ခရံာ်ဖိအတၢ်အိၣ်မူဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိတၢ်ဂ့ၢ်ဘျးစဲ
© 2024 Watch Tower Bible and Tract Society of Pennsylvania
လါယူၤလံ ၁-၇
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၅၇-၅၉
ယဟိဝၤယွၤ မၤဘံဘူ ပှၤလၢအထီဒါ အခ့အပှၤတဖၣ် အခိၣ်နူာ်
“ပၢၢ်တုၤလၢ ဟီၣ်ခိၣ်ဒီဘ့ၣ်”
၁၄ စီၤစတ့းဖၣ်န့ၣ် တချုးလၢ အဒုၣ်အဒါ မၤသံအီၤဒံးဘၣ်အခါ အဝဲစံၣ်တဲၤတဲလီၤတၢ် လၢတၢ်သးဒူအပူၤ. (မၤတၢ် ၆:၅; ၇:၅၄-၆၀) ဖဲန့ၣ်အခါ တၢ် “မၤနးမၤဖှီၣ် . . . နးမး” စးထီၣ်အသး ဒီးယ့ၣ်ၡူးအပျဲၢ်အဘီၣ်ခဲလၢာ် လီၤပြံလီၤပြါဝဲလၢ ယူဒၤဒီးၡၤမရံ အဟီၣ်ကဝီၤအပူၤ. ဘၣ်ဆၣ် ထဲဒၣ် တၢ်မၢဖိတဖၣ်န့ၣ် အိၣ်တ့ၢ်ဝဲလၢ ဝ့ၢ်ယရူၤၡလ့ၣ်အပူၤ. တၢ်ကဲထီၣ်အသးဒ်န့ၣ်သနာ်က့ တၢ်စံၣ်တဲၤတဲလီၤတၢ်မၤန့ၣ် တပတုာ်ဝဲဘၣ်. အဒိ စီၤဖံလံးပူးန့ၣ် အလဲၤအိၣ်လၢ ၡၤမရံ ဒီးအဝဲ “စံၣ်တဲၤတဲလီၤ” ပှၤဖဲန့ၣ်တဖၣ်လၢ “ခရံာ်အဂ့ၢ်” ဒီးဒုးကဲထီၣ်ပှၤဂၤလၢ ခရံာ်အပျဲၢ်အဘီၣ်. (မၤတၢ် ၈:၁-၈, ၁၄, ၁၅, ၂၅) တကးဒံးဘၣ် လံာ်စီဆှံ ပာ်ဖျါထီၣ်စ့ၢ်ကီးလၢ “ပှၤလၢ အလီၤပြံလီၤပြါ ခီဖျိလၢ တၢ်မၤအၢမၤနးလၢ အဟဲကဲထီၣ်အသး ဖဲစီၤစတ့းဖၣ် ဘၣ်တၢ်မၤသံအီၤ ဝံၤအလီၢ်ခံန့ၣ် အဝဲသ့ၣ်လဲၤတုၤလၢ ဖံၤနံက့ၤ, ကီးကူပြူး ဒီးဝ့ၢ်အၣ်တံၤအီာ်လီၤ. ဘၣ်ဆၣ် အဝဲသ့ၣ်န့ၣ် စံၣ်တဲၤတဲလီၤထဲဒၣ်လၢ ပှၤယူဒၤဖိတဖၣ်အအိၣ်လီၤ. သနာ်က့ ပှၤတနီၤလၢ အဝဲသ့ၣ်အကျါလၢ အဟဲလၢကီးကူပြူး ဒီးဝ့ၢ်ကူၤရ့ၤန့န့ၣ် လဲၤဝဲလၢ ဝ့ၢ်အၣ်တံၤအီာ် ဒီးတဲသကိးတၢ်ဒီး ပှၤလၢအတဲ ကြံးကျိာ်တဖၣ် ဒီးစံၣ်တဲၤတဲလီၤ အဝဲသ့ၣ်လၢ တၢ်သးခုကစီၣ် ဘၣ်ဃးဒီး ကစၢ်ယ့ၣ်ၡူး.” (မၤတၢ် ၁၁:၁၉, ၂၀) တဘျီတခီၣ် ခီဖျိလၢ တၢ်မၤအၢမၤနးအဃိ တၢ်သးခုကစီၣ် ရၤလီၤအသးအါထီၣ်.
၁၅ ဖဲစိဘံးယၢး ယူနံၤယၢၤ အစိၤန့ၣ် တၢ်ကဲထီၣ်သး ဒ်န့ၣ်စ့ၢ်ကီး. လီၤဆီဒၣ်တၢ် ဖဲ ၁၉၅၀ ဘျဲၣ်န့ၣ် ယဟိဝၤပှၤအုၣ်အသး လၢအကထိတဖၣ်န့ၣ် ပှၤဖီၣ်အဝဲသ့ၣ် ဒီးဆှၢအဝဲသ့ၣ်လၢ ဆဲးဘံရံယါ. ခီဖျိလၢ ပဒိၣ်တဖၣ် ဆှၢပဒီပုၢ်ဝဲၢ်မုၣ်ခွါဖဲန့ၣ်အဃိ တၢ်သးခုကစီၣ် ရၤလီၤအသးဝးဝး. ဒီးတၢ်လီၢ်တဖၣ်န့ၣ် ယံၤဝဲအမံးလာ် ၆,၀၀၀ (၁၀,၀၀၀ ကံလိမံထၢၣ်) အဃိ ဒီပုၢ်ဝဲၢ်မုၣ်ခွါတဖၣ် မ့ၢ်ဘၣ်လဲၤလၢ အနီၢ်ကစၢ် အတၢ်ရဲၣ်တၢ်ကျဲၤန့ၣ် တမ့ၢ်လၢ အဝဲသ့ၣ် လဲၤကတုၤဖဲန့ၣ် အါအါဘၣ်. ခီဖျိလၢ ပဒိၣ်တဖၣ် ဆှၢအဝဲသ့ၣ်အဃိ ဒီပုၢ်ဝဲၢ်မုၣ်ခွါတဖၣ် လဲၤတုၤလၢ ဆဲးဘံရံယါ. ဒီပုၢ်ဝဲၢ်ခွါတဂၤ တဲဝဲလၢ “ခီဖျိလၢ ပဒိၣ်ပပှၢ်တဖၣ် ဆှၢဖျိးပှၤဖဲန့ၣ်အဃိ ပှၤဆဲးဘံရံယါဖိလၢ အသူၣ်ဘျၢသးဘျၢလၢ အကထိတဖၣ်န့ၣ် သ့ၣ်ညါထီၣ်ဘၣ် တၢ်မ့ၢ်တၢ်တီ.”
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
ဘၣ်မနုၤအဃိ ပဘၣ်ပာ်လုၢ်ပာ်ပှ့ၤ ယဟိဝၤယွၤ အတၢ်အဲၣ်လၢအတီလဲၣ်
၁၅ ဘၣ်ဃးဒီး ကစၢ်ယွၤ ဒီသဒၢအခ့အပှၤန့ၣ် စီၤဒၤဝံးတဲကဒီးဝဲလၢ “ယွၤမ့ၢ်ယလ့တဖျၢၣ်, ယဘျုးယဖှိၣ် အကစၢ်လီၤ.” ဒီးစီၤဒၤဝံး တဲစ့ၢ်ကီးဝဲလၢ ယဟိဝၤယွၤ “မ့ၢ်ဝဲလၢ ယဘျုးယဖှိၣ် ယတိာ်ယတာ်, ယတၢးထီၣ်ထီ, ဒီးပှၤမၤပူၤမၤဖျဲးယၤ, ယကတီၤတဘ့ၣ်, ဒီးပှၤလၢယသန့ၤယသးလၢအီၤ” လီၤ. (စံးထီၣ်ပတြၢၤ ၅၉:၁၇; ၁၄၄:၂) ဘၣ်မနုၤအဃိ စီၤဒၤဝံး ထိၣ်သတြီၤဝဲ ယဟိဝၤယွၤ အတၢ်အဲၣ်လၢအတီဒီးတၢးထီ ဒီးတိာ်ဧိၤတာ်ဧိၤလဲၣ်. မ့ၢ်လၢ ပမ့ၢ်အိၣ်လၢ တၢ်လီၢ်တပူၤဂ့ၤတပူၤဂ့ၤ ပမ့မ့ၢ်ယဟိဝၤယွၤ အခ့အပှၤန့ၣ် အဝဲကဒီသဒၢပှၤ ဒ်သိး ပတၢ်ရံလိာ်သးဒီးအီၤ သုတဟးဂီၤတဂ့ၤအဂီၢ်လီၤ. ဒ်န့ၣ်အသိး လၢ စံးထီၣ်ပတြၢၤ အဆၢဒိၣ် ၉၁ အပူၤစ့ၢ်ကီး ပှၤကွဲးထါစံးထီၣ်ပတြၢၤ တဲဝဲလၢ “ယစံးလၢ ယွၤအဂ့ၢ်အကျိၤန့ၣ် မ့ၢ်ယတၢ်အိၣ်တဒၢအလီၢ်, ဒီးယတိာ်တဖျၢၣ်န့ၣ် မ့ၢ်ယကစၢ်လီၤ.” (စံးထီၣ်ပတြၢၤ ၉၁:၁-၃, ၉, ၁၄) စီၤမိၤၡ့စ့ၢ်ကီး တဲဝဲတၢ်ကတိၤလၢ အဘၣ်ဃးဒီး တၢ်အိၣ်တဒၢအလီၢ်လီၤ. (စံးထီၣ်ပတြၢၤ ၉၀:၁) တကးဒံးဘၣ် ဖဲစီၤမိၤၡ့ ဘူးထီၣ်ကသံအခါန့ၣ် အဝဲကွဲးဝဲလၢ “ယွၤအထူအယိာ်န့ၣ် မ့ၢ်နအိၣ်နဆိးအလီၢ်, ဒီးတၢ်အစုအထူအယိာ်တဖၣ်န့ၣ် အိၣ်လၢနဖီလာ်” လီၤ. (၅ မိၤၡ့ ၃၃:၂၇) တၢ်ကတိၤလၢအမ့ၢ် “တၢ်အစုအထူအယိာ်တဖၣ် . . . အိၣ်လၢနဖီလာ်” န့ၣ် အဒုးသ့ၣ်ညါပှၤ ဘၣ်ဃးဒီး ယဟိဝၤယွၤအဂ့ၢ်ဒ်လဲၣ်.
လါယူၤလံ ၈-၁၄
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၆၀-၆၂
ယဟိဝၤယွၤ မၤစၢၤပှၤဒ်သိး ပကအိၣ်ဘၣ် ဘံၣ်ဘံၣ်ဘၢဘၢ, ဒီသဒၢပှၤ ဒီးမၤဂၢၢ်မၤကျၢၤပှၤ
it-2 ၁၁၁၈ ¶၇
တၢးထီ
ဖဲပှၤသူအီၤဒ်တၢ်အဒိအသိးအခါ. ပှၤလၢအနာ်န့ၢ် ယဟိဝၤယွၤ ဒီးဒိကနၣ် ယဟိဝၤယွၤအကလုၢ်န့ၣ် အအိၣ်ဒီး တၢ်ဘံၣ်တၢ်ဘၢအလီၢ်လၢ အဂ့ၤဒိၣ်မး ဒ်စီၤဒၤဝံးတဲဝဲအသိး. အဝဲတဲဝဲလၢ “န [ယဟိဝၤယွၤ] မ့ၢ်ယတၢ်အိၣ်သဒၢအလီၢ်, တၢးထီလၢအကျၢၤလၢ အဒီသဒၢယၤလၢ ဒုၣ်ဒါလီၤ.” (စံး ၆၁:၃) ပှၤလၢ အနၢ်ပၢၢ်ယဟိဝၤယွၤအမံၤ အခီပညီ ဒီးအနာ်န့ၢ် ယဟိဝၤယွၤအမံၤ ဒီးအခၢၣ်စးဝဲ ယဟိဝၤယွၤအမံၤန့ၣ် တလိၣ်ပျံၤတၢ် နီတမံၤဘၣ်. မ့ၢ်လၢ “ယဟိဝၤယွၤ အမံၤန့ၣ် မ့ၢ်ဝဲတၢးထီလၢ အကျၢၤတဖျၢၣ်လီၤ. ပှၤတီပှၤလိၤ လဲၤဃ့ၢ်နုာ်လၢအပူၤ ဒီးဒိးန့ၢ်ဘၣ် တၢ်ဒီသဒၢလီၤ.”—ကတိၤ ၁၈:၁၀; ထိၣ်သတြီၤဒီး ၁ မူၤ ၁၇:၄၅-၄၇.
it-2 ၁၀၈၄ ¶၈
ဒဲ
လၢတၢ်အိၣ်သးအဖီခိၣ် တၢ်ကတိၤလၢ အမ့ၢ် “ဒဲ” န့ၣ် ဘၣ်တၢ်ဒိလီၤအီၤလၢ တၢ်အဂၤစ့ၢ်ကီး. တၢ်လၢဒဲန့ၣ် အကဲဝဲ တၢ်အိၣ်ဘှံး ဒီးတၢ်ဒီသဒၢအလီၢ်. (၁ မိၤ ၁၈:၁) လၢတၢ်ဆဲးတၢ်လၤတနီၤန့ၣ် ပှၤမ့ၢ်တူၢ်လိာ်ပှၤတမှံၤလၢ ဒဲပူၤန့ၣ် အဝဲသ့ၣ်ကွၢ်ထွဲ ပှၤတမှံၤတဂၤန့ၣ်ဂ့ၤဂ့ၤ ဒီးပာ်ကဲဝဲ. အဃိ ပှၤတဂၤပှၤမ့ၢ်တူၢ်လိာ်အီၤလၢ ဒဲပူၤန့ၣ် အဝဲမုၢ်လၢ်ဝဲသ့လၢ ပှၤကရ့အီၤဂ့ၤဂ့ၤ ဒ်န့ၣ်သ့. ဖဲလီၣ်ဖျါ ၇:၁၅ န့ၣ် တဲဝဲလၢ ကစၢ်ယွၤ “ကသလၣ်ထီၣ် အဒဲ” လၢပှၤဂီၢ်မုၢ်ဖးဒိၣ် အဖီခိၣ် အဃိ ပသ့ၣ်ညါသ့လၢ ပှၤဂီၢ်မုၢ်ဖးဒိၣ်န့ၣ် ကဒိးန့ၢ်ဘၣ်တၢ်ဒီသဒၢ ဒီးတၢ်ဘံၣ်တၢ်ဘၢ. (စံး ၆၁:၃, ၄) ဝံယၡါယၤ တဲဝဲဘၣ်ဃးဒီး ကစၢ်ယွၤအမါ စံယိၣ် ကကတဲာ်ကတီၤတၢ်လၢ အဖိခွါတဖၣ်လၢ ကဟဲအိၣ်ထီၣ်အဂီၢ်. ကစၢ်ယွၤ တဲအီၤလၢ “မၤဒိၣ်ထီၣ် နဒဲ.” (ၡါ ၅၄:၂) အဃိ အအဲၣ်ဒိးတဲဝဲ စံယိၣ်န့ၣ် မၤဒိၣ်ထီၣ်ဝဲ တၢ်ဒီသဒၢအလီၢ်လၢ အဖိတဖၣ်အဂီၢ်.
တၢး၀၂ ၄/၁၅ ၁၆ ¶၁၄
ကစၢ်ယွၤ အတၢ်သိၣ်တၢ်သီန့ၣ် အကဲဘျုးလၢ ပဂီၢ်
၁၄ ကစၢ်ယွၤအတၢ်သိၣ်တၢ်သီန့ၣ် တဆီတလဲနီတဘျီဘၣ်. ပအိၣ်မူဘၣ်လၢ တၢ်ဆၢကတီၢ်လၢ တၢ်ဆီတလဲ အိၣ်ဝဲထီဘိ. ဘၣ်ဆၣ် ယဟိဝၤယွၤန့ၣ် အမ့ၢ်ဝဲ လၢၢ်လၢအအိၣ်ဂၢၢ်ကျၢၤ ဒီးအအိၣ်ပာ်စၢၤဝဲ အစိၤစိၤအဃၣ်ဃၣ် ဒီးကအိၣ်ဒံး အစိၤစိၤအဃၣ်ဃၣ်. (စံးထီၣ်ပတြၢၤ ၉၀:၂) အဝဲတဲဝဲလၢ “ယမ့ၢ် ယဟိဝၤယွၤ ဒီးယတဆီတလဲဘၣ်.” (မၤလကံ ၃:၆) ကစၢ်ယွၤ အတၢ်သိၣ်တၢ်သီလၢ လံာ်စီဆှံပူၤန့ၣ် ပနာ်န့ၢ်အီၤသ့ ဒီးအတလီၤဂာ် ဒ်သိးဒီး ပှၤဟီၣ်ခိၣ်ဖိ အတၢ်ဟ့ၣ်ကူၣ်လၢ အဆီတလဲထီဘိဘၣ်. (ယၤကိာ် ၁:၁၇) အဒိ သရၣ်လၢ အမၤစၢၤတၢ်လၢ ပှၤသးအတၢ်တူၢ်ဘၣ် ဒီးတၢ်ဆိကမိၣ်တကပၤန့ၣ် တဲဝဲလၢ အဝဲသ့ၣ် ဟ့ၣ်ဂံၢ်ဟ့ၣ်ဘါဝဲလၢ ပှၤကလူၤဘၣ် ဖိသၣ်အသး. ဘၣ်ဆၣ် လၢခံအဝဲသ့ၣ် ဆီတလဲအတၢ်ထံၣ် ဒီးအၢၣ်လီၤဝဲလၢ အဝဲသ့ၣ် အတၢ်ဟ့ၣ်ကူၣ်န့ၣ်ကမၣ်. ဘၣ်ဃးဒီး တၢ်ကွၢ်လုၢ်ဒိၣ်ထီၣ်ဖိန့ၣ် ပှၤဟီၣ်ခိၣ်ဖိတဖၣ် အတၢ်သိၣ်တၢ်သီ ဒီးအတၢ်ဟံးစုနဲၣ်ကျဲန့ၣ် ဆီတလဲဝဲထီဘိ ဒီးအိၣ်ဝဲအမၠိမၠိ. သနာ်က့ ယဟိဝၤယွၤ အတၢ်သိၣ်တၢ်သီန့ၣ် တဆီတလဲ နီတဘျီဘၣ်. လၢအပူၤကွံာ် အနံၣ်လၢအကယၤတဖၣ် လံၤလံၤန့ၣ် လံာ်စီဆှံ ဟ့ၣ်ကူၣ်ဝဲလၢ မိၢ်ပၢ်တဖၣ် ကဘၣ်ကွၢ်လုၢ်ဒိၣ်ထီၣ် အဖိလၢ တၢ်အဲၣ်တၢ်ကွံအပူၤ. တၢ်မၢဖိပီလူး ကွဲးဝဲလၢ “ပၢ်သ့ၣ်ဧၢ, မၤအ့န့သုဖိတဖၣ် အသးတဂ့ၤ. ဆဲးကွၢ်လုၢ်ဒိၣ်ထီၣ် အဝဲသ့ၣ်လၢ ယဟိဝၤယွၤ အတၢ်သိၣ်လိနဲၣ်လိ ဒီးအတၢ်ဟံးစုနဲၣ်ကျဲတက့ၢ်.” (အ့းဖ့းစူး ၆:၄) ပသ့ၣ်ညါဘၣ်လၢ ယဟိဝၤယွၤ အတၢ်သိၣ်တၢ်သီန့ၣ် တဆီတလဲဘၣ် ဒီးပနာ်န့ၢ်အီၤသ့အဃိ ပသးခုဒိၣ်မး.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၆ ၆/၁ ၁၁ ¶၆
လံာ်စီဆှံ အတၢ်ပာ်ဖျါလၢ လံာ်စံးထီၣ်ပတြၢၤ ခံဘ့ၣ်တဘ့ၣ်အဂီၢ်
၆၂:၁၁. ကစၢ်ယွၤန့ၣ် တလိၣ်ဒိးသန့ၤအသးလၢ တၢ်ဂံၢ်တၢ်ဘါအဂၤ နီတမံၤဘၣ်. အဝဲမ့ၢ်ဝဲ တၢ်စိတၢ်ကမီၤ အဂံၢ်ခီၣ်ထံး. ဒီးလံာ်စီဆှံ တဲဝဲလၢ ‘တၢ်ဂံၢ်တၢ်ဘါန့ၣ် မ့ၢ်ကစၢ်ယွၤ အတၢ်လီၤ.’
