ပှၤဖးလံာ်ဖိတဖၣ် အတၢ်သံကွၢ်

ဘၣ်မနုၤအဃိ မးသဲ ဒီးလူၤကၣ် ကွဲးဝဲယ့ၣ်ၡူးဒိၣ်ထီၣ်အဂ့ၢ် လီၤဆီလိာ်အသးလဲၣ်

မးသဲအတၢ်ကွဲးလၢ ဘၣ်ဃးဒီးယ့ၣ်ၡူးအိၣ်ဖျဲၣ်ထီၣ်အဂ့ၢ် ဒီးဒိၣ်ထီၣ်အဂ့ၢ် လီၤဆီလိာ်အသးဒီး လူၤကၣ်အတၢ်ကွဲးန့ၣ် မ့ၢ်လၢတၢ်ဂ့ၢ်လၢလာ်တဖၣ်အံၤအဃိလီၤ.

မးသဲကွဲးဖျါထီၣ်ဝဲ တၢ်ဂ့ၢ်အါတက့ၢ်န့ၣ် ဘၣ်ထွဲလိာ်သးဒီးစီၤယိၤသးလီၤ. အဒိ, မးသဲပာ်ဖျါထီၣ်ဝဲဘၣ်ဃး ဖဲစီၤယိၤသး သ့ၣ်ညါဝဲလၢနီၢ်မၤရံဒၢထီၣ်အခါ အဝဲမၤဝဲဒ်လဲၣ်အဂ့ၢ်, ဖဲမူခိၣ်ကလူးတဲနၢ်ပၢၢ်အီၤ တၢ်ဂ့ၢ်လၢအတၢ်မံမီၢ်ပူၤအခါ ဒီးပာ်ဖျါထီၣ်စ့ၢ်ကီးဝဲလၢ စီၤယိၤသး မၤပိာ်ထွဲဝဲ မူခိၣ်ကလူးအတၢ်ဟ့ၣ်ကူၣ်န့ၣ်လီၤ. (မးသဲ ၁:၁၉-၂၅) တကးဒံးဘၣ် ကွဲးဖျါထီၣ်စ့ၢ်ကီးဝဲလၢ စီၤယိၤသးဒိကနၣ်ဝဲ မူခိၣ်ကလူးအတၢ်ဟ့ၣ်ပလီၢ်လၢ တၢ်မံမီၢ်အပူၤ ဒီးအဝဲဒီးအဟံၣ်ဖိဃီဖိ လဲၤဃ့ၢ်အိၣ်ခူသူၣ်ဝဲလၢ ကီၢ်အဲၤကူပတူးန့ၣ်လီၤ. မးသဲအတၢ်ကွဲးအပူၤ ပာ်ဖျါထီၣ်စ့ၢ်ကီးဝဲလၢ မူခိၣ်ကလူးဟဲတဲဘၣ် စီၤယိၤသးလၢတၢ်မံမီၢ်အပူၤ ဒ်သိးကက့ၤအိၣ်လၢ ကီၢ်အံၣ်စရ့လးအဃိ အဝဲက့ၤဝဲဒီးအဟံၣ်ဖိဃီဖိလၢ ဝ့ၢ်နစၤရ့းအပူၤလီၤ. (မးသဲ ၂:၁၃, ၁၄, ၁၉-၂၃) လၢမးသဲအဆၢဒိၣ် ၁ ဒီး ၂ အပူၤန့ၣ် စီၤယိၤသးအမံၤ ဘၣ်တၢ်ယၢၤထီၣ်အီၤနွံဘျီ ဒီးမ့မ့ၢ်နီၢ်မၤရံအမံၤန့ၣ် ဘၣ်တၢ်ယၢၤထီၣ်အီၤထဲဒၣ်ယဲၢ်ဘျီဧိၤလီၤ.

