ခရံာ်ဖိအတၢ်အိၣ်မူဒီး တၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိ အတၢ်ဂ့ၢ်ဘျးစဲ
လါအီကူး ၆–၁၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | လူၤကၣ် ၁၇–၁၈
“ပာ်ဖျါ တၢ်သ့ၣ်ညါဆၢတၢ်ဘျုး”
(လူၤကၣ် ၁၇:၁၁-၁၄) ဒီးတၢ်မၤအသးလၢ အလဲၤဆူယရူၤၡလ့ၣ်, ဒီးလဲၤခီဂာ်ၡၤမရံဒီး ကၤလံၤလါအခၢၣ်သးလီၤ. ၁၂ ဒီးကလဲၤနုာ်တ့ၢ်ဝဲလၢ သဝီတဖျၢၣ်အပူၤဒီး, ပှၤဘၣ်တၢ်ဆါအၢဆံဆဲၣ်ဂၤဟဲသဂၢၢ်အီၤ, ဒီးဆၢထၢၣ်အိၣ်သကွ့ၤဝဲ, ၁၃ ဒီးကိးပသူထီၣ်ဒီးစံးဝဲဒၣ်, ယ့ၣ်ၡူးကစၢ်ဧၢ, သူၣ်ကညီၤသးကညီၤ လၢ်ပှၤတက့ၢ်. ၁၄ ဒီးထံၣ်ဝဲဒီးစံးဘၣ်အီၤ, လဲၤဒုးနဲၣ်သုသးလၢပှၤလုၢ်တၢ်အဒိၣ်တက့ၢ်. ဒီးတၢ်မၤအသးလၢ အလဲၤတၢ်အဖၢမုၢ်ဒီး, ကဆှီထီၣ်က့ၤလီၤ.
nwtsty တၢ်မၤနီၣ်တဖၣ်လၢ လူၤ. ၁၇:၁၂, ၁၄
ပှၤဘၣ်တၢ်ဆါအၢဆံဆဲၣ်ဂၤ– လၢပျၢၤန့ၣ်, ပှၤဘၣ်တၢ်ဆါအၢတဖၣ်န့ၣ် ဖျါလၢအဝဲသ့ၣ် ဘၣ်အိၣ်ဖှိၣ်တပူၤဃီ မ့တမ့ၢ်ဘၣ်အိၣ်ဝဲတကရူၢ်ဃီ ဒ်သိးကမၤစၢၤလိာ်အသးယၢ်ခီယၢ်ခီန့ၣ်လီၤ. (၂ စီၤပၤ ၇:၃-၅) ကစၢ်ယွၤအတၢ်သိၣ်တၢ်သီအိၣ်လၢ ပှၤလၢအဘၣ်တၢ်ဆါအၢတဖၣ် ကဘၣ်အိၣ်လီၤဆီဝဲန့ၣ်လီၤ. ပှၤဘၣ်တၢ်ဆါအၢတဂၤန့ၣ် ဘၣ်ဟ့ၣ်ပလီၢ်စ့ၢ်ကီးပှၤဂၤလၢ အကလုၢ်ဒီးဘၣ်ကိးထီၣ်ဝဲ, တကဆှီဘၣ်, တကဆှီဘၣ်န့ၣ်လီၤ. (၃ မိၤ. ၁၃:၄၅, ၄၆) တၢ်သိၣ်တၢ်သီအိၣ်လၢ ပှၤဘၣ်တၢ်ဆါအၢတဖၣ် ကဘၣ်အိၣ်ယံၤဒီးပှၤဂၤအဃိ အဝဲသ့ၣ် ဆၢထၢၣ်အိၣ်ယံၤဝဲ ဒီးယ့ၣ်ၡူးန့ၣ်လီၤ.—ကွၢ်တၢ်မၤနီၣ်လၢ မး. ၈:၂ ဒီး Glossary, “ပှၤဘၣ်တၢ်ဆါအၢ; တၢ်ဆါအၢ.”
လဲၤဒုးနဲၣ်သုသးလၢပှၤလုၢ်တၢ်အဒိၣ်တက့ၢ်– ဖဲယ့ၣ်ၡူးအိၣ်လၢဟီၣ်ခိၣ်အခါ အဝဲအိၣ်ဒံးလၢ စီၤမိၤၡ့အတၢ်သိၣ်တၢ်သီအဖီလာ်အဃိ အၢၣ်လီၤတူၢ်လိာ်ဝဲပှၤလုၢ်တၢ်အဒိၣ် စီၤအၤဟရိၣ်အလီၢ်ဒီး မၢဝဲပှၤဘၣ်တၢ်ဆါအၢလၢ အတၢ်ဆါအၢဘျါက့ၤသ့ၣ်တဖၣ် ကလဲၤဒုးနဲၣ်အသး ဆူပှၤလုၢ်တၢ်အဒိၣ်အအိၣ်န့ၣ်လီၤ. (မး. ၈:၄; မၢ်. ၁:၄၄) လၢစီၤမိၤၡ့အတၢ်သိၣ်တၢ်သီအပူၤန့ၣ် ပှၤလုၢ်တၢ်အဒိၣ်တဂၤ ဘၣ်ဆၢတဲာ်ဝဲလၢ ပှၤဘၣ်တၢ်ဆါအၢတဂၤအတၢ်ဆါဘျါက့ၤလံန့ၣ်လီၤ. ခီဖျိလၢအတၢ်ဆါဘျါက့ၤအဃိ အဝဲသ့ၣ်ကဘၣ်လဲၤဆူတၢ်လုၢ်ဟံၣ်ဒီး ဘၣ်လုၢ်ထီၣ်ဝဲ ထိၣ်အကဆှီခံဘ့ၣ်လၢအမူဝဲ, ဒီးသ့ၣ်ဆှိအ့ရ့း, ဒီးတၢ်ဂီၤ, ဒီးကဖျီၣ်အ့စိးလီၤ.—၃ မိၤ. ၁၄:၂-၃၂.
(လူၤကၣ် ၁၇:၁၅, ၁၆) ဒီးလၢပှၤတဖၣ်အကျါတဂၤ, တုၤအသ့ၣ်ညါလၢအဘျါက့ၤဝဲဒီး, ဟဲက့ၤကဒါက့ၤ ဒီးစံးထီၣ်ပတြၢၤယွၤလၢအကလုၢ်ဖးဒိၣ်လီၤ. ၁၆ ဒီးထိၣ်လီၤပှီၤအသးလၢအခီၣ်ထံး, ဒီးစံးထီၣ်ပတြၢၤအဘျုးအဖှိၣ်လီၤ. ဒီးပှၤတဂၤန့ၣ် မ့ၢ်ပှၤၡၤမရံဖိလီၤ.
(လူၤကၣ် ၁၇:၁၇, ၁၈) ဒီးယ့ၣ်ၡူးကတိၤဆၢတၢ် ဒီးစံးဝဲဒၣ်, မ့ၢ်ပှၤဆံဆဲၣ်ဂၤန့ၣ် ကဆှီထီၣ်ဝဲတမ့ၢ်ဘၣ်ဧါ. ဒီးပှၤခွံဂၤန့ၣ်အိၣ်ဖဲလဲၣ်. ၁၈ ပှၤဟဲက့ၤကဒါက့ၤ, ဒီးစံးထီၣ်ပတြၢၤယွၤ အဘျုးအဖှိၣ်ပထံၣ်န့ၢ် ထဲပှၤတခီဘီမုၢ်ဖိ တဂၤအံၤဧိၤဧါ.
တၢး၀၈ ၈/၁ ကဘျံးပၤ ၁၄-၁၅ အဆၢ ၈-၉
ဘၣ်မနုၤအဃိ ဘၣ်ပာ်ဖျါ တၢ်စံးဘျုးစံးက့ၤလဲၣ်
ယ့ၣ်ၡူးန့ၣ် မ့ၢ်အကွၢ်ကပာ်ကွံာ်ဝဲ ပှၤလၢအသးပ့ၤနီၣ် စံးဘျုးက့ၤအီၤတဖၣ်န့ၣ်ဧါ. လံာ်စီဆှံ ဆဲးပာ်ဖျါဝဲလၢ– “ဒီးယ့ၣ်ၡူးကတိၤဆၢတၢ် ဒီးစံးဝဲဒၣ်, မ့ၢ်ပှၤဆံဆဲၣ်ဂၤန့ၣ် ကဆှီထီၣ်ဝဲတမ့ၢ်ဘၣ်ဧါ. ဒီးပှၤခွံဂၤန့ၣ်အိၣ်ဖဲလဲၣ်. ပှၤဟဲက့ၤကဒါက့ၤ, ဒီးစံးထီၣ်ပတြၢၤယွၤ အဘျုးအဖှိၣ်ပထံၣ်န့ၢ် ထဲပှၤတခီဘီမုၢ်ဖိ တဂၤအံၤဧိၤဧါ.”—လူၤကၣ် ၁၇:၁၇, ၁၈.
ပှၤဘၣ်တၢ်ဆါအၢခွံဂၤန့ၣ် တမ့ၢ်ပှၤအၢပှၤသီဘၣ်. အဝဲသ့ၣ်န့ၣ် ပာ်ဖျါထီၣ်တၢ်နာ်ယ့ၣ်ၡူးလၢ ပှၤအါဂၤအမဲာ်ညါဒီး မၤဝဲဒ်ယ့ၣ်ၡူးမၢအီၤအသိး ဒီးလဲၤဝဲဆူယရူၤၡလ့ၣ် ဒ်သိးကဒုးနဲၣ်အသးလၢ ပှၤလုၢ်တၢ်အဒိၣ်တဖၣ်န့ၣ်လီၤ. ခီဖျိယ့ၣ်ၡူးမၤဘျါအဝဲသ့ၣ်တဖၣ်လၢ တၢ်သူၣ်အိၣ်သးအိၣ်အပူၤအဃိ အဝဲသ့ၣ်ကစံးဘျုးဘၣ်ဝဲသပှၢ်တၢၢ်လီၤ. ဘၣ်ဆၣ် အဝဲသ့ၣ် တဟဲပာ်ဖျါထီၣ် အတၢ်စံးဘျုးစံးဖှိၣ်လၢ ယ့ၣ်ၡူးအအိၣ်ဘၣ်. မ့မ့ၢ်ပဝဲသ့ၣ်မီၣ်. ဖဲပှၤတဂၤဂၤတူၢ်လိာ်ခီၣ်ဆၢပှၤဂ့ၤဂ့ၤအခါ, မ့ၢ်ပတဲအီၤလၢတၢ်ဘျုးဧါ မ့တမ့ၢ်ဘၣ် မ့ၢ်ပပာ်ဖျါထီၣ် ပတၢ်စံးဘျုးစံးဖှိၣ် ခီဖျိပဆှၢန့ၢ်က့ၤအီၤ တၢ်စံးဘျုးအခးက့ဖိန့ၣ်ဧါ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(လူၤကၣ် ၁၇:၇-၁၀) ဒီးပှၤလၢသုကျါတဂၤဂၤ မ့ၢ်အိၣ်ဒီးအခ့အပှၤတဂၤ မၤစံာ်မ့ၢ်ဂ့ၤ, ကွၢ်ဆၣ်ဖိကီၢ်ဖိမ့ၢ်ဂ့ၤဒီး, တုၤအဟဲက့ၤလၢစံာ်ပူၤဒီး, ကစံးဘၣ်အီၤတကီၢ်ခါ, ဟဲက့ၤဆ့ၣ်နီၤသန့ၤ လၢမ့ၤလၣ်ထံးတက့ၢ်န့ၣ်, မ့ၢ်မတၤတဂၤလဲၣ်. ၈ မ့မ့ၢ်ကစံးဘၣ်အီၤ, ကတဲာ်ကတီၤတၢ်လၢယကအီၣ်, ဒီးယအီၣ်တၢ်အီတၢ်အဖၢမုၢ်န့ၣ်, ကံၢ်တူာ်နယီၢ်တကိး ဒီးမၤယခ့ယပှၤအတၢ်မၤတက့ၢ်. အန့ၣ်ဝံၤဒီး, နကအီၣ်ဒီး နကအီနဲဒၣ်လီၤန့ၣ်, တမ့ၢ်ဘၣ်ဧါ. ၉ မ့ၢ်အခ့အပှၤမၤဝဲ ဒ်အမၤလိာ်ဝဲအသိးန့ၣ်ဒီး, မ့ၢ်အစံးထီၣ်ပတြၢၤအီၤဧါ. ယဆိကမိၣ်လၢ အတပတြၢၤဘၣ်. ၁၀ ဒ်န့ၣ်အသိးသုဝဲဒၣ်အံၤ, ဒ်တၢ်မၤလိာ်သုအသိးန့ၣ်, သုမၤခဲလၢာ်ဝံၤဒီး, စံးသုဝဲလၢ ပမ့ၢ်တၢ်အခ့အပှၤလၢအတဂိာ်တသီၣ်ဘၣ်တၢ်လီၤ. အဂ့ၢ်ဒ်အံၤ, တၢ်လၢပမၤလံန့ၣ် မ့ၢ်တၢ်လၢပကြၢး မၤန့ၣ်လီၤ.