မ့ၢ်နနာ်လၢ ယဟိဝၤယွၤမၤတၢ်န့ၣ် အတီအလိၤထီဘိဧါ
၇ ပနာ်သပှၢ်ကတၢၢ်လၢ ယဟိဝၤယွၤ မၤတၢ်လၢအဘၣ်ထီဘိ. ဘၣ်ဆၣ် မ့မ့ၢ်ပှၤဟီၣ်ခိၣ်ဖိလၢ ယဟိဝၤယွၤ ဃုထၢထီၣ်ဝဲတဖၣ်န့ၣ် ဘၣ်သ့ၣ်သ့ၣ် ပကတူၢ်ဘၣ်လၢ ပနာ်န့ၢ်အဝဲသ့ၣ် တသ့ထီဘိဘၣ်. ဘၣ်သ့ၣ်သ့ၣ် ပကဆိကမိၣ်ဘၣ်လၢ ပှၤလၢအအိၣ်ဒီး တၢ်ခွဲးတၢ်ယာ်လၢ ယဟိဝၤယွၤ အတၢ်ကရၢကရိအပူၤန့ၣ် မ့ၢ်အဝဲသ့ၣ် မၤတၢ်ဒ် ယဟိဝၤယွၤ အတၢ်ဟံးစုနဲၣ်ကျဲအသိးစ့ၢ်ကီးဧါ မ့တမ့ၢ် အမၤဝဲဒ် အတၢ်ထံၣ်အသိးဧါ. ပှၤလၢလံာ်စီဆှံအပူၤ တနီၤစ့ၢ်ကီး ကတူၢ်ဘၣ်ဝဲဒ်န့ၣ်လီၤ. အဒိ, ပကဆိကမိၣ်ကွၢ်က့ၤတၢ်ဂ့ၢ်ဖဲ လံာ်အဆၢ ၃ အပူၤ. ပှၤလၢအမၤကမၣ် မုၢ်အိၣ်ဘှံးနံၤ အတၢ်သိၣ်တၢ်သီတဂၤ အဘူးအတံၢ်န့ၣ် ကဆိကမိၣ်ဘၣ်လၢ ပှၤတဂၤအံၤ တချုးလၢပှၤစံၣ်ညီၣ်သံအီၤဘၣ်န့ၣ် မ့ၢ်စီၤမိၤၡ့ တဲသကိးတၢ်ဒီး ယဟိဝၤယွၤ နီၢ်ကီၢ်စ့ၢ်ကီးဧါ. ဒီးအဂၤတခါန့ၣ် ဘၣ်သ့ၣ်သ့ၣ် ပှၤဃ့ၤသးဖိ စီၤအူၤရံယၤ အသကိး ကဆိကမိၣ်ဘၣ်ဝဲလၢ စီၤဒၤဝံး သူဝဲအတၢ်န့ၢ်စိန့ၢ်ကမီၤ ဒ်သိးအသုတဘၣ် တၢ်စံၣ်ညီၣ်သံအီၤတဂ့ၤအဂီၢ်လီၤ. နီၢ်ကီၢ်န့ၣ် ပှၤဟီၣ်ခိၣ်ဖိလၢ ယဟိဝၤယွၤ ဃုထၢထီၣ်အီၤတဖၣ်န့ၣ် ယဟိဝၤယွၤ နာ်န့ၢ်အဝဲသ့ၣ် အဃိ ပမ့ၢ်တနာ်န့ၢ် အဝဲသ့ၣ်ဘၣ်န့ၣ် လီၤဂာ်ဒ် ပတနာ်န့ၢ် ယဟိဝၤယွၤဘၣ်.
၈ မုၢ်မဆါတနံၤအံၤ ယဟိဝၤယွၤသူဝဲ “ကုၢ်လၢအတီ ဒီးအကူၣ်တၢ်သ့” ဒ်သိးကပၢဆှၢဝဲ အတၢ်ကရၢကရိ လၢဟီၣ်ခိၣ်လီၤ. (မးသဲ ၂၄:၄၅) အဝဲသ့ၣ် မၤဝဲဒ် ပှၤပၢဆှၢတၢ်ကမံးတံာ် လၢတၢ်မၢဖိအစိၤတဖၣ် မၤဝဲအသိး. အဝဲသ့ၣ် တီခိၣ်ရိၤမဲ ကစၢ်ယွၤအခ့အပှၤ လၢဟီၣ်ခိၣ်ဒီဘ့ၣ် ဒီးဟံးစုနဲၣ်ကျဲဝဲ တၢ်အိၣ်ဖှိၣ်သးပှၢ်တဖၣ်လီၤ. (ဖး မၤတၢ် ၁၆:၄, ၅.) ဒီးလၢတၢ်အိၣ်ဖှိၣ်ပူၤန့ၣ် တၢ်အိၣ်ဖှိၣ်သးပှၢ်တဖၣ် မၤထွဲဝဲ တၢ်ဟံးစုနဲၣ်ကျဲတဖၣ်အံၤ လီၤတံၢ်လီၤဆဲးလီၤ. အဃိ ပမ့ၢ်ဒိကနၣ် တၢ်ဟံးစုနဲၣ်ကျဲလၢ အဟဲလၢတၢ်ကရၢကရိ ဒီးတၢ်အိၣ်ဖှိၣ်သးပှၢ်အအိၣ်န့ၣ် မ့ၢ်ဒၣ်ပပာ်ဖျါထီၣ်လၢ ပနာ်န့ၢ်ယဟိဝၤယွၤလီၤ.
၉ တဘျီတခီၣ် ပကမၤဒ် တၢ်အိၣ်ဖှိၣ်သးပှၢ်တဖၣ် ဆၢတဲာ်ဝဲအသိးန့ၣ် တညီဘၣ်. အဒိ, အပူၤကွံာ်စှၤကိာ်နံၣ်န့ၣ် တၢ်အိၣ်ဖှိၣ်တနီၤန့ၣ် ဘၣ်တၢ်ပာ်ဖှိၣ်က့ၤအီၤ အဃိ တၢ်အိၣ်ဖှိၣ်တနီၤ အကဝီၤတၢ်အိၣ်ဖှိၣ်အကရူၢ် (circuits) န့ၣ် တဒ်သိးဒီး လၢညါလၢၤဘၣ်. ဒီးပှၤတနီၤန့ၣ် တၢ်အိၣ်ဖှိၣ်သးပှၢ် မၢအဝဲသ့ၣ် လဲၤသုးလၢ တၢ်အိၣ်ဖှိၣ်အဂၤ ဒ်သိးပှၤထီၣ်တၢ်အိၣ်ဖှိၣ်လၢ ဘီမုၢ်ဘျီၣ်ဒိၣ် အနီၣ်ဂံၢ်ကဘၣ်ဂီၢ်အဂီၢ် ဒီးဒ်သိး လီၢ်ဆ့ၣ်နီၤ တလီၤဟိအါတလၢတဂ့ၤအဂီၢ်. တၢ်အိၣ်ဖှိၣ်သးပှၢ် မ့ၢ်မၢပလဲၤထီၣ်က့ၤလၢ တၢ်အိၣ်ဖှိၣ်အဂၤတဖျၢၣ်န့ၣ် ဘၣ်သ့ၣ်သ့ၣ် ကကီလၢ ပကပာ်တ့ၢ် ပဟံၣ်ဖိဃီဖိ ဒီးပသကိးတဖၣ်လီၤ. တၢ်အိၣ်ဖှိၣ်သးပှၢ်တဖၣ် ကမၢဒီပုၢ်ဝဲၢ် ကလဲၤလၢ တၢ်အိၣ်ဖှိၣ်ဖဲလဲၣ်ဖဲလဲၣ်န့ၣ် မ့ၢ်ယဟိဝၤယွၤ တဲဘၣ်အဝဲသ့ၣ်ဧါ. တတဲဘၣ်ဘၣ်. ခီဖျိလၢ တၢ်ဂ့ၢ်အံၤအဃိ ပဝဲတနီၤန့ၣ် ဘၣ်သ့ၣ်သ့ၣ် ပတအဲၣ်ဒိးမၤထွဲ တၢ်ဟံးစုနဲၣ်ကျဲဘၣ်. ဘၣ်ဆၣ် ယဟိဝၤယွၤ နာ်န့ၢ်တၢ်အိၣ်ဖှိၣ်သးပှၢ် လၢအမၤတၢ်ဆၢတဲာ်တဖၣ်အံၤ ဒီးပဝဲစ့ၢ်ကီး ပကဘၣ်နာ်န့ၢ်အဝဲသ့ၣ်လီၤ.
၁၀ ပသးမ့ၢ်တလီၤပလိာ်ဒီး တၢ်အိၣ်ဖှိၣ်သးပှၢ်တဖၣ် အတၢ်ဆၢတဲာ်ဘၣ်ဒၣ်လဲာ် ဘၣ်မနုၤအဃိ ပကဘၣ်ဒိကနၣ် ဒီးဆီၣ်ထွဲဒံး အဝဲသ့ၣ် အတၢ်ဆၢတဲာ်လဲၣ်. ပမ့ၢ်ဒိကနၣ် အဝဲသ့ၣ် အတၢ်ဟံးစုနဲၣ်ကျဲန့ၣ် တၢ်အိၣ်ဖှိၣ်အတၢ်ဃူတၢ်ဖိး ကဟဲအါထီၣ်လီၤ. (အ့းဖ့းစူး ၄:၂, ၃) ဖဲပဆီၣ်လီၤသး ဒီးဒိကနၣ် တၢ်အိၣ်ဖှိၣ်သးပှၢ် အတၢ်ဆၢတဲာ်တဖၣ်အခါ ကကဲဘျုးဝဲလၢ တၢ်အိၣ်ဖှိၣ်အပူၤလီၤ. (ဖး ဧ့ၤဘြံၤ ၁၃:၁၇.) တကးဒံးဘၣ် တၢ်လၢအရ့ဒိၣ်ကတၢၢ်န့ၣ် ပမ့ၢ်ဆီၣ်ထွဲ ပှၤလၢယဟိဝၤယွၤ ဃုထၢထီၣ်ဝဲလၢ ကကွၢ်ထွဲပှၤန့ၣ် မ့ၢ်ဒၣ်ပပာ်ဖျါထီၣ်လၢ ပနာ်န့ၢ်ယဟိဝၤယွၤလီၤ.—မၤတၢ် ၂၀:၂၈.
လါယူၤလံ ၁၅-၂၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၆၃-၆၅
“နတၢ်အဲၣ်လၢအတီန့ၣ် ဂ့ၤဒိၣ်န့ၢ်ဒံး တၢ်မူ”
တၢး၀၁ ၁၀/၁၅ ၁၅-၁၆ ¶၁၇-၁၈
ပှၤလၢအမၤလီၤဖးပှၤဒီး ကစၢ်ယွၤ အတၢ်အဲၣ်သ့န့ၣ် တအိၣ်နီတဂၤဘၣ်
၁၇ ကစၢ်ယွၤအတၢ်အဲၣ်န့ၣ် အရ့ဒိၣ်လၢ နဂီၢ်ထဲလဲၣ်. နတူၢ်ဘၣ်ဒ် စီၤဒၤဝံးအသိးဧါ. အဝဲတဲဝဲလၢ “နတၢ်အဲၣ်လၢအတီန့ၣ် ဂ့ၤဒိၣ်န့ၢ်ဒံး တၢ်မူ အဃိ ယထးခိၣ် ကမၤလၤကပီၤနၤလီၤ. ယကစံးထီၣ်ပတြၢၤနၤ လၢယတၢ်အိၣ်မူ ဒီတစိၤညါ ဒီးယကကိးထီၣ်နမံၤ ဒီးဃ့ထုကဖၣ်လၢ နအိၣ်လီၤ.” (စံးထီၣ်ပတြၢၤ ၆၃:၃, ၄) လၢဟီၣ်ခိၣ်ချၢအံၤ တၢ်လၢအဂ့ၤဒိၣ်န့ၢ်ဒံး ကစၢ်ယွၤတၢ်အဲၣ် ဒီးတၢ်ရ့လိာ်သးဒီးကစၢ်ယွၤန့ၣ် တအိၣ်နီတမံၤဘၣ်. အဒိ တၢ်မၤလၢ ပှၤန့ၢ်ဘၣ်စ့ အါအါဂီၢ်ဂီၢ်န့ၣ် အတဟ့ၣ်ပှၤ တၢ်သူၣ်မံသးမုာ် ဒီးတၢ်သးခု ထဲသိးဒီး ပှၤအိၣ်ဒီးတၢ်ရ့လိာ်သးဒီး ကစၢ်ယွၤဘူးဘူးတံၢ်တံၢ်ဘၣ်. (လူၤကၣ် ၁၂:၁၅) ခရံာ်ဖိတနီၤန့ၣ် ပှၤမၢအဝဲသ့ၣ် ဃုထၢလၢ ကပာ်တ့ၢ်ကွံာ် ယဟိဝၤယွၤ မ့တမ့ၢ် ကဘၣ်တၢ်မၤသံအီၤ. ယဟိဝၤပှၤအုၣ်အသး အါဂၤန့ၣ် ဖဲဟီၣ်ခိၣ်တၢ်ဒုး ခံဘျီတဘျီအခါ အဝဲသ့ၣ် လီၤဘၣ်လၢ နးစံၤဃိာ်ပူၤ ဒီးအထံၣ်ဘၣ်ဒီး တၢ်အိၣ်သးဒ်န့ၣ်. ဘၣ်ဆၣ် အဝဲသ့ၣ် အါဂၤန့ၣ် ဆဲးအိၣ်ဂၢၢ်ကျၢၤဝဲလၢ ကစၢ်ယွၤတၢ်အဲၣ်အပူၤ ဒီးသးအိၣ်တူၢ်သံအသး. ပှၤလၢအတမၤဝဲဒ်န့ၣ်ဘၣ်န့ၣ် အိၣ်ထဲစှၤကိးဂၤလီၤ. ပှၤလၢအဆဲးတီဒီး ကစၢ်ယွၤ ဒီးဆဲးအိၣ်ဂၢၢ်ကျၢၤလၢ ကစၢ်ယွၤ အတၢ်အဲၣ်တၢ်ကွံအပူၤန့ၣ် အနာ်ဝဲသ့ သပှၢ်ကတၢၢ်လၢ အကဒိးန့ၢ်ဘၣ် တၢ်မူအထူအယိာ်လၢ ပှၤဟီၣ်ခိၣ်ဖိ ဟ့ၣ်အီၤတသ့ဘၣ်. (မၢ်ကူး ၈:၃၄-၃၆) သနာ်က့ အဝဲသ့ၣ် မၤဝဲဒ်န့ၣ်န့ၣ် တမ့ၢ်ထဲလၢ ကဒိးန့ၢ်ဘၣ် တၢ်မူအထူအယိာ် အဂီၢ်ဘၣ်.
၁၈ ယဟိဝၤယွၤ မ့ၢ်တအိၣ်ဘၣ်န့ၣ် ပအိၣ်မူ လီၤထူလိၤယိာ် တသ့ဘၣ်. ထံၣ်တမှံကွၢ်လၢ နအိၣ်မူဘၣ်ဖးယံာ် ဘၣ်ဆၣ် တၢ်ဘၣ်တ့ကစၢ် မ့ၢ်တအိၣ်ဘၣ်န့ၣ် တၢ်ကမၤအသး ဒ်လဲၣ်. နတၢ်အိၣ်မူန့ၣ် ကကဲထီၣ် တၢ်ကလီကလီ ဒီးအခီပညီ တအိၣ်နီတမံၤဘၣ်. ဖဲမုၢ်နံၤခံကတၢၢ် အဆၢကတီၢ် ယဟိဝၤယွၤ ဟ့ၣ်ပှၤတၢ်မၤလၢ အလီၤသူၣ်မံသးမုာ်. အဃိ ဖဲယွၤလၢ အအိၣ်ဒီး တၢ်တိာ်ပာ်တဂၤအံၤ ဟ့ၣ်ပှၤတၢ်မူအထူအယိာ် အခါစ့ၢ်ကီး ပနာ်သ့သပှၢ်ကတၢၢ်လၢ အဝဲကဟ့ၣ်လီၤပှၤ တၢ်လၢပကဘၣ်မၤလိအီၤ ဒီးတၢ်လၢ ပကဘၣ်မၤအီၤတဖၣ် အါမး. (စံၣ်တဲၤတဲလီၤ ၃:၁၁) “ကစၢ်ယွၤ အတၢ်ဆိၣ်ဂ့ၤ ထူးထူးတီၤတီၤ, အတၢ်ကူၣ်သ့ ဒီးအတၢ်သ့ၣ်ညါနၢ်ပၢၢ်န့ၣ် ယိာ်ဝဲဒိၣ်မး” အဃိ ပမ့ၢ်မၤလိၤအီၤလၢ အနံၣ်လၢ အကထိတဖၣ်အကထိသနာ်က့ ပမၤလိအီၤ တလၢာ်ဘၣ်.—ရိမ့ၤ ၁၁:၃၃.
“လၢတၢ်ခဲလၢာ်အပူၤန့ၣ်, စံးထီၣ်ပတြၢၤ တၢ်အဘျုးအဖှိၣ်တက့ၢ်”
လီၤဆီဒၣ်တၢ် ပကြၢးစံးဘျုးစံးဖှိၣ် ကစၢ်ယွၤလီၤ. တဘျီတခီၣ် နကဆိကမိၣ်ဘၣ် တၢ်ဟ့ၣ်လၢ ကစၢ်ယွၤဟ့ၣ်လီၤဝဲ လၢနီၢ်ခိဒီးနီၢ်သးအဂီၢ် ဒီးအဆဲးဟ့ၣ်လီၤဝဲန့ၣ်လီၤ. (၅ မိၤၡ့ ၈:၁၇, ၁၈; မၤတၢ် ၁၄:၁၇) နကြၢးဆိကမိၣ်ကွၢ် ကစၢ်ယွၤ အတၢ်ဂ့ၤတၢ်ဝါတဖၣ် တကးဒံးဘၣ် နကြၢးဆိကမိၣ်ထံ တၢ်ဆိၣ်ဂ့ၤလၢ ကစၢ်ယွၤဟ့ၣ်နၤ ဒီးပှၤလၢနအဲၣ်အီၤတဖၣ်န့ၣ်လီၤ. နမ့ၢ်ဆိကမိၣ်ထံ တၢ်ဘၣ်တ့ကစၢ် သးအိၣ်ဟ့ၣ်တၢ်အဂ့ၢ်န့ၣ် နကအဲၣ်ဒိး စံးဘျုးစံးဖှိၣ်အါထီၣ်အီၤ ဒီးနကပလၢၢ်ဘၣ်လၢ အဝဲအဲၣ်နၤ ဒီးပာ်လုၢ်ပာ်ပှ့ၤနၤ ဒိၣ်မးလီၤ.—၁ ယိၤဟၣ် ၄:၉.
တၢး၁၅ ၁၀/၁၅ ၂၂ ¶၇
ဆိကမိၣ်ထံ တၢ်လၢ ဘၣ်ဃးဒီး နီၢ်သးတခီတက့ၢ်
၇ ပကဆိကမိၣ်ထံတၢ်ဒီး ပကအိၣ်ဒီးတၢ်သးစၢၢ်ဆၢ တၢ်လၢပမၤလိဘၣ်တဖၣ်အဂီၢ် ပကဘၣ် ထဲးဂံၢ်ထဲးဘါအါမးလီၤ. လၢတၢ်န့ၣ်အဃိ ဖဲနလီၤဘှံးလီၤတီၤ အဆၢကတီၢ်န့ၣ် တမ့ၢ်တၢ်ဆၢကတီၢ်အဂ့ၤကတၢၢ်လၢနက မၤဝဲအဂီၢ်ဘၣ်. ဒီးကဘၣ်မ့ၢ် တၢ်ဘှ့ၣ်တၢ်ဘှီၣ်အလီၢ် လၢတၢ်မၤတံာ်တာ်နၤ တအိၣ်ဘၣ်. စီၤဒၤဝံး ဆိကမိၣ်ထံဝဲ တၢ်ဂ့ၢ်သ့ၣ်တဖၣ် ဖဲအဝဲမံပၢၢ်ထီၣ် လၢမုၢ်နၤခီအဆၢကတီၢ်န့ၣ်လီၤ. (စံးထီၣ်ပတြၢၤ ၆၃:၆) ယ့ၣ်ၡူးလၢအမ့ၢ် ပှၤလၢအလၢအပှဲၤတဂၤဒၣ်လဲာ် ဃုဝဲတၢ်လီၢ်လၢ အဘှ့ၣ်အဘှီၣ် ဒ်သိးကဆိကမိၣ်ထံတၢ် ဒီးဘါထုကဖၣ်တၢ်အဂီၢ်လီၤ.—လူၤကၣ် ၆:၁၂.