ဘၣ်ဆၣ် လၢလူၤကၣ် အတၢ်ကွဲးအပူၤန့ၣ် ပာ်ဖျါထီၣ်ဝဲ အါလၢနီၢ်မၤရံအဂ့ၢ်လီၤ. အဒိ, လူၤကၣ်အတၢ်ကွဲးန့ၣ် ပာ်ဖျါထီၣ်ဝဲဘၣ်ဃး မူခိၣ်ကလူးကၤဘြံၤအ့လး လဲၤအိၣ်သကိးနီၢ်မၤရံအဂ့ၢ်, နီၢ်မၤရံလဲၤအိၣ်သကိးဝဲ နီၢ်အ့းလံၤစါဘ့းအဂ့ၢ် ဒီးအတၢ်ကတိၤစံးထီၣ်ပတြၢၤ ယဟိဝၤယွၤအဂ့ၢ်န့ၣ်လီၤ. (လူၤကၣ် ၁:၂၆-၅၆) အဝဲကွဲးဖျါထီၣ်စ့ၢ်ကီးဝဲ စီၤစူၤမ့းအိၣ် အတၢ်ကတိၤလၢ အတဲဘၣ် နီၢ်မၤရံဘၣ်ဃး တၢ်လၢယ့ၣ်ၡူးကဘၣ်တူၢ်ဝဲလၢ ခါဆူညါအဂ့ၢ်န့ၣ်လီၤ. ဒီးဖဲယ့ၣ်ၡူးအိၣ် ၁၂ နံၣ်အခါ ယ့ၣ်ၡူးဒီးအဟံၣ်ဖိဃီဖိတဖၣ် လဲၤလၢတၢ်လုၢ်ဟံၣ်အဂ့ၢ်န့ၣ်လီၤ. ဒီးဖဲန့ၣ်အဝဲပာ်ဖျါထီၣ်ဝဲ နီၢ်မၤရံအတၢ်ကတိၤ ဒီးတကွဲးဖျါထီၣ်ဝဲ စီၤယိၤသးအတၢ်ကတိၤဘၣ်. ဒီးစီၤလူၤကၣ်ပာ်ဖျါထီၣ်ဝဲ တၢ်လၢနီၢ်မၤရံနၢ်ဟူဘၣ်ဝဲသ့ၣ်တဖၣ်န့ၣ် အဝဲတိၢ်နီၣ်ဃာ်ဝဲလၢ အသးပူၤအဂ့ၢ်လီၤ. (လူၤကၣ် ၂:၁၉, ၃၄, ၃၅, ၄၈, ၅၁) လၢလံာ်လူၤကၣ်အဆၢဒိၣ် ၁ ဒီး ၂ န့ၣ်နီၢ်မၤရံအမံၤ ဘၣ်တၢ်ယၢၤထီၣ်အီၤ ၁၂ ဘျီ ဒီးမ့မ့ၢ် စီၤယိၤသးအမံၤန့ၣ် ဘၣ်တၢ်ယၢၤထီၣ်အီၤထဲဒၣ် ၅ ဘျီဧိၤလီၤ. လၢတၢ်န့ၣ်အဃိ လံာ်မးသဲပာ်ဖျါဝဲအါလၢ စီၤယိၤသးအတၢ်ဆိကမိၣ် ဒီးတၢ်လၢအမၤဝဲတဖၣ်အဂ့ၢ်လီၤ. မ့မ့ၢ်လံာ်လူၤကၣ်န့ၣ် ပာ်ဖျါထီၣ်ဝဲအါလၢ နီၢ်မၤရံအတၢ်ဆိကမိၣ် ဒီးတၢ်လၢအမၤဝဲတဖၣ်န့ၣ်လီၤ.

