ကုၢ်လၢအကလုၢ်တီ ဒီးအကူၣ်တၢ်သ့န့ၣ် မ့ၢ်မတၤလဲၣ်

တချုးယ့ၣ်ၡူးသံအခါ အဝဲတဲသကိးတၢ်ဒီး အပျဲၢ်အဘီၣ် လွံၢ်ဂၤလၢအမ့ၢ် စီၤပ့းတရူး, စီၤယၤကိာ်, စီၤယိၤဟၣ်, ဒီးစီၤအၣ်ဒရ့းလီၤ. ဖဲယ့ၣ်ၡူးတဲဖျါထီၣ်ဝဲ အတၢ်ဟဲက့ၤလၢ မုၢ်နံၤခံကတၢၢ်အတၢ်ပနီၣ်အခါန့ၣ်, ကစၢ်သံကွၢ်ဝဲ တၢ်သံကွၢ်အရ့ဒိၣ်တခါအံၤလီၤ– “မၤသးဒ်န့ၣ်ဒီး တၢ်အကုၢ်အပှၤလၢ အကလုၢ်တီ, ဒီးအကူၣ်တၢ်သ့, လၢကစၢ်ပာ်ထီၣ်အီၤလၢ အပှၤဟံၣ်ဖိအခိၣ်, ဒ်သိးအကဒုးအီၣ်ဒုးအီအတၢ်လၢ အဆၢအကတီၢ်ဘၣ်န့ၣ်, မ့ၢ်မတၤလဲၣ်.” (မးသဲ ၂၄:၃, ၄၅; မၢ်ကူး ၁၃:၃, ၄) ယ့ၣ်ၡူး ဒုးနာ်န့ၢ်အပျဲၢ်အဘီၣ်တဖၣ်အံၤလၢ ဒ်အဝဲမ့ၢ် “ကစၢ်” အသိး အဝဲကပာ်ထီၣ် ပှၤလၢအကကတဲာ်ကတီၤ နီၢ်သးအတၢ်အီၣ်လၢ အပျဲၢ်အဘီၣ်တဖၣ်အဂီၢ်ဖဲ မုၢ်နံၤခံကတၢၢ်အတီၢ်ပူၤန့ၣ်လီၤ. ကုၢ်အဝဲအံၤကမ့ၢ်မတၤလဲၣ်.

ကုၢ်အဝဲအံၤမ့ၢ် ယ့ၣ်ၡူးအပျဲၢ်အဘီၣ်လၢ ဘၣ်တၢ်ဒိးဖှူအီၤလၢ သးစီဆှံအကျါစှၤဂၤတကရူၢ်လီၤ. “ကုၢ်” န့ၣ်မ့ၢ်ဝဲယဟိဝၤပှၤအုၣ်အသးတဖၣ် အပှၤပၢဆှၢတၢ်ကမံးတံာ်လီၤ. ကမံးတံာ်အဝဲအံၤ နီၤလီၤနီၢ်သးအတၢ်အီၣ်တၢ်အီ ဘၣ်ဆၢဘၣ်ကတီၢ်ဆူ ပှၤတဖၣ်လၢအဘူၣ်ထီၣ်ဘါထီၣ် ယဟိဝၤယွၤန့ၣ်လီၤ. ပဝဲသ့ၣ်တဖၣ်န့ၣ် ပသန့ၤပသးလၢ ကုၢ်လၢအကလုၢ်တီလၢ အကဒုးအီၣ်ပှၤတၢ်အီၣ် “ဖဲအဆၢအကတီၢ်ဘၣ်န့ၣ်” လီၤ.—လူၤကၣ် ၁၂:၄၂.

ကုၢ်အဝဲအံၤ တီခိၣ်ရိၣ်မဲ ယွၤအပှၤဟံၣ်ဖိလီၤ. (၁ တံၤမသ့း ၃:၁၅) ယ့ၣ်ၡူးဟ့ၣ်တ့ၢ်ဝဲကုၢ်အံၤ မူဒါအရ့ဒိၣ်လၢ ကဘၣ်တီခိၣ်ရိၣ်မဲ ယဟိဝၤယွၤအတၢ်ကရၢကရိ အတၢ်ဖံးတၢ်မၤလၢဟီၣ်ခိၣ်ချၢန့ၣ်လီၤ. ကုၢ်အဝဲအံၤကဘၣ်ကွၢ်ထွဲဝဲ ယဟိဝၤယွၤအတၢ်ကရၢကရိ အတၢ်စုလီၢ်ခီၣ်ခိၣ်, နဲၣ်လိတၢ်စံၣ်တဲၤတဲလီၤတၢ်မၤ, ဒီးသိၣ်လိပှၤခီဖျိလၢပတၢ်အိၣ်ဖှိၣ်လီၤ. ဒ်သိးကဟ့ၣ်ပှၤတၢ်လၢပလိၣ်ဘၣ်တဖၣ် ဖဲပလိၣ်ဘၣ်အီၤအဆၢကတီၢ်န့ၣ် “ကုၢ်လၢအကလုၢ်တီဒီးအကူၣ်တၢ်သ့” အံၤထုးထီၣ်ရၤလီၤန့ၢ်ပှၤ နီၢ်သးအတၢ်အီၣ်ခီဖျိ လံာ်လဲၢ်တဖၣ်လၢပသူအီၤလၢ ပတၢ်သးခုကစီၣ်တၢ်မၤအပူၤ, ဒီးတၢ်ရဲၣ်တၢ်ကျဲၤတဖၣ်လၢ ဘၣ်တၢ်မၤအီၤဖဲ ပတၢ်အိၣ်ဖှိၣ်ရိဖှိၣ် ဒီးပတၢ်အိၣ်ဖှိၣ် ဖးဒိၣ်တဖၣ်စ့ၢ်ကီးန့ၣ်လီၤ.

ကုၢ်အံၤ တီ ဒီးလံာ်စီဆှံအတၢ်မ့ၢ်တၢ်တီ ဒီးအမူဒါလၢကဘၣ်စံၣ်တဲၤတဲလီၤ တၢ်သးခုကစီၣ်န့ၣ်လီၤ. ဒီးတၢ်ခဲလၢာ်လၢ ခရံာ်ဟ့ၣ်လီၤအီၤတဖၣ်လၢ ဟီၣ်ခိၣ်ချၢန့ၣ်ကုၢ်အဝဲအံၤ အံးထွဲကွၢ်ထွဲဝဲလၢ တၢ်ကူၣ်သ့ အပူၤန့ၣ်လီၤ. (မၤတၢ် ၁၀:၄၂) ယဟိဝၤယွၤ အတၢ်ဆိၣ်ဂ့ၤအဃိကုၢ်အဝဲအံၤ အတၢ်ကတဲာ်ကတီၤတဖၣ်လၢ နီၢ်သးတခီအိၣ်အါအါဂီၢ်ဂီၢ် ဒီးအတၢ်ဖံးတၢ်မၤ လဲၤထီၣ်လဲၤထီဝဲလီၤ.—ယၡါယၤ ၆၀:၂၂; ၆၅:၁၃.

• လၢကဒုးအီၣ်ဒုးအီအပျဲၢ်အဘီၣ်တဖၣ်လၢ နီၢ်သးတခီအဂီၢ် ယ့ၣ်ၡူးပာ်ထီၣ်မတၤလဲၣ်.

• ကုၢ်အဝဲအံၤ တီ ဒီးကူၣ်တၢ်သ့လၢကျဲဒ်လဲၣ်.