-
ပအိၣ်လၢတၢ်အိၣ်ဘၢၣ်စၢၤန့ၣ် အဲၣ်ဒိးတဲဝဲ တၢ်မနုၤလဲၣ်အိၣ်မူလီၤထူလီၤယိာ် ပှဲၤဒီးတၢ်သးခု—တၢ်မၤလိသကိး လံာ်စီဆှံ
-
-
တၢ်မၤလိ ၄၅
ပအိၣ်လၢတၢ်ဘၢၣ်စၢၤန့ၣ် အဲၣ်ဒိးတဲဝဲ တၢ်မနုၤလဲၣ်
ယ့ၣ်ၡူးတဲဝဲလၢ အပျဲၢ်အဘီၣ်တဖၣ်န့ၣ် “တဘၣ်ဃးဒီး ဟီၣ်ခိၣ်ဘၣ်.” (ယိၤဟၣ် ၁၅:၁၉) ယ့ၣ်ၡူးအတၢ်ကတိၤအံၤ အဲၣ်ဒိးတဲဝဲလၢ အပျဲၢ်အဘီၣ်တဖၣ်န့ၣ် အိၣ်လၢတၢ်ဘၢၣ်စၢၤ ဒီးအဝဲသ့ၣ် တဆီၣ်ထွဲဝဲ ထံဂ့ၢ်ကီၢ်ဂ့ၢ်ဒီး တၢ်ဒုးတၢ်ယၤ နီတစဲးဘၣ်. ပမ့ၢ်ဘၣ်တဲတီတီန့ၣ် ပကအိၣ်လၢ တၢ်ဘၢၣ်စၢၤအဂီၢ် တညီဝဲထီဘိဘၣ်. ခီဖျိလၢ ပအိၣ်လၢတၢ်ဘၢၣ်စၢၤအဃိ ပှၤဂၤကတဲဆါပှၤ ဘၣ်ဆၣ် ပဆဲးအိၣ်လၢ တၢ်ဘၢၣ်စၢၤ ဒီးဆဲးသးတီဒီး ယဟိဝၤယွၤ ကသ့ဒ်လဲၣ်.
၁. ဟီၣ်ခိၣ်အပဒိၣ်ပပှၢ်တဖၣ်န့ၣ် ခရံာ်ဖိအမ့ၢ်အတီတဖၣ် ထံၣ်အဝဲသ့ၣ်ဒ်လဲၣ်.
ပဝဲလၢအမ့ၢ် ခရံာ်ဖိလၢ အမ့ၢ်အတီတဖၣ်န့ၣ် ပပာ်ကဲ ပဒိၣ်ပပှၢ်တဖၣ် ဒီးပမၤထွဲ ယ့ၣ်ၡူးအတၢ်ကတိၤ လၢအမ့ၢ် “တၢ်လၢ အဘၣ်ဃးဒီး ကဲစၢ်န့ၣ် ဟ့ၣ်က့ၤလၢ ကဲစၢ်.” ယ့ၣ်ၡူးအတၢ်ကတိၤအံၤ အဲၣ်ဒိးတဲဝဲ ပဘၣ်ဒိကနၣ် ဒီးမၤထွဲ ထံကီၢ်အတၢ်သိၣ်တၢ်သီ ဒ်သိးဒီး တၢ်သိၣ်တၢ်သီလၢအမ့ၢ် ပကဘၣ်ဟ့ၣ် တၢ်ခိတၢ်သွဲ. (မၢ်ကူး ၁၂:၁၇) ဒီးလံာ်စီဆှံ သိၣ်လိဝဲလၢ ဟီၣ်ခိၣ် အပဒိၣ်ပပှၢ်တဖၣ်န့ၣ် ခီဖျိလၢ ယဟိဝၤယွၤ ဟ့ၣ်အဝဲသ့ၣ် အခွဲးအဃိ အဝဲသ့ၣ်ပၢဘၣ်တၢ်. (ရိမ့ၤ ၁၃:၁) တကးဒံးဘၣ် ပသ့ၣ်ညါဘၣ်လၢ ဟီၣ်ခိၣ်အပဒိၣ်ပပှၢ် လၢအပၢတၢ်တဖၣ်န့ၣ် အတၢ်စိတၢ်ကမီၤ စှၤန့ၢ်ဒံးကစၢ်ယွၤဒံး. ဒီးပခိးကွၢ်လၢ်လၢ ကစၢ်ယွၤ ဒီးအဘီအမုၢ် လၢမူခိၣ်န့ၣ် ကမၤကတၢၢ်ကွံာ်ဝဲ ဟီၣ်ခိၣ်အတၢ်ကီတၢ်ခဲတဖၣ်လီၤ.
၂. ပအိၣ်လၢတၢ်ဘၢၣ်စၢၤ ကသ့ဒ်လဲၣ်.