တၢး၀၉ ၇/၁၅ ၁၆ ¶၆
ကွၢ်လိယ့ၣ်ၡူး—သိၣ်လိတၢ်လၢ တၢ်အဲၣ်တၢ်ကွံအပူၤ
၆ တၢ်ဂ့ၢ်လၢ ပဘၣ်သူၣ်ဘၣ်သးအီၤန့ၣ် ပတဲအီၤမုာ်မး. ဖဲပတဲတၢ်လၢ ပဘၣ်သူၣ်ဘၣ်သးအီၤ အဂ့ၢ်အခါ ပသးခု ဒီးပတဲအီၤလၢ တၢ်သူၣ်ဆူၣ်သးဆူၣ် ဒီးတၢ်သူၣ်အိၣ်သးအိၣ်အပူၤ. လီၤဆီဒၣ်တၢ် ပမ့ၢ်တဲ ပှၤလၢပအဲၣ်အီၤ အဂ့ၢ်န့ၣ် ပတဲဒ်န့ၣ် ဒီးပတဲဘၣ်ပှၤဂၤလၢအဂ့ၢ် မုာ်မး. ပပတြၢၤအီၤ, ပပာ်ကဲအီၤ ဒီးပဒီသဒၢအီၤ. ပအဲၣ်ဒိးလၢ ပှၤဂၤနာ်က့ ကဘၣ်သူၣ်ဘၣ်သး အီၤဒီးအတၢ်ဂ့ၤတၢ်ဝါ ဒ်ပဘၣ်သူၣ်ဘၣ်သးအီၤအသိး အဃိ ပမၤဒ်န့ၣ်.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၇ ၁၁/၁၅ ၁၅ ¶၆
နမၤမုာ်ထီၣ် ပှၤဂၤအသးဧါ
ပကမၤလီၤပှီၢ်ကွံာ် တၢ်သူၣ်ထီၣ်အဂီၢ်န့ၣ် ညီဝဲဘၣ်ဆၣ် ပကတ့ထီၣ်အီၤအဂီၢ် တညီဝဲဘၣ်. ပတၢ်စံးတၢ်ကတိၤစ့ၢ်ကီး ဒ်န့ၣ်လီၤ. အမၤဟးဂီၤပှၤသး သ့ဝဲညီညီဖိ ဘၣ်ဆၣ် အမၤမုာ်ထီၣ်ပှၤဂၤအသး တညီဘၣ်. ပမ့ၢ်ပှၤတလၢတပှဲၤဘၣ်အဃိ ပဝဲခဲလၢာ်န့ၣ် ပမၤဘၣ် တၢ်ကမၣ် ဒီးပအိၣ်ဒီး တၢ်လီၤတူာ်လီၤကာ်တဖၣ်. စီၤပၤၡလိၤမိၤ တဲဝဲလၢ “လၢဟီၣ်ခိၣ်ချၢအံၤ ပှၤတီပှၤလိၤလၢ အမၤတၢ်လၢအဘၣ် ထီဘိ ဒီးတမၤကမၣ်တၢ် နီတဘျီဘၣ်န့ၣ် တအိၣ်နီတဂၤဘၣ်.” (စံၣ်တဲၤတဲလီၤတၢ် ၇:၂၀) ပကဃု ပှၤဂၤအတၢ်ကမၣ် ဒီးတဲဟးဂီၤအသးအဂီၢ်န့ၣ် တမ့ၢ်တၢ်လၢ အကီအခဲ အါအါဘၣ်. (စံးထီၣ်ပတြၢၤ ၆၄:၂-၄) သနာ်က့ ပကတဲမုာ်ထီၣ် ပှၤသးအဂီၢ်န့ၣ် ပကဘၣ်ထဲးဂံၢ်ထဲးဘါ.
ijwfq ၅၁
ဘၣ်မနုၤအဃိ ယဟိဝၤပှၤအုၣ်အသးတဖၣ် လဲၤကဒါက့ၤဆူ ပှၤလၢအစံးတ့ၢ်အီၤလၢ “ယတအဲၣ်ဒိး ဒိကနၣ်ဘၣ်” န့ၣ်လဲၣ်
မ့ၢ်လၢယဟိဝၤပှၤအုၣ်အသးတဖၣ် အဲၣ်ကစၢ်ယွၤဒီး အဲၣ်ပှၤလၢအဃၢၤအဃိ တဲဘၣ်ဝဲ လံာ်စီဆှံ အတၢ်ကစီၣ်လၢ ပှၤခဲလၢာ် ဃုာ်ဒီး ပှၤလၢအစံးတ့ၢ်အီၤလၢ “ယတအဲၣ်ဒိး ဒိကနၣ်ဘၣ်” န့ၣ်လီၤ. (မးသဲ ၂၂:၃၇-၃၉) တၢ်အဲၣ် ကစၢ်ယွၤ ထိၣ်ဟူးထိၣ်ဂဲၤထီၣ်ပှၤ ဒ်သိးပကဒိကနၣ် အဖိခွါ အတၢ်မၤလိာ်လၢ ပကဘၣ် “အုၣ်ပသး” န့ၣ်လီၤ. (မၤတၢ် ၁၀:၄၂; ၁ ယိၤဟၣ် ၅:၃) လၢတၢ်န့ၣ်အဃိ ဒ်ဝံလၢပျၢၤတဖၣ် မၤဝဲအသိး ပဝဲစ့ၢ်ကီး ပတဲဘၣ်ပှၤဂၤလၢ ယွၤအတၢ်ကစီၣ် အဘျီတဖၣ်အဘျီလီၤ. (ယံးရမံယၤ ၂၅:၄) မ့ၢ်လၢပအဲၣ် ပှၤလၢပဃၢၤအဃိ ပဂုာ်ကျဲးစၢး စံၣ်တဲၤတဲလီၤ “ဘီမုၢ်အတၢ်သးခု အကစီၣ်” လၢကမၤပူၤဖျဲး ပှၤသးသမူန့ၣ်လီၤ. ပတဲဘၣ် တၢ်သးခုကစီၣ်အံၤလၢ ပှၤခဲလၢာ် ဃုာ်ဒီးပှၤလၢ လၢညါတအဲၣ်ဒိး ဒိကနၣ်ဝဲတဖၣ်စ့ၢ်ကီးန့ၣ်လီၤ.—မးသဲ ၂၄:၁၄.
ဖဲပလဲၤကဒါက့ၤ ဆူဟံၣ်ကစၢ်လၢ အသးတအိၣ်ဒိကနၣ်ဝဲတဂၤ အဟံၣ်အခါ ညီနုၢ်ပထံၣ်ဘၣ် အဝဲသ့ၣ်တနီၤန့ၣ် သးအိၣ်ဒိကနၣ်က့ၤတၢ်လီၤ. ဆိကမိၣ်ကွၢ် တၢ်ဂ့ၢ်သၢမံၤအံၤတက့ၢ်-
ပှၤကညီတဖၣ် သုးလီၢ်သုးကျဲ.
ဟံၣ်ဖိဃီဖိအဂၤ သးအိၣ်ဒိကနၣ် ပတၢ်ကစီၣ်.
ပှၤကညီတဖၣ် အသးဆီတလဲ. ဟီၣ်ခိၣ်တၢ်မၤအသး မ့တမ့ၢ် ပှၤတဂၤစုာ်စုာ် အတၢ်အိၣ်သးတဖၣ်အဃိ ပှၤတနီၤ “သ့ၣ်ညါလီၤက့ၤ အနီၢ်သးတၢ်လိၣ်ဘၣ်” ဒီးအဲၣ်ဒိးဒိကနၣ်ဝဲ လံာ်စီဆှံ အတၢ်ကစီၣ်န့ၣ်လီၤ. (မးသဲ ၅:၃, nwt) ဒ်တၢ်မၢဖိပီလူးအသိး ပှၤလၢအထီဒါပှၤတဂၤဒၣ်လဲာ် အတၢ်ပာ်သူၣ်ပာ်သး ဆီတလဲသ့ဝဲလီၤ.—၁ တံၤမသ့း ၁:၁၃.
ဘၣ်ဆၣ်သနာ်က့ ပတမၢဆူၣ် ပှၤကဒိကနၣ် ပတၢ်ကစီၣ် နီတဂၤဘၣ်. (၁ ပ့းတရူး ၃:၁၅) ဘၣ်ဃးဒီး တၢ်ဘူၣ်တၢ်ဘါန့ၣ် ပနာ်လၢ ပှၤတဂၤစုာ်စုာ် ကဘၣ်ဆၢတဲာ်တၢ်လၢ အနီၢ်ကစၢ်ဒၣ်ဝဲလီၤ.—၅ မိၤၡ့ ၃၀:၁၉, ၂၀.
လါယူၤလံ ၂၂-၂၈
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၆၆-၆၈
ယဟိဝၤယွၤ ဝံစၢၤပတၢ်ဝံ ကိးနံၤဒဲး
ယဟိဝၤယွၤ စံးဆၢပတၢ်ထုကဖၣ်ဒ်လဲၣ်
၁၅ ညီနုၢ်န့ၣ် ယဟိဝၤယွၤ တစံးဆၢ ပတၢ်ဃ့ထုကဖၣ် ဒ်သိးပဆိမိၣ်ဘၣ်. ဘၣ်ဆၣ် အတၢ်စံးဆၢန့ၣ် မၤစၢၤပှၤဒ်သိး ပကဆဲးတီဒီးအီၤ. အဃိ ယဟိဝၤယွၤ စံးဆၢပတၢ်ထုကဖၣ်ဒ်လဲၣ်န့ၣ် ပကဘၣ်ဆိမိၣ်ထံက့ၤအီၤ. ဒီပုၢ်ဝဲၢ်မုၣ်ယိခိၤ ဆိမိၣ်ဝဲလၢ ယဟိဝၤယွၤ တစံးဆၢအတၢ်ထုကဖၣ်ဘၣ်. ဘၣ်ဆၣ်လၢခံန့ၣ် အစးထီၣ်ကွဲးနီၣ်ဃာ်ဝဲ တၢ်ဂ့ၢ်လၢ အဃ့ဝဲတဖၣ်. တယံာ်ဘၣ်ဒီး တၢ်ဂ့ၢ်လၢ အဃ့ဝဲတနီၤန့ၣ် အသးပ့ၤနီၣ်ကွံာ်ဝဲ ဘၣ်ဆၣ် အကွၢ်ကဒါက့ၤ တၢ်ဂ့ၢ်လၢ အကွဲးနီၣ်ဃာ်လၢ လံာ်ပူၤ ဒီးအသ့ၣ်ညါဝဲလၢ တၢ်ဂ့ၢ်လၢအဃ့ ယဟိဝၤယွၤန့ၣ် အါတက့ၢ် ယဟိဝၤယွၤစံးဆၢအီၤလံ. လၢတၢ်လဲၤခီဖျိအံၤ ပသ့ၣ်ညါဘၣ်လၢ တဘျီတခီၣ် ပလိၣ်ဘၣ် တၢ်ဆၢကတီၢ်လၢ ပကဆိမိၣ်ထံက့ၤ ယဟိဝၤယွၤ စံးဆၢပတၢ်ဃ့ထုကဖၣ်.—စံးထီၣ်ပတြၢၤ ၆၆:၁၉, ၂၀.
တၢး၁၀ ၁၂/၁ ၂၃ ¶၆
ဆိကမိၣ်န့ၢ်တၢ်လၢ မိၢ်ပၢ်လၢ ဘၣ်ကွၢ်လုၢ်ဒိၣ်ထီၣ် အဖိထဲတဂၤတဖၣ်အဂီၢ်
ယဟိဝၤယွၤ ထိၣ်ဟူးထိၣ်ဂဲၤထီၣ် ပှၤကွဲးထါစံးထီၣ်ပတြၢၤလၢ ကကွဲးဝဲ တၢ်သးဝံၣ်လၢ ပှၤအံၣ်စရ့လးဖိတဖၣ် ကသးဝံၣ်ဝဲ ဖဲအဝဲသ့ၣ် ဘူၣ်ထီၣ်ဘါထီၣ်အီၤ အဆၢကတီၢ်. မုၣ်ကမဲ ဒီးဖိၣ်ဃဲတဖၣ်န့ၣ် ဖဲအဝဲသ့ၣ် နၢ်ဟူဘၣ်ဝဲ ပှၤသးဝံၣ်စံးထီၣ်ပတြၢၤ ကစၢ်ယွၤလၢ တၢ်သးဝံၣ်တဖၣ်အံၤအခါ ကဒုးသ့ၣ်နီၣ်ထီၣ် အဝဲသ့ၣ်လၢ ယဟိၤယွၤမ့ၢ် အဝဲသ့ၣ် အ “ပၢ်” ဒီးအ “စံၣ်ညီၣ်ကွီၢ်.” အဃိ ကကဲထီၣ် တၢ်ဂံၢ်တၢ်ဘါလၢ အဝဲသ့ၣ်အဂီၢ် ဒီးကမၤမုာ်ထီၣ် အဝဲသ့ၣ် အသးဒိၣ်မး. (စံးထီၣ်ပတြၢၤ ၆၈:၅; ၁၄၆:၉) ပဝဲစ့ၢ်ကီး ပဟ့ၣ်ဂံၢ်ဟ့ၣ်ဘါ မိၢ်ပၢ်လၢ အဘၣ်ကွၢ်လုၢ်ဒိၣ်ထီၣ်အဖိ ထဲတဂၤလၢ တၢ်ကတိၤလၢ ကအိၣ်တ့ၢ်လၢ အဝဲသ့ၣ်အသးပူၤ ဖးယံာ်သ့ဝဲစ့ၢ်ကီး. ရူၣ် လၢအဘၣ်ကွၢ်လုၢ်ဒိၣ်ထီၣ် အဖိထဲတဂၤန့ၣ် ပၢ်တဂၤတဲအီၤလၢ “နကွၢ်လုၢ်ဒိၣ်ထီၣ်နဖိခွါခံဂၤအံၤ ဖးဂ့ၤညါ, ဆဲးမၤဒ်န့ၣ်.” တၢ်ဆၢကတီၢ်ပူၤကွံာ် အနံၣ် ၂၀ လံသနာ်က့ ရူၣ် တသးပ့ၤနီၣ်ဝဲ တၢ်ကတိၤအံၤဘၣ်. အဝဲတဲဝဲလၢ “ယနၢ်ဟူဘၣ်လၢ အတဲဝဲဒ်န့ၣ်အဃိ ကဲထီၣ်တၢ်ဂံၢ်တၢ်ဘါ လၢယဂီၢ်ဒိၣ်မး.” “ပျ့ၤလၢအမၤဘျါက့ၤတၢ်န့ၣ် လီၤဂာ်ဒ်သိးဒီး သ့ၣ်တၢ်မူ” ဒီးအကဲထီၣ် တၢ်ဂံၢ်တၢ်ဘါလၢ မိၢ်ပၢ်လၢ အဘၣ်ကွၢ်လုၢ်ဒိၣ်ထီၣ်အဖိ ထဲတဂၤ သ့ဝဲအါန့ၢ်ဒံး ပဆိကမိၣ်အီၤဒံး. (ကတိၤ ၁၅:၄) အဃိ နဆိကမိၣ်ထံ တၢ်ဂ့ၢ်တမံၤမံၤလၢ နကပတြၢၤ မိၢ်ပၢ်လၢ အဘၣ်ကွၢ်လုၢ်ဒိၣ်ထီၣ်အဖိ ထဲတဂၤ ကသ့ဧါ.
တၢး၀၉ ၄/၁ ၃၁ ¶၁
ဖိၣ်ဃဲဖိတဖၣ်အပၢ်
“ကစၢ်ယွၤလၢ အအိၣ်လၢ အတၢ်အိၣ်တၢ်ဆိးအလီၢ်စီဆှံန့ၣ် မ့ၢ်ဝဲ ပှၤဖိၣ်ဃဲဖိအပၢ်.” (စံး ၆၈:၅) လံာ်စီဆှံတဆၢအံၤ ဒုးသ့ၣ်ညါပှၤ ယဟိဝၤယွၤအဂ့ၢ်. ယဟိဝၤယွၤန့ၣ် အသ့ၣ်ညါဝဲ ပှၤလၢအဘၣ် တၢ်မၤနၢၤအီၣ်အီၤတဖၣ် အတၢ်လိၣ်ဘၣ်. ဒီးပမ့ၢ်ကွၢ် တၢ်သိၣ်တၢ်သီလၢ ကစၢ်ယွၤဟ့ၣ်လီၤ ပှၤအံၣ်စရ့လးဖိတဖၣ်န့ၣ် ပသ့ၣ်ညါသ့လၢ ကစၢ်ယွၤ သူၣ်အိၣ်သးအိၣ်ဝဲ ပှၤလၢ အမိအပါ သံသဒၣ်ကွံာ်အီၤတဖၣ်ဒိၣ်မး. ပကတဲသကိး တၢ်ကတိၤ လၢအမ့ၢ် “ဖိၣ်ဃဲ” လၢလံာ်စီဆှံ ပာ်ဖျါထီၣ်ဝဲ အဆိကတၢၢ်တဘျီအဂ့ၢ်. ဒီးတၢ်ကတိၤအံၤ ပထံၣ်န့ၢ်အီၤဖဲ ၂ မိၤၡ့ ၂၂:၂၂-၂၄.
ယဟိဝၤယွၤ မၤစၢၤနၤလၢ နလဲၤခီဖျိတၢ်ကီတၢ်ခဲကန့ၢ်
၁၇ ဖး စံးထီၣ်ပတြၢၤ ၄၀:၅. ပှၤထီၣ်ကစၢၢ်တဂၤန့ၣ် အပာ်လီၤသးလၢ အကလဲၤတုၤလၢ ကစၢၢ်ဒီခိၣ်. ဖဲအထီၣ်ကစၢၢ်အခါ လၢကျဲန့ၣ် အထံၣ်ဝဲ တၢ်လီၢ်လၢအဃံလၤ အါတီၤအဃိ အကပတုာ် ဒီးကွၢ်ဝဲတၢ်လီၢ်တဖၣ်န့ၣ်. ဒ်ပှၤထီၣ်ကစၢၢ်တဂၤန့ၣ် မၤဝဲအသိး နၤစ့ၢ်ကီး ဖဲနလဲၤခီဖျိ တၢ်ကီတၢ်ခဲအခါ နကဘၣ်ပတုာ် ဒီးဆိမိၣ်ထံက့ၤလၢ ယဟိဝၤယွၤ မၤစၢၤနၤဒ်လဲၣ်. ကိးနံၤဒဲးန့ၣ် သံကွၢ်လီၤနသးလၢ ‘တနံၤညါအံၤ ယဟိဝၤယွၤ ဆိၣ်ဂ့ၤယၤဒ်လဲၣ်. ယတၢ်ကီတၢ်ခဲ အိၣ်ဒံးနာ်က့ ဒ်သိးယလဲၤခီဖျိအီၤ ကန့ၢ်အဂီၢ် ယဟိဝၤယွၤ မၤစၢၤယၤဒ်လဲၣ်.’ နမ့ၢ်သံကွၢ်လီၤနသး ဒ်အံၤန့ၣ် နကထံၣ်ဘၣ်လၢ ယဟိဝၤယွၤ မၤစၢၤနၤအါမး.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၆ ၆/၁ ၁၀ ¶၅
လံာ်စီဆှံ အတၢ်ပာ်ဖျါလၢ လံာ်စံးထီၣ်ပတြၢၤ ခံဘ့ၣ်တဘ့ၣ်အဂီၢ်
၆၈:၁၈—“ပိာ်ခွါတဖၣ်” လၢအ “ကဲထီၣ်ဝဲ တၢ်ဟ့ၣ်တဖၣ်” န့ၣ် မ့ၢ်မတၤလဲၣ်. အဝဲသ့ၣ်န့ၣ် မ့ၢ်ဝဲ ပှၤပိာ်ခွါတနီၤလၢ ပှၤဟဲက့ၤဖီၣ်အီၤ ဖဲပှၤဒုးန့ၢ်ဝဲ ကီၢ်တၢ်စံးပာ်အခါ. လၢခံန့ၣ် ပှၤဟ့ၣ်အဝဲသ့ၣ် မူဒါလၢ ကမၤစၢၤ ပှၤလ့ၤဝံဖိတဖၣ်.—ဧ့စြၤ ၈:၂၀.
