တၢ်မၤလိ ၂၁
“ယကဆှီဒီး ပှၤခဲလၢာ်အသွံၣ်”
စီၤပီလူးသးဆူၣ်လၢ တၢ်စံၣ်တဲၤတဲလီၤအပူၤ ဒီးအတၢ်ဟ့ၣ်ကူၣ်လၢ တၢ်အိၣ်ဖှိၣ်သးပှၢ်တဖၣ်အဂီၢ်
တၢ်ဂ့ၢ်ဒိးသန့ၤထီၣ်သးလၢ မၤတၢ် ၂၀:၁-၃၈
၁-၃. (က) ဖဲစီၤအူတူၤဃူးသံအဟါန့ၣ် ပှၤမၤမနုၤလဲၣ်. (ခ) စီၤအူတူၤဃူး သံဝံၤအလီၢ်ခံ စီၤပီလူးမၤမနုၤလဲၣ် ဒီးတၢ်မၤအသးအံၤ ဒုးသ့ၣ်ညါပှၤ စီၤပီလူးအဂ့ၢ်ဒ်လဲၣ်.
ဘၣ်တဟါ စီၤပီလူး ဒီးဒီပုၢ်ဝဲၢ်မုၣ်ခွါအါဂၤလၢ တြိၤအါ အတၢ်အိၣ်ဖှိၣ်န့ၣ် တဲသကိးတၢ်လၢ ဒၢးတဖျၢၣ်လၢ အအိၣ်လၢ ဟံၣ်သၢကထြၢတကထြၢ. ဒီးတၢ်တဟါန့ၣ် မ့ၢ်လၢစီၤပီလူး ကအိၣ်ဒီးဒီပုၢ်ဝဲၢ်မုၣ်ခွါတဖၣ် အလီၢ်ခံကတၢၢ်အဃိ အတဲသကိးတၢ်ဒီးအဝဲသ့ၣ် ဖးယံာ်တုၤလၢဖးဖီမုၢ်ညါ. ဒီးလၢဒၢးပူၤန့ၣ် ပှၤဒွဲၣ်ထီၣ်ဝဲ မ့ၣ်အူဒၢတဘျုးဖျၢၣ်ညါ အဃိ တၢ်ကိၢ်တဝံ ဒီးကလံၤကဆှီ တအိၣ်အါအါလၢၤဘၣ်. ပှၤသးစၢ်တဂၤ လၢအမံၤမ့ၢ် စီၤအူတူၤဃူး ဆ့ၣ်နီၤလၢ ပဲတြီဖိအကပၤ. ဒီးဖဲစီၤပီလူး စံၣ်တဲၤတဲလီၤတၢ်အဆၢကတီၢ်န့ၣ် စီၤအူတူၤဃူး မံခ့ဝဲ ဒီးလီၤတဲာ်လၢ ကိာ်လာ်ဒ့.
၂ လၢပှၤခဲလၢာ်အကျါန့ၣ် လီၤဂာ်လၢ ကသံၣ်သရၣ် စီၤလူၤကၣ်န့ၣ် မ့ၢ်ဝဲပှၤလၢ အလဲၤလီၤကွၢ်ဝဲ ပှၤသးစၢ်ဖိ စီၤအူတူၤဃူး အတၢ်အိၣ်သး အဆိကတၢၢ်တဂၤ. သနာ်က့ ဖဲပှၤလဲၤတုၤလၢ အအိၣ်အခါ စီၤအူတူၤဃူးန့ၣ် “အသံလံ.” အဃိ အဝဲသ့ၣ် မၤဝဲတသ့နီတမံၤဘၣ်. (မၤတၢ် ၂၀:၉) ဘၣ်ဆၣ် တၢ်လီၤလးကဲထီၣ်သးတခါ. စီၤပီလူး မံနီၤဝဲလၢ စီၤအူတူၤဃူး အဖီခိၣ်, အဖိးဟုအီၤ ဒီးတဲဝဲလၢ “ကိၢ်တဂ့ၤ, အမူထီၣ်က့ၤလံ.” စီၤပီလူး မၤသမူထီၣ်က့ၤဝဲ စီၤအူတူၤဃူး.—မၤတၢ် ၂၀:၁၀.
၃ တၢ်မၤအသးတခါအံၤ ပာ်ဖျါထီၣ်ဝဲလၢ ယဟိဝၤယွၤ သူဝဲအသးစီဆှံ ဒ်သိးကမၤဝဲတၢ်လၢ အလီၤကမၢကမၣ်တဖၣ်သ့. စီၤအူတူၤဃူးသံန့ၣ် တမ့ၢ် စီၤပီလူး အတၢ်ကမၣ်ဘၣ်. ဘၣ်ဆၣ် စီၤပီလူးတဘၣ်သးဝဲလၢ အဝဲသ့ၣ်အတၢ်အိၣ်ဖှိၣ်တဟါအံၤန့ၣ် ကကဲထီၣ်တၢ်လီၤဃံၢ်အလီၢ် မ့တမ့ၢ် ကဲထီၣ်တၢ်သးအုးလၢ ဒီပုၢ်ဝဲၢ်မုၣ်ခွါတဖၣ်အဂီၢ်ဘၣ်. စီၤပီလူး မၤမုာ်ထီၣ် ဒီးဟ့ၣ်ဂံၢ်ဟ့ၣ်ဘါ ဒီပုၢ်ဝဲၢ်မုၣ်ခွါအသးခီဖျိ အမၤသမူထီၣ်က့ၤဝဲ စီၤအူတူၤဃူး. အဃိ ဒီပုၢ်ဝဲၢ်မုၣ်ခွါတဖၣ် အသးမုာ်ထီၣ်ဝဲ ဒီးဆဲးစံၣ်တဲၤတဲလီၤတၢ်လၢ တၢ်သူၣ်ဆူၣ်သးဆူၣ်အပူၤ. ဖဲအံၤ ပသ့ၣ်ညါဘၣ်လၢ စီၤပီလူး ပာ်လုၢ်ပာ်ပှ့ၤဝဲ သးသမူသပှၢ်တၢၢ်. ဒီးတၢ်မၤအသးအံၤ ဒုးသ့ၣ်နီၣ်ထီၣ်ပှၤလၢ စီၤပီလူးအတၢ်ကတိၤလၢ “ယကဆှီဒီး ပှၤခဲလၢာ်အသွံၣ်.” (မၤတၢ် ၂၀:၂၆) ခဲအံၤ ပကကွၢ်သကိး ဘၣ်ဃး စီၤပီလူးအဒိအတဲာ်န့ၣ် မၤစၢၤပှၤလၢ ပပာ်လုၢ်ပာ်ပှ့ၤ သးသမူဒ်သိးဒီးအီၤ ကသ့ဒ်လဲၣ်.
“အဝဲလဲၤလၢ ကီၢ်မၤက့းဒနံ” (မၤတၢ် ၂၀:၁, ၂)
၄. စီၤပီလူး ထံၣ်ဘၣ်ဒီး တၢ်အိၣ်သးလၢ အလီၤပျံၤလီၤဖုးဒ်လဲၣ်.
၄ ဒ်တၢ်မၤလိလၢအပူၤကွံာ်တခါ ပာ်ဖျါထီၣ်ဝဲအသိး ဖဲစီၤပီလူး လဲၤလၢဝ့ၢ်အ့းဖ့းစူး အခါ အထံၣ်ဘၣ်ဒီးတၢ်အိၣ်သးလၢ အလီၤပျံၤလီၤဖုး. ခီဖျိလၢ အဝဲစံၣ်တဲၤတဲလီၤတၢ်အဃိ ပှၤသးပှံၢ်ထီၣ်တၢ်ဒိၣ်မး. ပှၤပိာ်စ့တဖၣ် လၢအတ့ဆါဝဲ တၢ်ဂီၤတၢ်ဖှီၣ် လၢအဘၣ်ဃးဒီး ကစၢ်မုၣ်နီၢ်အၢ်တ့းမံၤန့ၣ် အဝဲသ့ၣ် မၤတၢထီၣ်တၢလီၤတၢ် ဒီး “ဖဲတၢ်တၢထီၣ်တၢလီၤ လီၤကယး ဝံၤအလီၢ်ခံ” မၤတၢ် ၂၀:၁ ပာ်ဖျါထီၣ်ဝဲလၢ “စီၤပီလူး ကိးဖှိၣ်ပှၤလၢ အစူၢ်က့ၤနာ်က့ၤတၢ်တဖၣ် ဒီးဟ့ၣ်ဂံၢ်ဟ့ၣ်ဘါအဝဲသ့ၣ် ဒီးတဲဘၣ်အဝဲသ့ၣ်လၢ အကလဲၤတၢ် ဝံၤဒီး အဝဲလဲၤလၢ ကီၢ်မၤက့းဒနံ.”
