ယ့ၣ်ၡူးလီၣ်ဖျါထီၣ်အသးလၢ ပှၤမၤညၣ်ဖိတဖၣ်အမဲာ်ညါ

ဖဲယ့ၣ်ၡူး လီၣ်ဖျါထီၣ်အသးလၢ အတၢ်မၢဖိတဖၣ်​ အမဲာ်ညါ ဝံၤတယံာ်ဘၣ်န့ၣ်​ စီၤပ့းတရူး ဆၢတဲာ်လီၤအသးလၢ အကလဲၤဃုအီၣ်ညၣ်လၢ ပီၣ်လဲၣ်ကၤလံၤလါအပူၤ. စီၤသိၤမါ, စီၤယၤကိာ်, စီၤယိၤဟၣ်​ ဒီးယ့ၣ်ၡူးအပျဲၢ်အဘီၣ်​ အဂၤတနီၤန့ၣ်​ လဲၤပိာ်ဝဲ စီၤပ့းတရူးအခံ. အဝဲသ့ၣ်​ ဃုအီၣ်ညၣ်ဒီတနၤကျၢၤ သနာ်က့ တန့ၢ်နီတဘ့ၣ်ဘၣ်.

လၢခံတနံၤ ဖဲဂီၤခီန့ၣ်​ အဝဲသ့ၣ်​ ထံၣ်ပိာ်ခွါတဂၤ ဆၢထၢၣ်လၢထံကၢၢ်နံၤ. ပိာ်ခွါတဂၤအံၤ ကိးစိအဝဲသ့ၣ်​ ဒီးတဲဝဲလၢ ‘မ့ၢ်သုဖီၣ်ညၣ်န့ၢ် တဘ့ၣ်ဘ့ၣ်ဧါ.’ အဝဲသ့ၣ်တဲဘၣ်အီၤလၢ ‘တန့ၢ်နီတဘ့ၣ်ဘၣ်.’ ဒီးပိာ်ခွါတဂၤအံၤ တဲဘၣ်အဝဲသ့ၣ်လၢ “ကွံာ်လီၤစၤလၢ ကဘီအဃၢၤလၢ အထွဲတခီ.” ဖဲအဝဲသ့ၣ်​ မၤဝဲဒ်န့ၣ်အခါ မၤန့ၢ်ညၣ်ဒီဒူၣ်အဃိ ထုးထီၣ်ဝဲစၤ တန့ၢ်လၢၤဘၣ်. တဘျီဃီန့ၣ်​ စီၤယိၤဟၣ်​ သ့ၣ်ညါဝဲလၢ ပိာ်ခွါတဂၤအံၤ မ့ၢ်ဝဲယ့ၣ်ၡူး. စီၤယိၤဟၣ်​ တဲဝဲလၢ “အဝဲမ့ၢ် ကစၢ်လီၤ.” တဘျီဃီန့ၣ်​ စီၤပ့းတရူး စံၣ်လီၤလၢထံကျါ ဒီးလဲၤပီၢ်ဝဲထံဆူ ထံကၢၢ်နံၤ. မ့မ့ၢ်ယ့ၣ်ၡူး အပျဲၢ်အဘီၣ်အဂၤတဖၣ်န့ၣ်​ ပိာ်ထီၣ်ဝဲ စီၤပ့းတရူးအခံလၢကဘီ.

ဖဲအဝဲသ့ၣ်က့ၤတုၤလၢ ပီၣ်လဲၣ်ကၢၢ်နံၤအခါ အဝဲသ့ၣ်ထံၣ်ဝဲလၢ ပှၤကၣ်ဝဲကိၣ်ဒီးညၣ်​ လၢမ့ၣ်အူအဖီခိၣ်. ဒီးယ့ၣ်ၡူး မၢအဝဲသ့ၣ်​ ဟဲစိာ်အါထီၣ်ညၣ်တနီၤလၢ ပှၤကအီၣ်ဝဲအဂီၢ်. ဝံၤဒီး ယ့ၣ်ၡူးတဲဝဲလၢ “ဟဲအီၣ်​ ဂီၤခီတၢ်အီၣ်မီၤ.”

ဖဲအဝဲသ့ၣ်​ အီၣ်ဂီၤခီတၢ်အီၣ်ဝံၤအခါ ယ့ၣ်ၡူးသံကွၢ် စီၤပ့းတရူးလၢ ‘မ့ၢ်နအဲၣ်ယၤအါန့ၢ်ဒံး တၢ်ဖီၣ်ညၣ်အတၢ်မၤန့ၣ်ဧါ.’ စီၤပ့းတရူးတဲဝဲလၢ ‘အဲၣ်ဝဲသၢၤ. ကစၢ်ဧၢ, ယအဲၣ်နၤအါန့ၢ်ဒံး တၢ်ဖီၣ်ညၣ်အတၢ်မၤ.’ ယ့ၣ်ၡူးတဲဝဲလၢ “လုၢ်အီၣ်လုၢ်အီ ယသိဖိတဖၣ်တက့ၢ်.” ယ့ၣ်ၡူးသံကွၢ်ကဒီးအီၤလၢ ‘စီၤပ့းတရူးဧၢ, နအဲၣ်ယၤဧါ.’ စီၤပ့းတရူးတဲဝဲလၢ “မ့ၢ် ကစၢ်ဧၢ, နသ့ၣ်ညါလၢ ယအဲၣ်နၤ.” ဒီးယ့ၣ်ၡူးတဲဝဲလၢ “ကွၢ်ထွဲ ယသိဖိတဖၣ်တက့ၢ်.” ယ့ၣ်ၡူးသံကွၢ်ကဒီးအီၤ သၢဘျီတဘျီ ဒ်အလီၢ်လီၢ်. အဃိ စီၤပ့းတရူး အသးဘၣ်ဒိဒိၣ်မး ဒီးတဲဝဲလၢ “ကစၢ်ဧၢ, နသ့ၣ်ညါတၢ်ခဲလၢာ် ဒီးနသ့ၣ်ညါလၢ ယအဲၣ်နၤ.” ဝံၤဒီး ယ့ၣ်ၡူးတဲကဒီးအီၤလၢ “ကွၢ်ထွဲ ယသိဖိတဖၣ်တက့ၢ်.” ဒီးလၢခံ ယ့ၣ်ၡူးတဲဘၣ်​ စီၤပ့းတရူးလၢ “ဆဲးပိာ်ယခံတက့ၢ်.”