ခရံာ်ဖိအတၢ်အိၣ်မူဒီးတၢ်စံၣ်တဲၤတဲလီၤတၢ်ကၠိ ကၠိဖိလံာ်တၢ်မၤလိတၢ်ဂ့ၢ်ဘျးစဲ
လါစဲးပတ့ဘၢၣ် ၄-၁၀
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ| အ့ၤစတၢ် ၁-၂
“ဂုာ်ကျဲးစၢး ဒ်သိးနကအိၣ်ဒီး တၢ်ဆီၣ်လီၤသး ဒ်နီၢ်အ့ၤစတၢ်အသိး”
ဖဲနထံၣ်ဘၣ် တၢ်မၤကွၢ်အခါ အိၣ်ဒီးတၢ်ဆီၣ်လီၤသးတက့ၢ်
၁၁ ဖဲပှၤပတြၢၤပှၤ မ့တမ့ၢ် ပှၤပတြၢၤပှၤတလၢကွံာ်အခၢးအခါ ပတၢ်ဆီၣ်လီၤသးအိၣ်ဧါတအိၣ်ဧါန့ၣ် ကဖျါထီၣ်ဝဲလီၤ. နီၢ်အ့ၤစတၢ်န့ၣ် ဒိးန့ၢ်ဘၣ်တၢ်စံးပတြၢၤအါမးလီၤ. အဝဲမ့ၢ်ပိာ်မုၣ်လၢ အဃံလၤဒိၣ်ကတၢၢ်လၢ ကီၢ်ပၤရၣ်အပူၤလီၤ. ဒီးလၢတနံၣ်အတီၢ်ပူၤ ပှၤမၤဃံမၤလၤထီၣ်အီၤ ဃုာ်ဒီးပိာ်မုၣ်လၢအဂၤတဖၣ် ဒ်သိးကပြၢလိာ်အသးလၢ စီၤပၤအမဲာ်ညါအဂီၢ်န့ၣ်လီၤ. စီၤပၤန့ၣ်ဃုထၢဝဲ နီၢ်အ့ၤစတၢ်လၢ ကကဲထီၣ်အနီၢ်ပၤမုၣ်လီၤ. အဝဲကဲထီၣ်ဘၣ်နီၢ်ပၤမုၣ်ဘၣ်ဆၣ် အတၢ်ပာ်သူၣ်ပာ်သးတဆီတလဲဘၣ်. နီၢ်အ့ၤစတၢ်တပာ်ထီၣ်ထီအသးဘၣ် ဒီးအိၣ်ဒီးတၢ်ဆီၣ်လီၤသး, တၢ်အဲၣ်တၢ်ကွံဒီး တၢ်ယူးယီၣ်ပာ်ကဲလီၤ.—အ့ၤစတၢ် ၂:၉, ၁၂, ၁၅, ၁၇.
အဝဲဆၢထၢၣ်လၢ ကစၢ်ယွၤအပှၤဂီၢ်မုၢ်အဂီၢ်
၁၅ ဖဲတၢ်ဆၢကတီၢ်တုၤဃီၤလၢ နီၢ်အ့ၤစတၢ် ကလဲၤလၢစီၤပၤအမဲာ်ညါန့ၣ် အဝဲအိၣ်ဒီးတၢ်ခွဲးတၢ်ယာ်လၢ ကဃ့အါထီၣ်ဝဲတၢ်ဖိတၢ်လံၤလၢ အကကယၢကယဲထီၣ်အသး ဒ်သိးအကဖျါဃံဖျါလၤအဂီၢ်လီၤ. ဘၣ်ဆၣ် နီၢ်အ့ၤစတၢ် ပာ်ဖျါထီၣ်တၢ်ဆီၣ်လီၤသး, ကယၢကယဲထီၣ်အသး ဒ်စီၤဟ့က့ၤ ဟ့ၣ်ကူၣ်အီၤအသိး ဒီးတဃ့အါထီၣ်ဝဲ တၢ်နီတမံၤဘၣ်. (အ့ၤစတၢ် ၂:၁၅) ဘၣ်သ့ၣ်သ့ၣ် အဝဲကဆိကမိၣ်ဝဲလၢ ထဲတၢ်ဃံတၢ်လၤတခါဧိၤန့ၣ် ထုးန့ၢ်ဝဲစီၤပၤအသးတသ့ဘၣ်. ဒီးဒ်သိးအဝဲကမ့ၢ် မုၣ်ကနီၤလၢ အဖျါလီၤဆီလၢ စီၤပၤအဂီၢ်န့ၣ် တၢ်ဆီၣ်လီၤသး ဒီးတၢ်သူၣ်စူၤသးစူၤ ကမ့ၢ်တၢ်လၢအရ့ဒိၣ်န့ၣ်လီၤ. ဒ်နီၢ်အ့ၤစတၢ် ဆိကမိၣ်ဝဲအသိးန့ၣ် မ့ၢ်အဘၣ်စ့ၢ်ကီးဧါ.
ဖဲနထံၣ်ဘၣ် တၢ်မၤကွၢ်အခါ အိၣ်ဒီးတၢ်ဆီၣ်လီၤသးတက့ၢ်
၁၂ ပမ့ၢ်အိၣ်ဒီးတၢ်ဆီၣ်လီၤသးန့ၣ် ပကကူတၢ်သိးတၢ်ဒီး အိၣ်ထီၣ်အိၣ်လီၤလၢ အပာ်ဖျါထီၣ်တၢ်ယူးယီၣ်ပာ်ကဲပှၤဂၤဒီး ပနီၢ်ကစၢ်လီၤ. ပတကတိၤဒိၣ်လီၤပသး မ့တမ့ၢ် ပတမၤဒ်သိး ပှၤကဆိကမိၣ်ဒိၣ်ပှၤအဂီၢ်ဘၣ်. လၢတၢ်န့ၢ်အလီၢ် ပကဂုာ်ကျဲးစၢးဒ်သိး ပကအိၣ်ဒီး “တၢ်သူၣ်စူၤသးစူၤ” လီၤ. (ဖး ၁ ပ့းတရူး ၃:၃, ၄ တက့ၢ်, ယံးရမံယၤ ၉:၂၃, ၂၄) ပတၢ်စံးတၢ်ကတိၤဒီး တၢ်လၢပမၤတဖၣ်န့ၣ် ကပာ်ဖျါထီၣ်ဝဲ လၢပမ့ၢ်ပှၤဒ်လဲၣ်တဂၤလဲၣ်န့ၣ်လီၤ. အဒိ, ခီဖျိပအိၣ်ဒီးတၢ်ခွဲးတၢ်ယာ်လီၤဆီ, ပသ့ၣ်ညါတၢ်ဂ့ၢ်တၢ်ကျိၤတမံၤမံၤ မ့တမ့ၢ် ပသ့ၣ်ညါပှၤလၢ အတီခိၣ်ရိၤမဲတၢ်တဂၤဂၤအဃိ ဘၣ်သ့ၣ်သ့ၣ် ပကမၤဒ်သိးပှၤဂၤ ကဆိကမိၣ်ဒိၣ်ပှၤလီၤ. မ့တမ့ၢ် ပမၤသကိးတၢ်ဒီးပှၤဂၤဘၣ်ဆၣ် တၢ်ကဲထီၣ်လိၣ်ထီၣ် မ့ၢ်အိၣ်ထီၣ်န့ၣ် ပအဲၣ်ဒိးလၢပှၤကထံၣ်လၢ ပမၤထဲတဂၤလီၤ. ဘၣ်ဆၣ်ဆိကမိၣ်ကွၢ် ယ့ၣ်ၡူးအဂ့ၢ်တက့ၢ်. အဝဲမ့ၢ်သူဝဲတၢ်ကတိၤလၢ ပှၤဂၤကထံၣ်ဒိၣ်အီၤဒီး ပတြၢၤအီၤအဂီၢ်န့ၣ် အဝဲမၤဝဲသ့ဘၣ်ဆၣ် အဝဲတတဲတၢ်ဖဲအသးဘၣ်, အဝဲသူဝဲအယွၤအကလုၢ်ကထါလီၤ. ယ့ၣ်ၡူးတအဲၣ်ဒိးလၢ ပှၤကမၤလၤကပီၤအီၤဘၣ်. ထီဘိန့ၣ်အဝဲအဲၣ်ဒိးဝဲလၢ ပှၤကမၤလၤကပီၤယဟိဝၤယွၤလီၤ.— ယိၤဟၣ် ၈:၂၈.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
နသ့ၣ်ညါဧါ
ပှၤဃုသ့ၣ်ညါတၢ်ဖိတဖၣ် ထံၣ်န့ၢ်ဝဲ ပှၤဖၢၡၢၣ်ဖိ အလံာ်မဲာ်ဖျၢၣ်လၢ အလီၤဂာ်ဒ်သီးဒီး ပျၢ်ခိၣ်ထိး လၢအကွဲးဃာ်ဝဲ ပှၤတဂၤအမံၤလၢ မၤဒူခၤ (Marduka) (လၢကီၤလၤဝါကျိာ်န့ၣ် မၢ်ဒကဲၤ). မၤဒူခၤန့ၣ် အကဲပှၤရဲၣ်ကျဲၤတၢ်တဂၤ ဒီးဖျါလၢ အကွၢ်ထွဲဝဲစ့စရီ လၢကီၢ်ၡူၡၣ်အပူၤ. တကးဒံးဘၣ် ပှၤကူၣ်ဘၣ်ကူၣ်သ့ အါသၢၤ အၢနဲး လၢအဃုမၤလိ ပှၤကီၢ်မုၢ်ထီၣ်ဖိ အတၢ်စံၣ်စိၤတဲစိၤန့ၣ် တဲဝဲလၢ လံာ်မဲာ်ဖျၢၣ် လၢအလီၤဂာ်ဒ်သီးဒီး ပျၢ်ခိၣ်ထိးတခါအံၤ အကဲဝဲ “တၢ်အုၣ်အသး အဂၤတခါ လၢအပာ်ဖျါထီၣ်ဝဲ စီၤမၢ်ဒကဲၤအဂ့ၢ်.”
စးထီၣ်ဖဲ အါသၢၤ အၢနဲး တဲဖျါထီၣ်ဝဲ ဘၣ်ဃးဒီး စီၤမၢ်ဒကဲၤအဂ့ၢ် ဝံၤအလီၢ်ခံ ပှၤကူၣ်ဘၣ်ကူၣ်သ့အါဂၤ ကွဲးကျိာ်ထံက့ၤဝဲ ပှၤဖၢၡၢၣ်ဖိ အလံာ်မဲာ်ဖျၢၣ် လၢအလီၤဂာ်ဒ်သီးဒီး ပျၢ်ခိၣ်ထိး လၢအဂၤတဖၣ်ကၠ့ၤ. တၢ်လၢ အဝဲသ့ၣ် ကွဲးကျိာ်ထံက့ၤဝဲအကျါန့ၣ် ပၣ်ဃုာ်ဒီး ဝ့ၢ်ဖစဲဖလံး အလၢၢ်ဘ့ၣ်ဘၣ်တဖၣ် လၢအကဲဝဲ တိၢ်မၤဘူၣ်အတလါ လၢအဟးဂီၤကွံာ်ဝဲ ဒီးပှၤထံၣ်န့ၢ်ဝဲဘူးဒီး ဝ့ၢ်ခိၣ်ဒူ. တကးဒံးဘၣ် မုၢ်နံၤမုၢ်သီလၢ အအိၣ်လၢ လၢၢ်ဘ့ၣ်ဘၣ်တဖၣ်အံၤအလိၤန့ၣ် အကဲဝဲ ဖဲစီၤပၤစၤစံး တၢတဂၤ ပၢတၢ်အဆၢကတီၢ်. ဒီးလံာ်မဲာ်ဖျၢၣ်တဖၣ်န့ၣ် ပှၤကွဲးဝဲလၢ ပှၤဧ့ၤလၣ်ဖိ အကျိာ် ဒီးအအိၣ်ဒီး ပှၤမံၤအဂၤလၢ ပဖးဘၣ်လၢ လံာ်နီၢ်အ့ၤစတၢ် အပူၤကၠ့ၤ.
ဝ့ၢ်ဖစဲဖလံး အလၢၢ်ဘ့ၣ်ဘၣ်အါဘ့ၣ်န့ၣ် အိၣ်ဝဲဒီး ပှၤမံၤလၢအမ့ၢ် မၤဒူခၤ. ဖဲ စၤစံး တၢတဂၤ ပၢတၢ်အဆၢကတီၢ်န့ၣ် မၤဒူခၤ မၤတၢ်လၢစီၤပၤအနီပူၤ ဖဲကီၢ်ၡူၡၣ် ဒီးအကဲဝဲ ပှၤကွဲးလံာ်ဖိတဂၤ. တကးဒံးဘၣ် လၢလၢၢ်ဘ့ၣ်ဘၣ် တဘ့ၣ်အလိၤန့ၣ် ပှၤကွဲးဃာ်ဝဲ မၤဒူခၤအဂ့ၢ်လၢ မၤဒူခၤန့ၣ် အကဲဝဲ ပှၤကွဲးကျိာ်ထံတၢ်တဂၤ. အဃိ တၢ်ဂ့ၢ်တခါအံၤန့ၣ် အဘၣ်လိာ်သးဒီး တၢ်လၢလံာ်စီဆှံ တဲဝဲ ဘၣ်ဃးဒီး စီၤမၢ်ဒကဲၤအဂ့ၢ်. စီၤမၢ်ဒကဲၤန့ၣ် အကဲဝဲ စီၤပၤအဃၤၡဝ့ရိၣ် လၢအမ့ၢ် စၤစံး တၢတဂၤ အပဒိၣ်ဖးဒိၣ်တဂၤ ဒီးအတဲကျိာ်ဘၣ် အစှၤကတၢၢ် ခံကျိာ်. တကးဒံးဘၣ် စီၤမၢ်ဒကဲၤန့ၣ် ညီနုၢ်အဆ့ၣ်နီၤလၢ စီၤပၤအဟံၣ်အတြဲၤ လၢနီၡူၡၣ်အပူၤ. (အ့ၤစတၢ် ၂:၁၉, ၂၁; ၃:၃) စီၤပၤအဟံၣ်အတြဲၤတခါအံၤ အကဲဝဲ တၢ်သူၣ်ထီၣ်ဖးဒိၣ်တဖျၢၣ် ဒီးစီၤပၤအပဒိၣ်တဖၣ် မၤတၢ်လၢအပူၤ.
တၢ်ကွဲးနီၣ်လၢ လၢၢ်ဘ့ၣ်ဘၣ် ပာ်ဖျါထီၣ်ဝဲ ဘၣ်ဃးဒီး မၤဒူခၤအဂ့ၢ်န့ၣ် အလီၤဂာ်လိာ်သးဒီး စီၤမၢ်ဒကဲၤအဂ့ၢ် လၢပဖးဘၣ်လၢ လံာ်စီဆှံပူၤ. အဝဲသ့ၣ် အိၣ်မူဝဲ တၢ်ဆၢကတီၢ် တကတီၢ်ဃီ, တၢ်လီၢ်တတီၤဃီ ဒီးအဝဲသ့ၣ် ကဲပဒိၣ် ဒီးမၤတၢ်လၢ နီၡူၡၣ်အပူၤ. ခီဖျိလၢ တၢ်ဂ့ၢ်တဖၣ်အံၤ လီၤဂာ်လိာ်သးအဃိ တၢ်အုၣ်သးလၢ ပှၤဃုသ့ၣ်ညါ တၢ်ဖိတၢ်လံၤလၢပျၢၤတဖၣ် ပာ်ဖျါဝဲန့ၣ် ဖျါလီၤဂာ်လၢ အဘၣ်လိာ်သးဒီး စီၤမၢ်ဒကဲၤအဂ့ၢ် လၢပဖးဘၣ်လၢ လံာ်နီၢ်အ့ၤစတၢ်အပူၤ.
၃ စီၤပီလူးလိၣ်ဘၣ် တၢ်မၤစၢၤလီၤ. ဖဲ ခ.န ၅၆ န့ၣ် ပှၤဂီၢ်မုၢ်တွံၢ်ထီၣ် စီၤပီလူး လၢယရူၤၡလ့ၣ် တၢ်လုၢ်ဟံၣ်အချၢ ဒီးဂုာ်ကျဲးစၢး မၤသံအီၤလီၤ. လၢခံတနံၤ ဖဲပှၤလဲၤကိး စီၤပီလူးလၢ ပှၤယူဒၤဖိအကွီၢ်ဘျီၣ် လၢအဒိၣ်ကတၢၢ်အခါ အဒုၣ်အဒါတဖၣ် ဘူးကမၤသံအီၤလီၤ. (မၤတၢ် ၂၁:၃၀-၃၂; ၂၂:၃၀; ၂၃:၆-၁၀) ဖဲန့ၣ်အဆၢကတီၢ် ဘၣ်သ့ၣ်သ့ၣ် စီၤပီလူးကဆိမိၣ်ဘၣ်ဝဲလၢ ‘ယလဲၤခီဖျိ တၢ်မၤအၢမၤနးအံၤ ဘၣ်ကန့ၢ်ဧါ.’
၄ ယ့ၣ်ၡူးမၤစၢၤ စီၤပီလူးဒ်လဲၣ်. ဖဲပှၤဖီၣ်စီၤပီလူးဝံၤ အလီၢ်ခံတနၤန့ၣ် “ကစၢ်” ယ့ၣ်ၡူးဆၢထၢၣ်လၢ အကပၤဒီးတဲအီၤလၢ “ပာ်နသးခူတလ့ၢ်တက့ၢ်. အဂ့ၢ်ဒ်အံၤ, ဒ်နအုၣ်နသးလၢယဂီၢ် လၢယရူၤၡလ့ၣ် အပူၤအသိးန့ၣ်, နဘၣ်အုၣ်နသးလၢ ရိမ့ၤအပူၤ ဒ်န့ၣ်အသိးလီၤ.” (မၤတၢ် ၂၃:၁၁) တၢ်ကတိၤအံၤ ကဟ့ၣ်ဂံၢ်ဟ့ၣ်ဘါ စီၤပီလူးထဲလဲၣ်. ယ့ၣ်ၡူးစံးပတြၢၤ စီၤပီလူး ခီဖျိလၢ အအုၣ်အသးလၢ ယ့ၣ်ၡူးအဂီၢ် လၢယရူၤၡလ့ၣ်အပူၤအဃိလီၤ. ဒီးယ့ၣ်ၡူးအၢၣ်လီၤ စီၤပီလူးလၢ အကကွၢ်ထွဲအီၤတုၤလၢ အလဲၤအုၣ်အသးလၢ ရိမ့ၤပူၤအခါလီၤ. ဖဲစီၤပီလူးနၢ်ဟူဘၣ် တၢ်ကတိၤဒ်အံၤအခါ အဝဲတူၢ်ဘၣ်ဝဲဒ်သိး ဖိသၣ်လၢ အပၢ်ဖိးဟုအီၤလီၤ.
၅ စီၤပီလူးထံၣ်ဘၣ်ဒီး တၢ်ကီတၢ်ခဲမနုၤဒံးလဲၣ်. တၢ်ကဲထီၣ်အသးလၢ ယရူၤၡလ့ၣ်အပူၤ ခံနံၣ်ဝံၤအလီၢ်ခံ စီၤပီလူးဒိးထီၣ်ကဘီ ဒီးလဲၤလၢ ကီၢ်အံၤတလံလီၤ. ဖဲအလဲၤတၢ်လၢကျဲအခါ ကလံၤမုၢ်လီၤဖးဒိၣ် အဃိပှၤနီကဘီ ဒီးပှၤဒိးကဘီဖိတဖၣ် ဆိကမိၣ်ဝဲလၢ အဝဲသ့ၣ်ကသံလီၤ. ဘၣ်ဆၣ် စီၤပီလူးတပျံၤတၢ်ဘၣ်. ဘၣ်မနုၤအဃိလဲၣ်. စီၤပီလူးတဲဘၣ် ပှၤအိၣ်လၢကဘီပူၤတဖၣ်လၢ “အဂ့ၢ်ဒ်အံၤ, ယွၤလၢယမ့ၢ်အတၢ်, ဒီးယမၤအတၢ်, အကလူးတဂၤဆၢထၢၣ် လၢယဃၢၤလၢမုၢ်နၤအံၤ, ဒီးစံးဝဲဒၣ်, စီၤပီလူးဧၢ, ပျံၤတၢ်တဂ့ၤ, နဘၣ်ဆၢထၢၣ်လၢ စီၤပၤကဲစၢ်အမဲာ်ညါလီၤ. ဒီးယွၤဟ့ၣ်လီၤနၤလၢ ပှၤလၢအဒိးဃုာ် ကဘီဒီးနၤအံၤ ခဲလၢာ်လီၤ.” ယဟိဝၤယွၤသူ မူခိၣ်ကလူးလၢ ကဒုးသ့ၣ်နီၣ်ထီၣ်က့ၤအီၤလၢ ယ့ၣ်ၡူးအတၢ်ကတိၤလီၤ. ခီဖျိလၢ ယဟိဝၤအတၢ်မၤစၢၤအဃိ စီၤပီလူးလဲၤတုၤဝဲလၢ ရိမ့ၤ ဒ်ယ့ၣ်ၡူးအၢၣ်လီၤပာ်စၢၤအီၤအသိးလီၤ.—မၤတၢ် ၂၇:၂၀-၂၅; ၂၈:၁၆.