nwtsty တၢ်မၤနီၣ်လၢ လူၤ. ၁၇:၁၀
အတဂိာ်တသီၣ်ဘၣ်– “ပှၤသူအီၤတသ့ဘၣ်, အလုၢ်အပှ့ၤတအိၣ်ဘၣ်.” ယ့ၣ်ၡူး ဟ့ၣ်တၢ်အဒိအံၤန့ၣ် တအဲၣ်ဒိးတဲဝဲလၢ အပျဲၢ်အဘီၣ်တဖၣ်လၢ အဘၣ်တၢ်ဒိလီၤအီၤလၢကုၢ်န့ၣ် ကဘၣ်ဆိကမိၣ်လီၤအသး ဒ်ပှၤလၢပှၤသူအီၤတသ့ဘၣ် မ့တမ့ၢ် ပှၤလၢလုၢ်အပှ့ၤတအိၣ်ဘၣ်န့ၣ်ဘၣ်. ပမ့ၢ်ကွၢ်တၢ်ကတိၤလၢ အမဲာ်ညါဒီးအလီၢ်ခံန့ၣ် အဲၣ်ဒိးတဲဝဲလၢ အပျဲၢ်အဘီၣ်တဖၣ်န့ၣ် ကဘၣ်အိၣ်ဒီး တၢ်ဆီၣ်လီၤသး ဒီးတကြၢးအဲၣ်ဒိးလၢ ပှၤကမၤလၤကပီၤအီၤ မ့တမ့ၢ် ပှၤကစံးပတြၢၤအီၤ လီၤလီၤဆီဆီဘၣ်. ပှၤကူၣ်ဘၣ်ကူၣ်သ့တနီၤ တဲဝဲလၢ လံာ်စီဆှံတဆၢအံၤ သူဝဲတၢ်ကတိၤလၢ အခီပညီလီၤဂာ်ဒ် “ပမ့ၢ်ဒၣ်ကုၢ်လၢ တကြၢးဒိးန့ၢ်ဘၣ် တၢ်ပတြၢၤလီၤလီၤဆီဆီဘၣ်.”
(လူၤကၣ် ၁၈:၈) ယစံးဘၣ်သုလၢ အကစံၣ်ညီၣ်တီန့ၢ်အီၤချ့ချ့လီၤ. ဘၣ်ဆၣ်ဒီး, တုၤပှၤကညီဖိခွါအံၤဟဲလီၤဒီး, ကထံၣ်န့ၢ်တၢ်နာ်လၢဟီၣ်ခိၣ်ချၢအံၤဧါ.
nwtsty တၢ်မၤနီၣ်လၢ လူၤ. ၁၈:၈
တၢ်နာ်– မ့တမ့ၢ် “တၢ်နာ်ဒ်အံၤ.” တၢ်ကတိၤလၢအမ့ၢ် “တၢ်နာ်” အမဲာ်ညါန့ၣ် ပှၤသူဃာ်ဝဲကြံးအတၢ်ကတိၤလၢ အလီၤတံၢ်လီၤဆဲးအဃိ ပသ့ၣ်ညါဘၣ်လၢ တအဲၣ်ဒိးတဲဝဲ တၢ်နာ်ယိယိဘၣ်, အဲၣ်ဒိးတဲဝဲ တၢ်နာ်ဒ်သိးဒီး ပှၤမုၣ်ကမဲလၢ ယ့ၣ်ၡူး ဟ့ၣ်တၢ်အဒိအံၤအပူၤ အတၢ်နာ်လီၤ. (လူၤ. ၁၈:၁-၈) တၢ်နာ်အံၤန့ၣ် ကပၣ်ဃုာ်ဒီး ပနာ်တၢ်ထုကဖၣ် အစိကမီၤဒီး ကစၢ်ယွၤ ကမၤလီၤမၢ်ကွံာ် တၢ်တတီတလိၤလၢ အခ့အပှၤလၢ အဃုထၢဝဲတဖၣ်တူၢ်ဘၣ်ဝဲန့ၣ်လီၤ. ယ့ၣ်ၡူး အဲၣ်ဒိးလၢ အပျဲၢ်အဘီၣ်တဖၣ် ကသမံသမိးလီၤက့ၤ အတၢ်နာ်အဃိ သံကွၢ်အဝဲသ့ၣ်လၢ တၢ်သံကွၢ်ဘၣ်ဃးဒီးတၢ်နာ်လီၤ. ယ့ၣ်ၡူး တဲဘၣ်အပျဲၢ်အဘီၣ်လၢ အဝဲသ့ၣ် ကကွၢ်ဆၢၣ်မဲာ်ဘၣ် တၢ်မၤကွၢ်တဖၣ်ဝံၤအလီၢ်ခံ တဲဘၣ်ဝဲတၢ်အဒိဘၣ်ဃး တၢ်ထုကဖၣ်ဒီး တၢ်နာ်အဂ့ၢ်န့ၣ် ကြၢးဝဲဘၣ်ဝဲလီၤ.—လူၤ. ၁၇:၂၂-၃၇.
တၢ်ဖးလံာ်စီဆှံ
(လူၤကၣ် ၁၈:၂၄-၄၃) အသးအုးထီၣ်န့ၣ်, ယ့ၣ်ၡူးထံၣ်ဒီးစံးဝဲဒၣ်, ပှၤအထူးအတီၤလဲၤနုာ်ဆူ ယွၤအဘီအမုၢ်အပူၤကီဆံးဒိၣ်လဲၣ်. ၂၅ အဂ့ၢ်ဒ်အံၤ, ကီၤလၤအူးတဒုဝၣ်ဖျိထးအမဲၢ်ခံညီန့ၢ် ပှၤအထူးအတီၤတဂၤလဲၤနုာ်ဆူ မူခိၣ်အဘီအမုၢ်အပူၤတက့ၢ်လီၤ. ၂၆ ဒီးပှၤနၢ်ဟူတဖၣ်န့ၣ်စံးဝဲဒၣ်, မ့မ့ၢ်ဒ်န့ၣ်ဒီးမ့ၢ် မတၤကတုၤလၢတၢ်အုၣ်က့ၤခီၣ်က့ၤ သ့တဂၤလဲၣ်. ၂၇ ဒီးအဝဲဒၣ်စံး, တၢ်လၢပှၤကညီမၤတသ့ဘၣ်န့ၣ်, ယွၤမၤဝဲသ့လီၤ. ၂၈ ဒီးစီၤပ့းတရူးစံးဝဲဒၣ်, ကွၢ်ကွၢ်, ပဝဲဒၣ်အံၤ, ပဟးသဒၣ်ပတၢ်ခဲလၢာ်ဒီးပိာ်နခံလံ. ၂၉ ဒီးအဝဲဒၣ်စံးဘၣ်အီၤ, ယစံးဘၣ်သုတီတီ, ပှၤလၢအဟးသဒၣ်အဟံၣ်အဃီမ့ၢ်ဂ့ၤ, အမိၢ်အပၢ်မ့ၢ်ဂ့ၤ, အပုၢ်အဝဲၢ်မ့ၢ်ဂ့ၤ, အဖိအမါမ့ၢ်ဂ့ၤ, အဖိအလံၤမ့ၢ်ဂ့ၤ, လၢယွၤအဘီအမုၢ်အဃိ တဂၤလၢ်လၢ်န့ၣ်, ၃၀ ကန့ၢ်က့ၤဝဲ အါန့ၢ်အလီၢ်အါစုလၢအံၤတဃၣ်, ဒီးခဲကိာ်တဃၣ်ကန့ၢ်ဘၣ်တၢ်မူအထူအယိာ်လီၤ. ၃၁ ဒီးဟံးန့ၢ်ပှၤတဆံခံဂၤန့ၣ်, ဒီးစံးဘၣ်အီၤ, ကွၢ်ကွၢ်, ပလဲၤထီၣ်ဆူယရူၤၡလ့ၣ်, ဒီးကယဲၢ်တၢ်ကွဲးအသးလၢ ဝံအစုပူၤလၢ ပှၤကညီဖိခွါအံၤအဂ့ၢ်န့ၣ်, ကလၢထီၣ် ပှဲၤထီၣ်ဝဲခဲလၢာ်လီၤ. ၃၂ အဂ့ၢ်ဒ်အံၤ, ပှၤကဟ့ၣ်လီၤကွံာ်အီၤဆူ ပှၤကလုာ်တဖၣ်အစုပူၤ, ဒီးကဒုၣ်ဒွဲၣ်အီၤ, ဒီးကမၤအၢမၤနးအီၤ, ဒီးကထူးပှဲာ်အလိၤ, ၃၃ ဒီးကဝ့ၤအီၤတီၢ်အီၤ, ဒီးကမၤသံအီၤလီၤ. ဒီးလၢသၢနံၤတနံၤန့ၣ် ကဂဲၤဆၢထၢၣ်က့ၤဝဲလီၤ. ၃၄ ဒီးတၢ်န့ၣ်တဖၣ်အဝဲသ့ၣ် အနၢ်တပၢၢ်ဘၣ်နီတမံၤဘၣ် ဒီးတၢ်ကတိၤန့ၣ် အဂ့ၢ်အိၣ်ခူသူၣ်လၢအီၤ, ဒီးအဝဲဒၣ်စံးတၢ်န့ၣ် အနၢ်တပၢၢ်ဘၣ်ဝဲ တကူၢ်သ့ၣ်လီၤ. ၃၅ ဒီးတုၤအလဲၤဘူးဒီး ယရံၤဃိဒီး, ပှၤမဲာ်ဘျီၣ်ဆ့ၣ်နီၤဃ့တၢ်လၢ ကျဲအဃၢၤတဂၤ, ၃၆ နၢ်ဟူပှၤဂီၢ်မုၢ်ဟဲ, ဒီးသံကွၢ်ဝဲ, မ့ၢ်မနုၤလဲၣ်. ၃၇ ဒီးပှၤစံးဘၣ်အီၤလၢ ပှၤနစၤရ့းဖိယ့ၣ်ၡူးဟဲဝဲလီၤ. ၃၈ ဒီးအဝဲဒၣ်ကိးပသူထီၣ် ဒီးစံးဝဲဒၣ်, စီၤဒၤဝံးအဖိခွါယ့ၣ်ၡူးဧၢ, သူၣ်ကညီၤသးကညီၤစာ်ယၤတက့ၢ်. ၃၉ ဒီးပှၤလဲၤလၢညါတဖၣ်န့ၣ်, ဒ်သိးအကအိၣ်ဘှီၣ်ကလာ်ဒီး, ဒူအလိၤဘၣ်ဆၣ်ဒီး, အဝဲဒၣ်ကိးပသူထီၣ်အါထီၣ် ဒီးစံးဝဲဒၣ်, စီၤဒၤဝံးအဖိခွါဧၢ, သူၣ်ကညီၤသးကညီၤစာ်ယၤတက့ၢ်. ၄၀ ဒီးယ့ၣ်ၡူးအိၣ်ကတီၢ်, ဒီးမၢပှၤဟဲဆှၢအီၤဆူအအိၣ်လီၤ. ဒီးတုၤအဟဲဘူးဒီး, သံကွၢ်အီၤဒီးစံးဝဲဒၣ်, နသးအိၣ်လၢ ယကမၤနၤလၢမနုၤတမံၤလဲၣ်. ၄၁ ဒီးစံးဝဲဒၣ်, ကစၢ်ဧၢ, မ့ၢ်ဒ်သိးယကထံၣ်ထီၣ်က့ၤတၢ်လီၤ. ၄၂ ဒီးယ့ၣ်ၡူးစံးဘၣ်အီၤ, ထံၣ်ထီၣ်က့ၤတၢ်တက့ၢ်. နတၢ်နာ်အုၣ်က့ၤခီၣ်က့ၤလံနၤလံ. ၄၃ ဒီးထံၣ်ထီၣ်က့ၤတၢ် တကီၢ်ခါ, ဒီးစံးထီၣ်ပတြၢၤယွၤ, ဒီးပိာ်ထီၣ်အခံလီၤ. ဒီးပှၤခဲလၢာ်ထံၣ်ဝဲ, ဒီးစံးထီၣ်ပတြၢၤယွၤလီၤ.