ဒ်ယ့ၣ်ၡူးအသိး ပတမၤဘၣ်ဃးပသးဒီး ထံဂ့ၢ်ကီၢ်ဂ့ၢ်ဘၣ်. ဖဲပှၤဂီၢ်မုၢ်ထံၣ်ဘၣ် တၢ်လီၤလးလၢ ယ့ၣ်ၡူးမၤဝဲတဖၣ်အခါ အဝဲသ့ၣ် ဂုာ်ကျဲးစၢး ဒုးကဲထီၣ်ယ့ၣ်ၡူး လၢစီၤပၤ. ဘၣ်ဆၣ် ယ့ၣ်ၡူးတပျဲ အဝဲသ့ၣ်ဘၣ်. (ယိၤဟၣ် ၆:၁၅) ဘၣ်မနုၤအဃိ အတပျဲအဝဲသ့ၣ်ဘၣ်လဲၣ်. လၢခံန့ၣ် ယ့ၣ်ၡူးတဲဝဲလၢ “ယဘီယမုၢ်န့ၣ် တဘၣ်ဃးဒီး ဟီၣ်ခိၣ်အံၤဘၣ်.” (ယိၤဟၣ် ၁၈:၃၆) အဃိ ဒ်ပမ့ၢ် ယ့ၣ်ၡူးအပျဲၢ်အဘီၣ်အသိး ပအိၣ်လၢ တၢ်ဘၢၣ်စၢၤန့ၣ် ပကဘၣ်ပာ်ဖျါထီၣ် လၢကျဲအါဘိ. အဒိ ပတလဲၤဒုးတၢ်ဘၣ်. (ဖး မံကၤ ၄:၃.) ပပာ်ကဲ ထံကီၢ်အတၢ်ပနီၣ်တဖၣ် ဒ်သိးဒီးနီၣ်တယၢ် ဘၣ်ဆၣ် ပတယူးယီၣ်အီၤဘၣ်. ပမ့ၢ်ယူးယီၣ်အီၤန့ၣ် လီၤဂာ်ဒ်သိးဒီး ပဘါထီၣ်အီၤ. (၁ ယိၤဟၣ် ၅:၂၁) တၢ်ကရၢကရိတဖုဖုလၢ အဆီၣ်ထွဲ ထံဂ့ၢ်ကီၢ်ဂ့ၢ် မ့တမ့ၢ် ပဒိၣ်လၢ ပှၤကဃုထၢထီၣ်အီၤ တဂၤဂၤန့ၣ် ပတအိၣ်ဃူအီၤဘၣ် ဒီးပတထီဒါအီၤစ့ၢ်ကီးဘၣ်. ပမ့ၢ်အိၣ်လၢတၢ်ဘၢၣ်စၢၤ ဒ်အံၤ ဒီးလၢတၢ်အိၣ်သးအဂၤတဖၣ်န့ၣ် မ့ၢ်ဝဲ ပပာ်ဖျါထီၣ်လၢ ပသးတီဒီး ကစၢ်ယွၤအဘီမုၢ် လၢပသးဒီဖျၢၣ်ညါလီၤ.
ဃုသ့ၣ်ညါအါထီၣ်
ခဲအံၤ ပကတဲသကိး တၢ်အိၣ်သးတဖၣ်လၢ အကကဲထီၣ် တၢ်မၤကွၢ်လၢ ပကအိၣ်လၢတၢ်ဘၢၣ်စၢၤ. ပကတဲသကိးစ့ၢ်ကီး ဘၣ်ဃးဒီး ပဆၢတဲာ်တၢ်လၢ အဘၣ်ယဟိဝၤယွၤအသး ကသ့ဒ်လဲၣ်.
၃. ခရံာ်ဖိအမ့ၢ်အတီတဖၣ်န့ၣ် အိၣ်လၢတၢ်ဘၢၣ်စၢၤ
ဘၣ်ဃးဒီး တၢ်အိၣ်ဘၢၣ်စၢၤန့ၣ် ယ့ၣ်ၡူး ဒီးအပျဲၢ်အဘီၣ်တဖၣ်န့ၣ် ပာ်လီၤန့ၢ်ပှၤ တၢ်အဒိလၢအဂ့ၤ. ဖး ရိမ့ၤ ၁၃:၁, ၅-၇ ဒီး ၁ ပ့းတရူး ၂:၁၃, ၁၄. ဒီး ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ.
ဘၣ်မနုၤအဃိ ပဘၣ်ပာ်ကဲ ဟီၣ်ခိၣ်အပဒိၣ်ပပှၢ်တဖၣ်လဲၣ်.
ပအိၣ်လၢ ပဒိၣ်ပပှၢ်တဖၣ် အတၢ်ပၢဖီလာ်န့ၣ် ပပာ်ဖျါထီၣ် ကသ့ဒ်လဲၣ်.
ဖဲတၢ်ဒုး ကဲထီၣ်အခါ ထံကီၢ်တနီၤနီၤန့ၣ် တဲလီၤအသးလၢ အဝဲသ့ၣ် အိၣ်လၢတၢ်ဘၢၣ်စၢၤ. ဘၣ်ဆၣ် အဝဲသ့ၣ်ဆီၣ်ထွဲဝဲ ပှၤဒုးလိာ်သး ခံဒူၣ်လၢာ်လီၤ. နီၢ်ကီၢ်န့ၣ် တၢ်အိၣ်ဘၢၣ်စၢၤန့ၣ် အဲၣ်ဒိးတဲဝဲ အခီပညီဒ်လဲၣ်. ဖး ယိၤဟၣ် ၁၇:၁၆. ဒီး ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ.