၆ ယ့ၣ်ၡူးမၤစၢၤ ပှၤဒ်လဲၣ်. ယ့ၣ်ၡူးမၤစၢၤပှၤဒ် အမၤစၢၤစီၤပီလူးအသိးလီၤ. အဒိ ယ့ၣ်ၡူးအၢၣ်လီၤဝဲ ပှၤလၢအပိာ်အခံ ခဲလၢာ်လၢ “ယအိၣ်ဒီးသု ကိးမုၢ်နံၤမုၢ်နၤဒဲး, တုၤတၢ်အစိၤကတၢၢ်လီၤ.” (မးသဲ ၂၈:၂၀) ယ့ၣ်ၡူးအတၢ်ကတိၤန့ၣ် မၤဆူၣ်ထီၣ်ဝဲ ပဂံၢ်ပဘါလီၤ. လၢကျဲဒ်လဲၣ်. တဘျီတခီၣ်န့ၣ် ပကလဲၤခီဖျိ တၢ်ကီတၢ်ခဲ အဂီၢ်တညီဘၣ်. အဒိ ဖဲပှၤလၢပအဲၣ်ဘၣ်အီၤတဂၤ သံအခါ တမ့ၢ်ထဲပသးကဘၣ်ဒိ တသီခံသီဘၣ် လၢတၢ်န့ၣ်အလီၢ် ပသးကဘၣ်ဒိလၢ အနံၣ်တဖၣ်ညါလီၤ. ပှၤတနီၤ အသးပှၢ်ထီၣ်အဃိ ထံၣ်ဘၣ်ဝဲဒီး တၢ်ကီတၢ်ခဲလီၤ. ဒီးအဂၤတနီၤ ထံၣ်ဘၣ်ဒီး တၢ်ကီတၢ်ခဲ ကိးနံၤဒဲးအဃိ အဝဲသ့ၣ်သးဟးဂီၤဝဲလီၤ. ပထံၣ်ဘၣ် တၢ်ကီတၢ်ခဲတဖၣ်န့ၣ် သနာ်က့ ပအိၣ်ဒီးတၢ်ဂံၢ်တၢ်ဘါသ့ ခီဖျိ ပသ့ၣ်ညါလၢ ယ့ၣ်ၡူးအိၣ်ဒီးပှၤ “ကိးမုၢ်နံၤမုၢ်နၤဒဲး” အဃိလီၤ.—မးသဲ ၁၁:၂၈-၃၀.
၇ လံာ်စီဆှံပာ်ဖျါထီၣ်ဝဲလၢ ယဟိဝၤယွၤသူဝဲ မူခိၣ်ကလူးတဖၣ်လၢ ကမၤစၢၤပှၤလီၤ. (ဧ့ၤဘြံၤ ၁:၇, ၁၄) အဒိ မူခိၣ်ကလူး ဆီၣ်ထွဲမၤစၢၤပှၤဒီး ဟံးစုနဲၣ်ကျဲပှၤ ဖဲပစံၣ်တဲၤတဲလီၤ “ဘီမုၢ်အတၢ်သးခုအကစီၣ်” လၢ “ကယဲၢ်ပှၤကလုာ်, ဒီးပှၤအဒူၣ်, ဒီးပှၤကတိၤတၢ်အကျိာ်” ခဲလၢာ်လီၤ.—မးသဲ ၂၄:၁၃, ၁၄; ဖး လီၣ်ဖျါ ၁၄:၆ တက့ၢ်.
လါစဲးပတ့ဘၢၣ် ၁၁-၁၇
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | အ့ၤစတၢ် ၃-၅
“မၤစၢၤပှၤဂၤ ဒ်သိးကမၤ ကစၢ်ယွၤအတၢ်မၤလၢ အဂ့ၤကတၢၢ်”
it-2 ၄၃၁ ¶၇
စီၤမၢ်ဒကဲၤ
စီၤမၢ်ဒကဲၤ တဆုးလီၤအခိၣ်လၢ စီၤဟၤမၣ် အမဲာ်ညါဘၣ်. စီၤပၤအဃၤၡဝ့ရိၣ် ဟ့ၣ်လီၤဝဲ ပှၤအၤကးဖိ စီၤဟၤမၣ် လီၢ်လၤလၢအထီဒိၣ်မး ဒီးအဝဲဟ့ၣ်လီၤတၢ်ကလုၢ်လၢ စီၤပၤအခ့အပှၤလၢ အအိၣ်လၢ စီၤပၤအဟံၣ်တြဲၤန့ၣ် ကဘၣ်ထိၣ်လီၤပှီၤအသးလၢ စီၤဟၤမၣ် အမဲာ်ညါ. ဘၣ်ဆၣ် စီၤမၢ်ဒကဲၤ တမၤဝဲဒ်န့ၣ်ဘၣ်. အတဲဝဲလၢ အမ့ၢ်ပှၤယူဒၤဖိအဃိ အတထိၣ်လီၤပှီၤအသးလၢ စီၤဟၤမၣ် အမဲာ်ညါဘၣ်. (အ့ၤ ၃:၁-၄) စီၤမၢ်ဒကဲၤ မၤဝဲဒ်န့ၣ်န့ၣ် ပာ်ဖျါထီၣ်ဝဲလၢ ဒ်အမ့ၢ်ပှၤယူဒၤဖိ လၢအဟ့ၣ်လုၢ်ထီၣ်အသးလၢ ယဟိဝၤယွၤ အအိၣ်တဂၤအသိး အတအဲၣ်ဒီးလၢ အတၢ်ရ့လိာ်သးဒီး ယဟိဝၤယွၤ ကဟးဂီၤဘၣ်. ပှၤအံၣ်စရ့လးဖိလၢပျၢၤတဖၣ်န့ၣ် အဝဲသ့ၣ် ထိၣ်လီၤပှီၤအသးလၢ ပှၤလၢအလီၢ်လၤထီန့ၢ်ဒံးအဝဲသ့ၣ် ဒ်သိး ကပာ်ဖျါထီၣ်တၢ်ပာ်ကဲ ပှၤတဂၤန့ၣ်အဂီၢ်. ဘၣ်ဆၣ်မ့မ့ၢ် စီၤမၢ်ဒကဲၤ အတၢ်အိၣ်သးန့ၣ် လီၤဆီတစဲး. (၂ မူၤ ၁၄:၄; ၁၈:၂၈; ၁ စီၤပၤ ၁:၁၆.) စီၤမၢ်ဒကဲၤ တဆုးလီၤအခိၣ်လၢ စီၤဟၤမၣ် အမဲာ်ညါဘၣ်န့ၣ် တၢ်ဂ့ၢ်အိၣ်ဝဲ. လီၤဂာ်လၢ စီၤဟၤမၣ်န့ၣ် ကဲဝဲပှၤဧမၤလ့းဖိ ဒီးယဟိဝၤယွၤ ပာ်ဖျါထီၣ်ဝဲလၢ အဝဲကဒုးတၢ်ဒီး ပှၤဧမၤလ့းဖိ “တစိၤဘၣ်တစိၤ” လီၤ. (၂ မိၤ ၁၇:၁၆. see HAMAN.) အဃိ တၢ်အိၣ်သးလၢ စီၤမၢ်ဒကဲၤ ထံၣ်ဘၣ်ဝဲတခါအံၤန့ၣ် တဘၣ်ဃးလိာ်သးဒီး ထံဂ့ၢ်ကီၢ်ဂ့ၢ်ဘၣ် အဘၣ်ထွဲလိာ်သးဒီး တၢ်သးတီဒီးယဟိဝၤယွၤ.
it-2 ၄၃၁ ¶၉
စီၤမၢ်ဒကဲၤ
ကစၢ်ယွၤသူအီၤလၢ အကမၤပူၤဖျဲး ပှၤအံၣ်စရ့လးဖိ. စီၤပၤဟ့ၣ်လီၤတၢ်ကလုၢ်လၢ ပှၤကမၤသံ ပှၤယူဒၤဖိခဲလၢာ်လၢ အအိၣ်လၢထံကီၢ်ပူၤ. စီၤမၢ်ဒကဲၤ နာ်ဝဲလၢ နီၢ်အ့ၤစတၢ် ကဲထီၣ်ဘၣ်နီၢ်ပၤမုၣ်န့ၣ် မ့ၢ်လၢအကမၤပူၤဖျဲးဝဲ ပှၤယူဒၤဖိအဂီၢ်. အဃိ အဝဲတဲဘၣ် နီၢ်အ့ၤစတၢ်လၢ နီၢ်အ့ၤစတၢ်န့ၣ် အိၣ်ဒီးမူဒါဖးဒိၣ် ဒီးအဝဲမၢ နီၢ်အ့ၤစတၢ် လဲၤဃ့ကညးစီၤပၤ ဒီးဃ့စီၤပၤအတၢ်မၤစၢၤ. နီၢ်အ့ၤစတၢ်န့ၣ် အိၣ်ဒီးတၢ်လီၤဘၣ်ယိၣ်လၢ အသးသမူအဂီၢ်နာ်က့ အဝဲအၢၣ်လီၤဝဲလၢ အကမၤဝဲဒ် စီၤမၢ်ဒကဲၤ အတၢ်ဟံးစုနဲၣ်ကျဲအီၤအသိး.—အ့ၤ ၄:၇–၅:၂.
အဝဲဆၢထၢၣ်လၢ ကစၢ်ယွၤအပှၤဂီၢ်မုၢ်အဂီၢ်
၂၂ ဖဲနီၢ်အ့ၤစတၢ်နၢ်ဟူဘၣ်ဝဲ စီၤမၢ်ဒကဲၤ အတၢ်ဃ့ကညးအခါ အသးဘူးကလီၤတဲာ်ညါ. ခဲအံၤဒု တၢ်မၤကွၢ်လၢအဒိၣ်ကတၢၢ်တခါန့ၣ် ဟဲလီၤဘၣ်အီၤလံ. ဖဲအဝဲစံးဆၢက့ၤ စီၤမၢ်ဒကဲၤအခါ အဝဲပာ်ဖျါထီၣ်စ့ၢ်ကီးဝဲ အတၢ်သူၣ်ပျံၤသးဖုးန့ၣ်လီၤ. နီၢ်အ့ၤစတၢ် တဲသ့ၣ်နီၣ်ထီၣ်စီၤမၢ်ဒကဲၤလၢ စီၤပၤအတၢ်သိၣ်တၢ်သီ လၢအမ့ၢ် ပှၤလၢ စီၤပၤတကိးထံၣ်အီၤတဂၤ မ့ၢ်လဲၤလၢစီၤပၤအအိၣ်န့ၣ် အဝဲကဘၣ်တၢ်မၤသံကွံာ်အီၤန့ၣ်လီၤ. ဘၣ်ဆၣ်စီၤပၤမ့ၢ် ယူာ်လီၤအနီၣ်ထိးထူဆူ ပှၤလၢအမၤကမၣ် တၢ်သိၣ်တၢ်သီတဂၤအံၤအအိၣ်န့ၣ် အဝဲတသံဘၣ်ဝဲဘၣ်. လၢတၢ်န့ၣ်အဃိ မ့ၢ်နီၢ်အ့ၤစတၢ် ကအိၣ်ဒီးတၢ်မုၢ်လၢ်လၢ ကဒိးန့ၢ်ဘၣ် တၢ်သးကညီၤလၢ စီၤပၤအအိၣ်စ့ၢ်ကီးဧါ. နီၢ်အ့ၤစတၢ် ကသ့ၣ်နီၣ်ထီၣ်က့ၤ ဖဲနီၢ်ပၤမုၣ်ဝးၡတံၤ တဒိကနၣ်စီၤပၤအကလုၢ်အခါ တၢ်မၤအသးဒီးအီၤဒ်လဲၣ်အဂ့ၢ်န့ၣ်လီၤ. ဒီးနီၢ်အ့ၤစတၢ်တဲဘၣ် စီၤမၢ်ဒကဲၤလၢ စီၤပၤတကိးထံၣ်အီၤအိၣ်ဝဲ အသီ ၃၀ လံ. စီၤပၤတကိးထံၣ်အီၤ ယံာ်ထဲအံၤလံအဃိ ဘၣ်သ့ၣ်သ့ၣ် နီၢ်အ့ၤစတၢ်ကဆိကမိၣ်ဝဲလၢ စီၤပၤတအဲၣ်အီၤလၢၤဘၣ်.—အ့ၤစတၢ် ၄:၉-၁၁.
၂၃ စီၤမၢ်ဒကဲၤ စံးဆၢက့ၤနီၢ်အ့ၤစတၢ် ဒ်သိးကမၤဂၢၢ်ကျၢၤထီၣ်က့ၤအတၢ်နာ်လီၤ. အဝဲစံးစ့ၢ်ကီးလၢ နီၢ်အ့ၤစတၢ် မ့ၢ်တမၤတၢ်နီတမံၤသနာ်က့ ပှၤယူဒၤဖိကပူၤဖျဲးလၢ ကျဲအဂၤတဘိဘိလီၤ. ဘၣ်ဆၣ် အဝဲတဲဝဲလၢ နမ့ၢ်တမၤတၢ်နီတမံၤဘၣ်န့ၣ် တဘၣ်ဆိကမိၣ်လၢ နကပူၤဖျဲးတဂ့ၤ. စီၤမၢ်ဒကဲၤနာ်ယဟိဝၤယွၤ သပှၢ်ကတၢၢ်လီၤ. ဒီးအဝဲသ့ၣ်ညါလီၤတံၢ်လီၤဆဲးလၢ ယဟိဝၤယွၤ ကမၤလၢပှဲၤထီၣ်ဝဲအတၢ်စံးပာ်တဖၣ် ဒီးတဟ့ၣ်ဝဲအခွဲးလၢ ပှၤကမၤလီၤတူာ်ကွံာ် အပှၤဂီၢ်မုၢ်တဖၣ်အစၢၤအသွဲၣ်ဘၣ်. (ၡူ. ၂၃:၁၄) စီၤမၢ်ဒကဲၤ သံကွၢ်နီၢ်အ့ၤစတၢ်လၢ– “ကမ့ၢ်နကဲထီၣ်ဘၣ်နီၢ်ပၤမုၣ် လၢတၢ်ဆၢကတီၢ်ဒ်သိးအံၤအဂီၢ်ဧါ, န့ၣ်မတၤသ့ၣ်ညါတဂၤလဲၣ်.” (အ့ၤစတၢ် ၄:၁၂-၁၄, ခ့ခါစှီၤကျိာ်) စီၤမၢ်ဒကဲၤန့ၣ် နာ်ဝဲယဟိဝၤယွၤ တုၤလီၤတီၤလီၤန့ၣ်လီၤ. လၢတၢ်န့ၣ်အဃိ မ့ၢ်ပတကြၢးကွၢ်လိမၤဒိးအတၢ်နာ်ဘၣ်ဧါ.—ကတိၤ. ၃:၅, ၆.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
kr ၁၆၀ ¶၁၄
ဒုးတၢ်ဒ်သိး ကဘူၣ်ထီၣ်ဘါထီၣ်ဘၣ်တၢ်လၢ တၢ်သဘျ့ပူၤအဂီၢ်
၁၄ ဒ်နီၢ်အ့ၤစတၢ် ဒီးစီၤမၢ်ဒကဲၤအသိး ယဟိဝၤယွၤ အခ့အပှၤလၢ ပစိၤခဲအံၤန့ၣ် အဝဲသ့ၣ် ဒုးတၢ်ဒ်သိး ကဘူၣ်ထီၣ်ဘါထီၣ်ဘၣ်တၢ်ဒ် ယဟိဝၤယွၤ မၢအဝဲသ့ၣ်အသိး. (အ့ၤစတၢ် ၄:၁၃-၁၆) နပၣ်ဃုာ်လၢ တၢ်မၤတခါအံၤအပူၤသ့ဝဲ. နပၣ်ဃုာ်သ့ခီဖျိ နဃ့ဘါထုကဖၣ်န့ၢ်တၢ်လၢ ဒီပုၢ်ဝဲၢ်မုၣ်ခွါလၢ အထံၣ်ဘၣ်ဒီး တၢ်စံၣ်ညီၣ် တတီတလိၤဘၣ်တဖၣ်အဂီၢ်သ့. နမ့ၢ်ဃ့ထုကဖၣ်ဒ်အံၤန့ၣ် အမၤစၢၤဝဲ ဒီပုၢ်ဝဲၢ်မုၣ်ခွါလၢ အထံၣ်ဘၣ် တၢ်ကီတၢ်ခဲ ဒီးတၢ်မၤအၢမၤနးတဖၣ်အဂီၢ်သ့. (ဖး ယၤကိာ် ၅:၁၆.) ပဒီပုၢ်ဝဲၢ်တဖၣ် ဖဲအထီၣ်ရူအခါ အမၤနၢၤတၢ်အိၣ်ဝဲအါဘျီအဃိ ပသ့ၣ်ညါလၢ ယဟိဝၤယွၤ ဒိကနၣ်ဝဲ ပတၢ်ထုကဖၣ်.—ဧ့ၤ ၁၃:၁၈, ၁၉.
လါစဲးပတ့ဘၢၣ် ၁၈-၂၄
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | အ့ၤစတၢ် ၆-၈
“တၢ်မၤလိလၢ ဘၣ်ဃးဒီး ပကဘၣ်တဲတၢ်ဒီးပှၤဂၤဒ်လဲၣ်”
အဝဲအိၣ်ဒီးတၢ်ကူၣ်သ့, တၢ်သးဒူဒီး တအဲၣ်လီၤထဲအသးဘၣ်
၁၅ တၢ်ကီတၢ်ခဲလၢ အဟဲကဲထီၣ်အသးန့ၣ် နီၢ်အ့ၤစတၢ် တတဲဘၣ်အဝၤတဘျီဃီ အမဲာ်ညါ အဝဲအိၣ်ခိးဝဲလၢ တၢ်သးစူၤအပူၤအဃိ မ့ၢ်ဒၣ်အဝဲဟ့ၣ်အခွဲးလၢ စီၤဟၤမၣ်ကခူၣ်လီၤဝဲ အသွၣ်ခိၣ်လၢ အနီၢ်ကစၢ်အဂီၢ်န့ၣ်လီၤ. မုၢ်တနၤဖဲစီၤပၤ မံတန့ၢ်ဘၣ်န့ၣ် ဘၣ်သ့ၣ်သ့ၣ် ကမ့ၢ်ယဟိဝၤယွၤ အတၢ်ရဲၣ်တၢ်ကျဲၤအဃိလီၤ. (ကတိၤ. ၂၁:၁) လၢတၢ်န့ၣ်အဃိ ယွၤအကလုၢ်ကထါ ဆီၣ်ထွဲပှၤလၢပက “ကွၢ်လၢ်ယွၤအကျဲ” န့ၣ်လီၤ. (ဖး မံကၤ ၇:၇ တက့ၢ်.) ပမ့ၢ်အိၣ်ခိး ကစၢ်ယွၤအတၢ်မၤစၢၤန့ၣ် ဂ့ၤဒိၣ်န့ၢ်ဒံး ပကရီဂုာ်ကျဲးစၢး မၤဘၣ်ဂီၢ်က့ၤ တၢ်ကီတၢ်ခဲလၢ ပနီၢ်ကစၢ်န့ၣ်လီၤ.