၅, ၆. (က) စီၤပီလူးအိၣ်လၢ ကီၢ်မၤက့းဒနံ ယံာ်ဝဲထဲလဲၣ် ဒီးဖဲန့ၣ်အမၤစၢၤ ဒီပုၢ်ဝဲၢ်မုၣ်ဒီပုၢ်ဝဲၢ်ခွါတဖၣ်ဒ်လဲၣ်. (ခ) စီၤပီလူး အိၣ်ဒီးတၢ်ထံၣ်လၢ ဒီပုၢ်ဝဲၢ်မုၣ်ဒီပုၢ်ဝဲၢ်ခွါတဖၣ် အဖီခိၣ်ဒ်လဲၣ်.
၅ တချုးလၢ စီၤပီလူး လဲၤတုၤလၢ ကီၢ်မၤက့းဒနံ ဒံးဘၣ်န့ၣ် အဝဲအိၣ်ပတုာ်လၢ ဝ့ၢ်တြိၤအါအကဘီသန့ ဒီးအအိၣ်ဝဲဖဲန့ၣ်တတီၤဖိ. ဖဲန့ၣ်န့ၣ် စီၤပီလူး ဘၣ်သးဝဲလၢ စီၤတံတူး လၢပှၤဆှၢလီၤအီၤလၢညါခါ ဖဲဝ့ၢ်ကရံၣ်သူးန့ၣ် ကဟဲထံၣ်လိာ်သးဒီးအီၤဖဲန့ၣ်. (၂ ကရံၣ် ၂:၁၂, ၁၃) ဘၣ်ဆၣ် ဖဲအသ့ၣ်ညါလၢ စီၤတံတူး တဟဲလၢၤဘၣ်အခါ အဝဲဆဲးလဲၤလၢ ကီၢ်မၤက့းဒနံ ဒီးအိၣ်ဝဲဖဲန့ၣ် ကအိၣ်ဝဲတနံၣ်ညါ. ဒီးအ “ဟ့ၣ်ဂံၢ်ဟ့ၣ်ဘါ ပှၤလၢအအိၣ် ဖဲန့ၣ်တဖၣ်အါမး.”a (မၤတၢ် ၂၀:၂) လၢခံန့ၣ် စီၤတံတူး ထံၣ်လိာ်အသးဒီး စီၤပီလူးလၢ ကီၢ်မၤက့းဒနံ. ဒီးအတဲဘၣ် စီၤပီလူးလၢ ဖဲဒီပုၢ်ဝဲၢ်တဖၣ်လၢ ဝ့ၢ်ကရံၣ်သူး န့ၢ်ဘၣ်ဝဲ စီၤပီလူး အလံာ်ပရၢ အဆိကတၢၢ်တဘ့ၣ်အခါ လံာ်ပရၢန့ၣ် ထိးဘၣ်အဝဲသ့ၣ်အသးဒိၣ်မး. (၂ ကရံၣ် ၇:၅-၇) အဃိ စီၤပီလူး အဲၣ်ဒိးကွဲးန့ၢ် အဝဲသ့ၣ်လံာ်ခံဘ့ၣ်တဘ့ၣ် ဒီးလံာ်အံၤန့ၣ် အကဲဝဲ လံာ် ၂ ကရံၣ်သူး.
၆ စီၤလူၤကၣ် ပာ်ဖျါထီၣ်ဝဲလၢ ဖဲစီၤပီလူး လဲၤအိၣ်သကိးဝဲ ဒီပုၢ်ဝဲၢ်မုၣ်ခွါလၢ ဝ့ၢ်အ့းဖ့းစူး ဒီးလၢကီၢ်မၤက့းဒနံအခါ “ကဲထီၣ်တၢ်ဂံၢ်တၢ်ဘါ” လၢအဝဲသ့ၣ်အဂီၢ်ဒိၣ်မး. အဃိ ပသ့ၣ်ညါဘၣ်လၢ စီၤပီလူးန့ၣ် အဲၣ်ဒီပုၢ်ဝဲၢ်မုၣ်ခွါတဖၣ်ဒိၣ်မး. ဒီးအဝဲလီၤဆီဒီး ပှၤဖၤရံၤၡဲလၢ အဆိမိၣ်ဆံးပှၤဂၤ. စီၤပီလူး ထံၣ်ဝဲအဒီပုၢ်ဝဲၢ်တဖၣ် ဒ်သိးအသကိးတဖၣ် ဒီးအမၤသကိး ကစၢ်ယွၤအတၢ်မၤဒီး အဒီပုၢ်ဝဲၢ်မုၣ်ခွါတဖၣ် မုာ်ဒိၣ်မး. (ယိၤ ၇:၄၇-၄၉; ၁ ကရံၣ် ၃:၉) တဘျီတခီၣ် အဝဲဘၣ်ဟ့ၣ်ကူၣ်ဝဲ ဒီပုၢ်ဝဲၢ်မုၣ်ခွါတဖၣ်ဆူၣ်ဆူၣ်သနာ်က့ အတဆိမိၣ်ဝဲလၢ အဂ့ၤဒိၣ်န့ၢ်ဒံး ဒီပုၢ်ဝဲၢ်မုၣ်ခွါအဂၤတဖၣ်ဘၣ်.—၂ ကရံၣ် ၂:၄.
၇. ပဒီပုၢ်ဝဲၢ်လၢ အတီခိၣ်ရိၤမဲတၢ်လၢ ပစိၤခဲအံၤန့ၣ် ကွၢ်လိဝဲ စီၤပီလူး အဒိအတဲာ်ဒ်လဲၣ်.
၇ ဆၢကတီၢ်ခဲအံၤစ့ၢ်ကီး ကဝီၤအပှၤကွၢ်တၢ် ဒီးတၢ်အိၣ်ဖှိၣ်သးပှၢ်တဖၣ်န့ၣ် ကျဲးစၢးကွၢ်လိဝဲ စီၤပီလူး အဒိအတဲာ်. ဖဲအဝဲသ့ၣ် ဘၣ်သိၣ်က့ၤသီက့ၤ ဒီပုၢ်ဝဲၢ်မုၣ်ခွါအခါ အဝဲသ့ၣ် ကျဲးစၢးမၤဝဲဒ်သိး ကကဲထီၣ်တၢ်မၤစၢၤလၢ ပှၤလၢအလိၣ်ဘၣ် တၢ်သိၣ်က့ၤသီက့ၤတဖၣ်အဂီၢ်. အဝဲသ့ၣ်တစံၣ်ညီၣ်ပှၤလၢ အဘၣ်တၢ်သိၣ်က့ၤသီက့ၤအီၤတဖၣ်ဘၣ်, ဘၣ်ဆၣ် အဝဲသ့ၣ်ကျဲးစၢး နၢ်ပၢၢ်ပှၤတဖၣ်န့ၣ် ဒီးဟ့ၣ်ဂံၢ်ဟ့ၣ်ဘါအဝဲသ့ၣ်. ကဝီၤအပှၤကွၢ်တၢ်တဂၤ တဲဝဲလၢ “ဒီပုၢ်ဝဲၢ်မုၣ်ခွါအါတက့ၢ်န့ၣ် အဲၣ်ဒိးမၤတၢ်လၢအဘၣ် သနာ်က့ အါဘျီန့ၣ် အဝဲသ့ၣ်ထံၣ်ဘၣ်ဒီး တၢ်သူၣ်ဟးဂီၤသးဟးဂီၤ, တၢ်ပျံၤတၢ်ဖုး ဒီးတဘျီတခီၣ်န့ၣ် အဝဲသ့ၣ် တူၢ်ဘၣ်လၢ အမၤစၢၤလီၤ အနီၢ်ကစၢ်သးမၣ် တသ့ဘၣ်.” အဃိ တၢ်အိၣ်ဖှိၣ်သးပှၢ်တဖၣ် မ့ၢ်ဟ့ၣ်ဂံၢ်ဟ့ၣ်ဘါ အဝဲသ့ၣ်န့ၣ် ကဲထီၣ်တၢ်ဂံၢ်တၢ်ဘါ လၢအဝဲသ့ၣ်အဂီၢ်ဒိၣ်မး.—ဧ့ၤ ၁၂:၁၂, ၁၃.
