“ပာ်ဆူၣ်ထီၣ်​ နသးတက့ၢ်”

၁, ၂. စီၤပီလူးထံၣ်ဘၣ်​ တၢ်မၤအၢမၤနးလၢ ဝ့ၢ်ယရူၤၡလ့ၣ်အပူၤသနာ်က့ ဘၣ်မနုၤအဃိ အဝဲတကမၢကမၣ်ဘၣ်လဲၣ်.

ပှၤဂီၢ်မုၢ်လၢ ဝ့ၢ်ယရူၤၡလ့ၣ်န့ၣ်​ ဘၣ်သးမၤဆါ စီၤပီလူး သနာ်က့ ပှၤထုးထီၣ်က့ၤ စီၤပီလူးလၢ ပှၤတဖၣ်န့ၣ်အကျါ. ဘၣ်ဆၣ်​ လၢခံစီၤပီလူး လီၤဘၣ်ကဒီးလၢဃိာ်ပူၤ. တၢ်မၢဖိလၢ အသးဆူၣ်တဂၤအံၤအထံၣ်ဘၣ်​ တၢ်နးတၢ်ဖှီၣ်သနာ်က့ အဝဲတကမၢကမၣ်ဘၣ်. မ့ၢ်လၢ သးစီဆှံတဲဘၣ်အီၤလၢ လၢဝ့ၢ်ယရူၤၡလ့ၣ်န့ၣ်​ “ဃိာ်ဒီးတၢ်နးတၢ်ဖှီၣ်” အိၣ်ခိးပာ်စၢၤအီၤ. (မၤတၢ် ၂၀:၂၂, ၂၃) စီၤပီလူးကထံၣ်ဘၣ်​ တၢ်နးတၢ်ဖှီၣ်ဒ်လဲၣ်န့ၣ်​ အတသ့ၣ်ညါဝဲလီၤတံၢ်လီၤဆဲးဘၣ်. ဘၣ်ဆၣ်​ အသ့ၣ်ညါဝဲလၢ ခီဖျိလၢ ယ့ၣ်ၡူးအမံၤအဃိ အဝဲကဆဲးထံၣ်ဘၣ်​ တၢ်နးတၢ်ဖှီၣ်.—မၤတၢ် ၉:၁၆.

^၂ ခရံာ်ဖိအဝံတဂၤ ဟ့ၣ်ပလီၢ်ဝဲ စီၤပီလူးလၢ ပှၤကစၢဃာ်အီၤဒီး “ကဟ့ၣ်လီၤအီၤလၢပှၤကလုာ်အဂၤတဖၣ်အစုပူၤ.” (မၤတၢ် ၂၁:၄, ၁၀, ၁၁) တယံာ်ဒံးဘၣ်န့ၣ်​ ပှၤဂီၢ်မုၢ်လၢအကဲပှၤယူဒၤဖိတဖၣ်​ ကိးပသူထီၣ်ဒီးအဲၣ်ဒိးမၤသံစီၤပီလူး. ဒီးလၢခံ ပှၤလၢအပၣ်ဃုာ်လၢပှၤယူဒၤဖိအကွီၢ်ဘျီၣ်လၢ အဒိၣ်ကတၢၢ်အကျါတနီၤန့ၣ်​ တဲအါလိာ်သးဘၣ်ဃးဒီး စီၤပီလူးအဂ့ၢ်. ဒီးဖဲန့ၣ်န့ၣ်​ လီၤဂာ်ဒ်သိးအဝဲသ့ၣ်​ “ကထုးဆ့ဆိ” စီၤပီလူး. ခဲအံၤစီၤပီလူး ဘၣ်အိၣ်လၢဃိာ်ပူၤ လၢရိမ့ၤသုးဖိအိၣ်အတၢ်လီၢ် ဒီးအဝဲကထံၣ်ဘၣ်အါထီၣ်​ တၢ်ကီတၢ်ခဲ ဒီးတၢ်ပာ်ဒ့ၣ်ပာ်ကမၣ်အီၤဒံး. (မၤတၢ် ၂၁:၃၁; ၂၃:၁၀) အဃိ အဝဲကလိၣ်ဘၣ်​ တၢ်ဟ့ၣ်ဂံၢ်ဟ့ၣ်ဘါသပှၢ်တၢၢ်.

၃. ဒ်သိး ပကဆဲးစံၣ်တဲၤတဲလီၤတၢ်အဂီၢ် ပဒိးန့ၢ်ဘၣ်​ တၢ်ဟ့ၣ်ဂံၢ်ဟ့ၣ်ဘါဖဲလဲၣ်.

^၃ လၢမုၢ်နံၤခံကတၢၢ်အဆၢကတီၢ်န့ၣ်​ ပသ့ၣ်ညါလၢ “ပှၤလၢအအဲၣ်ဒိး တီဒီးကစၢ်ယွၤ ဒ်ယ့ၣ်ၡူးခရံာ်အပျဲၢ်တဂၤအသိးန့ၣ်​ ကဘၣ်တၢ်မၤနးမၤဖှီၣ်​ အဝဲသ့ၣ်ကိးဂၤဒဲး.” (၂ တံၤ ၃:၁၂) တဘျီတခီၣ်​ ပဝဲစ့ၢ်ကီး ဒ်သိးပကဆဲးစံၣ်တဲၤတဲလီၤတၢ်အဂီၢ် ပလိၣ်ဘၣ်တၢ်ဂံၢ်တၢ်ဘါ. “ကုၢ်လၢအတီ ဒီးအကူၣ်တၢ်သ့” ကတဲာ်ကတီၤန့ၢ်ပှၤ တၢ်ဟ့ၣ်ဂံၢ်ဟ့ၣ်ဘါ ဘၣ်ဆၢဘၣ်ကတီၢ် ခီဖျိ တၢ်ကရၢကရိ အလံာ်အလဲၢ်တဖၣ်​ ဒီးတၢ်အိၣ်ဖှိၣ်အတၢ်ရဲၣ်တၢ်ကျဲၤအဃိ ပသးခုဒိၣ်မး. (မး ၂၄:၄၅) ယဟိဝၤယွၤ ပာ်ဖျါထီၣ်န့ၢ်ပှၤလၢ အဒုၣ်အဒါ တဂၤဂ့ၤတဂၤဂ့ၤ မၤပတုာ်ဝဲ တၢ်သးခုကစီၣ်​ တၢ်မၤတန့ၢ်ဘၣ်. အဝဲသ့ၣ်မၤဟးဂီၤ ယဟိဝၤယွၤ အခ့အပှၤတန့ၢ်ဘၣ်​ ဒီးမၤပတုာ်ဝဲ အတၢ်စံၣ်တဲၤတဲလီၤတၢ်မၤ တန့ၢ်စ့ၢ်ကီးဘၣ်. (ၡါ ၅၄:၁၇; ယံး ၁:၁၉) မ့မ့ၢ်ဒ်န့ၣ်န့ၣ်​ တၢ်ကဲထီၣ်အသးဒီး တၢ်မၢဖိပီလူးဒ်လဲၣ်. အထံၣ်ဘၣ်​ တၢ်မၤအၢမၤနးသနာ်က့ ဒ်သိး အဆဲးစံၣ်တဲၤတဲလီၤတၢ် ကသ့အဂီၢ် အဒိးန့ၢ်ဘၣ်​ တၢ်ဟ့ၣ်ဂံၢ်ဟ့ၣ်ဘါဧါ. အမ့ၢ်ဒိးန့ၢ်ဘၣ်ဝဲန့ၣ်​ အဒိးန့ၢ်ဘၣ်ဝဲ လၢကျဲဒ်လဲၣ်​ ဒီးအကဲဘျုးလၢ အဂီၢ်ဒ်လဲၣ်.

