တၢ်ဘူၣ်တၢ်ဘါကမၣ် ဒုးအိၣ်ထီၣ် တၢ်ထံၣ်ကမၣ် ဘၣ်ဃးဒီး ကစၢ်ယွၤဒ်လဲၣ်

ကစၢ်ယွၤန့ၣ် မ့ၢ်ဝဲ တၢ်အဲၣ်တၢ်ကွံကစၢ် ဘၣ်ဆၣ် တၢ်ဘူၣ်တၢ်ဘါခိၣ်နၢ်လၢ အတဲလီၤအသး လၢအမၤန့ၢ်တၢ် ဒီးတဲန့ၢ်တၢ်လၢ ကစၢ်ယွၤအဂီၢ်န့ၣ် မၤဝဲတၢ်အၢတၢ်သီ အါမး. ဘၣ်မနုၤအဃိ ပတဲဒ်န့ၣ်လဲၣ်. ပမ့ၢ်ဘၣ်တဲလိၤလိၤန့ၣ် တၢ်ဘူၣ်တၢ်ဘါတဖၣ်အံၤ မ့ၢ်ဝဲ တၢ်ဘူၣ်တၢ်ဘါလၢ အကမၣ်. တၢ်လၢအဝဲသ့ၣ် တဲဝဲဒီးမၤဝဲန့ၣ် ဒုးဆိကမိၣ်ကမၣ်ပှၤဂၤ လၢကစၢ်ယွၤအဂ့ၢ်. အဝဲသ့ၣ် ဒုးအိၣ်ထီၣ် တၢ်ထံၣ်ကမၣ် ဘၣ်ဃးဒီး ကစၢ်ယွၤဒ်လဲၣ်. ဘၣ်ဃးဒီး တၢ်ထံၣ်ကမၣ်တဖၣ်န့ၣ် ကစၢ်ယွၤ တူၢ်ဘၣ်ဝဲဒ်လဲၣ်. ဒီးခါဆူညါန့ၣ် ကစၢ်ယွၤ ကမၤဝဲဒ်လဲၣ်.

၁. တၢ်ဘူၣ်တၢ်ဘါကမၣ် အခိၣ်အနၢ်တဖၣ် သိၣ်လိကမၣ် ကစၢ်ယွၤအဂ့ၢ်ဒ်လဲၣ်.

တၢ်မ့ၢ်တၢ်တီ လၢအဘၣ်ဃးဒီး ကစၢ်ယွၤအဂ့ၢ်န့ၣ် တၢ်ဘူၣ်တၢ်ဘါကမၣ် အခိၣ်အနၢ်တဖၣ် “ခီလဲဝဲဒီး တၢ်လံၣ်တၢ်လီလီၤ.” (ရိမ့ၤ ၁:၂၅) အဒိ တၢ်ဘူၣ်တၢ်ဘါ အါတက့ၢ်န့ၣ် တသိၣ်လိ အတၢ်အိၣ်ဖှိၣ်ဖိတဖၣ် လၢကစၢ်ယွၤအမံၤဘၣ်. ဘၣ်ဆၣ် လံာ်စီဆှံတဲဝဲလၢ ပှၤကဘၣ်ကိးထီၣ် ကစၢ်ယွၤအမံၤ. (ရိမ့ၤ ၁၀:​၁၃, ၁၄) တကးဒံးဘၣ် တၢ်ဘူၣ်တၢ်ဘါခိၣ်နၢ် တနီၤန့ၣ် တဲဝဲလၢ ဖဲတၢ်အၢတၢ်သီ အိၣ်ထီၣ်အခါ အကဲဝဲ ကစၢ်ယွၤအတၢ်ဘၣ်သး. ဘၣ်ဆၣ် တၢ်လၢအဝဲသ့ၣ် တဲဝဲန့ၣ် ကဲဝဲတၢ်လံၣ်တၢ်လီလီၤ. ကစၢ်ယွၤန့ၣ် တဒုးအိၣ်ထီၣ် တၢ်အၢတၢ်သီ နီတဘျီဘၣ်. (ဖး ယၤကိာ် ၁:၁၃.) အဃိ ပထံၣ်ဘၣ်လၢ တၢ်ဘူၣ်တၢ်ဘါကမၣ် အတၢ်သိၣ်လိတဖၣ်န့ၣ် မၤယံၤထီၣ်ပှၤဂၤဒီး ကစၢ်ယွၤ.