အဝဲကတိၤတၢ်လၢ တၢ်သူၣ်ဒူသးဒူအပူၤ
၁၆ တဘျီအံၤဒု နီၢ်အ့ၤစတၢ် မၤကွၢ်စီၤပၤ အတၢ်သူၣ်စူၤသးစူၤ တဘူၣ်လၢၤဘၣ်. ဖဲအဝဲသ့ၣ် အီၣ်သကိးအီသကိးတၢ် ခံဘျီတဘျီအခါ နီၢ်အ့ၤစတၢ် ကဘၣ်တဲဖျါထီၣ်ဝဲ တၢ်ဂ့ၢ်တၢ်ကျိၤခဲလၢာ်လီၤ. ဘၣ်ဆၣ် နီၢ်အ့ၤစတၢ် ကစးထီၣ်တဲအီၤဒ်လဲၣ်. ဖဲအဝဲသ့ၣ် အီၣ်တၢ်အီတၢ်အခါ စီၤပၤသံကွၢ်ကဒီးအီၤလၢ နလိၣ်ဘၣ်တၢ်မနုၤလဲၣ်. လၢတၢ်န့ၣ်အဃိ ကျဲအိးဟိထီၣ်အသးလၢ နီၢ်အ့ၤစတၢ် ကတဲဖျါထီၣ်ဝဲ အတၢ်သူၣ်ကိၢ်သးဂီၤတဖၣ်လီၤ. (အ့ၤစတၢ် ၇:၂) ခဲအံၤဒု တၢ်ဆၢကတီၢ်လၢ နီၢ်အ့ၤစတၢ် ကကတိၤတၢ်အဂီၢ် ဟဲတုၤဝဲလံ.
အဝဲအိၣ်ဒီးတၢ်ကူၣ်သ့, တၢ်သးဒူဒီး တအဲၣ်လီၤထဲအသးဘၣ်
၁၇ ဘၣ်သ့ၣ်သ့ၣ် ဖဲနီၢ်အ့ၤစတၢ် တချုးစံးဆၢက့ၤစီၤပၤအခါ အဝဲကဃ့ထုကဖၣ်တၢ်ဆူ ကစၢ်ယွၤအအိၣ်လီၤ. လၢခံန့ၣ် တၢ်ကွဲးဖျါထီၣ်က့ၤ နီၢ်အ့ၤစတၢ် အတၢ်ကတိၤလၢ– “ယမ့ၢ်ဘၣ်ဘျုးဘၣ်ဖှိၣ်လၢနမဲာ်, ဒီးမ့ၢ်ဂ့ၤဒီးစီၤပၤဒီး, မ်တၢ်ဟ့ၣ်ယသးသမူလၢ ယဃ့တၢ်အဃိ, ဒီးယပှၤတကလုာ်လၢ ယဃ့ကညးတၢ်အဃိန့ၣ်တက့ၢ်.” (အ့ၤစတၢ် ၇:၃) နီၢ်အ့ၤစတၢ် လီၤဆီလိာ်အသး ဒီးနီၢ်ပၤမုၣ်ဝးၡတံၤ လၢအမ့ၢ်တ့ၢ်စီၤပၤအမါလၢညါန့ၣ်လီၤ. အဝဲတမၤမဲာ်ဆှးအဝၤ လၢပှၤမဲာ်ညါဘၣ် ဒီးအၢၣ်လီၤဝဲလၢ အဝဲကပာ်ကဲဝဲ စီၤပၤအတၢ်ဆၢတဲာ်န့ၣ်လီၤ. (အ့ၤစတၢ် ၁:၁၀-၁၂) တကးဒံးဘၣ် နီၢ်အ့ၤစတၢ် တတဲဆါစီၤပၤ လၢအဟးနာ်ကြီ ပှၤအၢပှၤသီဒ်သိးဒီး စီၤဟၤမၣ်ဘၣ်. လၢတၢ်န့ၣ်အလီၢ် အဝဲဃ့ကညးဝဲဒ်သိးစီၤပၤ ကဒီသဒၢ အသးသမူအဂီၢ်လီၤ.
အဝဲအိၣ်ဒီးတၢ်ကူၣ်သ့, တၢ်သးဒူဒီး တအဲၣ်လီၤထဲအသးဘၣ်
၁၈ ဖဲစီၤပၤနၢ်ဟူဘၣ် နီၢ်အ့ၤစတၢ် အတၢ်ကတိၤအခါ အဝဲကဖုးဘၣ်အသးဒီး ကသးကညီၤဘၣ်အီၤလီၤ. ပှၤလၢအဒုးအိၣ်ထီၣ် တၢ်လီၤဘၣ်ယိၣ်လၢ အနီၣ်ပၤမုၣ်အဂီၢ်န့ၣ် မ့ၢ်မတၤတဂၤလဲၣ်. နီၢ်အ့ၤစတၢ် တဲဘၣ်အီၤလၢ– “ပဘၣ်တၢ်ဆါကွံာ်ပှၤ, ယဲဒၣ်ဒီးယပှၤတကလုာ်, ဒ်သိးတၢ်ကမၤဟးဂီၤပှၤ, ဒ်သိးတၢ်ကမၤသံပှၤ, ဒ်သိးတၢ်ကမၤဟါမၢ်ပှၤလီၤ. ပမ့ၢ်ဘၣ်တၢ်ဆါကွံာ်ပှၤလၢ ကုၢ်ပိာ်မုၣ်ဒီးကုၢ်ပိာ်ခွါအဂီၢ်ဒီး, ယကအိၣ်ဘှီၣ်ကလာ်လီၤ. ဘၣ်ဆၣ်ဒီး စီၤပၤအတၢ်လၢအကဟါမၢ်န့ၣ် တၢ်အဒုၣ်အဒါ မၤတၢ်ထဲသိးသိးန့ၣ်တသ့ဘၣ်.” (အ့ၤစတၢ် ၇:၄) နီၢ်အ့ၤစတၢ် တဲဖျါထီၣ်ဝဲ တၢ်ဂ့ၢ်ကီသ့ၣ်တဖၣ်အံၤပျီပျီလီၤ. ဒီးနီၢ်အ့ၤစတၢ် စံးဝဲလၢပှၤမ့ၢ်တဲပျံၤတဲဖုးအီၤထဲလၢ ကဒုးကဲအပှၤကလုာ်လၢကုၢ်န့ၣ် အဝဲကအိၣ်ဘှီၣ်ကလာ်လီၤ. ဘၣ်ဆၣ်မ့ၢ်လၢ ပှၤကမၤလီၤတူာ် အပှၤကလုာ်အဃိ အဝဲမ့ၢ်တတဲတၢ်နီတမံၤဘၣ်န့ၣ် ကကဲထီၣ်တၢ်ဘၣ်ဒိဘၣ်ထံးလၢ စီၤပၤအဂီၢ်လီၤ.
၁၉ ဒ်သိးပထုးန့ၢ်ပှၤဂၤအသးကသ့အဂီၢ် ပကဘၣ်ကတိၤတၢ်ဒ်လဲၣ်ဒ်လဲၣ်န့ၣ် နီၢ်အ့ၤစတၢ် ပာ်လီၤတၢ်အဒိအတဲာ်လၢအဂ့ၤလီၤ. အဒိ တၢ်ဂ့ၢ်ကီအဒိၣ်အမုၢ် မ့ၢ်ဟဲကဲထီၣ်အသး ဒီးပမ့ၢ်ဘၣ်တဲ ပှၤလၢပအဲၣ်ဘၣ်အီၤတဂၤ မ့တမ့ၢ် ပှၤလၢအတီခိၣ်ရိၤမဲတၢ်တဂၤဂၤန့ၣ် ပဝဲစ့ၢ်ကီး ပကဘၣ်အိၣ်ဒီး တၢ်သးစူၤ, ဒီးကတိၤတၢ်ပျီပျီလၢ တၢ်ယူးယီၣ်ပာ်ကဲအပူၤလီၤ.—ကတိၤ. ၁၆:၂၁, ၂၃.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၆ ၃/၁ ၁၁ ¶၁
လံာ်စီဆှံ အတၢ်ပာ်ဖျါလၢ လံာ်အ့ၤစတၢ်အဂီၢ်
၇:၄—ပှၤမ့ၢ်မၤလီၤတူာ်ကွံာ် ပှၤယူဒၤဖိတဖၣ်န့ၣ် “ကမၤဘၣ်ဒိ စီၤပၤ” ဒ်လဲၣ်. လၢတၢ်ကူၣ်သ့အပူၤ နီၢ်အ့ၤစတၢ် တဲဘၣ်စီၤပၤလၢ ပှၤမ့ၢ်ဆါလီၤဘၣ်ဖုး ပှၤယူဒၤဖိန့ၣ် အကမၤဘၣ်ဒိဝဲစီၤပၤ. စီၤဟၤမၣ် မ့ၢ်ကူၣ်ထီၣ်ဘၣ်ဖုးဝဲလၢ အကဆါလီၤအီၣ် ပှၤယူဒၤဖိန့ၣ် စ့ကန့ၢ်အါန့ၢ်ဒံးစ့ညၣ်အတၤလၣ် ၁၀,၀၀၀ လၢစီၤဟၤမၣ် ကဟ့ၣ်ဝဲလၢ စီၤပၤ အတၢ်လုၢ်ဒိၣ်ပှ့ၤဒိၣ်အလီၢ်အဂီၢ်ဒံး. စီၤပၤအတၢ်လုၢ်ဒိၣ်ပှ့ၤဒိၣ်အလီၢ်အဂီၢ်ဒံး. တကးဒံးဘၣ် ပှၤမ့ၢ်မၤသံ ပှၤယူဒၤဖိခဲလၢာ်န့ၣ် နီၢ်အ့ၤစတၢ်စ့ၢ်ကီး ကဘၣ်သံဝဲ.
၈ စီၤယၤကိာ် တမၤလိဘၣ်ဝဲ ဟီၣ်ခိၣ်အတၢ်ကူၣ်ဘၣ်ကူၣ်သ့ အါအါဘၣ်. အဃိ တၢ်ဘူၣ်တၢ်ဘါခိၣ်နၢ်တဖၣ် လၢစီၤယၤကိာ်အစိၤန့ၣ် ကထံၣ်အီၤဒ် အထံၣ်ဝဲ တၢ်မၢဖိပ့းတရူး ဒီးယိၤဟၣ်အသိး. အဝဲသ့ၣ် ထံၣ်ဝဲ တၢ်မၢဖိတဖၣ်အံၤဒ် ပှၤလၢအ “တမ့ၢ် ပှၤကူၣ်ဘၣ်ကူၣ်သ့ဘၣ်, မ့ၢ်ဒၣ် ပှၤမုၢ်ဆ့ၣ်မုၢ်ဂီၤဖိ” လီၤ. (မၤတၢ် ၄:၁၃) ဘၣ်ဆၣ် ပမ့ၢ်ဖးကွၢ် လံာ်လၢစီၤယၤကိာ် ကွဲးဝဲန့ၣ် ပသ့ၣ်ညါဘၣ်လၢ စီၤယၤကိာ်န့ၣ် မ့ၢ်ဝဲပှၤသိၣ်လိတၢ် လၢအဂ့ၤတဂၤ. ဒ်စီၤယၤကိာ်အသိး ဘၣ်သ့ၣ်သ့ၣ် ပတမၤလိဘၣ် ဟီၣ်ခိၣ်အတၢ်ကူၣ်ဘၣ်ကူၣ်သ့ အါအါဘၣ်. ဘၣ်ဆၣ် ခီဖျိလၢ ယဟိဝၤယွၤ အသးစီဆှံ ဒီးတၢ်ကရၢကရိ အတၢ်သိၣ်လိအဃိ ပကဲထီၣ် ပှၤသိၣ်လိတၢ်လၢအဂ့ၤသ့. ခဲအံၤ ပကတဲသကိး စီၤယၤကိာ် သိၣ်လိတၢ်ဒ်လဲၣ် ဒီးပန့ၢ်ဘၣ် တၢ်မၤလိလၢ အအိၣ်ဒ်လဲၣ်.
၉ စီၤယၤကိာ် တသူဝဲ တၢ်ကတိၤလၢအပတီၢ်ထီဘၣ် ဒီးၡဲပၠးဝဲ ယိယိဖိ. အဃိ ပှၤလၢအဒိကနၣ်အီၤတဖၣ်န့ၣ် သ့ၣ်ညါဝဲလၢ အကဘၣ်မၤတၢ်မနုၤလဲၣ် ဒီးအကဘၣ်မၤဝဲ ဒ်လဲၣ်လီၤ. အဒိ, စီၤယၤကိာ်သိၣ်လိဝဲ ခရံာ်ဖိတဖၣ်လၢ အဝဲသ့ၣ် မ့ၢ်ထံၣ်ဘၣ် တၢ်တတီတလိၤသနာ်က့ ကဘၣ်ပာ်အသးမုာ်မုာ်လီၤ. အဝဲကွဲးဝဲလၢ “ပှၤလၢ အတူၢ်ဘၣ်ခီၣ်ဘၣ်တ့ၢ်တၢ်တဖၣ်န့ၣ် ပပာ်ပနီၣ် အဝဲသ့ၣ်လၢ ပှၤလၢအသးခုလီၤ. သုနၢ်ဟူဘၣ် စီၤယိၤဘး အတၢ်တူၢ်န့ၢ်ခီၣ်ကဲအဂ့ၢ် ဒီးသုသ့ၣ်ညါလၢ အလီၢ်ခံကတၢၢ်န့ၣ် ယဟိဝၤယွၤ မၤန့ၢ်တၢ်မနုၤလၢ အဂီၢ်လဲၣ်န့ၣ်လီၤ. အဃိ သုထံၣ်ဘၣ်လၢ ယဟိဝၤယွၤန့ၣ် ပှဲၤဝဲဒီးတၢ်အဲၣ် တၢ်ကဟုကယာ် ဒီးတၢ်သးကညီၤန့ၣ်လီၤ.” (ယၤကိာ် ၅:၁၁) ပထံၣ်ဘၣ်လၢ ဖဲစီၤယၤကိာ် သိၣ်လိတၢ်အခါ ဟံးန့ၢ်ဝဲ တၢ်ဂ့ၢ်တၢ်ကျိၤ လၢလံာ်စီဆှံအပူၤ. အသူဝဲ ကစၢ်ယွၤအကလုၢ်ကထါ ဒ်သိး ပှၤဒိကနၣ်အီၤတဖၣ် ကထံၣ်ဝဲလၢ ယဟိဝၤယွၤန့ၣ် အဆိၣ်ဂ့ၤဝဲဒၣ် ပှၤလၢအတီဒီးအီၤတဖၣ် ဒ်သိးဒီး စီၤယိၤဘး. စီၤယၤကိာ်သူဝဲ တၢ်ကတိၤယိယိဖိ ဒီးအၡဲပၠးဝဲ ယိယိဖိ ဒ်သိးပှၤထိၣ်ထံတယာ်ကွၢ်တၢ်ဂ့ၢ် ကဘၣ်အဂီၢ်. အဃိ ပထံၣ်ဘၣ်လၢ အဝဲသိၣ်လိတၢ် ဒ်သိးပှၤကသးစၢၢ်ဆၢလၢ ယဟိဝၤယွၤ ဒီးတမ့ၢ်လၢ ပှၤကသးစၢၢ်ဆၢအီၤ အဂီၢ်ဘၣ်.
၁၀ တၢ်မၤလိလၢပဂီၢ်– သိၣ်လိတၢ် ယိယိဖိ ဒီးဒိးသန့ၤထီၣ်အီၤလၢ ကစၢ်ယွၤ အကလုၢ်ကထါ. ဖဲပသိၣ်လိတၢ်အခါ ပတၢ်တိာ်ပာ်န့ၣ် တဘၣ်မ့ၢ်ဒ်သိး ပှၤကဆိကမိၣ်ဒိၣ်ပှၤလၢ ပသ့ၣ်ညါတၢ်ထဲလဲၣ်န့ၣ်ဘၣ်, ပကဘၣ်သိၣ်လိတၢ် ဒ်သိးပှၤကသးစၢၢ်ဆၢလၢ ယဟိဝၤယွၤ သ့ၣ်ညါတၢ်ထဲလဲၣ် ဒီးအသူၣ်အိၣ်သးအိၣ်ပှၤ ထဲလဲၣ်လီၤ. (ရိမ့ၤ ၁၁:၃၃) ပမၤဒ်န့ၣ်သ့ ခီဖျိ တၢ်လၢပတဲအီၤတဖၣ်န့ၣ် ကဘၣ်ဒိးသန့ၤထီၣ်အသး လၢလံာ်စီဆှံထီဘိ. အဒိ, ဖဲပပှၤမၤလိ လံာ်စီဆှံဖိ ကဘၣ်မၤတၢ်ဆၢတဲာ်အခါ ပကတဲအီၤလၢ ပမ့ၢ်အိၣ်လၢ အဝဲသ့ၣ်အလီၢ်န့ၣ် ပကမၤဒ်အံၤဒ်နုၤအလီၢ် ပကဘၣ်မၤစၢၤ အဝဲသ့ၣ် ဒ်သိး အဝဲသ့ၣ် ကဆိကမိၣ်ထံဝဲ ပှၤဒိပှၤတဲာ် လၢလံာ်စီဆှံအပူၤ ဒီးကနၢ်ပၢၢ်ထီၣ်ဝဲ ယဟိဝၤယွၤ အတၢ်ထံၣ် ဒီးအတၢ်တူၢ်ဘၣ်အဂီၢ်လီၤ. ပမ့ၢ်မၤစၢၤ အဝဲသ့ၣ် ဒ်န့ၣ်န့ၣ် အဝဲသ့ၣ် မၤထွဲဝဲ တၢ်လၢအမၤလိဘၣ်ဝဲတဖၣ် ခီဖျိလၢ အအဲၣ်ဒိးမၤ တၢ်ဘၣ်ယဟိဝၤယွၤ အသးအဃိလီၤ, တမ့ၢ်လၢ အအဲၣ်ဒိးမၤ ပတၢ်ဘၣ်သးအဃိဘၣ်.