လါအီကူး ၁၃–၁၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | လူၤကၣ် ၁၉–၂၀
“တၢ်မၤလိလၢ တၢ်အဒိဘၣ်ဃး စ့ဆံဆဲၣ်မနါ”
(လူၤကၣ် ၁၉:၁၂, ၁၃) ဒီးစံးဝဲဒၣ်, မတၤတဂၤပဒိၣ်တဂၤလဲၤဆူ ထံယံၤကီၢ်ယံၤဒ်သိး အကမၤန့ၢ်အဘီအမုၢ်, ဒီးဟဲက့ၤကဒါက့ၤလီၤ. ၁၃ ဒီးကိးန့ၢ်အခ့အပှၤအကျါဆံဆဲၣ်ဂၤ, ဒီးဟ့ၣ်လီၤအီၤလၢစ့ဆံဆဲၣ်မနါ, ဒီးစံးဘၣ်အီၤ, ကၤတၢ်တုၤလီၤလၢယဟဲက့ၤတက့ၢ်.
jy ကဘျံးပၤ ၂၃၂ အဆၢ ၂-၄
တၢ်အဒိလၢဘၣ်ဃးဒီး စ့ဆံဆဲၣ်မနါ
အဝဲတဲဝဲလၢ “မတၤတဂၤပဒိၣ်တဂၤလဲၤဆူ ထံယံၤကီၢ်ယံၤဒ်သိး အကမၤန့ၢ်အဘီအမုၢ်, ဒီးဟဲက့ၤကဒါက့ၤလီၤ.” (လူၤကၣ် ၁၉:၁၂) တၢ်လဲၤတခါအံၤ ကယံာ်ဝဲလီၤ. ပသ့ၣ်ညါသပှၢ်တၢၢ်လၢ ယ့ၣ်ၡူးမ့ၢ် “ပဒိၣ်တဂၤ” လၢအလဲၤဝဲလၢ “ထံယံၤကီၢ်ယံၤ” လၢအမ့ၢ်မူခိၣ်, ဖဲတၢ်လီၢ်လၢအပၢ်ကဟ့ၣ်အီၤ စီၤပၤအလီၢ်န့ၣ်လီၤ.
လၢတၢ်အဒိပူၤန့ၣ် တချုးလၢ “ပဒိၣ်တဂၤ” လဲၤတၢ်ဒံးဘၣ်အခါ အဝဲကိးဝဲ အခ့အပှၤဆံဆဲၣ်ဂၤ ဒီးဟ့ၣ်လီၤအဝဲသ့ၣ်လၢ စ့မနါတဂၤတဘ့ၣ် ဒီးတဲအဝဲသ့ၣ်လၢ “ကၤတၢ်တုၤလီၤလၢယဟဲက့ၤတက့ၢ်.” (လူၤကၣ် ၁၉:၁၃) စ့မနါန့ၣ် အလုၢ်အပှ့ၤအိၣ်အါမး ဒီးဒ်သိးပှၤသူၣ်အီၣ်ဖျးအီၣ်တၢ်တဂၤ ကန့ၢ်ဘၣ်စ့မနါတဘ့ၣ်အဂီၢ်န့ၣ် အဝဲကဘၣ်မၤတၢ် သၢလါဘျဲၣ်လီၤ.
ခီဖျိလၢယ့ၣ်ၡူးဒိလီၤဝဲ အပျဲၢ်အဘီၣ်တဖၣ်လၢ ပှၤကူးဘုဖိအဃိ အပျဲၢ်အဘီၣ်တဖၣ် သ့ၣ်ညါဝဲလၢ အဝဲသ့ၣ်န့ၣ် လီၤဂာ်ဒ်တၢ်အခ့အပှၤ အဂၤတဆံလၢ တၢ်အဒိပူၤန့ၣ်လီၤ. (မးသဲ ၉:၃၅-၃၈) အဃိ တမ့ၢ်ယ့ၣ်ၡူးမၢ အဝဲသ့ၣ်ကူးဘုဒီး ဟဲက့ၤစိာ် ဘုလၢအကူးဝဲန့ၣ်ဘၣ်. လၢတၢ်န့ၣ်အလီၢ် ယ့ၣ်ၡူးမၢအဝဲသ့ၣ် ပာ်ဖှိၣ်ထီၣ်ပှၤလၢ အကလဲၤနုာ်ဘၣ်ဆူ ယွၤအဘီအမုၢ်အပူၤတဖၣ်န့ၣ်လီၤ. ယ့ၣ်ၡူးအပျဲၢ်အဘီၣ်တဖၣ်န့ၣ် ကဘၣ်သူဝဲ တၢ်လၢအအိၣ်ဒီးအီၤတဖၣ်ဒီး ကဘၣ်ဂုာ်ကျဲးစၢးမၤဝဲဒ်သိး ပှၤကလဲၤနုာ်ဘၣ်ဆူ ယွၤအဘီအမုၢ်အပူၤလီၤ.
(လူၤကၣ် ၁၉:၁၆-၁၉) ဒီးအခီၣ် ထံးတဂၤဟဲဃီၤဒီးစံးဝဲဒၣ်, ကစၢ်ဧၢ, နစ့တမနါန့ၣ်, န့ၢ်အါထီၣ်စ့ဆံဆဲၣ်မနါလံလီၤ. ၁၇ ဒီးစံးဘၣ်အီၤ, ဘၣ်လံ, ကုၢ်လၢအဂ့ၤတဂၤဧၢ, မ့ၢ်နမၤနကလုၢ်တီလၢ တၢ်စှၤကိာ်အပူၤဒီး, အိၣ်လၢဝ့ၢ်ဆံဆဲၣ်အဖီခိၣ်တက့ၢ်. ၁၈ ဒီးပှၤခံဂၤတဂၤဟဲဃီၤဒီးစံးဝဲဒၣ်, ကစၢ်ဧၢ, နစ့တမနါန့ၣ်, န့ၢ်အါထီၣ်စ့ယဲၢ်မနါလံ. ၁၉ ဒီးစံးစ့ၢ်ကီးလၢအီၤ, နဲဒၣ်အံၤ, အိၣ်လၢဝ့ၢ်ယဲၢ်ဝ့ၢ်အဖီခိၣ်တက့ၢ်.
jy ကဘျံးပၤ ၂၃၂ အဆၢ ၇
တၢ်အဒိလၢဘၣ်ဃးဒီး စ့ဆံဆဲၣ်မနါ
ယ့ၣ်ၡူးအပျဲၢ်အဘီၣ်တဖၣ် မ့ၢ်မၤဝဲဒ်တၢ်အခ့အပှၤလၢ အသူအတၢ်လၢအအိၣ်ဒီးအီၤတဖၣ် ဒ်သိးကဒုးကဲထီၣ်ပှၤဂၤလၢ ခရံာ်အပျဲၢ်အဘီၣ်န့ၣ် ယ့ၣ်ၡူးကဘၣ်သူၣ်ဘၣ်သး အဝဲသ့ၣ်ဒိၣ်မးလီၤ. ဒီးအဝဲသ့ၣ်နာ်ဝဲသ့လၢ ယ့ၣ်ၡူးကဆိၣ်ဂ့ၤ အတၢ်ဂုာ်ကျဲးစၢးတဖၣ်န့ၣ်လီၤ. ယ့ၣ်ၡူးအပျဲၢ်အဘီၣ်တဖၣ် အတၢ်အိၣ်သး, အတၢ်ခွဲးတၢ်ယာ်ဒီး အတၢ်သ့တၢ်ဘၣ် တဒ်သိးလိာ်အသးဘၣ်. ဘၣ်ဆၣ် ယ့ၣ်ၡူးလၢအ ‘မၤန့ၢ်အဘီအမုၢ်’ တဂၤအံၤန့ၣ် ကဆိၣ်ဂ့ၤအဝဲသ့ၣ် အတၢ်သးတီဒီး အတၢ်ဂုာ်ကျဲးစၢးဒုးကဲထီၣ်ပှၤဂၤလၢ ခရံာ်အပျဲၢ်အဘီၣ်န့ၣ်လီၤ.—မးသဲ ၂၈:၁၉, ၂၀.
(လူၤကၣ် ၁၉:၂၀-၂၄) ဒီးအဂၤတဂၤဟဲဃီၤဒီးစံးဝဲဒၣ်, ကစၢ်ဧၢ, ကွၢ်, နစ့တမနါလၢယပာ်လၢတၢ်ဘိၣ်တၢ်စှၢၤ အပူၤန့ၣ်တက့ၢ်. ၂၁ အဂ့ၢ်ဒ်အံၤ, ယပျံၤနၤလီၤ. အဂ့ၢ်ဒ်အံၤ, နမ့ၢ်ပှၤအကီ, ဒီးတၢ်လၢနတပာ်ဘၣ်န့ၣ် နဟံးန့ၢ်နဲ, ဒီးတၢ်လၢနတဖှံဘၣ်န့ၣ်နကူးနဲလီၤ. ၂၂ ဒီးစံးဘၣ်အီၤ, ကုၢ်လၢ အအၢတဂၤဧၢ, ယကစံၣ်ညီၣ်ဃၣ်နၤလၢ နထးခိၣ်ဒၣ်နဲလီၤ. နသ့ၣ်ညါလၢယမ့ၢ်ပှၤအကီ, ဒီးတၢ်လၢယတပာ်ဘၣ်န့ၣ် ယဟံးန့ၢ်ယဲ, ဒီးတၢ်လၢယတဖှံဘၣ်န့ၣ် ယကူးယဲလီၤ. ၂၃ မၤသးဒ်န့ၣ်ဒီး တုၤယဟဲက့ၤဒီးဒ်သိးယကန့ၢ်ဘၣ်ယစ့ ဒီးအအ့ၣ်ထီၣ်န့ၣ်, ဘၣ်မနုၤလၢနတဒုးလိၢ်ဘၣ်ယတၢ်န့ၣ်လဲၣ်. ၂၄ ဒီးစံးဘၣ်ပှၤဆၢထၢၣ်လၢ အဃၢၤတဖၣ်န့ၣ်, ဟံးန့ၢ်အစ့တမနါ ဒီးဟ့ၣ်လီၤပှၤလၢ အအိၣ် ဒီးစ့ဆံဆဲၣ်မနါ တဂၤန့ၣ်တက့ၢ်.
jy ကဘျံးပၤ ၂၃၃ အဆၢ ၁
တၢ်အဒိလၢဘၣ်ဃးဒီး စ့ဆံဆဲၣ်မနါ
ကုၢ်တဂၤအံၤန့ၣ် တမၤအါထီၣ်တၢ်လၢ အကစၢ်အဘီအမုၢ်အဂီၢ်အဃိ အဝဲဘၣ်တူၢ်ၡူကွံာ်အတၢ်န့ၢ်သါလီၤ. တၢ်မၢဖိတဖၣ်န့ၣ် အိၣ်ခိးကွၢ်လၢ်ဝဲ ယ့ၣ်ၡူးကပၢတၢ်လၢ ယွၤအဘီအမုၢ်အပူၤလီၤ. ပမ့ၢ်ကွၢ်ယ့ၣ်ၡူး အတၢ်ကတိၤလၢ အတဲဝဲအခ့အပှၤလၢခံကတၢၢ်တဂၤအံၤန့ၣ် ပသ့ၣ်ညါဘၣ်လၢ အဝဲသ့ၣ် မ့ၢ်တဂုာ်ကျဲးစၢးဘၣ်န့ၣ် တနုာ်ဘၣ်ဆူ ယွၤအဘီအမုၢ်အပူၤဘၣ်.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(လူၤကၣ် ၁၉:၄၃) အဂ့ၢ်ဒ်အံၤ, မုၢ်နံၤတဖၣ်ကဘၣ်နၤဒီး, နဒုၣ်နဒါ ကမၤတၢ်အခိၣ်ဒူဝးတရံးနၤ, ဒီးကကဝီၤဃာ်နၤ, ဒီးကတြီနၤတပူၤလၢ်လၢ်.