ပအိၣ်လၢတၢ်ဘၢၣ်စၢၤန့ၣ် အဲၣ်ဒိးတဲဝဲ အခီပညီဒ်လဲၣ်.
ဟီၣ်ခိၣ်အပဒိၣ်ပပှၢ်တဖၣ် မ့ၢ်မၢနမၤ တၢ်တမံၤမံၤ လၢအထီဒါလိာ်သးဒီး ကစၢ်ယွၤ အတၢ်သိၣ်တၢ်သီမီၤ နကမၤဒ်လဲၣ်. ဖး မၤတၢ် ၅:၂၈, ၂၉. ဒီး ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ.
ပှၤဟီၣ်ခိၣ်ဖိ အတၢ်သိၣ်တၢ်သီ မ့ၢ်ထီဒါလိာ်အသးဒီး ကစၢ်ယွၤ အတၢ်သိၣ်တၢ်သီန့ၣ် ပကဘၣ်ဒိကနၣ် မတဂၤ အတၢ်သိၣ်တၢ်သီလဲၣ်.
တၢ်အိၣ်သးတနီၤလၢ ခရံာ်ဖိတဖၣ် တဘၣ်ဒိကနၣ်ဝဲ ဟီၣ်ခိၣ်ပဒိၣ်ပပှၢ်တဖၣ် အကလုၢ်ဘၣ်န့ၣ် နဆိကမိၣ် ကမ့ၢ်တၢ်အိၣ်သး ဒ်လဲၣ်တဖၣ်လဲၣ်.
၄. ပတၢ်ဆိကမိၣ် ဒီးတၢ်လၢပမၤတဖၣ်န့ၣ် ကဘၣ်ဖျါလၢ ပအိၣ်လၢတၢ်ဘၢၣ်စၢၤ
ဖး ၁ ယိၤဟၣ် ၅:၂၁. ဒီး ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ.
လၢတၢ်ဂီၤမူအပူၤန့ၣ် ဒီပုၢ်ဝဲၢ်ခွါ အ့ၤက့ၣ် ပာ်လီၤအသးလၢ အတမၤဘၣ်ဃးလိာ်အသးဒီး တၢ်ကရၢကရိလၢ အဆီၣ်ထွဲ ထံဂ့ၢ်ကီၢ်ဂ့ၢ်ဘၣ် ဒီးအတယူးယီၣ် နီၣ်တယၢ်ဘၣ်. ဘၣ်မနုၤအဃိ အပာ်လီၤအသး ဒ်န့ၣ်လဲၣ်.
ဒီပုၢ်ဝဲၢ်ခွါ အ့ၤက့ၣ် အတၢ်ဆၢတဲာ်န့ၣ် နဆိကမိၣ် အဘၣ်ဧါ.
တၢ်အိၣ်သး အဂၤတဖၣ်လၢ အကကဲထီၣ် တၢ်မၤကွၢ်လၢ ပကအိၣ်လၢတၢ်ဘၢၣ်စၢၤန့ၣ် မ့ၢ်တၢ်အိၣ်သး ဒ်လဲၣ်တဖၣ်လဲၣ်. ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖၣ်အံၤ.
ဖဲပကွၢ် ပှၤလိာ်ကွဲပြၢတၢ် လၢထံကီၢ်အဂီၢ်အခါ ပအိၣ်လၢတၢ်ဘၢၣ်စၢၤ ကသ့ဒ်လဲၣ်.
ပှၤမၤထံဂ့ၢ်ကီၢ်ဂ့ၢ်တဖၣ် အတၢ်ဆၢတဲာ်န့ၣ် အကဲဘျုးလၢပဂီၢ်မ့ၢ်ဂ့ၤ အမၤဘၣ်ဒိပှၤမ့ၢ်ဂ့ၤ ပဆဲးအိၣ်လၢ တၢ်ဘၢၣ်စၢၤ ကသ့ဒ်လဲၣ်.
တၢ်ကစီၣ်လၢ ပကွၢ်ဘၣ် ဒီးပနၢ်ဟူဘၣ်လၢ ပသကိးအအိၣ်န့ၣ် အကဲထီၣ် တၢ်မၤကွၢ်လၢ ပကအိၣ်လၢတၢ်ဘၢၣ်စၢၤ ကသ့ဒ်လဲၣ်.
ခရံာ်ဖိအမ့ၢ်အတီတဂၤ ဆဲးအိၣ်လၢတၢ်ဘၢၣ်စၢၤ လၢအတၢ်ဆိကမိၣ် ဒီးအတၢ်မၤ ကသ့ဒ်လဲၣ်
ပှၤတနီၤ သံကွၢ်ဝဲလၢ– “ဘၣ်မနုၤအဃိ နတဆီၣ်ထွဲ ထံဂ့ၢ်ကီၢ်ဂ့ၢ်, နတယူးယီၣ်နီၣ်တယၢ် ဒီးနတသးဝံၣ် ထံကီၢ်ဒီကလုာ် အတၢ်သးဝံၣ်ဘၣ်လဲၣ်.”
ပှၤမ့ၢ်သံကွၢ်နၤ ဒ်န့ၣ်န့ၣ် နကစံးဆၢက့ၤဒ်လဲၣ်.
