ်သိးကဆၢထၢၣ်ဂၢၢ်ကျၢၤလၢ အသရၣ်အအိၣ်တခီဘၣ်. လၢမုၢ်နၤခီန့ၣ် အဝဲအိၣ်တီၢ်လၢတၢ်ပျီပူၤ လၢတၢ်ဂိၢ်ကျါ, ဒီးအဝဲဆၢထၢၣ်ဆူးမ့ၣ်အူဃုာ်ဒီး တၢ်အခ့အပှၤဒီးကုၢ်တဖၣ်လီၤ. ဖဲန့ၣ်န့ၣ် အဝဲထံၣ်ဘၣ်ဝဲ ပှၤအုၣ်အသးကဘျံးကဘျၣ်တဖၣ် ဟဲနုာ်ဟးထီၣ်ဝဲတဘျုးဂၤညါလီၤ.—မၢ်ကူး ၁၄:၅၄-၅၇; ယိၤဟၣ် ၁၈:၁၅, ၁၆, ၁၈.
it-2 ကဘျံးပၤ ၆၁၉ အဆၢ ၆
စီၤပ့းတရူး
အပျဲၢ်အဘီၣ် အဂၤတဂၤလဲၤပိာ်ထွဲပှၤခံဆူ ပှၤလုၢ်တၢ်အခိၣ်အဟံၣ်လီၤ. ခီဖျိလၢအဝဲအတၢ်မၤစၢၤအဃိ စီၤပ့းတရူးလဲၤနုာ်လီၤဆူကရၢၢ်ပူၤသ့ဝဲလီၤ. (ယိၤ. ၁၈:၁၅, ၁၆) စီၤပ့းတရူးတအိၣ်လၢ တၢ်ခံးကျါဘၣ်, ဒီးဟဲဆူးမ့ၣ်အူဒီးပှၤဂၤလီၤ. လၢမ့ၣ်အူအတၢ်ကပီၤအဃိ ပှၤအဂၤတဖၣ်ကွၢ်နီၣ်အီၤဘၣ် ဒီးသ့ၣ်ညါလၢ အဝဲမ့ၢ်ယ့ၣ်ၡူးအတံၤသကိးလီၤ. တကးဒံးဘၣ် အဝဲကတိၤတၢ်သီၣ် ဒ်ပှၤကၤလံၤလါဖိတဖၣ်စ့ၢ်ကီးလီၤ. ပှၤကွၢ်အီၤလီၤဂာ်လၢ ယ့ၣ်ၡူးအတံၤသကိးအဃိ အဝဲသမၢကွံာ်ဝဲယ့ၣ်ၡူးသၢဘျီလီၤ. လၢခံကတၢၢ်တဘျီန့ၣ် အဝဲဆိၣ်လီၤအသးလၢ အတသ့ၣ်ညါယ့ၣ်ၡူးဘၣ်လီၤ. ဖဲဝ့ၢ်ပူၤ ဆီဖါအိၣ်အိထီၣ် ခံဘျီတဘျီအခါ ယ့ၣ်ၡူး “ဃၣ်ဃီၤအသးဒီးကွၢ်စီၤပ့းတရူးလီၤ.” ဖဲန့ၣ်အခါ စီၤပ့းတရူး ဟးထီၣ်လၢတၢ်ချၢ ဒီးဟီၣ်ဟ့သးဝဲလီၤ. (မး. ၂၆:၆၉-၇၅; မၢ်. ၁၄:၆၆-၇၂; လူၤ. ၂၂:၅၄-၆၂; ယိၤ. ၁၈:၁၇, ၁၈; ကွၢ် COCKCROWING; OATH.) ဘၣ်ဆၣ် မ့ၢ်လၢယ့ၣ်ၡူး ဃ့ဘါထုကဖၣ်တ့ၢ်တၢ်လၢ စီၤပ့းတရူးအဂီၢ်အဃိ စီၤပ့းတရူးအတၢ်နာ် တလီၤမၢ်ကွံာ်ဝဲခဲလၢာ်ဘၣ်.—လူၤ. ၂၂:၃၁, ၃၂.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(မၢ်ကူး ၁၄:၅၁, ၅၂) ဒီးပှၤဖိၣ်သၣ်ခွါတဂၤပိာ်အဝဲဒၣ်အခံ, ဒီးကူထဲယၣ်ဖှီဝါကဆှၣ်တဘ့ၣ်ဧိၤလီၤ. ဒီးတၢ်အခ့အပှၤတဖၣ်ဟံးဃာ်အီၤ, ၅၂ ဒီးအဝဲဒၣ်ညိကွံာ်အယၣ်န့ၣ်, ဒီးဃ့ၢ်ထီၣ်ကွံာ်အိၣ်ဘ့ၣ်ဆ့လၢအဝဲသ့ၣ်အအိၣ်လီၤ.
