^၁၀ နီၢ်မၤရံဒီးစီၤယိၤသး ထံၣ်ဘၣ်ဝဲလၢ သဝီဖိတဖျၢၣ်အံၤ ပှဲၤဝဲဒီးပှၤဂီၢ်မုၢ်တဖၣ်လီၤ. ပှၤအဂၤတဖၣ်န့ၣ် ဟဲက့ၤတုၤဆိဝဲလၢ အဝဲသ့ၣ်အမဲာ်ညါ ဒ်သိးကဆဲးလီၤအမံၤအဂီၢ်လီၤ. လၢတၢ်န့ၣ်အဃိ ပှၤတမှံၤအဒၢးန့ၣ် ပှဲၤဝဲလံ.b မ့ၢ်လၢနီၢ်မၤရံဒီးစီၤယိၤသး ဃုတၢ်လီၢ်တၢ်ကျဲတဘၣ်ဘၣ်အဃိ ဘၣ်မံဝဲလၢဂီၤဖံးကရၢပူၤလီၤ. ဖဲနီၢ်မၤရံ အဟၢဖၢဆါထီၣ်အခါ အဝဲဘၣ်တူၢ်တၢ်လၢအတတူၢ်ဘၣ်ဝဲနီတဘျီဒံးဘၣ်. ဒီးစီၤယိၤသး ကသူၣ်ကိၢ်သးဂီၤတၢ်လၢအမါအဂီၢ်ဒိၣ်မးလီၤ. နီၢ်မၤရံ ဘၣ်အိၣ်ဖျဲၣ်ထီၣ်အဖိလၢ ဂီၤဖံးကရၢပူၤန့ၣ် တမ့ၢ်တၢ်လၢအညီဝဲလၢအဂီၢ်နီတစဲးဘၣ်.

၁၁. (က) ဘၣ်မနုၤအဃိ ပှၤပိာ်မုၣ်လၢအဂၤသ့ၣ်တဖၣ် ဒိသူၣ်ဒိသးလၢ နီၢ်မၤရံအဖီခိၣ်သ့ဝဲလဲၣ်. (ခ) ဘၣ်မနုၤအဃိ ယ့ၣ်ၡူးန့ၣ်ဘၣ်တၢ်ကိးအီၤလၢ “ဖိဝဲၢ်ကိ” လဲၣ်.

^၁၁ ပှၤပိာ်မုၣ်သ့ၣ်တဖၣ်န့ၣ် နၢ်ပၢၢ်စၢၤနီၢ်မၤရံ အတၢ်အိၣ်သးသ့ဝဲလီၤ. ပူၤကွံာ်အနံၣ် ၄,၀၀၀ ဘျဲၣ်န့ၣ်ယဟိဝၤယွၤ တဲဆိပာ်စၢၤဝဲလၢ ခီဖျိလၢပန့ၢ်သါဘၣ် တၢ်ဒဲးဘးအဃိ ဖဲပိာ်မုၣ်တဖၣ်အိၣ်ဖျဲၣ်ထီၣ် အဖိအဆၢကတီၢ် အဟၢဖၢကဆါဝဲလီၤ. (၁ မိၤ. ၃:၁၆) နီၢ်မၤရံစ့ၢ်ကီး ဖဲအိၣ်ဖျဲၣ်ထီၣ်ဝဲအဖိအခါန့ၣ် အဟၢဖၢကဆါဝဲဒိၣ်မးလီၤ. နီၢ်မၤရံ တူၢ်ဘၣ်ဝဲဒ်လဲၣ်န့ၣ် လံာ်လူၤကၣ်တပာ်ဖျါထီၣ်ဝဲဘၣ်. ပာ်ဖျါထီၣ်ဝဲယိယိဖိလၢ နီၢ်မၤရံ “ဆံးစၢ်န့ၢ်အဖိဝဲၢ်ကိပိာ်ခွါ” လီၤ. (လူၤကၣ် ၂:၇) ခဲအံၤန့ၣ်နီၢ်မၤရံ အိၣ်ဖျဲၣ်ထီၣ်ဝဲအ “ဖိဝဲၢ်ကိ” လံ. ဒီးဒ်တၢ်ဆၢကတီၢ်လဲၤပူၤကွံာ်အသိး အဝဲအိၣ်ဖျဲၣ်ကဒီးဝဲ အဖိလၢအဂၤန့ၣ် အိၣ်ဝဲအစှၤကတၢၢ်ဃုဂၤလီၤ. (မၢ်ကူး ၆:၃) မ့မ့ၢ်အဖိခွါဝဲၢ်ကိတဂၤအံၤ လီၤဆီဒီးအဖိလၢအဂၤဒိၣ်မးလီၤ. ဖိဝဲၢ်ကိလၢ နီၢ်မၤရံ အိၣ်ဖျဲၣ်ထီၣ်အံၤ မ့ၢ်ယဟိဝၤယွၤအ “တၢ်ဘၣ်တ့ခဲလၢာ် အပှၤဝဲၢ်ကိ” န့ၣ်လီၤ.—ကလီး. ၁:၁၅.

၁၂. နီၢ်မၤရံ ပုာ်မံလီၤအဖိဖဲလဲၣ်, ဒီးဂီၤဖံးကရၢန့ၣ် မၤအသးဒ်လဲၣ်.