တၢ်ဂ့ၢ်လၢအရ့ဒိၣ်
ခရံာ်ဖိအမ့ၢ်အတီတဖၣ် ဂုာ်ကျဲးစၢးပာ်ဖျါထီၣ်ဝဲလၢ အအိၣ်လၢတၢ်ဘၢၣ်စၢၤ လၢအတၢ်ဆိကမိၣ်, လၢအတၢ်ကတိၤ ဒီးလၢအတၢ်မၤ.
တၢ်ကွၢ်ကဒါက့ၤ
ပမူဒါအိၣ်လၢ ပကဘၣ်ဟ့ၣ် ဟီၣ်ခိၣ်အပဒိၣ်ပပှၢ်တဖၣ် လၢမနုၤလဲၣ်.
ဘၣ်ဃးဒီး ထံဂ့ၢ်ကီၢ်ဂ့ၢ်န့ၣ် ဘၣ်မနုၤအဃိ ပအိၣ်လၢတၢ်ဘၢၣ်စၢၤလဲၣ်.
တၢ်အိၣ်သးတဖၣ်လၢ အကမၤကွၢ် ပတၢ်အိၣ်ဘၢၣ်စၢၤန့ၣ် မ့ၢ်တၢ်အိၣ်သး မနုၤတဖၣ်လဲၣ်.
ဃုသ့ၣ်ညါ
ဒ်သိးပကဆဲးအိၣ်လၢ တၢ်ဘၢၣ်စၢၤအဂီၢ် ပကဘၣ်တူၢ်ဆါပသးဒ်လဲၣ်.
တချုးလၢ ဟံၣ်ဖိဃီဖိတဖၣ် ထံၣ်ဘၣ်တၢ်မၤကွၢ်လၢ အဘၣ်ဃးဒီး တၢ်အိၣ်ဘၢၣ်စၢၤဒံးဘၣ်န့ၣ် အဝဲသ့ၣ် အိၣ်ကတဲာ်ကတီၤ ဆိပာ်စၢၤအသး ကသ့ဒ်လဲၣ်.
ပၢၤဃာ်တၢ်အိၣ်ဘၢၣ်စၢၤလၢ ကမျၢၢ်တၢ်မၤလၢအဘၣ်ထွဲဒီး ထံဂ့ၢ်ကီၢ်ဂ့ၢ် (၄:၂၅)
ပှၤတဂၤ မ့ၢ်ဒီသဒၢဝဲအထံကီၢ် သနာ်က့ တၢ်လၢအမၤဝဲတခါအံၤ ဘၣ်မနုၤအဃိ တကဲဝဲ တၢ်လၤကပီၤလၢ အဂ့ၤကတၢၢ်ဘၣ်လဲၣ်.
ဖးကွၢ် ဘၣ်ဃးဒီး တချုးလၢ ပဆၢတဲာ်တၢ်လၢ ပကမၤတၢ်မၤတခါခါဒံးဘၣ်န့ၣ် ဒ်သိးပသုတဘၣ်ဃးဒီး ဟီၣ်ခိၣ်တဂ့ၤအဂီၢ် ပကဘၣ် ဆိကမိၣ်ထံ တၢ်ဂ့ၢ်မနုၤလဲၣ်.
“ပှၤကိးဂၤဒဲး ကဘၣ်ဝံ အနီၢ်ကစၢ် အတၢ်ဝံတၢ်ယိး” (တၢးထီခိးတၢ်, လါမၢ်ၡး ၁၅, ၂၀၀၆)
-
-
ပှၤမ့ၢ်မၤအၢမၤနးနၤ သနာ်က့ နဆဲးအိၣ်ဒီး တၢ်သးတီသ့အိၣ်မူလီၤထူလီၤယိာ် ပှဲၤဒီးတၢ်သးခု—တၢ်မၤလိသကိး လံာ်စီဆှံ
-
-
ပဝဲခရံာ်ဖိ ကိးဂၤဒဲး ပကထံၣ်ဘၣ် တၢ်ထီဒုၣ်ထီဒါ. ပှၤဂၤကဂုာ်ကျဲးစၢး မၤပတုာ်ပှၤဒ်သိး ပသုတဘူၣ်ထီၣ်ဘါထီၣ် ယဟိဝၤယွၤ လၢၤတဂ့ၤ. ဒီးပမ့ၢ်တပတုာ် ဘူၣ်ထီၣ်ဘါထီၣ် ယဟိဝၤယွၤဘၣ်န့ၣ် အဝဲသ့ၣ် ကမၤအၢမၤနးပှၤ. ဘၣ်ဆၣ် ပကြၢးဘၣ်ယိၣ်တၢ်ဧါ.
၁. ပှၤကမၤအၢမၤနးပှၤန့ၣ် ပသ့ၣ်ညါပာ်စၢၤဒ်လဲၣ်.