လါယူၤလံ ၂၉–လါအီကူး ၄
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၆၉
စံးထီၣ်ပတြၢၤ ၆၉ တဲဆိပာ်စၢၤဝဲ ယ့ၣ်ၡူးအဂ့ၢ်ဒ်လဲၣ်
တၢး၁၁ ၈/၁၅ ၁၁ ¶၁၇
အဝဲသ့ၣ် အိၣ်ခိး မ့းၡံအၤ
၁၇ မ့းၡံအၤန့ၣ် ကဘၣ်တၢ်သးဟ့အီၤကလီကလီ. (စံး ၆၉:၄) ဘၣ်ဃးဒီး ယ့ၣ်ၡူးအတၢ်ကတိၤန့ၣ် တၢ်မၢဖိယိၤဟၣ် ကွဲးဝဲလၢ “တၢ်မၤလၢ ပှၤတမၤ နီတဂၤဒံးဘၣ်န့ၣ် ယမ့ၢ်တမၤဘၣ်လၢ အဝဲသ့ၣ် အကျါဘၣ်ဒီး အဝဲသ့ၣ် အတၢ်ဒဲးဘး တအိၣ်ဘၣ်. ဘၣ်ဆၣ် ခဲအံၤအဝဲသ့ၣ် ထံၣ်ယၤဒီး သးဟ့ယၤဒီးယပၢ်လီၤ. ဘၣ်ဆၣ် တၢ်ကဲထီၣ်အသး ဒ်အံၤန့ၣ် မ့ၢ်ဒ်သိး တၢ်ကွဲးအသးလၢ အဝဲသ့ၣ် အတၢ်သိၣ်တၢ်သီအပူၤ လၢအမ့ၢ် ‘တၢ်ဂ့ၢ်တအိၣ် နီတမံၤဘၣ် သနာ်က့ အဝဲသ့ၣ်သးဟ့ယၤ’ န့ၣ် ကလၢထီၣ်ပှဲၤထီၣ် အဂီၢ်လီၤ.” (ယိၤ ၁၅:၂၄, ၂၅) ညီနုၢ် တၢ်ကတိၤလၢအမ့ၢ် “တၢ်သိၣ်တၢ်သီ” န့ၣ်အအဲၣ်ဒိးတဲဝဲ လံာ်စီဆှံခဲလၢာ်လၢ ပှၤဒိးန့ၢ်ဘၣ်အီၤသ့ လၢအဝဲသ့ၣ်အစိၤ. (ယိၤဟၣ် ၁၀:၃၄; ၁၂:၃၄) လံာ်တၢ်သးခုကစီၣ် ပာ်ဖျါထီၣ်ဝဲလၢ ယ့ၣ်ၡူးန့ၣ် ပှၤသးဟ့အီၤ. လီၤဆီဒၣ်တၢ် ယူဒၤတၢ်ဘူၣ်တၢ်ဘါ ခိၣ်နၢ်တဖၣ် သးဟ့အီၤ. တကးဒံးဘၣ် ယ့ၣ်ၡူး အနီၢ်ကစၢ်ဒၣ်ဝဲ တဲဝဲလၢ “လၢဟီၣ်ခိၣ် ကသးဟ့သုအဂီၢ်န့ၣ် တၢ်ဂ့ၢ်တအိၣ် နီတမံၤဘၣ်. ဘၣ်ဆၣ် မ့ၢ်လၢ ယအုၣ်ယသးလၢ ဟီၣ်ခိၣ် အတၢ်မၤတဖၣ်န့ၣ် အၢဝဲသီဝဲအဃိ ဟီၣ်ခိၣ်သးဟ့ယၤလီၤ.”—ယိၤ ၇:၇.
တၢး၁၀ ၁၂/၁၅ ၈ ¶၇-၈
အိၣ်ဒီးတၢ်သးဆူၣ်လၢ တၢ်ဘူၣ်တၢ်ဘါအမ့ၢ်အတီအဂီၢ်
၇ ဘၣ်တဘျီန့ၣ် ယ့ၣ်ၡူးပာ်ဖျါထီၣ်လၢ အအိၣ်ဒီးတၢ်သးဆူၣ်ဒိၣ်မး. တၢ်မၤအသးအံၤ ဘၣ်ဝဲဖဲ ယ့ၣ်ၡူး စးထီၣ်မၤတၢ်စံၣ်တဲၤတဲလီၤတၢ်မၤ ဖဲ ခ.န. ၃၀ ဘူၣ်လဲၤကပာ် အဆၢကတီၢ်. ယ့ၣ်ၡူးဒီး အပျဲၢ်အဘီၣ်တဖၣ် ဟဲဝဲလၢ ဝ့ၢ်ယရူၤၡလ့ၣ် ဒီးထံၣ်ဘၣ်ဝဲလၢ တၢ်လုၢ်ဟံၣ်န့ၣ် “ပှၤဆါကျီၢ်, သိ, ထိၣ်လွံၢ်တဖၣ် ဒီးပှၤခီလဲစ့ဖိတဖၣ် ဆ့ၣ်နီၤဝဲလၢ အဝဲသ့ၣ် အလီၢ်ဆ့ၣ်နီၤ အလိၤ.” ဖဲန့ၣ်အဆၢကတီၢ် ယ့ၣ်ၡူးမၤဝဲဒ်လဲၣ်. ဒီးအပျဲၢ်အဘီၣ်တဖၣ် သ့ၣ်နီၣ်ဝဲတၢ်ဂ့ၢ်မနုၤလဲၣ်.—ဖး ယိၤဟၣ် ၂:၁၃-၁၇.
၈ တၢ်လၢယ့ၣ်ၡူးတဲဝဲ ဒီးမၤဝဲန့ၣ် ဒုးသ့ၣ်နီၣ်ထီၣ် အပျဲၢ်အဘီၣ်တဖၣ်လၢ ဝံအတၢ်စံးပာ်လၢ စီၤဒၤဝံးတဲဝဲဖဲ စံးထီၣ်ပတြၢၤအပူၤ. အတဲဝဲလၢ “တၢ်သးဆူၣ်လၢ နဟံၣ်အဂီၢ်န့ၣ် အိၣ်ပှဲၤလၢယပူၤ.” (စံး ၆၉:၉) ဘၣ်မနုၤအဃိ အဝဲသ့ၣ် နီၣ်ဘၣ်ဝဲ တၢ်ဂ့ၢ်တခါအံၤလဲၣ်. မ့ၢ်လၢ တၢ်လၢယ့ၣ်ၡူး မၤဝဲန့ၣ် ဒုးအိၣ်ထီၣ် တၢ်ကီတၢ်ခဲဖးဒိၣ် ဒီးတၢ်လီၤဘၣ်ယိၣ်ဖးဒိၣ် သ့ဝဲအဃိ. ပှၤလုၢ်တၢ်ဒိၣ် ဒီးပှၤကွဲးလံာ်ဖိတဖၣ် ဒီးပှၤတနီၤန့ၣ် အအိၣ်ဒီး တၢ်စိတၢ်ကမီၤလၢ တၢ်လုၢ်ဟံၣ်ပူၤ ဒီးအဝဲသ့ၣ် ဆီၣ်ထွဲဝဲ တၢ်ဆါတၢ်ပှ့ၤ တၢ်မၤတခါအံၤ လၢအနီၢ်ကစၢ်အဘျုးအဂီၢ်. အဃိ ဒ်သိး ယ့ၣ်ၡူး ကပာ်ဖျါထီၣ် အဝဲသ့ၣ် အတၢ်ကမၣ် ဒီးကမၤဟးဂီၤ အဝဲသ့ၣ် အတၢ်ဟ့ၣ်ကူၣ်အဂီၢ် ယ့ၣ်ၡူး ထီဒါဝဲ တၢ်ဘူၣ်တၢ်ဘါ ဖဲအဝဲသ့ၣ်အစိၤအခါ. ယ့ၣ်ၡူးအသးဆူၣ်လၢ ကစၢ်ယွၤအဟံၣ် မ့တမ့ၢ် တၢ်ဘူၣ်တၢ်ဘါ အမ့ၢ်အတီအဂီၢ်န့ၣ် ဖျါဝဲ ၡဲၡဲဖိအဃိ အပျဲၢ်အဘီၣ်တဖၣ် နၢ်ပၢၢ်ဝဲ တၢ်အိၣ်သးတဘျီဃီ. တၢ်သးဆူၣ်န့ၣ် အကဲမနုၤလဲၣ်, အလီၤဆီဒီး ပှၤမၤကရီတၢ်ဧါ.
g၉၅ ၁၀/၂၂ ၃၁ ¶၄
ပှၤသးသ့ၣ်ဖးအဃိ ပှၤသံသ့ဧါ
ဘၣ်ဃးဒီး ယ့ၣ်ၡူးခရံာ်န့ၣ် ဝံအတၢ်စံးပာ် ပာ်ဖျါထီၣ်ဝဲလၢ “လၢတၢ်ဒုၣ်ဒွဲၣ်အဃိ ယသးသ့ၣ်ဖး ဒီးအပူၤလီၢ် ဘျါက့ၤတသ့ဘၣ်.” အဃိ ပှၤတနီၤတဲဝဲလၢ ယ့ၣ်ၡူးသံဝဲ ခီဖျိလၢ အသးသ့ၣ်ဖးအဃိ. (စံးထီၣ်ပတြၢၤ ၆၉:၂၀.) တၢ်ကတိၤတဖၣ်အံၤ ပကဘၣ်နၢ်ပၢၢ် အခီပညီလိၤလိၤဧါ. ဘၣ်သ့ၣ်သ့ၣ် ယ့ၣ်ၡူးကသံဝဲ ခီဖျိလၢ အသးသ့ၣ်ဖးနီၢ်ကီၢ်အဃိသ့. မ့ၢ်လၢတချုးလၢ အသံဒံးဘၣ် စှၤကိာ်နၣ်ရံၣ်အခါန့ၣ် အဝဲတူၢ်ဘၣ်တၢ်နးမး လၢနီၢ်ခိတကပၤ တကးဒံးဘၣ် အသးဘၣ်ဒိဝဲဒိၣ်မး. (မးသဲ ၂၇:၄၆; လူၤကၣ် ၂၂:၄၄; ဧ့ၤဘြံၤ ၅:၇) လံာ်စီဆှံတဲဝဲလၢ ဖဲယ့ၣ်ၡူးသံဝံၤအလီၢ်ခံ ပှၤဆဲးအကပၤလၢဘီ. ဒီးဖဲပှၤဆဲးအကပၤအခါ “တၢ်သွံၣ်ဒီးထံ” ဟဲလီၤဝဲ. တၢ်ကဲထီၣ်အသးဒ်အံၤန့ၣ် ဘၣ်သ့ၣ်သ့ၣ် ကမ့ၢ်ခီဖျိလၢ ယ့ၣ်ၡူးအသးသ့ၣ်ဖး မ့တမ့ၢ် အသးသွံၣ်ကျိၤ သ့ၣ်ဖးကွံာ် တဘိဘိ အဃိ အသွံၣ်ယွၤလီၤဝဲလၢ အကအိပူၤ မ့တမ့ၢ် ယွၤလီၤဝဲလၢ သးအသလီပူၤ. သးအသလီန့ၣ် အကးဘၢဃာ်ဝဲ သးဖျၢၣ် ဒီးအအိၣ်ဒီးထံလၢ အအိၣ်ဝးတရံးသးဖျၢၣ်. အဃိ ပှၤမ့ၢ်ဆဲးကွၢ်အီၤလၢ အကပၤမ့ၢ်ဂ့ၤ လၢအသးမ့ၢ်ဂ့ၤန့ၣ် “တၢ်သွံၣ်ဒီးထံ” ကဟဲယွၤလီၤဝဲ.—ယိၤဟၣ် ၁၉:၃၄.
it-2 ၆၅၀
တၢ်မုၢ်တၢ်ဘိလၢ အအိၣ်ဒီးအစုၣ်
ဘၣ်ဃးဒီး မ့းၡံအၤန့ၣ် လံာ်စီဆှံ တဲဆိပာ်စၢၤဝဲလၢ ပှၤကဒုးအီၣ်အီၤ “တၢ်မုၢ်တၢ်ဘိလၢ အအိၣ်ဒီးအစုၣ်.” (စံး ၆၉:၂၁) တချုးလၢ ပှၤဆဲးကွၢ်ယ့ၣ်ၡူးလၢ ဘီဒံးဘၣ်အခါ ပှၤဟ့ၣ်ဒုးအီအီၤ စပံးထံလၢ အဃါဃုာ်အသးဒီး တၢ်ခၣ်ထံ. ဘၣ်သ့ၣ်သ့ၣ် ပှၤဟ့ၣ်ဒုးအီအီၤ ဒ်သိးအတူၢ်ဘၣ်တၢ် ကကိညၢ်အဂီၢ် အဃိ အဝဲလ့ၣ်ကွၢ်ဝဲဝံၤ ဒီးတအီဝဲဘၣ်. ဖဲ မးသဲ (၂၇:၃၄) ကွဲးဝဲ ဝံအတၢ်စံးပာ်အံၤ လၢထီၣ်ပှဲၤထီၣ်အဂ့ၢ်အခါ အသူဝဲ ကြံးအတၢ်ကတိၤလၢအမ့ၢ် ခိလံၤ (တၢ်ခၣ်ထံ). ဖဲကြံးစဲးထူးကၠ့းအပူၤ စံးထီၣ်ပတြၢၤ ၆၉:၂၁ နာ်က့ သူဝဲတၢ်ကတိၤအံၤလီၤ. ဘၣ်ဆၣ် မ့မ့ၢ်လၢ လံာ်မၢ်ကူးအပူၤန့ၣ် အသူဝဲ တၢ်ကတိၤလၢအမ့ၢ် “မူရၣ်.” (မၢ်ကူး ၁၅:၂၃) အဃိ အလီၤဂာ်လၢ “တၢ်မုၢ်တၢ်ဘိလၢ အအိၣ်ဒီးအစုၣ်” မ့တမ့ၢ် “တၢ်ခၣ်ထံ” န့ၣ်မ့ၢ်ဝဲ “မူရၣ်.” မ့တမ့ၢ်ဘၣ်န့ၣ် တၢ်အထံလၢ ပှၤဒုးအီဝဲ ယ့ၣ်ၡူးန့ၣ် ကပၣ်ဃုာ်ဒီး တၢ်ခၣ်ထံ ဒီးမူရၣ် ဒီးအမၤမူၤပှၤသ့.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၉၉ ၁/၁၅ ၁၈ ¶၁၁
စံးထီၣ်ပတြၢၤ ယဟိဝၤယွၤ လၢတၢ်ထုကဖၣ်အပူၤ
၁၁ ပှၤအါဂၤန့ၣ် ဖဲအဝဲသ့ၣ် ဃ့ထုကဖၣ်အခါ အဃ့ဝဲထဲ တၢ်လၢအလိၣ်ဘၣ်ဝဲ. သနာ်က့ ပမ့ၢ်အဲၣ် ယဟိဝၤယွၤန့ၣ် ဖဲပဃ့ထုကဖၣ်လၢအအိၣ် လၢပှၤမဲာ်ညါမ့ၢ်ဂ့ၤ လၢပှၤလီၢ်ခံမ့ၢ်ဂ့ၤ ပကြၢးစံးဘျုးအီၤ ဒီးစံးထီၣ်ပတြၢၤအီၤ. တၢ်မၢဖိပီလူး တဲဝဲလၢ “တဘၣ် သူၣ်ကိၢ်သးဂီၤတၢ် နီတမံၤတဂ့ၤ. လၢတၢ်ခဲလၢာ်အပူၤန့ၣ် တဲဖျါထီၣ် သုတၢ်ဃ့တဖၣ်လၢ ကစၢ်ယွၤအအိၣ် ခီဖျိလၢ တၢ်ဃ့ထုကဖၣ် ဒီးတၢ်ဃ့ကညးတၢ် ဃုာ်ဒီး တၢ်စံးဘျုးစံးဖှိၣ်က့ၤတၢ်တက့ၢ်. ဒီးတၢ်သူၣ်မံသးမုာ်လၢ အဟဲလၢ ကစၢ်ယွၤအအိၣ် လၢအဒိၣ်န့ၢ်ယိာ်န့ၢ် တၢ်လၢပနၢ်ပၢၢ်အီၤသ့န့ၣ် ကပၢၤသုသးဒီး သုတၢ်ဆိကမိၣ်တဖၣ် ခီဖျိလၢ ယ့ၣ်ၡူးခရံာ်လီၤ.” (ဖံလံးပံး ၄:၆, ၇) ပကြၢးဃ့ထုကဖၣ် ဒီးဃ့ကညးတၢ် တကးဒံးဘၣ် ပကြၢးစံးဘျုး ယဟိဝၤယွၤ ခီဖျိ အဟ့ၣ်ပှၤ နီၢ်ခိအတၢ်လိၣ်ဘၣ် ဒီးနီၢ်သးအတၢ်လိၣ်ဘၣ်တဖၣ်. (ကတိၤဒိ ၁၀:၂၂) ထါစံးထီၣ်ပတြၢၤ တဲဝဲလၢ “ဟ့ၣ်လုၢ်ထီၣ် တၢ်စံးဘျုးစံးဖှိၣ် ဒ်သုတၢ်လုၢ်တၢ်ပာ်လၢ ကစၢ်ယွၤအအိၣ် ဒီးမၤလၢပှဲၤ တၢ်လၢသုအၢၣ်လီၤ တၢ်ထီကတၢၢ်တဂၤန့ၣ်တက့ၢ်.” (စံးထီၣ်ပတြၢၤ ၅၀:၁၄) စီၤဒၤဝံး အတၢ်ဃ့ထုကဖၣ် အတၢ်သးဝံၣ်န့ၣ် တဲဝဲလၢ “ယကသးဝံၣ် စံးထီၣ်ပတြၢၤ ကစၢ်ယွၤအမံၤ, ယကမၤလၤကပီၤအီၤ ဒီးယကစံးဘျုးစံးဖှိၣ်အီၤလီၤ.” (စံးထီၣ်ပတြၢၤ ၆၉:၃၀) ဖဲပဃ့ထုကဖၣ်လၢ ပှၤမဲာ်ညါအခါမ့ၢ်ဂ့ၤ လၢပှၤလီၢ်ခံအခါမ့ၢ်ဂ့ၤ ပကြၢးမၤဒ်န့ၣ်စ့ၢ်ကီး.