တၢး၀၈ ၂/၁၅ ကဘျံးပၤ ၃၀ အဆၢ ၆
လံာ်စီဆှံ အတၢ်ပာ်ဖျါလၢ လံာ်မၢ်ကူး
၁၄:၅၁, ၅၂—ပှၤဖိၣ်သၣ်ပိာ်ခွါလၢ “ဃ့ၢ်ထီၣ်ကွံာ်အိၣ်ဘ့ၣ်ဆ့” တဂၤန့ၣ်ကမ့ၢ်မတၤလဲၣ်. ခီဖျိလၢစီၤမၢ်ကူးပာ်ဖျါ တၢ်ကဲထီၣ်သးအံၤန့ၣ်ထဲအီၤတဂၤလီၤအဃိ ပနာ်သ့လၢအဝဲတဲလီၤ အနီၢ်ကစၢ်သးန့ၣ်လီၤ.
(မၢ်ကူး ၁၄:၆၀-၆၂) ဒီးပှၤလုၢ်တၢ်အခိၣ် ဂဲၤဆၢထၢၣ်လၢ တၢ်သးကံၢ်ပူၤ, ဒီးသံကွၢ်ယ့ၣ်ၡူး,ဒီးစံးဝဲဒၣ်, နတစံးဆၢဘၣ်တၢ် နီတမံၤဘၣ်ဧါ. အဝဲသ့ၣ်တဖၣ်အံၤ အုၣ်အသးထီဒါနၤလၢ မနုၤလဲၣ်. ၆၁ ဒီးအိၣ်ဝဲဘှီၣ်ကလာ်, ဒီးတကတိၤဆၢဘၣ် တၢ်နီတမံၤဘၣ်. ဒီးပှၤလုၢ်တၢ်အခိၣ် သံကွၢ်ကဒီးအီၤ, ဒီးစံးဘၣ်အီၤ, နမ့ၢ်ခရံာ်, တၢ်ဘၣ်ဆိၣ်ဂ့ၤတဂၤ အဖိခွါန့ၣ်ဧါ. ၆၂ ဒီးယ့ၣ်ၡူးစံးဝဲဒၣ်, ယမ့ၢ်လီၤ. ဒီးသုကထံၣ်ပှၤကညီဖိခွါအံၤဆ့ၣ်နီၤလၢတၢ်အစိ အကမီၤအစုထွဲတခီ, ဒီးဟဲလီၤဝဲအိၣ်ဒီး မူခိၣ်အတၢ်အၢၣ်တဖၣ်လီၤ.