nwtsty တၢ်မၤနီၣ်လၢ လူၤ. ၁၉:၄၃
တၢ်အခိၣ်ဒူ– မ့တမ့ၢ် “ကရၢၢ်ဖးထီ.” လၢလံာ်စီဆှံလၢ ကြံးကျိာ်တကတြူၢ်အပူၤ ကြံးအတၢ်ကတိၤလၢအမ့ၢ် khaʹrax (ခါရဲး) အံၤန့ၣ်ပထံၣ်ဘၣ်အီၤထဲ တဘျီဧိၤလီၤ. ဒီးအခီပညီအိၣ်လၢ “ပှၤသူနီၣ်က့အစူ မ့တမ့ၢ် တၢၣ် ဒီးပှၤကရၢဃာ်တၢ်လီၢ်” လီၤ. ဒီးအခီပညီအိၣ်စ့ၢ်ကီးလၢ “သုးမုၢ် တဖုလၢကရၢၢ်ဃာ်ဝဲ တၢ်လီၢ်ဒီးတီၤ” လီၤ. ယ့ၣ်ၡူးအတၢ်ကတိၤ ဟဲလၢပှဲၤထီၣ်ဝဲဖဲ ခ.န ၇၀, ရိမ့ၤအသုးမုၢ်လၢ ထဲထၢၤ(စ်) တီခိၣ်ရိၤမဲဝဲန့ၣ် ဟဲသူၣ်လီၤဝးတရံးဝဲ ဝ့ၢ်ယရူၤၡလ့ၣ် လၢတၢ်အခိၣ်ဒူ အိၣ်ဒီးသ့ၣ်ခိၣ်စူလီၤ. ဖဲန့ၣ်အခါ ထဲထၢၤ(စ်) န့ၣ်အိၣ်ဒီးအတၢ်တိာ်ပာ်သၢမံၤလီၤ. အဝဲတအဲၣ်ဒိးလၢ ပှၤယူဒၤဖိတဖၣ် ကဃ့ၢ်ဟးထီၣ်ကွံာ်လၢဝ့ၢ်ပူၤဘၣ်, အဲၣ်ဒိးဝဲလၢ အဝဲသ့ၣ်ကပာ်လီၤတၢ်စုကဝဲၤ ဒီးကပာ်လီၤဒိဝဲဒ်သိး အဝဲသ့ၣ်ကတူၢ်ၡူအသးအဂီၢ်လီၤ. ရိမ့ၤအသုးဖိတဖၣ် ကူာ်လီၤကွံာ်သ့ၣ်တဖၣ်ဒီး သူဝဲလၢကကဝီၤဃာ်ဝ့ၢ်အဂီၢ်လီၤ.
(လူၤကၣ် ၂၀:၃၈) ဘၣ်ဆၣ်ဒီးယွၤတမ့ၢ်ဘၣ်ပှၤသံအကစၢ်ဘၣ်, မ့ၢ်ပှၤမူတဖၣ်အကစၢ်လီၤ. အဂ့ၢ်ဒ်အံၤ, ပှၤခဲလၢာ်မူဝဲလၢအီၤလီၤ.
nwtsty တၢ်မၤနီၣ်လၢ လူၤ. ၂၀:၃၈
ပှၤခဲလၢာ်မူဝဲလၢအီၤ– မ့တမ့ၢ် “လၢယွၤအမဲာ်ညါ အဝဲသ့ၣ်ခဲလၢာ်မူဝဲ.” လံာ်စီဆှံ ပာ်ဖျါဝဲလၢ ပှၤလၢအတၢ်ရ့လိာ်သးဒီးယွၤတအိၣ်ဘၣ်တဂၤန့ၣ် မ့ၢ်မူသနာ်က့ လၢယွၤအမဲာ်ညါ မ့ၢ်ပှၤသံလီၤ. (အ့း. ၂:၁; ၁ တံၤ. ၅:၆) မ့မ့ၢ်ပှၤလၢ ယွၤဘၣ်သူၣ်ဘၣ်သးဝဲတဖၣ်န့ၣ် မ့ၢ်သံဘၣ်ဆၣ် မ့ၢ်လၢယွၤ ကမၤမူထီၣ်က့ၤအဝဲသ့ၣ်အဃိ လၢယွၤအတၢ်ထံၣ်အပူၤ အဝဲသ့ၣ်မ့ၢ်ပှၤလၢအမူဝဲတဖၣ်လီၤ.—ရိ. ၄:၁၆, ၁၇.
တၢ်ဖးလံာ်စီဆှံ
(လူၤကၣ် ၁၉:၁၁-၂၇) ဒီးတုၤပှၤနၢ်ဟူတၢ်န့ၣ်တဖၣ်ဒီး, မ့ၢ်အအိၣ်ဘူးဒီးယရူၤၡလ့ၣ်ဒီး ပှၤဆိကမိၣ်လၢ ယွၤအဘီအမုၢ်ကအိၣ်ထီၣ်တကီၢ်ခါ, ၁၂ သတးဒီး, ပာ်အါထီၣ်တၢ်ကတိၤအဒိဒီးစံးဝဲဒၣ်, မတၤတဂၤပဒိၣ်တဂၤလဲၤဆူ ထံယံၤကီၢ်ယံၤဒ်သိး အကမၤန့ၢ်အဘီအမုၢ်, ဒီးဟဲက့ၤကဒါက့ၤလီၤ. ၁၃ ဒီးကိးန့ၢ်အခ့အပှၤအကျါဆံဆဲၣ်ဂၤ, ဒီးဟ့ၣ်လီၤအီၤလၢစ့ဆံဆဲၣ်မနါ, ဒီးစံးဘၣ်အီၤ, ကၤတၢ်တုၤလီၤလၢယဟဲက့ၤတက့ၢ်. ၁၄ ဘၣ်ဆၣ်ဒီးအထံဖိကီၢ်ဖိတဖၣ်သးဟ့အီၤ, ဒီးမၢကလူးတဖၣ်လဲၤပိာ်အခံ, ဒီးစံးဝဲဒၣ်, အဝဲတဂၤအံၤကဲစီၤပၤလၢပဖီခိၣ်, ပသးတအိၣ်ဘၣ်လီၤ. ၁၅ ဒီးတၢ်မၤအသးလၢ အမၤန့ၢ်အဘီအမုၢ်ဝံၤဒီး, ဟဲက့ၤကဒါက့ၤဝဲ, ဒီးမၢပှၤကိးန့ၢ်အခ့အပှၤလၢ အဟ့ၣ်လီၤတ့ၢ်အီၤလၢ စ့တဖၣ်, ဒ်သိးအကသ့ၣ်ညါလၢပှၤတဂၤဒီးတဂၤမၤအါထီၣ် အတၢ်ဆံးအါဆံးအါအဂ့ၢ်န့ၣ်လီၤ. ၁၆ ဒီးအခီၣ် ထံးတဂၤဟဲဃီၤဒီးစံးဝဲဒၣ်, ကစၢ်ဧၢ, နစ့တမနါန့ၣ်, န့ၢ်အါထီၣ်စ့ဆံဆဲၣ်မနါလံလီၤ. ၁၇ ဒီးစံးဘၣ်အီၤ, ဘၣ်လံ, ကုၢ်လၢအဂ့ၤတဂၤဧၢ, မ့ၢ်နမၤနကလုၢ်တီလၢ တၢ်စှၤကိာ်အပူၤဒီး, အိၣ်လၢဝ့ၢ်ဆံဆဲၣ်အဖီခိၣ်တက့ၢ်. ၁၈ ဒီးပှၤခံဂၤတဂၤဟဲဃီၤဒီးစံးဝဲဒၣ်, ကစၢ်ဧၢ, နစ့တမနါန့ၣ်, န့ၢ်အါထီၣ်စ့ယဲၢ်မနါလံ. ၁၉ ဒီးစံးစ့ၢ်ကီးလၢအီၤ, နဲဒၣ်အံၤ, အိၣ်လၢဝ့ၢ်ယဲၢ်ဝ့ၢ်အဖီခိၣ်တက့ၢ်. ၂၀ ဒီးအဂၤတဂၤဟဲဃီၤဒီးစံးဝဲဒၣ်, ကစၢ်ဧၢ, ကွၢ်, နစ့တမနါလၢယပာ်လၢတၢ်ဘိၣ်တၢ်စှၢၤ အပူၤန့ၣ်တက့ၢ်. ၂၁ အဂ့ၢ်ဒ်အံၤ, ယပျံၤနၤလီၤ. အဂ့ၢ်ဒ်အံၤ, နမ့ၢ်ပှၤအကီ, ဒီးတၢ်လၢနတပာ်ဘၣ်န့ၣ် နဟံးန့ၢ်နဲ, ဒီးတၢ်လၢနတဖှံဘၣ်န့ၣ်နကူးနဲလီၤ. ၂၂ ဒီးစံးဘၣ်အီၤ, ကုၢ်လၢ အအၢတဂၤဧၢ, ယကစံၣ်ညီၣ်ဃၣ်နၤလၢ နထးခိၣ်ဒၣ်နဲလီၤ. နသ့ၣ်ညါလၢယမ့ၢ်ပှၤအကီ, ဒီးတၢ်လၢယတပာ်ဘၣ်န့ၣ် ယဟံးန့ၢ်ယဲ, ဒီးတၢ်လၢယတဖှံဘၣ်န့ၣ် ယကူးယဲလီၤ. ၂၃ မၤသးဒ်န့ၣ်ဒီး တုၤယဟဲက့ၤဒီးဒ်သိးယကန့ၢ်ဘၣ်ယစ့ ဒီးအအ့ၣ်ထီၣ်န့ၣ်, ဘၣ်မနုၤလၢနတဒုးလိၢ်ဘၣ်ယတၢ်န့ၣ်လဲၣ်. ၂၄ ဒီးစံးဘၣ်ပှၤဆၢထၢၣ်လၢ အဃၢၤတဖၣ်န့ၣ်, ဟံးန့ၢ်အစ့တမနါ ဒီးဟ့ၣ်လီၤပှၤလၢ အအိၣ် ဒီးစ့ဆံဆဲၣ်မနါ တဂၤန့ၣ်တက့ၢ်. ၂၅ (ဒီးအဝဲသ့ၣ်စံးဘၣ်အီၤ, ကစၢ်ဧၢ, အဝဲဒၣ်န့ၣ်အစ့အိၣ်ဆံဆဲၣ်မနါလံ,) ၂၆ အဂ့ၢ်ဒ်အံၤ, ယစံးဘၣ်သုလၢကယဲၢ်ပှၤလၢအတၢ်အိၣ်ဝဲန့ၣ်, တၢ်ကဟ့ၣ်အတၢ်လီၤ. ဒီးပှၤလၢအတၢ်တအိၣ်ဘၣ်န့ၣ်, ဖဲအတၢ်အိၣ်ဝဲဒီး, တၢ်ကဟံးထီၣ်ကွံာ်လၢအီၤလီၤ. ၂၇ မ့မ့ၢ်ယဒုၣ်ယဒါလၢ အသးတအိၣ်ဘၣ်လၢ ယကကဲအစီၤပၤတဖၣ်န့ၣ်, ဟဲစိာ်အီၤဖဲအံၤ, ဒီးမၤသံအီၤလၢယမဲာ်ညါတက့ၢ်.
