ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါနိၣ်ဝ့ဘၢၣ် ၆–၁၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ဧၤမိၣ် ၁–၉
“ဃုယွၤတက့ၢ်, ဒီးသုကမူလီၤ”
(ဧၤမိၣ် ၅:၄) အဂ့ၢ်ဒ်အံၤ, ယွၤစံးလၢ အံၣ်စရ့လးအပှၤဟံၣ်ဖိ ဒ်အံၤ, ဃုယၤတက့ၢ်, ဒီးသုကမူလီၤ.
(ဧၤမိၣ် ၅:၆) ဃုယွၤတက့ၢ်, ဒီးသုကမူလီၤ. ကဃ့ၢ်သဖှိဘၢၣ်ဖျိဘၣ်ဖုးတၢ်လၢ စီၤယိၤသးအဟံၣ်ပူၤ, ဒ်မ့ၣ်အူအသိး, ဒီးအီၣ်ကွံာ်ဝဲ, ဒီးပှၤမၤလီၤပံာ်အီၤတအိၣ်ဘၣ်လၢ ဘ့ၤသ့လးအပူၤဘၣ်.
တၢး၀၄ ၁၁/၁၅ ကဘျံးပၤ ၂၄ အဆၢ ၂၀
ဃုယဟိဝၤယွၤလၢ အထံၣ်နုာ်ပှၤသး
၂၀ စိၤဖဲန့ၣ် ပှၤလၢအအိၣ်မူဘၣ်ဖဲ ကီၢ်အံၣ်စရ့လးအပူၤတဖၣ်န့ၣ် ကတီဒီးယဟိဝၤယွၤအဂီၢ် တမ့ၢ်တၢ်လၢအညီဘၣ်. ပမ့ၢ်ဘၣ်တဲန့ၣ် မုၢ်မဆါတနံၤအံၤ ပမ့မ့ၢ် ခရံာ်ဖိလၢ အသးပှၢ်မ့ၢ်ဂ့ၤ အသးစၢ်မ့ၢ်ဂ့ၤ ပသ့ၣ်ညါလၢ ပကတြီဆၢကွံာ် ဟီၣ်ခိၣ်အတၢ်ကွဲန့ၢ်လွဲန့ၢ်တဖၣ်န့ၣ် တညီဘၣ်. ဘၣ်ဆၣ် ပှၤအံၣ်စရ့လးတနီၤ အဲၣ်ကစၢ်ယွၤ ဒီးအဲၣ်ဒိးမၤ တၢ်ဘၣ်ယွၤအသးအဃိ အဝဲသ့ၣ် ပၣ်ဃုာ်လၢ တၢ်ဘူၣ်တၢ်ဘါအမ့ၢ်အတီအပူၤလီၤ. ဖဲ ဧၤမိၣ် ၅:၄ န့ၣ်ယဟိဝၤယွၤ တဲဘၣ်အဝဲသ့ၣ်လၢ “ဃုယၤတက့ၢ်, ဒီးသုကမူလီၤ.” ဒ်န့ၣ်အသိး မုၢ်မဆါတနံၤအံၤ ပှၤလၢအပီၢ်ယၢ်လီၤက့ၤအသးဒီး ဃုယွၤ ခီဖျိဃုသ့ၣ်ညါဝဲ တၢ်သ့ၣ်ညါလီၤတံၢ်လီၤဆဲး လၢဘၣ်ဃးဒီး ယွၤအကလုၢ်ကထါဝံၤ မၤယွၤအတၢ်ဘၣ်သးတဖၣ်န့ၣ် ယဟိဝၤယွၤ ပာ်ဖျါထီၣ် တၢ်သးကညီၤလၢ အဝဲသ့ၣ်အဖီခိၣ်လီၤ. ပကမၤဒ်န့ၣ်အဂီၢ်တညီဘၣ်, ဘၣ်ဆၣ်ပမ့ၢ်မၤဒ်န့ၣ်န့ၣ် ပကဒိးန့ၢ်ဘၣ် တၢ်မူအထူအယိာ်လီၤ.—ယိၤဟၣ် ၁၇:၃.
(ဧၤမိၣ် ၅:၁၄, ၁၅) ဒ်သိးသုကမူဒီး, ဃုတၢ်ဂ့ၤတက့ၢ်. ဃုတၢ်အၢတဂ့ၤ. ဒီးဒ်န့ၣ်, တၢ်ကမၤအသးလၢ ယွၤတၢ်သုးမုၢ်ဂီၢ်မုၢ်အကစၢ်န့ၣ် ကအိၣ်ဒီးသု, ဒ်သုစံးအသိးန့ၣ်လီၤ. ၁၅ သးဟ့တၢ်အၢ, ဒီးအဲၣ်တၢ်ဂ့ၤ, ဒီးဒုးအိၣ်ဂၢၢ်ဆိးကျၢၤ တၢ်စံၣ်ညီၣ်တီလၢ ပဲတရီအပူၤတက့ၢ်. ဘၣ်တဘၣ် ယွၤတၢ်သုးမုၢ်ဂီၢ်မုၢ်အကစၢ် ကဒုးဘၣ်ဘျုးဘၣ်ဖှိၣ် စီၤယိၤသး အပှၤလၢအအိၣ်လီၤတဲာ်တဖၣ်လီၤ.
jd ကဘျံးပၤ ၉၀–၉၁ အဆၢ ၁၆–၁၇
ဃုယဟိဝၤယွၤ ဒီးအတၢ်ဘျၢလၢအပတီၢ်ထီ
၁၆ စီၤအၤဒၣ်အတၢ်ဃုထၢလၢ ဘၣ်ဃးဒီး ပှၤလၢအကြၢးဆၢတဲာ် တၢ်အဂ့ၤဒီးတၢ်အအၢန့ၣ် ကမၣ်ဝဲလီၤ. မ့ၢ်ပဝဲသ့ၣ်တဖၣ်စ့ၢ်ကီး ပကဃုထၢကျဲလၢ အပှဲၤဒီးတၢ်ကူၣ်သ့ဧါ. ဝံဧၤမိၣ်အဲၣ်ဒိးလၢ ပကဆိကမိၣ်လီၤတံၢ်လီၤဆဲးအဃိ အဝဲတဲဝဲလၢ “သးဟ့တၢ်အၢ, ဒီးအဲၣ်တၢ်ဂ့ၤ” တက့ၢ်. (ဧၤမိၣ် ၅:၁၅) ဝ့လံၤယၢၤ(စ်) ရ့နံၤ ဟၢၤဖၢၤ, (late professor) လၢအမ့ၢ် ပှၤကူၣ်ဘၣ်ကူၣ်သ့လၢ ဧ့ၤဘြံၤအတၢ်ကတိၤဒီးအလံာ်လဲၢ်လၢ ခၠံၣ်ကၤကိၤ (Chicago) ဖၠၣ်စိမိၤန့ၣ်တဲဝဲလၢ “တၢ်ဘျၢလၢဘၣ်ဃးဒီး တၢ်အဂ့ၤဒီးတၢ်အအၢလၢ [ဝံဧၤမိၣ်] အသးပူၤန့ၣ် မ့ၢ်ဒ်ယၤဝ့ အတၢ်ဘၣ်အသးအသိး [ယဟိဝၤယွၤ အတၢ်ဘျၢ ဘၣ်ဃးဒီးတၢ်ဂ့ၤဒီးတၢ်အၢ] လီၤ.” တၢ်အံၤမ့ၢ် တၢ်ဆိကမိၣ်အရ့ဒိၣ်လၢ ပမၤလိန့ၢ်ဘၣ်အီၤဖဲ ဝံတဆံခံဂၤအအိၣ်လီၤ. မ့ၢ်နသးအိၣ်တူၢ်လိာ် ယဟိဝၤယွၤအတၢ်ဘျၢ လၢဘၣ်ဃးဒီး တၢ်ဂ့ၤဒီးတၢ်အၢန့ၣ်ဧါ. တၢ်ဘျၢတဖၣ်အံၤန့ၣ် ဘၣ်တၢ်ပာ်ဖျါန့ၢ်ပှၤလၢ လံာ်စီဆှံအပူၤ ဒီးဘၣ်တၢ်တဲနၢ်ပၢၢ်ပှၤလၢ ခရံာ်ဖိလၢ အဒိၣ်တုာ်ခိၣ်ပှဲၤဒီး အတၢ်လဲၤခီဖျိအါ လၢအမ့ၢ် “တၢ်အကုၢ်အပှၤလၢ အကလုၢ်တီ, ဒီးအကူၣ်တၢ်သ့” လီၤ.—မးသဲ ၂၄:၄၅-၄၇.
၁၇ ပမ့ၢ်သးဟ့တၢ်အၢန့ၣ် ကမၤစၢၤပှၤဒ်သိး ပကဟးဆှဲး တၢ်လၢတဘၣ်ယဟိဝၤယွၤအသးလီၤ. အဒိ, ပှၤတဂၤ သ့ၣ်ညါဝဲလၢ တၢ်ကွၢ်တၢ်ဂီၤဘ့ၣ်ဆ့လၢ အ့ထၢၣ်နဲးအပူၤန့ၣ် တၢ်လီၤဘၣ်ယိာ်အိၣ်ဝဲအဃိ အဝဲဂုာ်ကျဲးစၢး ဟးဆှဲးဝဲ တၢ်ဂီၤတဖၣ်အံၤလီၤ. ဘၣ်ဆၣ် ဘၣ်ဃးဒီးတၢ်ဂီၤဘ့ၣ်ဆ့ အဝဲး(ဘ်)ဆးန့ၣ် အဝဲအ “သး” ပူၤအိၣ်ဒ်လဲၣ်. (အ့းဖ့းစူး ၃:၁၆, ခ့ခါစှီၤကျိာ်) အဝဲမ့ၢ်မၤထွဲဝဲ ကစၢ်ယွၤအတၢ်ကတိၤဖဲ ဧၤမိၣ် ၅:၁၅ န့ၣ်ကညီဝဲလၢ ကသးဟ့တၢ်အၢအဂီၢ်လီၤ. ဒီးအတၢ်ဂုာ်ကျဲးစၢးလၢ ကမၤတၢ်ဘၣ်ယွၤအသးန့ၣ် ကကဲထီၣ်လိၣ်ထီၣ်ဝဲလီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ဧၤမိၣ် ၂:၁၂) ဘၣ်ဆၣ်ဒီး သုဟ့ၣ်အီပှၤနစၤရံဖိလၢစပံးထံ, ဒီးမၤလိာ်ဝံတဖၣ်, ဒီးသုစံး, ကတိၤတၢ်လၢဝံကျိာ်တဂ့ၤ.