လါစဲးပတ့ဘၢၣ် ၂၅–လါအီးကထိဘၢၣ် ၁
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | အ့ၤစတၢ် ၉-၁၀
“အဝဲသူ အတၢ်န့ၢ်စိန့ၢ်ကမီၤ လၢကမၤစၢၤ အပှၤကလုာ်အဂီၢ်”
it-2 ၄၃၂ ¶၂
စီၤမၢ်ဒကဲၤ
စီၤမၢ်ဒကဲၤထီၣ်ဝဲ စီၤဟၤမၣ်အလီၢ် ဒီးအကဲထီၣ်ဝဲ ပဒိၣ်လၢ အလီၢ်အလၤထီကတၢၢ်တဂၤ ဒီးအဒိးန့ၢ်ဘၣ်ဝဲ စီၤပၤအပသံးလၢ အကစဲပနီၣ်တၢ်အဂီၢ်. တကးဒံးဘၣ် နီၢ်အ့ၤစတၢ် ပာ်ထီၣ်ဝဲ စီၤမၢ်ဒကဲၤလၢ စီၤဟၤမၣ်အဟံၣ်လၢ စီၤပၤဟ့ၣ်လီၤအီၤအဖီခိၣ်. ဒီးစီၤမၢ်ဒကဲၤ သူဝဲတၢ်စိတၢ်ကမီၤလၢ စီၤပၤဟ့ၣ်အီၤ ဒီးထုးထီၣ်ဝဲ တၢ်သိၣ်တၢ်သီ ဒီးကွဲးလီၤဝဲလၢ လံာ်ပရၢအပူၤ လၢပှၤယူဒၤဖိတဖၣ်န့ၣ် အိၣ်ဒီးတၢ်ခွဲးတၢ်ယာ်လၢ ကဒီသဒၢလီၤက့ၤအသး. အဃိ ပှၤယူဒၤဖိတဖၣ်န့ၣ် အတၢ်မုၢ်လၢ်အိၣ်ထီၣ် ဒီးအဝဲသ့ၣ် သးခုဝဲဒိၣ်မး. ပှၤအါဂၤလၢ အအိၣ်လၢ ဖၢၡၢၣ်အကီၢ်ပူၤန့ၣ် အိၣ်ဃူဝဲပှၤယူဒၤဖိတဖၣ် ဒီးဖဲလါအးဒၢ် ၁၃ သီန့ၣ် မုၢ်နံၤလၢပှၤကမၤသံ ပှၤယူဒၤဖိတဖၣ်န့ၣ် ဟဲတုၤဝဲ ဘၣ်ဆၣ် ပှၤယူဒၤဖိတဖၣ်န့ၣ် အိၣ်ကတဲာ်ကတီၤအသးလၢ ကဒုးဆၢက့ၤတၢ်အဂီၢ်လံ. ခီဖျိလၢ စီၤမၢ်ဒကဲၤ အလီၢ်အလၤ လၢအထီဒိၣ်မးအဃိ ပဒိၣ်ပပှၢ်အါဂၤန့ၣ် အိၣ်ဃူက့ၤဝဲ ပှၤယူဒၤဖိတဖၣ်. မ့မ့ၢ်လၢ ဝ့ၢ်ၡူၡၣ်အပူၤန့ၣ် တၢ်ဒုးအိၣ်တ့ၢ်ဒံးဝဲ လၢခံတသီဒံး. ပှၤယူဒၤဖိ အဒုၣ်အဒါလၢ ဖၢၡၢၣ်အဘီအမုၢ်အပူၤန့ၣ် သံဝဲ ၇၅,၀၀၀. ဖဲန့ၣ်အကျါန့ၣ် ပၣ်ဃုာ်ဒီး စီၤဟၤမၣ် အဖိခွါအဂၤ ၁၀. (အ့ၤ ၈:၁–၉:၁၈) နီၢ်အ့ၤစတၢ် တူၢ်လိာ်ဝဲ စီၤမၢ်ဒကဲၤ အတၢ်သိၣ်တၢ်သီလၢအမ့ၢ် ပှၤကဘၣ်မၤဝဲ “ပူရံၣ်” အမူးပွဲဖဲ လါအးဒၢ် ၁၄ သီ ဒီး ၁၅ သီ. ပှၤမၤဝဲဘူၣ်အံၤ ဒ်သိးပှၤကသူၣ်ဖှံသးညီ, ဟ့ၣ်လိာ်သးတၢ်ဟ့ၣ် ဒီးဟ့ၣ်ပှၤဖှီၣ်ဖိတဖၣ်လၢတၢ်ဟ့ၣ်. ဒီးပှၤယူဒၤဖိတဖၣ် ဆၢတဲာ်လီၤအသးလၢ အဝဲသ့ၣ် ဒီးအစၢၤအသွဲၣ်တဖၣ် ဒီးပှၤလၢအနုာ်လီၤပၣ်ဃုာ်လၢအကျါန့ၣ် ကမၤဝဲမူးပွဲအံၤ. စီၤမၢ်ဒကဲၤ မ့ၢ်ပှၤအဒိၣ်ကတၢၢ် ခံဂၤတဂၤလၢ ဖၢၡၢၣ်အကီၢ်ပူၤ ဒီးပှၤယူဒၤဖိတဖၣ်န့ၣ် ပာ်ကဲအီၤ. ဒီးစီၤမၢ်ဒကဲၤန့ၣ် ဆဲးမၤတၢ်လၢ ပှၤယူဒၤဖိတဖၣ်အဂီၢ်.—အ့ၤ ၉:၁၉-၂၂, ၂၇-၃၂; ၁၀:၂, ၃.
it-2 ၇၁၆ ¶၅
ပူရံၣ်
တၢ်တိာ်ပာ်. ပှၤတနီၤတဲဝဲလၢ ပှၤမၤပူရံၣ် လၢပစိခဲအံၤတဖၣ်န့ၣ် သးစၢၢ်ဆၢဝဲလၢ ကမၤမုာ်မၤပၠီၣ်အသး ဒိၣ်န့ၢ်ဒံး ကသးစၢၢ်ဆၢဝဲလၢ တၢ်ဘူၣ်တၢ်ဘါအဂီၢ်. ဒီးတဘျီတခီၣ်န့ၣ် ပှၤမၤဝဲလီၤလူလီၤဘျၢၣ် အဃိ ပူရံၣ်အမူးပွဲလၢ ပစိၤခဲအံၤန့ၣ် အတဒ်သိးဒီး ပှၤစးထီၣ်မၤအီၤလၢ အခီၣ်ထံးခါ ဒီးပှၤမၤအီၤလၢညါခါန့ၣ်ဘၣ်. စီၤမၤဒကဲၤ ဒီးနီၢ်အ့ၤစတၢ်န့ၣ် အဝဲသ့ၣ် ကဲပှၤလၢ အဘူၣ်ထီၣ်ဘါထီၣ် ယဟိဝၤယွၤ. ခီဖျိလၢ စီၤမၢ်ဒကဲၤ ဘူၣ်ထီၣ်ဘါထီၣ်ထဲ ယဟိဝၤယွၤအဃိ တၢ်ဂ့ၢ်ကီဟဲအိၣ်ထီၣ်ဝဲ ဘၣ်ဆၣ် ယဟိဝၤယွၤ မၤပူၤဖျဲး အီၤဒီးပှၤယူဒၤဖိတဖၣ်. အဃိ စီၤမၤဒကဲၤ ဒီးနီၢ်အ့ၤစတၢ် ဒုးအိၣ်ထီၣ်ဝဲပူရံၣ် အမူးပွဲ ဒ်သိးကမၤလၤကပီၤ ယဟိဝၤယွၤအဂီၢ်. စီၤဟၤမၣ်န့ၣ် လီၤဂာ်လၢ အကဲဝဲ ပှၤဧမၤလ့းဖိ. ပှၤဧမၤလ့းဖိတဖၣ်န့ၣ် ယဟိဝၤယွၤ တဲဝဲလၢ အကမၤလီၤမၢ်ကွံာ် အဝဲသ့ၣ်ခဲလၢာ်. စီၤမၢ်ဒကဲၤ ပာ်ကဲဝဲ ယဟိဝၤယွၤ အတၢ်ကတိၤအံၤ အဃိ အဝဲတထိၣ်လီၤပှီၤအသးလၢ စီၤဟၤမၣ် အမဲာ်ညါဘၣ်. (အ့ၤ ၃:၂, ၅; ၂ မိၤ ၁၇:၁၄-၁၆) တၢ်ကတိၤလၢ စီၤမၢ်ဒကဲၤတဲဝဲ နီၢ်အ့ၤစတၢ်န့ၣ် (အ့ၤ ၄:၁၄) ပာ်ဖျါထီၣ်ဝဲလၢ အဝဲအိၣ်ခိးကွၢ်လၢ်ဝဲ ပှၤလၢအအိၣ်ဒီး တၢ်စိတၢ်ကမီၤတဂၤ ကမၤပူၤဖျဲး ပှၤယူဒၤဖိ. ဒီးတချုးလၢ နီၢ်အ့ၤစတၢ် လဲၤလၢစီၤပၤအအိၣ် ဒီးကွဲအီၣ်စီၤပၤတၢ်အီၣ်အခါ အဝဲဒုၣ်တၢ်အီၣ်အဃိ အပာ်ဖျါထီၣ်ဝဲလၢအဃ့ ကစၢ်ယွၤအတၢ်မၤစၢၤ.—အ့ၤ ၄:၁၆.
cl ၁၀၁-၁၀၂ ¶၁၂-၁၃
“ကွၢ်လိ ကစၢ်ယွၤ” ဖဲနသူနတၢ်စိတၢ်ကမီၤအခါ
၁၂ ယဟိဝၤယွၤ ဟ့ၣ်လီၤပှၤ ပှၤကွၢ်သိတဖၣ် ဒ်သိး အဝဲသ့ၣ် ကတီခိၣ်ရိၤမဲတၢ်လၢ တၢ်အိၣ်ဖှိၣ်အပူၤ. (ဧ့ၤဘြံၤ ၁၃:၁၇) ပှၤပိာ်ခွါလၢ အတုၤထီၣ်ထီၣ်ဘးတဖၣ်အံၤန့ၣ် ကဘၣ်သူဝဲ တၢ်ခွဲးတၢ်ယာ်လၢ ကစၢ်ယွၤဟ့ၣ်အီၤ ဒ်သိး ကမၤစၢၤတၢ် ဒီးကမၤစၢၤဝဲသိတဖၣ်အဂီၢ်. ခီဖျိလၢ အဝဲသ့ၣ်ကဲ တၢ်အိၣ်ဖှိၣ်သးပှၢ်အဃိ အဝဲသ့ၣ် ကဲကစၢ်လၢ ဒီပုၢ်ဝဲၢ်မုၣ်ခွါအဖီခိၣ်သ့ဧါ. တသ့ဘၣ်. ဘၣ်ဃးဒီး အဝဲသ့ၣ်အမူဒါလၢ တၢ်အိၣ်ဖှိၣ်အပူၤန့ၣ် အဝဲသ့ၣ်ကဘၣ်အိၣ်ဒီး တၢ်ထံၣ်လၢအကြၢးအဘၣ် ဒီးတၢ်ဆီၣ်လီၤသး. (၁ ပ့းတရူး ၅:၂, ၃) ပှၤကွၢ်ထွဲတၢ်သ့ၣ်တဖၣ်န့ၣ် လံာ်စီဆှံတဲဝဲလၢ အဝဲသ့ၣ်ကဲ “ကဲပှၤကွၢ်သိလၢ ကစၢ်ယွၤ အတၢ်အိၣ်ဖှိၣ်အဂီၢ်လီၤ. တၢ်အိၣ်ဖှိၣ်အံၤ ကစၢ်ယွၤပှ့ၤဝဲဒီး အနီၢ်ကစၢ်အဖိခွါ အသွံၣ်လီၤ.” (မၤတၢ်၂၀:၂၈) အဃိ တၢ်အိၣ်ဖှိၣ်သးပှၢ်တဖၣ် ကဘၣ်ရ့ဒီး တၢ်အိၣ်ဖှိၣ်ဖိတဂၤစုာ်စုာ်လၢ တၢ်အဲၣ်တၢ်ကွံအပူၤ.
၁၃ ပကဆိကမိၣ်ကွၢ် ဘၣ်ဃးဒီး တၢ်အဒိတခါ. အဒိ နသကိးတဂၤ မၢနၤလၢနကကွၢ်ထွဲန့ၢ်အီၤ အတၢ်လုၢ်ဒိၣ်ပှ့ၤဒိၣ်တခါ ဒီးနသ့ၣ်ညါလၢ နသကိးတဂၤအံၤန့ၣ် ဘၣ်ပှ့ၤဝဲတၢ်တခါအံၤန့ၣ် အပှ့ၤဖးဒိၣ်ညါ. အဃိ နကကွၢ်ထွဲန့ၢ် နသကိးအတၢ်လုၢ်ဒိၣ်ပှ့ၤဒိၣ်တခါအံၤ ဂ့ၤဂ့ၤလီၤတမ့ၢ်ဧီၤ. ဒ်န့ၣ်အသိး ကစၢ်ယွၤဟ့ၣ်လီၤဝဲ တၢ်အိၣ်ဖှိၣ်သးပှၢ်တဖၣ်အမူဒါလၢ ကကွၢ်ထွဲဝဲ တၢ်အိၣ်ဖှိၣ်ဖိလၢ အလုၢ်ဒိၣ်ပှ့ၤဒိၣ်. ဒီးတၢ်အိၣ်ဖှိၣ်ဖိတဖၣ်န့ၣ် အလီၤဂာ်ဒ်သိးဒီး သိလၢပှၤကဘၣ်လုၢ်အီၣ်လုၢ်အီအဝဲသ့ၣ်. (ယိၤဟၣ် ၂၁:၁၆, ၁၇) ယဟိဝၤယွၤ အဲၣ်အသိတဖၣ်ဒိၣ်မး ဒီးအဝဲပှ့ၤက့ၤအဝဲသ့ၣ်လၢ အဖိခွါလၢအလုၢ်ဒိၣ်ပှ့ၤဒိၣ်တဂၤ လၢအမ့ၢ်ယ့ၣ်ၡူးအသွံၣ်. အဃိ တၢ်လၢအလုၢ်ဒိၣ်ပှ့ၤဒိၣ်န့ၢ်ဒံး ယ့ၣ်ၡူးအသွံၣ်လၢ ယဟိဝၤယွၤ ကပှ့ၤက့ၤအသိတဖၣ်န့ၣ် တအိၣ်ဘၣ်. အဃိ တၢ်အိၣ်ဖှိၣ်သးပှၢ်တဖၣ်န့ၣ် ကဘၣ်ရ့ဒီးသိတဖၣ် ဒ်ယဟိဝၤယွၤ အဲၣ်ဒိးဝဲအသိး.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၆ ၃/၁ ၁၁ ¶၄
လံာ်စီဆှံ အတၢ်ပာ်ဖျါလၢ လံာ်အ့ၤစတၢ်အဂီၢ်
၉:၁၀, ၁၅, ၁၆—ပှၤယူဒၤဖိတဖၣ် အိၣ်ဒီးတၢ်ခွဲးတၢ်ယာ်လၢ ကဟံးန့ၢ်ဝဲ အဒုၣ်အဒါတဖၣ် အတၢ်ဖိတၢ်လံၤ ဘၣ်ဆၣ် ဘၣ်မနုၤအဃိ အဝဲသ့ၣ် တဟံးန့ၢ်ဝဲလဲၣ်. အဝဲသ့ၣ် မၤဝဲဒ်န့ၣ်အဃိ ပာ်ဖျါထီၣ်ဝဲလၢ အဝဲသ့ၣ် အတၢ်တိာ်ပာ်န့ၣ် မ့ၢ်လၢကဒီသဒၢလီၤသးအဂီၢ် တမ့ၢ်လၢ ကထူးထီၣ်တီၤထီၣ်အဂီၢ်ဘၣ်.
လါအီးကထိဘၢၣ် ၂-၈
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယိၤဘး ၁-၃
“ဆဲးပာ်ဖျါထီၣ်လၢ နအဲၣ်ယဟိဝၤယွၤဒိၣ်မး”
ကွၢ်လိမၤဒိး စီၤနိအၤ, စီၤဒၤနံးယ့လး ဒီးစီၤယိၤဘး အတၢ်နာ် ဒီးအတၢ်ဒိကနၣ်တက့ၢ်
၁၆ စီၤယိၤဘး ထံၣ်ဘၣ်တၢ်ကီတၢ်ခဲ မနုၤတဖၣ်လဲၣ်. စီၤယိၤဘး ထံၣ်ဘၣ်တၢ်ဆီတလဲဖးဒိၣ် အိၣ်ထီၣ်လၢအတၢ်အိၣ်မူအပူၤလီၤ. အခီၣ်ထံးန့ၣ် စီၤယိၤဘး “ဒိၣ်န့ၢ်ကယဲၢ်ပှၤမုၢ်ထီၣ်ဖိ ခဲလၢာ်တက့ၢ်လီၤ.” (ယိၤဘး ၁:၃) အဝဲမ့ၢ်ပှၤထူးပှၤတီၤတဂၤ ဒီးပှၤအါဂၤသ့ၣ်ညါအီၤ ဒီးပာ်ကဲအီၤလီၤ. (ယိၤဘး ၂၉:၇-၁၆) အဝဲအိၣ်ဒီးလီၢ်လၤဒ်အံၤသနာ်က့ အဝဲတဆိကမိၣ်ဝဲလၢ အဂ့ၤန့ၢ်ပှၤဂၤဘၣ်. ဒီးအဝဲတဆိကမိၣ်လၢ အတလိၣ်ဘၣ်ယွၤအတၢ်မၤစၢၤန့ၣ်ဘၣ်. လၢတၢ်န့ၣ်အဃိ ယဟိဝၤယွၤ ကိးအီၤလၢ “ယခ့ယပှၤ” လီၤ. တကးဒံးဘၣ် ယဟိဝၤယွၤ တဲဝဲလၢ စီၤယိၤဘးန့ၣ်မ့ၢ် “ပှၤလၢအလၢအပှဲၤ, ဒီးအတီအလိၤ, ပှၤလၢအပျံၤယွၤ, ဒီးဟးဆှဲးတၢ်အၢ” လီၤ.—ယိၤဘး ၁:၈.
၁၇ စီၤယိၤဘး အတၢ်အိၣ်မူ ဆီတလဲလၢာ်လၢာ်ဆ့ဆ့လီၤ. တၢ်လၢအအိၣ်ဒီးအီၤတဖၣ် လီၤမၢ်ကွံာ်ခဲလၢာ်အဃိ အဝဲအသးဟးဂီၤတုၤဒၣ်လဲာ် အဲၣ်ဒိးသံဝဲလီၤ. မုၢ်မဆါတနံၤအံၤ ပသ့ၣ်ညါလၢမုၣ်ကီၤလံၢ် ဒုးအိၣ်ထီၣ်ဝဲ စီၤယိၤဘး အတၢ်ကီတၢ်ခဲလီၤ. အဝဲတဲဝဲလၢ စီၤယိၤဘးမၤယွၤအတၢ်မၤန့ၣ် မ့ၢ်ထဲဒၣ်လၢအနီၢ်ကစၢ် အဘျုးအဂီၢ်လီၤ. (ဖး ယိၤဘး ၁:၉, ၁၀ တက့ၢ်.) ယဟိဝၤယွၤတပာ်ဝဲ တၢ်ဒုၣ်ဒွဲၣ်စံးအၢတခါအံၤ ဒ်အမ့ၢ်တၢ်ဂ့ၢ်ဆံးဆံးဖိတခါဘၣ်. ဒ်သိးကစၢ်ယွၤ ကပာ်ဖျါထီၣ်လၢ မုၣ်ကီၤလံၢ်မ့ၢ်ပှၤလၢအလီတၢ်အဂီၢ်န့ၣ် အဝဲမၤဝဲဒ်လဲၣ်. ယဟိဝၤယွၤဟ့ၣ် စီၤယိၤဘးတၢ်ခွဲးတၢ်ယာ်လၢ ကပာ်ဖျါထီၣ် အတၢ်သးတီ ဒီးကပာ်ဖျါထီၣ်စ့ၢ်ကီးလၢ အဝဲမၤယွၤအတၢ်မၤန့ၣ် မ့ၢ်လၢအအဲၣ်ယွၤအဃိလီၤ.