လါအီကူး ၂၀–၂၆
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | လူၤကၣ် ၂၁–၂၂
“တၢ်အုၣ်က့ၤခီၣ်က့ၤသုအမုၢ်အလါဘူးထီၣ်”
(လူၤကၣ် ၂၁:၂၅) ဒီးတၢ်ပနီၣ်လီၤလးကအိၣ်ထီၣ်လၢမုၢ်အလိၤ, ဒီးလါအလိၤ, ဒီးဆၣ်ဧိၤဖီဧိၤအလိၤ, ဒီးတၢ်ကီတၢ်ခဲ, တၢ်ကိၢ်တၢ်ဂီၤ, ကဘၣ်ပှၤကညီ အကလုာ်ကလုာ်လၢ ဟီၣ်ခိၣ်ချၢလီၤ. ဒီးပီၣ်လဲၣ်ဒီး လပီတဖၣ်ကသီၣ်ဝဲလီၤ.
kr ကဘျံးပၤ ၂၂၆ အဆၢ ၉
ယွၤအဘီအမုၢ် ကမၤလီၤမၢ်ကွံာ် အဒုၣ်အဒါတဖၣ်
၉ တၢ်ပနီၣ်လၢ ကကဲထီၣ်အသးလၢမူခိၣ်. ယ့ၣ်ၡူးတဲဆိပာ်စၢၤဝဲလၢ– “မုၢ်ကခံးလီၤတကီၢ်ခါ, ဒီးလါတဟ့ၣ်လီၤဘၣ်အတၢ်ကပီၤဘၣ်, ဒီးဆၣ်ဧိၤဖီဧိၤ ကလီၤတဲာ်လၢမူခိၣ်” လီၤ. ပှၤဟီၣ်ခိၣ်ဖိတဖၣ် ကထံၣ်န့ၢ်တၢ်ကပီၤ လၢအမ့ၢ် တၢ်ဟံးစုနဲၣ်ကျဲအဂီၢ် တမ့ၢ်ကပာ်ဂံၢ်ပာ်ဘါဝဲ တၢ်ဘူၣ်တၢ်ဘါခိၣ်နၢ်တဖၣ်လၢၤဘၣ်. မ့ၢ်ယ့ၣ်ၡူး အဲၣ်ဒိးတဲဝဲ တၢ်လီၤလိၢ်လီၤလး ကကဲထီၣ်အသးလၢမူခိၣ်အနီၢ်ကီၢ်ဧါ. ဘၣ်သ့ၣ်သ့ၣ်ကမ့ၢ်ဝဲ. (ၡါ. ၁၃:၉-၁၁; အ့. ၂:၁, ၃၀, ၃၁) ဖဲပှၤဟီၣ်ခိၣ်ဖိတဖၣ် ထံၣ်ဘၣ်တၢ်မၤအသးတဖၣ်န့ၣ်အခါ အဝဲသ့ၣ်ကမၤအသးဒ်လဲၣ်. အဝဲသ့ၣ်ကအိၣ်ဒီး “တၢ်ကိၢ်တၢ်ဂီၤ” လီၤ. (လူၤကၣ် ၂၁:၂၅; စဖါနယၤ ၁:၁၇) ယွၤအဘီအမုၢ် အဒုၣ်အဒါတဖၣ် စးထီၣ်လၢ ‘စီၤပၤ တုၤလၢ အကုၢ်အပှၤ’ ဒၣ်လဲာ် “ဘၣ်ယိၣ်တၢ်လၢ တၢ်ကမၤအသး” ဒီးလူၤဃုတၢ်အိၣ်သဒၢအလီၢ်လီၤ. ဘၣ်ဆၣ် တၢ်အိၣ်သဒၢအလီၢ်လၢ ကပူၤဖျဲးဒီး ပစီၤပၤအတၢ်သးထီၣ်န့ၣ် ဃုထံၣ်န့ၢ်ဝဲတဘၣ်ဘၣ်.—လူၤကၣ် ၂၁:၂၆; ၂၃:၃၀; လီၣ်ဖျါ ၆:၁၅-၁၇.
(လူၤကၣ် ၂၁:၂၆) မ့ၢ်ပှၤကညီပျံၤတၢ်, ဒီးဘၣ်ယိၣ်တၢ်လၢ တၢ်ကမၤအသးလၢ ဟီၣ်ခိၣ်အဂ့ၢ်သတးဒီး, ကသံတ့ၢ်လီၤ. အဂ့ၢ်ဒ်အံၤ, မူခိၣ်အစိအကမီၤတဖၣ်န့ၣ် ကဟူးကဝးလီၤ.
(လူၤကၣ် ၂၁:၂၇, ၂၈) တုၤနုၤတစု, ပှၤကထံၣ်ဘၣ်ပှၤကညီဖိခွါအံၤ ဟဲလၢတၢ်အၢၣ်အပူၤအိၣ်ဒီးအစိအကမီၤ, ဒီးအလၤဒိၣ်အကပီၤဒိၣ်လီၤ. ၂၈ ဒီးတုၤတၢ်န့ၣ်တဖၣ်မၤအသးဒီး, မ့ၢ်တၢ်အုၣ်က့ၤခီၣ်က့ၤသုအမုၢ်အလါဘူးထီၣ်သတးဒီး, ကွၢ်ထီၣ်ဒီးမိာ်ထီၣ်သုခိၣ်တက့ၢ်.
ပာ်လီၤနသးလၢန “တၢ်အဲၣ်ပုၢ်အဲၣ်ဝဲၢ်န့ၣ်” ကအိၣ်ဂၢၢ်ကျၢၤထီဘိတက့ၢ်
၁၇ မ် “ပသးခူတလ့ၢ် [‘သးဒူ,’ nwt] . . . ” တက့ၢ်. (ဖး ဧ့ၤဘြံၤ ၁၃:၆ တက့ၢ်.) တၢ်နာ်န့ၢ်ယဟိဝၤယွၤန့ၣ် မၤစၢၤပှၤလၢ ပကအိၣ်ဒီးတၢ်သးဒူ ဒ်သိးပကလဲၤခီဖျိ တၢ်မၤကွၢ်လၢအဆူၣ်တဖၣ်အဂီၢ်န့ၣ်လီၤ. တၢ်သးဒူအဝဲအံၤ မၤစၢၤပှၤဒ်သိး ပကအိၣ်ဒီးတၢ်ထံၣ်လၢအဂ့ၤလီၤ. ဖဲပအိၣ်ဒီးတၢ်ထံၣ်လၢအဂ့ၤအခါ ပကပာ်ဖျါထီၣ် တၢ်အဲၣ်ပုၢ်အဲၣ်ဝဲၢ်ခီဖျိလၢ ပကဟ့ၣ်ဆူၣ်ထီၣ် ပဒီပုၢ်ဝဲၢ်အသးဒီး မၤမုာ်ထီၣ်အဝဲသ့ၣ်အသးလီၤ. (၁ သ့းစၤလနံ ၅:၁၄, ၁၅) ဖဲတၢ်နးတၢ်ဖှီၣ်ဖးဒိၣ်ဘၣ်ဝဲအဆၢကတီၢ်ဒၣ်လဲာ် ပအိၣ်ဒီးတၢ်သးဒူသ့ဝဲလီၤ. မ့ၢ်လၢပသ့ၣ်ညါလၢ ပတၢ်အုၣ်က့ၤခီၣ်က့ၤဘူးထီၣ်လံအဃိန့ၣ်လီၤ.—လူၤကၣ် ၂၁:၂၅-၂၈.
wp၁၅ ၇/၀၁ ကဘျံးပၤ ၂၀ အဆၢ ၁၃
“တၢ်အုၣ်က့ၤခီၣ်က့ၤသု အမုၢ်အလါ ဘူးထီၣ်လံ”
၁၃ မဲာ်တဲးလဲးတဖၣ်န့ၣ် ဖဲအသ့ၣ်ညါဝဲလၢ ကဘၣ်တၢ်မၤဟးဂီၤအီၤအခါ အသးကမၤအသးဒ်လဲၣ်. အဝဲသ့ၣ် “ကဟီၣ်ဝဲယၢၤဝဲ” လီၤ. (မးသဲ ၂၄:၃၀) ပှၤလၢအဘၣ်တၢ်ဒိးဖှူအီၤ ဒီးပှၤလၢအဆီၣ်ထွဲမၤစၢၤ အဝဲသ့ၣ်တဖၣ်န့ၣ် အသးကမၤအသးဒ်လဲၣ်. ယ့ၣ်ၡူးစံးဝဲလၢ “ဒီးတုၤတၢ်န့ၣ်တဖၣ်မၤအသးဒီး, မ့ၢ်တၢ်အုၣ်က့ၤခီၣ်က့ၤသုအမုၢ်အလါ ဘူးထီၣ်သတးဒီး, ကွၢ်ထီၣ်ဒီးမိာ်ထီၣ်သုခိၣ်တက့ၢ်.”—လူၤကၣ် ၂၁:၂၈.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(လူၤကၣ် ၂၁:၃၃) မူခိၣ်ဒီးဟီၣ်ခိၣ်ကပူၤကွံာ်လီၤ. မ့မ့ၢ်ယတၢ်ကတိၤအံၤတပူၤကွံာ်ဘၣ်.
nwtsty တၢ်မၤနီၣ်တဖၣ်လၢ လူၤ. ၂၁:၃၃
မူခိၣ်ဒီးဟီၣ်ခိၣ်ကပူၤကွံာ်လီၤ– လံာ်စီဆှံ အဆၢအဂၤတဖၣ် ပာ်ဖျါဝဲလၢ မူခိၣ်ဒီးဟီၣ်ခိၣ် ကအိၣ်ဝဲလီၤထူလီၤယိာ်လီၤ. (၁ မိၤ. ၉:၁၆; စံး. ၁၀၄:၅; စံၣ်. ၁:၄) အဃိ ယ့ၣ်ၡူးအဲၣ်ဒိးတဲဝဲလၢ မူခိၣ်ဒီးဟီၣ်ခိၣ်လၢ အလီၤမၢ်ကွံာ်ဝဲတသ့ဘၣ်အံၤ မ့ၢ်လီၤမၢ်ကွံာ်ဒၣ်လဲာ် အဝဲအတၢ်ကတိၤ ကဘၣ်လၢပှဲၤထီၣ်ဝဲ သပှၢ်တၢၢ်လီၤ. (ထိၣ်သတြီၤဒီး မးသဲ ၅:၁၈ တက့ၢ်.) ဘၣ်ဆၣ်, မူခိၣ်ဒီးဟီၣ်ခိၣ်အံၤန့ၣ် တမ့ၢ်မူခိၣ်ဒီးဟီၣ်ခိၣ် အနီၢ်ကီၢ်ဘၣ်. ဘၣ်သ့ၣ်သ့ၣ်ကမ့ၢ် “မူခိၣ်လၢအခီၣ်ထံးဒီး ဟီၣ်ခိၣ်လၢအခီၣ်ထံး” ဖဲ လီၣ်ဖျါ ၂၁:၁ အပူၤန့ၣ်လီၤ.
ယတၢ်ကတိၤအံၤတပူၤကွံာ်ဘၣ်– သူဝဲကြံးအတၢ်ကတိၤလၢ အထီဒါလိာ်အသးခံဖျၢၣ် ဒီးဝီၢ်အဃိ မ့ၢ်ဒၣ်ပာ်ဖျါဝဲဂ့ၤဂ့ၤလၢ ကဲထီၣ်အသးတသ့ဘၣ် ဒီးယ့ၣ်ၡူးအတၢ်ကတိၤကဘၣ်ဝဲသပှၢ်တၢၢ်န့ၣ်လီၤ.
(လူၤကၣ် ၂၂:၂၈-၃၀) ဒီးလၢယဘၣ်တၢ်လ့ပစီတဖၣ်အပူၤန့ၣ်, သုမ့ၢ်ပှၤလၢအအိၣ်ဝဲဆိးဝဲဒီးယၤလီၤ. ၂၉ ဒီးယပာ်လီၤန့ၢ်သုလၢ ဘီမုၢ်ဒ်ယပၢ်ပာ်လီၤန့ၢ်ယၤအသိး, ၃၀ ဒ်သိးသုကဆ့ၣ်နီၤအီၣ်တၢ်ဒီးအီတၢ်လၢ ယမ့ၤလၣ်ထံးလၢယဘီယမုၢ်အပူၤ, ဒီးသုကဆ့ၣ်နီၤလၢလီၢ်ပစိာ်အဖီခိၣ်, ဒီးစံၣ်ညီၣ်အံၣ်စရ့လးတဆံခံဒူၣ်န့ၣ်လီၤ.