တၢး၀၇ ၁၀/၁ ကဘျံးပၤ ၁၄ အဆၢ ၈
လံာ်စီဆှံ အတၢ်ပာ်ဖျါလၢ လံာ်ယိၤအ့လးဒီး လံာ်ဧၤမိၣ်
၂:၁၂. ပတကြၢး ဟ့ၣ်ဂံၢ်ဟ့ၣ်ဘါ ပှၤလဲၤလၢညါ, ကဝီၤအပှၤကွၢ်တၢ်, မ့ၡၢၢ်နရံၣ် မ့တမ့ၢ် ပှၤဘ့ၤသ့လးဖိ လၢအဂုာ်ကျဲးစၢးမၤတၢ်တဖၣ် လၢကပာ်တ့ၢ်ကွံာ် အတၢ်မၤလၢဆၢကတီၢ်လၢပှဲၤဒီး အိၣ်မူက့ၤဝဲယိယိဖိန့ၣ်ဘၣ်. လၢတၢ်န့ၣ်အလီၢ် ပကြၢးဟ့ၣ်ဂံၢ်ဟ့ၣ်ဘါအဝဲသ့ၣ်လၢ ကဆဲးမၤဝဲ တၢ်မၤလၢအဂ့ၤအံၤလီၤ.
(ဧၤမိၣ် ၈:၁, ၂) ကစၢ်ယွၤဒုးနဲၣ်ယၤဒ်အံၤ, ဒီးကွၢ်ကွၢ်, တၤသၣ်မံတနာ်လီၤ. ၂ ဒီးစံးဘၣ်ယၤ, စီၤဧၤမိၣ်ဧၢ, နထံၣ်တၢ်မနုၤတမံၤလဲၣ်. ဒီးယစံး, တၤသၣ်မံတနာ်လီၤ. ဒီးယွၤစံးယၤ, တၢ်အကတၢၢ်န့ၣ် ဘၣ်ယပှၤဂီၢ်မုၢ်အံၣ်စရ့လး, ဒီးယတလဲၤကပာ်လၢၤဘၣ်အီၤဘၣ်.
တၢး၀၇ ၁၀/၁ ကဘျံးပၤ ၁၄ အဆၢ ၆
လံာ်စီဆှံ အတၢ်ပာ်ဖျါလၢ လံာ်ယိၤအ့လးဒီး လံာ်ဧၤမိၣ်
၈:၁, ၂—“တၤသၣ်မံတနာ်” န့ၣ်ဒိလီၤဝဲတၢ်မနုၤလဲၣ်. တၢ်အံၤ မ့ၢ်တၢ်ပနီၣ်လၢ ယဟိဝၤယွၤအမုၢ်နံၤဘူးထီၣ်လံ. တၤသၣ်အံၤ ပှၤဒဲးအီၤဖဲ တၢ်ကူးဘုဘူးကဝံၤအကတီၢ် လၢတၢ်သူၣ်အီၣ်ဖျးအီၣ်တၢ်လၢ တနံၣ်အတီၢ်ပူၤ နံၣ်ကတၢၢ်န့ၣ်လီၤ. ဖဲယဟိဝၤယွၤ ဒုးထံၣ်ဝဲဝံဧၤမိၣ်လၢ “တၤသၣ်မံတနာ်” မ့တမ့ၢ် တၤသၣ်လၢ တၢ်ကိၢ်အကတီၢ်အခါ အဝဲအဲၣ်ဒိးစံးဝဲ တၢ်အကတၢၢ်လၢ ပှၤအံၣ်စရ့လးဖိတဖၣ်အဂီၢ်န့ၣ် ဘူးထီၣ်လံ. လၢတၢ်န့ၣ်အဃိ ယဟိဝၤယွၤတဲဘၣ် ဝံဧၤမိၣ်လၢ “တၢ်အကတၢၢ်န့ၣ် ဘၣ်ယပှၤဂီၢ်မုၢ်အံၣ်စရ့လး, ဒီးယတလဲၤကပာ်လၢၤဘၣ်အီၤဘၣ်.”
တၢ်ဖးလံာ်စီဆှံ
(ဧၤမိၣ် ၄:၁-၁၃) ကနၣ်တၢ်ကတိၤအံၤတက့ၢ်, ဘၤၡၣ်အဂီၤဖံးမိၢ်လၢ အအိၣ်ဝဲလၢ ၡၤမရံအကစၢၢ်လိၤ, လၢအမၤအၢပှၤဖှီၣ်ဖိ, လၢအမၤသဘှံး ပှၤလၢအဘၣ်ဖှီၣ်ဘၣ်ယာ်, လၢအစံးဘၣ်အကစၢ်တဖၣ်, ဟဲစိာ်အီသကိးတၢ်တက့ၢ်သ့ၣ်ဧၢ. ၂ ကစၢ်ယွၤဆိၣ်တၢ်လၢ အတၢ်စီဆှံအမဲာ်ညါ, ဒီးစံးဝဲ, ကွၢ်ကွၢ်, မုၢ်နံၤတဖၣ်ကဟဲဘၣ်သု ဖဲတၢ်ကထုးထီၣ်ကွံာ်သုလၢထးကွး, ဒီးသုစၢၤသုသွဲၣ်လၢတခွဲတဖၣ်လီၤ. ၃ ဒီးသုကဟးထီၣ်ကွံာ်လၢ တၢ်ဘၢၣ်ဖျိအလီၢ်, တဂၤစၢၢ်ဆၢလၢအမဲာ်ညါစုာ်စုာ်, ဒီးတၢ်ကကွံာ်တ့ၢ်ကွံာ်သု လၢနူၢ်ဧိၤစီၤဧိၤအပူၤလီၤ, ယွၤစံးဝဲဒၣ်. ၄ ဟဲဆူဘ့ၤသ့လးဒီးမၤကမၣ်တၢ်, မၤအါထီၣ်တၢ်ကမၣ်လၢ ကံးလကၤလးအပူၤ, ဒီးဟဲစိာ်သုတၢ်လုၢ်ကိးဂီၤဒဲး, သုမၤဘူၣ်ဆံဆဲၣ်ပူတပူလၢ သၢနံၣ်တဘျီတက့ၢ်. ၅ ဒီးလုၢ်တၢ်လုၢ်စံးထီၣ်ပတြၢၤအိၣ်ဒီးကိၣ်မံၣ်, ဒီးကိးထီၣ်တၢ်မၤဘူၣ် တီနံဒၣ်တၢ်န့ၣ်, ဒီးဒုးနၢ်ဟူတၢ်တက့ၢ်. အဂ့ၢ်ဒ်အံၤ, သုအဲၣ်ဒိးတၢ်ဒ်န့ၣ်သိးလီၤ, ပှၤအံၣ်စရ့လးဖိသ့ၣ်ဧၢ, ကစၢ်ယွၤစံးဝဲဒၣ်. ၆ ဒီးယဲဒၣ်စ့ၢ်ကီး ယဟ့ၣ်လီၤသုလၢ သုမဲကဆှီလၢသုဝ့ၢ်ခဲလၢာ်အပူၤ, ဒီးကိၣ်စှၤလၢသုလီၢ်ပူၤခဲလၢာ် ဘၣ်ဆၣ်ဒီး သုတဟဲက့ၤကဒါက့ၤဆူ ယအိၣ်ဘၣ်, ယွၤစံးဝဲဒၣ်. ၇ ယတြီစ့ၢ်ကီးတၢ်စူၤလၢ ကူးဘုတချုးဘၣ်ဒံးဘၣ်သၢလါ, ဒီးယမၢတၢ်ဟဲစူၤလၢဝ့ၢ်တဖျၢၣ်အဖီခိၣ်, ဒီးယမၢတၢ်အသုတဟဲစူၤတဂ့ၤ လၢဝ့ၢ်အဂၤတဖျၢၣ် အဖီခိၣ်လီၤ. တၢ်ဟဲစူၤလၢ ဟီၣ်ခိၣ်တကဝီၤအဖီခိၣ်, ဒီးတကဝီၤလၢ တၢ်တဟဲစူၤလၢအဖီခိၣ်န့ၣ် သူထီၣ်ဃ့ထီၣ်ဝဲလီၤ. ၈ ဒီးဝ့ၢ်ခံဖျၢၣ်သၢဖျၢၣ် အဖိဟးဝဲဆူဝ့ၢ်တဖျၢၣ်ဃီ ဒ်သိးအကအီထံ, ဒီးတဘျဲးအီဘၣ်ဝဲဘၣ်, ဘၣ်ဆၣ်ဒီး သုတဟဲက့ၤကဒါက့ၤဆူယအိၣ်ဘၣ်, ယွၤစံးဝဲဒၣ်. ၉ ယတီၢ်သုလၢကလံၤကိၢ်, ဒီးတၢ်မၤဆါ ဘုဧိၤဟုဧိၤလီၤ. သုတၤသၣ်အလီၢ်, ဒီးသုစပံးမုၢ်အလီၢ်, ဒီးသုချၢၣ်ဒၢ, ဒီးသုသ့ၣ်စၤယံးန့ၣ် ဒွဲၣ်ကၤစၣ်အီၣ်ကွံာ်အီၤလီၤ. ဘၣ်ဆၣ်ဒီး သုတဟဲက့ၤကဒါက့ၤ ဆူယအိၣ်ဘၣ်, ယွၤစံးဝဲဒၣ်. ၁၀ ယမၢလီၤတၢ်သံသတြိာ်လၢသုကျါ ဒ်လၢအဲၤကူပတူးအသိး, သုဖိၣ်သၣ်ခွါန့ၣ် ယမၤသံအီၤလၢနး, အိၣ်ဒီးတၢ်ဂုာ်န့ၢ်သုကသ့ၣ်, ဒီးယမၢသုသူၣ်ဒဲအလီၢ် အတၢ်နၢအုၣ်ဟဲနုာ်လၢသုနါဒ့ပူၤလီၤ. ဘၣ်ဆၣ်ဒီး သုတဟဲက့ၤကဒါက့ၤဆူယအိၣ်ဘၣ်, ယွၤစံးဝဲဒၣ်. ၁၁ ယမၤဟးဂီၤသုတနီၤနီၤ, ဒ်ယွၤမၤကဒံကဒါ စဒိၣ်ဒီးဂမိရၤအသိးန့ၣ်, ဒီးသုမၤသးဒ် မ့ၣ်အူကဖးလၢတၢ်ထုးထီၣ်ကွံာ်လၢ မ့ၣ်အူကျါအသိးန့ၣ်လီၤ. ဘၣ်ဆၣ်ဒီး သုတဟဲက့ၤကဒါက့ၤဆူယအိၣ်ဘၣ်, ယွၤစံးဝဲဒၣ်. ၁၂ မၤသးဒ်န့ၣ်ဒီး ယကမၤနၤဒ်အံၤ, အံၣ်စရ့လးဧၢ, မ့ၢ်ယကမၤနၤဒ်အံၤဒီး, ကတဲာ်ကတီၤနသး ဒ်သိးနကသဂၢၢ်နကစၢ်တက့ၢ်, အံၣ်စရ့လးဧၢ. ၁၃ အဂ့ၢ်ဒ်အံၤ, ကွၢ်ကွၢ်, ပှၤလၢအမၤကစၢၢ်ကလိ, ဒီးတ့ကလံၤသီၣ်ဂီၤ, ဒီးပှၤကညီ ဆိကမိၣ်ဝဲဒ်လဲၣ်ဒ်လဲၣ်န့ၣ် စံးဘၣ်တဲဘၣ်အီၤ, ဒီးပာ်မုၢ်ဂီၤလၢတၢ်ခံး, ဒီးယီၢ်ဟီၣ်ခိၣ်အလီၢ်ထီၣ်ထီတဖၣ်န့ၣ် မ့ၢ်ယွၤ, တၢ်သုးမုၢ်ဂီၢ်မုၢ်အကစၢ်မ့ၢ်အမံၤလီၤ.