၂. ခီဖျိလၢ တၢ်လၢ တၢ်ဘူၣ်တၢ်ဘါကမၣ် အခိၣ်အနၢ်တဖၣ် မၤဝဲအဃိ ပှၤတနီၤထံၣ်ကမၣ် ကစၢ်ယွၤဒ်လဲၣ်.

တၢ်ဘူၣ်တၢ်ဘါကမၣ် အခိၣ်အနၢ်တဖၣ်န့ၣ် တသးအိၣ်ပှၤဂၤ ဒ်ယဟိဝၤယွၤအသိးဘၣ်. လံာ်စီဆှံတဲဝဲလၢ တၢ်ဘူၣ်တၢ်ဘါခိၣ်နၢ်တဖၣ်န့ၣ် “အတၢ်ဒဲးဘး ပာ်ဖှိၣ်ထီၣ်အသး ထီဝဲတုၤလၢမူခိၣ်.” (လီၣ်ဖျါ ၁၈:၅) လၢအနံၣ်လၢ အကယၤတဖၣ်အတီၢ်ပူၤ တၢ်ဘူၣ်တၢ်ဘါခိၣ်နၢ်တဖၣ်န့ၣ် မၤဘၣ်ဃးအသးဒီး ထံဂ့ၢ်ကီၢ်ဂ့ၢ် ဒီးဆီၣ်ထွဲဝဲ တၢ်ဒုးတၢ်ယၤအဃိ ပှၤသံဝဲ အါအါဂီၢ်ဂီၢ်. တကးဒံးဘၣ် တၢ်ဘူၣ်တၢ်ဘါခိၣ်နၢ် တနီၤန့ၣ် အဝဲသ့ၣ် အဲၣ်ဒိးကဲဒိၣ်အဃိ အဝဲသ့ၣ်မၢဝဲ အတၢ်အိၣ်ဖှိၣ်ဖိတဖၣ် ဟ့ၣ်အဝဲသ့ၣ်လၢကျိၣ်စ့. တၢ်လၢ အဝဲသ့ၣ်မၤဝဲတဖၣ်န့ၣ် ပာ်ဖျါထီၣ်ဝဲလၢ အဝဲသ့ၣ် တသ့ၣ်ညါကစၢ်ယွၤဘၣ် အဃိ အဝဲသ့ၣ် တကြၢးတဲလီၤအသးလၢ အမၤန့ၢ်တၢ်လၢ ကစၢ်ယွၤအဂီၢ်ဘၣ်.​—ဖး ၁ ယိၤဟၣ် ၄:၈.

၃. ဘၣ်ဃးဒီး တၢ်ဘူၣ်တၢ်ဘါ လၢအကမၣ်န့ၣ် ကစၢ်ယွၤထံၣ်ဝဲဒ်လဲၣ်.

တၢ်လၢတၢ်ဘူၣ်တၢ်ဘါကမၣ် အခိၣ်အနၢ်တဖၣ်မၤဝဲ မ့ၢ်မၤသးထီၣ်နၤန့ၣ် နဆိကမိၣ် ယဟိဝၤယွၤမီၤ အကတူၢ်ဘၣ်ဝဲဒ်လဲၣ်. ကစၢ်ယွၤန့ၣ် အဲၣ်ပှၤဟီၣ်ခိၣ်ဖိ အဃိ တၢ်ဘူၣ်တၢ်ဘါခိၣ်နၢ် လၢအဒုးအိၣ်ထီၣ် တၢ်ထံၣ်ကမၣ် ဘၣ်ဃးဒီး ကစၢ်ယွၤအဂ့ၢ် ဒီးအတရ့ဒီး အတၢ်အိၣ်ဖှိၣ်ဖိ ဂ့ၤဂ့ၤဘၣ်န့ၣ် ကစၢ်ယွၤ သးထီၣ်အဝဲသ့ၣ်. ဒီးကစၢ်ယွၤ အၢၣ်လီၤဝဲလၢ တၢ်ဘူၣ်တၢ်ဘါကမၣ်န့ၣ် ကဘၣ်တၢ်မၤဟးဂီၤကွံာ်အီၤ “ဒီးပှၤတထံၣ်န့ၢ်အီၤ နီတဘျီလၢၤဘၣ်.” (လီၣ်ဖျါ ၁၈:၂၁) တယံာ်လၢၤဘၣ်န့ၣ် ကစၢ်ယွၤ ကမၤဟးဂီၤကွံာ် တၢ်ဘူၣ်တၢ်ဘါကမၣ်ခဲလၢာ်.​—လီၣ်ဖျါ ၁၈:၈.