ယ့ၣ်ၡူးအတၢ်လီၤစၢၤလီၤသွဲၣ်အဂ့ၢ်န့ၣ် ပှၤကွဲးလံာ်စီဆှံဖိခံဂၤ ကွဲးဝဲလီၤဆီလိာ်အသးလီၤ. မးသဲပာ်ဖျါထီၣ်ဝဲ စီၤယိၤသးအတၢ်ဟဲလီၤစၢၤလီၤသွဲၣ် ဒီးယ့ၣ်ၡူးမ့ၢ် စီၤယိၤသးအဖိခွါလၢ အကွၢ်လုၢ်ဖိန့ၢ်ဝဲအဃိ ယ့ၣ်ၡူးအိၣ်ဒီးတၢ်ခွဲးတၢ်ယာ်လၢ ကပၢတၢ်လၢ စီၤဒၤဝံးအလီၢ်ပစိာ်လီၤ. မ့ၢ်လၢစီၤယိၤသးန့ၣ် ဟဲလီၤစၢၤလီၤသွဲၣ်လၢ စီၤပၤဒၤဝံးအဖိခွါ စီၤၡလိၤမိၤလီၤ. (မးသဲ ၁:၆, ၁၆) မ့မ့ၢ်လံာ်လူၤကၣ်န့ၣ် ကွဲးဖျါထီၣ်ဝဲနီၢ်မၤရံအတၢ် ဟဲလီၤစၢၤလီၤသွဲၣ်လီၤ. ဒီးပာ်ဖျါထီၣ်ဝဲလၢ ယ့ၣ်ၡူးအိၣ်ဒီး တၢ်ခွဲးတၢ်ယာ်လၢကပၢတၢ်လၢ စီၤဒၤဝံးအလီၢ်ပစိာ် မ့ၢ်လၢနီၢ်မၤရံန့ၣ် မ့ၢ်စီၤနၤသၣ် အ “သွံၣ်ထံဖံးညၣ်” လီၤ. (ရိမ့ၤ ၁:၃, ခ့ခါစှီၤကျိာ်) ဘၣ်မနုၤအဃိ ပတဲဒ်န့ၣ်လဲၣ် မ့ၢ်လၢစီၤနၤသၣ်န့ၣ် မ့ၢ်ဝဲစီၤဒၤဝံးအဖိခွါအဃိလီၤ. (လူၤကၣ် ၃:၃၁) နီၢ်မၤရံန့ၣ် မ့ၢ်ဝဲစီၤဟ့ၤလံအဖိမုၣ်လီၤ. ဘၣ်ဆၣ် ဘၣ်မနုၤအဃိ လူၤကၣ်တပာ်ဖျါထီၣ်ဝဲလၢ နီၢ်မၤရံမ့ၢ် စီၤဟ့ၤလံအဖိမုၣ်ဘၣ်လဲၣ်. မ့ၢ်လၢတၢ်ကွဲးနီၣ်ကွဲးဃါန့ၣ် ကွဲးလီၤဝဲထဲဟံၣ်ခိၣ် အတၢ်ဟဲလီၤစၢၤလီၤသွဲၣ်အဃိလီၤ. လၢတၢ်န့ၣ်အဃိ လူၤကၣ်ကွဲးဖျါထီၣ်ဝဲလၢ စီၤယိၤသးန့ၣ်မ့ၢ်ဝဲ စီၤဟ့ၤလံအဖိခွါ ဘၣ်ဆၣ် ပှၤနၢ်ပၢၢ်လၢ စီၤယိၤသးန့ၣ်မ့ၢ်ဝဲ စီၤဟ့ၤလံအမာ်လီၤ.—လူၤကၣ် ၃:၂၃.

ယ့ၣ်ၡူးအတၢ်ဟဲလီၤစၢၤလီၤသွဲၣ်လၢ ပထံၣ်ဘၣ်လၢ လံာ်မးသဲ ဒီးလံာ်လူၤကၣ်အပူၤန့ၣ် မ့ၢ်ဒၣ်တၢ်အုၣ်သးလၢ ယ့ၣ်ၡူးမ့ၢ်ဝဲဒၣ် မ့းၡံအၤလၢ ယွၤစံးပာ်ဝဲန့ၣ်လီၤ. ယ့ၣ်ၡူးဟဲလီၤစၢၤလီၤသွဲၣ်လၢ စီၤပၤဒၤဝံးန့ၣ်ပှၤသ့ၣ်ညါဝဲအါမး ဒီးဖၤရံၤၡဲ ဒီးပှၤစးဒူၤကဲတဖၣ်စ့ၢ်ကီး ဂ့ၢ်လိာ်ဝဲတသ့ဘၣ်. လံာ်မးသဲဒီး လံာ်လူၤကၣ်ပာ်ဖျါထီၣ်ဝဲ ယ့ၣ်ၡူးအတၢ်ဟဲလီၤစၢၤလီၤသွဲၣ်အဂ့ၢ်န့ၣ် အရ့ဒိၣ်လၢပတၢ်နာ်အဂီၢ် ဒီးမၤစၢၤပှၤဒ်သိးပကနာ်လၢ ကယဲၢ်ယွၤအတၢ်အၢၣ်လီၤအီလီၤတဖၣ် ကဟဲလၢထီၣ်ပှဲၤထီၣ်ဝဲလီၤ.