ပၢၤဃာ် နတၢ်သးတီ
၁၀ ပဝဲသ့ၣ်တဖၣ်စ့ၢ်ကီး မုၣ်ကီၤလံၢ် တဲပှၤဒ်စီၤယိၤဘးအသိးလီၤ. အဝဲတဲဝဲလၢ ပတအဲၣ်ယဟိဝၤယွၤ အနီၢ်ကီၢ်ဘၣ်, ဒ်သိးပကမၤပူၤဖျဲး ပသးသမူအဂီၢ် ပကပာ်တ့ၢ်ကွံာ် ကစၢ်ယွၤအတၢ်မၤ ဒီးအဝဲတဲစ့ၢ်ကီးဝဲလၢ ပတၢ်သးတီန့ၣ် မ့ၢ်တၢ်ကလီကလီလီၤ. (ယိၤဘး ၂:၄, ၅; လီၣ်ဖျါ ၁၂:၁၀) လၢတၢ်န့ၣ်အဃိ နတူၢ်ဘၣ်ဒ်လဲၣ်. နသးကဘၣ်ဒိတမ့ၢ်ဘၣ်ဧါ. ဘၣ်ဆၣ် ဆိကမိၣ်ကွၢ် တၢ်ဂ့ၢ်အံၤတက့ၢ်. ယဟိဝၤယွၤ ပျဲဝဲလၢ မုၣ်ကီၤလံၢ် မၤကွၢ်ပတၢ်သးတီလီၤ. မ့ၢ်လၢအဝဲ နာ်န့ၢ်ပှၤအဃိ အဝဲဟ့ၣ်ပှၤ တၢ်ခွဲးတၢ်ယာ်လီၤဆီအံၤလီၤ. ယဟိဝၤယွၤနာ်ဝဲလၢ နပၢၤဃာ် နတၢ်သးတီ ဒီးပာ်ဖျါထီၣ်လၢ မုၣ်ကီၤလံၢ်မ့ၢ် ပှၤလီတၢ်သ့လီၤ. ဒီးအဝဲအၢၣ်လီၤဝဲလၢ အကမၤစၢၤနၤ ဒ်သိးနမၤဒ်န့ၣ် ကန့ၢ်အဂီၢ်လီၤ. (ဧ့ၤဘြံၤ ၁၃:၆) တၢ်ပၢကစၢ်လၢ အဒိၣ်ကတၢၢ်တဂၤအံၤ နာ်န့ၢ်ပှၤအဃိ မ့ၢ်တၢ်ခွဲးတၢ်ယာ်လၢ အလီၤဆီဒိၣ်မးလီၤ. ဘၣ်မနုၤအဃိ တၢ်သးတီ မ့ၢ်တၢ်လၢအရ့ဒိၣ်ဒိၣ်မးလဲၣ်န့ၣ် မ့ၢ်နသ့ၣ်ညါဧါ. မ့ၢ်လၢတၢ်သးတီ ကမၤစၢၤပှၤဒ်သိး ပကပာ်ဖျါထီၣ်လၢ မုၣ်ကီၤလံၢ်မ့ၢ်ပှၤလီတၢ်, ပကပာ်စီဆှံယွၤအမံၤ ဒီးဆီၣ်ထွဲမၤစၢၤအတၢ်ပၢလီၤ. ဒ်သိး ပကဆဲးအိၣ်ဒီးတၢ်သးတီအဂီၢ် ပမၤကသ့ဒ်လဲၣ်.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
ဖဲယ့ၣ်ၡူးဘူးထီၣ်ကသံအခါ အတဲတၢ်ကတိၤတဖၣ်န့ၣ် ပမၤလိန့ၢ်တၢ်မနုၤသ့လဲၣ်
၉ ယ့ၣ်ၡူးတဲတၢ်မနုၤလဲၣ်. တချုးဖဲ ယ့ၣ်ၡူးဘူးထီၣ်ကသံအခါန့ၣ် အဝဲကိးပသူထီၣ်လၢ “ယကစၢ်ယွၤဧၢ, ယကစၢ်ယွၤဧၢ, ဘၣ်မနုၤအဃိ နပာ်တ့ၢ်ကွံာ်ယၤလဲၣ်.” (မးသဲ ၂၇:၄၆) ဘၣ်မနုၤအဃိ ယ့ၣ်ၡူးတဲဝဲဒ်အံၤလဲၣ်န့ၣ် လံာ်စီဆှံတပာ်ဖျါထီၣ်ဝဲဘၣ်. ဘၣ်ဆၣ် ပကတဲသကိး ပမၤလိန့ၢ်တၢ်လၢ ယ့ၣ်ၡူးအတၢ်ကတိၤအံၤသ့ဒ်လဲၣ်. ဖဲယ့ၣ်ၡူးတဲဝဲဒ်န့ၣ်အခါ ပသ့ၣ်ညါဘၣ်လၢ အဝဲမၤလၢထီၣ်ပှဲၤထီၣ်ဝဲ ဝံအတၢ်စံးပာ်လၢ စံးထီၣ်ပတြၢၤ ၂၂:၁ အပူၤလီၤ. တကးဒံးဘၣ် ယ့ၣ်ၡူးအတၢ်ကတိၤအံၤ ပာ်ဖျါထီၣ်ဝဲလၢ ယဟိဝၤယွၤတ “မၤကရၢဝးတရံး” အဖိခွါဘၣ်. (ယိၤဘး ၁:၁၀) ယ့ၣ်ၡူးသ့ၣ်ညါဝဲလၢအပၢ် ဟ့ၣ်ဝဲအခွဲးလၢ ပှၤလၢအသးဟ့အီၤတဖၣ် ကမၤကွၢ်အတၢ်နာ် တုၤအသံတစုလီၤ. ပှၤဟီၣ်ခိၣ်လၢ အထံၣ်ဘၣ်တၢ်မၤကွၢ် ဒ်သိးဒီးယ့ၣ်ၡူးန့ၣ် တအိၣ်နီတဂၤဘၣ်. တၢ်ကတိၤသ့ၣ်တဖၣ်အံၤ ပာ်ဖျါထီၣ်ဝဲလၢ ယ့ၣ်ၡူးသံန့ၣ် အတၢ်ကမၣ်တအိၣ်ဘၣ်.
၁၁ စီၤယၤကိာ် နၢ်ပၢၢ်ဝဲ ဒီပုၢ်ဝဲၢ်မုၣ်ခွါတဖၣ် အတၢ်ကီတၢ်ခဲ. လၢစီၤယၤကိာ် အလံာ်ပရၢပူၤန့ၣ် ပထံၣ်ဘၣ်လၢ စီၤယၤကိာ် သ့ၣ်ညါဝဲ ဒီပုၢ်ဝဲၢ်မုၣ်ခွါတဖၣ် အတၢ်ကီတၢ်ခဲ. ဒီးဒီပုၢ်ဝဲၢ်မုၣ်ခွါတဖၣ် ကဘၣ်လဲၤခီဖျိ အတၢ်ကီတၢ်ခဲတဖၣ် ဒ်လဲၣ်န့ၣ် စီၤယၤကိာ် ဟ့ၣ်ကူၣ်အဝဲသ့ၣ်ပျီပျီ. အဒိ, ခရံာ်ဖိတနီၤန့ၣ် တမၤထွဲဝဲ တၢ်ဟ့ၣ်ကူၣ် တဘျီဃီဘၣ်. (ယၤကိာ် ၁:၂၂) ဒီးအဂၤတနီၤန့ၣ် ကွၢ်မဲာ်ဝဲ ပှၤကဲဒိၣ်တဖၣ်. (ယၤကိာ် ၂:၁-၃) ဒီးမ့မ့ၢ်လၢအဂၤတနီၤန့ၣ် ပၢၤအထးခိၣ်တန့ၢ်ဘၣ်. (ယၤကိာ် ၃:၈-၁၀) ခရံာ်ဖိတဖၣ်အံၤန့ၣ် အဝဲသ့ၣ် အိၣ်ဒီးတၢ်ကီတၢ်ခဲဖးဒိၣ် ဒ်အံၤသနာ်က့ စီၤယၤကိာ် တပျၢ်စုပျၢ်ခီၣ်လၢ အဝဲသ့ၣ် အဖီခိၣ်ဘၣ်. စီၤယၤကိာ် ဟ့ၣ်ကူၣ်အဝဲသ့ၣ်လိၤလိၤ လၢတၢ်အဲၣ်တၢ်ကွံအပူၤ. ဒီးပှၤလၢအနီၢ်သးဂံၢ်ဘါ လီၤစၢ်တဖၣ်န့ၣ် စီၤယၤကိာ် ဟ့ၣ်ကူၣ်အဝဲသ့ၣ် လၢကလဲၤဃ့တၢ်မၤစၢၤ လၢတၢ်အိၣ်ဖှိၣ်သးပှၢ်တဖၣ် အအိၣ်လီၤ.—ဖး ယၤကိာ် ၅:၁၃-၁၅.
၁၂ တၢ်မၤလိလၢပဂီၢ်– ပကဘၣ်နၢ်ပၢၢ်ပှၤဂၤ အတၢ်ကီတၢ်ခဲ ဒီးအိၣ်ဒီးတၢ်ထံၣ်လၢအဂ့ၤ. ပပှၤမၤလိလံာ်စီဆှံဖိအါဂၤန့ၣ် ကမၤထွဲဝဲ တၢ်လၢအမၤလိဘၣ်ဝဲအဂီၢ် ဘၣ်သ့ၣ်သ့ၣ် တညီလၢအဝဲသ့ၣ်အဂီၢ်ဘၣ်. (ယၤကိာ် ၄:၁-၄) ဘၣ်သ့ၣ်သ့ၣ် အဝဲသ့ၣ် ကပတုာ်ကွံာ် အလုၢ်လၢ်လၢအတဂ့ၤဘၣ် ဒီးကအိၣ်ဒီး ခရံာ်ဖိ အတၢ်ဂ့ၤတၢ်ဝါအဂီၢ် အဝဲသ့ၣ် ကလိၣ်ဘၣ် တၢ်ဆၢကတီၢ်. အဃိ ပကွၢ်လိမၤဒိး စီၤယၤကိာ်သ့ခီဖျိ တၢ်လၢပပှၤမၤလိလံာ်စီဆှံဖိတဖၣ် ကဘၣ်မၤဂ့ၤထီၣ်ဝဲန့ၣ် ပတဲဘၣ် အဝဲသ့ၣ်ပျီပျီ. ဒီးပကဘၣ် ဆဲးအိၣ်ဒီး တၢ်ထံၣ်လၢအဂ့ၤ ဒီးနာ်လၢ ယဟိဝၤယွၤ ကမူၤပှၤလၢအဆီၣ်လီၤသး လၢအအိၣ် ဒီးကဟ့ၣ် အဝဲသ့ၣ် တၢ်ဂံၢ်တၢ်ဘါ ဒ်သိး အဝဲသ့ၣ် ကဆီတလဲ အတၢ်အိၣ်မူအဂီၢ်လီၤ.—ယၤကိာ် ၄:၁၀.
၁၃ စီၤယၤကိာ် အိၣ်ဒီးတၢ်ထံၣ်လၢအကြၢးအဘၣ် လၢအနီၢ်ကစၢ် အဖီခိၣ်. စီၤယၤကိာ်န့ၣ် ခီဖျိလၢအမ့ၢ် ယ့ၣ်ၡူးအဒီပုၢ်ဝဲၢ် ဒီးအအိၣ်ဒီးမူဒါလီၤဆီအဃိ အတဆိကမိၣ်လီၤအသးလၢ အမ့ၢ်ပှၤလၢအရ့ဒိၣ်န့ၢ်ဒံး ဒီပုၢ်ဝဲၢ်မုၣ်ခွါအဂၤတဖၣ်ဘၣ်. အဝဲကိးဒီပုၢ်ဝဲၢ်မုၣ်ခွါတဖၣ်လၢ “ယဒီပုၢ်ဝဲၢ်သးဘိ” လီၤ. (ယၤကိာ် ၁:၁၆, ၁၉; ၂:၅) အတဂုာ်ကျဲးစၢးဝဲ ဒ်သိးပှၤဂၤကထံၣ်အီၤလၢ အမ့ၢ်ပှၤလၢပှၤပှဲၤဘၣ်. လၢတၢ်န့ၣ်အလီၢ် အတဲဝဲလၢ “ပဝဲခဲလၢာ် ပမၤကမၣ်တၢ်အါဘျီလီၤ.”—ဖး ယၤကိာ် ၃:၂.
၁၄ တၢ်မၤလိလၢပဂီၢ်– ပဝဲခဲလၢာ်န့ၣ် ပမ့ၢ်ပှၤတၢ်ဒဲးဘးဖိ. အဃိ ပတဘၣ်ဆိကမိၣ်လၢ ပမ့ၢ်ပှၤလၢအရ့ဒိၣ်န့ၢ်ဒံး ပပှၤမၤလိလံာ်စီဆှံဖိတဖၣ် လၢကျဲတဘိဘိဘၣ်. ပမ့ၢ် ဂုာ်ကျဲးစၢး ဒ်သိး အဝဲသ့ၣ် ကထံၣ်ဝဲလၢ ပတမၤကမၣ်တၢ်နီတဘျီဘၣ်န့ၣ် အဝဲကဆိကမိၣ်ဝဲလၢ အဒိကနၣ် ကစၢ်ယွၤအကလုၢ် လၢလၢပှဲၤပှဲၤ တသ့နီတဘျီဘၣ် ဒီးအသးကဟးဂီၤလီၤ. အဃိ ပမ့ၢ်တဲဘၣ် ပပှၤမၤလိလံာ်စီဆှံဖိ တီတီလိၤလိၤလၢ ပဝဲစ့ၢ်ကီး ပကမၤထွဲ လံာ်စီဆှံ အတၢ်ဟံးစုနဲၣ်ကျဲအဂီၢ် တညီလၢပဂီၢ်ထီဘိဘၣ် ဒီးယဟိဝၤယွၤ မၤစၢၤပှၤ လၢပကဆီတလဲပသး ဒ်လဲၣ်န့ၣ် အဝဲကသ့ၣ်ညါထီၣ်ဝဲလၢ အမၤယဟိဝၤယွၤ အတၢ်ဘၣ်သးသ့လီၤ.
လါအီးကထိဘၢၣ် ၉-၁၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယိၤဘး ၄-၅
“ပလီၢ်နသး ဘၣ်ဃးဒီး တၢ်ကစီၣ်လၢအတမ့ၢ်တတီ”
it-1 ၇၁၃ ¶၁၁
စီၤအလံဖးစး
၂. အကဲဝဲ စီၤယိၤဘး အသကိးသၢဂၤအကျါတဂၤ. (ယိၤဘး ၂:၁၁) စီၤအလံဖးစးန့ၣ် ကဲဝဲ ပှၤတ့မၣ်ဖိ ဒီးလီၤဂာ်လၢ အဟဲလီၤစၢၤလီၤသွဲၣ်လၢ စီၤဧ့ၡီၤ အဖိခွါဝဲၢ်ကိ အဃိ အကဲဝဲ စီၤအၤဘြၤဟၣ် အစၢၤအသွဲၣ် ဒီးအဒီဘူးဒီတံၢ်ဒီး စီၤယိၤဘးတစဲးဖိ. စီၤအလံဖးစး ဒီးအစၢၤအသွဲၣ်တဖၣ်န့ၣ် ပတြၢၤလီၤအသးလၢ အတၢ်ကူၣ်သ့အဃိ. (ယံး ၄၉:၇) လၢ “ပှၤမၤမုာ်ထီၣ်တၢ်ဖိ” သၢဂၤအကျါန့ၣ် စီၤအလံဖးစး ကဲပှၤလၢအရ့ဒိၣ်ကတၢၢ် ဒီးအဒိၣ်စိလၢ အသကိးတဖၣ် အဖီခိၣ်အဃိ ဖျါလီၤဂာ်လၢ အကဲပှၤလၢ အသးပှၢ်ကတၢၢ်စ့ၢ်ကီး. လၢပှၤတဲအါလိာ်သး သၢဘျီအကျါန့ၣ် အဝဲတဲတၢ်လၢအဆိကတၢၢ် ဒီးတဲတၢ်အါကတၢၢ်.
တၢး၀၅ ၉/၁၅ ၂၆ ¶၂
တြီဆၢတၢ်ဆိမိၣ် လၢအကမၣ်
စီၤအလံဖးစး တဲက့ၤဝဲ တၢ်လဲၤခီဖျိလၢ အလီၤကမၢကမၣ်လၢ “ပှၤနီၢ်သးဖိတဂၤ လဲၤခီဂာ်တၢ်လၢ ယမဲာ်ညါ ဒီးယဘ့ၣ်ကဆှၣ်ထီၣ်လီၤ. ဒီးပှၤနီၢ်သးဖိတဂၤန့ၣ် ဆၢထၢၣ်ဝဲ ဂၢၢ်တပၢၢ် ဒီးယထံၣ် တၢ်တမံၤန့ၣ် လၢယမဲာ်ညါ ဘၣ်ဆၣ် အကဲမနုၤလဲၣ်န့ၣ် ယတသ့ၣ်ညါဘၣ်. ဒီးတၢ်အိၣ်ဘှ့ၣ်ကလာ်လၢ ယကပိာ်ကပၤ ဒီးယနၢ်ဟူ တၢ်ကလုၢ်သီၣ်ထီၣ်.” (ယိၤဘး ၄:၁၅, ၁၆) ပှၤနီၢ်သးဖိလၢ အဟ့ၣ်ဒုးဆိကမိၣ် စီၤအလံဖးစးတၢ်န့ၣ် ကဲမတဂၤလဲၣ်. ပမ့ၢ်ကွၢ်တၢ်ကတိၤလၢ အဆဲးတဲဝဲလၢ အပာ်ဒ့ၣ်ပာ်ကမၢ်တၢ်န့ၣ် အပာ်ဖျါထီၣ်ဝဲလၢ ပှၤနီၢ်သးဖိတဂၤအံၤ တမ့ၢ်ဝဲ ကစၢ်ယွၤ အမူခိၣ်ကလူး လၢအတီအလိၤဘၣ်. (ယိၤဘး ၄:၁၇, ၁၈) ပှၤနီၢ်သးဖိတဂၤအံၤန့ၣ် အမ့ၢ်ဝဲ ပှၤနီၢ်သးဖိလၢ အအၢအသီ. အဃိ ပထံၣ်ဘၣ်လၢ ယဟိဝၤယွၤ သိၣ်ဃီၣ်ဝဲ စီၤအလံဖးစး ဒီးအသကိးခံဂၤ ခီဖျိလၢ အဝဲသ့ၣ် တဲလံၣ်တဲလီတၢ်အဃိ. (ယိၤဘး ၄၂:၇) စီၤအလံဖးစးန့ၣ် မုၣ်ကီၤလံၢ် ဒိၣ်စိလၢအဖီခိၣ် အဃိ တၢ်လၢအတဲဝဲတဖၣ်န့ၣ် ထီဒါလိာ်အသးဒီး ကစၢ်ယွၤ အတၢ်ဆိကမိၣ်.
တၢး၁၀ ၂/၁၅ ၁၉ ¶၅-၆
ထီဒါမုၣ်ကီၤလံၢ် အတၢ်ဆိကမိၣ်
မုၣ်ကီၤလံၢ်သူဝဲ စီၤယိၤဘး အသကိး စီၤအလံဖးစး လၢအကတဲဝဲလၢ ပှၤဟီၣ်ခိၣ်ဖိတဖၣ်န့ၣ် အဂံၢ်စၢ်ဘါစၢ်ဒိၣ်မး. စီၤအလံဖးစး တဲဝဲစီၤယိၤဘးလၢ “ပှၤကညီလၢ အမ့ၢ်ဒၣ် ဟီၣ်ခိၣ်ကမူၣ် ဒီးအိၣ်ဝဲဆိးဝဲလၢ ဟံၣ်လၢ ပှၤတ့အီၤလၢကပံာ် ဒီးလၢ အဘၣ်တၢ်မၤသဘှံးအီၤညီ ဒ်တၢ်အဃၢ်တဖၣ် အသိးန့ၣ် အကနးဒိၣ်န့ၢ်အန့ၣ်လၢ အဝဲသ့ၣ်အဂီၢ်လီၤ. အဝဲသ့ၣ် လီၤကလဲကွံာ် ခဲလၢာ်ခဲဆ့ လၢတနံၤအတီၢ်ပူၤလီၤ. အဝဲသ့ၣ်ဟးဂီၤကွံာ်ဝဲ လီၤထူလီၤယိာ် ဘၣ်ဆၣ် ပှၤတပာ်သူၣ်ပာ်သးဝဲ နီတဂၤဘၣ်.”—ယိၤဘး ၄:၁၉, ၂၀.
လံာ်စီဆှံအဆၢတနီၤန့ၣ် ပာ်ဖျါထီၣ်ဝဲလၢ ပလီၤဂာ်ဒ် “သပၢၤဟီၣ်ခိၣ်.” (၂ ကရံၣ် ၄:၇) ပန့ၢ်သါဘၣ်တၢ်ဒဲးဘး ဒီးတၢ်တလၢတပှဲၤအဃိ ပကဲပှၤလၢ အဂံၢ်စၢ်ဘါစၢ်. (ရိ ၅:၁၂) အဃိ ပထီဒါက့ၤ မုၣ်ကီၤလံၢ် လၢပနီၢ်ကစၢ်အဂံၢ်အဘါ တန့ၢ်ဘၣ်. ဘၣ်ဆၣ် ဒ်ပမ့ၢ်ခရံာ်ဖိအသိး ပတအိၣ်ထဲတဂၤဘၣ် ပှၤလၢအကမၤစၢၤပှၤန့ၣ်အိၣ်ဝဲ. ပမ့ၢ်ပှၤလၢ အဂံၢ်စၢ်ဘါစၢ်သနာ်က့ ကစၢ်ယွၤ ပာ်လုၢ်ပာ်ပှ့ၤပှၤဒိၣ်မး. (ၡါ ၄၃:၄) တကးဒံးဘၣ် ယဟိဝၤယွၤ ဟ့ၣ်လီၤဝဲအသးစီဆှံလၢ ပှၤလၢအဃ့အီၤတဖၣ်အအိၣ်. (လူၤကၣ် ၁၁:၁၃) ကစၢ်ယွၤ အသးစီဆှံန့ၣ် ဟ့ၣ်ပှၤ “တၢ်ဂံၢ်တၢ်ဘါလီၤဆီ” ဒ်သိး ပလဲၤခီဖျိ တၢ်ကီတၢ်ခဲ တမံၤဂ့ၤတမံၤဂ့ၤလၢ မုၣ်ကီၤလံၢ် ဒုးအိၣ်ထီၣ်ဝဲကန့ၢ်အဂီၢ်. (၂ ကရံၣ် ၄:၇; ဖံလံး ၄:၁၃) ပမ့ၢ်ထီဒါ မုၣ်ကီၤလံၢ် ဒီးအိၣ်ဆၢထၢၣ်ဂၢၢ်ကျၢၤ လၢတၢ်နာ်အပူၤန့ၣ် ကစၢ်ယွၤ ကဟ့ၣ်ပှၤ တၢ်ဂံၢ်တၢ်ဘါ. (၁ ပ့း ၅:၈-၁၀) အဃိ ပတလိၣ်ပျံၤ မုၣ်ကီၤလံၢ်ဘၣ်.