“ပှၤ . . . ကူၣ်ထီၣ်တၢ်လၢ ကမၤအၢအီၤ” (မၤတၢ် ၂၀:၃, ၄)
၈, ၉. (က) ဘၣ်မနုၤအဃိ စီၤပီလူး ဆီတလဲက့ၤ အတၢ်ရဲၣ်တၢ်ကျဲၤလၢ အကလဲၤလၢ ကီၢ်စူၤရံန့ၣ်လဲၣ်. (ခ) ဘၣ်မနုၤအဃိ ပှၤယူဒၤဖိတဖၣ်သးဟ့ စီၤပီလူးဒိၣ်မးလဲၣ်.
၈ စီၤပီလူးအိၣ်လၢ ကီၢ်မၤက့းဒနံ ဒီးအလဲၤဝဲလၢ ဝ့ၢ်ကရံၣ်သူး.b အအိၣ်ဖဲန့ၣ်သၢလါ ဝံၤအလီၢ်ခံ အဘၣ်သးလဲၤလၢ ဝ့ၢ်က့ၣ်ဃရ့း ဒ်သိးအကဒိးထီၣ်ကဘီ ဒီးလဲၤဝဲလၢ ကီၢ်စူၤရံအဂီၢ်. ဒီးဖဲန့ၣ် အကက့ၤစိာ်ဝဲ တၢ်မၤဘူၣ်တဖၣ်ဆူ ဝ့ၢ်ယရူၤၡလ့ၣ် လၢဒီပုၢ်ဝဲၢ်မုၣ်ခွါလၢ အလိၣ်ဘၣ်တၢ်မၤစၢၤတဖၣ်အဂီၢ်.c (မၤတၢ် ၂၄:၁၇; ရိ ၁၅:၂၅, ၂၆) ဘၣ်ဆၣ် လၢတၢ်တမုၢ်လၢ်အပူၤ တၢ်ဟဲကဲထီၣ်သးတခါ. မၤတၢ် ၂၀:၃ ပာ်ဖျါထီၣ်ဝဲလၢ “ပှၤယူဒၤဖိတဖၣ် ကူၣ်ထီၣ်တၢ်လၢ ကမၤအၢ” စီၤပီလူး. အဃိ စီၤပီလူး ဘၣ်ဆီတလဲက့ၤ အတၢ်ရဲၣ်တၢ်ကျဲၤ.
၉ ခီဖျိလၢ စီၤပီလူး ဟးထီၣ်ကွံာ်လၢ ယူဒၤတၢ်ဘူၣ်တၢ်ဘါအပူၤ အဃိ ပှၤယူဒၤဖိတဖၣ် သးက့ၣ်အီၤဒိၣ်မး. တကးဒံးဘၣ် လၢအပူၤကွံာ်န့ၣ် အစံၣ်တဲၤတဲလီၤတၢ်လၢ ဝ့ၢ်ကရံၣ်သူးအပူၤအဃိ ဘူၣ်ဘျီၣ်အခိၣ် စီၤကြံစပူး ကဲထီၣ်ဝဲခရံာ်ဖိ. (မၤတၢ် ၁၈:၇, ၈; ၁ ကရံၣ် ၁:၁၄) ဒီးဘၣ်တဘျီ ပှၤလုၢ်တၢ်ခိၣ်တဖၣ် လၢဝ့ၢ်ကရံၣ်သူးအပူၤန့ၣ် လဲၤလၢအဃါယၤကီၢ်ရ့ၣ် အပဒိၣ်ဖးဒိၣ် စီၤကးလံၤအိၣ်အအိၣ် ဒီးပာ်ဒ့ၣ်ပာ်ကမၣ်ဝဲ စီၤပီလူးလၢ စီၤပီလူးန့ၣ် အမၤကမၣ် ပှၤယူဒၤဖိအတၢ်သိၣ်တၢ်သီ. ဘၣ်ဆၣ် စီၤကးလံၤအိၣ် တကနၣ်ဃုာ် တၢ်လၢအဝဲသ့ၣ် တဲဝဲဘၣ်အဃိ အဝဲသ့ၣ် သးပှံၢ်ထီၣ်တၢ်ဒိၣ်မး. (မၤတၢ် ၁၈:၁၂-၁၇) အဃိ ဘၣ်သ့ၣ်သ့ၣ် ပှၤယူဒၤဖိတဖၣ် သ့ၣ်ညါဘၣ်ဝဲ မ့တမ့ၢ် အဝဲသ့ၣ် ဆိမိၣ်ဝဲလၢ တယံာ်လၢၤဘၣ်န့ၣ် စီၤပီလူး ကလဲၤဒိးထီၣ်ကဘီလၢ အအိၣ်ဘူးဒီး ဝ့ၢ်က့ၣ်ဃရ့းအဃိ အဝဲသ့ၣ် ကူၣ်ထီၣ်ဝဲလၢ ကအိၣ်ခိးခူသူၣ် စီၤပီလူးလၢကျဲ ဒီးမၤသံအီၤ. အဃိ စီၤပီလူး မၤဝဲဒ်လဲၣ်.
၁၀. ဘၣ်မနုၤအဃိ စီၤပီလူး တလဲၤလၢ ဝ့ၢ်က့ၣ်ဃရ့းလၢၤဘၣ်လဲၣ်.
၁၀ ဒ်သိး စီၤပီလူး ကဒီသဒၢလီၤအသး ဒီးကဒီသဒၢ တၢ်မၤဘူၣ်တဖၣ်အဂီၢ် အတလဲၤလၢ ဝ့ၢ်က့ၣ်ဃရ့းလၢၤဘၣ်. အက့ၤကဒါက့ၤလၢ ကီၢ်မၤက့းဒနံ ဒ်ကျဲလၢအဟဲတ့ၢ်ဝဲအသိး. စီၤပီလူး က့ၤလၢကျဲလၢ ခိခိၣ်တခီသနာ်က့ တၢ်လီၤဘၣ်ယိၣ်အိၣ်ဒံး. လၢညါ ဖဲကျဲတဖၣ်န့ၣ် တမျာ်အိၣ်ဝဲ ဒီးလၢပှၤတမှံၤအဟံၣ်တဖၣ်စ့ၢ်ကီး တၢ်ဘံၣ်တၢ်ဘၢတအိၣ်ဘၣ်. ဘၣ်ဆၣ် စီၤပီလူး ဆိမိၣ်ဝဲလၢ အက့ၤကဒါလၢ ကျဲလၢခိခိၣ်တခီန့ၣ် တၢ်ဘံၣ်တၢ်ဘၢ ကအိၣ်အါန့ၢ်ဒံး အလဲၤလၢ ဝ့ၢ်က့ၣ်ဃရ့းဒံး. ဒီးအဂ့ၤတမံၤလၢ စီၤပီလူးန့ၣ် အတလဲၤတၢ်ထဲတဂၤဘၣ်. စီၤအရံစတၢ်ဃူး, စီၤကါယူး, စီၤစ့းကူၣ်ဒူး, စီၤစိပၤတြူး, စီၤတံၤမသ့း, စီၤတြီဖံမူး ဒီးစီၤတူဃံၤကူး လဲၤပိာ်အခံ.—မၤတၢ် ၂၀:၃, ၄.