အဝဲသ့ၣ်​ “ကူၣ်ထီၣ်​ သကိးတၢ် ဒီးဆိၣ်လီၤအသး” ဘၣ်ဆၣ်​ အတၢ်ကူၣ်​ တကဲထီၣ်ဘၣ်​ (မၤတၢ် ၂၃:၁၁-၃၄)

၄, ၅. စီၤပီလူး ဒိးန့ၢ်ဘၣ်​ တၢ်ဟ့ၣ်ဂံၢ်ဟ့ၣ်ဘါ ဒ်လဲၣ်​ ဒီးဘၣ်မနုၤအဃိ ပတဲသ့လၢ တၢ်ဟ့ၣ်ဂံၢ်ဟ့ၣ်ဘါတခါအံၤ အဘၣ်ဆၢဘၣ်ကတီၢ်လဲၣ်.

^၄ ဖဲစီၤပီလူး ပူၤဖျဲးထီၣ်လၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်အနၤန့ၣ်​ အဝဲဒိးန့ၢ်ဘၣ်​ တၢ်ဟ့ၣ်ဂံၢ်ဟ့ၣ်ဘါဖးအါညါ. လံာ်စီဆှံ တဲဝဲလၢ “ကစၢ်ဆၢထၢၣ်လၢ စီၤပီလူးအကပၤ ဒီးတဲဝဲလၢ ‘ပာ်ဆူၣ်ထီၣ်​ နသးတက့ၢ်. ဒ်နအုၣ်နသး ဘၣ်ဃးဒီး ယဂ့ၢ်လီၤတံၢ်လီၤဆဲးလၢ ဝ့ၢ်ယရူၤၡလ့ၣ်အပူၤအသိး နကဘၣ်အုၣ်နသး လၢဝ့ၢ်ရိမ့ၤအပူၤ ဒ်န့ၣ်စ့ၢ်ကီး.’” (မၤတၢ် ၂၃:၁၁) မ့ၢ်လၢယ့ၣ်ၡူးတဲအီၤ ဒ်န့ၣ်အဃိ စီၤပီလူး သ့ၣ်ညါထီၣ်ဝဲလၢ အဝဲကပူၤဖျဲးထီၣ်​ ဝံၤဒီးကလဲၤဘၣ်ဆူ ဝ့ၢ်ရိမ့ၤ ဒီးစံၣ်တဲၤတဲလီၤဘၣ်​ ယ့ၣ်ၡူးအဂ့ၢ်ဖဲန့ၣ်.

^၅ လၢခံတနံၤန့ၣ်​ ပှၤပိာ်ခွါအဂၤ ၄၀ ဘျဲၣ်​ “ကူၣ်ထီၣ်​ တၢ်တမံၤလီၤ. အဝဲသ့ၣ်​ ဆိၣ်လီၤအသး လၢတချုးလၢ အဝဲသ့ၣ်မၤသံ စီၤပီလူးဒံးဘၣ်န့ၣ်​ အဝဲသ့ၣ်​ တအီၣ်တၢ်အီတၢ်ဘၣ်.” အဝဲသ့ၣ်​ “ကူၣ်ထီၣ်​ သကိးတၢ် ဒီးဆိၣ်လီၤအသး” အဃိ ဖျါလၢ အဝဲသ့ၣ်​ ပာ်လီၤသး လၢကမၤသံ တၢ်မၢဖိပီလူး သပှၢ်တၢၢ်. အဝဲသ့ၣ်​ ဆိၣ်လီၤအသးလၢ အမၤသံ စီၤပီလူး မ့တန့ၢ်ဘၣ်န့ၣ်​ အဝဲသ့ၣ်​ ကထံၣ်ဘၣ်​ တၢ်အၢတၢ်သီ. အဃိ စီၤပီလူး ဒိးန့ၢ်ဘၣ်ဝဲ တၢ်ဟ့ၣ်ဂံၢ်ဟ့ၣ်ဘါ လၢယ့ၣ်ၡူးအအိၣ်န့ၣ်​ ကဲဝဲတၢ်ဟ့ၣ်ဂံၢ်ဟ့ၣ်ဘါလၢ အဘၣ်ဆၢဘၣ်ကတီၢ်. (မၤတၢ် ၂၃:၁၂-၁၅) အဝဲသ့ၣ်​ ကူၣ်ထီၣ်ဝဲလၢ ကမၢပှၤဟဲက့ၤကိး စီၤပီလူးလၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ် ဒ်သိး ပှၤကသမံသမိး အါထီၣ်အီၤအဂီၢ်. သနာ်က့ အဝဲသ့ၣ်​ ကူၣ်ထီၣ်ပာ်စၢၤဝဲလၢ ကအိၣ်ခိးခူသူၣ်စီၤပီလူး ဒီးမၤသံအီၤ ဖဲစီၤပီလူးဟဲက့ၤလၢ ကျဲအခါ. ပှၤလုၢ်တၢ်ဒိၣ်အခိၣ်တဖၣ်​ ဒီးပှၤသူၣ်က့သးပှၢ်တဖၣ်စ့ၢ်ကီး တူၢ်လိာ်အဝဲသ့ၣ်​ အတၢ်ကူၣ်တခါအံၤ.

၆. ပှၤကကူၣ်သံ စီၤပီလူးန့ၣ်​ စီၤပီလူး သ့ၣ်ညါထီၣ်ဝဲဒ်လဲၣ်​ ဒီးပှၤသးစၢ်လၢ ပစိၤခဲအံၤန့ၣ်​ ဟံန့ၢ်တၢ်မၤလိလၢ စီၤပီလူး အဖိဒိၣ်ခွါ အဒိအတဲာ် သ့ဒ်လဲၣ်.

^၆ စီၤပီလူး အဖိဒိၣ်ခွါတဂၤ နၢ်ဟူဝဲလၢ ပှၤကူၣ်ထီၣ်တၢ်ဒ်အံၤအဃိ အလဲၤတဲဘၣ်​ စီၤပီလူး. အဃိစီၤပီလူး မၢအလဲၤတဲဘၣ်​ ရိမ့ၤအသုးခိၣ်​ စီၤကျီၤဒံလူၤစံ လၢတၢ်ဂ့ၢ်အံၤ. (မၤတၢ် ၂၃:၁၆-၂၂) ပှၤသးစၢ်လၢ အဟ့ၣ်လီၤအသးလၢ ကစၢ်ယွၤ အပှၤဂီၢ်မုၢ်အဂီၢ် ဒီးတသ့ဖဲအသ့ အဆီၣ်ထွဲ ယွၤအဘီအမုၢ် လၢတၢ်သးတီအပူၤ ဒ်စီၤပီလူး အဖိဒိၣ်ခွါတဂၤအံၤ အသိးန့ၣ်​ ယဟိဝၤယွၤ ပာ်လုၢ်ပာ်ပှ့ၤ အဝဲသ့ၣ်ဒိၣ်မး.