ပလီၢ်နသး ဘၣ်ဃးဒီး တၢ်ကစီၣ်လၢအတမ့ၢ်တတီ
● ဃုသ့ၣ်ညါ တၢ်ကစီၣ် အခီၣ်ထံးခီၣ်ဘိ ဒီးတၢ်ဂ့ၢ်တၢ်ကျိၤ
လံာ်စီဆှံတဲဝဲဒ်လဲၣ်– “တၢ်တမံၤဂ့ၤ တမံၤဂ့ၤ မ့ၢ်အဘၣ်ဧါ တဘၣ်ဧါန့ၣ် ဃုသ့ၣ်ညါအီၤ လီၤတံၢ်လီၤဆဲးတက့ၢ်.”—၁ သ့းစၤလနံ ၅:၂၁.
တၢ်ဂ့ၢ်လၢ ပှၤတဲသကိးဝဲအါ မ့တမ့ၢ် ပှၤပာ်ဖျါထီၣ်ဝံၤပာ်ဖျါထီၣ်က့ၤလၢ တၢ်ကစီၣ်အပူၤန့ၣ် တချုးလၢ နနာ်အီၤဒံးဘၣ် ဒီးတချုးလၢ နတဲဘၣ်ပှၤဂၤဒံးဘၣ်အခါန့ၣ် ဃုသ့ၣ်ညါလီၤတံၢ်လၢ မ့ၢ်အဘၣ်ဧါ တဘၣ်ဧါ. ပဃုသ့ၣ်ညါအီၤ ကသ့ဒ်လဲၣ်.
ဃုသ့ၣ်ညါ တၢ်ကစီၣ်အခီၣ်ထံးခီၣ်ဘိ ဟဲဖဲလဲၣ်. ခီပနံၣ်လၢ အရၤလီၤဝဲ တၢ်ကစီၣ် မ့တမ့ၢ် တၢ်ကရၢကရိတနီၤန့ၣ် ခီဖျိလၢ အဝဲသ့ၣ် အစံပွါယ့ ဒီးထံဂ့ၢ်ကီၢ်ဂ့ၢ်အဃိ အဝဲသ့ၣ် အိၣ်ဃူဝဲပှၤတဖုဖု. နမ့ၢ်ထံၣ်ဘၣ် တၢ်ကစီၣ်တမံၤမံၤန့ၣ် ထိၣ်သတြီၤအီၤဒီး တၢ်ကစီၣ်အဂၤတခါခါ. တဘျီတခီၣ်န့ၣ် နသကိး ကဆှၢဘၣ်န့ၢ်နၤ တၢ်ကစီၣ်လၢအကမၣ်လၢ အံမ့ပူၤ မ့တမ့ၢ်လၢ အ့ၤထၢၤနဲၣ်အပူၤ. အဃိ တချုးလၢန နထံၣ်ဘၣ်တၢ်ကစီၣ်လၢ အခီၣ်ထံးဒံးဘၣ်န့ၣ် တဘၣ်နာ် တၢ်ကစီၣ်တဖၣ်န့ၣ်ဒံးတဂ့ၤ.
တၢ်ကစီၣ်လၢ နနၢ်ဟူဘၣ်အီၤန့ၣ် မ့ၢ်အကဲတၢ်ကစီၣ်လၢ အဟဲထီၣ်သီသီဧါ ဒီးအဘၣ်လီၤတံၢ်ဧါန့ၣ် ဃုသ့ၣ်ညါအီၤ. ဃုသ့ၣ်ညါ မုၢ်နံၤမုၢ်သီ ဒီးတၢ်အုၣ်အသးလၢ အပာ်ဖျါထီၣ်ဝဲလၢ တၢ်ကစီၣ်န့ၣ်အဘၣ်. လီၤဆီဒၣ်တၢ် ပလီၢ်နသးဘၣ်ဃးဒီး တၢ်ကစီၣ်လၢ အဘံဘူ လၢပှၤပာ်ဖျါထီၣ်အီၤ လၢနီၢ်ကစၢ်အတၢ်ထံၣ် ဒီးတၢ်ကစီၣ်လၢ အထိၣ်ဟူးထိၣ်ဂဲၤထီၣ် ပှၤသးတၢ်တူၢ်ဘၣ်.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၃ ၅/၁၅ ၂၂ ¶၅-၆
နမ့ၢ်အိၣ်ဂၢၢ်အိၣ်ကျၢၤန့ၣ် နကန့ၢ်ဘၣ် ခိၣ်ဖးလၢ သးသမူတၢ်ဃ့ၢ်ပြၢတၢ်အပူၤ
ပအိၣ်ဘၣ်လၢ တၢ်ဘူၣ်တၢ်ဘါ အမ့ၢ်အတီ အတၢ်ကရၢကရိ အပူၤအဃိ မၤစၢၤပှၤဒ်သိး ပကအိၣ်ဂၢၢ်အိၣ်ကျၢၤအဂီၢ်. ပရ့လိာ်ဘၣ်ပသးဒီး ဒီပုၢ်ဝဲၢ်မုၣ်ခွါလၢ အပှဲၤဒီးတၢ်အဲၣ်တၢ်ကွံ လၢဟီၣ်ခိၣ်ဒီဘ့ၣ်အဃိ ပသးခုဒိၣ်မး. (၁ ပ့းတရူး ၂:၁၇) ဒီးပကဲထီၣ် တၢ်ဂံၢ်တၢ်ဘါလၢ ဒီပုၢ်ဝဲၢ်မုၣ်ခွါတဖၣ် ကအိၣ်ဂၢၢ်အိၣ်ကျၢၤဝဲအဂီၢ် သ့ဝဲစ့ၢ်ကီး.
ပကဆိကမိၣ်ကွၢ် စီၤယိၤဘး လၢအကဲပှၤတီပှၤလိၤတဂၤ အဒိအတဲာ်လၢ အကဲဘျုးဝဲအဂ့ၢ်. စီယိၤဘး အသကိး စီၤအလံဖးစး လၢပာ်မၤအသးဒ်သိးဒီး အဟ့ၣ်ဂံၢ်ဟ့ၣ်ဘါအီၤ တဂၤဒၣ်လဲာ်န့ၣ် အတဲဘၣ်ဝဲ စီၤယိဘးလၢ “လၢညါ နတၢ်ကတိၤတဖၣ် ဒုးဆၢထၢၣ်ဂၢၢ်ကျၢၤ ပှၤလၢအခီၣ်ဘၣ်တိၢ် တဂၤဂ့ၤ တဂၤဂ့ၤလီၤ. ဒီးနမၤဆူၣ်ထီၣ်ပှၤလၢ အခီၣ်လ့ၢ်ခိၣ် ကနိးတဖၣ် အဂံၢ်အဘါလီၤ.” (ယိၤဘး ၄:၄) မ့မ့ၢ်ပဝဲသ့ၣ်တဖၣ်မီၤ. ပဝဲတဂၤဘၣ်တဂၤန့ၣ် ပအိၣ်ဒီးမူဒါလၢ ပကမၤစၢၤ ပဒီပုၢ်ဝဲၢ်မုၣ်ခွါတဖၣ် ဒ်သိး ကဆဲးအိၣ်ဒီး တၢ်တူၢ်န့ၢ်ခီၣ်ကဲ လၢကစၢ်ယွၤ အတၢ်မၤအပူၤ. ဖဲပရ့လိာ်သးဒီး ဒီပုၢ်ဝဲၢ်မုၣ်ခွါတဖၣ်အခါ ပမၤထွဲ ဝံယၡါယၤ ၃၅:၃ သ့. ဖဲန့ၣ်တဲဝဲလၢ “မၤဆူၣ်ထီၣ် စုလၢအဂံၢ်စၢ်တဖၣ် ဒီးခီၣ်လ့ၢ်ခိၣ်လၢ အကနိးတဖၣ်တက့ၢ်.” (ယၡါယၤ ၃၅:၃) အဃိ ပာ်လီၤဖီတၢၣ်လၢ ဖဲနထံၣ်လိာ်သးဒီး ဒီပုၢ်ဝဲၢ်မုၣ်ခွါတဖၣ် တဘျီဂ့ၤတဘျီဂ့ၤအခါ နကဟ့ၣ်ဂံၢ်ဟ့ၣ်ဘါအဝဲသ့ၣ် တဂၤခံဂၤ. (ဧ့ၤဘြံၤ ၁၀:၂၄, ၂၅) ပမ့ၢ်စံးပတြၢၤအဝဲသ့ၣ် ဒီးစံးဘျုးစံးဖှိၣ်အဝဲသ့ၣ် ခီဖျိလၢ အဂုာ်ကျဲးစၢးမၤ ကစၢ်ယဟိဝၤယွၤ အတၢ်ဘၣ်သးန့ၣ် ကမၤစၢၤအဝဲသ့ၣ်ဒ်သိး အကအိၣ်ဂၢၢ်ကျၢၤ ဒီးဆဲးဃ့ၢ်လၢ တၢ်မူအကျဲ တုၤလၢအကတၢၢ်.
လါအီးကထိဘၢၣ် ၁၆-၂၂
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယိၤဘး ၆-၇
“ဖဲနထံၣ်ဘၣ်တၢ်ကီတၢ်ခဲ ဒီးနဆိကမိၣ်လၢ နလဲၤခီဖျိအီၤ တန့ၢ်လၢၤဘၣ်အခါ”
တၢး၀၆ ၃/၁၅ ၁၄ ¶၁၀
လံာ်စီဆှံ အတၢ်ပာ်ဖျါလၢ လံာ်ယိၤဘးအဂီၢ်
၇:၁; ၁၄:၁၄—တၢ်ကတိၤလၢအမ့ၢ် “ပှၤမၤတၢ်ဖိလၢ အဘၣ်မၤတၢ်ဆူၣ်ဆူၣ်” ဒီး “တၢ်ဆၢကတီၢ်လၢ အဘၣ်တၢ်ပာ်ပနီၣ်အီၤ” န့ၣ် အခီပညီဒ်လဲၣ်. စီၤယိၤဘး ထံၣ်ဘၣ်ဒီးတၢ်ကီတၢ်ခဲ နးဒိၣ်တလၢအဃိ အဝဲတူၢ်ဘၣ်ဝဲလၢ အတၢ်အိၣ်မူန့ၣ် လီၤဂာ်ဒ်သိးဒီး ပှၤမၤတၢ်ဖိလၢ အဘၣ်မၤတၢ်ဆူၣ်ဆူၣ်. (ဘး ၁၀:၁၇) ဖဲပှၤတဂၤသံအခါ တချုးလၢ အဂဲၤဆၢထၢၣ်သမူထီၣ်က့ၤ ဒံးဘၣ်န့ၣ် အဘၣ်အိၣ်လၢ ၡံအိအပူၤ သပှၢ်ကတၢၢ်. ဖဲစီၤယိၤဘး တဲဝဲလၢ တၢ်ဆၢကတီၢ်လၢ အဘၣ်တၢ်ပာ်ပနီၣ်အီၤအခါ အဝဲအဲၣ်ဒိးတဲဝဲ တၢ်ဆၢကတီၢ်လၢ ပှၤသံတဂၤ ဘၣ်အိၣ်ဝဲလၢ ၡံအိအပူၤအဆၢကတီၢ်.
ယဟိဝၤယွၤမၤပူၤဖျဲး ပှၤလၢအသးဂံၢ်ဘါလီၤစၢ်တဖၣ်
ပသ့ၣ်ညါလၢ ပတၢ်အိၣ်မူန့ၣ်ဖုၣ်ဝဲ ဒီးပမုၢ်နံၤတဖၣ်ပှဲၤဝဲဒီး “တၢ်ကိၢ်တၢ်ဂီၤ” လီၤ. (ယိၤဘး ၁၄:၁) အဃိ တဘျီတခီၣ်န့ၣ် ပသးဂံၢ်ဘါကလီၤစၢ်ဝဲလီၤ. ဘၣ်ဆၣ် ယဟိဝၤယွၤအခ့အပှၤလၢညါ အါဂၤစ့ၢ်ကီး တူၢ်ဘၣ်ဝဲဒ်န့ၣ်လီၤ. တနီၤန့ၣ်အဲၣ်ဒိးသံဝဲလီၤ. (၁ စီၤပၤ ၁၉:၂-၄; ယိၤဘး ၃:၁-၃, ၁၁; ၇:၁၅, ၁၆) ဘၣ်ဆၣ် ယဟိဝၤယွၤမၤမုာ်ထီၣ်အဝဲသ့ၣ်အသး ဒီးဟ့ၣ်ဆူၣ်ထီၣ် အဝဲသ့ၣ်အဂံၢ်အဘါလီၤ. ဒီးအဝဲသ့ၣ်အဂ့ၢ်န့ၣ် ပထံၣ်ဘၣ်လၢလံာ်စီဆှံအပူၤအဃိ ပမၤလိန့ၢ်တၢ်လၢ အဝဲသ့ၣ်အအိၣ်သ့ဝဲလီၤ.—ရိမ့ၤ ၁၅:၄.
g ၁/၁၂ ၁၆-၁၇
ဖဲနဆိကမိၣ်လၢ နတူၢ်တၢ်တကဲလၢၤဘၣ်အခါ
နမ့ၢ်ထံၣ်ဘၣ် တၢ်အိၣ်သးလၢ အကီအခဲန့ၣ် သ့ၣ်နီၣ်ထီၣ်လၢ ပှၤထံၣ်ဘၣ် တၢ်ကီတၢ်ခဲတဖၣ်န့ၣ် တမ့ၢ်ထဲနၤတဂၤဘၣ်. ပှၤကိးဂၤဒဲးန့ၣ် အိၣ်ဒီးတၢ်ကီတၢ်ခဲ တဂၤတမၠိ. လံာ်စီဆှံတဲဝဲလၢ “တုၤခဲအံၤန့ၣ် တၢ်ဘၣ်တ့ခဲလၢာ် ဆဲးကအုကစွါဒီး တူၢ်ဘၣ်တၢ် ဒ်သိးသိးလီၤ.” (ရိမ့ၤ ၈:၂၂) ဘၣ်သ့ၣ်သ့ၣ် နကတူၢ်ဘၣ်လၢ နတၢ်ကီတၢ်ခဲတဖၣ် လီၤမၢ်ကွံာ်ဝဲ တသ့နီတဘျီဘၣ်. ဘၣ်ဆၣ် ဒ်တၢ်ဆၢကတီၢ်လဲၤပူၤကွံာ်ဝဲအသိး တၢ်အိၣ်သး ဂ့ၤထီၣ်က့ၤဝဲသ့. ဘၣ်ဆၣ် ဖဲနထံၣ်ဘၣ် တၢ်ကီတၢ်ခဲအဆၢကတီၢ် တၢ်မနုၤကမၤစၢၤနၤလဲၣ်.
တဲဘၣ်နတၢ်တူၢ်ဘၣ်လၢ ပှၤလၢအဒိၣ်တုာ်ခိၣ်ပှဲၤ ဒီးနသကိးလၢ နနာ်န့ၢ်အီၤသ့. လံာ်စီဆှံတဲဝဲလၢ “တံၤသကိးတံၢ်နီၢ်န့ၣ် ပာ်ဖျါထီၣ် တၢ်အဲၣ်ကိးဆၢကတီၢ်ဒဲး ဒီးဖဲတၢ်ကိၢ်တၢ်ဂီၤအိၣ်ဝဲအခါ အကဲထီၣ်ဝဲ နဒီပုၢ်ဝဲၢ်လီၤ.” (ကတိၤဒိ ၁၇:၁၇) ပှၤတီပှၤလိၤ စီၤယိၤဘးန့ၣ် ဖဲအထံၣ်ဘၣ်ဒီး တၢ်သူၣ်ဟးဂီၤသးဟးဂီၤအခါ အဝဲတဲဘၣ်အတၢ်တူၢ်ဘၣ်လၢ ပှၤဂၤ. ဖဲအတူၢ်ဘၣ်လၢအ ‘သးဟ့လီၤ အတၢ်အိၣ်မူ’ အခါ အဝဲတဲဝဲလၢ “ယကကဒူးကဒ့ၣ်တၢ် ဒီးယကတဲတၢ် လၢတၢ်သးအုးဖးဒိၣ် အပူၤလီၤ.” (ဘး ၁၀:၁) နမ့ၢ်တဲဘၣ်ပှၤဂၤလၢ နတၢ်တူၢ်ဘၣ်န့ၣ် နသးကခုၣ်လီၤ ဒီးကမၤစၢၤနၤဒ်သိး နကအိၣ်ဒီး တၢ်ထံၣ်အဂ့ၤလၢ နတၢ်ကီတၢ်ခဲတဖၣ် အဖီခိၣ်.
ဃ့ဘါထုကဖၣ်ဒီး တဲဘၣ်ကစၢ်ယွၤလၢ နတၢ်တူၢ်ဘၣ်. ပှၤတနီၤတဲဝဲလၢ တၢ်ဃ့ဘါထုကဖၣ်န့ၣ် အကဲဝဲ တၢ်ကူစါယါဘျါ အကျိၤကျဲတမံၤလၢ အကမၤမုာ်ထီၣ်ပှၤသး. ဘၣ်ဆၣ် လံာ်စီဆှံ တတဲဝဲဒ်န့ၣ်ဘၣ်. စံးထီၣ်ပတြၢၤ ၆၅:၂ တဲဝဲလၢ ယဟိဝၤယွၤန့ၣ်မ့ၢ် “ပှၤလၢအဒိကနၣ် တၢ်ထုကဖၣ်” ဒီး ၁ ပ့းတရူး ၅:၇ န့ၣ်တဲဝဲလၢအ “သးအိၣ်သု.” ပကဘၣ်သန့ၤပသးလၢ ယဟိဝၤယွၤ အရ့ဒိၣ်ထဲလဲၣ်န့ၣ် လံာ်စီဆှံပာ်ဖျါထီၣ်ဝဲအါဘျီ. အဒိ–
“နာ်န့ၢ် ယဟိဝၤယွၤလၢ နသးဒီဖျၢၣ် ဒီးတဘၣ် သန့ၤနသးလၢ နနီၢ်ကစၢ် အတၢ်နၢ်ပၢၢ်တဂ့ၤ. လၢနတၢ်အိၣ်မူ ကိးသနၢၣ်ဒဲးန့ၣ် ဆိကမိၣ်ထံ အတၢ်ထံၣ်တက့ၢ်. ဒီးအဝဲ ကဒုးနဲၣ်နၤ ကျဲလၢအဘၣ်လီၤ.”—ကတိၤဒိ ၃:၅, ၆.
“မၤလၢပှဲၤန့ၢ်ဝဲ ပှၤလၢအပျံၤအီၤ [ယဟိဝၤ] တဖၣ် အတၢ်မိၣ်န့ၢ်သးလီလီၤ. အဝဲနၢ်ဟူ အဝဲသ့ၣ် အတၢ်ကိးပသူထီၣ်လၢ တၢ်မၤစၢၤအဂီၢ် ဒီးမၤပူၤဖျဲး အဝဲသ့ၣ်လီၤ”—စံးထီၣ်ပတြၢၤ ၁၄၅:၁၉.
“ပနာ်န့ၢ် ကစၢ်ယွၤလၢ ပမ့ၢ်ဃ့တၢ် တမံၤဂ့ၤတမံၤဂ့ၤ ဒ်အတၢ်ဘၣ်သးအသိးန့ၣ် အဝဲဒိကနၣ်ပှၤလီၤ.”—၁ ယိၤဟၣ် ၅:၁၄.
“ယဟိဝၤယွၤ အိၣ်ယံၤဒီး ပှၤအၢပှၤသီ, မ့မ့ၢ် ပှၤတီပှၤလိၤ အတၢ်ထုကဖၣ်န့ၣ် အနၢ်ဟူဝဲလီၤ.”—ကတိၤဒိ ၁၅:၂၉.