တၢး၁၄ ၁၀/၁၅ ကဘျံးပၤ ၁၆-၁၇ အဆၢ ၁၅-၁၆
သုကကဲထီၣ် “ပှၤလုၢ်တၢ်အဒိၣ်တဖၣ် အဘီအမုၢ်”
၁၅ ယ့ၣ်ၡူးမၤဝဲ ကစၢ်အတၢ်အီၣ်လၢဟါအီၣ် ဝံၤအလီၢ်ခံ မၤဝဲတၢ်အၢၣ်လီၤအီလီၤ ဒီးအပျဲၢ်အဘီၣ် လၢဘၣ်တၢ်သ့ၣ်ညါအီၤလၢ ဘီမုၢ်တၢ်အၢၣ်လီၤအီလီၤ န့ၣ်လီၤ. (ဖး လူၤကၣ် ၂၂:၂၈-၃၀ တက့ၢ်.) တၢ်အၢၣ်လီၤအီလီအံၤ တလီၤဂာ် ဒ်တၢ်အၢၣ်လီၤအီလီၤ အဂၤတဖၣ်ဘၣ်. တၢ်အၢၣ်လီၤအီလီၤအံၤ တပၣ်ဃုာ်ဒီး ယဟိဝၤယွၤဘၣ်. မ့ၢ်ဒၣ် ယ့ၣ်ၡူးမၤဝဲထဲဒၣ် ဒီးအပျဲၢ်အဘီၣ်လၢ ဘၣ်တၢ်ဒိးဖှူအီၤတဖၣ်လီၤ. ဖဲယ့ၣ်ၡူးတဲဝဲ “ယပာ်လီၤန့ၢ်သုလၢ ဘီမုၢ်ဒ်ယပၢ်ပာ်လီၤန့ၢ်ယၤအသိး,” အခါကအဲၣ်ဒိးတဲဝဲ တၢ်အၢၣ်လီၤအီလီၤလၢအပၢ်မၤဒီးအီၤန့ၣ်လီၤ. တၢ်န့ၣ်မ့ၢ် တၢ်အၢၣ်လီၤအီလီၤလၢ ကဒုးကဲထီၣ်အီၤလၢ “ပှၤလုၢ်တၢ်အဒိၣ်လီၤထူလီၤယိာ်, ဒ်စီၤမၤလကံစဒ့း”အသိးလီၤ.—ဧ့ၤဘြံၤ ၅:၅, ၆.
၁၆ တၢ်မၢဖိလၢ အသးတီ ၁၁ ဂၤ ပာ်ဖျါထီၣ် တၢ်သးတီ ဖဲယ့ၣ်ၡူး ဘၣ်တၢ်လ့ပစီအီၤ ဒီကတီၢ်အပူၤလီၤ. ဘီမုၢ်တၢ်အၢၣ်လီၤအီလီၤ ဒုးနာ်န့ၢ် တၢ်မၢဖိတဖၣ်လၢ အဝဲသ့ၣ် ကလဲၤထီၣ်ဘၣ်ဆူမူခိၣ် ဒီးဆ့ၣ်နီၤလၢ လီၢ်ပစိာ်တဖၣ်အလိၤဒီး ပၢတၢ်ဒ်စီၤပၤဒီး မၤတၢ်ဒ်ပှၤလုၢ်တၢ်အဒိၣ်တဖၣ်အသိးလီၤ. ဘၣ်ဆၣ် တမ့ၢ်ထဲပှၤ ၁၁ ဂၤအံၤကဒိးန့ၢ်ဘၣ် တၢ်ခွဲးတၢ်ယာ်အံၤဘၣ်. လၢတၢ်ထံၣ်လၢညါခီတခါအပူၤ ယ့ၣ်ၡူးတဲဘၣ် စီၤယိၤဟၣ်လၢ “ပှၤလၢအမၤနၢၤတၢ်န့ၣ်, ယကဒုးဆ့ၣ်နီၤအီၤဒီးယၤလၢယလီၢ်ပစိာ်အဖီခိၣ်, ဒ်ယမၤနၢၤတၢ်ဒီးယဆ့ၣ်နီၤဒီးယပၢ်လၢ အလီၢ်ပစိာ်အဖီခိၣ်အသိးန့ၣ်လီၤ.” (လီၣ်ဖျါ ၃:၂၁) အဃိ ဘီမုၢ် တၢ်အၢၣ်လီၤအီလီၤအံၤ ဘၣ်တၢ်မၤအီၤဒီးပှၤ ၁၄၄,၀၀၀ လၢအမ့ၢ်ခရံာ်ဖိလၢဘၣ်တၢ်ဒိးဖှူအီၤတဖၣ်လီၤ. (လီၣ်ဖျါ ၅:၉, ၁၀; ၇:၄) တၢ်အၢၣ်လီၤအီလီၤအံၤ မ့ၢ်တၢ်ဂ့ၢ်ဖိးသဲစးလၢ ပှၤဘၣ်တၢ်ဒိးဖှူအီၤတဖၣ် ကပၢဘၣ်တၢ်ဒီးယ့ၣ်ၡူးလၢမူခိၣ်န့ၣ်လီၤ. ဒီးတၢ်အံၤလီၤဂာ်ဒ် တလးမူးပိာ်မုၣ်လၢ ကဒိးတ့ဒိးဖျီအသးဒီး စီၤပၤလီၤ. ဒီးဖျီအသးဒီးစီၤပၤမ့ၢ်ဝံၤန့ၣ် ကပၢဘၣ်တၢ်ဒီးစီၤပၤန့ၣ်လီၤ. ဒ်န့ၣ်အသိး လံာ်စီဆှံပူၤ ပှၤဘၣ်တၢ်ဒိးဖှူအီၤတဖၣ် ဘၣ်တၢ်ကိးအီၤလၢ ခရံာ်အ “တလးမူးပိာ်မုၣ်” လီၤ. အဝဲသ့ၣ်မ့ၢ် “မုၣ်ကနီၤစီဆှံ” လၢအၢၣ်လီၤဝဲလၢ ကဖျီအသးဒီးခရံာ်လီၤ.—လီၣ်ဖျါ ၁၉:၇, ၈; ၂၁:၉; ၂ ကရံၣ်သူး ၁၁:၂.
တၢ်ဖးလံာ်စီဆှံ
(လူၤကၣ် ၂၂:၃၅-၅၃) ဒီးစံးဘၣ်အဝဲသ့ၣ်, ဖဲယမၢသုလဲၤ တၢ်တအိၣ်ဘၣ်ဒီး စ့အထၢၣ်, တၢ်အီၣ်အထၢၣ်, ဒီးခီၣ်ဖံးတဖၣ်ဒီး, သုတၢ်တလၢတပှဲၤဘၣ်န့ၣ် အိၣ်တမံၤမံၤဧါ. ဒီးအဝဲသ့ၣ်စံးဝဲဒၣ်, တအိၣ်ဘၣ်နီတမံၤဘၣ်. ၃၆ ဒီးစံးဘၣ်အီၤ, မ့မ့ၢ်ခဲကနံၣ်အံၤ, ပှၤအိၣ်ဒီးစ့အထၢၣ်န့ၣ်, မ်အဟံးန့ၢ်အီၤတက့ၢ်. ဒ်န့ၣ်အသိး, တၢ်အီၣ် အထၢၣ်လီၤ. ဒီးပှၤလၢ အနးတအိၣ်ဘၣ်န့ၣ်, မ်အဆါကွံာ်အယၣ် ဒီးပှ့ၤန့ၢ်တဘ့ၣ် တက့ၢ်. ၃၇ အဂ့ၢ်ဒ်အံၤ, ယစံးဘၣ်သုလၢတၢ်ကွဲးအသးအံၤ, တၢ်ဂံၢ်အီၤလၢပှၤမၤကမၣ်တၢ်ဖိအကျါ, ဘၣ်လၢထီၣ် ပှဲၤထီၣ်ဒံးလၢ ယပူၤလီၤ. အဂ့ၢ်ဒ်အံၤ, တၢ်လၢအဘၣ်ဃးဒီးယၤအံၤ, အိၣ်ဝဲဒီးအကတၢၢ်လီၤ. ၃၈ ဒီးအဝဲသ့ၣ်စံးဝဲဒၣ်, ကစၢ်ဧၢ, ကွၢ်ကွၢ်, နးခံဘ့ၣ်အိၣ်ဖဲအံၤလီၤ. ဒီးအဝဲဒၣ်စံးဘၣ်အီၤ, အါလံလီၤ. ၃၉ ဒီးဒ်အလုၢ်အလၢ်အသိးန့ၣ်, လဲၤဝဲဆူကစၢၢ် သ့ၣ်စၤယံးအလိၤ, ဒီးအပျဲၢ်အဘီၣ်ပိာ်ထီၣ်အခံလီၤ. ၄၀ ဒီးလဲၤတုၤဖဲအလီၢ်န့ၣ်ဒီးစံးဘၣ်အီၤ, ဒ်သိးသုသုတလဲၤနုာ်ဆူ တၢ်လ့ပစီအပူၤတဂ့ၤဒီး, ဘါထုကဖၣ်တၢ်တက့ၢ်. ၄၁ ဒီးပာ်စီၤစုၤအသးဒီးအီၤယံၤတကွံာ်လၢၢ်ဃၣ်ဃၣ်, ဒီးချံးလီၤအခီၣ်ဒီးဘါထုကဖၣ်တၢ်, ၄၂ ဒီးစံးဝဲဒၣ်, ပၢ်ဧၢ, မ့ၢ်ဘၣ်နသးဒီး, တၢ်လၢလီခီအံၤ, မ်အလဲၤပူၤကွံာ်လၢယၤတက့ၢ်. ဘၣ်ဆၣ်ဒီးဖဲယသးဒၣ်ယဲတမ့ၢ်ဘၣ်, မ့ၢ်ဖဲဒၣ်နသးဒၣ်နဲတက့ၢ်. ၄၃ ဒီးကလူးလၢမူခိၣ်တဂၤ လီၣ်ဖျါထီၣ်အသးလၢအီၤ, ဒီးဒုးဆူၣ်ထီၣ် အဂံၢ်အဘါလီၤ. ၄၄ ဒီးဘၣ်တၢ်ဖှီၣ်အိၣ်ဝဲတကဲဘၣ်ဒီး, ဘါထုကဖၣ်တၢ်သပှၢ်န့ၢ်အလီၢ်လီၤ. ဒီးတၢ်မၤအသးလၢ အကပၢၤလီၤဝဲလၢ ဟီၣ်ခိၣ် အဖီခိၣ်, ဒ်တၢ်သွံၣ်လီၤစီၤအဖျၢၣ်ဖးဒိၣ်အသိးန့ၣ်လီၤ. ၄၅ ဒီးဂဲၤဆၢထၢၣ်လၢတၢ်ဘါထုကဖၣ်, ဒီးက့ၤဝဲဆူအပျဲၢ်အဘီၣ်အအိၣ်, ဒီးထံၣ်န့ၢ်လၢ အမံသပ့ၤလၢတၢ်သးအုးအဃိ, ၄၆ ဒီးစံးဘၣ်အီၤ, သုမံသပ့ၤဘၣ်မနုၤလဲၣ်. ဂဲၤဆၢထၢၣ်ဒီးဘါထုကဖၣ်တၢ်, ဒ်သိးသုသုတလဲၤနုာ်ဆူ တၢ်လ့ပစီအပူၤတဂ့ၤန့ၣ်တက့ၢ်. ၄၇ ဒီးကတိၤတၢ်အဖၢမုၢ်ဒီး, ကွၢ်ကွၢ်, ပှၤဂီၢ်မုၢ်, ဒီးပှၤအိၣ်လၢ ပှၤတဆံခံဂၤအကျါ ကိးဝဲလၢ စီၤယူဒၤတဂၤဟဲလၢအမဲာ်ညါ, ဒီးလဲၤဆူယ့ၣ်ၡူးအအိၣ် ဒ်သိးအကနၢမူအီၤလီၤ. ၄၈ ဒီးယ့ၣ်ၡူးစံးဘၣ်အီၤ, စီၤယူဒၤဧၢ, နဟ့ၣ်လီၤကွံာ်ပှၤကညီဖိခွါလၢတၢ်နၢမူန့ၣ်ဧါ. ၄၉ ဒီးပှၤအိၣ်ဒီးအီၤထံၣ်တၢ်လၢအကမၤအသးဒီးစံးဘၣ်အီၤ, ကစၢ်ဧၢ, မ့ၢ်ပကကျီဒီးနးန့ၣ်ဧါ. ၅၀ ဒီးပှၤတဂၤကျီပှၤလုၢ်တၢ်အခိၣ်အခ့အပှၤတဂၤ, ဒီးအနၢ်ထွဲတခီတူာ်ကွံာ်ဝဲလီၤ. ၅၁ ဒီးယ့ၣ်ၡူးကတိၤဆၢတၢ်ဒီးစံးဝဲဒၣ်, ပှဲၤန့ၣ်လီၤ. ဒီးထိးဘၣ်အနၢ်, ဒီးမၤဘျါက့ၤအီၤလီၤ. ၅၂ ဒီးယ့ၣ်ၡူးစံးဘၣ် ပှၤလုၢ်တၢ်အခိၣ် ဒီးပှၤသုးဖိအခိၣ် ဘၣ်ဃးဒီးတၢ်လုၢ်အဟံၣ်, ဒီးပှၤသးပှၢ်သ့ၣ်တဖၣ်လၢ အဟဲဆူအအိၣ်န့ၣ်, ဒ်ပှၤဖီၣ်န့ၢ်တၢ်ဘျၣ်အသိးဒီး, သုဟဲဒီးနး, ဒီးနီၣ်တီၢ်န့ၣ်ဧါ. ၅၃ လၢယအိၣ်ဒီးသုလၢတၢ်လုၢ်အဟံၣ်ပူၤ သ့သ့တနံၤန့ၣ်, သုတယူာ်ထီၣ်သုစုလၢ ယလိၤဘၣ်. မ့မ့ၢ်ခဲကနံၣ်အံၤမ့ၢ်သုနၣ်ရံၣ်, ဒီးတၢ်ခံးအစိအကမီၤလီၤ.