လါနိၣ်ဝ့ဘၢၣ် ၁၃–၁၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ဧိၤဘါဒယၤ ၁–ယိၤနါ ၄
“ဟံးန့ၢ်တၢ်မၤလိလၢ နတၢ်ကမၣ်တဖၣ်”
(ယိၤနါ ၃:၁-၃) ဒီးယွၤအကလုၢ်ဘၣ် စီၤယိၤနါခံဘျီတဘျီ ဒီးစံးဝဲဒၣ်, ၂ ဂဲၤဆၢထၢၣ်လဲၤဆူနံၤနဝ့, ဝ့ၢ်ဖးဒိၣ်တဖျၢၣ်န့ၣ်, ဒီးကိးထီၣ်အီၤလၢ တၢ်လၢယမၤလိာ်နၤတက့ၢ်. ၃ ဒီးစီၤယိၤနါဂဲၤဆၢထၢၣ်, ဒီးလဲၤဝဲဆူနံၤနဝ့ ဒ်ယွၤအကလုၢ်အသိးန့ၣ်လီၤ. ဒီးနံၤနဝ့မ့ၢ်ဝ့ၢ်ဖးဒိၣ်တဖျၢၣ် လၢကစၢ်အမဲာ်ညါ, သၢနံၤလဲၤကျဲလီၤ.
အဝဲဒိးန့ၢ်ဘၣ်တၢ်မၤလိ ခီဖျိလၢ အတၢ်ဆၢတဲာ်ကမၣ်ဝဲအဃိ
၂၂ မ့မ့ၢ်ဝံယိၤနါန့ၣ် မ့ၢ်အဝဲကပာ်ဖျါထီၣ် တၢ်စံးဘျုးစံးဖှိၣ်က့ၤ ကစၢ်ယွၤ ဒီးဒိကနၣ်အကလုၢ်စ့ၢ်ကီးဧါ. တၢ်ဆၢကတီၢ်လဲၤပူၤကွံာ် သၢနံၤဒီးသၢနၤဝံၤအလီၢ်ခံန့ၣ် ညၣ်ဖးဒိၣ်တဘ့ၣ် “ဘှိးထီၣ်ကွံာ်စီၤယိၤနါ လၢခိလီၤ.” (ယိၤနါ ၂:၁၀) ဆိကမိၣ်ကွၢ်မီၣ်, အကတၢၢ်တၢၢ်န့ၣ် ဝံယိၤနါ တလိၣ်ပီၢ်ဝဲထံနီတစဲးဘၣ်, အဝဲဟဲက့ၤတုၤလၢ ပီၣ်လဲၣ်ကၢၢ်နံၤညီညီဖိန့ၣ်လီၤ. ဘၣ်ဆၣ် ဒ်သိးဝံယိၤနါ ကလဲၤဝဲဆူဝ့ၢ်နံၤနဝ့အဂီၢ် ကဘၣ်ဃုဝဲကျဲလၢ အနီၢ်ကစၢ်လီၤ. ယိၤနါ ၃:၁, ၂ စံးဝဲလၢ– “ဒီးယွၤအကလုၢ်ဘၣ်စီၤယိၤနါ ခံဘျီတဘျီဒီးစံးဝဲဒၣ်, ဂဲၤဆၢထၢၣ်လဲၤဆူနံၤနဝ့, ဝ့ၢ်ဖးဒိၣ်တဖျၢၣ်န့ၣ်, ဒီးကိးထီၣ်အီၤလၢ တၢ်လၢယမၤလိာ်နၤတက့ၢ်.” တဘျီအံၤ ဝံယိၤနါကမၤဝဲဒ်လဲၣ်.
၂၃ ဝံယိၤနါ တမၤယံာ်မၤနီၣ်အသး နီတစဲးဘၣ်. ပဖးဘၣ်လၢ– “စီၤယိၤနါဂဲၤဆၢထၢၣ်, ဒီးလဲၤဝဲဆူနံၤနဝ့ ဒ်ယွၤအကလုၢ်အသိးန့ၣ်လီၤ.” (ယိၤနါ ၃:၃) ဝံယိၤနါ ဆၢတဲာ်တၢ်ကမၣ် ဘၣ်ဆၣ်ဒိးန့ၢ်ဘၣ်တၢ်မၤလိအဃိ လၢခံန့ၣ်အဝဲပာ်ဖျါထီၣ် တၢ်ဒိကနၣ်လီၤ. ပဝဲစ့ၢ်ကီး ပကြၢးကွၢ်လိမၤဒိး ဝံယိၤနါ အတၢ်နာ်လီၤ. ပဝဲကိးဂၤဒဲးန့ၣ် ပမ့ၢ်ပှၤတၢ်ဒဲးဘးဖိ ဒီးပမၤကမၣ်ဘၣ်တၢ်လီၤ. (ရိ. ၃:၂၃) ဘၣ်ဆၣ် မ့ၢ်ပကြၢးဟ့ၣ်အၡူဧါ. မ့တမ့ၢ်ဘၣ်န့ၣ် မ့ၢ်ပကဟံးန့ၢ်တၢ်မၤလိလၢ ပတၢ်လဲၤခီဖျိ, ဃၣ်လိၤက့ၤပသး ဒီးပာ်ဖျါထီၣ်တၢ်ဒိကနၣ် ကစၢ်ယွၤအကလုၢ်ဧါ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(ဧိၤဘါဒယၤ ၁၀) လၢနမၤအၢ နဒီပုၢ်ဝဲၢ်ယၤကိာ်အဃိန့ၣ် တၢ်မဲာ်ဆှးကကျၢၢ်ဘၢနၤ, ဒီးနကဘၣ် တၢ်ဒီၣ်တဲာ်ကွံာ်နၤ လီၤထူလီၤယိာ်လီၤ.
တၢး၀၇ ၁၁/၁ ကဘျံးပၤ ၁၃ အဆၢ ၅
လံာ်စီဆှံ အတၢ်ပာ်ဖျါလၢ လံာ်ဧိၤဘါဒယၤ, လံာ်ယိၤနါ, လံာ်မံကၤ
၁၀—အဒိၣ် ‘ဘၣ်တၢ်ဒီၣ်တဲာ်ကွံာ်အီၤ လီၤထူလီၤယိာ်’ လၢကျဲဒ်လဲၣ်. ဒ်ဝံအတၢ်စံးပာ်အိၣ်ဝဲအသိး အဒိၣ်ကလုာ်ဒူၣ် ဒီးအတၢ်ပၢတၢ်ပြးလၢ အအိၣ်တ့ၢ်ဝဲအနီၢ်ကီၢ်န့ၣ် လီၤမၢ်ကွံာ်လၢ ဟီၣ်ခိၣ်ချၢလီၤ. ဘၤဘူၤလိၣ်အစီၤပၤ နဘိၤနးဒ့း ဒုးနၢၤဝဲ အဒိၣ်ဖဲ ချ.ခ.န ဃုယၤဖှိၣ်အခၢၣ်သးလီၤ. ဒီးဖဲ ချ.ခ.န လွံၢ်ယၤဖှိၣ်န့ၣ် နဘဲးထံယၢၤ ကလုာ်ဒူၣ် ဟဲအိၣ်လၢ အဒိၣ် အလီၢ်အကျဲအဃိ အဒိၣ်ကလုာ်ဒူၣ်တဖၣ် လဲၤအိၣ်လၢ နံကဲး လၢအအိၣ်လၢ ကီၢ်ယူဒၤကလံၤထံးလီၤ. ဒီးလၢခံတၢ်လီၢ်အံၤ ဘၣ်တၢ်သ့ၣ်ညါအီၤလၢ အံဒူမဲလီၤ. ဒီးဖဲ ခ.န ၇၀ ပှၤရိမ့ၤဖိတဖၣ် မၤဟးဂီၤဝဲ ဝ့ၢ်ယရူၤၡလ့ၣ်အခါနၣ် ပှၤအဒိၣ်ဖိတဖၣ် လီၤမၢ်ကွံာ်ဝဲခဲလၢာ်လီၤ.
