ပှၤဖးလံာ်ဖိတဖၣ် အတၢ်သံကွၢ်
မတဂၤ ကဂဲၤဆၢထၢၣ်သမူထီၣ်က့ၤ လၢဟီၣ်ခိၣ်ချၢလဲၣ် ဒီးတၢ်ဂဲၤဆၢထၢၣ် သမူထီၣ်က့ၤန့ၣ် ကမၤအသးဒ်လဲၣ်
ပကကွၢ်သကိး လံာ်စီဆှံတဲဝဲဒ်လဲၣ်.
မၤတၢ် ၂၄:၁၅ တဲဘၣ်ပှၤလၢ “ပှၤတီပှၤလိၤ ဒီးပှၤတတီတလိၤ လၢအသံသ့ၣ်တဖၣ် ကဂဲၤဆၢထၢၣ် သမူထီၣ်က့ၤဝဲ.” ပှၤတီပှၤလိၤန့ၣ် အကဲဝဲ ပှၤလၢအဒိကနၣ် ကစၢ်ယွၤအကလုၢ် ဒီးအဝဲသ့ၣ်အမံၤန့ၣ် အိၣ်ဝဲလၢ လံာ်တၢ်မူအပူၤ. (မၤလကံ ၃:၁၆) မ့မ့ၢ်လၢ ပှၤတတီတလိၤဘၣ်န့ၣ် အဝဲသ့ၣ်ကဲပှၤလၢ အတဒိးန့ၢ်ဘၣ် တၢ်ခွဲးတၢ်ယာ်လၢလၢပှဲၤပှဲၤ လၢကမၤလိဘၣ် ယဟိဝၤယွၤအဂ့ၢ်ဘၣ်. ဒီးအဝဲသ့ၣ်အမံၤန့ၣ် တအိၣ်လၢ လံာ်တၢ်မူအပူၤဘၣ်.
ပှၤခံဒူၣ်လၢအအိၣ်ဖဲ ယိၤဟၣ် ၅:၂၈, ၂၉ အပူၤန့ၣ် အဒ်သိးလိာ်သးဒီး ပှၤခံဒူၣ်လၢ မၤတၢ် ၂၄:၁၅ အပူၤ. ဘၣ်ဃးဒီး ပှၤလၢအကဂဲၤဆၢထၢၣ်သမူထီၣ်က့ၤတဖၣ်န့ၣ် ယ့ၣ်ၡူးတဲဝဲလၢ “ပှၤလၢ အမၤတၢ်ဂ့ၤတဖၣ်န့ၣ် ကဒိးန့ၢ်ဘၣ် တၢ်မူ ဒီးပှၤလၢ အမၤတၢ်အၢတဖၣ်န့ၣ် ကဘၣ်တၢ်စံၣ်ညီၣ်အီၤ.” ပှၤတီပှၤလိၤတဖၣ်အံၤ မ့ၢ်ဝဲပှၤလၢ အမၤတၢ်ဂ့ၤတဖၣ် တချုးလၢအဝဲသ့ၣ်သံဒံးဘၣ်အခါ. ပှၤသ့ၣ်တဖၣ်အံၤန့ၣ် ကဒိးန့ၢ်ဘၣ် တၢ်မူန့ၣ် အဲၣ်ဒိးတဲဝဲ အခီပညီလၢ အဝဲသ့ၣ်အမံၤန့ၣ် အိၣ်ဒံးဝဲလၢ လံာ်တၢ်မူအပူၤ. မ့မ့ၢ်လၢ ပှၤတတီတလိၤဘၣ်န့ၣ် အမ့ၢ်ဝဲပှၤလၢ အမၤတၢ်အၢတၢ်သီ တချုးလၢအဝဲသ့ၣ်သံဒံးဘၣ်အခါ. အဝဲသ့ၣ်ကဘၣ်တၢ်စံၣ်ညီၣ်န့ၣ် အဲၣ်ဒိးတဲဝဲလၢ အဝဲသ့ၣ်အမံၤ တအိၣ်လၢ လံာ်တၢ်မူအပူၤဒံးဘၣ် ဒီးဖဲန့ၣ်အဆၢကတီၢ် ပှၤကကွၢ်ထံဒီး သမံသမိးတၢ်လၢ အဝဲသ့ၣ်မၤဝဲတဖၣ်. အဝဲသ့ၣ်ကအိၣ်ဒီး တၢ်ခွဲးတၢ်ယာ်လၢ ကမၤလိဘၣ် ယဟိဝၤယွၤအဂ့ၢ်ဒီး ကအိၣ်ဒီးတၢ်မုၢ်လၢ်လၢ အဝဲသ့ၣ်အမံၤ ကအိၣ်ကွဲးလီၤအသးလၢ လံာ်တၢ်မူအပူၤ.