လါအီကူး ၂၇–လါစဲးပတ့ဘၢၣ် ၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | လူၤကၣ် ၂၃–၂၄
“သးအိၣ်ပျၢ်ပှၤဂၤအတၢ်ကမၣ်”
(လူၤကၣ် ၂၃:၃၄) ဒီးယ့ၣ်ၡူးစံးဝဲဒၣ်, ပၢ်ဧၢ, ပျၢ်အတၢ်ဒဲးဘးတက့ၢ်. အဂ့ၢ်ဒ်အံၤ, မ့ၢ်အမၤဝဲဒ်လဲၣ်ဒ်လဲၣ်န့ၣ် တသ့ၣ်ညါဘၣ်. ဒီးပှၤဖးဝဲသတးဒီး, နီၤဖးအကူအသိးအဆၢလီၤ.
cl ကဘျံးပၤ ၂၉၇ အဆၢ ၁၆
“တၢ်သ့ၣ်ညါ ခရံာ်အတၢ်အဲၣ်”
၁၆ ကျဲအဂၤတမံၤလၢ ယ့ၣ်ၡူးပာ်ဖျါထီၣ် အပၢ်အတၢ်အဲၣ်န့ၣ်မ့ၢ် အဝဲ “ပျၢ်ကွံာ်တၢ်ညီ” လီၤ. (စံးထီၣ်ပတြၢၤ ၈၆:၅) အဝဲအတၢ်ပာ်သူၣ်ပာ်သးအံၤန့ၣ် ဖျါဖဲအဝဲဘၣ်တၢ်ပျၤထီအီၤလၢ သ့ၣ်တၢၣ်လိၤအခါလီၤ. ယ့ၣ်ၡူးအစုဒီးအခီၣ် ဘၣ်တၢ်ပျၤအီၤလၢထး ဒီးကဘၣ်သံလီၤဆှးမဲာ်ဆှးနါ သနာ်က့ အဝဲတဲဝဲတၢ်ကတိၤမနုၤလဲၣ်. မ့ၢ်အဝဲဃ့တၢ်မၤစၢၤလၢ ယဟိဝၤယွၤ ဒ်သိးကစံၣ်ညီၣ် ပှၤလၢအမၤနးမၤဖှီၣ်အီၤတဖၣ်န့ၣ်ဧါ. တမၤဝဲဒ်န့ၣ်ဘၣ်. ယ့ၣ်ၡူး အတၢ်ကတိၤလၢခံကတၢၢ်မ့ၢ် “ပၢ်ဧၢ, ပျၢ်အတၢ်ဒဲးဘးတက့ၢ်. အဂ့ၢ်ဒ်အံၤ, မ့ၢ်အမၤဝဲဒ်လဲၣ်ဒ်လဲၣ်န့ၣ် တသ့ၣ်ညါဘၣ်.”—လူၤကၣ် ၂၃:၃၄.
(လူၤကၣ် ၂၃:၄၃) ဒီးယ့ၣ်ၡူးစံးဘၣ်အီၤ, ယစံးဘၣ်နၤတီတီအံၤ, ခဲမုၢ်ဆါအံၤ နကအိၣ်ဒီးယၤလၢ ပၤရဒံစူးအပူၤလီၤ.
g ၂/၀၈ ကဘျံးပၤ ၁၁ အဆၢ ၅-၆
ကစၢ်ယွၤ ပျၢ်ကွံာ် တၢ်ကမၣ်လၢအဖးဒိၣ်တဖၣ်ဧါ
ကစၢ်ယွၤကွၢ်ဝဲတၢ်ကမၣ် တကးဒံးဘၣ် ကွၢ်ဝဲပှၤမၤတၢ်ကမၣ်တဂၤ အတၢ်ပာ်သူၣ်ပာ်သးန့ၣ်လီၤ. (ယၡါယၤ ၁:၁၆-၁၉) ဆိကမိၣ်ကွၢ် ပှၤမၤကမၣ်တၢ်ခံဂၤလၢ ဘၣ်တၢ်ပျၤထီအီၤလၢ ယ့ၣ်ၡူးအကပၤ တခီတဂၤန့ၣ်တက့ၢ်. အဝဲသ့ၣ်ခံဂၤလၢာ် ဖျါလၢမၤဘၣ်တၢ်ကမၣ်ဖးဒိၣ်လီၤ. အဝဲတဂၤန့ၣ်တဲဝဲလၢ “ပဘၣ်တၢ်ဖဲပဂ့ၤဘၣ်လၢပမၤတၢ်အဃိလီၤ. မ့မ့ၢ်အဝဲ [ယ့ၣ်ၡူး] တဂၤအံၤ တမၤကမၣ်ဘၣ်တၢ်နီတမံၤဘၣ်.” ပှၤမၤကမၣ်တၢ်တဂၤအံၤ အတၢ်ကတိၤန့ၣ် ဖျါလၢအဝဲသ့ၣ်ညါပာ် ယ့ၣ်ၡူးအဂ့ၢ်တစဲးအဃိ အတၢ်ပာ်သူၣ်ပာ်သး ဆီတလဲအသးလီၤ. အဝဲအတၢ်ပာ်သူၣ်ပာ်သး ဆီတလဲအသးန့ၣ် ပသ့ၣ်ညါဘၣ်လၢ အတၢ်ကတိၤန့ၣ်လီၤ. အဝဲတဲဘၣ်ယ့ၣ်ၡူးလၢ “တုၤနဟဲလၢနဘီနမုၢ်အပူၤဒီး, သ့ၣ်နီၣ်ထီၣ်က့ၤယၤတက့ၢ်.” ယ့ၣ်ၡူးစံးဆၢက့ၤအီၤဒ်လဲၣ်. “ယစံးဘၣ်နၤတီတီအံၤ, ခဲမုၢ်ဆါအံၤ နကအိၣ်ဒီးယၤလၢ ပၤရဒံစူးအပူၤလီၤ.”—လူၤကၣ် ၂၃:၄၁-၄၃.
ဆိကမိၣ်ကွၢ်တၢ်အံၤတက့ၢ်. ယ့ၣ်ၡူးအတၢ်ကတိၤလၢခံကတၢၢ်လၢ အစံးဝဲန့ၣ် ပာ်ဖျါထီၣ်ဝဲလၢ အဝဲသးကညီၤပှၤလၢ အအၢၣ်လီၤအတၢ်ကမၣ်တဂၤန့ၣ်လီၤ. မ့ၢ်တၢ်လၢအဟ့ၣ်ဂံၢ်ဟ့ၣ်ဘါပှၤဒိၣ်မးလီၤ. အဃိ ပှၤတဂၤမ့ၢ်မၤတ့ၢ်တၢ်ကမၣ်သနာ်က့ အဝဲမ့ၢ်ပီၢ်ယၢ်လီၤက့ၤအသးနီၢ်နီၢ်န့ၣ် ယဟိဝၤယွၤဒီး ယ့ၣ်ၡူး ကပျၢ်အတၢ်ကမၣ်န့ၣ် ပနာ်သ့သပှၢ်တၢၢ်လီၤ.—ရိမ့ၤ ၄:၇.
(လူၤကၣ် ၂၄:၃၄) အိၣ်ဖှိၣ်ရိဖှိၣ်, ဒီးစံးတကူၢ်သ့ၣ်လၢ ကစၢ်ဂဲၤဆၢထၢၣ်က့ၤလံနီၢ်နီၢ်, ဒီးဒုးနဲၣ်လံအသးလၢစီၤၡံမိၣ်လံ.
cl ကဘျံးပၤ ၂၉၇-၂၉၈ အဆၢ ၁၇-၁၈
“တၢ်သ့ၣ်ညါ ခရံာ်အတၢ်အဲၣ်”
၁၇ ယ့ၣ်ၡူး ပျၢ်ကွံာ်စီၤပ့းတရူးအတၢ်ကမၣ်န့ၣ် မ့ၢ်တၢ်အဒိအတဲာ်လၢ အလီၤဘၣ်သူၣ်ဘၣ်သးဒိၣ်မးတခါလီၤ. စီၤပ့းတရူး အဲၣ်ဝဲယ့ၣ်ၡူးနီၢ်နီၢ်န့ၣ် ပသမၢအလီၢ်တအိၣ်ဘၣ်. ဖဲလါနံစၣ် ၁၄ သီ, ယ့ၣ်ၡူးအမုၢ်နံၤလၢခံကတၢၢ်လၢဟီၣ်ခိၣ်အနၤန့ၣ် စီၤပ့းတရူးစံးဘၣ်အီၤလၢ “ကစၢ်ဧၢ, ဆူဃိာ်ပူၤမ့ၢ်ဂ့ၤ, ဆူတၢ်သံအပူၤမ့ၢ်ဂ့ၤ, ယအိၣ်ကတီၤလံယသးလၢ ယကလဲၤဃုာ်ဒီးနၤလီၤ.” ဘၣ်ဆၣ်, ပူၤကွံာ်စှၤနၣ်ရံၣ်ဝံၤအလီၢ်ခံ စီၤပ့းတရူး သမၢဝဲလၢ အတသ့ၣ်ညါယ့ၣ်ၡူးဘၣ် သၢဘျီလီၤ. စီၤပ့းတရူးသမၢယ့ၣ်ၡူး သၢဘျီတဘျီဝံၤအလီၢ်ခံ တၢ်ကဲထီၣ်အသးဒ်လဲၣ်န့ၣ် လံာ်စီဆှံပာ်ဖျါထီၣ်ဝဲလၢ– “ကစၢ်န့ၣ် ဃၣ်ဃီၤအသးဒီးကွၢ်စီၤပ့းတရူးလီၤ.” စီၤပ့းတရူး အသးအုးလၢအတၢ်ကမၣ်ဖးဒိၣ်အဃိ “ဟးထီၣ်ဆူခိ, ဒီးဟီၣ်ဟ့သးနးမးလီၤ.” ဖဲယ့ၣ်ၡူးသံဝံၤအလီၢ်ခံ တၢ်မၢဖိပ့းတရူး ကဆိကမိၣ်ဘၣ်ဝဲလၢ ‘မ့ၢ်ယကစၢ် ကပျၢ်ကွံာ်ယတၢ်ကမၣ်ဧါ.’—လူၤကၣ် ၂၂:၃၃, ၆၁, ၆၂.