၇, ၈. ဒ်သိး စီၤပီလူး ကပူၤဖျဲးထီၣ်လၢ တၢ်ကူၣ်အၢအဂီၢ် စီၤကျီၤဒံလူၤစံ ရဲၣ်ကျဲၤဝဲဒ်လဲၣ်.

^၇ ဖဲစီၤကျီၤဒံလူၤစံ လၢအကဲဝဲ သုးဖိ ၁,၀၀၀ အခိၣ်​ နၢ်ဟူဝဲလၢ ပှၤကူၣ်ထီၣ်တၢ်လၢ ကမၤသံစီၤပီလူးအခါ အမၢဝဲ ပှၤသုးဖိ ၄၇၀ လၢအကဲဝဲ ပှၤသုးဖိ, ပှၤစိာ်ဘီဖိ ဒီးပှၤဒိးကသ့ၣ်သုးတဖၣ်​ လဲၤဆှၢဖျိးထီၣ်​ စီၤပီလူးလၢ ဝ့ၢ်ယရူၤၡလ့ၣ်​ ဒီးလဲၤဆှၢအီၤလၢ ဝ့ၢ်ကဲၤစါရံၤ. ဒီးဖဲအဝဲသ့ၣ်​ လဲၤတုၤလၢ ဝ့ၢ်ကဲၤစါရံၤအခါ ပှၤကဘၣ်လဲၤဆှၢအီၤလၢ ပဒိၣ်ဖးဒိၣ်​ စီၤဖ့လံးa အအိၣ်. လၢဝ့ၢ်ကဲၤစါရံၤန့ၣ်​ အိၣ်ဒီးရိမ့ၤအတၢ်ပၢအရူ အဝဲၤလီၢ်ခိၣ်သ့ၣ်​ လၢပှၤယူဒၤဖိအဂီၢ်. ဒီးတၢ်လီၢ်ဖဲန့ၣ်န့ၣ်​ ပှၤယူဒၤဖိအိၣ်ဝဲအါမး. ဘၣ်ဆၣ်​ ပှၤအိၣ်ဖဲန့ၣ်​ အါတက့ၢ်န့ၣ်​ အကဲဝဲပှၤကလုာ်ဂၤ. လၢဝ့ၢ်ကဲၤစါရံၤန့ၣ်​ တၢ်အိၣ်သး ဂ့ၤဒိၣ်န့ၢ်ဒံး ဝ့ၢ်ယရူၤၡလ့ၣ်ဖးဒိၣ်ညါ. မ့မ့ၢ်လၢ ဝ့ၢ်ယရူၤၡလ့ၣ်န့ၣ်​ ပှၤယူဒၤဖိတဖၣ်ထီဒါဝဲ တၢ်ဘူၣ်တၢ်ဘါအဂၤ ဒီးထံၣ်ဆံးဝဲ ဒီးမၤအၢမၤနးဝဲ ပှၤလၢအအိၣ်လၢ တၢ်ဘူၣ်တၢ်ဘါအဂၤ.

^၈ စီၤကျီၤဒံလူၤစံ မၤထွဲဝဲ ရိမ့ၤအတၢ်သိၣ်တၢ်သီ ဒီးကွဲးလံာ်လၢ စီၤဖ့လံးအအိၣ်​ ဒီးတဲဘၣ်အီၤလၢ စီၤပီလူးအဂ့ၢ်. စီၤကျီၤဒံလူၤစံ တဲဝဲလၢ အဝဲသ့ၣ်ညါထီၣ်ဝဲလၢ စီၤပီလူးကဲဝဲ ရိမ့ၤအထံဖိကီၢ်ဖိအဃိ ဖဲပှၤယူဒၤဖိတဖၣ်​ “ဘူးကမၤသံ” စီၤပီလူးအခါ အဝဲမၤပူၤဖျဲးထီၣ်အီၤ. ဒီးအတဲဝဲလၢ စီၤပီလူးန့ၣ်​ တမၤဘၣ်တၢ်ကမၣ်လၢ “ကြၢးသံမ့ၢ်ဂ့ၤ, ကြၢးဖၢနုာ်အီၤလၢ ဃိာ်ပူၤမ့ၢ်ဂ့ၤ” နီတမံၤဘၣ်. ဘၣ်ဆၣ်​ မ့ၢ်လၢပှၤကူၣ်အၢ စီၤပီလူးအဃိ အဝဲဆှၢလီၤ စီၤပီလူးလၢ စီၤဖ့လံးအအိၣ်​ ဒ်သိး စီၤဖ့လံး ကကနၣ်ဝဲ ပှၤလၢအပာ်ဒ့ၣ်ပာ်ကမၣ်​ စီၤပီလူး အတၢ်ကတိၤ ဝံၤဒီးကစံၣ်ညီၣ်ဝဲအဂီၢ်.—မၤတၢ် ၂၃:၂၅-၃၀.

၉. (က) စီၤကျီၤဒံလူၤစံ မၤကမၣ်ဝဲ တၢ်သိၣ်တၢ်သီ ဘၣ်ဃးဒီး ရိမ့ၤအထံဖိကီၢ်ဖိ အတၢ်ခွဲးတၢ်ယာ် ဒ်လဲၣ်. (ခ) တဘျီတခီၣ်​ ဘၣ်မနုၤအဃိ ပကဘၣ်သူ ထံဖိကီၢ်ဖိ အတၢ်ခွဲးတၢ်ယာ်လဲၣ်.