ဃုသ့ၣ်ညါအါထီၣ်

၄. ကစၢ်ယွၤ တတူၢ်လိာ် တၢ်ဘူၣ်တၢ်ဘါခဲလၢာ်ဘၣ်

ပှၤအါဂၤနာ်ဝဲလၢ အမ့ၢ်အိၣ်လၢ တၢ်ဘူၣ်တၢ်ဘါ တခါဂ့ၤတခါဂ့ၤန့ၣ် အရ့တဒိၣ်ဘၣ်. ဒီးအဝဲသ့ၣ်နာ်ဝဲလၢ တၢ်ဘူၣ်တၢ်ဘါသ့ၣ်တဖၣ်န့ၣ် လီၤဂာ်ဒ်ကျဲအါဘိ လၢအကဆှၢပှၤဆူ ကစၢ်ယွၤအအိၣ်. ဘၣ်ဆၣ် အဝဲသ့ၣ် အတၢ်ဆိကမိၣ်န့ၣ် အဘၣ်ဧါ. ဖး မးသဲ ၇:​၁၃, ၁၄ ဝံၤဒီး တဲသကိး တၢ်သံကွၢ် လၢလာ် တဖျၢၣ်အံၤ–

• ဘၣ်ဃးဒီး ကျဲလၢ အကဆှၢပှၤဆူ တၢ်မူန့ၣ် လံာ်စီဆှံတဲဝဲဒ်လဲၣ်.

ကွၢ်တၢ်ဂီၤမူ ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ.

တၢ်ဂီၤမူ– မ့ၢ်ကစၢ်ယွၤ တူၢ်လိာ် တၢ်ဘူၣ်တၢ်ဘါခဲလၢာ်ဧါ​—တၢ်ဂီၤမူဖုၣ်ကိာ် (၃:၂၂)

• မ့ၢ်လံာ်စီဆှံတဲဝဲလၢ ကစၢ်ယွၤတူၢ်လိာ် တၢ်ဘူၣ်တၢ်ဘါခဲလၢာ်ဧါ.

၅. တၢ်ဘူၣ်တၢ်ဘါကမၣ် အခိၣ်အနၢ်တဖၣ် တပာ်ဖျါထီၣ် တၢ်အဲၣ်ဒ်သိးဒီး ကစၢ်ယွၤဘၣ်

တၢ်ဘူၣ်တၢ်ဘါကမၣ် အခိၣ်အနၢ်တဖၣ်န့ၣ် ဒုးအိၣ်ထီၣ် တၢ်ထံၣ်ကမၣ် ဘၣ်ဃးဒီး ကစၢ်ယွၤအဂ့ၢ်အါမး. အဒိ အဝဲသ့ၣ်ဆီၣ်ထွဲ တၢ်ဒုးတၢ်ယၤအဃိ ပှၤထံၣ်ကမၣ်ကစၢ်ယွၤ. နကထံၣ်ဘၣ် အဒိတခါအဂီၢ် ကွၢ်တၢ်ဂီၤမူ. ဝံၤဒီး တဲသကိး တၢ်သံကွၢ် လၢလာ်တဖၣ်အံၤ.

တၢ်ဂီၤမူ– တၢ်လၢ တၢ်ဘူၣ်တၢ်ဘါခိၣ်နၢ် တဖၣ်မၤဝဲ ဖဲဟီၣ်ခိၣ်တၢ်ဒုး ခံဘျီတဘျီ (၂:၂၂)

• ဖဲဟီၣ်ခိၣ်တၢ်ဒုး ခံဘျီတဘျီအခါန့ၣ် တၢ်ဘူၣ်တၢ်ဘါ ခိၣ်နၢ်တဖၣ် မၤဝဲမနုၤလဲၣ်.

• အဝဲသ့ၣ် မၤဝဲဒ်န့ၣ်န့ၣ် နတူၢ်ဘၣ်ဒ်လဲၣ်.