(ဧိၤဘါဒယၤ ၁၂) လၢနဒီပုၢ်ဝဲၢ်အမုၢ်တနံၤ, မုၢ်တနံၤလၢ တၢ်ပာ်အီၤလၢပှၤတခီဘီမုၢ်ဖိန့ၣ် နတဂ့ၤကွၢ်ကီဘၣ်, ဒီးမုၢ်တနံၤလၢ အတုၤလၢတၢ်ဟးဂီၤန့ၣ် နတဂ့ၤသးခုဘၣ်လၢ ယူဒၤအဖီခိၣ်ဘၣ်, ဒီးလၢတၢ်ကိၢ်တၢ်ဂီၤအမုၢ်တနံၤန့ၣ် နတဂ့ၤပာ်ဒိၣ်နထးခိၣ်ဘၣ်.
jd ကဘျံးပၤ ၁၁၂ အဆၢ ၄–၅
ရ့ဒီးပှၤဂၤဒ် ယဟိဝၤယွၤ အတၢ်ဘၣ်သးအသိး
၄ နဟံးန့ၢ် တၢ်မၤလိလၢ ကစၢ်ယွၤ အတၢ်စံၣ်ညီၣ် ကီၢ်အဒိၣ်လၢ အဘူးဒီး ကီၢ်အံၣ်စရ့သ့န့ၣ်လီၤ. “လၢနဒီပုၢ်ဝဲၢ်အမုၢ်တနံၤ, မုၢ်တနံၤလၢတၢ်ပာ်အီၤလၢ ပှၤတခီဘီမုၢ်ဖိန့ၣ် နတဂ့ၤကွၢ်ကီဘၣ်, ဒီးမုၢ်တနံၤလၢအတုၤလၢ တၢ်ဟးဂီၤန့ၣ် နတဂ့ၤသးခုဘၣ်လၢ ယူဒၤအဖီခိၣ်ဘၣ်, ဒီးလၢတၢ်ကိၢ်တၢ်ဂီၤအမုၢ်တနံၤန့ၣ် နတဂ့ၤပာ်ဒိၣ်နထးခိၣ်ဘၣ်” (ဧိၤဘါဒယၤ ၁၂) ပှၤစိၢ်တဖၣ်ကဲ “ဒီပုၢ်ဝဲၢ်” ဒီးပှၤအံၣ်စရ့လးဖိတဖၣ်လၢ တၢ်ပနံာ်တၢ်ကၤတၢ်မၤအပူၤလီၤ. ဘၣ်ဆၣ် မ့မ့ၢ် ပှၤအဒိၣ်ဖိတဖၣ်န့ၣ် မ့ၢ်ဝဲစီၤယၤကိာ်အဝဲၢ် စီၤဧ့ၡီၤ အစၢၤအသွဲၣ်အဃိ မ့ၢ်ပှၤအံၣ်စရ့လးဖိတဖၣ်အ “ဒီပုၢ်ဝဲၢ်” အနီၢ်ကီၢ်လီၤ. (၅ မိၤၡ့ ၂:၁-၄) အဃိ ဖဲပှၤအံၣ်စရ့လးဖိတဖၣ် လီၤဘၣ်လၢ ဘၤဘူၤလိၣ်အတၢ်ပၢဖီလာ်အခါ ပှၤအဒိၣ်ဖိတဖၣ် သးခုဝဲန့ၣ် တကြၢးဘၣ်.—ယဃ့းစက့လး ၂၅:၁၂-၁၄.
၅ ပသ့ၣ်ညါဘၣ်လၢ ပှၤအဒိၣ်ဖိတဖၣ် တရ့ဒီး ပှၤအံၣ်စရ့လးဖိတဖၣ်ဂ့ၤဂ့ၤအဃိ ကစၢ်ယွၤ တဘၣ်သူၣ်ဘၣ်သးဝဲဘၣ်. ပကဘၣ်သံကွၢ်လီၤပသးလၢ, ‘ယတၢ်ရ့လိာ်သးဒီး ယဒီပုၢ်ဝဲၢ်တဖၣ်န့ၣ် မ့ၢ်ကစၢ်ယွၤထံၣ်ဝဲဒ်လဲၣ်.’ ပကဘၣ်ပလီၢ်ပသးလၢ ဖဲတၢ်တလဲၤအသးအဂ့ၢ်အဝီအခါ မ့ၢ်ပရ့ဒီးပဒီပုၢ်ဝဲၢ်ဒ်လဲၣ်, ပထံၣ်အီၤဒ်လဲၣ်. အဒိ ဆိကမိၣ်ကွၢ် ခရံာ်ဖိတဂၤ မၤဘၣ်ဒိနၤ မ့တမ့ၢ် နတဘၣ်လိာ်ဖိးဒ့ဒီး နဘူးနတံၢ်တဂၤဂၤန့ၣ်လီၤ. နမ့ၢ်ဆိကမိၣ်လၢပှၤ “တၢ်ကမၣ်” အိၣ်န့ၣ် နစၢဃာ်အတၢ်ကမၣ်ဧါ, နတဂုာ်ကျဲးစၢး သးပ့ၤနီၣ် မ့တမ့ၢ် မၤဘၣ်လိာ်က့ၤအီၤဘၣ်ဧါ. (ကလီးစဲ ၃:၁၃; ယိၤၡူ ၂၂:၉-၃၀; မးသဲ ၅:၂၃, ၂၄) နမ့ၢ်ပာ်ဒ့ၣ်ပာ်ကမၣ်အီၤန့ၣ် ဘၣ်သ့ၣ်သ့ၣ် နကရ့ဒီးအီၤမုာ်မုာ် တမုာ်မုာ်, နကဟးဆှဲးအီၤ မ့တမ့ၢ် နကတဲအၢအီၤလီၤ. ထံၣ်တမှံကွၢ်လၢခံ ဒီပုၢ်ဝဲၢ်တဂၤအံၤ မၤကမၣ်ဘၣ်တၢ်, ဒီးဘၣ်သ့ၣ်သ့ၣ် တၢ်အိၣ်ဖှိၣ်သးပှၢ်တဖၣ် ကဘၣ်သိၣ်က့ၤသီက့ၤအီၤန့ၣ်လီၤ. (ကလၤတံ ၆:၁) ဖဲန့ၣ်အခါ မ့ၢ်နအဲၣ်ဒိးလီၤဂာ်လၢ ပှၤအဒိၣ်ဖိ ဒီးသးခုဖဲ နဒီပုၢ်ဝဲၢ်တဖၣ် ဘၣ်ကီဘၣ်ခဲအခါန့ၣ်ဧါ. ကစၢ်ယွၤအဲၣ်ဒိးလၢ နကရ့ဒီးပှၤဂၤဒ်လဲၣ်.
တၢ်ဖးလံာ်စီဆှံ
(ယိၤနါ ၃:၁-၁၀) ဒီးယွၤအကလုၢ်ဘၣ် စီၤယိၤနါခံဘျီတဘျီ ဒီးစံးဝဲဒၣ်, ၂ ဂဲၤဆၢထၢၣ်လဲၤဆူနံၤနဝ့, ဝ့ၢ်ဖးဒိၣ်တဖျၢၣ်န့ၣ်, ဒီးကိးထီၣ်အီၤလၢ တၢ်လၢယမၤလိာ်နၤတက့ၢ်. ၃ ဒီးစီၤယိၤနါဂဲၤဆၢထၢၣ်, ဒီးလဲၤဝဲဆူနံၤနဝ့ ဒ်ယွၤအကလုၢ်အသိးန့ၣ်လီၤ. ဒီးနံၤနဝ့မ့ၢ်ဝ့ၢ်ဖးဒိၣ်တဖျၢၣ်လၢကစၢ်အမဲာ်ညါ, သၢနံၤလဲၤကျဲလီၤ. ၄ ဒီးစီၤယိၤနါ လဲၤဆိတနံၤလဲၤကျဲဆူဝ့ၢ်ပူၤ, ဒီးကိးထီၣ်ဝဲဒီးစံးဝဲဒၣ်, အိၣ်ဒံးအနံၤလွံၢ်ဆံ ဒီးနံၤနဝ့ကဘၣ်တၢ်မၤဟးဂီၤကွံာ်အီၤလီၤ. ၅ ဒီးပှၤနံၤနဝ့ဖိန့ၣ်နာ်ယွၤ, ဒီးကိးထီၣ်တၢ်ဒုၣ်တၢ်အီၣ်, ဒီးသိးထီၣ်ထၢၣ်အတၢ်ကံးညာ်, လၢအဒိၣ်ပၢၢ်လၢအဆံးလီၤ. ၆ ဒီးတၢ်ကတိၤ တုၤဘၣ်နံၤနဝ့အစီၤပၤ, ဒီးအဝဲဒၣ်ဂဲၤဆၢထၢၣ်လၢ အလီၢ်ပစိာ်အဖီခိၣ်, ဒီးဘ့ၣ်ကွံာ်စီၤပၤအကူအသိး, ဒီးကျၢၢ်ဘၢအသးလၢ ထၢၣ်အတၢ်ကံးညာ်, ဒီးဆ့ၣ်နီၤဝဲလၢဖၣ်ဆါအကျါ, ၇ ဒီးစီၤပၤဒီးအပဒိၣ်ဖးဒိၣ်တဖၣ် မၤလိာ်တၢ်သတးဒီး, ပှၤကိးထီၣ်တၢ်လၢနံၤနဝ့ဒီဝ့ၢ်ညါအပူၤ, ဒီးစံးဝဲဒၣ်, ပှၤကညီမ့ၢ်ဂ့ၤ, ဆၣ်ဖိကီၢ်ဖိမ့ၢ်ဂ့ၤ, ဂီၤဘုၣ်ဂီၤဖံးမ့ၢ်ဂ့ၤ, သိဒီးမဲာ်တဲးလဲးမ့ၢ်ဂ့ၤ, မ်အသုတအီၣ်ကွၢ်တၢ်နီတမံၤတဂ့ၤ. မ်အသုတအီၣ်အဆၣ်, ဒီးအသုတအီထံတဂ့ၤ. ၈ မ်ပှၤကညီဒီးဆၣ်ဖိကီၢ်ဖိ အိၣ်ကျၢၢ်ဘၢအသးဒီးထၢၣ်အတၢ်ကံးညာ်, ဒီးမ်အကိးပသူထီၣ်ဆူယွၤတက့ၢ်, ဒီးမ်အဃၣ်ကွံာ်အသးလၢအကျဲအၢ ဒီးလၢအဂုာ်ဆူၣ်ပျီဆူၣ်တၢ်လၢ အအိၣ်ဝဲလၢအစုပူၤန့ၣ်တက့ၢ်. ၉ ဘၣ်တဘၣ်ယွၤကဃၣ်အသး, ဒီးပီၢ်ယၢ်လီၤက့ၤအသး, ဒီးဃၣ်ကွံာ်အသးလၢ အသးကဲၤထီၣ်, ဒ်သိးပသုတတုၤလၢ တၢ်ဟးဂီၤတဂ့ၤန့ၣ်, မ့ၢ်မတၤသ့ၣ်ညါတဂၤလဲၣ်. ၁၀ ဒီးယွၤထံၣ်ဘၣ်အမၤတၢ်တဖၣ် လၢအဃၣ်ကွံာ်အသးလၢအကျဲအၢလီၤ. ဒီးယွၤပီၢ်ယၢ်လီၤက့ၤအသးလၢ တၢ်အၢလၢအစံးလၢသါကမၤအီၤ, ဒီးတမၤဘၣ်ဝဲဘၣ်.