^၉ စီၤကျီၤဒံလူၤစံ ကွဲးဝဲတၢ်မ့ၢ်တၢ်တီ ခဲလၢာ်ဧါ. အတကွဲးဝဲ ခဲလၢာ်ဘၣ်. အဃိ လီၤဂာ်ဒ်သိး အဝဲတဲဂ့ၤလီၤအသး. နီၢ်ကီၢ်န့ၣ်​ အမၤပူၤဖျဲးဝဲ စီၤပီလူးန့ၣ်​ တမ့ၢ်လၢ အသ့ၣ်ညါထီၣ်ဝဲလၢ စီၤပီလူးကဲဝဲ ပှၤရိမ့ၤဖိအဃိဘၣ်. ဒီးအဝဲတကွဲးဝဲ တၢ်ဂ့ၢ်လၢ ဘၣ်ဃးဒီး အဝဲမၢပှၤ ‘စၢဃာ်စီၤပီလူးဒီး ပျံၤထးခံဘိ’ ဒီး “မၢပှၤဖျ့အီၤဒီး သံကွၢ်သံဒိးအီၤ” ဘၣ်. (မၤတၢ် ၂၁:၃၀-၃၄; ၂၂:၂၄-၂၉) စီၤကျီၤဒံလူၤစံ မၤစီၤပီလူး ဒ်န့ၣ်န့ၣ်​ လီၤဂာ်ဒ်သိး အမၤကမၣ်ဝဲ တၢ်သိၣ်တၢ်သီ လၢဘၣ်ဃးဒီး ရိမ့ၤအထံဖိကီၢ်ဖိ အတၢ်ခွဲးတၢ်ယာ်. မုၢ်မဆါတနံၤအံၤစ့ၢ်ကီး မုၣ်ကီၤလံၢ်သူဝဲ တၢ်ဘူၣ်တၢ်ဘါ လၢအခိၣ်ကိၤ ဒီးအထီဒါတၢ်တဖၣ်​ ဒ်သိး ကမၤအၢမၤနး ကစၢ်ယွၤ အပှၤဂီၢ်မုၢ် ဒီးကမၤလီၤမၢ်ကွံာ် ပတၢ်ခွဲးတၢ်ယာ်လၢ ပကဘူၣ်ထီၣ်ဘါထီၣ်တၢ်လၢ တၢ်သဘျ့အပူၤ. အဃိ ဒ်စီၤပီလူးအသိး ကစၢ်ယွၤ အခ့အပှၤတဖၣ်​ သူဝဲထံဖိကီၢ်ဖိအတၢ်ခွဲးတၢ်ယာ် ဒီးပဒိၣ်အတၢ်သိၣ်တၢ်သီ ဒ်သိး ကဒီသဒၢလီၤအသးအဂီၢ် သ့ဝဲစ့ၢ်ကီး.

“လၢတၢ်သးခုအပူၤ ယကတဲဆၢက့ၤတၢ်လၢ ယနီၢ်ကစၢ်အဂီၢ်” (မၤတၢ် ၂၃:၃၅–၂၄:၂၁)

၁၀. ပှၤပာ်ဒ့ၣ်ပာ်ကမၣ်​ စီၤပီလူးဒ်လဲၣ်.

^၁၀ တချုးလၢ ပှၤလၢအပာ်ဒ့ၣ်ပာ်ကမၣ်​ စီၤပီလူး လၢအအိၣ်လၢ ဝ့ၢ်ယရူၤၡလ့ၣ်​ ဟဲတုၤလၢ ဝ့ၢ်ကဲၤစါရံၤဒံးဘၣ်န့ၣ်ပှၤ “ပၢၤဃာ် စီၤပီလူး လၢစီၤဟ့ၤရိာ်အနီပူၤ.” (မၤတၢ် ၂၃:၃၅) ဒီးယဲၢ်သီဝံၤအလီၢ်ခံ ပှၤလုၢ်တၢ်ခိၣ်​ အဒိၣ်ကတၢၢ် စီၤအနၤနံ, စီၤတ့ၢ်တူးလူး လၢအမ့ၢ် ပီၢ်ရီ ဒီးပှၤသူၣ်က့သးပှၢ် တနီၤန့ၣ်​ ဟဲဝဲလၢ ဝ့ၢ်ကဲၤစါရံၤ. ဒီးဒ်သိး စီၤတ့ၢ်တူးလူး ကတဲမုာ် စီၤဖ့လံးအနၢ် ဒီးကမၤအိၣ်အမဲာ်အဂီၢ် အဝဲစံးဘျုးဝဲ စီၤဖ့လံး ခီဖျိလၢ တၢ်လၢအမၤန့ၢ်ဝဲ ပှၤယူဒၤဖိတဖၣ်အဃိ.b ဒီးစီၤတ့ၢ်တူးလူးန့ၣ်​ စးထီၣ်တဲဝဲ စီၤပီလူးအဂ့ၢ် ဒီးအဝဲတဲဝဲလၢ စီၤပီလူးန့ၣ်​ “မ့ၢ်ပှၤလၢ အဟးမၤတံာ်တာ်ပှၤဂၤ ဒီးအဟ့ၣ်သဆၣ်ထီၣ်​ ပှၤယူဒၤဖိခဲလၢာ်လၢ ဟီၣ်ခိၣ်ဒီဘ့ၣ်​ ဒ်သိး ကထီဒါ ပဒိၣ်အဂီၢ်လီၤ. ဒီးအဝဲမ့ၢ်ဝဲ ပှၤနစၤရ့းဖိ အကရၢခိၣ်တဂၤ.” ဝံၤဒီး ပှၤယူဒၤဖိအဂၤတနီၤန့ၣ်​ “ထီဒါစီၤပီလူးဒီး တဲဝဲလၢ တၢ်ဂ့ၢ်တဖၣ်အံၤန့ၣ်​ မ့ၢ်ဝဲတီဝဲ.” (မၤတၢ် ၂၄:၅, ၆, ၉) အဝဲသ့ၣ်​ ပာ်ဒ့ၣ်ပာ်ကမၣ်​ စီၤပီလူးလၢ စီၤပီလူးန့ၣ်​ အမၤတၢထီၣ်တၢလီၤတၢ်, အတီခိၣ်ရိၤမဲဝဲ ကရၢလၢ အလီၤပျံၤလီၤဖုး ဒီးမၤဘၣ်အၢတၢ်လုၢ်ဟံၣ်အဃိ အကြၢးသံ.

၁၁, ၁၂. စီၤပီလူးပာ်ဖျါထီၣ်ဝဲလၢ ပှၤလၢအပာ်ဒ့ၣ်ပာ်ကမၣ်အီၤတဖၣ်​ တဲတၢ်တဘၣ်ဘၣ်ဒ်လဲၣ်.

^၁၁ ဝံၤဒီး ပှၤပျဲလၢ စီၤပီလူးကတဲတၢ် အဃိ အစးထီၣ်တဲဝဲလၢ “လၢတၢ်သးခုအပူၤ ယကတဲဆၢက့ၤတၢ်လၢ ယနီၢ်ကစၢ်အဂီၢ်.” ဒီးစီၤပီလူး ပာ်ဖျါထီၣ်ဝဲလၢ ပှၤလၢ အပာ်ဒ့ၣ်ပာ်ကမၣ်အီၤတဖၣ်​ တဲတၢ်န့ၣ်​ တဘၣ်ဘၣ်. အတမၤဘၣ်အၢတၢ်လုၢ်ဟံၣ်​ ဒီးမၤတၢထီၣ်တၢလီၤတၢ်ဘၣ်. အပာ်ဖျါထီၣ်ဝဲလၢ အတအိၣ်လၢ ဝ့ၢ်ယရူၤၡလ့ၣ်ဘၣ်န့ၣ်​ အိၣ်လံ “အါနံၣ်” လံ. ဒီးအဟဲက့ၤစိာ်န့ၢ်ဝဲ “တၢ်မၤဘူၣ်” လၢခရံာ်ဖိတဖၣ်လၢ အဘၣ်ကီဘၣ်ခဲ ခီဖျိလၢ တၢ်သၣ်ဝံၤလီၤဒိ ဒီးတၢ်မၤအၢမၤနးအဃိ. ဒီးအတဲဝဲလၢ တချုးလၢ အနုာ်လီၤလၢ တၢ်လုၢ်ဟံၣ်ဒံးဘၣ်န့ၣ်​ ‘အမၤကဆှီထီၣ်အသး ဒ်လုၢ်လၢ် အိၣ်ဝဲအသိး.’ တကးဒံးဘၣ်​ အတဲဝဲလၢ “လၢကစၢ်ယွၤ အမဲာ်ညါမ့ၢ်ဂ့ၤ, ပှၤဟီၣ်ခိၣ်ဖိ အမဲာ်ညါမ့ၢ်ဂ့ၤ, ယဂုာ်ကျဲးစၢး ပၢၤဃာ် ယသးလၢ အသ့ၣ်ညါဒၣ်တၢ်လၢ အကဆှီထီဘိလီၤ.”—မၤတၢ် ၂၄:၁၀-၁၃, ၁၆-၁၈.