လီၣ်ဖျါ ၂၀:၁၂, ၁၃ တဲဝဲဒၣ်လၢ ပှၤကိးဂၤဒဲးလၢ အကဂဲၤဆၢထၢၣ်သမူထီၣ်က့ၤန့ၣ် ကဘၣ်ဒိကနၣ် “တၢ်ကွဲးအသးတဖၣ်လၢ အအိၣ်ဝဲလၢ လံာ်ထူတဖၣ်အပူၤ” လၢအကဲဝဲ တၢ်သိၣ်တၢ်သီအသီလၢ ကစၢ်ယွၤကဟ့ၣ်လီၤပှၤ လၢဟီၣ်ခိၣ်သီအပူၤ. ဘၣ်ဆၣ် ပှၤလၢအတဒိကနၣ်တၢ်ဘၣ်တဖၣ်န့ၣ် ကစၢ်ယွၤကမၤဟးဂီၤကွံာ်အဝဲသ့ၣ်.—ယၡါယၤ ၆၅:၂၀.
ဒၤနံးယ့လး ၁၂:၂ တဲဆိပာ်စၢၤဝဲလၢ ပှၤလၢအသံတဖၣ်န့ၣ် ကဂဲၤဆၢထၢၣ်သမူထီၣ်က့ၤဝဲ ဒီးတနီၤန့ၣ် “ကဒိးန့ၢ်ဘၣ် တၢ်မူအထူအယိာ် ဒီးအဂၤတနီၤန့ၣ် ကဘၣ်တၢ်ဒုၣ်ဒွဲၣ်အီၤ ဒီးကဒိးန့ၢ်ဘၣ် တၢ်မဲာ်ဆှး လီၤထူလီၤယိာ်.” လံာ်စီဆှံတဆၢအံၤ အဲၣ်ဒိးတဲဝဲ ဘၣ်ဃးဒီး တၢ်စံၣ်ညီၣ် လၢအလီၢ်ခံကတၢၢ် လၢပှၤဂဲၤဆၢထၢၣ်သမူထီၣ်က့ၤတဖၣ် ကဒိးန့ၢ်ဘၣ်ဝဲ. ပှၤတနီၤန့ၣ် ကဒိးန့ၢ်ဘၣ် “တၢ်မူအထူအယိာ်” ဒီးအဂၤတနီၤန့ၣ် ကဒိးန့ၢ်ဘၣ် “တၢ်မဲာ်ဆှး လီၤထူလီၤယိာ်.” အဃိ ဖဲအနံၣ် ၁,၀၀၀ ဝံၤဝဲန့ၣ် ပှၤတနီၤကဒိးန့ၢ်ဘၣ် တၢ်မူအထူအယိာ် ဒီးအဂၤတနီၤ ကဘၣ်တၢ်မၤဟးဂီၤအီၤ လီၤထူလီၤယိာ်.—လီၣ်ဖျါ ၂၀:၁၅; ၂၁:၃, ၄.