၁၁. ခရံာ်ဖိလၢပစိၤခဲအံၤန့ၣ် ဒီသဒၢလီၤအသး သ့ဒ်လဲၣ် ဒီးဘၣ်ဃးဒီးတၢ်ဂ့ၢ်အံၤန့ၣ် ယ့ၣ်ၡူးပာ်လီၤ တၢ်အဒိအတဲာ်ဒ်လဲၣ်.
၁၁ ဒ်စီၤပီလူးအသိး ခရံာ်ဖိလၢပစိၤခဲအံၤစ့ၢ်ကီး ဖဲအဝဲသ့ၣ် စံၣ်တဲၤတဲလီၤတၢ်အခါ အဝဲသ့ၣ် ဒီသဒၢလိာ်သး တဂၤဒီးတဂၤ. လၢတၢ်လီၢ်တနီၤန့ၣ် ဖဲပဒီပုၢ်ဝဲၢ်တဖၣ် ဟးစံၣ်တဲၤတဲလီၤတၢ်လၢ တၢ်လီၢ်အဂၤအခါ အဝဲသ့ၣ် လဲၤသကိးဝဲဒ်သိးသိး ဒီးအစှၤကတၢၢ်န့ၣ် အဝဲသ့ၣ် လဲၤဝဲခံဂၤခံဂၤ. ဘၣ်ဆၣ် ပမ့ၢ်ထံၣ်ဘၣ်ဒီး တၢ်မၤအၢမၤနးဟီမီၤ ပကဘၣ်မၤဒ်လဲၣ်. ပသ့ၣ်ညါလၢ ခရံာ်ဖိတဖၣ်န့ၣ် ကထံၣ်ဘၣ်ဝဲ တၢ်မၤအၢမၤနး. (ယိၤ ၁၅:၂၀; ၂ တံၤ ၃:၁၂) သနာ်က့မ့ၢ်သ့န့ၣ် ပဟးဆှဲးတၢ်လၢ ကဒုးအိၣ်ထီၣ် တၢ်မၤအၢမၤနး. အဃိ ဖဲပဟးစံၣ်တဲၤတဲလီၤတၢ်အခါ ပပလီၢ်ပသး. ပကဆိမိၣ်ကွၢ် ယ့ၣ်ၡူးအဒိအတဲာ်. ဘၣ်တဘျီ လၢယရူၤၡလ့ၣ်အပူၤ ဖဲပှၤထီတၢ်တဖၣ် ကကွံာ် ယ့ၣ်ၡူးလၢလၢၢ်အခါ “ယ့ၣ်ၡူးအိၣ်ခူသူၣ် ဒီးဟးထီၣ်ကွံာ်ဝဲလၢ တၢ်လုၢ်ဟံၣ်ပူၤ.” (ယိၤ ၈:၅၉) ဒီးလၢခံ ဖဲပှၤယူဒၤဖိတဖၣ် ကူၣ်ထီၣ်ဝဲလၢ ကမၤသံယ့ၣ်ၡူးအခါ “ယ့ၣ်ၡူးတဟးလၢ ပှၤယူဒၤဖိအကျါ ပျီပျီလၢၤဘၣ်. အဝဲဟးထီၣ်ကွံာ်ဝဲ ဖဲန့ၣ် ဒီးလဲၤဝဲလၢ . . . တၢ်လီၢ်လၢ အဘူးဒီးပှၢ်မုၢ်ကနၢ.” (ယိၤ ၁၁:၅၄) ပထံၣ်ဘၣ်လၢ အလီၢ်မ့ၢ်အိၣ်န့ၣ် ယ့ၣ်ၡူးဒီသဒၢလီၤအသး အဃိ အမၤလၢပှဲၤထီၣ် ကစၢ်ယွၤအတၢ်တိာ်ပာ်သ့ဝဲ. ပဝဲစ့ၢ်ကီး ပမၤဒ်ယ့ၣ်ၡူးမၤဝဲအသိးသ့.—မး ၁၀:၁၆.
အဝဲသ့ၣ် “ပှဲၤဒီး တၢ်သူၣ်မံသးမုာ်” (မၤတၢ် ၂၀:၅-၁၂)
၁၂, ၁၃. (က) စီၤအူတူၤဃူး ဂဲၤဆၢထၢၣ်သမူထီၣ်က့ၤအဃိ ဒီပုၢ်ဝဲၢ်လၢတၢ်အိၣ်ဖှိၣ်ပူၤတဖၣ် တူၢ်ဘၣ်ဝဲဒ်လဲၣ်. (ခ) ပှၤလၢ အဟံၣ်ဖိဃီဖိ သံသဒၣ်အီၤတဖၣ်န့ၣ် အအိၣ်ဒီးတၢ်မုၢ်လၢ်မနုၤလဲၣ်.
၁၂ စီၤပီလူးဒီးအသကိးတဖၣ်န့ၣ် လဲၤတၢ်လၢ ကီၢ်မၤက့းဒနံအပူၤဒ်သိးသိး ဒီးလၢခံန့ၣ် ဖျါလၢအဝဲသ့ၣ် တလဲၤတၢ်ဒ်သိးသိးလၢၤဘၣ်. သနာ်က့လၢခံန့ၣ် အဝဲသ့ၣ် က့ၤထံၣ်လိာ်သးလၢ ဝ့ၢ်တြိၤအါအပူၤ.d လံာ်စီဆှံတဲဝဲ “လၢယဲၢ်သီ အတီၢ်ပူၤန့ၣ် ပလဲၤတုၤလၢ . . . တြိၤအါ.”e (မၤတၢ် ၂၀:၆) လၢညါန့ၣ် စီၤပီလူး မၤသမူထီၣ်က့ၤဝဲ စီၤအူတူၤဃူး ဖဲတြိၤအါအံၤ. ထံၣ်တမှံကွၢ်ဒ်အံၤ ဖဲစီၤပီလူး မၤသမူထီၣ်က့ၤ စီၤအူတူၤဃူးအခါ ဒီပုၢ်ဝဲၢ်မုၣ်ခွါ လၢတၢ်အိၣ်ဖှိၣ်ဖဲန့ၣ် အသးကမၤသးဒ်လဲၣ်. လံာ်စီဆှံပာ်ဖျါထီၣ်ဝဲလၢ အဝဲသ့ၣ် “ပှဲၤဒီး တၢ်သူၣ်မံသးမုာ်.”—မၤတၢ် ၂၀:၁၂.
၁၃ ဆၢကတီၢ်ခဲအံၤ ပတထံၣ်ဘၣ်တၢ်လီၤလး ဒ်သိးလၢညါလၢၤဘၣ်. ဘၣ်ဆၣ် လံာ်စီဆှံအတၢ်စံးပာ် ဘၣ်ဃးဒီး ပှၤသံကဂဲၤဆၢထၢၣ်သမူထီၣ်က့ၤအဂ့ၢ်န့ၣ် ကဲထီၣ် “တၢ်သူၣ်မံသးမုာ်” လၢပှၤလၢအဟံၣ်ဖိဃီဖိ သံသဒၣ်အီၤတဖၣ်အဂီၢ်. (ယိၤဟၣ် ၅:၂၈, ၂၉) စီၤအူတူၤဃူး ဂဲၤဆၢထၢၣ်သမူထီၣ်က့ၤ ဘၣ်ဆၣ် ခီဖျိလၢ အတလၢတပှဲၤဘၣ်အဃိ လၢခံန့ၣ် အဘၣ်သံကဒါ. (ရိ ၆:၂၃) သနာ်က့ ပှၤလၢ အကဂဲၤဆၢထၢၣ်သမူထီၣ်က့ၤ လၢဟီၣ်ခိၣ်သီအပူၤန့ၣ် အအိၣ်ဒီးတၢ်မုၢ်လၢ်လၢ အကအိၣ်မူဘၣ် လီၤထူလီၤယိာ် ဒီးမ့မ့ၢ်ပှၤလၢ အဂဲၤဆၢထၢၣ်သမူထီၣ်က့ၤလၢ ကပၢဃုာ်တၢ်ဒီး ယ့ၣ်ၡူးလၢမူခိၣ်န့ၣ် အဝဲသ့ၣ်တသံနီတဘျီလၢၤဘၣ်. (၁ ကရံၣ် ၁၅:၅၁-၅၃) ပှၤလၢ အဘၣ်တၢ်ဒိးဖှူအီၤမ့ၢ်ဂ့ၤ, “သိလၢအဂၤတဖၣ်” မ့ၢ်ဂ့ၤ အဝဲသ့ၣ်အိၣ်ဒီးတၢ်မုၢ်လၢ်လၢ ဘၣ်ဃးဒီး တၢ်ဂဲၤဆၢထၢၣ်သမူထီၣ်က့ၤအဃိ အဝဲသ့ၣ် “ပှဲၤဒီး တၢ်သူၣ်မံသးမုာ်.”—ယိၤ ၁၀:၁၆.