လါနိၣ်ဝ့ဘၢၣ် ၂၀–၂၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | မံကၤ ၁–၇
“ယဟိဝၤယွၤ ဃ့ပှၤတၢ်မနုၤလဲၣ်”
(မံကၤ ၆:၆, ၇) ယကဟဲဆူယွၤအမဲာ်ညါ အိၣ်ဒီးမနုၤတမံၤလဲၣ်. ယကဆုးလီၤယခိၣ်လၢ ကစၢ်အထီကတၢၢ်အမဲာ်ညါအိၣ် ဒီးမနုၤတမံၤလဲၣ်. ယကဟဲဆူအအိၣ်ဒီးတၢ်လုၢ်မ့ၣ်အူ ဒီးဂီၤဖံးတနံၣ်ဖိတဖၣ်စ့ၢ်ကီးဧါ. ၇ ဘၣ်ယွၤအသးလၢသိဖါအကထိတဖၣ်, သိဧိၤချါဧိၤ အကျိအကလးတဖၣ်ဧါ. ယကဟ့ၣ်လီၤယဖိဝဲၢ်ကိလၢ ယတၢ်ဒဲးဘးအဃိ, ယနီၢ်ခိအတၤသၣ်လၢ ယသးအတၢ်ဒဲးဘးအဃိဧါ.
တၢး၀၈ ၅/၁၅ ကဘျံးပၤ ၆ အဆၢ ၂၀
ပကြၢးရ့ဒီးပှၤဂၤဒ်လဲၣ်
၂၀ လၢယွၤအတၢ်ထံၣ်န့ၣ် ပတၢ်ရ့လိာ်သးဒီး ပဒီပုၢ်ဝဲၢ် မ့ၢ်တၢ်အရ့ဒိၣ်တမံၤလၢ တၢ်ဘူၣ်ထီၣ်ဘါထီၣ် အမ့ၢ်အတီအဂီၢ်လီၤ. ပှၤလၢအဟ့ၣ်လုၢ်ထီၣ် ဆၣ်ဖိကီၢ်ဖိ ဆူယဟိဝၤယွၤအအိၣ်တဂၤ မ့ၢ်တရ့ဒီးအဒီပုၢ်ဝဲၢ်ဂ့ၤဂ့ၤဘၣ်န့ၣ် အဝဲအတၢ်လုၢ်ထီၣ် ကဲထီၣ်ဝဲတၢ်ကလီကလီ လၢယဟိဝၤယွၤအဂီၢ်သ့လီၤ. (မံ. ၆:၆-၈) အဃိ, ယ့ၣ်ၡူး ဟ့ၣ်ဂံၢ်ဟ့ၣ်ဘါ အပျဲၢ်အဘီၣ်တဖၣ်လၢ “မၤဘၣ်လိာ်ဖိးလိာ်နသးဒီးအီၤချ့ချ့” လီၤ. (မး. ၅:၂၅) ဒ်န့ၣ်အသိး စီၤပီလူးကွဲးဝဲလၢ “သးဒိၣ်ထီၣ်ဒီး, မၤကမၣ်တၢ်တဂ့ၤ. လၢသုတၢ်သးဒိၣ်ထီၣ်န့ၣ်သုတဒုးလီၤနုာ်မုၢ်တဂ့ၤ. ဒီးဟ့ၣ်မုၣ်ကီၤလံၢ် အလီၢ်တဂ့ၤ.” (အ့း. ၄:၂၆, ၂၇) ပမ့ၢ်သးဒိၣ်ထီၣ်တၢ်န့ၣ် ပကြၢးမၤဘၣ်လိာ်ဖိးလိာ်ပသးလၢအဆိအချ့လီၤ. ပမ့ၢ်မၤဒ်န့ၣ်န့ၣ် ပသးကခုၣ်လီၤက့ၤဒီး မုၢ်ကီၤလံၢ် ဟံးန့ၢ်တၢ်ခွဲးတၢ်ယာ်လၢပဖီခိၣ်တသ့လၢၤဘၣ်.—လူၤကၣ် ၁၇:၃, ၄.
(မံကၤ ၆:၈) ပှၤကညီဧၢ, အဝဲဒၣ်ဒုးနဲၣ်တ့ၢ်နတၢ်လၢအဂ့ၤလီၤ. ဒီးမ့တမ့ၢ်ဘၣ် အမၢနမၤတၢ်တီတၢ်လိၤ, ဒီးအဲၣ်ဒိးတၢ်သးကညီၤ, ဒီးလဲၤတၢ်ဒီးနကစၢ်လၢနသးစူၤန့ၣ်ဘၣ်ဒီး, မ့ၢ်အမၢနၤလၢမနုၤလဲၣ်.
“ယဟိဝၤယွၤ ဃ့က့ၤနၤတၢ်မနုၤလဲၣ်”
“မၤတၢ်တီတၢ်လိၤ.” လံာ်တဘ့ၣ် ပာ်ဖျါထီၣ်ဝဲလၢ “တၢ်တီတၢ်လိၤ” န့ၣ် “ပၣ်ဃုာ်ဒီး ပရ့ဒီးပှၤဂၤတီတီလိၤလိၤ ဒီးတကွၢ်မဲာ်တၢ်ဘၣ်.” ကစၢ်ယွၤအဲၣ်ဒိးလၢ နကရ့ဒီးပှၤဂၤတီတီလိၤလိၤ ဒ်အတၢ်ဘျၢအိၣ်ဝဲအသိးလီၤ. ပမၤတၢ်တီတီလိၤလိၤ ခီဖျိ ဖဲပရ့ဒီးပှၤဂၤအခါ ပတကွၢ်မဲာ်တၢ်ဘၣ်, ဒီးပအိၣ်ဒီး တၢ်သူၣ်ဘျၢသးဘျၢလီၤ. (၃ မိၤၡ့ ၁၉:၁၅; ယၡါယၤ ၁:၁၇; ဧ့ၤဘြံၤ ၁၃:၁၈) ဖဲပရ့ဒီးပှၤဂၤ တီတီလိၤလိၤအခါ ပှၤဂၤစ့ၢ်ကီး ကအဲၣ်ဒိးရ့ပှၤ တီတီလိၤလိၤလီၤ.—မးသဲ ၇:၁၂.
“အဲၣ်ဒိးတၢ်သးကညီၤ.” ကစၢ်ယွၤတအဲၣ်ဒိးထဲလၢ ပကပာ်ဖျါထီၣ် တၢ်သးကညီၤဘၣ်, အဲၣ်ဒိးဝဲလၢ ပကသးအိၣ် ပာ်ဖျါထီၣ်တၢ်သးကညီၤလီၤ. ဧ့ၤဘြံၤအတၢ်ကတိၤလၢအမ့ၢ် “တၢ်သးကညီၤ” (cheʹsedh) န့ၣ်ကအဲၣ်ဒိးစံးစ့ၢ်ကီးဝဲ “တၢ်အဲၣ်တၢ်သးကညီၤ” မ့တမ့ၢ် “တၢ်အဲၣ်လၢအတီ” လီၤ. ပှၤကူၣ်ဘၣ်ကူၣ်သ့ တဂၤတဲဝဲလၢ “တၢ်ကတိၤလၢအမ့ၢ် ၡၢၤစ့ [cheʹsedh] န့ၣ်နကွဲးကျိးထံအီၤထဲလၢ တၢ်အဲၣ် ဒီးတၢ်သးကညီၤန့ၣ် တလၢပှဲၤဘၣ်. ဒီးတၢ်ဂ့ၤတၢ်ဝါအံၤ တခါစုာ်စုာ်န့ၣ် တမ့ၢ် [cheʹsedh] ဘၣ်, ဘၣ်ဆၣ် တၢ်ဂ့ၤတၢ်ဝါအံၤ ခဲလၢာ်န့ၣ် ပၣ်ဃုာ်လၢ [cheʹsedh] လီၤ.” ပမ့ၢ်အိၣ်ဒီး တၢ်သးကညီၤန့ၣ် ပကပာ်ဖျါထီၣ်အီၤလၢ တၢ်သူၣ်အိၣ်သးအိၣ်အပူၤ, ဒီးပကပာ်ဖျါထီၣ်တၢ်သးကညီၤလၢ ပှၤဂၤအဖီခိၣ် လၢတၢ်သူၣ်ခုသးခုအပူၤလီၤ. ဒီးလၢခံကတၢၢ်န့ၣ် ပကဒိးန့ၢ်ဘၣ် တၢ်သးခု ခီဖျိလၢပဟ့ၣ်တၢ်အဃိန့ၣ်လီၤ.—မၤတၢ် ၂၀:၃၅.
“လဲၤတၢ်ဒီးနကစၢ်လၢနသးစူၤ.” လၢလံာ်စီဆှံအပူၤ တၢ်ကတိၤလၢအမ့ၢ် “လဲၤတၢ်” န့ၣ်အဲၣ်ဒိးစံးဝဲပှၤ “ပိာ်ဝဲကျဲတဘိ လီၤတံၢ်လီၤဆဲး” လီၤ. ပလဲၤတၢ်ဒီးယွၤ ခီဖျိပပိာ်တၢ်မူအကျဲလၢ ကစၢ်ယွၤပာ်ဖျါထီၣ်ဝဲလၢ လံာ်စီဆှံအပူၤလီၤ. ဒ်သိးပကပိာ်ကျဲအံၤအဂီၢ် ပကဘၣ်အိၣ်ဒီးတၢ် “သးစူၤ” မ့တမ့ၢ် တၢ်ဆီၣ်လီၤသးလီၤ. ပမၤကသ့ဒ်လဲၣ်. လၢကစၢ်ယွၤအမဲာ်ညါ ပမ့ၢ်အိၣ်ဒီး တၢ်ဆီၣ်လီၤသးန့ၣ် ပကသ့ၣ်ညါလီၤ ပတၢ်အိၣ်သးလၢ ယွၤအမဲာ်ညါန့ၣ်အိၣ်ဒ်လဲၣ် ဒီးပကတူၢ်လိာ်လၢ ပမၤတၢ်တသ့ခဲလၢာ်ဘၣ်. အဃိ ‘လဲၤတၢ်လၢတၢ်သးစူၤ’ န့ၣ်အဲၣ်ဒိးစံးဝဲ ပအိၣ်ဒီးတၢ်ထံၣ်လၢအဘၣ်လၢ တၢ်လၢကစၢ်ယွၤဃ့ပှၤဒီး တၢ်လၢပမၤအီၤသ့တဖၣ်အဖီခိၣ်လီၤ.