လံာ်စီဆှံ တဲဖျါထီၣ်န့ၢ်ပှၤ လီၤတံၢ်လီၤဆဲးလၢ “ပှၤလၢအအဲၣ်ဒိး တီဒီးကစၢ်ယွၤ ဒ်ယ့ၣ်ၡူးခရံာ်အပျဲၢ်တဂၤအသိးန့ၣ် ကဘၣ်တၢ်မၤနးမၤဖှီၣ် အဝဲသ့ၣ်ကိးဂၤဒဲးလီၤ.” (၂ တံၤမသ့း ၃:၁၂) ယ့ၣ်ၡူးန့ၣ် ခီဖျိလၢ အတဘၣ်ဃးဒီး ဟီၣ်ခိၣ်ဘၣ်အဃိ ပှၤမၤအၢမၤနးအီၤ. ပဝဲစ့ၢ်ကီး ခီဖျိလၢ ပတမၤဘၣ်ဃးလိာ်ပသးဒီး ဟီၣ်ခိၣ်တၢ်ပၢတၢ်ပြး ဒီးတၢ်ဘူၣ်တၢ်ဘါကမၣ် နီတခါဘၣ်အဃိ ပှၤမ့ၢ်မၤအၢမၤနးပှၤ သနာ်က့ ပတကမၢကမၣ်ဘၣ်.—ယိၤဟၣ် ၁၅:၁၈, ၁၉.
၂. ပအိၣ်ကတဲာ်ကတီၤဆိပာ်စၢၤပသး လၢတၢ်မၤအၢမၤနးအဂီၢ် ကသ့ဒ်လဲၣ်.
ပကဘၣ် မၤဂၢၢ်ကျၢၤထီၣ် ပတၢ်နာ်ယဟိဝၤယွၤ လၢဆၢကတီၢ်ခဲအံၤ. အဃိ ကိးနံၤဒဲးန့ၣ် ဟံးန့ၢ်တၢ်ဆၢကတီၢ် လၢနကဃ့ထုကဖၣ် ဒီးဖးလံာ်စီဆှံ. တကးဒံးဘၣ် နကဘၣ် ထီၣ်တၢ်အိၣ်ဖှိၣ်ထီဘိ. ပမ့ၢ်မၤဒ်အံၤန့ၣ် ပဟံၣ်ဖိဃီဖိ မ့ၢ်ထီဒါပှၤ မ့တမ့ၢ် ပမ့ၢ်ထံၣ်ဘၣ်ဒီး တၢ်မၤအၢမၤနး တမံၤဂ့ၤတမံၤဂ့ၤ သနာ်က့ ပလဲၤခီဖျိ တၢ်မၤအၢမၤနးတဖၣ်အံၤ လၢတၢ်သးဒူအပူၤသ့. တၢ်မၢဖိပီလူး လၢအကဲပှၤတဂၤလၢ အထံၣ်ဘၣ်ဒီး တၢ်မၤအၢမၤနး တလီၢ်လီၢ်န့ၣ် ကွဲးဝဲလၢ “ယဟိဝၤယွၤ မ့ၢ်ပှၤလၢ အမၤစၢၤယၤအဃိ ယတပျံၤတၢ်ဘၣ်.”—ဧ့ၤဘြံၤ ၁၃:၆.
ပမၤအါထီၣ် ပတၢ်သးဒူ သ့ခီဖျိ ပဟးစံၣ်တဲၤတဲလီၤတၢ်ထီဘိ. ဖဲပဟးစံၣ်တဲၤတဲလီၤတၢ်အခါ အမၤစၢၤပှၤဒ်သိး ပကသန့ၤပသး လၢယဟိဝၤယွၤ ဒီးပသုတပျံၤပှၤကညီ လၢၤတဂ့ၤ. (ကတိၤဒိ ၂၉:၂၅) ခါဆူညါန့ၣ် ပဒိၣ်ပပှၢ်မ့ၢ်ဂုာ်ကျဲးစၢး မၤပတုာ်ပှၤ ဒ်သိး ပသုတဟးစံၣ်တဲၤတဲလီၤတၢ် လၢၤတဂ့ၤ သနာ်က့ ပမ့ၢ်မၤအါထီၣ် ပတၢ်သးဒူ ခီဖျိပစံၣ်တဲၤတဲလီၤတၢ် လၢဆၢကတီၢ်ခဲအံၤန့ၣ် မ့ၢ်ဝဲ ပအိၣ်ကတဲာ်ကတီၤ ဆိပာ်စၢၤပသး ဒ်သိးပကဆဲး စံၣ်တဲၤတဲလီၤတၢ် လၢခါဆူညါ.—၁ သ့းစၤလနံ ၂:၂.
၃. ဖဲပထံၣ်ဘၣ် တၢ်မၤအၢမၤနးအခါ ပမ့ၢ်ဆဲးတီဒီး ယဟိဝၤယွၤန့ၣ် ကကဲဘျုးဒ်လဲၣ်.