^၁၂ စီၤပီလူးတဲဝဲလၢ အဘူၣ်ထီၣ်ဘါထီၣ်ဝဲ မိၢ်ပၢ်ဖံဖုလၢပျၢၤတဖၣ်​ အကစၢ်ယွၤ “ဒ်တၢ်ဘူၣ်တၢ်ဘါ အကရၢလၢ အဝဲသ့ၣ်​ တဲလၢအကမၣ်အံၤ အတၢ်ရဲၣ်တၢ်ကျဲၤ အိၣ်ဝဲအသိး.” ဒီးအနာ်ဝဲ “တၢ်ခဲလၢာ်လၢ အအိၣ်လၢ စီၤမိၤၡ့ အတၢ်သိၣ်တၢ်သီ ဒီးဝံအတၢ်ကွဲးအသးတဖၣ်​ အပူၤ.” အတဲစ့ၢ်ကီးဝဲလၢ ဒ်ပှၤလၢ အပာ်ဒ့ၣ်ပာ်ကမၣ်အီၤတဖၣ်အသိး အဝဲစ့ၢ်ကီး အနာ်ဝဲလၢ “ပှၤတီပှၤလိၤဒီး ပှၤတတီတလိၤ လၢအသံသ့ၣ်တဖၣ်​ ကဂဲၤဆၢထၢၣ်​ သမူထီၣ်က့ၤဝဲ.” အဃိ ဘၣ်ဃးဒီး ပှၤလၢအထီဒါအီၤတဖၣ်န့ၣ်​ စီၤပီလူးတဲဝဲလၢ “ဖဲယဆၢထၢၣ်လၢ ပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ် အမဲာ်ညါအခါ ပှၤလၢ အအိၣ်ဖဲအံၤတဖၣ်​ ထံၣ်ဝဲလၢ ယမၤကမၣ်တၢ် ဒ်လဲၣ်န့ၣ်​ မၢအဝဲသ့ၣ်​ တဲဖျါထီၣ်လၢ အနီၢ်ကစၢ်တက့ၢ်. တၢ်လၢယမၤန့ၣ်​ အိၣ်ဒၣ်ထဲ တမံၤလၢအမ့ၢ် ဖဲယအိၣ်ဆၢထၢၣ်လၢ အဝဲသ့ၣ်အကျါန့ၣ်​ ယကိးပသူထီၣ်လၢ ‘တနံၤအံၤ ယဘၣ်တၢ်စံၣ်ညီၣ်ဒ်အံၤ မ့ၢ်လၢ ယနာ်လၢပှၤသံ ကဂဲၤဆၢထၢၣ်​ သမူထီၣ်က့ၤ အဃိလီၤ.’”—မၤတၢ် ၂၄:၁၄, ၁၅, ၂၀, ၂၁.

၁၃-၁၅. ပမ့ၢ်ဘၣ်လဲၤ တဲတၢ်လၢ ပဒိၣ်အမဲာ်ညါန့ၣ်​ ပကွၢ်လိ စီၤပီလူး အဒိအတဲာ် သ့ဒ်လဲၣ်.

^၁၃ ခီဖျိလၢ ပတၢ်စူၢ်တၢ်နာ်အဃိ ပမ့ၢ်ဘၣ်လဲၤတဲတၢ်လၢ ပဒိၣ်အမဲာ်ညါ ဒီးပှၤမ့ၢ်ပာ်ဒ့ၣ်ပာ်ကမၣ်ပှၤလၢ ပမၤတၢထီၣ်တၢလီၤတၢ် ဒီးထီဒါပဒိၣ်​ ဒီးပကဲ “ကရၢလၢ အလီၤပျံၤလီၤဖုး” န့ၣ်ပဟံန့ၢ်တၢ်မၤလိလၢ စီၤပီလူးအအိၣ်သ့. စီၤပီလူးန့ၣ်​ အတမၤအိၣ်အမဲာ်လၢ ပဒိၣ်ဖးဒိၣ်အမဲာ်ညါ ဒ်စီၤတ့ၢ်တူးလူးအသိးဘၣ်. အဝဲပာ်အသးမုာ်မုာ် ဒီးတဲတၢ်လၢ တၢ်ပာ်ကဲအပူၤ. ဒီးအပာ်ဖျါထီၣ်ဝဲ တၢ်အုၣ်သး တီတီလိၤလိၤ လီၤတံၢ်လီၤဆဲး လၢတၢ်ကူၣ်သ့အပူၤ. စီၤပီလူးတဲဝဲလၢ “ပှၤယူဒၤဖိတနီၤလၢ အဟဲလၢ အၤစံအကီၢ်ရ့ၣ်” လၢအပာ်ဒ့ၣ်ပာ်ကမၣ်အီၤလၢ အမၤဘၣ်အၢ တၢ်လုၢ်ဟံၣ်န့ၣ်​ တအိၣ်လၢအဝဲသ့ၣ်အကျါ ဖဲအံၤဘၣ်. အဃိ ဒ်တၢ်သိၣ်တၢ်သီ အိၣ်ဝဲအသိး အဝဲသ့ၣ်​ ကြၢးတဲဖျါထီၣ်ဝဲ တၢ်ဂ့ၢ်တၢ်ကျိၤလၢ အပာ်ဒ့ၣ်ပာ်ကမၣ်​ စီၤပီလူး လၢစီၤပီလူးအမဲာ်ညါ. ဒီးစီၤပီလူး ကြၢးဒိးန့ၢ်ဘၣ်​ တၢ်ခွဲးတၢ်ယာ်လၢ ကတဲဆၢက့ၤအဝဲသ့ၣ်အဂီၢ်.—မၤတၢ် ၂၄:၁၈, ၁၉.