^၁၂ လၢခံန့ၣ် လံာ်စီဆှံပာ်ဖျါထီၣ်ဝဲလၢ နီၢ်မၤရံ “ဘိၣ်ဘံဃာ်အီၤလၢတၢ်ကံးညာ်, ဒီးပုာ်မံလီၤအီၤလၢ ဂီၤဖံးအီၣ်တၢ်အလီၢ်လီၤ.” (လူၤကၣ် ၂:၇) ဖဲပှၤတ့တၢ်ဂီၤ မ့တမ့ၢ် ပှၤထီၣ်ပူ ဘၣ်ဃးဒီးခရံာ်အိၣ်ဖျဲၣ်ထီၣ်အဂ့ၢ်န့ၣ် ဒုးဆိကမိၣ်ပှၤလၢ နီၢ်မၤရံအိၣ်ဘၣ်ဝဲမုာ်မုာ်ခုၣ်ခုၣ်လၢ ဂီၤဖံးကရၢပူၤဒီး မ့ၢ်တၢ်လီၢ်လၢအဂ့ၤလၢ အဝဲကအိၣ်ဖျဲၣ်ထီၣ်အဖိအဂီၢ်လီၤ. နီၢ်နီၢ်န့ၣ် တမ့ၢ်ဒ်န့ၣ်ဘၣ်. နီၢ်မၤရံ ပုာ်မံလီၤ ဖိသၣ်လၢ ဂီၤဖံးအီၣ်တၢ်အလီၢ်န့ၣ် အဲၣ်ဒိးစံးဝဲလၢ ဂီၤဖံးအီၣ်ဆၣ်အကျိးပူၤလီၤ. ဒီးဂီၤဖံးကရၢန့ၣ် တမ့ၢ်တၢ်လီၢ်လၢ အကဆှဲကဆှီဘၣ် ဒီးကလံၤဆှံတအိၣ်စ့ၢ်ကီးဘၣ်. မိၢ်ပၢ်တဖၣ်န့ၣ် တအဲၣ်ဒိးအိၣ်ဖျဲၣ်ထီၣ်အဖိလၢ ဂီၤဖံးအကရၢပူၤနီတဂၤဘၣ်. ကအဲၣ်ဒိးအိၣ်ဖျဲၣ်ထီၣ်အဖိလၢ တၢ်လီၢ်လၢအဂ့ၤကတၢၢ်လီၤ. စီၤယိၤသးဒီးနီၢ်မၤရံန့ၣ် ကအဲၣ်ဒိးအိၣ်ဖျဲၣ်ထီၣ်ဝဲ ယဟိဝၤယွၤအဖိခွါ လၢတၢ်လီၢ်လၢအဂ့ၤကတၢၢ်, တမ့ၢ်ဘၣ်ဧါ.

၁၃. (က) ဒ်တၢ်အိၣ်ဒီးအဝဲသ့ၣ်အသိး နီၢ်မၤရံဒီးစီၤယိၤသး ဂုာ်ကျဲးစၢးဝဲ အဂ့ၤကတၢၢ်လၢကျဲဒ်လဲၣ်. (ခ) မုၢ်မဆါတနံၤအံၤ မိၢ်ပၢ်လၢအအိၣ်ဒီး တၢ်ကူၣ်သ့တဖၣ် ကွၢ်လိမၤဒိး နီၢ်မၤရံဒီးစီၤယိၤသး သ့လၢကျဲဒ်လဲၣ်.

^၁၃ အဝဲသ့ၣ် တဆိကမိၣ်ဝဲထဲ အတၢ်အိၣ်သးလၢ အကီအခဲသ့ၣ်တဖၣ်အံၤဘၣ်. မ့ၢ်ကီလၢအဝဲသ့ၣ်အဂီၢ် ဘၣ်ဆၣ် ဂုာ်ကျဲးစၢးဝဲလၢအဂ့ၤကတၢၢ်လီၤ. အဒိ ဒ်သိးဖိသၣ်ဖိအံၤကကလၢၤ ဒီး ကပူၤဖျဲးလၢတၢ်ဘၣ်ယိၣ်အဂီၢ် နီၢ်မၤရံဘိၣ်ဘံအီၤလၢ တၢ်ကံးညာ်ဒီး ပုာ်မံလီၤအီၤကယီကယီလၢ ဂီၤဖံးအီၣ်ဆၣ်အကျိးပူၤလီၤ. နီၢ်မၤရံအိၣ်ဒီး တၢ်သူၣ်ကိၢ်သးဂီၤအကလုာ်ကလုာ် ဘၣ်ဆၣ် အဝဲဂုာ်ကျဲးစၢးကွၢ်ထွဲဝဲအဖိ လၢအဂ့ၤကတၢၢ်လီၤ. နီၢ်မၤရံဒီးစီၤယိၤသး ကသ့ၣ်နီၣ်ထီၣ်က့ၤဝဲလၢ တၢ်အရ့ဒိၣ်ကတၢၢ်န့ၣ် မ့ၢ်ဝဲလၢ အဝဲသ့ၣ်ကသိၣ်လိအဖိခွါ ဒ်သိးကအဲၣ်ယဟိဝၤယွၤအဂီၢ်လီၤ. (ဖး ၅ မိၤၡ့ ၆:၆-၈ တက့ၢ်.) ဒ်န့ၣ်အသိး မုၢ်မဆါတနံၤအံၤ ပှၤဟီၣ်ခိၣ်ဖိအါတက့ၢ် တပာ်ဒိၣ်တၢ်ဘူၣ်တၢ်ဘါသနာ်က့ မိၢ်ပၢ်လၢအအိၣ်ဒီးတၢ်ကူၣ်သ့တဖၣ်န့ၣ် ကမၤစၢၤအဖိ ဒ်သိးကပာ်ဆိကစၢ်ယွၤအတၢ်မၤလၢ နီၣ်ဂံၢ်တၢန့ၣ်လီၤ.