နမ့ၢ်တဲဘၣ်န တၢ်ကီတၢ်ခဲလၢ ကစၢ်ယွၤအအိၣ်န့ၣ် အဝဲကမၤစၢၤနၤ. လံာ်စီဆှံ ဟ့ၣ်ဂံၢ်ဟ့ၣ်ဘါပှၤလၢ “နာ်န့ၢ် ကစၢ်ယွၤ ထီဘိတက့ၢ်. တဲဖျါထီၣ် သုတၢ်တူၢ်ဘၣ်ခဲလၢာ် လၢအအိၣ်တက့ၢ်.”—စံးထီၣ်ပတြၢၤ ၆၂:၈.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
ဒိကနၣ်, ဃုသ့ၣ်ညါ ဒီးပာ်ဖျါထီၣ် တၢ်ဒိသူၣ်ဒိသး
၁၀ ပကွၢ်လိမၤဒိး ယဟိဝၤယွၤ သ့ခီဖျိ ပဂုာ်ကျဲးစၢး ဒ်သိးပကနၢ်ပၢၢ် ပဒီပုၢ်ဝဲၢ်မုၣ်ခွါတဖၣ်လီၤ. အဃိ ရ့ဒီးဒီပုၢ်ဝဲၢ်မုၣ်ခွါတဖၣ် ဒ်သိးနကသ့ၣ်ညါအါထီၣ် အဝဲသ့ၣ် တက့ၢ်. တချုးလၢ တၢ်အိၣ်ဖှိၣ်ထီၣ်ဒံးဘၣ် ဒီးဖဲတၢ်အိၣ်ဖှိၣ် ဝံၤအလီၢ်ခံန့ၣ် တဲတၢ်ဒီးအဝဲသ့ၣ်, ဟးစံၣ်တဲၤတဲလီၤတၢ်ဒီး အဝဲသ့ၣ် ဒီးကွဲဒုးအီၣ်ဒုးအီအီၤ တၢ်အီၣ်တက့ၢ်. နမ့ၢ်မၤဒ်န့ၣ်န့ၣ် ဘၣ်သ့ၣ်သ့ၣ် နကကမၢကမၣ်လီၤ. အဒိ ဘၣ်သ့ၣ်သ့ၣ် နကဆိကမိၣ်လၢ ဒီပုၢ်ဝဲၢ်မုၣ်တဂၤန့ၣ် တအဲၣ်ဒိးကနၣ်ဃုာ် ပှၤဂၤအါအါဘၣ်. ဘၣ်ဆၣ် လၢခံနကသ့ၣ်ညါထီၣ်လၢ အမ့ၢ်ပှၤလၢ အမဲာ်ဆှးဆူၣ်တဂၤလီၤ. ဒီးဘၣ်သ့ၣ်သ့ၣ် နကဆိကမိၣ်လၢ ဒီပုၢ်ဝဲၢ်ခွါတဂၤန့ၣ် အအဲၣ်တၢ်ထူးတၢ်တီၤဒိၣ်မး ဘၣ်ဆၣ် လၢခံနသ့ၣ်ညါထီၣ်လၢ အဝဲမ့ၢ်ပှၤလၢ အသးအိၣ်ဟ့ၣ်တၢ်ဒိၣ်မးလီၤ. မ့တမ့ၢ် နကထံၣ်ဘၣ်လၢ ဟံၣ်ဖိဃီဖိတဒူၣ်န့ၣ် ဟဲထီၣ် တၢ်အိၣ်ဖှိၣ်စဲၤခံ တလီၢ်လီၢ်လီၤ. ဒီးလၢခံမး နသ့ၣ်ညါဘၣ်လၢ အဝဲသ့ၣ်န့ၣ် ထံၣ်ဘၣ်ဒီး တၢ်ထီဒုၣ်ထီဒါလီၤ. (ယိၤဘး ၆:၂၉) ပတအဲၣ်ဒိး ‘နုာ်လီၤမၤသဘံၣ်ဘုၣ် ပသးလၢပှၤဂၤအတၢ်ဂ့ၢ်အပူၤ’ ဘၣ်. (၁ တံၤမသ့း ၅:၁၃, ခ့ခါစှီၤကျိာ်) ဘၣ်ဆၣ် ပမ့ၢ်သ့ၣ်ညါ ပဒီပုၢ်ဝဲၢ်မုၣ်ခွါတဖၣ်အဂ့ၢ် ဒီးတၢ်လၢအဝဲသ့ၣ် လဲၤခီဖျိဘၣ် လၢအတၢ်အိၣ်မူအပူၤတဖၣ်န့ၣ် ကမၤစၢၤပှၤဒ်သိး ပနၢ်ပၢၢ်စၢၤ အဝဲသ့ၣ် ကသ့အါထီၣ် အဂီၢ်လီၤ.
၁၅ စီၤယၤကိာ် သူဝဲတၢ်အဒိ လၢအထုးန့ၢ်ပှၤသး. ဖဲစီၤယၤကိာ် သိၣ်လိတၢ်အခါ သးစီဆှံမၤစၢၤအီၤ. တကးဒံးဘၣ် ဒ်သိး အသိၣ်လိတၢ်ကသ့အဂီၢ် လီၤဂာ်လၢ အမၤလိန့ၢ်တၢ်အါမးလၢ အကၠီအဒိအတဲာ် လၢဘၣ်ဃးဒီး တၢ်ဟ့ၣ်တၢ်အဒိ. တၢ်အဒိလၢ စီၤယၤကိာ်သူဝဲလၢ အလံာ်ပရၢပူၤန့ၣ် ပှၤနၢ်ပၢၢ်ဘၣ်အီၤညီ ဒီးပှၤန့ၢ်ဘၣ် တၢ်မၤလိသ့ဝဲဂ့ၤဂ့ၤလီၤ.—ဖး ယၤကိာ် ၃:၂-၆, ၁၀-၁၂.
၁၆ တၢ်မၤလိလၢပဂီၢ်– သူတၢ်အဒိလၢ အကဲဘျုးတဖၣ်. နမ့ၢ်သူ တၢ်အဒိလၢ အကြၢးအဘၣ်န့ၣ် လီၤဂာ်ဒ် နမၤစၢၤ ပှၤဒိကနၣ်တၢ်ဖိ ဒ်သိး အဝဲသ့ၣ် ထံၣ်တမှံကွၢ်တၢ် ကသ့အဂီၢ်လီၤ. အဃိ ကမၤစၢၤအဝဲသ့ၣ်ဒ်သိး အဝဲသ့ၣ် တိၢ်နီၣ်ဝဲ လံာ်စီဆှံ တၢ်မ့ၢ်တၢ်တီလၢ အရ့ဒိၣ်တဖၣ် ကန့ၢ်အဂီၢ်လီၤ. ယ့ၣ်ၡူးမ့ၢ် ပှၤအဖၠဲးကတၢၢ်တဂၤလၢ အသူဝဲ တၢ်အဒိ ဒီးအပုၢ်စီၤယၤကိာ် ကွၢ်လိမၤဒိးအီၤလီၤ. ခဲအံၤ ပကတဲသကိး စီၤယၤကိာ် ဟ့ၣ်တၢ်အဒိတခါ ဒီးဘၣ်မနုၤအဃိ တၢ်အဒိတခါအံၤန့ၣ် ကဲဘျုးလဲၣ်.
၁၇ ဖး ယၤကိာ် ၁:၂၂-၂၅. စီၤယၤကိာ် ဟ့ၣ်တၢ်အဒိ ဘၣ်ဃးဒီး မဲာ်ထံကလၤန့ၣ် ကဲဘျုးဝဲလၢ ကျဲအဘိအါမး. ဘၣ်ဆၣ် ဖဲအံၤန့ၣ် စီၤယၤကိာ်အဲၣ်ဒိးတဲဝဲ လီၤဆီဒၣ်တၢ် ဘၣ်ဃးဒီး ဒ်သိးပကဒိးန့ၢ်ဘၣ်အဘျုးလၢ လံာ်စီဆှံအဂီၢ် ပကဘၣ် ဖးလံာ်စီဆှံ တကးဒံးဘၣ် ပကဘၣ်မၤထွဲ တၢ်လၢပဖးဘၣ်အီၤတဖၣ်လီၤ. စီၤယၤကိာ် ဟ့ၣ်တၢ်အဒိတခါအံၤန့ၣ် မၤစၢၤဝဲ ပှၤဒိကနၣ်တၢ်ဖိတဖၣ် လၢကထံၣ်တမှံဝဲ ပှၤတဂၤလၢ အကွၢ်လီၤအသး လၢမဲာ်ထံကလၤအပူၤလီၤ. အအဲၣ်ဒိး သိၣ်လိပှၤ တၢ်မနုၤလဲၣ်. ပှၤတဂၤ မ့ၢ်ကွၢ်လီၤ မဲာ်ထံကလၤ ဒီးမ့ၢ်ထံၣ်တၢ်ဘၣ်အၢလၢအလိၤ ဒီးမ့ၢ်တမၤပျီဝဲ နီတမံၤဘၣ်န့ၣ် အကွၢ်လီၤမဲာ်ထံကလၤနာ်က့ အဘျုးတအိၣ်လၢအဂီၢ်ဘၣ်. ဒ်န့ၣ်အသိး ပှၤတဂၤလၢ အဖးကစၢ်ယွၤ အကလုၢ်ကထါ ဒီးအသ့ၣ်ညါလီၤအသးလၢ အကဘၣ်ဆီတလဲ အသးသနာ်က့ အမ့ၢ်တမၤဝဲဘၣ်န့ၣ် အဖးလံာ်စီဆှံနာ်က့ အဘျုးတအိၣ် နီတမံၤဘၣ်.
၁၈ ဖဲပဟ့ၣ်တၢ်အဒိအခါ ပကွၢ်လိမၤဒိး စီၤယၤကိာ်သ့လၢ ကျဲသၢဘိ. (၁) တၢ်အဒိလၢ နတဲအီၤန့ၣ် ကဘၣ်လီၤပလိာ်ဒီး တၢ်ဂ့ၢ်လၢနတဲတဖၣ်, (၂) သူတၢ်အဒိလၢ ပှၤနၢ်ပၢၢ်ဘၣ်အီၤညီညီဖိ ဒီး (၃) ဟ့ၣ်တၢ်အဒိလၢ ပှၤဟံးန့ၢ်တၢ်မၤလိသ့. ပကဘၣ်သူတၢ်အဒိလၢ အလီၤပလိာ်ဒီး တၢ်ဂ့ၢ်လၢပတဲအီၤဒ်လဲၣ် ပမ့ၢ်တသ့ၣ်ညါဘၣ်န့ၣ် ပဃုကွၢ်အီၤလၢ လံာ်လဲၢ်လၢ ပတၢ်ကရၢကရိ ထုးထီၣ်ဝဲ (Watch Tower Publications Index) အပူၤသ့. ဖဲန့ၣ် တၢ်အဒိအိၣ်ဝဲဒီဒူၣ် လၢပသူအီၤသ့လီၤ. တၢ်အဒိန့ၣ် လီၤဂာ်ဒ် တၢ်ကလုၢ်ဒၢ (microphone) အသိး. ဒ်တၢ်ကလုၢ်ဒၢ မၤၡဲထီၣ် တၢ်ကလုၢ်သီၣ်အသိး တၢ်အဒိန့ၣ် မၤစၢၤပှၤဒိကနၣ်တၢ်ဖိ ဒ်သိးကနၢ်ပၢၢ်ထီၣ်တၢ်ဂ့ၢ် ဂ့ၤဂ့ၤအဂီၢ်. အဃိ ပအဲၣ်ဒိးဟ့ၣ် တၢ်အဒိလၢ အဘၣ်ဃးလိာ်အသးထဲလၢ တၢ်ဂ့ၢ်လၢအရ့ဒိၣ် ဒ်သိးပှၤကနၢ်ပၢၢ်ထီၣ် တၢ်ဂ့ၢ်လၢအရ့ဒိၣ်အဂီၢ်လီၤ. ပအဲၣ်ဒိးမၤဂ့ၤထီၣ် ပတၢ်သ့တၢ်ဘၣ်လၢ တၢ်သိၣ်လိနဲၣ်လိအပူၤန့ၣ် တဘၣ်မ့ၢ်ဒ်သိး ပှၤကသးစၢၢ်ဆၢပှၤအဂီၢ်ဘၣ်, ကဘၣ်မ့ၢ်လၢ ပကမၤစၢၤပှၤဂၤ ဒ်သိးအဝဲသ့ၣ် ကကဲထီၣ် ယဟိဝၤယွၤ အဟံၣ်ဖိဃီဖိအဂီၢ်လီၤ.
လါအီးကထိဘၢၣ် ၂၃-၂၉
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယိၤဘး ၈-၁၀
“ကစၢ်ယွၤ အတၢ်အဲၣ်လၢအတီ ဒီသဒၢပှၤလၢ မုၣ်ကီၤလံၢ် အတၢ်လံၣ်တၢ်လီတဖၣ်”
မ့ၢ်ပမၤ တၢ်ဘၣ်ယွၤအသး သ့သပှၢ်တၢၢ်ဧါ
စီၤယိၤဘး ဘၣ်တူၢ်ဘၣ်ဝဲ တၢ်နးတၢ်ဖှီၣ် တခါဝံၤတခါန့ၣ်လီၤ. ဘၣ်ဆၣ် အဝဲတသ့ၣ်ညါဝဲလၢ ယဟိဝၤယွၤ ဟ့ၣ်မုၣ်ကီၤလံၢ်အခွဲးလၢ အကမၤနးမၤဖှီၣ်အီၤဘၣ်. စီၤယိၤဘး နၢ်ပၢၢ်ကမၣ်ဝဲလၢ အဝဲ မ့ၢ်တီဒီးယွၤမ့ၢ်ဂ့ၤ တတီဒီးယွၤမ့ၢ်ဂ့ၤ ကစၢ်ယွၤ တပာ်သူၣ်ပာ်သးဝဲဘၣ်. (ယိၤဘး ၉:၂၀-၂၂) ပှၤလၢအနၢ်ဟူဘၣ် စီၤယိၤဘး အတၢ်ကတိၤတဖၣ်န့ၣ် ဆိကမိၣ်လၢ စီၤယိၤဘးအဲၣ်ဒိး တဲဝဲလၢ အတၢ်တီတၢ်လိၤ အိၣ်ဒိၣ်န့ၢ်ဒံး ကစၢ်ယွၤ အတၢ်တီတၢ်လိၤန့ၣ်လီၤ.—ယိၤဘး ၃၂:၁, ၂; ၃၅:၁, ၂.
ဘၣ်မနုၤအဃိ ပဘၣ်ပာ်လုၢ်ပာ်ပှ့ၤ ယဟိဝၤယွၤ အတၢ်အဲၣ်လၢအတီလဲၣ်
၁၄ ကစၢ်ယွၤအတၢ်အဲၣ်လၢအတီန့ၣ် ဒီသဒၢပှၤလၢနီၢ်သးတခီ. စီၤဒၤဝံး ဃ့ဘါထုကဖၣ်လၢ ယဟိဝၤယွၤအအိၣ် ဒီးတဲဝဲလၢ “နဲဒၣ်အံၤ နမ့ၢ်ယအိၣ်ခူသူၣ်အလီၢ်လီၤ. နကမၤပူၤဖျဲးယၤဒီး တၢ်ကိၢ်တၢ်ဂီၤ, ဒီးနကဒုးအိၣ်ဝးတရံးယၤလၢ တၢ်သးဝံၣ်ဘၣ်ဃးဒီး တၢ်မၤပူၤဖျဲးတၢ် . . . မ့မ့ၢ်ပှၤလၢ အသန့ၤအသးလၢယွၤန့ၣ် တၢ်ဘျုးတၢ်ဖှိၣ် ကအိၣ်ဝးတရံးအီၤလီၤ.” (စံးထီၣ်ပတြၢၤ ၃၂:၇, ၁၀) ဒ်ဝ့ၢ်ဒူၣ်လၢ အအိၣ်ဝးတရံးဝ့ၢ် ဒီသဒၢဝဲ ပှၤဝ့ၢ်ဖိတဖၣ်အသိးန့ၣ် ယဟိဝၤယွၤ အတၢ်အဲၣ်လၢအတီ အိၣ်ဝးတရံးပှၤ ဒီးအဒီသဒၢပှၤလၢ တၢ်လၢကမၤဟးဂီၤ ပတၢ်ရ့လိာ်သးဒီးအီၤ အဂီၢ်လီၤ. တကးဒံးဘၣ် ယဟိဝၤယွၤ မူၤဃီၤပှၤဆူအအိၣ် ခီဖျိလၢ အအိၣ်ဒီး တၢ်အဲၣ်လၢအတီအဃိလီၤ.—ယံးရမံယၤ ၃၁:၃.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၁၀ ၁၀/၁၅ ၆-၇ ¶၁၉-၂၀
“မတၤသ့ၣ်ညါ ယဟိဝၤယွၤ အသးလဲၣ်.”
၁၉ ဘၣ်ဃးဒီး “ယဟိဝၤယွၤ အသး” န့ၣ်ပမၤလိန့ၢ်တၢ်မနုၤလဲၣ်. ပကနၢ်ပၢၢ် ယဟိဝၤယွၤ အသးအဂီၢ် ပကဘၣ်ပျဲလၢ ကစၢ်ယွၤအကလုၢ်ကထါ ကမၤစၢၤပှၤ. ပမ့ၢ်ပှၤတလၢတပှဲၤဘၣ်အဃိ ပတကြၢးစံၣ်ညီၣ် ယဟိဝၤယွၤ ဒ်ပတၢ်ထံၣ် ဒီးပတၢ်ဆိကမိၣ်အိၣ်ဝဲ အသိးဘၣ်. စီၤယိၤဘး တဲဝဲလၢ ကစၢ်ယွၤ “တမ့ၢ် ပှၤကညီ ဒ်သိးဒီးယၤဘၣ် အဃိ ယကလဲၤထီၣ်ရူဒီးအီၤ လၢယကတဲဆၢက့ၤအီၤ အဂီၢ်န့ၣ် တန့ၢ်ဘၣ်.” (ယိၤဘး ၉:၃၂) ပမ့ၢ်နၢ်ပၢၢ်ထီၣ် ယဟိဝၤယွၤ အတၢ်ပာ်သူၣ်ပာ်သးန့ၣ် ပကအဲၣ်ဒိးတဲဒ် စီၤယိၤဘး လၢအတဲဝဲ “တၢ်လၢအမၤဝဲတဖၣ်အံၤန့ၣ် မ့ၢ်ဒၣ်ထဲ တစဲးဖိဒံးလီၤ. တၢ်လၢပနၢ်ဟူတ့ၢ် ဘၣ်ဃးဒီးအီၤန့ၣ် လီၤဂာ်ဒ် တၢ်ကတိၤ ကသွံဒံဖိလီၤ. အဝဲဒုးသီၣ်ထီၣ် လီအသီၣ်ဖးဒိၣ် ဒ်လဲၣ်ဒ်လဲၣ်န့ၣ် မတဂၤ နၢ်ပၢၢ် ကသ့လဲၣ်.”—ယိၤဘး ၂၆:၁၄.