ပမ့ၢ်ထံၣ်ဘၣ် တၢ်မၤအၢမၤနးန့ၣ် ပတူၢ်ဘၣ်တမုာ်ဘၣ်. ဘၣ်ဆၣ် ဖဲပလဲၤခီဖျိ တၢ်မၤအၢမၤနးန့ၢ်အခါ ပတၢ်နာ် ဂၢၢ်ကျၢၤဒိၣ်ထီၣ်ဝဲ. ဒီးတဘျီတခီၣ်န့ၣ် ပဆိကမိၣ်လၢ ပလဲၤခီဖျိတၢ် တန့ၢ်လၢၤဘၣ်. သနာ်က့ ဖဲပဆိကမိၣ်ဒ်န့ၣ်အခါ ပထံၣ်ဘၣ် ယဟိဝၤယွၤ အတၢ်မၤစၢၤ လၢကျဲတဘိဘိအဃိ ပတၢ်ရ့လိာ်သးဒီးအီၤ ဂၢၢ်ကျၢၤဒိၣ်ထီၣ်ဝဲ. (ဖး ယၤကိာ် ၁:၂-၄.) ဖဲယဟိဝၤယွၤ ထံၣ်ဝဲလၢ ပဘၣ်တူၢ်တၢ်အခါ အသးတမုာ်ဘၣ်. ဘၣ်ဆၣ် ဖဲအထံၣ်ဝဲလၢ ပတဟ့ၣ်အၡူဘၣ်အခါ အဝဲသးခုဒိၣ်မး. လံာ်စီဆှံ တဲဝဲလၢ “သုမ့ၢ်တူၢ်တၢ်နးတၢ်ဖှီၣ် မ့ၢ်လၢ သုမၤတၢ်ဂ့ၤအဃိန့ၣ် ကစၢ်ယွၤ ဘၣ်သူၣ်ဘၣ်သးဝဲလီၤ.” (၁ ပ့းတရူး ၂:၂၀) အဃိ ပမ့ၢ်တီဒီး ယဟိဝၤယွၤန့ၣ် ယဟိဝၤယွၤ ကဆိၣ်ဂ့ၤပှၤ ဒီးအကဟ့ၣ်ပှၤ တၢ်မူအထူအယိာ် လၢဟီၣ်ခိၣ်သီအပူၤ. ဒီးပှၤလၢအအိၣ်လၢ ဟီၣ်ခိၣ်သီအပူၤန့ၣ် ကဘူၣ်ထီၣ်ဘါထီၣ် ယဟိဝၤယွၤ ကိးဂၤဒဲး ဒီးပှၤတြီအဝဲသ့ၣ် တအိၣ်နီတဂၤလၢၤဘၣ်.—မးသဲ ၂၄:၁၃.
ဃုသ့ၣ်ညါအါထီၣ်
ခဲအံၤ ပကတဲသကိး ဘၣ်ဃးဒီး ပှၤမ့ၢ်မၤအၢမၤနးပှၤ သနာ်က့ ပတီဒီး ယဟိဝၤယွၤသ့. ဒီးပမ့ၢ်တီဒီး ယဟိဝၤယွၤန့ၣ် အကဆိၣ်ဂ့ၤပှၤ.
၄. နဟံၣ်ဖိဃီဖိ မ့ၢ်ထီဒါနၤ သနာ်က့ နလဲၤခီဖျိအီၤန့ၢ်
ယ့ၣ်ၡူး သ့ၣ်ညါဝဲဂ့ၤဂ့ၤလၢ ပှၤလၢပဟံၣ်ဖိဃီဖိအကျါ တနီၤန့ၣ် ဘၣ်သ့ၣ်သ့ၣ် အဝဲသ့ၣ် တအဲၣ်ဒိးလၢ ပကဘူၣ်ထီၣ်ဘါထီၣ် ယဟိဝၤယွၤဘၣ်. ဖး မးသဲ ၁၀:၃၄-၃၆ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
ပှၤတဂၤမ့ၢ် ဆၢတဲာ်လီၤအသးလၢ အကဘူၣ်ထီၣ်ဘါထီၣ် ယဟိဝၤယွၤန့ၣ် ဘၣ်သ့ၣ်သ့ၣ် ပှၤလၢအဟံၣ်ဖိဃီဖိ အကျါတဂၤဂၤ ကတဲအီၤ မ့တမ့ၢ် ကမၤကီမၤခဲအီၤဒ်လဲၣ်.
ဒ်သိး နကထံၣ်ဘၣ် အဒိတခါအဂီၢ် ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ.
နဟံၣ်ဖိဃီဖိ မ့တမ့ၢ် နသကိးတဂၤဂၤ မ့ၢ်ဂုာ်ကျဲးစၢး တြီနၤဒ်သိး နသုတဘူၣ်ထီၣ်ဘါထီၣ် ယဟိဝၤယွၤ လၢၤတဂ့ၤန့ၣ် နကမၤဒ်လဲၣ်.
ဖး စံးထီၣ်ပတြၢၤ ၂၇:၁၀ ဒီး မၢ်ကူး ၁၀:၂၉, ၃၀. ဖးလံာ်စီဆှံတဆၢ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ. ဝံၤဒီး ဖးလံာ်စီဆှံလၢခံတဆၢ ဒီးတဲသကိးကဒီး တၢ်သံကွၢ် လၢလာ်တဖျၢၣ်အံၤ–
နဟံၣ်ဖိဃီဖိ မ့တမ့ၢ် နသကိးတဂၤဂၤ မ့ၢ်ဂုာ်ကျဲးစၢး တြီနၤဒ်သိး နသုတဘူၣ်ထီၣ်ဘါထီၣ် ယဟိဝၤယွၤ လၢၤတဂ့ၤန့ၣ် တၢ်အၢၣ်လီၤလၢ လံာ်စီဆှံတဆၢအံၤအပူၤန့ၣ် ကမၤစၢၤနၤဒ်လဲၣ်.