လါအီကူး ၅-၁၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၇၀-၇၂
“တဲဘၣ် ပှၤလၢခံတစိၤ” ဘၣ်ဃးဒီး ကစၢ်ယွၤအတၢ်စိတၢ်ကမီၤအဂ့ၢ်
တၢး၉၉ ၉/၁ ၁၈ ¶၁၇
သးစၢ်သ့ၣ်ဧၢ ကၠီးလိနသး ဒ်သိးနပဲာ်ထံနီၤဖးတၢ် ကသ့အဂီၢ်
၁၇ ဒ်သိး ပတလီၤဘၣ်လၢ မုၣ်ကီၤလံၢ် အပျံၤသကွီၤ တဂ့ၤအဂီၢ် ပကဘၣ်ပလီၢ်ပသး ထီဘိ ဒီးတဘျီတခီၣ်န့ၣ် ပကလိၣ်ဘၣ် တၢ်သးဒူဖးဒိၣ်. တဘျီတခီၣ် ပကတူၢ်ဘၣ်လၢ ပလီၤဆီဒီး ပသကိးတဖၣ် တကးဒံးဘၣ် ပလီၤဆီဒီး ပှၤကိးဂၤဒဲး. စီၤဒၤဝံး ဃ့ဘါထုကဖၣ်ဝဲလၢ “အိ တၢ်ပၢကစၢ် ယဟိဝၤယွၤဧၢ, နမ့ၢ်ယတၢ်မုၢ်လၢ် ဒီးယနာ်န့ၢ်နၤလၢ ယနီၢ်ဆံးခါ လံၤလံၤလံ. အိ ကစၢ်ယွၤဧၢ, နသိၣ်လိယၤ စးထီၣ်လၢ ယသးစၢ်လံၤလံၤလံ. ဒီးယတဲဖျါထီၣ် နတၢ်မၤလၢ အလီၤလိၢ်လီၤလးတဖၣ်အဂ့ၢ် တုၤလၢခဲအံၤလီၤ.” (စံးထီၣ်ပတြၢၤ ၇၁:၅, ၁၇) စီၤဒၤဝံးန့ၣ် အအိၣ်ဒီးတၢ်သးဒူဒိၣ်မး. စီၤဒၤဝံးန့ၣ် အမၤအိၣ်ထီၣ် အတၢ်သးဒူ လၢအနီၢ်ဆံးခါလံၤလံၤလံ. တချုးလၢ အဝဲလဲၤဒုးတၢ်ဒီး စီၤကၤလယး ဒံးဘၣ်အခါလံၤလံၤန့ၣ် အဝဲပာ်ဖျါထီၣ်လၢ အအိၣ်ဒီး တၢ်သးဒူဖးဒိၣ်. အဝဲဒီသဒၢ အပါအသိတဖၣ် ဒီးမၤသံဝဲ ခ့ယုၢ်ဒီးတၤသူ. (၁ ၡမူၤအ့လး ၁၇:၃၄-၃၇) စီၤဒၤဝံးတဲဝဲ ယဟိဝၤယွၤလၢ “ယနာ်န့ၢ်နၤလၢ ယနီၢ်ဆံးခါ လံၤလံၤလံ.” အဃိ အပာ်ဖျါထီၣ်ဝဲလၢ အဝဲအိၣ်ဒီး တၢ်သးဒူန့ၣ် မ့ၢ်လၢယဟိဝၤယွၤ မၤစၢၤအီၤအဃိ. စီၤဒၤဝံး သန့ၤအသးလၢ ယဟိဝၤယွၤအဃိ မၤစၢၤအီၤဒ်သိး အလဲၤခီဖျိဝဲ တၢ်ကီတၢ်ခဲ တမံၤဂ့ၤတမံၤဂ့ၤလၢ အထံၣ်ဘၣ်ဝဲ ကန့ၢ်အဂီၢ်. နၤစ့ၢ်ကီး နမ့ၢ်သန့ၤသးလၢ ယဟိဝၤယွၤန့ၣ် အဝဲကမၤစၢၤနၤ ဒ်သိး နကအိၣ်ဒီး တၢ်သးဒူ ဒီးတၢ်ဂံၢ်တၢ်ဘါလၢနက “မၤနၢၤဟီၣ်ခိၣ်” အဂီၢ်.—၁ ယိၤဟၣ် ၅:၄.
g၀၄ ၁၀/၈ ၂၃ ¶၃
ပကြၢးရ့ဒီး ပှၤသးပှၢ်တဖၣ် ဒ်လဲၣ်
ပှၤကွဲးထါစံးထီၣ်ပတြၢၤ ဃ့ထုကဖၣ်ဝဲလၢ “ဖဲယသးပှၢ်ထီၣ်အခါ တဘၣ်ပာ်တ့ၢ်ကွံာ်ယၤတဂ့ၤ. ဒီးဖဲယဂံၢ်ယဘါ လၢာ်ကွံာ်အခါ တဘၣ်လဲၤသဒၣ်ယၤတဂ့ၤ.” (စံးထီၣ်ပတြၢၤ ၇၁:၉) ပှၤသးပှၢ်တဖၣ်န့ၣ် ဘၣ်သ့ၣ်သ့ၣ် ကတူၢ်ဘၣ်ဝဲလၢ အတကဲဘျုး နီတမံၤလၢၤဘၣ်. သနာ်က့ ကစၢ်ယွၤတ “ပာ်တ့ၢ်ကွံာ်” အဝဲသ့ၣ်ဘၣ်. ပှၤကွဲးထါစံးထီၣ်ပတြၢၤ တဂၤအံၤန့ၣ် တမ့ၢ်လၢ အတူၢ်ဘၣ်ဝဲလၢ ယဟိဝၤယွၤ ပာ်တ့ၢ်ကွံာ်အီၤအဃိ အကွဲးဝဲဒ်န့ၣ်ဘၣ်. လၢတၢ်န့ၣ်အလီၢ် အအဲၣ်ဒိး ပာ်ဖျါထီၣ်ဝဲလၢ အသးဒံးပှၢ်ထီၣ်န့ၣ် အဝဲကဘၣ် သန့ၤအသးလၢ ယဟိဝၤယွၤ ဒံးဒိၣ်ထီၣ်. ပှၤလၢအပာ်ဖျါထီၣ် တၢ်သးတီ ဒ်အံၤန့ၣ် ယဟိဝၤယွၤ ကဆီၣ်ထွဲမၤစၢၤ အဝဲသ့ၣ် လၢအတၢ်အိၣ်မူ ဒီတစိၤ. (စံးထီၣ်ပတြၢၤ ၁၈:၂၅) ဒီးအါဘျီန့ၣ် ယဟိဝၤယွၤ မၤစၢၤအဝဲသ့ၣ် ခီဖျိလၢ ခရံာ်ဖိဒီပုၢ်ဝဲၢ်မုၣ်ခွါတဖၣ်.
တၢး၁၄ ၁/၁၅ ၂၃ ¶၄-၅
တချုးလၢ မုၢ်နံၤလၢအကီအခဲ ဟဲတုၤအိၣ်နၤ ဒံးဘၣ်အခါ မၤယဟိဝၤယွၤ အတၢ်မၤ
၄ နမ့မ့ၢ် ပှၤဒိၣ်တုာ်ခိၣ်ပှဲၤ လၢအအိၣ်ဒီး တၢ်လဲၤခီဖျိတဂၤန့ၣ် သံကွၢ်လီၤနသးလၢ ‘ဖဲယဂံၢ်ဘါ အိၣ်ဒံးအခါ ယကဘၣ်မၤ တၢ်မနုၤလဲၣ်.’ ဒ်နမ့ၢ် ခရံာ်ဖိလၢ အဒိၣ်တုာ်ခိၣ်ပှဲၤတဂၤအသိး နအိၣ်ဒီး တၢ်ခွဲးတၢ်ယာ်လၢ ပှၤဂၤတဒိးန့ၢ်ဘၣ်ဝဲဘၣ်. နအိၣ်ဒီး တၢ်ခွဲးတၢ်ယာ်လၢ နကသိၣ်လိက့ၤ ပှၤသးစၢ်တဖၣ်လၢ တၢ်သိၣ်လိလၢ နန့ၢ်ဘၣ်အီၤလၢ ယဟိဝၤယွၤအအိၣ်. ဒီးနဟ့ၣ်ဂံၢ်ဟ့ၣ်ဘါ ပှၤဂၤလၢ နတၢ်လဲၤခီဖျိလၢ ကစၢ်ယွၤ အတၢ်မၤပူၤသ့. စီၤဒၤဝံး ဃ့ဘါထုကဖၣ်လၢ အကဒိးန့ၢ်ဘၣ် တၢ်ခွဲးတၢ်ယာ် ဒ်န့ၣ်အဂီၢ်. အဝဲဃ့ဝဲလၢ “အိ ကစၢ်ယွၤဧၢ, နသိၣ်လိယၤ စးထီၣ်လၢ ယသးစၢ်လံၤလံၤလံ. . . . ယသးမ့ၢ်ပှၢ်ထီၣ် ဒီးယခိၣ်ဆူၣ်မ့ၢ်ဝါထီၣ် သနာ်က့ တဘၣ်ပာ်တ့ၢ်ကွံာ်ယၤတဂ့ၤ. ပျဲယတဲဘၣ် ပှၤလၢခံတစိၤ ဘၣ်ဃးဒီး နတၢ်စိတၢ်ကမီၤ ဒီးပျဲယတဲဘၣ် ပှၤလၢကဟဲလၢခံတဖၣ် ဘၣ်ဃးဒီး နတၢ်ဂံၢ်တၢ်ဘါတက့ၢ်.”—စံး ၇၁:၁၇, ၁၈.
၅ တၢ်လၢနမၤလိဘၣ်အီၤ လၢအနံၣ်အါမး အတီၢ်ပူၤတဖၣ်န့ၣ် နဒုးသ့ၣ်ညါပှၤဂၤ ကသ့ဒ်လဲၣ်. နကွဲအိၣ်သကိး ဒီပုၢ်ဝဲၢ်မုၣ်ခွါလၢ အသးစၢ်တဖၣ် ဒ်သိး နကရ့လိာ်သး ဒီးဟ့ၣ်ဂံၢ်ဟ့ၣ်ဘါလိာ်သး ကသ့ဧါ. နဟးစံၣ်တဲၤတဲလီၤတၢ်ဒီးအီၤ ဒီးပာ်ဖျါထီၣ်န့ၢ်အီၤလၢ နမၤကစၢ်ယွၤ အတၢ်မၤအဃိ နဒိးန့ၢ်ဘၣ် တၢ်သးခုထဲလဲၣ် ကသ့ဧါ. စီၤအလံဟူၤ တဲဝဲလၢ “ယကပျဲလၢ ပှၤသးပှၢ်တဖၣ် တဲတၢ် ဒီးပှၤလၢ အသးနံၣ်အါတဖၣ် ကတဲဖျါထီၣ် တၢ်ကူၣ်သ့လီၤ.” (ယိၤဘး ၃၂:၇) တၢ်မၢဖိပီလူး ဟ့ၣ်ဂံၢ်ဟ့ၣ်ဘါဝဲ ခရံာ်ဖိဒီပုၢ်ဝဲၢ်မုၣ် လၢအအိၣ်ဒီး တၢ်လဲၤခီဖျိတဖၣ်လၢ ကဟ့ၣ်ဂံၢ်ဟ့ၣ်ဘါပှၤဂၤ ခီဖျိလၢ တၢ်စံးတၢ်ကတိၤ ဒီးတၢ်ဖံးတၢ်မၤ. အဝဲ ကွဲးဝဲလၢ “ပိာ်မုၣ်လၢအသးပှၢ်တဖၣ်န့ၣ် . . . ကြၢးမ့ၢ် ပှၤလၢအသိၣ်လိတၢ်လၢအဂ့ၤ.”—တံတူး ၂:၃.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-1 ၇၆၈
ထံကျိဖရၤသး
တၢ်လီၢ်လၢ ပှၤအံၣ်စရ့လးဖိတဖၣ် ဒိးန့ၢ်ဘၣ်ဝဲ. ကစၢ်ယွၤ အၢၣ်လီၤဝဲ စီၤအၤဘြၤဟၣ်လၢ အကဟ့ၣ်ဝဲ စီၤအၤဘြၤဟၣ် အဖိအလံၤတဖၣ် တၢ်လီၢ်တၢ်ကျဲ “စးထီၣ်လၢ အဲၤကူပတူး အထံကျိ တုၤလၢ ထံကျိဖးဒိၣ် လၢအမ့ၢ် ထံကျိဖရၤသးန့ၣ်လီၤ.” (၁ မိၤ ၁၅:၁၈) ဒီးယဟိၤယွၤ တဲဖျါထီၣ်ကဒီးဝဲ တၢ်အၢၣ်လီၤအံၤလၢ ပှၤအံၣ်စရ့လးဖိတဖၣ်အအိၣ်. (၂ မိၤ ၂၃:၃၁; ၅ မိၤ ၁:၇, ၈; ၁၁:၂၄; ၡူ ၁:၄) ၁ ကွဲးနီၣ်တၢ် ၅:၉ ပာ်ဖျါထီၣ်ဝဲလၢ ဘူးထီၣ်လၢ စီၤဒၤဝံးကပၢတၢ်အခါ ပှၤရူၤဘ့ၣ်ဖိတဖၣ် မၤလဲၢ်ထီၣ် အတၢ်အိၣ်တၢ်ဆိးအလီၢ် “ပၢၢ်တုၤလၢ ပှၢ်မုၢ်ကနၢအခီၣ်ထံးလၢ အဘူးဒီး ထံကျိဖရၤသး.” ဖျါလၢ ပှၤရူၤဘ့ၣ်ဖိတဖၣ် မၤလဲၢ်ထီၣ်ဝဲ တၢ်လီၢ်လၢ ကံလဧး အဟီၣ်ကဝီၤမုၢ်ထီၣ်တခီ တုၤထဲဒၣ်လၢ စူၤရံအပှၢ်မုၢ်ကနၢ အဆၢ. ဘၣ်မနုၤအဃိ ပတဲဒ်န့ၣ်လဲၣ်. စူၤရံအပှၢ်မုၢ်ကနၢန့ၣ် လဲၢ်ဝဲပၢၢ်တုၤလၢ ထံကျိဖရၤသး. ဒီးထံကျိဖရၤသးဒီး “ကံးလဧး အဟီၣ်ကဝီၤ အမုၢ်ထီၣ်တခီ” (၁ ကွဲး ၅:၁၀) န့ၣ်တၢ်ဒ့စၢၤ ကယံၤဝဲ ၈၀၀ ကံလိမံထၢၣ် (၅၀၀ မံးလာ်) ညါ. (RS ကွဲးဝဲလၢ “ပၢၢ်တုၤလၢ ပှၢ်မုၢ်ကနၢ အခီၣ်ထံး ဒီးပှၢ်မုၢ်ကနၢအံၤ အိၣ်ဝဲလၢ ထံကျိဖရၤသး လၢအံၤတကပၤ.” JB ကွဲးဝဲလၢ “တုၤလၢပှၢ်မုၢ်ကနၢ အခီၣ်ထံး ဒီးပှၢ်မုၢ်ကနၢအံၤ ကတၢၢ်ဝဲဖဲ ထံကျိဖရၤသး.”) ဖဲစီၤဒၤဝံး ဒီးစီၤၡလိၤမိၤပၢတၢ်အဆၢကတီၢ် ကီၢ်အံၣ်စရ့လး အကီၢ်ဆၢ လဲၢ်ထီၣ်ဝဲ တုၤလၢ ပှၤစူၤရံဖိ အဘီအမုၢ် စိဘၤ ဒီးတုၤလၢ ထံကျိဖရၤသး အကၢၢ်နံၤ. အဃိဖျါလီၤဂာ်လၢ အပၣ်ဃုာ်ဒီး တၢ်လီၢ်ဒီတကျိၤလၢ အအိၣ်တုၤလၢ ကီၢ်စူၤရံ အထးခီ. ဖျါလၢ ယဟိဝၤယွၤ အတၢ်အၢၣ်လီၤအံၤ လၢထီၣ်ပှဲၤထီၣ်ဝဲ လၢလၢပှဲၤပှဲၤ စးထီၣ်ဖဲန့ၣ်အဆၢကတီၢ်.—၂ မူၤ ၈:၃; ၁ စီၤပၤ ၄:၂၁; ၁ ကွဲး ၁၈:၃-၈; ၂ ကွဲး ၉:၂၆.
ijwfq ၄၉
ဘၣ်မနုၤအဃိ ယဟိဝၤပှၤအုၣ်အသးတဖၣ် ဆီတလဲကွံာ် အတၢ်စူၢ်တၢ်နာ်တနီၤလဲၣ်
ပတၢ်စူၢ်တၢ်နာ်န့ၣ် ဒိးသန့ၤထီၣ်အသးလၢ လံာ်စီဆှံလီၤ. ခီဖျိလၢပနၢ်ပၢၢ်အါထီၣ် လံာ်စီဆှံအဃိ ပဆီတလဲပတၢ်နာ်တနီၤန့ၣ်လီၤ.
ပဆီတလဲပတၢ်နာ်န့ၣ် လီၤပလိာ်ဒီး လံာ်စီဆှံအတၢ်သိၣ်တၢ်သီလၢ ကတိၤဒိ ၄:၁၈ လၢအစံးဝဲ– “မ့မ့ၢ်ပှၤတီပှၤလိၤအကျဲန့ၣ် မၤသးဒ်မုၢ်ဆ့ၣ်ထီၣ် အတၢ်ကပီၤဒံးယံာ်ဒံးကပီၤထီၣ်, ဒံးယံာ်ဒံးကပီၤထီၣ်, တုၤလၢမုၢ်ထူၣ်အသိးန့ၣ်လီၤ.” ဒ်မုၢ်ဆ့ၣ်ထီၣ် အတၢ်ကပီၤဒံးယံာ်ဒံးကပီၤထီၣ်ဝဲအသိး ကစၢ်ယွၤဒုးနၢ်ပၢၢ်အါထီၣ်ပှၤ တၢ်မ့ၢ်တၢ်တီ တဆီဘၣ်တဆီ ဖဲအဆၢကတီၢ်ဘၣ်ဝဲအခါလီၤ. (၁ ပ့းတရူး ၁:၁၀-၁၂) ဒ်လံာ်စီဆှံတဲဆိပာ်စၢၤဝဲအသိး ကစၢ်ယွၤဒုးနၢ်ပၢၢ်အါထီၣ်ပှၤ တၢ်မ့ၢ်တၢ်တီ တဆီဘၣ်တဆီ ဖဲ “တၢ်ကတၢၢ်” အဆၢကတီၢ်န့ၣ်လီၤ.—ဒၤနံးယ့လး ၁၂:၄.
ပတၢ်ဆီတလဲ ပတၢ်နၢ်ပၢၢ်ဘၣ်ဃးဒီးလံာ်စီဆှံ တၢ်မ့ၢ်တၢ်တီတဖၣ်န့ၣ် ပတကြၢးကမၢကမၣ် ဒီးပတကြၢးသးတံာ်တာ်စ့ၢ်ကီးဘၣ်. ပှၤလၢပျၢၤလၢ အဘူၣ်ထီၣ်ဘါထီၣ်ယွၤန့ၣ် အိၣ်ဒီးတၢ်ထံၣ်ဒီး တၢ်မုၢ်လၢ်လၢ အကမၣ်စ့ၢ်ကီးလီၤ. အဃိ အဝဲသ့ၣ် ဘၣ်ဆီတလဲကွံာ်ဝဲ အတၢ်နၢ်ပၢၢ်လၢအကမၣ်န့ၣ်လီၤ.
တချုးကစၢ်ယွၤမၢလီၤ စီၤမိၤၡ့ဒံးဘၣ်အနံၣ် ၄၀ န့ၣ် စီၤမိၤၡ့အဲၣ်ဒိးမၤပူၤဖျဲးဝဲ ပှၤအံၣ်စရ့လးဖိတဖၣ်လီၤ.—မၤတၢ် ၇:၂၃-၂၅, ၃၀, ၃၅.
ဝံအတၢ်စံးပာ်လၢ အဘၣ်ဃးဒီးမ့းၡံအၤအတၢ်သံ ဒီးအတၢ်ဂဲၤဆၢထၢၣ်သမူထီၣ်က့ၤအဂ့ၢ်န့ၣ် တၢ်မၢဖိတဖၣ် အတၢ်နၢ်ပၢၢ်ကမၣ်ဝဲလီၤ.—ယၡါယၤ ၅၃:၈-၁၂; မးသဲ ၁၆:၂၁-၂၃.
ဘၣ်ဃးဒီး “ကစၢ်အမုၢ်နံၤ” န့ၣ် ပှၤခရံာ်ဖိလၢညါတနီၤ အတၢ်နၢ်ပၢၢ်ကမၣ်ဝဲလီၤ.—၂ သ့းစၤလနံ ၂:၁, ၂.
လၢခံကစၢ်ယွၤဘှီဘၣ်က့ၤ အဝဲသ့ၣ်အတၢ်နၢ်ပၢၢ်ကမၣ်တဖၣ်လီၤ. ဒီးပဝဲစ့ၢ်ကီး ပဃ့လၢကစၢ်ယွၤကဆဲးမၤစၢၤပှၤ ဒ်န့ၣ်အသိးလီၤ.—ယၤကိာ် ၁:၅.