“လၢကမျၢၢ်အမဲာ်ညါ ဒီးလၢတဟံၣ်ဘၣ် တဟံၣ်” (မၤတၢ် ၂၀:၁၃-၂၄)
၁၄. ဖဲအ့းဖ့းစူး တၢ်အိၣ်ဖှိၣ်သးပှၢ်တဖၣ် ဟဲတုၤလၢ ဝ့ၢ်မံလ့ၤတူးအခါ စီၤပီလူး တဲအဝဲသ့ၣ်ဒ်လဲၣ်.
၁၄ စီၤပီလူး ဒီးအသကိးတဖၣ် ဟးထီၣ်လၢ ဝ့ၢ်တြိၤအါ ဒီးလဲၤလၢ အၣ်စူး ဒီးဆဲးလဲၤဝဲလၢ ဝ့ၢ်မ့ၤတိၤလ့, ကီးဃံအူး, ကီးစါမူး ဒီးဝ့ၢ်မံလ့ၤတူး. စီၤပီလူး ပာ်လီၤအသးလၢ တချုးလၢ ဘူၣ်ယဲၢ်ဆံဘၣ်ဒံးဘၣ်န့ၣ် အကလဲၤ တုၤအတုၤလၢ ဝ့ၢ်ယရူၤၡလ့ၣ်. အဃိ အဝဲတအိၣ်ပတုာ်လၢ ဝ့ၢ်အ့းဖ့းစူးလၢၤဘၣ်. ဘၣ်ဆၣ် အအဲၣ်ဒိးတဲတၢ်ဒီး ဝ့ၢ်အ့းဖ့းစူး အတၢ်အိၣ်ဖှိၣ်သးပှၢ်တဖၣ်ဒံးအဃိ အမၢ တၢ်အိၣ်ဖှိၣ်သးပှၢ်တဖၣ်အံၤ ဟဲလၢဝ့ၢ်မံလ့ၤတူး. (မၤတၢ် ၂၀:၁၃-၁၇) ဖဲဝ့ၢ်အ့းဖ့းစူး အတၢ်အိၣ်ဖှိၣ်သးပှၢ်တဖၣ် ဟဲတုၤအခါ စီၤပီလူး တဲအဝဲသ့ၣ်လၢ “စးထီၣ်ဖဲ မုၢ်နံၤလၢ ယခါလီၤယခီၣ်လၢ အၤစံကီၢ်ရ့ၣ် အပူၤလံၤလံၤ ယအိၣ်မူလၢ သုကျါဒ်လဲၣ်ဒ်လဲၣ်န့ၣ် သုသ့ၣ်ညါ ဂ့ၤဂ့ၤလီၤ. ယမၤကစၢ်အတၢ်မၤ ဒ်ကုၢ်တဂၤအသိး လၢတၢ်ဆီၣ်လီၤသး ဒိၣ်ဒိၣ်မုၢ်မုၢ်အပူၤလီၤ. ဒီးပှၤယူဒၤဖိတဖၣ် ကူၣ်အၢယၤအဃိ ယလဲၤခီဖျိ တၢ်မၤကွၢ် အကလုာ်ကလုာ် လၢတၢ်မဲာ်ထံမဲာ်နိ အပူၤလီၤ. ဘၣ်ဆၣ် တၢ်လၢ အကဲဘျုး လၢသုဂီၢ်န့ၣ် ယတပာ်ခူသူၣ်အီၤ နီတမံၤဘၣ်, ယစံၣ်တဲၤတဲလီၤသု တၢ်ခဲလၢာ်လီၤ. ဒီးယသိၣ်လိသုလၢ ကမျၢၢ်အမဲာ်ညါ ဒီးလၢတဟံၣ်ဘၣ် တဟံၣ်လီၤ. ယအုၣ်ယသး လီၤတံၢ်လီၤဆဲးလၢ ပှၤယူဒၤဖိဒီး ပှၤကြံးဖိတဖၣ် အမဲာ်ညါ ဒ်သိးအဝဲသ့ၣ် ကပီၢ်ယၢ်လီၤက့ၤအသး ဒီးဘူၣ်ထီၣ်ဘါထီၣ် ကစၢ်ယွၤ ဒီးစူၢ်က့ၤနာ်က့ၤ ပကစၢ် ယ့ၣ်ၡူးအဂီၢ်လီၤ.”—မၤတၢ် ၂၀:၁၈-၂၁.
၁၅. ပဟးစံၣ်တဲၤတဲလီၤတၢ် လၢတဟံၣ်ဘၣ်တဟံၣ်အဃိ ကဲဘျုးဝဲဒ်လဲၣ်.
၁၅ လၢပစိၤခဲအံၤန့ၣ် တၢ်စံၣ်တဲၤတဲလီၤတၢ် အကျိၤအကျဲအိၣ်ဝဲအါမး. ဒ်စီၤပီလူးအသိး ပကျဲးစၢးလဲၤလၢ ပှၤအိၣ်ဝဲအလီၢ် ဒ်သိးဒီး ပှၤအိၣ်ခိးကါအလီၢ်, ကျဲလၢပှၤဟးထီၣ်ဟးလီၤအါ ဒီးပှၤဆါတၢ်ပှ့ၤတၢ်အလီၢ်. သနာ်က့ တၢ်စံၣ်တဲၤတဲလီၤတၢ် လၢတဟံၣ်ဘၣ်တဟံၣ်န့ၣ် ပထံၣ်အီၤလၢအမ့ၢ် တၢ်စံၣ်တဲၤတဲလီၤ အကျိၤအကျဲလၢ အရ့ဒိၣ်ကတၢၢ်ဒံး. ဘၣ်မနုၤအဃိလဲၣ်န့ၣ် မ့ၢ်လၢတၢ်စံၣ်တဲၤတဲလီၤတၢ် တဟံၣ်ဘၣ်တဟံၣ်န့ၣ် ကဒုးအိၣ်ထီၣ် တၢ်ခွဲးတၢ်ယာ်လၢ ပှၤကိးဂၤဒဲး ကနၢ်ဟူဘၣ် တၢ်သးခုကစီၣ်ထီဘိအဂီၢ်. အဃိ တၢ်စံၣ်တဲၤတဲလီၤတၢ် အကျိၤအကျဲတခါအံၤန့ၣ် ပာ်ဖျါထီၣ်ဝဲလၢ ကစၢ်ယွၤ တကွၢ်ဒိၣ်ဆံးအါစှၤတၢ်ဘၣ်. ဒီးအဂၤတမံၤန့ၣ် ပကမၤစၢၤဘၣ် ပှၤလၢအသးဘျၢတဖၣ် ဒ်သိး အဝဲသ့ၣ် ကသ့ၣ်ညါထီၣ် ကစၢ်ယွၤအဂီၢ်. တကးဒံးဘၣ် ပတၢ်နာ်ကအါထီၣ် ဒီးပကအိၣ်ဒီး တၢ်တူၢ်န့ၢ်ခီၣ်ကဲ. ခီဖျိလၢ ပလဲၤစံၣ်တဲၤတဲလီၤတၢ် “လၢကမျၢၢ်အမဲာ်ညါ ဒီးလၢတဟံၣ်ဘၣ် တဟံၣ်.” လၢတၢ်သးဆူၣ်ပူၤအဃိ ပှၤဂၤတဖၣ် ကသ့ၣ်ညါဝဲလၢ ပမ့ၢ်ခရံာ်ဖိလၢအမ့ၢ်အတီ.