၅. ပှၤမ့ၢ်မၤအၢမၤနးနၤ သနာ်က့ ဆဲးဘူၣ်ထီၣ်ဘါထီၣ် ယဟိဝၤယွၤ
ပှၤမ့ၢ်ဂုာ်ကျဲးစၢး တြီပှၤဒ်သိး ပသုတဘူၣ်ထီၣ်ဘါထီၣ် ယဟိဝၤယွၤ လၢၤတဂ့ၤန့ၣ် ဒ်သိး ပကဆဲးဘူၣ်ထီၣ်ဘါထီၣ် ယဟိဝၤယွၤအဂီၢ် ပလိၣ်ဘၣ်တၢ်သးဒူ. ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ.
ဒ်သိး နတၢ်သးဒူ ကအါထီၣ်အဂီၢ် တၢ်လဲၤခီဖျိလၢ တၢ်ဂီၤမူအပူၤအံၤ မၤစၢၤနၤဒ်လဲၣ်.
ဖး မၤတၢ် ၅:၂၇-၂၉ ဒီး ဧ့ၤဘြံၤ ၁၀:၂၄, ၂၅. ဖးလံာ်စီဆှံတဆၢ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ. ဝံၤဒီး ဖးလံာ်စီဆှံ လၢခံတဆၢ ဒီးတဲသကိးကဒီး တၢ်သံကွၢ် လၢလာ်တဖျၢၣ်အံၤ–
ပဒိၣ်ပပှၢ် မ့ၢ်တဲပှၤလၢ ပတဘၣ်ဟးစံၣ်တဲၤတဲလီၤတၢ် မ့တမ့ၢ် တဘၣ်ထီၣ်တၢ်အိၣ်ဖှိၣ် လၢၤဘၣ်န့ၣ် ဘၣ်မနုၤအဃိ အရ့ဒိၣ်လၢ ပကဘၣ် ဆဲးဘူၣ်ထီၣ်ဘါထီၣ် ယဟိဝၤယွၤလဲၣ်.
၆. ဒ်သိး နတူၢ်တၢ်ကန့ၢ်အဂီၢ် ယဟိဝၤယွၤ ကမၤစၢၤနၤ
လၢဟီၣ်ခိၣ်ဒီဘ့ၣ်န့ၣ် ယဟိဝၤပှၤအုၣ်အသးတနီၤ လၢအသးပှၢ်မ့ၢ်ဂ့ၤ အသးစၢ်မ့ၢ်ဂ့ၤ အဝဲသ့ၣ် ထံၣ်ဘၣ်ဒီး တၢ်မၤအၢမၤနး ဘၣ်ဆၣ် အဝဲသ့ၣ် ဆဲးဘူၣ်ထီၣ်ဘါထီၣ် ယဟိဝၤယွၤ လၢတၢ်သးတီအပူၤ. အဝဲသ့ၣ် ဆဲးဘူၣ်ထီၣ်ဘါထီၣ် ယဟိဝၤယွၤ လၢတၢ်သးတီအပူၤ န့ၢ်ဝဲဒ်လဲၣ်. ဒ်သိးနကထံၣ်ဘၣ် တၢ်အဒိအဂီၢ် ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ.
လၢတၢ်ဂီၤမူအပူၤန့ၣ် ဒ်သိး ယဟိဝၤပှၤအုၣ်အသးတဖၣ် ဆဲးတူၢ်တၢ်ကန့ၢ်အဂီၢ် တၢ်မနုၤမၤစၢၤ အဝဲသ့ၣ်လဲၣ်.
ဖး ရိမ့ၤ ၈:၃၅, ၃၇-၃၉ ဒီး ဖံလံးပံၤ ၄:၁၃. ဖးလံာ်စီဆှံတဆၢ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ. ဝံၤဒီး ဖးလံာ်စီဆှံ လၢခံတဆၢ ဒီးတဲသကိးကဒီး တၢ်သံကွၢ် လၢလာ်တဖျၢၣ်အံၤ–
ဒ်လံာ်စီဆှံတဆၢအံၤ ပာ်ဖျါထီၣ်ဝဲအသိး ဘၣ်မနုၤအဃိ နနာ်သ့လၢ နလဲၤခီဖျိ တၢ်မၤကွၢ် တမံၤဂ့ၤတမံၤဂ့ၤ န့ၢ်ဝဲလဲၣ်.
ဖး မးသဲ ၅:၁၀-၁၂ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–
နမ့ၢ်ထံၣ်ဘၣ်ဒီး တၢ်မၤအၢမၤနး သနာ်က့ ဘၣ်မနုၤအဃိ နသးခုသ့ဒံးလဲၣ်.
ယဟိဝၤပှၤအုၣ်အသး လၢအကကွဲၢ်တဖၣ်န့ၣ် ထံၣ်ဘၣ်ဒီး တၢ်မၤအၢမၤနး သနာ်က့ အဝဲသ့ၣ် ဆဲးဘူၣ်ထီၣ်ဘါထီၣ် ယဟိဝၤယွၤ လၢတၢ်သးတီအပူၤ. နၤစ့ၢ်ကီး နမၤဒ်သိးဒီး အဝဲသ့ၣ်န့ၢ်
ပှၤတနီၤတဲဝဲလၢ– “ယၤဒု ယမ့ၢ်ထံၣ်ဘၣ်ဒီး တၢ်မၤအၢမၤနးန့ၣ် ယတူၢ်တန့ၢ်ဘၣ်.”