ကစၢ်ယွၤတဃ့ပှၤအါန့ၢ် တၢ်လၢပမၤအီၤသ့တဖၣ်အဃိ ပသးခုဒိၣ်မးလီၤ. အဝဲအဲၣ်ဒိးလၢ ပကမၤအတၢ်မၤလၢ အဂ့ၤကတၢၢ်လီၤ. (ကလီးစဲ ၃:၂၃) ဒီးနၢ်ပၢၢ် ပတၢ်အိၣ်အသးလီၤ. (စံးထီၣ်ပတြၢၤ ၁၀၃: ၁၄) ပမ့ၢ်ဃုသ့ၣ်ညါ တၢ်လၢကစၢ်ယွၤဃ့ပှၤတဖၣ် လၢတၢ်သးစူၤ မ့တမ့ၢ် တၢ်ဆီၣ်လီၤသးအပူၤန့ၣ် ပကဒိးန့ၢ်ဘၣ်တၢ်သးခု ဖဲပလဲၤတၢ်ဒီးယွၤအခါလီၤ. မ့ၢ်နဃုသ့ၣ်ညါ ကျဲလၢနလဲၤတၢ်ဒီးယွၤကသ့န့ၣ်ဧါ. နမ့ၢ်မၤဒ်န့ၣ်န့ၣ် နကဒိးန့ၢ်ဘၣ် ယွၤအတၢ်ဆိၣ်ဂ့ၤ ထူးထူးတီၤတီၤလီၤ.—ကတိၤဒိ ၁၀:၂၂.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(မံကၤ ၂:၁၂) ယၤကိာ်ဧၢ, ယကထၢဖှိၣ်နၤခဲလၢာ် သပှၢ်တၢၢ်လီၤ. ယကပာ်ဖှိၣ်အံၣ်စရ့လးလၢ အအိၣ်လီၤတဲာ်သပှၢ်တၢၢ်လီၤ. ယကပာ်အီၤတပူၤဃီ ဒ်ဘိးစရၤအသိအသိးန့ၣ်, ဒ်သိတဖုလၢ အအီၣ်ဆၣ်အလီၢ်ပူၤအသိးန့ၣ်လီၤ. ကတၢထီၣ်တၢလီၤလၢပှၤကညီအဃိလီၤ.
တၢး၀၇ ၁၁/၁ ကဘျံးပၤ ၁၅ အဆၢ ၆
လံာ်စီဆှံ အတၢ်ပာ်ဖျါလၢ လံာ်ဧိၤဘါဒယၤ, လံာ်ယိၤနါ, ဒီးလံာ်မံကၤ
၂:၁၂—ဝံအတၢ်စံးပာ်လၢအမ့ၢ် ‘ယကပာ်ဖှိၣ်အံၣ်စရ့လး လၢအအိၣ်လီၤတဲာ်သပှၢ်တၢၢ်လီၤ’ ဟဲလၢထီၣ်ပှဲၤထီၣ်လၢ ဆၢကတီၢ်ဖဲလဲၣ်. အဆိကတၢၢ်န့ၣ် ဟဲလၢပှဲၤထီၣ်ဝဲဖဲ ချ.ခ.န ၅၃၇, ဖဲပှၤယူဒၤဖိလၢ အအိၣ်လီၤတဲာ်တ့ၢ်တဖၣ် ဟးထီၣ်လၢကီၢ်ဘၤဘူၤလိၣ်ဒီး ဟဲက့ၤဆူ အထံအကီၢ်အခါလီၤ. မ့မ့ၢ်လၢပစိၤခဲအံၤန့ၣ် ဝံအတၢ်စံးပာ်အံၤ ဟဲလၢပှဲၤထီၣ်ဝဲလၢ “ယွၤအအံၣ်စရ့လး” အဃိလီၤ. (ကလၤတံ ၆:၁၆) ဖဲ ၁၉၁၉ န့ၣ် ခရံာ်ဖိလၢ အဘၣ်တၢ်ဒိးဖှူအီၤတဖၣ် ဘၣ်တၢ်ပာ်ဖှိၣ်ထီၣ်အီၤ “ဒ်သိတဖုလၢ အအီၣ်ဆၣ်အလီၢ်ပူၤ” အသိးလီၤ. ဖဲအဝဲသ့ၣ် ပာ်ဖှိၣ်ထီၣ်အသးဒီး “ပှၤဂီၢ်မုၢ်ဖးဒိၣ်” လၢအမ့ၢ် “သိလၢအဂုၤအဂၤ” လီၤဆီဒၣ်တၢ်ဖဲ ၁၉၃၅ န့ၣ် အဝဲသ့ၣ်အကလုၢ် “တၢထီၣ်တၢလီၤလၢ ပှၤကညီအဃိ” မ့တမ့ၢ် အကလုၢ်ဒိၣ်ထီၣ်လီၤ. (လီၣ်ဖျါ ၇:၉; ယိၤဟၣ် ၁၀:၁၆) အဝဲသ့ၣ် မၤသကိးတၢ်လၢ တၢ်သူၣ်ဆူၣ်သးဆူၣ်အပူၤ လၢတၢ်ဘူၣ်တၢ်ဘါအမ့ၢ်အတီအဂီၢ်လီၤ.
(မံကၤ ၇:၇) မ့မ့ၢ်ယဲဒၣ်အံၤ ယကကွၢ်လၢ်ယွၤအကျဲ, ယကမုၢ်လၢ်တၢ်လၢ တၢ်အုၣ်က့ၤခီၣ်က့ၤယၤအကစၢ်လီၤ. ယကစၢ်န့ၣ် ကဒိကနၣ်ယကလုၢ်လီၤ.
တၢး၀၃ ၈/၁၅ ကဘျံးပၤ ၂၄ အဆၢ ၂၀
ယဟိဝၤယွၤ မုၢ်လၢ်တၢ်မနုၤလၢ ပအိၣ်လဲၣ်
၂၀ ခီဖျိလၢ ပဒိးန့ၢ်ဘၣ်ယဟိဝၤယွၤ အတၢ်ဆိၣ်ဂ့ၤအဃိ ပအဲၣ်ဒိးကွၢ်လိမၤဒိး ဝံမံကၤအဒိအတဲာ်လီၤ. အဝဲတဲဝဲလၢ “ယကမုၢ်လၢ်တၢ်လၢ တၢ်အုၣ်က့ၤခီၣ်က့ၤယၤအကစၢ်လီၤ.” (မံကၤ ၇:၇) တၢ်ကတိၤအံၤ ဘၣ်ထွဲလိာ်အသးဒီး တၢ်လဲၤတၢ်ဒီးယွၤလၢ တၢ်သးစူၤ မ့တမ့ၢ် တၢ်ဆီၣ်လီၤသးအပူၤဒ်လဲၣ်. ပမ့ၢ်မုၢ်လၢ်တၢ် မ့တမ့ၢ် ပမ့ၢ်အိၣ်ဒီးတၢ်သးစူၤန့ၣ် ကမၤစၢၤပှၤဒ်သိး ပသးအဂံၢ်အဘါသုတလီၤစၢ် ခီဖျိလၢ ယွၤအမုၢ်နံၤတဟဲဒံးအဃိန့ၣ်လီၤ. (ကတိၤဒိ ၁၃:၁၂) ပမ့ၢ်တဲတီတီန့ၣ် ပဝဲခဲလၢာ် ပအိၣ်ခိးကွၢ်လၢ် ဟီၣ်ခိၣ်လၢ အအၢအသီအံၤ ကကတၢၢ်ကွံာ်ဝဲအမုၢ်နံၤလီၤ. ဘၣ်ဆၣ် ကိးနွံဒဲးန့ၣ် ပှၤလၢအကထိတဖၣ် စးထီၣ်လဲၤတၢ်ဒီးယွၤသီသီလီၤ. အဃိ ပအိၣ်ဒီးတၢ်ဂ့ၢ်လၢ ပကအိၣ်ဒီး တၢ်မုၢ်လၢ် မ့တမ့ၢ် တၢ်သးစူၤန့ၣ်လီၤ. ဘၣ်ဃးဒီး တၢ်ဂ့ၢ်အံၤန့ၣ် ပှၤလၢအကဲယဟိဝၤပှၤအုၣ်အသး ယံာ်တ့ၢ်လံတဂၤ တဲဝဲလၢ “ယမ့ၢ်ကွၢ်က့ၤဖဲ ယပၣ်ဃုာ်လၢတၢ်စံၣ်တဲၤတဲလီၤတၢ်မၤလၢ အပူၤကွံာ် ၅၅ နံၣ်ဘျဲၣ်အတီၢ်ပူၤန့ၣ် ခီဖျိလၢ ယမုၢ်လၢ်ယဟိဝၤယွၤအဃိ ယတဘၣ်တူၢ်ၡူကွံာ်တၢ်နီတမံၤဘၣ်. လၢတၢ်န့ၣ်အလီၢ် လီၤဂာ်လၢ ယတတူၢ်ဘၣ် တၢ်လၢအလီၤသးအုးတဖၣ်ဘၣ်.” နၤစ့ၢ်ကီး နတူၢ်ဘၣ်ဒ်န့ၣ်ဧါ.