^၁၄ ပထံၣ်ဘၣ်လၢ စီၤပီလူးန့ၣ်​ တဲဖျါထီၣ်ဝဲ အတၢ်စူၢ်တၢ်နာ်အဂ့ၢ်ဒူဒူ. လၢအပူၤကွံာ် ဖဲပှၤယူဒၤဖိ အကွီၢ်ဘျီၣ်လၢ အဒိၣ်ကတၢၢ်အပူၤန့ၣ်​ အတဲဝဲ တၢ်ဂဲၤဆၢထၢၣ်သမူထီၣ်က့ၤ အဂ့ၢ်အဃိ တၢ်သဘံၣ်သဘုၣ်​ အိၣ်ထီၣ်ဝဲ သနာ်က့ ခဲအံၤန့ၣ်​ အတဲဖျါထီၣ်ဝဲ တၢ်ဂဲၤဆၢထၢၣ်သမူထီၣ်က့ၤအဂ့ၢ် ဒူဒူဘူၣ်ဒံး. (မၤတၢ် ၂၃:၆-၁၀) ဖဲစီၤပီလူး တဲဆၢက့ၤတၢ်လၢ အနီၢ်ကစၢ်အဂီၢ်အခါ ဘၣ်မနုၤအဃိ အတဲဝဲ တၢ်ဂဲၤဆၢထၢၣ်သမူထီၣ်က့ၤ အဂ့ၢ်လဲၣ်. အတဲဝဲ တၢ်မ့ၢ်တၢ်တီ ဘၣ်ဃးဒီးယ့ၣ်ၡူး ဒီးယ့ၣ်ၡူး အတၢ်ဂဲၤဆၢထၢၣ်သမူထီၣ်က့ၤအဂ့ၢ် လၢပှၤထီဒါတၢ်တဖၣ်​ တတူၢ်လိာ်ဝဲဘၣ်. (မၤတၢ် ၂၆:၆-၈, ၂၂, ၂၃) စီၤပီလူး ထံၣ်ဘၣ်တၢ်မၤကွၢ် ဒ်အံၤန့ၣ်​ မ့ၢ်လၢအနာ်ဝဲ တၢ်ဂဲၤဆၢထၢၣ်မူထီၣ်က့ၤ, လီၤဆီဒၣ်တၢ် မ့ၢ်လၢ အနာ်ဝဲ ယ့ၣ်ၡူး ဒီးယ့ၣ်ၡူးအတၢ်ဂဲၤဆၢထၢၣ်​ သမူထီၣ်က့ၤအဂ့ၢ်အဃိ.

^၁၅ ဒ်စီၤပီလူးအသိး ပစံၣ်တဲၤတဲလီၤတၢ် လၢတၢ်သးဒူ ဒီးဟံန့ၢ်တၢ်ဂံၢ်တၢ်ဘါလၢ ယ့ၣ်ၡူးအတၢ်ကတိၤသ့. ယ့ၣ်ၡူးတဲဘၣ်​ အပျဲၢ်အဘီၣ်တဖၣ်လၢ “ပှၤခဲလၢာ်ကသးဟ့သုလၢ ယမံၤအဃိလီၤ. ဘၣ်ဆၣ်​ ပှၤလၢအတူၢ်တၢ်လၢ တၢ်သးတီအပူၤတုၤလၢ အကတၢၢ်န့ၣ်​ ကတုၤလၢ တၢ်အုၣ်က့ၤခီၣ်က့ၤ.” ဘၣ်ဃးဒီး ပကဘၣ်တဲ တၢ်ဂ့ၢ်မနုၤလဲၣ်န့ၣ်​ မ့ၢ်ပကဘၣ်​ ဘၣ်ယိၣ်တၢ်ဧါ. ပတလိၣ်​ ဘၣ်ယိၣ်တၢ်ဘၣ်. ယ့ၣ်ၡူးအၢၣ်လီၤဝဲလၢ “ဖဲပှၤလဲၤကိးသု ဒ်သိးကဟ့ၣ်လီၤကွံာ်သုအခါ သုကဘၣ်တဲ မနုၤလဲၣ်န့ၣ်​ တဘၣ်သူၣ်ကိၢ်သးဂီၤတဂ့ၤ. သုတမ့ၢ်ပှၤလၢ အတဲတၢ်ဘၣ်, မ့ၢ်သးစီဆှံတဲတၢ် ခီဖျိလၢသုလီၤ. အဃိ တဲတၢ်ဂ့ၢ်လၢ သးစီဆှံ ဟံးစုနဲၣ်ကျဲသု ဖဲနၣ်ရံၣ်အဝဲန့ၣ်တက့ၢ်.”—မၢ် ၁၃:၉-၁၃.

“စီၤဖ့လံး ပျံၤထီၣ်တၢ်” (မၤတၢ် ၂၄:၂၂-၂၇)

၁၆, ၁၇. (က) ဖဲပှၤဖီၣ်ဃာ် စီၤပီလူး ဒီးသမံသမိးအီၤအခါ စီၤဖ့လံး တဲဝဲမနုၤလဲၣ်​ ဒီးအမၤဝဲမနုၤလဲၣ်. (ခ) ဘၣ်မနုၤအဃိ စီၤဖ့လံး ပျံၤထီၣ်တၢ်လဲၣ်​ ဒီးဘၣ်မနုၤအဃိ အဝဲကိးထံၣ်ဝဲ စီၤပီလူး တဘျုးဘျီညါလဲၣ်.

^၁၆ ပဒိၣ်ဖးဒိၣ်​ စီၤဖ့လံး နၢ်ဟူဘၣ်ဝဲ ခရံာ်ဖိအတၢ်စူၢ်တၢ်နာ် တဘျီအံၤန့ၣ်​ တမ့ၢ်ဝဲ အဆိကတၢၢ်တဘျီဘၣ်. လံာ်စီဆှံ တဲဝဲလၢ “စီၤဖ့လံး သ့ၣ်ညါဝဲ တၢ်မ့ၢ်တၢ်တီအကျဲအံၤ အဂ့ၢ်ဂ့ၤဂ့ၤအဃိ အပာ်ပတုာ်ကွံာ်ဝဲ တၢ်သံကွၢ်သံဒိး ဒီးတဲဝဲလၢ “ဖဲသုးဖိ တကထိအခိၣ်​ စီၤလူၤစံ ဟဲအခါ ယကစံၣ်ညီၣ်န့ၢ်သု တၢ်ဂ့ၢ်တဖၣ်အံၤလီၤ.” ဒီးအဝဲမၤလိာ် သုးခိၣ်တဂၤလၢ ကဖီၣ်ဃာ် စီၤပီလူး ဘၣ်ဆၣ်​ ဟ့ၣ်အီၤတၢ်သဘျ့တနီၤ ဒီးဟ့ၣ်ဝဲအခွဲး ဒ်သိး အသကိးတဖၣ်​ ကဟဲမၤန့ၢ်အီၤတၢ်လၢ အလိၣ်ဘၣ်တဖၣ်.”—မၤတၢ် ၂၄:၂၂, ၂၃.