လါအီကူး ၁၂-၁၈
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၇၃-၇၄
နမ့ၢ်သးက့ၣ် ပှၤလၢအတဘူၣ်ထီၣ်ဘါထီၣ် ကစၢ်ယွၤဘၣ်န့ၣ် နကဘၣ်မၤဒ်လဲၣ်
“ယဟိဝၤယွၤမၤပူၤဖျဲး ပှၤလၢအသးဂံၢ်ဘါလီၤစၢ်တဖၣ်”
၁၄ ပှၤလၢအကွဲး ထါစံးထီၣ်ပတြၢၤ ၇၃ တဂၤန့ၣ် မ့ၢ်ပှၤလ့ၤဝံဖိလီၤ. အဝဲအိၣ်ဒီးတၢ်ခွဲးတၢ်ယာ်လၢ အမၤဘၣ်ယဟိဝၤယွၤတၢ်မၤလၢ တၢ်ဘူၣ်ထီၣ်ဘါထီၣ်အလီၢ်န့ၣ်လီၤ. ဘၣ်ဆၣ် ဘၣ်တဘျီ အသးဂံၢ်ဘါလီၤစၢ်ဝဲလီၤ. ဘၣ်မနုၤအဃိလဲၣ်. အဝဲသးက့ၣ် ပှၤအၢပှၤသီဒီး ပှၤလၢအပာ်ထီၣ်ထီအသးတဖၣ်န့ၣ် တမ့ၢ်လၢအဝဲသ့ၣ်မၤတၢ်အၢအဃိဘၣ် မ့ၢ်လၢ အဝဲသ့ၣ်မၤတၢ်ကဲထီၣ်လိၣ်ထီၣ်အဃိလီၤ. (စံးထီၣ်ပတြၢၤ ၇၃:၂-၉, ၁၁-၁၄) အဝဲသ့ၣ်ထူးထီၣ်တီၤထီၣ် ဒီးအိၣ်ဘၣ်ဝဲမုာ်မုာ်ခုၣ်ခုၣ် ဒီးတအိၣ်ဒီးတၢ်ကိၢ်တၢ်ဂီၤတဖၣ်ဘၣ်. ပှၤအၢပှၤသီသ့ၣ်တဖၣ် အတၢ်ကဲထီၣ်လိၣ်ထီၣ်န့ၣ် မၤသးအုးဝဲ ပှၤလၢအကွဲးဝဲထါစံးထီၣ်ပတြၢၤတဂၤအံၤ အသးလီၤ. အဃိ အတဲဝဲလၢ “ယမၤကဆှီယသး ဒီးသ့စီကွံာ်ယစုလၢ တၢ်ဒဲးဘးတအိၣ်ဘၣ်အပူၤန့ၣ် ဟဲလၢတၢ်ကလီကလီ အဂီၢ်လီၤ.” အဃိ ဖျါတြၢၢ်ကလာ်လၢ အဝဲတအဲၣ်ဒိးဘူၣ်ထီၣ်ဘါထီၣ် ယဟိဝၤယွၤလၢၤဘၣ်.
“ယဟိဝၤယွၤမၤပူၤဖျဲး ပှၤလၢအသးဂံၢ်ဘါလီၤစၢ်တဖၣ်”
၁၅ ဖး စံးထီၣ်ပတြၢၤ ၇၃:၁၆-၁၉, ၂၂-၂၅ တက့ၢ်. ပှၤလ့ၤဝံဖိတဂၤအံၤ “လဲၤနုာ်လၢ ယွၤအလီၢ်စီဆှံအပူၤလီၤ.” ဖဲအဝဲလဲၤလၢကစၢ်ယွၤအဟံၣ်အခါ အဝဲအိၣ်ဒီး ပှၤလၢအဘူၣ်ထီၣ်ဘါထီၣ် ယဟိဝၤယွၤအဃိ အသးမုာ်ထီၣ်ဝဲလီၤ. တကးဒံးဘၣ် အဆိကမိၣ်ထံတၢ်ဂ့ၢ်တၢ်ကျိၤ ဒီးအဃ့ဘါထုကဖၣ်တၢ် ဘၣ်ဃးဒီးအတၢ်အိၣ်သးလီၤ. လၢခံ အဝဲစးထီၣ်သ့ၣ်ညါဝဲလၢ အတၢ်ဆိကမိၣ်န့ၣ်ကမၣ်ဖးဒိၣ် ဒီးအတၢ်ရ့လိာ်သးဒီး ကစၢ်ယွၤန့ၣ် ဘူးကဟးဂီၤညါ. တကးဒံးဘၣ် အသ့ၣ်ညါစ့ၢ်ကီးဝဲ ပှၤအၢပှၤသီကဲထီၣ် “တၢ်လီၤတလ့ၣ်အလီၢ်” ဒီး အဝဲသ့ၣ်ကဟးဂီၤဝဲ “စီဖ့ကလ့ၤလၢ တၢ်ပျံၤတၢ်ဖုး” အပူၤလီၤ. ပှၤလ့ၤဝံဖိတဂၤအံၤ စးထီၣ်ထံၣ်တၢ်ဒ် ယဟိဝၤယွၤအသိးအဃိ အတသူၣ်အုးသးအုး ဒီးအတသးက့ၣ် ပှၤအၢပှၤသီတဖၣ်လၢၤဘၣ်. ဖဲအမၤဝဲဒ်န့ၣ်အခါ အဝဲက့ၤအိၣ်က့ၤဒီးတၢ်သးခု ဒီးတၢ်သူၣ်မံသးမုာ် ဒီးတဲဝဲလၢ “လၢယဟိဝၤယွၤအမဲာ်ညါန့ၣ် တဘၣ်ယသးလၢ ပှၤအိၣ်လၢဟီၣ်ခိၣ်ချၢ နီတဂၤဘၣ်.”
၁၆ ပမၤလိန့ၢ်ဘၣ် တၢ်မနုၤလဲၣ်. မ်ပသုတသးက့ၣ် ပှၤအၢပှၤသီတဂ့ၤ. အဝဲသ့ၣ်အတၢ်သးခုန့ၣ် ကလီၤမၢ်ကွံာ်ဝဲ ဒီးအဝဲသ့ၣ်တအိၣ်မူဘၣ်ဝဲ လီၤထူလီၤယိာ်ဘၣ်. (စံၣ်တဲၤတဲလီၤတၢ် ၈:၁၂, ၁၃) ပမ့ၢ်သးက့ၣ်အဝဲသ့ၣ်န့ၣ် အိၣ်ဒၣ်ပသးကဟးဂီၤ တကးဒံးဘၣ် ပတၢ်ရ့လိာ်သးဒီး ယဟိဝၤယွၤစ့ၢ်ကီး ကဟးဂီၤဝဲလီၤ. အဃိ ပမ့ၢ်တူၢ်ဘၣ်တၢ်ဒ် ပှၤလ့ၤဝံဖိတဂၤအံၤအသိးန့ၣ် ပကဘၣ်ဃုထံၣ်န့ၢ်တၢ်မၤစၢၤလၢ ယဟိဝၤယွၤအကလုၢ်ကထါအပူၤ ဒီးပကဘၣ်ဆဲးရ့ဒီး ပဒီပုၢ်ဝဲၢ်မုၣ်ခွါတဖၣ် လၢအအဲၣ်ယဟိဝၤယွၤန့ၣ်လီၤ. ပမ့ၢ်အဲၣ်ယဟိဝၤယွၤ အါန့ၢ်ဒံးတၢ်ခဲလၢာ်န့ၣ် ပကအိၣ်ဒီးတၢ်သးခုနီၢ်ကီၢ် ဒီးပကဆဲးအိၣ်ဘၣ်လၢ “တၢ်မူနီၢ်ကီၢ်” အကျဲဖီခိၣ်န့ၣ်လီၤ.—၁ တံၤမသ့း ၆:၁၉.
ကွၢ်လိမၤဒိး စီၤမိၤၡ့ အတၢ်နာ်
၅ နဟးဆှဲး “တၢ်မုာ်တၢ်ပၠီၣ် တစိၢ်တလီၢ်” ကသ့ဒ်လဲၣ်. ထီဘိန့ၣ် သ့ၣ်နီၣ်ထီၣ်လၢ တၢ်မၤလၢအကမၣ် လၢအမၤမုာ်ပသးန့ၣ် အမၤမုာ်ပသး သ့ထဲတစိၢ်တလီၢ်လီၤ. အိၣ်ဒီးတၢ်နာ် ဒီးနာ်လၢ “ဟီၣ်ခိၣ်အံၤ ဒီးဟီၣ်ခိၣ် အတၢ်သူၣ်လီသးကွံန့ၣ် ကလီၤမၢ်ကွံာ်ဝဲလီၤ.” (၁ ယိၤဟၣ် ၂:၁၅-၁၇) ဒီးပှၤမၤတၢ်ဒဲးဘးလၢ အတပီၢ်ယၢ်လီၤအသးတဖၣ် အကထံၣ်ဘၣ် တၢ်ကီတၢ်ခဲဒ်လဲၣ်န့ၣ် ဆိကမိၣ်ထံအီၤ. အဝဲသ့ၣ်န့ၣ် လီၤဂာ်ဒ် ပှၤအိၣ်လၢ “ဟီၣ်ခိၣ်လၢအဘျ့ အလိၤ ဒ်သိး . . . ကတူၢ်ဘၣ်တၢ်နးတၢ်ဖှီၣ် သတူၢ်ကလာ် ဒီးသံဝဲလီၤ.” (စံး ၇၃:၁၈, ၁၉) နမ့ၢ်ဘၣ် တၢ်ကွဲန့ၢ်လွဲန့ၢ်နၤ လၢနကမၤ ကမၣ်တၢ်န့ၣ် သံကွၢ်လီၤနသးလၢ ‘ယအဲၣ်ဒိးလၢ ယတၢ်အိၣ်မူ ကမၤအသး ဒ်လဲၣ်.’
တၢး၁၃ ၂/၁၅ ၂၅-၂၆ ¶၃-၅
ဒ်သိးနကဒိးန့ၢ်ဘၣ် တၢ်လၤကပီၤအဂီၢ် တဘၣ်ပျဲ တၢ်မၤတံာ်တာ်နၤ နီတမံၤတဂ့ၤ
၃ ပှၤကွဲး ထါစံးထီၣ်ပတြၢၤ နာ်ဝဲလၢ ယဟိဝၤယွၤ ကဖီၣ်ဃာ်အစုထွဲ ဒီးကဆှၢအီၤ ဆူတၢ်လၤကပီၤ. (ဖး စံးထီၣ်ပတြၢၤ ၇၃:၂၃ ၂၄.) ယဟိဝၤယွၤ မၤဝဲဒ်အံၤ လၢကျဲဒ်လဲၣ်. ယဟိဝၤယွၤ ဆှၢအခ့အပှၤလၢ အအိၣ်ဒီး တၢ်ဆီၣ်လီၤသးတဖၣ်လၢ တၢ်လၤကပီၤ ခီဖျိ အမၤလၤကပီၤ အဝဲသ့ၣ်လၢ ကျဲအါဘိ. ဒီးအဝဲမၤစၢၤအဝဲသ့ၣ် ဒ်သိးအဝဲသ့ၣ် ကနၢ်ပၢၢ်ထီၣ် အတၢ်ဘၣ်သးအဂီၢ်. (၁ ကရံၣ် ၂:၇) ဒီးအဝဲမၤလၤကပီၤ ပှၤလၢဒိကနၣ်အကလုၢ် ခီဖျိ အဟ့ၣ်အဝဲသ့ၣ် တၢ်ခွဲးတၢ်ယာ်လၢ ကအိၣ်ဒီး တၢ်ရ့လိာ်သးဒီးအီၤ ဘူးဘူးတံၢ်တံၢ်.—ယၤ ၄:၈.
၄ ယဟိဝၤယွၤ ဟ့ၣ်လီၤစ့ၢ်ကီး အခ့အပှၤတဖၣ်လၢ တၢ်လုၢ်ဒိၣ်ပှ့ၤဒိၣ်လၢအမ့ၢ် တၢ်စံၣ်တဲၤတဲလီၤတၢ်မၤ. (၂ ကရံၣ် ၄:၁, ၇) ဒီးတၢ်စံၣ်တဲၤတဲလီၤတၢ်မၤအံၤန့ၣ် ကဲထီၣ် တလၤကပီၤလၢ အဝဲသ့ၣ်အဂီၢ်. ပှၤလၢအပၣ်ဃုာ်လၢ တၢ်စံၣ်တဲၤတဲလီၤတၢ်မၤ လၢကစံးထီၣ်ပတြၢၤ ယဟိဝၤယွၤ ဒီးကမၤစၢၤပှၤဂၤအဂီၢ်န့ၣ် ယဟိဝၤယွၤ အၢၣ်လီၤအဝဲသ့ၣ်လၢ “ပှၤလၢအပာ်ဖျါထီၣ် တၢ်ပာ်ကဲလၢ ယဖီခိၣ်န့ၣ် ယကပာ်ဖျါထီၣ် တၢ်ပာ်ကဲလၢ အဝဲသ့ၣ် အဖီခိၣ်လီၤ.” (၁ မူၤ ၂:၃၀) ဒီးကစၢ်ယွၤ အခ့အပှၤတဖၣ်န့ၣ် အဒိးန့ၢ်ဘၣ်ဝဲ တၢ်လၤကပီၤခီဖျိ အဒိးန့ၢ်ဘၣ် မံၤဂ့ၤသၣ်ဂ့ၤလၢ ယဟိဝၤယွၤ ဒီးကစၢ်ယွၤအခ့အပှၤတဖၣ် အမဲာ်ညါ.—ကတိၤ ၁၁:၁၆; ၂၂:၁.
၅ ပှၤလၢအ “မုၢ်လၢ်တၢ်လၢ ယဟိဝၤယွၤအအိၣ် ဒီးအိၣ်မူပိာ်ထွဲ အကျဲ” န့ၣ်အအိၣ်ဒီး တၢ်မုၢ်လၢ်လၢ ခါဆူညါအဂီၢ်ဒ်လဲၣ်. လံာ်စီဆှံ အၢၣ်လီၤအဝဲသ့ၣ်လၢ “အဝဲ [ယဟိဝၤယွၤ] ကပာ်ထီၣ်ထီသု ဒီးသုကန့ၢ်သါဘၣ် ဟီၣ်ခိၣ်လီၤ. ဖဲပှၤအၢပှၤသီတဖၣ် ဘၣ်တၢ်မၤလီၤမၢ်ကွံာ်အီၤအခါ သုကထံၣ်ဘၣ်လီၤ.” (စံး ၃၇:၃၄) အဃိ အဝဲသ့ၣ် အိၣ်ဒီးတၢ်မုၢ်လၢ်လၢ ကဒိးန့ၢ်ဘၣ်ဝဲ တၢ်လၤကပီၤ ဒိၣ်ဒိၣ်မုၢ်မုၢ် လၢအမ့ၢ်ဝဲ တၢ်မူအထူအယိာ်.—စံး ၃၇:၂၉.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
it-2 ၂၄၀
လဝံးအသၤ
စံးထီၣ်ပတြၢၤ ၇၄ ပာ်ဖျါထီၣ်ဝဲ ကစၢ်ယွၤ မၤပူၤဖျဲးဝဲ အပှၤအဂီၢ်မုၢ်အဂ့ၢ်. ဒီးအဆၢဖိ ၁၃ ဒီး ၁၄ န့ၣ်အသူဝဲအဒိလၢ ကပာ်ဖျါထီၣ်ဝဲ ကစၢ်ယွၤမၤပူၤဖျဲးဝဲ ပှၤအံၣ်စရ့လးဖိတဖၣ်လၢ ကီၢ်အဲၤကူပတူးအခါ. ဖဲအံၤန့ၣ် “တၢ်သးသမူဖးဒိၣ်လၢ အအိၣ်လၢပီၣ်လဲၣ်ပူၤတဖၣ်” န့ၣ်ဘၣ်တၢ်ပာ်ဖျါထီၣ်အီၤလၢ အမ့ၢ်ဝဲ “လဝံးအသၤ.” အဃိ “တၢ်မၤသဘှံး လဝံးအသၤအခိၣ်သၣ်ဃံတဖၣ်” န့ၣ်ကအဲၣ်ဒိးတဲဝဲ တၢ်မၤဟးဂီၤကွံာ် စီၤပၤဖၤရိၤ ဒီးအသုးမုၢ်သံၣ်ဘိတဖၣ် ဖဲပှၤအံၣ်စရ့လးဖိတဖၣ် ဟးထီၣ်လၢ ကီၢ်အဲၤကူပတူးအခါ. လၢ The Aramaic Targums အပူၤန့ၣ် တၢ်ကတိၤလၢ အမ့ၢ် “လဝံးအသၤ အခိၣ်သၣ်ဃံ” အလီၢ်န့ၣ် အသူဝဲတၢ်ကတိၤလၢမ့ၢ် ဖၤရိၤအပှၤလၢ အဂံၢ်ဆူၣ်တဖၣ်. (ထိၣ်သတြီၤဒီး ဃ့း ၂၉:၃-၅, ဖဲအံၤန့ၣ် စီၤပၤဖၤရိၤန့ၣ် ဘၣ်တၢ်ပာ်ဖျါထီၣ်အီၤဒ် “ပီၣ်လဲၣ် အတၢ်သးသမူဖးဒိၣ်” လၢအအိၣ်လၢ ထံကျိနံၤလါအပူၤ. ကွၢ်စ့ၢ်ကီး ဃ့း ၃၂:၂.) လဝံးအသၤ (LXX, “ဂုၢ်”) လၢ ယၡါယၤ ၂၇:၁ အပူၤန့ၣ် ဖျါလၢအအဲၣ်ဒိး ဒိလီၤဝဲ တၢ်ပၢတၢ်ပြး မ့တမ့ၢ် တၢ်ကရၢကရိတခါလၢ အဒိၣ်စိလၢ ဟီၣ်ခိၣ်ဒီဘ့ၣ် ဒီးပှၤတဂၤလၢ အဘၣ်တၢ်ဒိလီၤအီၤလၢ “ဂုၢ်” ဒီး “ပယိၤ” န့ၣ်ဒိၣ်စိလၢအဖီခိၣ်. (လီၣ် ၁၂:၉) ဝံအတၢ်စံးပာ်အံၤ အတဲဝဲ ဘၣ်ဃးဒီး ပှၤအံၣ်စရ့လးဖိတဖၣ် ကဟဲက့ၤဘၣ်လၢ အထံအကီၢ်အဂ့ၢ်. အဃိ လဝံးအသၤလၢ ယဟိဝၤယွၤ ‘ကကျီကွံာ်အီၤ’ အကျါန့ၣ် ကပၣ်ဃုာ်ဒီး ဘၤဘူၤလိၣ်စ့ၢ်ကီး. ဘၣ်ဆၣ် ဖဲအဆၢဖိ ၁၂ ဒီး ၁၃ န့ၣ် ပာ်ဖျါထီၣ်ဝဲလၢ လဝံးအသၤန့ၣ် မ့ၢ်စ့ၢ်ကီး အၤၡူၢ် ဒီးအဲၤကူပတူး. အဃိ ဖဲအံၤန့ၣ် ဖျါလၢ လဝံးအသၤန့ၣ် အဲၣ်ဒိးတဲဝဲ တၢ်ကရၢကရိ မ့တမ့ၢ် တၢ်ပၢတၢ်ပြးတခါလၢ အဒိၣ်စိလၢ ဟီၣ်ခိၣ်ဒီဘ့ၣ် လၢအထီဒါဝဲ ယဟိဝၤယွၤ ဒီးအပှၤဂီၢ်မုၢ်.
ijwbq ၈၉
တၢ်ဘူၣ်တၢ်ဘါခဲလၢာ်န့ၣ် မ့ၢ်အဒ်သိးသိးဧါ, မ့ၢ်ကစၢ်ယွၤ တူၢ်လိာ်ဝဲခဲလၢာ်ဧါ
လံာ်စီဆှံ တဲဝဲလၢ တၢ်ဘူၣ်တၢ်ဘါခဲလၢာ်န့ၣ် တဒ်သိးဘၣ်. လၢလံာ်စီဆှံအပူၤ ပထံၣ်ဘၣ်လၢ တၢ်ဘူၣ်တၢ်ဘါလၢ ကစၢ်ယွၤ တဘၣ်သူၣ်ဘၣ်သးဝဲဘၣ်န့ၣ် အိၣ်ဝဲအါမး. ဘၣ်မနုၤအဃိ ကစၢ်ယွၤ တတူၢ်လိာ်ဝဲဘၣ်လဲၣ်န့ၣ် တၢ်ဂ့ၢ်အိၣ်ဝဲ ခံထံၣ်.