တၢ်ဖးလံာ်စီဆှံ
(မံကၤ ၄:၁-၁၀) ဒီးလၢမုၢ်နံၤအလီၢ်ခံတဖၣ်န့ၣ် တၢ်ကမၤအသးလၢ ယွၤအဟံၣ်အကစၢၢ်န့ၣ် ကအိၣ်ဂၢၢ်ဆိးကျၢၤလၢကစၢၢ်ဒီခိၣ်, ဒီးကဘၣ်တၢ်ပာ်အီၤ ထီၣ်ထီန့ၢ်တၢ်စိခိၣ်တဖၣ်, ဒီးပှၤဂီၢ်မုၢ်ကယွၤလီၤဝဲဆူအအိၣ်လီၤ. ၂ ဒီးပှၤအါကလုာ်ကလဲၤဒီးစံးဝဲ, ဟဲ, လဲၤထီၣ်သကိးဆူ ယွၤအကစၢၢ်, ဆူစီၤယၤကိာ် အကစၢ်အဟံၣ်န့ၣ်တက့ၢ်. ဒီးကနဲၣ်လိပှၤလၢအကျဲတဖၣ်, ဒီးပကပိာ်အကျဲဧိၤကပူၤဧိၤလီၤ. အဂ့ၢ်ဒ်အံၤ, လၢစံယိၣ်အပူၤန့ၣ် တၢ်သိၣ်တၢ်သီကလဲၤထီၣ်, ဒီးယွၤအကလုၢ်ကထါလၢ ယရူၤၡလ့ၣ်အပူၤလီၤ. ၃ ဒီးကစံၣ်ညီၣ် ပှၤဂီၢ်မုၢ်တဖၣ်အကွီၢ်, ဒီးကသိၣ်ဃီၣ် ပှၤအါကလုာ်အိၣ်လၢအယံၤ, ဒီးအဝဲသ့ၣ်ကပိာ်က့ၤ အနးလၢထဲၣ်အကနၣ်, ဒီးအဘီလၢဒီပဲာ်ဃိတၢ်လီၤ. ဒီးပှၤတကလုာ် တယၤထီၣ်လၢၤဘၣ် နးလၢပှၤတကလုာ်အဖီခိၣ်ဘၣ်, ဒီးတမၤလိဒုးသုးတၢ်လၢၤဘၣ်လီၤ. ၄ ဒီးပှၤကဆ့ၣ်နီၤလၢ အစပံးမုၢ်အဖီလာ်, ဒီးအသ့ၣ်ချၢၣ်ဒၢအဖီလာ်စုာ်စုာ်, ဒီးတၢ်တမၤပျံၤဘၣ်အီၤ နီတဂၤဘၣ်. အဂ့ၢ်ဒ်အံၤ, တၢ်သုးမုၢ်ဂီၢ်မုၢ်အယွၤအထးခိၣ် ကတိၤလံတၢ်လံ. ၅ ပှၤဂီၢ်မုၢ်ခဲလၢာ် လဲၤတၢ်တဂၤလၢ အကစၢ်အမံၤပူၤစုာ်စုာ်, ဒီးပကလဲၤတၢ်ပဝဲလၢ ယွၤပကစၢ်အမံၤပူၤလီၤထူလီၤယိာ်လီၤ. ၆ ယွၤစံးဝဲဒၣ်, တၢ်လၢမုၢ်တနံၤန့ၣ် ယကဒုးအိၣ်ဖှိၣ်ပှၤလၢအလဲၤတၢ်တကျဲၢ်တကျဲၢ်, ဒီးယကထၢဖှိၣ်ပှၤလၢ တၢ်ဟီထီၣ်ကွံာ်အီၤ, ဒီးပှၤလၢယမၤအၢအီၤလီၤ. ၇ ဒီးပှၤလၢအလဲၤတကျဲၢ်တကျဲၢ်န့ၣ် ယကပာ်လၢတၢ်အိၣ်လီၤတဲာ်, ဒီးပှၤလၢတၢ်ဟီထီၣ်ကွံာ်အီၤလၢအယံၤန့ၣ် ယကပာ်လၢပှၤတကလုာ်ဆူၣ်, ဒီးယွၤကကဲစီၤပၤလၢ အဖီခိၣ်လၢကစၢၢ်စံယိၣ်အလိၤ တုၤအံၤဆူညါလီၤထူလီၤယိာ်လီၤ. ၈ ဒီးနဲဒၣ်သိတဖုအတၢးထီ, စံယိၣ်အဖိမုၣ်အတၢ်စိခိၣ်ဧၢ, တၢ်ပၢတၢ်လၢအခီၣ်ထံးကဟဲဆူနအိၣ်, ယရူၤၡလ့ၣ် အဖိမုၣ်အဘီအမုၢ်န့ၣ်ကဟဲဝဲလီၤ. ၉ ခဲကနံၣ်အံၤ နကိးပသူထီၣ် မ့ၢ်အဘၣ်မနုၤလဲၣ်. စီၤပၤတအိၣ်လၢ နပူၤဘၣ်ဧါ. နပှၤကူၣ်လိာ်အသးတဖၣ် ဟါမၢ်လၢတၢ်ဆိးကဲးနၤ ဒ်ပိာ်မုၣ်လၢအဘၣ်ဟုးဆါအသိးန့ၣ်ဧါ. ၁၀ ဘၣ်တၢ်ဆိးကဲး, ဒီးဆံးစၢ်တၢ်ဒ်ပိာ်မုၣ်လၢ အဘၣ်ဟုးဆါအသိးန့ၣ်တက့ၢ်, စံယိၣ်အဖိမုၣ်ဧၢ. အဂ့ၢ်ဒ်အံၤ, ခဲကနံၣ်အံၤနဘၣ်ဟးထီၣ်လၢဝ့ၢ်ပူၤ, ဒီးဘၣ်အိၣ်လၢပှၢ်လၢ်ကျါ, ဒီးနဘၣ်လဲၤဆူဘၤဘူၤလိၣ်လီၤ. ဖဲန့ၣ်တၢ်ကမၤပူၤဖျဲးနၤလီၤ, ဖဲန့ၣ်ယွၤကပှ့ၤက့ၤနၤလၢ ဒုၣ်ဒါအစုပူၤလီၤ.
လါနိၣ်ဝ့ဘၢၣ် ၂၇–လါဒံၣ်စ့ဘၢၣ် ၃
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | နၤဃူၣ် ၁–ဃဘးကူာ် ၃
“သူၣ်ဆူၣ်သးဆူၣ်လၢ နီၢ်သးတခီဒီး ဆိးသီထီဘိ”
(ဃဘးကူာ် ၂:၁-၄) ယကဆၢထၢၣ်လၢပၢၤတၢ်အလီၢ်, ဒီးယကပာ်ယသးလၢ ယတိာ်ယတာ်အဖီခိၣ်, ဒီးယကကွၢ်တၢ်လၢ အကစံးဘၣ်ယၤဒ်လဲၣ်ဒ်လဲၣ်. ဒီးယကစံးဆၢတၢ်ဘၣ်ဃးဒီး ယကဒူးကဒ့ၣ်တၢ်ဒ်လဲၣ်ဒ်လဲၣ်န့ၣ်လီၤ. ၂ ဒီးယွၤစံးဆၢယၤ ဒီးစံးဝဲဒၣ်, ကွဲးတၢ်ထံၣ်လၢညါခီ, ဒီးကွဲးလၢတၢ်ဘ့ၣ်ဘၣ်အလိၤ, ဒ်သိးပှၤလၢအဖးတၢ်န့ၣ် ကဃ့ၢ်ဝဲတက့ၢ်. ၃ အဂ့ၢ်ဒ်အံၤ, တၢ်ထံၣ်လၢညါခီန့ၣ် အိၣ်ဝဲလၢတၢ်အဆၢအကတီၢ်အဂီၢ်, ဒီးကကတိၤတၢ်လၢတၢ်အကတၢၢ်, ဒီးတကတိၤကဘျံးကဘျၣ်ဘၣ်. မ့ၢ်သုးနံၤသုးသီဘၣ်ဆၣ်ဒီး, အိၣ်ခိးအီၤတက့ၢ်. အဂ့ၢ်ဒ်အံၤ, ကဟဲသပှၢ်တၢၢ် ဒီးတသုးနံၤသုးသီဘၣ်. ၄ ကွၢ်ကွၢ်, ပှၤလၢအပာ်ကဖိအသးန့ၣ် အသးတလိၤ လၢအပူၤဘၣ်. မ့မ့ၢ်ပှၤအတီအလိၤန့ၣ် ကမူဝဲလၢအတၢ်နာ်လီၤ.
တၢး၀၇ ၁၁/၁၅ ကဘျံးပၤ ၁၀ အဆၢ ၃–၅
လံာ်စီဆှံ အတၢ်ပာ်ဖျါလၢ လံာ်နၤဃူၣ်, လံာ်ဃဘးကူာ် ဒီးလံာ်စဖါနယၤ
၂:၁. ဒ်ဝံဃဘးကူာ်အသိး ပကဘၣ်ဆိးသီဒီး သူၣ်ဆူၣ်သးဆူၣ်လၢ နီၢ်သးတခီလီၤ. တကးဒံးဘၣ် ပကဘၣ်အိၣ်ကတဲာ်ကတီၤပသးလၢ ပကဆီတလဲ ပတၢ်ဆိကမိၣ်ဒ်တၢ် “ကဒူးကဒ့ၣ်” မ့တမ့ၢ် တၢ်သိၣ်ဃီၣ်လၢ ပဒိးန့ၢ်ဘၣ်အီၤအသိးန့ၣ်လီၤ.
၂:၃; ၃:၁၆. ဖဲပအိၣ်ခိး ယဟိဝၤယွၤ အမုၢ်နံၤလၢ တၢ်နာ်အပူၤအခါ မ်ပကပလီၢ်ပသးဒ်သိး ပတၢ်သးဆူၣ် သုတလီၤမၢ်ကွံာ်တဂ့ၤ.
၂:၄. ဒ်သိးပကပူၤဖျဲးလၢ ယဟိဝၤယွၤ အတၢ်စံၣ်ညီၣ်အမုၢ်နံၤအဂီၢ် ပကဘၣ်အိၣ်ဒီး တၢ်တူၢ်န့ၢ်ခီၣ်ကဲဒီး တၢ်သးတီလီၤ.—ဧ့ၤဘြံၤ ၁၀:၃၆-၃၈.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(နၤဃူၣ် ၁:၈) မ့မ့ၢ်လၢတၢ်လုၣ်ဘၢတၢ်အတၢ်လုာ်န့ၣ်, ကမၤလၢာ်ကွံာ်အလီၢ်, ဒီးတၢ်ခံးကလူၤအဒုၣ်အဒါလီၤ.
(နၤဃူၣ် ၂:၆) ထံမိၢ်ပှၢ်အတြဲၤ အိၣ်အိးထီၣ်အသး, ဒီးအနူၢ်အစီၤန့ၣ်ပှံၢ်ကွံာ်ဝဲလီၤ.