^၁၇ စှၤကိာ်သီ ဝံၤအလီၢ်ခံ စီၤဖ့လံး ဒီးအမါ နီၢ်ဒြူၤစံးလ့ၤ လၢအကဲ ပှၤယူဒၤမုၣ်န့ၣ်ဟဲတုၤဝဲ ဒီးမၢပှၤကိးန့ၢ်အီၤလၢ စီၤပီလူးဒီး “ဒိကနၣ်ဝဲ အတၢ်ကတိၤ လၢအဘၣ်ဃးဒီး တၢ်နာ်ယ့ၣ်ၡူးခရံာ်.” (မၤတၢ် ၂၄:၂၄) သနာ်က့ ဖဲစီၤပီလူး တဲဝဲတၢ်ဂ့ၢ် ဘၣ်ဃးဒီး “တၢ်တီတၢ်လိၤအဂ့ၢ်, တၢ်ကီၤသူၣ်ကီၤသးအဂ့ၢ် ဒီးတၢ်စံၣ်ညီၣ်လၢ ကဟဲအဂ့ၢ်အခါ စီၤဖ့လံး ပျံၤထီၣ်တၢ်.” ဘၣ်သ့ၣ်သ့ၣ်​ ကမ့ၢ်လၢ အသ့ၣ်ညါလီၤသးလၢ အမၤတ့ၢ် တၢ်အၢတၢ်သီအဃိ အပျံၤထီၣ်တၢ်. အဃိ အတဲစီၤပီလူးလၢ “ခဲအံၤ နက့ၤသ့လံ. ဘၣ်ဆၣ်​ ဖဲတၢ်ခွဲးတၢ်ယာ် အိၣ်ထီၣ်အခါ ယကကိးက့ၤနၤလၢ အသီတဘျီ.” လၢခံ စီၤဖ့လံး ကိးထံၣ်ဝဲ စီၤပီလူး တဘျုးဘျီညါ. ဘၣ်ဆၣ်​ တမ့ၢ်လၢ အအဲၣ်ဒိး သ့ၣ်ညါ တၢ်မ့ၢ်တၢ်တီအဃိဘၣ်. အမုၢ်လၢ်ဝဲလၢ စီၤပီလူး ကထိးအီၤဒီးကျိၣ်ဒီးစ့.—မၤတၢ် ၂၄:၂၅, ၂၆.

၁၈. ဘၣ်မနုၤအဃိ စီၤပီလူးတဲဘၣ်ဝဲ စီၤဖ့လံး ဒီးအမါလၢ “တၢ်တီတၢ်လိၤအဂ့ၢ်, တၢ်ကီၤသူၣ်ကီၤသးအဂ့ၢ် ဒီးတၢ်စံၣ်ညီၣ်လၢ ကဟဲ” အဂ့ၢ်လဲၣ်.

^၁၈ ဘၣ်မနုၤအဃိ စီၤပီလူး တဲဘၣ်ဝဲ စီၤဖ့လံး ဒီးအမါလၢ “တၢ်တီတၢ်လိၤအဂ့ၢ်, တၢ်ကီၤသူၣ်ကီၤသးအဂ့ၢ် ဒီးတၢ်စံၣ်ညီၣ်လၢ ကဟဲ” အဂ့ၢ်လဲၣ်. ခီဖျိလၢ အဝဲသ့ၣ်​ အဲၣ်ဒိးသ့ၣ်ညါဝဲလၢ ပှၤမ့ၢ်နာ် ယ့ၣ်ၡူးန့ၣ်​ ပှၤကဘၣ်​ မ့ၢ်ပှၤဒ်လဲၣ်အဃိ စီၤပီလူး တဲဘၣ်အဝဲသ့ၣ်​ တၢ်ဂ့ၢ်တဖၣ်န့ၣ်. တကးဒံးဘၣ်​ စီၤပီလူး သ့ၣ်ညါလၢ အဝဲသ့ၣ်န့ၣ်​ အိၣ်ဒီးတၢ်သကဲာ်ပဝး လၢအလီၤရၢၢ်, အမၤတၢ်အၢတၢ်သီ ဒီးတၢ်တတီတလိၤအဃိ စီၤပီလူးတဲဘၣ်​ အဝဲသ့ၣ်လၢ တၢ်လၢပှၤကဘၣ်မၤအီၤ ဒ်သိးပှၤကကဲထီၣ်ဘၣ်​ ခရံာ်အပျဲၢ်အဘီၣ်အဂီၢ်. စီၤပီလူး အတၢ်ကတိၤန့ၣ်​ ပာ်ဖျါထီၣ်ဝဲလၢ စီၤဖ့လံး ဒီးအမါ အတၢ်အိၣ်မူန့ၣ်​ တဘၣ်လိာ်သးဒီး ကစၢ်ယွၤ အတၢ်သိၣ်တၢ်သီလၢ အတီအလိၤ နီတစဲးဘၣ်. အဃိ အဝဲသ့ၣ်​ ကသ့ၣ်ညါထီၣ်ဝဲလၢ ကစၢ်ယွၤ ကစံၣ်ညီၣ်ဝဲ ပှၤဟီၣ်ခိၣ်ဖိတဖၣ်​ ဒ်တၢ်လၢ အဝဲသ့ၣ်တဲဝဲ, မၤဝဲ ဒီးဆိကမိၣ်ဝဲအသိး. တကးဒံးဘၣ်​ အဝဲသ့ၣ်​ ကသ့ၣ်ညါထီၣ်ဝဲလၢ ကစၢ်ယွၤ ကစံၣ်ညီၣ်အဝဲသ့ၣ်​ ဒ်လဲၣ်န့ၣ်​ အမ့ၢ်တၢ်လၢ အရ့ဒိၣ်ဒိၣ်န့ၢ်ဒံး အဝဲသ့ၣ်​ ကစံၣ်ညီၣ်စီၤပီလူးဒ်လဲၣ်ဒံး. အဃိ စီၤဖ့လံး “ပျံၤထီၣ်တၢ်” န့ၣ်တမ့ၢ်တၢ်လၢ အလီၤကမၢကမၣ်ဘၣ်.

၁၉, ၂၀. (က) လၢပတၢ်စံၣ်တဲၤတဲလီၤ တၢ်မၤအပူၤ ပမ့ၢ်ထံၣ်ဘၣ်ဒီး ပှၤလၢအဖျါလၢ အအဲၣ်ဒိးသ့ၣ်ညါ တၢ်မ့ၢ်တၢ်တီ ဘၣ်ဆၣ်​ မ့ၢ်တသးအိၣ်​ ဆီတလဲ အတၢ်အိၣ်မူဘၣ်န့ၣ်​ ပကဘၣ်မၤဒ်လဲၣ်. (ခ) စီၤဖ့လံး တကဲဝဲ စီၤပီလူး အသကိး နီၢ်ကီၢ်ဘၣ်န့ၣ်​ ပသ့ၣ်ညါဘၣ်ဒ်လဲၣ်.