၁၈ စီၤပ့းတရူး ဘၣ်အိၣ်ခိး တၢ်စံးဆၢဖးယံာ်ညါဧါ. ယ့ၣ်ၡူး ဂဲၤဆၢထၢၣ်သမူထီၣ်က့ၤဖဲ လါနံစၣ် ၁၆ သီဂီၤခီ ဒီးလီၤဂာ်လၢတၢ်အနံၤန့ၣ် အဝဲလဲၤဟးဆူ စီၤပ့းတရူးအအိၣ်လီၤ. (လူၤကၣ် ၂၄:၃၄; ၁ ကရံၣ်သူး ၁၅:၄-၈) ဘၣ်မနုၤအဃိ ယ့ၣ်ၡူး အသးစၢၢ်ဆၢဝဲ အတၢ်မၢဖိလၢ အသမၢအီၤတဂၤအံၤလဲၣ်. ဘၣ်သ့ၣ်သ့ၣ် ယ့ၣ်ၡူး ကအဲၣ်ဒိးဒုးသ့ၣ်ညါ စီၤပ့းတရူးလၢ အဝဲအဲၣ်အီၤဒီး ပာ်လုၢ်ပာ်ပှ့ၤဒံးအီၤလီၤ. ဘၣ်ဆၣ် ယ့ၣ်ၡူး ပာ်ဖျါဝဲအါန့ၢ်အန့ၣ်ဒံးလီၤ.
ခူၣ်ထီၣ်နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
(လူၤကၣ် ၂၃:၃၁) အဂ့ၢ်ဒ်အံၤ, ပှၤမ့ၢ်မၤသ့ၣ် သံကစဲာ်ဒ်အံၤဒီး, ကမၤတၢ်ဃ့ဒ်လဲၣ်.
nwtsty တၢ်မၤနီၣ်လၢ လူၤ. ၂၃:၃၁
သ့ၣ် သံကစဲာ်, . . . တၢ်ဃ့– ဖျါလၢယ့ၣ်ၡူးအဲၣ်ဒိးတဲဝဲ ပှၤယူဒၤဖိတဖၣ်လီၤ. အဝဲသ့ၣ်န့ၣ် လီၤဂာ်ဒ်သ့ၣ်လၢ ဘူးလၢအကသံလီၤ. မ့ၢ်လၢယ့ၣ်ၡူးဒီး ပှၤယူဒၤဖိလၢအနာ်အီၤတနီၤ အိၣ်ဒံးအဃိ အစုၣ်စီၣ်အိၣ်ဒံးဝဲတစဲးလီၤ. ဘၣ်ဆၣ် တယံာ်လၢၤဘၣ် ယ့ၣ်ၡူးကဘၣ် တၢ်မၤသံအီၤလီၤ. ပှၤယူဒၤဖိလၢ အိၣ်ဒီးတၢ်သးတီတဖၣ် ကဘၣ်တၢ်ဒိးဖှူအီၤလၢ သးစီဆှံ ဒီးကကဲထီၣ် နီၢ်သးအံၣ်စရ့လးဖိလီၤ. (ရိ. ၂:၂၈, ၂၉; ကလၤ. ၆:၁၆) ဖဲန့ၣ်အခါ နီၢ်ခိအံၣ်စရ့လး ကသံလၢနီၢ်သးတခီဒီး ကလီၤဂာ်လၢသ့ၣ်အဃ့ထီလီၤ.—မးသဲ ၂၁:၄၃.
(လူၤကၣ် ၂၃:၃၃) ဒီးလဲၤဝဲတုၤလၢအလီၢ်ကိးဝဲလၢကရၤနံ, ဒီးပှၤပျၤထီအီၤဖဲန့ၣ်, ဒီးပှၤမၤအၢတၢ်ခံဂၤ, တဂၤလၢစုထွဲ, ဒီးတဂၤလၢစုစ့ၣ်လၢထူၣ်စုညါအလိၤလီၤ.
nwtsty မံဒံယါ
ထးတဘိလၢ အနုာ်လီၤဆူ ပှၤခီၣ်နၢၣ်ခံအဃံပူၤ
တၢ်ဂီၤအံၤမ့ၢ်ဝဲ ထးတဘိလၢကအိၣ် ၁၁.၅ စဲးထံၣ်မံထၢၣ် (၄.၅ စုမုၢ်ဒိၣ်) နုာ်လီၤဆူ ပှၤခီၣ်နၢၣ်ခံအဃံပူၤအဂီၤန့ၣ်လီၤ. တၢ်ဃံအဝဲန့ၣ် ဘၣ်တၢ်ခူၣ်န့ၢ်အီၤလၢ ဝ့ၢ်ယရူၤၡလ့ၣ် ကလံၤစိးတခီ ဖဲ ၁၉၆၈ နံၣ်ဒီးဘၣ်တၢ်ပာ်ပနီၣ်အီၤလၢ ရိမ့ၤအစိၤန့ၣ်လီၤ. ဒီးမ့ၢ်တၢ်အုၣ်အသးလၢ ဖဲပှၤပျၤထီပှၤလၢသ့ၣ်တၢၣ်လိၤအခါ ပှၤဒိအီၤလၢထးန့ၣ်လီၤ. ဖဲရိမ့ၤအသုးဖိတဖၣ် ပျၤထီယ့ၣ်ၡူး လၢသ့ၣ်တၢၣ်လိၤအခါ ကသူဝဲ ထးလၢအလီၤဂာ်ထးတဘိအံၤလီၤ. ပှၤထံၣ်န့ၢ် တၢ်ဃံအံၤလၢ တလါလၢပှၤတ့အီၤလၢလၢၢ် အပူၤလီၤ. အဃိ ပသ့ၣ်ညါဘၣ်လၢ ပှၤလၢအဘၣ်တၢ်ပျၤထီအီၤလၢ သ့ၣ်တၢၣ်အလိၤန့ၣ် ပှၤဟ့ၣ်အခွဲးလၢ ပှၤကခူၣ်လီၤအီၤလီၤ.
တၢ်ဖးလံာ်စီဆှံ
(လူၤကၣ် ၂၃:၁-၁၆) ဒီးပှၤဂီၢ်မုၢ်ခဲလၢာ်န့ၣ် ဂဲၤဆၢထၢၣ်, ဒီးဆှၢအီၤဆူစီၤပံၤလးအအိၣ်လီၤ. ၂ ဒီးပာ်တၢ်ကမၣ်လၢအလိၤဒီးစံးဝဲဒၣ်, အဝဲတဂၤအံၤ, ပထံၣ်န့ၢ်အီၤလၢ အဒုးလီၤကမၣ်ပှၤတကလုာ်အံၤ, ဒီးတြီပှၤဟ့ၣ်သွဲလၢကဲစၢ်, ဒီးစံးလီၤအသးလၢခရံာ်, စီၤပၤတဂၤလီၤ. ၃ ဒီးစီၤပံၤလးသံကွၢ်အီၤ ဒီးစံးဝဲဒၣ်, နဲဒၣ်အံၤနမ့ၢ်ပှၤယူဒၤဖိအစီၤပၤန့ၣ်ဧါ. ဒီးအဝဲဒၣ်ကတိၤဆၢအီၤဒီးစံးဝဲဒၣ်, နစံးလံတၢ်လံ. ၄ ဒီးစံးဘၣ်ပှၤလုၢ်တၢ်အခိၣ် ဒီးပှၤဂီၢ်မုၢ်တဖၣ်န့ၣ်, အဝဲတဂၤအံၤ, ယတထံၣ်န့ၢ်ဘၣ်တၢ်ကမၣ်လၢအလိၤ နီတမံၤဘၣ်. ၅ ဒီးအဝဲသ့ၣ်ပာ်အသးဆူၣ်န့ၢ်အလီၢ်တက့ၢ်. ဒီးစံးဝဲဒၣ်, အဝဲတဂၤအံၤ, သိၣ်က့ၤသီက့ၤတၢ်လၢ ကီၢ်ယူဒၤဒီကီၢ်ညါ, လၢကၤလံၤလါတုၤဖဲအံၤ, ဒီးသဆၣ်ထီၣ် ပှၤဂီၢ်မုၢ်အခံလီၤ. ၆ ဒီးစီၤပံၤလးနၢ်ဟူလၢ ကၤလံၤလါတဘီဒီး, သံကွၢ်ဝဲ, ပှၤအံၤမ့ၢ်ပှၤကၤလံၤလါဖိဧါ. ၇ ဒီးတုၤအသ့ၣ်ညါလၢ အဘၣ်ဃးဒီးစီၤဟ့ၤရိာ်အစိအကမီၤ, ဒီးမ့ၢ်လၢစီၤဟ့ၤရိာ်အိၣ်လၢယရူၤၡလ့ၣ်လၢ မုၢ်နံၤတဖၣ်န့ၣ်သတးဒီး, မၢအလဲၤဆူအအိၣ်လီၤ. ၈ ဒီးတုၤစီၤဟ့ၤရိာ် ထံၣ်ဘၣ်ယ့ၣ်ၡူးဒီး, အသးခုဒိၣ်မးလီၤ. အဂ့ၢ်ဒ်အံၤ, နၢ်ဟူတ့ၢ်အဂ့ၢ်အကျိၤအါမံၤ, ဒီးတၢ်မိၣ်ထံၣ်ဘၣ်အသးလၢအီၤဃဲးဃဲး, ဒီးမုၢ်လၢ်ဝဲလၢ အကထံၣ်တၢ်လီၤလးမၤအသးလၢအီၤ တမံၤမံၤလီၤ. ၉ ဒီးသံကွၢ်အီၤလၢ တၢ်ကတိၤအါဘီ, ဒီးအဝဲဒၣ်တစံးဆၢဘၣ်အီၤနီတဘီဘၣ်. ၁၀ ဒီးပှၤလုၢ်တၢ်အခိၣ်ဒီးပှၤကွဲးလံာ်သ့ၣ်တဖၣ်, ဆၢထၢၣ်ဒီးပာ်ထီၣ်တၢ်ကမၣ်လၢ အလိၤနးမးလီၤ. ၁၁ ဒီးစီၤဟ့ၤရိာ်ဒီးအပှၤသုးဖိတဖၣ်, မၤအီၤတရီတပါ, ဒီးဒုၣ်ဒွဲၣ်အီၤ, ဒီးဒုးသိးထီၣ်အဆ့ကပြုၢ်ကပြီၤ, ဒီးဒုးက့ၤက့ၤအီၤဆူ စီၤပံၤလးအအိၣ်လီၤ. ၁၂ ဒီးလၢမုၢ်တနံၤန့ၣ်, စီၤပံၤလးဒီးစီၤဟ့ၤရိာ်ဘၣ်လိာ်က့ၤအသးလီၤ. အဂ့ၢ်ဒ်အံၤ, လၢထံးလၢမကိာ်န့ၣ်, ထီဒါလိာ်အသးလီၤ. ၁၃ ဒီးစီၤပံၤလးကိးဖှိၣ် ပှၤလုၢ်တၢ်အခိၣ် ဒီးပဒိၣ်ပပှၢ်ဒီးပှၤဂီၢ်မုၢ်တဖၣ်, ၁၄ ဒီးစံးဘၣ်အီၤ, သုဟဲဆှၢပှၤတဂၤအံၤဆူယအိၣ်ဒ်ပှၤလၢ အဒုးလီၤကမၣ်ပှၤဂီၢ်မုၢ်အသိးလီၤ. ဒီးကွၢ်ကွၢ်, ယသံကွၢ်သံဒိးအီၤလၢ သုမဲာ်ညါဘၣ်ဆၣ်ဒီး, တၢ်ကမၣ်လၢ သုပာ်လၢအလိၤန့ၣ်, ယတထံၣ်န့ၢ်ဘၣ်နီတမံၤဘၣ်. ၁၅ လၢန့ၣ်အမဲာ်ညါ, စီၤဟ့ၤရိာ်တထံၣ်ဘၣ်. အဂ့ၢ်ဒ်အံၤ, ယမၢသုလဲၤဆူအအိၣ်, ဒီးကွၢ်ကွၢ်, တၢ်ဂ့ၤဘၣ်သံန့ၣ်, တမၤဘၣ်ဝဲ နီတမံၤဘၣ်. ၁၆ မၤသးဒ်န့ၣ်ဒီးယကသိၣ်ဃီၣ်အီၤဒီး, ယကပျၢ်အီၤလီၤ.