၁၆, ၁၇. စီၤပီလူး ပာ်ဖျါထီၣ်တၢ်သးဒူဒ်လဲၣ် ဒီးခရံာ်ဖိလၢပစိၤခဲအံၤစ့ၢ်ကီး ကွၢ်စီၤပီလူး အဒိအတဲာ်ဒ်လဲၣ်.
၁၆ စီၤပီလူးတဲဘၣ် အ့းဖ့းစူး တၢ်အိၣ်ဖှိၣ်သးပှၢ်တဖၣ်လၢ အက့ၤမ့ၢ်တုၤလၢ ဝ့ၢ်ယရူၤၡလ့ၣ်န့ၣ် အကထံၣ်ဘၣ်ဒီး တၢ်ကီတၢ်ခဲဒ်လဲၣ်န့ၣ် အတသ့ၣ်ညါဘၣ်. အတဲဝဲလၢ “ဘၣ်ဆၣ် ယသးသမူန့ၣ် ယတထံၣ်အီၤဒ် တၢ်လၢ အရ့ဒိၣ်လၢယဂီၢ် နီတစဲးဘၣ်. တၢ်လၢ အရ့ဒိၣ်န့ၣ်မ့ၢ်ဝဲ ယကမၤဝံၤက့ၤ ယမူဒါဒီး တၢ်စံၣ်တဲၤတဲလီၤ တၢ်မၤလၢ ကစၢ်ယ့ၣ်ၡူး ဟ့ၣ်လီၤယၤလၢ ယကအုၣ်ယသး လီၤတံၢ်လီၤဆဲးလၢ တၢ်သးခုကစီၣ် ဘၣ်ဃးဒီး ကစၢ်ယွၤ အတၢ်သးကညီၤ ဒိၣ်ဒိၣ်မုၢ်မုၢ် အဂ့ၢ်.” (မၤတၢ် ၂၀:၂၄) စီၤပီလူး ပာ်ဖျါထီၣ်ဝဲ တၢ်သူၣ်ဒူသးဒူ ဒီးအတပျဲဝဲလၢ အတၢ်အိၣ်ဆူၣ်အိၣ်ချ့ လၢအတဂ့ၤဘၣ်မ့ၢ်ဂ့ၤ, တၢ်မၤအၢမၤနးမ့ၢ်ဂ့ၤ, တၢ်တမံၤဂ့ၤတမံၤဂ့ၤမ့ၢ်ဂ့ၤ ကမၤပတုာ်အီၤလၢ အကမၤတၢ်လၢ ကစၢ်ယွၤအဲၣ်ဒိးလၢ အမၤဝဲန့ၣ်ဘၣ်.
၁၇ ဆၢကတီၢ်ခဲအံၤစ့ၢ်ကီး ခရံာ်ဖိတဖၣ်ထံၣ်ဘၣ်ဒီး တၢ်ကီတၢ်ခဲအါမံၤ. တနီၤန့ၣ်ထံၣ်ဘၣ်ဒီး ပဒိၣ်တြီဃာ် ပတၢ်ကရၢကရိ အတၢ်ဖံးတၢ်မၤ ဒီးတနီၤန့ၣ်ထံၣ်ဘၣ်ဝဲ တၢ်မၤအၢမၤနး. မ့မ့ၢ် ခရံာ်ဖိအဂၤတနီၤန့ၣ် အတၢ်အိၣ်ဆူၣ်အိၣ်ချ့တဂ့ၤဘၣ်, တနီၤန့ၣ်ထံၣ်ဘၣ်ဒီး တၢ်သူၣ်အုးသးအုး ဘၣ်ဆၣ် အဝဲသ့ၣ်ဆဲးတီဒီးကစၢ်ယွၤဒံး. ဒီးမ့မ့ၢ်ခရံာ်ဖိလၢ အသးစၢ်တဖၣ်န့ၣ် ဖဲအဝဲသ့ၣ်လဲၤထီၣ်ကၠိအခါ အသကိးတဖၣ် ဆီၣ်သနံးအီၤလၢ အကမၤတၢ်လၢအတဂ့ၤဘၣ်. ဘၣ်ဆၣ် ပမ့ၢ်ထံၣ်ဘၣ်ဒီး တၢ်ကီတၢ်ခဲ ဒ်လဲၣ်ဂ့ၤဒ်လဲၣ်ဂ့ၤန့ၣ် ဒ်စီၤပီလူးအသိး ပပာ်လီၤပသးလၢပက ‘အုၣ်ပသး လီၤတံၢ်လီၤဆဲးလၢ တၢ်သးခုကစီၣ်’ ဒီးပတပျဲလၢ တၢ်တမံၤဂ့ၤတမံၤဂ့ၤ ကမၤပတုာ်ပှၤဘၣ်.
“ပလီၢ်သုသး ဘၣ်ဃးဒီး သုနီၢ်ကစၢ်ဒီး သိခဲလၢာ်” (မၤတၢ် ၂၀:၂၅-၃၈)
၁၈. စီၤပီလူး ကကဆှီဒီး ပှၤခဲလၢာ် အသွံၣ်အဂီၢ် အမၤဝဲဒ်လဲၣ် ဒီးအ့းဖ့းစူး အတၢ်အိၣ်ဖှိၣ်သးပှၢ်တဖၣ် ကွၢ်လိအီၤ သ့ဒ်လဲၣ်.
၁၈ ဖဲအ့းဖ့းစူး တၢ်အိၣ်ဖှိၣ်သးပှၢ်တဖၣ်ဟဲလၢ စီၤပီလူးအိၣ်အခါ စီၤပီလူး ဟ့ၣ်ကူၣ်အဝဲသ့ၣ်လီၤတံၢ်လီၤဆဲး ဒီးတဲဘၣ် တၢ်အိၣ်ဖှိၣ်သးပှၢ်တဖၣ်အံၤလၢ အနီၢ်ကစၢ်ဒၣ်ဝဲ ကွၢ်ထွဲဝဲတၢ်အိၣ်ဖှိၣ်တဖၣ် ဂ့ၤဂ့ၤဘၣ်ဘၣ်. စီၤပီလူး တဲဘၣ်အဝဲသ့ၣ်လၢ အဝဲသ့ၣ်ထံၣ်လိာ်အသး တဘျီအံၤန့ၣ် ဘၣ်သ့ၣ်သ့ၣ် ကမ့ၢ်အလီၢ်ခံကတၢၢ်တဘျီ. ဒီးစီၤပီလူး ဆဲးတဲအဝဲသ့ၣ်လၢ “ယကဆှီဒီး ပှၤခဲလၢာ်အသွံၣ်, မ့ၢ်လၢ ယတဲဘၣ်သု တၢ်ခဲလၢာ် လၢအဘၣ်ဃးဒီး ကစၢ်ယွၤ အတၢ်ဘၣ်သး ပျီပျီ အဃိလီၤ.” ဒ်သိး တၢ်အိၣ်ဖှိၣ်သးပှၢ်တဖၣ်အံၤ ကကွၢ်လိ စီၤပီလူး ဒီးကကဆှီဒီး ပှၤခဲလၢာ် အသွံၣ်အဂီၢ် အဝဲသ့ၣ် ကဘၣ်မၤဝဲဒ်လဲၣ်. စီၤပီလူး တဲဘၣ်အဝဲသ့ၣ်လၢ “ပလီၢ်သုသး ဘၣ်ဃးဒီး သုနီၢ်ကစၢ်ဒီး သိခဲလၢာ်တက့ၢ်. သးစီဆှံ ပာ်ထီၣ်သုလၢ ပှၤကွၢ်ထွဲတၢ်တဖၣ် ဒ်သိး သုကကဲပှၤကွၢ်သိလၢ ကစၢ်ယွၤ အတၢ်အိၣ်ဖှိၣ်အဂီၢ်လီၤ. တၢ်အိၣ်ဖှိၣ်အံၤ ကစၢ်ယွၤပှ့ၤဝဲဒီး အနီၢ်ကစၢ်အဖိခွါ အသွံၣ်လီၤ.” (မၤတၢ် ၂၀:၂၆-၂၈) တကးဒံးဘၣ် စီၤပီလူး ဟ့ၣ်ပလီၢ် အဝဲသ့ၣ်လၢ “ထွံၣ်မံၤ အဒူတဖၣ်” ကဟဲနုာ်လီၤလၢ တၢ်အိၣ်ဖှိၣ်အပူၤ ဒီး “ကတဲက့ၣ်တဲကူတၢ် ဒ်သိး ကကွဲန့ၢ်လွဲန့ၢ် ပှၤလၢ အစူၢ်က့ၤနာ်က့ၤတၢ်တဖၣ် လၢအဝဲသ့ၣ် အအိၣ်.” အဃိ တၢ်အိၣ်ဖှိၣ်သးပှၢ်တဖၣ် ကဘၣ်မၤဝဲဒ်လဲၣ်. စီၤပီလူး တဲဘၣ်အဝဲသ့ၣ်လၢ “အိၣ်ပလီၢ်သး ဒီးသ့ၣ်နီၣ်ထီၣ်လၢ ယသိၣ်လိသု တဂၤစုာ်စုာ် လၢမဲာ်ထံမဲာ်နိအပူၤ ထီဘိ, လၢမုၢ်ဆါဒီး လၢမုၢ်နၤ လၢသၢနံၣ်အတီၢ်ပူၤလီၤ.”—မၤတၢ် ၂၀:၂၉-၃၁.