^၁၉ လၢတၢ်စံၣ်တဲၤတဲလီၤ တၢ်မၤအပူၤန့ၣ်​ ဘၣ်သ့ၣ်သ့ၣ်​ ပကထံၣ်ဘၣ်ဒီး ပှၤဒ်သိးဒီး စီၤဖ့လံး. လၢအခီၣ်ထံးန့ၣ်​ ကဖျါလၢ အဝဲသ့ၣ်​ အဲၣ်ဒိးသ့ၣ်ညါ တၢ်မ့ၢ်တၢ်တီ ဘၣ်ဆၣ်​ နီၢ်ကီၢ်န့ၣ်​ အဝဲသ့ၣ်​ တအဲၣ်ဒိး မၤထွဲ ကစၢ်ယွၤ အတၢ်သိၣ်တၢ်သီ ဒီးဆီတလဲ အတၢ်အိၣ်မူဘၣ်. ပမ့ၢ်ထံၣ်ဘၣ်ဒီး ပှၤဒ်န့ၣ်န့ၣ်​ ပကဘၣ်အိၣ်ဒီး တၢ်ကူၣ်သ့. ဒီးဒ်စီၤပီလူးအသိး လၢတၢ်ကူၣ်သ့အပူၤ ပကဘၣ်တဲ အဝဲသ့ၣ်လၢ ဒ်သိးအဝဲသ့ၣ်​ ကဒိးန့ၢ်ဘၣ်​ ကစၢ်ယွၤ အတၢ်ဘၣ်သးအဂီၢ် အဝဲသ့ၣ်​ ကဘၣ်မၤဝဲဒ်လဲၣ်. ပမ့ၢ်မၤဒ်န့ၣ်န့ၣ်​ ဘၣ်သ့ၣ်သ့ၣ်​ တၢ်မ့ၢ်တၢ်တီ ကထိၣ်ဟူးထိၣ်ဂဲၤထီၣ်​ အဝဲသ့ၣ်​ လၢကသးအိၣ်​ ဆီတလဲအသး. ဘၣ်ဆၣ်​ ပမ့ၢ်သ့ၣ်ညါ လီၤတံၢ်လၢ အဝဲသ့ၣ်​ တသးအိၣ်​ ပာ်တ့ၢ်ကွံာ် တၢ်လၢယဟိဝၤယွၤ သးဟ့ဝဲတဖၣ်ဘၣ်န့ၣ်​ ပတမၢဆူၣ်အီၤလၢ ကဆီတလဲအသးဘၣ်. ဒီးပကဟးဃုက့ၤ ပှၤလၢအသးအိၣ်​ ဃုသ့ၣ်ညါ တၢ်မ့ၢ်တၢ်တီ အနီၢ်ကီၢ်တဖၣ်.

^၂၀ စီၤဖ့လံး အတၢ်ပာ်သူၣ်ပာ်သး အိၣ်ဒ်လဲၣ်န့ၣ်​ လံာ်စီဆှံ ပာ်ဖျါထီၣ်ဝဲ. လံာ်စီဆှံ တဲဝဲလၢ “ပူၤကွံာ်ခံနံၣ်​ ဝံၤအလီၢ်ခံ စီၤပီၤကံၤဖ့စတူး ထီၣ်က့ၤလၢ စီၤဖ့လံးအလီၢ်လီၤ. ဒီးမ့ၢ်လၢ စီၤဖ့လံး အဲၣ်ဒိးဝဲလၢ ပှၤယူဒၤဖိတဖၣ်​ ကဘၣ်သူၣ်ဘၣ်သးအီၤအဃိ အဝဲပာ်ဃာ် စီၤပီလူးလၢ ဃိာ်ပူၤဒံး.” (မၤတၢ် ၂၄:၂၇) စီၤဖ့လံးန့ၣ်​ အတကဲဝဲ စီၤပီလူး အသကိး နီၢ်ကီၢ်ဘၣ်. စီၤဖ့လံး သ့ၣ်ညါဝဲလၢ ပှၤလၢအပိာ် “တၢ်မ့ၢ်တၢ်တီအကျဲ” တဖၣ်န့ၣ်​ တထီဒါပဒိၣ်ဘၣ်​ ဒီးတမၢပှၤမၤ ဒ်န့ၣ်စ့ၢ်ကီးဘၣ်. (မၤတၢ် ၁၉:၂၃) ဒီးအသ့ၣ်ညါစ့ၢ်ကီးဝဲလၢ စီၤပီလူးန့ၣ်​ တမၤကမၣ်​ ရိမ့ၤအတၢ်သိၣ်တၢ်သီ နီတမံၤဘၣ်. သနာ်က့ အအဲၣ်ဒိးလၢ “ပှၤယူဒၤဖိတဖၣ်​ ကဘၣ်သူၣ်ဘၣ်သးအီၤအဃိ” အဖီၣ်ဃာ် စီၤပီလူး.

၂၁. စီၤပီၤကံၤဖ့စတူး ကဲထီၣ်ဝဲ ပဒိၣ်ဖးဒိၣ်​ ဝံၤအလီၢ်ခံ တၢ်ကဲထီၣ်အသးဒီး စီၤပီလူး ဒ်လဲၣ်​ ဒီးစီၤပီလူး ကဆဲးန့ၢ်ဘၣ်ဝဲ တၢ်ဂံၢ်တၢ်ဘါ ဖဲလဲၣ်.

^၂၁ ဒ်မၤတၢ် အဆၢဒိၣ်​ ၂၄ အဆၢဖိ အလီၢ်ခံကတၢၢ်တဆၢ ပာ်ဖျါထီၣ်ဝဲအသိး ဖဲစီၤပီၤကံၤဖ့စတူး ထီၣ်လၢ စီၤဖ့လံးအလီၢ်အခါ စီၤပီလူး ဘၣ်အိၣ်လၢ ဃိာ်ပူၤဒံး. စီၤပီလူး ဘၣ်တဲဖျါထီၣ်​ အတၢ်ဂ့ၢ်လၢ ပဒိၣ်တဖၣ်​ အမဲာ်ညါ တဂၤဝံၤတဂၤ. တၢ်မၢဖိလၢ အအိၣ်ဒီး တၢ်သးဒူတဂၤအံၤန့ၣ်​ ဘၣ်လဲၤလၢ “စီၤပၤတဖၣ်​ ဒီးပဒိၣ်ပပှၢ်တဖၣ်​ အမဲာ်ညါ.” (လူၤ ၂၁:၁၂) ဒီးပကထံၣ်ဘၣ်လၢ လၢခံန့ၣ်​ အစံၣ်တဲၤတဲလီၤဝဲ ပှၤပၢတၢ်လၢ အဒိၣ်ကတၢၢ် လၢအစိၤအခါ. စီၤပီလူး လဲၤခီဖျိဘၣ်​ တၢ်သ့ၣ်တဖၣ်အံၤ သနာ်က့ အတၢ်နာ် တလီၤစှၤ နီတဘျီဘၣ်. အဃိ ပနာ်သ့လၢ ယ့ၣ်ၡူးအတၢ်ကတိၤ လၢအမ့ၢ် “ပာ်ဆူၣ်ထီၣ်​ နသး” န့ၣ်ကဆဲးကဲထီၣ်​ တၢ်ဂံၢ်တၢ်ဘါ လၢစီၤပီလူး အဂီၢ်ဒိၣ်မး.