တၢ်ဂ့ၢ် ၁– တၢ်ဘူၣ်ထီၣ်ဘါထီၣ် ယွၤလၢအကမၣ်တဖၣ်
ဘၣ်ဃးဒီး တၢ်ဘူၣ်ထီၣ်ဘါထီၣ် ယွၤလၢအကမၣ်တဖၣ်န့ၣ် လံာ်စီဆှံသူဝဲ တၢ်ကတိၤလၢအမ့ၢ် “တၢ်ကလီကလီ, ဒီးတၢ်လၢအတဂိာ်တသီၣ်ဘၣ်” လီၤ. (ယံးရမံယၤ ၁၀:၃-၅; ၁၆:၁၉, ၂၀) ယဟိဝၤယွၤ မၤလိာ်ပှၤအံၣ်စရ့လးဖိ လၢပျၢၤတဖၣ်လၢ “အိၣ်ဒီးကစၢ်အဂုၤအဂၤတဖၣ် လၢယမဲာ်ညါတဂ့ၤ.” (၂ မိၤၡ့ ၂၀:၃, ၂၃; ၂၃:၂၄) ဖဲပှၤအံၣ်စရ့လးဖိတဖၣ် ဘူၣ်ထီၣ်ဘါထီၣ်ဝဲ ယွၤအဂၤတဖၣ်အခါ “ယွၤအသးထီၣ်ကဲၤထီၣ်” လီၤ.—၄ မိၤၡ့ ၂၅:၃; ၃ မိၤၡ့ ၂၀:၂; စံၣ်ညီၣ်ကွီၢ် ၂:၁၃, ၁၄.
ကစၢ်ယွၤ အတၢ်ပာ်သူၣ်ပာ်သးလၢ ဘၣ်ဃးဒီး တၢ်ဘူၣ်ထီၣ်ဘါထီၣ် “တၢ်လၢပှၤကိးအီၤလၢ ကစၢ်တဖၣ်” န့ၣ် တဆီတလဲဒံးဘၣ်. (၁ ကရံၣ်သူး ၈:၅, ၆; ကလၤတံ ၄:၈) ကစၢ်ယွၤ မၤလိာ်ဝဲလၢ ပှၤလၢအအဲၣ်ဒိး ဘူၣ်ထီၣ်ဘါထီၣ်အီၤန့ၣ် တဘၣ်ရ့ဒီးပှၤလၢ အမၤဝဲ တၢ်ဘူၣ်တၢ်ဘါကမၣ်တဖၣ် အလုၢ်အလၢ်လၢၤဘၣ်. ကစၢ်ယွၤမၢပှၤ “ဟးထီၣ်လၢအကျါ, ဒီးအိၣ်လီၤဆီ” လီၤ. (၂ ကရံၣ်သူး ၆:၁၄-၁၇) တၢ်ဘူၣ်တၢ်ဘါခဲလၢာ် မ့ၢ်ဒ်သိးသိး ဒီးကစၢ်ယွၤ မ့ၢ်တူၢ်လိာ်အီၤန့ၣ် တမ့ၢ်လၢ ကစၢ်ယွၤ ကမၤလိာ်ဝဲဒ်န့ၣ်ဘၣ်.
တၢ်ဂ့ၢ် ၂– တၢ်ဘူၣ်ထီၣ်ဘါထီၣ် ယွၤလၢအမ့ၢ်အတီ လၢကျဲလၢအတတူၢ်လိာ်ဝဲဘၣ်
တဘျီတခီၣ် ပှၤအံၣ်စရ့လးဖိတဖၣ် ဖဲအဝဲသ့ၣ် ဘူၣ်ထီၣ်ဘါထီၣ် ကစၢ်ယွၤအခါ အဝဲသ့ၣ် မၤထွဲဝဲတၢ်ဘူၣ်တၢ်ဘါလၢ အကမၣ်တဖၣ် အတၢ်စူၢ်တၢ်နာ် ဒီးအလုၢ်အလၢ်လီၤ. ဘၣ်ဆၣ် ယဟိဝၤယွၤ တတူၢ်လိာ် အဝဲသ့ၣ် အတၢ်ဘူၣ်ထီၣ်ဘါထီၣ် လၢအယီကျဲၣ်ကျီအသးဒီး တၢ်ဘူၣ်တၢ်ဘါ အကမၣ်တဖၣ်န့ၣ်ဘၣ်. (၂ မိၤၡ့ ၃၂:၈; ၅ မိၤၡ့ ၁၂:၂-၄) ယ့ၣ်ၡူးပာ်ဒ့ၣ်ပာ်ကမၣ် တၢ်ဘူၣ်တၢ်ဘါခိၣ်နၢ် ဖဲအစိၤတဖၣ်, မ့ၢ်လၢအဝဲသ့ၣ် ဘူၣ်ထီၣ်ဘါထီၣ်ကစၢ်ယွၤ ဒ်ကျဲလၢ တဘၣ်ကစၢ်ယွၤအသး အဃိလီၤ. အဝဲသ့ၣ် ပာ်မၤအသးဒ် အအဲၣ်ထူအဲၣ်ယွၤ ဘၣ်ဆၣ် အဝဲသ့ၣ် “ပာ်လီၤတဲာ်ကွံာ်” “တၢ်သိၣ်တၢ်သီလၢ အဃၢဒိၣ်တက့ၢ်တဖၣ်န့ၣ်, တၢ်စံၣ်ညီၣ်ဒီးတၢ်သးကညီၤ ဒီးတၢ်နာ်တဖၣ်” လီၤ.—မးသဲ ၂၃:၂၃.
ဒ်န့ၣ်အသိး မုၢ်မဆါတနံၤအံၤ ကစၢ်ယွၤ ဘၣ်သူၣ်ဘၣ်သးဝဲ ထဲဒၣ်တၢ်ဘူၣ်တၢ်ဘါလၢ အဒိးသန့ၤထီၣ်အသး လၢတၢ်မ့ၢ်တၢ်တီလီၤ. ဒီးတၢ်မ့ၢ်တၢ်တီအံၤ ပထံၣ်ဘၣ်အီၤလၢ လံာ်စီဆှံပူၤလီၤ. (ယိၤဟၣ် ၄:၂၄; ၁၇:၁၇; ၂ တံၤမသ့း ၃:၁၆, ၁၇) တၢ်ဘူၣ်တၢ်ဘါ အတၢ်သိၣ်လိတဖၣ်လၢ အထီဒါလိာ်အသးဒီး လံာ်စီဆှံန့ၣ် မၤယံၤထီၣ်ဝဲ ပှၤဂၤဒီးကစၢ်ယွၤလီၤ. တၢ်ဘူၣ်တၢ်ဘါ အတၢ်သိၣ်လိ ဒ်သိးဒီး ယွၤသၢဂၤတဂၤဃီ, ပှၤကလၤလၢအသံတသ့ဘၣ် ဒီးတၢ်မၤနးမၤဖှီၣ် လီၤထူလီၤယိာ်န့ၣ် ပှၤအါဂၤ ဆိကမိၣ်ဝဲလၢ အမ့ၢ်လံာ်စီဆှံအတၢ်သိၣ်လိ ဘၣ်ဆၣ်သနာ်က့ တၢ်သိၣ်လိတဖၣ်အံၤန့ၣ် ဟဲလီၤစၢၤလၢ တၢ်ဘူၣ်တၢ်ဘါ အကမၣ်လီၤ. တၢ်ဘူၣ်တၢ်ဘါလၢ အဆီၣ်ထွဲဝဲ တၢ်သိၣ်လိတဖၣ်အံၤန့ၣ် အပာ်ဒိၣ်ဝဲ တၢ်ဘူၣ်တၢ်ဘါ အလုၢ်အလၢ် ဒိၣ်န့ၢ်ဒံး ကစၢ်ယွၤ အတၢ်ထံၣ်ဒံးအဃိ အဝဲသ့ၣ်မ့ၢ်ဝဲ “တၢ်ကလီကလီ” ဒီးအဘျုးတအိၣ်ဘၣ်.—မၢ်ကူး ၇:၇, ၈.
ကစၢ်ယွၤသးဘၣ်အၢဝဲ တၢ်ဘူၣ်တၢ်ဘါလၢ အပာ်မၤအသးတဖၣ်လီၤ. (တံတူး ၁:၁၆) တၢ်ဘူၣ်တၢ်ဘါလၢ အမၤစၢၤပှၤဂၤ ဒ်သိး ကဘူၣ်ထီၣ်ဘါထီၣ် ကစၢ်ယွၤန့ၣ် ကဘၣ်မ့ၢ်ဝဲ တၢ်ဘူၣ်တၢ်ဘါလၢ အဟ့ၣ်ဂံၢ်ဟ့ၣ်ဘါပှၤဂၤ ဒ်သိးကအိၣ်မူဝဲ ဂ့ၤဂ့ၤဘၣ်ဘၣ်ကိးနံၤဒဲး ဒီးတမ့ၢ်ဝဲ တၢ်ဘူၣ်တၢ်ဘါလၢ အပာ်ဒိၣ်ဝဲ လုၢ်လၢ်ထူသနူတဖၣ်ဘၣ်. အဒိ, လံာ်စီဆှံတဲဝဲလၢ “ပှၤတဂၤဂၤ မ့ၢ်ဆိကမိၣ်လၢ အမ့ၢ်ပှၤဘါယွၤဖိဒီး, မ့ၢ်တမၤနၢၤဘၣ်အပျ့ၤဘၣ်, မ့မ့ၢ်အလီလီၤအသးဒီး, အဝဲဒၣ် အတၢ်ဘူၣ်ထီၣ်ဘါထီၣ်န့ၣ် မ့ၢ်တၢ်ကလီကလီလီၤ. တၢ်ဘူၣ်ထီၣ်ဘါထီၣ် အစီအဆှံ, ဒီးတဘၣ်အၢဘၣ်သီဘၣ်တမံၤ မ့ၢ်အအံၤ, တၢ်အိၣ်သကိး ပှၤဖိၣ်ဃဲဒီးမုၣ်ကမဲ လၢအဘၣ်တၢ်နးတၢ်ဖှီၣ်အပူၤ, ဒီးတၢ်ပလီၢ်အသးဒ်သိး အသုတဘၣ်တၢ်ဃံၣ်တၢ်ဃူးလၢ ဟီၣ်ခိၣ်တဂ့ၤန့ၣ်လီၤ.” (ယၤကိာ် ၁:၂၆, ၂၇) “တၢ်ဘူၣ်ထီၣ်ဘါထီၣ် အစီအဆှံ” န့ၣ်လံာ်စီဆှံ ခ့ကၠ့(မ်)ဘၢၡၢၤ ပာ်ဖျါထီၣ်ဝဲလၢ တၢ်ဘူၣ်တၢ်ဘါ လၢအကဆှီ, မ့ၢ်လၢတၢ်ဘူၣ်တၢ်ဘါအံၤန့ၣ် ကဆှီဝဲ ဒီးတၢ်ပာ်မၤသး တအိၣ်ဘၣ်အဃိလီၤ.
လါအီကူး ၁၉-၂၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၇၅-၇၇
ဘၣ်မနုၤအဃိ ပတဘၣ်ပာ်ကဖၢလၢ ပသးဘၣ်လဲၣ်
နကထံၣ်ဘၣ် ပှၤလၢအမၤယဟိဝၤယွၤ အတၢ်မၤ ဒီးပှၤလၢတမၤဘၣ်တဖၣ် အတၢ်လီၤဆီလိာ်အသး
၄ စီၤပီလူးတဲဝဲလၢ ပှၤအါဂၤ ကအဲၣ်လီၤဒၣ်ထဲအသး ဒီးကမ့ၢ်ပှၤအဲၣ်ကျိၣ်အဲၣ်စ့ဝံၤ တဲကဒီးဝဲလၢ ပှၤကညီတဖၣ်ကမ့ၢ် ပှၤခိးထဲသိးလိာ်အသး, ပှၤပာ်ထီၣ်ထီအသး ဒီးပှၤပာ်အသး ကဖၢလၢစ့ၢ်ကီးလီၤ. ပှၤလၢအိၣ်ဒီးတၢ်ပာ်သူၣ်ပာ်သး ဒ်အံၤတဖၣ်န့ၣ် အဝဲသ့ၣ်ဆိကမိၣ်လီၤအသးလၢ အဂ့ၤန့ၢ်ပှၤဂၤ ခီဖျိလၢအက့ၢ်အဂီၤ, အတၢ်သ့တၢ်ဘၣ်, အတၢ်အိၣ်တၢ်ယၢၤ မ့တမ့ၢ် အလီၢ်အလၤအဃိလီၤ. ပှၤလၢအိၣ်ဒီးတၢ်ပာ်သူၣ်ပာ်သးဒ်အံၤတဖၣ်န့ၣ် အဲၣ်ဒိးလၢပှၤကပာ်ဒိၣ်အီၤလီၤ. ပှၤကူၣ်ဘၣ်ကူၣ်သ့တဂၤ တဲဝဲလၢ– ‘ပှၤလၢအပာ်ထီၣ်ထီအသးန့ၣ် လီၤဂာ်ဒ်သိး အဘူၣ်ထီၣ်ဘါထီၣ် အနီၢ်ကစၢ်လီၤ.’ ပှၤတနီၤတဲဝဲလၢ တၢ်ပာ်ထီၣ်ထီသးန့ၣ် မ့ၢ်တၢ်လၢအလီၤသးဘၣ်အၢတုၤဒၣ်လဲာ် ပှၤလၢအပာ်ထီၣ်ထီအသးတဖၣ်ဒၣ်လဲာ် မ့ၢ်ထံၣ်ဝဲ ပှၤအဂၤပာ်ထီၣ်ထီအသးန့ၣ် အဝဲသ့ၣ်သးဟ့ဝဲလီၤ.
၅ ယဟိဝၤယွၤသးဟ့ဝဲ တၢ်ပာ်ထီၣ်ထီသး မ့တမ့ၢ် ပှၤလၢအ “မဲာ်ကွၢ်တၢ်အိၣ်ဒီး တၢ်ပာ်ထီၣ်ထီသး” န့ၣ်လီၤ. (ကတိၤဒိ ၆:၁၆, ၁၇, ခ့ခါစှီၤကျိာ်) တကးဒံးဘၣ် တၢ်ပာ်ထီၣ်ထီသးန့ၣ် ထုးယံၤထီၣ်ပှၤဒီးကစၢ်ယွၤလီၤ. (စံးထီၣ်ပတြၢၤ ၁၀:၄) တၢ်ပာ်ထီၣ်ထီသးန့ၣ် မ့ၢ်ဝဲမုၣ်ကီၤလံၢ်အတၢ်ပာ်သူၣ်ပာ်သးလီၤ. (၁ တံၤမသ့း ၃:၆) လီၤသးအုးဒိၣ်မးလၢ ယွၤအခ့အပှၤလၢ အိၣ်ဒီးတၢ်သးတီတနီၤဒၣ်လဲာ် ကဲထီၣ်ပှၤလၢအပာ်ထီၣ်ထီအသးသ့ဝဲလီၤ. အဒိ, ပှၤယူဒၤဖိအစီၤပၤဧူးစံယါန့ၣ် အိၣ်ဒီးတၢ်သးတီအနံၣ်အါမးလီၤ. ဘၣ်ဆၣ်လံာ်စီဆှံတဲဝဲလၢ– “တုၤအဆူၣ်ထီၣ်ဒီး, အသးပာ်ထီၣ်ထီအသးတုၤ အတုၤလၢတၢ်ဟးဂီၤလီၤ. အဂ့ၢ်ဒ်အံၤ, မၤကမၣ်ယွၤ, အကစၢ်, ဒီးလဲၤနုာ်လၢယွၤအနူၢ်ပူၤ ဒ်သိးအကဆိၣ်ကဲၤတၢ်နၢမူလၢ တၢ်လုၢ်လီၢ်ဆိၣ်ကဲၤတၢ်နၢမူအဖီခိၣ်လီၤ.” နီၢ်နီၢ်န့ၣ် အတၢ်ခွဲးတၢ်ယာ်တအိၣ်လၢ ကမၤဝဲဒ်န့ၣ်ဘၣ်. လၢခံ စီၤပၤဃံးစကံယၤစ့ၢ်ကီး အိၣ်ဒီးတၢ်ပာ်ထီၣ်ထီသး တစိၢ်တလီၢ်လီၤ.—၂ ကွဲးနီၣ်တၢ် ၂၆:၁၆; ၃၂:၂၅, ၂၆.
တၢ်လီၤလးလၢ ယ့ၣ်ၡူးမၤဝဲန့ၣ် ပန့ၢ်ဘၣ်တၢ်မၤလိဒ်လဲၣ်
၁၁ ယ့ၣ်ၡူးမၤကဲထီၣ်ထံလၢ စပံးထံန့ၣ် ပန့ၢ်ဘၣ်တၢ်မၤလိဒ်လဲၣ်. ပမၤလိန့ၢ်ဘၣ် တၢ်ဆီၣ်လီၤသး. ယ့ၣ်ၡူးတပာ်ထီၣ်ထီသးလၢ အမၤတၢ်လီၤလးသ့အဃိဘၣ်. အမၤတၢ်မ့ၢ်ကဲထီၣ် တမံၤမံၤနာ်က့ အတပတြၢၤလီၤအသး နီတဘျီဘၣ်. ယ့ၣ်ၡူးပာ်ဖျါထီၣ် တၢ်ဆီၣ်လီၤသး ဒီးဟ့ၣ်တၢ်လၤကပီၤခဲလၢာ်လၢ အပါအအိၣ်ထီဘိ. (ယိၤဟၣ် ၅:၁၉, ၃၀; ၈:၂၈) ပမ့ၢ်ကွၢ်လိ ယ့ၣ်ၡူးန့ၣ် ပကဆီၣ်လီၤသး ဒီးပမၤတၢ်မ့ၢ်ကဲထီၣ် တမံၤမံၤန့ၣ် ပတတဲဂ့ၤလီၤပသး ဒ်သိးပှၤကထံၣ်ဒိၣ်ပှၤအဂီၢ်ဘၣ်. ပမ့ၢ်မၤဘၣ် ယဟိဝၤယွၤအတၢ်မၤလၢ အလီၤဆီတမံၤမံၤန့ၣ် ပတဘၣ် ပတြၢၤလီၤပသးဘၣ်, ဘၣ်ဆၣ် ပကဘၣ်ပတြၢၤလၢ ယဟိဝၤယွၤဟီ. (ယံးရမံယၤ ၉:၂၃, ၂၄) ယဟိဝၤယွၤ မ့ၢ်တမၤစၢၤပှၤဘၣ်န့ၣ် ပမၤတၢ် တကဲထီၣ်နီတမံၤဘၣ်. အဃိ ဖဲပမၤတၢ်ကဲထီၣ် တမံၤဂ့ၤတမံၤဂ့ၤန့ၣ် ပကဘၣ်ဟ့ၣ် တၢ်လၤကပီၤ ခဲလၢာ်လၢ ယဟိဝၤယွၤအအိၣ်.—၁ ကရံၣ်သူး ၁:၂၆-၃၁.