၁၉. ဖဲတၢ်မၢဖိအစိၤန့ၣ် တၢ်မနုၤဟဲအိၣ်ထီၣ်လဲၣ် ဒီးလၢခံန့ၣ် တၢ်ဆဲးမၤအသးဒ်လဲၣ်.
၁၉ ဖဲယ့ၣ်ၡူးသံဝံၤအလီၢ်ခံအနံၣ် ၆၀ ဃၣ်ဃၣ်န့ၣ် “ထွံၣ်မံၤ အဒူတဖၣ်” ဟဲနုာ်လီၤလၢ တၢ်အိၣ်ဖှိၣ်အပူၤ ဒီးဖဲ ခ.န ၉၈ နံၣ်န့ၣ် တၢ်မၢဖိယိၤဟၣ် ကွဲးဝဲလၢ “ခဲအံၤန့ၣ် ပှၤလၢအထီဒါခရံာ် အိၣ်ဖျါထီၣ်ဝဲ အါဂၤလံ. . . . လၢညါ အဝဲသ့ၣ် အိၣ်လၢပကျါ ဘၣ်ဆၣ် အဝဲသ့ၣ် ဟးထီၣ်ကွံာ် မ့ၢ်လၢ အဝဲသ့ၣ် တဘၣ်ဃးဒီးပှၤဘၣ် အဃိလီၤ. အဝဲသ့ၣ် မ့ၢ်ဘၣ်ဃးဒီးပှၤန့ၣ် အဝဲသ့ၣ်ကဆဲးအိၣ်လၢ ပကျါ.” (၁ ယိၤ ၂:၁၈, ၁၉) တဆီဘၣ်တဆီ ဒီးဖဲယ့ၣ်ၡူးသံအနံၣ် ၂၀၀ ဘျဲၣ်ဝံၤအလီၢ်ခံ (သၢယၤဖှိၣ်) န့ၣ်ပှၤလၢအထီဒါက့ၤ တၢ်မ့ၢ်တၢ်တီ လၢအတီခိၣ်ရိၤမဲတၢ်တဖၣ်န့ၣ် အဝဲသ့ၣ်ထံၣ်လီၤအသးလၢ အပတီၢ်ထီန့ၢ်ဒံး ပှၤအဂၤလၢ တၢ်အိၣ်ဖှိၣ်ပူၤခဲလၢာ်. တကးဒံးဘၣ် ဖဲယ့ၣ်ၡူးသံန့ၢ်ဝဲအနံၣ် ၃၀၀ ဘျဲၣ်ဝံၤအလီၢ်ခံ (လွံၢ်ယၤဖှိၣ်) န့ၣ်ရိမ့ၤအပဒိၣ် ခါစထဲးထံ ပာ်ပနီၣ်ဝဲ ခရံာ်ဖိတၢ်ဘူၣ်တၢ်ဘါ လၢအကမၣ်အံၤ ဒ်တၢ်ဘူၣ်တၢ်ဘါ လၢအဘၣ်လိာ်သးဒီး တၢ်သိၣ်တၢ်သီ. လၢတၢ်ဘူၣ်တၢ်ဘါတခါအံၤအပူၤန့ၣ် ပှၤလၢအထီဒါက့ၤ တၢ်မ့ၢ်တၢ်တီ လၢအတီခိၣ်ရိၤမဲတၢ်တဖၣ် တဲက့ၣ်တဲကူတၢ် ဒီးကျဲၣ်ကျီဝဲ လံာ်စီဆှံအတၢ်သိၣ်လိ ဒီးတၢ်ဘူၣ်တၢ်ဘါအကမၣ် အတၢ်စူၢ်တၢ်နာ် ဒီးအလုၢ်အလၢ်တဖၣ်. ဒီးပှၤပာ်ပနီၣ်အဝဲသ့ၣ် ဒ်ခရံာ်ဖိလၢအဘၣ်လိာ်သးဒီး တၢ်သိၣ်တၢ်သီ. အဃိ ပှၤလၢအထီဒါက့ၤ တၢ်ဘူၣ်တၢ်ဘါအမ့ၢ်အတီတဖၣ် အတၢ်သိၣ်လိ ဒီးအလုၢ်အလၢ်တဖၣ်န့ၣ် ပထံၣ်ဘၣ်တုၤလၢ ခရံာ်ဖိလၢပစိၤခဲအံၤအကျါ.
၂၀, ၂၁. စီၤပီလူး ဟ့ၣ်လီၤအသးန့ၣ် အပာ်ဖျါထီၣ်ဝဲဒ်လဲၣ် ဒီးခရံာ်ဖိတၢ်အိၣ်ဖှိၣ်သးပှၢ် လၢပစိၤခဲအံၤမၤဝဲ ဒ်စီၤပီလူးအသိးဒ်လဲၣ်.