ဖး ယိၤဟၣ် ၁၃:​၃၄, ၃၅ ဒီး ၁၇:၁၆. ဝံၤဒီး တဲသကိး တၢ်သံကွၢ် လၢလာ်တဖၣ်အံၤ–

• ဖဲတၢ်ဘူၣ်တၢ်ဘါခိၣ်နၢ်တဖၣ် ဆီၣ်ထွဲဝဲ တၢ်ဒုးတၢ်ယၤအခါ နဆိကမိၣ် ကစၢ်ယွၤ ကသးခုဧါ.

• ခီဖျိလၢ တၢ်ဘူၣ်တၢ်ဘါကမၣ်အဃိ တၢ်အၢတၢ်သီ ဟဲအိၣ်ထီၣ်အါမး. တၢ်ဘူၣ်တၢ်ဘါကမၣ် အခိၣ်အနၢ်တဖၣ် တပာ်ဖျါထီၣ်တၢ်အဲၣ် ဒ်သိးဒီး ယဟိဝၤယွၤဘၣ်န့ၣ် နထံၣ်ဘၣ်တဘျီဘျီဧါ. ဟ့ၣ်တၢ်အဒိ.

၆. ကစၢ်ယွၤ အဲၣ်ဒိးမၤစၢၤ ပှၤဟီၣ်ခိၣ်ဖိ ဒ်သိးအဝဲသ့ၣ် ကဟးထီၣ်ကွံာ်လၢ တၢ်ဘူၣ်တၢ်ဘါကမၣ်အပူၤ

ဖး လီၣ်ဖျါ ၁၈:၄a ဝံၤဒီး တဲသကိး တၢ်သံကွၢ် လၢလာ်တဖျၢၣ်အံၤ–

• နသ့ၣ်ညါဘၣ်လၢ ကစၢ်ယွၤ အဲၣ်ဒိးမၤစၢၤ ပှၤဟီၣ်ခိၣ်ဖိ ဒ်သိးအဝဲသ့ၣ် ကထူၣ်ဖျဲးထီၣ်ကွံာ် လၢတၢ်ဘူၣ်တၢ်ဘါကမၣ် အခိၣ်အနၢ်တဖၣ် အတၢ်လံၣ်န့ၢ်လီန့ၢ်အဃိ နသးခုဧါ.

၇. ဆဲးမၤလိ ဘၣ်ဃးဒီး ကစၢ်ယွၤ အမ့ၢ်အတီတဂၤ အဂ့ၢ်

ခီဖျိ တၢ်လၢ တၢ်ဘူၣ်တၢ်ဘါကမၣ် မၤဝဲတဖၣ်အဃိ မ့ၢ်နကြၢးထံၣ်ကမၣ် ကစၢ်ယွၤဧါ. ပကကွၢ်သကိး တၢ်အဒိတခါ. ဆိကမိၣ်ကွၢ်လၢ ဖိခွါတဂၤ တအဲၣ်ဒိးဒိကနၣ် အပါအကလုၢ်ဘၣ် အဃိ အဟးထီၣ်ကွံာ်လၢအဟံၣ် ဒီးအမၤတၢ်အၢတၢ်သီအါမး. တၢ်လၢ ဖိခွါလၢအထီဒါက့ၤတၢ်တဂၤအံၤ မၤဝဲန့ၣ် အပါတဘၣ်သးဝဲဘၣ်. အဃိန့ၣ် ပပာ်တၢ်ကမၣ် လၢအပါ အလိၤသ့ဧါ.

• ခီဖျိ တၢ်လၢ တၢ်ဘူၣ်တၢ်ဘါကမၣ် မၤဝဲတဖၣ်အဃိ မ့ၢ်နကပာ်တၢ်ကမၣ် လၢယဟိဝၤယွၤအလိၤ ဒီးတဆဲးမၤလိ အဂ့ၢ်လၢၤဘၣ်ဧါ.

တၢ်ဂ့ၢ်လၢအရ့ဒိၣ်

တၢ်ဘူၣ်တၢ်ဘါကမၣ် အခိၣ်အနၢ်တဖၣ်န့ၣ် ဒုးအိၣ်ထီၣ်တၢ်ထံၣ်ကမၣ် ဘၣ်ဃးဒီး ကစၢ်ယွၤ ခီဖျိ အဝဲသ့ၣ် အတၢ်သိၣ်လိ လၢအကမၣ် ဒီးအဝဲသ့ၣ် အတၢ်မၤ လၢအတဂ့ၤဘၣ်တဖၣ်. အဃိ ကစၢ်ယွၤ ကမၤ ဟးဂီၤကွံာ် တၢ်ဘူၣ်တၢ်ဘါကမၣ်.