တၢး၀၇ ၁၁/၁၅ ကဘျံးပၤ ၉ အဆၢ ၂
လံာ်စီဆှံ အတၢ်ပာ်ဖျါလၢ လံာ်နၤဃူၣ်, လံာ်ဃဘးကူာ် ဒီးလံာ်စဖါနယၤ
၂:၆—“ထံမိၢ်ပှၢ်အတြဲၤ” တဖၣ်လၢအအိၣ်အိးထီၣ်အသးန့ၣ် မ့ၢ်မနုၤလဲၣ်. မ့ၢ်ဝဲ ထံကျိထဲၤကြံးအတြဲၤတဖၣ်လၢ အအိၣ်လၢ ဝ့ၢ်နံၤနဝ့လီၤ. ဖဲ ချ.ခ.န. ၆၃၂ န့ၣ်ဘၤဘူၤလိၣ်ဒီးမၤဒဲအစီၤပၤ ပာ်ဖှိၣ်ထီၣ်အသးဒီး လဲၤဒုးဝဲ ဝ့ၢ်နံၤနဝ့ဘၣ်ဆၣ် ပှၤဝ့ၢ်ဖိတဖၣ် တပျံၤတၢ်ဘၣ်. ခီဖျိလၢ ဝ့ၢ်ခိၣ်ဒူလၢ အကျၢၤအဃိ အဝဲသ့ၣ်ဆိကမိၣ်ဝဲလၢ ပှၤဝာ်နုာ်လၢဝ့ၢ်ပူၤတန့ၢ်ဘၣ်. ဘၣ်ဆၣ် တၢ်စူၤလီၤဒိၣ်ဒိၣ်ကလဲာ်အဃိ ထံကျိထဲၤကြံး အထံပှဲၤလုာ်ကွံာ်ဝဲလီၤ. ပှၤကွဲးတၢ်စံၣ်စိၤတဲစိၤ ဒံၤဧိၤဒိရး တဲဝဲလၢ “ထံလုၣ်ဘၢကွံာ် တၢ်လီၢ်တနီၤနီၤလၢ ဝ့ၢ်အပူၤ ဒီးဝ့ၢ်ခိၣ်ဒူအါတက့ၢ်န့ၣ် လီၤပှီၢ်ကွံာ်ဝဲလီၤ.” အဃိ ဒ်ဝံအတၢ်စံးပာ်အိၣ်ဝဲအသိး ထံမိၢ်ပှၢ် အတြဲၤတဖၣ်လၢ ဝ့ၢ်နံၤနဝ့န့ၣ် အိးထီၣ်အသးဒီး ဝ့ၢ်အံၤဟးဂီၤကွံာ်ဝဲ ဒ်မ့ၣ်အူအီၣ်ကွံာ် တၢ်ကမှံလၢ အဃ့ထီ ချ့သဒံးအသိးလီၤ.—နၤဃူၣ် ၁:၈-၁၀.
(ဃဘးကူာ် ၃:၁၇-၁၉) ချၢၣ်ဒၢမ့ၢ်တဆှိးဘၣ် ဘၣ်ဆၣ်, တၤသၣ်မ့ၢ်တအိၣ်ဘၣ်လၢ စပံးမုၢ်အလိၤဘၣ်ဆၣ်, သ့ၣ်စၤယံးအသၣ်မ့ၢ်လီၤဘီဘၣ်ဆၣ်, တၢ်အီၣ်တၢ်အီ မ့ၢ်တအိၣ်လၢပှၢ်လၢ်ကျါဘၣ်ဆၣ်, သိဒီးမဲာ်တဲးလဲးမ့ၢ်လၢာ်ဝဲလၢ ကရၢပူၤဘၣ်ဆၣ်, ဒီးဂီၤဘုၣ်ဂီၤဖံးမ့ၢ်တအိၣ်လၢ အလီၢ်ပူၤဘၣ်ဆၣ်ဒီး, ၁၈ ယသူၣ်ကပိၢ်ယသးကဝးလၢယွၤအပူၤ, ယကသူၣ်ဖှံသးညီ လၢတၢ်အုၣ်က့ၤခီၣ်က့ၤ အကစၢ်အပူၤလီၤ. ၁၉ ယွၤယကစၢ်မ့ၢ်ယဂံၢ်ယဘါလီၤ. မၤယခီၣ်ဒ်တၤဟိမိၢ်အခီၣ်အသိး, ဒုးလဲၤယၤလၢယလီၢ်ထီၣ်ထီအဖီခိၣ်လီၤ. လၢတၢ်အခိၣ်အဂီၢ်, အိၣ်ဒီးယနီၣ်ဒ့တၢ်တဖၣ်.
တၢး၀၇ ၁၁/၁၅ ကဘျံးပၤ ၁၀ အဆၢ ၁၀
လံာ်စီဆှံ အတၢ်ပာ်ဖျါလၢ လံာ်နၤဃူၣ်, လံာ်ဃဘးကူာ် ဒီးလံာ်စဖါနယၤ
၃:၁၇-၁၉. ဖဲအၢ်မက့းဒိၣ် တချုးတုၤအဆၢကတီၢ်ဒီး ဟဲတုၤဝဲအဆၢကတီၢ် ပမ့ၢ်ထံၣ်ဘၣ်ဒီး တၢ်အိၣ်သးအကီအခဲသနာ်က့ ပမ့ၢ်ဆဲးမၤအတၢ်ဘၣ်အသးလၢ တၢ်သးခုအပူၤန့ၣ် ပနာ်သ့သပှၢ်ကတၢၢ်လၢ ယဟိဝၤယွၤကဟ့ၣ်ပှၤ ‘တၢ်ဂံၢ်တၢ်ဘါ’ လီၤ.
တၢ်ဖးလံာ်စီဆှံ
(ဃဘးကူာ် ၂:၁၅–၃:၆) ပှၤလၢအဟ့ၣ်သံးလၢပှၤလၢအဃၢၤ, ဒီးလူလီၤနသးကဲၤထီၣ်, ဒီးဒုးအီမူၤအီၤဒ်သိး နကကွၢ်အတၢ်အိၣ်ဘ့ၣ်ဆ့န့ၣ် ဘၣ်အဖှီၣ်လီၤ. ၁၆ နပှဲၤဒီးတၢ်မဲာ်ဆှး, တမ့ၢ်ဘၣ်ဒီးတၢ်လၤကပီၤဘၣ်. အီစ့ၢ်ကီးနဲ, ဒီးဒုးနဲၣ်လၢနတဒိးဘၣ် တၢ်ကူးတရံးဘၣ်န့ၣ်တက့ၢ်. လီခီလၢယွၤအစုထွဲအပူၤ ကဟဲတရံးဆူနအိၣ်, ဒီးတၢ်မဲာ်ဆှးကအိၣ်လၢ နလၤကပီၤအဖီခိၣ်လီၤ. ၁၇ အဂ့ၢ်ဒ်အံၤ, တၢ်မၤန့ၢ်ဆူၣ်လဘၤနိၣ်န့ၣ် ကကျၢၢ်ဘၢနၤ, ဒီးတၢ်မၤဟးဂီၤဆၣ်ဖိကီၢ်ဖိလၢ အမၤပျံၤမၤဖုးအီၤ, လၢပှၤကညီအသွံၣ်အဃိ, ဒီးလၢတၢ်မၤန့ၢ်ဆူၣ် ထံဧိၤကီၢ်ဧိၤ, ဒီးခူဧိၤဝ့ၢ်ဧိၤ, ဒီးကယဲၢ်ပှၤလၢ အအိၣ်ဝဲလၢအပူၤခဲလၢာ်အဃိလီၤ. ၁၈ တၢ်ဂီၤလၢပှၤတ့စိးပျၤဝဲ, တၢ်ဂီၤသိအသး, ဒီးပှၤသိၣ်လိတၢ်ကဘျံးကဘျၣ်, ပှၤတ့တၢ်ဂီၤတအုၣ်, ဒီးသန့ၤအသးလၢတၢ်လၢအတ့ဝဲန့ၣ် မ့ၢ်အဘျုးမနုၤလဲၣ်. ၁၉ ပှၤလၢအစံး သ့ၣ်ဧိၤဝၣ်ဧိၤ ဂဲၤဆၢထၢၣ်တက့ၢ်, ဒီးလၢၢ်ဧိၤလ့ဧိၤတအုၣ်န့ၣ် ဖုသံနီၣ်တက့ၢ်န့ၣ်ဘၣ်အဖှီၣ်လီၤ. အဝဲန့ၣ်ကသိၣ်လိတၢ်စ့ၢ်ကီးဧါ. ကွၢ်ကွၢ်, အဝဲန့ၣ် ပီၤဝဲဒီးထူဒီးစ့ဘၣ်ဆၣ်ဒီး, အသါတအိၣ်ဘၣ်လၢအပူၤ လ့ၤတက့ၤဘၣ်. ၂၀ မ့မ့ၢ်ယွၤအိၣ်ဝဲလၢ အနူၢ်စီဆှံအပူၤလီၤ. အိၣ်ဘှီၣ်ကလာ်လၢအမဲာ်ညါ, ပှၤဟီၣ်ခိၣ်ဖိခဲလၢာ်သ့ၣ်ဧၢ. ၃ စီၤဃဘးကူာ်အတၢ်ထုကဖၣ် ဒ်ၡံကအိနိးအသိး. ၂ ယွၤဧၢ, ယနၢ်ဟူနကစီၣ်, ဒီးယပျံၤတၢ်. ယွၤဧၢ, လၢနံၣ်ဧိၤလါဧိၤအပူၤ မၤမူထီၣ်က့ၤနတၢ်မၤ, လၢနံၣ်ဧိၤလါဧိၤအပူၤန့ၣ် လီၣ်ဖျါထီၣ်အီၤတက့ၢ်. သ့ၣ်နီၣ်ထီၣ်က့ၤတၢ်သးကညီၤ လၢတၢ်သးထီၣ်အပူၤတက့ၢ်. ၃ ယွၤဟဲဝဲလၢတ့ၤမၣ်, ဒီးတၢ်စီဆှံတဂၤလၢကစၢၢ်ပၤရၣ်, စ့လၤ. အလၤကပီၤကျၢၢ်ဘၢမူခိၣ်, ဒီးဟီၣ်ခိၣ်ပှဲၤဝဲဒီး အတၢ်စံးထီၣ်ပတြၢၤလီၤ. ၄ အတၢ်ကယဲၢ်ကယူာ် မၤအသးဒ်မုၢ်အတၢ်ကပီၤအသိး, အစုလိၤဧူၢ်ထီၣ်, ဒီးအကဟုကညီၢ် အိၣ်ခူသူၣ်ဖဲန့ၣ်လီၤ. ၅ တၢ်သံသတြိာ်လဲၤဝဲလၢအမဲာ်ညါ, ဒီးတၢ်သံသတြိာ်မ့ၣ်အူ လဲၤတၢ်လၢအခီၣ်ထံးလီၤ. ၆ အိၣ်ကတီၢ်ဝဲ, ဒီးဟီၣ်ခိၣ်ဟူးဝးဝဲ, ကွၢ်ဝဲ, ဒီးဒုးကနိးကစုာ်ပှၤကလုာ်တဖၣ်, ကစၢၢ်ကလိအထူအယိာ်သ့ၣ်ဖးလီၤအသး, တၢ်စိခိၣ်အထူအယိာ်သကူးလီၤအသးလီၤ. အကျဲဧိၤအကပူၤဧိၤ အိၣ်လၢပျၢၤလၢကစၢၢ်လီၤ.