၁၂ ပကွၢ်လိ ယ့ၣ်ၡူးတၢ်ဆီၣ်လီၤသး သ့လၢအဂၤတခါဒံး. ဆိမိၣ်ကွၢ် တၢ်အဒိတခါ. ဒီပုၢ်ဝဲၢ်ခွါသးစၢ်လၢ အကဲတၢ်အိၣ်ဖှိၣ်အပှၤမၤစၢၤတၢ်တဂၤ ကဘၣ်ဟ့ၣ် ကမျၢၢ်တၢ်စံၣ်တဲၤတဲလီၤ အဆိကတၢၢ်တဘျီအဃိ တၢ်အိၣ်ဖှိၣ်သးပှၢ်တဂၤ မၤစၢၤအီၤလၢ အကကတဲာ်ကတီၤ အတၢ်စံၣ်တဲၤတဲလီၤ. ခီဖျိလၢ တၢ်အိၣ်ဖှိၣ်သးပှၢ် မၤစၢၤအီၤဂ့ၤဂ့ၤအဃိ အဟ့ၣ်တၢ်စံၣ်တဲၤတဲလီၤ ဂ့ၤဒိၣ်မး ဒီးတၢ်အိၣ်ဖှိၣ်ဖိတဖၣ် န့ၢ်ဂံၢ်န့ၢ်ဘါဒိၣ်မး. တၢ်အိၣ်ဖှိၣ်ဝံၤဘျီ ဒီပုၢ်ဝဲၢ်တဂၤ ဟဲလၢတၢ်အိၣ်ဖှိၣ်သးပှၢ်အအိၣ် ဒီးတဲအီၤလၢ ‘ဒီပုၢ်ဝဲၢ်ခွါတဂၤအံၤ ဟ့ၣ်တၢ်စံၣ်တဲၤတဲလီၤ ဖၣ်ဂ့ၤညါနီၤ.’ ဖဲန့ၣ် မ့ၢ်တၢ်အိၣ်ဖှိၣ်သးပှၢ်တဂၤန့ၣ် ကတဲလၢ ‘မ့ၢ်, သနာ်က့ ယဘၣ်မၤစၢၤအီၤ ဖၣ်ယံာ်ညါ’ န့ၣ်ဧါ. မ့တမ့ၢ် အကဆီၣ်လီၤသး ဒီးတဲလၢ ‘မ့ၢ်ဒၢး, အမၤဝဲဂ့ၤဒိၣ်မး ယသးခုစၢၤအီၤစ့ၢ်ကီး’ န့ၣ်ဧါ. ပမ့ၢ်အိၣ်ဒီးတၢ်ဆီၣ်လီၤသးန့ၣ် ဖဲပမၤစၢၤပှၤဂၤလၢ အမၤတၢ်ကဲထီၣ် တမံၤမံၤအခါ ပတပတြၢၤလီၤ ပနီၢ်ကစၢ်သးဘၣ်. ပသ့ၣ်ညါလၢ ယဟိဝၤယွၤထံၣ်ဝဲ ဒီးပာ်လုၢ်ပာ်ပှ့ၤ တၢ်လၢပမၤအဃိ ပသးခုလံ. (ထိၣ်သတြီၤဒီး မးသဲ ၆:၂-၄; ဧ့ၤဘြံၤ ၁၃:၁၆) ပမ့ၢ်ကွၢ်လိ ယ့ၣ်ၡူး ဒီးအိၣ်ဒီး တၢ်ဆီၣ်လီၤသးန့ၣ် ပသ့ၣ်ညါလၢ ယဟိဝၤယွၤ ကသးခုနီၢ်ကီၢ်.—၁ ပ့းတရူး ၅:၆.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၆ ၇/၁၅ ၁၁ ¶၃
လံာ်စီဆှံ အတၢ်ပာ်ဖျါလၢ လံာ်စံးထီၣ်ပတြၢၤ သၢဘ့ၣ်တဘ့ၣ် ဒီးလွံၢ်ဘ့ၣ်တဘ့ၣ်အဂီၢ်
၇၆:၁၀—“ပှၤဟီၣ်ခိၣ်ဖိ အတၢ်သူၣ်ဒိၣ်သးဖျိး” န့ၣ်အစံးထီၣ်ပတြၢၤ ယဟိဝၤယွၤ ကသ့ဒ်လဲၣ်. ခီဖျိလၢ ပကဲကစၢ်ယွၤ အခ့အပှၤအဃိ ကစၢ်ယွၤ မ့ၢ်ဟ့ၣ်အခွဲးလၢ ပှၤကသးထီၣ်ပှၤန့ၣ် အကဲဘျုးဝဲသ့. တၢ်ကီတၢ်ခဲ တခါဂ့ၤတခါဂ့ၤလၢ ပထံၣ်ဘၣ်အီၤန့ၣ် အကဲထီၣ်တၢ်မၤလိလၢပဂီၢ်သ့. ဒီးတဘျီတခီၣ်န့ၣ် ယဟိဝၤယွၤ ဟ့ၣ်အခွဲးလၢ ပကထံၣ်ဘၣ် တၢ်ကီတၢ်ခဲ ဒ်သိးကသိၣ်လိပှၤအဂီၢ်. (၁ ပ့းတရူး ၅:၁၀) ‘အဝဲသ့ၣ်အတၢ်သူၣ်ဒိၣ်သးဖျိးလၢ အအိၣ်တ့ၢ်ဒံးန့ၣ် ကကဲထီၣ် တၢ်မၤလၤကပီၤနၤလီၤ.’ ပမ့ၢ်ထံၣ်ဘၣ် တၢ်ကီတၢ်ထဲ တုၤလၢပသံဟီမီၤ. ပမ့ၢ်ထံၣ်ဘၣ်ဒီး တၢ်အိၣ်သးဒ်အံၤန့ၣ် ပှၤလၢအထံၣ်ဝဲလၢ ပအိၣ်ဒီးတၢ်သးတီ တုၤလၢအကတၢၢ်န့ၣ် အဝဲသ့ၣ် စံးထီၣ်ပတြၢၤ ကစၢ်ယွၤသ့အဃိ အကဲထီၣ်တၢ်မၤလၤကပီၤလၢ ကစၢ်ယွၤအဂီၢ်သ့စ့ၢ်ကီး.
လါအီကူး ၂၆–လါစဲးပတ့ဘၢၣ် ၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ စံးထီၣ်ပတြၢၤ ၇၈
ပှၤအံၣ်စရ့လးဖိလၢ အသးတတီဘၣ်အဒိအတဲာ်န့ၣ် ကဲထီၣ်တၢ်ဟ့ၣ်ပလီၢ် လၢပဂီၢ်
တၢး၉၆ ၁၂/၁ ၂၉-၃၀
ဘၣ်မနုၤအဃိ ပဘၣ် “သ့ၣ်နီၣ်ထီၣ်က့ၤ မုၢ်နံၤလၢ အပူၤကွံာ်တဖၣ်” လဲၣ်
တၢ်ဒဲးဘးလၢ ပှၤအံၣ်စရ့လးဖိတဖၣ် မၤဘၣ်ဝဲခဲအံၤခဲအံၤန့ၣ် မ့ၢ်ဝဲ တၢ်သးပ့ၤနီၣ်ကွံာ် တၢ်လၢကစၢ်ယွၤ မၤန့ၢ်အဝဲသ့ၣ်. အဃိ တၢ်ကဲထီၣ်အသးဒီးအဝဲသ့ၣ် ဒ်လဲၣ်. လံာ်စီဆှံတဲဝဲလၢ “အဝဲသ့ၣ် မၤကွၢ်ကစၢ်ယွၤ တဘျီဝံၤတဘျီ ဒီးအဝဲသ့ၣ် မၤသးအုး အံၣ်စရ့လး အကစၢ်ယွၤလၢ အစီဆှံတဂၤလီၤ. အဝဲသ့ၣ် တသ့ၣ်နီၣ်ထီၣ်က့ၤ ကစၢ်ယွၤ အတၢ်စိတၢ်ကမီၤ ဒီးမုၢ်နံၤလၢ ကစၢ်ယွၤ မၤပူၤဖျဲး အဝဲသ့ၣ်လၢ ဒုၣ်ဒါအစုပူၤန့ၣ်ဘၣ်.” (စံး ၇၈:၄၁, ၄၂) ဒီးလၢခံ ခီဖျိလၢ အဝဲသ့ၣ် သးပ့ၤနီၣ်ကွံာ် ကစၢ်ယွၤ အတၢ်မၤလိာ်တဖၣ်အဃိ ယဟိဝၤယွၤ ညိကွံာ်အဝဲသ့ၣ်.—မးသဲ ၂၁:၄၂, ၄၃.
ပှၤကွဲးထါစံးထီၣ်ပတြၢၤ ပာ်လီၤန့ၢ်ပှၤ တၢ်အဒိလၢအဂ့ၤ. အဝဲတဲဝဲလၢ “ယဟိဝၤယွၤဧၢ, ယကသ့ၣ်နီၣ်ထီၣ်က့ၤ တၢ်လၢနမၤတဖၣ် ဒီးယကသ့ၣ်နီၣ်ထီၣ်က့ၤ နတၢ်မၤလၢ အလီၤလိၢ်လီၤလး လၢအမၤအသးလၢပျၢၤတဖၣ်လီၤ. ယကဆိကမိၣ်ထံ တၢ်လၢနမၤခဲလၢာ် ဒီးယကဆိကမိၣ်ထံဘၣ်ဃး တၢ်လၢနမၤတဖၣ်အဂ့ၢ်လီၤ.” (စံး ၇၇:၁၁, ၁၂) ပမ့ၢ်ဆိကမိၣ်ထံ ဘၣ်ဃးကစၢ်ယွၤအခ့အပှၤ လၢပျၢၤလၢအသးတီတဖၣ်အဂ့ၢ် ဒီးကစၢ်ယွၤ အတၢ်အဲၣ်လၢ အပာ်ဖျါထီၣ်လၢ ပဖီခိၣ်အဂ့ၢ်န့ၣ် ကထိၣ်ဟူးထိၣ်ဂဲၤထီၣ်ပှၤ, ကကဲထီၣ် တၢ်ဂံၢ်တၢ်ဘါ လၢပဂီၢ် ဒီးပကစံးဘျုးစံးဖှိၣ်အီၤ. တကးဒံးဘၣ် ပမ့ၢ် “သ့ၣ်နီၣ်ထီၣ် မုၢ်နံၤလၢအပူၤကွံာ်တဖၣ်” ကမၤစၢၤပှၤဒ်သိး ပတသးလီၤဘှံးလၢၤတဂ့ၤ ဒီးကမၤစၢၤပှၤလၢ ပကဂုာ်ကျဲးစၢး မၤကစၢ်ယွၤ အတၢ်မၤ လၢအဂ့ၤကတၢၢ် ဒီးအိၣ်ဒီးတၢ်သးတီ တုၤလၢအကတၢၢ်.
တၢး၀၆ ၇/၁၅ ၁၇ ¶၁၆
‘တဘၣ်ကဒူးကဒ့ၣ်တၢ်တဂ့ၤ’
၁၆ ပမ့ၢ်ယဟိဝၤပှၤအုၣ်အသးအဃိ ပဒိးန့ၢ်ဘၣ် တၢ်ဆိၣ်ဂ့ၤအါမး ဘၣ်ဆၣ် ပမ့ၢ်သးစၢၢ်ဆၢထဲ ပနီၢ်ကစၢ် ဒီးပတၢ်ကီတၢ်ခဲတဖၣ်န့ၣ် ပကကဒူးကဒ့ၣ်တၢ် ဒီးပကသးပ့ၤနီၣ်ကွံာ် တၢ်ဆိၣ်ဂ့ၤလၢ ပဒိးန့ၢ်ဘၣ်အီၤတဖၣ်. ဒ်သိး ပတကဒူးကဒ့ၣ်တၢ်လၢၤတဂ့ၤအဂီၢ် ပကဘၣ်ဆိကမိၣ်ထံ ဘၣ်ဃးတၢ်ဆိၣ်ဂ့ၤလၢ ပဒိးန့ၢ်ဘၣ်အီၤတဖၣ် အဂ့ၢ်ထီဘိ. ပဝဲတဂၤဘၣ်တဂၤန့ၣ် ပအိၣ်ဒီး တၢ်ခွဲးတၢ်ယာ်လီၤဆီလၢ ပစံၣ်တဲၤတဲလီၤဘၣ် ယဟိဝၤယွၤအမံၤ. (ယၡါယၤ ၄၃:၁၀) တကးဒံးဘၣ် ပအိၣ်ဒီးတၢ်ရ့လိာ်သးဒီးအီၤ ဘူးဘူးတံၢ်တံၢ်သ့ ဒီးပတဲတၢ်ဒီး “ပှၤလၢအဒိကနၣ် တၢ်ထုကဖၣ်တဂၤ” အံၤ သ့ဝဲကိးဆၢကတီၢ်ဒဲး. (စံးထီၣ်ပတြၢၤ ၆၅:၂; ယၤကိာ် ၄:၈) ပတၢ်အိၣ်မူန့ၣ် ပှဲၤဒီးတၢ်သးခု မ့ၢ်လၢ ပနၢ်ပၢၢ် ယဟိဝၤယွၤ အတၢ်ပၢအခွဲး ဒီးပအိၣ်ဒီးတၢ်ခွဲးတၢ်ယာ်လၢ ကပာ်ဖျါထီၣ် တၢ်သးတီဒီးကစၢ်ယွၤအဃိ. (ကတိၤဒိ ၂၇:၁၁) ဒီးပအိၣ်ဒီး တၢ်ခွဲးတၢ်ယာ်လၢ ပကဟးစံၣ်တဲၤတဲလီၤ တၢ်သးခုကစီၣ် ထီဘိ. (မးသဲ ၂၄:၁၄) တကးဒံးဘၣ် ပနာ်ယ့ၣ်ၡူးအတၢ်ပှ့ၤက့ၤ အဃိ ပအိၣ်ဒီး သးလၢအသ့ၣ်ညါဒၣ်တၢ် လၢအကဆှီသ့. (ယိၤဟၣ် ၃:၁၆) ပမ့ၢ်အိၣ်ဒီး တၢ်ကီတၢ်ခဲဒ်လဲၣ်ဂ့ၤဒ်လဲၣ်ဂ့ၤ သနာ်က့ ပဒိးန့ၢ်ဘၣ် တၢ်ဆိၣ်ဂ့ၤသ့ၣ်တဖၣ်အံၤ.
တၢး၁၁ ၇/၁ ၁၀ ¶၃-၄
ယဟိဝၤယွၤန့ၣ် အတၢ်တူၢ်ဘၣ်အိၣ်ဧါ
ပှၤကွဲးထါ စံးထီၣ်ပတြၢၤတဲလၢ “အဝဲသ့ၣ် ထီဒါ ကစၢ်ယွၤလၢ ပှၢ်မုၢ်ကနၢ အဘျီအါမး ဒီးအဝဲသ့ၣ် မၤဘၣ်ဒိအသးလၢ မဲးမုၢ်ပျီလီၤ.” (အဆၢဖိ ၄၀) ဒီးအဆၢဖိလၢခံတဆၢ ဆဲးတဲကဒီးဝဲလၢ “အဝဲသ့ၣ် မၤကွၢ်ကစၢ်ယွၤ တဘျီဝံၤတဘျီ.” (အဆၢဖိ ၄၁) ပာ်သူၣ်ပာ်သးလၢ ပှၤကွဲးလံာ်အံၤ ပာ်ဖျါထီၣ်ဝဲ ပှၤအံၣ်စရ့လးဖိတဖၣ် ထီဒုၣ်ထီဒါတၢ်အဂ့ၢ်. ဖဲအဝဲသ့ၣ် ဟးထီၣ်လၢ ကီၢ်အဲၤကူပတူးအပူၤ ဝံၤတယံာ်ဒံးဘၣ် ဒီးအလဲၤတုၤလၢ ပှၢ်မုၢ်ကနၢအခါ အဝဲသ့ၣ် ဒီးစးထီၣ်ထီဒါတၢ်. အဝဲသ့ၣ်န့ၣ် စးထီၣ်ကဒူးကဒ့ၣ် ကစၢ်ယွၤ ဒီးတနာ်အီၣ်ဝဲလၢ ကစၢ်ယွၤ ကွၢ်ထွဲ ဒီးကဟုကယာ် အဝဲသ့ၣ်သ့လၢၤဘၣ်. (၄ မိၤၡ့ ၁၄:၁-၄) လံာ်စီဆှံ အလံာ်ခီယ့ၤတဘ့ၣ် တဲဝဲလၢ တၢ်ကတိၤလၢအမ့ၢ် “အဝဲသ့ၣ် ထီဒါ ကစၢ်ယွၤ” န့ၣ်ဘၣ်သ့ၣ်သ့ၣ် အဲၣ်ဒိးတဲဝဲ “အဝဲသ့ၣ် အခိၣ်ကိၤ လၢကစၢ်ယွၤ အဖီခိၣ်” မ့တမ့ၢ် “အဝဲသ့ၣ်တကနၣ် ကစၢ်ယွၤအကလုၢ်ဘၣ်.” သနာ်က့ ဖဲအဝဲသ့ၣ် ပီၢ်ယၢ်လီၤက့ၤသးအခါ ကစၢ်ယွၤ သးကညီၤဘၣ်အဝဲသ့ၣ် ဒီးပျၢ်ကွံာ်အဝဲသ့ၣ် အတၢ်ကမၣ်. ဘၣ်ဆၣ် လၢခံ အဝဲသ့ၣ် က့ၤထီဒါကစၢ်ယွၤ ဒ်လီၢ်လီၢ်အသိး. အဝဲသ့ၣ် မၤဝံၤမၤက့ၤဝဲဒ်န့ၣ် တဘျီဝံၤတဘျီ.—စံးထီၣ်ပတြၢၤ ၇၈:၁၀-၁၉, ၃၈.
ဖဲယဟိဝၤအပှၤဂီၢ်မုၢ်လၢ အသးတဂၢၢ်တကျၢၤဘၣ်တဖၣ်အံၤ ထီဒါကွံာ်အီၤ တဘျီဝံၤတဘျီအခါ ယဟိဝၤယွၤ ကတူၢ်ဘၣ်ဝဲဒ်လဲၣ်. အဆၢဖိ ၄၀ တဲဝဲလၢ “အဝဲသ့ၣ် မၤဘၣ်ဒိအသး.” တၢ်ကွဲးကျိာ်ထံလၢအဂၤတဘ့ၣ် တဲဝဲလၢ အဝဲသ့ၣ် “မၤသးအုးအသး.” လံာ်စီဆှံ အလံာ်ခီယ့ၤတဘ့ၣ် တဲဝဲလၢ “ဖဲအံၤ တၢ်လၢ ပှၤဧ့ၤဘြံၤဖိတဖၣ် မၤဝဲန့ၣ် လီၤဂာ်ဒ်သိးဒီး ဖိသၣ်လၢ အနၢ်က့ၣ်တဂၤ မၤဘၣ်ဒိပှၤသးအသိး.” ဖိလၢအနၢ်က့ၣ်တဂၤ မ့ၢ်တကနၣ် အမိအပါ အကလုၢ်ဘၣ်န့ၣ် အမိအပါ အသးအုးဒိၣ်မး. ဒ်န့ၣ်အသိး ဖဲပှၤအံၣ်စရ့လးဖိတဖၣ် ထီဒါတၢ်အခါ “အံၣ်စရ့လး အကစၢ်ယွၤလၢ အစီဆှံတဂၤ” အ “သးအုး” ဝဲ.—အဆၢဖိ ၄၁.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၆ ၇/၁၅ ၁၁ ¶၄
လံာ်စီဆှံ အတၢ်ပာ်ဖျါလၢ လံာ်စံးထီၣ်ပတြၢၤ သၢဘ့ၣ်တဘ့ၣ် ဒီးလွံၢ်ဘ့ၣ်တဘ့ၣ်အဂီၢ်
၇၈:၂၄, ၂၅; တၢ်ဂ့ၢ်အဘျဲၣ်—ဘၣ်မနုၤအဃိ ကိၣ်မၤနၤန့ၣ် လံာ်စီဆှံကိးဝဲလၢ “မူခိၣ်အဘု” ဒီး “ပှၤလၢအဂံၢ်ဆူၣ်ဘါဆူၣ်တဖၣ် အကိၣ်” လဲၣ်. တၢ်ကတိၤတဖၣ်အံၤန့ၣ် တအဲၣ်ဒိးတဲဝဲလၢ ကိၣ်မၤနၤန့ၣ် မ့ၢ်ဝဲ မူခိၣ်ကလူးတဖၣ် အတၢ်အီၣ်ဘၣ်. “မူခိၣ်အဘု” န့ၣ်အဲၣ်ဒိးတဲဝဲလၢ ကိၣ်မၤနၤန့ၣ် အဟဲလၢမူခိၣ်. (စံးထီၣ်ပတြၢၤ ၁၀၅:၄၀) မူခိၣ်ကလူး လၢအမ့ၢ် “ပှၤလၢအဂံၢ်ဆူၣ်ဘါဆူၣ်တဖၣ်” န့ၣ်အိၣ်လၢမူခိၣ်အဃိ တၢ်ကတိၤလၢအမ့ၢ် “ပှၤလၢအဂံၢ်ဆူၣ်ဘါဆူၣ်တဖၣ် အကိၣ်” န့ၣ် ကအဲၣ်ဒိးတဲဝဲ ကစၢ်ယွၤလၢ အအိၣ်လၢမူခိၣ်န့ၣ် ဟ့ၣ်လီၤဝဲ တၢ်အီၣ်အံၤ. (စံးထီၣ်ပတြၢၤ ၁၁:၄) ဒီးအဂၤတခါန့ၣ် ဘၣ်သ့ၣ်သ့ၣ် ယဟိဝၤယွၤ ကသူဝဲ မူခိၣ်ကလူးတဖၣ် ဒ်သိး ကဟ့ၣ်လီၤဝဲ ပှၤအံၣ်စရ့လးဖိတဖၣ်လၢ ကိၣ်မၤနၤအဂီၢ်.