ပှၤလၢကဂဲၤဆၢထၢၣ် သမူထီၣ်က့ၤတဖၣ်န့ၣ် အတၢ်အိၣ်သးလီၤဂာ်ဒ်သိး ပှၤလၢအကလဲၤအိၣ်လၢ ထံကီၢ်အသီ ဒ်ပှၤထံဂၤကီၢ်ဂၤဖိအသိး. ပှၤတီပှၤလိၤတဖၣ်န့ၣ် လီၤဂာ်ဒ်ပှၤထံဂၤကီၢ်ဂၤဖိလၢ အဒိးန့ၢ်ဘၣ် တၢ်မၤအဘံၤစၤ (work visa) လၢအအိၣ်ဒီး တၢ်သဘျ့ဖဲအကြၢး. မ့မ့ၢ် ပှၤတတီတလိၤတဖၣ်န့ၣ် အလီၤဂာ်ဒ်ပှၤထံဂၤကီၢ်ဂၤဖိလၢ အဒိးန့ၢ်ဘၣ် တၢ်ဟးကသုၣ်ကသီအဘံၤစၤ (visitor’s visa) လၢအကအိၣ်ဘၣ်ဖဲ ထံကီၢ်အသီတဘ့ၣ်န့ၣ် ထဲတစိၢ်တလီၢ်. ပှၤထံဂၤကီၢ်ဂၤဖိတဖၣ်အံၤ ဒ်သိးအဝဲသ့ၣ်ဆဲးအိၣ်လၢ ထံကီၢ်အသီတဘ့ၣ်အံၤ အပူၤကသ့အဂီၢ် အဝဲသ့ၣ်ကဘၣ်ဒိကနၣ်ဝဲ ထံကီၢ်အသီတဘ့ၣ်န့ၣ် အတၢ်သိၣ်တၢ်သီ. ဒ်န့ၣ်အသိး ပှၤတတီတလိၤလၢ အသမူထီၣ်က့ၤတဖၣ်န့ၣ် ဒ်သိးအဝဲသ့ၣ် ကဆဲးအိၣ်မူဘၣ်လၢ ပၤရဒံစူးအပူၤအဂီၢ် အဝဲသ့ၣ်ကဘၣ် ဒိကနၣ်ဒီးမၤထွဲ ယဟိဝၤယွၤ အတၢ်သိၣ်တၢ်သီ ဒီးပာ်ဖျါထီၣ်ဝဲလၢ အမ့ၢ်ပှၤတီပှၤလိၤ. လၢအခီၣ်ထံးခါ ပှၤထံဂၤကီၢ်ဂၤဖိတဖၣ်အံၤ အဝဲသ့ၣ်မ့ၢ်ဒိးန့ၢ်ဘၣ် ဘံၤစၤ ဒ်လဲၣ်ဂ့ၤဒ်လဲၣ်ဂ့ၤ ဒ်သိးအဝဲသ့ၣ်ကကဲထီၣ် ပှၤထံဖိကီၢ်ဖိအဂီၢ် အဝဲသ့ၣ်ကဘၣ်ဒိကနၣ်ဝဲ ထံကီၢ်အတၢ်သိၣ်တၢ်သီ မ့တမ့ၢ်ဘၣ်န့ၣ် အဝဲသ့ၣ်အိၣ်လၢ ထံကီၢ်အဝဲန့ၣ်အပူၤ တသ့လၢၤဘၣ်. အဃိ အဝဲသ့ၣ်ကကဲထီၣ် ထံဖိကီၢ်ဖိဧါ တကဲထီၣ်ဧါန့ၣ် ဒိးသန့ၤထီၣ်သးလၢ တၢ်လၢအဝဲသ့ၣ်မၤဝဲလၢ ထံကီၢ်အသီတဘ့ၣ်န့ၣ်အပူၤ. ဒ်န့ၣ်အသိးပှၤလၢ အဂဲၤဆၢထၢၣ်သမူထီၣ်က့ၤတဖၣ် ကဆဲးအိၣ်ဘၣ်လၢ ဟီၣ်ခိၣ်ပၤရဒံစူးအပူၤဧါ တအိၣ်ဘၣ်ဧါန့ၣ် ဒိးသန့ၤထီၣ်သးလၢ အဝဲသ့ၣ်အတၢ်သးတီ ဒီးတၢ်လၢအမၤဝဲ လၢဟီၣ်ခိၣ်သီအပူၤ.
ယဟိဝၤယွၤန့ၣ် အအိၣ်ဒီးတၢ်အဲၣ်တၢ်ကွံ တကးဒံးဘၣ် အဝဲစံၣ်ညီၣ်တၢ် တီတီလိၤလိၤ. (၅ မိၤၡ့ ၃၂:၄; စံးထီၣ်ပတြၢၤ ၃၃:၅) အဃိ အဝဲကပာ်ဖျါထီၣ် တၢ်အဲၣ်ခီဖျိ အမၤသမူထီၣ်က့ၤပှၤတီပှၤလိၤ ဒီးပှၤတတီတလိၤတဖၣ်. ဒီးအဝဲအဲၣ်ဒိးဝဲလၢ ပှၤကဒိကနၣ် အတၢ်သိၣ်တၢ်သီလၢ အဘၣ်ဃးဒီး တၢ်အဘၣ်ဒီးတၢ်အကမၣ်. ထဲဒၣ်ပှၤလၢ အအဲၣ်အီၤဒီးအအိၣ်မူဒ် အတၢ်သိၣ်တၢ်သီအသိးန့ၣ် ကအိၣ်ဒီးတၢ်ခွဲးတၢ်ယာ်လၢ ကအိၣ်မူဘၣ်လၢ ဟီၣ်ခိၣ်သီအပူၤ.