jy ကဘျံးပၤ၂၈၇ အဆၢ ၄
ယ့ၣ်ၡူး ဘၣ်တၢ်လဲၤကိးအီၤဆူ စီၤအၣ်နၣ်အအိၣ်, ဒီးလၢခံ စီၤကၤယါဖၤအအိၣ်
စီၤကၤယါဖၤ သ့ၣ်ညါဝဲလၢ ပှၤတဂၤဂၤ မ့ၢ်တဲလီၤအသးလၢ အမ့ၢ်ယွၤအဖိခွါန့ၣ် ပှၤယူဒၤဖိတဖၣ် အသးဒိၣ်ထီၣ်တၢ်ဒိၣ်မးလီၤ. ဖဲယ့ၣ်ၡူး ကိးကစၢ်ယွၤလၢ ပၢ်အခါ ပှၤယူဒၤဖိတဖၣ် စံးဝဲလၢအဝဲ “ပာ်အသးထဲသိးဒီးယွၤ.” အဃိအဲၣ်ဒိးမၤသံအီၤလီၤ. (ယိၤဟၣ် ၅:၁၇, ၁၈; ၁၀:၃၁-၃၉) စီၤကၤယါဖၤ သ့ၣ်ညါဝဲတၢ်ဂ့ၢ်အံၤအဃိ သံကွၢ်ဝဲယ့ၣ်ၡူးလၢ “နမ့ၢ်ယွၤအဖိခွါခရံာ်ဧါ, တမ့ၢ်ဘၣ်လဲၣ်န့ၣ်, ဒ်သိးနကစံးဘၣ်ပှၤဒီး, ယမၢနဆိၣ်တၢ်လၢယွၤလၢ အမူဝဲအမဲာ်ညါလီၤ.” (မးသဲ ၂၆:၆၃) လၢအပူၤကွံာ် ယ့ၣ်ၡူးအၢၣ်လီၤတ့ၢ်ဝဲလၢ အဝဲမ့ၢ် ယွၤအဖိခွါလီၤ. (ယိၤဟၣ် ၃:၁၈; ၅:၂၅; ၁၁:၄) ခဲအံၤတဘျီ အဝဲမ့ၢ်တအၢၣ်လီၤဝဲန့ၣ် ကဖျါလၢအဝဲဂ့ၢ်လိာ်ကွံာ်ဝဲလၢ အမ့ၢ်ယွၤအဖိခွါ, ခရံာ်န့ၣ်လီၤ. အဃိ ယ့ၣ်ၡူးစံးဝဲလၢ “ယမ့ၢ်လီၤ. ဒီးသုကထံၣ်ပှၤကညီဖိခွါအံၤ ဆ့ၣ်နီၤလၢတၢ်အစိအကမီၤအစုထွဲတခီ, ဒီးဟဲလီၤဝဲအိၣ်ဒီးမူခိၣ်အတၢ်အၢၣ်တဖၣ်လီၤ.”—မၢ်ကူး ၁၄:၆၂.
တၢ်ဖးလံာ်စီဆှံ
(မၢ်ကူး ၁၄:၄၃-၅၉) ဒီးတကီၢ်ခါ, ဖဲအကတိၤတၢ်အဖၢမုၢ်ဒီး, ပှၤလၢတဆံခံဂၤန့ၣ်အကျါ, စီၤယူဒၤအံၣ်စကၤရံၤအိာ်တဂၤ, ဟဲတုၤဝဲဒီးပှၤဂီၢ်မုၢ်ဖးဒိၣ်, အိၣ်ဒီးနး, ဒီးနီၣ်တီၢ်တဖၣ်, လၢပှၤလုၢ်တၢ်အခိၣ်ဒီးပှၤကွဲးလံာ်ဒီး ပှၤသူၣ်က့သးပှၢ်အအိၣ်လီၤ. ၄၄ ဒီးပှၤလၢပှၤဟ့ၣ်လီၤကွံာ်အီၤတဂၤန့ၣ်, ဟ့ၣ်တၢ်ပနီၣ်တမံၤလၢ ပှၤတဖၣ်န့ၣ်, ဒီးစံးဝဲဒၣ်, ဖဲဒၣ်ပှၤလၢယနၢမူအီၤတဂၤန့ၣ်, မ့ၢ်အဝဲဒၣ်လီၤ. ဟံးဃာ်ဒီး က့ၤစိာ်အီၤကျၢၤကျၢၤတက့ၢ်. ၄၅ ဒီးဟဲတုၤဝဲဒီး, လဲၤတကီၢ်ခါဆူအအိၣ်, ဒီးစံးဝဲဒၣ်, ရၤဘံဧၢ, ရၤဘံဧၢ, ဒီးနၢမူအီၤလီၤ. ၄၆ ဒီးအဝဲသ့ၣ်တဖၣ်န့ၣ်ပာ်ထီၣ်အစုလၢအလိၤ, ဒီးဟံးဃာ်အီၤလီၤ. ၄၇ ဒီးပှၤဆၢထၢၣ်ဖဲန့ၣ်အကျါတဂၤဘ့ၣ်ထီၣ်အနး, ဒီးကျီပှၤလုၢ်တၢ်အခိၣ်အခ့အပှၤတဂၤ, ဒီးအနၢ်တူာ်ကွံာ်တခီလီၤ. ၄၈ ဒီးယ့ၣ်ၡူးကတိၤဆၢတၢ်ဒီးစံးဘၣ်အီၤ, သုဟဲဖီၣ်န့ၢ်ယၤဒ်တၢ်ဘျၣ်အသိး, အိၣ်ဒီးနးဒီးနီၣ်တီၢ်တဖၣ်န့ၣ်ဧါ. ၄၉ ယအိၣ်လၢသုကျါဒီးသိၣ်က့ၤသီက့ၤတၢ်လၢ တၢ်လုၢ်ဟံၣ်ပူၤ သ့သ့တနံၤ,ဒီးသုတဟံးဃာ်ဘၣ်ယၤဘၣ်. ဘၣ်ဆၣ်ဒီးမ့ၢ်ဒ်သိးတၢ်ကွဲးအသးတဖၣ် ကလၢထီၣ်ပှဲၤထီၣ်လီၤ. ၅၀ ဒီးပှၤခဲလၢာ်န့ၣ်လဲၤသဒၣ်အီၤ, ဒီးဃ့ၢ်ထီၣ်ကွံာ်ဝဲလီၤ. ၅၁ ဒီးပှၤဖိၣ်သၣ်ခွါတဂၤပိာ်အဝဲဒၣ်အခံ, ဒီးကူထဲယၣ်ဖှီဝါကဆှၣ်တဘ့ၣ်ဧိၤလီၤ. ဒီးတၢ်အခ့အပှၤတဖၣ်ဟံးဃာ်အီၤ, ၅၂ ဒီးအဝဲဒၣ်ညိကွံာ်အယၣ်န့ၣ်, ဒီးဃ့ၢ်ထီၣ်ကွံာ်အိၣ်ဘ့ၣ်ဆ့လၢအဝဲသ့ၣ်အအိၣ်လီၤ. ၅၃ ဒီးဆှၢထီၣ်ယ့ၣ်ၡူးဆူ ပှၤလုၢ်တၢ်အခိၣ် အအိၣ်လီၤ. ဒီးပှၤလုၢ်တၢ်အခိၣ်ခဲလၢာ်, ဒီးပှၤသူၣ်က့သးပှၢ်, ဒီးပှၤကွဲးလံာ်သ့ၣ်တဖၣ်, ဟဲအိၣ်ဖှိၣ်လၢအအိၣ်လီၤ. ၅၄ ဒီးစီၤပ့းတရူးပိာ်ထီၣ်စိ အခံပၢၢ်လၢ ပှၤလုၢ်တၢ်အခိၣ်အဂၢၤပူၤ, ဒီးဆ့ၣ်နီၤဝဲအိၣ်ဒီးတၢ်အခ့အပှၤ, ဒီးဆူးမ့ၣ်အူလီၤ. ၅၅ ဒီးပှၤလုၢ်တၢ်အခိၣ်တဖၣ်, ဒီးပှၤသးပှၢ်အတၢ်အိၣ်ဖှိၣ်ခဲလၢာ် ဃုပှၤအုၣ်အသး ထီဒါယ့ၣ်ၡူး, ဒ်သိးအကမၤသံအီၤလီၤ. ဒီးတထံၣ်န့ၢ်ဘၣ်ဝဲဘၣ်. ၅၆ အဂ့ၢ်ဒ်အံၤ, ပှၤအုၣ်အသးလၢ တၢ်ကဘျံးကဘျၣ် ထီဒါအီၤအါဂၤဘၣ်ဆၣ်ဒီး, အတၢ်ကတိၤတလီၤပလိၣ်ဘၣ်. ၅၇ ဒီးပှၤတနီၤနီၤဂဲၤဆၢထၢၣ်, ဒီးအုၣ်အသးလၢတၢ်ကဘျံးကဘျၣ်ထီဒါအီၤ, ဒီးစံးဝဲဒၣ်, ၅၈ ပနၢ်ဟူပှၤတဂၤအံၤစံးဝဲ, သါကမၤလီၤပှီၢ်ကွံာ်တၢ်လုၢ်အဟံၣ်အံၤ,လၢတၢ်မၤဝဲလၢစု, ဒီးသၢနံၤအတီၢ်ပူၤန့ၣ်, သါကမၤထီၣ်အဂၤတဖျၢၣ်, လၢတၢ်တမၤဘၣ်လၢစုဘၣ်လီၤ. ၅၉ ဒီးဒ်န့ၣ်အသိးဒၣ်လဲာ် အဝဲသ့ၣ်အတၢ်ကတိၤ တလီၤပလိာ်စ့ၢ်ကီးဘၣ်.