၂၀ စီၤပီလူး တဟံန့ၢ်တၢ်ခွဲးတၢ်ယာ်လၢ တၢ်အိၣ်ဖှိၣ်ဖိတဖၣ် အဖီခိၣ်ဘၣ်. ဒ်သိးအတကဲထီၣ် တၢ်ဝံတၢ်ယိးလၢ တၢ်အိၣ်ဖှိၣ်ဖိအဂီၢ် တဂ့ၤအဂီၢ် အမၤတၢ်လၢ အနီၢ်ကစၢ်. အဃိ စီၤပီလူးန့ၣ် အလီၤဆီဒီး ပှၤလၢအဟံန့ၢ် တၢ်ခွဲးတၢ်ယာ်လၢ တၢ်အိၣ်ဖှိၣ်ဖိတဖၣ် အဖီခိၣ်. တကးဒံးဘၣ် အမၤစၢၤ ဒီပုၢ်ဝဲၢ်မုၣ်ခွါတဖၣ် ဒီးအတမုၢ်လၢ်ဝဲလၢ အကန့ၢ်ဘၣ်ကျိၣ်စ့လၢ ဒီပုၢ်ဝဲၢ်မုၣ်ခွါတဖၣ်အအိၣ်ဘၣ်. အဟ့ၣ်ဂံၢ်ဟ့ၣ်ဘါဝဲ အ့းဖ့းစူးတၢ်အိၣ်ဖှိၣ်သးပှၢ်တဖၣ် လၢကမၤစၢၤ ဒီပုၢ်ဝဲၢ်မုၣ်ခွါတဖၣ် ဒီးတဘၣ်မုၢ်လၢ်လၢ အဝဲသ့ၣ် ကန့ၢ်ဘၣ်တၢ်လၢ ဒီပုၢ်ဝဲၢ်မုၣ်ခွါအအိၣ်ဘၣ်. အဝဲတဲဘၣ် တၢ်အိၣ်ဖှိၣ်သးပှၢ်တဖၣ်လၢ “မၤစၢၤ ပှၤလၢ အဂံၢ်စၢ်ဘါစၢ် တဖၣ်” ဒီး “သ့ၣ်နီၣ်ထီၣ် ကစၢ်ယ့ၣ်ၡူး အတၢ်ကတိၤ လၢအတဲဝဲလၢ ‘ဟ့ၣ်တၢ်န့ၣ် ဒုးအိၣ်ထီၣ် တၢ်သးခုအါန့ၢ်ဒံး ဒိးန့ၢ်ဘၣ်တၢ်ဒံး.’”—မၤတၢ် ၂၀:၃၅.
၂၁ ဒ်စီၤပီလူးအသိး တၢ်အိၣ်ဖှိၣ်သးပှၢ်လၢ မုၢ်မဆါတနံၤအံၤန့ၣ် အဝဲသ့ၣ်ဟ့ၣ်လီၤအသး. အဝဲသ့ၣ်လီၤဆီဒီး ခရံာ်ဖိတၢ်ဘူၣ်တၢ်ဘါခိၣ်နၢ်လၢ အဃ့အီၣ်စ့လၢ တၢ်အိၣ်ဖှိၣ်ဖိတဖၣ်အအိၣ်. တၢ်အိၣ်ဖှိၣ်သးပှၢ်တဖၣ် သ့ၣ်ညါဝဲလၢ အအိၣ်ဒီးမူဒါလၢအကဘၣ်ကဲ “ပှၤကွၢ်သိလၢ ကစၢ်ယွၤ အတၢ်အိၣ်ဖှိၣ်အဂီၢ်” အဃိ အဝဲသ့ၣ် ဟ့ၣ်လီၤအသး ဒီးကွၢ်ထွဲဝဲသိတဖၣ် လၢတၢ်သူၣ်အိၣ်သးအိၣ်အပူၤ. လၢတၢ်အိၣ်ဖှိၣ်အပူၤန့ၣ် ပှၤလၢအပာ်ထီၣ်ထီအသး ဒီးပှၤလၢအအဲၣ်ဒိးလၢ ပှၤကပာ်ဒိၣ်အီၤန့ၣ် ကစၢ်ယွၤ တဘၣ်သူၣ်ဘၣ်သး အဝဲသ့ၣ်ဘၣ်. ပှၤလၢအပာ်ထီၣ်ထီအသး ဒီးဃုအ “နီၢ်ကစၢ်အလၤကပီၤ” န့ၣ်လၢခံကတၢၢ် အဝဲသ့ၣ် မၤတၢ်တကဲထီၣ်လိၣ်ထီၣ်ဘၣ်.—ကတိၤ ၁၁:၂; ၂၅:၂၇.
“အဝဲသ့ၣ် ကိးဂၤဒဲး ဟီၣ်ဝဲသပှၢ်တၢၢ်.”—မၤတၢ် ၂၀:၃၇
၂၂. ဘၣ်မနုၤအဃိ အ့းဖ့းစူးတၢ်အိၣ်ဖှိၣ်သးပှၢ်တဖၣ် အဲၣ်ဘၣ်ဝဲ စီၤပီလူးလဲၣ်.
၂၂ စီၤပီလူးအဲၣ်ဝဲ ဒီပုၢ်ဝဲၢ်မုၣ်ခွါတဖၣ်နီၢ်ကီၢ်အဃိ ဒီပုၢ်ဝဲၢ်မုၣ်ခွါတဖၣ် အဲၣ်အီၤဒိၣ်မး. အဃိ ဖဲအဝဲသ့ၣ်ကဘၣ်လီၤဖးအခါ “အဝဲသ့ၣ် ကိးဂၤဒဲး ဟီၣ်ဝဲသပှၢ်တၢၢ် ဒီးဖိးဟုဝဲ စီၤပီလူး ဒီးနၢမူအီၤလၢ တၢ်အဲၣ်တၢ်ကွံ အပူၤ.” (မၤတၢ် ၂၀:၃၇, ၃၈) ဆၢကတီၢ်ခဲအံၤ ပှၤလၢအဟ့ၣ်လီၤ အတၢ်ဆၢကတီၢ်, တၢ်ဂံၢ်တၢ်ဘါ ဒီးတၢ်ထူးတၢ်တီၤ လၢဒီပုၢ်ဝဲၢ်မုၣ်ခွါတဖၣ်အဂီၢ် ဒ်စီၤပီလူးအသိးန့ၣ် ဒီပုၢ်ဝဲၢ်မုၣ်ခွါတဖၣ် ပာ်လုၢ်ပာ်ပှ့ၤ ဒီးအဲၣ်ဘၣ်အဝဲသ့ၣ်ဒိၣ်မး. ဖဲပဆိမိၣ်ထံ စီၤပီလူးအဒိအတဲာ်အခါ ပသ့ၣ်ညါဘၣ်လၢ စီၤပီလူးန့ၣ်အ “ကဆှီဒီး ပှၤခဲလၢာ်အသွံၣ်” နီၢ်ကီၢ်.—မၤတၢ် ၂၀:၂၆.
a ကွၢ်တၢ်လွံၢ်နၢၣ် လၢအမ့ၢ် “စီၤပီလူး အလံာ်ပရၢ လၢအကွဲးဝဲ ဖဲအအိၣ်လၢ ကီၢ်မၤက့းဒနံအခါ.”
b လီၤဂာ်လၢ ဖဲစီၤပီလူးအိၣ်လၢ ဝ့ၢ်ကရံၣ်သူးတဘျီအံၤ အခါန့ၣ် အကွဲးဝဲ လံာ်ရိမ့ၤ.
c ကွၢ်တၢ်လွံၢ်နၢၣ် လၢအမ့ၢ် “စီၤပီလူး လဲၤဆှၢတၢ်မၤဘူၣ်တဖၣ်.”
d ဖဲမၤတၢ် ၂၀:၅, ၆ န့ၣ်စီၤလူၤကၣ် သူဝဲတၢ်ကတိၤ လၢအမ့ၢ် “ပှၤ” ဒီး “ပ” အဃိ အပာ်ဖျါထီၣ်ဝဲလၢ အထံၣ်လိာ်အသးဒီး စီၤပီလူး လၢဝ့ၢ်ဖံလံးပံၤ ဒီးစီၤပီလူး လဲၤကိးအီၤလၢ ဝ့ၢ်တြိၤအါ.—မၤတၢ် ၁၆:၁၀-၁၇, ၄၀.
e အဝဲသ့ၣ် ဒိးထီၣ်ကဘီလၢဝ့ၢ်ဖံလံးပံၤ ဒီးလဲၤတုၤလၢဝ့ၢ်တြိၤအါန့ၣ် ယံာ်ဝဲယဲၢ်သီညါ. ဘၣ်ဆၣ် လၢအပူၤကွံာ်န့ၣ် အဝဲသ့ၣ်လဲၤတၢ် ယံာ်ဝဲခံသီလီၤ. ဒီးဘၣ်သ့ၣ်သ့ၣ်ကမ့ၢ်လၢ မူခိၣ်ကလံၤသီၣ်ဂီၤ တဂ့ၤဘၣ်အဃိ အတၢ်လဲၤတဘျီအံၤ ယံာ်ဒိၣ်ထီၣ်တစဲး.—မၤတၢ် ၁၆:၁၁.