တၢ်ကွၢ်ကဒါက့ၤ

• ဘၣ်ဃးဒီး တၢ်လၢ တၢ်ဘူၣ်တၢ်ဘါကမၣ် အခိၣ်အနၢ်တဖၣ် သိၣ်လိဝဲ ဒီးမၤဝဲန့ၣ် နတူၢ်ဘၣ်ဒ်လဲၣ်.

• ဘၣ်ဃးဒီး တၢ်ဘူၣ်တၢ်ဘါကမၣ်န့ၣ် ယဟိဝၤယွၤ တူၢ်ဘၣ်ဝဲဒ်လဲၣ်.

• တၢ်ဘူၣ်တၢ်ဘါကမၣ်တဖၣ်န့ၣ် ကစၢ်ယွၤ ကမၤအီၤဒ်လဲၣ်.

ဃုသ့ၣ်ညါ

ပကတဲသကိး တၢ်ဂ့ၢ်ခံထံၣ် လၢအပာ်ဖျါထီၣ်ဝဲလၢ ဘၣ်မနုၤအဃိ ကစၢ်ယွၤ တဘၣ်သူၣ်ဘၣ်သး တၢ်ဘူၣ်တၢ်ဘါခဲလၢာ်ဘၣ်လဲၣ်.

“တၢ်ဘူၣ်တၢ်ဘါခဲလၢာ်န့ၣ် မ့ၢ်အဒ်သိးလိာ်သးဧါ. ဒီးကစၢ်ယွၤ တူၢ်လိာ်ဝဲခဲလၢာ်ဧါ” (တၢ်မၤလိလၢ အအိၣ်လၢ online အဖီခိၣ်)

ဘၣ်မနုၤအဃိ ယဟိဝၤယွၤ အဲၣ်ဒိးဝဲလၢ ပကဘူၣ်ထီၣ်ဘါထီၣ်အီၤ တပူၤဃီဃုာ်ဒီး ပှၤလၢ အဘူၣ်ထီၣ်ဘါထီၣ်အီၤတဖၣ်လဲၣ်.

“မ့ၢ်ပကဘၣ်အိၣ်လၢ တၢ်ဘူၣ်တၢ်ဘါ အတၢ်ကရၢကရိတခါအပူၤဧါ” (တၢ်မၤလိလၢ အအိၣ်လၢ online အဖီခိၣ်)

တၢ်အိၣ်ဖှိၣ်သရၣ်တဂၤ အသးဟးဂီၤ လၢအတၢ်ဘူၣ်တၢ်ဘါအဃိ. သနာ်က့ အဝဲဆဲးမၤလိ တၢ်မ့ၢ်တၢ်တီ ဘၣ်ဃးဒီး ကစၢ်ယွၤအဂ့ၢ်.

“ဘၣ်မနုၤအဃိ တၢ်အိၣ်ဖှိၣ် သရၣ်တဂၤ ဟးထီၣ်ကွံာ်လၢ အတၢ်ဘူၣ်တၢ်ဘါအပူၤလဲၣ်” (ပၢၢ်ထီၣ်! လါဖ့ၤဘြူၤအါရံၤ ၂၀၁၅)

လၢအနံၣ် လၢအကယၤတဖၣ်အတီၢ်ပူၤ တၢ်ဘူၣ်တၢ်ဘါကမၣ် အခိၣ်အနၢ်တဖၣ် သိၣ်လိပှၤဂၤလၢ ကစၢ်ယွၤန့ၣ် တသူၣ်အိၣ်သးအိၣ်ပှၤဘၣ် ဒီးအဝဲကဲ ပှၤလၢအအၢအသီ. ဃုသ့ၣ်ညါကွၢ် တၢ်မ့ၢ်တၢ်တီဘၣ်ဃးဒီး တၢ်လံၣ်တၢ်လီသၢခါအံၤအဂ့ၢ်.

“တၢ်လံၣ်တၢ်လီလၢ အမၤယံၤထီၣ် ပှၤဒီး ကစၢ်ယွၤ” (တၢးထီခိးတၢ်, လါနိၣ်ဝ့ဘၢၣ် ၁, ၂၀၁၃)