၂၀ ပမ့ၢ်ဖး လံာ်စီဆှံအဆၢလၢ ပနၢ်ပၢၢ်ဘၣ်အီၤကီ လီၤဆီဒၣ်တၢ် ပမ့ၢ်တနၢ်ပၢၢ် ယဟိဝၤယွၤ အတၢ်ထံၣ်ဘၣ်န့ၣ် ပကဘၣ်မၤဒ်လဲၣ်. ပဃုသ့ၣ်ညါတၢ်ဂ့ၢ်တၢ်ကျိၤလံဘၣ်ဆၣ် ပမ့ၢ်တနၢ်ပၢၢ်ၡဲၡဲဘၣ်န့ၣ် ပထံၣ်အီၤဒ် တၢ်မၤကွၢ် ပတၢ်နာ်လၢ ယဟိဝၤယွၤအဖီခိၣ်သ့. ပကဘၣ်သ့ၣ်နီၣ်ထီၣ်လၢ တဘျီတခီၣ်န့ၣ် ပဒိးန့ၢ်ဘၣ် တၢ်ခွဲးတၢ်ယာ်လၢ ပကပာ်ဖျါထီၣ်လၢ ပနာ်န့ၢ်ယဟိဝၤယွၤ အတၢ်ဂ့ၤတၢ်ဝါတဖၣ်. အဃိ ပကအိၣ်ဒီး တၢ်ဆီၣ်လီၤသး ဒီးသ့ၣ်နီၣ်ထီၣ်လၢ ပနၢ်ပၢၢ် တၢ်ဂ့ၢ်ခဲလၢာ်တသ့ဘၣ်. (စံၣ် ၁၁:၅) ပကတူၢ်လိာ် စီၤပီလူး အတၢ်ကတိၤလၢ အတဲဝဲ “ကစၢ်ယွၤ အတၢ်ဆိၣ်ဂ့ၤ ထူးထူးတီၤတီၤ, အတၢ်ကူၣ်သ့ ဒီးအတၢ်သ့ၣ်ညါနၢ်ပၢၢ်န့ၣ် ယိာ်ဝဲဒိၣ်မးလီၤ. အဃိ အတၢ်စံၣ်ညီၣ်တဖၣ် ဒီးတၢ်လၢအမၤဝဲတဖၣ်န့ၣ် ပနၢ်ပၢၢ်အီၤတလၢာ်ဘၣ်. တၢ်ကွဲးအသးအိၣ်ဝဲလၢ “မတဂၤ သ့ၣ်ညါထီၣ်ဝဲ ယဟိဝၤယွၤ အတၢ်ဆိကမိၣ်လဲၣ်. ဒီးမတဂၤ ကဲထီၣ်ပှၤလၢ အဟ့ၣ်ကူၣ်ဟ့ၣ်ဖးအီၤ ကသ့လဲၣ်.” ဒီး “မတဂၤ ဟ့ၣ်ဆိ ကစၢ်ယွၤတၢ်တမံၤမံၤ ဒ်သိးကစၢ်ယွၤ ကဘၣ်ဟ့ၣ်ဆၢကဒါက့ၤအီၤလဲၣ်.” တၢ်ခဲလၢာ်ဟဲလၢ ကစၢ်ယွၤအအိၣ် ဒီးဟဲအိၣ်ထီၣ် ခီဖျိလၢအီၤ ဒီးအိၣ်ဝဲလၢအဂီၢ်လီၤ. ကစၢ်ယွၤ ကြၢးဒိးန့ၢ် တၢ်လၤကပီၤ အစိၤစိၤဃၣ်ဃၣ်လီၤ. အၤမ့ၣ်.”—ရိမ့ၤ ၁၁:၃၃-၃၆.
လါအီးကထိဘၢၣ် ၃၀–လါနိၣ်ဝ့ဘၢၣ် ၅
တၢ်လုၢ်ဒိၣ်ပှ့ၤဒိၣ်တဖၣ်လၢ လံာ်စီဆှံအပူၤ | ယိၤဘး ၁၁-၁၂
“ဒ်သိးပကဒိးန့ၢ်ဘၣ် တၢ်ကူၣ်သ့ ဒီးဒိးန့ၢ်ဘၣ်အဘျုးအဂီၢ် တၢ်လၢပကဘၣ်မၤအီၤသၢခါ”
တၢး၀၉ ၄/၁၅ ၆ ¶၁၇
စီၤယိၤဘး မၤလၤကပီၤဝဲ ယဟိဝၤယွၤအမံၤ
၁၇ တၢ်မနုၤမၤစၢၤ စီၤယိၤဘး ဒ်သိးအကဆဲးအိၣ်ဒီး တၢ်သးတီအဂီၢ်လဲၣ်. တချုးလၢ စီၤယိၤဘး ထံၣ်ဘၣ်ဒီး တၢ်ကီတၢ်ခဲတဖၣ်အခါလံၤလံၤန့ၣ် အဝဲမၤဂၢၢ်ကျၢၤထီၣ်ပာ်စၢၤ အတၢ်ရ့လိာ်သးဒီး ယဟိဝၤယွၤ. ဒီးအဝဲတသ့ၣ်ညါဝဲလၢ မုၣ်ကီၤလံၢ် တဲအါတၢ်ဒီး ယဟိဝၤယွၤ သနာ်က့ အဝဲပာ်လီၤအသးလၢ အကဆဲးတီဒီး ယဟိဝၤယွၤ. အတဲဝဲလၢ “တုၤလၢယသံဒၣ်လဲာ် ယတမၤဟးဂီၤ ယတၢ်သးတီဘၣ်.” (ယိၤဘး ၂၇:၅) စီၤယိၤဘး မၤဂၢၢ်ကျၢၤထီၣ် အတၢ်ရ့လိာ်သးဒီး ယဟိဝၤယွၤ လၢကျဲဒ်လဲၣ်. အဝဲကနၢ်ဟူဘၣ်ဝဲ တၢ်ဂ့ၢ်လၢ ဘၣ်ဃးဒီး ယဟိဝၤယွၤ ရ့ဒီးစီၤအၤဘြၤဟၣ်, စီၤအံၤစဲး ဒီးစီၤယၤကိာ်ဒ်လဲၣ် ဒီးအကနာ်ဝဲ တၢ်ဂ့ၢ်သ့ၣ်တဖၣ်န့ၣ် သပှၢ်ကတၢၢ်. တကးဒံးဘၣ် စီၤယိၤဘး သ့ၣ်ညါထီၣ်ဘၣ် ယဟိဝၤယွၤ အတၢ်ဂ့ၤတၢ်ဝါတဖၣ် ခီဖျိလၢ အဃုသ့ၣ်ညါဝဲ တၢ်ဘၣ်တ့သ့ၣ်တဖၣ်အဂ့ၢ်.—ဖး ယိၤဘး ၁၂:၇-၉, ၁၃, ၁၆.
ယဟိဝၤယွၤအိၣ်ဒီးပှၤ အဃိ ပတအိၣ်ထဲတဂၤဧိၤဘၣ်
၁၀ မၤဂ့ၤထီၣ်နတၢ်ရ့လိာ်သးဒီး ဒီပုၢ်ဝဲၢ်မုၣ်ခွါတဖၣ်တက့ၢ်. ရ့ဒီးဒီပုၢ်ဝဲၢ်မုၣ်ခွါလၢ တၢ်အိၣ်ဖှိၣ်အပူၤ ဒ်သိးနကမၤလိန့ၢ် တၢ်လၢအဝဲသ့ၣ်အအိၣ် ဒီးအဝဲသ့ၣ်အသးပှၢ်မ့ၢ်ဂ့ၤ, အသးစၢ်မ့ၢ်ဂ့ၤ ဒီးအကလုာ်မ့ၢ် တဒ်သိးဒီးနၤဘၣ်မ့ၢ်ဂ့ၤ ရ့ဒီးအဝဲသ့ၣ်တက့ၢ်. လံာ်စီဆှံတဲဘၣ်ပှၤလၢ တၢ်ကူၣ်ဘၣ်ကူၣ်သ့န့ၣ် “အိၣ်ဝဲဒီးပှၤသးပှၢ်” လီၤ. (ယိၤဘး ၁၂:၁၂) ပှၤသးပှၢ်စ့ၢ်ကီး မၤလိန့ၢ်တၢ်လၢ ပှၤသးစၢ်တဖၣ် အအိၣ်သ့ဝဲလီၤ. စီၤဒၤဝံးန့ၣ် အသးစၢ်န့ၢ် စီၤယိနၤသၣ် အနံၣ်အါမး ဘၣ်ဆၣ် အဝဲသ့ၣ်ရ့လိာ်အသးမုာ်ဒိၣ်မးလီၤ. (၁ ၡမူၤအ့လး ၁၈:၁) စီၤဒၤဝံးဒီး စီၤယိနၤသၣ်န့ၣ် ထံၣ်ဘၣ်တၢ်ကီတၢ်ခဲတဖၣ်ဒၣ်လဲာ် အဝဲသ့ၣ်မၤစၢၤလိာ်အသး တဂၤဒီးတဂၤလၢ ကမၤယဟိဝၤယွၤ အတၢ်မၤအဂီၢ်လီၤ. (၁ ၡမူၤအ့လး ၂၃:၁၆-၁၈) ဒီပုၢ်ဝဲၢ်မုၣ်အရံၣ်နၣ် လၢအမ့ၢ်ယဟိဝၤပှၤအုၣ်အသး ထဲအဂၤဧိၤလၢ အဟံၣ်ဖိဃီဖိအကျါန့ၣ် တဲဝဲလၢ “ပဒီပုၢ်ဝဲၢ်မုၣ်ခွါတဖၣ်န့ၣ် လီၤဂာ်ဒ် ပမိၢ်ပပၢ်ဒီး ပဒီပုၢ်ဝဲၢ်တံၢ်နီၢ်လီၤ. ယဟိဝၤယွၤ သူအဝဲသ့ၣ်လၢ ကမၤလၢပှဲၤ ပတၢ်လိၣ်ဘၣ်တဖၣ်လီၤ.”
၁၁ နမ့မ့ၢ်ပှၤလၢ အမဲာ်ဆှးသ့န့ၣ် ကီလၢနကဃု တံၤသကိးအသီလီၤ. ဒီပုၢ်ဝဲၢ်မုၣ်ရဲနၤ လၢအမ့ၢ်ပှၤလၢအမဲာ်ဆှးသ့ ဒီးဖဲအမၤလိတၢ်မ့ၢ်တၢ်တီအခါန့ၣ် အထံၣ်ဘၣ်ဒီး တၢ်ထီဒုၣ်ထီဒါလီၤ. အတဲဝဲလၢ “ယသ့ၣ်ညါလၢ ယလိၣ်ဘၣ် ဒီပုၢ်ဝဲၢ်မုၣ်ခွါတဖၣ် အတၢ်ဆီၣ်ထွဲမၤစၢၤလီၤ.” နကတဲဘၣ်ပှၤဂၤလၢ နတၢ်တူၢ်ဘၣ်တဖၣ်န့ၣ် တညီဝဲဘၣ်. ဘၣ်ဆၣ် ဖဲနတဲသကိးတၢ်ဒီးပှၤဂၤအခါ အဝဲသ့ၣ်ကဲထီၣ် နတံၤသကိးသ့လီၤ. နတံၤသကိးတဖၣ်န့ၣ် အဲၣ်ဒိးဟ့ၣ်ဂံၢ်ဟ့ၣ်ဘါနၤ ဒီးမၤစၢၤနၤလီၤ. ဘၣ်ဆၣ် ဒ်သိးအဝဲသ့ၣ်မၤစၢၤနၤ ကသ့အဂီၢ် နကဘၣ်တဲဘၣ်အဝဲသ့ၣ်လီၤ.
၁၂ ကျဲအဂ့ၤကတၢၢ်တဘိလၢ နဃုထံၣ်န့ၢ် နတံၤသကိးသ့န့ၣ် မ့ၢ်ဝဲနလဲၤ စံၣ်တဲၤတဲလီၤတၢ်ဒီး ဒီပုၢ်ဝဲၢ်မုၣ်ခွါတဖၣ်လီၤ. ဒီပုၢ်ဝဲၢ်မုၣ်ခၤရိၤတဲဝဲလၢ “ခီဖျိလၢ ယလဲၤစံၣ်တဲၤတဲလီၤတၢ် ဃုာ်ဒီးဒီပုၢ်ဝဲၢ်မုၣ်တဖၣ် ဒီးပၣ်ဃုာ်လၢဘီမုၢ် အတၢ်ဖံးတၢ်မၤတဖၣ်အဃိ ယဒိးန့ၢ်အါထီၣ် ယတံၤသကိးလီၤ. နံၣ်လၢအပူၤကွံာ်တဖၣ်န့ၣ် ယဟိဝၤယွၤမၤစၢၤယၤ ခီဖျိလၢ တံၤသကိးတဖၣ်အံၤလီၤ.” ပမ့ၢ်ဂုာ်ကျဲးစၢးရ့ဒီး ဒီပုၢ်ဝဲၢ်လၢအအိၣ်ဒီးတၢ်သးတီတဖၣ်န့ၣ် မ့ၢ်ဝဲကျဲလၢ အဂ့ၤကတၢၢ်လီၤ. ယဟိဝၤယွၤသူဝဲ ပှၤသ့ၣ်တဖၣ်အံၤလၢ ပကမၤနၢၤကွံာ် ပတၢ်အိၣ်သယုၢ်သညိလီၤ.—ကတိၤဒိ ၁၇:၁၇
it-2 ၁၁၉၀ ¶၂
တၢ်ကူၣ်သ့
တၢ်ကူၣ်သ့လၢ အဟဲလၢ ကစၢ်ယွၤအိၣ်. ယဟိဝၤယွၤကဲဝဲ “ပှၤထဲတဂၤ လၢအအိၣ်ဒီး တၢ်ကူၣ်သ့.” (ရိ ၁၆:၂၇; လီၣ် ၇:၁၂) တၢ်ကတိၤလၢအမ့ၢ် တၢ်သ့ၣ်ညါန့ၣ် အဲၣ်ဒိးတဲဝဲ တၢ်သ့ၣ်ညါ တၢ်ဂ့ၢ်တၢ်ကျိၤ လီၤတံၢ်လီၤဆဲး. ယဟိဝၤယွၤ မ့ၢ်ဝဲတၢ်ဘၣ်တ့ကစၢ် ဒီး “အအိၣ်ပာ်စၢၤ အစိၤစိၤအဃၣ်ဃၣ်” ဒီးအ “ကအိၣ်ဒံး အစိၤစိၤအဃၣ်ဃၣ်.” (စံးထီၣ်ပတြၢၤ ၉၀:၁, ၂) အဃိ အဝဲသ့ၣ်ညါဝဲ မူဟီၣ်ကယၢ ဒီးတၢ်အိၣ်လၢအပူၤတဖၣ်အဂ့ၢ် ဒီးတၢ်ကဲထီၣ်သးလၢအပူၤအဂ့ၢ် တုၤလၢပစိၤခဲအံၤခဲလၢာ်. ကစၢ်ယွၤ ဒုးအိၣ်ထီၣ်ဝဲ န့ဆၢၣ်အတၢ်ဘျၢတဖၣ် ဒီးန့ဆၢၣ်အတၢ်လဲၤတရံးတဖၣ်အဃိ ပှၤဟီၣ်ခိၣ်ဖိတဖၣ် ဃုသ့ၣ်ညါဝဲ တၢ်သ့ၣ်တဖၣ်အံၤဒီး တ့ထီၣ်ဝဲ တၢ်ဖိတၢ်လံၤလၢအသီ. အဃိ တၢ်သ့ၣ်တဖၣ်အံၤ မ့ၢ်တအိၣ်ဘၣ်န့ၣ် အဝဲသ့ၣ် မၤဝဲတသ့နီတမံၤဘၣ်. (ယိၤဘး ၃၈:၃၄-၃၈; စံး ၁၀၄:၂၄; ကတိၤ ၃:၁၉; ယံး ၁၀:၁၂, ၁၃) အဃိ ပမ့ၢ်ဆိကမိၣ်ထံထံန့ၣ် ကစၢ်ယွၤ အတၢ်သိၣ်တၢ်သီ လၢဘၣ်ဃးဒီး တၢ်သကဲာ်ပဝးန့ၣ် အရ့ဒိၣ်ဝဲဒိၣ်မး. အကမၤစၢၤဝဲ ပှၤဟီၣ်ခိၣ်ဖိတဖၣ်ဒ်သိး အတၢ်အိၣ်မူ ကလဲၤအသးဂ့ၤဂ့ၤဘၣ်ဘၣ်, ဆၢတဲာ်တၢ်ကဘၣ် ဒီးကပှဲၤဒီးတၢ်သးခုအဂီၢ်. (၅ မိၤ ၃၂:၄-၆; ကွၢ် ယဟိဝၤယွၤ [ကစၢ်ယွၤ လၢအပာ်လီၤ တၢ်သိၣ်တၢ်သီ လၢအဘၣ်ဃးဒီး တၢ်သကဲာ်ပဝး].) တၢ်လၢကစၢ်ယွၤ တနၢ်ပၢၢ်ဝဲန့ၣ် တအိၣ်နီတမံၤဘၣ်. (ၡါ ၄၀:၁၃, ၁၄) ပမ့ၢ်ကွၢ်ခဲအံၤန့ၣ် ကစၢ်ယွၤပျဲလၢ တၢ်လၢအထီဒါလိာ်သးဒီး တၢ်သိၣ်တၢ်သီတဖၣ် ကအါထီၣ်ဝဲ. ဘၣ်ဆၣ် တၢ်သ့ၣ်တဖၣ်အံၤ ကအိၣ်ဝဲတစိၢ်တလီၢ် ဒီးလၢခံကတၢၢ်န့ၣ် တၢ်ခဲလၢာ် ကကဲထီၣ်ဝဲဒ် အတၢ်ဘၣ်သးအသိး. ဒီးတၢ်ကတိၤလၢ အတဲဝဲခဲလၢာ်န့ၣ် “ကလၢထီၣ်ပှဲၤထီၣ်” ဝဲ.—ၡါ ၅၅:၈-၁၁; ၄၆:၉-၁၁.
နီၢ်သးအတၢ်လုၢ်ဒိၣ်ပှ့ၤဒိၣ်တဖၣ်
တၢး၀၈ ၈/၁ ၁၁ ¶၅
တၢ်ရ့လိာ်သးဒီး ပှၤလၢအဒိၣ်ထီၣ်သီတဖၣ်
▪ ‘မ့ၢ်ယနၢ်ပၢၢ် အဝဲသ့ၣ်ဒ် တၢ်လၢအဝဲသ့ၣ် အဲၣ်ဒိးတဲဝဲအသိးဧါ.’ ယိၤဘး ၁၂:၁၁ တဲဝဲလၢ “ဒ်ပျ့ၤလ့ၣ်ကွၢ် တၢ်အီၣ်အသိး နၢ်န့ၣ် ဒိကနၣ်တၢ်လၢ ပှၤတဲဝဲတဖၣ်ထံထံ ဒ်သိး ကနီၤဖးဝဲ တၢ်အဘၣ် ဒီးတၢ်အကမၣ် အဂီၢ်လီၤ.” ဖဲနဖိဒိၣ်ထီၣ်သီအဆၢကတီၢ်န့ၣ် နကဘၣ် “ဒိကနၣ်” တၢ်လၢအဝဲသ့ၣ် “တဲဝဲတဖၣ်ထံထံ” န့ၣ်မ့ၢ်တၢ်လၢအရ့ဒိၣ်ဒိၣ်မး. ညီနုၢ် ပှၤသးစၢ်တဖၣ် တဲတၢ်န့ၣ် အခီပညီတမ့ၢ်ဒ် အဝဲသ့ၣ် အဲၣ်ဒိးတဲဝဲအသိးဘၣ်. အဒိ နဖိကတဲဝဲလၢ “နရ့ယၤဒ် ဖိသၣ်အသိး ထီဘိလီၤ” မ့တမ့ၢ် ကတဲဝဲလၢ “နတဒိကနၣ် ယတဲတၢ် နီတဘျီဘၣ်.” အဝဲသ့ၣ် တဲဝဲလၢ “နရ့ယၤဒ် ဖိသၣ်အသိး ထီဘိလီၤ” န့ၣ် ဘၣ်သ့ၣ်သ့ၣ် ကအဲၣ်ဒိးတဲဝဲလၢ “နတနာ်ယၤဘၣ်” ဒီးအတဲဝဲလၢ “နတဒိကနၣ် ယတဲတၢ် နီတဘျီဘၣ်” န့ၣ်ဘၣ်သ့ၣ်သ့ၣ် အကအဲၣ်ဒိးတဲဝဲလၢ “ယအဲၣ်ဒိးတဲဘၣ်နၤ တၢ်လၢယတူၢ်ဘၣ်တဖၣ်.” အဃိ တဘၣ်သးစၢၢ်ဆၢ အဝဲသ့ၣ် အတၢ်ကတိၤ ဒ်သိးဒီး “ထီဘိ” ဒီး “နီတဘျီ” ဘၣ်န့ၣ်တဂ့ၤ. လၢတၢ်န့ၣ်အလီၢ် ဂုာ်ကျဲးစၢး ဒ်သိး နကနၢ်ပၢၢ် တၢ်လၢအဝဲသ့ၣ် အဲၣ်ဒိးတဲဝဲ အနီၢ်ကီၢ်.