ဒ်သိး အဝဲသ့ၣ် ကအိၣ်ဒီးတၢ်သးဒူအဂီၢ် လံာ်စီဆှံအဆၢလၢ မၤစၢၤအီၤသ့န့ၣ် ကမ့ၢ်ဖဲလဲၣ်တဆၢလဲၣ်.
တၢ်ဂ့ၢ်လၢအရ့ဒိၣ်
ဖဲပထံၣ်ဘၣ်ဒီး တၢ်မၤအၢမၤနးအခါ ပမ့ၢ်ဆဲးဘူၣ်ထီၣ်ဘါထီၣ် ယဟိဝၤယွၤန့ၣ် ယဟိဝၤယွၤ ပာ်လုၢ်ပာ်ပှ့ၤဝဲ ပတၢ်ဂုာ်ကျဲးစၢး. ဒီးခီဖျိလၢ ယဟိဝၤယွၤ အတၢ်မၤစၢၤအဃိ ပတူၢ်တၢ်ကန့ၢ်ထီဘိ.
တၢ်ကွၢ်ကဒါက့ၤ
ပှၤကမၤအၢမၤနးပှၤန့ၣ် ပသ့ၣ်ညါပာ်စၢၤဒ်လဲၣ်.
ပအိၣ်ကတဲာ်ကတီၤ ဆိပာ်စၢၤပသး လၢတၢ်မၤအၢမၤနးအဂီၢ် ကသ့ဒ်လဲၣ်.
ပမ့ၢ်ထံၣ်ဘၣ်ဒီး တၢ်မၤအၢမၤနး တမံၤဂ့ၤတမံၤဂ့ၤ သနာ်က့ ဘၣ်မနုၤအဃိ ပနာ်သ့သပှၢ်တၢၢ်လၢ ပဆဲးဘူၣ်ထီၣ်ဘါထီၣ် ယဟိဝၤယွၤ သ့ဒံးလဲၣ်.
ဃုသ့ၣ်ညါ
ကွၢ်တၢ်ဂီၤမူလၢ အပာ်ဖျါထီၣ်ဝဲ ဒီပုၢ်ဝဲၢ်ခွါသးစၢ်တဂၤ တဲဖျါထီၣ်ဝဲလၢ ခီဖျိလၢ အတမၤဘၣ်ဃးအသးဒီး ထံဂ့ၢ်ကီၢ်ဂ့ၢ်ဘၣ်အဃိ အဘၣ်အိၣ်လၢဃိာ်ပူၤ. ဘၣ်ဆၣ် ဒ်သိး အတူၢ်တၢ်ကန့ၢ်အဂီၢ် ယဟိဝၤယွၤ မၤစၢၤအီၤဒ်လဲၣ်.
ထံၣ်ဘၣ်ဒီး တၢ်မၤအၢမၤနးဘၣ်ဆၣ် ဆဲးအိၣ်ဒီးတၢ်တူၢ်န့ၢ်ခီၣ်ကဲ (၂:၃၄)
ကွၢ်တၢ်ဂီၤမူလၢ အပာ်ဖျါထီၣ်ဝဲ ပှၤဒီမိၢ်ဝၤခံဂၤ ထံၣ်ဘၣ်ဒီး တၢ်မၤကွၢ်လၢ အနံၣ်အါမး သနာ်က့ ဒ်သိး အဝဲသ့ၣ် ကဆဲးဘူၣ်ထီၣ်ဘါထီၣ် ယဟိဝၤယွၤ လၢတၢ်သးတီအပူၤန့ၣ် တၢ်မနုၤမၤစၢၤ အဝဲသ့ၣ်လဲၣ်.
ဖးကွၢ် တၢ်ဂ့ၢ်လၢ အပာ်ဖျါထီၣ်ဝဲ ဖဲနထံၣ်ဘၣ်ဒီး တၢ်မၤအၢမၤနးအခါ နအိၣ်ဒီးတၢ်သးဒူ ကသ့ဒ်လဲၣ်.
“ဆၢကတီၢ်ခဲအံၤ အိၣ်ကတဲာ်ကတီၤပာ်စၢၤနသး လၢတၢ်မၤအၢမၤနးအဂီၢ်” (တၢးထီခိးတၢ်, လါယူၤလံ ၂၀၁၉)
ပဟံၣ်ဖိဃီဖိ မ့ၢ်ထီဒါပှၤန့ၣ် ပကြၢးအိၣ်ဒီးတၢ်ထံၣ်ဒ်လဲၣ်. ဒီးဒ်သိး ပကပာ်ပသး မုာ်မုာ်ခုၣ်ခုၣ် ဒီးဆဲးသးတီဒီး ယဟိဝၤယွၤအဂီၢ် ပကဘၣ်မၤဒ်လဲၣ်.
“တၢ်မ့ၢ်တၢ်တီန့ၣ် တဒုးအိၣ်ထီၣ် “တၢ်ဃူတၢ်ဖိးဘၣ်, မ့ၢ်နးတဘ့ၣ်”” (တၢးထီခိးတၢ်, လါအီးကထိဘၢၣ် ၂၀၁၇)
-